La Loi sur les langues autochtones en Oji-cri

La traduction en Oji-cri de la Loi sur les langues autochtones disponible sur cette page est fournie à titre informatif seulement et ne constitue pas une version officielle de la Loi. Les versions officielles et juridiquement contraignantes sont en français et en anglais et peuvent contenir des modifications qui ne sont pas reflétées dans cette traduction.

Sur cette page

• ᓂᑕᒼ ᐃᑭᑐᐏᐣ
• ᑲᒐᑿᐠ ᐑᐣᑕᒪᑫᐏᐣ
• ᐊᓂᑯᑕᒪᑫᐏᓇᐣ
• ᑫᐃᓇᐸᑕᑭᐣ ᐅᐣᒋ ᐅᐦᐅᐍ ᐃᓇᑯᓂᑲᐣ
• ᒥᓂᑯᐏᓇᐣ ᑲᐃᓯᓭᑭᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ
• ᒪᓑᑲᐏᓰᐏᓇᐣ, ᐊᓄᑮᐏᓇᐣ ᒦᓇ ᑫᑐᑕᐣᐠ ᐊᐦᐊᐍ ᐅᑭᒪ
• ᑲᓇᑕ ᐱᒥᐏᒋᑫᐏᓇᐣ
• ᐅᔑᐲᐦᐃᑫᐏᑲᒥᐠ ᐅᐣᒋ ᑲᒪᒦᓄᒋᑫᐨ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ
• ᐃᓇᑯᓂᑫᐏᓇᐣ ᒦᓇ ᐃᓇᑯᓂᑫᐏᓀᐣᓴᐣ
• ᑎᐱᓇᐍ ᓇᑲᒋᒋᑫᐏᐣ
• ᐅᑭᒪᐏᑲᒥᐠ ᓇᑲᒋᒋᑫᐏᐣ
• ᑫᐃᔑ ᒪᑕᓄᑭᒪᑲᐠ

ᓂᑕᒼ ᐃᑭᑐᐏᐣ

ᐃᑭᑐᐏᐣ ᒋᓂᓯᑕᐏᓂᑲᑌᐠ ᒦᓇ ᒋᒪᒋᒋᑲᑌᐠ ᐃᐦᐃᐍ ᒥᓂᑯᐏᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ ᐁᐃᓇᑌᑭᐣ ᒪᒥᓄᒋᑫᐏᓂᐣᐠ ᐅᐣᒋ ᐊᓂᔑᓂᓂᐘᐠ ᒥᓇ ᐁᑭᒋᓀᐣᑕᑯᐠ ᐊᓂ ᐅᓇᒋᑲᑌᐠ ᐅᐦᐅᐍ ᑲᓇᑕ ᐊᐦᑭ, ᐁᑯ ᐍᐣᒋᑲᓇᐘᐸᐣᒋᑲᑌᐠ ᐃᐦᐃᐍ ᑌᐻᐏᐣ ᒥᓇ ᒥᓄᒋᑫᐏᐣ ᐊᓄᑭᐏᐣ ᐅᐦᐅᒪ ᑲᓇᑕ ᑲᑭᐸᑭᑎᓂᑲᑌᑭᐣ ᑐᑕᒧᐏᓇᐣ ᒋᑭᑐᒋᑲᑌᑭᐣ;

ᐃᑭᑐᐏᐣ ᐊᐦᐊᐍ ᐅᑭᒪᐏᐣ ᐅᐦᐅᒪ ᑲᓇᑕ ᐁᐊᔓᑕᒪᐨ ᐃᐦᐃᐍᓂ ᒥᓯᐍ ᐅᑭᒪᐏᓇᐣ ᐃᑭᑐᐏᐣ ᐅᐣᒋ ᐅᒦᓂᑯᐏᓂᐘ ᐊᓂᔑᓂᓂᐘᐠ, ᐁᐃᑭᑐᓇᓂᐘᐣᐠ ᐁᓂᓯᑕᐏᓂᑲᑌᑭᐣ ᐅᒥᓂᑯᐏᓂᐘ ᐊᓂᔑᓂᓂᐤ ᐃᔑᑭᔘᐏᓇᐣ;

ᐃᑭᑐᐏᐣ 2019 ᐊᐦᑭᐏᐣ ᑭᐊᑭᐣᒋᑲᑌ ᐃᑭᐍᓂᐘᐠ ᑲᒪᒪᐤᐱᐘᐨ ᐃᐦᐃᒪ ᒥᓯᐍ ᐅᑭᒪᐏᓇᐣ ᐁᑭᓇᑭᐣᑕᒧᐘᐨ ᒥᓯᐍ ᐅᑭᒪᐏᓇᐣ ᐊᐦᑭᐏᐣ ᒋᓇᑭᐣᒋᑲᑌᐠ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ, ᑯᑕᑭᔭᐣ ᑫᑯᓇᐣ, ᒋᐘᐸᐣᒋᑲᑌᐠ ᑲᓂᐘᓂᒋᑲᑌᐠ ᐊᓂᔑᓂᓂᐤ ᐃᔑᑮᔘᐏᓇᐣ ᒦᓇ ᐁᓇᐣᑕᐍᐣᑕᑯᐠ ᐑᐸᐨ ᑫᑯᓇᐣ ᒋᑐᒋᑲᑌᑭᐣ ᒋᐸᒥᒋᑲᑌᑭᐣ, ᒋᒧᑭᓂᑲᑌᑭᐣ ᒥᓇ ᒋᐊᐸᒋᒋᑲᑌᑭᐣ ᐊᓂᔑᓂᓂᐤ ᐃᔑᑮᔘᐏᓇᐣ;

ᐃᑭᑐᐏᐣ ᐊᐦᐊᐍ ᐅᑭᒪᐏᐣ ᐅᐦᐅᒪ ᑲᓇᑕ ᐅᓂᓯᑕᐏᓇᐣ ᐃᓂᐍᓂᐘᐣ ᑲᐏᒋᐘᐨ ᐊᓂᔑᓂᓂᐘᐣ ᒋᓇᒋᑲᑌᐠ ᐁᓂᓯᑕᐏᓂᑲᑌᐠ ᒥᓇ ᐁᒪᒋᒋᑲᑌᐠ ᐃᐦᐃᐍᓂ ᐅᒦᓂᑯᐏᐣ ᐅᐣᒋ ᑎᐯᓂᒥᑎᓱᐏᐣ, ᑲᔦ ᐃᐦᐃᐍ ᒪᐣᑐ ᒥᓂᑯᐏᐣ ᒋᑎᐯᓂᒥᑎᓱᐨ;

ᐃᑭᑐᐏᐣ ᐊᓂᔑᓂᓂᐘᐠ, ᐃᓅᐃᐟ ᒥᓇ ᐑᓴᑯᑌᐏᓂᓂᐘᐠ ᐅᑕᔭᓇᐘ ᐁᒪᐘᒋᑐᐘᐨ ᑲᐃᓇᑲᓀᓯᐘᐨ, ᐃᓇᑲᓀᓯᐏᓇᐣ ᒥᓇ ᐁᓇᑌᓂᐠ ᐅᐱᒪᑎᓯᐏᓂᐘ ᒥᓇ ᐁᐊᔭᐘᐨ, ᐅᑕᓇᐣᐠ ᐊᑯᓇᐠ ᓄᐣᑯᒼ ᑲᑮᔑᑲᐠ, ᐁᐱᒥ ᐱᒪᑎᓯᐘᐨ, ᐁᐊᐸᒋᑐᐘᐨ ᒥᓇ ᐁᑲᐯᔑᐘᐨ ᐊᐦᑭᓇᐣ ᓄᑯᒼ ᑲᐃᔑ ᑭᑫᐣᒋᑲᑌᐠ ᑲᓇᑕ;

ᐃᑭᑐᐏᐣ ᐊᓂᔑᓂᓂᐤ ᐃᔑᑮᔘᐏᓇᐣ ᓂᑕᒼ ᐃᓂᐍᓂᐘᐣ ᐃᔒᐃᔘᐏᓇᐣ ᑭ ᐊᐸᒋᒋᑲᑌᐘᐣ ᓄᑯᒼ ᑲᐃᔑᓂᑲᑌᐠ ᓬᐊᓇᑕ ᒦᓇ ᐃᓂᐍᓂᐘᐣ ᐃᔑᑮᔘᐏᓇᐣ ᑭᐊᓂ ᒪᒥᑭᑲᑌᐘᐣ;

ᐃᑭᑐᐏᐣ ᐊᓂᔑᓂᓂᐤ ᐃᔑᑮᔘᐏᓇᐣ ᑭᓂᓯᑕᐏᓇᑿᐣ ᐁᑭ ᐊᐸᒋᒋᑲᑌᐠ ᑲᓂ ᐅᐣᒋᑲᑌᐠ ᐏᒋᐏᑎᐏᐣ ᑲᐱᑕᑯᔑᓄᐘᐨ ᐍᒥᒋᑯᔑᐘᐠ ᒥᓇ ᐊᓂᔑᓂᓂᐘᐠ;

ᐃᑭᑐᐏᐣ ᐊᓂᔑᓂᓂᐘᐠ ᑭᓇᑿᐣ ᐁᑭᐏᒋᑐᐘᐨ ᑲᓂᐅᓇᒋᑲᑌᐠ ᐅᑭᒪᐏᐣ ᑲᓇᑕ ᒥᓇ ᐊᓂᔑᓂᓂᐤ ᐃᔑᑮᔘᐏᓇᐣ ᑭᐊᐸᒋᒋᑲᑌᐘᐣ ᐁᒣᒣᔾᑭᓇᑯᐠ ᒦᓇ ᐁᑭᒋᓇᑭᐣᑌᐠ ᐃᔑᑮᔘᐏᓇᐣ ᒦᓇ ᐃᓇᑲᓀᓯᐏᓇᐣ ᐅᐦᐅᒪ ᑲᓇᑕ;

ᐃᑭᑐᐏᐣ ᐅᐍᑎᓀᑫ ᐅᑕᓇᐣᐠ ᐃᓂᐍᓂᐘᐣ ᑲᑭᒪᒉᐣᒋᑫᒪᑲᑭᐣ ᐅᑭᒪᐏᐣ ᐃᓇᑯᓂᑫᐏᓇᐣ ᒥᓇ ᑐᑕᒧᐏᓇᐣ, ᐃᓂᐍᓂᐘᐣ ᑎᓄᑲᐣ, ᐍᒥᒋᑯᔑᓇᑭᐣᒋᑫᐏᐣ, ᐁᑭᐊᐣᒋᑯᓯᐦᐊᐘᐨ, ᑲᑭᐅᑕᐱᓇᑲᓀᐘᐣ ᐊᐘᔑᔕᐠ ᒦᓇ ᐍᓑᑲᐨ ᑭᑭᓄᒪᑫᐏᓇᐣ, ᐁᑭᓂᔑᐘᓇᒋᒋᑫᒪᑲᑭᐣ ᐊᓂᔑᓂᓂᐤ ᐃᔑᑮᔘᐏᓇᐣ ᒦᓇ ᐁᑭᐘᐸᐣᒋᑲᑌᐠ ᐁᑭᓂᔑᐘᓇᒋᒋᑫᒪᑲᐠ ᐃᓂᐍᓂᐘᐣ ᐃᔑᑮᔘᐏᓇᐣ;

ᐃᑭᑐᐏᐣ ᐁᔑᓇᑯᑭᐣ ᐊᓂᔑᓂᓂᐤ ᐃᓑᑭᑮᔘᐏᓇᐣ ᐯᐸᑲᐣ ᐃᔑᑮᔘᒪᑲᓄᐣ, ᑲᔦ ᐃᐦᐃᐍ ᒋᑭ ᑭᒋᐏᓂᑲᑌᑭᐣ ᐃᓂᐍᓂᐘᐣ ᐃᔑᑮᔘᐏᓇᐣ, ᒦᓇ ᐁᓇᐣᑕᐍᐣᑕᑯᐠ ᒋᐏᒋᐦᐊᑲᓀᐘᐨ ᑲᑲᑵᑐᑕᒧᐘᐨ ᐊᓂᔑᓂᓂᐘᐠ ᒋᑭᐍᐅᑕᐱᓇᒧᐘᐨ, ᒋᐅᒼᐱᓇᒧᐘᐨ, ᒋᐸᒥᑐᐘᐨ ᒥᓇ ᒋᒪᓑᑲᐏᑐᐘᐨ;

ᐃᑭᑐᐏᐣ ᐊᓂᔑᓂᓂᐤ ᐃᔑᑮᔘᐏᓇᐣ ᑭᒋᓀᐣᑕᑯᓄᐣ ᒋᓂᓯᑕᐏᓇᑯᓯᐘᐨ, ᒋᓇᑲᓀᓯᐘᐨ, ᐅᑕᒐᑯᐏᓂᐘ, ᑲᐃᔑ ᐏᒋᑐᐘᐨ ᐊᐦᑭᑲᐣᐠ, ᒥᓯᑌᑲᒥᐠ ᐘᐸᐣᒋᑫᐏᐣ ᒦᓇ ᒋᑭᑎᐯᓂᒥᑎᓱᐘᐨ ᐊᓂᔑᓂᓂᐘᐠ;

ᐃᑭᑐᐏᐣ ᑲᑐᒋᑲᑌᐠ ᐃᓂᐍᓂᐘᐣ ᑲᐃᓇᑌᑭᐣ ᐊᓂᔑᓂᓂᐤ ᐃᓑᑭᑮᔘᐏᓇᐣ ᐅᐣᒋ ᐑᒋᐦᐃᐍᒪᑲᓄᐣ ᒋᐊᓂ ᑭᑫᐣᒋᑲᑌᐠ ᐊᓂᔑᓂᓂ ᑭᑫᐣᒋᑫᐏᓇᐣ ᒥᓇ ᑲᔦ ᐁᑲ ᒋᐘᓂᒋᑲᑌᐠ ᐃᓇᑲᓀᓯᐏᓇᐣ ᑲᐃᔑ ᒣᒣᔾᑭᓇᑯᑭᐣ, ᐱᒪᒋᒋᑲᐏᐣ ᒦᓇ ᐊᒐᑯᐏᐣ;

ᐃᑭᑐᐏᐣ ᑲᐃᔑ ᐯᐸᑲᐣ ᐱᒥᐏᒋᑲᓂᐘᐣᐠ ᐅᒪ ᑲᓇᑕ ᐁᑲᐣᒋᓂᐣᔕᐦᐃᑫᐘᐨ ᒋᐊᐸᒋᒋᑲᑌᑭᐣ ᐊᓂᔑᓂᓂᐤ ᐃᔑᑮᔘᐏᓇᐣ ᒦᓇ ᒋᐑᒋᐦᐊᑲᓀᐘᐨ ᐊᓂᔑᓂᓂᐘᐠ ᒋᑮᐍᐅᑕᐱᓇᐣᐠ, ᒋᐅᒼᐱᓇᐣᐠ, ᒋᐸᒥᑐᐨ ᒥᓇ ᒋᒪᓑᑲᐏᑐᐨ ᐃᓂᐍᓂᐘᐣ ᒦᓇ ᐁᓇᐣᑕᐍᐣᑕᑯᓯᐨ ᐅᑭᒪᐏᐣ ᐅᒪ ᑲᓇᑕ ᒋᐏᒋᑐᒋᐣ ᐃᓂᐍᓂᐘᐣ ᐱᒥᐏᒋᑫᐏᓇᐣ;

ᐃᑭᑐᐏᐣ ᐊᐦᐊᐍ ᐅᑭᒪᐏᐣ ᐅᒪ ᑲᓇᑕ ᐁᐊᔓᑕᒪᐨ ᒋᐸᑭᑎᓇᐨ ᒋᑌᐱᓭᓂᐨ, ᒋᐱᒥᓭᐨ ᒥᓇ ᑭᓌᑲᓑ ᒋᓇᑌᐠ ᔓᓂᔭ ᑲᐸᑭᑎᓇᑲᓀᐨ ᐅᐣᒋ ᑭᐍᐅᑕᐱᓂᑫᐏᐣ, ᒋᐅᒼᐱᓂᑲᑌᑭᐣ, ᒋᐸᒥᒋᑲᑌᑭᐣ ᒥᓇ ᒋᒪᓑᑲᐘᒋᑲᑌᑭᐣ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᓇᐣ;

ᐃᑭᑐᐏᐣ ᐃᑭᐍᓂᐘᐠ ᐊᓂᔑᓂᓂᐘᐠ ᐃᓇᑌᓂ ᒋᒥᓄᓭᑭᐸᐣ ᐏᓇᐘ ᒋᓃᑲᓂᓑᑲᒧᐘᐨ ᒋᑮᐍᐅᑕᐱᓇᒧᐘᐨ, ᒋᐅᒼᐱᓇᒧᐘᐨ, ᒋᐸᒥᑐᐘᐨ ᒥᓇ ᒋᒪᓑᑲᐏᑐᐘᐨ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᓇᐣ;

ᐃᑭᑐᐏᐣ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᐣ ᑲ ᐊᐸᒋᒋᑲᑌᐠ ᓇᐣᑐᑕᒧᐏᓂᐣᐠ ᒦᓇ ᑲᐯ ᐱᒪᑎᓯᐏᐣ ᑭᑫᐣᒋᑫᐏᐣ ᐅᐣᒋ ᐊᓂᔑᓂᓂᐘᐠ, ᑲᔦ ᐃᓂᐍᓂᐘᐣ ᑭᑭᓄᒪᑫᐏᑲᒥᑯᐣ ᐅᐣᒋ ᐊᓂᔑᓂᓂᐘᐠ, ᐁᑭᒋᓀᐣᑕᑯᑭᐣ ᒋᑭᐍᐅᓇᒋᑲᑌᑭᐣ ᒦᓇ ᒋᐸᒥᓂᑲᑌᑭᐣ ᒋᑲᓑᑭᑕᒪᓱᐨ ᐃᓂᐍᓂᐘᐣ ᐃᔑᑮᔘᐏᓇᐣ;

ᐃᑭᑐᐏᐣ ᐃᐦᐃᐍ ᑫᑐᒋᑲᑌᐠ ᐁᑲ ᒋᒪᓑᑲᐘᑌᐠ ᒥᓇ ᒋᓇᑲᒋᒋᑲᑌᐠ ᑲᐃᔑ ᒣᒣᔾᑭᓇᑯᐠ ᐅᓇᐣᑕᐍᐣᑕᒧᐏᐣ ᐊᓂᔑᓂᓂᐘᐠ, ᑕᔑᑫᐏᓇᐣ ᒥᓇ ᐊᐑᔭᐠ ᐁᓇᐣᑕᐍᐣᑕᑯᐠ ᒋᐅᐣᒋ ᐘᐸᐣᒋᑲᑌᐠ ᐃᔑᓇᑯᓯᐏᓇᐣ, ᐃᓇᑲᓀᓯᐏᓇᐣ ᒥᓇ ᐅᑐᑕᓇᒥᐘᐨ ᐃᑭᐍᓂᐘᐠ ᐊᓂᔑᓂᓂᐘᐠ;

ᒥᓇ ᐃᑭᑐᐏᐣ ᐁᓇᐣᑕᐍᐣᑕᑯᐠ ᒋᓇᑲᒋᒋᑲᑌᐠ ᑲᐃᔑ ᒣᒣᔾᑭᓭᑭᐣ ᒥᓇ ᓇᐣᑕᐍᐣᑕᒧᐏᓇᐣ ᐅᐣᒋ ᐊᓂᔑᓂᓂᐤ ᑭᒋᔭᐦᐊᐠ, ᐅᓑᑲᑎᓴᐠ/, ᐊᐘᔑᔕᐠ, ᑲᒫᑭᔭᐘᐨ, ᐃᑵᐘᐠ, ᓇᐯᐘᐠ ᒦᓇ ᑲ ᐊᐣᒋᐦᐃᑎᓱᐘᐨ ᑲᔦ ᑲᓂᔓᐊᒐᑯᐏᐨ ᐊᐏᔭ;

ᓄᑯᒼ, ᐃᑭᑐᓇᓂᐘᐣ, ᐅᑭᒪ, ᐅᐣᒋ ᒥᓇ ᐁᐑᒋᐘᐨ ᑲᑮᐏᐣᑕᒪᑯᐨ ᒥᓇ ᑲᑭᐸᑭᑎᓇᐣᐠ ᐃᑭᐍᓂᐘᐠ ᑲᐅᑭᒪ ᑭᑭᓇᐘᒋᒋᑫᐘᐨ ᒥᓇ ᐅᑭᒪᐤ ᐘᑲᐦᐃᑲᓂᐠ ᐅᒪ ᑲᓇᑕ, ᐃᔑ ᐃᓇᑯᓂᑫ ᐊᑭᐣᒋᑫᐘᐠ ᐅᐍᓂ

ᑲᒐᑿᐠ ᐑᐣᑕᒪᑫᐏᐣ

1 ᐅᐦᐅᒪ ᐃᓇᑯᓂᑲᓂᐠ ᐃᔑᓂᑲᒋᑲᑌ ᐊᓂᔑᓂᓂᐤ ᐃᔑᑮᔘᐏᓇᐣ ᐃᓇᑯᓂᑲᐣ

ᐊᓂᑯᑕᒪᑫᐏᓇᐣ

Note marginale : ᐃᔑᓂᑲᒋᑫᐏᓇᐣ

2 ᐅᓄᐍᓂᐘᐣ ᐃᔑᓂᑲᒋᑫᐏᓇᐣ ᐊᑌᐘᐣ ᐅᐦᐅᒪ ᐃᓇᑯᓂᑫᐏᓂᐣᐠ.

ᑲᐃᓇᑭᒪᑲᓀᐨ ᐅᑭᒪ

ᐯᔑᑯᐣ ᐃᔑᓂᑲᒋᑲᓂᐘᐣ ᐃᐦᐃᒪ ᑲᐃᓇᐣᓯᓇᐦᐃᑲᑌᐠ ᐸᑫᐱᐦᐃᑲᐣ 2 ᐃᐦᐃᒪ ᔓᓂᔭ ᐱᒥᐏᒋᑫᐏᐣ ᐃᓇᑯᓂᑲᐣ.

ᑲᒥᓄᒋᑫᐨ

ᐃᑭᑐᓇᓂᐘᐣ ᐊᐦᐊᐍ ᑲᒪᒦᓄᒋᑫᐨ ᐅᐣᒋ ᐊᓂᐢᓂᓂᐤ ᐃᔑᑮᔘᐏᓇᐣ ᐁᑮᓄᐦᐊᑲᓀᐨ ᐃᐦᐃᒪ ᑲᐃᓇᑌᐨ ᐸᑫᐲᐦᐃᑲᐣ 13.

ᑲᓇᑕ ᐱᒥᐏᒋᑫᐏᓇᐣ

ᐃᑭᑐᓇᓂᐘᐣ ᐃᓂᐍᓂᐘᐣ ᐱᒥᐏᒋᑫᐏᓇᐣ ᑲᐃᔑᐑᐣᒋᑲᑌᑭᐣ ᐃᐦᐃᒪ ᐑᐣᒋᑫᐏᓂᐣᐠ (a) ᐊᑯᓇᐠ (b) ᒥᓇ (d) ᑲᐃᔑᓂᑲᒋᑲᑌᐠ ᐅᑭᒪᐏᐣ ᐃᐦᐃᒪ ᐸᑫᐲᐦᐃᑲᓂᐣᐠ 2 ᐃᒪᓀᑫ ᔓᓂᔭ ᐱᒥᐏᒋᑫᐏᐣ ᐃᓇᑯᓂᑲᐣ ᑲᔦᒪ ᐅᑭᒪᐏᐣ ᒪᒋᑕᒪᐏᓇᐣ, ᑲᐃᔑ ᐑᐣᒋᑲᑌᑭᐣ ᐃᐦᐃᒪ ᐊᑹᑕᐤ ᐹᑫᐲᐦᐃᑲᓂᐠ 83 (1) ᐃᐦᐃᒪ ᐃᓇᑯᓂᑲᓂᐠ.

ᐊᓂᔑᓂᓂᐤ ᐅᑭᒪᐏᓇᐣ

ᐃᑭᑐᓇᓂᐘᐣ ᐃᑭᐍᓂᐘᐠ ᐅᓇᔓᐍᐏᓂᓂᐘᐠ, ᐅᑭᒪᐏᐣ ᑲᔦᒪ ᑯᑕᑮᔭᐣ ᐱᒥᐏᒋᑫᐏᓇᐣ ᑲᐃᓇᑭᒪᑲᓀᐘᐨ ᒋᐊᓅᑮᑕᐘᐨ ᐊᓂᔑᓂᓂᐘᐣ ᒦᓇ ᑲᐅᐣᒋ ᑎᐯᐣᑕᑯᓯᐘᐨ ᑕᔒᑫᐏᓂᐠ ᑲᔦᒪ ᐊᓂᔑᓂᓂᐘᐠ ᑲᓂᓯᑕᐏᓂᑲᑌᓂᐠ ᐅᒦᓂᑯᐘ ᒦᓇ ᐁᑭᐊᑌᓂᐠ ᐃᐦᐃᒪ ᐸᑫᐲᐦᐃᑲᓂᐠ 35 ᐅᐣᒋ ᑲᓇᑕ ᐃᓇᑯᓂᑫᐏᐣ, 1982.

ᐊᓂᔑᓂᓂᐘᐠ ᐱᒥᐏᒋᑫᐏᐣ

ᐃᑭᑐᓇᓂᐘᐣ ᐃᓂᐍᓂᐘᐣ ᐊᓂᔑᓂᓂᐘᐠ ᐱᒥᐏᒋᑫᐏᐣ ᐁᐊᓄᑮᑕᐘ ᐊᓂᔑᓂᓂᐘᐣ ᒦᓇ ᑲᐅᐣᒋ ᑎᐯᐣᑕᑯᓯᐘᐨ ᑲᔦᒪ, ᐁᑲ ᐁᐊᑌᐠ ᐃᐦᐃᒪ ᐸᑫᐲᐦᐃᑲᓂᐠ 45, ᐁᐃᔑ ᓇᑲᒋᐘᐨ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ.

ᐊᓂᔑᓂᓂᐘᐠ

ᐃᑭᑐᓇᓂᐘᐣ ᑲᐃᓇᑭᒪᑲᓀᐘᐨ ᐃᔑᓂᑲᒋᑫᐏᐣ ᐊᓂᔑᓂᓂᐘᐠ ᐅᐣᒋ ᑲᓇᑕ ᐃᐦᐃᒪ ᐸᑫᐲᐦᐃᑲᓂᐠ 35(2) ᐃᐦᐃᒪ ᑲᓇᑕ ᐃᓇᑯᓂᑫᐏᓂᐠ, 1982.

ᐅᑭᒪ

ᐃᑭᑐᓇᓂᐘᐣ ᐊᐦᐊᐍ ᐅᑭᒪ ᑲᓃᑲᓂᓑᑲᐠ ᐃᓇᑲᓀᓯᐏᓇᐣ.

ᐅᔑᐲᐦᐃᑫᐏᑲᒥᐠ

ᐃᑭᑐᓇᓂᐘᐣ ᐅᐣᒋ ᐅᔑᐲᐦᐃᑫᐏᑲᒥᐠ ᑲᐃᔑᐊᐱᐨ ᑲᒪᒦᓄᓂᑫᐨ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ ᒋᐅᐣᒋ ᐅᐣᒋᑲᑌᐠ ᐸᑫᐲᐦᐃᑲᐣ 12.

Note marginale : ᐅᒦᓂᑯᐏᐣ ᐅᐣᒋ ᐊᓂᔑᓂᓂᐘᐠ

3 ᐅᐦᐅᐍ ᐃᓇᑯᓂᑫᐏᐣ ᑕᐃᓇᒋᑲᑌ ᐁᐑᒋᒋᑲᑌᑭᐣ ᐃᓂᐍᓂᐘᐣ ᒦᓂᑯᐏᓇᐣ ᐅᐣᒋ ᐊᓂᔑᓂᓂᐘᐠ ᒋᓂᓯᑕᐏᓂᑲᑌᑭᐣ ᒦᓇ ᐁᑌᐻᒋᑲᑌᐠ ᐅᐣᒋ ᐸᑫᐱᐦᐃᑲᓂᐠ 35 ᐃᐦᐃᒪ ᑲᓇᑕ ᐃᓇᑯᓂᑫᐏᐣ, 1982, ᒥᓇ ᐁᑲ ᐁᓇᑲᓑᑭᑲᑌᐠ ᑲᔦᒪ ᐁᑕᐸᓴᑭᐣᑌᐠ ᐅᑕᐱᓂᑫᐏᐣ.

Note marginale : ᑲᑲᑿᔭᑯᓭᑭᐣ ᑲᔦᒪ ᑲᑲᓇᐦᐃᓭᑭᐣ

4 ᑮᓑᐱᐣ ᐅᐣᒋᓯᓭᐠ ᐁᑲ ᑿᔭᐠ ᐁᐃᓯᓭᐠ ᑲᔦᒪ ᐁᓇᑭᓑᑲᑫᒪᑲᐠ ᐊᓂᒥᓯᐏᐣ ᐅᐣᒋ ᐅᐦᐅᐍ ᐃᓇᑯᓂᑫᐏᐣ ᒦᓇ ᑎᕒᐄᑎ — ᐃᐦᐃᐍ ᑲᔦ ᐊᐦᑭᐏ ᐱᒥᑕᔑᐣᒋᑫᐏᐣ ᓇᑯᒥᑎᐏᐣ — ᑲᔦᒪ ᐃᐦᐃᐍ ᑎᐯᓂᒥᑎᓱᐏᐣ ᓇᑯᒦᑎᐏᐣ, ᐃᐦᐃᐍ ᑎᕒᐄᑎᑲᔦᒪ ᑎᐯᓂᒥᑎᓱᐏᐣ ᓇᑯᒥᑎᐏᐣ ᑕᓃᑲᓂᓭ ᑭᓑᐱᐣ ᐃᓯᓭᐠ ᐁᑲ ᐁᑿᔭᑯᓭᐠ ᑲᔦᒪ ᐊᓂᒥᓭᐏᐣ.

ᑫᐃᓇᐸᑕᑭᐣ ᐅᐣᒋ ᐅᐦᐅᐍ ᐃᓇᑯᓂᑲᐣ

Note marginale : ᑫᐃᓇᐸᑕᑭᐣ

5 Tᑫᐃᓇᐸᑕᑭᐣ ᐅᐦᐅᒪ ᐃᓇᑯᓂᑲᓂᐠ ᐅᐍᓂᐘᐣ

• (a) ᒋᐑᒋᒋᑲᑌᐠ ᒦᓇ ᒋᐑᐣᒋᑲᑌᐠ ᒋᐊᐸᒋᒋᑲᑌᑭᐣ ᐊᓂᔑᓂᓂᐤ ᐃᔑᑮᔘᐏᓇᐣ, ᐃᓂᐍᓂᐘᐣ ᑲᔦ ᐊᓂᔑᓂᓂᐤ ᐃᔑᑮᔘᐏᐣ ᐃᓇᑯᓂᐣᒋᐸᓄᐦᐅᐏᐣ;
• (b) ᒋᐑᒋᒋᑲᑌᑭᐣ ᑲᑐᑕᒧᐘᐨ ᐊᓂᔑᓂᓂᐘᐠ ᒋᑮᐍᐅᑕᐱᓇᒧᐘᐨ, ᒋᑮᐍᐆᒼᐱᓇᒧᐘᐨ, ᒋᐸᒥᑐᐘᐨ ᒦᓇ ᒋᒪᓑᑲᐘᑐᐘᐨ ᐊᓂᔑᓂᓂᐤ ᐃᔑᑮᔘᐏᓇᐣ, ᐃᓂᐍᓂᐘᐣ ᑲᔦ
  • (i) ᒋᓇᑲᒋᒋᑲᑌᐠ ᐁᐲᓯᓇᑯᐠ ᐃᐦᐃᐍ ᐊᓂᔑᓂᓂᐤ ᐃᔑᑮᔘᐏᓇᐣ,
  • (ii) ᒋᐅᓇᒋᑲᑌᑭᐣ ᑫᑐᒋᑲᑌᐠ ᒦᓇ ᑐᑕᒧᐏᓇᐣ ᒋᑭᐍᐱᒋᑲᑌᐠ ᒦᓇ ᒋᐸᒥᓂᑲᑌᐠ ᒋᐊᐸᒋᒋᑲᑌᐠ ᒦᓇ ᒋᐊᔭᒥᓇᓂᐘᐣᐠ ᐊᓂᔑᓂᓂᐤ ᐃᔑᑮᔘᐏᓇᐣ.
  • (iii) ᒋᐅᔑᒋᑲᑌᑭᐣ ᐲᐘᐱᐠ ᐊᐸᒋᒋᑲᓇᐣ, ᑭᑭᓄᒪᑫ ᐊᐸᒋᒋᑲᓇᐣ ᒦᓇ ᑲᐯ ᓴᑲᑭ ᐲᐦᐃᑲᓇᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ, ᐃᓂᐍᓂᐘᐣ ᑲᔦ ᐲᐣᑕᐍᓯᒋᑲᓇᐣ ᑲᔦ ᒪᐣᓯᓇᑌᓯᒋᑲᓇᐣ ᐃᑭᐍᓂᐘᐠ ᑲᓂᑕ ᐊᓂᔑᓂᓂᒧᐘᐨ ᐃᔑᑮᔘᐏᓇᐣ ᒦᓇ ᒪᐣᓯᓇᐦᐃᑫᐏᐣ ᐅᐣᒋ ᓃᐱᑌᐲᐦᐃᑲᓇᐣ, ᒪᐘᐣᑐᐲᐦᐃᑫᐏᓇᐣ ᒦᓇ ᑲᐃᔑᐍᐸᐣᒋᑲᑌᑭᐣ ᐊᔭᒥᐏᓇᐣ ᐅᐣᒋ ᐃᔑᑮᔘᐏᓇᐣ, ᒋᓇᐸᒋᒋᑲᑌᑭᐣ ᐅᐣᒋ, ᑲᔦ ᑯᑕᑮᔭᐣ, ᒋᐸᒥᓂᑲᑌᐠ ᒦᓇ ᒋᐊᔕᐍᐑᐣᒋᑲᑌᑭᐣ ᐃᔑᑮᔘᐏᓇᐣ,
  • (iv) ᒋᐑᒋᒋᑲᑌᑭᐣ ᐊᓂᔑᓂᓂᒧᐏᐣ ᑭᑫᐣᒋᑫᐏᐣ ᒦᓇ ᐃᓇᑲᓀᓯᐏᓇᐣ ᑐᑕᒧᐏᓇᐣ — ᑲᔦ ᐃᔑᑮᔘᐏᐣ ᒪᓇᒋᒋᑫᐏᐣ, ᐑᒋᐦᐃᑭᑭᓄᒪᑫᐏᐣ ᒦᓇ ᑭᑭᓄᒪᑫᐏᓇᐣ — ᒋᓑᐱᓭᐠ ᑫᓂ ᐊᐸᒋᑐᐘᐨ ᑲᑲᑭᑐᐘᐨ ᐊᓂᔑᓂᓂᐤ ᐃᔑᑮᔘᐏᓇᐣ,
  • (v) ᒋᐑᒋᒋᑲᑌᑭᐣ ᐱᒥᐏᒋᑫᐏᓇᐣ ᑲᐃᔑ ᓇᑲᒌᐘᐨ ᐊᓂᔑᓂᓂᐤ ᐃᔑᑮᔘᐏᓇᐣ, ᒦᓇ
  • (vi) ᒋᑐᒋᑲᑌᑭᐣ ᓇᓇᐣᑐᑭᑫᐣᒋᑫᐏᓇᐣ ᑲᔦᒪ ᓇᑲᒋᒋᑫᐏᓇᐣ ᐃᓂᐍᓂᐘᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ;
• (c) ᒋᐅᓇᒋᑲᑌᐠ ᐃᓇᓄᑮᐏᐣ ᒋᐑᒋᐦᐃᐍᓭᐠ ᒋᑮᑐᑕᒧᐘᐨ ᐅᒦᓂᑯᐏᓂᐘ ᐊᓂᔑᓂᓂᐘᐠ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ, ᒋᑮᑐᒋᑲᑌᑭᐣ ᓄᑯᒥᑎᐏᓇᐣ ᑲᔦᒪ ᐅᓇᒋᑫᐏᓇᐣ ᑲᐑᐣᒋᑲᑌᑭᐣ ᐃᐦᐃᒪ ᐸᑫᐲᐦᐃᑲᓂᐠ 8 ᒦᓇ 9;
• (d) ᒋᐅᐣᒋᑲᑌᑭᐣ ᑫᑮᑐᒋᑲᑌᐠ ᒋᓇᑌᑭᐣ ᒋᑌᐱᓭᐠ, ᒋᐱᒥᑲᒪᑲᐠ ᒦᓇ ᑭᓌᑲᓑ ᑲᐸᑭᑎᓇᑲᓀᐨ ᔓᓃᔭ ᐃᐣᒋᑫᐏᐣ ᐅᐣᒋ ᑮᐍᐅᑕᐱᓂᑫᐏᓇᐣ, ᐆᒼᐱᓂᑫᐏᐣ, ᐅᐣᒋ ᐊᓂᔑᓂᓂᐤ ᐱᒥᐏᒋᑫᐏᓇᐣ ᒋᓂᓯᑕᐏᓂᑲᑌᑭᐣ ᒥᓇ ᑲᔦ ᑯᑕᑮᔭᐣ ᐅᑭᒪᐏᓇᐣ;
• (e) ᒋᐅᓇᒋᑲᑌᑭ ᐑᑕᐣᑭᒥᑎᐏᓇᐣ ᐅᐣᒋ ᑯᑕᑮᔭᐣ ᐅᑭᒪᐏᓇᐣ, ᐊᓂᔑᓂᓂᐤ ᐅᑭᒪᐏᓇᐣ ᒦᓇ ᑯᑕᑮᔭᐣ ᐊᓂᔑᓂᓂᐤ ᐅᑭᒪᐏ ᐱᒥᐏᒋᑫᐏᓇᐣ. ᐊᓂᔑᓂᓂᐤ ᒪᒋᑕᐏᓇᐣ ᒦᓇ ᑯᑕᑮᔭᐣ ᐱᒯᒋᑫᐏᓇᐣ ᑲᓄᐄᑕᐘᐨ ᐊᓂᔑᓂᓂᐘᐣ ᒦᓇ ᐃᓂᐍᓂᐘᐣ ᒪᓑᑲᐏᓰᐏᐣ ᑎᐯᐣᒋᑫᐏᓇᐣ ᐃᑭᐍᓂᐘᐠ ᑲᐅᑭᒪᐏᐘᐨ ᐊᓂᔑᓂᓂᐘᐠ ᐱᒥᐏᒋᑫᐏᓇᐣ ᒦᓇ ᑯᑕᑮᔭᐣ ᐅᑭᒪᐏᓇᐣ;
• (e.1) ᒋᐅᓇᒋᑲᑌᑭᐣ ᑫᐅᐣᒋ ᑌᐅᐃᓇᒪᓱᐨ ᐊᓂᔑᓂᓂᐤ ᐅᑭᒪᐏᓇᐣ ᒦᓇ ᑯᑕᑮᔭᐣ ᐊᓂᔑᓂᓂ ᐅᑭᒪᐏᓇᐣ ᒦᓇ ᐊᓂᔑᓂᓂ ᐱᒥᐏᐨᑫᐏᓇᐣ ᒋᐑᒋᑐᐘᐨ ᐅᓇᑌᑭᐣ ᐃᓇᑯᓂᑫᐏᓇᐣ ᐅᐣᒋ ᐅᐦᐅᐍ ᒪᒌᐃᐅᐣᒋᑲᑌᐠ ᐃᓇᑯᓂᑫᐏᐣ;
• (f) ᒋᓇᑵᒋᑲᑌᑭᐣ ᐃᓂᐍᓂᐘᐣ ᑌᐻ ᒦᓇ ᒪᒦᓄᒋᑫᐏᐣ ᑲᑲᓄᑕᒧᐘᐨ ᐅᐦᐅᒪ ᑲᓇᑕ ᐃᑭᑐᐏᓇᐣ ᒋᑭᑐᒋᑲᑌᑭᐣ ᐊᑭᐣᑕᓱᓇᐣ 13 ᐊᑯᓇᐠ 15; ᒦᓇ,
• (g) ᒋᐸᑭᑎᓂᑲᑌᐠ ᒪᒋᑕᓂᐘᐣᐠ ᐃᐦᐃᐍ ᒥᓯᐍ ᐅᑭᒪᐏᓇᐣ ᐃᑭᑐᐏᐣ ᐅᐣᒋ ᐅᒦᓂᑯᐏᐣ ᐊᓂᔑᓂᓂᐘᐠ ᐅᐣᒋ ᐅᐦᐅᐍ ᐊᓂᔑᓂᓂᐤ ᐃᔑᑮᔘᐏᓇᐣ.

ᒥᓂᑯᐏᓇᐣ ᑲᐃᓯᓭᑭᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ

Note marginale : ᑲᐃᔑ ᓂᓯᑕᐏᓇᒧᐘᐨ ᐅᑭᒪᐏᐣ ᐅᒪ ᑲᓇᑕ

6 ᐊᐦᐊᐍ ᐅᑭᒪᐏᐣ ᑲᓇᑕ ᐅᓂᓯᑕᐏᓇᓇᐣ ᐅᒦᓂᑯᐏᐣ ᐃᑭᐍᓂᐘᐠ ᐊᓂᔑᓂᓂᐘᐠ ᐅᓂᓯᑕᐏᓂᑯᐏᓂᐘ ᒦᓇ ᐁᑭ ᐃᓇᑌᐠ ᐃᐦᐃᒪ ᐸᑫᐲᐦᐃᑲᓀᐣᐢ 35 ᐃᐦᐃᒪ ᑲᓇᑕ ᐃᓇᑯᓂᑫᐏᐣ, 1982 ᐁᐊᑌᑭᐣ ᒥᓂᑯᐏᓇᐣ ᐅᐣᒋ ᐊᐱᔑᓂᓂᐤ ᐃᔑᑮᔘᐏᓇᐣ.

ᒪᓑᑲᐏᓰᐏᓇᐣ, ᐊᓄᑮᐏᓇᐣ ᒦᓇ ᑫᑐᑕᐣᐠ ᐊᐦᐊᐍ ᐅᑭᒪ

Note marginale : ᐸᐸᒥᑲᑵᑌᐏᓇᐣ — ᒋᑌᐱᓭᐨ, ᒋᑲᐯ ᐃᓯᓭᐨ ᒦᓇ ᑭᓌᑲᓑ - ᐃᓇᒋᑫᐏᐣ ᐅᐣᒋ ᔓᓂᔭ

7 ᐊᐦᐊᐍ ᐅᑭᒪ ᐃᓯᓭᓂ ᒋᑲᑵᒋᒪᐨ ᐊᓂᔑᓂᓂᐤ ᐅᑭᒪᐏᓇᐣ ᒦᓇ ᑯᑕᑭᔭᐣ ᐊᓂᔑᓂᓂᐤ ᐅᑭᒼᒪᐏᐣ ᐱᒥᐏᒋᑫᐏᓇᐣ ᒦᓇ ᑯᑕᑭᔭᐣ ᐊᓂᔑᓂᓂᐤ ᐱᒥᐏᒋᑫᐏᓇᐣ ᒋᐅᐣᒋ ᐃᓯᓭᓂᐠ ᒋᑭᑫᐣᑕᐣᐠ ᒋᑌᐱᓭᐨ, ᒋᐱᒥᓄᓭᐨ ᒦᓇ ᑭᓌᑲᓑ ᒋᓇᑌᐠ ᔓᓂᔭ ᒋᐅᐣᒋ ᑲᓑᑭᒋᑲᑌᑭᐣ ᒋᑮᐍᐅᑕᐱᓂᑲᑌᑭᐣ, ᒋᑭᐍᐅᒼᐱᓂᑲᑌᑭᐣ, ᒋᐸᒥᒋᑲᑌᑭᐣ ᒥᓇ ᒋᒪᓑᑲᐘᑌᑭᐣ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑭᔘᐏᓇᐣ.

Note marginale : ᐑᒋᐏᑎᐏᐣ ᒋᐏᒋᒋᑲᑌᑭᐣ ᐊᓂᔑᓂᓂᐤ ᐃᔑᑮᔘᐏᓇᐣ

8 ᐊᐦᐊᐍ ᐅᑭᒪ ᐅᑲᐏᒋᐘᐣ ᐃᓯᓭᓂᐠ ᐃᓂᐍᓂᐘᐣ ᑯᑕᑭᔭᐣ ᐅᑭᒪᐏᓇᐣ, ᐊᓂᔑᓂᓂᐤ ᐅᑭᒪᐏᓇᐣ ᑲᔦᒪ ᑯᑕᑭᔭᐣ ᐊᓂᔑᓂᓂᐤ ᐅᑭᒪᐏ ᐱᒥᐏᒋᑫᐏᓇᐣ ᑲᔦᒪ ᑯᑕᑭᔭᐣ ᐱᒥᐏᒋᑫᐏᓇᐣ — ᐃᓂᐍᓂᐘᐣ ᑲᔦ ᒋᒪᐣᓯᓇᐦᐃᑲᑌᑭᐣ ᓇᑯᒥᑎᐏᓇᐣ ᑲᔦᒪ ᐃᓇᒋᑫᐏᓇᐣ ᐃᓂᐍᓂᐘᐣ ᑎᓄᑲᐣ ᒋᐅᐣᑕᒋᑲᑌᑭᐣ ᐊᓂᔑᓂᓂᐤ ᐃᔑᑮᔘᐏᓇᐣ ᐱᒥᐏᒋᑵᐃᓇᐣ ᒦᓇ ᐑᒋᐦᐃᐍᐏᓇᐣ ᐅᐣᒋ ᑭᑭᓄᒪᑫᐏᐣ, ᐊᐦᑯᓯᐏᐣ ᒦᓇ ᑲᐃᔑᐱᒥᐏᒋᑲᑌᑭᐣ ᑎᐸᑯᓂᑫᐏᓇᐣ — ᒋᐅᐣᒋ ᑲᓇᐘᐸᐣᑕᐣᐠ ᑲᑲᑵᑐᒋᑲᑌᑭᐣ ᑿᔭᐠ ᒋᓯᓭᑭᐣ ᒦᓇ ᒋᐑᒋᐦᐃᐍᓭᑭᐣ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᓇᐣ ᐅᒪ ᑲᓇᑕ ᕕᔑᑲᓇᐘᐸᐣᒋᑲᑌᑭᐣ ᐃᐦᐃᒪ ᐅᒥᓂᑯᐏᓂᐘ ᐊᓂᔑᓂᓂᐘᐠ ᑲᐃᔑᓂᓯᑕᐏᓂᑲᑌᑭᐣ ᒥᓇ ᐁᐃᔑᐊᑌᑭᐣ ᐃᐦᐃᒪ ᐸᑫᐲᐦᐃᑲᓂᐠ 35 ᐃᐦᐃᒪ ᑲᓇᑕ ᐃᓇᑯᓂᑫᐏᓂᐠ, 1982 ᒥᓇ ᐃᓂᐍᓂᐘᐣ ᒪᓑᑲᐏᓯᐏᓇᐣ ᑲᔦ ᑕᔑᐅᑭᒪᐏᓇᐣ ᐅᐣᒋ ᐊᓂᔑᓂᓂ ᑲᑕᔑᐅᑭᒪᐘᑭᐣ ᒥᓇ ᐃᓂᐍᓂᐘᐣ ᑯᑕᑮᔭᐣ ᐅᑭᒪᐏᓇᐣ.

Note marginale : ᓇᑯᒥᐏᑎᓇᐣ ᑲᔦᒪ ᐃᓇᒋᑫᐏᓇᐣ — ᑲᐃᓇᐸᑕᑭᐣ ᐅᐣᒋ ᐃᓇᑯᓂᑲᐣ

9 ᐁᐃᔑᓇᑲᒋᒋᑲᑌᑭᐣ ᑲᐃᔑ ᒣᒣᔾᑭᓭᐘᐨ ᒥᓇ ᑲᐃᔑᓇᐣᑕᐍᐣᑕᒧᐘᐨ ᐊᓂᓑᓂᓂᐘᐠ, ᑕᔑᑫᐏᓇᐣ ᒥᓇ ᐃᓂᓂᐘᐠ ᒥᓇ ᐃᓊᓂᐘᐣ ᓇᑲᐨᒋᑫᐏᓇᐣ ᑲᔦ ᓇᓇᐣᑐᑭᑫᐣᒋᑫᐏᓇᐣ ᑲᐃᓇᑌᐠ ᐃᐦᐃᒪ ᐸᑫᐲᐦᐃᑲᓂᐠ 24 ᒥᓇ ᒋᓇᑲᒋᒋᑲᑌᑭᐣ ᐃᓂᐍᓂᐘᐣ ᑲᐃᓇᑌᑭᐣ ᐅᒥᓂᑯᐏᐣ ᐊᓂᔑᓂᓂᐘᐠ ᐁᓂᓯᑕᐏᓂᑲᑌᓂᐠ ᒥᓇ ᐁᐃᓇᑌᓂᐠ ᐃᐦᐃᒪ ᐸᑫᐲᐦᐃᑫᐏᐣ 35 ᐃᒪ ᑲᓇᑕ ᑭᒋᓇᑯᓂᑫᐏᐣ, 1982 ᒥᓇ ᐃᓂᐍᓂᐘᐣ ᐅᒪᓑᑲᐏᓯᐏᓂᐘ ᑲᔦ ᑲᐃᔑᑎᐯᐣᒋᑫᐘᐨ ᐊᓂᔑᓂᓂᐤ ᐅᑭᒪᐏᐣ ᐱᒥᐏᒋᑫᐏᓇᐣ ᒥᓇ ᑲᔦ ᑯᑕᑮᔭᐣ ᐅᑭᒪᐏᓇᐣ, ᐊᐦᐊᐍ ᐅᑭᒪᐏᐣ ᒥᓇ ᑲᐃᓯᓭᓂᐠ ᐊᐦᐊᐍ ᐅᑭᒪ ᒋᒪᐣᓯᓇᐦᐊᑭᐣ ᓇᑯᒥᑎᐏᓇᐣ ᑲᔦᒪ ᐃᓇᒋᑫᐏᓇᐣ ᒋᑭᓯᓭᒋᑲᑌᐠ ᐅᐦᐅᐍ ᐃᓇᑯᓂᑫᐏᐣ ᐅᐣᒋ ᑯᑕᑮᔭᐣ ᐅᑭᒪᐏᓇᐣ, ᐊᓂᔑᓂᓂᐤ ᐅᑭᒪᐏᐣ ᑲᔦᒪ ᐊᓂᔑᓂᓂᐤ ᐅᑭᒪᐏᐣ ᐱᒥᐏᒋᑫᐏᐣ ᑲᔦᒪ ᐊᓂᔑᓂᓂᐤ ᐱᒥᐏᒋᑫᐏᐣ.

Note marginale : ᑯᑕᑮᔭᐣ ᓇᑯᒥᑎᐏᓇᐣ

10 ᐊᐘᔑᒣ ᒋᑭᑫᐣᒋᑲᑌᐠ, ᐸᑫᐲᐦᐃᑲᓇᐣ 8 ᒥᓇ 9, ᒥᓇ ᐃᓂᐍᓂᐘᐣ ᓇᑯᒥᑎᐏᓇᐣ ᑲ ᐊᓂᒧᒋᑲᑌᑭᐣ ᐃᐦᐃᒪ ᐸᑫᐲᐦᐃᑲᓂᐠ, ᐁᑲ ᒋᓀᐣᒋᑲᑌᐠ ᐁᓇᑲᓑᑭᑫᒪᑲᑭᐣ

• (a) ᐊᐑᔭ ᑲᔦᒪ ᐱᒥᐏᒋᑫᐏᐣ ᐁᑲ ᒋᐊᐯᓂᒧᐨ ᐃᐦᐃᐍ ᑲᐃᓇᑌᐠ ᒋᑭᐍᐅᑕᐱᓂᑲᑌᐠ, ᒋᐅᒼᐱᓂᑲᑌᐠ, ᒋᐸᒥᓂᑲᑌᐠ ᑲᔦᒪ ᒋᒪᓑᑲᐘᑌᐠ ᐃᐦᐃᐍ ᐊᓂᔑᓂᓂᐤ ᐃᔑᑮᔘᐏᐣ ᐃᐦᐃᒪ ᑲᐃᓇᑌᐠ ᑎᕒᐃᑏ — ᐃᓂᐍᓂᐘᐣ ᑲᔦ ᐊᐦᑭᐏᓇᐣ ᓇᑯᒥᑎᐏᓇᐣ — ᑲᔦᒪ ᑎᐯᓂᒥᑎᓱᐏᐣ ᓇᑯᒥᑎᐏᐣ; ᑲᔦᒪ
• (b) ᐊᓂᔑᓂᓂᐤ ᐅᑭᒪᐏᐣ ᑲᔦᒪ ᐊᓂᔑᓂᓂᐤ ᐅᑭᒪᐏᐣ ᐱᒥᐏᒋᑫᐏᐣ ᐁᑲ ᒋᔑᑲᓇᐘᐸᐣᑕᒧᐘᐨ, ᐅᐣᒋ ᐅᑭᒪᐏᐣ ᐅᐦᐅᒪ ᑲᓇᑕ ᑲᔦᒪ ᑯᑕᑮᔭᐣ ᐅᑭᒪᐏᓇᐣ, ᒥᓇ ᑎᕒᐄᑏ — ᐃᓂᐍᓂᐘᐣ ᑲᔦ ᐊᐦᑭᐏᓇᐣ ᓇᑯᒥᑎᐏᓇᐣ — ᑲᔦᒪ ᑎᐯᓂᒥᑎᓱᐏᐣ ᓇᑯᒥᑎᐏᐣᑲᐃᓇᒋᑲᑌᐠ, ᑯᑕᑭᔭᐣ ᒥᓇ ᑫᑯᓇᐣ, ᒋᑭᐍᐅᑕᐱᓂᑲᑌᐠ, ᒋᑭᐍᐅᒼᐱᓂᑲᑌᐠ, ᒋᐸᒥᒋᑲᑌᐠ ᑲᔦᒪ ᒋᒪᓑᑲᐘᑌᐠ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᐣ.

ᑲᓇᑕ ᐱᒥᐏᒋᑫᐏᓇᐣ

Note marginale : ᒋᑌᐱᓂᑲᑌᑭᐣ ᐏᒋᐦᐃᐍᐏᓇᐣ ᐃᐦᐃᒪ ᐊᓂᔑᓂᓂᐤ ᐃᔑᑮᔘᐏᓇᐣ

10.1 ᐃᐦᐃᐍ ᑲᓇᑕ ᐱᒥᐏᒋᑫᐏᐣ ᑲᔦᒪ ᑲᐱᒥᐏᒋᑫᑕᒪᑯᐨ ᑲᔦᒪ ᐃᓂᐍᓂᐘᐣ ᑲᑲᓄᒋᑫᑕᒪᑯᐨ ᐃᓯᓭ, ᑭᓑᐱᐣ ᐱᒥᓂᐣᔕᐦᐃᑲᑌᐠ ᐃᓇᑯᓂᑫᐏᓀᐣᓴᐣ, ᒋᓇᒋᑲᑌᐠ ᒋᑭᑌᐱᓂᑲᑌᐠ ᐏᒋᐦᐃᐍᐏᐣ ᐊᓂᔑᓂᓂᐤ ᐃᔑᑮᔘᐏᓇᐣ, ᑭᓑᐱᐣ ᐃᐦᐃᐍ ᐱᒥᐏᒋᑫᐏᐣ ᑲᔦᒪ ᑲᐱᒥᐏᒋᑫᑕᒪᑯᐨ ᑲᔦᒪ ᑲᑲᓄᒋᑲᑌᒪᑯᐨ ᐁᐃᓯᓭᓂᐠ ᒋᑭᑐᑕᒧᐘᐨ ᒥᓇ ᐁᐃᓯᓭᐠ ᐁᓇᐣᑕᐍᐣᑕᑯᐠ ᐃᐦᐃᐍ ᒋᑭᑌᐱᓂᑲᑌᑭᐣ ᐑᒋᐦᐃᐍᐏᓇᐣ ᒋᐊᓂᔑᓂᓂᒧᓇᓂᐘᐣᐠ.

Note marginale : ᓇᑯᒥᑎᐏᓇᐣ ᑲᔦᒪ ᐃᓇᒋᑫᐏᓇᐣ

• 10.2 (1) ᐃᐦᐃᐍ ᓇᑯᒥᑎᐏᐣ ᑲᔦᒪ ᐃᓇᒋᑫᐏᐣ ᑕᑭᓯᓭ ᒋᑭᐊᒋᑲᑌᐠ ᐃᐦᐃᒪ ᐸᑫᐲᐦᐃᑲᓂᐠ 8 ᑲᔦᒪ 9 ᒋᓇᒋᑲᑌᐠ ᐃᐦᐃᐍ ᑲᓇᑕ ᐱᒥᐏᒋᑫᐏᐣ ᑲᔦᒪ ᑲᐱᒥᐏᒋᑫᑕᒪᑯᐨ ᑲᔦᒪ ᑲᑲᓄᒋᑲᑕᒪᑯᐨ ᒋᐅᐣᑕᑐᐘᐨ ᐏᒋᐦᐃᐍᐏᐣ ᒋᐊᐸᒋᒋᑲᑌᐠ ᐊᓂᔑᓂᓂᐤ ᐃᔑᑮᔘᐏᐣ.

• Note marginale : ᑲᑲᑿᔭᑯᓭᑭᐣ ᑲᔦᒪ ᑲᑲᓇᐦᐃᓭᑭᐣ

  (2) ᑭᓑᐱᐣ ᐅᐣᒋᓯᓭᐠ ᐁᑲ ᑿᔭᐠ ᐁᐃᓯᓭᐠ ᑲᔦᒪ ᐁᒪᐣᓯᓭᐠ ᐃᐦᐃᐍ ᓇᑯᒥᑎᐏᐣ ᑲᔦᒪ ᐃᓇᒋᑫᐏᐣ ᑲᐃᔑᐏᐣᒋᑲᑌᐠ ᐃᐦᐃᒪ ᐸᑫᐱᐦᐃᑲᓂᑲᓂᐠ (1) ᒥᓇ ᐃᓂᐍᓂᐘᐣ ᑲᐃᓇᑌᑭᐣ ᐃᓇᑯᓂᑫᐏᓀᐣᓴᐣ ᐃᐦᐃᒪ ᑲᐃᔑᐏᐣᒋᑲᑌᑭᐣ 45(1)(a.2), ᐃᐦᐃᐍ ᓇᑯᒥᑎᐏᐣ ᑲᔦᒪ ᐃᓇᒋᑫᐏᐣ ᑕᓃᑲᓂᓭᐃᐦᐃᐍ ᐅᐣᒋ ᑲᑲᐃᔑᑿᔭᑯᓭᐠ ᑲᔦᒪ ᑲᐃᔑᒪᐣᓯᓭᐠ.

Note marginale : ᐊᓂᑲᓄᑕᒪᑫᐏᐣ ᑲᔦᒪ ᐊᓂᑯᐑᐣᑕᒪᑫᐏᐣ

11 ᐃᐦᐃᐍ ᑲᓇᑕ ᐱᒥᐏᒋᑫᐏᐣ ᑕᐅᐣᒋᓯᓭ

• (a) ᑫᑯᓇᐣ ᐯᐸᓄᐣ ᑲᐸᒥᓇᒧᐘᐨ ᒋ ᐊᓂᔑᓂᓂᐤᐲᐦᐃᑲᑌᑭᐣ ᐊᓂᔑᓂᓂᐤ ᐃᔑᑮᔘᐏᐣ; ᑲᔦᒪ
• (b) ᐊᓂᑲᓄᑕᒪᑫᐏᐣ ᐏᒋᐦᐃᐍᐏᐣ ᒋᐅᐣᑕᒋᑲᑌᐠ ᕕᑭᓯᓭᐠ ᒋᐊᐸᒋᒋᑲᑌᐠ ᐊᓂᔑᓂᓂᐤ ᐃᔑᑮᔘᐏᐣ ᒣᑿ ᑲᓇᑕ ᐱᒥᐏᒋᑫᐏᐣ ᑫᑯᓇᐣ ᑐᑕᒧᐘᐨ.

ᐅᔑᐲᐦᐃᑫᐏᑲᒥᐠ ᐅᐣᒋ ᑲᒪᒦᓄᒋᑫᐨ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ

ᒋᐅᓇᒋᑲᑌᐠ

Note marginale : ᐅᔑᐲᐦᐃᑫᐏᑲᒥᐠ ᐁᐅᓇᒋᑲᑌᐠ

• 12 (1) ᐁᐅᓇᒋᑲᑌᐠ ᐅᔑᐱᐦᐃᑫᐏᑲᒥᐠ, ᒋᔑᑭᑫᐣᑕᑯᐠ ᐃᐦᐃᐍ ᐅᔑᐲᐦᐃᑫᐏᑲᒥᐠ ᐅᐣᒋ ᑲᒪᒥᓄᒋᑫᐨ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ, ᒋᑕᓇᐱᐨ ᐊᐦᐊᐍ ᑲᒪᒥᓄᒋᑫᐨ ᒥᓇ ᐊᑯᓇᐠ ᓂᓯᐣ ᐊᐱᑕᒪᑫᐏᓂᐘᐠ.

• Note marginale : ᐁᐃᓇᑌᐠ

  (2) ᐃᐦᐃᐍ ᐅᔑᐲᐦᐃᑲᐏᑲᒥᐠ ᑲᐏᐣ ᑕᐃᓇᑭᐣᑌᓯᐣ ᒋᐊᓄᑭᑕᐘᐨ ᐅᑭᒪᐏᓇᐣ ᐅᐣᒋ ᑲᓇᑕ ᑲᔦ ᐁᑲ ᐁᐃᓇᑭᐣᑌᐠ ᒋᐅᐣᒋ ᑲᓇᐘᐸᐣᒋᑲᑌᐠ ᐃᐦᐃᒪ ᔓᓂᔭ ᐱᒥᐏᒋᑫᐏᐣ ᐃᓇᑯᓂᑫᐏᐣ, ᒥᓇ ᐊᐦᐊᐍ ᒪᒥᓄᒋᑫᐏᓂᓂ, ᐊᐱᑕᒪᑫᐠ ᒥᓇ ᐊᓄᑭᓇᑲᓇᐠ ᐁᑲ ᐃᐦᐃᒪ ᒋᔑᑕᑯᓭᐘᐨ ᑲᓇᑕ ᐊᓄᑭᓇᑲᓇᐠ ᑲᐃᔑ ᓇᑲᒋᐦᐊᑲᓀᐘᐨ.

Note marginale : ᐁᐃᓄᐦᐋᑲᓀᐨ ᐊᐦᐊᐍ ᑫᒪᒦᓄᒋᑫᐨ

13 ᐃᐦᐃᐍᓂ ᐅᑎᑭᑐᐏᐣ ᐊᐦᐊᐍ ᐅᑭᒪ ᒋᑭᑐᐨ ᐃᓑᑿ ᑐᑕᐣᐠ ᐅᑭᒪ ᐁᑭ ᐸᐸᒥᑲᑵᑌᐨ ᐊᓂᔑᓂᓂᐤ ᐅᑭᒪᐏᓇᐣ ᒥᓇ ᑯᑕᑭᔭᐣ ᐊᓂᔑᓂᓂ ᐅᑭᒪᐏᓇᐣ ᐱᒥᐏᒋᑫᐏᐣ ᒥᓇ ᑯᑕᑭᔭᐣ ᐊᓂᔑᓂᓂ ᐱᒥᐏᒋᑫᐏᓇᐣ, ᐊᐦᐊᐍ ᐅᑭᒪᐏᓇ ᑲ ᑲᓄᒋᑫᑕᒪᑫᐨ ᒋᐅᓇᓴᐨ ᐃᓂᐍᓂᐘᐣ ᑲᒪᒥᓄᒋᑫᓂᐨ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ ᒋᐊᓄᑭᑕᐣᐠ ᑭᓑᐱᐣ ᑿᔭᐠ ᑐᑕᐣᐠ ᐊᓄᑭᐏᐣ ᐁᑲ ᐊᐘᔑᒣ ᓂᔭᓄᐊᐦᑭᐏᐣ ᒋᓇᑭᐣᓱᐨ, ᑭᓑᐱᐣ ᐁᑕ ᓴᑭᑎᓂᑯᐨ ᐃᓂᐍᓂᐘᐣ ᐅᑭᒪᐏᐣ ᑲᑲᓄᒋᑫᑕᒪᐘᐨ ᐊᓂᐣ ᐊᐲ ᑕᐃᓯᓭ ᐅᐍ.

Note marginale : ᐑᐣᑕᒪᑫᐠ ᐅᑕᐲᑕᒪᑫᐠ

13.1 ᐊᐦᐊᐍ ᐅᑭᒪ ᐃᓯᓭᓂ ᒋᑭᐅᓇᓴᐨ ᑲᒥᑏ ᒋᐅᐣᒋᓯᓭᐠ ᒋᐏᐣᑕᒪᐘᑲᓀᐨ ᐅᑭᒪ ᐅᐣᒋ ᑲᐃᔑ ᐅᓇᓴᑲᓀᐨ ᐊᐦᐊᐍ ᑲᒪᒥᓄᒋᑫᐨ.

Note marginale : ᑫᓂᑲᓂᓑᑲᐠ ᐱᒥᐏᒋᑫᐏᐣ

14 ᐊᐦᐊᐍ ᑲᒪᒥᓄᒋᑫᐨ ᐅᑲᓂᑲᓂᓑᑲᐣ ᐃᐦᐃᐍᓂ ᐅᔑᐲᐦᐃᑫᐏᑲᒥᐠ ᒦᓇ ᒋᐱᒥᐏᑐᐨ ᑲᔦ ᒋᐸᒥᒋᑫᐨ ᐃᐦᐃᐍᓂ ᐅᔑᐲᐦᐃᑫᐏᑲᒥᑯᐣᐠ ᒥᓇ ᑲᑭᓇ ᑫᑯᐣ ᑲᐃᓯᓭᓂᐠ ᒋᐊᓄᑭᒋᑲᑌᑭᐣ.

Note marginale : ᑲᒪᒦᓄᒋᑫᐨ ᐁᑲ ᐁᐊᔭᐨ ᑲᔦᒪ ᐁᑲ ᐁᑮᑐᑕᐣᐠ ᑫᑯᐣ

15 ᑭᓑᐱᐣ ᐊᐦᐊᐍ ᑲᒪᒥᓄᒋᑫᐨ ᐁᑲ ᐊᔭᐨ ᑲᔦᒪ ᐁᑲ ᐁᑭᑐᑕᐣᐠ, ᑲᔦᒪ ᐃᐦᐃᐍ ᑲᒪᒥᓄᒋᑫᐨ ᐁᑲ ᐊᔭᒪᑲᐠ, ᐊᐦᐊᐍ ᐅᑭᒪ ᐅᑲᓄᓇᐣ ᐯᔑᐠ ᐊᐱᑕᒪᑫᐣ ᒋᓇᑭᐣᓱᐨ ᑲᒪᒥᓄᒋᑫᐨ, ᐢᓑᑯᐨ ᐊᐦᐊᐍ ᐊᐱᑕᒪᑫ ᒋᓇᓄᑭᑕᒪᑫᐨ ᑲᒪᒥᓄᒋᑫᐨ ᐁᑲ ᐊᐘᔑᒣ ᒋᓯᓭᓂᐠ 90 ᑕᓱᑭᔑᑲ ᐃᐦᐃᐍ ᐁᑕ ᔕᐳᓂᑲᑌᐠ ᐅᑭᒪᐏᐣ ᐃᑭᑐᐏᐣ ᐁᑭᐸᑭᑎᓇᐣᐠ ᐅᑭᒪ ᐁᑭᑐᑕᐣᐠ ᐊᐦᐊᐍ ᐅᑭᒪ ᐁᑭᐸᐸᒥᑲᑵᑌᐨ ᐃᓂᐍᓂᐘᐣ ᐊᓂᔑᓂᓂᐤ ᐅᑭᒪᐏᓇᐣ ᒥᓇ ᐊᓂᔑᓂᓂᐤ ᐅᑭᒪᐏᓇᐣ ᐱᒥᐏᐨᑫᐏᓇᐣ ᒥᓇ ᑯᑕᑭᔭᐣ ᐊᓂᔑᓂᓂᐤ ᐱᒥᐏᒋᑫᐏᓇᐣ.

Note marginale : ᐁᐃᓄᐦᐊᑲᓀᐘᐨ ᐅᑕᐲᑕᒪᑫᐠ

• 16 (1) ᐁᐃᑭᑐᐨ ᐅᑎᑭᑐᐏᐣ ᐊᐦᐊᐍ ᐅᑭᒪ ᐁᑭᑐᑕᐣᐠ ᐊᐦᐊᐍ ᐅᑭᒪ ᐁᑭᐸᐸᒥᑲᑵᑌᐨ ᐃᓂᐍᓂᐘᐣ ᐊᓂᔑᓂᓂᐤ ᐅᑭᒪᐏᓇᐣ ᒥᓇ ᐊᓂᔑᓂᓂᐤ ᐅᑭᒪᐏᓇᐣ ᐱᒥᐏᐨᑫᐏᓇᐣ ᒥᓇ ᑯᑕᑭᔭᐣ ᐊᓂᔑᓂᓂᐤ ᐱᒥᐏᒋᑫᐏᓇ, ᐃᑭᐍᓂᐘᐠ ᐅᑭᒪᐏᐣ ᐅᑎᑭᑐᐏᐣ ᒋᐅᓇᓴᐨ ᐊᑯᓇᐠ ᓂᓯᐣ ᐊᐱᑕᒪᑫᐣ ᒋᐊᐱᐘᐨ ᐃᐦᐃᒪ ᐱᒥᐏᐨᑫᐏᓂᐣᐠ ᒋᓇᑌᓂᐠ ᐅᑕᐱᑕᒪᑫᐏᐣ ᐊᑯᓇᐠ 5 ᑕᓱᐊᐦᑭᐏᐣ.

• Note marginale : ᐸᑯᓭᐣᒋᑫᐏᓇᐣ ᐅᐣᒋ ᐊᓂᔑᓂᓂᐘᐠ, ᐃᓄᐏᐟ ᒦᓇ ᐑᓴᑯᑌᐏᓂᓂᐘᐠ

  (2) ᐁᑲ ᒪᔑ ᑐᑕᐣᐠ ᐅᑎᑭᑐᐏᓇᐣ ᐅᐣᒋ ᐸᑫᐲᐦᐃᑲᓂᐣᐠ (1), ᐊᐦᐊᐍ ᐅᑭᒪ ᐅᑲᓇᓇᐣᑕᐘᐸᐣᑕᐣ ᐃᑭᑐᐏᓇᐣ ᒋᑭᑫᐣᑕᑯᐨ ᐃᐦᐃᐍ ᐅᑭᒪᐏᐣ ᐅᓇᒋᑫᐏᐣ ᒋᐅᓇᓴᑲᓀᐘᐨ ᐊᐑᔭᐠ ᑲᑲᓑᑭᑐᐘᐨ ᒋᑭᑲᓄᒋᑫᑕᒪᑫᐘᐨ ᑲᐃᔑ ᐸᑯᓭᑕᒧᐘᐨ ᐊᓂᔑᓂᓂᐘᐠ, ᐃᓄᐏᐟ ᒥᓇ ᐑᓴᑯᑌᐏᓂᓂᐘᐠ.

Note marginale : ᑮᐍ ᐃᓄᐦᐃᑫᐏᐣ

17 ᐊᐦᐊᐍ ᑲᒪᒥᓄᒋᑫᐨ ᒥᓇ ᐊᐲᑕᒪᑫᐠ ᑕᑭᐍᐊᓴᐘᐠ ᓂᐣᔢ ᑲᔦᒪ ᒋᐊᓂᑯ ᐊᓄᑭᐘᐨ ᐃᐦᐃᒪ ᐅᔑᐱᐦᐃᑫᐏᑲᒥᑯᐣᐠ.

Note marginale : ᐁᐃᓇᑌᐠ

18 ᐊᐦᐊᐍ ᑲᒪᒥᓄᒋᑫᐨ ᒥᓇ ᐊᐲᑕᒪᑫᐃᐠ ᒋᐅᓇᓴᑲᓀᐘᐨ ᐃᐦᐃᐊ ᐅᔑᐲᐦᐃᑫᐏᑲᒥᑯᐣᐠ ᑲᐯᐦᐃ ᒋᓇᑌᓂᐠ.

Note marginale : ᐊᓄᑮᐏᐣ ᐱᒥᑎᐸᐦᐃᑫᐏᐣ

• 19 (1) ᐊᐦᐊᐍ ᑲᒪᒥᓄᒋᑫᐨ ᒥᓇ ᐊᐲᑕᒪᑫᐠ ᑕᐱᒥᑎᐸᐦᐊᒪᐘᐠ ᑫᐃᓇᒋᑫᐘᐨ ᐅᑭᒪᐏᐣ ᐃᑭᑐᐏᐣ.

• Note marginale : ᒣᑎᓂᑫᐏᓇᐣ

  (2) ᐊᐦᐊᐍ ᑲᒪᒥᓄᒋᑫᐨ ᒋᒥᓇᑲᓀᐨ ᑫᐅᐣᒋ ᐸᐸᒥᔭᐨ ᒥᓇ ᑯᑕᑭᔭᐣ ᒣᑎᓂᑫᐏᓇᐣ ᒣᑿ ᐁᑐᑕᐣᐠ ᐅᑕᓄᑮᐏᐣ ᑭᓑᐱᐣ ᐁᑲ ᑭᐊᔭᐨ ᐃᐦᐃᒪ ᑲᑕᓇᓄᑭᐨ. ᐃᑭᐍᓂᐘᐠ ᑲᔦ ᐊᐱᑕᒪᑫᐏᓂᓂᐘᐠ ᒋᑭᐍᒥᓇᑲᓀᐘᐨ ᐅᒣᑎᓂᑫᐏᐣ ᒣᑿ ᐁᐸᐸᒪᓄᑭᐨ ᐃᐦᐃᐍᓂ ᐁᑐᑕᒧᐘᐨ ᑲᐸᐸᒥᔭᐘᐨ.

Note marginale : ᐊᓄᑭᓇᑲᓇᐠ

20 ᐃᐦᐃᐍ ᐅᔑᐲᐦᐃᑫᐏᑲᒥᐠ ᐅᑲᓄᑮᐦᐊᐘᐣ ᐊᓄᑭᓇᑲᓇᐣ ᑲᐃᔑᓇᐣᑕᐍᐣᑕᑯᐠ ᐊᓄᑭᐏᐣ ᒋᑭᑐᒋᑲᑌᑭᐣ ᐃᐦᐃᒪ ᐅᔑᐲᐦᐃᑫᐏᑲᒥᑯᐣᐠ ᒥᓇ ᒋᐅᓀᐣᒋᑲᑌᐠ ᐊᓂᐣ ᑫᐃᓇᓄᑭᐘᐨ ᒥᓇ ᑫᐃᓇᑌᑭᐣ ᐃᓂᐍᓂᐘᐣ ᐊᓄᑭᐏᓇᐣ, ᐃᓂᐍᓂᐘᐣ ᑲᔦ ᑎᐸᐦᐃᑫᐏᓇᐣ ᒥᓇ ᐊᔑᐨ ᑫᑌᐱᓇᑭᐣᐠ ᐏᒋᐦᐃᑯᐏᓇᐣ.

Note marginale : ᐁᑲ ᒋᒪᐣᓯᓭᐠ ᐊᓄᑭᐏᓇᐣ

21 ᐊᐦᐊᐍ ᑲᒪᒥᓄᒋᑫᐨ, ᐊᐱᑕᒪᑫᐠ ᒥᓇ ᐊᓄᑭᓇᑲᓇᐠ ᐃᐦᐃᒪ ᐅᔑᐲᐦᐃᑫᐏᑲᒥᑯᐣᐠ ᑲᔦᒪ ᑲᑕᓇᓄᑮᐨ ᐁᑲ ᑌᐻ ᐁᐱᒥᑐᑕᐣᑭᐣ ᐅᑕᓄᑭᐏᓇᐣ ᑲᔦᒪ ᐁᐏᒋᑐᐨ ᑲᐃᓇᓄᑭᒪᑲᐠ ᐊᓄᑭᐏᐣ ᐃᐦᐃᒪ ᑫᐏᐣ ᐁᐸᐸᒥᓯᐢᐨ ᑲᐃᔑ ᒪᒥᓄᒋᑫᐨ ᐊᓄᑭᓇᑲᐣ.

Note marginale : ᑫᓃᑲᓇᑌᐠ ᐅᔑᐲᐦᐃᑫᐏᑲᒥᐠ

22 ᐃᐦᐃᐍ ᐅᔑᐲᐦᐃᑫᐏᑲᒥᐠ ᒋᔑᐊᑌᐠ ᐃᐦᐃᒪ ᑲᐃᔑ ᓂᑲᓂᓯᐠ ᐅᑌᓇ ᐅᑭᒪᐏᐣ ᑲᐃᔑ ᐊᐱᐘᐨ ᑲᐃᔑᐑᐣᒋᑲᑌᐠ ᐃᐦᐃᒪ ᑲᐃᔑᓂᑲᓂᓯᐠ ᐅᑭᒪᐅᑌᓇ ᐃᓇᑯᓂᑫᐏᐣ, ᑲᔦᒪ ᐸᑲᐣ ᐅᐦᐅᒪ ᑲᓇᑕ ᒋᔑᐅᓇᑭᐣᑌᐠ ᒋᑭᑐᒪᑲᐠ ᐃᐦᐃᐍ ᐅᑭᒪᐏᐣ ᐃᑭᑐᐏᐣ.

ᐃᓇᓄᑮᐏᐣ ᒦᓇ ᒪᓑᑲᐏᓰᐏᓇᐣ, ᐊᓄᑮᐏᓇᐣ ᒦᓇ ᑐᑕᒧᐏᓇᐣ

Note marginale : ᐃᓇᓄᑮᐏᐣ

• 23 (1) ᐃᐦᐃᐍ ᐃᓇᓄᑮᐏᐣ ᐅᐣᒋ ᐅᔑᐲᐦᐃᑫᐏᑲᒥᐠ ᐅᓄᐍᓂᐘᐣ

  • (a) ᒋᐑᒋᑐᐘᐨ ᒋᐑᐣᒋᑲᑌᑭᐣ ᐊᓂᔑᓂᓂᐤ ᐃᔑᑮᔘᐏᓇᐣ;
  • (b) ᒋᐏᒋᑐᐘᐨ ᑲᑐᑕᒥᓂᐨ ᐊᓂᔑᓂᓂᐘᐣ ᑲᑲᑵ ᑭᐍᐅᑕᐱᓇᒧᐘᐨ, ᐆᒼᐱᓇᒧᐘᐨ. ᒋᐸᒥᓇᒧᐘᐨ ᒥᓇ ᒋᒪᓑᑲᐏᑐᐘᐨ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᓇᐣ;
  • (c) ᒋᓇᑲᒋᑐᐘᐨ ᐃᓂᐍᓂᐘᐣ ᑲᐃᔑ ᒪᒪᐣᓯᓭᑭᐣ ᒥᓇ ᒋᓇᑲᒋᑐᐘᐨ ᐃᑭᑐᐏᓇᐣ ᐃᐦᐃᒪ ᑲᐃᓇᒋᑲᑌᑭᐣ ᒋᑐᒋᑲᑌᐠ ᐃᓇᑯᓂᑫᐏᓂᐠ;
  • (d) ᒋᐏᐣᑕᒧᐘᐨ ᒥᓯᐍ ᐃᓂᓂᐘᐣ ᒋᐏᐣᑕᒪᐘᐨ ᒥᓇ ᒋᓂᓯᑐᑕᒥᓂᐨ ᐅᐣᒋ ᐃᓂᐍᓂᐘᐣ
    • (i) ᑲᐃᔑ ᒣᒣᔾᑭᓇᑯᑭᐣ ᒥᓇ ᐁᑭᒋᓀᐣᒋᑲᑌᑭᐣ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᓇᐣ,
    • (ii) ᐁᑲ ᐁᐸᐸᑲᓂᓇᑯᑭᐣ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᓇᐣ ᒥᓇ ᐃᓇᑲᓀᓯᐏᓇᐣ ᐅᐣᒋ ᐊᓂᔑᓂ ᓂᐘᐠ,
    • (iii) ᐅᒦᓂᑯᐏᓂᐘ ᐊᓂᔑᓂᓂᐘᐠ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ,
    • (iv) ᐁᑭᒋᓀᐣᒋᑲᑌᑭᐣ ᐃᓂᐍᓂᐘᐣ ᒥᓂᑯᐏᓇᐣ ᐅᐣᒋ ᐊᓂᔑᓂᓂᐘᐠ, ᒥᓇ ᑲᔦ ᒥᓯᐍ ᐃᓂᓂᐘᐠ,
    • (v) ᑲᑭᒪᐣᓯᓭᐦᐃᐍᒪᑲᐠ ᐍᒥᒋᑯᔑᔦᐦᐃ ᒥᓇ ᒪᓀᐣᒋᑫᐏᓇᐣ ᐅᑭᒪᐏᐣ ᐃᓇᑯᓂᑲᓇᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ ᒥᓇ ᑲᔦ ᒋᑭᑐᑕᒧᐘᐨ ᐅᒦᓂᑯᐏᓂᐘ, ᒥᓇ
    • (vi) ᐁᑭᒋᓀᐣᑕᑯᐠ ᒋᓇᓄᑭᓇᓂᐘᐠ ᒥᓇ ᒋᐸᑭᑎᓂᑲᑌᐠ ᐃᓂᐍᓂᐘᐣ ᒪᒥᓄᒋᑫᐏᓇᐣ ᐅᐣᒋ ᐊᓂᔑᓂᓂᐘᐠ; ᒥᓇ
  • (e) ᒋᐏᒋᒋᑲᑌᑭᐣ ᐃᓂᐍᓂᐘᐣ ᒪᒋᑕᐏᓇᐣ ᒥᓇ ᒋᐊᐸᒋᒋᑲᑌᑭᐣ ᓄᑯᒼ ᑲᓂᔑᓇᑯᑭᐣ ᐲᐘᐱᑯᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᐣ ᑭᑭᓄᒪᑫᐏᐣ ᒥᓇ ᒋᑭᐍᐅᑕᐱᓂᑲᑌᑭᐣ, ᒋᐏᑕᓄᑭᒪᑲᓀᐘᐨ ᐊᓂᔑᓂᓂᐤ ᐅᑭᒪᐏᓇᐣ ᒥᓇ ᑯᑕᑭᔭᐣ ᐊᓂᔑᓂᓂᐤ ᐅᑭᒪᐏᓇᐣ ᐱᒥᐏᒋᑫᐏᓇᐣ, ᐊᓂᔑᓂᓂᐤ ᐱᒥᐏᒋᑫᐏᓇᐣ, ᐃᑭᐍᓂᐘᐠ ᐅᑭᒪᐏᐣ ᐅᒪ ᑲᓇᑕ ᒥᓇ ᑯᑕᑭᔭᐣ ᐅᑭᒪᐏᓇᐣ.

• Note marginale : ᐸᐸᒥᑲᑵᑌᐏᓇᐣ ᒦᓇ ᐃᓇᒋᑫᐏᓇᐣ

  (2) ᒋᑭᑐᑕᒧᐘᐨ ᐅᑕᓄᑭᐏᓂᐘ, ᐅᔑᐲᐦᐃᑫᐏᑲᒥᐠ ᐅᑲᑐᑕᐣ, ᐃᓯᓭᑭᐣ, ᒋᑲᑵᒋᒪᐨ ᒥᓇ ᒋᐅᓇᒋᑫᐘᐨ ᐃᓂᐍᓂᐘᐣ ᐊᓂᔑᓂᓂᐤ, ᑯᑕᐠ ᐅᑭᒪᐏᓇᐣ ᒪᒋᑕᐏᓇᐣ ᑲᐸᐸᒥᓯᐘᐨ ᒋᐸᐸᒪᒋᒧᐘᐨ, ᒋᑭᐍᐅᑕᐱᓂᑲᑌᐠ ᑲᔦᒪ ᒋᒪᓇᒋᒋᑲᑌᐠ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᓇᐣ.

Note marginale : ᓇᓇᐣᑐᑭᑫᐣᒋᑫᐏᐣ ᑲᔦᒪ ᓇᑲᒋᒋᑫᐏᓇᐣ

• 24 (1) ᐃᐦᐃᐍ ᐅᔑᐱᐦᐃᑫᐏᑲᒥᐠ ᐅᑲᑐᑕᓇᐘ ᓇᓇᐣᑐᑭᑫᐣᒋᑫᐏᓇᐣ ᑲᔦᒪ ᓇᑲᒋᒋᑫᐏᐣ, ᑲᔦᒪ ᒋᓯᓭᑐᐘᐨ ᓇᓇᐣᑑᑭᑫᐣᒋᑫᐏᐣ ᑲᔦᒪ ᓇᓇᑲᒋᒋᑫᐏᐣ ᒋᑭᑐᒋᑲᑌᑭᐣ, ᐅᐣᒋ ᐃᐦᐃᐍ

  • (a) ᒋᐅᓇᓴᑲᓀᐨ ᔓᓂᔭ ᒋᓌᓱᐨ ᒋᐏᒋᒋᑲᑌᑭᐣ ᐊᓂᔑᓂᓂᐤ ᐃᔑᑮᔘᐏᓇᐣ; ᑲᔦᒪ
  • (b) ᒋᐊᐸᒋᒋᑲᑌᑭᐣ ᐊᓂᔑᓂᓂᐤ ᐃᔑᑮᔘᐏᓇᐣ ᐅᒪ ᑲᓇᑕ, ᑲᔦ ᐃᐦᐃᐍ ᒋᓇᐸᒋᒋᑲᑌᐠ ᒋᐅᐣᒋ ᑭᑫᐣᒋᑲᑌᐠ ᐃᓂᐍᓂᐘᐣ ᐃᔑᑮᔘᐏᓇᐣ ᑲᔦᒪ ᒋᓂᓯᑕᐏᓂᑲᑌᑭᐣ ᑫᐅᐣᒋ ᑭᐍᐅᑕᐱᓂᑲᑌᐠ ᒥᓇ ᒋᐱᒥᓇᑲᒋᒋᑲᑌᐠ ᐊᔭᒥᐦᐃᐍᐏᐣ ᐅᐣᒋ ᐃᔑᑮᔘᐏᓇᐣ.

• Note marginale : ᑕᔑᑫᐏᐣ ᓇᑲᒋᒋᑫᐏᓇᐣ

  (2) ᐃᐦᐃᐍ ᓇᓇᐣᑐᑭᑫᐣᒋᑫᐏᐣ ᑲᔦᒪ ᓇᑲᒋᒋᑫᐏᓇᐣ ᑲᐏᐣᒋᑲᑌᑭᐣ ᐃᐦᐃᒪ ᐸᑫᐲᐦᐃᑲᓂᐠ (1) ᑲᔦ ᒋᓇᑲᒋᒋᑲᑌᐠ ᐃᐦᐃᐍ ᑕᔑᑫᐏᐣ ᓇᑲᒋᒋᑫᐏᐣ, ᒋᐸᑭᑎᓇᒧᐘᐨ ᐃᑭᐍᓂᐘᐠ ᐊᓂᔑᓂᓂᐘᐠ ᒌᑐᒋᑲᑌᓂᐠ ᐃᐦᐃᐍᓂ ᓇᑲᒋᒋᑫᐏᐣ ᑲᐑᐟᑐᒋᑲᑌᐠ.

• Note marginale : ᒋᐅᐣᑎᓂᑲᑌᑭᐣ — ᓇᓇᐣᑐᑭᑫᐣᒋᑫᐏᐣ ᑲᔦᒪ ᓇᑲᒋᒋᑫᐏᐣ

  (3) ᐃᐦᐃᐍ ᐅᔑᐲᐦᐃᑫᐏᑲᒥᐠ ᐃᓯᓭᓂ ᐃᓂᐍᓂᐘᐣ ᑲᐃᔑ ᒥᑭᑫᒪᑲᐠ ᓇᓇᐣᑐᑭᑫᐣᒋᑫᐏᐣ ᑲᔦᒪ ᓇᑲᒋᒋᑫᐏᐣ ᑲᐑᐣᒋᑲᑌᐠ ᐃᐦᐃᒪ ᐸᑫᐲᐦᐃᑲᓂᐠ (1) ᒋᒥᓇᑲᓀᐘᐨ ᐊᓂᔑᓂᓂᐘᐠ, ᐊᓂᔑᓂᓂᐤ ᐅᑭᒪᐏᐣ, ᐊᓂᔑᓂᓂᐤ ᐅᑭᒪᐏᐣ ᐱᒥᐏᒋᑫᐏᐣ ᑲᔦᒪ ᐊᓂᔑᓂᓂᐤ ᐱᒥᐏᒋᑫᐏᓇᐣ ᑲᑭ ᐸᐸᒥᓯᐘᐨ ᐃᐦᐃᐍᓂ ᓇᓇᐣᑐᑭᑫᐣᒋᑫᐏᐣ ᑲᔦᒪ ᓇᑲᒋᒋᑲᐏᐣ. ᑲᐃᓇᑌᐠ ᐃᓇᑯᓂᑫᐏᐣ, ᐃᐦᐃᐍ ᐅᔑᐱᐦᐃᑫᐏᑲᒥᐠ ᐅᑲᐸᑭᑎᓇᓇᐘ ᐯᐸᓄᐣ ᑲᔦᒪ ᑲᑮᐅᔑᒋᑲᑌᑭᐣ ᐅᐣᒋ ᓇᓇᐣᑐᑭᑫᐣᒋᑫᐏᐣ ᑲᔦᒪ ᓇᑲᒋᒋᑫᐏᐣ ᒋᒥᓇᑲᓀᐘᐨ ᐊᓂᔑᓂᓂᐘᐠ, ᐊᓂᔑᓂᓂᐤ ᐅᑭᒪᐏᐣ ᑲᔦᒪ ᐊᓂᔑᓂᓂᐤ ᐅᑭᒪᐏᐣ ᐱᒥᐏᒋᑫᐏᐣ ᑲᔦᒪ ᐊᓂᔑᓂᓂᐤ ᐱᒥᐏᐨᑫᐏᐣ.

• Note marginale : ᔕᑅᑌᐱᒋᑫᐏᐣ ᑲᔦᒪ ᒋᐊᐸᒋᒋᑲᑌᐠ ᐁᑲ ᒋᑎᐸᐦᐃᑲᓂᐘᐠ

  (4) ᐃᐦᐃᐍ ᐅᔑᐲᐦᐃᑫᐏᑲᒥᐠ ᒋᐸᑭᑎᓇᐨ ᐊᓂᔑᓂᓂᐘᐣ, ᐊᓂᔑᓂᓂᐤ ᐅᑭᒪᐏᐣ ᑲᔦᒪ ᐊᓂᔑᓂᓂ ᐅᑭᒪᐏᐣ ᐱᒥᐏᒋᑫᐏᐣ ᑲᔦᒪ ᐊᓂᔑᓂᓂᐤ ᐱᒥᐏᐨᑫᐏᐣ ᒋᔕᑅᑌᐸᐦᐊᒧᐘᐨ ᑲᔦᒪ ᕕᐊᐸᒋᑐᐘᒋᐣ ᐃᓂᐍᓂᐘᐣ ᓇᓇᐣᑐᑭᑫᐣᒋᑫᐏᐣ ᑲᔦᒪ ᓈᑲᒋᒋᑫᐏᐣ ᐁᑲ ᒋᑎᐸᐦᐊᒧᐘᐨ ᐅᐣᒋ ᐁᐏᓇᐸᒋᑐᐘᐨ ᒋᑭᐍᐅᑕᐱᓇᒧᐘᐨ, ᒋᐅᒼᐱᐣᒧᐘᐨ, ᒋᐸᒥᓇᒧᐘᐨ ᑲᔦᒪ ᒋᒪᓑᑲᐏᑐᐘᐨ ᐊᓂᔑᓂᓂᐤ ᐃᔑᑮᔘᐏᓇᐣ. ᑲᐃᓇᑌᐠ ᐃᓇᑯᓂᑫᐏᐣ, ᐃᐦᐃᐍ ᐅᔑᐲᐦᐃᑫᐏᑲᒥᐠ ᐅᑲᐸᑭᑎᓇᓇᐘ ᐯᐸᓄᐣ ᑲᑭᐊᐸᒋᒋᑲᑌᑭᐣ ᑲᔦᒪ ᑲᑭᐅᔑᒋᑲᑌᑭᐣ ᐁᑭ ᓇᓇᐣᑐᑭᑫᐣᒋᑲᑌᐠ ᑲᔦᒪ ᐁᑭᓇᓇᑲᒋᒋᑲᑌᐠ ᒋᔕᑅᑌᐸᐦᐃᑲᑌᑭᐣ ᑲᔦᒪ ᒋᔑ ᐊᐸᒋᒋᑲᑌᑭᐣ ᐃᐦᐃᒪ ᐊᓂᔑᓂᓂᐤ ᑕᔑᑫᐏᓂᐣᐠ, ᐊᓂᔑᓂᓂᐤ ᐅᑭᐊᐏᐣ ᑲᔦᒪ ᐊᓂᔑᓂᓂᐤ ᐅᑭᒪᐏᐣ ᐱᒥᐏᒋᑫᐏᐣ ᑲᔦᒪ ᐊᓂᔑᓂᓂᐤ ᐱᒥᐏᐨᑫᐏᐣ ᐁᑲ ᒋᑎᐸᐦᐊᒧᐘᐨ, ᐃᐦᐃᐍ ᒋᓇᐸᒋᑐᐘᐨ.

Note marginale : ᐑᒋᐦᐃᐍᐏᐣ ᑲᐸᑭᑎᓇᒧᐘᐨ ᐅᐦᐅᒪ ᐅᔑᐲᐦᐃᑫᐏᑲᒥᑯᐣᐠ

25 ᐠᑲᑵᑌᐘᐨ ᐃᑭᐍᓂᐘᐠ ᐊᓂᔑᓂᓂᐤ ᑕᔑᑫᐏᐣ ᑲᔦᒪ ᐊᓂᔑᓂᓂᐤ ᐅᑭᒪᐏᐣ ᑲᔦᒪ ᐊᓂᔑᓂᓂᐤ ᐅᑭᒪᐏᐣ ᐱᒥᐏᒋᑫᐏᐣ, ᐅᔑᐲᐦᐃᑫᐏᑲᒥᐠ ᑕᐑᒋᑐ ᐃᓂᐍᓂᐘᐣ ᑕᔑᑫᐏᓇᐣ ᑲᔦᒪ ᐊᓂᔑᓂᓂᐤ ᐅᑭᒪᐏᐣ ᑲᔦᒪ ᐊᓂᔑᓂᓂᐤ ᐅᑭᒪᐏᐣ ᐱᒥᐏᒋᑫᐏᐣ ᐃᐦᐃᐍ ᑲᐑᑐᑕᒧᐘᐨ ᒋᑭᐍᐅᑕᐱᓇᒧᐘᐨ, ᑭᐍᐅᒼᐱᓂᑫᐏᐣ, ᒋᐸᒥᑐᐘᐨ ᒥᓇ ᒋᒪᓑᑲᐏᑐᐘᐨ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᓇᐣ, ᐃᓂᐍᓂᐘᐣ ᐅᑐᑕᒧᐏᓂᐘ ᑲᔦ

• (a) ᒋᐅᓇᑌᑭᐣ ᑲᐯ ᑎᐸᒋᒧᐏᓇᐣ ᐅᐣᒋ ᐃᔑᑮᔘᐏᐣ, ᐃᓂᐍᓂᐘᐣ ᐊᐸᒋᒋᑲᓇᐣ ᐅᐣᒋ ᐲᐣᑕᐍᓯᒋᑲᐣ ᒦᓇ ᒪᐣᓯᓇᑌᓯᒋᑲᓇᐣ ᒥᓇ ᐯᐸᓄᐣ ᑎᓄᑲᐣ ᓂᐱᑌᐲᐦᐃᑫᐏᓇᐣ, ᒪᐘᐣᑐᐲᐦᐃᑫᐏᓇᐣ ᒦᓇ ᐃᓂᑕᑯᓯᐏᓇᐣ ᐅᐣᒋ ᐃᔑᑮᔘᐏᐣ, ᒋᓇᐸᒋᒋᑲᑌᑭᐣ, ᑯᑕᑭᔭᐣ ᒥᓇ, ᒋᐸᐸᒥᓯᓇᓂᐘᐣᐠ ᑲᔦ ᒋᐊᓂᑯ ᑭᑭᓄᒪᑫᓇᓂᐘᐣᐠ;
• (b) ᒋᐅᓇᒋᑲᑌᐠ ᒪᐣᓯᓇᐦᐃᑲᓀᐣᓯᑲᐣ ᐅᐣᒋ ᐊᓂᑲᓄᑕᒪᑫᐠ ᒥᓇ ᐊᓂᑲᓄᑕᒪᑫᐲᐦᐃᑫᐏᓂᓂᐘᐠ;
• (c) ᒋᑐᒋᑲᑌᑭᐣ ᓇᓇᐣᑐᑭᑫᐣᒋᑫᐏᓇᐣ ᒥᓇ ᓇᑲᒋᒋᑫᐏᓇᐣ ᒥᓇ ᑕᔒᑫᐏᓂᐣᐠ ᓇᑲᒋᒋᑫᐏᐣ ᐅᐣᒋ ᑲᐃᓇᐸᒋᑐᐘᐨ ᐃᔑᑮᔘᐏᐣ;
• (d) ᒋᐅᓇᑌᑭᐣ ᒥᓇ ᒋᒪᑕᓄᑮᒋᑲᑌᑭᐣ ᐅᓇᒋᑫᐏᓇᐣ ᐅᐣᒋ ᑲᑮᐍᐅᑕᐱᓂᑲᑌᐠ, ᑲᐅᒼᐱᓂᑲᑌᐠ, ᑲᐸᒥᓂᑲᑌᐠ ᒥᓇ ᑲᒪᓑᑲᐏᒋᑲᑌᐠ ᐃᐦᐃᐍ ᐃᔑᑮᔘᐏᐣ; ᑲᔦᒪ
• (e) ᒋᐏᒋᐘᑲᓀᐨ ᐅᑭᒪᐏᐣ ᐅᐦᐅᒪ ᑲᓇᑕ ᑲᔦᒪ ᑯᑕᑮᔭᐣ ᐅᑭᒪᐏᓇᐣ ᒋᐅᓇᑌᑭᓂᓇᑲᓀᓯᐏᐣ ᒋᓇᑲᒋᒋᑲᑌᐠ ᑫᑐᒋᑲᑌᑭᐣ ᑭᑭᓄᒪᑫᐏᓇᐣ ᒥᓇ ᑭᑫᐣᒋᑫᐏᐣ ᐅᐣᒋ ᐃᔑᑮᔘᐏᐣ.

Note marginale : ᒪᒦᓄᒋᑫᐏᐣ ᐑᒋᐦᐃᐍᐏᓇᐣ

26 ᑲᑵᑌᐘᐨ ᐃᑭᐍᓂᐘᐠ ᐊᓂᔑᓂᓂᐤ ᑕᔑᑫᐏᐣ, ᐊᓂᔑᓂᓂᐤ ᐅᑭᒪᐏᐣ ᑲᔦᒪ ᐊᓂᔑᓂᓂᐤ ᐅᑭᒪᐏᐣ ᐱᒥᐏᒋᑫᐏᐣ, ᐊᓂᔑᓂᓂᐤ ᐱᒥᐏᒋᑫᐏᐣ ᑲᔦᒪ ᐅᐠᑭᒪᐏᐣ ᐅᐣᒋ ᑲᓇᑕ, ᐃᐦᐃᐍ ᐅᔑᐲᐦᐃᑫᐏᑲᒥᐠ ᐅᑲᐑᒋᑐᓇᐘ, ᐃᓂᐍᓂᐘᐣ ᑲᔦ ᒥᓄᒋᑫᐏᓇᐣ ᑲᔦ ᐃᓂᐍᓂᐘᐣ ᐃᓇᑲᓀᓯᐏᓇᐣ ᑲᐃᔑᓇᐣᑕᐍᐣᑕᑯᑭᐣ ᐏᒋᐦᐃᐍᐏᓇᐣ, ᒋᐅᐣᒋ ᑲᓑᑭᒋᑲᑌᐠ ᒥᓄᒋᑫᐏᓇᐣ ᑭᓑᐱᐣ ᒪᐣᓯᓭᐠ ᐅᓄᐍᓂᐘᐣ

• (a) ᒋᑭᑐᑕᒧᐘᐨ ᐃᓂᐍᓂᐘᐠ ᑲᐸᐸᒥᓯᐘᐨ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ ᐅᐣᒋ ᓇᑯᒥᑎᐏᐣ ᑲᑭᐏᒋᐘᑲᓇᐁᐨ ᐅᑭᒪᐏᐣ ᐅᐦᐅᒪ ᑲᓇᑕ.
• (b) ᔓᓂᔭᐣ ᑲᐸᑭᑎᓇᐨ ᐅᑭᒪᐏᐣ ᐅᐦᐅᒪ ᑲᓇᑕ ᐃᐦᐃᐍ ᑲᐃᓇᐸᒋᐦᐊᑲᓀᐨ ᐊᓄᑭᐏᓇᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ;
• (c) ᒋᑭᑐᑕᒧᐘᐨ ᑫᑯᓇᐣ ᐃᑭᐍᓂᐘᐠ ᐅᑭᒪᐏᐣ ᑲᓇᑕ ᐅᑕᔓᑕᒪᐏᓇᐣ ᐅᐣᒋ ᐅᐍ ᐃᓇᑯᓂᑫᐏᐣ; ᑲᔦᒪ
• (d) ᕕᒪᒋᐊᓄᑭᒪᑲᑭᐣ ᐃᓂᐍᓂᐘᐣ ᐅᑭᒪᐏᐣ ᐅᒪ ᑲᓇᑕ ᐅᑐᓇᒋᑫᐏᓇᐣ ᒦᓇ ᐱᒥᐏᒋᑫᐏᓇᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ.

Note marginale : ᒋᓇᑲᒋᒋᑲᑌᑭᐣ ᑲᓄᒋᑫᐏᓇᐣ

• 27 (1) ᐊᐦᐊᐍ ᒪᒥᓄᒋᑫ ᐅᑲᑐᑕᐣ ᒋᓇᑲᒋᑐᐨ ᒪᐣᓯᓭᐏᐣ ᐃᑭᑐᐏᐣ, ᐁᑭᐊᑐᐨ ᐃᑭᐍᓂᐘᐠ ᐊᓂᔑᓂᓂᐤ ᐅᑭᒪᐏᐣ ᑲᔦᒪ ᐊᓂᔑᓂᓂᐤ ᐅᑭᒪᐏᐣ ᐱᒥᐏᒋᑫᐏᐣ, ᑲᔦᒪ ᐊᓂᔑᓂᓂᐤ ᐱᒥᐏᒋᑫᐏᐣ ᑲᔦᒪ ᐊᓂᔑᓂᓂᐤ, ᐃᓂᐍᓂᐘᐣ ᐅᐣᒋ ᐃᓯᓭᐏᓇᐣ ᑲᒪᐣᓯᓇᐦᐃᑲᑌᑭᐣ ᐃᐦᐃᒪ ᐏᐣᑕᒪᑫᐃᓂᐠ 26(a) ᐊᑯᓇᐠ (d).

• Note marginale : ᑎᐸᒋᒧᐏᐣ

  (2) ᐃᓑᑿ ᓇᓇᑲᒋᒋᑫᐨ, ᐊᐦᐊᐍ ᑲᒥᓄᒋᑫᐨ ᐅᑲᐅᓇᐣᓯᓇᐦᐊᐣ ᐅᑎᐸᒋᒧᐏᐣ ᒋᐊᑌᑭᐣ ᐃᓂᐍᓂᐘᐣ ᐃᑭᑐᐏᓇᐣ ᑲᐃᓀᐣᑕᐣᐠ ᐊᐦᐊᐍ ᑲᒥᓄᒋᑫᐨ ᑫᐃᓯᓭᐠ ᑲᐃᓀᐣᑕᐣᐠ.

Note marginale : ᑌᐱᓭᐏᐣ, ᒥᓂᑯᐏᓇᐣ, ᒪᓑᑲᐏᓰᐏᓇᐣ ᒦᓇ ᑭᐸᑭᑎᓂᑯᐏᓇᐣ

28 ᐃᐦᐃᐍ ᐅᔑᐲᐦᐃᑫᐏᑲᒥᐠ ᐅᑕᔭᓇᐘ ᐊᓄᑭᓇᑲᓇᐣ, ᒥᓂᑯᐏᓇᐣ, ᒪᓑᑲᐏᓯᐏᓇᐣ ᒦᓇ ᐅᒥᓂᑯᐏᓂᐘ ᑐᑲᐣ ᐊᐑᔭ, ᐃᓂᐍᓂᐘᐣ ᑲᔦ ᒋᑲᓑᑭᑕᒪᑫᐨ

• (a) ᒋᒪᐣᓯᓇᐦᐊᐣᑭᐣ ᐃᓂᐍᓂᐘᐣ ᔓᓂᔭᐏ ᓇᑯᒥᑎᐏᓇᐣ;
• (b) ᒋᑌᐱᓇᐣᐠ, ᒋᑭᒋᐏᓇᐣᐠ ᒥᓇ ᒋᐍᐱᓇᐣᐠ ᑫᑯᓇᐣ ᑲᑎᐯᐣᒋᑲᑌᑭᐣ ᑲᔦᒪ ᐁᐸᑯᓭᐣᑕᐣᐠ ᑲᔦᒪ ᐁᑎᐯᐣᒋᑫᐨ ᑫᑯᓇᐣ, ᑲᔦᒪ ᐁᐱᒥᑎᐸᐦᐊᐣᑭᐣ ᑫᑯᓇᐣ; ᒥᓇ
• (c) ᒋᑎᐸᑯᓂᑫᐨ ᒥᓇ ᒋᑎᐸᑯᓇᑲᓀᐨ.

Note marginale : ᐊᓄᓂᐍᐏᓇᐣ

29 ᐊᐦᐊᐍ ᑲᒥᓄᒋᑫᐨ ᐅᑲᓄᓇᐣ ᐃᓂᐍᓂᐘᐣ ᑲᒥᓄᒋᑫᐨ ᐅᒪᓑᑲᐏᓰᐏᓇᐣ, ᐅᑕᓄᑮᐏᓇᐣ ᒥᓇ ᐅᑐᒋᑫᐏᓇᐣ ᐅᒪ ᐅᐣᒋ ᐃᓇᑯᓂᑫᐏᓂᐣᐠ ᐃᓂᐍᓂᐘᐣ ᐊᐲᑕᒪᑫᐣ ᑲᔦᒪ ᐊᓄᑮᓇᑲᓇᐣ ᐃᐦᐃᒪ ᐅᓯᐲᐦᐃᑫᐏᑲᒥᑯᐣᐠ, ᐃᓂᐍᓂᐘᐣ ᒋᓇᑐᒋᐣ ᐅᑕᓄᓂᐍᐏᐣ ᐊᐦᐊᐍ ᑲᒪᒥᓄᒋᑫᐨ ᒋᓇᑐᐨ.

Note marginale : ᐁᐊᑯᑌᐠ ᑭᒪᓂᐱᓂᑯᐏᐣ

30 ᑲᐏᐣ ᑫᑯᐣ ᑐᑕᒧᐏᐣ ᑲᔦᒪ ᑯᑕᐠ ᐃᔑᒋᑫᐏᐣ ᐊᔭᓯᓅᐣᒋ ᑲᒪᒥᓄᒋᑫᐨ, ᐊᐲᑕᒪᑫ, ᐊᓄᑮᓇᑲᐣ ᐃᐦᐃᒪ ᐅᔑᐲᐦᐃᑫᐏᑲᒥᑯᐣᐠ ᑲᔦᒪ ᐊᐏᔭ ᑲᐃᓇᓄᑭᑕᒪᑫᐨ ᐃᐦᐃᒪ ᐅᔑᐲᐦᐃᑫᐏᑲᒥᑯᐣᐠ ᑫᑯᐣ ᒋᑭᑐᒋᑲᑌᐠ, ᑲᔦᒪ ᐁᑲ ᑫᑯᐣ ᒋᑭᑐᒋᑲᑌᐠ, ᐃᐦᐃᐍ ᒋᑭᑐᑕᐣᐠ ᑲᔦᒪ ᑲᐃᓀᐣᒋᑲᑌᐠ ᒋᑭᑐᑕᐣᐠ ᐃᐦᐃᐍ ᑲᐃᔑ ᒥᓄᓭᐠ ᒪᓑᑲᐏᓯᐏᐣ, ᑲᔦᒪ ᐃᐦᐃᐍ ᑲᐃᔑᒋᑫᐨ ᑲᔦᒪ ᑲᐃᓀᐣᒋᐊᐠᑌᐠ ᑲᐃᔑᒋᑫᐨ ᐁᒥᓄᓭᓂᐠ ᐅᑕᓄᑮᐏᐣ ᑲᔦᒪ ᐅᑐᑕᒧᐏᐣ, ᐊᐦᐊᐍ ᐊᐑᔭ ᐅᐣᒋ ᐅᐦᐅᒪ ᐃᓇᑯᓂᑫᐏᓂᐣᐠ.

ᔓᓂᔭ ᐱᒥᐏᒋᑫᐏᐣ

Note marginale : ᐁᐃᓇᑌᐠ ᐊᐦᑮᐏᐣ

31 ᐃᐦᐃᐍ ᐅᔑᐲᐦᐃᑫᐏᑲᒥᐠ ᔓᓂᔭᐏ ᐊᐨᑭᐏᐣ ᑕᐅᐣᒋᒪᒋᑕᒪᑲᐣ ᓂᑭᐲᓯᒼ 1 ᐃᐦᐃᐍ ᐯᔑᑯᐊᐦᑭᐏᐣ ᑫᐃᔑ ᐃᓑᑿᓭᐠ ᒥᐣᑭᓯᐏᐲᓯᒼ 31 ᒥᓇ ᐊᐦᑭᐘᐠ.

Note marginale : ᑫᐃᓇᑌᐠ ᒣᑎᓂᑫᐏᐣ ᑲᑌᐱᓇᑲᓀᐨ ᔓᓂᔭ

32 ᐃᓂᐍᓂᐘᐣ ᑫᓂᐅᓇᒋᑲᑌᑭᐣ ᒋᓇᑲᒋᒋᑲᑌᐠ ᐊᐦᐊᐍ ᔓᓂᔭᐣ ᑲᐱᒥᓇᑲᒋᐦᐊᐨ ᑫᐃᓇᒋᑫᐨ ᒋᑲᓇᐘᐸᐣᒋᑲᑌᑭᐣ, ᐊᐦᐊᐍ ᐅᔑᐱᐦᐃᑫᐏᑲᒥᐠ ᑕᐃᔑᒣᑎᓂᑫ, ᐃᐦᐃᐍ ᑲᐃᔑ ᐊᓄᓇᑲᓀᐘᐨ ᒋᓇᓄᑮᐘᐨ, ᒣᑿ ᐃᐦᐃᐍ ᔓᓃᔭᐏᐊᐦᑮᐘᐠ ᑲᔦᒪ ᑯᑕ ᐊᐦᑮᐏᐣ ᓂᑲᐣ, ᐃᓂᐍᓂᐘᐣ ᔓᓂᔭᐣ ᑲᑌᐱᓇᐨ ᐃᐦᐃᐍ ᑲ ᐊᐦᑭᐘᐠ ᒣᑿ ᐁᐱᒥᑐᑕᒧᐘᐨ ᐅᑕᓄᑮᐏᓂᐘ.

Note marginale : ᒪᒋᑕᒪᓱᐏᐣ ᐅᓇᒋᑫᐏᐣ ᒦᓇ ᑲᐃᓇᐱᑭᓂᑫᒪᑲᐠ

• 33 (1) ᐃᐦᐃᐍ ᐅᔑᐲᐦᐃᑫᐏᑲᒥᐠ ᒋᐅᓇᒋᑫᐘᐨ ᒪᒋᑕᐏᐣ ᐅᐊᒋᑫᐏᐣ ᒥᓇ ᑫᐃᓇᐱᑭᓂᑫᐘᐨ ᐃᐦᐃᐍ ᐯᔑᑯ ᐊᐦᑭᐏᐣ ᒥᓇ ᒋᒥᓇᐘ ᐃᓂᐍᓂᐘᐣ ᐅᑭᒪᐣ.

• Note marginale : ᑫᐃᓇᑌᐠ ᒥᓇ ᐁᑯᓀᓇᐣ ᑫᐊᑌᑭᐣ ᐃᐦᐃᒪ ᒪᒋᑕᐏᐣ ᐅᓇᒋᑫᐏᓂᐠ

  (2) ᐃᐦᐃᐍ ᐅᔑᐲᐦᐃᑫᐏᑲᒥᐠ ᒪᒋᑕᐏᐣ ᐅᓇᒋᑫᐏᐣ ᑲᑭᓇ ᒋᐑᐣᒋᑲᑌᑭᐣ ᐃᓂᐍᓂᐘᐣ ᐅᔑᐲᐦᐃᑫᐏᑲᒥᐠ ᐅᑐᑕᒧᐏᓂᐘ ᒥᓇ ᒋᐊᑌᐠ ᐃᑭᑐᐏᐣ ᐅᐣᒋ

  • (a) ᐅᔑᐲᐦᐃᑫᐏᑲᒥᐠ ᐅᑕᓄᓂᑯᐏᐣ;
  • (b) ᐅᔑᐲᐦᐃᑫᐏᑲᒥᐠ ᑲᑲᑵᑌᐱᓇᒧᐘᐨ ᐯᔑᑯᐊᐦᑭᐏᐣ ᒥᓇ ᑫᐅᐣᒋ ᑭᑫᐣᑕᒧᐘᐨ ᐁᐱᑕᓄᑮᐘᐨ ᑲᑲᑵᑌᐱᓇᒧᐘᐨ ᐊᓄᑮᐏᓇᐣ; ᒥᓇ
  • (c) ᐅᔑᐲᐦᐃᑫᐏᑲᒥᐠ ᑲᐃᓀᐣᑕᒧᐘᐨ ᑫᐲᑕᓄᑮᐘᐨ ᐅᐣᒋ ᐯᔑᑯᐊᐦᑭᐏᐣ,

• Note marginale : ᑲᐃᓇᑌᑭᐣ ᒣᑎᓂᑫᐏᓇᐣ

  (3) ᐅᔑᐲᐦᐃᑫᐏᑲᒥᐠ ᑫᐃᓇᐱᑭᓂᑫᐨ ᒋᐊᒋᑲᑌᐠ ᐃᑭᑐᐏᐣ ᐅᐣᒋ ᐅᔑᐲᐦᐃᑫᐏᑲᒥᐠ ᑫᐅᐣᑎᓇᐨ ᒦᓇ ᑫᐃᔑᒣᑎᓂᑫᐨ ᔓᓂᔭᓇᐣ ᐯᔑᑯᐊᐦᑭᐏᐣ.

• Note marginale : ᑐᑕᒧᐏᓇᐣ ᒋᓇᐸᐸᐣᒋᑲᑌᑭᐣ ᐅᐣᒋ ᒪᒋᑕᐏᐣ ᐅᓇᒋᑫᐏᐣ

  (4) ᐅᔑᐲᐦᐃᑫᐏᑲᒥᐠ ᒋᒪᒋᐏᑐᐘᐨ ᐅᑐᑕᒧᐏᓂᐘ ᑲᑭᒪᐣᓯᓇᐦᐊᒧᐘᐨ ᐃᐦᐃᐍ ᐯᔑᑯᐊᐦᑭᐏᐣ ᒋᓇᒋᑲᑌᐠ ᑲᑭᓇᐣᓯᓇᐦᐃᑲᑌᐠ ᐃᐦᐃᐍ ᒪᒋᑕᐏᐣ ᐅᓇᒋᑫᐏᐣ ᐯᔑᑯᐊᐦᑭ.

Note marginale : ᔓᓂᔭ ᒪᐣᓯᓇᐦᐃᑲᓇᐣ ᒦᓇ ᐲᐘᐱᑯ ᐊᐸ ᒋᒋᑲᓇᐣ

• 34 (1) ᐅᔑᐲᐦᐃᑫᐏᑲᒥᐠ ᐅᑲᑲᓇᐍᐣᑕᓇᐘ ᒪᐣᓯᓇᐦᐃᑲᓇᐣ ᑲᐃᔑ ᒪᐣᓯᓇᐦᐘᑲᓀᐨ ᔓᓂᔭ ᒥᓇ ᒋᑲᓇᐍᐣᑕᒧᐘᐨ ᒥᓇ ᒋᐱᒥᐏᒋᑫᐘᐨ ᔓᓂᔭ ᒥᓇ ᐸᒥᒋᑫᐏᐣ ᐃᓇᒋᑫᐏᓇᐣ ᒥᓇ ᐏᐣᑕᒪᑫᐏᐣ ᐲᐘᐱᑯᐣ.

• Note marginale : ᑲᐃᔑ ᓇᐣᑕᐍᐣᑕᑯᑭᐣ

  (2) ᐃᓂᐍᓂᐘᐣ ᒪᐣᓯᓇᐦᐃᑲᓇᐣ, ᓴᑲᑭᐲᐦᐃᑲᓇᐣ ᒦᓇ ᐲᐘᐱᑯᐣ ᑲᐑᐣᒋᑲᑌᑭᐣ ᐃᐦᐃᒪ ᐸᑫᐱᐦᐃᑲᓂᐠ (1) ᒋᑲᓇᐍᐣᒋᑲᑌᑭᐣ ᒦᓇ ᒋᐸᒥᓂᑲᑌᑭᐣ ᑲᐃᓀᐣᑕᑯᐠ ᒋᑐᒋᑲᑌᑭᐣ ᒋᐅᐣᒋ ᑭᑫᐣᒋᑲᑌᐠ ᐁᒥᓄᓭᑭᐣ ᐃᓂᐍᓂᐘᐣ

  • (a) ᐅᔑᐲᐦᐃᑫᐏᑲᒥᑯᐣᐠ ᑲᐅᐣᒋ ᑎᐯᐣᑕᑯᑭᐣ ᐁᑲᓇᐍᐣᒋᑲᑌᑭᐣ ᒦᓇ ᐁᐸᒥᓂᑲᑌᑭᐣ;
  • (b) ᐃᓂᐍᓂᐘᐣ ᒣᑎᓂᑫᐏᓇᐣ ᐁᑐᒋᑲᑌᑭᐣ ᑲᐃᓇᐣᓯᓇᐦᐃᑲᑌᐠ ᐃᐦᐃᒪ ᐃᓇᑯᓂᑫᐏᓂᐠ;
  • (c) ᔓᓂᔭᐏᓇᐣ, ᐊᓄᑭᓇᑲᓇᐠ ᒥᓇ ᑲᑭᓇ ᐊᐸᒋᒋᑲᓇᐣ ᑿᔭᐠ ᐁᐸᒥᓂᑲᑌᑭᐣ ᐁᑲ ᒋᑭᒋᒣᑎᓂᑲᓂᐘᐠ ᒥᓇ ᑿᔾᐠ ᒋᓯᓭᑭᐣ; ᒥᓇ
  • (d) ᐅᑐᑕᒧᐏᓂᐘ ᐁᑐᒋᑲᑌᑭᐣ ᑿᔭᐠ ᒋᓯᓭᑭᐣ.

• Note marginale : ᐱᐣᑎᑲᒥᐠ ᓴᑲᑭᐲᐦᐃᑫᐏᐣ

  (3) ᐅᔑᐱᐦᐃᑫᐏᑲᒥᐠ ᒋᑭᑐᑕᒧᐘᐨ ᐱᐣᑎᑲᒥᐠ ᓴᑲᑭᐣᒋᑫᐏᓇᐣ ᒋᑭᑐᒋᑲᑌᑭᐣ ᒋᐅᐣᒋᑭᑫᐣᒋᑲᑌᐠ ᐅᔑᐱᐦᐃᑫᐏᑲᒥᐠ ᒣᑎᓂᑫᐏᓇᐣ ᒥᓇ ᑐᑕᒧᐏᓇᐣ ᒋᐅᐣᒋ ᑭᑫᐣᒋᑲᑌᐠ ᐁᓇᐸᐸᐣᒋᑲᑌᑭᐣ ᐃᐦᐃᒪ ᑲᐃᓇᒋᑲᑌᐠ ᐸᑫᐲᐦᐃᑲᓂᐠ (1) ᒥᓇ (2).

• Note marginale : ᔓᓂᔭ ᓴᑲᑭᐣᒋᑫᐏᐣ ᐃᑭᑐᐏᓇᐣ

  (4) ᐅᔑᐲᐦᐃᑫᐏᑲᒥᐠ ᒋᐅᓇᑐᐘᐨ ᔓᓂᔭᐏ ᑎᐸᑭᐣᒋᑫᐏᓇᐣ ᐯᔑᑯᐊᐦᑭᐏᐣ, ᐃᐦᐃᐍ ᑲᐃᓇᒋᑲᑌᐠ ᓴᑲᑭᐣᒋᑫᐏᐣ ᑲᐱᒥᓂᐣᔕᐦᐃᑲᑌᑭᐣ.

• Note marginale : ᔕᑲᓑᑭᓀᐲᐦᐃᑲᐣ ᐅᐣᒋ ᔓᓂᔭ ᓴᑲᑭᐣᒋᑫᐏᐣ ᐃᑭᑐᐏᓇᐣ

  (5) ᐅᔑᐲᐦᐃᑫᐏᑲᒥᐠ ᔓᓂᔭᐏ ᓴᑲᑭᐣᒋᑫᐏᓇᐣ ᒋᐅᓇᒋᑲᑌᑭᐣ ᐃᐦᐃᒪ ᓴᑲᑭᐲᐦᐃᑫᐏᓂᐠ ᑲᐃᓇᑌᐠ ᐏᐣᑕᒪᑫᐏᐣ ᒋᓇᒋᑲᑌᑭ ᐃᓂᐍᓂᐘᐣ ᐅᐣᒋ ᒪᔭᒼ ᐃᓇᓄᑮᐏᓇᐣ.

Note marginale : ᐯᔑᑯᐊᐦᑭ ᔓᓂᔭ ᓴᑲᑭᐣᒋᑫ ᐅᑎᐸᒋᒧᐏᐣ

• 35 (1) ᐅᔑᐲᐦᐃᑫᐏᑲᒥᐠ ᒋᑐᑕᐣᑭᐣ ᐃᓂᐍᓂᐘᐣ ᑲᓴᑲᑭᐣᒋᑫᐨ ᐅᑎᐸᒋᒧᐏᐣ ᒋᐅᓇᒋᑲᑌᑭᐣ ᐃᓂᐍᓂᐘᐣ ᔓᓂᔭᐏ ᑎᐸᒋᒧᐏᓇᐣ ᒥᓇ ᒋᒥᓯᐍ ᑎᐸᒋᒪᑲᓀᐨ ᔓᓂᔭ ᑲ ᐊᐸᒋᐦᐊᑲᓀᐨ ᑫᓴᑲᑭᑭᒪᑲᓀᐨ ᐃᐣᐦᐃᒪ ᑲᐃᓇᑌᐠ ᐸᑫᐱᐦᐃᑲᓂᐠ (3).

• Note marginale : ᑫᐊᑌᑭᐣ

  (2) ᐃᐦᐃᐍ ᑎᐸᒋᒧᐏᐣ, ᑯᑕᑭᔭᐣ ᒦᓇ ᑫᑯᓇᐣ,

  • (a) ᒋᐊᑌᑭᐣ ᐯᐸᑲᐣ ᐃᑭᑐᐏᓇᐣ ᐃᐦᐃᐍ ᐅᐣᒋ ᑲᐃᓀᐣᑕᐣᐠ ᐊᐦᐊᐍ ᑲᓴᑲᑭᐲᐦᐃᑫᐨ
    • (i) ᐃᓂᐍᓂᐘᐣ ᔓᓂᔭᐏ ᓴᑲᑭᐲᐦᐃᑲᓇᐣ ᐁᐸᑭᑎᓂᑲᑌᑭᐣ ᑿᔭᐠ, ᑲᐃᓇᑌᐠ ᔓᓂᔭᐏ ᑎᐸᒋᒧᐏᓇᐣ, ᒋᐅᐣᒋ ᑭᑫᐣᒋᑲᑌᐠ ᑲᑭᓇᓄᑮᓇᓂᐘᐣᐠ ᐅᑕᓇᐣᐠ ᐊᐦᑭᐏᐣ,
    • (ii) ᒪᒪᐤ ᑎᐸᒋᒧᐏᐣ ᑿᔭᐠ ᐁᐃᑭᑐᒪᑲᐠ ᑲᑭᓇ ᑫᑯᐣ ᑲᐃᔑᒥᑭᑲᑌᐠ ᒥᓇ, ᑭᓑᐱᐣ ᐃᓯᓭᐠ, ᐁᑭ ᐃᔑᑭᑫᐣᒋᑲᑌᐠ ᐃᓇᓄᑭᐏᓇᐣ ᐅᑕᓇᐣᐠ ᐊᐦᑭᐏᐣ, ᒥᓇ
    • (iii) ᐅᔑᐲᐦᐃᑫᐏᑲᒥᐠ ᐅᒣᑎᓂᑫᐏᓇᐣ ᑲᑭᐘᐸᐣᑕᑭᐣ ᐊᐦᐊᐍ ᑲ ᓴᑲᑭᐲᐦᐃᑫᐨ ᑲᑭᓇᑲᒋᑐᐨ ᒋᔑᐸᑭᑎᓇᐣᐠ ᐅᑎᐸᒋᒧᐏᓂᐠ ᐁᑭᑐᒋᑲᑌᐠ ᑲᐃᓇᒋᑲᓂᐘᐣᐠ ᐅᐦᐅᒪ ᐃᓇᑯᓂᑫᐏᐣ; ᒥᓇ
  • (b) ᒋᑲᓄᒋᑲᑌᐠ ᑯᑕᑮᔭᐣ ᑲᐃᓯᓭᑭᐣ ᑲᐃᔑᐊᑌᑭᐣ ᐃᓂᐍᓂᐘᐣ ᓇᑲᒋᒋᑫᐏᓇᐣ ᐅᐣᒋ ᑲᓴᑲᑭᐲᐦᐃᑫᐨ ᒋᓇᑲᒋᒋᑫᐨ ᐅᐣᒋ ᐅᑎᐸᒋᒧᐏᐣ, ᑲᐃᓀᐣᑕᐣᐠ ᑲᓴᑲᑭᐲᐦᐃᑫᐨ, ᒋᐊᓂ ᐑᐣᑕᒪᐘᑲᓀᐨ ᐊᐦᐊᐍ ᑲᐃᔑᐊᐱᐨ ᐅᑭᒪ.

• Note marginale : ᓴᑲᑭᐣᒋᑲᐣ ᐅᐣᒋ ᑲᒪᒪᐏᓭᑭᐣ ᐑᐣᑕᒪᑫᐏᓇᐣ

  (3) ᐊᐦᐊᐍ ᐅᑭᒪ ᐅᑲᓇᐣᑕᐍᐣᑕᐣ ᐃᓂᐍᓂᐘᐣ ᑲᑲᒪᒪᐏᓭᑭᐣ ᐑᐣᑕᒪᑫᐏᓇᐣ ᐅᐣᒋ ᐃᐦᐃᐍ ᐁᓇᐣᑕᐍᐣᑕᑯᐠ ᐃᐦᐃᒪ ᑎᐸᒋᒧᐏᓂᐠ ᑲᐃᓇᑌᐠ ᐃᐦᐃᒪ ᐅᔑᐲᐦᐃᑲᓂᐠ (2)(a) ᒋᓴᑲᑭᐲᐦᐃᑲᑌᐠ.

• Note marginale : ᐁᒥᓇᑲᓀᐨ ᐊᐦᐊᐍ ᐅᑭᒪ

  (4) ᐅᔑᐲᐦᐃᑫᐏᑲᒥᐠ ᐃᓯᓭᓂ ᒋᒥᓇᐨ ᐅᑭᒪᐣ ᐃᓂᐍᓂᐘᐣ ᑲᓴᑲᑭᐲᐦᐃᑲᑌᑭᐣ ᔓᓂᔭ ᑎᐸᒋᒧᐏᓇᐣ ᐃᐦᐃᐍ ᐯᔑᑯᐊᐦᑭᐏᐣ ᐅᐣᒋ 90 ᑕᓱᑮᔑᑲ ᐃᓑᑿᓭᐠ ᔓᓃᔭ ᐊᐦᑮᐏᐣ.

Note marginale : ᐃᓯᓭᐏᓇᐣ ᓇᑲᒋᒋᑲᑌᑭᐣ

• 36 (1) ᐊᓇᐲ ᑕᐃᔑᓇᐣᑕᐍᐣᑕᑯᐣ ᐊᐦᐊᐍ ᐅᑭᒪ, ᐅᔑᐲᐦᐃᑫᐏᑲᒥᐠ ᑕᐃᓯᓭᓂ ᒋᓇᓇᑲᒋᒋᑲᑌᑭᐣ ᒋᑐᒋᑲᑌᐠ ᐅᐣᒋ ᐃᓂᐍᓂᐘᐣ ᒣᑎᓂᑫᐏᓇᐣ ᒥᓇ ᑐᑕᒧᐏᓇᐣ ᒋᐅᐣᒋ ᑭᑫᐣᒋᑲᑌᐠ ᐃᓂᐍᓂᐘᐣ ᒪᐣᓯᓇᐦᐃᑲᓇᐣ, ᓴᑲᑭᐣᒋᑫᐏᓇᐣ ᒥᓇ ᑲᑐᒋᑲᑌᐠ ᐃᐦᐃᒪ ᑲᐃᔑ ᐑᐣᒋᑲᑌᐠ ᐸᑫᐲᐦᐃᑲᓂᐠ 34 ᐅᐣᒋ, ᐃᐦᐃᐍ ᒥᓂᑯᐠ ᑲᐃᓯᓭᐠ ᒋᔑᓇᑲᒋᒋᑲᓌᐠ, ᐁᑭᑐᒋᑲᑌᐠ ᑲᐃᔑ ᓇᐣᑕᐍᐣᑕᑯᐠ ᒋᔑᐱᒥᐏᒋᑲᓂᐘᐣᐠ ᐃᐦᐃᒪ ᐸᑫᐲᐦᐃᑲᓂᐠ.

• Note marginale : ᑲᑭᓇᓇᑲᒋᒋᑫᐨ

  (2) ᐃᐦᐃᐍ ᑲᐅᓇᑭᐣᑌᐠ ᓇᑲᒋᒋᑫᐏᐣ ᒋᑐᒋᑲᑌᐠ ᐊᐦᐊᐍ ᐅᔑᐲᐦᐃᑫᐏᐣ ᑲᓴᑲᑭᐣᒋᑫᐨ. ᔕᑯᐨ, ᑭᓑᐱᐣ, ᐃᓀᐣᑕᐣᐠ ᐅᑭᒪ, ᐊᐑᔭ ᑯᑕᐠ ᐁᑲ ᒋᑐᑕᐣᐠ ᐅᔑᐲᐦᐃᑫᐏᑲᒥᐠ ᑲᓴᑲᑭᐣᒋᑫᐨ ᒋᑭᑐᑕᐣᐠ ᐃᐦᐃᐍᓂ ᓇᑲᒋᒋᑫᐏᐣ, ᐊᐦᐊᐍ ᐅᑭᒪ ᐃᓯᓭᓂ, ᐃᓑᑿ ᐊᔭᒥᐦᐊᐨ ᑲᒪᒥᓄᒋᑫᓂᐨ, ᒋᑭᑐᐨ ᑯᑕᐠ ᑲᓴᑲᑭᐲᐦᐃᑫᐨ ᒋᑐᑕᐣᐠ ᐃᐦᐃᐍᓂ ᓇᑲᒋᒋᑫᐏᐣ ᐁᐃᓇᑭᓱᐨ ᒋᑮᑐᑕᐣᐠ.

• Note marginale : ᐅᓇᒋᑫᐏᐣ

  (3) ᐁᑲ ᒪᔑ ᒪᒋᒋᑲᑌᐠ ᓇᑲᒋᒋᑫᐏᐣ, ᐊᐦᐊᐍ ᑲᓇᓇᑲᒋᒋᑫᐨ ᒋᓇᑲᒋᑐᒋᐣ ᐅᔑᐲᐦᐃᑫᐏᑲᒥᐠ ᐅᒪᐣᓯᓇᐦᐃᑫᐏᓇᐣ ᒥᓇ ᐅᑐᑕᒧᐏᓇᐣ ᑫᓇᑲᒋᒋᑲᑌᑭᐣ ᒥᓇ ᒋᐸᑭᑎᓇᐣᐠ ᐅᑐᓇᒋᑫᐏᐣ ᑫᑐᑕᐣᐠ ᓇᑲᒋᒋᑫᐏᓇᐣ, ᑲᔦ ᐃᐦᐃᐍᓂ ᐅᑎᑭᑐᐏᐣ ᑫᓇᐸᐸᐣᑕᐣᐠ ᒋᐊᒋᑲᑌᑭᐣ ᐃᐦᐃᒪ ᓇᐠᑲᒋᒋᑫᐏᓂᐣᐠ, ᒋᒥᓇᒋᐣ ᐃᓂᐍᓂᐘᐣ ᑲᒪᒥᓄᒋᑫᓂᐨ

• Note marginale : ᒋᐊᐯᓂᒧᓇᓂᐘᐠ ᐅᐣᒋ ᐱᐣᑎᑲᒥᐠ ᓴᑲᑭᐲᐦᐃᑫᐏᐣ

  (4) ᐊᐦᐊᐍ ᑲᐏᓇᑲᒋᒋᑫᐨ, ᒥᓂᑯᐠ ᑫᐃᓯᓭᓂᐠ, ᒋᐊᐯᓂᒧᐨ ᐃᐦᐃᐍᓂ ᐲᐣᑎᑲᒥᐠ ᓴᑲᑭᐣᒋᑫᐏᐣ ᑲᑮᑐᒋᑲᑌᐠ ᐃᐦᐃᒪ ᑲᐃᓇᑌᐠ ᐸᐯᐲᐦᐃᑲᐣ 34(3).

Note marginale : ᑲᑭᓇᓇᑲᒋᒋᑫᐨ ᐃᓯᓭᐏᓇᐣ ᐅᑎᐸᒋᒧᐏᐣ

• 37 (1) ᐊᐦᐊᐍ ᑲᓇᑲᒋᒋᑫᐨ ᐅᑲᑐᑕᐣ, ᐊᐲ ᑭᔑᑐᐨ ᐅᓇᑲᒋᒋᑫᐏᐣ, ᒋᐸᑭᑎᓇᐣᐠ ᐅᑎᐸᒋᒧᐏᐣ ᑲᑮᔑᒥᑭᑫᐨ, ᒥᓇ ᒪᒪᐤ ᑎᐸᒋᒧᐏᐣ, ᒋᒥᓇᐨ ᐅᑭᒪᐣ ᒥᓇ ᑲᒪᒥᓄᒋᑫᐨ.

• Note marginale : ᑫᐊᑌᑭᐣ

  (2) ᑲᓇᑲᒋᒋᑫᐨ ᐅᑎᐸᒋᒧᐏᐣ ᐅᓄᐍᓂᐘᐣ ᒋᐊᑌᑭᐣ

  • (a) ᐃᑭᑐᐏᐣ ᐅᐣᒋ, ᑲᓇᑲᒋᒋᑫᐨ ᐁᐃᓀᐣᑕᐣᐠ, ᐁᓇᑲᒋᒋᑲᑌᐠ ᑲᔦ ᑲᐃᓇᑌᐠ ᐸᑫᐲᐦᐃᑲᐣ 34(2), ᐁᐃᓀᐣᑕᐣᐠ ᐁᑲ ᑫᑯᓇᐣ ᐍᐣᒋᒥᑲᐣ ᒋᒪᐣᓯᓭᑭᐣ ᐃᐦᐃᒪ ᓴᑲᑭᐣᒋᑫᐏᓇᐣ ᒦᓇ ᑐᑕᒧᐏᓇᐣ ᑲᑭᓇᑲᒋᑐᒋᐣ; ᒥᓇ
  • (b) ᐅᑎᑭᑐᐏᐣ ᐊᓂᐣ ᒥᓂᑯᐠ ᐊᐦᐊᐍ ᑲᑭᓇᑲᒋᒋᑫᐨ ᐁᑭᐊᐯᓂᒧᐨ ᐃᐦᐃᐍᓂ ᐲᐣᑎᑲᒥᐠ ᓴᑲᑭᐣᒋᑫᐏᓇᐣ.

• Note marginale : ᒋᑎᐸᒋᒧᓇᓂᐘᐣᐠ ᒪᒪᐤ ᑎᐸᒋᒧᐏᐣ

  (3) ᐅᔑᐲᐦᐃᑫᐏᑲᒥᐠ ᐃᓯᓭᓂ, ᐑᐸᐨ ᐊᓃᓯᓭᐠ ᐊᐦᐊᐍ ᑲᒪᒥᓄᒋᑫᐨ ᑲᑭᑌᐱᓇᐣᐠ ᐃᐦᐃᐍᓂ ᑎᐸᒋᒧᐏᐣ, ᒋᐊᑯᑲᑐᐨ ᐃᐦᐃᐍᓂ ᒪᒪᐤ ᑎᐸᒋᒧᐏᐣ ᑲᐃᔑᐊᑌᓂᐠ ᐲᐘᐱᑯᐣᐠ.

Note marginale : ᑎᐸᒋᒧᐏᓇᐣ ᒋᐏᐣᑕᒪᐘᑲᓀᐨ ᑲᓇᑕ ᔓᓃᔭᐣ ᑲᓇᑲᒋᐦᐊᐨ

38 ᐅᔑᐱᐦᐃᑫᐏᑲᒥᐠ ᑲᓴᑲᑭᐲᐦᐃᑫᐨ ᑲᔦᒪ ᑲᑭᓇᑲᒋᒋᑫᐨ ᐊᐱ ᐃᓯᓭᑭᐣ ᒋᑲᑵᒋᒪᐘᐨ ᐃᓂᐍᓂᐘᐣ ᑲᓴᑲᑭᐣᒋᑫᐨ ᐅᑭᒪᐏᐣ ᐅᒪ ᑲᓇᑕ ᑫᑯᓇᐣ ᐅᐣᒋ ᓴᑲᑭᐣᒋᑫᐏᐣ ᑲᔦᒪ ᑲᑭᓇᑲᒋᒋᑲᓂᐘᐣᐠ.

Note marginale : ᒥᓂᑯᐏᐣ ᐅᐣᒋ ᑎᐸᒋᒧᐏᓇᐣ

• 39 (1) ᐁᐃᑭᑐᐨ ᐊᐦᐊᐍ ᐅᔑᐲᐦᐃᑫᐏᑲᒥᐠ ᑲᓴᑲᑭᐣᒋᑫᐨ ᑲᔦᒪ ᑲᑭᓇᑲᒋᒋᑫᐨ, ᓄᑯᒼ ᑲᔦᒪ ᐅᑕᓇᐣᐠ ᑲᑭᒪᒥᓄᒋᑫᐨ, ᐊᐱᑕᒪᑫᐠ ᑲᔦᒪ ᐊᓄᑭᓇᑲᓇᐠ ᐅᐣᒋ ᐅᔑᐲᐦᐃᑫᐏᑲᒥᑯᐣᐠ ᑲᐃᔑᐑᐣᒋᑲᑌᑭᐣ, ᐯᐸᓄᐣ, ᒪᐣᓯᓇᐦᐃᑲᓇᐣ, ᐊᒋᑫᐏᓇᐣ ᒦᓇ ᔓᓂᔭᐏᐯᐸᓄᐣ ᑲᑭᐱᒥᐏᑐᐘᒋᐣ, ᐊᐦᐊᐍ ᑲᓴᑲᑭᐣᒋᑫᐨ ᑲᔦᒪ ᑲᓇᑲᒋᒋᑫᐨ ᐁᓇᐣᑕᐍᐣᑕᒧᐘᐨ ᒋᑭᑎᐸᒋᒧᐨ ᑲᐃᔑᓇᐣᑕᐍᐣᑕᑯᐠ ᐅᒪ ᐃᓇᑯᓂᑫᐏᐣ.

• Note marginale : ᐁᐃᓯᓭᐠ ᒋᐏᐣᒋᑲᑌᐠ

  (2) ᑭᓑᐱᐣ ᐅᔑᐱᐦᐃᑫᐏᑲᒥᐠ ᓄᑯᒼ ᑲᔦᒪ ᐅᑕᓇᐣᐠ ᑲᑭᒪᒥᓄᓂᑫᐨ, ᐊᐱᑕᒪᑫᐏᓂᓂᐘᐠ ᑲᔦᒪ ᐊᓄᑭᓇᑲᓇᐠ ᐁᑲ ᐁᔭᔭᐘᐨ ᐑᐣᑕᒪᑫᐏᓇᐣ ᑲᔦᒪ ᒋᑭᐏᐣᑕᒧᐘᐨ ᑲᑲᑵᒋᒪᑲᓀᐘᐨ ᐅᐣᒋ ᑲᓴᑲᑭᐲᐦᐃᑫᐨ ᑲᔦᒪ ᑲᓇᑲᒋᒋᑫᐨ ᐃᐦᐃᒪ ᑲᐃᓇᑌᐣ ᐸᑫᐲᐦᐃᑲᓂᐠ (1), ᐅᔑᐲᐦᐃᑫᐏᑲᒥᐠ ᓄᑯᒼ ᑲᒪᒥᓄᒋᑫᐨ ᑲᔦᒪ ᐊᐱᑕᒪᑫᐠ ᐃᓯᓭᓂ ᒋᑌᐱᓇᒧᐘᐨ ᐑᐣᑕᒪᑫᐏᓇᐣ ᑲᔦᒪ ᐑᐣᑕᒪᑫᐏᐣ ᒥᓇ ᒋᒥᓇᐨ ᑲᓴᑲᑭᐲᐦᐃᑫᓂᐨ ᑲᔦᒪ ᑲᓇᑲᒋᒋᑫᐨ.

Note marginale : ᐁᑭᒋᐏᓂᑲᑌᐠ

40 ᑲᐏᐣ ᑫᑯᐣ ᐃᐦᐃᒪ ᐸᑫᐲᐦᐃᑲᓂᐠ 34 ᐊᑯᓇᐠ 39 ᒋᓀᐣᒋᑲᑌᐠ ᐁᒥᓇᑲᓀᐨ ᒪᓑᑲᐏᓯᓹᐣ ᐊᐦᐊᐍ ᐅᔑᐲᐦᐃᑫᐏᑲᒥᐠ ᓴᑲᑭᐣᒋᑫᐏᓂᓂ ᑲᔦᒪ ᑲᓇᑲᒋᒋᑫᐨ ᒋᑭᐏᐣᒋᑲᑌᐠ ᑲᐃᓀᐣᒋᑲᑌᐠ ᐁᓇᑌᐠ ᐅᐣᒋ ᐃᓂᐍᓂᐘᐣ ᐃᓇᑯᓂᑫᐏᓀᐣᓴᐣ, ᐃᓂᐍᓂᐘᐣ ᑲᔦ ᑲᐃᓯᓭᓂᐠ ᐅᔑᐲᐦᐃᑫᐏᑲᒥᐠ ᐅᑕᓄᑮᐏᐣ ᑲᔦᒪ ᐃᓇᑯᓂᑫᐏᓀᐣᓴᐣ ᑲᐃᓇᑌᑭᐣ ᐅᐣᒋ ᐅᔑᐲᐦᐃᑫᐏᑲᒥᐠ.

Note marginale : ᐁᐃᓯᓭᐠ ᒋᒦᓂᑯᔭᐣ

41 ᒋᐏᐣᒋᑲᑌᐠ ᑲᔦᒪ ᒋᒪᐣᓯᓇᐦᐃᑲᑌᐠ ᐃᑭᑐᐏᐣ ᑲᔦᒪ ᑎᐸᒋᒧᐏᐣ ᑲᑐᒋᑲᑌᐠ ᑲᐃᓇᑌᐠ ᐃᓇᑯᓂᑫᐏᐣ ᐊᐦᐊᐍ ᐅᐣᒋ ᐅᔑᐲᐦᐃᑫᐏᑲᒥᐠ ᑲᓴᑲᑭᐣᒋᑫᐨ ᑲᔦᒪ ᑲᓇᑲᒋᒋᑫᐨ ᐅᑕᔭᓇᐘ ᐃᐦᐃᐍᓂ ᓇᑲᒋᐏᐣ ᐃᓯᓭᐏᓇᐣ.

Note marginale : ᐁᐸᑭᑎᓂᑲᑌᐠ ᐅᐣᒋ ᑫᑯᓇᐣ ᑲᒪᒋᑕᓂᐘᐣᐠ

42 ᐊᐦᐊᐍ ᑲᒪᒥᓄᒋᑫᐨ ᐅᑲᑐᑕᐣ, ᐏᐸᐨ ᐃᓯᓭᓂᐠ, ᒋᐏᐣᑕᒪᐘᐨ ᐅᑭᒪᐣ ᐃᓂᐍᓂᐘᐣ ᔓᓂᔭᐏ ᐱᒥᐏᒋᑫᐏᓇᐣ ᑲᔦᒪ ᑯᑕᑭᔭᐣ ᐃᓯᓭᐏᓇᐣ, ᑲᐃᓀᐣᑕᐣᐠ ᑲᒪᒥᓄᒋᑫᐨ, ᐁᐃᓯᓭᑭᐣ ᐃᓂᐍᓂᐘᐣ ᒋᓇᑭᓑᑲᑌᑭᐣ ᐅᔑᐱᐦᐃᑫᐏᑲᒥᐠ ᒋᑭᑐᑕᒧᐘᐨ ᐅᑕᓄᑮᐏᓂᐘ ᑲᔦᒪ ᒋᑭᑐᑕᐣᐠ ᐅᒪᓑᑲᐏᓯᐏᐣ ᑲᔦᒪ ᒋᑭᑐᑕᐣᑭᐣ ᐅᑕᓄᑭᐏᓇᐣ ᑲᔦ ᐅᑐᑕᒧᐏᓇᐣ, ᐃᐦᐃᐍ ᑲᐃᔑ ᑲᔑᐦᐅᐨ ᑲᔦᒪ ᑲᐃᔑᓇᐣᑕᐍᐣᑕᑯᐠ ᒋᐅᐣᑎᓇᑲᓀᐨ ᑲᐸᑭᑎᓇᑲᓀᐨ ᔓᓂᔭ.

ᐯᔑᑯᐊᐦᑭ ᑎᐸᒋᒧᐏᐣ

Note marginale : ᑲᑕᑯᓯᐣᑭᐣ ᐃᓇᒋᑫᐏᓇᐣ

• 43 (1) ᐅᔑᐲᐦᐃᑫᐏᑲᒥᐠ ᐅᑲᑐᑕᐣ, ᐊᐱ ᐃᓯᓭᐠ ᓂᐅᐲᓯᒼ ᐃᓑᑿ ᔓᓂᔭ ᐱᒥᐏᒋᑫᐏᐣ ᐊᐦᑭᐏᐣ, ᒋᒥᓇᐨ ᑎᐸᒋᒧᐏᐣ ᐃᓂᐍᓂᐘᐣ ᐅᑭᒪᐣ ᐅᐣᒋ ᐅᓄᐍᓂᐘᐣ

  • (a) ᐁᐊᐸᒋᒋᑲᑌᑭᐣ ᒥᓇ ᐁᒥᓄᒋᑲᑌᑭᐣ ᐃᓂᐍᓂᐘᐣ ᐊᓂᔑᓂᓂᐤ ᐃᔑᑮᔘᐏᓇᐣ ᐅᒪ ᑲᓇᑕ;
  • (b) ᑲᐃᔑᓇᐣᑕᐍᐣᑕᒧᐘᐨ ᐊᓂᔑᓂᓂᐘᐠ, ᑕᔑᑫᐏᓇᐣ ᒥᓇ ᐊᓂᔑᓂᓂᐘᐠ ᒥᓇ ᐱᒥᐏᒋᑫᐏᓇᐣ ᑲᐃᔑ ᓇᑲᒋᐘᐨ ᐊᓂᔑᓂᓂᐤ ᐃᔑᑭᔘᐏᓇᐣ — ᒥᓇ ᐁᐱᑕᓄᑮᓇᓂᐘᐣᐠ — ᐃᓂᐍᓂᐘᐣ ᐅᐣᒋ ᑭᐍᐅᑕᐱᓂᑫᐏᐣ, ᑭᐍᐅᒼᐱᓂᑫᐏᐣ, ᒋᐸᒥᒋᑫᐏᐣ ᒥᓇ ᒋᒪᓑᑲᐘᑌᑭᐣ ᐊᓂᔑᓂᓂᐤ ᐃᔑᑮᔘᐏᓇᐣ
  • (c) ᐁᐃᓇᐸᒋᐦᐊᑲᓀᐨ ᔓᓂᔭ ᑲᐸᑭᑎᓇᐨ ᐅᑭᒪᐏᐣ ᑲᓇᑕ ᒋᓇᐸᒋᐦᐊᑲᓀᐨ ᐃᓂᐍᓂᐘᐣ ᐃᔑᒋᑫᐏᓇᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᓇᐣ; ᒥᓇ
  • (d) ᒋᒪᒋᒋᑲᑌᐠ ᐅᐦᐅᐍ ᐃᓇᑯᓂᑫᐏᐣ.

• Note marginale : ᑐᑕᒧᐏᓇᐣ ᐅᐣᒋ ᐅᔑᐲᐦᐃᑫᐏᑲᒥᐠ ᒥᓇ ᑯᑕᐠ ᑲ ᐊᑌᑭᐣ

  (2) ᐃᐦᐃᐍ ᐯᔑᑯᐊᐦᑭᐏᐣ ᑎᐸᒋᒧᐏᐣ ᐃᓯᓭ ᒥᓇ ᒋᐏᐣᒋᑲᑌᑭᐣ ᐅᐣᒋ ᐅᔑᐲᐦᐃᑫᐏᑲᒥᐠ ᑲᓃᑲᓂᓭᑭᐣ ᐊᓄᑭᐏᓇᐣ ᐅᐣᒋ ᐯᔑᑯᐊᐦᑭᐏᐣ ᒥᓇ ᐅᓄᐍᓂᐘᐣ ᑲᔦ

  • (a) ᒋᓂᐱᑌᐱᐦᐃᑲᑌᑭᐣ ᐃᓂᐍᓂᐘᐣ ᓇᓇᐣᑐᑭᑫᐣᒋᑫᐏᓇᐣ ᒥᓇ ᓇᑲᒋᒋᑫᐏᓇᐣ ᑲᑮᑐᒋᑲᑌᑭᐣ ᐃᐦᐃᒪ ᑲᐃᔑᐊᑌᐠ ᐸᑫᐲᐦᐃᑲᓂᐠ 24(1);
  • (a.1) ᐅᔑᐲᐦᐃᑫᐏᑲᒥᐠ ᔓᓂᔭ ᓴᑲᑭᐣᒋᑫᐏᓇᐣ;
  • (b) ᐯᔑᑯᐊᐦᑭᐏᐣ ᑲᓴᑲᑭᐣᒋᑫᐨ ᐅᑎᐸᒋᒧᐏᐣ;
  • (c) ᐃᑭᑐᐏᐣ ᐅᐣᒋ ᑲᐃᓯᓭᐠ ᐅᔑᐲᐦᐃᑫᐏᑲᒥᐠ ᐁᑭᑌᐱᓇᒧᐘᐨ ᑲᑲᑵᑌᐱᓇᒧᐘᐸᐣ ᐃᐦᐃᐍ ᑲ ᐊᐦᑭᐘᐣᐠ; ᒥᓇ
  • (d) ᑯᑕᑭᔭᐣ ᒥᓇ ᐏᐣᑕᒪᑫᐏᓇᐣ ᐅᐣᒋ ᑲᐃᓇᑌᑭᐣ ᐃᓇᑯᓂᑫᐏᓀᐣᓴᐣ.

Note marginale : ᐁᐸᑭᑎᓂᑲᑌᐠ ᐅᑭᒪᐏᑲᒥᑯᐣᐠ

• 44 (1) ᐊᐦᐊᐍ ᐅᑭᒪ ᐅᑲᑐᑕᐣ ᐃᐦᐃᐍᓂ ᑎᐸᒋᒧᐏᓇᐣ ᐅᔑᐲᐦᐃᑫᐏᑲᒥᐠ ᒋᐊᒋᑲᑌᐠ ᐃᐦᐃᒪ ᐅᑭᒪᐏᑲᒥᑯᐣᐠ ᐃᓂᐍᓂᐘᐣ ᑭᔑᑲᐣ 15 ᑲᐃᓯᓭᐠ ᑲᐃᔑ ᐅᓇᐱᐘᐨ ᐅᑭᒪᐠ ᑲ ᐊᐱᐘᐨ ᐃᐦᐃᒪ ᐅᑭᒪ ᐘᑲᐦᐃᑲᓂᐠ ᐊᐱ ᑲᐸᑭᑎᓂᑲᑌᐠ ᐃᐦᐃᐍ ᑎᐸᒋᒧᐏᐣ.

• Note marginale : ᐁᒦᓇᑲᓀᐘᐨ ᐃᑭᐍᓂᐘᐠ ᑲᒥᑏ

  (2) ᐃᓑᑿ ᐸᑭᑎᓂᑲᑌᐠ, ᐃᐦᐃᐍ ᑎᐸᒋᒧᐏᐣ ᐃᔑᓂᐣᔕᐦᐃᑲᑌ ᐃᐦᐃᒪ ᑲᒥᑏ ᑲᐅᐣᒋ ᓇᑲᒋᒋᑫᐘᐨ ᐅᑭᒪᐏᐣ, ᐅᑭᒪᐏ ᐘᑲᐦᐃᑲᐣ ᑲᔦᒪ ᑲᐃᔑ ᓂᔕᑭᐣ ᐅᑭᒪᐏ ᐘᑲᐦᐃᑲᓇᐣ ᐃᓯᓭ ᒋᐅᓇᑭᐣᒋᑲᑌᑭᐣ ᑲᔦᒪ ᒋᓇᒋᑲᑌᑭᐣ ᐃᐦᐃᐍ ᒋᑐᒋᑲᑌᐠ ᒋᓇᑲᒋᒋᑲᑌᐠ ᐃᐦᐃᐍ ᑎᐸᒋᒧᐏᐣ.

ᐃᓇᑯᓂᑫᐏᓇᐣ ᒦᓇ ᐃᓇᑯᓂᑫᐏᓀᐣᓴᐣ

Note marginale : ᐃᓇᑯᓂᑫᐏᐣ-ᐅᐣᒋᑫᐏᐣ ᒪᓑᑲᐏᓰᐏᓇᐣ

• 45. (1) ᐁᑭᑐᒋᑲᑌᑭᐣ ᑲᑵᑌᐏᓇᐣ ᐅᐣᒋ ᐅᑭᒪ ᐃᐦᐃᒪ ᐅᔑᐲᐦᐃᑫᐏᑲᒥᑯᐣᐠ, ᐃᑭᐍᓂᐘᐠ ᐊᓂᔑᓂᓂᐤ ᐅᑭᒪᐏᓇᐣ ᒥᓇ ᑯᑕᑭᔭᐣ ᐊᓂᔑᓂᓂᐤ ᐅᑭᒪᐏᓇᐣ ᐱᒥᐏᒋᑫᐏᓇᐣ ᒥᓇ ᑯᑕᑭᔭᐣ ᐊᓂᔑᓂᓂᐤ ᐱᒥᐏᒋᑫᐏᓇᐣ ᒋᓇᑲᒋᒋᑲᑌᑭᐣ ᐃᐦᐃᐍ ᑲᐃᔑ ᒣᒣᔾᑭᓭᑭᐣ ᐃᓯᓭᐏᓇᐣ ᒥᓇ ᓇᐣᑕᐍᐣᑕᒧᐏᓇᐣ ᐅᐣᒋ ᐊᓂᔑᓂᓂᐘᐠ, ᑕᔒᑫᐏᓇᐣ ᒥᓇ ᐃᓂᓂᐘᐠ, ᐃᐦᐃᐍ ᐅᑭᒪᐏᐣ ᑲᐅᑯᐱᐘᐨ ᐅᑲᐅᔑᑐᓇᐘ ᐃᓇᑯᓂᑫᐏᓀᐣᓴᐣ

  • (a) ᒋᑭᒋᓀᐣᒋᑲᑌᑭᐣ ᐃᑭᑐᐏᓇᐣ ᐅᐣᒋ ᒪᐣᓯᓭᐏᐣ ᑲᐑᐣᒋᑲᑌᑭᐣ ᐃᐦᐃᒪ ᐸᑫᐲᐦᐃᑲᓂᐠ 27, ᑲᔦ ᐃᓂᐍᓂᐘᐣ
    • (i) ᒋᒪᐣᓯᓇᐦᐃᑲᑌᑭᐣ ᐃᓂᐍᓂᐘᐣ ᐃᑭᑐᐏᓇᐣ, ᐃᓂᐍᓂᐘᐣ ᑲᔦ ᑲᐃᓇᒋᑲᓂᐘᐠ ᒋᓯᓭᑭᐣ ᐁᑲ ᒪᔑ ᐅᑕᐱᓂᑲᑌᐠ ᐃᑭᑐᐏᓇᐣ ᑫᒪᐣᓯᓇᐦᐃᑲᑌᑭᐣ,
    • (ii) ᓂᓇᑲᒋᒋᑲᑌᑭᐣ ᓂᐍᓂᐘᐣ ᐃᑭᑐᐏᓇᐣ, ᒥᓇ
    • (iii) ᑎᐸᒋᒧᐏᓇᐣ ᑫᐅᔑᒋᑲᑌᑭᐣ ᐃᓑᑿ ᓇᓇᑲᒋᒋᑲᑌᑭᐣ ᐃᓂᐍᓂᐘᐣ ᐃᑭᑐᐏᓇᐣ, ᑲᔦ ᐃᓂᐍᓂᐘᐣ ᐃᑭᑐᐏᓇᐣ ᑲᑭᐸᑭᑎᓂᑲᑌᑭᐣ ᒋᐊᑌᑭᐣ ᐃᐦᐃᒪ ᑎᐸᒋᒧᐏᓂᐣᐠ, ᒥᓂᑯᐠ ᑲᔦ ᑲᑭᑕᔑᑭᑲᑌᐠ ᒋᑮᔑᒋᑲᑌᐠ ᐃᓂᐍᓂᐘᐣ ᑎᐸᒋᒧᐏᓇᐣ ᒋᑮᔑᒋᑲᑌᑭᐣ ᒥᓇ ᐃᑭᐍᓂᐘᐠ ᐊᐑᔭᐠ ᑲᔦᒪ ᐱᒥᐏᒋᑫᐏᓇᐣ ᑲᑎᐸᒋᒪᑲᓀᐘᐨ ᒋᐸᑭᑎᓂᑲᑌᑭᐣ;
  • (a.1) ᒋᑭᒋᓀᐣᒋᑲᑌᑭᐣ ᑲᑐᒋᑲᑌᐠ ᑲᑵᑌᐏᓇᐣ ᐅᒪ ᐃᓇᑯᓂᑫᐏᓂᐠ ᑲᔦ ᒋᒪᒋᑕᔑᐣᒋᑲᑌᑭᐣ ᐃᓂᐍᓂᐘᐣ ᓇᑯᒥᑎᐏᓇᐣ ᑲᔦᒪ ᐃᓇᒋᑫᐏᓇᐣ ᐃᐦᐃᒪ ᐸᑫᐱᐦᐃᑲᓂᐠ 8 ᒥᓇ 9;
  • (a.2) ᐅᐣᒋ ᑲᔦ ᐸᑫᐲᐦᐃᑲᓂᐠ 10.1,
    • (i) ᒋᐏᐣᒋᑲᑌᑭᐣ ᐏᒋᐦᐃᐍᐏᓇᐣ ᒋᑭᑌᐱᓂᑲᑌᑭᐣ ᒋᐅᐣᑕᒋᑲᑌᑭᐣ ᐅᐣᒋ ᐊᓂᔑᓂᓂᐤ ᐃᔑᑮᔘᐏᐣ ᒥᓇ ᑲᐅᐣᒋᑎᐯᐣᑕᑯᐠ ᐃᐦᐃᒪ ᑲᐃᔑᐊᑌᐠ ᑲᓇᑕ ᐱᒥᐏᒋᑫᐏᐣ ᑲᔦᒪ ᑲᐱᒥᐏᒋᑫᑕᒪᑯᐨ ᑲᔦᒪ ᑲᑲᓄᒋᑫᑕᒪᑯᐨ ᒋᑭᐅᐣᑕᒋᑲᑌᑭᐣ ᐏᒋᐦᐃᐍᐏᓇᐣ ᐃᓂᐍᓂᐘᐣ ᐃᔑᑮᔘᐏᓇᐣ,
    • (ii) ᒋᐏᐣᒋᑲᑌᐠ ᐃᐦᐃᐍ ᐃᑭᑐᐏᐣ “ᒋᐅᐣᑕᒋᑲᑌᐠ ᒋᑌᐱᓂᑲᑌᐠ ᐏᒋᐦᐃᐍᐏᓇᐣ”, ᒥᓇ
    • (iii) ᒋᐏᐣᒋᑲᑌᐠ ᐃᓂᐍᓂᐘᐣ ᐃᑭᑐᐏᓇᐣ “ᑲᐃᔑᑌᐱᓭᐠ” ᒥᓇ “ᑲᐃᔑᓇᐣᑕᐍᐣᑕᑯᐠ” ᒥᓇ ᒋᐑᐣᒋᑲᑌᐠ ᑲᐃᓯᓭᐠ ᐃᐦᐃᒪ ᑲᓇᑕ ᐱᒥᐏᒋᑫᐏᓂᐣᐠ ᑲᔦᒪ ᑲᐱᒥᐏᒋᑫᑕᒪᑫᐨ ᑲᔦᒪ ᑲᑲᓄᒋᑫᑕᒪᑫᐨ ᐁᐃᓯᓭᓂᐠ ᐁᑌᐱᓭᐨ ᒋᑭᑐᑕᐣᑭᐣ ᐃᓂᐍᓂᐘᐣ ᐏᒋᐦᐃᐍᐏᓇᐣ ᒋ ᐊᓂᔑᓂᓂᐤ ᐃᔑᑮᔘᐏᓇᐣ ᒥᓇ ᐃᑭᐍᓂᐘᐠ ᑲᓇᐣᑕᐍᐣᑕᒧᐘᐨ ᒋᑭᑌᐱᓇᒧᐘᐨ ᐃᐍᓂ ᐏᒋᐦᐃᐍᐏᐣ ᐃᐍᓂ ᑲᐃᔑᑮᔘᐘᐨ ᒋᑌᐱᓭᐠ;
  • (b) ᒋᐏᐣᒋᑲᑌᑭᐣ ᑯᑕᑭᔭᐣ ᐏᐣᑕᒪᑫᐏᓇᐣ ᒋᐊᑌᑭᐣ ᐃᐦᐃᒪ ᐯᔑᑯᐊᐦᑭᐏᐣ ᑎᐸᒋᒧᐏᐣ ᐅᐣᒋ ᐃᐦᐃᐍ ᐸᑫᐲᐦᐃᑲᐣ 43(2)(d); ᒥᓇ
  • (c) ᐃᓯᓭ, ᐁᐱᒥᐏᒋᑲᑌᐠ ᑲᐃᓇᑭᐣᑌᐠ ᒥᓇ ᑲᐃᓇᑌᐠ ᐃᐦᐃᐍ ᐃᓇᑯᓂᑫᐏᐣ.

• Note marginale : ᑲᐃᔑᐅᓀᐣᒋᑲᑌᑭᐣ ᒋᑮᑐᒋᑲᑌᐠ

  (2) ᐃᓂᐍᓂᐘᐣ ᐃᓇᑯᓂᑫᐏᓀᐣᓴᐣ ᑲ ᐊᑌᑭᐣ ᐃᒪ (1)(a.2) ᒋᐏᐣᒋᑫᒪᑲᐠ ᒥᓇ ᑲᐃᔑ ᓇᐣᑕᐍᐣᑕᑯᑭᐣ ᐁ ᒣᒣᔾᑭᓇᑯᑭᐣ ᐅᐣᒋ ᐅᓄᐍᓂᐘᐣ;

  • (a) ᐃᐦᐃᐍ ᐊᓂᔑᓂᓂᐤ ᐃᔑᑮᔘᐃᐣ ᑲᑕᔑᐣᒋᑲᑌᐠ;
  • (b) ᒋᐊᐸᒋᒋᑲᑌᐠ ᒥᓇ ᐁᓇᒋᑲᑌᐠ ᐃᐦᐃᐍ ᐃᔑᑮᔘᐏᐣ;
  • (c) ᑲᐃᔑ ᒣᒣᔾᑭᓭᑭᐣ ᒥᓇ ᑲᐃᔑᓇᐣᑕᐍᐣᒋᑲᑌᑭᐣ ᐃᒪᓀᑫ ᐊᓂᔑᓂᓂᑲᐣᐠ, ᑕᔑᑫᐏᓂᐣᐠ ᑲᔦᒪ ᐊᓂᔑᓂᓂᐘᐠ ᑲ ᐊᐸᒋᑐᐘᐨ ᐃᐍᓂ ᐃᔑᑮᔘᐏᐣ;
  • (d) ᐊᐣᑎᓀᑫ ᐁᐣᑕᓇᐸᒋᒋᑲᑌᐠ ᐃᐦᐃᐍ ᐃᔑᑮᔘᐏᐣ; ᒥᓇ
  • (e) ᐃᐦᐃᐍ ᑲᓇᑕ ᐱᒥᐏᒋᑫᐏᐣ ᑲᔦᒪ ᑲᐱᒥᐏᒋᑫᑕᒪᑯᐨ ᑲᔦᒪ ᑲᑲᓄᒋᑫᑕᒪᑯᐨ ᒋᑭᐊᑐᒋᐣ ᒋᑌᐱᓂᑲᑌᐠ ᐏᒋᐦᐃᐍᐏᐣ ᐃᐦᐃᐍ ᑲᐃᔑᑮᔘᓇᓂᐘᐣᐠ.

Note marginale : ᐑᑕᓄᑮᒥᑎᐏᐣ

45.1 ᐊᐦᐊᐍ ᐅᑭᒪ ᐅᑲᑐᑕᐣ ᑌᐻ ᐃᓂᐍᓂᐘᐣ ᐊᓂᔑᓂᓂᐤ ᐅᑭᒪᐏᐣ ᒥᓇ ᑯᑕᑮᔭᐣ ᐊᓂᔑᓂᓂᐤ ᐅᑭᒪᐏᓇᐣ ᐱᒥᐏᒋᑫᐏᐣ ᒥᓇ ᐊᓂᔑᓂᓂᐤ ᐱᒥᐏᒋᑫᐏᓇᐣ ᐁᐃᓯᓭᑐᐨ ᒋᑭᑐᑕᒧᐘᐨ ᒣᑿ ᐅᓇᒋᑲᑌᑭᐣ ᐃᓇᑯᓂᑫᐏᓀᐣᓴᐣ ᒋᐊᓂ ᑮᔑᒋᑲᑌᐠ ᐃᓇᑯᓂᑫᐏᓀᐣᓴᐣ ᐃᐦᐃᒪ ᑲ ᐊᑌᑭᐣ ᐸᑫᐲᐦᐃᑲᓂᐠ 45.

Note marginale : ᐃᓇᑯᓂᑫᐏᓀᐣᓴᐣ — ᐅᔑᐲᐦᐃᑫᐏᑲᒥᐠ ᒪᒪᐤᐱᐏᓇᐣ ᒦᓇ ᑐᑕᒧᐏᓇᐣ

46 ᐅᔑᐲᐦᐃᑫᐏᑲᒥᐠ ᐅᑲᐅᓇᑐᓇᐣ ᑫᐱᒥᓂᔕᐦᐃᑲᑌᑭᐣ ᐅᓄᐍᓂᐘᐣ

• (a) ᐁᐅᓇᒋᑲᑌᑭᐣ ᒪᒪᐤᐱᐏᓇᐣ ᐅᐣᒋ ᐅᔑᐲᐦᐃᑫᐏᑲᒥᐠ, ᐊᑭᐣᑕᓱᐣ ᑲᑕᓰᓄᐘᐨ ᐊᐑᔭᐠ ᒋᔕᐳᓂᑲᑌᑭᐣ ᐅᓀᐣᒋᑫᐏᓇᐣ ᒥᓇ ᑫᑐᒋᑲᑌᐠ ᐅᓀᐣᒋᑲᑌᑭᐣ ᑫᑯᓇᐣ; ᒥᓇ
• (b) ᑫᑐᒋᑲᑌᑭᐣ ᒣᑿ ᑐᑕᒪᐠ ᑲᐃᔑᓇᐣᑕᐍᐣᑕᑯᐠ ᐅᔑᐲᐦᐃᑫᐏᑲᒥᐠ.

Note marginale : ᐃᓇᑯᓂᑫᐏᓀᐣᓴᐣ — ᒪᐣᓯᓭᐏᓇᐣ ᒦᓄᒋᑫᐏᐣ ᒦᓇ ᑲᓄᒋᑫᐏᓇᐣ

47 ᐃᓂᐍᓂᐘᐣ ᒋᓇᑲᒋᒋᑲᑌᑭᐣ ᐃᓇᑯᓂᑫᐏᓀᐣᓴᐣ ᑲᐅᓇᑌᑭᐣ ᐅᐣᒋ ᐸᑫᐲᐦᐃᑲᐣ45(a), ᐅᔑᐲᐦᐃᑫᐏᑲᒥᐠ ᐅᑲᐅᓇᑐᓇᐣ ᑫᐱᒥᓂᐣᔕᐦᐃᑲᑌᑭᐣ, ᐃᓂᐍᓂᐘᐣ ᑲᔦ ᐃᓇᒋᑫᐏᐣ ᑫᐱᒥᓂᔕᐦᐃᑲᑌᐠ, ᑫᐃᔑᐊᓄᑭᒪᑲᐠ ᒣᑿᐨ ᒪᒥᓄᒋᑲᓂᐘᐠ ᐑᒋᐦᐃᐍᐏᐣ ᑲᔦᒪ ᓇᑲᒋᒋᑲᑌᑭᐣ ᒪᐣᓯᓭᐏᐣ

Note marginale : ᐃᓇᑯᓂᑫᐏᓀᐣᓴᐣ — ᐁᑲ ᒋᐸᐸᒪᒋᒧᐏᐣ

48 ᐅᔑᐲᐦᐃᑫᐏᑲᒥᐠ ᐅᑲᐅᔑᑐᓇᐣ ᑫᐱᒥᓂᔕᐦᐃᑲᑌᑭᐣ ᒋᑭᑫᐣᒋᑲᑌᐠ ᐁᑲ ᒋᐸᐸᒪᒋᒧᓇᓂᐘᐣᐠ ᐃᓂᐍᓂᐘᐣ ᐑᐣᑕᒪᑫᐏᓇᐣ ᐅᐣᒋ ᐅᔑᐲᐦᐃᑫᐏᑲᒥᐠ ᑲᑌᐱᓇᑭᐣ ᐑᐣᑖᑫᐏᓇᐣ ᐁᐊᐸᒋᑐᐨ ᐅᒪᓑᑲᐏᓰᐏᐣ ᒥᓇ ᑲᓂᑐᑕᑭᐣ ᐅᑕᓄᑭᐏᓇᐣ ᒥᓇ ᐅᑐᑕᒧᐏᓇᐣ.

ᑎᐱᓇᐍ ᓇᑲᒋᒋᑫᐏᐣ

Note marginale : ᓂᔭᓄᐊᐦᑭ ᓇᑲᒋᒋᑫᐏᐣ

• 49 (1) ᐃᓯᓭᐠ ᓂᔭᓄᐊᐦᑭ ᐃᐦᐃᐍ ᐃᓑᑿ ᑭᔑᑲᐠ ᐅᐦᐅᐍ ᐸᑫᐱᐦᐃᑲᓇᐣ ᒪᑕᓄᑭᒪᑲᐠ ᒥᓇ ᐁᐣᑕᓱ ᓂᔭᓄᐊᐦᑭᐘᐠ, ᐊᐦᐊᐍ ᐅᑭᒪ ᐅᑲᑐᑕᐣ ᒋᓇᓇᑲᒋᒋᑲᑌᐠ ᐅᐍ ᐱᒥᐏᒋᑫᐏᐣ ᑲᐃᓇᑌᐠ ᐃᐦᐃᐍ ᐃᓇᑯᓂᑲᐣ, ᒥᓇ ᐃᐍ ᑲᐃᔑ ᐱᒥᐏᑌᐠ ᑲᔦ ᐸᒥᓂᑲᑌᐠ, ᐃᓂᐍᓂᐘᐣ ᓇᑯᒥᑎᐏᓇᐣ ᑲᔦᒪ ᐃᓇᒋᑫᐏᓇᐣ ᑲᐃᓇᑌᐠ ᐃᐦᐃᒪ ᐸᑫᐲᐦᐃᑲᓂᐠ 9 ᒥᓇ ᐅᑐᑕᒧᐏᓂᐘ ᐅᒪ ᐅᔑᐲᐦᐃᑫᐏᑲᒥᐠ. ᐃᐦᐃᐍ ᓇᓇᑲᒋᒋᑫᐏᐣ ᒋᑐᒋᑲᑌᐠ ᒋᐘᐸᒥᑎᓇᓂᐘᐠ ᑲᔦᒪ ᐊᓄᓇᑲᓀᐘᐨ ᐅᐣᒋ ᐅᑭᒪ ᐁᑭᑲᑵᒋᒪᐨ ᐃᓂᐍᓂᐘᐣ ᐅᔑᐲᐦᐃᑫᐏᑲᒥᐠ.

• Note marginale : ᑎᐸᒋᒧᐏᐣ

  (2) ᐊᐦᐊᐍ ᐊᐑᔭ ᑲᔦᒪ ᑲᓄᓇᑲᓀᐨ ᑲᑐᑕᐣᐠ ᓇᑲᒋᒋᑫᐏᐣ ᒋᐸᑭᑎᓇᐣᐠ ᒋᒥᓇᐨ ᐅᑭᒪᐣ ᐅᑎᐸᒋᒧᐏᐣ ᐁᐏᐣᑕᒪᑫᒪᑲᐠ ᑲᑭᔑᒥᑭᑫᐨ ᒥᓇ ᐅᑎᑭᑐᐏᓇᐣ, ᐃᓂᐍᓂᐘᐣ ᑲᔦ

  • (a) ᐃᓂᐍᓂᐘᐣ ᐃᔑᒋᑫᐏᓇᐣ ᑫᑭᑐᒋᑲᑌᑭᐣ ᒋᑭᔑᒋᑲᑌᐠ ᑲᑲᑵᑌᐱᓂᑲᑌᑭᐣ ᑲᐃᓇᒋᑲᑌᐠ ᐃᐦᐃᒪ ᐃᓇᑯᓂᑲᓂᐠ; ᒥᓇ
  • (b) ᑭᓑᐱᐣ ᐊᔭᒪᑲᐠ ᒋᐊᐣᒋᒋᑲᑌᐠ ᐃᓇᑯᓂᑫᐏᐣ ᐅᐣᒋ, ᑯᑕᑮᔭᐣ ᒥᓇ, ᑲᐃᓇᓄᑮᒪᑲᐠ ᑲᔦᒪ ᐅᑐᑕᒧᐏᐣ ᐃᑭᐍᓂᐘᐠ ᐅᔑᐲᐦᐃᑫᐏᑲᒥᐠ ᑲᔦᒪ ᓇᑯᒥᑎᐏᓇᐣ ᑲᔦᒪ ᐃᓇᒋᑫᐏᓇᐣ ᑲᑭᐅᔑᒋᑲᑌᑭᐣ ᐃᒪ ᐸᑫᐲᐦᐃᑲᐣ 9

• Note marginale : ᐸᐸᒥᑲᑵᑌᐏᓇᐣ

  (2.1) ᐁᑲ ᒪᔑ ᐸᑭᑎᓂᑲᑌᐠ ᐃᐦᐃᐍ ᑎᐸᒋᒧᐏᐣ ᒋᒥᓇᑲᓀᐨ ᐅᑭᒪ, ᑲᑭᓇᑲᒋᒋᑫᐨ ᑲᑭᑐᑕᐣᐠ ᓇᑲᒋᒋᑫᐏᐣ ᒋᐸᐸᒥᑲᑵᒋᒪᐨ ᐊᓂᔑᓂᓂᐤ ᐅᑭᒪᐏᓇᐣ ᒥᓇ ᐊᓂᔑᓂᓂᐤ ᐅᑭᒪᐏᓇᐣ ᐱᒥᐏᒋᑫᐏᐣ ᒥᓇ ᑯᑕᑭᔭᐣ ᐊᓂᔑᓂᓂᐤ ᐱᒥᐏᒋᑫᐏᓇᐣ ᐃᓂᐍᓂᐘᐣ ᐅᐣᒋ ᑲᑭᔑᒥᑭᑫᐨ ᒥᓇ ᐅᑎᑭᑐᐏᓇᐣ ᑫᑭᐊᑌᑭᐣ ᐃᐦᐃᒪ ᑎᐸᒋᒧᐏᓂᐣᐠ.

• Note marginale : ᐁᐸᑭᑎᓂᑲᑌᐠ ᐃᒪ ᐅᑭᒪᐏ ᐘᑲᐦᐃᑲᓂᐠ

  (3) ᐊᐦᐊᐍ ᐅᑭᒪ ᒋᐅᓇᒋᑫᐨ ᐃᐦᐃᐍᓂ ᑎᐸᒋᒧᐏᐣ ᒋᔑᐸᑭᑎᓇᐣᐠ ᐃᓂᐍᓂᐘᐣ ᐅᑭᒪᐏᑲᒥᑯᐣ ᐃᓂᐍᓂᐘᐣ ᓂᑕᒼ 15 ᑭᔑᑲᐣ ᑲᐃᔑ ᐅᓇᐱᐘᐨ ᐅᑭᒪ ᐘᑲᐦᐃᑲᓂᐠ ᐃᐦᐃᐍ ᑭᔑᑲ ᑲᑭᔑ ᐸᑭᑎᓂᑲᑌᐠ ᐃᐦᐃᐍ ᑎᐸᒋᒧᐏᐣ ᐁᑌᐱᓂᑲᑌᐠ.

• Note marginale : ᐁᒥᓇᑲᓀᐘᐨ ᑲᒥᑏ

  (4) ᐃᓑᑿ ᐸᑭᑎᓂᑲᑌᐠ, ᐃᐦᐃᐍ ᑎᐸᒋᒧᐏᐣ ᑕᓂᒥᓇᑲᓀᐘᐠ ᑲᒥᑏ ᐅᐣᒋ ᐅᓇᔓᐍᐏᓂᓂᐘᐠ, ᐅᑭᒪᐏ ᐘᑲᐦᐃᑲᓂᐠ ᑲᔦᒪ ᓂᔑᐣ ᐅᓇᔓᐍᐏᑲᒥᑯᐣ ᑲᐃᓇᑭᐣᒋᑲᑌᑭᐣ ᑫᒪ ᒋᐅᔑᒋᑲᑌᑭᐣ ᒋᓇᓄᑮᒪᑲᐠ ᒋᓇᑲᒋᒋᑲᑌᑭᐣ ᐅᐍ ᑎᐸᒋᒧᐏᐣ.

ᐅᑭᒪᐏᑲᒥᐠ ᓇᑲᒋᒋᑫᐏᐣ

Note marginale : ᓂᓱᐊᐦᑭ ᓇᑲᒋᒋᑫᐏᐣ

49.1 ᐏᐸᐨ ᐊᓂᓯᓭᐠ ᐃᓑᑿ ᓂᓱᐊᐦᑭᐏᐣ ᑎᐱᓑᑲᒧᓭᐠ ᐃᐍ ᑭᔑᑲ ᐅᐍ ᑲᒪᑕᓄᑮᒪᑲᐠ ᒥᓇ ᐁᐣᑕᓱ ᓂᓱᐊᐦᑮᐘᐠ ᑲᐃᔑ ᑎᐱᓑᑲᒧᓭᐠ, ᒋᓇᑲᒋᒋᑲᑌᐠ ᐅᐍ ᐃᓇᑯᓂᑫᐏᐣ ᒥᓇ ᑲᐃᔑ ᐱᒥᐏᐨᑲᑌᐠ ᑲᔦ ᐸᒥᓂᑲᑌᐠ ᒋᐅᐣᒋ ᒪᒋᑕᐘᐨ ᐃᑭᐍᓂᐘᐠ ᐅᓇᔓᐍᐏᓂᓂᐘᐠ, ᐅᑭᒪᐏ ᐘᑲᐦᐃᑲᐣ ᑲᔦᒪ ᓂᔑᐣ ᐃᓂᐍᓂᐘᐣ ᐘᑲᐦᐃᑲᓇᐣ ᒋᓇᑭᐣᒋᑲᑌᑭᐣ ᑲᔦᒪ ᒋᐅᓇᒋᑲᑌᑭᐣ ᐅᐍ ᐅᐣᒋ.

ᑫᐃᔑ ᒪᑕᓄᑭᒪᑲᐠ

Note marginale : ᐃᓇᑯᓂᑲᐣ ᐁᐅᓇᔓᐘᑌᐠ

^{Note de bas de page *} 50 ᐅᐍ ᑲᐃᓇᒋᑲᑌᐠ ᐃᓇᑯᓂᑫᐏᐣ ᑕᒪᑕᓄᑮᒪᑲᐣ ᐃᐦᐃᐍ ᑮᔑᑲ ᑲᔦᒪ ᑮᔑᑲᐣ ᒋᐅᓇᒋᑫᐘᐨ ᑲᐃᑭᑐᒪᑲᐠ ᐅᓇᔓᐍᐏᐯᐸᐣ ᐅᐣᒋ ᐅᑭᒪᑫᐏᐣ.