The Indigenous Languages Act in Inuktitut North Baffin

The translation of the Indigenous Languages Act into Inuktitut North Baffin made available on this page is for informational purposes only and is not official version of the Act. The official, legally authoritative versions are in English and French and may contain amendments not reflected in this translation.

On this page

• ᐱᒋᐊᕐᓂᖓᓂ
• ᑕᐃᓯᒍᑎ ᓇᐃᒡᓕᑎᓯᒪᔪᖅ
• ᑐᑭᓯᓇᕆᐊᖅᓯᒪᔭᖓᑦ
• ᐱᖁᔭᐅᑉ ᐱᔾᔪᑎᖏᑦ
• ᐱᔪᓐᓇᐅᑎᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᑐᕌᖓᔪᑦ
• ᒥᓂᔅᑕᐅᑉ ᐱᔪᓐᓇᕐᓂᖏᑦ, ᐱᔭᒃᓴᖏᑦ ᐱᓕᕆᐊᒃᓴᖏᓪᓗ
• ᒐᕙᒪᑐᖃᒃᑯᑦ ᐱᓕᕆᕝᕕᖏᑦ
• ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᑲᒥᓯᓇᐅᑉ ᑎᑎᕋᕐᕕᖓ
• ᐊᑐᐊᒐᑦ ᒪᓕᒐᓪᓗ
• ᓇᖕᒥᓂᖅ ᕿᒥᕐᕈᓂᖃᕐᓂᖅ
• ᒪᓕᒐᓕᐅᕐᕕᒡᔪᐊᒥᑦ ᕿᒥᕐᕈᔭᐅᔪᑦ
• ᐊᑐᓕᖅᑎᓪᓗᒍ

ᐱᒋᐊᕐᓂᖓᓂ

ᑕᐃᒪᐃᒻᒪᑦ ᐃᓕᓴᕆᔭᐅᑎᓪᓗᒍ ᐱᓕᕆᐊᖑᑎᓪᓗᒍ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐊᑐᕐᓂᖅᐹᖑᕗᖅ ᐋᖅᑭᐅᒪᑎᑦᑎᓂᕐᒧᑦ ᓄᓇᖃᖅᑳᖅᓯᒪᔪᑦ ᐃᓄᖏᓐᓂᒃ ᐋᖅᑭᐅᒪᑎᑦᑎᓪᓚᕆᐅᕗᕐᓗ ᑲᓇᑕᒥᑦ, ᐱᓗᐊᖅᑐᒥᑦ ᓱᓕᓂᕐᒧᑦ ᐋᖅᑭᐅᒪᑎᑦᑎᓂᕐᒧᓪᓗ ᑲᑎᒪᔨᖏᓐᓂᒃ ᑲᓇᑕᒥᑦ ᐱᓕᕆᐊᖃᖁᔨᑎᓪᓗᒋᑦ.

ᑕᐃᒪᐃᒻᒪᑦ ᑲᓇᑕᐅᑉ ᒐᕙᒪᖓ ᐱᓕᕆᐊᖃᕈᒪᕗᑦ ᓯᓚᕐᔪᐊᒥᐅᑦ ᑲᑐᔾᔨᖃᑎᒌᖏᓐᓄᑦ ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᓯᒪᔪᑦ ᐃᓄᖏᓐᓂᒃ, ᐊᖏᖅᓯᒪᓪᓗᑎᒡᓗ ᐱᔪᓐᓇᐅᑎᑦ ᑐᕌᖓᔪᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ;

ᑕᐃᒪᐃᒻᒪᑦ 2019−ᖑᑎᓪᓗᒍ ᐅᓐᓂᖅᓯᐅᓚᐅᖅᐳᑦ ᑲᑎᒪᔨᖏᑦ ᓯᓚᕐᔪᐊᒥᐅᑦ ᑲᑐᔾᔨᖃᑎᒌᖏᑦ ᓯᓚᕐᔪᐊᕐᒥᐅᑦ ᐊᕐᕌᒍᒋᓂᕋᖅᖢᓂᐅᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ, ᐊᓯᖏᓪᓗ, ᐅᔾᔨᕆᔭᐅᓚᐅᖅᐳᖅ ᐊᓯᐅᔨᓯᒪᓂᖏᓐᓂ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᑐᐊᕕᐅᑕᐅᓕᖅᖢᓂᓗ ᐅᖃᐅᓯᕆᔭᐅᖏᓐᓇᕐᓗᓂ, ᐅᖃᐅᓯᕐᒥᓂᒃ ᐅᑎᖅᑎᑦᑎᓇᓱᐊᕐᓗᑎᒃ ᐊᒻᒪ ᐱᔪᒥᓴᐃᓗᑎᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ;

ᑕᐃᒪᐃᒻᒪᑦ ᑲᓇᑕᐅᑉ ᒐᕙᒪᖓᑦ ᐃᓕᓴᖅᓯᓯᒪᕗᖅ ᑕᒪᐃᓐᓄᑦ ᑐᕌᖓᔪᓂ ᓄᓇᖃᖅᑳᖅᓯᒪᔪᑦ ᐃᓄᖏᑦ ᐃᓕᓴᕆᔭᐅᔭᕆᖃᕐᓂᖏᓐᓄᑦ ᐱᓕᕆᐊᖑᓗᑎᒡᓗ ᐱᔪᓐᓇᐅᑎᖏᑦ ᓇᖕᒥᓂᖅ ᐱᓇᓱᐊᖃᑦᑕᕈᓐᓇᖅᓯᓗᑎᒃ, ᐱᖃᑕᐅᕗᖅ ᓯᕗᕚᖏᓐᓂᒃ ᐱᔪᓐᓇᐅᑎᓪᓚᕆᒋᖕᒪᒍ ᓇᖕᒥᓂᖅ ᒐᕙᒪᑖᕐᓂᕐᒧᑦ;

ᑕᐃᒪᐃᒻᒪᑦ ᐊᓪᓚᑦ, ᐃᓄᐃᑦ ᐊᓪᓚᖓᔪᓪᓗ ᓇᖕᒥᓂᖅ ᑭᓇᐅᔾᔪᖃᕐᒪᑕ, ᐃᓕᖅᑯᓯᖏᑦ ᐃᓅᓯᖏᓐᓂᒡᓗ ᐊᒻᒪ ᐱᓯᒪᔭᖏᓐᓂᒃ, ᑕᐃᒪᙵᓕᒫᖅ ᐃᓅᓯᐅᓚᐅᖅᑐᒥᒃ ᒫᓐᓇᒧᑦ ᑎᑭᖦᖢᒍ, ᐆᒪᐃᓐᓇᖅᐳᖅ ᓱᓕ, ᐊᑐᖅᑕᐅᕗᖅ ᓄᓇᖓᓂᒡᓗ ᒫᓐᓇᐅᓕᖅᑐᖅ ᑲᓇᑕᐅᕗᖅ;

ᑕᐃᒪᐃᒻᒪᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᓯᕗᓪᓕᐅᓪᓗᑎᒃ ᐅᖃᐅᓯᑦ ᐊᑐᖅᑕᐅᕗᑦ ᓄᓇᖓᓂ ᐅᓪᓗᒥᐅᓕᖅᑐᖅ ᑕᐃᔭᕗᑦ ᑲᓇᑕᒥᑦ ᑖᒃᑯᐊᓗ ᐅᖃᐅᓯᑦ ᐊᓯᔾᔨᖅᓯᒪᓕᖅᐳᑦ ᐊᕐᕌᒍᒐᓵᓗᖕᓂᑦ ᖄᖏᖅᑎᓪᓗᒍ;

ᑕᐃᒪᐃᒻᒪᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐃᓚᒋᔭᐅᕐᔪᐊᖅᓯᒪᕗᑦ ᐃᓅᖃᑎᒌᓕᓵᖃᑦᑕᕐᓂᑰᑎᓪᓗᒋᑦ ᑖᒃᑯᐊ ᑕᕆᐅᑉ ᐊᑭᐊᓂᕐᒥᐅᑦ ᐊᒻᒪ ᓄᓇᖃᖅᑳᖅᓯᒪᔪᑦ ᐃᓄᖏᓐᓂᒃ;

ᑕᐃᒪᐃᒻᒪᑦ ᓄᓇᖃᖅᑳᖅᓯᒪᔪᑦ ᐃᓄᖏᑦ ᐱᓕᕆᐊᖃᖅᓯᒪᕐᔪᐊᖅᐳᑦ ᑲᓇᑕ ᐋᖅᑭᒃᓱᖅᑕᐅᑎᓪᓗᒍ ᐊᒻᒪ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐃᑲᔫᑎᓯᒪᕗᖅ ᐊᔾᔨᒌᖏᑦᑑᑎᐅᓂᖏᑦ ᐅᖃᐅᓯᖏᑦ ᐊᒻᒪ ᐃᓕᖅᑯᓯᑐᖃᖓ ᑲᓇᑕᐅᑉ;

ᑕᐃᒪᐃᒻᒪᑦ ᐃᓅᓯᐅᓚᐅᖅᓯᒪᔪᖅ ᐃᓚᐃᓐᓈᖅᓯᖃᑦᑕᕐᓂᑰᑎᓪᓗᒋᑦ ᒐᕙᒪᒃᑯᑦ ᐊᑐᐊᒐᖏᑦ ᐱᓕᕆᐊᒃᓴᖏᓪᓗ, ᐅᑯᐊ ᐱᓪᓗᒋᑦ, ᐊᓯᖏᓪᓗ ᐱᔾᔪᑎᐅᔪᑦ, ᖃᓪᓗᓈᙳᖅᑎᑕᐅᓇᓱᐊᕐᓂᖅ, ᓅᑕᐅᓚᐅᖅᓯᒪᑎᓪᓗᒋᑦ ᓅᒍᒪᖏᑎᓪᓗᒋᑦ, ᒐᕙᒪᑐᖃᒃᑯᑦ ᒪᓕᒐᓕᐅᕆᓚᐅᖅᓯᒪᓂᖓ ᓄᓇᖃᖅᑳᖅᓯᒪᔪᓂ ᑎᒍᐊᙳᐊᖃᑦᑕᐅᓚᐅᕐᓂᖏᓐᓄᑦ ᐊᒻᒪ ᐃᓕᓐᓂᐊᕆᐊᖃᖅᑎᑕᐅᓚᐅᖅᓯᒪᓂᖏᓐᓄᑦ, ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐋᓐᓂᕈᑕᐅᓚᐅᖅᓯᒪᕗᖅ ᐊᒻᒪ ᐅᖃᐅᓯᖏᓐᓄᑦ ᐊᓯᐅᔨᓯᒪᕐᔪᐊᖅᓯᒪᕗᑦ;

ᑕᐃᒪᐃᒻᒪᑦ ᖃᓄᐃᓕᕐᓂᖓ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐊᔾᔨᒌᖏᓐᓂᓕᕇᕗᑦ, ᐱᖃᑕᐅᕗᖅ ᐅᖃᐅᓯᖃᐃᓐᓇᕈᓐᓇᕐᓂᖏᑦ ᑖᒃᑯᐊ ᐅᖃᐅᓰᑦ, ᑕᐃᒪᓐᓇᓗ ᑐᐊᕕᐅᔾᔭᐅᔭᕆᐊᖃᓕᖅᐳᑦ ᐃᑲᔪᓱᕐᓗᒋᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐅᑎᖅᑎᑦᑎᓇᓱᐊᖅᑎᓪᓗᒋᑦ, ᐅᖃᐅᓯᕆᔭᐅᖏᓐᓇᕐᓗᓂ ᓴᙱᓂᖅᑖᖅᑎᓪᓗᒋᓪᓗ;

ᑕᐃᒪᐃᒻᒪᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᑭᓇᐅᔾᔪᑎᓕᒋᓪᓚᕆᒃᐸᖏᑦ, ᐃᓕᖅᑯᓯᖏᑎᒍᑦ, ᐅᒃᐱᕆᔭᖏᓐᓂᒃ, ᓄᓇᒦᔾᔪᓯᕆᖃᑦᑕᖅᑕᖏᑎᒍᑦ, ᓯᓚᕐᔪᐊᒥᑦ ᑕᐅᑦᑐᖏᑎᒍᑦ ᐊᒻᒪ ᓇᖕᒥᓂᖅ ᐱᓇᓱᐊᕈᓐᓇᕐᓂᕆᔭᖓᓂᒃ ᓄᓇᖃᖅᑳᖅᓯᒪᔪᑦ ᐃᓄᖁᑎᖏᑦ;

ᑕᐃᒪᐃᒻᒪᑦ ᓴᐳᑎᓇᓱᐊᕆᐊᖃᕐᓂᖅ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐃᑲᔫᑎᐅᒐᔭᖅᐳᖅ ᖃᐅᔨᒪᔭᖏᓐᓂᒃ ᐊᓯᐅᔨᑦᑕᐃᓕᒪᓂᕐᒧᑦ ᐃᓕᖅᑯᓯᖏᑎᒍᑦ, ᐊᕙᑎᖏᓐᓂᒃ ᐊᒻᒪ ᐅᒃᐱᕆᔭᖏᑎᒍᑦ ;

ᑕᐃᒪᐃᒻᒪᑦ ᐊᔾᔨᒌᖏᑦᑐᓂ ᑲᑐᔾᔨᖃᑎᒌᒋᐊᖃᖅᐳᑦ ᓇᒥᑐᐃᓐᓇᖅ ᑲᓇᑕᓕᒫᒥᒃ ᑐᕌᒐᕆᖕᒪᒍᑦ ᑲᔪᖏᖅᓴᐃᓇᓱᐊᖅᖢᑎᒃ ᐊᑐᖅᑕᐅᓗᓂ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐃᑲᔪᖅᑕᐅᓗᑎᒡᓗ ᐅᑎᖅᑎᑦᑎᓇᓱᐊᖅᑎᓪᓗᒋᑦ, ᐅᖃᐅᓯᕐᒥᓂᒃ ᐅᑎᖅᑎᑦᑎᒐᓱᐊᖅᑎᓪᓗᒋᑦ, ᐅᖃᐅᓯᕆᔭᐅᖏᓐᓇᕐᓗᓂ ᓴᙱᓂᖅᑖᖅᑎᓪᓗᒋᓪᓗ ᐊᒻᒪ ᑲᓇᑕᐅᑉ ᒐᕙᒪᑯᖏᑦ ᐃᑲᔪᖅᓱᐃᓐᓇᕆᐊᖃᖅᐳᑦ ᑖᒃᑯᐊ ᐱᔭᐅᓇᓱᒃᑎᓪᓗᒋᑦ;

ᑕᐃᒪᐃᒻᒪᑦ ᑲᓇᑕᐅᑉ ᒐᕙᒪᖓᑦ ᐱᓕᕆᐊᖃᑦᑎᐊᕆᐊᖅᐳᑦ, ᐃᑲᔪᖅᓱᐃᓐᓇᕐᓂᐊᖅᐳᑦ ᐊᑯᓂᐅᓂᐊᖅᑐᒥᒡᓗ ᑮᓇᐅᔭᖃᖅᑎᑦᑎᓗᒃ ᐅᑎᖅᑎᑦᑎᓇᓱᐊᖅᑎᓪᓗᒋᑦ, ᐅᖃᐅᓯᕐᒥᓂᒃ ᐊᑐᓕᒃᑲᓐᓂᕋᓱᐊᖅᑎᓪᓗᒋᑦ, ᐅᖃᐅᓯᖃᐃᓐᓇᕐᓗᑎᒃ ᓴᙱᓂᖅᑖᕐᓗᑎᒡᓗ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ;

ᑕᐃᒪᐃᒻᒪᑦ ᓄᓇᖃᖅᑳᖅᓯᒪᔪᑦ ᐊᐅᓚᑦᑎᔨᐅᑦᑎᐊᕋᔭᖅᐳᑦ ᐅᑎᖅᑎᑦᑎᓇᓱᐊᖅᑎᓪᓗᒋᑦ, ᐅᖃᐅᓯᕐᒥᓂᒃ ᐊᑐᓕᒃᑲᓐᓂᕋᓱᐊᖅᑎᓪᓗᒋᑦ, ᐅᖃᐅᓯᖃᐃᓐᓇᕐᓗᑎᒃ ᓴᙱᓂᖅᑖᕐᓗᑎᒡᓗ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ;

ᑕᐃᒪᐃᒻᒪᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖓᓂ ᐃᓄᖕᓂᑦ ᑐᓴᒐᒃᓴᖅᑖᕐᓗᑎᒃ ᐊᑯᓂᐅᓂᐊᖅᑐᒥᒡᓗ ᐃᓕᓐᓂᐊᕈᑎᐅᓂᐊᖅᑐᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ, ᐱᖃᓯᐅᔾᔨᕗᖅ ᐃᓕᓐᓂᐊᖅᑐᓕᕆᓂᖅ, ᐊᑐᖅᑕᐅᓯᐅᖑᔪᓂᒃ ᓄᓇᖃᖅᑳᖅᓯᒪᔪᓄᑦ, ᐋᖅᑭᒋᐊᖃᓪᓚᕆᒃᐳᑦ ᐅᖃᐅᓯᐅᖏᓐᓇᖅᐸᒡᓗᑎᒃ;

ᑕᐃᒪᐃᒻᒪᑦ ᐊᔾᔨᐅᙱᑦᑐᒥᑦ ᐱᔾᔪᑎᖃᕆᐊᖃᖅᐳᑦ ᓄᓇᖃᖅᑳᖅᓯᒪᔪᓂᒡᓗ ᐱᓕᕆᖃᑎᒌᓯᐅᓂᒃ ᐅᐸᓗᙵᐃᔭᐅᑎᖃᕆᐊᖃᖅᐳᑦ ᓄᓇᓕᖕᓂᑦ ᐊᒻᒪᓗ ᐃᓄᖕᓂᑦ ᐱᓕᕆᖃᑎᒌᒋᐊᖃᖅᐳᑦ ᐊᔾᔨᒌᖏᑦᑑᔪᑦ, ᐃᓕᖅᑯᓯᓕᕆᓂᕐᑯᑦ ᐊᒻᒪ ᐃᓅᓯᕆᓚᐅᖅᓯᒪᔭᖏᓐᓂᒃ ᓄᓇᖃᖅᑳᖅᓯᒪᔪᑦ ᑐᓴᐅᒪᖃᑦᑕᕐᓗᑎᒃ;

ᐊᒻᒪᓗ ᑕᐃᒪᐃᒻᒪᑦ ᐱᓕᕆᐊᖃᕆᐊᖃᖅᐳᑦ ᐊᔾᔨᐅᖏᑦᑐᒥᒃ ᐱᔾᔪᑎᖃᕐᓗᑎᒃ ᐊᒻᒪ ᐱᓕᕆᖃᑎᖃᕆᐊᖃᖅᐳᑦ ᓄᓇᖃᖅᑳᖅᓯᒪᔪᑦ ᐃᓐᓇᖏᓐᓂᒃ, ᒪᒃᑯᒃᑐᓂ, ᓱᕈᓯᕐᓂᒃ, ᐃᓄᖕᓂᑦ ᑎᒥᒥᒍᑦ ᐊᔪᕈᑎᖃᖅᑐᓂ, ᐊᕐᓇᓂᒃ, ᐊᖑᑎᓂᒃ ᐊᒻᒪ ᐊᕐᓇᙳᖅᑐᕕᓂᕐᓂᑦ/ᐊᖑᑎᙳᖅᑐᕕᓂᕐᓂᑦ ᐊᒻᒪ ᐃᓕᖅᑯᓯᓖᑦ ᐊᕐᓇᑎᑐᑦ ᐊᖑᑎᑐᓪᓗ.

ᒫᓐᓇ, ᑕᐃᒪᐃᒻᒪᑦ ᑭᖕ, ᑕᐃᑲᓂ ᐅᖃᐅᔾᔨᖅᑕᖏᓐᓂᒃ ᐊᖏᖅᑕᖏᓐᓂᒡᓗ ᐃᑦᑑᑎᑦ ᐊᒻᒪ ᑲᓇᑕᐅᑉ ᒐᕙᒪᖃᕐᕕᖓᓂᖔᖅᑐᓂ ᐅᑯᓂᖓ ᒪᓕᒐᙳᖅᑎᑦᑎᕗᑦ:

ᑕᐃᓯᒍᑎ ᓇᐃᒡᓕᑎᓯᒪᔪᖅ

Marginal note: ᑕᐃᓯᒍᑎ ᓇᐃᒡᓕᑎᓯᒪᔪᖅ

1 ᑕᕝᕙᓂ ᐱᖁᔭᕐᒥᑦ ᑕᐃᔭᐅᓯᒪᕗᖅ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐱᖁᔭᖅ.

ᑐᑭᓯᓇᕆᐊᖅᓯᒪᔭᖓᑦ

Marginal note: ᑐᑭᖏᑦ

2 ᑖᓐᓇ ᐱᖁᔭᖅ ᐅᑯᓂᖓ ᑐᑭᓕᐅᖅᓯᒪᕗᖅ:

ᒥᓂᔅᑕᖓᑦ

ᑐᑭᖃᕆᕗᖅ ᑕᐃᑲᓂ ᐃᓚᖓ 2−ᒥᑦ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᐱᖁᔭᖅ.

ᑲᒥᓯᓇ

ᑐᑭᓕᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᑲᒥᓯᓇᖓ ᓂᕈᐊᖅᑕᐅᓯᔪᖅ ᐃᓚᖓ 13-ᒥᑦ.

ᒐᕙᒪᑐᖃᒃᑯᕕᒃ ᐱᓕᕆᕝᕕᐊ

ᑐᑭᓕᒃ ᓇᓕᐊᖕᓂᑐᐃᓐᓇᖅ ᑐᕌᖓᔪᓂ ᑎᑎᕋᖅᓯᒪᔪᓂ (a)-ᒥᑦ (d)−ᒧᑦ ᑐᑭᖏᓐᓂ ᐱᓕᕆᕝᕕᐊ ᐃᓚᖓᓂ 2−ᒥᑦ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᐱᖁᔭᖓᓂ ᐅᕝᕙᓘᓐᓃᑦ ᒐᕙᒪᑐᖃᒃᑯᑦ ᑲᑐᔾᔨᖃᑎᒌᖏᑦ, ᑐᑭᓕᐅᖅᓯᒪᕗᖅ ᑕᐃᑲᓂ ᐃᓚᒃᑲᓐᓂᖓᓂ 83(1)−ᒥᑦ ᐱᖁᔭᕐᒥᑦ.

ᓄᓇᖃᖅᑳᖅᓯᒪᔪᑦ ᐊᐅᓚᑦᑎᕕᐊᓂ

ᑐᑭᓕᒃ ᑲᑎᒪᔨᑦ, ᒐᕙᒪᒃᑯᑦ ᐊᓯᖏᓪᓘᓐᓃᑦ ᐱᔪᓐᓇᕐᓂᖃᖅᑐᑦ ᑕᕝᕙᓂ ᐱᖁᔭᕐᒥᑦ ᑖᒃᑯᓄᖓ ᓄᓇᖃᖅᑳᖅᓯᒪᔪᓄᑦ, ᓄᓇᓕᖕᓄᑦ ᐃᓄᖕᓄᓪᓘᓐᓃᑦ ᐱᔪᓐᓇᐅᑎᖃᖅᑐᓄᑦ ᐃᓕᓴᕆᔭᐅᓯᒪᔪᓂᑦ ᐊᖏᖅᑕᐅᓯᒪᔪᓂᒡᓗ ᐃᓚᖓ 35−ᒥᑦ ᐱᖁᔭᕐᔪᐊᖅ ᐱᖁᔭᖓᓂ, 1982-ᒥᑦ.

ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᑦ

ᑐᑭᓕᒃ ᓄᓇᖃᖅᑳᖅᓯᒪᔪᑦ ᑭᒡᒐᖅᑐᐃᔪᑦ ᓄᓇᖃᖅᑳᖅᓯᒪᔪᑦ ᐱᓕᕆᖃᑎᒌᒃᑐᑦ ᐱᓪᓗᒋᑦ ᐃᓚᖏᓪᓗ ᐅᕝᕙᓘᓐᓃᑦ, ᐊᓯᐊᒍᑦ ᐃᓚᖓ 45−ᒥᑦ, ᐱᔾᔪᑎᖃᓪᓚᕆᒃᐳᖅ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ.

ᓄᓇᖃᖅᑳᖅᓯᒪᔪᑦ

ᑐᑭᓕᐅᖅᓯᒪᔭᖓᓃᑉᐳᖅ ᓄᓇᖃᖅᑳᖅᓯᒪᔪᑦ ᑲᓇᑕᒥᑦ ᑕᐃᑲᓂ ᐃᓚᒃᑲᓐᓂᖓᓂ 35(2) ᐱᖁᔭᕐᔪᐊᖅ ᐱᖁᔭᖓᓂ, 1982-ᒥᑦ.

ᒥᓂᔅᑕ

ᑐᑭᓕᒃ ᒥᓂᔅᑕ ᑲᓇᑕᒥᑦ ᐃᑦᑕᕐᓂᓴᓕᕆᔨᒃᑯᑦ.

ᑎᑎᕋᕐᕕᒃ

ᑐᑭᓕᒃ ᑎᑎᕋᕐᕕᖓ ᑲᒥᓯᓇ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐃᓕᓴᕆᔭᐅᓯᒪᔪᖅ ᑕᐃᑲᓂ ᐃᓚᖓ 12−ᒥᑦ.

Marginal note: ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᔪᑦ

3 ᑖᓐᓇ ᐱᖁᔭᖅ ᑐᑭᓕᐅᖅᑕᐅᓯᒪᕗᖅ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓄᑦ ᐊᖏᖅᑕᐅᓯᒪᔪᓂᒡᓗ ᐃᓚᖓ 25−ᒥᑦ ᐱᖁᔭᕐᔪᐊᖅ ᐱᖁᔭᖓᓂ, 1982-ᒥᑦ, ᐊᒻᒪ ᑭᑭᑕᐅᓯᒪᖏᓚᑦ ᐅᕝᕙᓘᓐᓃᑦ ᖃᓄᐃᓕᐅᖅᑕᐅᔪᓐᓇᖏᑦᑐ

Marginal note: ᐊᔾᔨᒌᖏᓐᓂᖃᕈᑎᒃ ᐊᑲᐅᓕᐅᕈᑎᒥᒡᓘᓐᓃᑦ

4 ᑕᕝᕙᓂ ᐱᖁᔭᕐᒥᑦ ᖃᓄᑐᐃᓐᓇᖅ ᐊᔾᔨᒌᖏᓐᓂᖃᕈᑎᒃ ᐊᑲᐅᓕᐅᕈᑎᒥᒡᓘᓐᓃᑦ ᐊᒻᒪ ᐊᖏᕈᑎᐊᓂ - ᐱᖃᑕᐅᓪᓗᑎᒃ ᓄᓇᒧᑦ ᑐᒃᓯᕋᐅᑎᖏᓐᓄᑦ ᐊᖏᕈᑎᒥᑦ − ᓇᖕᒥᓂᖅ ᒐᕙᒪᖃᓕᕐᓂᕐᒧᓪᓘᓐᓃᑦ, ᑕᐃᒪᐃᑎᓪᓗᒍ ᐊᖏᕈᑎᖏᑦ ᐊᔾᔨᒌᖏᓐᓂᖃᐅᖅᐳᑦ ᐊᑲᐅᓕᐅᑎᒥᒡᓘᓐᓃᑦ.

ᐱᖁᔭᐅᑉ ᐱᔾᔪᑎᖏᑦ

Marginal note: ᐱᔾᔪᑎᖏᑦ

5 ᑕᔅᓱᒪ ᐱᖁᔭᐅᑉ ᐱᔾᔪᑎᖏᑦ ᐅᑯᐊᖑᕗᑦ

• (a) ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐃᑲᔪᖅᓱᕐᓗᒋᑦ ᑲᔪᖏᖅᓴᕐᓗᒋᓪᓗ ᐊᑐᖅᑕᐅᓂᖓ, ᐱᖃᑕᐅᕗᖅ ᓄᓇᖃᖅᑳᖅᓯᒪᔪᑦ ᐅᖃᕈᓐᓇᖏᑦᑐᓄᑦ ᐅᖃᐅᓰᑦ;
• (b) ᐃᑲᔪᖅᓱᕐᓗᒋᑦ ᓄᓇᖃᖅᑳᖅᓯᒪᔪᑦ ᐅᑎᖅᑎᑦᑎᓇᓱᐊᖅᑎᓪᓗᒋᑦ, ᐅᖃᐅᓯᕐᒥᓂᒃ ᐊᑐᓕᒃᑲᓐᓂᕋᓱᐊᖅᑎᓪᓗᒋᑦ, ᐅᖃᓪᓚᒍᓐᓇᐃᓐᓇᕐᓗᑎᒃ ᓴᙱᓂᖅᑖᕐᓗᓂᓗ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ, ᐱᖃᓯᐅᑎᓗᑎᒃ ᐱᓇᓱᐊᖅᑎᓪᓗᒋᑦ ᐃᒪᓐᓇ
  • (i) ᐅᖃᐅᓯᖏᑦ ᓄᓇᖃᖅᑳᖅᓯᒪᔪᑦ ᐃᓕᓴᕆᔭᐅᔪᓐᓇᖅᓯᓗᑎᒃ,
  • (ii) ᐸᕐᓇᐃᓇᓱᐊᕐᓗᑎᒃ ᐋᖅᑭᒃᓱᐃᒃᑲᓐᓂᕋᓱᐊᖅᑎᓪᓗᖏᑦ ᐊᒻᒪ ᐅᖃᓪᓚᐃᓐᓇᖃᑦᑕᕋᓱᐊᖅᑎᓪᓗᒋᑦ ᐅᖃᐅᓯᕐᒥᓂᒃ.
  • (iii) ᖃᕋᓴᐅᔭᒃᑰᕈᑎᒃᑯᑦ ᓴᓇᔭᓗᑎᒃ, ᐃᓕᓐᓂᐊᕈᑎᓕᐅᕐᓗᑎᒃ ᐊᒻᒪ ᑎᑎᖅᑲᓂ ᐊᑐᐃᓐᓇᕈᓐᓇᖅᑐᓂᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ, ᐱᖃᑕᐅᕗᑦ ᓈᓚᐅᑎᒃᑯᑦ, ᑕᕐᕋᔭᐅᓯᒃᑯᑦ ᑕᑯᓴᐅᖃᑦᑕᕐᓗᑎᒃ ᐅᖃᓪᓚᐃᓐᓇᖃᑦᑕᖅᑐᓂ ᐅᖃᐅᓯᕐᓂᒃ ᐊᒻᒪ ᑎᑎᕋᖅᓯᒪᔪᒥᒃ ᓲᕐᓗ ᑐᑭᓕᐅᖅᓯᒪᔪᒥᒃ, ᐅᖃᐅᓯᓕᕆᔪᓂ ᐊᒻᒪ ᑎᑎᕋᐅᓯᓕᕆᔪᓂᒃ ᐅᖃᐅᓯᕐᓂᒃ, ᐱᔾᔪᑎᖃᕋᓱᐊᖅᑎᓪᓗᒋᑦ ᐊᓯᖏᓐᓂᒃ, ᐅᖃᓪᓚᐃᓐᓇᖃᑦᑕᕈᓐᓇᕐᓂᖅ ᐊᒻᒪ ᑐᓴᐅᒪᖃᑦᑕᐅᑎᖃᑦᑕᕐᓂᕐᒧᑦ ᐅᖃᐅᓯᕐᓂᑦ,
  • (iv) ᐃᑲᔪᖅᓱᕐᓗᒋᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐃᓕᓐᓂᐊᕐᓗᑎᒃ ᐊᒻᒪ ᐃᓕᖅᑯᓯᓕᕆᑎᓪᓗᒋᑦ - ᐱᖃᐅᑎᕗᖅ ᓱᕈᓯᕐᓄᑦ ᐅᖃᐅᓯᓕᕆᓂᕐᒧᑦ, ᐃᓕᓐᓂᐊᖅᑎᑦᑎᔨᑖᕐᓂᖅ ᐊᒻᒪ ᒪᕐᕉᖕᓂᑦ ᐅᖃᐅᓯᖅᑖᕋᓱᐊᖅᑐᓂ ᐃᓕᓐᓂᐊᕈᑎᓂᒃ − ᐅᓄᖅᓯᒋᐊᑲᓐᓂᖁᓗᒋᑦ ᐅᖃᐅᕆᐅᖅᑐᓂ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ,
  • (v) ᐃᑲᔪᖅᓱᕐᓗᒋᑦ ᑲᑐᔾᔨᓇᓱᐊᖅᑐᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐊᒻᒪ
  • (vi) ᕿᒥᕐᕈᔪᖃᕈᒪᑎᓪᓗᒍ ᖃᐅᔨᓴᖅᑐᖃᕈᒪᑎᓪᓘᓐᓃᑦ ᐅᖃᐅᓯᖏᓐᓂᒃ ᐱᓪᓗᒋᑦ;
• (c) ᐋᖅᑭᒃᓱᐃᓇᓱᐊᖅᑎᓪᓗᒋᑦ ᐊᔪᓐᓇᕈᓐᓃᖅᐸᓪᓕᖅᑎᓪᓗᒍᑦ ᐱᓕᕆᐊᖃᕋᓱᐊᖅᑎᓪᓗᒋᑦ ᐱᔪᓐᓇᐅᑎᖏᓐᓄᑦ ᐃᓄᖏᑦ ᐅᖃᐅᓯᖏᓐᓄᑦ ᑐᕌᖓᑎᓪᓗᒍ, ᐱᖃᑕᐅᕗᖅ ᐊᖏᕈᑎᓕᐅᕐᓂᒃᑯᑦ ᐋᖅᑭᒃᓱᐃᓇᓱᐊᖅᑎᓪᓗᒋᓪᓘᓐᓃᑦ ᑕᐃᑲᓂ ᐃᓚᖏᑦ 8 ᐊᒻᒪ 9−ᒦᑦᑐᓂᒃ;
• (d) ᐊᑐᖅᑕᐅᔪᓐᓇᖅᑐᓂ ᐊᔪᕈᓐᓇᕈᓐᓃᖅᐸᓪᓕᖅᑎᑦᑎᓇᓱᐊᖅᑎᓪᓗᒋᑦ ᒪᓕᒐᖅᑎᒎᖓᔪᓂ, ᑲᔪᓯᑏᓐᓇᖁᓗᒍ ᐊᑯᓂᐅᓂᐊᖅᑐᒥᒡᓗ ᑮᓇᐅᔭᖃᖅᑎᑕᐅᓗᑎᒃ, ᐅᑎᖅᑎᑦᑎᓇᓱᐊᖅᑎᓪᓗᒋᑦ, ᐅᖃᐅᓯᕐᒥᓂᒃ ᐊᑐᓕᒃᑲᓐᓂᕋᓱᐊᖅᑎᓪᓗᒋᑦ, ᐅᖃᓪᓚᒍᓐᓇᐃᓐᓇᕐᓗᑎᒃ ᓴᙱᓂᖅᑖᕐᓗᓂᓗ ᐅᖃᐅᓯᖏᑦ;
• (e) ᐃᑲᔪᖅᑕᐅᓗᑎᒃ ᑲᑐᔾᔨᖃᑎᒌᒐᓱᐊᖅᑎᓪᓗᒋᑦ ᓄᓇᓕᖕᓂᑦ ᐊᕕᒃᑐᖅᓯᒪᔪᒥᒃ ᐅᑭᐅᖅᑕᖅᑐᒥᒡᓗ ᒐᕙᒪᖏᑦ, ᓄᓇᖃᖅᑳᖅᓯᒪᔪᑦ ᒐᕙᒪᖏᑦ ᐊᓯᖏᓪᓗ ᓄᓇᖃᖅᑳᖅᓯᒪᔪᒃ ᑎᒥᐅᔪᑦ, ᑲᑐᔾᔨᖃᑎᒌᖑᔪᑦ ᐊᓯᖏᓪᓗ ᐱᓕᕆᐊᖃᕋᓱᐊᖅᑐᓂ ᐱᔪᓐᓇᐅᑎᖏᓐᓄᑦ ᐱᔪᓐᓇᕐᓂᖏᓐᓄᓪᓗ ᐊᒻᒪ ᒪᓕᒐᕐᓂᑦ ᐊᐅᓚᑕᐅᔪᓂ ᓄᓇᖃᖅᑳᖅᓯᒪᔪᒃ ᐊᐅᓚᑦᑎᔨᖏᑕ ᑎᒥᖏᓐᓄᑦ ᑖᒃᑯᓄᖓ;
• (e.1) ᐃᑲᔪᖅᑕᐅᓗᑎᒃ ᐊᑐᐃᓐᓇᐅᑎᑦᐊᕈᓐᓇᖅᑐᓂ ᓄᓇᖃᖅᑳᖅᓯᒪᔪᑦ ᒐᕙᒪᖏᑦ ᐊᓯᖏᓪᓗ ᓄᓇᖃᖅᑳᖅᓯᒪᔪᒃ ᑎᒥᐅᔪᑦ ᑲᑐᔾᔨᖃᑎᒌᖏᓪᓗ ᐊᑐᐊᒐᓕᐅᖃᑎᒌᒐᓱᐊᖅᑎᓪᓗᒋᑦ ᑐᕌᖓᔪᒥᒃ ᑕᕝᕙᓂ ᐱᖁᔭᖓᓂᙶᖅᑐᒥᒃ;
• (f) ᑭᐅᔭᐅᔪᓐᓇᖁᓗᒍ ᓱᓕᓂᕐᒧᑦ ᐋᖅᑭᐅᒪᖃᑦᑕᐅᑎᓕᕆᓂᕐᒧᓪᓗ ᑲᑎᒪᔨᖏᓐᓄᑦ ᑲᓇᑕᐅᒥᑦ ᐱᓕᕆᐊᖃᓱᐊᖅᑎᓪᓗᒋᑦ ᓈᓴᐅᑎᖏᓐᓃᑦᑐᓂᒃ 13−ᒥᑦ 15−ᒧᑦ; ᐊᒻᒪ
• (g) ᐃᑲᔪᖅᑕᐅᓇᓱᒡᓗᑎᒃ ᐱᓕᕆᐊᖃᓱᐊᖅᑎᓪᓗᒋᑦ ᓯᓚᕐᔪᐊᒥᐅᓄᑦ ᑲᑐᔾᔨᖃᑎᒌᖏᓄᑦ ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᓯᒪᔪᒃ ᑐᕌᖓᓗᑎᒃ ᐅᖃᐅᓯᖏᓐᓂᒃ.

ᐱᔪᓐᓇᐅᑎᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᑐᕌᖓᔪᑦ

Marginal note: ᐃᓕᓴᕆᔭᐅᓯᒪᕗᖅ ᑲᓇᑕᐅᑉ ᒐᕙᒪᖓᓂ

6 ᑲᓇᑕᐅᑉ ᒐᕙᒪᖓᑦ ᐃᓕᓴᕆᕚ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᔪᑦ ᐊᖏᖅᓯᒪᔭᖏᓪᓗ ᑕᐃᑲᓂ ᐃᓚᖓ 35−ᒥᑦ ᐱᖁᔭᕐᔪᐊᖅ ᐱᖁᔭᖓᓂ, 1982−ᒥᑦ ᐱᖃᑕᐅᓗᑎᒃ ᐱᔪᓐᓇᐅᑎᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ.

ᒥᓂᔅᑕᐅᑉ ᐱᔪᓐᓇᕐᓂᖏᑦ, ᐱᔭᒃᓴᖏᑦ ᐱᓕᕆᐊᒃᓴᖏᓪᓗ

Marginal note: ᐅᖃᖃᑎᖃᑦᑕᐅᑎᓂᖅ − ᐱᓕᕆᑦᑎᐊᕈᓐᓇᖁᓗᒋᑦ, ᒪᑭᒪᑦᑎᐊᕐᓗᓂ ᐊᑯᓂᐅᓂᖅᑐᒥᒡᓗ ᑮᓇᐅᔭᖃᖅᑎᑕᐅᓗᑎᒡᓗ

7 ᒥᓂᔅᑕ ᐅᖃᖃᑎᖃᕆᐊᖃᖅᐳᖅ ᐊᔾᔨᒌᖏᑦᑐᓂ ᓄᓇᖃᖅᑳᖅᓯᒪᔪᑦ ᒐᕙᒪᖏᓐᓂᒃ ᐊᓯᖏᓪᓗ ᓄᓇᖃᖅᑲᖅᓯᒪᔪᑦ ᐊᐅᓚᑕᖏᓐᓂᒃ ᐊᓯᖏᓐᓂᒡᓗ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓂᒃ ᐱᓕᕆᑦᑎᐊᕈᓐᓇᖁᓗᒋᑦ, ᒪᑭᒪᑦᑎᐊᕈᓐᓇᖁᓗᒋᑦ ᐊᑯᓂᐅᓂᐊᖅᑐᒥᒡᓗ ᑮᓇᐅᔭᖃᖅᑕᐅᓗᑎᒃ ᐅᑎᖅᑎᑦᑎᓇᓱᐊᖅᑎᓪᓗᒋᑦ, ᐅᖃᐅᓯᕐᒥᓂ ᐊᑐᓕᒃᑲᓐᓂᕋᓱᐊᖅᑎᓪᓗᒋᑦ, ᐅᖃᐅᓯᕆᔭᐅᖏᓐᓇᕐᓗᓂ ᓴᙱᓂᖅᑖᖅᑎᑕᐅᓗᑎᒡᓗ ᐅᖃᐅᓯᖏᑦ.

Marginal note: ᑲᑐᔾᔭᐅᓗᑎᒃ ᐃᑲᔪᖅᑕᐅᔪᓐᓇᖁᓗᒋᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ

8 ᒥᓂᔅᑕ ᑲᑐᔾᔨᖃᑎᖃᑐᐃᓐᓇᕆᐊᓕᒃ ᓄᓇᓖᑦ ᐊᕕᒃᑐᖅᓯᒪᔪᓂ ᐅᑭᐅᖅᑕᖅᑐᒥᒡᓘᓐᓃᑦ ᒐᕙᒪᖏᓐᓂᒃ, ᓄᓇᖃᖅᑳᖅᓯᒪᔪᑦ ᒐᕙᒪᖏᓐᓂᒃ ᐊᓯᐊᖏᓪᓘᓐᓃᑦ ᓄᓇᖃᖅᑳᖅᓯᒪᔪᒃ ᑎᒥᖏᓐᓂᒃ, ᓄᓇᖃᖅᑲᖅᓯᒪᔪᒃ ᑲᑐᔾᔨᖃᑎᒌᖏᓐᓂᒃ ᐊᓯᖏᓪᓘᓐᓃᑦ ᓇᖕᒥᓂᖅᓱᖅᑐᓂ − ᐱᖃᑕᐅᕗᖅ ᐊᖏᕈᓕᐅᕐᓂᖅ ᐋᖅᑭᒃᓱᐃᓂᕐᓘᓐᓃᑦ ᐱᔾᔪᑎᖏᓐᓂᒃ ᓲᕐᓗ ᐃᓕᓐᓂᐊᕈᑎᓕᐅᕐᓂᖅ ᐱᔨᑦᑎᐅᑎᓕᐅᕐᓂᕐᓗ ᐃᓕᓐᓂᐊᖅᑐᓕᕆᓂᕐᒧᑦ, ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᐅᓚᑦᑎᓇᓱᐊᖅᑎᓪᓗᒋᓪᓗ ᒪᓕᒐᓕᕆᓂᕐᒧᑦ − ᑲᑐᔾᔨᖃᑎᒌᓕᕋᓱᐊᖅᑎᓪᓗᒋᑦ ᐃᑲᔪᖅᓱᖅᑕᐅᑦᑎᐊᕐᓗᑎᒃ ᓄᓇᖃᖅᑳᖅᓯᔪᑦ ᐅᖃᐅᓯᖏᑦ ᑲᓇᑕᒥᑦ ᑕᐃᒪᓐᓇ ᒪᓕᒐᓱᐊᖅᑐᓂ ᐱᔪᓐᓇᐅᑎᖏᓐᓄᑦ ᐃᓕᓴᕆᔭᐅᓯᒪᔪᑦ ᐊᖏᖅᑕᐅᓯᒪᓪᓗᑎᒡᓗ ᐃᓚᖓ 35−ᒥᑦ ᐱᖁᔭᕐᔪᐊᖅ ᐱᖁᔭᖓᓂ, 1982−ᒥᑦ ᐱᔪᓐᓇᕐᓂᖏᓐᓄᓪᓗ ᒪᓕᒐᑦ ᐊᐅᓚᑕᐅᔪᓂᒡᓗ ᓄᓇᖃᖅᑳᖅᓯᒪᔪᑦ ᑎᒥᖏᓐᓄᑦ ᐊᒻᒪ ᓄᓇᓖᑦ ᐊᕕᒃᑐᖅᓯᒪᔪᓂ ᐅᑭᐅᖅᑕᖅᑐᒥᐅᑕᓪᓗ.

Marginal note: ᐊᖏᕈᑎᑦ ᐋᖅᑭᒃᓱᖅᑕᐅᓯᒪᔪᓪᓘᓐᓃᑦ − ᐱᖁᔭᐅᑉ ᐱᔾᔪᑎᖏᑦ

9 ᐊᔾᔨᐅᖏᑦᑐᒥᑦ ᐱᓕᕆᐊᖃᕋᓱᖕᓂᖅ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᒌᓯᐅᓂᒃ ᐱᓕᕆᐊᖃᖅᑎᓪᓗᒋᑦ, ᓄᓇᓕᖕᓂᑦ ᐃᓄᖕᓂᒡᓗ ᐊᒻᒪ ᕿᒥᕐᕈᓇᓱᐊᖅᑐᓂ ᖃᐅᔨᓴᖅᑐᓂᒡᓘᓐᓃᑦ ᓇᓗᓇᐃᖅᓯᒪᔮᓂ ᑕᐃᑲᓂ ᐃᓚᖓ 24−ᒥᑦ ᑕᐃᑲᓂ ᓇᓗᓇᐃᖅᓯᔪᓂ ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᓯᒪᔪᑦ ᐃᓕᓴᕆᓯᒪᔮᓂ ᐊᖏᖅᓯᒪᔭᖓᓂᒡᓗ ᐃᓚᖓ 35−ᒥᑦ ᐱᖁᔭᕐᔪᐊᖅ ᐱᖁᔭᖓᓂ, 1982−ᒥᑦ ᐱᔪᓐᓇᕐᓂᖏᓐᓂᒡᓗ ᒪᓕᒐᕐᓂᑦ ᐊᐅᓚᑕᐅᔪᓂᒃ ᓄᓇᖃᖅᑳᖅᓯᒪᔪᑦ ᑎᒥᖏᓐᓂᒃ ᓄᓇᓕᖕᓂᒡᓗ ᐊᕕᒃᑐᖅᓯᒪᔪᓂᒃ ᐊᒻᒪ ᐅᑭᐅᖅᑕᖅᑐᒥᑦ, ᒥᓂᔅᑕ ᒥᓂᔅᑕᐅᔪᕐᓗ ᐊᖏᕈᑎᐅᓕᐅᑐᐃᓐᓇᕆᐊᓕᒃ ᐋᖅᑭᒃᓱᐃᓗᓂᓘᓐᓂᑦ ᐱᔾᔪᑎᖏᓐᓂᒃ ᑕᔅᓱᒪ ᐱᖁᔭᐅᑉ ᑖᒃᑯᓂᖓ ᐱᓕᕆᐊᖃᕐᓗᓂ ᓄᓇᓕᖕᓂᑦ ᐊᕕᒃᑐᖅᓯᒪᔪᓂᒃ ᐅᑭᐅᖅᑕᖅᑐᒥᒡᓘᓐᓃᑦ ᒐᕙᒪᖏᓐᓂᒃ, ᓄᓇᖃᖅᑳᖅᓯᔪᑦ ᒐᕙᒪᖓᓂ ᐊᓯᖏᓐᓂᒡᓘᓐᓂᑦ ᓄᓇᖃᖅᑳᖅᓯᒪᔪᑦ ᑎᒥᐅᔪᒥᒃ ᓄᓇᖃᖅᑳᖅᓯᒪᔪᓪᓘᓐᓃᑦ ᑲᑐᔾᔨᖃᑎᖃᓂ.

Marginal note: ᐊᓯᐊᓂ ᐊᖏᕈᑎᑦ

10 ᓇᓗᓇᐃᖅᓯᒃᑲᓐᓂᕐᓗᒍ, ᐃᓚᖏᑦ 8 ᐊᒻᒪ 9, ᐊᖏᕈᑎᑐᐃᓐᓇᕐᒥᒡᓗ ᐃᓚᖏᓐᓂᒃ ᓇᓗᓇᐃᖅᑕᖏᓐᓂᒃ, ᓄᖃᖓᑎᑦᑎᒐᔭᖏᑦᑐᑦ

• (a) ᑭᓇᑐᐃᓐᓇᕐᒥᑦ ᐅᕝᕙᓘᓐᓃᑦ ᒪᓕᒐᕐᒥᑦ ᑕᑎᖃᖅᑐᖃᖅᑎᓪᓗᒍ ᐅᑎᖅᑎᑦᑎᓇᓱᐊᕈᒪᔪᒥᒃ, ᐅᖃᐅᓯᕐᒥᓂᒃ ᐊᑐᓕᒃᑲᓐᓂᕈᒪᔪᓂᒃ, ᐅᖃᐅᓯᖃᐃᓐᓇᕈᒪᔪᒥᒃ ᓴᙱᓂᖅᑖᖅᑎᑦᑎᔪᒪᔪᒥᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᐊᓂ ᐊᖏᕈᑎᓃᑦᑐᓂᒃ − ᐱᖃᑕᐅᕗᖅ ᓄᓇᑖᕈᑎᒧᑦ ᑐᒃᓯᕋᐅᑎᒥᒃ ᐊᖏᕈᑎᒥᒃ − ᐅᕝᕙᓘᓐᓃᑦ ᓇᖕᒥᓂᖅ ᒐᕙᒪᑖᕐᓂᕐᒧᑦ ᐊᖏᕈᑎᒥᒃ; ᐅᕝᕙᓘᓐᓃᑦ
• (b) ᓄᓇᖃᖅᑳᖅᓯᒪᔪᑦ ᒐᕙᒪᖓᑦ ᐊᓯᖏᓪᓂᒡᓘᓐᓃᑦ ᑎᒥᐅᔪᒥᒃ ᐊᖏᕈᑎᓕᐅᖅᑎᓪᓗᒋᑦ, ᑲᓇᑕᐅᑉ ᒐᕙᒪᖓᓂ ᒐᕙᒪᖏᑕᓘᓐᓂᑦ ᓄᓇᓖᑦ ᐊᕕᒃᑐᖅᓯᒪᔪᓂᒃ ᐅᑭᐅᖅᑕᖅᑐᒥᒡᓘᓐᓃᑦ − ᐱᖃᑕᐅᓗᑎᒃ ᓄᓇᑖᕈᑎᒧᑦ ᑐᒃᓯᕋᐅᑎᒥᒃ ᐊᖏᕈᐊᓂ − ᐅᕝᕙᓘᓐᓃᑦ ᓇᖕᒥᓂᖅ ᒐᕙᒪᑖᕈᑎᒧᑦ ᐊᖏᕈᑎᐊᓂ ᐃᓗᓕᖃᖅᖢᓂ, ᐊᓯᐊᒎᑦᑕᐅᖅ ᐱᔾᔪᑎᖃᖅᑐᓂ, ᐅᑎᖅᑎᑦᑎᓇᓱᐊᕐᓂᕐᒧᑦ, ᐅᖃᐅᓯᕐᒥᒃ ᐊᑐᓕᒃᑲᓐᓂᕋᓱᐊᖅᑐᓂᒃ, ᐅᖃᐅᓯᖃᐃᓐᓇᕐᓂᕐᒧᑦ ᓴᙱᓐᓂᖅᑕᕐᓂᕐᒧᓘᓐᓃᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᐊᓂ.

ᒐᕙᒪᑐᖃᒃᑯᑦ ᐱᓕᕆᕝᕕᖏᑦ

Marginal note: ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐱᔨᑦᑎᖅᑕᐅᓂᖅ

10.1  ᒐᕙᒪᑐᖃᒃᑯᑦ ᐱᓕᕆᕝᕕᐊᓂ ᑭᒡᒐᖅᑐᐃᕕᐊᓂᒡᓘᓐᓃᑦ ᐅᕝᕙᓘᓐᓂᑦ ᓇᖕᒥᓂᖅ ᑭᒡᒐᖅᑐᐃᔪᒥᒃ ᐃᒪᓐᓇᐃᓕᐅᑐᐃᓐᓇᕆᐊᓖᑦ, ᒪᓕᒡᓗᒍ ᐊᑐᐊᒐᕐᓂᑦ, ᐱᔨᑦᑎᕈᓐᓇᖅᑐᒥᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᐊᓂ, ᐱᓕᕆᕝᕕᐊᓂᑦ ᑭᒡᒐᖅᑐᐃᕕᐊᓂᒡᓘᓐᓂᑦ ᐅᕝᕙᓘᓐᓃᑦ ᓇᖕᒥᓂᖅ ᑭᒡᒐᖅᑐᐃᔪᒥᒃ ᐱᓕᕆᐊᖃᕈᓐᓇᖅᑐᑦ ᐊᒻᒪ ᐱᔨᑦᑎᐅᑎᒃᓴᖃᕐᔪᐊᖅᐳᑦ ᐅᖃᐅᓯᓕᕆᔪᓂᒃ.

Marginal note: ᐊᖏᕈᑎᑦ ᐋᖅᑭᒃᓱᖅᑕᐅᓯᒪᔪᓪᓗ

• 10.2 (1) ᑕᐃᑲᓂ ᐃᓚᖓ 8 ᐅᕝᕙᓘᓐᓃᑦ 9−ᒥᑦ ᐊᖏᕈᑎᓕᐅᑐᐃᓐᓇᕆᐊᓖᑦ ᐋᖅᑭᒃᓱᐃᓗᑎᒡᓘᓐᓃᑦ ᐱᔪᓐᓇᖅᓯᑎᑦᑎᓗᑎᒃ ᒐᕙᒪᑐᖃᒃᑯᓂᖔᕐᕕᖕᒥᑦ ᑭᒡᒐᖅᑐᐃᔭᖓᓂᒡᓘᓐᓃᑦ ᐅᕝᕙᓘᓐᓃᑦ ᐱᔨᑦᑎᖅᑕᐅᔭᕆᐊᖃᓪᓚᕆᒃᑐᓂ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ.

• Marginal note: ᐊᔾᔨᒌᖏᓐᓂᕆᔭᖓ ᐊᑲᐅᓕᐅᕈᑎᓪᓘᓐᓃᑦ

  (2) ᑕᐃᑲᓂ ᐃᓚᒃᑲᓐᓂᖓᓂ (1)−ᒥᑦ ᐊᑐᐊᒐᖏᓐᓂᓪᓗ ᑕᐃᑲᓂ ᑎᑎᕋᖅᓯᒪᔪᖅ 45(1)(a.2)-ᒥᑦ ᐊᔾᔨᒌᖏᓐᓂᖃᖅᑎᓪᓗᒍ ᐊᑲᐅᓕᐅᕈᑎᑕᖃᖅᑎᓪᓗᒍᓘᓐᓃᑦ ᐊᖏᕈᑎᒥᑦ, ᐊᖏᕈᑎ ᐋᖅᑭᒃᓯᒪᔪᓪᓘᓐᓃᑦ ᐱᑕᖃᓯᐅᖑᕗᖅ.

Marginal note: ᑐᑭᓕᐅᕐᓂᖅ ᑐᓵᔨᖃᕐᓂᕐᓗ

11 ᒐᕙᒪᑐᖃᒃᑯᓐᓂᖔᕐᕕᖕᒥᑦ ᐱᓕᕆᐊᖃᑐᐃᓐᓇᕆᐊᓖᑦ

• (a) ᓄᓇᖃᖅᑳᖅᓯᒪᔪᑦ ᐅᖃᐅᓯᖓᓂ ᖃᓄᑐᐃᓐᓇᖅ ᑎᑎᖅᑲᒥᒃ ᑐᑭᓕᐅᖅᑕᐅᔪᖃᕐᓗᓂ; ᐅᕝᕙᓘᓐᓃᑦ
• (b) ᑐᓵᔨᑕᖃᕆᐊᖃᕐᓂᕈᑎᒃ ᐃᑲᔫᑎᐅᔪᓐᓇᖁᓗᒍ ᓄᓇᖃᖅᑳᖅᓯᒪᔫᑉ ᐅᖃᐅᓯᖓᓂ ᒐᕙᒪᖃᒃᑯᑦ ᐱᓕᕆᕝᕕᐊ ᐱᓕᕆᐊᖃᖅᑎᓪᓗᒋᑦ.

ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᑲᒥᓯᓇᐅᑉ ᑎᑎᕋᕐᕕᖓ

ᑎᑎᕋᕐᕕᖓ

Marginal note: ᑎᑎᕋᕐᕕᖓ

• 12 (1) ᑎᑎᕋᕐᕕᒃᑕᖃᖅᐳᖅ ᖃᐅᔨᒪᔭᐅᓪᓗᓂᓗ ᑎᑎᕋᕐᕕᖓ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᑲᒥᓯᓇᐅᑉ, ᐃᓚᖃᖅᖢᑎᒃ ᑲᒥᓯᓇ ᐱᖓᓱᓂᓪᓗ ᑐᑭᒧᐊᒃᑎᓂ.

• Marginal note: ᖃᓄᐃᑦᑑᓂᖓ

  (2) ᑎᑎᕋᕐᕕᖓ ᑭᒡᒐᖅᑐᐃᔨᐅᖏᓚᖅ ᑭᖕ ᑲᓇᑕᐅᑉ ᐱᔪᓐᓇᐅᑎᓄᑦ ᐊᐅᓚᑦᑎᖏᓚᖅ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᐱᖁᔭᖓᓂ, ᑲᒥᓯᓇᖓᓂᒡᓗ, ᑐᑭᒧᐊᒃᑎᑦᑎᔨᓂᒃ ᐃᖅᑲᓇᐃᔭᖅᑎᓂᒡᓗ ᐃᓚᒋᔭᐅᖏᓚᓪᓗ ᒐᕙᒪᑐᖃᒃᑯᑦ ᐃᓄᖕᓄᑦ ᐊᐅᓚᑦᑎᕕᖏᓐᓂᒃ.

Marginal note: ᑲᒥᓯᓇ ᓂᕈᐊᖅᑕᐅᓂᖓ

13 ᒥᓂᔅᑕ ᐱᖁᔨᑎᓪᓗᒍ ᐅᖃᖃᑎᖃᕇᖅᓯᒪᓕᖅᑎᓪᓗᒍ ᐊᔾᔨᒌᖏᑦᑐᓂ ᓄᓇᖃᖅᑳᖅᓯᒪᔪᑦ ᒐᕙᒪᖏᓐᓂ ᐊᓯᖏᓐᓂᒡᓗ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓂᒡᓗ, ᐊᐅᓚᑦᑎᔨᖓᑦ ᑲᑎᒪᔨᓂᒃ ᓂᕈᐊᕆᐊᖃᖅᐳᖅ ᑲᒥᓯᓇᒥᒃ ᑎᑎᕋᕐᕕᐊᓂ ᐱᓕᕆᐊᑦᑎᐊᕈᓐᓇᖅᑎᓪᓗᒍ ᐊᕐᕌᒍᑦ ᑕᓪᓕᒫᑦ ᐅᖓᑖᓂᐅᖏᑦᑐᖅ, ᖃᖓᑐᐃᓐᓇᕐᓗ ᑖᒃᑯᓇᓂ ᒥᓂᔅᑕᐅᔪᓐᓃᖅᑎᑕᐅᔪᓐᓇᖅᖢᓂ.

Marginal note: ᐅᖃᐅᔾᔨᔩᑦ ᑲᑎᒪᔨᕋᓛᖏᑦ

13.1  ᒥᓂᔅᑕ ᑲᑎᒪᔨᕋᓛᖅᑖᖅᑎᑦᑎᑐᐃᓐᓇᕆᐊᓕᒃ ᐅᖃᐅᔾᔨᖅᑕᐅᔪᓐᓇᖁᓗᒍᑦ ᑲᒥᓯᓇᐅᑉ ᓂᕈᐊᖅᑕᓂᒃ.

Marginal note: ᐊᐅᓚᑦᑎᔨᒻᒪᕆᕐ

14 ᑲᒥᓯᓇ ᑎᑎᕋᕐᕕᐊᓂ ᐊᐅᓚᑦᑎᔨᒻᒪᕆᐅᕗᖅ ᐊᐅᓚᑦᑎᔪᓐᓇᖅᖢᓂᓗ ᖃᓄᑐᐃᓐᓇᕐᓗ ᐱᔾᔪᑕᐅᔪᓂ.

Marginal note: ᑲᒥᓯᓇ ᐱᑕᖃᖏᑎᓪᓗᒍ ᐱᓕᕆᐊᖃᕈᓐᓇᖏᑎᓪᓗᒍᓘᓐᓃᑦ

15 ᑲᒥᓯᓇ ᐱᓕᕆᐊᖃᕈᓐᓇᖏᑎᓪᓗᒍ ᑎᑎᕋᕐᕕᖓᓂᒡᓘᓐᓃᑦ ᐃᓄᖃᖏᑎᓪᓗᒍ, ᒥᓂᔅᑕ ᓂᕈᐊᑐᐃᓐᓇᕆᐊᓕᒃ ᑲᒥᓯᓇᐅᑉ ᐱᓕᕆᐊᕆᒐᔭᖅᑕᖓᓂ, ᑭᓯᐊᓂ ᑲᒥᓯᓇᐅᑉ ᐱᓕᕆᐊᒃᓴᖓᓂ ᐱᓕᕆᐊᖃᕈᓐᓇᖅᑐᖅ ᐅᓪᓗᓂ 90−ᓂᑦ ᐊᖏᖅᑕᐅᓯᒪᒃᐸᑦ ᑭᓯᐊᓂ ᐊᐅᓚᑦᑎᔨᖓᑕ ᑲᑎᒪᔩᑦ ᒥᓂᔅᑕ ᐱᖁᔭᖓᑎᒍᑦ ᒪᓕᒡᓗᒍ ᐅᖃᖃᑎᖃᕇᖅᓯᒪᓕᖅᑎᓪᓗᒍ ᓄᓇᖃᖅᑳᖅᓯᒪᔪᑦ ᒐᕙᒪᖏᓐᓂᒃ ᐊᓯᖏᓪᓗ ᑎᒥᐅᔪᓂ ᑲᑐᔾᔨᖃᑎᒌᖏᓐᓂᒡᓗ.

Marginal note: ᑐᑭᒧᐊᒃᑎᑦᑎᔨᑦ ᓂᕈᐊᖅᑕᐅᑎᓪᓗᒋᑦ

• 16 (1) ᒥᓂᔅᑕ ᐱᖁᔨᑎᓪᓗᒍ ᐅᖃᖃᑎᖃᕇᖅᓯᒪᓕᖅᑎᓪᓗᒍᓗ ᓄᓇᖃᖅᑳᖅᓯᒪᔪᑦ ᒐᕙᒪᖏᓐᓂᒃ ᐊᓯᖏᓐᓂᒡᓗ ᑎᒥᐅᔪᓂ ᑲᑐᔾᔨᖃᑎᒌᖏᓐᓂᒡᓗ, ᐊᐅᓚᑦᑎᔨᖓ ᑲᑎᒪᔨᑦ ᓂᕈᐊᕋᔭᖅᑐᖅ ᐱᖓᓱᓂ ᑐᑭᒧᐊᒃᑎᑦᑎᔨᓂ ᑲᒪᔪᓐᓇᕋᔭᖅᑐᓂ ᑎᑎᕋᕐᕕᐊᓂ ᑕᓪᓕᒪᑦ ᐊᕐᕌᒍᑦ ᐅᖓᑖᓂᐅᖏᑦᑐᖅ ᑭᓯᐊᓂ.

• Marginal note: ᐊᓪᓚᑦ, ᐃᓄᐃᑦ ᐊᓪᓚᖓᔪᓪᓗ ᐱᓪᓗᒋᑦ

  (2) ᑕᐃᑲᓂ ᐃᓚᒃᑲᓐᓂᖓ (1)−ᒥᑦ ᐃᓱᒪᒃᓴᖅᓯᐅᓚᐅᖏᓐᓂᖏᓂᒃ, ᒥᓂᔅᑕ ᑐᓴᕋᓱᒋᐊᓕᒃ ᐊᐅᓚᑦᑎᔨᐊᓄᑦ ᑲᑎᒪᔨᓂ ᓂᕈᐊᕈᓐᓇᖅᑐᓂ ᐃᓄᖕᓂᑦ ᑭᒡᒐᖅᑐᐃᔪᓐᓇᖅᑐᓂ ᐊᓪᓚᑦ, ᐃᓄᐃᑦ ᐊᓪᓚᖓᔪᓂᒡᓗ ᐱᓪᓗᒋᑦ.

Marginal note: ᓂᕈᐊᖅᑕᐅᑲᒃᓂᕐᓂᖅ

17 ᑲᒥᓯᓇ ᑐᑭᒧᐊᒃᑎᑦᑎᔨᓪᓗ ᓂᕈᐊᖅᑕᐅᒃᑲᓐᓂᑐᐃᓐᓇᕆᐊᓖᑦ ᒪᕐᕈᐃᖅᓱᕐᓗᑎᒃ ᐅᖓᑖᓂᒡᓘᓐᓃᑦ ᑎᑎᕋᕐᕕᐊᓂ.

Marginal note: ᖃᓄᐃᑦᑑᓂᖓ

18 ᑲᒥᓯᓇ ᑐᑭᒧᐊᒃᑎᑦᑎᔨᖏᓪᓗ ᑎᑎᕋᕐᕕᐊᓂ ᐊᐅᓚᑦᑎᔨᐅᕗᑦ ᐃᖅᑲᓇᐃᔭᕐᓇᐅᑎᓪᓗᒍ.

Marginal note: ᐊᑭᓕᐅᑎᒃᓴᑦ

• 19 (1) ᑲᒥᓯᓇ ᑐᑭᒧᐊᒃᑎᑦᑎᔨᓪᓗ ᐊᑭᓕᖅᑕᐅᒐᔭᖅᑐᑦ ᐊᐅᓚᑦᑎᔨᖓᑕ ᑲᑎᒪᔨᓄᑦ ᐃᓱᒪᒋᔭᕐᒥᒍᑦ ᒪᓕᒡᓗᓂ.

• Marginal note: ᐊᑭᓕᒃᓴᑦ

  (2) ᑲᒥᓯᓇ ᑮᓇᐅᔭᕐᓂᑦ ᐅᑎᖅᑎᑦᑎᕕᐅᒋᐊᖃᖅᐳᖅ ᐊᓯᐊᖏᓂᒡᓗ ᐊᑭᓕᒃᓴᓂ ᐱᔭᒃᓴᖏᓐᓂᒃ ᐱᓕᕆᐊᖃᖅᑎᓪᓗᒍ ᑲᒥᓯᓇ ᐃᖅᑲᓇᐃᔭᕐᕕᒋᒐᔪᒃᑕᖓᓃᖏᑦᑕᕌᖓᒥᒃ. ᑐᑭᒧᐊᒃᑎᑦᑎᔨ ᑮᓇᐅᔭᕐᓂᑦ ᐊᑎᖅᑎᑦᑎᕕᐅᒋᐊᓖᑦ ᐊᑭᓕᒃᓴ ᐱᓕᕆᒃᓴᖏᓐᓂᒃ ᐱᓕᕆᐊᖃᖅᑎᓪᓗᒋᑦ ᑕᐃᑲᓂ ᐃᖅᑲᓇᐃᔭᕐᕕᒋᒐᔪᒃᑕᖓᓃᖏᑦᑕᕌᖓᒥᒃ.

Marginal note: ᐃᖅᑲᓇᐃᔭᖅᑎᑦ

20 ᑎᑎᕋᕐᕕᐊᓂ ᐃᖅᑲᓇᐃᔭᖅᑎᑖᖅᑐᑐᐃᓐᓇᕆᐊᓖᑦ ᑲᔪᓯᔪᓐᓇᖁᓗᒍ ᐱᓕᕆᐊᒃᓴᑦ ᐱᔭᒃᓴᖏᓪᓗ ᖃᓄᐃᑦᑑᓂᖏᓪᓗ ᐃᖅᑲᓇᐃᔭᖕᒥᓂᒃ, ᐱᖃᑕᐅᕗᖅ ᐊᑭᓕᐅᑎᒃᓴᖏᓐᓄᑦ ᐃᑲᔫᑎᒃᓴᖏᓐᓄᓪᓗ.

Marginal note: ᐃᒻᒥᒃᑯᑦ ᐊᑲᐅᓕᐅᕈᑎᖃᕐᓂᖅ

21 ᑲᒥᓯᓇ, ᑐᑭᒧᐊᒃᑎᑦᑎᔨ ᐃᖅᑲᓇᐃᔭᖅᑎᓪᓗᒍ ᑎᑎᕋᕐᕕᐊᓂ ᐊᖏᕆᐊᖃᖏᑉᐳᒃ ᐊᐅᓚᑦᑎᔨᐅᓗᑎᒡᓗᓐᓃᑦ ᐅᕝᕙᓘᓐᓃᑦ ᐃᖅᑲᓇᐃᔮᒥᖕᓂᒃ ᐱᔭᒃᓴᕆᖏᑕᒥᓂ ᖃᓄᑐᐃᓐᓇᕐᓗ ᐱᓕᕆᐊᕆᔭᕆᐊᖃᖏᑕᖓᓂ ᐊᒻᒪ ᑕᐃᒪᓐᓇ ᐱᓇᓱᐊᕈᒪᔭᖏᓐᓂᒃ

Marginal note: ᐊᖓᔪᖅᑳᖃᕐᕕᐊᑕ ᑎᑎᕋᕐᕕᖓ

22 ᑎᑎᕋᕐᕕᐊ ᐊᖓᔪᖅᑳᖃᕐᕕᐊ ᑲᓇᑕᒥᑦ ᐊᖓᔪᖅᑳᖃᕐᕕᐊᓃᑦᑐᖅ, ᓇᓗᓇᐃᖅᓯᒪᕗᖅ ᑎᑎᕋᖅᓯᒪᔪᒥᒃ ᑕᐃᑲᓂ ᑲᓇᑕᒥᑦ ᐊᖓᔪᖅᑳᖃᕐᕕᐊᓂ ᐱᖁᔭᖓᓂ, ᐅᕝᕙᓘᓐᓃᑦ ᐊᓯᐊᓂ ᐃᓂᒋᔭᐅᔪᒥᒃ ᑲᓇᑕᒥᑦ ᓂᕈᐊᖅᓯᒪᑐᐃᓐᓇᕆᐊᖃᖅᑕᖓᓂ ᐊᐅᓚᑦᑎᔨᖓᑕ ᑲᑎᒪᔩᑦ.

ᑐᕌᒐᖏᑦ ᐱᔪᓐᓇᕐᓂᖏᓪᓗ, ᐱᔭᒃᓴᑦ ᐱᓕᕆᐊᒃᓴᓪᓗ

Marginal note: ᑐᕌᒐᖓ

• 23 (1) ᑐᕌᒐᖃᖅᐳᑦ ᑎᑎᕋᕐᕕᐊᓂ ᐃᒪᓐᓇ

  • (a) ᑲᔪᖏᖅᓴᕐᓗᒍ ᓄᓇᖃᖅᑳᖅᓯᒪᔪᑦ ᐅᖃᐅᓯᑦ;
  • (b) ᓄᓇᖃᖅᑳᖅᓯᒪᔪᑦ ᐃᔪᖅᓱᕐᓗᒋᑦ ᐅᑎᖅᑎᑦᑎᓇᓱᐊᖅᑎᓪᓗᒋᑦ, ᐅᖃᐅᓯᕐᒥᓂᒃ ᐊᑐᓕᒃᑲᓐᓂᕋᓱᐊᖅᑎᓪᓗᒋᑦ, ᐊᐅᓚᑕᐅᓗᓂ ᓴᙱᓂᖅᑖᖅᑎᑕᐅᓗᓂᒡᓗ ᐅᖃᐅᓯᖏᓐᓂᒃ;
  • (c) ᑕᕝᕙᓂ ᐱᖁᔭᕐᒥᑦ ᐊᑐᐃᓐᓇᐅᑎᑦᑎᕗᖅ ᐅᓐᓂᕐᓗᒃᑐᓂ ᐃᑲᔪᕋᓱᓯᐅᖑᕗᑦ ᐊᑲᐅᖏᓕᐅᕈᑎᓂ ᕿᒥᕐᕈᕙᒃᖢᑎᒡᓗ.
  • (d) ᐱᔪᒥᓴᐃᓇᓱᒃᖢᑎᒃ ᐃᓄᖕᓂᑦ ᖃᐅᔨᒪᑎᑦᑎᓗᑎᒃ ᑐᑭᓯᐅᒪᓗᑎᒡᓗ ᐅᑯᓂᖓ
    • (i) ᐊᔾᔨᒌᖏᑦᑑᑎᐅᕗᑦ ᓴᙱᔫᕗᕐᓗ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ,
    • (ii) ᐊᕕᒃᒍᓐᓇᙱᔾᔪᑎᒋᔭᖓ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐃᓄᖏᑕ ᐃᓕᖅᑯᓯᖏᓂᒡᓗ,
    • (iii) ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᑐᕌᖓᑎᓪᓗᒋᑦ,
    • (iv) ᐱᔪᓐᓇᐅᖏᓐᓂ ᐊᑑᑎᓂᖅᐹᖑᔪᑦ ᓄᓇᖃᖅᑳᖅᓯᒪᔪᑦ, ᐱᖃᑕᐅᒋᕗᖅ ᐃᓄᑐᐃᓐᓇᑦ,
    • (v) ᐊᒃᑐᐃᓂᕐᓗᒃᑕᐅᓯᒪᓂᖅ ᖃᓪᓗᓈᖑᖅᑎᑕᐅᓇᓱᓚᐅᕐᓂᕐᒥᓄᑦ ᐊᒻᒪ ᓈᒻᒪᖏᑦᑐᓂ ᐃᓚᐃᓐᓈᓚᐅᖅᓯᒪᓂᖏᑦ ᒐᕙᒪᒃᑯᑦ ᐊᑐᐊᒐᖏᓐᓂᒃ ᓄᓇᖃᖅᑳᖅᓯᒪᔪᑦ ᐅᖃᐅᖏᓐᓂᒃ ᐱᓕᕆᐊᖃᖅᑎᓪᓗᒋᓪᓗ ᐱᔪᓐᓇᐅᑎᖏᓐᓂᒃ, ᐊᒻᒪ
    • (vi) ᐱᓕᕆᖃᑎᒌᒍᓐᓇᑦᑎᐊᕆᐊᖃᕐᓂᖅ ᑲᔪᓯᔪᓐᓇᑦᑎᐊᖁᓗᒍ ᐃᑲᔪᖅᓱᖅᑕᐅᓗᑎᒡᓗ ᐋᖅᑭᐅᒪᑎᑦᑎᓂᕐᒧᑦ ᓄᓇᖃᖅᑳᓯᒪᔪᓄᑦ; ᐊᒻᒪ
  • (e) ᐃᑲᔪᖅᑕᐅᓗᑎᒃ ᐱᓕᕆᐊᒃᓴᐅᓇᓱᒃᑐᓂ ᐊᑐᖅᑕᐅᓗᑎᒡᓗ ᖃᕋᓴᐅᒃᑰᕈᑎᓂᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐃᓕᓐᓂᐊᕈᑎᓂ ᐅᖃᐅᓯᕐᒥᓂᒡᓗ ᐅᑎᖅᑎᑦᑎᓇᓱᐊᖅᑐᓂ, ᑲᑐᔾᔨᖃᑎᖃᕐᓗᑎᒃ ᓄᓇᖃᖅᑳᖅᑐᑦ ᒐᕙᒪᖁᖏᓐᓂᒃ ᐊᓯᖏᓂᒡᓗ ᓄᓇᖃᖅᑳᖅᓯᒪᔪᑦ ᑎᒥᖏᓐᓂᒃ, ᑲᑐᔾᔨᖃᑎᖏᓐᓂᒃ, ᑲᓇᑕᐅᑉ ᒐᕙᒪᖓᓂ ᐊᒻᒪ ᓄᓇᓖᑦ ᐊᕕᒃᑐᖅᓯᒪᔪᑦ ᐅᑭᐅᖅᑕᖅᑐᒥᒡᓗ ᒐᕙᒪᖏᓐᓂᒃ.

• Marginal note: ᐅᖃᖃᑎᖃᕐᓂᖅ ᐊᐅᓚᑦᑎᓂᕐᓗ

  (2) ᑐᕌᖓᓂ ᑲᒪᓇᓱᐊᕋᓱᒃᑎᓪᓗᒋᑦ, ᑎᑎᕋᕐᕕᐊᓂ ᐱᔭᒃᓴᖃᕆᐊᖃᖅᐳᑦ ᐱᔭᕆᐊᖃᕌᖓᒥᒃ, ᐅᖃᖃᑎᖃᕐᓗᑎᒃ ᐊᐅᓚᑎᓗᑎᒡᓗ ᓇᓕᐊᑐᐃᓐᓇᖅ ᓄᓇᖃᖅᑳᖅᓯᒪᔪᑦ, ᓄᓇᓖᑦ ᐊᕕᒃᑐᖅᓯᒪᔪᒃ ᐅᑭᐅᖅᑕᖅᑐᒥᒡᓘᓐᓃᑦ ᐱᔪᒥᓴᐃᓗᑎᒃ, ᐅᖃᐅᓯᕐᒥᓂ ᐅᑎᖅᑎᑦᑎᓇᓱᐊᖅᑐᓂ ᓴᐳᒻᒥᒃᖠᕐᓗᑎᒡᓘᓐᓃᑦ ᓄᓇᖃᖅᑳᓯᒪᔪᑦ ᐅᖃᐅᓯᖏᓐᓂᒃ.

Marginal note: ᕿᒥᕐᕈᓂᖃᕐᓂᖅ ᖃᐅᔨᓴᕐᓂᕐᓘᓐᓃᑦ

• 24 (1) ᑎᑎᕋᕐᕕᐊᓂ ᕿᒥᕐᕈᓂᖅᑕᖃᑐᐃᓐᓇᕆᖃᐊᓕᒃ ᖃᐅᔨᓴᕐᓗᑎᒡᓘᓐᓃᑦ ᐱᔾᔪᑎᐅᔪᒥᒡᓘᓐᓃᑦ, ᐱᓪᓗᒍ ᒪᓕᒐᕐᒥᑦ

  • (a) ᑮᓇᐅᔭᖃᖅᑎᑕᐅᔪᒥᒃ ᐃᑲᔪᖅᓱᕋᓱᐊᖅᑐᒥᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ; ᐅᕝᕙᓘᓐᓃᑦ
  • (b) ᑲᓇᑕᒥᑦ ᐊᑐᖅᑕᐅᓂᖓᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓂᒃ, ᐱᖃᑕᐅᓗᑎᒃ ᐋᖅᑭᒃᓱᐃᓇᓱᐊᖅᑎᓪᓗᒋᑦ ᑖᒃᑯᓂᖓ ᐅᖃᐅᓯᕐᓂᑦ ᓇᓗᓇᐃᖅᓯᓇᓱᐊᕐᓗᑎᒡᓘᓐᓃᑦ ᐅᑎᖅᑎᑦᑎᓇᓱᐊᖅᑎᓪᓗᒋᑦ ᐅᖃᓪᓚᐃᓐᓇᖃᑦᑕᕐᓗᑎᒡᓗ ᐅᖃᐅᓯᖏᓐᓂᒃ.

• Marginal note: ᓄᓇᓕᖕᓂᑦ ᖃᐅᔨᓴᖅᑕᐅᔪᑦ

  (2) ᑐᕌᖓᔪᒥᒃ ᑎᑎᕋᖅᓯᒪᔪᖅ (1)(b)−ᒥᑦ ᕿᒥᕐᕈᔪᖃᖅᑎᓪᓗᒍ ᖃᐅᔨᓴᖅᑐᖃᖅᑎᓪᓗᒍᓘᓐᓃᑦ ᓄᓇᓕᖕᓂᑦ ᖃᐅᔨᓴᕐᓂᖃᑐᐃᓐᓇᕆᐊᓖᑦ, ᐊᐱᕆᓯᒪᑎᓪᓗᒋᑦ ᓄᓇᖃᖅᑳᖅᓯᒪᔫᑉ ᓄᓇᖓᓂ ᖃᐅᔨᓴᕐᓂᖃᕐᓂᐊᖅᑎᓪᓗᒋᑦ.

• Marginal note: ᐊᑐᐃᓐᓇᐅᑎᑦᑎᓂᖅ − ᕿᒥᕐᕈᓂᖅ ᖃᐅᔨᓴᕐᓂᖃᕐᓂᕐᓘᓐᓃᑦ

  (3) ᓇᓗᓇᐃᖅᓯᒪᔭᖓᓂ ᐃᓚᒃᑲᓐᓂᖓ (1)−ᒥᑦ ᑎᑎᕋᕐᕕᐊ ᐊᑐᐃᓐᓇᐅᑎᑦᑎᒋᐊᓕᒃ ᖃᓄᑐᐃᓐᓇᖅ ᕿᒥᕐᕈᓂᖃᖅᑐᖃᖅᑎᓪᓗᒍ ᖃᐅᔨᓴᖅᑐᖃᖅᑎᓪᓗᒍᓘᓐᓃᑦ ᓇᓕᐊᖕᓂᑐᐃᓐᓇᖅ ᓄᓇᖃᖅᑳᖅᓯᒪᔫᑉ ᓄᓇᖓᓂ, ᒐᕙᒪᖓᓂ ᐊᓯᐊᓂᒡᓘᓐᓂᑦ ᑎᒥᐅᔪᒥᒃ ᑲᑐᔾᔨᖃᑎᒌᖏᓐᓂᒃ ᐃᑲᔪᖅᑕᐅᔪᓐᓇᖁᓗᒋᑦ. ᐱᔾᔪᑎᒋᓗᒍ ᖃᓄᑐᐃᓐᓇᖅ ᒪᓕᒐᖅᑎᒍᑦ, ᐃᖅᑲᓇᐃᔭᕐᕕᐊᑕ ᑎᑎᖅᑲᓂ ᐊᑐᖅᑕᐅᔪᓂ ᕿᒥᕐᕈᓂᖃᕐᓘᓐᓃᑦ ᖃᐅᔨᓴᕐᓂᖃᕐᓗᑎᒡᓘᓐᓃᑦ ᑖᒃᑯᓄᖓ.

• Marginal note: ᐊᔾᔨᖓᓂ ᐱᓇᓱᐊᕐᓂᖅ ᐊᑐᖅᑕᐅᓂᖓ ᐊᑭᖃᖏᑦᑕᕆᐊᓕᒃ

  (4) ᑎᑎᕋᕐᕕᐊᓂ ᐱᔪᓐᓇᖅᑎᑦᑎᒋᐊᓕᒃ ᓄᓇᖃᖅᑳᖅᓯᒪᔪᑦ ᓄᓇᓕᖕᓂᕐᒥᐅᑕᕐᓂᑦ ᒐᕙᒪᖓᓂ ᐊᓯᐊᓂᒡᓘᓐᓃᑦ ᑎᒥᐅᔪᒥᒃ ᑲᑐᔾᔨᖃᑎᒌᓂᒡᓘᓐᓃᑦ ᐊᔾᔨᖓᓂ ᐱᔪᓐᓇᖅᑎᑦᑎᒋᐊᓖᑦ ᐊᓯᐊᒍᓪᓘᓐᓃᑦ ᕿᒥᕐᕈᓂᐊᖃᕐᓗᑎᒃ ᖃᐅᔨᓴᕐᓗᑎᒡᓘᓐᓃᑦ ᐊᑭᖃᖏᑦᑐᒥᑦ ᐱᔾᔪᑎᖃᖅᑎᓪᓗᒋᑦ ᐅᑎᖅᑎᑦᑎᓇᓱᐊᕐᓂᕐᒧᑦᓗ, ᐅᖃᐅᓯᕐᒥᑦ ᐊᑐᓕᒃᑲᓐᓂᕋᓱᐊᖅᑐᓂᒃ, ᐅᖃᐅᓯᖃᓐᓇᕐᓂᕐᒧᑦ ᓴᙱᓂᖅᑖᖅᑎᑦᑎᓂᕐᒧᓪᓗ ᐅᖃᐅᓯᖏᓐᓂᒃ. ᒪᓕᒡᓗᒍ ᒪᓕᒐᖅᑎᒍᑦ, ᑎᑎᕋᕐᕕᐊᓂ ᐱᔪᓐᓇᖅᑎᑦᑎᒋᐊᓕᒡᓗ ᖃᓄᑐᐃᑦᑐᑐᐃᓐᓇᕐᒥᑦ ᑎᑎᖅᑲᒥᒃ ᐊᑐᕐᓗᑎᒃ ᓴᓇᓗᑎᒡᓘᓐᓃᑦ ᕿᒥᕐᕈᓇᓱᒃᑕᒥᓂᒃ ᖃᐅᔨᓴᖅᑕᐅᒥᒡᓘᓐᓃᑦ ᐊᑐᖅᑕᖓᓂᒡᓘᓐᓃᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ, ᒐᕙᒪᖏᓐᓂᒃ ᐊᓯᖏᓐᓂᒡᓘᓐᓃᑦ ᑎᒥᐅᔪᓂᒃ ᑲᑐᔾᔨᖃᑎᒌᓂᒡᓘᓐᓃᑦ ᐊᑭᖃᖏᑦᑐᒥᒃ ᐱᔭᕆᐊᖃᖅᐳᑦ ᑖᒃᑯᓂᖓ ᐱᔾᔪᑎᖃᕐᓗᑎᒃ.

Marginal note: ᑎᑎᕋᕐᕕᐊᓂ ᐃᑲᔪᑕᐅᔪᖃᖅᑎᓪᓗᒍ

25 ᓄᓇᖃᖅᑳᖅᓯᒪᔪᑦ ᓄᓇᓕᖓᓂᙶᖅᑐᒥᑦ ᒐᕙᒪᖓᓂᒡᓘᓐᓂᑦ ᐊᓯᐊᓂᒡᓘᓐᓂᑦ ᑎᒥᐅᔪᒥᒃ, ᑎᑎᕋᕐᕕᐊᓂ ᐃᑲᔪᑐᐃᓐᓇᕆᐊᓖᑦ ᓇᓕᐊᑕ ᐱᓇᓱᐊᖅᑐᓂ ᐅᑎᖅᑎᑦᑎᓇᓱᐊᕐᓂᕐᒧᑦ, ᐅᖃᐅᓯᕐᒥᓂᒃ ᐊᑐᓕᒃᑲᓐᓂᕋᓱᐊᖅᑐᓂᒃ, ᐅᖃᓪᓚᐃᓐᓇᖃᑦᑕᕈᒪᔪᓂᒃ ᓴᙱᓂᖅᑖᓂᕐᒧᓪᓘᓐᓃᑦ ᐅᖃᐅᓯᖏᓂᒃ, ᐱᖃᑕᐅᕗᑦ ᐱᓇᓱᐊᖅᑎᓪᓗᒋᑦ ᐃᒪᓐᓇ

• (a) ᓴᓇᓗᑎᒃ ᑎᑎᖅᑲᖁᑎᖃᐃᓐᓇᕐᓗᑎᒃ ᐅᖃᐅᓯᕐᒥᒃ, ᐱᖃᑕᐅᕗᑦ ᓈᓚᐅᑎᒃᑯᑦ ᑕᕋᔭᐅᓯᒃᑯᓪᓗ ᓂᐱᓕᐅᖅᑕᐅᔪᕕᓂᕐᒥᒃ ᑎᑎᖅᑲᑎᑯᓪᓗ ᓲᕐᓗ ᑐᑭᓕᐅᖅᓯᒪᔪᒥᒃ, ᐅᖃᐅᓯᓕᕆᔾᔪᑎᓂᒃ ᑎᑎᖅᑲᓂᒡᓘ ᐅᖃᐅᓯᕐᒧᑦ, ᐱᔾᔪᑎᖃᕐᓗᑎᒃ ᐊᓯᖏᓐᓂᒡᓗ, ᐱᓯᒪᐃᓐᓇᕐᓗᑎᒃ ᑐᓂᓯᖃᑦᑕᕐᓗᑎᒡᓗ.
• (b) ᓇᓗᓇᐃᒃᑕᕐᒥᓂᒃ ᐊᑐᖅᑕᐅᓯᐅᓂᒃ ᓴᓇᓗᑎᒃ ᑐᑭᓕᐅᖅᑎᓄᑦ ᑐᓵᔨᓄᓪᓗ;
• (c) ᕿᒥᕐᕈᓂᖃᕐᓗᑎᒃ ᖃᐅᔨᓴᓂᖃᕐᓗᑎᒡᓗ ᐊᒻᒪ ᓄᓇᒋᔭᐅᔪᒥᒃ ᖃᐅᔨᓴᕐᓂᖃᕐᓗᑎᒃ ᐊᑐᖅᑕᐅᓂᖓ ᐅᖃᐅᓯᐅᑉ;
• (d) ᐋᖅᑭᒃᓱᐃᓗᑎᒃ ᐸᕐᓇᐃᓗᑎᒡᓗ ᐅᑎᖅᑎᑦᑎᓇᓱᐊᖅᑐᖃᖅᑎᓪᓗᒍ, ᐅᖃᐅᓯᒥᓂᕐ ᐊᑐᓕᒃᑲᓐᓂᕋᓱᐊᖅᑐᓂᒃ, ᐅᖃᓪᓚᐃᓐᓇᖃᑦᑕᓕᕐᓗᑎᒃ ᓴᙱᓂᖅᑖᕐᓗᓂᓗ ᐅᖃᐅᓯᖓᑦ; ᐅᕝᕙᓘᓐᓃᑦ
• (e) ᐅᐸᓗᙵᐃᔭᖅᑕᐅᓗᑎᒃ ᑲᓇᑕᐅᑉ ᒐᕙᒪᖓ ᓄᓇᓕᖕᓂᑦ ᐊᕕᒃᑐᖅᓯᒪᔪᓂᒡᓘᓐᓃᑦ ᐅᑭᐅᖅᑕᖅᑐᒥᒡᓘᓐᓃᑦ ᒐᕙᒪᖏᓐᓂᒃ ᐃᓕᖅᑯᓯᒨᖓᔪᒥᒃ ᐃᓕᓐᓂᐊᖅᑎᑦᑎᓂᕐᒧᑦ ᐃᓕᓐᓂᐊᕈᑎᓂᒡᓗ ᐅᖃᐅᓯᕐᒧᑦ.

Marginal note: ᐊᑲᐅᖏᓕᐅᕈᑎᓄᑦ ᐋᖅᑭᒃᓱᐃᓇᓱᐊᖅᑎᑦ

26 ᓄᓇᖃᖅᑳᖅᓯᔫᑉ ᓄᓇᖓᓂᙶᖅᑐᒥᒃ ᑐᒃᓯᕋᖅᑐᖃᖅᑎᓪᓗᒍ, ᒐᕙᒪᖓᓂ ᐊᓯᐊᓂᒡᓘᓐᓃᑦ ᑎᒥᐅᔪᒥᒃ, ᑲᑐᔾᔨᖃᑎᒌᒥᒃ ᐅᕝᕙᓘᓐᓃᑦ ᑲᓇᑕᐅᑉ ᒐᕙᒪᖓᓂ, ᑎᑎᕋᕐᕕᐊᓂ ᐱᔨᑦᑎᑐᐃᓐᓇᕆᐊᓖᑦ, ᐱᖃᑕᐅᕗᖅ ᐊᑲᐅᖏᓕᐅᕈᑎᓂᒃ ᐋᖅᑭᒃᓱᐃᓇᓱᐊᕐᓂᕐᒧᑦ, ᐊᓯᐊᓂᒡᓘᓐᓃᑦ ᐃᓕᖅᑯᓯᖅᑐᒎᖓᔪᒥᒃ ᐱᔨᑦᑎᖅᑕᐅᓗᑎᒃ, ᐃᑲᔪᖅᑕᐅᔪᓐᓇᖅᓯᖁᓗᒋᑦ ᐊᑲᐅᓕᐅᕈᑎᓂᒃ ᐋᖅᑭᒃᓱᐃᓇᓱᐊᖅᑎᓪᓗᒋᑦ ᐃᒪᓐᓇ

• (a) ᐊᖏᖅᓯᒪᑦᑎᐊᖁᓗᒋᑦ ᓇᓕᐊᑐᐃᓐᓇᖅ ᑭᒡᒐᖅᑐᐃᔪᒥᒃ ᑐᕌᖓᔪᒥᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂ ᐊᖏᕈᑎᓕᐅᖅᓯᒪᑎᓪᓗᒋᑦ ᑲᓇᑕᐅᑉ ᒐᕙᒪᖓᓂ.
• (b) ᑮᓇᐅᔭᖅᑖᖅᑎᑕᐅᓂᕐᒧᑦ ᑲᓇᑕᐅᑉ ᒐᕙᒪᖓᑕ ᑐᕌᖓᓇᓱᒃᑐᓂ ᓄᓇᖃᖅᑳᖅᓯᒪᔪᒃ ᐅᖃᐅᓯᖏᓐᓂᒃ;
• (c) ᑕᔅᓱᒪ ᐱᖁᔭᖓᓂ ᐱᓇᓱᐊᖅᑕᐅᔪᑦ ᖃᓄᑐᐃᓐᓇᖅ ᑲᓇᑕᐅᑉ ᒐᕙᒪᖓᓂ ᐊᖏᖅᑕᐅᓯᒪᔪᓂᒃ;
• (d) ᐱᓕᕆᐊᖃᓱᒃᑎᓪᓗᒋᑦ ᖃᓄᑐᐃᓐᓇᖅ ᑲᓇᑕᐅᑉ ᒐᕙᒪᖓᑕ ᐊᑐᐊᒐᖏᓐᓂᒃ ᐱᓕᕆᐊᒃᓴᖏᓐᓂᒡᓗ ᑐᕌᖓᔪᓂᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ.

Marginal note: ᐅᓐᓂᕐᓘᑕᐅᔪᑦ ᕿᒥᕐᕈᑎᓪᓗᒋᑦ

• 27 (1) ᑲᒥᓯᓇ ᐅᓐᓂᕐᓘᑕᐅᔪᒥᒃ ᕿᒥᕐᕈᑐᐃᓐᓇᕆᐊᓕᒃ, ᓄᓇᖃᖅᑳᖅᓯᒪᔪᑦ ᒐᕙᒪᖓᓂ ᐊᓯᐊᓂᒡᓗ ᓄᓇᖃᖅᑳᖅᓯᒪᔪᒥᓂ ᐊᐅᓚᑕᖓᓂ ᑐᓂᔭᐅᓯᒪᔪᓂ ᑖᒃᑯᓂᖓ, ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖑᔪᑦ ᐃᓄᖏᓐᓂᒡᓘᓐᓃᑦ, ᑕᐃᑲᓂ ᓇᓗᓇᐃᖅᓯᒪᔭᖏᓐᓂᒃ ᑎᑎᕋᖅᓯᒪᔪᑦ 26(a)−ᒥᑦ (d)-ᒧᑦ ᖃᓄᑐᐃᓐᓇᖅ ᐱᔾᔪᑎᐅᔪᒥᒃ.

• Marginal note: ᐅᓂᒃᑳᓕᐅᕐᓂᖅ

  (2) ᕿᒥᕐᕈᔭᕇᖅᓯᒪᓕᖅᑎᓪᓗᒋᑦ, ᑲᒥᓯᓇ ᐅᓂᒃᑳᓕᐅᕆᐊᓕᒃ ᖃᓄᑐᐃᓐᓇᖅ ᐃᓱᒪᒃᓴᖅᓯᐅᕈᑎᑕᐅᓚᖅᓯᒪᔪᓂ.

Marginal note: ᐱᓇᓱᐊᖅᑕᐅᔪᓐᓇᖅᑐᑦ, ᐱᔪᓐᓇᐅᑎᑦ, ᐱᔪᓐᓇᕐᓂᕆᔭᐅᔪᑦ ᐃᑲᔫᑎᐅᔪᓐᓇᖅᑐᓪᓗ

28 ᑎᑎᕋᕐᕕᐊᓂ ᐱᓇᓱᐊᖅᑕᐅᔪᓐᓇᖅᑐᑦ, ᐱᔪᓐᓇᐅᑎᑦ, ᐱᔪᓐᓇᕐᓂᕆᔭᐅᔪᑦ ᐃᑲᔫᑎᔪᓐᓇᖅᑐᓪᓗ ᐃᓄᑐᐃᓐᓇᕐᒧᑦ, ᐱᖃᑕᐅᕗᑦ ᐃᒪᓐᓇ ᐱᓇᓱᐊᖅᑕᐅᔪᓐᓇᖅᐳᑦ.

• (a) ᐊᖏᕈᑎᓕᐅᕐᓗᑎᒃ;
• (b) ᐱᓇᓱᐊᖅᑎᓪᓗᒋᑦ, ᐱᓯᒪᓗᑎᒃ ᐱᓯᒪᔪᓐᓃᕐᓗᑎᒡᓗ ᓇᖕᒥᓂᖁᑎᒥᒃ ᐱᔪᒪᔭᒥᓂᒡᓘᓐᓃᑦ ᐅᕝᕙᓘᓐᓃᑦ ᓇᖕᒥᓂᖅᑖᕈᓐᓇᕐᓂᕐᒧᑦ ᐊᑐᖅᑐᐊᕐᓗᑎᒡᓘᓐᓃᑦ ᓇᖕᒥᓂᖁᑎᒥᒃ; ᐊᒻᒪ ᓇᖕᒥᓂᖅᑖᕐᓗᑎᒃ, ᐱᓯᒪᓗᑎᒃ ᐱᓯᒪᒍᓐᓃᕐᓗᑎᒡᓗ ᐱᔪᒪᔭᕐᓂᒡᓘᓐᓃᑦ ᓇᖕᒥᓂᖅᑖᕈᓐᓇᕐᓂᖅ ᐅᕝᕙᓘᓐᓃᑦ ᓇᖕᒥᓂᖁᑎᒥᒃ ᐊᑐᖅᑐᐊᕐᓗᑎᒃ; ᐊᒻᒪ
• (c) ᐃᖅᑲᖅᑐᐃᕕᖕᒨᖅᑎᑦᑎᓗᑎᒃ ᐃᖅᑲᖅᑐᐃᕕᓕᐊᕈᔾᔭᐅᓗᑎᒡᓗ.

Marginal note: ᑎᓕᐅᕆᓂᖅ

29 ᑲᒥᓯᓇ ᑎᓕᓯᑐᐃᓐᓇᕆᐊᓕᒃ ᓇᓕᐊᑐᐃᓐᓇᖅ ᐱᔪᓐᓇᕐᓂᖏᓐᓂᒃ, ᐱᔭᒃᓴᖏᓐᓂᒃ ᐱᓕᕆᐊᓴᖏᓪᓂᒡᓗ ᒪᓕᒡᓗᒍ ᑕᕝᕙᓂ ᐱᖁᔭᕐᒥᑦ ᓇᓕᑐᐃᓐᓇᖅ ᑐᑭᒧᐊᒃᑎᑦᑎᔨᒥᒃ ᐃᖅᑲᓇᐃᔭᖅᑎᒥᒡᓘᓐᓃᑦ ᑎᑎᕋᕐᕕᖓᒥ, ᐱᔾᔪᑎᒋᓗᒍ ᖃᓄᑐᐃᓐᓇᖅ ᐱᓕᕆᐊᒃᓴᕆᒐᔭᖅᑕᖓᓂ.

Marginal note: ᐸᓯᒃᓴᓕᐊᖑᔪᓐᓇᖏᑦᑐᑦ

30 ᐱᓕᕆᐊᖑᒍᓐᓇᖏᑦᑐᖅ ᐊᓯᖏᓪᓘᓐᓃᑦ ᐃᖅᑲᖅᑐᐃᕕᖕᒨᕈᔾᔭᐅᓗᓂ ᑲᒥᓯᓇ, ᑐᑭᒧᐊᒃᑎᑦᑎᔨ, ᐃᖅᑲᓇᐃᔭᖅᑎ ᑎᑎᕋᕐᕕᖕᒥᑦ ᐃᓄᖕᒥᓘᓐᓃᑦ ᐱᓕᕆᐊᖃᖅᑐᒥᑦ ᑎᑎᕋᕐᕕᖓᒥᑦ ᖃᓄᑐᐃᓐᓇᖅ, ᐲᖅᓯᔪᖃᖁᔨᓗᓂᓘᓐᓃᑦ ᐱᓕᕆᐊᒃᓴᒥᒃ, ᐱᓕᕆᐊᖃᖅᑐᒥᒃ, ᓱᓕᑦᑎᐊᖅᑐᒥᒃ ᖃᓄᑐᐃᓐᓇᖅ ᐱᔪᓐᓇᕐᓂᕆᔭᐅᔪᒥᒃ, ᐱᓕᕆᐊᖑᔪᒥᒡᓘᓐᓃᑦ ᐅᕝᕙᓘᓐᓃᑦ ᓱᓕᔪᒥᒃ ᐱᓕᕆᐊᖃᖅᑐᒥᒃ ᖃᓄᑐᐃᓐᓇᖅ ᐱᔭᒃᓴᕆᔭᐅᔪᒥᒃ, ᐱᓕᕆᐊᖑᔪᕕᓂᕐᒥᒡᓘᓐᓂᑦ, ᐃᓄᖕᒥᑦ ᒪᓕᒡᓗᒍ ᑕᔅᓱᒥᖓ ᐱᖁᔭᕐᒥᑦ.

ᑮᓇᐅᔭᓕᕆᓂᕐᒧᑦ ᐊᐅᓚᑦᑎᓂᖅ

Marginal note: ᑮᓇᐅᔭᓕᕆᓂᕐᒧᑦ ᐊᕐᕌᒍᐊ

31 ᑎᑎᕋᕐᕕᐊᓂ ᑮᓇᐅᔭᓕᕆᓂᕐᒧᑦ ᐊᕐᕌᒍᖓ ᐱᒋᐊᖃᑦᑕᖅᐳᖅ ᐄᑉᐳ 1−ᒥᑦ ᐃᓱᓕᑉᐸᒃᖢᓂᓗ ᒫᔾᔨ 31−ᒥᑦ ᐊᕐᕌᒍᑦ ᖄᖏᕌᖓᑦ.

Marginal note: ᐊᐅᓚᓂᕐᒧᑦ ᑮᓇᐅᔭᒃᓴᕐᕕᒋᔭᐅᔪᑦ

32 ᒐᕙᒪᑐᖃᒃᑯᑦ ᑮᓇᐅᔭᓕᕆᔩᑦ ᑲᑎᒪᔨᖏᑦ ᖃᓄᑐᐃᓐᓇᖅ ᐱᓕᕆᐊᖃᑐᐃᓐᓇᕆᐊᓖᑦ, ᑎᑎᕋᕐᕕᐊᓂ ᐱᕈᖅᐸᓪᓕᐊᑐᐃᓐᓇᕆᐊᓕᒃ, ᑐᕌᒐᖏᓐᓄᑦ ᖄᖏᐅᑎᓗᑎᒡᓘᓐᓃᑦ, ᑕᐃᑲᓂ ᑮᓇᐅᔭᓕᕆᓂᕐᒧᑦ ᐊᕐᕌᒍᐊᓂ ᐊᐃᑉᐸᖓᓂᒡᓘᓐᓃᑦ, ᖃᓄᑐᐃᓐᓇᖅ ᑮᓇᐅᔭᒃᓴᕐᓗᑎᒃ ᐱᓚᐅᖅᑕᖏᓐᓂᒃ ᑮᓇᐅᔭᓕᕆᓂᕐᒧᑦ ᐊᕐᕌᒍᒋᓚᐅᖅᑕᖓᓂ.

Marginal note: ᐱᓕᕆᐊᒃᓴᑦ ᐸᕐᓇᒃᑕᐅᓯᒪᔪᑦ ᑮᓇᐅᔭᑦ ᐊᑐᖅᑐᒃᓴᓪᓗ

• 33 (1) ᑎᑎᕋᕐᕕᐊᓂ ᐱᓕᕆᐊᒃᓴᒥᓂ ᐸᕐᓇᐃᑐᐃᓐᓇᕆᐊᓖᑦ ᑮᓇᐅᔭᓂᒡᓗ ᐊᑐᖅᑐᒃᓴᓂ ᑮᓇᐅᔭᓕᕆᓐᓇᐅᑉ ᐊᕐᕌᒍᓕᒫᖏᓐᓂᒃ ᑐᓂᔭᐅᓗᑎᒡᓗ ᒥᓂᔅᑕᒧᑦ.

• Marginal note: ᖃᓄᐃᑦᑑᓂᖓ ᐱᔾᔪᑎᖏᓪᓗ ᐱᓕᕆᐊᓴᖏᓐᓄᑦ ᐸᕐᓇᐃᓇᓱᒃᑎᓪᓗᒋᑦ

  (2) ᑎᑎᕋᕐᕕᐊᓂ ᐱᓕᕆᐊᒃᓴᓄᑦ ᐸᕐᓇᐃᔭᕆᐊᖃᖅᐳᑦ ᑕᒪᐃᓐᓄᑦ ᐱᓕᕆᐊᓴᐅᓂᐊᖅᑐᓕᒫᓂ ᐅᓂᑳᓕᐅᕆᐊᖃᖅᖢᑎᒡᓗ ᐃᒪᓐᓇ

  • (a) ᑎᑎᕋᕐᕕᐊᑕ ᑐᕌᒐᖏᓐᓂᒃ;
  • (b) ᑎᑎᕋᕐᕕᐊᓂ ᐱᔾᔪᑎᖏᓐᓂ ᑮᓇᐅᔭᓕᕆᓂᕐᒧᑦ ᐊᕐᕌᒍᐊᓂ ᖃᓄᐃᓕᐅᕈᒪᔭᖏᓪᓗ ᐃᖅᑲᓇᐃᒋᐊᖃᖅᑐᓂᒃ ᑲᔪᓯᑦᑎᐊᕈᓐᓇᖁᓗᒋᑦ; ᐊᒻᒪ
  • (c) ᑎᑎᕋᕐᕕᐊᓂ ᓂᕆᐅᒋᔭᖏᓐᓂ ᐱᓕᕆᐊᒃᓴᐅᓕᒑᔪᓂ ᑮᓇᐅᔭᓕᕆᓂᕐᒧᑦ ᐊᕐᕌᒍᐊᓂ.

• Marginal note: ᑮᓇᐅᔭᑦ ᐊᑐᖅᑐᒃᓴᑦ ᐱᔾᔪᑎᖏᑦ

  (3) ᑎᑎᕋᕐᕕᐊᓂ ᑮᓇᐅᔭᑦ ᐊᑐᖅᑐᒃᓴᑦ ᐱᖃᓯᐅᔾᔨᒋᐊᖃᖅᐳᑦ ᐅᓂᒃᑳᖅᓯᒪᔪᒥᒃ ᐱᓕᕆᐊᒃᓴᖏᓐᓂᒃ ᑮᓇᐅᔭᒃᑕᐅᓯᒪᔪᑦ ᐊᑭᓕᐅᑎᒃᓴᓂᒡᓗ ᑮᓇᐅᔭᓕᕆᓂᕐᒧᑦ ᐊᕐᕌᒍᐊᓂ.

• Marginal note: ᐱᓕᕆᐊᒃᓴᒧᑦ ᐸᕐᓇᒃᑕᐅᓯᒪᔪᑦ

  (4) ᑎᑎᕋᕐᕕᐊᓂ ᐱᓕᕆᐊᖃᕆᐊᖃᖅᐳᑦ ᑮᓇᐅᔭᓕᕆᓂᕐᒧᑦ ᐊᕐᕌᒍᐊᓂ ᑕᐃᒪᓐᓇ ᐸᕐᓇᒃᓯᒪᓗᑎᒃ ᐱᓕᕆᐊᕆᐊᓚᐅᖅᑕᖏᓐᓄᑦ ᐊᕐᕌᒍᐊᓂ.

Marginal note: ᑎᑎᕋᖅᑕᐅᖃᑦᑕᖅᑐᑦ ᐱᓕᕆᐊᖑᖃᑦᑕᖅᑐᓪᓗ

• 34 (1) ᑎᑎᕋᕐᕕᐊᓂ ᑎᑎᕋᖅᓯᒪᖃᑦᑕᕆᐊᓖᑦ ᖃᓄᐃᑉᐸᓪᓕᐊᔭᖏᓐᓂᒃ ᐃᓗᓕᖃᕆᐊᖃᖅᖢᑎᒡᓗ ᑮᓇᐅᔭᓕᕆᔾᔪᑕᐅᔪᓂ ᐊᐅᓚᑕᖏᓐᓂ ᐊᒻᒪ ᑐᓴᒐᒃᓴᖏᓂᒡᓗ ᐊᑐᖅᐸᒃᑕᖏᓐᓂ.

• Marginal note: ᐱᖁᔭᐅᓯᒪᔪᑦ

  (2) ᑎᑎᕋᕐᕕᐅᖃᑦᑕᖅᑐᑦ, ᑎᑎᖅᑲᑦ ᐊᑐᖅᑕᐅᓯᐅᖑᔪᓪᓗ ᑕᐃᑲᓂ ᓇᓗᓇᐃᖅᓯᒪᔮᓂ ᐃᓚᒃᑲᓐᓂᖓᓂ (1)−ᒥᑦ ᐱᓯᒪᔭᐅᒋᐊᖃᖅᐳᑦ ᐊᐅᓚᑕᐅᑦᑎᐊᕐᓗᑎᒡᓗ ᖃᐅᔨᒪᑦᑎᐊᕋᔭᕐᒪᖔᑕ ᓇᒦᓐᓂᕆᔭᖏᑦ ᐃᒪᓐᓇ

  • (a) ᑎᑎᕋᕐᕕᐊᑕ ᐱᖁᑎᖏᑦ ᓴᐳᑎᔭᐅᓯᒪᑦᑎᐊᕐᓗᑎᒃ ᐊᐅᓚᑕᐅᑦᑎᐊᕐᓗᑎᒡᓗ
  • (b) ᑮᓇᐅᔭᓕᕆᔾᔪᑕᐅᔪᑦ, ᐃᓄᓕᕆᔾᔪᑕᐅᔪᑦ ᓇᖕᒥᓂᕐᓗ ᐱᕙᓪᓕᐊᔭᐅᑦᑎᐊᕐᓗᑎᒃ; ᐊᒻᒪᑮᓇᐅᔭᑦ ᑕᐅᓰᖅᑕᐅᔪᑦ ᑲᔪᓯᑎᑕᐅᑦᑎᐊᖅᐸᒡᓗ ᒪᓕᒡᓗᒍ ᑕᕝᕙᓂ ᐱᖁᔭᕐᒥᑦ;
  • (c) ᐱᓕᕆᐊᒃᓴᖏᑦ ᑲᔪᓯᑎᐊᕋᓱᒃᐸᒃᓗᑎᒃ.
  • (d) ᐱᓕᕆᐊᖏᑦ ᐱᓕᕆᐊᖑᑦᑎᐊᖃᑦᑕᖅᑐᑦ.

• Marginal note: ᑮᓇᐅᔭᓕᐊᖑᔪᕕᓃᑦ ᑎᑎᕋᕐᕕᐊᓂ ᕿᒥᕐᕈᔭᐅᑎᓪᓗᒋᑦ

  (3) ᐃᓚᒃᑲᓐᓂᖏᑦ (1) ᐊᒻᒪ (2) ᐱᔾᔪᑎᖏᑦ ᓇᓗᓇᐃᖅᓯᒪᕗᑦ ᑎᑎᕋᕐᕕᐊᓂ ᐃᓗᐊᓂ ᑮᓇᐅᔭᓕᐅᖅᑕᐅᕙᓪᓕᐊᔪᑦ ᖃᐅᔨᓴᖅᑕᐅᑐᐃᓐᓇᕆᐊᓖᑦ ᑮᓇᐅᔭᑦ ᑕᐅᓰᖅᑕᐅᕙᓪᓕᐊᔪᑦ ᐱᓕᕆᐊᖑᔪᓪᓗ.

• Marginal note: ᑮᓇᐅᔭᓕᕆᓂᕐᒧᑦ ᐅᓂᒃᑳᓕᐊᑦ

  (4) ᐊᕐᕌᒍᑕᒫᖅ ᑎᑎᕋᕐᕕᐊᓂ ᑮᓇᐅᔭᓕᕆᓂᕐᒧᑦ ᐅᓂᒃᑳᓕᐅᕆᐊᓖᑦ, ᒪᓕᒡᓗᒍ ᐊᖏᖅᑕᐅᓯᒪᔪᒥᒃ ᑮᓇᐅᔭᓕᕆᓂᕐᒧᑦ ᐊᑐᖅᑕᐅᓯᐅᖑᔪᓂᒃ.

• Marginal note: ᑮᓇᐅᔭᓕᕆᓂᕐᒧᑦ ᐅᓂᒃᑳᓕᐊᖏᑦ ᓇᓗᓇᐃᖅᓯᒪᔪᑦ

  (5) ᑎᑎᕋᕐᕕᐊᓂ ᑮᓇᐅᔭᓕᕆᓂᕐᒧᑦ ᓇᓗᓇᐃᖅᓯᒪᑦᑎᐊᕆᐊᓖᑦ ᑐᓴᒐᒃᓴᑦ ᐊᑐᖅᑕᐅᓯᐅᖑᔪᓄᑦ ᒪᓕᒡᓗᑎᒃ.

Marginal note: ᐊᕐᕌᒍᑕᒫᖅ ᑮᓇᐅᔭᓕᐊᖑᕙᓪᓕᐊᔪᓂ ᐅᓂᒃᑳᓕᐊᖅ

• 35 (1) ᑎᑎᕋᕐᕕᐊᓂ ᐊᕐᕌᒍᑕᒫᖅ ᑮᓇᐅᔭᓕᐊᖑᕙᓪᓕᐊᔪᓂ ᐅᓂᒃᑳᓕᐅᖅᓯᒪᒋᐊᓖᑦ ᑐᓴᒐᒃᓴᓕᒫᖏᓐᓂᒃ ᑕᐃᑲᓂ ᓇᓗᓇᐃᖅᓯᒪᔮᓂ ᐃᓚᒃᑲᓐᓂᖓᓂ (3)−ᒥᑦ.

• Marginal note: ᐃᓗᖏᑦ

  (2) ᐅᓂᒃᑳᓕᐊᖓᓂ ᐱᖃᓯᐅᔾᔨᒋᐊᖃᖅᐳᖅ, ᐊᓯᖏᓂᒡᓗ ᐃᓗᓕᖃᕐᓗᑎᒃ,

  • (a) ᐱᖃᑕᐅᓗᑎᒃ ᐊᕕᒃᓯᒪᓗᑎᒃ ᐅᓂᒃᑳᓕᐊᑦ ᐃᓱᒪᓐᓂᕈᓂ ᑎᑎᕋᕐᕕᐊᓂ ᑮᓇᐅᔭᓕᐊᖑᕙᒃᑐᓂ ᖃᐅᔨᓴᖅᑎᒻᒪᕆᐊᓄᑦ
    • (i) ᑮᓇᐅᔭᓕᕆᓂᕐᒧᑦ ᐅᓂᒃᑳᓕᐊᖅᓯᒪᑦᑎᐊᕐᓗᑎᒃ, ᒪᓕᒡᓗᒍ ᐱᖁᔭᐅᓯᒪᔪᓂ ᑮᓇᐅᔭᓕᕆᓂᕐᒧᑦ ᐊᑐᖅᑕᐅᓯᐅᖑᔪᓂᒃ, ᐃᓗᓕᖃᖅᑐᓂ ᐊᑐᖅᑕᐅᓚᐅᖅᓯᒪᔪᓂᒃ ᐊᕐᕌᒍᒋᓚᐅᖅᑕᖓᓂ,
    • (ii) ᑎᑎᕋᖅᑕᐅᓯᒪᔪᒃ ᑐᓴᒐᒃᓴᑦ ᑕᒻᒪᖏᑦᑐᐃᓐᓇᐅᓗᑎᒃ ᐊᒻᒪ, ᐱᔭᕆᐊᖃᕐᓂᕈᑎᒃ, ᒪᓕᓚᐅᕈᓂ ᐊᑐᖅᑕᐅᓚᐅᖅᓯᒪᔪᓂᒃ ᐊᕐᕌᒍᒋᓚᐅᖅᑕᖓᓂ, ᐊᒻᒪ
    • (iii) ᑎᑎᕋᕐᕕᐊᓂ ᑮᓇᐅᔭᕐᓂᑦ ᑕᐅᖅᓰᖅᑕᐅᓚᐅᖅᑐᑦ ᑮᓇᐅᓕᐊᖑᓚᐅᖅᑐᓂ ᖃᐅᔨᓴᖅᑎᒻᒪᕆᐊᑕ ᖃᐅᔨᓴᐅᓚᐅᖅᓯᒪᔭᖓᓂ ᐅᓂᒃᑳᓕᐊᖏᒥᑦ ᒪᓕᒡᓗᒍ ᑕᕝᕙᓂ ᐱᖁᔭᕐᒥᑦ; ᐊᒻᒪ
  • (b) ᐅᔾᔨᖅᓱᕆᐊᖃᖅᑐᓂ ᖃᓄᑐᐃᓐᓇᖅ ᐱᔾᔪᑎᓕᐅᕈᓐᓇᖅᑐᒥᒃ ᑮᓇᐅᔭᓕᐊᖑᓚᐅᖅᓯᒪᔪᒥᒃ ᖃᐅᔨᓴᖅᑎᒻᒪᕆᐊᑕ ᐅᓂᒃᑳᓕᐊᒥᒃ, ᐃᓱᒪᒋᔭᖓᑦ ᒪᓕᒡᓗᒍ, ᑕᑯᓇᒃᑕᐅᔭᕆᐊᖃᓕᕐᓂᖓ ᑎᑎᕋᕐᕕᖓᒥᑦ ᒥᓂᔅᑕᐅᓘᓐᓃᑦ.

• Marginal note: ᑮᓇᐅᔭᓕᐊᖑᔪᕕᓃᑦ ᖃᐅᔨᓴᖅᑕᐅᑎᓪᓗᒋᑦ ᑐᓴᒐᒃᓴᓕᐅᖑᔪᕕᓃᑦ

  (3) ᒥᓂᔅᑕ ᖃᓄᑐᐃᓐᓇᖅ ᖃᐅᔨᓴᖅᑕᐅᖁᔨᑐᐃᓐᓇᕆᐊᓕᒃ ᑐᓴᒐᒃᓴᑐᐃᓐᓇᕐᒥᑦ ᐱᖃᑕᐅᓗᓂ ᐅᓂᒃᑳᓕᐊᖅ ᑕᐃᑲᓃᑦᑐᒥᑦ ᑎᑎᕋᖅᓯᒪᔪᖅ (2)(a)−ᒥᑦ ᑮᓇᐅᔭᓕᐊᖑᔪᕕᓃᑦ ᖃᐅᔨᓴᖅᑕᐅᑎᓪᓗᓂᒋᑦ.

• Marginal note: ᒥᓂᔅᑕᒧᑦ ᑐᓂᔭᐅᑎᓪᓗᒍ

  (4) ᑎᑎᕋᕐᕕᐊᓂ ᒥᓂᔅᑕᒧᒃ ᑐᓂᓯᔭᕆᐊᓕᒃ ᑮᓇᐅᔭᓕᐊᖑᔪᕕᓃᑦ ᐅᓂᒃᑳᓕᐊᖑᓂ ᐱᓪᓗᒍ ᑮᓇᐅᔭᓕᕆᓂᕐᒧᑦ ᐊᕐᕌᒍᓂ ᑕᐃᑲᙵᑦ ᐅᓪᓗᓂ 90−ᓂᒃ ᐃᓱᓕᑎᓪᓗᒍ ᑮᓇᐅᔭᓕᕆᓂᕐᒧᑦ ᐊᕐᕌᒍᐊᓂ.

Marginal note: ᐊᔾᔨᐅᖏᑦᑐᒥᒃ ᖃᐅᔨᓴᕐᓂᖅ

• 36 (1) ᖃᖓᑐᐃᓐᓇᑦᑎᐊᒃᑯᑦ ᒥᓂᔅᑕᐅᑉ ᐱᖁᔭᖓᑎᒍᑦ, ᑎᑎᕋᕐᕕᐊᓂ ᐊᔾᔨᐅᖏᑦᑐᒥᒃ ᖃᐅᔨᓴᕆᐊᖃᖅᑐᑦ ᑮᓇᐅᔭᑦ ᑕᐅᓰᖅᑕᐅᔪᑦ ᐱᓕᕆᐊᖑᔪᓪᓗ ᕿᒥᕐᕈᐊᒐᖁᑎᖏᓐᓂᒃ, ᑎᑎᖅᑲᖁᑎᖏᓐᓂᒃ, ᐊᑐᖅᑕᐅᓯᐅᖑᔪᑦ ᐱᓕᕆᐊᖑᖃᑦᑕᖅᑐᓪᓗ ᑲᔪᓯᑦᑎᐊᕋᓗᐊᕐᒪᖔᑕ ᓇᓗᓇᐃᖅᓯᒪᔮᓂ ᐃᓚᖓ 34−ᒥᑦ, ᑕᐃᑲᙵᑦ ᖃᐅᔨᓴᖅᑕᐅᑎᓪᓗᒋᑦ, ᐱᓯᒪᔭᐅᓂᖏᑦ ᒪᓕᑦᑎᐊᕆᐊᕋᓗᐊᕐᒪᖔᑕ ᑕᐃᑲᓂ ᐃᓚᖓᓂ.

• Marginal note: ᖃᐅᔨᓴᖅᑎ

  (2) ᑎᑎᕋᕐᕕᐊᓂ ᑮᓇᐅᔭᓕᐊᖑᕙᒃᑐᓂ ᐊᔾᔨᐅᖏᑦᑐᒥᒃ ᖃᐅᔨᓴᖅᑕᐅᒋᐊᓕᒃ. ᑭᓯᐊᓂ, ᒥᓂᔅᑕ ᐱᖁᔨᓐᓂᖅᐸᑦ, ᐃᓱᒪᒋᔭᖓᓂ ᐊᓯᐊᒍᑦ ᐃᖅᑲᓇᐃᔭᕐᕕᖓᓃᖏᑦᑐᒥᒃ, ᒥᓂᔅᑕᓗ ᐱᖃᑐᐃᓐᓇᕆᐊᓕᒃ, ᐅᖃᖃᑎᖃᕐᓗᓂ ᑲᒥᓯᓇᒥᒃ, ᖃᐅᔨᓴᖅᑕᐅᖁᔭᓗᓂ ᐊᓯᐊᓂᒃ.

• Marginal note: ᐸᕐᓇᒃᑕᐅᓯᒪᔪᖅ

  (3) ᐊᓯᔾᔨᐅᖏᑦᑐᒥᒃ ᖃᐅᔨᓴᕆᐊᓚᐅᖏᓐᓂᒥᓂᒃ, ᖃᐅᔨᓴᖅᑎ ᖃᐅᔨᓴᕆᐊᖃᖅᐳᖅ ᑎᑎᕋᕐᕕᐊᓂ ᐊᑐᖃᑦᑕᖅᑐᓂ ᖃᓄᖅ ᖃᐅᔨᓴᖃᑦᑕᕐᒪᖔᑕᓗ ᐸᕐᓇᐃᓗᑎᒡᓗ ᖃᓄᖅ ᖃᐅᔨᓴᕐᓂᐊᕐᒪᖔᑕ, ᐱᖃᑕᐅᕗᑦ ᐅᓂᒃᑳᓕᐊᖅ ᖃᓄᖅ ᖃᐅᔨᓴᓚᐅᕐᒪᖔᑕ, ᑲᒥᓯᓇᒧᑦ.

• Marginal note: ᑎᑎᕋᕐᕕᐊᓂ ᑮᓇᐅᔭᓕᐊᖑᔪᕕᓃᑦ ᖃᐅᔨᓴᖅᑕᐅᑎᓪᓗᒋᑦ

  (4) ᖃᐅᔨᓴᖅᑎ ᑲᒪᑦᑎᐊᕋᓱᒋᐊᖃᖅᐳᖅ, ᐃᓗᐊᓂ ᑮᓇᐅᔭᓕᐊᖑᔪᕕᓂᕐᓂᑦ ᖃᐅᔨᓴᖅᑎᓪᓗᒍ ᑕᐃᑲᓂ ᓇᓗᓇᐃᖅᓯᒪᔮᓂ ᐃᓚᒃᑲᓐᓂᖓᓂ 34(3)−ᒥᑦ.

Marginal note: ᖃᐅᔨᓴᖅᑎᐅᑉ ᐅᓂᒃᑳᓕᐊᖓᑦ

• 37 (1) ᐱᓕᕆᐊᖃᕆᐊᖃᖅᐳᖅ ᖃᐅᔨᓴᖅᑎ, ᐊᔾᔨᐅᖏᑦᑐᒥᒃ ᖃᐅᔨᓴᕐᓂᖃᕌᖓᒥᒃ, ᖃᐅᔨᕙᓪᓕᐊᔭᖏᑦ ᐅᓂᒃᑳᓕᐅᕐᓗᓂ ᒥᓂᔅᑕᒧᑦ ᐊᒻᒪ ᑲᒥᓯᓇᒧᑦ.

• Marginal note: ᐅᓂᒃᑳᓕᐊᖓᑕ ᐃᓗᓕᖏᑦ

  (2) ᖃᐅᔨᓴᖅᑎ ᐅᓂᒃᑳᓕᐊᖏᑦ ᐱᖃᓯᐅᔾᔨᒋᐊᖃᖅᐳᑦ

  • (a) ᖃᐅᔨᓴᖅᑎᐅᑉ ᐃᓱᒪᒋᔭᖓᓂ ᐅᓂᒃᑳᓕᐊᖑᔪᑦ ᓇᓗᓇᐃᖅᓯᒪᑦᑎᐊᕋᓗᐊᕐᒪᖔᑦ ᑮᓇᐅᔭᕐᓂᑦ ᖄᖏᐅᑎᓯᒪᕐᔪᐊᖏᒃᑲᓗᐊᕐᒪᖔᑦ ᐊᑐᖅᑕᐅᖃᑦᑕᖅᑐᓂ ᖃᐅᔨᓴᖅᑕᐅᖃᑦᑕᖅᑐᓂᒡᓗ ᒪᓕᒡᓗᒍ ᓇᓗᓇᐃᖅᓯᒪᔮᓂ ᐃᓚᒃᑲᓐᓂᖓᓂ 34(2)−ᒥᑦ; ᐊᒻᒪ
  • (b) ᑕᐃᑲᓂ ᖃᐅᔨᓴᖅᑎ ᖃᐅᔨᓴᖅᑎᓪᓗᒍ ᐅᓂᒃᑳᓕᐊᖑᔪᕕᓂᕐᒥᑦ ᑎᑎᕋᕐᕕᐊᓂ ᑮᓇᐅᔭᓕᐊᖑᔪᕕᓂᕐᓂᑦ.

• Marginal note: ᓇᐃᓈᖅᓯᒪᔪᒥᒃ ᐅᓂᒃᑳᓕᐅᕐᓂᖅ

  (3) ᑲᒥᓯᓇ ᐅᓂᒃᑳᓕᐊᖑᔪᕕᕐᓂᒥᑦ ᑎᑎᕋᕐᕕᐊᓂ ᐱᔭᕇᖅᓯᒪᓕᖅᑎᓪᓗᒍ, ᓇᐃᓈᖅᓯᒪᔪᒥᒃ ᐅᓂᒃᑳᓕᐅᕆᐊᓕᒃ ᐃᑭᐊᕿᕕᒃᑯᑦ.

Marginal note: ᐅᖃᖃᑎᖃᕐᓂᖅ ᑮᓇᐅᔭᓕᐊᖑᕙᒃᑐᓂ ᖃᐅᔨᓴᖅᑎᒻᒪᕆᒡᔪᐊᖓᓂ

38 ᖃᖓᑐᐃᓐᓇᒃᑯᑦ ᑮᓇᐅᔭᓕᐊᖑᕙᒃᑐᓂ ᖃᐅᔨᓴᖅᑎᒻᒪᕆᖓᑦ ᑎᑎᕋᕐᕕᐊᓂ ᑮᓇᐅᔭᓕᐊᖑᕙᒃᑐᓂ ᖃᐅᔨᓴᖅᑎᖓᓄᑦ ᐅᖃᖃᑎᖃᕋᔭᖅᑐᖅ ᐊᔾᔨᐅᖏᑦᑐᒥᒃ ᖃᐅᔨᓴᓚᐅᓂᕐᒥᓂ ᖃᓄᑐᐃᓐᓇᕐᓘᓐᓃᑦ ᑐᕌᒐᕆᓚᐅᖅᑕᒥᓂᒃ.

Marginal note: ᑐᓴᖅᑕᐅᔭᕆᐊᖃᖅᑐᑦ

• 39 (1) ᑎᑎᕋᕐᕕᐊᓂ ᑮᓇᐅᔭᓕᐊᖑᔪᕕᓃᑦ ᖃᐅᔨᓴᖅᑎᒻᒪᕆᖓ ᑐᒃᓯᕋᖅᑎᓪᓗᒍ ᖃᐅᔨᓴᖅᑎᓘᓐᓃᑦ, ᐱᑕᖃᖅᑎᓪᓗᒍ ᑲᒥᓯᓇᕕᓂᕐᒥᒡᓘᓐᓃᑦ, ᑐᑭᒧᐊᒃᑎᑦᑎᔩᑦ ᐃᖅᑲᓇᐃᔭᖅᑎᓪᓘᓐᓃᑦ ᑎᑎᕋᕐᕕᐊᓂ ᖃᓄᑐᐃᓐᓇᖅ ᑐᓴᒐᒃᓴᓂ ᓇᓗᓇᐃᖅᑕᐅᔪᓂᒡᓘ ᑐᓴᐅᒪᑎᑦᑎᓗᓂ, ᐊᑐᐃᓐᓇᐅᑎᑦᑎᓗᓂᒡᓗ ᖃᓄᑐᐃᓐᓇᖅ ᑎᑎᕋᕐᕕᐅᑉ ᓂᐱᓕᐅᖅᓯᒪᔭᖏᓐᓂᒃ, ᑎᑎᖅᑲᓂ, ᕿᒥᕐᕈᐊᒐᕐᓂᑦ, ᑮᓇᐅᔭᒃᑯᕕᖕᓂᑦ ᐊᒻᒪ ᐊᑭᓕᕈᓐᓇᐅᑎᓂᒃ ᐊᐅᓚᑕᖏᓐᓂᒃ, ᑕᐃᒪᓐᓇ ᑮᓇᐅᔭᓕᐊᖑᕙᒃᑐᓂ ᖃᐅᔨᓴᖅᑎᒻᒪᕆᐊ ᖃᐅᔨᓴᖅᑎᓘᓐᓃᑦ ᐅᓂᒃᑳᓕᐊᖑᖁᔭᒐᔭᖅᑕᖓᓂ ᒪᓕᒡᓗᒍ ᑕᕝᕙᓂ ᐱᖁᔭᕐᒥᑦ.

• Marginal note: ᑐᓴᖅᑎᑦᑎᔭᕆᐊᖃᕐᓂᖅ

  (2) ᑎᑎᕋᕐᕕᐊ ᐱᑕᖃᖅᐸᑦ ᑲᒥᓯᓇᐅᓚᐅᖅᓯᒪᔪᒡᓘᓐᓃᑦ, ᑐᑭᒧᐊᒃᑎᑦᑎᔨᓂᒃ ᐃᖅᑲᓇᐃᔭᖅᑎᒥᒡᓘᓐᓃᑦ ᑐᓴᒐᒃᓴᖅᑕᖃᖏᑉᐸᑦ ᓇᓗᓇᐃᖅᓯᔾᔪᑎᒥᒡᓘᓐᓃᑦ ᑐᒃᓯᕋᖅᑕᖓᑕ ᑮᓇᐅᔭᓕᐊᖑᕙᒃᑐᓂ ᖃᐅᔨᓴᖅᑎᒻᒪᕆᖓᑕ ᖃᐅᔨᓴᖅᑎᒥᒡᓘᓐᓃᑦ ᒪᓕᒡᓗᒍ ᐃᓚᒃᑲᓐᓂᖓ (1)−ᒥᑦ, ᑎᑎᕋᕐᕕᐊᓂ ᑲᒥᓯᓇᒋᓕᖅᑕᖓᑕ ᑐᑭᒧᐊᒃᑎᑦᑎᔨᓂᒡᓘᓐᓃᑦ ᑐᓴᒐᒃᓴᖃᕆᐊᖃᖅᐳᑦ ᓇᓗᓇᐃᖅᓯᔾᔪᑎᒥᒡᓘᓐᓃᑦ ᐊᒻᒪ ᑐᓂᓯᓗᑎᒃ ᑮᓇᐅᔭᓕᐊᖑᕙᒃᑐᓂ ᖃᐅᔨᓴᖅᑎᒻᒪᕆᖓᓄᑦ ᖃᐅᔨᓴᖅᑎᒧᒡᓘᓐᓃᑦ.

Marginal note: ᑭᒡᓕᒋᔭᐅᔪᖅ

40 ᐱᑕᖃᖏᓚᖅ ᐃᓚᖏᓐᓂᒃ 34−ᒥᑦ 39−ᒧᑦ ᑐᑭᓯᒪᐅᔾᔪᑎᑕᖃᖏᓚᖅ ᐱᖁᔭᐅᔪᒥᒃ ᑎᑎᕋᕐᕕᐊᓂ ᑮᓇᐅᔭᓕᐊᖑᕙᒃᑐᓂ ᖃᐅᔨᓴᖅᑎᒻᒪᕆᖓ ᖃᐅᔨᓴᖅᑎᖓᓂᒡᓘᓐᓃᑦ ᓇᓗᓇᐃᖅᓯᓗᓂ ᖃᓄᑐᐃᓐᓇᖅ ᐃᓱᒪᒋᔭᒥᓂᒃ ᐱᓇᓱᒃᑎᑦᑎᒐᔭᖅᑐᒥᒃ ᐱᔾᔪᑕᐅᔪᓂᒃ ᐊᑐᐊᒐᕐᒥᙶᖅᑐᓂᒃ, ᐱᖃᑕᐅᕗᖅ ᐱᓇᓱᐊᖅᑎᑦᑎᓂᖅ ᑎᑎᕋᕐᕕᐊᓂ ᑐᕌᖓᖏᓐᓂᒃ ᖃᓄᑐᐃᓐᓇᕐᓘᓐᓃᑦ ᐊᑐᐊᒐᓕᐅᕋᓱᐊᖅᑎᓪᓗᒋᑦ.

Marginal note: ᐱᔪᓐᓇᕐᓂᖃᕈᓐᓇᖅᑎᑕᐅᓂᖅ

41 ᐅᖃᐅᓯᑎᒍᑦ ᑎᑎᕋᖅᓯᒪᔪᒃᑯᓪᓘᓐᓃᑦ ᐅᓂᒃᑳᓕᐊᒥᒃ ᐅᓂᒃᑳᓕᐊᖓᓂᒡᓘᓐᓃᑦ ᑕᕝᕙᓂ ᐱᖁᔭᕐᒥᑦ ᑖᒃᑯᓂᖓ ᑎᑎᕋᕐᕕᐊᖓ ᑮᓇᐅᔭᓕᐊᖑᕙᒃᑐᓂ ᖃᐅᔨᓴᖅᑎᒻᒪᕆᐊᑕ ᖃᐅᔨᓴᖅᑎᓪᓗᓂᓘᓐᓃᑦ ᐱᔪᓐᓇᕐᓂᖃᖅᑎᑕᐅᕗᖅ.

Marginal note: ᓴᖅᑭᑎᑦᑎᓂᖅ ᐱᕙᓪᓕᐊᒍᑕᐅᔪᕕᓂᕐᒥᒃ

42 ᑲᒥᓯᓇ ᐃᒪᓐᓇᐃᓕᐅᕆᐊᓕᒃ, ᐊᔪᕈᓐᓃᑐᐊᖅᐸᑦ, ᓇᓗᓇᐃᖅᓯᓗᓂ ᒥᓂᔅᑕᒧᑦ ᓇᓕᐊᑐᐃᓐᓇᕐᓘᓐᓃᑦ ᑮᓇᐅᔭᓕᕆᔨᓂᒃ ᐊᓯᐊᓂᒡᓘᓐᓂᑦ ᐱᕙᓪᓕᐊᔪᓂᒃ, ᑲᒥᓯᓇᐅᑉ ᐃᓱᒪᖓ ᒪᓕᒡᓗᒍ, ᑎᑎᕋᕐᕕᐊᓂ ᑲᔪᓯᑎᑦᑎᑐᐃᓐᓇᕆᐊᖃᓪᓚᕆᒃᑎᓪᓗᒋᑦ ᑐᕌᒐᖏᓐᓂᒃ ᐱᔪᓐᓇᕐᓂᒥᓂᒡᓗ ᐱᓕᕆᐊᖃᖅᑎᓪᓗᒋᑦ ᐱᔭᒃᓴᖏᓐᓂᒡᓘᓐᓂᑦ ᐱᓕᕆᐊᖃᖅᑎᓪᓗᒋᑦ, ᐅᕝᕙᓘᓐᓃᑦ ᑮᓇᐅᔭᖃᑎᑕᐅᒋᐊᓕᖕᓂᑦ.

ᐊᕐᕌᒍᑕᒫᖅᓯᐅᑎ ᐅᓂᒃᑳᓕᐊᖅ

Marginal note: ᐃᓗᓕᖏᑦ

• 43 (1) ᐱᓕᕆᐊᖃᕆᐊᖃᖅᐳᑦ ᑎᑎᕋᕐᕕᐊᓂ, ᑕᖅᑭᑦ ᑎᓴᒪᑦ ᐃᓱᓕᑦᑕᕌᖓᒥᒃ ᑮᓇᐅᔭᓕᕆᓂᕐᒧᑦ ᐊᕐᕌᒍᐊᓂ, ᒥᓂᔅᑕᒧᑦ ᐊᕐᕌᒍᑕᒫᖅᓯᐅᑎᓂ ᐅᓂᒃᑳᓕᐅᕆᐊᓖᑦ ᐅᑯᓂᖓ

  • (a) ᑲᓇᑕᒥᑦ ᐊᑐᖅᑕᐅᓂᖓ ᖃᓄᐃᓕᕐᓂᖏᓐᓂᒡᓗ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ;
  • (b) ᐱᓕᕆᖃᑎᒌᓯᐅᖑᔪᓂ ᐱᔭᕆᐊᖃᕐᓂᖅ, ᓄᓇᓕᖕᓂᑦ ᐃᓄᖏᓐᓂᒡᓗ ᐊᒻᒪ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐱᓕᕆᐊᖃᖅᐸᒃᑐᓂ − ᐱᕙᓕᐊᑎᑕᐅᓗᑎᒡᓗ − ᐱᓪᓗᒍ ᐅᑎᖅᑎᑦᑎᓇᓱᐊᕐᓂᕐᒧᑦ, ᐅᖃᐅᓯᕐᒥᓂᒃ ᐊᑐᓕᒃᑲᓐᓂᕋᓱᐊᖅᑐᓂᒃ, ᐅᖃᐅᓯᖃᐃᓐᓇᕐᓂᕐᒧᑦ ᓴᙱᓂᖅᑖᓂᕐᒧᓪᓗ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ
  • (c) ᑲᓇᑕᐅᑉ ᒐᕙᒪᖓᓂ ᑮᓇᐅᔭᖃᖅᑎᑕᐅᑦᑎᐊᕐᓂᖅ ᑐᕌᖓᔪᓂ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓃᖓᔪᓂᒃ; ᐊᒻᒪ
  • (d) ᐱᓕᕆᐊᖑᑎᓪᓗᒍ ᑖᓐᓇ ᐱᖁᔭᖅ.

• Marginal note: ᐱᓕᕆᐊᖑᔪᑦ ᑎᑎᕋᕐᕕᖕᒥᑦ ᐊᓯᖏᓪᓗ ᐱᔾᔪᑎᐅᔪᑦ

  (2) ᐊᕐᕌᒍᑕᒫᖅ ᐅᓂᒃᑳᓕᐊᖓᑦ ᑐᓴᒐᒃᓴᖃᕆᐊᖃᖅᑐᓪᓗ ᑎᑎᕋᕐᕕᖕᒥᑦ ᐱᓕᕆᐊᖑᕙᒃᑐᓂ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ ᐱᖃᓯᐅᔾᔨᒋᐊᖃᕆᕗᕐᓗ

  • (a) ᑎᑎᕋᖅᓯᒪᓗᑎᒃ ᕿᒥᕐᕈᔭᐅᔪᑦ ᖃᐅᔨᓴᖅᑕᐅᔪᓪᓗ ᒪᓕᒡᓗᒍ ᐃᓚᒃᑲᓐᓂᖓ 24(1)−ᒥᑦ;
  • (a.1) ᑎᑎᕋᕐᕕᐅᑉ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ ᐅᓂᒃᑳᓕᐊᖅ;
  • (b) ᐊᕐᕌᒍᑕᒫᖅ ᑮᓇᐅᔭᓕᕆᔾᔪᑎᕕᓂᕐᓄᑦ ᖃᐅᔨᓴᖅᑎᒻᒪᕆᖓᑕ ᐅᓂᒃᑳᓕᐊᖓᓂᒃ;
  • (c) ᑎᑎᕋᕐᕕᐊᓂ ᐅᓂᒃᑳᓕᐊᖓᑦ ᐱᔾᔪᑎᖏᓐᓂᒃ ᐱᓕᕆᐊᖃᓱᒃᑎᓪᓗᒋᑦ ᑮᓇᐅᔭᓕᕆᓂᕐᒧᑦ ᐊᕐᕌᒍᐊᓂ; ᐊᒻᒪ
  • (d) ᖃᓄᑐᐃᓐᓇᖅ ᐊᓯᐊᓂ ᑐᓴᒐᒃᓴᓂᒃ ᓇᓗᓇᐃᖅᓯᒪᔭᖓᓂ ᑕᐃᑲᓂ ᐊᑐᐊᒐᕐᓂᑦ.

Marginal note: ᒪᓕᒐᓕᐅᕐᕕᒡᔪᐊᒧᑦ ᓴᖅᑭᑎᑦᑎᓂᖅ

• 44 (1) ᒥᓂᔅᑕ ᑎᑎᕋᕐᕕᐊᑕ ᐅᓂᒃᑳᓕᐊᖓᓂ ᐊᔾᔨᖓᓂ ᑐᓂᓯᔭᕆᐊᖃᖅᑐᖅ ᒪᓕᒐᓕᐅᕐᕕᒡᔪᐊᒧᑦ ᖃᖓᑐᐃᓐᓇᖅ ᐅᓪᓗᒋᓕᖅᑕᖓᓂ 15−ᓂᒃ ᑕᐃᒪᙵᑦ ᑲᑎᒪᑎᓪᓗᒋᑦ ᐅᓂᒃᑳᓕᐊᖅ ᐱᓚᐅᖅᑎᓪᓗᓂᐅᒃ.

• Marginal note: ᑲᑎᒪᔨᕋᓛᓄᑦ ᑐᓂᔭᐅᑎᓪᓗᒍ

  (2) ᓴᖅᑭᑕᐅᔭᕇᖅᑎᓪᓗᒍ, ᐅᓂᒃᑳᓕᐊᖅ ᑐᓂᔭᐅᒋᐊᓕᒃ ᑲᑎᒪᔨᕋᓛᖏᓐᓄᑦ ᐃᑦᑑᑎᑦ, ᑲᓇᑕᐅᑉ ᒐᕙᒪᖃᕐᕕᖓᓄᑦ ᑕᒪᕐᒥᓘᓐᓃᑦ ᒪᓕᒐᓕᐅᕐᕕᒡᔪᐊᒧᑦ ᓂᕈᐊᖅᑕᐅᑐᐃᓐᓇᕆᐊᓕᒃ ᐅᕝᕙᓘᓐᓃᑦ ᕿᒥᕐᕈᓂᖃᕐᓗᑎᒃ ᐅᓂᒃᑳᓕᐊᖓᓂᒃ.

ᐊᑐᐊᒐᑦ ᒪᓕᒐᓪᓗ

Marginal note: ᐊᑐᐊᒐᓕᐅᕈᓐᓇᕐᓂᖅ

• 45 (1) ᑎᑎᕋᕐᕕᐊᓂ ᒥᓂᔅᑕ ᐅᖃᖃᑎᖃᕆᐊᖃᖅᑐᖅ, ᐊᔾᔨᒌᖏᑦᑐᓂᒃ ᓄᓇᖃᖅᑳᖅᓯᒪᔪᑦ ᒐᕙᒪᖏᓐᓂᒃ ᐊᓯᖏᓐᓂᒡᓗ ᑎᒥᐅᔪᓂᒃ ᐊᔾᔨᒌᖏᑦᑐᓂᒡᓗ ᑲᑐᔾᔨᖃᑎᒌᓂᒃ ᐱᓕᕆᐊᖃᕋᓱᒃᑎᓪᓗᒋᑦ ᐊᔾᔨᐅᖏᑦᑐᓂᒃ ᐱᔾᔪᑎᓂᒃ ᐊᒻᒪ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᒌᒃᑐᓂᒃ, ᓄᓇᓕᖕᓂᑦ ᐃᓄᖏᓐᓂᒡᓗ, ᐊᐅᓚᑦᑎᔨᖓ ᑲᑎᒪᔨᖏᑦ ᐊᑐᐊᒐᓕᐅᑐᐃᓐᓇᕆᐊᓖᑦ

  • (a) ᑕᐃᑲᓂ ᐃᓚᖓ 27−ᒥᑦ ᐅᓐᓂᓘᑎᑦ ᐱᓪᓗᒋᑦ, ᐱᖃᓯᐅᑎᕗᑦ
    • (i) ᐅᓐᓂᓘᑎᓕᐅᕐᓂᖅ, ᐱᖃᑕᐅᕗᑦ ᖃᓄᐃᓕᐅᕐᓂᖏᑦ ᐅᓐᓂᕐᓗᒃᑐᖃᓚᐅᖅᑎᓐᓇᒍᑦ,
    • (ii) ᐅᓐᓂᕐᓘᑎᑦ ᕿᒥᕐᕈᔭᐅᓗᑎᒃ, ᐊᒻᒪ
    • (iii) ᐅᓐᓂᕐᓗᑕᐅᔪᑦ ᕿᒥᕐᕈᔭᐅᔭᕇᖅᑎᓪᓗᒋᑦ ᐅᓂᒃᑳᓕᐊᖏᓐᓂᒃ, ᐱᖃᑕᐅᕗᑦ ᖃᓄᐃᑦᑑᓂᖏᑦ ᐃᓱᒪᒃᓴᖅᓯᐅᕈᑎᐅᑐᐃᓐᓇᕆᐊᓕᒃ ᑖᒃᑯᓂᖓ ᐅᓂᒃᑳᓕᐊᓂ, ᑕᐃᑲᓂ ᐱᔭᕇᖅᑕᐅᒋᐊᓕᒃ ᐅᓂᒃᑳᓕᐊᑦ ᐃᓄᖏᓂᒡᓗ ᑲᑐᔾᔨᖃᑎᒌᒃᑐᓂᒡᓗ ᐅᓂᒃᑳᓕᐅᕆᐊᓕᖕᓂᑦ;
  • (a.1) ᐅᖃᖃᑎᒌᖕᓂᐅᖃᑦᑕᖅᑐᑦ ᐱᓪᓗᒋᑦ ᑕᕝᕙᓂ ᐱᖁᔭᕐᒥᑦ ᒪᓕᒋᐊᖃᕐᓂᖏᓐᓄᑦ ᐊᖏᖃᑎᒌᖕᓂᒡᓗ ᐅᕝᕙᓘᓐᓃᑦ ᐋᖅᑭᒃᓱᖅᓯᒪᔪᓂᒃ ᑕᐃᑲᓂ ᐃᓚᖏᓐᓂᒃ 8 ᐊᒻᒪ 9−ᒥᑦ;
  • (a.2) ᐃᓚᖓ 10.1 ᐱᔾᔪᑎᖓ,
    • (i) ᓇᓗᓇᐃᖅᑕᐅᓗᑎᒃ ᐱᔨᑦᑎᖅᑕᐅᔪᑦ ᐊᑐᐃᓐᓇᐅᑐᐃᓐᓇᕆᐊᓖᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖓᓂ ᐊᒻᒪᓗ ᒐᕙᒪᑐᖃᒃᑯᑦ ᐱᓕᕆᕝᕕᐊᓂ ᑭᒡᒐᖅᑐᐃᔪᒥᒡᓘᓐᓃᑦ ᐅᕝᕙᓘᓐᓃᑦ ᐊᑐᐃᓐᓇᔭᕆᐊᖃᓪᓚᕆᒃᑐᓄᑦ ᐱᔨᑦᑎᖅᑕᐅᑐᐃᓐᓇᕆᐊᓕᒃ ᐅᖃᐅᓯᐊᓂ,
    • (ii) ᑐᑭᓕᐅᖅᑕᐅᑎᓪᓗᒍ ᓇᓗᓇᐃᖅᑕᐅᒋᐊᓕᒃ “ᐱᔨᑦᑎᖅᑕᐅᔪᓐᓇᖅᑐᑦ”, ᐊᒻᒪ
    • (iii) ᑐᑭᓕᐅᖅᓯᒪᔪᖅ ᓇᓗᓇᐃᖅᓯᒪᔮᓂ “ᐃᓗᓕᖏᑦ” ᐊᒻᒪ “ᑐᒃᓯᕋᖅᑕᐅᔪᖅ” ᐱᔨᑦᑎᑕᖏᓪᓗ ᓇᓗᓇᐃᖅᑕᐅᓯᒪᔪᑦ ᒐᕙᒪᑐᖃᒃᑯᑦ ᐱᓕᕆᕝᕕᐊᓂ ᑭᒡᒐᖅᑐᐃᔪᒥᒡᓘᓐᓃᑦ ᐱᔨᑦᑎᖅᑕᐅᔭᕆᐊᖃᓪᓚᕆᒃᑐᓂᒡᓘᓐᓃᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᐊᓂ ᑕᐃᑯᐊᓗ ᐱᔨᑦᑎᖅᑕᐅᔪᒪᔪᑦ ᐅᖃᐅᓯᕐᒧᑦ;
  • (b) ᓇᓗᓇᐃᖅᑕᐅᓯᒪᔪᓪᓗ ᐊᓯᖏᑦ ᑐᓴᒐᒃᓴᑦ ᐱᖃᓯᐅᔾᔨᑐᐃᓐᓇᕆᐊᓕᒃ ᐊᕐᕌᒍᑕᒫᖅ ᐅᓂᒃᑳᓕᐊᖓᓂ ᐱᔾᔪᑎᖏᓐᓃᑦᑐᓂᒃ ᑕᐃᑲᓂ ᑎᑎᕋᖅᓯᒪᔪᖅ 43(2)(d)−ᒥᑦ; ᐊᒻᒪ
  • (c) ᐱᓗᐊᖅᑐᒥᑦ, ᑲᔪᓯᑎᑕᐅᔪᓐᓇᖁᓗᒋᑦ ᐱᔾᔪᑎᖏᑦ ᒪᓕᒐᖏᓪᓗ ᑕᔅᓱᒪ ᐱᖁᔭᐅᑉ.

• Marginal note: ᐊᔾᔨᒌᓐᓂᓕᕇᑦ ᐅᐸᓗᙵᐃᔭᐅᑎᑦ

  (2) ᑕᐃᑲᓂ ᑎᑎᕋᖅᓯᒪᔪᑦ (1)(a.2)−ᒥᑦ ᐊᑐᐊᒐᓕᐊᖑᔪᑦ ᑐᑭᓕᐅᖅᓯᒪᑐᐃᓐᓇᕆᐊᓕᒃ ᐱᖁᔭᐅᓯᒪᔪᓪᓗ ᐊᔾᔨᒌᖏᑦᑑᑎᐅᕗᑦ ;

  • (a) ᓄᓇᖃᖅᑳᖅᓯᒪᔪᖅ ᐅᖃᐅᓯᖓ ᐊᐱᖅᑯᑕᐅᔪᖅ;
  • (b) ᐊᑐᖅᑕᐅᓂᖓ ᐅᖃᐅᓯᖏᓐᓇᕈᓐᓇᕐᓂᖓᓗ ᐅᖃᐅᓯᐅᑉ;
  • (c) ᐊᔾᔨᖏᑦᑐᒥᑦ ᐱᔾᔪᑎᖃᖅᑐᖅ ᓄᓇᖃᖅᑳᖅᓯᒪᔪᓂᒡᓗ ᐱᓕᕆᖃᑎᒌᒃᐸᒃᑐᓂ ᐱᔭᐅᔪᒪᑎᓪᓗᒍ ᐃᓄᖕᓂᓘᓐᓃᑦ ᐅᖃᐅᓯᖓ ᐊᑐᖅᑕᐅᖃᑦᑕᕈᓂ;
  • (d) ᐊᕕᒃᑐᖅᓯᒪᕝᕕᒋᔭᖓᓃᑦᑐᖅ ᐊᑐᖅᑕᐅᓯᐅᖑᔪᖅ ᐅᖃᐅᓯᖅ; ᐊᒻᒪ
  • (e) ᒐᕙᒪᑐᖃᒃᑯᕕᖕᒥᙶᖅᑐᖅ ᑭᒡᒐᑐᐃᕕᖕᒥᖕᓘᓐᓃᑦ ᑐᕌᒐᕆᔭᐅᑐᐃᓐᓇᕆᐊᓕᖕᓘᓐᓃᑦ ᐱᔨᑦᑎᐅᑕᐅᔪᓐᓇᖁᓗᒍ ᐅᖃᐅᓯᖅ;

Marginal note: ᑲᑐᔾᔨᖃᑎᖃᕐᓂᖅ

45.1  ᒥᓂᔅᑕ ᓄᓇᖃᖅᑳᖅᓯᒪᔪᑦ ᒐᕙᒪᖏᓐᓂᒃ ᐊᓯᖏᓐᓂᒡᓗ ᓄᓇᖃᖅᑳᖅᓯᒪᔪᑦ ᑎᒥᐅᔪᑦ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓄᑦ ᑲᑐᔾᔨᖃᑎᖃᕈᓐᓇᖅᐳᑦ ᐊᑐᐊᒐᓕᐅᕐᓗᑎᒃ ᐊᐅᓚᑦᑎᔪᓐᓇᖅᑐᓂ ᐊᑐᐊᒐᕐᓂᑦ ᑕᐃᑲᓂᙶᖅᑐᒥᑦ ᐃᓚᖓ 25−ᒥᑦ.

Marginal note: ᒪᓕᒐᑦ − ᑎᑎᕋᕐᕕᖓᓂ ᑲᑎᒪᑎᓪᓗᒋᑦ ᐱᓕᕆᐊᖃᖅᐸᒃᑎᓪᓗᒋᓪᓗ

46 ᑎᑎᕋᕐᕕᐊᓂ ᒪᓕᒐᓕᐅᑐᐃᓐᓇᐃᓐᓇᕆᐊᓖᑦ ᐅᑯᐊ ᐱᓪᓗᒋᑦ

• (a) ᑎᑎᕋᕐᕕᐊᓂ ᑲᑎᒪᖁᔨᓗᑎᒃ, ᖃᔅᓯᐅᓂᖏᑦ ᐃᓄᐃᑦ ᓈᒻᒪᒍᓐᓇᖁᓗᒋᑦ ᑲᑎᒪᓂᐊᖅᑎᓪᓗᒋᑦ ᑲᑎᒪᓕᕌᖓᒥᒃ ᑕᐃᒪᓐᓇᓗ ᐃᓱᒪᓕᐅᖃᑦᑕᖅᐳᑦ; ᐊᒻᒪ
• (b) ᑎᑎᕋᕐᕕᐊᓂ ᖃᓄᐃᓕᐅᖃᑦᑕᕐᓂᕆᔭᖏᓐᓂᒃ.

Marginal note: ᒪᓕᒐᑦ − ᐊᑲᐅᖏᓕᐅᕈᑎᑦ ᐅᓐᓂᕐᓘᑎᓪᓗ

47 ᑕᐃᑲᓂ ᑎᑎᕋᖅᓯᒪᔪᖅ 45(a)−ᒥᑦ ᐱᔾᔪᑎᖓ ᓇᓕᐊᑐᐃᓐᓇᖅ ᐊᑐᐊᒐᑦ, ᑎᑎᕋᕐᕕᐊᓂ ᒪᓕᒐᓕᐅᑐᐃᓐᓇᕆᐊᓖᑦ, ᐱᖃᑕᐅᕗᑦ ᒪᓕᒐᖏᑦ ᐊᑐᖅᑕᐅᓯᐅᖑᔪᑦ, ᐃᓗᓕᖃᖅᖢᑎᒃ ᐊᑲᐅᖏᓕᐅᕈᑎᓂ ᐱᔨᑦᑎᖅᑕᐅᓯᖑᔪᓂ ᕿᒥᕐᕈᔭᐅᖃᑦᑕᖅᑐᓂᒡᓘᓐᓃᑦ ᐅᓐᓂᕐᓘᑎᓂᒃ.

Marginal note: ᒪᓕᒐᑦ − ᐃᓄᖕᓄᑦ ᑐᓴᖅᑕᐅᒋᐊᖃᖏᑦᑐᑦ

48 ᑎᑎᕋᕐᕕᐊᓂ ᒪᓕᒐᓕᐅᕆᐊᖃᖅᐳᑦ ᐃᓄᖕᓄᑦ ᑐᓴᖅᑕᐅᒋᐊᖃᖏᑦᑐᓂ ᑐᓴᒐᒃᓴᓂ ᑎᑎᕋᕐᕕᖕᒥᑦ ᕿᒥᕐᕈᔭᐅᖃᑦᑕᖅᑐᓂ ᐃᓄᖕᓄᑦ ᑐᓴᖅᑕᐅᒋᐊᖃᖏᑦᑐᓂ ᐱᔪᓐᓇᕐᓂᖏᓐᓂᒃ ᐱᓕᕆᐊᒃᓴᖏᓐᓂᒡᓗ ᐱᓕᕆᐊᖃᖅᑎᓪᓗᒋᑦ.

ᓇᖕᒥᓂᖅ ᕿᒥᕐᕈᓂᖃᕐᓂᖅ

Marginal note: ᐊᕐᕌᒍᑦ ᑕᓪᓕᒪᑦ ᖄᖏᕌᖓᒥᒃ ᕿᒥᕐᕈᓂᐅᖃᕐᓂᖅ

• 49 (1) ᐊᕐᕌᒍᑦ ᑕᓪᓕᒪᑦ ᖄᖏᕌᖓᒥᒃ ᒪᓕᒡᓗᒍ ᐃᓚᖓ ᐊᑐᓕᓚᐅᖅᑎᓪᓗᒍ ᐊᕐᕌᒍᑕᒫᕐᓗ ᑕᓪᓕᒪᑦ ᑕᐃᒪᓐᓇ, ᒥᓂᔅᑕ ᓇᖕᒥᓂᖅ ᕿᒥᕐᕈᓂᖃᖃᑦᑕᖅᐳᑦ ᑕᕝᕙᓂ ᐱᖁᔭᖓᓂᙶᖅᑐᒥᑦ, ᑎᑎᕋᖅᑎᖏᑦ ᐊᐅᓚᑕᖏᓪᓗ, ᖃᓄᑐᐃᓐᓇᖅ ᐊᖏᕈᑎᓕᐅᖅᑎᓪᓗᒍ ᐋᖅᑭᒃᓱᐃᑎᓪᓗᒍᓘᓐᓃᑦ ᑕᐃᑲᓃᑦᑐᒥᑦ ᐃᓚᖓ 9−ᒥᑦ ᐱᓕᕆᐊᒃᓴᖏᖓᓪᓗ ᑎᑎᕋᕐᕕᖕᒥᑦ. ᕿᒥᕐᕈᔭᖓ ᐱᖃᓯᐅᑎᒋᐊᓕᒃ ᖃᐅᔨᓴᖅᑕᖓᓂ ᐃᓅᑉ ᑎᒥᐅᔪᓂᒡᓘᓐᓃᑦ ᓂᕈᐊᖅᑕᖓᓂ ᒥᓂᔅᑕᐅᑉ ᐅᖃᖃᑎᒌᖕᓂᒃᑯᑦ ᑎᑎᕋᕐᕕᖓᓂ.

• Marginal note: ᐅᓂᒃᑳᓕᐊᖅ

  (2) ᐃᓄᖕᒥᑦ ᑎᒥᐅᔪᒥᒡᓘᓐᓃᑦ ᕿᒥᕐᕈᔪᒥᒃ ᑐᓂᓯᒋᐊᓕᒃ ᒥᓂᔅᑕᒧᑦ ᐅᓂᒃᑳᓕᐅᖅᓯᒪᔪᒥᒃ ᐅᖃᐅᓯᒃᓴᖏᑦ ᐱᔭᕇᖅᓯᒪᓗᑎᒃ ᐃᓱᒪᒃᓴᖅᓯᐅᕈᑎᖓᓂᒡᓗ, ᐅᑯᐊ ᐱᖃᐅᓯᐅᕗᑦ

  • (a) ᖃᓄᑐᐃᓐᓇᖅ ᐃᑲᔫᑎᐅᔪᓐᓇᖅᑐᓂ ᐱᔨᑦᑎᖏᓐᓃᑦᑐᓂ ᑕᔅᓱᒪ ᐱᖁᔭᐅᑉ ᓇᓗᓇᐃᖅᑕᖓᓂ; ᐊᒻᒪ
  • (b) ᖃᓄᑐᐃᓐᓇᖅ ᐊᓯᔾᔨᖅᑐᖃᕌᖓᑦ ᑐᕌᖓᔪᓂᒃ ᐃᒪᓐᓇ, ᐊᓯᐊᒍᕐᕕᖃᖅᑎᓪᓗᒍ, ᑐᕌᒐᖓ ᐱᓕᕆᐊᒃᓴᓪᓘᓐᓃᑦ ᑎᑎᕋᕐᕕᖕᒥᑦ ᐅᕝᕙᓘᓐᓃᑦ ᐊᖏᖅᑕᐅᓯᒪᔪᓂ ᐋᖅᑭᒃᑕᐅᓯᒪᔪᓂᒡᓘᓐᓂᑦ ᑕᕝᕙᓂ ᐃᓚᖓ 9−ᒦᑦᑐᒥᒃ.

• Marginal note: ᐅᖃᖃᒌᒍᑕᐅᔪᑦ

  (2.1) ᒥᓂᔅᑕᒧᑦ ᐅᓂᒃᑳᓕᐅᖅᑐᖃᓚᐅᖏᑎᓪᓗᒍ ᓱᓕ, ᐃᓄᒃ ᑎᒥᐅᔪᕐᓘᓐᓃᑦ ᕿᒥᕐᕈᔭᖓᓂ ᐅᖃᖃᑎᖃᕆᐊᖃᖅᑐᖅ ᐊᔾᔨᒌᖏᑦᑐᓂᒃ ᓄᓇᖃᖅᑳᖅᓯᒪᔪᑦ ᒐᕙᒪᖏᓐᓂᒃ ᐊᓯᖏᓂᒡᓗ ᑎᒥᐅᔪᓂᒃ ᐊᒻᒪ ᐊᔾᔨᒌᖏᑦᑐᓂᒃ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓂᒃ ᐱᓪᓗᒋᑦ ᐃᓱᒪᓕᐅᖅᑕᐅᔪᓂ ᐃᓱᒪᒃᓴᖅᓯᐅᕈᑎᖏᓐᓂᒡᓗ ᐅᓂᒃᑳᓕᐊᖏᑦ ᐱᔾᔪᑎᖏᓐᓄᑦ.

• Marginal note: ᓴᖅᑭᑎᑦᑎᓂᖅ ᒪᓕᒐᓕᐅᕐᕕᒡᔪᐊᒥᑦ

  (3) ᒥᓂᔅᑕ ᐊᔾᔨᖓᓂ ᓴᓇᔭᕆᐊᖃᖅᐳᖅ ᐅᓂᒃᑳᓕᐊᓂ ᑐᓂᔭᐅᓚᐅᖏᓐᓂᖓᓂ ᒪᓕᒐᓕᐅᕐᕕᒡᔪᐊᒧᑦ ᖃᖓᑐᐃᓐᓇᒃᑯᑦ ᐅᓪᓗᓂ 15−ᓂᒃ ᒪᓕᒐᓕᐅᕐᕕᒡᔪᐊᖅ ᐱᔭᕇᕋᖓᒥᒃ ᐅᓂᒃᑳᓕᐊᒥᒃ.

• Marginal note: ᑲᑎᒪᔨᕋᓛᓄᐊᖅᑕᐅᑎᓪᓗᒍ

  (4) ᑐᓂᔭᐅᓚᐅᖅᑎᓪᓗᒍ, ᐅᓂᒃᑳᓕᐊᖅ ᑐᓂᔭᐅᖃᑦᑕᖅᐳᖅ ᑲᑎᒪᔨᕋᓛᖏᓐᓄᑦ ᐃᑦᑑᑎᓄᑦ, ᑲᓇᑕᐅᑉ ᒐᕙᒪᖃᕐᕕᖓ ᑕᒪᕐᒥᓘᓐᓃᑦ ᒪᓕᒐᓕᐅᕐᕕᒡᔪᐊᒧᑦ ᓂᕈᐊᖅᑕᐅᑐᐃᓐᓇᕆᐊᖃᖅᑎᓪᓗᒍ ᐃᓕᓴᕆᔭᐅᓗᓂᓘᓐᓃᑦ ᕿᒥᕐᕈᓂᖃᕐᓂᐊᖅᑎᓪᓗᒍ ᐅᓂᒃᑳᓕᐊᖓᓂ.

ᒪᓕᒐᓕᐅᕐᕕᒡᔪᐊᒥᑦ ᕿᒥᕐᕈᔭᐅᔪᑦ

Marginal note: ᐊᕐᕌᒍᓂ ᐱᖓᓱᑦ ᖄᖏᕌᖓᑦ ᕿᒥᕐᕈᔭᐅᖃᑦᑕᕐᓂᖏᑦ

49.1  ᐱᖓᔪᙵᓂ ᓇᓪᓕᐅᓐᓂᖅᓯᐅᖅᑎᓪᓗᒋᑦ ᐊᔪᕐᓇᒍᓐᓂᑐᐊᕌᖓᒥᒃ ᐅᓪᓗᖓᓂ ᐃᓚᖓ ᐊᑐᓕᖅᑎᓪᓗᒍ ᐊᒻᒪ ᓇᓪᓕᐅᓐᓂᖅᓯᐅᕌᖓᑦ ᐱᖓᔪᖓᓂ ᐊᕐᕌᒍᓂ, ᕿᒥᕐᕈᖃᑦᑕᖅᐳᑦ ᑕᔅᓱᒥᖓ ᐱᖁᔭᕐᒥᑦ ᐊᐅᓚᑕᖏᓐᓂᓘ ᐊᒻᒪ ᐱᒋᐊᖅᑕᐅᔭᕌᖓᒥᒃ ᑲᑎᒪᔨᕋᓛᖏᓐᓄᑦ ᐃᑦᑑᑎᖏᓐᓄᑦ, ᒪᓕᒐᓕᐅᕐᕕᒡᔪᐊᒥᑦ ᑕᒪᕐᒥᓪᓘᓐᓃᑦ ᓂᕈᐊᖅᓯᑐᐃᓐᓇᕆᐊᓖᑦ ᐱᔾᔪᑎᓕᐅᕐᓗᑎᒡᓘᓐᓃᑦ.

ᐊᑐᓕᖅᑎᓪᓗᒍ

Marginal note: ᑲᑎᒪᔨᑦ ᑎᓕᐅᕆᑎᓪᓗᒋᑦ

^{Footnote *} 50 ᑕᔅᓱᒪ ᐱᖁᔭᐅᑉ ᒪᓕᒋᖏᑦ ᐊᑐᓕᓚᐅᖅᐳᖅ ᐅᓪᓗᖓᓂ ᐅᓪᓗᖏᓐᓂᒡᓘᓐᓃᑦ ᑎᓕᔭᖓᓂ ᐊᐅᓚᑦᑎᔨᐊᑕ ᑲᑎᒪᔩᑦ.