Parliament Hill, kegon kagi mikimowatc
Agwamshi ka matsek wedi kidja odimtananok, panama ki-ndikendjigadeh wedi odja, *Barrack Hill*, ijinkadeh. Oma wedi nekehnah, opimehnah ogimanodagini-migwamik, Parliament Hill, ka ijinkadek, Lt-Colonel John ijinkazo kagi minjak shimaginishin megwatc ka-migadinanok odi weshkit ishkwiyak 19th Century ijinkadeni. Eh-odjagi todjigadek dish wedi, kagi kijigabidimowatc, agwa kidja onashtcigadek kodon ke mikimak apitc kodik kegon oma ojitcigadek. Wedi nehnawi, nenawi ka asiniyok, manehkegon ima ikidomigan kidja kendjigadek, miya gotc pejigon pidigimik ima, Canadian History odja.
Nidinjawehni awehdi, maneh gegoni ogi monan ka inabidjitcgadenik, tapishkot, sigibazin, awehsis okan, onaginin ka paskagan, mamowi abigiyanish kagi piskagadek ka migazinanok. Pejik kagi mikimak, miya gotc ijinagon, kegon ka paskizigehnanok, pikok ijinagon, anish asiniyon. Odehnak ka kijigabidimowatc mamowi ka widokazowatc Canada kegoni (PSPC), o-widja odimtamawan Kitigan Zibin mamowi Pikwakanagan Anishnaben kapi odisendjian, ogi ndemawan weni ka ininkindjin, ka kinamagendjin University of Montreal, kidja nadi-kendik wewendah agoneni weni keh noshtowatc.
Mi-gwendok eh-ija kishkitowatc ka ininkiwatc, ka-ndikendimowatc weshkit kegoni kagi pi-abidinik, agwa mishi wapishkiyeh ka-pi mijigatc oma. Ka ininkitc weni mamowi kagi kinamowadjin, eh-ija kendimowatc dish, mi-gwendik kagi monigehwatc Outaouais nekenah, kiwidokazok weni oma. Pepejik ogi atonawa kagi mikimowatc. Apitc ki mamowiseyok kidja animodimowatc kagi mikimowatc, kakina dish inendimok yeni asiniyobinik kagi mikimowatc, eh mokomaniyok (mo-ko-man). Mokoman yedi ka ijinkadek, eh-odja ijinkadek dish ozan eyehdowinah kinkobodeh.
Iye mòkomànàbik onindjìng inigokwàbikad taniniganing tagì shegwàkosinigoban kaye ayàndachin kì asibodegoban nanàj ako chàgibodeg iye pìwànako mòkomàn. Mokoman yedi, inendimok weshkit anishnabek kagi ojitowatc, ozam weskitc kawin ogikendisinawah anpitc miya ka kejendjigadenik, 2,500 nash 4,000 tisobon minigik inendimok eh tisobonezimgik. Miyah gotc tapishkotc kodigin kegon ka mikigadek, wasik kipi odisehmigan oma dish kidja mikimak, makosinobin oma anamik miya gotc ka ija nidinimak kegon, weshkit gotc agwa mishi wapishkiyeh ka tigoshik oma.
Odimtawin mamowi Anishnabek
Nijin anishnabek ka ija tijikeyatc, Kitigan Zibi mamowi, Pikwakanagan, widja odimamawan PSPC, kidja widokagwadjin adi keh todimowatc kinesh kidja minowashinik actic kidja wabidik kina awik. Kinoweh wewenda kida atisokadeh wedi mokoman anishnabek ima atcigadenok oda-atsokon, adi ka odja ojitowatc weni mamowi adi ka inabidjitowatc. Ki mamowi odimtayok kidja ojitowatc anishnabe ke ija kinamagozitc weni odja, Algonquin Collage mamowi, kidja widokaginiyatc anishnabek kidja kendimowatc kewinwa weni odimtawini.
Anishnabe weni minjak kjeh ija kinamagozinanonik, tedigo kida widokazok odi nigan ishpin widja odimtamadjin anmitcigojin. Ishpin weni odapinimowatc odimtawini mamowi eh ija kishkitowatc, kinamage-migwamik mamowi ke kinamagoziyatcweni, oga kishka widjotimtamawan weni ka ininkindjan kidja agwa onastcigadek koni agwa kidja onisik kegon, anishnabe kagi pi abidjitok. Adidik kotc keh ija mikimowatc kegoni, anishnabe dish eh-ija kendik. Kijigabidasn wedi ka mizinsek , anishnabek ka ija kinamowaginiyatc weni kidja ininkiyatc, meneh notc winda kendimin.
Maneh kiyabitc winda kendimin, oma inabin Centre Block project kozabidjigini kak.