Avian influenza in Arctic and Northern Canada (Inuktitut)

ᑎᖕᒥᐊᑦ ᐋᓐᓂᐊᖓ ᐊᐃᑦᑐᖅᓯᓲᖅ ᐆᑎᕐᓇᖅ ᐋᓐᓂᐊᓇᖅᑐᑦ ᕿᓚᒥᑯᓗᒃ ᐊᐃᑦᑐᕐᓗᐃᔪᓐᓇᖅᑐᑦ ᐊᓯᒥᖕᓄᑦ ᑎᖕᒥᐊᓄᑦ ᐊᒻᒪᓗ ᐱᑕᖃᓲᖑᖕᒥᔪᑦ ᓇᖕᒥᓂᖅ ᐱᕈᖅᑎᑕᒐᕐᓂᑦ ᐊᕿᒡᒋᕐᔪᐊᓂᑦ ᐊᒻᒪᓗ ᓄᓇᒥᐅᑕᓂ ᑎᖕᒥᐊᓂ, ᑖᒃᑯᓇᓂᓗ ᑲᖑᖅ, ᓂᕐᓕᑦ, ᖁᕐᔪᒃ, ᓇᐅᔭᐃᑦ, ᐃᒥᖁᑕᐃᓚᐃᑦᒪ ᓯᒡᔭᕆᐊᕐᔪᐃᑦ, ᑕᑎᒐᕐᔪᐊᖅ, ᐊᒻᒪᓗ ᓂᕿᑐᓲᑦ ᑎᖕᒥᐊᑦ. ᑎᖕᒥᐊᑦ ᐋᓐᓂᐊᖓ ᐊᐃᑦᑐᖅᓯᓲᖅ ᐆᑎᕐᓇᖅ ᐅᑯᐊᑦᑕᐅᖅ ᐊᐃᑦᑐᐃᔪᓐᓇᖅᑐᑦ ᓄᓇᒥ ᐊᒻᒪᓗ ᓄᓇᓕᖕᓂ ᓂᕐᔪᑎᓂᒃ, ᐱᓗᐊᖅᑐᒥᒃ ᑕᒪᒃᑯᐊ ᑎᖕᒥᐊᕋᓱᓲᑦ, ᑐᖁᖓᔪᖅᑐᓲᑦ, ᐅᕝᕙᓘᓐᓃᑦ ᓂᕆᒍᑎᒃ ᐋᓐᓂᐊᓕᖕᓂᒃ ᑎᖕᒥᐊᓂᒃ ᑖᔅᓱᓂᐊ ᑎᖕᒥᐊᑦ ᐋᓐᓂᐊᖓ ᐊᐃᑦᑐᖅᓯᓲᖅ ᐆᑎᕐᓇᖅ.ᑎᖕᒥᐊᓄᑦ ᖃᓂᒪᓇᖅᑐᖅ ᑲᓇᑕᒥ .

• ᑎᑎᕋᖅᓯᒪᔪᑦ

  ᐸᓃᒃ: ᒪᕐᕈᒃᑲᓐᓃᒃ ᐊᑖᑕᒃ, ᓈᒻᒪᒃᓯᖅᑰᖅᑐᑦ ᐊᕙᑎᓂᒃ ᐱᑭᐅᓐᓇᒪ ᓈᒻᒪᒃᓯᖅᑰᖅᐳᑦ ᐊᓈᓇᓐᓄᑦ ᓂᖏᐅᓐᓄᑦ ᐊᑦᑕᓐᓄᓪᓗ ᓲᒧᑦ

  ᐊᑖᑕᒃ: ᐱᓕᕆᑦᑎᐊᖅᑐᒻᒪᕆᐅᕗᑎᑦ, ᑲᖑᖅᑐᕐᓂᐊᓕᖅᑐᒍᑦ ᐅᓐᓄᒍᒻᒥᑕᕐᓇᒥ. ᐅᒥᐊᒧᙵᐅᓕᕐᓗᒃ, ᐅᓕᑉᐸᓪᓕᐊᓕᑉᒪᑦ

  ᐸᓃᒃ: ᐊᑖᑕᒃ ᐃᓕᓴᐃᔨᒐ ᐅᖃᓚᐅᖅᑐᖅ ᑎᖕᒥᐊᒡᒎᖅ ᐋᓐᓂᐊᓕᓲᖑᔪᑦ. ᓱᓕᕙ?

  ᐊᑖᑕᒃ: ᐄ, ᑎᖕᒥᐊᑦ ᐋᓐᓂᐊᓕᕈᓐᓇᖅᑐᑦ ᐸᓂᒃ. ᑕᑯᓯᒪᔪᒍᑦ ᑎᖕᒥᐊᓂᒃ ᐋᓐᓂᐊᖅᑐᓂᒃ ᓄᓇᒥ ᐱᓇᓱᓲᕆᙱᑕᕗᑦ ᑕᐃᒃᑯᐊ.

  ᐸᓃᒃ: ᒥᓯᔅ ᐸᕐᑕᓂᐅᑉ ᐅᖃᓪᓚᒡᕕᒋᓚᐅᖅᑖᑎᒍᑦ ᑎᖕᒥᐊᑦ ᓄᕙᓂᖓᓂᒃ ᐅᖃᖅᖢᓂᓗ ᐃᓄᐃᑦᑕᐅᕉᖅ ᑕᐃᔅᓱᒥᖓ ᓄᕙᓕᕈᓐᓇᕐᒥᔪᑦ. ᐅᖃᓚᐅᕐᒥᔪᖅ ᑎᖕᒥᐊᑦ ᓄᕙᖕᓂᖓᒎᖅ ᑕᕝᕙᐅᑎᓪᓗᒍ ᐊᒥᓱᐊᓗᐃᒡᒎᖅ ᐊᑕᐅᑦᑎᒃᑯᑦ ᐋᓐᓂᐊᓕᓲᖑᔪᑦ.

  ᐊᑖᑕᒃ: ᐄᖑᑐᐃᓐᓇᕆᐊᓕᒃ, ᖃᐅᔨᒪᙱᑦᑐᖓ ᑕᐃᒪᓐᓇᐅᓂᖓᓂᒃ. ᐊᒃᑲᒐ ᐲᑕ ᐅᖃᓚᐅᖅᑐᖅ ᑕᑯᓚᐅᕐᓂᕋᖅᖢᓂ ᑲᖑᕐᓂᒃ ᐋᓐᓂᐊᖅᑰᔨᔪᓂᒃ. ᐃᒪᓐᓇ ᐱᓂᐊᓕᖅᐳᒍᒃ, ᐸᐅᓗᓯ ᐆᒪᔪᕐᓂᐊᖅᑎ ᑕᑯᔭᖅᑐᕐᓂᐊᓕᖅᐸᕗᒃ ᐊᐱᕆᓂᐊᕋᑦᑎᒃᑯᒃ.

  ᐊᒃᑲ ᐲᑕ: ᐄ, ᖃᐅᔨᓴᖅᑐᓕᕆᔨᓂᑦ ᑕᐃᔭᐅᔪᖅ ᑎᖕᒥᐊᑦ ᓄᕙᖕᓂᖓᐅᓂᕋᖅᑕᐅᓪᓗᓂ. ᑕᑯᒐᔪᙱᑕᕗᑦ ᑕᒫᓂ ᑭᓯᐊᓂ ᑎᖕᒥᐊᑦ ᐃᓚᖏᓐᓃᑐᐃᓐᓇᕆᐊᓕᒃ, ᑭᓯᐊᓂᑦᑕᐅᖅ ᑎᖕᒥᐊᑦ ᑖᔅᓱᒥᖓ ᐋᓐᓂᐊᓕᐅᒐᓗᐊᑦ ᐋᓐᓂᐊᖅᑰᔨᓲᖑᙱᒻᒪᑕ

  ᐸᓃᒃ: ᖃᓄᕐᓕ ᖃᐅᔨᔪᓐᓇᖅᐱᑕ ᓇᓕᐊᒃ ᐋᓐᓂᐊᖃᕐᒪᖔᑕ

  ᐊᒃᑲ ᐲᑕ: ᑕᑯᑐᐃᓐᓇᕆᐊᖃᖅᑐᓯ ᑎᖕᒥᐊᓂᒃ ᑐᖁᖓᔪᓂᒃ ᓄᓇᒥ ᐃᓚᖏᓪᓗ ᐋᓐᓂᐊᖅᑰᔨᔪᓂᒃ ᑕᑯᒍᑦᑕ ᐱᓇᓱᒋᐊᖃᙱᑕᕗᑦ. ᑎᖕᒥᐊᑦ ᐋᓐᓂᐊᓖᑦ ᑲᑉᐱᐊᓱᖅᑰᔨᑐᐃᓐᓇᕆᐊᓖᑦ, ᐃᕿᐊᓱᖅᑰᔨᓗᑎᒡᓘᓐᓃᑦ, ᐅᕐᕉᔮᕐᓗᑎᒡᓗ, ᓴᔪᑐᐃᓐᓇᕆᐊᖃᕐᒥᔪᑦ ᐳᕕᓐᓂᖃᕈᓐᓇᖅᖢᑎᒡᓗ ᓂᐊᖁᕐᒥᒍᑦ, ᖁᖓᓯᒃᑯᑦ ᐃᔨᖏᒃᑎᒃᑯᓪᓗ ᖁᐃᖅᓱᖃᑦᑕᕈᓐᓇᖅᖢᑎᒃ ᑕᒋᐅᖅᓴᕈᓐᓇᕆᓪᓗᑎᒡᓗ.

  ᐸᓃᒃ: ᑎᖕᒥᐊᑦ ᑕᒋᐅᖅᓴᓲᑦ!

  ᐊᒃᑲ ᐲᑕ: ᕼᐊᕼᐊ ᐄ ᓇᓕᐊᖕᓂᑐᐃᓐᓇᖅ ᑖᒃᑯᓂᖓ ᑕᑯᓐᓂᕈᕕᑦ ᑎᖕᒥᐊᒥ, ᕿᒪᒡᓗᒍ ᖃᐅᔨᑎᓪᓗᖓᓗ ᓇᓂ ᑕᑯᓚᐅᕐᒪᖔᖅᐱᐅᒃ. ᖃᐅᔨᑎᑲᐅᑎᒋᔭᕆᐊᖃᕆᕙᕐᒪ ᑕᑯᓐᓂᕈᕕᑦ ᑎᖕᒥᐊᓂᒃ ᑐᖁᖓᔪᓂᒃ. ᖃᐅᔨᑎᑕᐅᑲᐅᖅᑐᕈᒪ, ᓈᒻᒪᖕᓂᖅᓴᐅᖕᒪᑦ! ᑕᐃᒪᓐᓇ ᑭᓱᑯᑦᑎᐊᓂᒃ ᐲᖅᓯᓗᖓ ᖃᐅᔨᓴᖅᑕᐅᒃᐸᑦ ᖃᐅᔨᑎᑕᐅᔪᓐᓇᕋᔭᕋᑦᑕ ᑎᖕᒥᐊᑦ ᓄᕙᖕᓂᖓᐅᖕᒪᖔᑦ.

  ᐊᑖᑕᒃ: ᐅᖃᖅᑲᐅᒐᕕᑦ ᑎᖕᒥᐊᑦ ᐃᓚᖏᑦ ᐋᓐᓂᐊᖃᕈᓐᓇᕐᓂᕋᖅᖢᒋᑦ ᐋᓐᓂᐊᖅᑰᔨᙱᒃᑲᓗᐊᖅᖢᑎᒃ? ᑕᕝᕙᓕᖃᐃ ᑎᖕᒥᐊᒥᒃ ᐋᓐᓂᐊᓕᖕᒥᒃ ᐱᔭᖃᑐᐃᓐᓇᕆᐊᖃᖅᑐᒍᑦ ᐋᓐᓂᐊᖃᕐᓂᖓᓂᒃ ᖃᐅᔨᒪᙱᓪᓗᑕ?

  ᐊᒃᑲ ᐲᑕ: ᐄᖑᑐᐃᓐᓇᕆᐊᓕᒃ, ᑎᖕᒥᐊᑦ ᓄᕙᖕᓂᖓᓂᒃ ᐊᐃᑦᑐᕐᓗᒃᑕᐅᓇᔭᙱᓐᓂᖅᓴᐅ ᒐᓗᐊᖅᖢᑕ ᐱᑐᐃᓐᓇᕆᐊᖃᙱᓐᓂᖅᓴᐅᔪ ᓐᓇᖅᑐᒍᑦ ᐃᒪᐃᓕᐅᕈᑦᑕ.

  ᐊᒃᑲ ᐲᑕ: ᓯᕗᓪᓕᕐᒥ, ᐊᒃᑐᖅᑕᐃᓕᓗᒋᑦ ᓂᕆᑦᑕᐃᓕᓗᒋᓪᓗ ᑎᖕᒥᐊᑦ ᐋᓐᓂᐊᖅᑰᔨᔪᑦ ᑐᖁᖓᔪᒡᓘᓐᓃᑦ ᖃᐅᔨᒪᔭᐅᙱᑦᑐᓂᒃ ᑐᖁᔪᕕᓃᑦ. ᑎᖕᒥᐊᓂᒃ ᑐᖂᑦᑎᓂᑕᒫᑦ, ᐊᒡᒑᖅᓯᒪᕙᒡᓗᑎᑦ ᐋᒃᑐᓕᕌᖓᕕᑦ ᒪᓐᓂᖕᓂᒡᓗ ᐱᑭᐅᑦᑕᕌᖓᕕᑦ ᓯᓚᒥᓗ ᐱᓕᕆᐊᕆᕙᒡᓗᒋᑦ. ᑎᖕᒥᓕᕆᑎᓪᓗᑎᑦ ᑮᓇᐃᑦ ᐊᒃᑐᖅᑕᐃᓕᓗᒍ ᓂᕆᕙᙱᓪᓗᑎᑦ, ᐃᒥᖅᐸᙱᓪᓗᑎᓪᓗ ᓱᐴᖅᑐᖅᐸᖕᓇᒡᓗ ᑎᖕᒥᐊᓕᕆᑎᓪᓗᑎᑦ ᒪᓐᓂᖕᓂᒡᓘᓐᓃᑦ. ᐊᑕᐅᓯᕐᒧᐊᖅᐸᙱᓪᓗᒋᑦ ᐃᕆᐸᔪᑦ ᓴᓗᒪᙱᑦᑐᓪᓗ ᐱᑭᐅᑕᖅᑕᑎᑦ. ᐱᕙᙱᓪᓗᒋᑦ ᓯᖁᒥᓯᒪᔪᑦ ᓴᓗᒪᙱᓗᐊᖅᑐᓪᓗ ᒪᓐᓃᑦ. ᒪᕐᓗᐃᔭᖅᐸᒡᓗᒋᑦ ᒪᓐᓃᑦ ᐸᓂᖅᑐᒧᑦ ᐊᓪᓚᕈᑎᕋᓛᒧᑦ ᐊᓕᓚᔪᕐᒧᓪᓘᓐᓃᑦ, ᐃᕐᕈᖅᑐᖅᐸᙱᓪᓗᒋᑦ ᒪᓐᓃᑦ ᐃᒫᓂ. ᐃᕐᕈᖅᑐᓕᕈᕕᒋᑦ ᐆᒪᔪᑯᓗᒥᑎᖅᑕᐅᔪᓐᓇᕐᒪᑕ. ᐊᒡᒐᑎᑦ ᐃᕐᒥᒃᐸᒡᓗᒋᑦ ᐆᓇᔪᒃᑐᒧᑦ ᐃᒪᕐᒧᑦ ᐃᕐᒥᐅᑎᖃᖅᑐᒧᑦ ᑎᖕᒥᐊᓕᕆᐊᓂᑐᐊᕌᖓᕕᑦ ᒪᓐᓂᓕᕆᐊᓂᑐᐊᕌᖓᕕᓪᓘᓐ ᓃᑦ. ᐃᕐᒥᒃᐸᒡᓗᒋᑦ ᐆᒪᔪᐃᔭᐃᔾᔪᑎᒧᓪᓗ ᐊᓪᓚᖅᑎᖅᐸᒡᓗᒋᑦ ᓵᑉ ᖄᖏᑦ ᒪᓐᓂᖕᓄᑦ ᐊᒃᑐᐊᔭᐅᖅᑲᐅᔪᑦ ᑎᖕᒥᐊᓄᓪᓘᓐᓃᑦ. ᐊᓯᖏᓐᓂᒃ ᐊᓐᓄᕌᕐᓗᑎᑦ ᐊᑐᖅᑲᐅᔭᑎᑦ ᐊᓐᓄᕌ ᑲᒥᒋᖅᑲᐅᔮᒃᑭᒡᓗ ᐃᕐᒥᑲᐅᑎᒋᓗᒋᑦ ᓱᕐᕈᑯᒥᑎᖅᑕᐅᓯᒪᑐᐃᓐᓇᕆᐊ ᖃᕐᒪᑕ ᐊᐅᖕᒥᒃ, ᐊᓇᕈᔪᖕᒥᒃ ᓄᕙᕈᔪᖕᒥᒡᓘᓐᓃᑦ.

  ᐊᑖᑕᒃ: ᐊᓯᐊᓄᐊᖅᐸᓪᓕᐊᓗᑎᑦ ᐱᑭᐅᑕᕐᕕᒋᔭᕐᓂᑦ, ᓄᓇᒥᙶᖅᑐᒥᒃ ᒪᕐᓗᐃᔭᖅᐸᒡᓗᒋᒃ ᑲᒦᒃᑭᒃ ᐊᓐᓄᕌᑎᓪᓗ. ᑕᐃᒪᓐᓇ ᓯᐊᒻᒪᒃᑎᕆᙱᑦᑐᓐᓇᕋᑦᑕ ᓄᕙᖕᓇᒥᒃ ᓄᓇᒧᑦ.

  ᐊᒃᑲ ᐲᑕ: ᑐᑭᓯᓇᖅᑐᖅ, ᐃᒪᓐᓇ ᐅᖃᖅᐱᑦ ᐋᓐᓂᐊᓕᖕᒥᒃ ᑎᖕᒥᐊᕋᓗᐊᕈᑦᑕ ᖃᓄᐃᖅᑰᔨᙱᑦᑐᒥᒃ ᓂᕆᔪᓐᓇᖅᑐᒍᑦ? ᐊᑦᑕᕐᓇᙱᑦᑐᖅ ᓂᕆᓗᓂ ᐆᑦᑎᐊᖅᓯᒪᔪᓂᒃ ᑎᖕᒥᐊᓂᒃ ᒪᓐᓂᖕᓂᒡᓗ. ᓂᕿᖓ ᐊᐅᐸᔪᙱᑦᑎᐊᕐᓗᓂ ᑭᓯᐊᓂ ᑎᖕᒥᐊᒥᓪᓗ ᐃᔅᓵᕿᓂᖅᑕᖃᙱᑦᑎᐊᕐᓗᓂᑎᒃ, ᑕᐃᒪᓐᓇ ᖃᐅᔨᒪᔾᔪᑎᒋᔪᓐᓇᖅᐸᑦ ᑎᖕᒥᐊᖅ ᐆᑦᑎᐊᖅᓯᒪᓂᖓᓂᒃ. ᖃᓄᐃᔾᔮᙱᑦᑐᑎᑦ ᒪᓕᑦᑎᐊᕈᕕᒋᑦ ᐃᓂᖅᑎᖅᑕᐅᔾᔪᑎᒋᔭᑎᑦ.

  ᐸᓃᒃ: ᓂᕆᑦᑕᐃᓕᓗᑎᓪᓗ ᐊᐃᐸᔪᒥᒃ, ᖁᐊᖅᑐᖅᑕᐃᓕᓗᑎᓪᓗ ᒪᓐᓂᖕᓂᒡᓗ ᐊᐃᐸᔪᖅᑐᖅᑕᐃᓕᓗᑎᑦ.

  ᐊᒃᑲ ᐲᑕ: ᖃᐅᔨᓯᒪᓕᕐᒪᑕ ᖁᐊᖅᓯᐊᕆᒐᓗᐊᕐᓗᒋᑦ ᐆᒪᔪᖓ ᑐᖁᔾᔮᙱᑦᑐᖅ. ᐃᒃᑯᐊᓕᑭᐊᖅ ᐊᕿᒡᒋᕐᔪᐊᑉ ᒪᓐᓂᖏᑦ ᓂᐅᕕᕐᕕᖕᒥᙶᖅᑐᑦ? ᑕᐃᒃᑯᐊᓕ ᐊᔾᔨᒋᔭᐅᙱᑦᑐᑦ, ᓂᐅᕕᕐᕕᖕᒥᙶᖅᑐᑦ ᐊᕿᒡᒋᕐᔪᐊᑦ ᒪᓐᓂᖏᓪᓗ ᐊᐅᓚᑕᐅᑦᑎᐊᕐᒪᑕ ᖃᐅᔨᓴᖅᑕᐅᕙᒃᖢᑎᒡᓗ ᐋᓐᓂᖃᕐᓇᙱᑦᑎᐊᕋᓗᐊᕐᒪᖔᑕ. ᑎᖕᒥᐊᓪᓕ ᑕᒪᐅᙵᖅᐸᒃᑐᑦ ᐊᔾᔨᒋᔭᐅᙱᒻᒪᑕ ᓄᔪᐊᖅᑐᑦ ᑎᖕᒥᐊᑦ ᐊᐅᓚᑕᐅᔭᕆᐊᒃᓴᖅ ᐊᔪᕐᓇᕐᒪᑕ. ᐃᒪᓐᓇ ᓲᕐᓗ ᐃᓄᐃᑦ ᓄᓇᖅᑲᑎᒌᑦ ᓄᕙᓕᖅᐸᖕᒪᑕ ᓄᓇᒥᖕᓂ, ᐊᐃᑦᑐᕐᓗᖃᑦᑕᐅᑎᕙᒃᖢᑎᒃ ᐃᓛᓐᓂᒃᑯᑦ ᐊᒻᒪᐃᓛᒃ ᖃᓄᐃᑦᑐᓐᓃᕐᔫᒥᕙᒃᖢᑎᒃ. ᑕᐃᒪᐃᒻᒪᑦ ᐃᓄᖕᓂ ᑕᐃᒪᐃᒃᑭᕗᖅᑕᐅᖅ ᑎᖕᒥᐊᓂ. ᖃᓅᒐᓗᐊᖅᐸᑦ, ᐋᓐᓂᐊᓕᕐᓂᕈᕕᑦ ᑎᖕᒥᐊᓕᕆᐊᓪᓚᓚᐅᕐᓗᑎᑦ ᒪᓐᓂᖕᓂᒡᓘᓐᓃᑦ,

  ᐊᑖᑕᒃ: ᐋᓐᓂᐊᕐᕕᖕᒧᑦ ᐅᖄᓚᑲᐅᑎᒋᓗᑎᑦ ᐅᖃᐅᑎᓗᒋᑦ ᑎᖕᒥᐊᓕᕆᓚᐅᕐᓂᕋᕐᓗᑎᑦ ᖃᐅᔨᑲᐅᑎᒋᓂᐊᕐᒪᑕ ᖃᓄᐃᓕᐅᕐᓂᐊᕆᐊᒃᓴᖅ.

  ᐊᒃᑲ ᐲᑕ: ᐅᔾᔨᓱᑦᑎᐊᕈᑦᑕ, ᒪᓕᒡᓗᒋᓪᓗ ᐊᑐᖁᔭᐅᔪᑦ ᐊᑦᑕᕐᓇᖅᑐᒧᐊᔾᔮᙱᑦᑐᒍᑦ. ᑕᐃᒪᓐᓇᑦᑎᐊᖅ, ᓇᓗᓇᙱᒻᒪᑦ ᐅᔾᔨᖅᓱᑦᑎᐊᕐᓗᑕᓗ.

  ᐸᓃᒃ: ᐅᕝᕙᐅᓇ ᑎᒍᓚᐅᕈᒃ ᖃᐅᔨᕚᓪᓕᕈᑎᒃᓴᖅ, ᑐᑭᓯᕚᓪᓕᕈᑎᑕᖃᖅᑐᖅ ᐅᖃᐅᓯᕆᖅᑲᐅᔭᑦᑎᓐᓂᒃ. ᐅᐸᒃᑕᐅᔪᓐᓇᓲᖑᔪᖓ ᐅᕝᕙᓘᓐᓃᑦ ᐆᒪᔪᕐᓂᐊᖅᑎᒃᑯᓐᓄᒃ ᓇᓕᐊᖕᓄᑐᐃᓐᓇᖅ ᓄᓇᓕᖕᓂ ᑐᑭᓯᒋᐊᒃᑲᓐᓂᕈᒪᒍᕕᑦ ᑎᖕᒥᐊᑦ ᓄᕙᖕᓂᖓᓂᒃ. ᖁᔭᕐᓇᒦᒃ, ᑖᓐᓇ ᑕᑯᖅᑯᑎᓂᐊᕋᒃᑯ ᒥᓯᔅ ᐹᕐᑕᓐᒧᑦ ᐃᓕᓐᓂᐊᖃᑎᒃᑲ ᖃᐅᔨᒪᔪᐃᓐᓇᐅᓂᐊᕐᒪᑕ

  [ᓱᓕᔪᓂᒃ ᑎᖕᒥᐊᑦ ᓄᕙᖕᓂᖓᓂᒃ ᐊᒻᒪ ᑎᖕᒥᐊᕋᓱᖕᓂᕐᒥᒃ ᐱᑭᐅᑕᕐᓂᕐᒥᒡᓗ ᐊᑦᑕᕐᓇᙱᑦᑐᒃᑯᑦ, ᒪᒪᕆᔭᑦᑎᓐᓂᒃ ᓂᕆᑦᑎᐊᖃᑦᑕᕐᓂᐊᖁᓪᓗᑕ!]