ᐅᑭᐅᖅᑕᖅᑐᒥᒃ ᖃᐅᔨᒪᓇᓱᐊᕐᓂᖅ : ᐊᖅᕼᐊᓕᐊᑦ ᐅᓂᒃᑳᖅ ᐃᓚᖓ 5

ᐊᖅᕼᐊᓕᐊᑦ

ᐅᑭᐅᖅᑕᖅᑐᒥᒃ ᖃᐅᔨᒪᔪᑐᖃᓕᕆᔨᒃᑯᑦ ᐅᖃᓕᒫᒐᖅ | 2025

ᑕᖅᕋᖅᑐᖅᑕᐅᓂᖓ ᐊᐳᑦ
ᐃᓕᑦᑎᐊᕋᓱᒃᖢᒍ ᐊᐳᑦ ᐃᑲᔫᑎᔪᖅ ᖃᓄᐃᓕᖓᓂᐊᕐᒪᖔᑦ ᓯᓚᐅᑉ ᖃᓄᐃᓐᓂᖓᑕ ᐊᓯᖑᖅᓯᒪᓕᕐᓂᖓᓄᑦ

ᐲᖅᐸᓪᓕᐊᓗᒋᑦ ᓄᑖᑦ ᐃᓗᐊᖏᔾᔪᑎᑖᖑᕙᓪᓕᐊᔪᑦ
ᑮᒋᐊᑦ ᐸᒥᐅᖅᑑᑦ ᓅᑉᐳᑦ ᓄᓇᑐᐃᓐᓇᒧᑦ ᐅᐊᖕᓇᖓᓄᑦ ᐃᓅᕕᒃ

ᐊᐅᒍᓐᓇᓐᖏᑦᑐᖅ ᐲᔭᖃᑦᑕᕐᓂᖓᓄᑦ ᓴᕿᑎᑦᑎᕗᖅ ᓯᑯᑐᖄᓗᖏᓐᓂᒃ

ᑐᓄᐊᓂ ᓴᕿᔮᖅᑎᑕᐅᔪᑦ ᑕᐃᑲᓂ ᑲᓇᑕᐅᑉ ᖁᑎᒃᑐᕐᒥᐅᓂ ᖃᐅᔨᓴᕐᕕᖓᓂᒃ

© ᐊᑕᓂᐊᓗᒃ ᑭᖕ ᐱᔪᓐᓇᐅᑎᖃᖅᑐᖅ ᑲᓇᑕᒥᒃ, ᑭᒡᒐᖅᑐᖅᑕᐅᔪᖅ ᐊᖓᔪᖅᑳᖓᓂᑦ ᐊᒻᒪᓗ ᐊᖓᔪᖅᑳᖓ ᐊᐅᓚᑦᓯᔨᑦ ᐅᑭᐅᖅᑕᖅᑐᒥᒃ ᖃᐅᔨᒪᔪᑐᖃᓕᕆᔨᒃᑯᑦ ᑲᓇᑕ, 2025
ISSN 2562-6078

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ (POLAR) ᒐᕙᒪᑐᖃᒃᑯᑦ ᑎᒥᒋᕙᐅᒃ. ᐱᓕᕆᐊᒃᓴᖃᖅᐳᑦ ᐱᓕᕆᓗᑎᒃ ᓄᓇᕐᔪᐊᕐᒥᐅᑎᑐᑦ ᐊᔪᙱᑎᒋᔪᑎᑐᑦ ᐅᑭᐅᖅᑕᖅᑐᒥ ᖃᐅᔨᓴᕐᓂᕐᓂᒃ. ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐱᓕᕆᐊᒃᓴᖃᖅᐳᑦ ᓯᕗᒧᐊᖅᑎᓪᓗᒋᑦ ᑲᓇᑕᐅᑉ ᖃᐅᔨᒪᔭᖏᑦ

ᐅᑭᐅᖅᑕᖅᑐᕐᒥᒃ ᓴᙲᒃᑎᒋᐊᕐᓗᒋᓪᓗ ᑲᓇᑕᒥᐅᑦ ᓯᕗᓕᖅᑎᐅᓂᖏᑦ ᐅᑭᐅᖅᑕᖅᑐᓂ ᑭᒡᓕᓯᓂᐊᕐᓂᒃᑯᑦ ᓴᓇᐅᒐᑎᒍᓪᓗ.

ᑕᒫᓂ ᐊᕐᕌᒍᒥ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓇᓗᓇᐃᒃᑯᑕᐅᕗᑦ ᑕᔭᓄᑦ ᐊᕐᕌᒍᓄᑦ ᓯᕗᒧᐊᖅᑎᑦᑎᓂᕐᓂᒃ ᐅᑭᐅᖅᑕᖅᑐᒥ ᖃᐅᔨᒪᔭᐅᔪᓂᒃ ᐃᑲᔪᖅᑐᐃᓪᓗᑎᒡᓗ ᐅᑭᐅᖅᑕᖅᑐᒥ ᓄᓇᕐᔪᐊᓪᓗ ᐊᑖᓂ ᖃᐅᔨᓴᕐᓂᕐᓂ. ᐃᓕᓴᕆᓯᒪᔭᕗᑦ 10ᓄᑦ ᐊᕐᕌᒍᓄᑦ ᓇᓪᓕᐅᑎᓂᑦᑎᓐᓄᑦ ᐊᔾᔨᙳᐊᖅ ᐱᕗᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐅᓪᓗᕆᐊᖓ ᑐᕌᒐᓪᓗᐊᑕᐅᓪᓗᓂ, ᑭᒡᒐᖅᑐᐃᔪᖅ ᑕᒪᒃᑮᖕᓂᒃ ᕿᒪᒃᑕᑦᑎᓐᓂ ᐊᑐᖅᓯᒪᔭᑦᑎᓐᓂᒃ ᓯᕗᓂᑦᑎᓐᓂᒡᓗ, ᓴᖅᑭᔮᖅᑎᑦᑎᓪᓗᑎᒃ 10ᓄᑦ ᐊᕐᕌᒍᓄᑦ ᓯᕗᒧᐊᕐᓂᕐᓂᒃ, ᑲᑐᔾᔨᖃᑎᒌᖕᓂᕐᓂᒃ ᐊᒃᑐᐃᓂᕐᓂᒡᓗ ᐅᑭᐅᖅᑕᖅᑐᓂ ᖃᐅᔨᓴᕐᓂᕐᓂ. 

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐅᓪᓗᕆᐊᖓ

ᓇᓗᓇᐃᒃᑯᑕᓕᐅᓚᐅᖅᑐᑦ 2016ᒥ ᑭᓇᐅᓂᕐᒧᑦ ᓇᓗᓇᐃᒃᑯᑕᑐᑦ ᑎᒥᒧᑦ.

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐅᓪᓗᕆᐊᖓᑕ ᐊᔾᔨᖓ ᓴᓇᔭᐅᓪᓗᓂ ᐋᖅᑭᒋᐊᖅᓯᒪᔪᕐᒥᑦ ᒪᐃᐴᑉ ᐃᕕᐊᓂᑦ ᓴᓇᓯᒪᔪᕐᒧᑦ, ᐋᖅᑭᒋᐊᖅᓯᒪᒋᓪᓗᓂᓗ ᖃᓐᓂᕐᒧᑦ. ᓇᓗᓇᐃᒃᑯᑕᖅ ᓴᓇᔭᐅᓪᓗᓂ ᐊᔪᖏᓐᓂᕐᒧᑦ ᐃᓕᓴᕆᔭᐅᔾᔪᑎᑖᖅᓯᒪᔪᕐᒧᑦ ᕙᐃ ᔨᐅᒧᑦ.

ᐱᒋᐊᖅᖢᓂ ᒪᐃᐴᑉ ᐃᕕᐊᓂᑦ.

ᐋᖅᑭᒋᐊᖅᑕᐅᒋᓪᓗᓂ.

ᓴᓇᓯᒪᓂᖓ ᖃᓐᓂᙳᖅᑎᑕᐅᓪᓗᓂ.

ᑕᖅᓴᓕᖅᑕᐅᓪᓗᓂ.

ᓄᓇᕐᔪᐊᑉ ᖄᖓᓄᑦ ᐊᑖᓄᓪᓗ ᓇᓗᓇᐃᒃᑯᑦᑎᖅᑕᐅᓪᓗᑎᒃ.

ᖃᓐᓂᖅ ᐅᐃᔾᔮᖅᑎᑕᐅᓪᓗᓂ ᓴᖅᑭᔮᖅᑎᑦᑎᓂᐊᕋᒥ 23.5° ᐅᕕᖓᓂᖓᓂᒃ ᓄᓇᕐᔪᐊᑉ ᕿᑎᐊᓂᑦ.

ᐊᖅᕼᐊᓕᐊᑦ ᓇᓂᑦᑎᓯᑦ

• ᐊᖅᕼᐊᓚᐃᑦ ᐅᖃᓕᒫᒐᖅ 2025
• ᑐᓴᒐᒃᓴᖅ ᐊᖓᔪᖅᑳᖓᓂᑦ ᖃᐅᔨᓴᖅᑎᒻᒪᕇᑦ, ᑐᓴᒐᒃᓴᖅ ᐃᓇᖐᓯᒪᔪᒥᑦ ᐊᖓᔪᖅᑳᖓᓂᑦ, ᑲᑎᒪᔨᑦ
• ᐅᑭᐅᖅᑕᖅᑐᒥᒃ ᖃᐅᔨᒪᔪᑐᖃᓕᕆᔨᒃᑯᑦ: ᑲᑎᖓᔪᑦ ᖃᐅᔨᓴᖅᑎᒻᒪᕇᑦ ᐊᒻᒪᓗ ᓄᓇᖅᑲᖅᑳᖅᓯᒪᔪᑦ ᖃᐅᔨᒪᔭᖏᑦ
• ᐅᑭᐅᖅᑕᖅᑐᒧᑦ ᖃᖓᒃᑰᖓᒐᔭᕐᓂᖏᑦ
• ᐃᑲᔪᖅᑕᐅᔪᖅ ᖃᐅᔨᓴᕐᓂᒃᑯᑦ ᑲᓇᑕᐅᑉ ᐅᑭᐅᖅᑕᖅᑐᐊ
• ᑲᓇᑕᐅᑉ ᖁᑎᒃᑐᕐᒥᐅᓂ ᖃᐅᔨᓴᕐᕕᖓᑕ ᐃᒡᓗᐊᑕ ᐸᕐᓇᐅᑖ
• ᐅᑭᐅᖅᑕᖅᑐᒥ ᖃᐅᔨᓴᖅᑎᒻᒪᕇᑦ ᖃᐅᔨᓴᖅᑎᖏᑦ
• ᓯᑕᕚᓂ ᑰᓚᒻᐱ
• ᓯᑳᑦ ᒍᐃᓕᐊᒻᓴᓐ
• ᐳᓚᐃᔭᓐ ᕙᓐᑐᐳᓕᒃ
• ᐃᐅᓚᓐ ᑲᒃᔅ

ᐅᓂᒃᑳᑦ

• ᐃᓗᐊᓂ ᐅᑭᐅᖅᑕᖅᑐᒧᑦ ᓄᐊᑕᐅᓯᒪᔪᑦ
• ᕿᓂᖅᑐᑦ ᕿᖁᐊᕐᓂᒃ ᐱᓇᖕᓇᖓᓂ ᐅᑭᐅᖅᑕᖅᑐᖅ
• ᐃᓕᑦᑎᓇᓱᒃᑐᑦ ᐊᓯᖑᖅᐸᓪᓕᐊᔪᑦ ᐅᒥᖕᒪᐃᑦ ᐊᑐᖅᐸᒃᑕᑐᖃᕐᒥᖕᓂᒃ
• ᓂᕿᓪᓚᑖᓂᒃ = ᓂᕿᒃᓴᖃᕐᑎᑦᑎᓂᖅ
• ᐃᓂᖏᑦ ᓄᓇᓕᖕᓂ ᖁᐊᒃᑯᕕᑦ
• ᓯᕗᓂᒃᓴᑦᑎᓐᓂ ᖃᐅᔨᓴᖅᑎᒃᓴᐃᑦ
• ᒪᓕᒃᑕᐅᔪᑦ ᑎᖕᒥᐊᑦ ᓇᑭᖔᕐᒪᖔᑕ
• ᐅᓇ ᐊᓇᖅᑕᖅᕕᐅᔪᖅ ᑯᕕᖅᑕᕐᕕᖓ
• ᓄᓇᖅᑲᖅᑳᖅᓯᒪᔪᑦ ᖃᐅᔨᒪᓂᖓ ᐸᐅᕐᖓᓂᒃ ᓄᓇᑦᓯᐊᕐᒥ
• ᐅᑭᐅᖅᑕᖅᑐᒥᒃ ᖃᐅᔨᒪᔪᑐᖃᓕᕆᔨᒃᑯᑦ ᖃᐅᔨᓴᖅᑎᒻᒪᕆᖕᓂᑦ ᐃᓕᓴᕆᔭᐅᔾᔪᑎ ᐊᒻᒪᓗ ᐃᓕᓐᓂᐊᖅᑐᓄᑦ ᑮᓇᐅᔭᒃᓴᖃᕐᑎᑦᑎᓂᖅ
• ᓯᕗᒻᒧᖃᑎᒌᖕᓂᖅ

ᒫᓐᓇ ᓵᖓᔭᐅᔪᑦ

• ᑕᖅᕋᖅᑐᖅᑕᐅᓂᖓ ᐊᐳᑦ
  ᖃᐅᔨᓴᖅᑎᑦ ᕗᓛᓐᔅ ᓯᓚᓐᓂᐊᖅᑎᒃᑯᑦ 8-ᓄᑦ ᑕᕿᓄᑦ ᐃᖃᓗᒃᑑᑦᑎᐊᕐᒥ ᖃᐅᔨᓴᕐᓗᑎᒃ ᖃᓄᖅ ᐋᕿᒃᓱᖅᓯᒪᓂᖓᓂ ᐅᑭᐅᖅᑕᖅᑐᖅ ᐊᐳᑖ.
• ᐊᓐᐋᑎᑲ —ᓂᒋᑦᑎᓐᓂ ᐅᑭᐅᖅᑕᖅᑐᐊᓂ ᓴᓇᔭᓂᖓᑦ
• ᐲᖅᐸᓪᓕᐊᓗᒋᑦ ᓄᑖᑦ ᐃᓗᐊᖏᔾᔪᑎᑖᖑᕙᓪᓕᐊᔪᑦ
  ᖃᐅᔨᓴᖅᑎᑦ ᖃᐅᔨᒪᖁᔨᓚᐅᖅᑐᑦ ᐊᓯᖑᖅᑐᓂᒃ ᓄᓇᑐᐃᓐᓇᖅ ᐆᒪᔪᓕᒫᖏᑦ ᐊᕙᑎᓕᒫᖏᓪᓗ ᑕᐃᑲᓂ Laurier Trail Valley Creek ᖃᐅᔨᓴᕐᕕᖓᓂ ᑕᐃᒪᖓᓂᑦ ᐊᓂᒍᖅᑐᓂᑦ 34 ᐊᕐᕌᒍᑦ.
  ᐃᓚᖏᑦ ᐊᖏᔪᑦ ᐊᓯᖑᓛᖑᔪᑦ ᑕᒫᓃᓕᕐᒪᑕ ᑮᒋᐊᑦ ᐸᒥᐅᖅᑑᑦ.
• ᓇᓄᒃ ᓂᐱᓕᐅᖅᓯᒪᔪᑦ
  ᐅᑯᐊ ᐊᒥᓱᑦ ᓂᐱᓕᐅᖅᓯᒪᔪᑦ 20 ᓇᐃᑦᑑᑎᑦ ᑕᕐᕆᔭᐅᑎᑦ ᐅᓂᒃᑳᖑᓪᓗᑎᒃ ᐃᓄᐃᑦ ᐱᐅᓯᑐᖃᖏᓐᓂᒃ ᖃᐅᔨᒪᔭᐅᔪᓂᒃ ᓴᓐᓂᕈᑎᐅᑉ ᐃᒪᖓᓂ ᓇᓄᐃᑦ ᖃᐅᔨᒪᔭᐅᑦᑎᐊᕐᓂᐊᕐᒪᑕ ᐊᒻᒪᓗ ᐊᑕᒻᒪᕆᖕᒪᑕ ᐊᐅᓚᑦᑎᔾᔪᑎᓄᑦ ᓂᕐᔪᑎᓄᑦ.
• ᖄᖓᓂ ᓴᕿᔮᖅᑐᖅ
  ᐅᑭᐅᖅᑕᖅᑐᒥᒃ ᖃᐅᔨᒪᔪᑐᖃᓕᕆᔨᒃᑯᑦ ᑲᓇᑕ ᓄᓇᒥ ᐱᔭᕐᓂᓐᖏᑦᑐᓂᒃ ᖃᐅᔨᓴᖅᑎ ᐊᐃᓂ ᐱᑐᓯᓐ ᐊᒻᒪᓗ ᓵᓂᓐ ᐃᕕᑕᓕᒐᖅ ᐆᒃᑐᕋᖅᑐᑦ ᐊᐳᑎᒥᒃ ᐃᓕᑦᑎᓇᓱᒃᖢᑎᒃ ᑕᐃᑲᓂ ᑲᓇᑕᐅᑉ ᖁᑎᒃᑐᕐᒥᐅᓂ ᖃᐅᔨᓴᕐᕕᖓᓂᒃ. ᐊᔾᔨᓕᐊᖓ: ᐃᓖᔅ ᐃᒻᐱᐅ

ᑐᓴᒐᒃᓴᑦ ᖃᐅᔨᓴᖅᓯᓪᓗᐊᑕᕐᒥᑦ

ᐊᓕᐊᓇᐃᒍᓱᑦᑎᐊᖅᑐᖓ ᐅᖃᐅᓯᕆᔪᓐᓇᕋᒃᑯ ᐱᑐᐃᓐᓇᖏᑦᑐᖅ ᓴᖅᑭᑕᐅᔪᖅ ᐊᖅᑲᓕᐊᑦ, ᓴᖅᑭᔮᖅᑎᑦᑎᓪᓗᓂ ᐃᓚᖏᓐᓂᒃ ᖃᐅᔨᓴᖅᑕᐅᔪᓂᒃ ᓄᓇᖃᖅᑳᖅᑐᑦ ᖃᐅᔨᒪᔭᖏᓐᓂᒡᓗ ᐃᑲᔪᖅᑕᐅᓪᓗᑎᒃ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓂᑦ (ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ). 

ᑕᐃᒎᓯᖅ ᐊᖅHᐊᓕᐊᑦ ᐃᓄᐃᓐᓇᖅᑐᕐᓂᑦ ᑐᑭᓕᒃ ᐊᖅᓴᕐᓂᕐᓄᑦ. ᐊᖅᓴᕐᓃᑦ ᓴᖅᑭᓲᑦ ᑕᒪᒃᑮᓂ ᓄᓇᕐᔪᐊᑉ ᖄᖓᓂ ᐊᑖᓂᓗ. ᑖᓐᓇ ᓴᖅᑭᔮᖅᑎᑦᑎᕗᖅ ᐊᔾᔨᒌᖏᑦᑐᓂᒃ ᐅᖃᐅᓯᐅᔪᓂᒃ ᑕᕝᕙᓂ ᐊᑐᐃᓐᓇᖏᑦᑐᓂ ᓴᖅᑭᑕᐅᔪᓂ, ᓴᖅᑭᔮᖅᑎᑦᑎᓪᓗᑎᒃ ᖃᐅᔨᓴᕐᓂᕐᓂᒃ ᐃᓱᒪᓇᖏᑦᑐᓂᒡᓗ ᐃᓱᒪᓂᕐᓂᒃ ᑕᒪᒃᑮᓂ ᐅᑭᐅᖅᑕᖅᑐᒥ ᓄᓇᕐᔪᐊᓪᓗ ᐊᑖᓂ.

ᐅᖃᓕᒫᒐᑦᑕ ᖄᖓᓂ, ᒪᕐᕉᒃ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓄᓇᓂ ᐱᓕᕆᔨᖏᑦ ᐃᑲᔪᖅᐳᑦ ᖃᐅᔨᓴᖅᑎᓂᒃ ᒥᑎᕈ-ᕗᕋᓐᔅᒥᑦ ᖃᐅᔨᓴᖅᑐᓂᒃ ᐊᐳᑎᓂᒃ. ᐅᖃᓕᒫᕐᓂᐊᕋᕕᑦ ᐅᖃᐅᓯᐅᓪᓗᐊᑕᖅᑐᒥ ᐅᓂᒃᑳᒥ, ᖃᐅᔨᓴᖅᑐᑦ ᖃᐅᔨᓴᓚᐅᕐᒥᔪᑦ ᐊᐳᑎᓂᒃ ᐃᐊᒃᔅᕋᐃᖅᖢᒋᑦ. ᒥᑎᕈ-ᕗᕋᓐᔅ ᓴᖅᑭᔮᖅᑎᑦᑎᕗᑦ ᓄᓇᕐᔪᐊᒥᐅᓂᑦ ᑎᒥᒥᒃ ᑎᑭᓚᐅᖅᑐᓄᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ (ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᒃ) ᐃᓕᒃᑲᓐᓂᕆᐊᖅᑐᖅᖢᑎᒃ ᖃᓄᖅ ᐅᑭᐅᖅᑕᖅᑑᑉ ᐊᐳᑎᖏᑦ ᐊᒃᑐᐃᖕᒪᖔᑕ ᓄᓇᕐᔪᐊᑉ ᓯᓚᖏᓐᓂᒃ. ᓴᖅᑭᔮᖅᑎᑦᑎᑦᑎᐊᖅᑐᓪᓛᓗᒃ ᐃᓚᖏᓐᓂᒃ ᑲᑐᔾᔨᖃᑎᒌᖕᓂᕐᓂᒃ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᑐᖃᑦᑕᖅᑕᖏᓐᓂᒃ ᖃᐅᔨᓴᖅᑎᓄᑦ ᖃᐅᔨᓴᕐᓂᕐᓄᓪᓗ ᑎᒥᓄᑦ ᑲᓇᑕᒥ ᓄᓇᕐᔪᐊᕐᒥᓗ.

ᐃᓗᐊᓂ, ᓇᓂᓯᓂᐊᖅᑐᑎᑦ ᐅᓂᒃᑳᖅᑐᓂᒃ ᐱᓕᕆᔭᐅᔪᓄᑦ ᐊᐅᓚᑕᐅᔪᓄᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᖃᐅᔨᓴᖅᑎᖏᓐᓄᑦ, ᐱᖃᓯᐅᖦᖢᒋᑦ ᖃᐅᔨᓴᖅᑐᓂᑦ ᓄᓇᐃᑦ ᓯᕐᒥᖏᓐᓂᒃ, ᒫᓯᓂᒃ ᖁᐱᕐᕈᓂᒃ ᓯᓚᓂᒡᓗ. ᐅᖃᓕᒫᕐᓂᐊᕐᒥᔪᑎᑦ ᐃᓚᖏᓐᓂᒃ ᐃᓄᐃᑦ, ᓯᓚᑦᑐᖅᓴᕐᕕᒡᔪᐊᑦ, ᑕᑯᔭᒐᖃᕐᕖᑦ, ᐊᓰᓪᓗ ᖃᐅᔨᓴᕐᓂᕐᓄᑦ ᑎᒦᑦ ᑲᑐᔾᔨᖃᑎᒋᖃᑦᑕᖅᑕᑦᑎᓐᓄᑦ ᐱᓕᕆᔪᓄᑦ ᐃᓱᒪᖕᓇᖏᑦᑐᓂᒃ ᖃᐅᔨᓴᕐᓂᕐᓂᒃ ᓯᕗᒧᐊᖅᑎᑦᑎᓇᓱᒃᖢᑎᒃ ᖃᐅᔨᒪᔭᔭᑦᑎᓐᓂᒃ ᐅᑭᐅᖅᑕᖅᑑᑉ ᓄᓇᖏᓐᓂ. ᑕᑯᓇᒃᑐᑦ ᐃᖂᑎᓂᒃ, ᖁᐱᕐᕈᕋᓛᓂᒃ ᓯᕐᒥᓂ, ᓅᓲᓂᒃ ᑎᖕᒥᐊᓂᒃ, ᐅᒥᖕᒪᖕᓂᒃ, ᓄᓇᓕᖕᓂ ᖁᐊᒃᑯᕕᖕᓂᒃ, ᑭᒍᑕᖏᕐᓇᓂᒃ ᐊᓯᒃᑲᓐᓂᓂᒡᓗ.  

ᑖᒃᑯᓇᓂ ᐅᖃᓕᒫᒐᓂ, ᐊᓕᐊᓇᐃᒍᓱᖕᒥᔪᒍᑦ ᐅᖃᐅᓯᕆᔪᓐᓇᕋᑦᑎᒍᑦ ᕿᒪᒃᑕᑦᑎᓐᓂ ᖃᓄᐃᓚᐅᖅᑐᑐᓄᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᑦ ᐊᓂᒍᖅᑐᓂ 10 ᐊᕐᕌᒍᓂ ᓴᓇᔭᐅᓂᖓᓄᓪᓗ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᑉ. ᐅᐱᑦᑐᒍᑦ ᐱᓕᕆᔭᐅᓯᒪᔪᓄᑦ ᐅᓪᓗᒥᒧᑦ, ᐃᓚᐅᓂᕗᓪᓗ ᐊᔪᕈᓐᓃᖅᑎᖦᖢᒋᑦ ᐊᔾᔨᒌᖏᑦᑐᓄᑦ ᖃᐅᔨᓴᕐᓃᑦ ᑲᓇᑕᒥᐅᑦ ᐅᑭᐅᖅᑕᖅᑐᐊᓂ ᐅᖓᑖᓄᓪᓗ.

ᑐᙵᓴᖅᐸᒋᑦ ᑕᑯᓇᒡᓗᒋᑦ ᑖᒃᑯᐊ ᐊᖅᑲᓕᐊᑦ ᖃᐅᔨᒃᑲᓐᓂᕐᓗᑎᑦ ᑖᒃᑯᓄᖓ ᑲᒪᓇᖅᑐᓄᑦ ᖃᐅᔨᓴᖅᑐᓄᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐃᑲᔪᖅᓯᒪᔭᖏᓐᓄᑦ ᓯᕗᓪᓕᖅᐹᑦᑎᓐᓄᑦ 10ᓄᑦᐊᕐᕌᒍᓄᑦ.

ᑕᐃᕕᑦ ᕼᐃᒃ, PhD 

ᖃᐅᔨᓴᖅᑎᓪᓗᐊᑕᖅ ᑐᒡᓕᕐᓗ ᐊᖓᔪᖅᑳᒧᑦ, ᖃᐅᔨᓴᕐᓃᑦ

ᓇᓗᓇᐃᖅᓯᒪᔪᖅ - ᓇᓗᓇᐃᖅᓯᒪᔪᑦ: ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᕈᐊᕋ ᓴᓇᐅᒐᒥᒃ ᐃᓕᓯᓂᖓᑦ ᓯᓚᑖᓂ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᑉ (ᑕᑯᒍᒃ ᒪᒃᐱᒐᖅ 17)

ᑐᓴᒐᒃᓴᑦ ᐊᖓᔪᖅᑳᖑᓚᐅᑲᒃᑐᒥᑦ ᐊᖓᔪᖅᑳᖓᓂᓪᓗ ᓯᕗᓕᖅᑎᒃᑯᑦ ᐱᓕᕆᔨᖓᓂᑦ

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᖁᕕᐊᓲᑎᖃᕐᓂᐊᖅᑐᑦ ᓇᓪᓕᐅᑎᓂᕐᒥᓂᒃ ᔫᓂᒥ. ᐊᓕᐊᓇᐃᒍᓱᒃᑐᒍᑦ ᐳᐃᒍᔾᔭᐃᕐᓂᐊᕋᑦᑎᒍᑦ ᑖᓐᓇ ᑎᑭᓐᓂᖅ ᑖᔅᓱᒧᖓ ᐱᑐᐃᓐᓇᐅᖏᑦᑐᒧᑦ ᐅᖃᓕᒫᒐᒧᑦ ᐊᖅᑲᓕᐊᑦ.

ᕿᒪᒃᑕᑦᑎᓂ ᐊᖅᑲᓕᐊᑦ ᐅᓂᒃᑳᕗᑦ ᑐᕌᖓᓚᐅᖅᑐᑦ ᐅᑭᐅᖅᑕᖅᑐᓂ ᖃᐅᔨᓴᕐᓂᖏᓐᓄᑦ ᑭᓯᐊᓂ ᑎᑎᕋᖅᓯᒪᓪᓗᓂ ᓯᓚᑦᑐᖅᓴᕐᕕᒡᔪᐊᓅᓂᖅᓴᓄᑦ. ᑖᒃᑯᐊ ᐅᖃᓕᒫᒐᒃᓴᑦ ᐅᓄᕐᓂᖅᓴᓄᑦ ᐃᓄᖕᓄᑦ ᐱᐅᒋᔭᐅᖁᓚᐅᕋᑦᑎᒍᑦ. ᑕᐃᒪᐃᒻᒪᑦ ᐅᖃᓕᒫᒐᑎᑐᑦ ᓴᓇᓯᒪᕗᑦ, ᐊᔾᔨᑦᑎᐊᕚᓗᖃᖅᖢᑎᒃ ᐅᓂᒃᑳᓂᒡᓗ, ᑖᔅᓱᒧᖓ 10ᓄᑦ ᐊᕐᕌᒍᓄᑦ ᓇᓗᓇᐃᖅᓯᔪᕐᒧᑦ. ᖃᓄᖅ ᐱᐅᓂᖅᓴᐅᕙ ᓴᖅᑭᔮᖅᑎᓪᓗᒋᑦ ᑲᓇᑕᒥᐅᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᒃ ᐅᖃᐅᓰᓗᒋᓪᓗ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐅᓂᒃᑳᖏᑦ ᑲᓇᑕᒥᐅᓕᒫᓄᑦ?

ᐊᓂᒍᖅᑐᓂ 10 ᐊᕐᕌᒍᓂ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐃᑲᔪᖅᓯᒪᕗᑦ ᐊᔾᔨᒋᖏᑦᑐᓂᒃ ᖃᐅᔨᓴᕐᓂᕐᓄᑦ ᐱᓕᕆᔪᓂᒃ ᖃᐅᔨᓴᖅᑎᓂᑦ ᖃᐅᔨᒪᔭᐅᔪᓂᒃ ᑎᒍᒥᐊᖅᑎᓂᓪᓗ ᑲᓇᑕᒥ ᓄᓇᕐᔪᐊᕐᒥᓗ. ᑖᒃᑯᐊ ᖃᐅᔨᓴᖅᑏᑦ ᐱᓕᕆᔭᖏᑦ ᓯᕗᒧᐊᖅᑎᑦᑎᓯᒪᕗᑦ ᖃᐅᔨᒪᔭᐅᔪᓂᒃ ᐅᑭᐅᖅᑕᖅᑐᓂ ᓄᓇᖏᓐᓂ. ᐅᐱᑦᑐᒍᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑮᓇᐅᔭᑎᒍᑦ ᐊᒃᑭᓯᔪᑎᒍᓪᓗ ᐃᑲᔪᕐᓂᖏᑦ ᐃᑲᔪᖅᓯᒪᖕᒪᑕ ᑖᒃᑯᓂᖓ ᐱᓕᕆᔭᐅᔪᓂᒃ.

ᖃᔅᓰᑦ ᐱᓕᕆᔭᐅᔪᑦ ᑕᕝᕙᓂ ᐱᖃᓯᐅᔾᔭᐅᔪᑦ. ᐱᑕᖃᑦᑎᐊᕋᓗᐊᖅᑎᓪᓗᒍ ᑲᔪᓯᑦᑎᐊᖅᑐᓂᑦ ᖃᐅᔨᓴᕐᓂᕐᓂᑦ ᐅᓂᒃᑳᓂᒃ ᐅᖃᐅᓯᕆᔪᓐᓇᖅᑕᑦᑎᓐᓂᒃ, ᓂᕈᐊᖅᓯᒪᕗᒍᑦ ᐅᓂᒃᑳᓂᒃ ᓴᖅᑭᔮᖅᑎᑦᑎᔪᓂᒃ ᖃᓄᕈᓘᔭᐅᔪᓂᒃ ᖃᐅᔨᓴᖅᑐᓂᒃ ᑲᓇᑕᐅᑉ ᐅᐊᖕᓇᖓᓂ. ᖃᐅᔨᒪᕗᒍᑦ ᓱᓕᒃᑲᓐᓂᓪᓚᒃ ᐱᓕᕆᔭᕆᐊᓖᑦ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᓕᐊᓇᐃᒍᓱᒃᐳᑦ ᐃᓚᐅᒐᒥᒃ ᑲᔪᓰᓐᓇᖅᑐᓂᒃ ᓯᕗᓂᕐᒥᓗ ᐅᑭᐅᖅᑕᖅᑐᓂ ᖃᐅᔨᓴᕐᓂᖏᓐᓂ. 

ᑖᒃᑯᓇᓂ ᒪᒃᐱᒐᓂ, ᑕᑯᐊᕐᔪᖕᓂᐊᖅᑐᑎᑦ ᐃᓚᖏᓐᓂᒃ ᑲᒪᓇᖅᑐᓂᒃ ᖃᐅᔨᓴᕐᓂᕐᓂᒃ-ᓄᑖᓂᒃ ᐃᓱᒪᓇᖏᑦᑐᓂᒃ, ᓴᓇᐅᒐᓂᒃ, ᑭᒡᓕᓯᓂᐊᕐᓂᕐᓂᒃ ᐅᑭᐅᖅᑕᖅᑐᓂ ᖃᐅᔨᒪᔭᖏᓐᓂᒡᓗ—ᑲᓇᑕᐅᑉ ᐅᑭᐅᖅᑕᖅᑐᐊᓂ ᓄᓇᕐᔪᐊᓪᓗ ᐊᑖᓂ.

ᐊᓕᐊᓇᐃᒋᒃᑭᑦ ᐅᖃᓕᒫᕐᓗᒋᑦ ᑕᕝᕙᓂ ᓴᖅᑭᑕᐅᔪᓂ ᐊᖅᑲᓕᐊᑦ. 

ᓱᓴᓐ (ᓱ) ᑭᐊᕐ, CPA, CGA 
ᐊᖓᔪᖅᑳᖑᓚᐅᑲᒃᑐᖅ ᐊᖓᔪᖅᑳᕐᓗ ᓯᕗᓕᖅᑎᓄᑦ ᐱᓕᕆᔨ

ᑲᑎᒪᔩᑦ

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᒪᔨᖏᑦ ᐱᓕᕆᐊᒃᓴᖃᖅᐳᑦ ᐊᐅᓚᑦᑎᓂᕐᓂᒃ ᑎᒥᒥᒃ. ᐃᓚᖏᑦ ᓂᕈᐊᖅᑕᐅᓪᓗᑎᒃ ᐊᑭᑦᑐᕋᐅᑎᔪᓄᑦ ᑎᒃᑯᐊᖅᑕᐅᓪᓗᑎᒡᓗ ᑎᓕᐅᕈᑎᒧᑦ-ᑲᑎᒪᔨᓂᑦ- ᑐᙵᓪᓗᑎᒃ ᐊᑐᖅᓯᒪᔭᕐᒥᓄᑦ, ᖃᐅᔨᒪᔭᐅᔪᓄᑦ ᖃᓄᑎᒋᓗ ᐃᑲᔪᕈᓐᓇᕐᒪᖔᑕ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐱᓕᕆᐊᒃᓴᖏᓐᓄᑦ.

ᐃᒃᓯᕙ ᐅ ᑕᖅᑐᓂ – ᔭᓇᑦ ᑭᖕ, PhD

ᐊᖓᔪᖅᑳᑉ ᑐᒡᓕᐊ – ᑕᐃᕕᑦ ᕋ. ᒧᐊᕐ, PEng

ᑲᑎᒪᔨ – ᑭᐊᕆᓐ ᐸᕐᓇᔅ, PhD

ᑲᑎᒪᔨ – ᒪᕆᐸᑦ ᓴ. ᒧᕆ, PhD

ᑲᑎᒪᔨ – ᑕᐃᕕᑦ H. ᑐᕐᐱᓐ, CM, PhD, LLD, DSc, FRSC

ᑲᑎᒪᔨ – ᒃᓚᐃᕝ ᑎᐊᔅᓚ

ᑲᑎᒪᔨ – ᒥᓯᐊᓪ ᒋᓕᔅ

ᐅᑭᐅᖅᑕᖅᑐᓂ ᖃᐅᔨᒪᔭᐅᔪᑦ: ᑲᑎᙵᔪᑦ ᑭᒡᓕᓯᓂᐊᕐᓃᑦ ᓄᓇᖃᖅᑳᖅᑐᑦ ᖃᐅᔨᒪᔭᖏᓪᓗ

“ᐅᕙᒍᑦ [ᑲᓇᑕᒥᐅᑦ] ᐃᓱᒪᒋᒐᑦᑕ ᐅᕙᑦᑎᓂᒃ ᐅᑭᐅᖅᑕᖅᑐᒥᐅᑎᑐᑦ ᐅᑭᐅᖅᑕᖅᑐᒥᓗ ᓄᓇᓕᒃᑎᑐᑦ ᐊᓱᐃᓛᒃ ᓈᓚᖃᑦᑕᖅᐳᒍᑦ ᖃᓄᐃᑦᑐᓄᑦ ᐅᑭᐅᖅᑕᖅᑐᒥ ᐃᓄᖏᓐᓄᓪᓗ ᐊᕙᑎᖏᓐᓄᓪᓗ,” ᐅᖃᖅᑐᖅ ᕕᑦ ᕗᕋᐃᓱ, ᐃᒃᓯᕙᐅᑕᖅ ᑲᓇᑕᒥᐅᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᒪᔨᖏᓐᓄᑦ 1991ᒥᑦ 1999ᒧᑦ. “ᓵᑦᑕᕆᐊᖃᕐᓂᖏᑦ ᑭᒡᓕᓯᓂᐊᕐᓂᕐᓄᑦ ᐊᑲᐅᙱᓗᕈᑏᑦ ᐱᓂᖅᓴᓪᓚᐅᓕᖅᑐᖅ ᐅᓪᓗᒥ, ᐊᒃᓱᑲᓪᓚᒃ, ᒐᕙᒪᖓᑕ ᑲᓇᑕᐅᑉ ᓴᓇᓚᐅᖅᑎᓪᓗᓂᖏᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᒪᔨᖏᑦ. ”

ᓄᓇᕐᔪᐊᑉ ᓯᓚᖓ ᐊᓯᔾᔨᖅᓯᒪᓕᖅᑐᖅ ᐅᔾᔨᕐᓇᖅᖢᓂ ᑕᐃᒪᙵᓂᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᒪᔨᖏᑦ ᓴᓇᔭᐅᓚᐅᖅᑎᓪᓗᒋᑦ 1991ᒥ ᑎᓕᐅᕆᔨᐅᓂᐊᕋᒥᒃ ᒐᕙᒪᑐᖃᓂᒃ

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐱᓕᕐᔭᖏᓐᓄᑦ. 2000 ᐱᒋᐊᕐᓂᖏᓐᓂ, ᐅᑭᐅᖅᑕᖅᑐᖅ ᐅᖅᑰᓯᓯᒪᕗᖅ ᐅᖅᑰᓯᓂᖓ ᓱᒃᑲᓂᖅᓴᐅᓪᓗᓂ ᓄᓇᕐᔪᐊᕐᒥᐅᓕᒫᓂᑦ. ᑖᓐᓇ ᑲᔪᓰᓐᓇᖅᑐᖅ ᐊᒃᑐᐃᓂᖃᓪᓚᒃᖢᓂ ᐅᑭᐅᖅᑕᖅᑐᒥᐅᓄᑦ.

 ᕕᑦ ᐅᖃᖅᑐᖅ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᒪᔨᖏᑦ ᐃᓱᒫᓗᓚᐅᕐᒪᑕ ᓵᑕᕆᐊᒃᓴᖅ ᐊᒃᑐᐊᖏᓐᓂᕐᓂᒃ ᓯᓚᑦᑐᖅᓴᕐᕕᒡᔪᐊᓂᑦ ᑭᒡᓕᓯᓂᐊᕐᓂᕐᓂᑦ ᖃᐅᔨᒪᔭᑐᖃᓂᓪᓗ ᐅᑭᐅᖅᑕᖅᑐᒥᐅᓂᑦ. ᑐᑭᓯᓗᒋᑦ ᐅᑭᐅᖅᑕᖅᑑᑉ ᐊᓯᔾᔨᕐᓂᖏᑦ ᓴᓇᓚᐅᖅᑐᑦ ᐱᕕᒃᓴᒥᒃ ᑲᑐᔾᔨᒃᑲᓐᓂᕐᓗᑎᒃ ᖃᐅᔨᓴᕐᓂᕐᓂᒃ ᑭᒡᓕᓯᓂᐊᖅᑎᓂᑦ ᐃᓄᖕᓂᓪᓗ ᐊᑐᖅᑐᓂᒃ ᐊᓯᔾᔨᖅᑐᓂᒃ ᑕᕝᕙᙵᑲᐅᑎᒋᒥᑦ.

ᕕᑦ ᐅᖃᖅᐳᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ (ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ) ᓴᓇᔭᐅᒐᒥᒃ 2015ᒥ, ᐃᓚᖏᑦ ᐊᒃᓱᕉᑕᐅᓚᐅᖅᑐᑦ ᐊᒃᑐᖅᑎᓪᓗᒋᑦ ᐊᒃᑐᐊᖏᓐᓂᐅᔪᑦ ᑭᒡᓕᓯᓂᐊᕐᓂᒃᑯᑦ ᖃᐅᔨᓴᕐᓂᕐᓂᑦ ᓄᓇᖃᖅᑳᖅᑐᑦ ᖃᐅᔨᒪᔭᖏᓐᓄᓪᓗ, ᐃᑲᔪᕐᓗᒋᑦ ᐅᑭᐅᖅᑕᖅᑐᒥ ᖃᐅᔨᓴᕐᓃᑦ ᐱᓕᕆᔪᓪᓗ.

 ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓴᓇᔭᐅᓚᐅᖅᓯᒪᔪᑦ ᑲᓇᑕᒥᐅᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᓂᕐᒥᑦ ᐱᖁᔭᕐᔪᐊᒧᑦ, ᐊᑐᓕᖅᖢᓂ ᔫᓂ 1, 2025ᒥ. ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᑦᑎᓚᐅᖅᑐᑦ ᐊᑐᒐᒃᓴᓂᒃ ᖃᐅᔨᒪᔭᐅᔪᓂᒡᓗ ᑲᓇᑕᒥᐅᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᒪᔨᖏᓐᓂᑦ ᑕᐃᔅᓱᒪᓂᓗ ᑭᒡᓕᓯᓂᐊᕐᓂᕐᓄᑦ ᓴᓇᐅᒐᓄᓪᓗ ᐱᓕᕆᔪᓂᑦ ᓄᓇᖃᖅᑳᖅᑐᓄᑦ ᐱᓕᕆᔩᑦ ᐅᑭᐅᖅᑕᖅᑐᒥᒡᓗ ᓴᓇᓃᑦ ᑲᓇᑕᒥ (ᒫᓐᓇ ᑭᖕᒧᑦ –ᓄᓇᖃᖅᑳᖅᑐᓄᑦ ᐱᓕᕆᖃᑎᒌᑦ ᐅᑭᐅᖅᑕᖅᑐᓕᕆᔨᑯᓪᓗ ᑲᓇᑕᒥ), ᐊᑕᐅᓯᕐᒧᑦ ᑎᒥᒧᑦ.

 ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓴᓇᔭᐅᓚᐅᖅᑐᑦ ᑐᙵᕕᐅᓂᐊᕋᒥᒃ ᑭᒡᓕᓯᓂᐊᕐᓂᕐᓄᑦ

ᐅᑭᐅᖅᑕᖅᑐᓂ ᖃᐅᔨᓴᕐᓂᖏᓐᓄᑦ, ᓯᕗᓕᖅᑎᐅᓗᑎᒃ ᐅᑭᐅᖅᑕᖅᑐᒥ ᐊᑲᐅᙱᓕᐅᕈᑎᓄᑦ, ᐊᐅᓚᓪᓗᒍᓗ ᑲᓇᑕᒥᐅᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᒃ. ᐱᓕᕆᐊᒃᓴᖃᖅᐳᑦ ᑐᓴᐅᒪᔭᐅᑎᓪᓗᒋᑦ ᑐᑭᓯᓇᓱᒡᓗᒋᓪᓗ ᖃᐅᔨᒪᔭᐅᔪᑦ ᐅᑭᐅᖅᑕᖅᑐᓂ ᓄᓇᖏᓐᓂᑦ, ᑕᒪᒃᑮᖕᓂᑦ ᓄᓇᕐᔪᐊᑉ ᖄᖓᓂᑦ ᐊᑖᓂᓪᓗ. ᓯᕗᒧᐊᖅᑎᓪᓗᒋᑦ ᖃᐅᔨᒪᔭᐅᔪᑦ ᐱᐅᓯᒋᐊᕈᑎᒋᓗᒋᑦ ᐊᕙᑎᓕᕆᓂᕐᓂᒃ ᐸᖅᑭᔨᐅᓂᕐᓂᒃ, ᑮᓇᐅᔭᑎᒍᑦ ᐱᕕᒃᓴᓂᒃ, ᐃᓅᓯᖃᑦᑎᐊᕐᓂᕐᓄᓪᓗ ᑲᓇᑕᐅᑉ ᐅᑭᐅᖅᑕᖅᑐᓂ ᓄᓇᖃᖅᑎᖏᓐᓄᑦ ᑐᙵᕕᐅᓪᓚᒃᐳᖅ ᑎᒥᒧᑦ.

 ᐊᓐᓄᕈ ᐊᐳᔭᓐ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓯᕗᓕᖅᑎᓄᑦ ᑐᑭᒧᐊᒃᑎᑦᑎᔨᖓ ᐱᓕᕆᔭᐅᔪᓄᑦ, ᐊᖏᖅᑐᖅ ᕕᑦᒧᑦ ᐅᑭᐅᖅᑕᖅᑐᒥ ᖃᐅᔨᓴᕐᓃᑦ ᑲᑎᑎᑦᑎᔭᕆᐊᓖᑦ ᑕᒪᒃᑮᖕᓂᒃ ᖃᓪᓗᓈᑦ ᖃᐅᔨᓴᕈᓯᖏᓐᓂᒃ ᓄᓇᖃᖅᑳᖅᑐᑦ ᖃᐅᔨᒪᔭᖏᓐᓂᒡᓗ.

 “ᐅᓄᖅᑐᑎᒍᑦ, ᑲᓇᑕᐅᑉ ᐅᑭᐅᖅᑕᖅᑐᐊ ᐱᒋᐊᕈᑕᐅᓚᐅᖅᑐᖅ ᑭᒡᓕᓯᓂᐊᕐᓂᕐᓄᑦ ᐅᖓᓯᒃᑲᒥ. ᐅᑭᐅᖅᑕᖅᑐᒥᐅᓪᓗ ᑲᓇᑕᒥᐅᑦ, ᐱᓗᐊᖅᑐᒥ ᐅᖓᓯᒃᑐᓂ ᓄᓇᓕᖕᓂ, ᖃᐅᔨᓴᖅᑕᐅᓪᓚᓚᐅᖅᑐᑦ, ᑖᒃᑯᐊᓗ ᖃᐅᔨᔭᐅᔪᑦ ᖃᐅᔨᓴᖅᑐᓂᑦ ᐃᑲᔫᑕᐅᓚᐅᖅᓯᒪᓇᑎᒃ ᑐᓴᖅᑎᑕᐅᔾᔪᑕᐅᓗᑎᒡᓘᓐᓃᑦ ᐃᓄᖕᓄᑦ ᖃᐅᔨᓴᖅᑕᐅᔪᓄᑦ,” ᐅᖃᖅᑐᖅ ᐊᓐᓄᕈ. “ᑎᒥᐅᓪᓗᑕ, ᐃᓱᒪᔪᖓ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐱᕕᒃᓴᖃᖅᐳᑦ ᐊᓯᔾᔨᕐᓗᒍ ᑖᓐᓇ ᑎᐊᒪᐃᓕᖓᔪᖅ, ᐃᑲᔪᕐᓗᑎᒡᓘᓐᓃᑦ ᐊᓯᔾᔨᖃᑕᐅᓗᒍ ᑖᓐᓇ ᑕᐃᒪᐃᓕᖓᔪᖅ. ᐃᑲᔪᕐᓗᓂ ᐊᒃᓱᓪᓕ ᑐᓴᖅᑎᓪᓗᒋᑦ ᖃᐅᔨᓴᖅᑏᑦ, ᓯᓚᑖᓂᙶᖅᑐᑦ ᐅᑭᐅᖅᑕᖅᑑᑉ, ᑐᙵᕗᖅ ᑕᐃᒃᑯᓄᖓ ᓴᓇᓗᑎᒃ ᑐᑭᖃᖅᑐᓂᒃ ᑕᐃᒪᐃᓕᖓᐃᓐᓇᕐᓂᐊᖅᑐᓂᒃ, ᐊᑯᓂᒧᑦ ᐱᓕᕆᖃᑎᒌᖕᓂᕐᓂᒃ ᐃᓄᖕᓄᑦ ᐱᔨᑦᑎᕋᖅᑕᒥᓄᑦ.”  

 ᕆᑦᓱᑦ ᐳᑐᕈ, PhD, ᑎᒃᑯᐊᖅᑕᐅᓚᐅᖅᑐᖅ ᐃᒃᓯᕙᐅᑕᕐᒧᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᒪᔨᖏᓐᓄᑦ ᔪᓚᐃ 2015ᒥ. ᕆᑦᓱᑦ ᐃᖅᑲᐅᒪᕗᖅ ᓯᕗᓂᕐᒥ ᐊᒃᓱᕉᑕᐅᓚᐅᖅᑐᓄᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᑦ, ᐅᖃᖅᖢᓂ ᐱᕈᖅᓴᓪᓗᓂ ᐊᒃᓱᕉᑏᑦ ᑕᐃᒪᐃᓲᖑᖕᒪᑕ ᓇᓕᐊᑐᐃᓐᓇᕐᓄᑦ ᑎᒥᐅᓕᓵᖅᑐᓄᑦ. ᐊᓯᔾᔨᖅᑐᓂ ᒐᕙᒪᓂ ᑕᖅᑮᑦ ᖃᔅᓰᑦ ᐊᓂᒍᖅᑎᓪᓗᒋᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓴᓇᔭᐅᓂᖓᓂᑦ ᓱᒃᑲᐃᔾᔪᑕᐅᓚᐅᖅᑐᖅ ᓯᕗᒧᐊᕐᓂᕐᓄᑦ, ᑲᑎᒪᔩᑦ ᐱᓕᕇᓐᓇᕋᓗᐊᖅᑎᓪᓗᒋᑦ ᐊᑐᐊᒐᓄᑦ, ᐱᓕᕆᔾᔪᓯᕐᓄᑦ ᐱᓯᓇᓯᒧᓪᓗ ᐸᕐᓇᐅᑎᒧᑦ ᑐᕌᖓᑎᓪᓗᒋᑦ ᓴᓇᓂᕐᒧᑦ ᓄᑖᖑᓛᓄᑦ ᖃᐅᔨᓴᕐᕕᖕᒥ ᐅᑭᐅᖅᑕᖅᑐᒥ.  

 “ᐊᒻᒪᓗ, ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᐃᒃᐱᒋᔭᐅᑦᑎᐊᖅᑎᑦᑕᕆᐊᖃᓚᐅᖅᑕᕗᑦ ᑭᓱᓕᒫᓂ ᐱᓕᕆᔭᑦᑎᓐᓂ, ᐅᖃᖅᑐᖅ ᕆᑦᓱᑦ. “ᐊᑎᓕᐅᓚᐅᖅᑐᒍᑦ ᐊᖏᖃᑎᒌᒍᑎᒥᒃ ᓈᒻᒪᒋᔭᐅᔪᒥᒃ ᓯᕗᓕᖅᑎᑦᑎᓐᓄᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᓪᓗ [ᐃᑦᒃ]. ᓴᖅᑭᔮᖅᑎᑦᑎᓚᐅᖅᑐᖅ ᓯᕗᒧᐊᖅᑐᒍᑦ ᐱᔭᒃᓴᖃᖅᖢᑕᓗ ᑐᒃᓯᕋᐅᑕᐅᔪᓂᒃ ᐅᑭᐅᖅᑕᖅᑐᒥᐅᑦ ᓄᓇᓕᖕᓂᑦ ᖃᓄᖅ ᖃᐅᔨᓴᕈᓐᓇᕐᒪᖔᑕ ᐅᑭᐅᖅᑕᖅᑐᒥ.” ᐅᖃᒃᑲᓐᓂᕐᒥᕗᖅ, “ᐅᕙᓐᓄᓪᓕ, ᐱᕐᔪᐊᖑᓚᐅᖅᑐᖅ ᑖᓐᓇ ᓴᖅᑭᖁᓚᐅᕋᒃᑯ ᐅᓪᓗᕐᒥᑦ ᐱᒋᐊᕐᓂᖓᓂᑦ.”

ᔭᐃᓴᓐ ᑐᓗᒐᓇᒃ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑐᑭᒧᐊᒃᑎᑦᑎᔨᖓᑦ ᖃᐅᔨᒪᔭᐅᔪᓄᑦ ᐊᐅᓚᑦᑎᓂᕐᓄᑦ ᑲᑎᖃᑎᖃᕐᓂᕐᓄᓪᓗ, ᐊᖏᖅᑐᖅ ᐱᕈᖅᓴᐃᓗᓂ ᖃᐅᔨᒪᔭᐅᔪᓂᒃ ᐅᑭᐅᖅᑕᖅᑐᕐᒥᑦ ᐱᓕᕆᔭᐅᑦᑎᐊᓛᖑᔪᓐᓇᖅᑐᖅ ᑲᑐᔾᔨᓂᒃᑯᑦ ᑎᒍᒥᐊᖃᑕᐅᔪᓕᒫᓂᑦ.

 “ᑕᐃᒪᐃᑦᑎᑦᑎᓪᓚᑦᑖᕈᒪᓚᐅᕋᑦᑕ ᖃᐅᔨᓴᕐᓂᑐᐊᑦ ᐅᑎᖏᓪᓗᑎᒃ ᓄᓇᓕᖕᓄᑦ, ᑭᓯᐊᓂ ᑖᒃᑯᐊ ᖃᐅᔨᓴᖅᑕᐅᓪᓚᑦᑖᖅᑐᑦ ᓄᓇᓕᖕᒥᐅᓂᑦ ᐅᑭᐅᖅᑕᖅᑐᒥᐅᓂᓪᓗ ᐱᒻᒪᕆᕙᐃᑦ ᐱᕐᔪᐊᑎᑐᑦ ᑐᑭᓕᒃᑎᑐᓪᓗ, “ ᐅᖃᖅᑐᖅ ᔭᐃᓴᓐ. ᐅᖃᖅᑐᖅ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑐᕌᖅᑐᑦ ᑕᐃᒪᐃᑦᑎᑦᑎᓗᑎᒃ ᐱᕈᖅᓴᐃᓗᑎᒃ ᑲᑐᔾᔨᖃᑎᒌᖕᓂᕐᓂᒃ ᐱᓕᕆᖃᑎᒌᓂᒃ ᑲᑐᔾᔨᓗᑎᒃ ᐱᓕᕆᓗᑎᒡᓗ ᑕᒪᒃᑮᓄᑦ ᖃᓄᐃᖁᔭᐅᔪᓄᑦ.

“ᑲᑎᑦᑎᔪᒍᑦ ᓯᓚᑦᑐᖅᓯᒪᔪᕐᓂᒃ, ᓯᓚᑦᑐᖅᓴᕐᕕᒡᔪᐊᓂᒡᓗ ᑲᑎᑎᖦᖢᒋᑦ ᑲᑎᑦᑎᔪᒍᑦ ᖃᐅᔨᓴᖅᑎᓂᒃ ᖃᐅᔨᒪᔨᑕᕐᓂᒡᓗ ᑲᑎᑎᖦᖢᒋᑦ. ᑲᑎᑎᑦᑎᖕᒥᔪᒍᑦ ᓄᓇᓕᖕᓂ ᓯᕗᓕᖅᑎᓂᒃ ᓄᓇᓕᖕᓂ ᖃᐅᔨᒪᔨᑕᕐᓂᒃ ᑕᑯᓯᒪᔪᕐᓂᒃ ᐃᒻᒥᓂᒃ ᑖᒃᑯᓂᖓ ᐊᓯᔾᔨᕐᓂᕐᓂᒃ ᐃᓅᓯᕐᒥᓂ, ᐊᖑᓇᓱᒃᑐᓕᕆᔨᓂᑦ ᒥᑭᒋᐊᕐᓂᐊᖅᑐᓕᕆᔨᓂᓪᓗ ᑲᑐᔾᔨᖃᑎᒌᓂᑦ, ᓄᓇᓕᖕᒥᐅᓪᓗ ᐃᓱᒪᒋᔭᖏᓐᓂᑦ ᐃᓄᖕᓂᑦ, ᐱᖃᓯᐅᖦᖢᒋᑦ. ᕿᓂᓪᓚᒃᑐᒍᓪᓗ ᖃᓄᖅ ᐃᓕᖅᑯᓯᑐᖃᒃᑯᑦ ᖃᐅᔨᒪᔭᐅᔪᑦ ᐱᒻᒪᕆᐅᒋᔭᐅᓗᑎᒃ ᐊᔾᔨᖏᑎᑐᑦ ᑭᒡᓕᓯᓂᐊᕐᓂᖅᑎᑐᑦ.”

 ᐅᓄᕐᓂᖅᓴᑦ ᐱᓕᕆᔭᐅᔪᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐃᑲᔪᖅᑕᖏᓐᓂᑦ ᐊᒃᑐᐊᑦᑎᐊᖅᑐᑦ ᓄᓇᓕᖕᓄᑦ ᖃᐅᔨᓴᕐᕕᐅᔪᓄᑦ. ᓴᖅᑭᔮᖅᑎᑦᑎᔪᖅ ᑖᔅᓱᒥᖓ CINUK ᐱᒋᐊᕈᑎᐅᕗᖅ, ᑲᓇᑕᐅᑉ-ᐃᓄᐃᑦ ᓄᓇᖓᑦ-ᐳᕆᑕᓐ ᓄᓇᖏᓐᓂ ᐅᑭᐅᖅᑕᖅᑐᒥ ᖃᐅᔨᓴᕐᓂᕐᓄᑦ ᐱᓕᕆᓂᖓᑦ 2021–25. ᑖᓐᓇ ᐱᖃᓯᐅᔾᔨᕗᖅ ᐃᓄᐃᑦ ᐃᓚᐅᑦᑎᐊᕐᓂᖏᓐᓂᒃ ᑲᑎᑦᑎᓪᓗᑎᒃ ᐳᕆᑕᓐ ᓄᓇᖏᓐᓂᑦ, ᑲᓇᑕᒥᐅᓂᒃ ᐃᓄᖕᓂᒡᓗ ᖃᐅᔨᓴᖅᑎᓂᒃ ᑲᑐᔾᔨᓗᑎᒃ ᖃᐅᔨᓴᕐᓂᕐᓄᑦ ᐱᕐᔪᐊᖑᔪᓄᑦ ᐃᓄᐃᑦ ᓄᓇᖓᓂ ᓄᓇᓕᖕᓄᑦ.

 ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐅᒃᐱᕈᓱᑦᑎᐊᖅᑐᑦ ᖃᐅᔨᓴᕐᓗᓂ ᑲᑐᔾᔨᖃᑎᒋᓗᒋᑦ ᑎᒍᒥᐊᖃᑕᐅᔪᓕᒫᑦ ᐱᔪᓐᓇᐅᑎᓖᓪᓗ ᑐᕌᕈᑕᐅᕗᖅ ᑐᑭᖃᕐᓂᖅᓴᓄᑦ, ᖃᐅᔨᓴᑦᑎᐊᖅᓯᒪᓂᖅᓴᐅᓂᕐᓄᑦ ᖃᐅᔨᒪᔭᐅᔪᓂᒡᓗ ᐊᑑᑎᖃᕐᓂᖅᓴᐅᔪᓄᑦ ᐅᑭᐅᖅᑕᖅᑐᒥᐅᓄᑦ ᑲᓇᑕᒥᐅᓕᒫᓄᓪᓗ.

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᖃᖓᒨᖓᔪᖏᑦ

ᐅᑐᐱᕆ 17, 2007– ᐳᕋᐃᒻ ᒥᓂᔅᑕ ᔅᑎᕙᓐ ᕼᐊᐳ ᐅᖃᖅᐳᖅ ᐸᕐᓇᒃᑐᑦ ᓴᓇᓗᑎᒃ ᓄᓇᕐᔪᐊᕐᒥᐅᓄᑦ ᓇᓕᒧᑦᑐᒥᒃ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥᒃ.
ᕕᕝᕗᐊᕆ 2009 – ᐃᖃᓗᒃᑑᑦᑎᐊᖅ, ᖃᐅᓱᐃᑦᑐᖅ ᒥᑦᑎᒪᑕᓕᒡᓗ ᓂᕈᐊᒐᒃᓴᐅᓕᖅᐳᑦ ᐃᓂᐅᔪᓐᓇᕐᓗᑎᒃ ᓄᑖᒧᑦ ᖃᐅᔨᓴᕐᕕᒃᓴᒧᑦ. .

ᐋᒡᒌᓯ 24, 2010 – ᐃᖃᓗᒃᑑᑦᑎᐊᖅ ᓂᕈᐊᖅᑕᐅᕗᖅ ᐃᓂᐅᓗᓂ ᑲᓇᑕᒥᐅᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ (ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᒃ). 

ᐋᒡᒌᓯ 13, 2012 – ᒐᕙᒪᒃᑯᑦ ᐅᖃᖅᑐᑦ $188 ᒥᓕᐊᓐ 6 ᐊᕐᕌᒍᓂ ᓇᓗᓇᐃᖅᑕᐅᕗᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ ᐱᖃᓯᐅᖦᖢᒋᑦ $142.4 ᒥᓕᐊᓐ ᓴᓇᔭᐅᓂᖓᓄᑦ, ᐱᖁᑎᓄᑦ ᐱᒋᐊᕈᑎᓄᓪᓗ ᐊᑭᓄᑦ; $46.2 ᒥᓕᐊᓐ ᑭᒡᓕᓯᓂᐊᕐᓂᕐᓄᑦ ᓴᓇᐅᒐᓄᓪᓗ ᖃᐅᔨᓴᕐᓂᕐᓄᑦ ᐱᓕᕆᓂᖓᓄᑦ.

ᓯᑎᐱᕆ 2012– EVOQ ᐱᓕᕆᓂᕐᒧᑦ ᑭᓱᓕᐅᖅᑎ ᐊᓚᐃᓐ ᕗᐊᓂᐊᐃ ᑲᑎᖃᖅᐳᖅ ᐃᖃᓗᒃᑑᑦᑎᐊᕐᒥᐅᓂᒃ ᐃᓐᓇᕐᓂᒃ, ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ ᑲᑎᒪᔨᖏᓐᓂᒃ, ᓄᓇᓕᖕᒥᐅᓂᒃ, ᓄᓇᕘᒥ ᐸᕐᓇᐃᔨᓂᒃ ᐃᓄᓕᒫᓄᓪᓗ ᑲᑎᒪᔨᓂᒃ ᐅᖃᐅᓯᕆᓪᓗᒋᑦ ᐃᒡᓗᒧᑦ ᐸᕐᓇᐅᑏᑦ.  

ᐋᒡᒌᓯ 23, 2014 – ᐳᕋᐃᒻ ᒥᓂᔅᑕ ᔅᑎᕙᓐ ᕼᐊᐳ ᐃᓚᐅᕗᖅ ᓄᓇᒥᒃ ᖃᓗᕋᖅᓯᓂᕐᒧᑦ ᐊᐅᓚᔾᔭᒃᖢᒍ ᓴᓇᔭᐅᓂᖓ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᑉ.

ᐅᑐᐱᕆ 23, 2014 – ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ ᐱᖁᔭᕐᔪᐊᖅ ᓯᕗᓕᖅᐹᒧᑦ ᐅᖃᐅᓯᐅᕗᖅ ᐃᒡᓗᖓᓂ ᐃᓄᑐᐃᓐᓇᐃᑦ ᓴᓇᖁᓪᓗᒋᑦ ᓄᑖᒥᒃ ᖃᐅᔨᓴᕐᓂᕐᓄᑦ ᑎᒥᒥᒃ, ᑲᑎᑎᖦᖢᒋᑦ ᑲᓇᑕᒥᐅᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᒪᔨᖏᑦ ᐅᑭᐅᖅᑕᖅᑑᑉ ᑭᒡᓕᓯᓂᐊᕐᓂᕐᓄᑦ ᓴᓇᐅᒐᓄᓪᓗ ᑐᑭᒧᐊᒃᑎᑦᑎᔨᖏᓐᓄᑦ ᐃᓗᐊᓂ ᑭᖕᒧᑦ –ᓄᓇᖃᖅᑳᖅᑐᓄᑦ ᐱᓕᕆᖃᑎᒌᑦ ᐅᑭᐅᖅᑕᖅᑐᓕᕆᔨᑯᑦ ᑲᓇᑕᒥᒃᑯᓪᓗ (ᐊᑎᖃᓚᐅᖅᑐᑦ ᓄᓇᖃᖅᑳᖅᑐᓕᕆᔩᑦ ᐅᑭᐅᖅᑕᖅᑐᒥᒡᓗ ᓴᓇᓃᑦ ᑲᓇᑕᒥ).

ᔫᓂ 1, 2015 – ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ ᐱᖁᔭᕐᔪᐊᖅ ᐊᑐᓕᖅᐳᖅ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓴᓇᔭᐅᕗᑦ ᐊᐅᓚᓐᓂᐊᕐᒪᔾᔪᒃ ᖃᐅᔨᓴᕐᕕᒃ ᑐᙵᕕᐅᓗᑎᒡᓗ ᐅᑭᐅᖅᑕᖅᑐᓂ ᖃᐅᔨᓴᕐᓂᖏᓐᓄᑦ. 

ᐅᑭᐊᒃᓵᖓᓂ 2015– ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᐅᓚᑦᑎᕗᑦ ᑭᓇᐅᓂᕐᒥᓄᑦ ᑲᑎᒪᓂᕐᓂᒃ ᑎᒍᒥᐊᖃᑕᐅᔪᓄᑦ, ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓄᑦ, ᓄᖃᖅᑳᖅᑐᓄᑦ ᐃᓄᖕᓄᑦ ᑲᓇᑕᒥᐅᓄᓪᓗ ᓄᓇᕐᔪᐊᕐᒥᐅᓄᓪᓗ ᖃᐅᔨᓴᕐᓂᕐᓄᑦ ᑎᒥᓄᑦ ᑭᒡᓕᓯᓂᐊᕐᓂᒃᑯᑦ ᑲᑐᔾᔨᖃᑎᒌᖕᓂᕐᓄᑦ ᐅᑭᐅᖅᑕᖅᑐᒥ ᓄᓇᕐᔪᐊᓪᓗ ᐊᑖᓂ.  
 ᐋᒡᒌᓯ 21, 2019 – ᑭᐱᓯᓂᖓᑦ ᓇᓗᓇᐃᕈᑕᐅᕗᖅ ᒪᑐᐃᖅᑕᐅᓂᖓᓄᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᑉ. 

ᔫᓂ 7, 2023 – ᐱᑖᕆᔭᐅᓂᖏᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ ᐱᖁᑏᑦ ᑐᓂᔭᐅᕗᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᑦ ᑎᓕᔭᐅᔾᔪᑎᒧᑦ ᑲᑎᒪᔪᓂᑦ

ᔪᓚᐃ 17, 2023– ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᒃ ᐅᐊᖕᓇᒦᓛᖑᓕᖅᐳᑦ ᑲᓇᑕᒥ ᐃᒡᓗᓂ ᐱᓪᓗᒍ ᓯᐅᕗᒧᑦ ᐳᖅᑐᓂᓕᖕᒧᑦ ᓖᑦ ᐃᓕᓴᕆᔭᐅᔾᔪᑎᒧᑦ (ᓯᕗᓕᖅᑎᐅᓂᖏᓐᓄᑦ ᐆᒻᒪᖁᑎᓄᑦ ᐊᕙᑎᓕᕆᓂᕐᓄᓪᓗ ᓴᓇᓯᒪᔪᓄᑦ).

ᐅᑐᐱᕆ 2023 – ᑭᖕᒧᑦ –ᓄᓇᖃᖅᑳᖅᑐᓄᑦ ᐱᓕᕆᖃᑎᒌᑦ ᐅᑭᐅᖅᑕᖅᑐᓕᕆᔨᑯᓪᓗ ᑲᓇᑕᒥᒃᑯᑦ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ, ᐃᓄᓕᒫᓄᑦ ᐱᔨᑦᑎᕋᕐᓃᑦ ᓂᐅᕕᕐᓂᓕᕆᔨᒃᑯᓪᓗ ᑲᓇᑕᒥ ᑐᓂᔭᐅᕗᑦ ᐱᐅᓂᕐᓄᑦ ᑲᑎᓐᓂᕐᓂ ᑲᑐᔾᔨᖃᑎᒌᖕᓂᕐᓂᓗ ᐃᓄᖕᓄᑦ ᐃᓕᓴᕆᔭᐅᔾᔪᑎᒥᒃ ᕆᐊᓪ ᐱᖁᑏᑦ ᑎᒥᖓᑦ ᑲᓇᑕᒥᒃᑯᓐᓂᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ ᑲᑐᔾᔨᓪᓗᑎᒃ ᐃᒡᓘᑉ ᐋᖅᑭᒃᓯᒪᓂᖓᓄᑦ ᐱᓕᕆᓂᕐᒧᑦ.

ᔮᓐᓄᐊᕆ 9, 2025 – ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑎᑎᕋᕐᕕᖕᒥᒃ ᒪᑐᐃᖅᓯᕗᑦ ᕙᐃᑦᕼᐅᐊᔅᒥ.

ᔫᓂ 1, 2025 – ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᖁᕕᐊᓱᒍᑎᖃᖅᐳᑦ 10ᓄᑦ ᐊᕐᕌᒍᒥᓂᒃ.

ᐃᑲᔪᖅᑐᑦ ᖃᐅᔨᓴᕐᓂᕐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ

ᓴᓂᓕᕇᑦ ᑳᐸᐃᑦ ᑭᑉᐹᕆᒃᑐᑦ ᖄᐹᖅᓯᔪᑦ ᐃᒡᓗᓪᓗᐊᑕᕐᒥᒃ ᐃᓕᓯᒪᕗᑦ ᖄᐹᕇᒃᖢᑎᒃ ᖁᒻᒧᐊᖓᔪᒥᒃ ᐅᐃᔾᔮᖓᔪᒥᒃ ᐊᐳᑎᑎᑐᑦ ᐃᒡᓗᒥ.

ᐃᓗᐊᓂ ᐃᓯᕐᕕᐅᑉ, ᐃᓅᑉ ᓴᓇᙳᐊᒐᖓ ᐊᖑᑎᒧᑦ ᕿᔪᓕᔭᖅᑐᒧᑦ ᑭᖑᓕᖃᖅᐳᖅ ᖃᐅᓪᓗᖅᑕᒧᑦ ᓴᓇᙳᐊᒐᒃᓴᒧᑦ ᐅᑭᐅᖅᑕᖅᑑᑉ ᓇᓄᐊᓄᑦ. ᐅᖓᑖᓂ ᓴᓇᙳᐊᒐᑦ, ᐊᓕᒍᖅ ᐊᑭᙵᖅ ᑎᑎᕋᐅᔭᓕᒃ ᑎᖕᒥᐊᓂᒃ, ᑐᓗᒐᓂᒃ, ᐊᖏᔪᐊᓗᖕᒥᒃ ᐅᒃᐱᒡᔪᐊᕐᒥᒃ, ᐃᓄᖕᒥᒡᓗ ᑎᒍᒥᐊᖅᑐᒥᒃ ᓱᓗᒥᒃ ᑐᙵᓴᐃᓪᓗᓂ ᑲᑎᕝᕕᖕᒧᑦ. ᐊᑭᙵᖏᑦ, ᑐᙵᓪᓗᑎᒃ ᖃᑯᖅᑐᓄᑦ ᕿᔪᓄᑦ ᓇᐸᔪᓄᑦ, ᑎᑭᑉᐳᑦ ᒪᕐᕉᖕᓄᑦ ᓇᑎᓕᖕᓄᑦ.

ᖃᐅᓪᓗᓪᓚᑦᑖᖏᑦᑐᖅ ᓇᑎᖓ ᐃᓚᓯᒪᓪᓗᓂ ᐊᔾᔨᙳᐊᓂᒃ ᑐᒃᑐᓂᒃ, ᓇᑦᑎᕐᓂᒃ, ᐊᕐᕕᓂᒃ ᕿᒻᒥᓂᒃ ᓄᓲᖅᑐᓂᒃ ᖃᒧᑏᖕᓂᒃ, ᐊᖑᓇᓱᒃᑎᓂᒃ ᓇᐅᒃᑭᐅᑎᓕᖕᓂᒃ, ᕿᓚᐅᑎᓄᓪᓗ ᒧᒥᖅᑎᓂᒃ. ᐊᔾᔨᖃᖏᑦᑐᖅ ᓇᑎᖅ ᐱᕗᖅ ᐃᓚᖏᓐᓂᒃ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ.

ᐊᑕᖏᖅᖢᑎᒃ ᓂᕆᐅᓇᙱᓚᑦ ᖃᐅᔨᓴᕐᕕᖕᒧᑦ. ᐅᖃᖅᑰᔨᔪᖅ ᐱᕕᒃᓴᖅ ᖃᐅᔨᓴᕐᓃᑦ ᑲᑎᑦᑎᓪᓗᑎᒃ ᖃᓪᓗᓈᑦ ᖃᐅᔨᓴᕈᓯᖏᓐᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ. ᑐᙵᓱᒋᑦ ᑲᓇᑕᒥᐅᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ.

ᐊᔾᔩᑦ: ᐊᓕᒃᔅ ᕗᕋᑦᑭᓐ

“ᒐᕙᒪᕗᑦ ᓴᓇᓂᐊᖅᐳᑦ ᓄᓇᕐᔪᐊᕐᒥᐅᓄᑦ ᓇᓕᒧᑦᑐᒥᒃ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥᒃ ᐱᐅᓛᖑᓂᐊᖅᑐᒥᒃ ᐅᑭᐅᖅᑕᖅᑐᒥ ᐊᑲᐅᙱᓕᐅᕈᑎᓄᑦ, ᐱᖃᓯᐅᓪᓗᒋᑦ ᐊᕙᑎᓕᕆᓂᕐᓄᑦ ᑭᒡᓕᓯᓂᐊᕐᓃᑦ ᐊᑐᒐᒃᓴᓂᒡᓗ ᓴᓇᓃᑦ. ᑖᓐᓇ ᖃᐅᔨᓴᕐᕕᒃ ᓴᓇᔭᐅᓗᓂ ᑲᓇᑕᒥᐅᓄᑦ, ᑲᓇᑕᐅᑉ ᐅᑭᐅᖅᑕᖅᑐᐊᓂ, ᑕᕝᕙᐅᓗᓂᓗ ᐱᔨᑦᑎᕋᕐᓂᐊᕋᒥ ᓄᓇᕐᔪᐊᕐᒧᑦ.”

— ᒐᕙᓄ ᔨᐊᓄᕈᓪ, ᐊᔪᖏᓐᓂᐊᓗᐊ ᐅᒃᐱᕐᓇᖅᑐᖅ ᒥᑲᐃᓪ ᔭᓐ, 2007ᒥ ᐅᖃᖅᑕᖏᑦ ᑯᐃᓐ ᐃᒃᓯᕙᐅᑕᖓᓂᑦ.  

ᐃᓂᖃᖅᖢᓂ ᓯᓚᑎᑦᑎᐊᖓᓂ ᕼᐊᒪᓚᖓᑕ ᐃᖃᓗᒃᑑᑦᑎᐊᑉ, ᐱᓇᖕᓇᒥ ᓄᓇᕘᒥ, ᑲᓇᑕᒥᐅᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖓ ᐊᑦᑎᑦᑎᐊᖅᓯᒪᕗᖅ. ᐃᑲᓗᒃᑑᑦᑎᐊᒃ, ᐃᓄᐃᓐᓇᖅᑐᓐ ᑕᐃᒎᓯᖅ ᐃᑲᓗᒃᑑᑦᑎᐊᒃ, ᑐᔨᖃᖅᐳᖅ “ᐃᖃᓗᒐᓱᒡᕕᑦᑎᐊᕙᒃ”ᒥᒃ. ᑖᓐᓇ ᓴᖅᑭᔮᖅᑎᑕᐅᕗᖅ ᖃᐅᔨᓴᕐᕕᐅᑉ ᐊᑎᖏᑕ ᐱᒋᐊᕐᓂᖏᓐᓂ, ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᒃ. ᐃᖃᓗᒃ ᒪᒪᕆᔭᐅᔪᖅ ᓂᒡᓕᓇᖅᑐᓂ ᐃᖃᓘᓲᖅ ᐱᑕᖃᓲᖅ ᓄᓇᓖᑦ ᐃᒪᖏᓐᓂ, ᑕᓯᖏᓐᓂ ᑰᖏᓐᓂᓗ ᐅᑭᐅᖅᑕᖅᑐᒥ ᐅᑭᐅᖅᑕᖅᑑᓪᓗ ᐊᑖᓂ. ᑐᙵᕕᐅᔪᖅ ᐃᓂᓄᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥᑦ ᖃᐅᔨᓴᕐᕕᐅᔪᓄᑦ.

ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖓ ᓄᓇᓕᖕᒥᐅᓂᒃᑕᐅᖅ ᖃᐅᔨᓴᖅᑎᖃᖅᑐᑦ ᐱᓕᕆᔭᖏᑦ ᐊᒃᑐᐊᓪᓗᑎᒃ ᐊᑕᐅᓯᕐᒧᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐱᖓᓱᓂᑦ ᖃᐅᔨᓴᕐᓂᕐᓄᑦ ᐱᓕᕆᓂᖏᓐᓄᑦ: ᐆᒪᔫᖃᑎᒌᖏᑦᑐᓄᑦ ᑭᒡᓕᓯᓂᐊᕐᓃᑦ, ᐊᑕᐅᓯᖅ ᖃᓄᐃᖏᓐᓂᖅ, ᓴᓗᒪᔪᑦ ᓄᑮᑦ ᓴᓇᐅᒐᓪᓗ. ᐅᖃᓕᒫᒃᑲᓐᓂᕆᑦ ᐅᑭᐅᖅᑕᖅᑐᓂ ᖃᐅᔨᓴᖅᑎᕗᑦ ᐊᒡᒋᖅᑐᓂ ᒪᒃᐱᒐᓂ.

ᖃᖓᑐᔪᒥᑦ ᑕᑯᒃᓴᐅᔪᖅ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᒃ ᓴᓇᔭᐅᑎᓪᓗᒍ 2017ᒥ. ᐃᓕᓐᓂᐊᕐᕕᐅᔪᑦ ᐱᖃᓯᐅᔾᔨᔪᑦ ᖃᐅᔨᓴᕐᕕᓪᓗᐊᑕᐅᑉ ᐃᒡᓗᐊᓂᒃ ᖃᓂᓛᒥ; ᐊᐅᓪᓚᖅᓯᒪᔾᔪᑎᓄᑦ ᓱᕋᒃᓯᒪᔪᓕᕆᕝᕕᒃ ᑕᓕᖅᐱᖕᒥ; ᐱᖓᓲᓕᖓᔪᓪᓗ ᐃᒡᓗᑦ ᑐᓄᐊᓂ ᓴᐅᒥᖕᒥ, ᓴᓂᓇᓂ ᐸᓕᐊᙳᐊᑉ.  

ᒪᕐᕉᖕᓂᒃ ᖁᓕᕇᓕᒃ ᖃᐅᔨᓴᕐᕕᓪᓗᐊᑕᐅᑉ ᐃᒡᓗᐊ 4,855ᓂᒃ ᓴᓂᒧᑦ ᑐᑭᒧᑦ ᒦᑕᓂᒃ ᐊᖏᓂᓕᒃ ᑭᒡᓕᓯᓂᐊᕐᓂᕐᓄᑦ ᖃᐅᔨᓴᕐᓂᕐᓄᑦ ᖃᐅᔨᒪᔭᐅᔪᓂᒡᓗ ᑐᓴᖅᑎᑦᑎᓂᕐᓄᑦ. ᐃᒡᓗ ᒪᕐᕉᖕᓂᒃ ᖃᐅᔨᓴᕐᕕᓕᒃ, ᑎᑎᕋᕐᕖᑦ, ᐊᔪᕈᓐᓃᖅᓴᕐᕖᑦ, ᑭᓱᕈᓘᔭᓄᓪᓗ ᐊᑐᕈᓐᓇᖅᑐᓄᑦ ᐃᓃᑦ ᑲᑐᔾᔨᔪᓄᑦ ᐃᓕᓐᓂᐊᕐᓂᕐᓄᑦ ᓄᓇᓕᖕᒥᐅᓂᒡᓗ ᑲᑎᖃᑎᖃᕐᓂᕐᓄᑦ.

“ᑭᒡᓕᓯᓂᐊᕐᓂᓕᕆᓪᓗᓂ ᐅᑭᐅᖅᑕᖅᑐᒥ ᐊᒃᓱᕈᕐᓇᖅᑐᖅ ᐅᓄᖅᑐᑎᒍᑦ. ᑭᓯᐊᓂ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᒃ ᐃᓂᖃᖅᑎᑦᑎᔪᖅ ᖃᐅᔨᓴᖅᑎᓄᑦ ᑐᔪᕐᒥᕕᒋᓗᒍ, ᖃᐅᔨᓴᕐᕕᖃᖅᖢᓂ ᖃᐅᔨᓴᕐᕕᖕᓂᓗ ᑭᓱᓕᕆᔾᔪᑎᓂᒃ, ᐊᐅᓪᓚᖅᓯᒪᔪᖅᓯᐅᑎᓂᒃ ᑎᓴᒪᓕᒃᑎᑐᑦ ᓯᑭᑑᑎᑐᓪᓗ, ᑲᑎᕝᕕᖃᖅᖢᓂ, ᐊᔪᕐᓇᖏᓐᓂᖅᓴᓪᓚᐅᓕᖅᑎᖦᖢᒍ ᐃᓄᖕᓄᑦ ᑭᒡᓕᓯᓂᐊᕋᓱᒃᑐᓄᑦ. ᖃᐅᔨᓴᕐᕕᖃᖅᖢᓂ ᐃᓂᖃᕆᕗᖅ ᑲᑎᑎᓪᓗᒋᑦ ᖃᐅᔨᓴᖅᑏᑦ, ᑎᒦᑦ ᐅᑭᐅᖅᑕᖅᑐᒥᐅᓪᓗ ᑲᑎᑎᓪᓗᒋᑦ.” —ᐃᒥᓕ ᑯᐊᐃᑦ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᐅᓚᑦᑎᔨᖓ ᖃᐅᔨᓴᕐᓂᕐᓄᑦ ᐱᓕᕆᓂᕐᓄᑦ

ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖓ ᖃᔅᓯᑲᓪᓚᓂᒃ ᖃᐅᔨᓴᕐᕕᖃᖅᑐᖅ ᖃᐅᔨᓴᕐᕕᒋᓪᓗᒋᑦ ᖃᐅᔨᓴᒐᒃᓴᓂᒃ. ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᔭᐃᓴᓐ ᒫᔅ ᐊᕆᓇ ᓂᑯᓚᐃᕙᓗ ᐱᓕᕆᕘᒃ ᖃᐅᔨᓴᕐᓂᕐᓄᑦ ᖃᐅᔨᓴᕐᕕᖕᒥ.

ᐊᖏᓐᓇᖅᑐᓄᑦ ᖃᐅᔨᓴᕐᕕᒃ, ᑲᑉᐳᔾᔭᖅᑐᒥᒃ ᐊᖏᓐᓇᖅᑐᒥᒃ ᑕᑯᓇᒍᑎᖃᖅᖢᓂ, ᐊᑐᖅᑕᐅᔪᖅ ᖃᐅᔨᓴᖅᑎᓄᑦ ᓈᒻᒪᑦᑎᐊᖅᖢᓐᓗ ᐃᓕᓴᐃᕕᒋᓗᒍ ᖃᐅᔨᑎᓪᓗᒋᓪᓗ ᐃᓕᓐᓂᐊᖅᑐᑦ ᖃᐅᔨᓴᕐᕕᖕᓂ ᐱᖅᑯᓯᕐᓂᒃ.

“ᐃᓚᖓᑦ ᐅᓄᖅᑐᓂᑦ ᖃᓄᐃᓐᓇᓱᒃᑕᑦᑎᓐᓂᑦ ᐋᖅᑭᒃᓱᖅᖢᒋᑦ ᖃᐅᔨᓴᕐᕖᑦ ᖃᐅᔨᓴᖅᑏᑦ ᑕᕝᕗᙵᓲᑦ ᐱᓕᕆᓪᓚᒐᓱᖃᑦᑕᖅᑐᑦ ᖃᓪᓗᓈᓄᓪᓗ ᐅᑎᖅᖢᑎᒃ ᖃᐅᔨᓴᒐᒃᓴᑭᓪᓚᒐᓱᒃᖢᑎᒃ. ᐊᒻᒪᓗ, ᐃᓚᖏᑦ ᑭᓱᑦ, ᐱᕈᖅᑐᑎᑐᑦ ᐃᒥᕐᓄᓪᓗ ᖃᐅᔨᓴᒐᒃᓴᑦ, ᐊᐅᓪᓚᖅᑎᖦᖢᒋᑦ ᐱᐅᔪᓐᓃᓲᑦ.” ᓂᑯᓚᔅ ᓇᓐᑎᐊᓪᕗᐊᓐᑎᐊᐃ,, PhD, ᖃᐅᔨᓴᕐᕕᖕᓂᒃ ᐊᐅᓚᑦᑎᔨ 

 “ᐊᑕᐅᓯᖅ ᐱᕐᔪᐊᖑᔪᖅ ᖃᐅᔨᓴᖅᑕᓂᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ ᑕᑯᓇᒡᓗᒋᑦ ᐆᒪᔫᖃᑏᒌᖏᑦᑐᓂ ᐊᔾᔨᒌᖏᓐᓂᕐᓂᒃ ᐅᑭᐅᖅᑕᖅᑐᒥ, ᐊᑐᖅᖢᒋᑦ ᑎᒥᓕᐅᕈᑎᓄᑦ ᑐᙵᔪᓄᑦ ᐱᓕᕆᔾᔪᓯᕐᓂᒃ ᓴᓇᓗᓂ ᑭᓱᓂᙶᖅᑐᓂᑦ ᑲᑎᖅᓱᖅᓯᒪᔪᓂᒃ ᒫᓐᓇᐅᔪᖅ ᒪᔪᓂᑦ. ᑖᒃᑯᐊ ᓇᓗᓇᐃᑦᑎᐊᖅᓯᒪᔪᑦ ᑲᑎᖅᓱᖅᓯᒪᔪᑦ ᐊᑐᖅᑕᐅᓗᑎᒃ ᕿᒥᕐᕈᔾᔪᑕᐅᓗᑎᒃ ᑲᔪᓰᓐᓇᖅᑐᓂᒃ ᐆᒪᔪᓂ ᐊᓯᔾᔨᖅᑐᓂᒃ ᑕᐃᒪᐃᑦᑐᓄᑦ ᐅᑭᐅᖅᑕᖅᑐᒥ, ᐃᖃᓗᒃᑑᑦᑎᐊᕐᒥ ᐅᑭᐅᖅᑕᖅᑐᒥᓗ.” — ᐃᐊᓐ ᕼᐊᒡ, PhD, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᖃᐅᔨᓴᕐᓂᕐᓄᑦ ᑭᒡᓕᓯᓂᐊᖅᑎᓪᓗᐊᑕᖅ

ᑎᒦᑦ ᑭᓱᓕᐅᕈᑎᖏᓐᓄᑦ ᖃᐅᔨᓴᕐᕕᒃ ᖃᐅᔨᓴᖅᑎᓄᑦ, ᔅᐱᐊᓐᓱ ᒪᓐᒃᑕᓐᑎᑐᑦ, PhD, ᓯᓚᑦᑐᖅᓴᕐᕕᒡᔪᐊᖓᓂᑦ ᒍᐃᐊᓪᕝ, ᐲᖅᓯᔪᓐᓇᖅᑐᑦ ᑎᒥᐅᑉ ᑭᓱᓕᐅᕈᑎᖏᓐᓂᒃ ᐆᒪᔪᓂᑦ ᖃᐅᔨᓴᒐᒃᓴᓂᑦ.

ᐆᒪᔪᕐᓂᐊᖅᑏᑦ ᐋᒃᑐᕈᓐᓇᖅᑐᑦ ᐊᖏᔪᓂᒃ ᓂᕐᔪᑎᓂᒃ, ᓲᕐᓗᑐᑦ ᐅᒥᖕᒪᖕᓂᒃ, ᑐᖁᖓᔪᓄᑦ ᖃᐅᔨᓴᕐᕕᖕᒥ. ᐹᑦ ᐊᖏᔪᑦ ᑭᕕᒃᓯᔾᔪᑎᓗ ᖃᐅᔨᓴᕐᕕᓕᐊᖓᔪᑦ ᑭᕕᒃᓯᔪᓐᓇᖅᑐᑦ ᐊᒡᔭᖅᓯᓗᑎᒡᓗ ᐊᕐᕕᕐᒥᒃ ᐃᒡᓗᕈᓯᕐᒧᑦ ᖃᐅᔨᓴᖅᑕᐅᓂᐊᕋᒥ.

ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᒃ ᒪᕐᕉᖕᓂᒃ ᐊᖏᔪᓂᒃ ᐃᒡᓗᕈᓯᓕᒃ ᓴᓇᓯᒪᓪᓗᑎᒃ ᑐᙵᓱᒃᑎᑦᑎᓂᕐᓄᑦ ᐃᓂᐅᓪᓗᑎᒃ ᑲᑎᑦᑐᓄᑦ, ᓄᓇᓕᖕᓂᑦ ᑲᑎᒪᔪᓄᑦ ᖃᐅᔨᒪᔭᐅᔪᓂᒃ ᑐᓴᖅᑎᑦᑎᓂᕐᓄᓪᓗ. ᐃᓄᓕᒫᓄᑦ ᐅᖃᓪᓚᖕᓂᑦᑎᓐᓄᑦ, ᖃᐅᔨᓴᖅᑏᑦ ᐅᖃᐅᓯᖃᖅᐳᑦ ᐱᓕᕆᔭᒥᓂᒃ, ᓄᓇᓕᖕᒥᐅᓪᓗ ᑲᑎᒪᔩᑦ ᐱᕕᖃᖅᐳᑦ ᐊᐱᕆᓗᑎᒃ ᑐᓴᖅᑎᑦᑎᓗᑎᒡᓗ.

ᑕᑲᓇᓂ, ᓱᕈᓰᑦ ᑕᑯᓇᒃᐳᑦ ᑕᕆᐅᕐᒥᐅᑕᓂᒃ ᐆᒪᔪᓂᒃ ᐃᖃᓗᒃᑑᑦᑎᐊᑉ ᐃᒪᖏᓐᓂᑦ ᑲᓇᑕᒥᐅᑦ ᑕᑯᓇᒡᕕᖓᓂ ᓯᓚᒥᐅᑕᓄᑦ ᐅᖃᓪᓚᖕᓂᕐᓄᑦ ᐅᓂᒃᑳᖅᑎᓪᓗᒋᑦ ᓯᑎᐱᕆ 2022ᒥ.

1,655 ᓴᓂᒧᑦ ᑐᑭᒧᑦ ᒦᑕᓂᒃ ᐊᖏᓂᓕᒃ ᐊᐅᓪᓚᖅᓯᒪᔾᔪᑎᓄᑦ ᓱᕋᒃᓯᒪᔪᓕᕆᕝᕕᐅᑉ ᐃᒡᓗᐊ, ᐃᓂᖃᖅᑎᑦᑎᔪᖅ, ᑭᓱᓕᕆᕝᕕᖕᓂᒃ, ᐱᖁᑎᓂᒡᓗ ᐃᑲᔫᑕᐅᓪᓗᑎᒃ ᖃᐅᔨᓴᖅᑎᓄᑦ ᐊᐅᓪᓚᖅᓯᒪᓂᕐᒥᓂ ᓄᓇᓂ.

ᐱᖃᓯᐅᔾᔨᔪᖅ ᕿᔪᓕᕆᕝᕕᖕᒥᒃ, ᐊᐅᓚᐅᑎᓕᕆᕝᕕᖕᒥᒃ, ᖁᑭᐅᑎᓄᑦ ᑮᒡᕕᖕᒥᒃ, ᐊᖅᑲᐅᒪᓲᖅᑎᓄᑦ ᐱᓕᕆᕝᕕᖕᒥᒃ, ᐋᖅᑭᒃᓱᐃᕕᖕᒥᒃ, ᓂᒡᓕᓇᖅᑐᒃᑯᕕᖕᒥᒃ, ᐅᖅᑰᔪᒃᑯᕕᖕᒥᒃ, ᑎᑎᕋᕐᕕᖕᓂᒃ ᐊᔪᕈᓐᓃᖅᓴᕐᕕᖕᒥᒡᓗ. ᖃᐅᔨᓴᖅᑏᑦ ᐊᑐᕈᓐᓇᕐᒥᔪᑦ ᑎᓴᒪᓕᖕᓂᒃ, ᓯᑭᑑᓂᒃ ᐊᐅᓪᓚᖅᓯᒪᔾᔪᑎᓂᒃ, ᐋᓐᓂᖅᑐᖅᓯᐅᑎᓂᒃ ᐊᖅᑲᐅᒪᓯᐅᑎᓂᒡᓗ.

“ᑖᓐᓇ ᐱᕕᒃᓴᖅ ᐱᖃᕐᓗᓂ ᑕᐃᒪᐃᑦᑐᒥᒃ ᑐᙵᕕᖕᒥᒃ ᑲᓇᑕᐅᑉ ᖁᑦᑎᒃᑐᒥ ᐅᑭᐅᖅᑕᖅᑐᐊᓂ ᐱᓕᕆᔪᒥᒃ ᐃᑲᔪᕐᓗᒋᑦ ᑭᒡᓕᓯᓂᐊᖅᑏᑦ ᓄᓇᓖᓪᓗ, ᓴᙲᒃᑎᓴᐃᖏᓐᓇᐅᔭᖅᑐᑦ ᐅᑭᐅᖅᑕᖅᑐᒥᑦ ᖃᐅᔨᒪᔭᐅᔪᓂᒃ ᖃᐅᔨᓴᕐᓂᕐᓂᒃ ᐱᕐᔪᐊᖑᔪᓄᑦ ᑲᓇᑕᒥᐅᓄᑦ-ᓄᓇᓕᖕᓃᒃᑲᓗᐊᕈᓂ, ᓄᓇᕐᔪᐊᕐᒥ ᐅᑭᐅᖅᑕᖅᑐᓂ, ᓄᓇᕐᔪᐊᕐᒥᓘᓐᓃᑦ ᐳᖅᑐᓂᕐᓂ-ᑕᐃᒪᓐᓇ ᐱᓕᕆᐊᒃᓴᖃᖅᐳᖅ.”

—ᔭᓂᑦ ᑭᖕ, PhD,  ᐃᒃᓯᕙᐅᑕᖅ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᒪᔨᖏᑦ.  

 ᐅᑭᐅᖅᑕᖅᑐᓂ ᓄᓇᓂ ᐱᓕᕆᔩᑦ ᓴᓇᓐ ᐃᕕᑕᓕᒐᖅ ᓚᐃᓚ ᐊᕐᓇᖅᑯᕐᓗ

“ᐃᑲᔪᖃᑦᑕᖅᑐᒍᑦ ᖃᐅᔨᓴᖅᑏᑦ ᐊᐅᓪᓚᐅᑎᓪᓗᒋᑦ ᐃᑲᔪᖅᖢᒋᓪᓗ ᐃᑲᔪᕆᐊᖃᕌᖓᑕ. ᐅᑭᐅᒃᑯᑦ, ᐊᐅᓪᓚᐅᑎᕙᒃᑕᕗᑦ ᓯᑭᑑᒃᑯᑦ ᑲᓕᖦᖢᑕ ᖃᒧᑏᖕᓂᒃ ᐱᖁᑎᖏᓐᓂᒃ ᐅᓯᓪᓗᑕ. ᐊᐅᔭᒃᑯᑦ ᐊᐅᓪᓚᐅᑎᖃᑦᑕᖅᑕᕗᑦ ᑎᓴᒪᓕᒃᑯᑦ ᓴᓂᓕᕇᓄᓪᓘᓐᓃᑦ.” ᓚᐃᓚ ᐊᕐᓇᖅᑯᖅ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᐅᓪᓚᖅᓯᒪᔪᓂ ᐱᓕᕆᔨ [ᐅᓇ– ᐊᕐᓇᖅ ]

ᑎᑭᓯᒪᔪᑦ ᖃᐅᔨᓴᖅᑏᑦ ᑐᔪᕐᒥᔪᓐᓇᖅᑐᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥ ᐃᓐᒃᓴᓂ ᐱᖓᓱᐃᓕᖓᔪᓂ ᐃᒡᓗᓂ. ᐊᑐᓃᑦ ᒪᕐᕉᖕᓂᒃ ᓇᑎᓖᑦ ᐃᒡᓗᖏᒃ (ᑕᓕᖅᐱᐊᓂ ᐊᓄᕆᒧᑦ ᓄᒃᑭᒃᓴᐅᑎᐅᑉ) ᐱᖓᓱᓂᒃ ᑎᓴᒪᓕᖕᓂᒃ ᐃᒡᓗᓖᑦ.

“ᑭᓇᑐᐃᓐᓇᖅ ᑕᒪᐅᙵᕈᒪᔪᖅ ᖃᐅᔨᓴᕆᐊᖅᑐᕐᓗᓂ—ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᑦ ᐃᖅᑲᓇᐃᔭᖅᑎᐅᒐᓗᐊᕈᑎᒃ, ᓇᖕᒥᓂᕗᑦ ᐃᖅᑲᓇᐃᔭᖅᑎᕗᑦ ᑭᒡᓕᓯᓂᐊᖅᑏᑦ, ᑕᒫᓂᕐᒥᐅᑦ ᑭᒡᓕᓯᓂᐊᖅᑏᑦ, ᖃᐅᔨᓴᖀᑦ ᒐᕙᒪᓅᖏᑦᑐᖅ ᑎᒥᓄᑦ, ᓯᓚᑦᑐᖅᓴᕐᕕᒡᔪᐊᓂᓪᓘᓐᓃᑦ ᓄᓇᕐᔪᐊᕐᒥᐅᓂᓪᓘᓐᓃᑦ ᑎᒥᓂᑦ — ᐃᑲᔪᖅᑕᕗᑦ ᖃᐅᔨᔭᐅᔪᓂᒃ ᑲᑎᖅᓱᐃᓂᕐᓄᑦ. ᑕᐃᒪᐃᒻᒪᑦ, ᐊᐅᓪᓚᕆᐊᖃᕈᑎᒃ ᓄᓇᓄᑦ ᑲᑎᖅᓱᐃᓗᑎᒃ ᖃᐅᔨᓴᒐᒃᓴᓂᒃ—ᑭᓱᑐᐃᓐᓇᓂᒃ ᐱᓕᕆᔪᒪᔭᒥᓂᒃ—ᑭᓱᓕᕆᔾᔪᑎᖃᖅᑐᒍᑦ ᐊᐅᓪᓚᐅᔾᔨᔨᓂᒡᓗ ᐊᐅᓚᔾᔭᒃᓯᖃᑕᐅᔪᓐᓇᖅᑐᓂᒃ ᑖᔅᓱᒥᖓ."

—ᔅᑲᑦ ᔭᓐᓴᓐ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᐅᓚᑦᑎᔨᖓ ᐊᐅᓪᓚᖅᓯᒪᔪᓂ aulanirnut 

ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᑉ ᐃᒡᓗᐊᑕ ᐋᖅᑭᒃᓯᒪᓂᖓ

ᑐᙵᓱᒋᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ, ᓄᓇᕐᔪᐊᕐᒥᐅᓄᑦ ᓇᓕᒧᑦᑐᖅ ᖃᐅᔨᓴᕐᕕᒃ ᑲᓇᑕᐅᑉ ᐅᑭᐅᖅᑕᖅᑐᐊᓂ. ᑖᓐᓇ ᐃᓂ ᑐᙵᓴᐃᔪᖅ ᑭᒡᓕᓯᓂᐊᖅᑎᓂᒃ ᖃᐅᔨᒪᔨᑕᕐᓂᒡᓗ ᑲᓇᑕᒥᑦ ᓄᓇᕐᔪᐊᕐᒥᓪᓗ ᖃᐅᔨᓴᕆᐊᖅᑐᓄᑦ. ᐅᓄᕐᓂᖅᓴᑦ ᖃᐅᔨᓴᕐᕖᑦ ᖁᓪᓕᐊᓂ ᓇᑎᐊᓃᑦᑐᑦ ᖃᐅᔨᓴᕐᕕᓪᓗᐊᑕᐅᑉ ᐃᒡᓗᐊᓂ.

ᖃᐅᔨᓴᕐᕕᓪᓗᐊᑕᖅ: ᖃᐅᔨᒪᔭᐅᔪᓂᒃ ᐅᖃᐅᓯᖃᕐᕕᒃ, ᓂᕿᓕᐅᕐᕕᒃ, ᐅᑕᖅᑭᕕᒃ, ᖃᐅᔨᔭᐅᔾᔪᑏᑦ ᑲᑎᖅᓱᖅᓯᒪᔪᑦ, ᐃᓕᓴᐃᕝᕕᒃ ᖃᐅᔨᓴᕐᕕᒃ, ᓂᒡᓕᓇᖅᑐᒃᑯᕕᒃ ᖃᐅᔨᓴᕐᕕᒃ, ᓴᓗᒪᔪᒃᑯᕕᒃ ᖃᐅᔨᓴᕐᕕᒃ, ᑎᑎᕋᕐᕕᖕᓂ ᐱᓕᕆᕝᕖᑦ, ᓂᒡᓕᓇᖅᑐᒃᑯᕖᑦ, ᐃᓕᓯᕝᕖᑦ, ᐊᐅᓪᓚᖅᑐᓄᑦ ᐅᓯᓕᖅᓱᕐᕖᑦ, ᑐᖁᖓᔪᓂᒃ ᖃᐅᔨᓴᕐᕖᑦ, ᐱᕈᖅᓴᐃᕕᒃ

ᐊᐅᓪᓚᖅᓯᒪᔾᔪᑎᓄᑦ ᓱᕋᒃᓯᒪᔪᓕᕆᕝᕕᒃ: ᓱᕋᒃᓯᒪᔪᓕᕆᕝᕕᒃ ᓄᓇᒃᑰᕈᑎᒃᑯᕕᒃ, ᕿᔪᓕᕆᕝᕕᒃ, ᑭᓱᒃᑯᕕᒃ, ᐆᒪᔪᓂᑦ ᓱᕈᓂᒃ ᐃᔾᔪᕈᕐᕕᒃ, ᐊᖅᑲᐅᒪᓲᖅᑎᓄᑦ ᐱᓕᕆᕝᕕᒃ, ᖃᐅᔨᓴᕐᕕᒃ, ᐸᕐᓇᒡᕕᒃ ᐊᐅᓪᓚᕐᓂᐊᖅᑐᓄᑦ

ᐳᕐᓚ ᐊᖅᓴᕐᓃᑦ

ᓴᓇᔨ ᕙᐃ ᔨᐅ ᓴᓇᓚᐅᖅᑐᖅ ᐊᖏᔪᒥᒃ ᓴᓂᒧᑦ ᑐᑭᒧᑦ ᖁᒻᒧᓪᓗ ᓴᓇᓯᒪᔪᒥᒃ ᐃᓕᓯᒪᓪᓗᓂ ᓵᖓᓂ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᑉ ᑐᙵᓴᐃᓪᓗᓂ ᐅᐸᒃᑐᓂᒃ. ᐊᑎᖃᖅᖢᓂ ᐳᕐᓚ ᐊᖅᓴᕐᓃᑦ, ᐃᓕᓯᒪᔪᖅ ᓴᓇᓯᒪᕗᖅ ᑳᐳᒥᒃ ᖄᐹᖅᓯᒪᔪᕐᓂᒃ ᓱᓪᓗᓕᖕᓂᒃ ᐃᒃᐱᒋᔾᔪᑎᒋᓪᓗᒋᑦ ᓯᕗᕚᓂᒃ ᐃᓄᖕᓂᒃ ᕿᑎᕐᒥᐅᓂᑦ ᓴᓇᕐᕈᑎᓕᐅᖃᑦᑕᓚᐅᖅᑐᓄᑦ, ᐅᓗᑎᑐᑦ ᐅᓈᑎᑐᓪᓗ, ᑳᐳᒥᑦ. ᑭᒡᒐᖅᑐᐃᔪᖅ ᐋᖅᑭᒋᐊᖅᓯᒪᔪᕐᒥᒃ ᒪᐃᐳ ᐃᕕᖕᒥᒃ, ᑲᓇᑕᐅᑉ ᓇᓗᓇᐃᒃᑯᑕᖓ, ᓇᓗᓇᐃᒃᑯᑕᐅᓪᓗᓂ ᑲᓇᑕᐅᑉ ᐊᐅᓚᑦᑎᓂᖓᓂᒃ ᐅᑭᐅᖅᑕᖅᑐᒥᒃ. ᐅᖓᓯᖐᖕᓂᖏᑦ ᓱᓪᓗᓖᑦ, ᐊᑐᓂ ᐃᑯᒪᓕᖅᓯᒪᓪᓗᑎᒃ, ᐊᔪᕆᑉᐳᑦ ᐊᖅᓴᕐᓃᑦ ᐊᐅᓚᓂᖏᓐᓂᒃ.

ᓄᓇᐅᑉ ᐃᓗᐊᓂ ᓯᕐᒦᑦ ᐊᐅᖕᓂᖏᓐᓄᑦ ᓄᓇᐃᑦ ᑲᑕᖕᓂᖏᑕ ᓴᖅᑭᑦᑎᕗᑦ ᐃᑦᑕᕐᓂᓴᕐᓂᒃ ᓂᓚᖕᓂᒃ

ᔅᑎᐸᓂ ᑯᓗᒻ, PhD 

ᐅᑭᐅᖅᑕᖅᑐᓂ ᖃᐅᔨᓴᕐᓂᕐᓄᑦ ᑭᒡᓕᓯᓂᐊᖅᑎ – ᑭᒡᓕᓯᓂᐊᕐᓂᕐᓄᑦ ᓴᓇᐅᒐᓄᓪᓗ ᐱᓕᕆᓂᕐᓄᑦ ᐱᓕᕆᖃᑎᒌᑦ

ᖃᐅᔨᓴᕐᓂᕐᓄᑦ ᐊᔪᙱᓛᖓ: ᓄᓇᐅᑉ ᐃᓗᐊᓂ ᓯᕐᒦᑦ ᓄᓇᐃᓪᓗ ᖃᓄᐃᓕᖓᓂᖏᑦ

2009ᒥ, ᖃᐅᔨᓴᖅᑎᓪᓗᒋᑦ ᐅᔭᕋᕈᖅᓯᒪᔪᕐᓂᒃ ᓇᐹᖅᑐᓂᒃ ᐊᑭᐊᓂ, ᓄᓇᕗᑦ, ᖃᐅᔨᓴᖅᑏᑦ ᓇᓂᓯᓚᐅᖅᑐᑦ ᐊᑭᓐᓈᓗᖕᒥᒃ ᓂᓚᖕᒥᒃ ᓴᖅᑭᑕᐅᔪᒧᑦ ᓄᓇᐃᑦ ᓯᕐᒥᖏᑕ ᐊᐅᖕᓂᖏᓐᓄᑦ. ᔅᑎᕙᓂ ᑯᓗᒻ, ᓄᓇᐃᑦ ᓯᕐᒥᖏᓐᓄᑦ ᖃᐅᔨᒪᔨᑕᖅ, ᐃᓚᐅᓚᐅᖅᑐᖅ ᖃᐅᔨᓴᖅᑎᓄᑦ ᑕᑯᓇᒋᐊᖅᑐᖅᑐᓄᑦ.

ᒪᖂᑉ ᐊᐅᔭᒃᑯᓪᓗ ᐅᖅᑰᓂᖅᓴᓄᑦ ᐊᐅᒃᓯᔪᓐᓇᖅᑐᑦ ᐃᔾᔪᔪᒥᒃ ᖄᖓᓃᑦᑐᒥᒃ ᖁᐊᖑᓲᖑᒐᓗᐊᒥᒃ ᓄᓇᒥᒃ, ᖃᐅᔨᒪᔭᐅᓪᓗᓂ ᓄᓇᐃᑦ ᓯᕐᒥᖏᑎᑐᑦ. ᑖᓐᓇ ᓯᕕᖓᔪᓂᒃ ᑐᙵᑦᑎᐊᕈᓐᓃᖅᑎᑦᑎᓲᖅ ᐊᐅᒃᑐᕐᓗ ᖄᖓ ᑎᓲᒃᖢᓂ, ᓴᓇᓪᓗᓂ ᑕᐃᔭᐅᔪᒥᒃ ᐊᐅᒃᑐᒧᑦ ᓄᓇᐃᖅᑐᑐᑦ.

“ᖄᖏᑦ ᓄᓇᐃᑦ ᓯᕐᒥᖏᑕ ᑎᓲᕐᓂᐊᖅᑐᑦ ᓴᖅᑭᓪᓗᒋᓪᓗ ᖁᐊᑦ ᓯᕐᒦᑦ ᐊᑖᓃᑦᑐᑦ,” ᐅᖃᖅᑐᖅ ᔅᑎᕙᓂ. “ᑖᓐᓇ ᓄᓇᐃᖅᑐᖅ ᓴᖅᑭᑦᑎᕗᖅ ᓯᕐᒥᐅᑉ ᓂᓚᖓᓂᒃ.”

“20,000 ᐊᕐᕌᒍᐸᓘᓚᐅᖅᑐᓂ, ᓄᓇᕐᔪᐊᑉ ᐅᐊᖕᓇᓕᒫᖓ ᖄᐹᖅᓯᒪᓚᐅᖅᓯᒪᖕᒪᑦ ᓯᕐᒥᐊᓗᐃᑦ ᓂᓚᖏᓐᓄᑦ ᓄᓇᓂ. ᑖᒃᑯᐊ ᓂᓛᓗᐃᑦ, ᐊᔾᔨᐸᓗᖏᑦ ᑲᓛᖦᖡᑦ ᓄᓇᖏᓐᓂ ᓄᓇᕐᔪᐊᓪᓗ ᐊᑖᓂᑐᑦ,” ᐅᖃᖅᑐᖅ ᔅᑎᕙᓂ. “ᓯᕐᒦᑦ ᓄᖑᑉᐹᓪᓕᓚᐅᖅᑐᑦ, ᕿᒪᐃᓪᓗᑎᒃ ᓯᕐᒦᑦ ᐃᓚᖏᓐᓂᒃ ᓴᐅᔭᐅᓕᕆᓪᓗᑎᒃ ᓄᓇᓄᑦ ᐊᐅᔾᔭᐃᖅᑕᐅᓪᓗᑎᒡᓗ ᓄᓇᐃᑦ ᓯᕐᒥᖏᓐᓄᑦ.”  

“ᑕᐃᒪᐃᒐᔪᒃᐳᖅ, ᓇᓂᓯᓯᒪᔪᒍᑦ ᓴᐅᓯᒪᔪᓂᒃ ᓯᕐᒦᑦ ᓂᓚᖏᓐᓂᒃ ᐊᕐᕌᒍᓕᖕᓂᒃ ᑭᖑᓪᓕᖅᐹᒧᑦ ᓄᓇᕐᔪᐊᖅ ᓯᕐᒦᓐᓇᕈᖅᑐᒧᑦ, ᐊᑯᓐᓂᖓᓂᐸᓗᒃ 23,000 28,00ᓗ ᐊᕐᕌᒎᓚᐅᖅᑐᑦ. ᑭᓯᐊᓂ ᑖᓐᓇ ᐊᑭᐊᓂ ᓇᓂᔭᕗᑦ ᐃᑦᑕᐅᓂᖅᓴᖅ ᐊᓯᓂᑦ ᓯᕐᒦᑦ ᓂᓚᖏᓐᓂᑦ ᓇᓂᔭᐅᔪᓂᑦ ᓄᓇᐃᑦ ᓯᕐᒥᖏᓐᓂ ᓄᓇᕐᔪᐊᑉ ᐅᐊᖕᓇᖓᓂ.”

ᖃᐅᔨᓇᓱᒃᖢᒋᑦ ᓄᑕᐅᖏᓐᓂᖏᑦ ᒪᕐᕋᐃᑦ ᓯᕐᒥᖕᒧᐊᖅᑕᐅᔪᑦ, ᖃᐅᔨᓴᖃᑎᒌᑦ ᐊᑐᓚᐅᖅᑐᑦ ᓄᓇᕐᔪᐊᑉ ᓂᐱᑦᑕᕐᓂᖓᓄᑦ ᕿᔪᒃᑖᕈᖅᑐᓄᑦ ᖃᐅᔨᓴᕐᓂᕐᓂᒃ. ᒪᕐᕋᐃᑦ ᑰᓄᐊᕌᖓᑕ ᑕᓯᕐᒧᓪᓘᓐᓃᑦ, ᓂᐱᓐᓇᕐᓂᖏᑦ ᓄᓇᒥᐅᑕᖏᑕ ᑎᒃᑯᐊᓲᖑᕗᑦ ᓄᓇᕐᔪᐊᑉ ᒫᓐᓇᐅᔪᖅ ᓂᐱᑦᑖᕐᓂᖓᑕ ᑐᕌᖅᑕᖓᓄᑦ. ᒪᕐᕋᐃᑦ ᓴᐅᔭᐅᒐᒥᒃ, ᑖᒃᑯᐊ ᑎᒃᑯᐊᖓᓂᖏᑦ ᓄᓇᒥᐅᑦ ‘ᐊᐅᓚᔾᔭᒍᓐᓇᐃᓪᓕᕗᑦ,” ᐳᐃᒍᔾᔭᐃᖅᖢᒍ ᓄᓇᕐᔪᐊᑉ ᓂᐱᑦᑕᕐᓂᖓᑕ ᑐᕌᖓᔭᖓ ᑕᐃᔅᓱᒪᓂᒥ. ᖃᐅᔨᓴᕐᓃᑦ ᐃᑎᔪᓂᑦ ᓄᓇᓂᒃ ᐱᔭᐅᔪᓂᑦ ᑕᕆᐅᑉ ᐃᖅᑲᖓᓂᑦ ᓴᖅᑭᔮᖅᑎᑦᑎᓯᒪᕗᑦ ᓄᓇᕐᔪᐊᑉ ᓂᐱᑦᑕᕐᓂᖓ ᐅᑎᒧᖔᖅ ᓵᓯᒪᔪᖅ 183 ᖏᖅᓱᖅᖢᓂ ᕿᒪᒃᑕᑦᑎᓐᓂ 83 ᒥᓕᐊᓐ ᐊᕐᕌᒍᓂ. ᑖᒃᑯᐊ ᐅᑎᒧᑦ ᓵᓐᓃᑦ ᑕᐃᒪᐃᒐᔪᖏᑦᑐᑦ, 100,000 ᐊᕐᕌᒍᐸᓗᖕᓂᑦ 1 ᒥᓕᐊᓐᓄᑦ ᐊᕐᕌᒍᓄᑦ.

ᓴᓂᓕᕇᒃᑎᓪᓗᒋᑦ ᑕᑯᓇᒃᖢᒋᑦ ᓂᐱᑦᑖᕐᓃᑦ ᑎᒃᑯᐊᒐᓂᖏᑦ ᒪᕐᕋᓂ ᓇᓂᔭᐅᔪᓂ ᓯᕐᒥᖕᒥ ᓴᖅᑭᑦᑐᒥ ᐊᑭᐊᓂ ᐊᑐᖅᖢᒍ ᓂᐱᑦᑕᕐᓂᕐᓄᑦ ᓄᓇᕐᔪᐊᕐᒥ ᓵᙵᓃᑦ ᖃᖓᒥᑦ ᓇᓗᓇᐃᖅᓯᔪᑦ (ᑐᙵᓪᓗᑎᒃ ᑕᕆᐅᕐᓂ ᒪᕐᕋᓂᑦ ᐳᐃᒍᔾᔭᐃᖅᓯᒪᔪᓂᑦ), ᖃᐅᔨᓴᖅᑏᑦ ᓇᓚᐅᑦᑖᕈᓐᓇᓚᐅᖅᑐᑦ ᓯᕐᒥᐅᑉ ᐊᕐᕌᒍᖏᓐᓂᒃ.

ᔅᑎᕙᓂ ᐅᖃᖅᑐᖅ ᒪᕐᕋᐃᑦ ᓯᕐᒥᐅᑉ ᖁᓛᓃᑦᑐᑦ ᐳᐃᒍᔾᔭᐃᖅᓯᓚᐅᖅᑐᑦ ᓇᓗᓇᐃᖅᓯᔪᓂᒃ ᓂᐱᑦᑖᕐᓇᐅᑉ ᐅᑎᒧᖔᖅ ᓵᓐᓂᖓᓂᒃ 700,000 ᐊᕐᕌᒎᓚᐅᖅᑐᓂ. ᑕᐃᒪᐃᒻᒪᑦ ᑖᔅᓱᒥᖓ ᓂᓚᖃᓚᐅᖅᑐᑦ ᑕᐃᒪᐃᓚᐅᖅᑎᓐᓇᒍ, ᑕᐃᒪᐃᒻᒪᑦ ᑎᒫᓂᐅᖏᑦᑐᖅ 700,000 ᐊᕐᕌᒍᖃᖅᐳᖅ.

 “ᓂᓚᑐᖃᐅᓛᖑᔪᖅ ᓇᓂᔭᐅᔪᓂᑦ ᓄᓇᐃᑦ ᓯᕐᒥᖏᓐᓂ ᓄᓇᕐᔪᐊᑉ ᐅᐊᖕᓇᖓᓂ.”

ᔅᑎᕙᓂ ᐅᑎᖅᓯᒪᖏᒃᑲᓗᐊᖅᖢᓂ ᐊᑭᐊᓄᑦ 2024ᒥᓂᑦ, ᑕᑯᓇᐃᓐᓇᖅᑕᖏᑦ ᖃᐅᔨᔭᐅᔪᑦ ᖃᐅᔨᓴᖅᑕᒥᓂᑦ. ᑲᑐᔾᔨᖃᑎᖃᖅᖢᓂ ᑕᒃᑐ ᑕᓂᐅᓪ ᕗᐊᑎᐊᒥᒃ ᓯᓚᑦᑐᖅᓴᕐᕕᒡᔪᐊᖓᓂᑦ ᒪᓐᑐᕆᐊᓪ, ᔅᑎᕙᓂ ᑎᑎᕋᓂᒃ ᓴᖅᑭᑦᑎᓚᐅᖅᑐᖅ ᖃᐅᔨᔭᒥᓂᑦ ᓄᓇᓕᕆᓂᕐᓄᑦ ᑎᒥᐊᑕ ᐊᒥᐊᓕᒃᑲᓂᑦ ᓄᓇᓕᕆᓃᑦ ᐅᖃᓕᒫᒐᖏᓐᓂ ᓯᑎᐱᕆ 2024ᒥ.

ᓇᓗᓇᐃᖅᓯᒪᔪᖅ - ᓇᓗᓇᐃᖅᓯᒪᔪᑦ: ᓯᕐᒦᑦ ᐊᐅᖕᓂᖏᓐᓄᑦ ᓄᓇᐃᖅᑐᑦ ᐊᑭᐊᓂ ᓴᖅᑭᑦᑎᔪᑦ ᐃᑦᑕᕐᓂᓴᕐᓂᒃ ᓯᕐᒦᑦ ᓂᓚᖏᓐᓂᒃ.

ᓇᓗᓇᐃᖅᓯᒪᔪᖅ - ᓇᓗᓇᐃᖅᓯᒪᔪᑦ: ᓯᕐᒥᒃ -93 ᐊᑭᐊᓂ ᓴᖅᑭᔮᖅᑎᑦᑎᕗᖅ ᓯᐅᕋᐃᑦ ᑲᑎᑦᑐᑦ ᓯᕐᒥᐅᑉ ᓂᓚᖓᓄᑦ. ᑖᒃᑯᐊ ᓴᐅᓯᔪᓐᓇᖅᑐᑦ ᐊᖏᔪᓂᒃ ᓯᕐᒦᑦ ᓂᓚᖏᓐᓂᒃ, ᖃᖓᐅᓕᕈᓂ ᐊᐅᒃᑎᖏᓪᓗᒋᑦ ᓄᓇᐃᑦ ᓯᕐᒥᖏᓐᓂ.

ᑲᑎᙵᓕᖅᑎᑦᑎᓃᑦ ᐳᖅᑐᔪᓄᑦ ᓄᓇᓄᑦ ᖁᑦᑎᒃᑐᒥ ᐅᑭᐅᖅᑕᖅᑐᕐᒧᓪᓗ

ᔅᑲᑦ ᕕᓕᐊᒻᓴᓐ, PhD

ᐅᑭᐅᖅᑕᖅᑐᓂ ᖃᐅᔨᓴᕐᓂᕐᓄᑦ ᑭᒡᓕᓯᓂᐊᖅᑎ – ᑭᒡᓕᓯᓂᐊᕐᓂᕐᓄᑦ ᓴᓇᐅᒐᓄᓪᓗ ᐱᓕᕆᖃᑎᒌᑦ

ᖃᐅᔨᓴᕐᓂᕐᓄᑦ ᐊᔪᙱᓛᖓ: ᓯᓚᐃᑦ ᐊᓂᕐᓂᖃᖏᑦᑑᓪᓗ ᑲᑎᓐᓂᖏᑦ

ᐳᖅᑐᓃᑦ ᓴᐃᓐᑦ ᐃᓚᐃᐊᔅ ᖃᖅᑲᓂ ᔪᑲᓐᒥ ᖃᓂᒋᔮᓃᑦᑐᑦ ᖄᖓᑕ ᐊᓂᕐᓂᖃᕐᓇᖅᑑᑉ, ᐳᒃᑭᓛᖓ ᓄᓇᕐᔪᐊᑉ ᓯᓚᖓᑕ, ᖃᓂᓐᓂᖅᓴᖅ ᖄᖏᓐᓂᑦ ᐳᖅᑐᓂᖅᓴᓂᑦ ᖃᖅᑲᓂᑦ ᓄᓇᕐᔪᐊᑉ ᕿᑎᐊᓂ.

ᓯᓚ ᐊᓂᕐᓂᑭᓐᓂᖅᓴᐅᓕᓲᖅ ᖃᓂᓐᓂᖅᓴᓂ ᓄᓇᕐᔪᐊᑉ ᖄᖓᓂ ᐊᑖᓂᓗ, ᑕᐃᒪᐃᒻᒪᑦ ᐊᓂᕐᓂᖃᕐᓇᖅᑐᖅ ᐊᓂᕐᓂᑭᓐᓂᖅᓴᐅᓕᓲᖅ ᑕᐃᑲᓂᑦᑕᐅᖅ. ᑕᐃᒪᐃᒻᒪᑦ, 6,000 ᒦᑕᓂᒃ ᐳᖅᑐᓂᓕᒃ ᓴᐃᓐᑦ

ᐃᓚᐃᐊᔅ ᖃᖅᑲᐃᑦ, ᐅᐊᖕᓇᖓᓂ 60° ᐅᐊᖕᓇᖅ ᓴᓂᒧᑦ, ᖁᓛᓄᐊᖅᐳᖅ ᐊᓂᕐᓂᖃᕐᓇᐅᑉ. ᑖᒃᑯᐊ ᖃᖅᑲᐃᑦ ᖃᓂᓐᓂᖅᓴᐃᑦ ᖄᖓᓄᑦ ᐊᓂᕐᓂᖃᕐᓇᐅᑉ ᖃᖅᑲᖅ ᐃᕗᕆᔅᑦᒥᑦ, 8,849 ᒦᑕᓄᑦ ᐳᖅᑐᓂᓖᑦ 28° ᐅᐊᖕᓇᒦᖦᖢᑎᒃ.

ᐅᑭᐅᖅᑕᖅᑐᓂ ᖃᐅᔨᓴᕐᓂᕐᓄᑦ ᑭᒡᓕᓯᓂᐊᖅᑎ ᔅᑲᑦ ᕕᓕᐊᒻᓴᓐ ᐊᑎᖃᖅᑎᑕᖏᑦ ᖃᖅᑲᐃᑦ, “ᐃᓚᖓᑦ, ᐱᓛᖑᖏᒃᑯᓂ, ᖃᐅᔨᔪᒥᓇᓛᑦ ᓯᓚᓄᑦ ᐃᓃᑦ ᓄᓇᕐᔪᐊᕐᒥ.”

“ᑭᒃᑯᓕᒫᑦ ᐅᖃᓪᓚᖃᑦᑕᕐᒪᑕ ᖃᓄᑎᒋ ᐅᑭᐅᖅᑕᖅᑐᖅ ᐅᖅᑰᓯᓕᕐᒪᖔᑦ. ᐄ, ᑖᓐᓇ ᑭᓲᖏᑦᑐᖅ ᓴᓂᐊᓂ ᐅᑭᐅᖅᑕᖅᑑᑉ ᓯᓚᖓᑕ,” ᐅᖃᖅᑐᖅ ᔅᑲᑦ. ᐅᖃᖅᑐᖅ ᓯᓚᐃᑦ ᓴᐃᓐᑦ ᐃᓚᐃᐊᔅ ᖃᖅᑲᓂ ᐅᖅᑰᓯᕙᓪᓕᐊᓂᖅᓴᑦ ᓄᓇᕐᔪᐊᕐᒥ ᐅᖅᑰᓯᕙᓪᓕᐊᔪᕐᒥᑦ. “ᐊᖏᔪᐊᓗᐃᑦ ᓴᐃᓐᑦ ᐃᓚᐃᐊᔅ ᖄᖅᑲᐃᑦ ᐱᕐᔪᐊᖑᔪᐊᓗᐃᑦ ᑐᑭᓯᓂᑦᑎᓐᓄᑦ ᖃᓄᖅ ᐊᓯᓕᒫᖏᑦ ᐅᑭᐅᖅᑕᖅᑑᑉ ᓯᓚᖏᑦ ᐊᓯᔾᔨᖅᐸᓪᓕᐊᓂᖏᓐᓄᑦ.”

ᑖᓐᓇ ᐅᐊᔅᓯᓇᓱᒃᖢᒍ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᐅᓚᑦᑎᔪᑦ ᐃᒻᒥᓂᒃ ᐊᐅᓚᑦᑐᓂᒃ ᓯᓚᓐᓂᐊᕐᕕᖕᓂᒃ ᖃᖅᑲᓂ. ᔅᑲᑦ ᐊᐅᓚᑦᑎᔪᖅ ᐱᓕᕆᖃᑎᒌᓂᒃ ᑕᑯᓇᓲᓂᒃ ᐅᖅᑰᓯᕙᓪᓕᐊᓂᒃᑯᑦ ᖃᓄᐃᑉᐸᓪᓕᐊᔪᓂᒃ ᑖᒃᑯᓇᙵᑦ ᓯᓚᓐᓂᐊᕐᕕᖕᓂᑦ, ᖃᖓᑦᑕᖅᑎᑕᐅᓯᒪᔪᓂᑦ ᐳᕕᒐᓂᑦ ᓇᐃᓴᐃᓂᕐᓂᑦ, ᖃᖓᑦᑕᖅᑎᑕᐅᓯᒪᔪᓂᑦ ᖃᐅᔨᓴᖅᑕᓂᑦ, ᖁᑦᑎᒃᑐᓂᑦ ᓄᓇᓂᑦ ᓂᓚᖕᓂᑦ ᐲᖅᑕᓂᑦ ᓴᐃᓐᑦ ᐃᓚᐃᐊᔅ ᓯᕐᒥᖏᓐᓂᑦ, ᐊᓯᓂᓪᓗ ᓯᓚᓂᑦ ᖃᓄᐃᑦᑐᕕᓂᕐᓂᑦ ᓇᓗᓇᐃᒃᑯᑕᓂᓗ. ᑕᒃᑯᐊ ᖃᐅᔨᒪᔭᐅᔪᑦ ᐃᑲᔫᑕᐅᓂᐊᖅᑐᑦ ᖃᐅᔨᓴᖃᑎᒌᓄᑦ ᓄᓇᕐᔪᐊᑉ ᐊᓯᔾᔨᖅᐸᓪᓕᐊᓪᓚᒃᑐᒥᒃ ᓯᓚᖃᕈᑎᖏᓐᓂᒃ.

ᖃᐅᔨᔭᐅᔪᑦ ᑲᑎᖅᓱᖅᑕᐅᔪᓂᑦ ᓴᖅᑭᔮᖅᑎᑦᑎᕗᑦ ᐊᕐᕌᒍᑕᒫᑦ ᓄᓇᐃᑦ ᖄᖏᑕ ᐅᖅᑰᓂᖏᓐᓂᒃ ᓴᐃᓐᑦ ᐃᓚᐃᐊᔅ ᖃᖅᑲᓂ ᐅᖅᑰᓯᒋᐊᖅᓯᒪᕗᑦ 1979ᒥᓂᑦ ᐳᖅᑐᓂᓕᒫᓂᑦ 2,000ᓂᑦ 6,000ᓄᑦ ᒦᑕᓄᑦ. ᐅᖅᑰᓯᓛᑦ ᖁᓛᓃᑦᑐᑦ 5,500 ᒦᑕᑦ.

ᐅᖅᑰᓯᕙᓪᓕᐊᓂᖓ ᓴᐃᓐᑦ ᐃᓚᐃᐊᔅ ᖃᖅᑲᓂ 1.6ᖏᖅᓱᖅᖢᓂ ᓱᒃᑲᓂᖅᓴᖅ ᓄᓇᐃᑦ ᖄᖓᑕ ᐅᖅᑰᓂᖏᓐᓂᑦ ᓄᓇᕐᔪᐊᕐᒥᓕᒫᖅ.

ᖃᓄᐃᒻᒪᑦ ᓯᓚ ᐅᖅᑰᓯᕙᓪᓕᐊᓂᖅᓴᐅᕙ ᑖᒃᑯᓇᓂ ᖁᑦᑎᒃᑐᓂ ᓄᓇᓂ?

“ᐳᔪᓄᑦ ᐊᒃᑐᐃᓂᐅᔪᖅ—ᑭᓯᐊᓂ ᐳᔫᖏᑦᑐᖅ ᑭᒃᑯᓕᒫᓄᑦ ᐅᖃᐅᓯᐅᓲᖅ. ᐱᕐᔪᐊᖑᔪᖅ ᐳᔪᖅ ᐅᖃᐅᓯᕆᔭᐅᔪᓐᓇᖏᑦᑐᖅ, ᐃᒥᕐᒥᑦ ᐳᔪᖅ,” ᐅᖃᖅᑐᖅ ᔅᑲᑦ. ᔅᑲᑦ ᐅᖃᖅᑐᖅ ᐅᖅᑰᓂᖅᓴᑦ ᓯᓚᑦ ᐃᒥᕐᓂᑦ ᐳᔪᖃᕐᓂᖅᓴᐅᖕᒪᑕ, ᐳᔪᐃᑦ ᐃᔅᓴᒃᓯᓕᕆᓪᓗᑎᒃ ᐅᖅᑰᓂᕐᓂᒃ ᓄᓇᕐᔪᐊᕐᒥᑦ. ᑖᓐᓇ ᑕᐃᒪᐃᔾᔪᓯᖅ ᐅᖅᑰᓯᑎᑦᑎᒃᑲᓐᓂᖅᖢᓂ ᓯᓚᒥᒃ, ᐋᖅᑭᒃᓯᓪᓗᓂ ᐳᔪᕐᒧᑦ ᐅᖅᑰᓯᕙᓪᓕᐊᔪᒥᒃ. ᐅᑭᐅᖅᑕᖅᑐᖅ ᐅᖅᑰᓯᕙᓪᓕᐊᑎᓪᓗᒍ, ᐃᒥᒃᑲᓐᓃᑦ ᐃᔅᓴᐅᑎᕗᑦ ᓯᓚᒧᑦ, ᐅᖅᑰᓯᔾᔪᑎᒋᓂᖅᓴᕆᓪᓗᒋᑦ ᓯᓚᒧᑦ.

ᔅᑲᑦ ᐅᖃᖅᑐᖅ ᓴᐃᓐᑦ ᐃᓚᐃᐊᔅ ᓯᓚᒃᑯᑦ ᐅᖅᑰᓯᓂᖓ “ᖃᐅᔨᓴᐅᑕᐅᔪᖅ” ᐅᑭᐅᖅᑕᖅᑐᓕᒫᒧᑦ

“ᑖᒃᑯᐊ ᐊᒃᑐᐊᓂᐅᔪᑦ ᐅᑯᓄᖓ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖁᑦᑎᒃᑐᓂᓗ ᓄᓇᓂ. ᑖᒃᑯᐊᓗ ᑐᑭᓯᒍᑦᑎᒍᑦ, ᐅᖃᕈᓐᓇᕐᓂᐊᖅᑐᒍᑦ ᐊᐅᓚᔾᔪᓯᕐᓄᑦ ᖃᓄᐃᒻᒪᑦ ᓄᓇᕐᔪᐊᖅ ᐅᖅᑰᓯᕙᓪᓕᐊᓪᓚᖕᒪᖔᑦ.”

ᓯᕐᒥᒃ ᓴᐃᓐᑦ ᐃᓚᐃᐊᔅ ᖃᖅᑲᖏᓐᓂ ᒃᓗᐊᓂ ᑲᓇᑕᒥ ᒥᕐᖑᐃᖅᓯᕐᕕᖕᒥ, ᔪᑲᓐ.

ᓇᓗᓇᐃᒃᑯᑕᖅᓯᓃᖅ ᖁᐱᕐᕈᓂᒃ

ᐳᕋᐃᐊᓐ ᕙᓐᑕᓐᐳᕆᖕᒃ, ᒻ.Sc.

ᐅᑭᐅᖅᑕᖅᑐᓂ ᖃᐅᔨᓴᕐᓂᕐᓄᑦ ᑭᒡᓕᓯᓂᐊᖅᑎ - ᑭᒡᓕᓯᓂᐊᕐᓂᕐᓄᑦ ᓴᓇᐅᒐᓄᓪᓗ ᐱᓕᕆᓂᕐᓄᑦ ᐱᓕᕆᖃᑎᒌᑦ

ᖃᐅᔨᓴᕐᓂᕐᓄᑦ ᐊᔪᙱᓛᖓ: ᖁᐱᕐᕈᐃᑦ

ᐃᓄᐃᑦ ᖃᐅᔨᒪᕗᑦ ᓇᓗᓇᐃᒃᑯᑕᓂᒃ ᓂᐅᕕᐊᒃᓴᓂ, ᑭᓯᐊᓂ ᐃᓱᒪᓂᖅ ᓇᓗᓇᐃᒃᑯᑦᑎᖅᓯᓂᕐᓂᒃ ᖁᐱᕐᕈᓂᒃ ᖃᐅᔨᒪᔭᐅᓗᐊᖏᑦᑐᖅ.

1700ᖏᓐᓂᑦ, ᐆᒪᔪᑦ ᓇᓗᓇᐃᖅᑕᐅᖃᑦᑕᖅᓯᒪᖕᒪᑕ ᐊᑐᖅᖢᑎᒃ ᐆᒪᔪᓕᕆᔨᐅᑉ ᑲᕈᓪ ᓕᓂᐊᐃᔅ ᐱᓕᕆᔾᔪᓯᖓᓂᒃ ᐋᖅᑭᒃᓯᕕᒋᓪᓗᒋᑦ ᓚᑎᓐᑯᑦ ᑭᓲᓂᖓᓄᑦ ᐆᒪᔫᓪᓗ ᐊᑎᖓᓄᑦ ᑐᙵᓪᓗᑎᒃ ᑎᒥᒃᑯᑦ ᖃᓄᐃᓕᖓᓂᖏᓐᓄᑦ. ᑖᓐᓇ ᑕᐃᒪᐃᓕᐅᕈᓯᖅ ᖃᐅᔨᒪᔭᐅᔪᖅ ᐊᕕᒃᑐᐃᓪᓗᓂ ᐆᒪᔪᓕᕆᓂᖅᑎᑐᑦ.

“ᐅᐊᖑᕗᖅ ᐅᓪᓗᒥ ᐊᔪᕈᓐᓃᕋᑦᑕ ᓇᓗᓇᐃᒃᑯᑦᑎᖅᓯᓗᑕ ᐊᑐᓂᒃᑯᓪᓗ ᓇᓗᓇᐃᕐᓗᒋᑦ ᐆᒪᔪᑦ. ᐃᑲᔪᑐᐃᓐᓇᖅᑐᒍᑦ ᑭᓱᓕᒫᓂᒃ ᑲᕈᓪ ᓕᓂᐊᐃᔅ ᐊᓯᓂᓪᓗ ᐱᓕᕆᔭᐅᓯᒪᔪᕐᓂᒃ,” ᐅᖃᖅᑐᖅ ᖃᐅᔨᓴᖅᑎ ᐳᕋᐃᐊᓐ ᓕᓂᐊᐃᔅ. “ᑎᒥᐅᑉ ᑭᓱᓕᐅᕈᑎᓕᒫᖏᓐᓂᒃ ᖃᐅᔨᓴᕈᓐᓇᖅᖢᑕ, ᐊᔾᔨᒌᖏᓐᓂᕐᓂᒃ ᖃᐅᔨᔪᓐᓇᖅᑐᒍᑦ ᐆᒪᔫᖃᑎᒌᖏᑦᑐᓂ ᑐᙵᓪᓗᑎᒃ ᑎᒥᐊᑕ ᑭᓱᓕᐅᕈᑎᖏᓐᓄᑦ ᖃᐅᔨᒪᔭᐅᔪᓄᑦ, ᑐᙵᙱᖔᕐᓗᓂ ᑎᒥᖏᑕ ᑕᐅᑦᑐᑐᐊᖏᓐᓄᑦ ᐃᓕᓯᒪᔭᕐᒥᓄᓪᓘᓐᓃᑦ ᓇᓚᐅᑦᑖᕐᓗᑎᒃ ᖃᓄᖅ ᐆᒪᔫᖃᑎᒌᖏᑦᑐᑦ ᐃᓚᒌᖕᒪᖔᑕ.”

ᐳᕋᐃᐊᓐ ᑲᑎᖅᓱᐃᓲᖅ ᐊᔾᔨᒌᖏᑦᑐᓂᒃ ᖁᐱᕐᕈᓂᒃ ᐃᖃᓗᒃᑑᑦᑎᐊᑉ ᓄᓇᖏᓐᓂ, ᑮᓕᓂᕐᒥ, ᐊᑐᖅᖢᓂ ᐊᔪᓕᖅᑎᑦᑎᔾᔪᑎᓂᒃ ᓴᓇᓯᒪᔪᓂᒃ ᑭᓱᑐᐃᓐᓇᓂᒃ ᐱᔪᓐᓇᖅᖢᑎᒃ ᐹᕐᖑᖅᑐᓂᑦ ᖃᖓᑕᔪᓄᑦ ᖁᐱᕐᕈᓂᒃ. ᑖᒃᑯᐊ ᖃᐅᔨᓴᒐᒃᓴᑦ ᓇᒃᓯᐅᔾᔭᐅᓪᓗᑎᒃ ᓯᓚᑦᑐᖅᓴᕐᕕᒡᔪᐊᖓᓄᑦ ᒍᐃᐊᕝ ᑎᒥᖓᓄᑦ ᐆᒪᔫᖃᑎᒌᖏᑦᑐᓄᑦ ᑎᒥᐅᑉ ᑭᓱᓕᐅᕈᑎᓕᒫᖏᓐᓄᑦ ᖃᐅᔨᓴᖅᑐᓄᑦ ᓇᓗᓇᐃᖅᑕᐅᓪᓗᑎᒃ ᑎᒥᐅᑉ ᑭᓱᓕᐅᕈᑎᖏᑎᒍᑦ.

ᐳᕋᐃᐊᓐ ᐅᖃᖅᑐᖅ ᖁᐱᕐᕈᓄᑦ ᓇᓗᓇᐃᒃᑯᑕᐃᑦ ᑎᑎᖅᓯᒪᔪᓄᑦ ᓇᐃᓴᐅᑎᓄᓪᓗ ᐊᑐᖏᑦᑐᑦ ᓂᐅᕕᐊᒃᓴᑎᑐᑦ ᑭᓯᐊᓂ ᐆᒪᔫᑉ ᑎᒥᒃᑯᑦ ᑭᓱᓕᐅᕈᑎᖏᓐᓄᑦ. ᐊᑐᓂ ᖁᐱᕐᕉᑉ ᓇᓗᓇᐃᒃᑯᑕᖓ ᐊᔾᔨᖃᖏᑦᑐᒥᒃ ᓇᐃᓴᐅᑎᓕᖅᑕᐅᓪᓗᓂ ᑕᐃᔭᐅᔪᒥᒃ ᓇᓗᓇᐃᒃᑯᑕᒧᑦ ᓇᐃᓴᐅᑎᒥᒃ, ᑲᑎᑎᑕᐅᓪᓗᓂ ᑎᒥᐅᑉ ᑭᓱᓕᐅᕈᑎᖏᓐᓄᑦ ᖃᐅᔨᒪᔭᐅᔪᓄᑦ.

ᑎᒥᐅᑉ ᑭᓱᓕᐅᕈᑎᖏᑦ ᖃᐅᔨᓴᖅᑕᐅᖅᑳᖅᖢᑎᒃ, ᐊᓯᓄᓪᓗ ᓴᓂᐊᓂ ᑕᑯᓇᒃᑕᐅᓪᓗᑎᒃ ᐃᓐᑐᓂᐊᑦᑯᑦ ᑭᓱᓕᐅᕈᑎᖏᓐᓄᑦ ᖃᐅᔨᒪᔾᔪᑕᐅᔪᓄᑦ ᑲᑎᓯᒪᔪᓄᑦ ᓇᓂᔭᐅᓪᓗᑎᒃ ᐊᔾᔨᒋᓛᖏᑦ.

ᓴᖅᑭᔾᔪᑕᐅᓪᓗᑎᒃ ᑎᒥᐅᑉ ᑭᓱᓕᐅᕈᑎᖏᓐᓄᑦ-ᓇᓗᓇᐃᒃᑯᑕᓕᖅᓯᒪᔪᓂᒃ ᖁᐱᕐᕈᓂᒃ, ᐊᓯᔾᔨᖅᑎᓐᓇᒋᑦ ᖃᐅᔨᒪᔾᔪᑎᒋᓪᓗᒋᑦ ᖁᐱᕐᕈᑦ ᐃᖃᓗᒃᑑᑦᑎᐊᑉ ᓄᓇᖏᓐᓃᑦᑐᑦ ᒫᓐᓇ. ᑖᒃᑯᐊ ᐃᑲᔫᑕᐅᔪᑦ ᐅᐊᔅᓯᓂᕐᓄᑦ ᑕᒫᓂᕐᒥᐅᑕᐅᖏᑦᑐᑦ ᐆᒪᔪᑦ ᑕᒪᐅᙵᕈᑎᒃ. ᓄᑖᑦ ᖁᐱᕐᕈᐃᑦ ᑎᑭᑦᑐᓐᓇᖅᑐᑦ ᐱᔮᖅᑰᖏᑦᑐᒧᑦ ᐃᓄᒃᑎᒍᑦ ᐅᓯᔭᐅᔪᓄᓪᓘᓐᓃᑦ. ᑭᓯᐊᓂ, ᖃᐅᔨᓴᖅᑏᑦ ᐳᕋᐃᐊᓐᑎᑐᑦ, ᓇᓚᐅᑦᑖᕈᓐᓇᖅᑐᑦ ᓯᓚᐃᑦ ᐊᓯᔾᔨᓕᖅᑎᓪᓗᒋᑦ, ᖁᐱᕐᕈᐃᑦ ᖃᓪᓗᓈᓂᑦ ᐅᑭᐅᖅᑕᖅᑐᒧᐊᕐᓂᐊᖅᑐᑦ, ᐃᓂᓂ ᐊᖏᒡᓕᒋᐊᕐᓗᒋᑦ.

“ᖁᐱᕐᕈᐃᑦ ᐊᕙᑏᓪᓗ ᖃᓄᐃᓲᖑᖕᒪᑕ ᐱᕐᔪᐊᑎᒍᑦ,” ᐅᖃᖅᑐᖅ ᐳᕋᐃᐊᓐ.

ᐃᓱᒫᓘᑕᐅᑐᐃᓐᓇᕆᐊᓕᒃ ᓄᑖᑦ ᖁᐱᕐᕈᐃᑦ ᐅᑭᐅᖅᑕᖅᑐᒧᐊᕈᑎᒃ ᖃᓄᐃᖃᑎᖃᕐᓂᐊᕐᒪᑕ ᐅᑭᐅᖅᑕᖅᑐᖅ—ᐃᓃᕐᓗᒋᓪᓘᓐᓃᑦ —ᐊᓰᑦ ᐆᒪᔪᑦ. ᑖᓐᓇ ᓂᕿᒃᓴᑭᔾᔪᑕᐅᔪᓐᓇᖅᑐᖅ ᑕᒫᓂᕐᒥᐅᓄᑦ ᐆᒪᔪᓄᑦ, ᓂᕆᔨᖃᖏᓪᓗᑎᒡᓘᓐᓃᑦ ᑕᒪᐅᙵᓕᓵᖅᑐᑦ ᖁᐱᕐᕈᑦ.

ᐅᖃᐅᓯᖃᕆᕗᖅ ᐊᓯᒥᒃ ᐃᓱᒫᓘᑎᒥᒃ.

“ᐱᐅᙱᓚᖅ ᖃᓪᓗᓈᒥᐅᓄᑦ ᑲᓇᑕᒧᑦ ᑕᐅᖅᓰᔪᖃᕈᑎᒃ ᑎᒥᐅᑉ ᑭᓱᓕᐅᕈᑎᖏᓐᓂᒃ ᐊᔾᔨᒌᐸᓗᖕᓄᑦ ᐆᒪᔪᓄᑦ, ᐆᒪᔪᖅ ᐅᑭᐅᖅᑕᖅᑐᒧᐊᕈᓂ, ᑎᒥᒧᑦ ᑭᓱᓕᐅᕈᑎᑖᕐᓗᓂ ᐊᓐᓇᐅᒪᔾᔪᑎᓂᒃ’ ᓂᒡᓚᓱᒃᑐᓂ, ᐅᑎᓕᕐᒥᓗᓂ ᖃᓪᓗᓈᓄᑦ ᑲᓇᑕᒧᑦ.”

ᐊᒃᑐᐃᓃᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ ᐆᒪᔫᖃᑎᒌᖏᑦᑐᓄᑦ, ᑕᒪᒃᑮᑦ ᐅᑭᐅᖅᑕᖅᑐᒥ ᖃᓪᓗᓈᓂᓗ ᑲᓇᑕᒥ, ᓇᓗᓇᐃᓐᓇᖅᐳᑦ. ᐅᖃᕐᒪᑦ ᐳᕋᐃᐊᓐ, “ᓯᓚᐃᑦ ᐊᓯᔾᔨᕐᓂᖏᑦ ᐊᒃᑐᐃᓂᖃᓪᓚᖕᓂᐊᖅᑐᑦ ᑭᓱᓕᒫᓄᑦ ᐊᕙᑎᒥᐅᑕᓄᑦ, ᑕᒪᒃᑮᒃ ᐃᕝᕕᑦ ᐅᕙᖓᓗ—ᑭᓯᐊᓂᑦᑕᐅᖅ ᖁᐱᕐᕈᓄᑦ.”

ᑖᓐᓇ ᒥᑭᑦᑐᑯᓗᒃ ᑐᑭᓕᓵᖅᑐᖅ ᐊᓯᓄᑦ ᐆᒪᔪᓄᑦ ᒪᓐᓂᓕᖅᓯᓲᖅ ᓇᓗᓇᐃᒃᑯᑕᓕᖅᑕᐅᓚᐅᕋᓂ ᓱᓕ. ᐊᓯᓄᑦ ᐆᒪᔪᓄᑦ ᒪᓐᓂᓕᖅᓯᓲᖅ ᒪᓐᓂᓕᖅᓯᓲᖅ ᐊᓯᓂᒃ ᖁᐱᕐᕈᓂᒃ ᕿᑎᕈᓪᓕᖏᑦ ᓂᕆᕙᒃᖢᑎᒃ ᐱᕈᖅᖢᑎᒡᓗ. ᐊᓂᓕᕆᓪᓗᓂ ᖁᐱᕐᕈᒥᑦ ᑐᑭᕐᓂᐊᓕᕈᓂ.

ᐳᕋᐃᐊᓪ ᕙᓐᑐᐳᕆᖕᒃ ᑯᕆᔅᑐᓪ ᓱᐳᓪᓗ ᖃᐅᔨᓴᖅᑐᑦ ᖁᐱᕐᕈᖅᑕᐅᑎᓂᒃ ᐃᖃᓗᒃᑑᑎᐊᑉ ᖃᓂᒋᔮᓂ 2007ᒥ.

ᑲᒪᓇᖅᑐᑦ ᒫᓰᑦ

ᐃᐅᕆᓐ ᑲᒃᔅ, M.Sc.

ᐅᑭᐅᖅᑕᖅᑐᓂ ᖃᐅᔨᓴᕐᓂᕐᓄᑦ ᑭᒡᓕᓯᓂᐊᖅᑎ - ᑭᒡᓕᓯᓂᐊᕐᓂᕐᓄᑦ ᓴᓇᐅᒐᓄᓪᓗ ᐱᓕᕆᓂᕐᓄᑦ ᐱᓕᕆᖃᑎᒌᑦ ᖃᐅᔨᓴᕐᓂᕐᓄᑦ ᑭᒡᓕᓯᓂᐊᖅᑎ—ᑭᒡᓕᓯᓂᐊᕐᓂᕐᓄᑦ ᓴᓇᐅᒐᓄᓪᓗ ᐱᓕᕆᓂᕐᒧᑦ ᐱᓕᕆᖃᑎᒌᑦ

ᖃᐅᔨᓴᕐᓂᕐᓄᑦ ᐊᔪᙱᓛᖓ: ᒫᓰᑦ

“ᒫᓰᑦ ᐊᑑᑎᖃᑦᑎᐊᖅᑐᑦ, ᑕᑯᒥᓇᖏᑦᑐᐊᓘᒐᓗᐊᕋᒥᒃ ᐊᔾᔨᒌᖏᓐᓈᓘᖅᑰᔨᓪᓗᑎᒡᓗ. ᐆᒪᔫᖃᑎᒌᖏᑦᑐᑦ ᖃᓄᐃᙱᑎᖃᑦᑕᖅᑕᖏᑦ,” ᐅᖃᖅᑐᖅ ᖃᐅᔨᓴᖅᑎ ᐃᐅᕆᓐ ᑲᒃᔅ.

ᐃᐅᕆᓐ ᐅᖃᖅᑐᖅ ᐅᑭᐅᖅᑕᖅᑐᒥᐅᑦ ᒫᓰᑦ ᖃᐅᔨᓴᖅᑕᐅᓯᒪᖏᑦᑐᑦ ᑕᐃᒪᓐᓇᑎᒋᑎᑐᑦ ᑕᑯᒥᓇᕐᓂᖅᓴᑎᑐᑦ ᐱᕈᖅᑐᑎᑐᑦ, ᐊᖏᓂᖅᓴᐅᓪᓗᑎᒃ ᐱᕈᖅᓯᐊᖃᖅᖢᑎᒡᓗ. ᑭᓯᐊᓂ, ᐱᕐᔪᐊᒥᒃ ᐊᑑᑎᓖᑦ ᐅᑭᐅᖅᑕᖅᑑᑉ ᐊᑖᓂ ᐅᑭᐅᖅᑕᖅᑐᓂᓗ ᐊᕙᑎᓂ.

“ᐊᐅᔾᔭᐃᖅᓯᓲᑦ ᓄᓇᐃᑦ ᓯᕐᒥᖏᓐᓂᒃ,” ᐅᖃᖅᑐᖅ ᐃᐅᕆᓐ. “ᑖᓐᓇ ᐱᕈᖅᑐᑦ ᐃᑭᐊ ᐱᕐᔪᐊᖑᔪᖅ ᐅᔅᓯᖏᔾᔪᑕᐅᓪᓗᓂ. ᐊᒻᒪᓗ, ᒫᓰᑦ ᓯᕗᓪᓕᖅᐸᐅᓪᓗᑎᒃ ᐱᕈᓲᑦ ᓄᓇᐃᓐᓇᕐᓂ ᐅᑭᐅᖅᑕᖅᑐᒥᓘᓐᓃᑦ ᓄᓇᓂ. ᐱᓯᒪᓲᑦ ᐃᒥᕐᓂᒃ ᐃᑲᔪᖅᖢᑎᒡᓗ ᐃᔾᔪᓕᐅᕐᓂᕐᓄᑦ, ᐊᓯᓄᑦ ᐱᕈᕐᕕᐅᔪᓐᓇᖅᓯᓪᓗᑎᒃ ᐱᕈᖅᑐᓄᑦ.”

ᐅᖃᖅᑐᖅ ᖃᐅᔨᓴᕐᓂᒃᑯᑦ ᖃᐅᔨᓇᓱᒃᑐᑦ ᖃᓄᖅ ᒫᓰᑦ ᐱᕐᔪᐊᖑᖕᒪᖔᑕ ᓇᐃᑐᕈᔭᓐᖃᐃᓐᓇᕈᓐᓇᕐᓂᕐᓄᑦ ᖃᓄᕐᓗ ᐊᒃᑐᐊᖕᒪᖔᑕ ᐆᒪᔫᖃᑎᒌᖏᑦᑐᑦ ᖃᓄᐃᖏᓐᓂᖏᓐᓄᑦ ᐃᓂᖃᖅᑎᑦᑎᓪᓗᑎᒃ ᖁᐱᕐᕈᓂᒃ.

ᒫᓰᑦ ᖃᐅᔨᓴᖅᑕᐅᓯᒪᒐᓗᐊᖅᖢᑎᒃ ᐊᐅᓱᐃᑦᑑᑉ ᕿᑭᖅᑕᖓᓂ, ᐊᓯᓂ ᑲᓇᑕᒥ ᕿᑭᖅᑕᓂ ᖃᐅᔨᓴᓗᐊᖅᓯᒪᖏᑦᑐᑦ. ᒪᕐᕈᑐᐊᒃ ᑭᒡᓕᓯᓂᐊᕐᓂᕐᓄᑦ ᑎᑎᕋᑦ ᐅᖃᐅᓯᖃᖅᑐᑦ ᐱᕈᖅᑐᓂᒃ ᑮᓕᓂᕐᒥ. ᑐᙵᔪᑦ ᒪᕐᕉᖕᓄᑦ ᑕᑯᔭᖅᑐᖅᑐᓄᑦ: ᐊᑕᐅᓯᖅ 1913ᒥᑦ 1918ᒧᑦ ᐊᓯᐊᓗ 1959ᒥ. ᑲᑎᖦᖢᑎᒃ, ᑎᑎᖅᓯᒪᕗᑦ ᑲᑎᖦᖢᒋᑦ 57 ᐱᕈᖅᑐᓂᒃ. ᐃᐅᕆᓐ ᖃᐅᔨᓴᖅᑕᖏᓐᓂᑦ ᑮᓕᓂᕐᒥ, ᓇᓗᓇᐃᖅᓯᓯᒪᔪᖅ 71ᓂᒃ ᐊᔾᔨᒌᖏᑦᑐᓂᒃ ᐳᐃᒍᔾᔭᐃᖅᓯᒪᖏᑦᑐᓂᒃ ᓱᓕ ᑭᒡᓕᓯᓂᐊᕐᓂᕐᓄᑦ ᑲᑎᖅᓱᖅᓯᒪᔪᓂ ᑎᑎᕋᓂᓘᓐᓃᑦ. ᐃᐅᕆᓐ ᐅᒃᐱᕈᓱᒃᑐᖅ ᐅᓄᖅᑐᑦ ᓱᓕ ᐱᕈᖅᑐᑦ ᑲᑎᖅᓱᖅᑕᐅᓯᒪᙱᓚᑦ.

ᐊᔾᔨᒌᖏᑦᑐᑦ ᐱᕈᖅᑑᖃᑎᒌᖏᑦᑐᑦ ᐱᕈᓲᖑᕗᑦ ᐊᔾᔨᒌᖏᑦᑐᓂ ᐊᕙᑎᓂ—ᐸᓂᖅᑐᓂᑦ ᖃᐅᓯᖅᑐᓄᑦ. ᐃᐅᕆᓐ ᑕᑯᓇᒃᑐᖅ ᐊᔾᔨᒌᖏᑦᑐᓂᒃ ᐃᓂᒋᔭᐅᔪᓂᒃ ᐱᕈᕐᕕᐅᔪᓂ ᓴᖅᑭᔮᖅᑎᓐᓇᓱᒃᖢᒋᑦ ᐊᔾᔨᒌᖏᓐᓂᖏᑦ.

ᑮᓕᓂᖅ ᐊᖏᒐᒥ ᐊᒃᓱᕉᑎᖃᖅᖢᓂᓗ ᑕᑯᓇᒐᓱᒡᓗᓂ ᐅᖓᓯᒃᑐᓄᑦ ᐊᐅᔭᒃᑯᑦ, ᐃᐅᕆᓐ ᐅᐸᓲᖏᑦ ᓄᓇᐃᑦ ᐊᓰᑦ ᖃᐅᔨᓴᖅᑏᑦ ᐃᓚᐅᓪᓗᑎᒃ ᖁᓕᒥᒎᒃᑯᑦ. ᕿᓂᖅᓲᖅ ᐊᔾᔨᐅᖏᑦᑐᓂᒃ ᐃᓂᓂᒃ ᓄᓇᓂ ᑲᑎᖅᓱᐃᓲᖑᓪᓗᓂᓗ ᐅᓄᓛᖑᓇᓱᒃᑐᓂᒃ ᒫᓯᓂᒃ ᐊᔪᕐᓇᖏᑦᑐᒃᑯᑦ. ᐊᑐᓂ ᖃᐅᔨᓴᒐᒃᓴᑦ ᒥᑭᑦᑐᒧᑦ ᑲᔪᕐᒧᑦ ᐸᐃᑉᐹᕐᒧᑦ ᐴᓲᖏᑦ ᖃᐅᔨᓴᕐᕕᖕᒧᑦ ᐅᑎᐅᑎᓪᓗᒋᑦ ᖃᐅᔨᓴᕐᓂᐊᕋᒥᒋᑦ ᐊᖏᓐᓇᖅᑐᒧᑦ ᓇᓗᓇᐃᕐᓗᒋᓪᓗ ᖃᓄᐃᑦᑑᓕᖓᓂᖏᑦ.

ᐊᑕᖏᑲᓴᒃᑐᑦ ᐱᕈᖅᑐᑦ ᐆᒻᒪᕈᓐᓇᙱᓚᑦ ᐸᓂᖅᓯᒪᓕᕌᖓᒥᒃ, ᑭᓯᐊᓂ ᒫᓰᑦ ᐊᔪᖏᑦᑐᑦ.

“ᐸᓂᖅᑐᖅ ᒫᓯ ᐃᒻᒥᕈᕕᐅᒃ ᐆᒻᒪᓲᖅ. ᐱᐅᒋᓛᕋ ᑖᓐᓇ ᒫᓯᓄᑦ,” ᐅᖃᖅᑐᖅ ᐃᐅᕆᓐ.

ᑕᑯᓇᒃᓯᒪᔪᖅ ᒫᓯᓂᒃ 1800ᓂᑦ ᐆᒻᒪᖅᑎᖦᖢᒋᓪᓗ ᐃᒥᕐᒧᑦ. ᐆᔭᐅᔭᓂᒃ ᑕᖅᓴᖃᕈᓐᓃᖅᑐᑦ, ᐆᔭᐅᔭᐅᓇᑎᒃ ᑕᖅᓴᖃᓗᐊᕋᑎᒡᓗ. “ᑭᓯᐊᓂ,” ᐅᖃᖅᑐᖅ ᐃᐅᕆᓐ, “ᐃᓗᓕᖏᑦ ᐃᒻᒥᖅᖢᑎᒃ ᐆᒻᒪᖅᑰᔨᒃᑲᓐᓂᖅᖢᑎᒃ.”

ᐃᐅᕆᓐ ᐅᖃᖅᑐᖅ ᖃᓄᐃᑦᑑᓂᖏᑦ ᒫᓰᑦ ᑲᑎᖅᓱᖅᑕᖏᑦ ᐱᕈᖅᑐᓄᑦ ᖃᐅᔨᒪᔾᔪᑕᐅᓂᐊᖅᑐᓄᑦ ᑲᑎᖅᓱᖅᓯᒪᔪᓄᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥ. ᑖᒃᑯᐊ ᖃᐅᔨᓴᒐᒃᓴᑦ ᐸᓂᖅᑎᑕᐅᓪᓗᑎᒃ ᑐᖅᑯᖅᑕᐅᓪᓗᑎᒡᓗ ᐴᒃᓴᓄᑦ ᖃᐅᔨᒪᔾᔪᑕᐅᓂᐊᕋᒥᒃ ᑕᒪᒃᑮᓄᑦ ᐃᓄᓕᒫᓄᑦ ᐊᓯᓄᓪᓗ ᖃᐅᔨᓴᖅᑎᓄᑦ. ᑲᑎᖅᓱᖅᓯᒪᔪᑦ ᐱᖃᓯᐅᔾᔨᔭᕇᖅᑐᑦ ᐱᕈᖅᓯᐊᓕᖕᓂᒃ ᐱᕈᖅᑐᓂᒃ, ᓚᐃᑲᓂᒃ, ᐅᖁᖕᓂᒃ, ᑕᕆᐅᕐᒥᐅᓂᒡᓗ ᖁᐊᓴᓂᒃ.

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᖅᓱᖅᓯᒪᔭᖏᓐᓂ

ᑕᒫᓂᕐᒥᐅᑦ ᖁᐱᕐᕈᑦ, ᐱᕈᖅᓯᐊᓖᑦ ᐱᕈᖅᑐᑦ, ᒫᓰᑦ, ᓚᐃᑲᓐ, ᐅᖁᐃᑦ, ᑕᕆᐅᕐᒥ ᖁᐊᓴᑦ ᐃᓚᒋᕙᐃᑦ ᖃᐅᔨᓴᒐᒃᓴᓄᑦ ᐱᓯᒪᔭᐅᔪᑦ ᖃᐅᔨᒪᔾᔪᑎᒃᓴᓄᑦ ᑲᑎᖅᓱᖅᓯᒪᔪᓄᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥ. ᑖᒃᑯᐊ ᓴᓇᔭᐅᔪᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᑕᑯᓇᒡᕕᖓᓄᓪᓗ ᓯᓚᒥᐅᑕᓄᑦ.

Erysimum pallasli ᐱᕈᖅᑑᒐᔪᒃᑐᖅ ᑲᓇᑕᐅᑉ ᐅᑭᐅᖅᑕᖅᑐᒥ ᕿᑭᖅᑕᖏᓐᓂ, ᖃᓪᓗᓈᑎᑐᑦ ᖃᐅᔨᒪᔭᐅᔪᖅ ᐊᕐᑎᒃ ᕕᓗᑎᑐᑦ ᐃᓄᒃᑎᑐᓪᓗ ᓄᓇᕌᐱᒃᑎᑐᑦ.

Boloria freija, ᕗᕆᔭ ᕗᕆᑎᓪᓚᕆ ᑕᕐᕋᓕᑭᓵᖅ ᐃᒪᖅᓱᖕᓃᓲᖅ ᓇᐹᖅᑐᖃᖏᑦᑐᓂᓗ ᓄᓇᕐᔪᐊᕐᒥ, ᑲᓇᑕᐅᓪᓗ ᐅᑭᐅᖅᑕᖅᑐᐊᓃᓲᖑᓪᓗᓂ, ᔪᕈᑉ ᐅᐊᖕᓇᖓᓂ, ᒪᖑᓕᐊᒥ ᓴᐃᐱᐅᕆᐊᒥᓗ.

ᑕᑯᔭᖅᑐᖅᑐᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ ᑕᑯᓇᒃᑐᑦ ᖁᐱᕐᕈᓂᒃ ᑲᑎᖅᓱᖅᓯᒪᔪᓂᒃ.

ᕿᓂᖅᑐᑦ ᐃᖂᑎᓂᒃ ᐅᑭᐅᖅᑕᖅᑑᑉ ᐱᓇᖕᓇᖓᓂ

“ᐃᖂᑏᑦ ᑕᑯᒥᓇᖅᐳᑦ, ᐊᖏᔪᑦ ᐊᑐᐃᓐᓇᐅᖏᑦᑐᓄᓪᓗ ᑲᔫᓪᓗᑎᒃ ᐃᖂᑏᑦ ᓴᓇᓲᑦ ᐃᒪᐅᑉ ᐃᓗᐊᓂ ᓇᐹᖅᑑᖃᑎᒌᓂᒃ. ᐆᒪᔫᖃᑎᒌᖏᑦᑐᓄᑦ ᐱᕐᔪᐊᖑᔪᑦ ᐆᒪᔫᖃᑎᒌᖏᑦᑐᓄᑦ ᐃᓂᒋᔭᓐᓇᕆᔭᐅᖕᒪᑕ,” ᐅᖃᖅᑐᖅ ᖃᐅᔨᓴᕐᓂᕐᓄᑦ ᑭᒡᓕᓯᓂᐊᖅᑎ ᐊᒪᓐᑕ ᓴᕗᐊᐃ.”ᑲᓇᑕᐅᑉ ᐅᑭᐅᖅᑕᖅᑐᖓᓂ, ᐊᖏᔪᓪᓚᓂᒃ ᐃᖂᑎᓄᑦ ᓇᐹᖅᑐᖃᑎᒌᖃᖅᑐᒍᑦ.”

ᐊᒪᓐᑕ ᐃᖂᑎᓄᑦ ᖃᐅᔨᒪᔨᑕᐅᔪᖅ ᐊᐅᓚᑦᑎᓪᓗᓂᓗ ᐱᕈᖅᑐᓕᕆᓂᕐᓂᒃ ᑲᓇᑕᒥᐅᑦ ᑕᑯᓇᒡᕕᖓᓄᑦ ᓯᓚᒥᐅᑕᓄᑦ ᐊᑐᕙᒥ. ᑕᑯᓇᒡᕕᒃ ᐅᑭᐅᖅᑕᖅᑐᒥᑦ ᐃᖂᑎᓂᒃ ᑲᑎᖅᓱᐃᓯᒪᔪᑦ, ᐱᔭᐅᓪᓗᑎᒃ 1960ᓂ 1970ᓂᓗ, ᐃᓚᖏᑦ ᓄᑕᐅᙱᑎᒋᓪᓗᑎᒃ 1910ᓂᑦ! ᐊᒪᓐᑕ ᖃᐅᔨᔪᒪᓚᐅᖅᑐᖅ ᖃᐅᔨᓴᕈᒪᓪᓗᓂ ᐊᓯᔾᔨᖅᑐᓂᒃ ᐊᓂᒍᖅᑐᓂ 50 ᐊᕐᕌᒍᓂ ᓯᓚᐃᑦ ᐊᓯᔾᔨᕐᓂᖏᓐᓄᑦ.

ᖃᐅᔨᔪᒪᓗᐊᖅᑐᖅ ᐃᖂᑎᓂᒃ ᐱᕐᔪᐊᕐᒧᓪᓗ ᐊᑑᑎᖓᓂᒃ ᐃᒪᐃᑦ ᐃᓗᐊᓂ ᐆᒪᔫᖃᑎᒌᖏᑦᑐᓄᑦ. ᐃᖂᑏᑦ ᐃᓂᒃᓴᑦᑎᐊᕚᓗᓕᐅᓲᑦ ᖃᔅᓯᐊᓗᖕᓄᑦ ᑕᕆᐅᕐᒥᐅᓄᑦ ᐆᒪᔪᓄᑦ, ᐱᖃᓯᐅᖦᖢᒋᑦ ᐴᖅᖢᒋᑦ ᐳᔪᕐᓗᐃᑦ ᐊᓂᕐᓂᓕᐅᖅᖢᑎᒡᓗ. ᑭᓯᐊᓂ ᐊᒪᓐᑕ ᓇᓗᓚᐅᖅᑐᖅ ᐃᖂᑎᓂᒃ ᓇᓂᓯᓂᐊᕐᒪᖔᑦ ᐱᓇᖕᓇᖓᓂ ᐅᑭᐅᖅᑕᖅᑑᑉ ᑕᕆᐅᖓᓂ.

ᖃᐅᔨᓴᕐᓂᖅᓴᐅᓯᒪᔪᑦ ᑲᓇᖕᓇᕐᒥ ᐅᑭᐅᖅᑕᖅᑐᒥ, ᐱᓗᐊᖅᑐᒥ ᐃᓂᓂ ᓲᕐᓗᑐᑦ ᕗᕋᐸᓲᑉ ᑲᖏᖅᖢᐊᓂ ᐃᖃᓗᐃᑦ ᖃᓂᒋᔮᓂ, ᐱᕈᖅᑐᓪᓛᓗᐃᑦ ᓇᐹᖅᑑᖃᑎᒌᑦ ᑕᑭᑎᒋᔪᑦ 15 ᐃᓯᒐᓄᑦ ᐱᑕᖃᒐᔪᒃᖢᑎᒃ. ᕗᕋᐸᓲᑉ ᑲᖏᖅᖢᐊ ᓴᙱᔪᓂᒃ ᐃᖏᕐᕋᓂᖃᕐᒪᑦ ᑎᓂᓐᓂᕐᓂᒡᓗ, ᐊᔾᔨᒋᓇᓂᒋᑦ ᑕᕆᐅᑦ ᑮᓕᓂᕐᒥ, ᑎᓂᓐᓂᕐᓄᑦ ᐃᖏᕐᕋᓂᖃᓗᐊᖏᒻᒪᑕᓕ.

“ᐅᑭᐅᖅᑕᖅᑑᑉ ᐱᓇᖕᓇᖓ ᐊᔾᔨᒋᙱᑖᓗᐊ, ᓲᖃᐃᒻᒪ ᐅᔭᕋᖃᓗᐊᖏᒻᒪᑦ. ᐊᕿᑦᑐᐃᓐᓈᓗᐃᑦ ᒪᕐᕋᑦ. ᐱᐅᖏᑦᑐᖅ ᑕᐃᒪᓐᓇ ᐃᖂᑎᓄᑦ ᐊᑕᕕᒃᓴᖃᖏᓐᓇᒥᒃ,” ᐅᖃᖅᑐᖅ ᐊᒪᓐᑕ. “ᐅᔭᕋᒡᔪᐊᖃᕈᑎᒃ ᐅᔭᕋᓂᒡᓘᓐᓃᑦ, ᐃᖂᑎᖃᕋᔭᖅᑐᖅ ᐃᖅᑲᒥᐅᓂᒡᓗ ᐆᒪᔪᓂᒃ.”

ᐊᒪᓐᑕ ᑐᓴᕋᓱᓚᐅᖅᑐᖅ ᓄᓇᓕᖕᒥᐅᓄᑦ ᖃᐅᔨᒪᔪᓄᑦ ᓄᓇᖏᑕ ᐆᒪᔪᖏᓐᓂᒃ. ᑭᓯᐊᓂ, ᑕᐅᕙᓂ ᑎᓂᑦᑎᐊᖃᑦᑕᖏᓐᓂᖓᓄᑦ, ᖃᐅᔨᒪᓗᐊᓚᐅᖏᑦᑐᑦ ᐃᒫᓂᕐᒥᐅᓂᒃ ᐱᕈᖅᑐᓂᒃ.

ᓄᓇᓕᖕᒥᐅᒧᑦ ᐊᐅᓪᓚᐅᔾᔭᐅᓚᐅᖅᑐᑦ ᐊᒪᓐᑕ ᖃᐅᔨᓴᖃᑎᖏᓪᓗ ᑲᖏᖅᖣᑉ ᓯᓚᑖᓄᑦ ᐃᖏᕐᕋᓂᓕᖃᕐᓂᖓᓂᒃ ᖃᐅᔨᒪᔭᐅᔪᒧᑦ. ᐱᓕᕆᖃᑎᒌᑦ ᐃᒫᓄᐊᖅᓯᓪᓗᑎᒃ ᐊᔾᔨᓕᐅᕆᔪᒥᒃ ᐅᒥᐊᒥᑦ, ᑕᑯᔾᔪᑕᐅᓪᓗᓂ ᑕᕆᐅᑉ ᐃᖅᑲᖓᓂᒃ ᑕᕝᕙᙵᑲᐅᑎᒋᒧᑦ. ᐊᒪᓐᑕ ᐊᓕᐊᓇᐃᒍᓱᓚᐅᖅᑐᖅ ᑕᑯᒐᒥᒃ ᐃᖂᑎᓂᒃ ᐊᓯᓂᒡᓗ ᐃᖂᑎᓂᒃ. ᐱᓪᕆᖃᑎᒌᑦ ᑕᒻᒪᕇᒃᑯᑕᓄᑦ ᐳᐃᒍᔾᔭᐃᖅᖢᒋᑦ ᐃᓂᖏᑦ, ᓄᓇᙳᐊᓕᐅᖅᖢᑎᒃ ᑕᕆᐅᑉ ᐃᖅᑲᖓᓂᒃ.

ᐱᓕᕆᖃᑎᒌᑦ ᖃᖓᐅᓕᖅᑎᓪᓗᒍ ᐅᑎᓚᐅᖅᑐᑦ ᑖᒃᑯᓄᖓ ᐃᓂᓄᑦ ᐊᖅᑲᐅᒪᔭᖅᑐᖅᖢᑎᒃ ᑕᑯᓇᒡᓗᒋᓪᓗ ᐃᖂᑏᑦ ᑕᕝᕗᖓᑲᐅᑎᒋ. ᐃᖂᑏᑦ ᐱᕈᕋᓗᐊᖅᑎᓪᓗᒋᑦ 10 ᐃᓯᒐᓄᑦ, ᐅᔾᔨᕈᓱᓚᐅᖅᑐᑦ ᑐᑭᓕᐊᖏᒻᒪᑕ ᖁᒻᒧᑦ ᐊᓯᑎᑐᑦ ᐃᖂᑎᑐᑦ ᓇᐹᖅᑐᑎᑐᑦ; ᑭᓯᐊᓂ, ᑕᕆᐅᑉ ᐃᖅᑲᖓᓃᓚᐅᖅᑐᑦ.

ᐊᒪᓐᑕ ᐅᒃᐱᕈᓱᒃᑐᖅ ᑕᐃᒪᐃᑦᑐᖅ ᓴᙱᔪᓄᑦ ᐃᖏᕐᕋᓂᓄᑦ ᑕᐅᕙᓂ. ᐱᓕᕆᖃᑎᒌᓪᓗ ᑕᑯᓇᓕᖅᑐᑦ ᖃᐅᔨᔭᐅᔪᓂᒃ ᑲᑎᖅᓱᓚᐅᖅᑕᒥᓂᒃ ᐊᖅᑲᐅᒪᓂᕐᒥᓂ ᐃᖃᓗᒃᑑᑦᑎᐊᕐᒥ ᑐᑭᓯᑦᑎᐊᕐᓂᖅᓴᐅᓂᐊᕋᒥᒃ ᖃᓄᖅ ᐃᖂᑏᑦ ᐱᕈᓪᓚᖕᒪᖔᑕ ᐅᑭᐅᖅᑕᖅᑑᑉ ᐱᓇᖕᓇᖓᓂ.

ᐊᒪᓐᑕ ᓴᕕᐊᐃ ᑕᑯᓇᒃᑐᖅ ᐃᖂᑎᓂᒃ ᐱᕈᖅᑐᓂᒃ ᑕᕆᐅᑉ ᐃᖅᑲᖓᓂ ᐃᖃᓗᒃᑑᑦᑎᐊᕐᒥ.

ᐊᔾᔨ : ᑲᓇᑕᒥᐅᑦ ᑕᑯᓇᒡᕕᖓᑦ ᓯᓚᒥᐅᑕᓄᑦ

ᑕᖅᕋᖅᑐᖅᑕᐅᓂᖓ ᐊᐳᑦ

ᐃᓕᑦᑎᐊᕋᓱᒃᖢᒍ ᐊᐳᑦ ᐃᑲᔫᑎᔪᖅ ᖃᓄᐃᓕᖓᓂᐊᕐᒪᖔᑦ ᓯᓚᐅᑉ ᖃᓄᐃᓐᓂᖓᑕ ᐊᓯᖑᖅᓯᒪᓕᕐᓂᖓᓄᑦ

“ᐊᐳᑎ ᐱᕐᔪᐊᕌᓗᒃ ᓯᓚᑦᑎᓐᓄᑦ. ᖃᐅᓪᓗᕐᓂᖓ ᐊᐳᑎᐅᑉ ᐅᑎᖅᑎᖕᒪᒋᑦ ᓯᕿᓂᐅᑉ ᖃᐅᒪᖏᓐᓂᒃ ᓯᓚᒧᑦ ᐅᖅᑰᑎᓗᐊᕐᓇᒍᓗ ᓄᓇᕐᔪᐊᖅ,” ᐅᖃᖅᑐᖅ ᒪᕆ ᑐᒪᓐᑦ, ᐊᐳᑎᓄᑦ ᑭᒡᓕᓯᓂᐊᖅᑎ ᖃᐅᔨᓴᖅᑎᓗ ᒐᕙᒪᖃᑎᒌᓄᑦ ᓯᓚᓄᑦ ᐱᔨᑦᑎᕋᕐᓃᑦ ᕗᕋᓐᔅᒧᑦ.

ᒪᕆ ᐃᖅᑲᓇᐃᔭᖅᑐᖅ ᖃᐅᔨᓴᕐᕕᖕᒥ ᕗᕋᓐᔅ ᖃᖅᑲᖏᓐᓂ ᐳᖅᑐᓂᓕᖕᒥᒃ 1,300 ᒦᑕᓂᒃ. 1961ᒥᓂᑦ, ᖃᐅᔨᓴᖅᑏᑦ ᖃᐅᔨᓴᕐᕕᖕᒥ ᖃᐅᔨᓴᖅᓯᒪᔪᑦ ᐊᐳᑎᓂᒃ ᑲᑎᖅᓱᐃᓪᓗᑎᒃ ᖃᐅᔨᔭᐅᔪᓂᒃ ᓇᓚᐅᑦᑖᕈᑎᒋᒃᑲᓐᓂᖅᖢᒋᑦ ᑎᓲᒃᑐᓄᑦ ᓯᓚᓄᓪᓗ ᓇᓚᐅᑦᑖᕈᑎᒋᓪᓗᒋᑦ. ᑭᓯᐊᓂ, ᐅᔾᔨᕈᓱᓚᐅᖅᑐᑦ ᐊᐳᑏᑦ ᓄᓇᕐᔪᐊᑉ ᖄᖓᓂ ᐊᑖᓂᓗ ᓄᓇᕐᔪᐊᕐᒧᑦ ᐊᒃᑐᐃᓂᖃᕐᓂᖅᓴᓪᓛᓗᐃᑦ ᐊᐳᑎᓂᑦ ᖃᖅᑲᓃᑦᑐᓂᑦ.

“ᐅᖃᕋᔭᖅᑐᖓ ᐅᑭᐅᖅᑕᖅᑑᑉ ᐊᐳᑎᖏᑦ ᐱᕐᔪᐊᖑᓂᖅᓴᓪᓛᓗᐃᑦ ᓄᓇᕐᔪᐊᑉ ᓯᓚᖏᓐᓄᑦ ᖃᖅᑲᐃᑦ ᐊᐳᑎᖏᓐᓂᑦ,“ ᐅᖃᖅᑐᖅ ᒪᕆ.

ᐱᕐᔪᐊᖑᓂᖓ ᑐᑭᓯᓪᓚᑦᑖᓚᐅᖅᑕᖓ ᒪᕆᐅᑉ ᓯᕗᓪᓕᖅᐹᒥᒃ ᖃᖓᑕᒐᒥ ᑲᓇᑕᒥᐅᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐊᓄᑦ 2022ᒥ. ᐊᐳᑎᓄᑦ ᑭᒡᓕᓯᓂᐊᖅᑎ ᑕᐅᑐᓚᐅᖅᑐᖅ ᑲᒪᓪᓗᓂ ᐊᖏᓂᐊᓗᐊᓄᑦ ᐊᐳᑎᐅᑉ ᐊᑖᓃᑦᑐᒧᑦ ᐃᒻᒥᓄᑦ. ᑲᒪᓪᓚᓚᐅᖅᑐᖅ ᐃᒃᐱᒍᓱᒃᑎᑕᐅᓪᓗᓂᓗ ᐊᖏᔪᐊᓗᖕᓄᑦ ᖃᐅᓪᓗᖅᑕᒧᑦ ᐅᑭᐅᖅᑕᖅᑐᒥ ᓄᓇᓂᒃ.

“ᐊᐳᑎ ᐱᕐᔪᐊᖑᔪᖅ ᖃᐅᓪᓗᕋᒥ. ᐅᑎᖅᑎᒻᒪᒋᑦ ᓯᕿᓂᐅᑉ ᖃᐅᒪᖏᑦ ᐊᐳᑎᖃᕈᕕᑦ ᐊᖏᔪᓪᓛᓗᖕᒧᑦ ᓄᓇᒧᑦ, ᐱᕐᔪᐊᓪᓚᕆᐅᔪᖅ ᓇᓕᒧᑎᖦᖢᒋᓪᓗ ᓯᓚᐃᑦ.”

ᒪᕆ ᐅᖃᖅᑐᖅ ᐅᑭᐅᖅᑕᖅᑑᑉ ᐊᐳᑎᖏᑦ ᖃᐅᔨᓴᖅᑕᐅᓯᒪᖏᓐᓂᖅᓴᑦ ᖃᖅᑲᐃᑦ ᐊᐳᑎᖏᓐᓂᑦ; ᖃᓄᐃᓕᖓᓂᖏᑦ ᑐᑭᓯᔭᐅᖏᓐᓂᖅᓴᐅᓪᓗᑎᒃ.

ᐊᐳᑎᐅᑉ ᐋᖅᑭᒃᓯᒪᓂᖏᑦ

ᖃᐅᔨᓴᖅᖢᓂ ᐊᐳᑎᓂᒃ ᐱᖃᓯᐅᔾᔨᔪᖅ ᑕᑯᓇᒡᓗᒋᑦ ᐋᖅᑭᒃᓯᒪᖏᑦ ᑲᑕᒃᓯᒪᔪᓂ ᐊᐳᑎᓂ. ᐅᐃᕖᒥᐅᑦ ᖃᐅᔨᓴᖅᑏᑦ ᑕᐃᒪᐃᑦᑐᓐᓇᓚᐅᖅᑐᑦ ᖃᕋᓴᐅᔭᑎᒍᑦ ᐃᓚᐃᓐᓇᖓᓂᒃ ᐊᔾᔨᓕᐅᖅᓯᒪᔪᓂᒃ, CTᓄᓪᓘᓐᓃᑦ ᖃᐅᔨᓴᕐᓂᒃᑯᑦ. ᐋᓐᓂᐊᕖᑦ ᐊᑐᓲᑦ CT ᖃᐅᔨᓴᐅᑎᓂᒃ ᓴᓇᔾᔪᑎᒋᓪᓗᒋᑦ ᓇᓗᓇᐃᑦᑎᐊᖅᓯᒪᔪᓂᒃ ᓴᓂᒧᑦ ᑐᑭᒧᑦ ᖁᒻᒧᓪᓗ ᐊᔾᔨᓂᒃ ᑎᒥᒥᒃ. ᑕᐃᒪᓐᓇᑦᑕᐅᖅ ᖃᐅᔨᓴᓲᑦ ᐊᐳᑎᓂᒃ. CT ᖃᐅᔨᓴᐅᑎ ᓴᓇᓲᖅ ᑕᑯᒃᓴᐅᑦᑎᐊᖅᑐᓂᒃ ᐃᓗᐃᑦᑑᓕᖓᔪᓂᒃ ᖃᓐᓂᓂᒃ. ᑕᐃᒪᓐᓇ ᓴᖅᑭᑦᑎᓲᖅ ᖃᓄᐃᓕᖓᓂᖏᓐᓂᒃ ᖃᐅᔨᓴᖅᑎᓄᓪᓗ ᑐᑭᓯᔾᔪᑕᐅᓪᓗᓂ ᖃᓄᖅ ᖃᓐᓃᑦ ᐋᖅᑭᓲᖑᖕᒪᖔᑕ ᓄᓇᒥ.

ᐃᒻᒥᓄᑦ, ᓇᒃᓴᕐᓗᒋᑦ ᑖᒃᑯᐊ ᓴᓇᐅᒐᐃᑦ ᐅᑭᐅᖅᑕᖅᑐᒧᑦ ᐊᑑᑎᖃᑦᑎᐊᓚᐅᖅᑐᖅ ᖃᐅᔨᓴᕈᑎᒋᓗᒋᑦ ᐅᑭᐅᖅᑕᖅᑑᑉ ᐊᐳᑎᖏᓐᓂᒃ.

“ᖃᓄᐃᓐᓇᓱᓚᐅᖅᐳᒍᑦ ᒪᓕᒡᓗᒋᑦ ᐋᖅᑭᒃᓱᖅᐸᓪᓕᐊᓂᖏᑦ, ᑕᑯᒃᓴᐅᑦᑎᐊᓪᓛᖑᓕᒋᑦ, ᐅᑭᐅᖅᑕᖅᑐᒥ ᐊᐳᑏᑦ ᑲᑎᓯᒪᔪᑦ ᐊᑕᐅᓯᕐᒥ ᐃᓗᐃᑦᑐᕐᒥ ᖃᓐᓂᕐᓇᕐᒥ. ᐊᓱᐃᓛᒃ, ᖃᓐᓂᓕᕐᓂᖓᓂᑦ ᐊᐅᑦᑎᐊᕐᓂᖓᓄᑦ ᐊᐳᑏᑦ,” ᐅᖃᖅᑐᖅ ᒪᕆ.

ᐱᓕᕆᓐᓇᕐᓂᓕᒫᖓ ᐅᑐᐱᕆᒥᑦ ᒪᐃᒧᑦ, ᐊᒃᓱᕉᑎᖃᓚᐅᖅᖢᓂ. ᖃᐅᔨᓴᖅᑏᑦ ᐃᒡᓗᖃᕆᐊᖃᓚᐅᖅᑐᑦ 8ᓄᑦ ᑕᖅᑭᓄᑦ, ᐊᑕᐅᓯᕐᒥᒡᓗ ᐊᖏᔪᐊᓗᖕᒥᒃ 2,000 ᐸᐅᓂᒃ ᐅᖁᒪᐃᓐᓂᓕᖕᒥᒃ CT ᖃᐅᔨᓴᐅᑎᒥᒃ ᓂᒡᓚᓱᒃᑐᒥ ᐃᓂᖃᖅᑎᑦᑎᔭᕆᐊᖃᓚᐅᖅᑐᑦ ᓂᒡᓚᓱᒃᑎᒋᓗᓂ ᐊᑯᓐᓂᖓᓂ -10 -20ᓗ ᓯᐊᓪᓯᐊᔅ. ᒪᕆ ᖃᐅᔨᓚᐅᖅᑐᖅ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖓ ᐃᖃᓗᒃᑑᑦᑎᐊᕐᒥ, ᓄᓇᕘᑉ ᐱᓇᖕᓇᖓᓂ, ᐃᓂᖃᖅᑎᑦᑐᓐᓇᓚᐅᖅᑕᖏᑦ ᐊᑐᕆᐊᓕᓕᒫᖏᓐᓄᑦ.

““ᐱᑕᖃᓗᐊᖏᒻᒪᑦ ᐅᓄᖅᑐᓂᒃ ᐃᓂᓂᒃ ᓇᒃᓯᐅᔾᔨᔪᓐᓇᖅᑐᓂᒃ ᐃᓚᐃᓐᓇᖓᓂᒃ ᐊᔾᔨᓕᐅᖅᓯᒪᔪᓂᒃ, ᐃᓂᖃᕐᓗᑎᒃ ᓯᓚᓐᓂᐊᕈᑎᓄᑦ, ᐊᑐᕆᐊᓕᓕᒫᖃᕐᓗᓂᓗ ᑕᕝᕙᓂ. ᑖᓐᓇ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᒡᓗ ᐃᖅᑲᓇᐃᔭᖅᑎᖃᕐᒪᑦ ᐊᕐᕌᒍᓕᒫᒧᑦ, ᐃᑲᔫᑎᓪᓚᐅᓚᐅᖅᑐᑦ ᐃᒻᒥᓄᑦ,” ᐅᖃᖅᑐᖅ ᓂᑯᓚᔅ ᓇᓐᑎᐊᓪ-ᕗᐊᑎᐊ, ᖃᐅᔨᓴᕐᕕᖕᓄᑦ ᐊᐅᓚᑦᑎᔨ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥ.ᖕ

ᐃᓚᐃᓐᓇᖓᓄᑦ ᐊᔾᔨᓕᐅᕈᑎ, -rayᓂᒃ ᐊᑐᓲᖅ, ᒪᓕᒋᐊᖃᓚᐅᕐᒪᑦ ᐊᑦᑕᕐᓇᖏᓐᓂᕐᓄᑦ ᐱᖁᔭᓄᓪᓗ ᒪᓕᒋᐊᓕᖕᓂᒃ ᐊᐅᓪᓚᖅᑎᑕᐅᖏᓐᓂᕐᒥᓂ ᕗᕋᓐᔅᒥᑦ ᑲᓇᑕᒧᑦ. ᐸᐃᑉᐹᓕᕆᔭᕆᐊᓖᑦ ᐱᔭᕇᕐᒪᑕ, ᐃᓚᐃᓐᓇᖓᓂᒃ ᐊᔾᔨᓕᐅᕈᑎ ᓇᒃᓯᐅᔾᔭᐅᓚᐅᖅᑐᖅ ᖃᖓᑕᓲᒃᑯᑦ ᑲᓇᑕᐅᑉ ᐅᑭᐅᖅᑕᖅᑐᐊᓄᑦ ᔪᓚᐃ 2023ᒥ.

ᐊᔾᔨᓕᐅᕈᑎ ᐃᓕᔭᐅᓪᓗᓂ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᑉ ᖁᐊᒃᑯᕕᐊᓄᑦ. ᒪᕇᑉ ᐱᓕᕆᖃᑎᖏᑦ ᑕᐃᑲᓃᑦᑐᓐᓇᓚᐅᖏᒻᒪᑕ, ᐅᖃᖃᑎᒋᔪᓐᓇᓚᐅᖅᑕᖏᑦ ᖃᕋᓴᐅᔭᒃᑯᑦ ᑲᑎᒪᔾᔪᑎᓄᑦ ᑐᕌᖅᑎᖦᖢᒋᑦ ᐱᓕᕆᖃᑎᓂ ᓯᓚᑦᑐᖅᓴᕐᕕᒡᔪᐊᖓᓂᑦ ᓲᐳᕈᒃ ᐋᖅᑭᒃᓱᕐᓗᒍ ᐊᔾᔨᓕᐅᕈᑎ. ᖃᐅᔨᓴᖅᑏᑦ ᑎᑭᑕᐃᓐᓇᕐᒪᑕ ᐅᑐᐱᕆ 2024ᒥ, ᑭᓱᓕᒫᑦ ᐊᑐᐃᓐᓇᐅᓕᓚᐅᖅᑐᑦ.

ᑕᖅᑮᑦ 8ᓂ, ᒪᕐᕉᓈᖅᑐᑦ ᖃᐅᔨᓴᖅᑏᑦ (15 ᐃᓄᐃᑦ ᑲᑎᑦᑐᑦ) ᐃᖅᑲᓇᐃᔭᖅᑐᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥ 6 ᐱᓇᓱᐊᕈᓯᓄᑦ ᓂᑭᑦᑖᖅᖢᑎᒃ ᑲᑎᙵᕙᒃᖢᑎᒃ ᒪᕐᕉᖕᓄᑦ ᐱᓇᓱᐊᕈᓰᖕᓄᑦ. ᑕᐃᒪᓐᓇ ᐊᑐᓂ ᒪᕐᕉᖑᔫᒃ ᐃᓕᓐᓇᕈᓐᓇᓚᐅᖅᑑᒃ ᑕᕝᕙᓃᑉᐸᒌᖅᑐᓂᑦ ᐃᖃᓗᒃᑑᑦᑎᐊᕐᒥ. ᐃᓚᖓᑦ PhD ᐃᓕᓐᓂᐊᖅᑎᖓᑦ, ᑭᐊᕕᓐ ᕗᐊᓂᐊᐃ, ᖃᐅᔨᓴᓚᐅᖅᑐᖅ ᖃᐅᔨᓴᒐᒃᓴᓂᒃ ᑎᓯᐱᕆ 15, 2023ᒥᑦ ᐃᓱᐊᓄᑦ ᔮᓐᓄᐊᕆ 2024.

ᑭᐊᕕᓐ ᐅᖃᖅᑐᖅ ᐊᐳᑎᓂᒃ ᐆᒃᑐᖅᓯᓚᐅᖅᑐᑦ ᐅᓪᓗᕐᒥ ᐃᓚᖏᓐᓂᒡᓗ ᐊᔾᔨᓕᐅᕆᓪᓗᑎᒃ ᖃᐅᑎᓪᓗᒍ. ᐳᐃᒍᔾᔭᐃᓚᐅᖅᑕᖏᑦ ᐊᐳᑏᑦ ᓂᒡᓕᓇᕐᓂᖏᑦ ᐅᖁᒪᐃᖅᓱᖅᖢᒋᓪᓗ ᑎᓯᓂᖓ ᖃᐅᔨᓇᓱᒃᖢᒍ, ᑕᐃᒪᓐᓇ ᖃᐅᔨᔾᔪᑕᐅᓪᓗᓂ ᖃᓄᑎᒋ ᓂᓚᖃᕐᒪᖔᑦ ᐊᐳᑎᒥ.

ᐊᐳᑎ ᒥᑭᓪᓛᒃᑯᑦ ᑐᙵᕕᖃᕐᒪᑦ ᑐᑭᒧᐊᖓᔪᓂᒃ ᓴᓂᒧᑦ ᖁᒻᒧᓪᓗ ᐋᖅᑭᒃᓯᒪᔪᓂᒃ ᐊᓂᕐᓂᕐᒥᑦ ᓂᓚᖕᒥᓪᓗ. ᑖᓐᓇ ᑐᙵᕕᒃ ᐊᒃᑐᐃᕗᖅ ᖃᓄᐃᓕᖓᓂᖏᓐᓂᒃ, ᓲᕐᓗ ᖃᓄᑎᒋ ᑲᑎᙵᑎᒋᕙ, ᖃᓄᑎᒋ ᐅᖅᑰᓯᑎᙱᓚᐅᒃ ᓄᓇ ᐊᑖᓃᑦᑐᖅ, ᖃᓄᑎᒋᓗ ᐃᒥᖃᕐᒪᖔᑦ ᐊᐅᒑᖓᒥ.

”ᐃᓚᖓ ᐱᕐᔪᐊᖑᔪᖅ ᐅᕙᑦᑎᓄᑦ, ᐊᐳᑏᑦ ᖃᓄᐃᓕᖓᓂᖏᑦ ᒪᓕᒃᖢᒋᑦ, ᐊᖏᓂᖏᑦ ᖃᓐᓂᙳᓕᖅᑑᑉ, ᐅᖃᖅᑐᖅ ᑭᐊᕕᓐ. “ᐱᖅᑯᓯᑐᖃᐅᕗᖅ ᐊᖏᓐᓇᖅᑐᒧᑦ ᑕᑯᓗᒍ ᐊᖏᓂᖓᓗ ᑕᑯᓗᒍ.”

ᑕᐃᒪᓐᓇ ᓇᓚᐅᑦᑎᑦᑎᐊᕐᓇᖏᑦᑐᖅ, ᑕᐃᒪᐃᒻᒪᑦ ᖃᐅᔨᓴᖅᑏᑦ ᐊᐅᓪᓚᖅᓯᒪᔪᓕᕆᔨᓂ ᐊᑐᓚᐅᖅᑐᑦ ᒥᑭᑦᑐᒥᒃ ᐊᐅᓚᐅᑎᓕᖕᒥᒃ ᖃᐅᒻᒥᑦᑎᓲᒥᒃ ᐊᐳᑎᒥᒃ. ᖃᐅᒪᑎᑦᑎᔪᓐᓇᕐᓂᖏᓐᓄᑦ, ᐱᓕᕆᖃᑎᒌᑦ ᖃᐅᔨᔪᓐᓇᓚᐅᖅᑐᑦ ᖃᓐᓂᒃᓴᑦ ᐊᖏᓂᖏᓐᓂᒃ.

ᖄᐹᕇᑦ ᐊᐳᑏᑦ

ᖃᐅᔨᑕᒫᑦ, ᐱᓕᕆᖃᑎᒌᑦ ᑲᑎᖅᓱᐃᖃᑦᑕᓚᐅᖅᑐᑦ ᐊᐳᑎᓂᒃ ᖃᐅᔨᓴᒐᒃᓴᓂᒃ ᑲᑉᐳᑎᑎᑦᑎᓪᓗᑎᒃ 20 ᓯᐊᓐᑕᒦᑕᓂᒃ ᑕᑭᓂᓕᖕᒥᒃ ᐊᐅᒃᑕᔫᒥᒃ ᓱᓪᓗᓕᖕᒥᒃ ᑕᐅᓄᖓ ᐊᐳᑎᒧᑦ. ᑖᒃᑯᐊ ᖃᐅᔨᓴᒐᒃᓴᑦ ᖃᐅᔨᓴᖅᑕᐅᒋᓪᓗᑎᒃ ᐃᓚᐃᓐᓇᒐᓂᒃ ᐊᔾᔨᓕᐅᕈᑎᒧᑦ.

“ᑕᐃᒪᓐᓇᑦᑕᐅᖅ ᐆᒃᑐᖅᓯᖃᑦᑕᓚᐅᕐᒥᔪᑦ ᕗᕋᓐᔅ ᖃᖅᑲᖏᓐᓂ. ᑭᓯᐊᓂ ᖃᐅᔨᓴᒐᒃᓴᑦ ᐅᖓᓯᖕᓂᖅᓴᒧᑦ ᓇᒃᓴᕆᐊᖃᓚᐅᖅᑕᖏᑦ ᐊᔾᔨᓕᐅᖅᑕᐅᓂᐊᕐᒪᑕ. ᐅᖓᓯᒃᓯᕙᓪᓕᐊᓗᑎᒃ ᖃᐅᔨᓴᒐᒃᓴᓄᑦ, ᓱᕋᒍᓐᓇᕐᓂᖅᓴᕆᕙᑎᑦ ᐊᐳᑏᑦ ᑐᙵᕕᖏᑦ,” ᐅᖃᖅᑐᖅ ᓂᑯᓚᔅ. “ᓯᓚᒥ ᐱᓕᕆᑎᓪᓗᒋᑦ ᑕᕝᕙᓂ, ᒥᓂᑦᐸᓗᖕᒧᑦ ᐱᓱᒋᐊᖃᓚᐅᖅᑐᑦ ᖃᐅᔨᓴᖅᑕᕐᕕᖕᒥᓂᑦ ᐃᓗᐊᓄᑦ ᖁᐊᒃᑯᕕᑦᑕ.”

ᒪᕆ ᐅᖃᖅᑐᖅ ᐅᑭᐅᖅᑕᖅᑑᑉ ᐊᐳᑎᖏᑦ ᒪᕐᕉᖕᓂᒃ ᖄᐹᕇᖕᒪᑕ.

“ᖄᖓᓃᑦᑐᖅ ᑎᓯᔪᓪᓛᓘᓪᓗᓂ ᐊᐳᑎ: ᒥᑭᑦᑐᒍᓗᐃᑦ ᖃᓐᓃᑦ, ᑎᓯᔪᓪᓛᓗᐃᑦ. ᑕᐃᒪᐃᒻᒪᑦ, ᐊᓄᕆᒧᑦ ᑎᓯᓴᖅᓯᒪᔪᑦ ᐊᐳᑏᑦ,” ᐅᖃᖅᑐᖅ ᒪᕆ. “ᐊᑖᓃᑦᑐᖅ ᓂᑲᓇᕐᓂᖅᓴᐅᔪᖅ, ᑎᓯᖏᓐᓂᖅᓴᖅ. ᖃᓐᓂᖏᑦ ᖄᖓᓃᑦᑐᑦ ᐊᐳᑏᑦ ᐊᖕᒪᓗᐸᓗᒃᑐᑦ, ᑭᓯᐊᓂ ᐊᑖᓃᑦᑐᓂ, ᐊᓂᕐᓂᓕᐊᓗᒃ ᖃᓐᓂᒃᓴᓪᓗ ᑭᑉᐹᕆᐸᓗᒃᑐᑦ ᐊᖏᓂᖅᓴᓪᓚᐅᓪᓗᑎᒡᓗ.”

ᑭᐊᕕᓐ ᐅᖃᖅᑐᖅ ᖃᓄᖅ ᓂᑲᓇᖅᑎᒋᖕᒪᖔᑦ ᐊᑖᓃᑦᑐᖅ. ᓱᕋᓲᖅ ᐊᒃᑐᕈᕕᐅᒃ.

“ᐊᐳᑎᐅᔪᖅ ᑎᓲᖕᓇᖅᑐᖅ ᖃᖅᑲᓂ ᐱᑕᖃᓲᖅᑎᑐᑦ,’ ᐅᖃᖅᑐᖅ. ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥ, ᓱᖁᑕᐅᖏᑦᑐᖅ ᖃᐃᕋᒻᒪᑦ.

ᐃᖃᓗᒃᑑᑦᑎᐊᕐᒦᑎᓪᓗᒍ, ᒪᕆ ᑕᑯᓚᐅᖅᑐᖅ ᖃᓄᑎᒋ ᐊᑑᑎᖃᖅᑎᒋᖕᒪᖔᑦ ᐊᐳᑎ ᓄᓇᓕᖕᒥᐅᓄᑦ, ᐊᒃᑐᐃᓪᓗᓂ ᐅᓄᖅᑐᓄᑦ ᐃᓚᖏᓐᓄᑦ ᐃᓅᓯᖏᓐᓂ, ᓲᕐᓗᑐᑦ ᐊᖑᓇᓱᖕᓂᖅᑎᑐᑦ, ᐅᓯᑲᖅᑕᕐᓂᕐᓄᑦ, ᐃᒥᕐᓄᑦ ᐱᖁᑎᕐᔪᐊᓄᓪᓗ.

“ᐊᓯᔾᔨᖅᓯᐊᕐᔪᓚᐅᖅᑐᖅ ᖃᓄᖅ ᑕᑯᖕᒪᖔᒃᑭᑦ ᐱᓕᕆᔭᒃᑲ, ᓲᖃᐃ ᐃᓄᐃᑦ ᐃᓚᐅᖕᒪᑕ,” ᐅᖃᖅᑐᖅ ᒪᕆ. “ᐃᓕᖅᑯᓯᖓᑦ ᐊᐳᑎᓄᑦ ᓄᓇᓄᓪᓗ ᐊᔾᔨᒋᙱᑖᓗᒋᖕᒥᒡᒪᒍ ᑕᕝᕙᓂ ᐱᒋᔭᑦᑎᓐᓂ [ᕗᕋᓐᔅ ᖃᖅᑲᖏᓐᓂ]. ᑖᓐᓇ ᑐᑭᓯᓇᖅᑐᓪᓛᓗᒃ ᐃᒃᐱᓐᓇᓪᓚᒃᖢᓂᓗ.”

ᐅᑭᐅᕐᒥ, ᐱᓕᕆᖃᑎᒌᑦ ᐳᐃᒍᔾᔭᐃᖅᓯᓚᐅᖅᑐᑦ ᐃᓗᐃᑦᑐᒃᑯᑦ ᐃᓗᐃᑦᑐᕈᕐᓂᖓᓂᑦ ᓯᕗᓪᓕᖅᐹᒥᑦ ᐊᐱᔪᒥᑦ ᐊᐅᖕᓂᕐᒥᓄᑦ. ᖃᐅᔨᓴᓚᐅᖅᑐᑦ 2,000 ᐃᓚᐃᓐᓇᖏᓐᓂᒃ ᐊᔾᔨᙳᐊᓄᑦ, ᑲᑎᖦᖢᒋᑦ 37 ᒦᑕᑦ,121 ᐃᓯᒐᓪᓘᓐᓃᑦ, ᐊᐳᑎᓂᑦ.

ᖃᐅᔨᓴᕐᓂᖓᑦ ᐃᑲᔪᕐᓂᐊᖅᑐᖅ ᓱᓕᓂᖅᓴᒧᑦ ᐋᖅᑭᙳᐊᖅᓯᓂᕐᓄᑦ ᐊᔪᕆᖅᓱᐃᔾᔪᑎᒋᓗᒍ ᖃᓄᖅ ᐊᐳᑏᑦ ᐊᓯᔾᔨᖅᐸᓪᓕᐊᓲᖑᖕᒪᖔᑕ ᓯᓚᐃᑦ ᐊᓯᔾᔨᕐᓂᖏᓐᓄᑦ ᑕᐃᒪᐃᑎᑕᐅᓪᓗᑎᒃ. ᒪᕆ ᐅᖃᖅᑐᖅ ᑖᓐᓇ ᐋᖅᑭᙳᐊᖅᓯᒪᔪᖅ ᐱᕕᖃᖅᑎᑦᑎᔪᓐᓇᖅᑐᖅ ᐅᑭᐅᖅᑕᖅᑐᒥᐅᓂᒃ ᓄᓇᓕᖕᓂᒃ ᐊᑑᑎᖃᑦᑎᐊᖅᑐᓂᒃ ᑐᑭᓯᓂᕐᓂᒃ ᐃᑲᔫᑎᒋᓗᒋᑦ ᓱᖑᐃᑎᓂᒃᑯᑦ ᐊᓯᔾᔨᖅᐸᓪᓕᐊᔪᓄᑦ ᓯᓚᓄᑦ.

ᖃᐅᔨᓴᖅᑎ ᐊᑐᖅᑐᖅ ᐊᖏᓐᓇᖅᑐᒥᒃ ᖃᐅᔨᓴᖅᖢᒋᑦ ᐊᐳᑏᑦ ᖃᓐᓂᒃᓴᑦ ᐅᑭᐅᒃᑯᑦ ᑕᖅᑭᕆᓛᖑᑎᓪᓗᒍ.

ᐊᔾᔨ : ᑭᐊᕕᓐ ᕗᐊᑐ

x-ᕋᐃᒧᑦ ᐃᓚᐃᓐᓇᖏᓐᓂᑦ ᐊᔾᔨᓕᐅᖅᑕᐅᔪᖅ ᖃᓐᓂᕐᒥᒃ. ᐊᔾᔨᓕᐅᕆᔪᖅ: ᐸᔅᑲᓪ ᕼᐊᒐᓐᒧᓗ

ᐱᓕᕆᖃᑎᒌᑦ ᖃᐅᑕᒫᑦ ᐆᒃᑐᖅᓯᖃᑦᑕᓚᐅᖅᑐᑦ ᐅᑭᐅᖅᑕᖅᑐᕐᒥ ᐊᐱᔪᓄᑦ ᑲᑎᑦᑐᓂᒃ.

ᐊᐳᑎᐅᑉ ᐱᕐᔪᐊᖑᓂᖓ

“ᐃᓄᐃᑦ ᖃᐅᔨᓇᓱᓪᓚᖃᑦᑕᓚᐅᖅᑐᑦ ᐊᐳᑏᑦ ᖃᓄᐃᑦᑑᓂᖏᓐᓂᒃ ᐊᐅᓪᓚᖏᓐᓂᕐᒥᓂ,” ᐅᖃᖅᑐᖅ ᐃᒥᓕ ᐊᖑᓚᓕᒃ, ᓯᕗᓕᖅᑎᓄᑦ ᑐᑭᒧᐊᒃᑎᑦᑎᔨ ᕿᑎᕐᒥᐅᑦ ᐃᑦᑕᕐᓂᓴᓄᑦ ᓴᓴᐃᐊᑎᖓᓄᑦ ᐃᖃᓗᒃᑑᑦᑎᐊᕐᒥ. ᓄᖅᑲᖓᓕᖅᑐᖅ ᐃᓕᓴᐃᔨᕕᓂᖅ ᐊᐱᖅᓱᑲᑕᒃᓯᒪᔪᖅ ᐃᓐᓇᕐᓂᒃ ᖃᐅᔨᒃᑲᓐᓂᕋᓱᒃᖢᓂ ᐊᐳᑎᓄᑦ ᖃᐅᔨᒪᔭᐅᔪᓂᒃ.

“ᐃᓐᓇᐃᑦ ᐅᓂᒃᑳᒐᔪᖕᒪᑕ ᖃᓄᖅ ᐱᕐᔪᐊᖑᓂᖓᓂᒃ ᐊᐳᑎᐅᑉ ᐃᒻᒥᓄᑦ ᐊᐅᓪᓚᖅᓯᒪᓗᓂ, ᑭᑉᐹᕆᒃᑐᓂᒃ ᐊᐳᑎᓂᒃ ᐲᔭᐃᓗᓂ ᐃᒡᓗᕕᒐᕐᓄᑦ, ᐊᖑᓇᓱᖕᓂᒃᑯᓪᓗ. ᑕᐃᒪᐃᒻᒪᑦ ᐊᐳᑎᐅᑉ ᖃᓄᐃᓕᖓᓂᖓ ᐱᕐᔪᐊᖑᔪᖅ,” ᐃᒥᓕ ᐅᖃᖅᑐᖅ. ᓲᕐᓗ,, ᐊᐳᑏᑦ ᐃᒡᓗᕕᒐᓕᐅᕈᑕᐅᔪᑦ ᑎᓯᔪᓂᙶᖅᑐᓂᑦ ᐊᐱᑦᑖᑦ, ᐊᐱᓯᒪᔪᓂᓪᓘᓐᓃᑦ ᐊᓄᕆᒧᑦ, ᑎᓯᓂᖅᓴᐅᓪᓗᑎᒃ ᐃᔾᔪᓂᖅᓴᐅᓪᓗᑎᒡᓗ ᐊᓯᓕᒫᓂᑦ ᐊᐳᑎᓂᑦ. ᖃᓐᓂᖅ ᐅᐱᕐᖓᒃᓵᑉ ᓄᙳᐊᓂ, ᑕᐃᔭᐅᔪᖅ ᒪᕼᐊᖅᑎᖅᑐᕐᒥᒃ ᖃᐅᓯᐅᓂᖅᓴᖅ, ᐱᖏᑦᑐᖅ ᓅᒃᑕᕐᓂᕐᓄᑦ.

ᐃᓇᐃᑦ ᐅᔾᔨᕈᓱᒃᓯᒪᔪᑦ ᐊᓯᔾᔨᖅᑐᓂᒃ ᐊᐳᑎᓂ.

“ᖃᐅᔨᔪᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ, ᐊᐳᑎ ᖃᐅᓯᕐᓂᖅᓴᖅ, ᐃᖏᕐᕋᑦᑎᐊᕐᓇᖏᔾᔪᑎᒋᓪᓗᒍ,” ᐅᖃᖅᑐᖅ ᐃᒥᓕ. “ᐊᒃᑐᐃᓪᓚᑦᑖᖅᑐᖅ ᐃᓄᖕᓂᒃ, ᐊᖑᓇᓱᒃᑎᑎᑐᑦ.”

ᐅᔾᔨᕈᓱᒃᓯᒪᖕᒥᔪᖅ ᐊᓯᔾᔨᖅᑐᓂᒃ ᐊᐳᑎᓂ. ᐊᕐᕌᒍᓂ ᐊᓂᒍᖅᑐᓂ, ᐃᒥᓕ ᐃᓕᓐᓂᐊᖅᑎᑕᖏᓪᓗ ᑕᑯᓇᒃᓯᒪᔪᑦ ᐊᐳᑎᓂᒃ ᐊᖏᓐᓇᖅᑐᓄᑦ.

“ᐅᓪᓗᒥᐅᔪᑦ ᖃᓐᓂᖏᑦ ᐳᕙᓪᓚᖅᓯᒪᓂᖅᓴᓪᓛᓘᓕᖅᑐᑦ ᑕᐃᔅᓱᒪᓂᓂᑦ. ᐊᐳᑎ ᐅᓪᓗᒥ ᐊᔾᔨᒋᙱᑕᓪᓛᓗᐊ.”

ᐊᐳᑎ ᐊᑑᑎᖃᓗᐊᕐᒪᑦ ᐅᑭᐅᖅᑕᖅᑐᒥᐅᑦ ᐃᓅᓯᖏᓐᓄᑦ ᑕᐃᒎᓯᓪᓗᐊᑕᖃᖅᑐᑦ ᐅᖃᐅᓯᕆᓪᓗᒋᑦ ᖃᓄᐃᑦᑑᖏᑦ, ᐱᐅᓂᖏᑦ ᑎᓯᓂᖏᓪᓗ ᐊᐳᑏᑦ ᐊᔾᔨᒌᖏᑦᑐᓂ ᖃᖓᓂ ᐊᕐᕌᒍᒥ: ᐅᑭᐊᒃᓵᖅ, ᐅᑭᐅᖅ, ᐅᐱᕐᖔᕐᓗ. ᖃᖓᑦᑎᐊᓵᖅ, ᐃᓄᐃᓐᓇᖅᑑᖓᔪᒥᒃ ᑕᐃᒎᓰᑦ ᑐᑭᖏᓐᓄᑦ ᓴᖅᑭᑕᐅᓚᐅᖅᑐᖅ ᖃᐅᔨᒪᔭᐅᓂᐊᕐᒪᑕ ᐃᓄᐃᓐᓇᖅᑐᑦ ᑕᐃᒎᓯᖏᑦ. ᑖᓐᓇ ᐱᖃᓯᐅᔾᔨᓪᓗᓂ ᐅᓄᖅᑐᓂᒃ ᐊᔾᔨᒌᖏᑦᑐᓂᒃ ᑕᐃᒎᓯᓂᒃ ᐊᐳᑎᓄᑦ, ᓲᕐᓗᑐᑦ ᐊᐱᓪᓗᐊᖅᑲᖅ-ᐊᐱᓕᓵᕐᓂᖅ ᐊᐅᕕᖅ-ᐊᐳᑎ ᑭᓪᓗᖅᑕᐅᓯᒪᔪᖅ. ᑖᓐᓇ ᐊᑕᐅᓯᐅᔪᖅ ᐳᐃᒍᔾᔭᐃᕈᑎᒋᓗᒍ ᐊᐳᑎᓄᑦ ᑐᕌᖓᔪᓂᒃ ᑕᐃᒎᓯᓂᒃ ᐊᑐᐃᓐᓇᐅᓗᑎᒃ, ᐱᓗᐊᖅᑐᒥᒃ ᒪᒃᑯᒃᑐᓄᑦ ᑕᓚᕘᕋᓛᓕᖕᓄᑦ.

ᐃᒥᓕ ᐅᖃᖅᐳᖅ ᐱᕐᔪᐊᖑᓂᖓᓄᑦ ᑲᔪᓯᑎᓪᓗᒋᑦ ᐃᓐᓇᐃᑦ ᐊᑐᖅᓯᒪᔭᖏᑦ ᖃᐅᔨᒪᔭᖏᓪᓗ ᐊᐅᓪᓚᖅᓯᒪᓪᓗᑎᒃ ᒪᒃᑯᒃᑐᓄᑦ ᑭᖑᕚᓄᑦ. "ᐊᓱᐃᓛᒃ, ᑐᑭᓯᔪᓐᓇᖅᑐᑦ ᖃᐅᔨᒪᓗᒋᓪᓗ ᑲᑉᐱᐊᓇᕐᓂᖏᑦ ᖃᓄᐃᑦᑐᑦ ᐊᐳᑏᑦ.”

ᓄᐊᕐᔪᐊᑉ ᐊᑎᖓ: ᓂᒋᕐᒥ ᐅᑭᐅᖅᑕᖅᑐᓂ ᐱᓕᕆᔭᕗᑦ

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᑎᖓ ᓴᖅᑭᔮᖅᑎᑦᑎᕗᖅ ᑎᒥᒧᑦ ᐊᖏᖅᓯᒪᓂᖓᓄᑦ ᓯᕗᒧᐊᖅᑎᓪᓗᒋᑦ ᑭᒡᓕᓯᓂᐊᕐᓂᕐᓄᑦ ᖃᐅᔨᓴᕐᓃᑦ ᑕᒪᒃᑮᓂ ᐅᑭᐅᖅᑕᖅᑐᒥ ᓄᓇᕐᔪᐊᑉ ᐊᑎᖓᓂᓗ. ᑕᐃᒎᓯᖅ ‘purla’ ᑎᒍᓯᕗᖅ ᐃᓗᐃᑦᑐᒃᑯᑦ ᐊᖏᓂᖓᓂᒃ ᐅᑭᐅᖅᑕᖅᑐᓂ ᑭᒡᓕᓯᓂᐊᕐᓃᑦ, ᐅᖃᐅᓯᕆᑦᑎᐊᖅᖢᒍ ᓄᓇᕐᔪᐊᕐᒧᑦ ᐱᕐᔪᐊᖑᓂᖓ ᑕᒪᒃᑮᒃ ᓄᓇᕐᔪᐊᑉ ᑲᔾᔨᐊᑕ ᐊᑖᓃᑦᑑᓪᓗ ᑐᑭᓯᓂᕐᓄᑦ ᓯᓚᐃᑦ ᐊᓯᔾᔨᕐᓂᖏᓐᓂᒃ, ᐆᒪᔫᖃᑎᒌᖏᑦᑐᓂᒃ, ᓄᓇᕐᔪᐊᓪᓗ ᐃᓕᖅᑯᓯᖅᓱᖅᑐᑦ ᖃᓄᐃᓕᐅᕈᓯᖏᑦ. ᑖᓐᓇ ᐊᑎᖅ ᑎᒍᓯᕗᖅ ᑲᓇᑕᐅᑉ ᐊᑑᑎᖃᑦᑎᐊᖅᖢᓂ ᐱᓕᕆᐊᒃᓴᖓᓂᒃ ᐃᓚᐅᖃᑕᐅᓪᓚᒃᑐᑐᑦ ᐅᑭᐅᖅᑕᖅᑐᓂ ᖃᐅᔨᓴᕐᓂᕐᓄᑦ, ᐱᕈᖅᓴᐃᓪᓗᑎᒃ ᑭᒡᓕᓯᓂᐊᕐᓂᕐᓄᑦ ᑲᑐᔾᔨᓂᕐᓂᒃ ᓵᓪᓗᒋᓪᓗ ᐊᔾᔨᐅᖏᑦᑐᑦ ᐊᒃᓱᕉᑕᑦ ᓵᑕᐅᔪᑦ ᑕᒪᒃᑮᖕᓄᑦ ᐅᑭᐅᖅᑕᖅᑐᒥ ᓄᓇᕐᔪᐊᓪᓗ ᐊᑎᖓᓂ ᐊᕙᑎᓂᑦ.

ᓄᓇᕐᔪᐊᑉ ᐊᑎᖓ ᓄᓇᑲᓪᓚᐅᔪᖅ ᐊᐅᓚᑦᑎᔪᖅ ᓄᓇᕐᔪᐊᑉ ᓯᓚᖏᓐᓂᒃ ᑕᕆᐅᖏᑕᓗ ᐊᐅᓚᔾᔪᓯᖏᓐᓂᒃ ᐱᕐᔪᐊᖑᓪᓗᓂᓗ ᑲᓇᑕᒧᑦ ᓄᐊᕐᔪᐊᕐᒧᓪᓗ. ᓄᓇᕐᔪᐊᑉ ᐊᑎᖓᓂ ᖃᐅᔨᓴᕐᓃᑦ ᐱᐅᓯᒋᐊᖅᑎᑦᑎᔪᓐᓇᖅᑐᑦ ᑐᑭᓯᓂᑦᑎᓐᓂᒃ ᐊᔾᔨᒌᖏᑦᑐᕈᓘᔭᓄᑦ ᑭᒡᓕᓯᓂᐊᕐᓂᕐᓄᑦ, ᐱᖃᓯᐅᓪᓗᒍ ᓄᓇᕐᔪᐊᖅ ᐆᒪᔫᖃᑎᒌᖏᑦᑐᓄᓪᓗ ᐃᓕᖅᑯᓯᓂᒃ, ᓯᓚᓄᑦ, ᐊᓂᕐᓂᖃᖏᑦᑐᓄᑦ ᓄᓇᕐᔪᐊᓄᓪᓗ ᓄᓇᕐᔪᐊᑦᑕ ᓯᓚᑖᓃᑦᑐᓄᑦ. ᐱᐅᔪᐊᓗᖕᓂᒃ ᖃᓄᐃᓕᖓᓂᓕᒃ ᑐᑭᓯᓇᓱᒡᓗᒋᑦ ᓱᖏᐅᑎᖃᑦᑕᕐᓂᖏᑦ ᐱᕈᖅᑐᑦ, ᓂᕐᔪᑏᑦ ᐃᓄᐃᓪᓗ ᖃᓄᐃᓪᓚᓲᓄᑦ ᓯᓚᓄᑦ.

ᖃᐅᔨᓴᕐᓂᕗᑦ ᐊᔪᖏᓐᓂᕗᓪᓗ ᐅᑭᐅᖅᑕᖅᑐᒥᐅᑕᐅᓪᓗᑕ ᒐᕙᒪᖃᑎᒌᖑᓪᓗᑕ ᐱᔪᓐᓇᖅᑎᑉᐸᑎᒍᑦ ᐊᑑᑎᖃᑦᑎᐊᖅᑐᓂᒃ ᑐᑭᓯᓗᑕ ᐊᑐᕐᓗᑕᓗ ᓇᒧᙵᐅᔾᔨᓂᒃᑯᑦ, ᐅᓯᑲᖅᑕᕐᓂᒃᑯᑦ, ᐸᕐᓇᒃᓯᒪᓂᒃᑯᑦ ᐊᐅᓚᑦᑎᓂᒃᑯᓪᓗ ᐊᕙᑎᒃᑯᑦ ᑲᔪᓰᓐᓇᕈᓐᓇᖅᑐᓂᒃ ᐳᓚᕋᓐᓂᕐᓂᒃ ᑕᒪᒃᑮᖕᓂ ᐅᑭᐅᖅᑕᖅᑐᒥ ᓄᐊᕐᔪᐊᓪᓗ ᐊᑖᓂ ᐊᕙᑎᓂ.

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑭᒡᒐᖅᑐᐃᔪᑦ ᑲᓇᑕᒥᒃ ᑭᒡᓕᓯᓂᐊᕐᓂᕐᓄᑦ ᑲᑎᒪᔨᖏᓐᓂ ᓄᓇᕐᔪᐊᑉ ᐊᑖᓂ ᖃᐅᔨᓴᕐᓂᕐᓄᑦ, ᓄᓇᕐᔪᐊᕐᒥᐅᓂᑦ ᑎᒥᐅᔪᖅ ᐃᑲᔪᓲᖅ ᑭᒡᓕᓯᓂᐊᕐᓂᕐᓄᑦ ᑎᓗᕆᕙᒃᖢᑎᒃ ᓄᓇᕐᔪᐊᑉ ᐊᑎᖓᓄᑦ ᐊᖏᖃᑎᒌᒃᓯᒪᔪᓄᑦ ᒐᕙᒪᖃᑎᒌᖏᑦᑐᓄᑦ. ᓱᓕᓗ, ᑲᓇᑕᒥᐅᑦ ᑲᑎᒪᔨᖏᑦ ᓄᓇᕐᔪᐊᑉ ᐊᑖᓂ ᖃᐅᔨᓴᕐᓂᕐᓄᑦ ᓴᖅᑭᑕᐅᓚᐅᖅᑐᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᑦ ᑎᓕᐅᕆᕙᒃᖢᑎᒡᓗ ᒐᕙᒪᑐᖃᒃᑯᓐᓂᒃ ᑲᓇᑕᒥᐅᑦ ᓄᓇᕐᔪᐊᑉ ᐊᑎᖓᑕ ᑭᒡᓕᓯᓂᐊᕐᓂᖏᓐᓄᑦ. ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᓇᑕᐅᑉ ᑲᑎᒪᔨᓄᑦ ᑎᒥᒋᖕᒥᔭᖓᑦ ᑲᑎᒪᔨᓄᑦ ᐊᐅᓚᑦᑎᔨᓄᑦ ᓄᓇᕐᔪᐊᑉ ᐊᑎᖓᑕ ᐱᓕᕆᔭᖏᓐᓄᑦ .

ᓄᐊᕐᔪᐊᑉ ᐊᑎᖓᑕ ᐃᓕᓴᕐᓇᕈᑎᖏᑦ ᔨᐊᓐᑑ ᐱᐊᖑᐃᓐ ᐱᓱᒃᑐᑦ.

ᓄᓇᕐᔪᐊᑉ ᐊᑎᖓᓄᐊᖅᑐᑦ 2025ᒥ

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐃᑲᔪᓚᐅᖅᑐᑦ ᑲᓇᑕᒥᐅᑦ ᓄᓇᕐᔪᐊᑉ ᐊᑖᓄᑦ ᖃᐅᔨᓴᕆᐊᕐᓂᖓᓂᒃ, ᑭᓱᓕᕆᔨᕈᓘᔭᖅᑏᑦ ᖃᐅᔨᓴᕆᐊᖅᑐᑦ ᓄᐊᕐᔪᐊᑉ ᐊᑖᓄᑦ ᕖᕝᕗᐊᕆ 23ᒥᑦ ᒫᔾᔨ 23, 2025ᒧᑦ.

15 ᑭᒡᓕᓯᓂᐊᖅᑏᑦ ᓄᓇᒥᐅᓂᑦ ᐊᑐᒐᒃᓴᑦ ᑲᓇᑕᒥᑦ, ᐊᕙᑎᓕᕆᓂᕐᓄᑦ ᓯᓚᐃᓪᓗ ᐊᔅᔾᔨᕐᓂᖏᓐᓄᑦ ᑲᓇᑕᒥᒃᑯᓐᓂᑦ, ᐃᖃᓗᒐᓱᖕᓂᓕᕆᓃᑦ ᐃᒪᕐᒥᐅᑕᓕᕆᔨᒃᑯᓪᓗ ᑲᓇᑕᒥᒃᑯᓐᓂᑦ, ᑕᕆᐅᕐᓂ ᐊᕙᑎᓕᕆᓂᕐᓄᑦ ᖃᐅᔨᓴᕐᓃᑦ, ᓇᓚᐅᑦᑖᕐᓃᑦ ᖃᓄᐃᒋᐊᕐᓂᕐᓄᓪᓗ ᑲᑐᔾᔨᖃᑎᒌᑦ, ᑕᓪᓕᒪᓪᓗ ᓯᓚᑐᖅᓴᕐᕕᒡᔪᐊᕐᒥᑦ ᐃᑭᓚᐅᖅᑐᑦ ᑭᖕᒧᑦ ᑲᓇᑕᒥᐅᑦ ᑕᕆᐅᕐᓂ ᐅᓇᑕᖅᑐᒃᓴᖏᑕ ᐅᒥᐊᕐᔪᐊᖓᓄᑦ, HMCS ᒪᒍᕋᑦ ᐳᕈᒃ, ᐳᓐᑕ ᐊᕆᓇᔅ, ᓯᓕᒥ. ᖃᐅᔨᓴᕆᐊᖅᑐᑦ ᑐᕌᓕᕐᒥᓪᓗᑎᒃ ᓂᒋᓄᑦ ᓯᐊᑦᓚᓐ ᕿᑭᖅᑕᓄᑦ, ᓂᒋᕐᒥ ᐃᓚᖓ ᑲᓇᑕᒥᐅᑦ ᐅᑭᐅᖅᑕᖅᑐᓂ ᕿᑭᖅᑕᓄᑦ, ᖃᐅᔨᒪᔭᐅᓪᓗᑎᒃ ᐅᑭᐅᖅᑕᖅᑐᒥ ᓯᓚᕈᔪᓪᓚᖕᓂᖏᓐᓄᑦ ᐊᔾᔨᐸᓗᖏᓐᓄᓪᓗ ᓄᓇᖏᓐᓄᑦ.

ᐊᔾᔨᒌᖏᑦᑐᓂᒃ ᑭᒡᓕᓯᓂᐊᕐᓂᕐᓂᒃ ᐱᓕᕆᔪᒪᓚᐅᖅᑐᑦ ᑖᔅᓱᒪᓂ ᖃᐅᔨᓴᕆᐊᕐᓂᕐᒥ. ᒪᕐᕈᓪᓗᐊᑖᖕᓂᒃ ᐃᓚᖃᓚᐅᖅᑐᖅ: ᑕᕆᐅᕐᓂ ᐱᓕᕆᓂᖃᕐᓗᓂ, ᑐᕌᖅᑐᓄᑦ ᑕᕆᐅᓕᕆᓂᕐᓄᑦ ᓱᕈᓄᓪᓗ, ᓯᒡᔭᒧᓪᓗ ᐃᓚᖓ, ᑐᕌᖅᑐᖅ ᐱᖓᓱᓄᑦ ᑲᖏᖅᖢᓪᓗᐊᑕᓄᑦ ᓂᒋᕐᓄᑦ ᓯᐊᑦᓚᓐ ᕿᑭᖅᑕᓄᑦ, ᖃᐅᔨᓴᖅᑏᑦ ᖃᐅᔨᓴᖅᖢᑎᒃ ᑕᕆᐅᕐᓂ ᓄᓇᓂᓗ ᓄᓇᐃᑦ ᖃᓄᐃᓕᖓᓂᖏᓐᓂᒃ, ᓯᒡᔭᓂ ᑕᕆᐅᕐᓕᕆᓂᕐᓂᒃ ᓱᕈᓄᓪᓗ ᐱᓕᕆᓪᓗᑎᒃ.

ᑕᕆᐅᕐᓂ ᐊᕙᑎᓕᕆᓂᕐᓄᑦ ᖃᐅᔨᓴᕐᓃᑦ, ᓇᓚᐅᑦᑖᕐᓃᑦ ᖃᓄᐃᒋᐊᕐᓂᕐᓄᓪᓗ ᑲᑐᔾᔨᖃᑎᒌᖏᑦ ᐃᑲᔪᓚᐅᖅᑐᑦ ᖃᐅᔨᓴᖅᑐᓂ ᐃᖏᕐᕋᔪᓐᓇᖅᑐᓂᒃ ᑕᕆᐅᓕᕆᓂᕐᓄᑦ ᖃᐅᔨᓴᕐᕕᖕᓂᒃ, ᓴᓇᓯᒪᓪᓗᐊᑕᖅᑐᑦ ᐅᒥᐊᕐᔪᐊᓂ ᐊᑐᖅᑕᐅᖃᑦᑕᕐᓂᐊᕐᒪᑕ, ᓲᕐᓗᑐᑦ HMCS ᒪᕈᒐᑦ ᐳᕈᒃᑦᑎᑐᑦ.

ᑲᑎᒪᔩᑦ 2025 ᓄᓇᕐᔪᐊᑉ ᐊᑎᖓᓄᑦ ᖃᐅᔨᓴᕆᐊᖅᑐᑦ ᐃᖏᕐᕋᕗᑦ ᓴᓂᐊᒍᑦ ᓯᕐᒥᐅᑉ ᓄᐊᕐᔪᐊᑉ ᐊᑎᖓᓂ.

ᐊᔾᔨ : ᑯᐊᐳᕈ ᑲᓄ ᐱᐊᓂᑦ

HMCS ᒪᒍᕋᑦ ᐳᕈᒃ ᑐᕌᖅᑐᖅ ᓂᒋᕐᒧᑦ ᐳᓐᑕ ᐊᕆᓇᔅᒧᑦ ᖃᐅᔨᓴᖅᑎᓂᑦ ᐃᑭᕝᕕᒋᔭᐅᓪᓗᓂ.

ᐅᑭᐅᖅᑕᖅᑐᒥᐅᓄᑦ ᐊᔾᔨᒌᖑᖏᑦᑐᑦ

ᐊᔾᔨᒌᐸᓗᐃᑦ ᐊᔾᔨᒌᖏᓐᓃᓪᓗ ᐅᑭᐅᖅᑕᖅᑐᒥ ᓄᓇᕐᔪᐊᓪᓗ ᐊᑖᓂ ᖃᐅᔨᓴᕐᓂᕐᓂ

ᐃᐊᓐ ᕼᐊᒡ, PhD

ᐆᒪᔪᕐᓂᐊᖅᑎ

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦᖃᐅᔨᓴᕐᓂᕐᓄᑦ ᑭᒡᓕᓯᓂᐊᖅᑎ

ᐊᔪᙱᓛᖏᑦ: ᓄᓇᓂ ᐆᒪᔫᖃᑎᒌᖏᑦᑐᓕᕆᓃᑦ ᑕᕆᐅᕐᓂᓗ ᐆᒪᔪᓕᕆᓃᑦ

ᐃᐊᓐ ᕼᐊᒡ, PhD, ᖃᓂᒋᔮᓂ ᓴᑯᑕᓐ ᓯᕐᒥᐅᑉ ᓄᓇᕐᔪᐊᑉ ᐊᑖᓂ 85° ᓂᒋᕐᒥ.

ᐊᔾᔨ : ᐸᐃᕋᓐ ᐊᑕᒻᔅ

ᐃᐊᓐ ᕼᐊᒡ ᐃᓚᐅᓕᓚᐅᖅᑐᖅ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᑦ 2017ᒥ ᖃᐅᔨᓴᕐᓂᕐᓄᑦ ᑭᒡᓕᓯᓂᐊᖅᑎᓪᓗᐊᑕᐅᓪᓗᓂ ᖃᐅᔨᓴᕐᓂᕐᓄᓪᓗ ᐊᖓᔪᖅᑳᖑᓪᓗᓂ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᑦ ᐅᑭᐅᖅᑕᖅᑐᓂ ᐆᒪᔫᖃᑎᒌᖏᑦᑐᓄᑦ ᖁᐊᖅᑎᑦᑎᓂᕐᓄᓪᓗ ᖃᐅᔨᓴᖅᑎᖏᓐᓄᑦ. ᐃᓚᒋᓪᓚᓚᐅᖅᑕᖓ ᖃᐅᔨᓴᕐᓂᖓᑕ ᑐᕌᖓᔪᖅ ᓄᓇᕐᔪᐊᑉ ᐊᑎᖓᓄᑦ. ᐊᔾᔨᒌᐸᓗᖕᓂᓖᑦ ᓄᓇᕐᔪᐊᑉ ᐊᑎᖓᓂ ᐅᑭᐅᖅᑕᖅᑐᒥᓗ ᐱᕐᔪᐊᖑᔪᓄᑦ ᖃᐅᔨᓴᖅᑎᓄᑦ ᑐᑭᓯᔭᐅᓗᑎᒃ ᑕᒪᒃᑮᓂ ᐅᑭᐅᖅᑕᖅᑐᓂ ᓄᓇᓂ.

“ᐅᑭᐅᖅᑕᖅᑐᖅ ᓄᓇᕐᔪᐊᓪᓗ ᐊᑎᖓ ᑲᑎᙵᕗᑦ ᓯᓚᒧᑦ, ᖃᓄᐃᑦᑐᖃᕆᓪᓗᓂᓗ ᐅᑭᐅᖅᑕᖅᑐᒥ ᐊᒃᑐᐃᔪᓂᒃ ᓄᓇᕐᔪᐊᑉ ᐊᑎᖓᓂᒃ, ᐃᒡᓗᐊᓄᓪᓗ,” ᐅᖃᖅᑐᖅ ᐃᐊᓐ, ᐅᖃᖅᖢᓂ ᑕᒪᒃᑮᒃ ᐊᔾᔨᒌᐸᓗᖕᓂᒃ ᐊᕙᑎᓂ ᖃᓄᐃᓕᖓᖕᒪᑕ. “ᐆᒪᔪᓄᓪᓗ ᐱᖅᑯᓯᖅᑕᖃᕐᒪᑦ ᐊᔾᔨᒌᐸᓘᔪᓂᒃ ᑕᒪᒃᑮᖕᓂ. ᐆᒪᔪᑦ ᑖᒃᑯᓇᓂ ᐊᕙᑎᓂ ᐊᑐᓲᑦ ᖃᓄᐃᕐᔪᐊᖅᑐᓂᒃ ᖃᓄᐃᓕᖓᓂᕐᓂᒃ.”

ᓄᓇᐃᑦ ᐅᔾᔨᕐᓇᖅᑐᓂᒃ ᐊᔾᔨᒌᖏᓐᓂᖃᖅᐳᑦ, ᑭᓯᐊᓂ. ᐅᑭᐅᖅᑕᖅᑐᖅ ᑕᕆᐅᕐᖑᖕᒪᑦ ᓄᓇᓄᑦ ᐊᕙᓗᔭᐅᓯᒪᓪᓗᓂ, ᓄᓇᕐᔪᐊᑉ ᐊᑎᖓᓕ ᓄᓇᐅᓪᓗᓂ ᐊᕙᓗᔭᐅᓯᒪᓪᓗᓂ ᑕᕆᐅᕐᓄᑦ. ᓄᓇᐃᑦ ᓄᓇᕐᔪᐊᑉ ᐊᑖᓂ ᖄᐹᖅᓯᒪᕗᑦ ᓯᓕᓪᓚᒃᑐᓄᑦ ᓂᓚᖕᓂᑦ ᐃᓄᖃᓚᐅᖅᓯᒪᓇᓂᓗ. ᐅᑭᐅᖅᑕᖅᑐᕐᓗ, ᑭᓯᐊᓂ ᐃᓚᖓ ᐊᐅᓲᖑᖕᒪᑦ ᐊᕐᕌᒍᑕᒫᑦ ᐊᖏᕐᕋᕆᔭᐅᓯᒪᓪᓗᓂᓗ ᐃᑦᑕᕐᒥᑦ.

“ᐃᓅᓯᖅ ᓄᓇᕐᔪᐊᑉ ᐊᑎᐊᓂ ᐊᔪᕐᓇᖏᑦᑐᑯᒃᑎᑐᑦ ᓴᓇᓯᒪᔪᖅ, ᐊᖏᓛᑦ ᐊᕐᕌᒍᓕᒫᒧᑦ ᓄᓇᒥᐅᑦ ᓂᕐᔪᑏᑦ ᒥᑭᖦᖢᑎᒃ, ᖁᐱᕐᕈᕐᓚᐅᓪᓗᑎᒃ ᐋᓯᕙᕋᓛᓪᓗ, ᒥᑭᓐᓂᖅᓴᐅᓪᓗᑎᒃ ᐊᑕᐅᓯᕐᒥᑦ ᒥᓕᒦᑕᒥᑦ. ᖃᐅᔨᒪᔭᐅᑦᑎᐊᖅᑐᑦ ᐱᐊᓐ ᖑᐃᓐ ᓇᑦᑏᓪᓗ ᑕᕆᐅᕐᒥᐅᖑᔪᑦ ᓂᕐᔪᑏᑦ ᓄᓇᒧᐊᓲᖑᓪᓗᑎᒡᓗ ᐊᐅᔭᑐᐊᒃᑯᑦ,” ᐅᖃᖅᑐᖅ ᐃᐊᓐ. “ᑖᓐᓇ ᐊᔾᔨᒋᙱᑕᖓ ᐅᑭᐅᖅᑕᖅᑑᑉ, ᖃᓄᑯᓘᔭᖅ ᐋᖅᑭᒃᓯᒪᔪᓂᒃ ᓄᓇᓂ ᐊᕙᑎᖃᕐᒪᑕ ᐱᖃᓯᐅᔾᔨᔪᓂᒃ ᐊᕐᕌᒍᓕᒫᖅ ᐊᖑᓇᓱᒃᑎᒻᒪᕆᐅᓛᖃᓲᖑᓪᓗᑎᒃ, ᐊᒪᕈᖅᑎᑐᑦ ᓇᓄᖅᑎᑐᓪᓗ.”

ᐃᐊᓐ ᐅᖃᖅᑐᖅ ᑕᒪᒃᑮᒃ ᐊᔾᔨᒌᐸᓗᖕᓃᑦ ᐊᔾᔨᒌᖏᓐᓃᓪᓗ ᓄᓇᕐᔪᐊᑉ ᖄᖓᓂᑦ ᐊᑖᓂᓪᓗ ᐆᒪᔪᖅᑎᒍᑦ ᖃᐅᔨᔪᒥᓇᕆᔭᖏᑦ. ᖃᐅᔨᓴᕐᓗᒋᑦ ᐱᐅᓯᒋᐊᕐᓂᐊᖅᑕᖏᑦ ᑐᑭᓯᓂᕗᑦ ᓄᓇᕐᔪᐊᕐᒥ ᐆᒪᔫᖃᑎᒌᖏᑦᑐᓄᑦ ᐱᓕᕆᔾᔪᓯᕐᓂᒃ.

“ᐊᑲᐅᙱᓕᐅᕈᑎᓪᓚᐅᔪᖅ ᐊᓯᔾᔨᕐᓃᑦ ᑖᒃᑯᓇᓂ ᓄᓇᓂ,” ᐅᖃᖅᑐᖅ. “ᐅᖅᑰᓂᕐᓄᑦ ᖃᓐᓂᕐᓄᓪᓗ ᒪᖁᖕᓂᕐᓄᑦ ᐃᓕᖅᑯᓰᑦ ᐅᑭᐅᖅᑕᖅᑐᓂ ᐊᓯᔾᔨᑲᐅᖅᑐᓕᕐᒪᑕ, ᐱᓗᐊᖅᑐᒥ ᐅᑭᐅᖅᑕᖅᑐᒥ. ᑐᑭᓯᓗᒋᑦ ᖃᓄᖅ ᓄᓇᕐᔪᐊᕐᒥ ᐆᒪᔫᖃᑎᒌᖏᑦᑐᒃᑯᕖᑦ ᖃᓄᐃᒋᐊᕐᒪᖔᑕ ᑖᒃᑯᓄᖓ ᐊᓯᔾᔨᕐᓂᕐᓄᑦ ᐊᒃᓱᕈᕐᓇᓪᓚᒃᑐᖅ.”

ᖁᐱᕐᕈᑦ ᑯᓕᒻᐳᓚ ᐆᒪᔫᖃᑎᒌᖏᑦᑐᑦ ᐃᐊᓐᒥᑦ ᐱᓕᕆᖃᑎᒥᓂᓪᓗ ᐊᑐᖅᑕᐅᔪᑦ ᑎᒥᒃᑯᑦ ᑭᓱᓕᐅᕈᑎᒃᑯᑦ ᖃᐅᔨᓴᕐᓂᕐᓄᑦ ᓴᓇᒃᑲᓐᓂᕈᑎᒋᓗᒋᑦ ᕿᒪᒃᑕᑦᑎᓐᓂ ᓄᓇᓂᒃ ᓯᓚᖏᓐᓂᒡᓗ ᓄᓇᕐᔪᐊᑉ ᐊᑎᖓᓂ.

ᐊᔾᔨ : ᔨᐊᒪ ᑲᓕᓐᔅ

ᐆᒪᔪᑦ! —ᖁᐱᕐᕈᕋᓛᑦ ᓯᕐᒦᑦ ᓂᓚᖏᓐᓂ

ᐳᕋᐃᑎ ᐅᑲᓄ, PhD

ᒪᒋᓪ ᓯᓚᑦᑐᖅᓴᕐᕕᒡᔪᐊᖅ

ᖁᐱᕐᕈᕋᓛᓕᕆᓂᖅ

ᐅᑭᐅᖅᑕᖅᑐᒥ ᓄᓇᕐᔪᐊᑉ ᐊᑎᖓᓄᑦ ᐃᓕᓐᓂᐊᕈᑎᒃᓴᓂᒃ ᑮᓇᐅᔭᖅᑖᖅᑐᖅ

“ᕿᒪᒃᑕᑦᑎᓐᓂ, ᐃᓄᐃᑦ ᑕᑯᒐᔭᖅᑐᑦ ᓯᕐᒥᖕᒥᒃ ᐃᓱᒪᓗᑎᒡᓗ ᑭᓱᑐᐃᓐᓇᒥᒃ ᐆᒪᕝᕕᐅᖏᑦᑐᖅ. ᖃᓄᐃᑦᑐᖃᖏᑦᑐᖅ ᑕᐃᑲᓂ,” ᐅᖃᖅᑐᖅ ᐳᕋᐃᑎ ᐅᑲᓄ, PhDᒧᑦ ᐃᓕᓐᓂᐊᓚᐅᖅᓯᒪᔪᖅ ᒪᒋᐅᓪ ᓯᓚᑦᑐᖅᓴᕐᕕᒡᔪᐊᕐᒥ.

ᐳᕋᐃᑎ ᐅᖃᖅᑐᖅ ᐃᔨᑐᐃᓐᓇᒧᑦ, ᐆᒪᔪᖃᖅᑰᔨᖏᑦᑐᖅ ᓂᓚᖕᒥ. ᓲᖃᐃ ᖃᐅᔨᓴᖅᑏᑦ ᖃᐅᔨᔭᖏᑦ ᓇᓂᓯᓚᐅᕐᒪᑕ ᐅᑭᐅᖅᑕᖅᑐᓂ ᓯᕐᒥᓂ ᒥᑭᓗᐊᒧᑦ, ᐊᖏᓐᓇᖅᑐᖃᕆᐊᖃᖅᖢᑎᒃ ᑕᑯᔪᒪᓗᒍ—ᖁᐱᕐᕈᕋᓛᑦ.

“ᖃᐅᔨᔪᒪᓪᓚᑦᑖᖅᐳᖓ ᐆᒪᕚᑦ?” ᐅᖃᖅᑐᖅ. “ᒦᑕᒧᑦ ᖄᖓᓄᑦ ᓯᕐᒥᐅᑉ ᐃᓗᐊᓄᐊᕈᒪ, ᐆᒪᔪᓂᒃ ᖁᐱᕐᕈᕋᓛᖅᓯᐊᕐᓂᐊᖅᐳᖓ ᑕᐃᑲᓂ?”

ᐳᕋᐃᑎ ᐱᓚᐅᖅᑐᖅ ᒦᑕᒧᑦ ᑕᑭᓂᓕᖕᓂᒃ ᓂᓚᖕᓂᒃ ᓂᐅᖅᑐᖅᑕᐅᔾᓂᒃ ᕙᐃᑦ ᓯᕐᒥᖕᒥᑦ ᐊᒃᓱᓪ ᕼᐊᐃᐳᒡ ᕿᑭᖅᑕᕐᒥᑦ ᐅᐊᖕᓇᖅ ᑲᓇᖕᓇᕐᒥᑦ ᓄᓇᕘᒥ, ᔭᓐᓴᓐᔅ ᓯᕐᒥᐊᓂᓪᓗ ᓕᕕᖕᔅᑕᓐ ᕿᑭᖅᑕᕐᒥᑦ ᓄᓇᕐᔪᐊᑉ ᐊᑎᖓᓂᑦ. ᓇᓂᓯᓚᐅᖅᑐᖅ ᐆᒪᔪᓂᒃ ᖁᐱᕐᕈᕋᓛᓂᒃ ᑕᒪᒃᑮᖕᓂᑦ ᓯᕐᒥᓂᑦ, ᑭᓯᐊᓂ ᐊᔾᔨᒌᖕᓇᑎᒃ. ᑭᓯᐊᓂ, ᖁᐱᕐᕈᕋᓛᑦ ᐱᖃᓚᐅᖅᑐᑦ ᐅᓄᖅᑐᓂᒃ ᐊᔾᔨᒌᖕᓂᕐᓂᒃ ᐊᐅᓚᔾᔪᓯᕐᒥᒍᑦ. ᑖᓐᓇ ᐅᖃᖅᑰᔨᕗᖅ ᐊᔾᔨᒌᓂᒃ ᐊᓐᓇᐅᒪᓂᕐᓄᑦ ᐸᕐᓇᐅᑎᖃᖅᑰᖅᑐᑦ ᓂᓚᖕᓂ ᐆᒪᓂᕐᓄᑦ.

ᖃᐅᔨᓴᕐᓗᒋᑦ ᐃᑲᔫᑎᒋᓂᐊᖅᑕᕗᑦ ᑐᑭᔅᔾᔪᑎᒋᓗᒋᑦ ᖃᓄᖅ ᐊᒃᑐᐃᑐᐃᓐᓇᕆᐊᖃᕐᒪᖔᒡᑕ ᐃᓂᑖᕆᓵᖅᑕᒥᓂᒃ. ᑐᑭᓯᓗᒋᑦ ᑖᒃᑯᐊ ᖁᐱᕐᕈᕋᓛᑦ ᐱᕐᔪᐊᖑᕗᖅ ᓲᖃᐃᒻᒪ, ᓄᓇᕐᔪᐊᖅ ᐅᖅᑰᓯᓕᖅᑎᓪᓗᒍ ᓯᓚᐃᓪᓗ ᐊᓯᔾᔨᖅᖢᑎᒃ ᐅᑭᐅᖅᑕᖅᑐᒥᐅᑦ ᓯᕐᒦᑦ ᓂᓚᐃᓪᓗ ᐊᐅᓕᕐᒪᑕ. ᑖᓐᓇ ᑐᑭᓕᒃ ᑖᒃᑯᐊ ᖁᐱᕐᕈᕋᓛᑦ ᑯᕕᔭᐅᓂᐊᖅᑐᑦ ᐊᓯᓄᑦ ᐊᕙᑎᓄᑦ. ᖃᐅᔨᓴᕐᓗᒋᑦ ᐃᑲᔫᑎᒋᓂᐊᖅᑕᕗᑦ ᑐᒃᓯᓗᒋᑦ ᖃᓄᖅ ᐊᒃᑐᐃᒐᔭᕐᒪᖔᑕ ᐃᓂᑖᕆᓕᖅᑕᒥᓂᒃ.

“ᖃᐅᔨᕙᓪᓕᐊᖏᓐᓇᕋᑦᑕ ᑭᒡᓕᖏᑦ ᖁᐱᕐᕈᕋᓛᑦ ᐅᖓᑖᓃᓐᓂᖅᓴᓪᓛᓗᐃᑦ ᐃᓱᒪᒋᓯᒪᔭᓕᒫᑦᑎᓐᓂᑦ,” ᐅᖃᖅᐳᑦ ᐳᕋᐃᑎ. “ᓇᒧᓕᒫᕐᕕᒋᓯᒪᔭᑦᑎᓐᓄᑦ, ᓯᓚᖓ ᐅᐊᑲᓪᓚᐅᒐᓗᐊᕈᓂ, ᓇᓂᓰᓐᓇᖅᑐᒍᑦ ᐆᒪᔪᓂᒃ ᖁᐱᕐᕈᕋᓛᓂᒃ ᑕᐃᑲᓂ. ᑖᓐᓇᓗ ᐱᖃᓯᐅᔾᔨᓕᕐᒥᔪᖅ ᓯᕐᒥᐅᑉ ᕿᑎᐊᓂ ᓂᓚᐃᓐᓇᕐᒥ ᓄᓇᕐᔪᐊᑉ ᐊᑖᓂ.”

ᐳᕋᐃᑎ ᐅᑲᓄ ᐲᖅᓯᔪᖅ ᓂᓚᖕᒥᒃ ᔭᓐᓴᓐᔅ ᓯᕐᒥᐊᓂᑦ ᓄᓇᕐᔪᐊᑉ ᐊᑖᓂ ᖃᐅᔨᓴᕐᓂᐊᕋᒥᒋᑦ ᖁᐱᕐᕈᕋᓛᑦ ᓂᓚᖕᓃᑦᑐᑦ.

ᑲᓇᑕᒥᐅᑦ (ᐱᓐ ᖑᐃᓐᓗ) ᐃᓚᒋᔭᐅᓯᒪᕗᑦ ᓄᓇᕐᔪᐊᑉ ᐊᑖᓂ ᖃᐅᔨᓴᕐᓂᕐᓄᑦ ᐅᖓᑖᓄᑦ 100 ᐊᕐᕌᒍᓄᑦ.

ᓇᐹᖅᑐᓄᑦ: ᖃᐅᔨᓴᕐᓃᑦ ᐊᓯᔾᔨᖅᑐᓄᑦ ᐅᒥᖕᒪᐃᑦ ᐃᓕᖅᑯᓯᖏᓐᓄᑦ

ᑯᕆᔅᑎᓐ ᑕᓐᐸᕐ, MSc ᐃᓕᓐᓂᐊᖅᑐᖅ

ᕕᐅᕗᕆᑦ ᓗᐊᕆᐊᐃ ᓯᓚᑦᑐᖅᓴᕐᕕᒡᔪᐊᖓ

ᐅᑭᐅᖅᑕᖅᑐᒥᐅᑕᐅᓂᕐᒧᑦ ᑮᓇᐅᔭᖅᑖᖅᑐᖅ

ᖃᖓᑦᑎᐊᓂ ᐊᕐᕌᒍᓂ, ᐅᒥᖕᒪᐃᑦ ᓅᓯᒪᕗᑦ ᓇᐹᖅᑐᓄᑦ ᑕᐃᑎᓂ ᓂᓂ ᓄᓇᖃᖅᑳᖅᑐᑦ ᓴᐳᔾᔭᐅᓯᒪᔪᕐᒧᑦ ᓄᓇᑦᑎᐊᕐᒥ. ᖃᐅᔨᒃᑲᓐᓂᕈᒥᓇᖅᐳᖅ, ᐅᒥᖕᒪᐃᑦ ᑕᕝᕗᙵᖅᓯᒪᖏᑦᑐᑦ ᓇᐹᖅᑐᓄᑦ 100 ᐊᕐᕌᒍᓄᑦ.

ᑯᕆᔅᑎᓐ ᑕᓐᐸᕐ, ᒪᔅᑐᓄᑦ ᐃᓚᓕᐅᑎᓂᕐᓄᑦ ᐆᒪᔪᕐᓂᐊᕐᓂᕐᓄᑦ ᐃᓕᓐᓂᐊᖅᑐᖅ ᕕᐅᕗᕆᑦ ᓗᐊᕆᐊᐃᒥ, ᖃᐅᔨᓴᖅᑐᖅ ᖃᓄᐃᒻᒪᑦ ᐅᑎᕐᒪᖔᑕ.

“1800 ᐃᓱᖏᓐᓂ ᑭᖑᓪᓕᖅᐹᖑᓚᐅᖅᑐᖅ ᑕᕝᕙᓂ ᑕᑯᔭᐅᒐᒥᒃ,” ᑯᕆᔅᑎᓐ ᐅᖃᖅᑐᖅ. ᐅᖃᒃᑲᓐᓂᖅᑐᖅ ᐊᖑᓇᓱᓗᐊᖅᑕᐅᓪᓗᑎᒃ ᓄᖑᑲᓴᓚᐅᕐᒪᑕ ᑲᓇᑕᒥ. “ᐅᓄᖅᓯᕙᓪᓕᐊᓕᕐᒥᖕᒪᑕ, ᓇᐹᖅᑐᖃᖏᑦᑐᓃᓐᓂᖅᓴᐅᓚᐅᖅᑐᑦ.”

2021ᒥ, 307 ᐊᔾᔨᓗᕈᑏᑦ ᐋᖅᑭᒃᓱᖅᑕᐅᓚᐅᖅᑐᑦ ᐃᓗᐊᓂ 26,000 ᓴᓂᒧᑦ ᑐᑭᒧᑦ ᑭᓛᒥᑕᓄᑦ ᐊᖏᓂᓕᖕᒥ ᓴᐳᔾᔭᐅᓯᒪᔪᕐᒥ ᐊᔾᔨᓕᐅᕆᖃᑦᑕᕐᓂᐊᕋᒥᒃ ᐆᒪᔪᓂᒃ ᐱᓱᒃᑐᓂᒃ ᑕᐃᑲᓂ. ᓯᕗᓪᓕᖅᐹᒥ ᐊᕐᕌᒍᒥ, ᒥᓕᐊᓐ ᐊᔾᔩᑦ ᐊᔾᔨᓕᐅᖅᑕᐅᓚᐅᖅᑐᑦ ᑐᒃᑐᓂᒃ, ᐊᒪᕈᓂᒃ, ᓇᓄᕐᓂᒃ, ᑎᖕᒥᐊᓂᒃ—ᐅᒥᖕᒪᖕᓂᒡᓗ. ᑯᕈᔅᑎᓐ ᖃᐅᔨᓴᖅᑐᖅ ᐅᒥᖕᒪᐃᑦ ᐊᔾᔨᖏᓐᓂᒃ ᖃᐅᔨᓇᓱᒃᖢᓂ ᓇᐹᖅᑐᓕᖕᒧᐊᕐᒪᖔᑕ ᓂᕿᓄᑦ ᕿᒫᓪᓗᑎᒡᓘᓐᓃᑦ ᐊᖑᓇᓱᒃᑎᓐᒃ ᐊᒪᕈᖅᑎᑐᑦ ᐊᒃᖤᑎᑐᓪᓗ.

ᑭᓯᐊᓂ, ᔭᓗᓇᐃᕝᒥᐅᑕᑐᖃᖅ ᐊᓯᐊᓂᒃ ᐃᓱᒪᔪᖅ. ᐃᓱᒪᔪᖅ ᐅᒥᖕᒪᐃᑦ “ᐅᖅᑰᓂᕐᓂᒃ ᐊᐅᓚᑦᑎᔪᑦ,” ᑎᒥᖏᑕᓘᓐᓃᑦ ᐅᖅᑰᓂᖏᓐᓂᒃ ᑕᐃᒪᐃᑦᑎᑦᑏᓐᓇᕋᓱᒃᑐᑦ.

“ᐅᖅᑰᓯᔪᐊᓘᖕᒪᑦ ᐅᑭᐅᖅᑕᖅᑐᒥ,” ᑯᕆᔅᑏᓐ ᐅᖃᖅᑐᖅ. ᐅᖃᖅᑐᖅ ᖃᖓᑦᑎᐊᖅ ᐊᐅᔭᐅᑉ ᐅᖅᑰᓂᖏᑦ ᓇᐹᖅᑐᖃᖏᑦᑐᓂ ᑎᑭᓯᒪᖕᒪᑕ 30 ᓯᐊᓪᓯᐊᔅᓄᑦ. ᐅᒥᖕᒪᐃᑦ ᕿᕕᐅᖏᑦ, ᕿᕕᐅᖑᓂᕋᖅᑕᐅᔪᑦ ᐃᓄᒃᑎᑐᑦ, ᑐᕐᕈᔪᓪᓛᓘᖕᒪᑕ 8ᖏᖅᓱᖅᖢᑎᒡᓗ ᐅᖅᑰᓂᖅᓴᐅᓪᓗᑎᒃ ᓰᐲᑦ ᕿᕕᐅᖏᓐᓂᑦ.

ᑯᕆᔅᑏᓐ ᐅᖃᖅᑐᖅ ᓂᒡᓚᓱᖕᓂᖅᓴᐃᑦ, ᑕᓪᓗᕐᒦᑦᑐᑦ ᓇᐸᖅᑐᐃᑦ ᐅᖅᑰᓗᐊᖏᔾᔪᑕᐅᓇᓱᒋᔭᐅᔪᑦ ᓇᐹᖅᑐᖃᖏᑦᑐᓂᑦ. ᐅᖃᖅᑐᖅ ᒨᓰᑦ ᒥᓂᓱᑕᒥ ᑕᑯᔭᐅᓯᒪᔪᑦ ᕿᓂᖅᑎᓪᓗᒋᑦ ᓂᒡᓚᓱᖕᓂᖅᓴᓂᒃ ᓇᐹᖅᑐᓕᖕᓂᒃ ᐅᖅᑰᔪᒥᒃ ᕿᒪᒐᓱᒃᖢᑎᒃ ᐅᖃᖅᖢᓂᓗ ᐅᒥᖕᒪᑦ ᑕᐃᑎᓂ ᓂᓂᒥ ᑕᐃᒪᐃᑐᐃᓐᓇᕆᐊᓖᑦ.

ᐊᔾᔨᓕᐅᕈᑎᐅᑉ ᐊᔾᔨᓕᐅᖅᑕᖓ ᐅᒥᖕᒪᑦ ᓇᐹᖅᑐᓕᖕᓂ ᑕᐃᑎᓂ ᓂᓂ ᓄᓇᖃᖅᑳᖅᑐᑦ ᓴᐳᔾᔭᐅᓯᒪᔪᕐᒥ.

ᐊᔾᔨ : ᖢᑦᓯᓪ ᒃ'ᐃ ᑎᓂ ᓄᓇᖃᖅᑳᖅᑐᑦ, ᒥᕐᖑᐃᖅᓯᕐᕕᓕᕆᔩᑦ ᑲᓇᑕᒥ, ᒐᕙᒪᖓᑦ ᓄᓇᑦᑎᐊᑉ

ᐊᖑᓇᓱᒃᑕᐅᔪᑦ ᓂᖀᑦ ᓇᓕᒧᑦᑐᑦ ᓂᕿᖃᕈᓐᓇᕐᓂᕐᓄᑦ

ᐊᐃᒥ ᑳᒋ, PhD

ᐃᓕᓴᕆᔭᐅᓯᒪᔪᖅ ᓂᕆᖃᑦᑕᕐᓂᓕᕆᔨ

ᖃᐅᔨᓴᖅᑐᓄᑦ ᐃᑲᔪᖃᑕᐅᔪᖅ ᓄᓇᕘᒥ ᖃᐅᔨᓴᕐᕕᖕᒥ,

ᖃᐅᔨᓴᖅᑐᓄᑦ ᐃᑲᔪᖃᑕᐅᔪᖅ ᐃᓚᓕᐅᑎᓯᒪᔪᖅ ᐃᓚᐅᓇᓂ ᐃᓕᓴᐃᔨ ᓯᓚᑦᑐᖅᓴᕐᕕᒡᔪᐊᖓᓂ ᐊᐅᐳᑕᐅᑉ ᐃᓕᓐᓂᐊᕐᕕᖓᓂ ᐃᓄᓕᒫᓄᑦ ᖃᓄᐃᖏᓐᓂᕐᓄᑦ,

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓂᑦ ᑮᓇᐅᔭᖅᑖᑐᕕᓂᖅ

“ᐊᑕᐅᓯᖅ ᖃᓄᐃᖏᓐᓂᖅ ᐅᖃᐅᓯᖃᒐᔪᓲᖅ ᐃᓅᖃᑎᒋᖕᓂᖏᓐᓄᑦ ᓂᕐᔪᑏᑦ, ᐃᓄᐃᑦ ᐊᕙᑏᓪᓗ, ᖃᓄᐃᖏᓐᓂᖏᓪᓗ ᑖᒃᑯᐊᓕᒫᖅ.” ᐅᖃᖅᑐᖅ ᐊᐃᒥ ᑳᒋ, ᖃᐅᔨᓴᕐᓂᖓ ᑐᕌᖅᑐᖅ ᐃᓄᖕᓄᑦ. “ᑖᒃᑯᐊ ᐃᓅᖃᑎᒌᖕᓃᑦ ᐱᕐᔪᐊᖑᔪᑦ ᓄᓇᕘᒥ, ᓄᓇᓕᖕᓂᑦ ᐊᖑᓇᓱᒃᑕᐅᔪᑦ ᓂᖀᑦ ᑐᙵᔾᔪᑕᐅᔪᑦ ᓂᕿᖃᕈᓐᓇᕐᓂᕐᓄᑦ.”

ᐊᐃᒥ, ᑐᙵᔪᖅ ᐃᖃᓗᖕᓂ, ᐃᓱᒫᓘᑎᓕᒃ ᓂᕿᖃᕈᓐᓇᕐᓂᒃ ᐃᓄᓕᒫᑦ ᖃᓄᐃᖏᓐᓂᓐᓂᒡᓗ ᓄᓇᕘᒥ. ᖃᐅᔨᓴᕐᓂᖏᑦ ᑐᕌᖓᔪᑦ ᐊᖑᓇᓱᒃᑕᐅᔪᓄᑦ ᓂᖀᓄᑦ ᐊᑐᕐᓂᖏᓐᓄᓪᓗ ᐃᑲᔪᕐᓗᑎᒃ ᓂᕿᖃᕈᓐᓇᕐᓂᕐᓄᑦ. ᐊᖑᓇᓱᒃᑕᐅᔪᑦ ᓂᖀᑦ ᓄᓇᒥᙶᖅᑐᑦ, ᑕᕆᐅᕐᓂᑦ, ᕿᓚᖕᓂᑦ, ᐱᖃᓯᐅᔾᔨᓪᓗᑎᒡᓗ ᑎᖕᒥᐊᓂᒃ, ᐃᖃᓗᖕᓂᒃ ᑕᕆᐅᕐᒥᐅᓂᒃ ᓄᓇᒥᐅᓂᒡᓗ ᓂᕐᔪᑎᓂᒃ, ᑭᒍᑕᖏᕐᓇᓂᒃ ᐱᕈᖅᑐᓂᒡᓗ. ᐊᑑᑎᖃᑦᑎᐊᖅᑐᑦ ᓂᕿᖃᕈᓐᓇᕐᓂᕐᓄᑦ, ᖃᓄᐃᖏᓐᓂᕐᓄᑦ, ᐃᓅᓯᖃᑦᑎᐊᕐᓂᕐᓄᑦ, ᓄᓇᓕᖕᓂ ᐃᓅᓯᕐᓄᑦ ᐃᓄᐃᓪᓗ ᐃᓕᖅᑯᓯᑐᖃᖏᓐᓄᑦ.

ᐊᐃᒥ ᐅᖃᖅᑐᖅ ᖃᐅᔨᓴᖅᑕᒥᓂ ᑐᕌᖅᑎᑕᐅᔪᖅ ᐃᓄᖕᓄᑦ ᐊᕐᓇᓄᑦ ᐊᓯᓄᓪᓗ ᖃᐅᔨᒪᔨᑕᓄᑦ. ᐊᑕᐅᓯᖅ ᐃᓚᖓᑦ ᖃᐅᔨᒪᔨᑕᕐᓂᑦ ᐊᐃᒡᒐ ᓴᖑᔭ ᑲᖏᖅᑐᒑᐱᖕᒥᑦ, ᖃᐅᔨᓴᕐᓂᕐᓄᑦ ᐃᓚᐅᖃᑕᐅᓲᖅ ᐱᓕᕆᓂᕐᒧᑦ.

"ᐊᖑᓇᓱᒃᑕᐅᔪᑦ ᓂᖀᑦ ᐃᓅᓕᓴᐅᑎᒋᔭᕗᑦ. ᑕᕐᓂᑦᑎᓐᓄᓪᓗ ᓂᕿᒋᖕᒥᔭᕗᑦ,” ᐅᖃᖅᑐᖅ ᐊᐃᒡᒐ.

ᐊᐃᒡᒐ ᐊᐃᒥᓗ ᐱᓕᕆᖃᑎᖃᑦᑎᐊᓲᑦ ᓄᓇᓕᖕᓂ ᕿᑭᖅᑕᓂᒥ ᐅᖃᐅᓯᕆᓪᓗᒋᑦ ᖃᐅᔨᒪᔭᐅᔪᑦ ᐊᖑᓇᓱᒃᑕᐅᔪᓂᒃ ᓂᕿᓂᒃ ᐸᕐᓇᖕᓂᕐᓄᑦ, ᓱᕈᔾᔭᐃᖅᓯᓂᕐᓄᑦ ᐊᑦᑕᕐᓇᖏᑦᑐᒦᓐᓂᕐᓄᓪᓗ. ᑖᒃᑯᐊ ᐱᖃᓯᐅᔾᔨᔪᑦ ᖃᓄᖅ ᐃᒍᓇᖅᓯᔭᕆᐊᖃᕐᒪᖔᑕ, ᐸᓂᖅᑎᓪᓗᒋᑦ, ᓂᕿᓕᐅᕐᓗᒋᓪᓗ. ᐅᖃᐅᓯᖃᓲᑦᑕᐅᖅ ᖃᓄᖅ ᐊᖑᓇᓱᒃᑕᐅᔪᑦ ᓂᖀᑦ ᐃᑲᔪᕐᒪᑕ ᒪᓂᓐᓂᕐᓂᒃ ᐃᓗᐃᑦᑐᒃᑯᓪᓗ ᐃᓅᑦᑎᐊᕐᓂᕐᓄᑦ.

ᐊᖑᓇᓱᒃᑕᐅᔪᑦ ᓂᖀᑦ ᑎᒥᓄᑦ ᐱᐅᓪᓚᒃᑐᑦ, ᕕᑕᒥᓐᖃᖅᖢᑎᒃ ᐊ, ᑦ, ᒥᒡᓗ: ᓴᕕᕋᔭᒃᓴᑦ; ᓂᖀᑦ; ᓴᐅᓂᒃᓴᑦ; ᐱᐅᔪᓪᓗ ᐅᖅᓱᑦ-ᐊᑑᑎᖃᑦᑎᐊᖅᖢᑎᒡᓗ ᐃᓄᖕᓂᒃ ᖃᓄᐃᖏᑎᑦᑎᓂᕐᓄᑦ.

ᓄᓇᓖᑦ ᖃᓄᐃᖏᓐᓂᕐᓄᑦ ᑭᒡᒐᖅᑐᖅᑎᖏᑦ ᐊᓰᓪᓗ ᐃᓄᐃᑦ ᖃᐅᔨᒪᔨᑕᐃᑦ ᐅᖃᑦᑎᐊᖅᓯᒪᔪᑦ ᐊᖑᓇᓱᒃᑕᐅᔪᑦ ᓂᖀᑦ ᑐᙵᕕᐅᓪᓚᖕᒪᑕ ᓂᕿᖃᕈᓐᓇᕐᓂᕐᓄᑦ ᓂᕿᓂᒡᓗ ᐊᐅᓚᑦᑎᓂᐅᓂᕐᓄᑦ,” ᐊᐃᒥ ᐅᖃᖅᑐᖅ. “ᐊᑑᑎᖃᑦᑎᐊᖅᑐᖅ ᓴᙲᒃᑎᒋᐊᕐᓗᒋᑦ ᑎᒥᐅᑉ ᓴᐳᔾᔨᔾᔪᑎᖏᑦ ᖃᓂᒪᐃᓐᓇᖅᑖᖏᔾᔪᑎᒋᓗᒋᓪᓗ ᑐᓴᐅᒪᔭᐅᑎᓪᓗᒋᓪᓗ ᖃᓄᐃᖏᑦᑎᐊᕐᓃᑦ.”

ᐊᐃᒥ ᑳᒋ ᐊᐃᒡᒐᕼ ᓴᖑᔭᓗ ᓇᑦᑎᕐᒥᒃ ᐆᑦᑎᔫᒃ ᐊᐅᓪᓚᖅᓯᒪᓪᓗᑎᒃ ᐅᐊᖕᓇᖓᓂ ᑲᖏᖅᑐᒑᐱᐅᑉ, ᓄᓇᕘᒥ.

ᐊᔾᔨ : ᓴᓐᑐᕋ ᔅᑕᑦᓂᒃ, ᓂᕿᕗᑦ ᓯᓚᓄᓪᓗ ᐊᓯᔾᔨᐸᓪᓕᐊᔪᓄᑦ ᖃᐅᔨᓴᕐᓂᕐᓄᑦ ᐱᓕᕆᓂᖓᑦ

ᖃᖅᑯᐊᖅᑐᖅ ᓄᑖᒥᒃ ᐊᑲᐅᙱᓕᐅᕈᑎᒥᒃ: ᑮᒋᐊᑦ ᐸᒥᐅᖅᑑᑦ ᓅᑉᐳᑦ ᓄᓇᑐᐃᓐᓇᒧᑦ ᐅᐊᖕᓇᖓᓄᑦ ᐃᓅᕕᒃᑦ

ᓗᐊᕆᐊᐃ ᑐᒡᒐᓄᑦ ᓇᖅᓴᐅᑉ ᑰᖓᓂ ᖃᐅᔨᓴᕐᕕᒃ, 50 ᑭᓛᒥᑕᓄᑦ ᐅᐊᖕᓇᖓᓃᑦᑐᖅ ᐃᓅᕕᐅᑉ, ᓄᓇᑦᑎᐊᖅ, ᐃᓂᒋᔭᐅᔪᖅ ᐊᑯᓂᐅᓛᒧᑦ ᖃᐅᔨᓴᖅᑕᐅᔪᓄᑦ ᐃᒻᒥᕐᕕᐅᔪᓄᑦ ᑲᓇᑕᐅᑉ ᐅᑭᐅᖅᑕᖅᑐᐊᓂ.

“ᐸᕐᓇᓚᐅᖅᓯᒪᖏᑦᑐᒍᑦ 30 ᐊᕐᕌᒍᑦ ᐅᖓᑖᓄᑦ ᖃᐅᔨᓴᕐᕕᐅᖕᒪᑦ. ᑕᐃᒪᐃᓕᓚᐅᖅᑐᖅ ᖃᖓᒥᑦ ᐊᓂᒍᖅᑐᒥᑦ,” ᐅᖃᖅᑐᖅ ᐃᒦᑦ ᓅᒃᑕᕐᓂᖏᓐᓄᑦ ᖃᐅᔨᓴᖅᑎ ᐱᓕᑉ ᒪᕐᔅ, ᐃᓕᓴᐃᔨ ᕕᐅᕗᕆᑦ ᓗᐊᕆᐊᐃ ᓯᓚᑦᑐᖅᓴᕐᕕᒡᔪᐊᕐᒥ ᑲᓇᑕᒥᓗ ᖃᐅᔨᓴᕐᓂᕐᓄᑦ ᐃᒃᓯᕙᐅᑕᐅᓪᓗᓂ ᑯᑦᓚᓐ ᐃᒦᑦ ᓅᒃᑕᕐᓂᖏᓐᓄᑦ ᖃᐅᔨᓴᕐᓂᕐᓄᑦ.

ᐃᒻᒥᕐᕕᐅᔪᑦ ᐃᓂᐅᔪᖅ ᒪᖁᒃᑕᓕᒫᓄᑦ ᐊᐳᑎᓂᓪᓘᓐᓃᑦ ᐊᐅᒃᑐᓂᑦ ᑰᒃᖢᑎᒃ ᑕᓯᒃᑯᑦ ᑰᒃᑯᓪᓘᓐᓃᑦ ᑰᕋᓛᖏᓐᓄᓪᓗ, ᑕᕆᐅᓕᐊᖅᑐᒧᑦ ᑎᒥᒧᑦ, ᑕᓯᖅᑎᑐᑦ, ᑕᕆᐅᖅᑎᑐᓪᓘᓐᓃᑦ. ᑕᕝᕙᓂᓕ, ᑐᒡᒐᓄᑦ ᓇᖅᓴᐅᑉ ᐃᒻᒥᕐᕕᖓ ᑯᕕᓲᖑᖕᒪᑦ ᑲᓇᖕᓇᕐᒧᑦ, ᐃᑳᖅᖢᒍ ᐃᓅᕕᖕᒥᑦ ᑐᒃᑑᔮᖅᑐᕐᒧᑦ ᐊᖅᑯᑎ ᑯᕕᓪᓗᓂᓗ ᕼᐊᔅᑭ ᑕᓯᕐᓄᑦ.

1991ᒥ, 60-ᓴᓂᒧᑦ ᑐᑭᒧᑦ ᑭᓛᒥᑕᓄᑦ ᐊᖏᓂᓕᒃ ᐃᒻᒥᕐᕕᐅᔪᖅ ᓂᕈᐊᖅᑕᐅᓚᐅᖅᑐᖅ ᓈᒫᑎᐊᖅᑐᑎᑐᑦ ᖃᐅᔨᓴᕐᕕᒃᑐᑦ ᐃᒦᑦ ᓅᒃᑕᕐᓂᖏᓐᓄᑦ, ᓇᐹᖅᑐᖃᖏᑦᑐᒥ ᐆᒪᔫᖃᑎᒌᖏᑦᑐᒃᑯᕕᖕᓂ ᐅᐊᖕᓇᖓᓂ ᓇᐹᖅᑐᓖᑦ. ᐊᓂᒍᖅᑐᓂ 30 ᐊᕐᕌᒍᓂ, ᖃᐅᔨᓴᕐᓃᑦ ᐃᓚᒋᐊᓚᐅᖅᑐᑦ ᐃᒦᑦ ᓅᒃᑕᕐᓂᖏᓐᓂᑦ ᐱᖃᓯᐅᑎᔭᐃᓐᓇᕆᓕᖅᖢᒋᑦ ᐃᓗᐃᑦᑐᑦ ᐅᑭᐅᖅᑕᖅᑐᓂ ᐃᒻᒥᕐᕕᓕᒫᑦ. ᑖᒃᑯᐊ ᐱᖃᓯᐅᔾᔨᔪᑦ ᑕᑯᓇᖕᓂᕐᓂᒃ ᐊᓯᔾᔨᖅᑐᓂᒃ ᓯᓚᓂ, ᐊᐳᑎᓂ, ᑰᖕᓂᕐᓂ, ᐱᕈᖅᑐᓂ, ᐊᐅᒃᑐᓂ ᓄᓇᐃᑦ ᓯᕐᒥᖏᓐᓂᑦ, ᐅᖅᑰᓯᓇᖅᑐᓄᑦ ᐳᔪᕐᓄᑦ, ᐊᒻᒪᓗ… ᑎᑭᑦᑐᓄᑦ ᐲᕙᐃᑦ.

ᑲᓇᑕᐅᑉ ᐊᖏᓛᖓ ᐊᕕᙵᐅᔭᖓ ᐃᓂᖃᒐᔪᒃᑐᖅ ᓇᐹᖅᑐᓕᖕᓂ. ᑭᓯᐊᓂ ᑎᑭᖦᖢᒍ 2007, ᖃᐅᔨᓴᖅᑏᑦ ᑕᑯᓚᐅᖏᑦᑐᑦ ᐲᕙᓂᒃ ᑐᖕᒥᕌᑦ ᓇᖅᓴᖓᓂ, 68° ᐅᐊᖕᓇᕐᒦᑦᑐᖅ.

“ᓇᐹᖅᑐᖃᖏᑦᑐᕐᓘᓐᓃᑦ ᖃᓂᒋᔮᓂ ᖃᐅᔨᓴᕐᕕᑦᑕ,” ᐅᖃᖅᑐᖅ ᐊᓕᒃᔅ ᕗᒐᓪ, ᖃᐅᔨᓴᕐᓂᕐᓄᑦ ᐃᓚᐅᔪᖅ ᐊᐅᓚᑦᑎᓲᖅ ᐊᐅᓪᓚᖅᓯᒪᔪᕐᓄᑦ ᖃᐅᔨᓴᕐᓂᕐᓂᑦ ᑐᖕᒥᕌᑦ ᓇᖅᓴᖓᓂ . “ᓇᐹᖅᑐᖅᑕᖃᖏᑦᑐᖅ, ᓴᐳᑎᓕᐅᓲᑦ ᓇᐹᖅᑐᕋᓛᓄᑦ.”

ᓇᐹᖅᑐᖃᖏᓐᓂᖓ ᓄᖅᑲᕈᑕᐅᓯᒪᖏᑦᑐᖅ ᐲᕙᓄᑦ ᑕᒪᐅᙵᕐᓗᑎᒃ. ᐊᓕᒃᔅ ᐅᖃᕐᒪᑦ, ᐲᕙᐃᑦ ᐊᔪᙱᓪᓚᖕᒪᑕ ᓴᐳᑎᓕᐅᖅᖢᑎᒃ ᐃᒡᓗᒥᓂᒡᓗ ᓇᐹᖅᑐᕋᓛᓂᑦ, ᐱᑕᖃᓪᓚᒃᖢᑎᒡᓗ ᑕᒫᓂ. ᑖᒃᑯᐊ ᐱᕈᖅᑐᑦ ᑕᒫᓃᓚᐅᖅᑐᑦ 1910ᓂᑦ, ᐊᑯᓂᐊᓗᒃ ᐲᕙᑕᖃᓚᐅᙱᑎᓪᓗᒍ.

“ᐲᕙᐃᑦ ᐱᕐᔪᐊᖑᔪᑦ,” ᕕᐅᓪ ᐅᖃᖅᑐᖅ. “ᐃᓱᒫᓗᓪᓚᒃᑐᑦ ᐱᕙᐃᑦ ᖃᓄᐃᓐᓂᐊᕐᒪᖔᑕ ᑕᒪᑐᒧᖓ ᓄᓇᒧᑦ, ᑕᓯᕐᓄᑦ, ᐃᖃᓗᐃᑦ ᐃᓂᖏᓐᓄᑦ, ᐊᓯᓄᓪᓗ.”

ᐲᕙᐃᑦ ᑐᕌᖓᔭᐅᔪᑦ ᐊᖏᔪᒧᑦ ᐱᓕᕆᔭᐅᔪᒧᑦ ᑲᓇᑕᒧᑦ-ᐃᓄᐃᑦ ᓄᓇᖓᓄᑦ-ᐳᕆᑕᓐᒧᑦ (CINUK

ᐅᑭᐅᖅᑕᖅᑐᒥ ᖃᐅᔨᓴᕐᓂᕐᓄᑦ ᐱᓕᕆᔭᖓᓄᑦ. ᐱᓕᕆᔭᖓᑦ ᑲᑐᔾᔭᐅᔪᖅ ᐃᓅᕕᐊᓗᐃᑦ ᑲᑐᔾᔨᔪᑦ ᐱᓕᕆᔨᖓᓄᑦ ᐃᖃᓗᒐᓱᖕᓂᕐᓄᓪᓗ ᑲᑐᔾᔭᐅᔪᓄᑦ ᐊᐅᓚᑦᑎᓂᕐᓄᑦ ᑲᑎᒪᔨᖏᓐᓄᑦ.

ᑲᓇᑕᒧᑦ-ᐃᓄᐃᑦ ᓄᓇᖓᓄᑦ-ᐳᕆᑕᓐᒧᑦ ᐱᓕᕆᔭᐅᔪᖅ ᑐᑭᓯᓇᓱᒃᑐᑦ ᐅᓄᕐᓂᖏᓐᓂᒃ ᐲᕙᐃᑦ ᑕᐅᕙᓂ ᖃᓄᕐᓗ ᐊᒃᑐᐃᖕᒪᖔᑕ ᑕᓯᕐᓂᒃ, ᐆᒪᔫᖃᑎᒌᖏᑦᑐᓂᒃ, ᐃᒦᑦ ᓅᓐᓂᖏᓐᓂᒃ ᓄᓇᐃᓪᓗ ᓯᕐᒥᖏᓐᓂᒃ.

“ᐊᓯᔾᔨᖅᑐᑦ ᐅᑭᐅᑉ ᐊᐳᑎᖏᓐᓂ ᑕᓯᕐᓂ ᐊᓯᔾᔩᓲᖅ ᐃᔾᔪᓂᖓᓂᒃ ᑕᓯᐅᑉ ᓯᑯᐊᓂᒃ. ᐃᒪᖃᕐᓂᖅᓴᐅᒍᓂ ᑕᓯᐅᑉ ᓯᑯᐊᑕ ᐊᑖᓂ ᑐᑭᖃᖅᐳᖅ ᐲᕙᐃᑦ ᐃᓂᖏᑦ ᑕᓯᕐᓂ ᐱᐅᓂᖅᓴᐅᑐᐃᓐᓇᕆᐊᓕᒃ, ᑭᓯᐊᓂ ᖃᐅᔨᒪᓪᓚᑦᑖᖏᑦᑐᒍᑦ,” ᐅᖃᖅᑐᖅ ᕕᐅᓪ.

ᐊᓕᒃᔅ ᐅᖃᖅᑐᖅ ᐊᖑᓇᓱᒃᑏᑦ ᓂᕐᔪᑏᑦ ᑕᒪᐅᙵᖅᑎᑦᑎᑐᐃᓐᓇᕆᐊᓖᑦ ᐲᕙᓂᒃ ᐅᑭᐅᖅᑕᖅᑐᕐᒨᓂᖅᓴᖅ. "ᐅᖅᑰᓂᖓ ᓈᒻᒪᖕᒪᑦ ᐊᓐᓇᐅᒪᔪᓐᓇᕐᒪᑕ ᐊᔪᕐᕕᒋᓚᐅᖅᑕᒥᓂ.”

“ᓱᓕ ᖃᐅᔨᒪᓪᓚᑦᑖᖏᑦᑐᒍᑦ ᓱᓕ” ᐅᖃᖅᑐᖅ ᕕᐅᓪ.

30 ᐊᕐᕌᒍᓂ ᖃᐅᔨᓴᖅᑕᓂᑦ ᖃᐅᔨᒪᔭᐅᔪᖃᖅᖢᑎᒃ ᑐᖕᒥᕌᑦ ᓇᖅᓴᖓᓂ, ᖃᐅᔨᓴᖅᑏᑦ ᐋᖅᑭᒃᓯᙳᐊᕈᓐᓇᖅᑐᑦ ᓇᓚᐅᑦᑖᕐᓗᒋᓪᓗ ᐊᒃᑐᐃᓂᖏᑦ ᓯᓚᐃᑦ ᐊᓯᔾᔨᕐᓂᖏᓐᓂᑦ ᑕᕝᕗᖓ. ᕕᐅᓪ ᐅᖃᖅᑐᖅ ᑕᐃᒪᓐᓇ ᐃᑲᔫᑕᐅᔪᖅ ᑐᑭᓯᔾᔪᑕᐅᓪᓗᓂ “ᖃᓄᐃᓯᒪᕙᑦ ᐊᓂᒍᖅᑐᓂ 30 ᐊᕐᕌᒍᓂ ᖃᓄᐃᓐᓂᐊᖅᐸᓪᓗ ᐊᒡᒋᖅᑐᓂ 50ᓂᑦ 100 ᐊᕐᕌᒍᓄᑦ.”

ᑭᓯᐊᓂ, ᓂᕆᐅᒋᔭᐅᓚᐅᖏᑦᑐᑦ ᐲᕙᐃᑦ ᑎᑭᓐᓂᐊᕐᓂᖏᑦ.

ᐲᕙᐃᑦ ᐊᑕᐅᓯᑐᐊᖑᔪᑦ ᐅᓄᖅᑐᓂᑦ ᐊᓯᔾᔨᖅᑐᓂᑦ ᐅᑭᐅᖅᑕᖅᑐᒥ ᓇᐹᖅᑐᖃᖏᑦᑐᓂ ᖃᐅᔨᓴᖅᑎᓄᑦ ᑐᖕᒥᕌᑦ ᓇᖅᓴᖓᑕ ᑰᖕᒥ ᖃᐅᔨᓴᖅᑕᐅᔪᓂᑦ. ᕕᐅᓪ ᐅᖃᒃᑲᓐᓂᖅᐳᖅ 34 ᐊᕐᕌᒍᓂ ᐊᓂᒍᖅᑐᓂ ᖃᓄᐃᑦᑐᓂ, ᓄᓇ ᓴᖅᑭᔮᖅᑎᑦᑎᕗᖅ ᐊᔾᔨᐅᖏᑦᑐᓂᒃ ᐅᑭᐅᖅᑕᖅᑐᓂ ᐳᐃᒍᔾᔭᐃᖅᓯᒪᔪᕐᓂᒃ ᖃᐅᔨᓴᖅᑎᓂᑦ ᐊᑐᖅᑕᐅᔪᓄᑦ ᑲᓇᑕᒥ ᓄᓇᕐᔪᐊᕐᒥᓗ.

ᓯᕗᓪᓕᖅᐹᖅ ᖃᐅᔨᓴᕐᓂᕐᓄᑦ ᑕᖕᒫᕐᕕᐅᔪᖅ ᑐᖕᒥᕌᑦ ᓇᖅᓴᖓᓂ 1991ᒥ.

ᐊᔾᔨ : ᕕᓕᑉ ᒪᕐᔅ

ᖃᖓᑕᓲᕋᓛᒥᑦ ᑕᑯᒃᑕᐅᔪᖅ ᓗᐊᕆᐊᐃ ᑐᖕᒥᕌᑦ ᓇᖅᓴᖓᑕ ᑰᖓᓂ ᖃᐅᔨᓴᕐᕕᐅᑉ ᑕᖕᒫᕐᕕᖓᓂ, ᐊᐅᔭᕐᒥ 2024. ᕼᐊᔅᑭ ᑕᓰᑦ ᑐᓄᐊᓂ ᑕᑯᒃᓴᐅᔪᑦ.

ᐊᔾᔨ : ᐊᓕᒃᔅ ᕗᒍᓪ

ᖃᐅᔨᓴᖅᑏᑦ ᐃᓕᓴᐱᑦ ᐳᕆᑉ ᕼᐊᑦᓕ ᑕᒻᑉᓴᓐᓗ ᐅᖃᐅᓯᓖᑦ ᓯᓚᑦᑐᖅᓴᕐᕕᒡᔪᐊᖓᑕ ᑯᐸᐃᒃ ᒪᓐᑐᕆᐊᓪᑉ ᓯᓚᓐᓂᐊᕈᑎᖏᑕ ᐋᖅᑭᒃᓯᒪᓂᖏᓐᓄᑦ ᑐᖕᒥᕌᑦ ᓇᖅᓴᖓᓂ.

ᐲᕙᐃᑦ ᓴᐳᑎᖓ ᑐᖕᒥᕌᑦ ᓇᖅᓴᖓᑕ ᑰᖓᓂ,

Ajji : ᑎᐅᓪᓴᓐ ᑲᕆᔭᕙᓴᒻ, CINUK ᐱᓕᕆᔭᖓᑦ BARIN’

ᖃᐅᔨᓴᕐᓗᒋᑦ ᓄᓇᓖᑦ ᖁᐊᒃᑯᕕᖏᑦ ᓂᕿᖃᕈᓐᓇᕐᓄᑦ

ᐊᐃᒥ ᔪᕆᔅ, MSc ᐃᓕᓐᓂᐊᖅᑎ

ᕙᑐᓗ, ᐃᓕᓐᓂᐊᕐᕕᒃ ᐃᓄᓕᒫᑦ ᖃᓄᐃᖏᓐᓂᓐᓄᑦ ᑭᒡᓕᓯᓂᐊᕐᓂᕐᓄᑦ

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓂᑦ ᐅᑭᐅᖅᑕᖅᑐᒥᐅᑕᖅ ᐃᓕᓐᓂᐊᕐᓂᕐᓄᑦ ᑮᓇᐅᔭᖅᑖᖅᑐᖅ

ᐊᖑᓇᓱᒃᑕᐅᔪᑦ ᓂᖀᑦ ᑐᙵᕕᐅᔪᑦ ᐃᓄᕕᐊᓗᐃᑦ ᐃᓅᓯᖃᑦᑎᐊᕐᓂᖏᓐᓄᑦ ᑭᓇᐅᓂᖏᓐᓄᓪᓗ, ᐊᓯᓄᑦ ᓂᕿᑖᖅᑎᑦᑎᓃᑦ ᐱᕐᔪᐊᖑᐃᓐᓇᐅᔭᖅᓯᒪᔪᑦ ᐃᓄᕕᐊᓗᐃᑦ ᐃᓕᖅᑯᓯᑐᖃᖏᓐᓄᑦ.

ᐅᑭᐅᖅᑕᖅᑐᒥ ᓄᓇᓕᖕᒥᐅᑦ ᐊᖑᓇᓱᓲᑦ, ᐃᖃᓗᒐᓱᓲᑦ, ᑭᒍᑕᖏᕐᓇᖅᑕᓲᓪᓘᓐᓃᑦ ᐊᑦᑕᕐᓇᖏᑦᑐᓂ ᑐᖅᑯᕈᓐᓇᖅᑕᖏᑦ ᐅᑭᐅᖅᑕᖅᑐᒥᑦ ᓂᕿᓂ, ᓄᓇᓕᖕᓂ ᐊᖑᓇᓱᒃᑕᐅᔪᓄᑦ ᖁᐊᒃᑯᕕᖕᓄᑦ ᐊᐅᓚᑕᐅᔪᒧᑦ ᐊᑐᖅᑎᑕᐅᔪᒧᓪᓗ ᕼᐊᒪᓚᓄᑦ, ᓄᓇᓕᖕᓄᑦ, ᓄᓇᓕᖕᓂᓘᓐᓃᑦ ᑎᒥᒧᑦ. ᓄᓇᓕᖕᓂ ᖁᐊᒃᑯᕖᑦ ᐃᓄᕕᐊᓗᐃᑦ ᓄᓇᑖᕐᕕᖏᓐᓂ ᐊᑐᖅᑕᐅᔪᑐᖃᕐᓂᑦ ᓂᓚᖕᓂᑦ ᐃᒡᓗᓕᐅᖅᓯᒪᔪᕐᓂᑦ ᐅᓪᓗᒥᓯᐅᑎᓄᑦ ᐃᓯᒐᒃᓴᓄᑦ ᖁᐊᒃᑯᕕᖕᓄᑦ ᓯᕿᓂᕐᓄᑦ ᓴᙲᒃᑎᓴᐅᑎᓕᖕᓄᑦ. ᐊᑐᓂ ᓄᓇᓕᒃ ᐸᕐᓇᓲᖑᕗᑦ, ᐊᐅᓚᑦᑎᓲᖑᕗᑦ ᐊᑐᖅᖢᒋᓪᓗ ᓄᓇᓕᖏᑕ ᖁᐊᒃᑯᕕᖏ ᐊᔾᔨᒌᖏᑦᑐᑎᒍᑦ.

“ᓄᓇᓕᖕᓂ ᖁᐊᒃᑯᕖᑦ ᐊᑑᑎᖃᑦᑎᐊᖅᑐᑦ ᐃᓕᖅᑯᓯᑐᖃᓄᑦ, ᐃᓅᓯᖃᕈᓯᕐᓄᑦ, ᐊᖑᓇᓱᒃᑕᐅᔪᓄᓪᓗ ᓂᕿᓄᑦ ᐱᔪᓐᓇᕐᓂᕐᓄᑦ ᐅᑭᐅᖅᑕᖅᑐᒥ ᓄᓇᓕᖕᓂ, ᑖᓐᓇᓗ ᖃᐅᔨᓴᕐᓂᖅ ᐊᑑᑎᖃᓪᓚᒍᓐᓇᖅᑐᖅ ᓄᓇᓕᖕᓄᑦ ᓴᖅᑭᔮᖅᑎᓪᓗᒍ ᑖᓐᓇ ᐱᕐᔪᐊᖑᓂᖅ ᑮᓇᐅᔭᖃᖅᑎᑦᑎᔨᓄᑦ ᐊᑐᐊᒐᓕᐅᖅᑎᓄᓗ,” ᐊᐃᒥ ᐅᖃᖅᑐᖅ.

ᔭᓗᓇᐃᕝᒥᐅᖅ ᐊᐃᒥ ᔪᕆᔅ ᖃᐅᔨᓴᕐᓂᕐᓄᑦ ᐱᓕᕆᔭᖓ ᑕᑯᓇᒃᑐᖅ ᖃᓄᖅ ᖁᐊᒃᑯᕖᑦ ᑐᒃᑑᔮᖅᑐᕐᒥ, ᐸᐅᓚᑕᒃᒥ, ᐃᓅᕕᖕᒥᓗ ᐊᑐᖅᑕᐅᖕᒪᖔᑕ ᓄᓇᓕᖕᒥᐅᓄᑦ.

ᐊᔾᔨ : ᐊᐃᒥ ᔪᕆᔅ ᐃᓗᐊᓃᑦᑐᖅ ᓄᓇᓖᑦ ᖁᐊᒃᑯᕕᐊᓂ ᐃᓅᕕᖕᒥ.

ᓯᕗᓂᕐᒥᑦ ᖃᐅᔨᓴᖅᑎᕗᑦ

ᐊᕐᕌᒍᑕᒫᑦ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑮᓇᐅᔭᖃᖅᑎᑦᑎᓲᑦ ᑭᒡᓕᓯᓂᐊᕐᓂᕐᓂᒃ ᖃᐅᔨᒪᔭᐅᔪᓄᑦ ᐱᓕᕆᓂᕐᓂᒡᓗ ᒪᒃᑯᒃᑐᓄᑦ, ᑕᐃᔭᐅᔪᒥᒃ STEM (ᑭᒡᓕᓯᓂᐊᕐᓃᑦ, ᓴᓇᐅᒐᐃᑦ, ᑭᓱᓕᐅᕐᓃᑦ ᓇᐃᓴᐅᓯᕆᓂᓪᓗ) ᐃᓕᓐᓂᐊᖅᑐᓂ. ᑖᒃᑯᐊ ᐱᓕᕆᓃᑦ ᑐᕌᖓᔪᑦ ᐊᐅᓚᔾᔭᐃᓗᑎᒃ ᐱᔪᒪᓂᕐᓂᒃ ᒪᒃᑯᒃᑐᓂ ᐃᓄᖕᓂ ᐃᓕᓐᓂᐊᕐᓂᕐᓄᑦ ᓄᓇᕐᔪᐊᕐᒥᓄᑦ, ᖃᐅᔨᔪᒪᓕᖅᑎᓪᓗᒋᓪᓗ ᑭᒡᓕᓯᓂᐊᕐᓂᕐᓄᑦ ᖃᐅᔨᓴᕐᓂᕐᓄᑦ ᓄᓇᖃᖅᑳᖅᑐᓪᓗ ᖃᐅᔨᒪᔭᖏᓐᓄᑦ.

ᐱᖓᓱᖓᑦ ᐊᕐᕌᒍᑕᒫᖅᓯᐅᑎ ᒪᑭᒋᐊᖅᑕ STEAM ᐃᓕᓐᓂᐊᕐᓂᖅ, ᐊᐅᓚᑕᐅᔪᖅ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒧᑦ ᐊᐃᕐᕆᓕ 2024ᒥ, ᓯᕗᓪᓕᖅᐹᖑᓚᐅᖅᑐᖅ ᐊᐅᓪᓚᖅᑐᓂ ᐊᕐᕌᒍᒥ. (ᓇᐃᓈᖅᓯᒪᔪᖅ ᑕᐃᒎᓯᖅ STEAM ᐱᖃᓯᐅᔾᔨᔪᖅ ᓴᓇᐅᒐᓂᒃ, ᒪᒃᑯᒃᑐᑦ ᐱᓕᕆᓚᐅᕐᒥᖕᒪᑕ ᓴᓇᐅᒐᓕᐅᖅᖢᑎᒃ). ᑕᓪᓕᒪᓄᑦ ᐅᓪᓗᓄᑦ, 14 ᒪᒃᑯᒃᑐᑦ ᓄᓇᕘᒥᑦ ᐱᕕᖃᓚᐅᖅᑐᑦ ᐱᓕᕆᓗᑎᒃ ᑭᒡᓕᓯᓂᐊᖅᑏᑦ ᖃᐅᔨᓴᖅᑏᓪᓗ ᐱᓕᕆᔭᖏᓐᓂᒃ.“ᐊᑐᕈᓐᓇᕐᓗᒋᑦ ᐃᓂᐅᔪᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥ, ᖃᐅᔨᓴᕐᕕᖕᓄᐊᓪᓚᑦᑖᕈᓐᓇᕐᓗᑎᒃ ᑭᒡᓕᓯᓂᐊᕐᓂᕐᓄᓪᓗ ᖃᐅᔨᓴᕐᓪᑐᐃᒃ, ᐅᐊᖑᓪᓚᒃᑐᖅ ᐃᒻᒥᓄᑦ,” ᐅᖃᖅᑐᖅ ᑯᕆᔅᑐᓪ ᖃᐅᒻᒪᕆᐊᖅ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᑐᐊᒐᓂᒃ ᖃᐅᔨᓴᖅᑎᖓ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓂ. “ᒪᒃᑯᒃᑐᑦ ᐃᒻᒥᓂᒃ ᐊᑐᓚᐅᖅᑐᑦ ᖃᐅᔨᓴᖅᑎᐅᓂᕐᓄᑦ, ᐊᓕᐊᓇᐃᒋᔭᓪᓛᓗᒋᓚᐅᖅᑕᖓᑦ.”

ᑯᕆᔅᑕᓪ ᐊᐅᓚᑦᑎᓚᐅᖅᑐᖅ STEAM ᐊᐅᓪᓚᖅᑐᓄᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᑦ, ᑲᑐᔾᔭᐅᓪᓗᓂ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᑦ, ᓄᓇᕗᑦ ᑐᙵᕕᒃ ᐃᓚᓕᐅᓯᒪᔪᓄᑦ, ᑲᓇᑕᐅᑉ ᐊᓂᕐᓂᖃᖏᑦᑐᓄᑦ ᑎᒥᖓᓄᑦ, ᔅᕼᐊᑦ ᑲᓇᑕ, ᐊᒃᑐᐊ, ᓄᓇᕘᒥ ᐆᒪᔪᓕᕆᓂᕐᓄᑦ ᑲᑎᒪᔨᖏᓐᓄᑦ, ᐱᙳᐊᒃᑯᓐᓄᓪᓗ.

ᐃᓕᓐᓂᐊᖅᑐᑦ ᐃᓚᐅᓪᓗᑎᒃ ᓄᓇᕐᔪᐊᕐᒥ ᐱᓕᕆᔭᐅᓲᓄᑦ ᑭᒡᓕᓯᓂᐊᕐᓂᕐᓄᑦ, ᐱᖃᓯᐅᖦᖢᒋᑦ ᓄᓇᓕᖕᓄᑦ ᑐᙵᔪᓂᒃ ᓇᐅᑦᑎᖅᓱᕐᓂᕐᓂᒃ ᐆᒪᔪᓂᒃ ᐳᐃᒍᔾᔭᐃᖅᖢᒋᓪᓗ ᐆᒪᔪᓅᖓᔪᑦ ᐊᑐᖅᖢᑎᒃ ᖃᐅᔨᔭᐅᔪᓂᑦ ᓄᓇᙳᐊᓕᐅᕈᑎᓂᒃ. ᓴᓇᒋᓪᓗᑎᒃ ᑎᓴᒪᓕᖕᓂᒃ ᓈᒻᒪᒃᑐᓂᒃ ᐅᑭᐅᖅᑕᖅᑐᒧᑦ.

ᐃᓕᓪᓗᓂ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᐊᑑᑎᖃᑦᑎᐊᓚᐅᖅᑐᖅ ᑕᖕᒫᖅᓯᒪᔪᕐᓄᑦ. ᐃᓐᓇᐃᑦ ᐅᓂᒃᑳᖃᑦᑕᓚᐅᖅᑐᑦ ᕿᒪᒃᑕᑦᑎᓐᓐᓂ ᖃᓅᓚᐅᖅᑐᓂᒃ ᐃᖃᓗᒃᑑᑦᑎᐊᕐᒥ ᓄᓇᒋᔭᐅᔪᓄᓪᓗ ᐃᓚᒌᓄᑦ ᑕᐅᕙᓂ. ᐊᑐᐃᓐᓇᖏᑦᑐᒧᑦ ᐱᕕᖃᓚᐅᖅᑐᑦ ᒪᒃᑯᒃᑐᑦ ᖁᓪᓕᕐᒥᒃ ᐱᓕᕆᔪᓐᓇᖅᑎᓪᓗᒋᑦ. ᒪᒃᑯᒃᑐᑦ ᐃᓕᓚᐅᕐᒥᔪᑦ ᐃᓄᐃᑦ ᓇᐃᓴᐅᓯᕆᔾᔪᑎᖏᓐᓂᒃ ᓴᓇᔭᐅᔪᓄᑦ ᐃᓄᑉᐱᐊᖅ ᐊᑯᓐᓂᖅᓱᖅᑐᓄᑦ ᐃᓕᓐᓂᐊᖅᑎᓄᑦ 19190ᓂ. ᑕᖕᒫᖅᓯᒪᔪᑦ ᐃᓱᓕᔾᔪᑎᖃᖅᖢᑎᒃ ᒪᒃᑯᒃᑐᑦ ᐸᖅᑭᔨᖏᑦ ᐱᓕᕆᓂᕐᒧᓪᓗ ᑲᑐᔾᔨᖃᑕᐅᔪᑦ ᐃᓚᐅᕝᕕᐅᑦᑎᐊᖅᑐᒥᒃ ᓂᕆᕕᒡᔪᐊᖅᑎᑦᑎᓚᐅᖅᑐᑦ ᓄᓇᓕᖕᒥᐅᓂᒃ.

ᐃᓚᐅᔪᑦ ᒪᑭᒋᐊᖅᑕ 2024 STEAM ᑕᖕᒫᖅᑐᓄᑦ ᖃᐅᔨᓴᕐᕕᖕᒥ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥ.

ᐊᔾᔨ : ᒪᑭᒋᐊᖅᑕ ᐃᓄᐃᑦ ᐊᔪᕈᓐᓃᖅᓴᓂᕐᓄᑦ ᑯᐊᐳᕇᓴᖓᑦ

ᓱᓕᓗᒧᓪᓗ STEM ᑕᖕᒫᖅᓯᒪᔪᕐᓄᑦ ᐊᖓᔪᒃᖠᓄᑦ ᐃᓕᓐᓂᐊᖅᑎᓄᑦ ᒪᒃᑯᒃᑐᓄᑦ, ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖓ ᑐᙵᓴᐃᓚᐅᖅᑐᑦ ᐳᖅᑐᓂᓕᖕᓂᒃ 2, 3, 6ᓂᒡᓗ ᓱᕈᓯᓂᒃ ᑯᓪᓕᒃ ᐃᓕᕼᐊᒃᕕᒃ ᓱᕈᓯᓄᑦ ᐃᖃᓗᒃᑑᑦᑎᐊᕐᒥ. ᓱᕈᓰᑦ ᑕᑯᓇᓚᐅᖅᑐᑦ ᖃᐅᔨᓴᕐᕕᖕᓂᒃ ᑕᑯᓇᒃᖢᑎᒡᓗ ᑕᑯᒐᔪᒃᑕᓂᒃ ᐊᖏᓐᓇᖅᑐᓄᑦ, ᓲᕐᓗᑎᑐᑦ ᐅᔭᕋᒃᑎᑐᑦ, ᐸᓂᖅᑐᑦ ᐱᕈᖅᑐᑦ ᖁᐱᕐᕈᓂᒡᓗ.

ᐃᓕᓐᓂᐊᖅᑏᑦ ᐃᓚᐅᓚᐅᕐᒥᔪᑦ ᓱᕉᖏᑦᑐᓄᑦ ᓄᑭᓄᑦ ᑲᑎᒪᔪᓄᑦ ᐃᓕᖦᖢᑎᒃ ᖃᓄᖅ ᐊᓄᕆᓄᑦ ᓯᕿᓂᕐᓄᓪᓗ ᓄᑭᓕᐅᕈᑏᑦ ᐱᓲᖑᖕᒪᖔᑕ. ᑕᐃᒃᑯᐊ ᑕᕝᕙ ᓄᓇᙳᐊᓕᐅᓕᕆᓪᓗᑎᒃ ᐃᖃᓗᒃᑑᑦᑎᐊᕐᒥᒃ ᐅᖃᐅᓯᕆᓪᓗᒋᓪᓗ ᓇᓂ ᐱᐅᓛᖑᖕᒪᖔᑕ ᐃᓕᓯᕕᒋᔭᕆᐊᒃᓴᖅ ᐊᓄᕆᓄᑦ ᓄᑭᓕᐅᕈᑎᓂᒃ ᓄᓇᓕᖕᓄᑦ ᐃᑲᔫᑕᐅᓂᐊᖅᑐᓄᑦ ᓄᑭᓄᑦ.

ᐳᖅᑐᓂᓖᑦ 6ᒧᑦ ᐃᓕᓐᓂᐊᖅᑐᑦ ᑎᒍᒥᐊᖅᑐᑦ ᒥᑭᑦᑐᑯᓗᖕᓂᒃ ᓯᕿᓂᕐᒧᑦ ᓄᒃᑭᒃᓴᐅᑎᓂᒃ ᑕᐅᑐᒃᖢᑎᒡᓗ ᖃᓄᖅ ᓯᕿᓂᕐᒧᑦ ᐊᐅᓚᑕᐅᖕᒪᖔᑕ ᒥᑭᑦᑐᑦ ᐊᓄᕌᕈᑏᑦ ᐊᑕᔪᑦ ᓄᒃᑭᒃᓴᐅᑎᓄᑦ.

ᐃᓕᓐᓂᐊᖅᑐᑦ STEAM ᑕᖕᒫᖅᓯᒪᔪᓂ ᐱᓇᓱᐊᕈᓯᓕᒫᕐᒧᑦ ᐊᐅᓚᓚᐅᖅᑐᑦ ᔫᓂᒥ. ᐃᓕᓐᓂᐊᖅᑐᑦ ᐊᐅᓚᑕᐅᓪᓗᑎᒃ ᑕᒃᑐ ᓱᓴᓇ ᔭᐃᑯᑉᔅᒧᑦ, ᐃᓕᓴᐃᔨ ᓯᓚᑦᑐᖅᓴᕐᕕᒡᔪᐊᖓᓄᑦ ᒍᐃᓪᕝ, ᖃᐅᔨᑎᖦᖢᓂᒋᑦ ᒪᒃᑯᒃᑐᑦ ᓯᓚᒥ ᐃᓕᓴᕐᕕᖕᒧᑦ. ᒪᒃᑯᒃᑐᑦ ᑕᐅᑐᐃᓐᓇᓕᖅᑐᑦ, ᑕᓚᕖᓴᐅᖏᑦᑐᓄᑦ, ᑭᓯᐊᓂ ᐅᐸᒃᑐᓄᑦ ᖃᐅᔨᓴᖅᑎᓄᑦ, ᐸᕐᓇᒃᑎᓄᑦ ᐱᓕᕆᖃᑎᒌᓄᑦ, ᐃᓕᓴᐃᔨᐅᖃᑕᐅᔪᓄᑦ ᓄᓇᓕᖕᒥᐅᓄᓪᓗ, ᐅᖃᐅᓯᕆᓪᓗᓂᒋᑦ ᖃᐅᔨᒪᔭᓂ ᑭᓱᕈᓘᔭᕐᓄᑦ. ᐃᓕᓚᐅᖅᑐᑦ ᖃᓂᑦᑐᓂ ᐱᕈᖅᑐᓂᒃ, ᑎᖕᒥᐊᓂᒃ, ᐊᔾᔨᓕᐅᕆᓂᕐᓂᒃ, ᐊᖑᓇᓱᖕᓂᕐᓂᒃ ᐃᖃᓗᒐᓱᖕᓂᕐᓂᒃ, ᑲᓅᕐᓂᕐᓂᒃ, ᐱᓯᒃᑕᕐᓂᕐᓂᒃ ᑭᒡᓕᓯᓂᐊᕐᓂᕐᓂᒡᓗ ᓄᓇᓂ ᐱᓕᕆᓂᕐᓂᒃ, ᖁᐱᕐᕈᓂᒃ ᑕᕆᐅᖑᖏᑦᑐᓂᓗ ᐃᒪᕐᓂ ᐆᒪᔪᕐᓄᑦ. ᐃᓚᐅᓪᓗᑎᒃ ᓄᓇᓕᖕᓂ ᐃᓕᓴᐃᔩᑦ ᐃᓐᓇᐃᓪᓗ, ᐃᓕᓐᓂᐊᖅᑐᑦ ᑲᑎᑦᑎᓚᐅᖅᑐᑦ ᑭᒡᓕᓯᓂᐊᕐᓂᕐᓂᒃ ᓄᓇᓕᖕᒥᐅᑦ ᖃᐅᔨᒪᔭᑐᖃᖏᓐᓂᒃ.

ᐋᒡᒌᓯ 2024ᒥ, ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖓ ᐊᐅᓚᑦᑎᓚᐅᖅᑐᑦ ᓯᕗᓪᓕᖅᐹᒥᒃ ᐃᓕᑉᐸᓪᓕᐊᔪᓐᓇᖅᑐᓄᑦ ᐊᐅᓚᓲᓄᑦ ᐃᓕᓐᓂᐊᕐᓂᕐᓂᒃ ᐃᖃᓗᒃᑑᑦᑎᐊᕐᒥᐅᑦ ᓱᕈᓰᑦ ᐃᓚᐅᓪᓗᑎᒃ ᖃᔅᓯᓄᑦ ᐅᓪᓗᓄᑦ ᐃᓕᑉᐸᓪᓕᐊᔪᓐᓇᖅᑐᓄᑦ ᐊᐅᓚᓲᓂᒃ ᓴᓇᓂᕐᓄᑦ ᐊᐅᔭᒃᑯᑦ ᐃᓕᓐᓂᐊᕐᓂᕐᓂ. ᐃᓕᓐᓂᐊᖅᑐᑦ ᐊᑐᐃᓐᓇᐅᑎᑦᑎᓚᐅᖅᑐᑦ ᐊᓕᐊᓇᐃᑦᑐᓂᒃ, ᐃᓕᓐᓇᖅᑐᓂᒃ ᐃᓚᐅᖁᔨᓪᓗᑎᒡᓗ ᑲᑐᔾᔨᖃᑎᒌᖕᓂᕐᓄᑦ ᑭᓱᕉᔭᓕᐅᕈᓐᓇᕐᓂᕐᓄᓪᓗ ᒪᒃᑯᒃᑐᓄᑦ ᐃᓚᐅᔪᓄᑦ.

ᐱᓕᕆᓪᓚᒃᑐᖅ ᐃᓚᐅᔪᖅ ᐃᓕᑉᐸᓪᓕᐊᔪᓐᓇᖅᑐᓄᑦ ᐊᐅᓚᓲᓄᑦ ᐃᓕᓐᓂᐊᖅᑐᓂ.

ᐊᐅᔭᑕᒫᑦ, 15 ᐊᖓᔪᒃᖠᓄᑦ ᐃᓕᓐᓂᐊᖅᑏᑦ ᓄᓇᑦᑎᐊᕐᒥᑦ ᐃᓚᐅᓲᑦ ᓇᐹᖅᑐᖃᖏᑦᑐᓂ ᑭᒡᓕᓯᓂᐊᕐᓂᕐᓄᑦ ᐃᓕᖅᑯᓯᑐᖃᓄᓪᓗ ᐃᓕᓐᓂᐊᖅᑐᓄᑦ. 1999ᒥᓂᑦ, ᒐᕙᒪᖓᑦ ᓄᓇᑦᑎᐊᑉ ᐊᑐᐃᓐᓇᐅᑎᑦᑎᓲᑦ ᑖᔅᓱᒥᖓ 10ᓄᑦ ᐅᓪᓗᓄᑦ ᓯᓚᓂ ᐃᓕᓐᓂᐊᕈᑎᒥᒃ, ᐱᕕᖃᖅᑎᑦᑎᔪᖅ ᐃᓕᓐᓂᐊᖅᑐᓂᒃ ᐊᖓᔪᒃᖠᓂᒃ ᐃᓕᓐᓂᐊᖅᑎᓂᒃ ᐱᓕᕆᓯᒪᔭᕐᒥᓄᑦ. ᑖᓐᓇ ᐃᓕᓐᓂᐊᕐᓂᖅ ᐱᓕᕆᔭᐅᓲᖅ ᓇᐹᖅᑐᖃᖏᑦᑐᓂ ᐆᒪᔪᖃᑎᒌᖏᑦᑐᒃᑯᕕᖕᓄᑦ ᖃᐅᔨᓴᕐᕕᖕᒥ, ᑕᕆᖕ ᑕᓯᕐᒥ, 300 ᑭᓛᒥᑕᓂᒃ ᐅᖓᓯᖕᓂᓕᒃ ᓂᒋᕐᒥ ᑲᓇᖕᓇᖓᓂ ᔭᓗᓇᐃᕝ ᓂᒋᕐᒥ ᐅᑭᐅᖅᑕᖅᑐᓂ ᐆᒪᔫᖃᑎᒌᖏᑦᑐᒃᑯᕕᖕᓂ.

“ᐃᓂᖃᕐᒪᑦ ᐃᓕᖅᑯᓯᑐᖃᒃᑯᑦ ᐱᕐᔪᐊᒧᑦ ᓄᓇᒥ—ᐃᒪᒃᑯᑦ ᐃᑳᕐᕕᒃ ᑐᒃᑐᓄᑦ ᐊᖑᓇᓱᒡᕕᒋᔭᒻᒪᕆᒡᓗ ᐃᑦᑕᕐᓂᑦ. ᐃᓕᕈᓘᔭᕐᓇᕐᕕᐊᓗᒃ ᐃᓕᓐᓂᐊᖅᑎᓄᑦ,” ᐅᖃᖅᑐᖅ ᑯᒪᕆ ᑲᕈᓇᕋᑦᓂ, ᑐᑭᒧᐊᒃᑎᑦᑎᔨ ᓄᓇᑦᑎᐊᑉ ᓄᓇᓕᕆᓂᕐᓄᑦ ᖃᐅᔨᓴᖅᑐᓄᑦ, ᐊᑕᐅᓯᕐᓗ ᐃᓕᓐᓂᐊᖅᑐᓄᑦ ᐸᕐᓇᒃᑎ.

ᐃᓕᓐᓂᐊᕐᕕᐅᔪᒥ, ᐃᓕᓐᓂᐊᖅᑐᑦ ᐱᓕᕆᖃᑎᖃᑦᑎᐊᓲᑦ ᐅᑭᐅᖅᑕᖅᑐᒥ ᖃᐅᔨᓴᖅᑎᓂᒃ, ᐊᕙᑎᓕᕆᓂᕐᓄᑦ ᐃᓕᓴᐃᔨᓂᒃ ᑦᓕᓱ ᖃᐅᔨᒪᔨᑕᕐᓂᒃ ᐃᓕᓐᓂᐊᖅᖢᑎᒃ ᓇᐹᖅᑐᖃᖏᑦᑐᓂᒃ ᓄᓇᓂᒃ, ᓂᕐᔪᑎᓂᒃ, ᐱᕈᖅᑐᓂᒃ, ᐃᓄᐃᓪᓗ ᕿᒪᒃᑕᑦᑎᓐᓂ ᑕᒫᓃᖃᑦᑕᕐᓂᕕᓂᖏᓐᓂᒃ. ᐃᓕᓐᓂᐊᓕᕋᒥᒃ, ᑭᓱᓄᑦ ᑐᙵᓚᐅᖅᑐᑦ, ᑭᓯᐊᓂ ᐃᓕᓐᓂᐊᖅᑐᑦ ᐊᓯᔾᔨᖅᓯᒪᕗᑦ ᐱᓕᕆᓂᕐᒧᑦ ᑐᕌᖅᑐᒧᑦ ᐊᒡᒐᓄᑦ ᐱᓕᕆᔪᓄᑦ, ᓄᓇᓄᑦ ᑐᙵᔪᓄᑦ ᐃᓕᓐᓂᐊᕐᓂᕐᓄᑦ. ᐱᓱᔪᒃᑎᓪᓗᒋᑦ, ᐱᕈᖅᓯᐊᓕᕆᔨ, ᓄᓇᓕᕆᔨ ᐃᓕᖅᑯᓯᑐᖃᓕᕆᔩᓪᓗ ᐃᓚᐅᕗᑦ ᐃᓕᓐᓂᐊᑐᓂ, ᐃᓱᒪᒋᔭᒥᓂᒃ ᐅᖃᐅᓯᖃᖅᖢᑎᒃ ᑐᑭᓯᓯᒪᔭᕐᒥᓂᒡᓗ ᓄᓇᐃᑦ ᑕᑯᓇᒃᑎᓪᓗᓂᒋᑦ.

“ᑭᒡᓕᓯᓂᐊᕐᓃᑦ ᐃᓕᖅᑯᓯᑐᖃᓄᓪᓗ ᐃᓕᓐᓂᐊᕐᓃᑦ ᐊᑑᑎᖃᖅᑐᑐᑦ ᐃᓚᒋᔭᐅᔪᑦ ᐃᖅᑲᓇᐃᔮᓐᓄᑦ,” ᐅᖃᖅᑐᖅ ᑲᕆᓐ ᒃᓚᒃ, ᐊᐅᓚᑦᑎᔨ ᖃᐅᔨᓴᕐᓂᕐᓄᑦ ᐊᐅᓚᑦᑎᓂᕐᓄᓪᓗ ᐆᒪᔪᓂᒃ ᐱᓕᕆᕝᕕᖕᒥᒃ, ᐊᕙᑎᓕᕆᓃᑦ ᓯᓚᐃᓪᓗ ᐊᓯᔾᔨᕐᓂᖏᑦ ᒐᕙᒪᖓᓄᑦ ᓄᓇᑦᑎᐊᑉ. “ᐅᖃᐅᓯᕆᔪᓐᓇᖅᑕᒃᑲ ᐊᒃᓱᕉᑎᒋᔭᒃᑲ-ᐊᕙᑏᑦ ᑐᒃᑐᓪᓗ-ᐃᓕᓐᓂᐊᖅᑐᓄᑦ ᖃᖓᒥ ᐃᓅᓯᕐᒥᓂ ᓄᓇᕐᔪᐊᖅ ᐃᓯᒐᒥᓃᖦᖢᓂ ᖃᓄᖅᑑᖅᖢᑎᒡᓗ ᐃᓅᓯᖏᑦ ᓇᒧᙵᐅᓂᐊᕐᒪᖔᑕ.”

ᐃᓚᐅᔪᑦ ᑕᖃᐃᖅᓯᖅᐳᑦ ᐅᓪᓗᓕᒫᖅ ᓇᐹᖅᑐᖃᖏᑦᑐᓂ ᐱᓱᔪᒃᑎᓪᓗᒋᑦ.

ᐊᔾᔨ ᒐᕙᒪᖓᑦ ᓄᓇᑦᑎᐊᑉ

ᓇᓄᒃ ᐅᓂᒃᑳᑦ

ᐳᐃᒍᔾᔭᐃᕐᓗᒋᑦ ᐃᓄᐃᑦ ᖃᐅᔨᒪᔭᖏᑦ ᐊᑑᑎᖃᑦᑎᐊᖅᑐᑦ ᐊᐅᓚᑕᐅᓂᖓᓄᑦ ᓇᓄᐃᑦ ᐅᑭᐅᖅᑕᖅᑑᑉ ᑲᓇᖕᓇᖓᓂ

ᐊᑕᐅᓯᖅ ᓇᓄᖅ ᕿᑭᖅᑖᓘᑉ ᐃᑭᖓᓂᑦ ᓇᓄᕐᓂᑦ ᓯᑯᒥ ᐹᒻᒪᖓᔪᖅ ᖃᓂᒋᔮᓂ ᐸᑐᔅᑦ ᕿᑭᖅᑕᐅᑉ, ᓄᓇᕘᒥ.

ᓇᓄᐃᑦ ᓇᓗᓇᐃᒃᑯᑕᐅᔪᑦ ᐅᑭᐅᖅᑕᖅᑐᒧᑦ ᐊᒃᑐᐊᓂᖃᓪᓚᒃᖢᑎᒃ ᐃᓄᐃᑦ ᐃᓕᖅᑯᓯᑐᖃᖏᓐᓄᑦ, ᖃᔅᓯᑦ ᕼᐋᓐᓇᓚᑦ ᐊᕐᕌᒍᓄᑦ, ᐃᓄᐃᑦ ᐃᓅᖃᑎᖃᑦᑎᐊᖅᓯᒪᕗᑦ ᓇᓄᕐᓂᒃ, ᐊᑑᑎᖃᑦᑎᐊᖅᖢᑎᒃ ᓂᕿᒥᓄᑦ, ᐊᓐᓄᕌᒥᓄᑦ, ᐅᒃᐱᕐᓂᕐᒥᓄᑦ ᓴᓇᐅᒐᒥᓄᓪᓗ.

ᓇᓄᕐᓂᒃ ᐊᐅᓚᑦᑎᓂᕐᓄᑦ ᐱᓕᕆᔾᔪᓰᑦ ᐱᒋᐊᖅᑳᓚᐅᖅᑐᑦ ᖃᔅᓰᓐᓇᓂᒃ ᓇᓐᓄᒍᓐᓇᖅᑎᑕᐅᓚᐅᙱᑎᓪᓗᒋᑦ ᐆᒪᔪᓄᓪᓗ ᖃᐅᔨᓴᕐᓂᕐᓄᑦ ᐊᑐᐊᒐᓪᓗ ᓴᖅᑭᑕᐅᓪᓗᑎᒃ ᑲᓇᑕᐅᑉ ᐅᑭᐅᖅᑕᖅᑐᐊᓂ ᐅᖓᑖᓂ 50 ᐊᕐᕌᒍᑦ. ᐅᓪᓗᒥ, ᓄᖑᔾᔭᐃᖅᓯᓂᑦ ᑐᕌᖓᕗᑦ ᓇᓇᐅᐃᑦ ᑎᒥᖏᑕ ᖃᓄᐃᓕᖓᓂᖏᓐᓄᑦ, ᐃᓕᖅᑯᓯᖏᓐᓄᑦ ᐃᓂᖏᓐᓄᓪᓗ. ᑭᓯᐊᓂ ᐃᓄᐃᑦ ᐃᒃᐱᒍᓱᒃᑐᑦ ᓂᐱᖏᑦ ᑐᓴᖅᑕᐅᓯᒪᖏᒻᒪᑕ ᖃᓄᖅᑑᖅᑐᓂᑦ, ᓇᖕᒥᓂᖅ ᐊᑐᖅᓯᒪᒐᓗᐊᖅᖢᑎᒃ ᓇᓄᐃᑦ ᐅᓄᕐᓂᖏᑎᒍᑦ ᖃᓄᐃᖏᓐᓂᖏᑎᒍᓪᓗ.

“ᐊᖑᓇᓱᒃᑎᐅᓪᓗᖓ, ᐅᒃᐱᕈᓱᓪᓚᒃᑐᖓ ᐱᐅᔪᓄᑦ ᓄᖑᔾᔭᐃᖅᓯᓂᕐᓄᑦ ᐱᓕᕆᔾᔪᓯᕐᓂᒃ,” ᐅᖃᖅᑐᖅ ᑎᐅᕆᒃ ᐸᑐᓪ, ᐃᓐᓇᖅ ᓄᓇᑦᓯᐊᕗᒻᒥᑦ. “ᐅᒃᐱᕈᓱᖏᑦᑐᖓ ᐊᐅᓪᓚᕐᓗᖓ ᑭᓱᓕᒫᓂᒃ ᑐᖁᕋᐃᓗᖓ ᑕᕝᕙᐅᑐᐃᓐᓇᕐᓂᖓᓄᑦ. ᐱᓕᕆᓂᒃᓴᖃᕐᓂᖅᓴᐅᔪᒃᓴᐅᔪᖓ ᓴᐳᑎᓗᒋᑦ ᐊᑐᒐᒃᓴᑦ ᓯᓚᒥᐅᑕᓂᑦ ᐊᐅᓚᑦᑎᔪᓂᑦ.”

ᐃᓚᓕᐅᑎᓗᒋᑦ ᑭᒡᓕᓯᓂᐊᕐᓃᑦ ᓄᓇᖃᖅᑳᖅᑐᓪᓗ ᖃᐅᔨᒪᔭᖏᑦ

ᑎᐅᕆᒃ ᐊᑕᐅᓯᐅᔪᖅ ᐅᓄᖅᑐᓂᑦ ᓄᑖᓂᒃ ᓄᖑᔾᔭᐃᖅᓯᓂᕐᓄᑦ ᐋᖅᑭᙳᐊᓯᒪᔪᖅᑖᕈᒪᔪᓂᑦ ᐃᓚᓕᐅᔾᔨᔪᓂᒃ ᑭᒡᓕᓯᓂᐊᕐᓂᕐᓂᒃ ᓄᓇᖃᖅᑳᖅᑐᓪᓗ ᖃᐅᔨᒪᔭᖏᓐᓂᒃ. ᐃᓕᓴᕆᓗᒋᑦ ᐱᐅᓂᖏᑦ ᐃᓄᐃᑦ ᐃᓱᒪᒋᔭᖏᑦ ᓇᓅᖃᑎᒌᓄᑦ ᓯᕗᒧᐊᕈᑕᐅᔪᓐᓇᖅᐳᖅ ᑲᔪᓰᓐᓇᕈᓐᓇᖅᑐᓄᑦ ᓄᖑᔾᔭᐃᖅᓯᓂᕐᓄᑦ ᖃᓄᖅᑑᕐᓂᕐᓄᑦ.

ᓇᓄᐃᑦ ᐱᓱᓲᑦ ᐅᖓᓯᒃᑐᐊᓗᖕᒧᑦ, ᕿᑭᖅᑖᓘᑉ ᐃᑭᖓᓂᕐᒥᐅᑦ ᐱᓱᒃᖢᑎᒃ ᓄᓇᑦᓯᐊᕗᒻᒧᑦ, ᓄᓇᕕᖕᒧᑦ, ᓄᓇᕘᑉ ᑲᓇᖕᓇᖓᓄᑦ, ᐱᓇᖕᓇᖓᓄᓪᓗ ᑲᓛᖦᖡᑦ ᓄᓇᖓᑕ. ᑖᒃᑯᐊ ᑲᑎᑦᑎᕗᑦ ᐅᓄᖅᑐᓂᒃ ᓂᕈᐊᕐᓂᒃᑯᑦ ᐃᓕᖅᑯᓯᑐᖃᒃᑯᓪᓗ ᐊᕕᒃᓯᒪᔪᓂᒃ, ᐊᒃᓱᕈᕐᓇᖅᓯᑎᒃᑲᓐᓂᖅᖢᒋᑦ ᐊᐅᓚᑦᑎᓂᕐᓄᑦ ᐱᓕᕆᔭᐅᔪᑦ.

ᐃᓄᐃᑦ ᐊᔾᔨᒌᖏᑦᑐᓂᑦ ᓄᓇᓂᑦ ᐊᔾᔨᒌᖏᑦᑐᓂᒃ ᐱᓕᕆᔾᔪᓯᖃᖅᐳᑦ ᓇᓄᕐᓄᑦ ᓄᖑᑎᑦᑎᑦᑎᑕᐃᓕᒪᓂᕐᓄᑦ, ᐱᖃᓯᐅᖦᖢᒋᑦ ᐊᔾᔨᒌᖏᑦᑐᑦ ᓇᓄᖅᑕᐅᔪᓐᓇᖅᑐᑦ ᐅᓄᕐᓂᖏᑦ ᐊᖑᓇᓱᖕᓂᕐᓄᓪᓗ ᖃᓄᖅᑑᖅᑐᑦ. ᑭᓯᐊᓂ ᐊᖏᖅᑐᑦ ᖃᐅᔨᒪᑎᑦᑎᖃᑎᒌᒡᓗᑎᒃ ᖃᐅᔨᓴᖅᑕᐅᔪᓂᑦ ᐱᐅᓛᒃᑯᓪᓗ ᐱᓕᕆᔾᔪᓯᕐᓂᒃ ᐊᑑᑎᖃᑦᑎᐊᖅᑐᑦ ᐃᑲᔫᑕᐅᓗᑎᒃ ᑕᒪᒃᑮᓄᑦ ᓄᓇᓕᖏᓐᓄᑦ ᕿᑭᖅᑖᓘᑉ ᐃᑭᖓᑕ ᓇᓅᖃᑎᒌᖏᑦᑐᓄᓪᓗ.

2022ᒥ ᓄᓇᑦᓯᐊᕘᑉ ᑐᕐᖓᑦ ᐆᒪᔪᓄᑦ, ᐱᕈᖅᑐᓄᑦ ᐃᖃᓗᒐᓱᖕᓂᕐᓄᓪᓗ ᐱᓕᕆᔨᖓᑦ, ᓄᓇᕘᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ, ᓄᓇᕕᒃ ᑕᕆᐅᕐᓂ ᐆᒪᔪᓕᕆᓂᕐᓄᑦ ᑲᑎᒪᔨᖏᑦ ᓴᓇᓚᐅᖅᑐᑦ ᑭᓱᓕᕆᔨᕈᓘᔭᕐᓂᑦ ᑲᑎᒪᔨᕋᓛᓂᒃ. ᑖᒃᑯᐊ ᑲᑎᒪᔨᕋᓛᑦ ᐃᓚᖃᓚᐅᖅᑐᑦ ᐃᓄᖕᓂᒃ ᖃᐅᔨᒪᔨᑕᕐᓂᒃ, ᐊᐅᓚᑦᑎᔨᐅᖃᑎᒡᓰᓂᑦ ᓯᕗᓕᖅᑎᓂᒃ, ᐆᒪᔪᕐᓂᐊᖅᑎᓂᒃ, ᐄᓅᓯᕐᓄᑦ ᑭᒡᓕᓯᓂᐊᖅᑎᓂᒃ ᐃᓄᓕᒫᓄᑦ ᖃᓄᐃᖏᓐᓂᕐᓄᑦ ᖃᐅᔨᒪᔨᑕᕐᓂᒃ ᐱᖁᔭᓕᕆᔨᓂᒡᓗ. ᖃᓄᐃᓐᓇᓱᓚᐅᖅᑕᖓᑦ ᑲᑎᑎᓪᓗᒋᑦ ᐊᔾᔨᒌᖏᑦᑐᑦ ᐃᓱᒪᒋᔭᐅᔪᑦ ᐊᒃᓱᕈᕐᓇᖅᑐᓄᑦ ᐱᓕᕆᔾᔪᑎᒋᓗᒋᑦ ᐊᒃᑐᐊᔪᓄᑦ ᓇᓄᕐᓂᒃ ᐊᐅᓚᑦᑎᓂᕐᓄᑦ.

“ᐊᑕᐅᓯᖅ ᐃᓚᖓ ᑐᕌᓕᓚᐅᖅᑕᕗᑦ ᐃᓱᒪᓂᐅᔪᖅ ᐃᓄᐃᑦ ᖃᐅᔨᒪᔭᖏᑦ ᐊᑐᐃᓐᓇᐅᓂᖅᓴᐅᓕᖅᑎᓪᓗᒋᑦ,” ᐅᖃᖅᑐᖅ ᑕᐃᕕᑦ ᐳᐊᕆᔅ, ᐃᓅᓯᓕᕆᓂᕐᓄᑦ ᖃᐅᔨᓴᖅᑎ ᑕᕐᕆᔭᓕᐅᖅᑎᓗ ᐃᓚᐅᓚᐅᖅᓯᒪᔪᖅ ᑲᑎᒪᔨᕋᓛᓄᑦ. “ᑖᓐᓇ ᑐᑭᐊᓃᓚᐅᖅᑐᖅ ᐊᑑᑎᖃᑦᑎᐊᖅᑐᓄᑦ ᐱᑕᖃᖏᑦᑐᓂᒃ ᓇᓗᓇᐃᖅᓯᓗᑎᒃ ᐃᓄᐃᑦ ᓂᐱᖏᑦ ᑐᓴᖅᑕᐅᖏᓐᓂᖏᓐᓄᑦ ᑐᓴᖅᑕᐅᔪᓐᓇᕐᓂᖅᓴᐅᒐᓗᐊᕋᒥᒃ ᐊᒃᑐᐊᔪᓄᑦ ᓇᓄᕐᓄᑦ.

ᑲᑎᓐᓂᖓᑦ ᑲᔪᓯᔾᔪᑕᐅᓪᓗᓂ ᓴᓇᔭᐅᓂᖓᓄᑦ ᓇᓄᒃ ᐅᓂᒃᑳᑦ, ᑭᖑᓕᕇᑦ 20 ᓇᐃᑦᑐᑦ ᐅᓂᒃᑳᖅᑐᑦ ᑕᕐᕆᔭᑦ ᓴᖅᑭᔮᖅᑎᑦᑎᔪᓂᒃ ᐃᓄᐃᑦ ᐃᓱᒪᒋᔭᖏᓐᓂᒃ ᓇᓄᕐᓄᑦ, ᐱᖃᓯᐅᖦᖢᒋᑦ ᐃᓕᖅᑯᓯᑐᖃᒃᑯᑦ ᐱᕐᔪᐊᖑᓂᖏᑦ ᐃᓅᖃᑎᒌᖕᓂᖓᓪᓗ ᐃᓄᐃᑦ ᑖᒃᑯᓄᖓ ᓂᕐᔪᑎᓄᑦ

ᐳᐃᒍᔾᔭᐃᕐᓗᒋᑦ ᖃᐅᔨᒪᔭᐅᔪᑦ ᑕᕐᕆᔭᓄᑦ

“ᐊᔾᔨᓕᐅᕆᓗᓂ ᑕᕐᕆᔭᓂᒃ ᐱᓕᕆᔾᔪᓯᐅᔪᖅ ᑲᑎᖅᓱᐃᓗᓂ ᐃᓄᐃᑦ ᖃᐅᔨᒪᔭᖏᓐᓂᒃ, ᑕᑯᓇᒡᓗᒋᑦ, ᖃᐅᔨᓴᕐᓗᒋᑦ, ᐊᒻᒪᓗ, ᐱᕐᔪᐊᖑᓛᒧᑦ, ᐊᓯᓄᑦ ᑕᑯᑎᑕᐅᑎᓪᓗᒋᑦ ᓇᓕᐊᓪᓗᐊᓄᑦ ᑕᐅᑐᒃᑐᓄᑦ,” ᐅᖃᖅᑐᖅ ᑕᐃᕕᑦ. ᐅᖃᖅᑐᑦ ᐱᓕᕆᖃᑎᒌᑦ ᐱᖃᓯᐅᔾᔨᓚᐅᖅᑐᑦ ᑕᓪᓕᒪᓂᒃ ᐃᓄᖕᓂᒃ ᑕᕐᕆᔭᓕᐅᖅᑎᓂᒃ 8 ᓄᓇᓕᖕᓂᑦ ᓄᓇᕘᑉ ᑲᓇᖕᓇᖓᓂ, ᓄᓇᕕᖕᒥᑦ ᓄᓇᑦᓯᐊᕗᒻᒥᑦ ᑲᓛᖦᖠᓪᓗ ᓄᓇᖏᓐᓂ.

ᓇᓄᒃ ᑭᖑᓕᕇᑦ ᑐᕌᖅᑐᑦ ᑕᑯᑎᓪᓗᒋᑦ ᐊᔾᔨᒌᖏᓪᓚᒃᑐᓄᑦ ᑕᐅᑐᒃᑎᓄᑦ, ᐱᖃᓯᐅᓪᓗᒋᑦ ᒐᕙᒪᓄᑦ ᐊᑐᐊᒐᓕᐅᖅᑎᓄᑦ, ᐃᓚᐅᔪᓄᑦ ᓇᓄᕐᓂᒃ ᐊᐅᓚᑦᑎᓂᕐᓄᑦ.

“ᖃᐅᔨᑎᓐᓇᓱᒃᑕᕗᑦ ᐱᕐᔪᐊᖑᓂᖏᓐᓄᑦ ᐃᓄᐃᑦ ᖃᐅᔨᒪᔭᖏᑦ ᐃᓚᓕᐅᔾᔭᐅᓗᑎᒃ ᓇᓄᕐᓄᑦ ᓄᖑᔾᔭᐃᔅᓯᓂᕐᓄᑦ,” ᑕᐃᕕᑦ ᐅᖃᖅᑐᖅ.

ᑕᕐᕆᔭᑦ, ᐊᑐᐃᓐᓇᐅᔪᑦ ᑕᒪᒃᑮᖕᓂ ᖃᓪᓗᓈᑎᑐᑦ ᐃᓄᒃᑎᑐᓪᓗ, ᓇᓂᔭᐅᔪᓐᓇᖅᑐᑦ ᔪᑐᑉᑯᑦ

ᓇᓄᒃ ᐅᓂᒃᑳᑦ ᐊᐃᖅᑭᕕᐊᒍᓪᓗ (nanuknarratives.com). ᑕᕐᕆᔭᑦ ᓴᖅᑭᔮᖅᑎᑦᑎᔪᑦ ᐊᔾᔨᒌᖏᑦᑐᓂᒃ ᖃᓄᐃᓕᖓᓂᕐᓂᒃ ᐃᓄᐃᑦ ᖃᐅᔨᒪᔭᖏᓐᓂᒃ ᐊᑐᖅᓯᒪᔭᖏᓐᓂᒡᓗ ᓇᓄᕐᓄᑦ, ᓲᕐᓗᑐᑦ ᓇᓄᕐᓂᒃ ᑕᐅᑐᒃᑐᑦ, ᐊᑐᖅᑕᐅᔪᑦ ᓇᓄᕐᓂᑦ, ᐊᑦᑕᕐᓇᖏᑦᑐᒦᓐᓃᑦ ᓇᓄᖅᓯᓃᓪᓗ, ᐃᓄᐃᑦ ᐸᖅᑭᔨᐅᓂᖏᑦ ᑲᑐᔾᔨᖃᑎᒌᖕᓃᓪᓗ. ᖃᔅᓯᑲᓪᓚᐃᑦ ᑕᕐᕆᔭᑦ ᓵᑎᖕᒥᔪᑦ ᐊᓯᔾᔨᖅᑐᓂᒃ ᐃᓕᖅᑯᓯᓂᒃ ᓇᓄᕐᓂ ᓯᓚᐃᑦ ᐊᓯᔾᔨᕐᓂᖏᓐᓄᑦ ᐊᒃᑐᐊᔪᓄᓪᓗ ᐊᓯᔾᔨᖅᑐᓄᑦ ᓯᑯᐃᑦ ᖃᓄᐃᓕᖓᓂᖏᓐᓂ.

ᑕᐃᕕᑦ ᐳᐊᐃᓯ, ᑕᕐᕆᔭᓕᐅᖅᑎ ᐸᖏᖅᑑᕐᒥᑦ, ᓄᓇᕗᑦ, ᐅᖃᖅᑐᖅ, “ᐅᖃᕐᓗᓂ ᓄᓇᕘᒥ, ᐅᑭᐅᖅᑕᖅᑐᓕᒫᒥᓗ, ᓇᓄᐃᑦ ᓄᖑᓕᕐᒪᑕ. ᑖᓐᓇ ᖃᓪᓗᓈᓂᑦ ᐃᓱᒪᔾᔪᓯᖅ. ᐅᕙᑦᑎᓐᓄᑦ ᑕᑉᐹᓃᑦᑐᓄᑦ, ᐅᓄᕐᓂᖅᓴᐅᖅᑰᔨᓕᖅᑐᑦ ᓇᓄᐃᑦ ᓄᓇᓕᖕᓄᐊᖅᑐᑦ. ᑕᐃᒪᐃᖃᑦᑕᓚᐅᖏᑦᑑᒐᓗᐊᖅ.”

ᐱᕈᖅᓴᐃᒃᑲᓐᓂᕐᓗᑎᒃ ᑐᑭᓯᓂᕐᓄᑦ, ᐊᑭᖃᖏᑦᑐᖅ ᐃᓐᑐᓂᐊᑦᑯᑦ ᐃᓕᓴᒐᒃᓴᑦ ᐊᑐᐃᓐᓇᐅᔪᑦ ᓇᓄᒃ ᐅᓂᒃᑳᑦ ᐊᐃᖅᑮᕕᐊᓂ. ᐃᓕᓴᒐᒃᓴᑦ ᐱᖃᓯᐅᔾᔨᕗᑦ ᑕᕐᕆᔭᓂᒃ ᐅᖃᖃᑎᒌᖕᓂᕐᓄᑦ ᑐᕌᕈᑎᖃᖅᖢᑎᒃ ᐊᐱᖅᑯᑎᓂᒡᓗ ᖃᐅᔨᓇᓱᒡᓗᒋᑦ ᐃᓄᐃᑦ ᖃᐅᔨᒪᔭᖏᑦ ᐊᑑᑎᖃᑦᑎᐊᕐᒪᖔᑕ ᐊᐅᓚᑦᑎᐊᖅᑐᓄᑦ ᓇᓄᕐᓂᒃ ᐊᐅᓚᑦᑎᓂᕐᓄᑦ. ᑕᕐᕆᔭᐃᑦ ᑕᑯᒃᓴᐅᑎᑕᐅᓛᕐᒥᔪᑦ ᐅᕙᒍᑦ ᑦᕝᒃᑯᑦ, ᐃᓄᒃᑎᑐᑦ ᑕᓚᕖᓴᒐᒃᓴᑦ, ᑕᑯᔭᐅᓲᑦ ᐅᖓᑖᓂ 600,000 ᐊᖏᕐᕋᓂ ᑲᓇᑕᒥ.

“ᓇᓄᒃ ᐅᓂᒃᑳᑦ ᑐᑭᖃᓪᓗᐊᑕᖅᑐᑦ ᐅᖃᐅᓯᕆᓗᒋᑦ ᐃᑎᔪᒥᒃ ᐊᑯᓂᒥᓪᓗ ᐃᓅᖃᑎᖃᕋᑦᑕ ᓇᓄᕐᓄᑦ,” ᐅᖃᖅᑐᖅ ᑲᓛᖦᖠᒥᐅᖅ ᑕᕐᕆᔭᓕᐅᖅᑎ ᐃᑭᒪᓕᒃ ᐱᑭᓚᒃ, ᓴᓇᓚᐅᖅᑐᖅ ᐱᖓᓱᓂᒃ ᑕᕐᕆᔭᓂᒃ ᑭᖑᓕᕇᓄᑦ. “ᐃᓕᓴᖅᓯᒪᔮᑎᒍᑦ ᐊᖑᓇᓱᒋᐊᒃᓴᖅ, ᕿᑐᕐᖓᕗᑦ ᐱᕈᖅᓴᕆᐊᒃᓴᖅ, ᖃᓄᕐᓗ ᐊᓐᓇᐅᒪᔪᓐᓇᕐᒪᖔᑕ ᐅᑭᐅᖅᑕᖅᑐᒥ. ᐃᓕᓪᓚᖃᑦᑕᖅᑐᒍᑦ ᐅᕙᑦᑎᓐᓂᒃ ᐃᓅᖃᑎᒌᖕᓂᑦᑎᒍᑦ ᓇᓄᕐᒧᑦ.”

ᐊᓯᒥᑑᕋᓂ ᐱᓕᕆᔪᓂ ᐊᔾᔨᓕᐅᕆᔪᑎᑐᑦ, ᐃᑭᒪᓕᒃ ᐊᐱᖅᓱᓚᐅᖏᑦᑐᖅ ᐃᓐᓇᕐᓂᒃ ᐃᓅᖃᑎᖃᕐᓂᕐᒥᓄᑦ ᓇᓄᕐᓂᒃ. ᐅᖃᖅᑐᑦ ᐱᖓᓱᑦ 100 ᐊᕐᕌᒍᓄᑦ ᑕᐃᓂᔅᓂᑦ ᓄᓇᐃᖅᑕᐅᓯᒪᓂᕐᓄᑦ ᑲᓛᖦᖠᒥᐅᑦ ᐃᓐᓇᐃᑦ ᓇᓗᓕᕐᒪᑕ ᑕᐃᒃᑯᓂᖓ ᖃᐅᔨᒪᔭᐅᔪᓂᒃ. ᐃᑭᒪᓕᒃ ᐱᓕᕆᔪᖅ ᐊᐅᔭᓪᓚᒃᑎᓪᓗᒋᑦ ᑖᒃᑯᐊ ᖃᐅᔨᒪᔭᐅᔪᑐᖃᑦ ᐊᑐᒃᑲᓐᓂᕐᓗᒋᑦ ᐃᓄᐃᑦ ᐱᓕᕆᔾᔪᓯᖏᑦ ᐅᓂᒃᑳᖏᓪᓗ ᐳᐃᒍᔾᔭᐃᖅᑕᐅᔪᑦ ᓄᓇᐃᖅᓯᔪᓂᑦ, ᐊᔪᕆᖅᓱᐃᔨᓂᑦ ᐊᕐᕙᖕᓂᐊᖅᑎᓂᓪᓗ. ᑕᕐᕆᔭᐃᑦ ᐃᑲᔪᕐᓂᐊᖅᑐᑦ ᑐᓴᖅᑕᐅᑎᓪᓗᒋᑦ ᑖᒃᑯᐊ ᖃᐅᔨᒪᔭᐅᔪᑦ ᑲᓛᖦᖠᒥᐅᓄᑦ.

ᑲᓇᑕᒥ, ᐃᓄᐃᑦ ᐊᖑᓇᓱᒃᑏᑦ ᐱᓇᓱᒃᑐᑦ ᐊᑑᑎᖃᕐᓂᖅᓴᐅᓗᑎᒃ ᓇᓄᕐᓄᑦ ᐊᐅᓚᑦᑎᓂᕐᓂ, ᓴᙱᔪᓂᒡᓗ ᐱᔾᔪᑎᒃᓴᖃᖅᐳᑦ ᑕᐃᒪᐃᑦᑕᕆᐊᒃᓴᖅ.

“ ᑐᓴᐅᒪᔭᐅᑎᓐᓇᓱᖃᑦᑕᖅᑕᕗᑦ, ᑕᕐᕆᔭᕐᒥ, ᐊᑐᖅᑕᐅᓂᒋᑦ ᓂᕐᔪᑎᓕᒫᒥᑦ ᖃᓄᕐᓗ ᐃᒃᐱᒋᔭᐅᓪᓗᓂ ᐱᓕᕆᔭᐅᖕᒪᖔᑦ,” ᐅᖃᖅᑐᖅ ᑎᐅᕆᒃ. ᐅᖃᖅᑐᖅ ᐅᖃᓪᓚᒡᓗᓂ ᐊᑐᖅᓯᒪᔭᕐᒥᓂᑦ ᐃᒻᒥᓄᓪᓗ ᖃᐅᔨᓯᒪᔭᓂᒃ ᐊᕗᖔᓘᕈᓐᓇᖅᑐᖅ ᑲᑐᔾᔨᔪᓄᑦ ᓇᓄᕐᓂᒃ ᐊᐅᓚᑦᑎᓂᕐᓄᑦ.

ᐊᔾᔨᓕᐅᕆᔪᑦ ᓯᑯᓂᒃ ᓯᓚᑖᓂ ᐃᓄᒃᔪᐊᖅ, ᓄᓇᕕᒃ.

ᐊᔾᔨ : ᑕᒥ ᐸᓕᓱ

ᑕᐃᕕᑦ ᐳᐊᕆᔅ (ᐊᔾᔨᓕᐅᕈᑎᓂᒃ ᐊᒡᔭᖅᑐᖅ) ᑲᕈᓪ ᒥᓯᓕᓐᓗ ᐊᔾᔨᓕᐅᕆᔪᑦ ᑐᒃᑐᓂᒃ ᓚᐸᑐᐊᒥ.

ᐊᔾᔨ : ᐃᐅᑐᕆᑦ ᐊᓚᓐ

ᓇᓅᑉ ᐊᒥᖓ ᐃᖃᓗᖕᓂ.

ᐃᓐᓇᖅ ᑎᐅᕆᒃ ᐸᑐᓪ

ᖃᐅᔨᓗᒋᑦ ᓇᑭᙶᕐᒪᖔᑕ ᑎᖕᒥᐊᑦ

ᐃᓱᒪᒋᑦ ᑕᑯᓗᑎᑦ ᒥᑭᑦᑐᒥᒃ ᐃᒻᒥᖅᑯᑕᐃᓚᕐᒥᒃ ᐃᖃᓗᒃᑑᑦᑎᐊᕐᒥ ᖃᐅᔨᓗᑎᓪᓗ ᖃᖓᑕᔪᕕᓂᖅ ᓄᓇᕐᔪᐊᑉ ᐊᑎᖓᓂᑦ, ᐅᖓᑖᓂ 40,000 ᑭᓛᒥᑕᓄᑦ ᐅᖓᓯᖕᓂᓕᒃ. ᐋᒡᒌᓯ 2024ᒥ, ᓇᐸᔪᕐᒥᒃ ᓇᑉᐸᖅᓯᓚᐅᕐᒪᑕ ᓯᓚᑖᓂ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᑉ ᑕᐃᒪᐃᓐᓂᐊᕋᒥᒃ — ᓇᒧᙵᐅᔪᑦ ᖃᐅᔨᕙᓪᓕᐊᓗᒋᑦ ᑕᒪᐅᙵᓲᑦ ᑎᖕᒥᐊᑦ.

ᐃᖃᓗᒃᑑᑦᑎᐊᖅ ᐱᕐᔪᐊᖑᔪᖅ ᑎᖕᒥᐊᖑᑦ ᓇᒧᙵᓲᓄᑦ. ᐅᐊᖕᓇᖓᓂ ᐊᕼᐃᐊᒃ ᓅᓲᓄᑦ ᑎᖕᒥᐊᓄᑦ ᓴᐳᔾᔭᐅᓯᒪᔫᑉ, ᓴᐳᔾᔭᐅᓯᒪᔪᑐᐊᖑᓪᓗᓂ ᑎᖕᒥᐊᓄᑦ ᕿᑎᕐᒥᐅᓂ. ᑕᒫᓂ ᓄᓇᐃᑦ ᐊᖏᕐᕋᕆᔭᐅᔪᑦ ᐅᓄᓛᓄᑦ ᐊᔾᔨᒌᖏᑦᑐᓄᑦ ᑲᖑᓄᑦ ᓇᓂᑐᐃᓐᓇᕐᒥ ᑲᓇᑕᒥ ᐊᒥᐊᓕᒃᑲᓂᓗ ᐃᕙᕝᕕᐅᔪᓂ, ᐱᖅᓯᐅᓪᓗᒋᑦ ᐅᓄᓪᓚᒃᑐᑦ ᓅᓲᑦᑕᐅᖅ ᑎᖕᒥᐊᖑᖃᑎᒌᖏᑦᑐᑦ. ᐃᖃᓗᒃᑑᑦᑎᐊᖅ ᖃᓂᑦᑐᑯᓘᒐᒥ ᓴᐳᔾᔭᐅᓯᒪᔪᕐᒧᑦ ᐅᓄᖅᑐᓄᑦ ᑎᖕᒥᐊᖑᓲᓄᑦ ᑕᒫᓂ, ᓈᒪᑦᑎᐊᓚᐅᖅᑐᖅ ᓇᑉᐸᕐᓗᒍ ᓇᐸᔪᖅ ᑕᒫᓂ.

ᑕᑭᓂᖃᖅᖢᓂ 10-ᒦᑕᓂᒃ, ᓇᐸᔪᖅ ᐃᓚᒋᔭᐅᔪᖅ ᒧᑕᔅ ᐆᒪᔪᓄᑦ ᓇᒧᙵᐅᕙᓪᓕᐊᔪᓄᑦ ᖃᐅᔨᓴᕐᓂᕐᓄᑦ ᐱᓕᕆᔾᔪᓯᕐᓄᑦ, ᓇᐸᔪᖃᖅᖢᑎᒃ ᓄᓇᕐᔪᐊᓕᒫᒥ. ᐊᔾᔨᒋᓇᒋᑦ ᑕᒻᒪᕇᒃᑯᑕᓄᑦ, ᐊᑐᓲᖅ ᓈᓚᐅᑎᑎᒍᑦ ᓇᐸᔪᓂᒃ ᐊᑐᓲᑦ ᐱᕙᓪᓕᐊᓪᓗᑎᒃ ᖃᐅᔨᔭᐅᔪᓂᒃ ᒥᑭᑦᑐᓂᑦ ᖃᐅᔨᓴᐅᑎᓂᑦ ᐃᓕᔭᐅᔪᓄᑦ ᒥᑭᑦᑐᓄᑦ ᑎᖕᒥᐊᓄᑦ. ᖃᐅᔨᓴᐅᑏᑦ ᓇᓃᓐᓂᕐᒥᓂᒃ ᐅᖃᐃᓐᓇᓲᖑᖕᒪᑕ ᕿᓚᒥᑯᓗᒃ ᓇᐸᔫᑉ ᖃᐅᔨᓪᓗᓂᐅᒃ ᑎᖕᒥᐊᖅ ᓇᐸᔫᑉ ᑐᓴᕈᓐᓇᖅᑕᖓᓃᑎᓪᓗᒍ. ᓇᐸᔪᑦ ᐱᖓᓱᓂᒃ ᐊᑕᐅᓯᑐᐊᒧᑦ ᓵᙵᔪᓂᒃ ᓇᐸᔪᓖᑦ ᖃᐅᔨᔪᓐᓇᖅᑐᓂᒃ ᑎᖕᒥᐊᒥᒃ ᖃᖓᑕᔪᒥᒃ ᐅᖓᓯᒃᑎᒋᔪᑎᑐᑦ 20 ᑭᓛᒥᑕᓄᑦ.

ᒃᓕᐊ ᕗᕋᐱᓐ, ᐅᑭᐅᖅᑕᖅᑐᒥ ᐆᒪᔪᕐᓂᐊᖅᑎ ᐃᓚᐅᓕᓵᓚᐅᖅᑐᖅ ᑎᖕᒥᐊᑦ ᑲᓇᑕᒃᑯᓐᓄᑦ ᐅᑭᐅᖅᑕᖅᑐᓂ ᐃᓂᒋᔭᐅᔪᓄᑦ ᓄᖑᔾᔭᐃᖅᓯᓂᕐᓄᑦ ᐸᕐᓇᐅᑎᐅᓪᓗᓂ, ᐊᐅᓚᑦᑎᓚᐅᖅᑐᖅ ᐸᕐᓇᒃᖢᒋᓪᓗ ᓇᐸᔪᕐᒥᒃ ᐋᖅᑭᒃᓯᔪᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥ. ᐱᓕᕆᓂᖅ ᑲᑐᔾᔭᐅᓚᐅᖅᑐᖅ ᑲᓇᑕᒥᐅᑦ ᐆᒪᔪᓕᕆᓂᕐᓄᑦ ᐱᔨᑦᑎᕋᕐᓂᕐᓄᑦ ᐊᑦᓚᓐᑎᒃ ᓄᓇᓄᑦ, ᓯᓚᑦᑐᖅᓴᕐᕕᒡᔪᐊᖓᑕ ᕕᓐᓱ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᓪᓗ.

ᓇᑉᐸᖅᓯᔪᑦ ᖃᐅᔨᓴᐅᑎᓕᖅᓯᖏᒃᑲᓗᐊᖅᖢᑎᒃ ᑎᖕᒥᐊᓂᒃ ᓇᖕᒥᓂᖅ, ᒃᓕᐊ ᐅᖃᖅᑐᖅ, “ᖃᓄᐃᓐᓇᓱᒃᑕᖓ ᒧᑕᔅ ᖃᐅᔨᓴᕐᕕᐅᑉ ᐱᕕᓕᐅᕈᓐᓇᕐᓗᓂ ᖃᐅᔨᓴᐅᑎᓕᖅᓯᓂᕐᓄᑦ ᖃᐅᔨᓗᓂᓗ ᑎᖕᒥᐊᓂᒃ ᖃᐅᔨᓴᐅᑎᓕᖅᑕᐅᔪᓄᑦ ᐊᓯᓂ ᓄᓇᓂ.”

ᓇᐸᔪᖅ ᐃᖃᓗᒃᑑᑦᑎᐊᕐᒥ ᑲᑎᖅᓱᐃᓂᐊᖅᑐᖅ ᖃᐅᔨᔭᐅᔪᓂᒃ ᐅᐱᕐᖓᒃᓵᓕᓵᒥᑦ ᐅᑭᐊᒃᓵᑉ ᐃᓱᐊᓄᑦ, ᒃᓕᐊ ᐅᖃᖅᑐᖅ ᑭᓇᑐᐃᓐᓇᐅᑉ ᑕᑯᔪᓐᓇᖅᑕᖏᑦ ᖃᐅᔨᔭᐅᔪᑦ ᓇᐸᔪᕐᒧᑦ ᒧᑕᔅ ᐊᐃᖅᑮᕕᐊᓂ. ᖃᐅᔨᒪᔭᐅᔪᑦ ᐃᖃᓗᒃᑑᑦᑎᐊᑉ ᓅᓲᖏᑦ ᑎᖕᒥᐊᖏᓐᓄᑦ ᐊᑐᐃᓐᓇᐅᔪᑦ ᐃᓕᓴᐃᔨᓄᑦ, ᐊᖑᓇᓱᒃᑐᓕᕆᔨᓄᑦ ᑲᑐᔾᔨᖃᑎᒌᓄᑦ, ᖃᐅᔨᓴᖅᑎᓄᑦ, ᒐᕙᒪᓄᑦ ᖃᐅᔨᔪᒪᔪᓄᓪᓗ ᓄᓇᓕᖕᒥᐅᓄᑦ ᑲᑎᒪᔨᓄᑦ.

ᒃᓕᐊ ᕗᕋᐱᓐ ᐋᕿᒃᓯᔪᖅ ᒧᑕᔅ ᓇᐸᔫᑉ ᓇᐸᔪᖓᓂ ᐋᒡᒌᓯ 2024ᒥ.

ᓇᐸᔪᖅ ᒧᑕᔅᒧᑦ ᓇᐸᔪᓕᒃ, ᓇᐸᔪᖅ ᖃᓂᒋᔮᓂ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᑉ ᐱᖓᓱᐃᓕᖓᔪᑦ ᐃᒡᓗᐃᑦ ᖃᓂᒋᔮᓂ ᓇᒧᙵᐅᔪᓂᒃ ᑎᖕᒥᐊᓂᒃ ᖃᐅᔨᓴᓕᒑᔪᖅ.

ᐅᓇ ᐊᓇᖅᑕᖅᕕᐅᔪᖅ ᑯᕕᖅᑕᕐᕕᖓ

ᐃᖃᓗᒃᑑᑦᑎᐊᖅ, ᐊᓯᑎᑐᑦ ᐅᑭᐅᖅᑕᖅᑐᒥ ᓄᓇᓕᒃᑎᑐᑦ, ᑭᓈᓗᒃᑯᕕᖃᖅᑐᖅ. ᑕᐃᒪᓐᓇᐅᓇᓂᓕ ᑲᓇᑕᒥ ᓂᒋᕐᒥᐅᑎᑐᑦ, ᑭᓈᓗᐃᑦ ᓱᓪᓗᒃᑰᖅᖢᑎᒃ ᓱᕈᐃᔭᐃᕝᕕᖕᓄᑦ ᑯᕕᔭᐅᓪᓗᑎᒡᓘᓐᓃᑦ ᑭᓈᓗᒃᑯᕕᖕᓄᑦ, ᕼᐊᒪᓚᒃᑯᑦ ᓱᕈᖏᑦ ᐃᒥᖏᑦ ᐱᔭᐅᓲᑦ ᐊᑐᓂ ᐃᒡᓗᓂᑦ ᒥᓪᓗᐊᖅᑎᓄᑦ ᓄᓇᒃᑰᕈᑎᓄᑦ ᑯᕕᔭᐅᓪᓗᑎᒡᓗ ᑭᓈᓗᒃᑯᕕᖕᒧᑦ.

ᑭᓈᓗᒃᑯᕖᑦ ᑮᓇᐅᔭᓂᒃ ᐊᑐᓗᐊᖏᒃᑲᓗᐊᖅᖢᑎᒃ ᐸᖅᑭᔭᕆᐊᖃᓗᐊᕋᑎᒡᓗ, ᐊᒃᓱᕈᕐᓇᖅᑐᖃᕐᒪᑕ ᐅᑭᐅᖅᑕᖅᑐᒥ. ᑯᕕᕝᕖᑦ ᐅᑭᐅᖅᑕᖅᑐᒥ ᖁᐊᖑᒐᔪᖕᒪᑕ ᐊᕐᕌᒎᑉ ᐃᓗᐊᓂ ᑕᖅᑭᓂ, ᖁᐱᕐᕈᕋᓛᓄᑦ ᓱᕋᒃᑕᐅᔪᓐᓇᖏᑦᑐᑦ ᑎᒥᒥᙶᖅᑐᑦ ᓱᕋᑦᑎᑦᑎᐊᕐᓗᒋᑦ. ᓵᓐᓇᓱᒃᖢᒍ ᑖᓐᓇ, ᒐᕙᒪᖃᑎᒌᓄᑦ ᖃᐅᔨᓴᕐᓂᕐᓄᑦ ᑲᑎᒪᔨᖏᑦ ᑲᓇᑕᒥ, ᐃᐅᓪᑲᓐ ᑭᓱᓕᐅᖅᑏᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓪᓗ ᑲᑐᔾᔨᓚᐅᖅᑐᑦ ᓴᓇᓪᓗᑎᒃ ᑭᓈᓗᓕᕆᔾᔪᑎᓂᒃ ᐋᖅᑭᒃᓯᒪᓪᓗᓂ ᓵᖁᓪᓗᒋᑦ ᐊᔾᔨᐅᖏᑦᑐᑦ ᐊᒃᓱᕈᕐᓃᑦ ᓱᕈᐃᔭᐃᓪᓗᓂ ᑭᓈᓗᖕᓂᒃ ᐅᖓᓯᒃᑐᓂ ᐅᑭᐅᖅᑕᖅᑐᒥᐅᓂ ᓄᓇᓕᖕᓂ.

ᑖᓐᓇ ᐃᓱᒪᒋᔭᐅᔭᕆᐅᖅᑐᖅ, ᖃᐅᔨᒪᔭᐅᔪᖅ BEASTᑎᑐᑦ (ᐆᒪᔪᓂᑦ-ᑲᑉᐳᔾᔭᖅᑐᓄᑦ ᐊᓂᕐᓂᖃᖏᑦᑐᓄᑦ ᑭᓈᓗᖕᓂᒃ ᓱᕈᐃᔭᐃᓃᑦ) ᓴᓇᔭᐅᓚᐅᖅᑐᖅ ᐱᐅᓯᒋᐊᖁᓪᓗᒋᑦ ᑭᓈᓗᖕᓂᒃ ᐊᐅᓚᑦᑎᓃᑦ.

ᓱᕈᓂᒃ ᐃᒥᓂᒃ ᓱᕈᐃᔭᐃᔾᔪᓯᑐᖃᐃᑦ ᐃᓚᓯᓲᖑᖕᒪᑕ ᐊᓂᕐᓂᕐᓂᒃ- ᐱᓕᕆᔾᔪᓯᖅ ᑕᐃᔭᐅᔪᖅ ᐊᓂᕐᓂᓕᖅᓯᓂᕐᓂᒃ- ᓱᒃᑲᓕᑎᒋᐊᖅᖢᒋᑦ ᖁᐱᕐᕈᕋᓛᑦ ᐱᕈᕐᓂᖏᑦ ᓱᕋᑦᑎᓲᓄᑦ ᑎᒥᓂᙶᖅᑐᓂᒃ ᑭᓱᓂᒃ. ᓴᓂᐊᓂᓕ, BEAST ᐊᐅᓚᑕᐅᔪᓐᓇᖅᑐᖅ ᐊᓂᕐᓂᑭᓪᓗᓂ ᐊᓂᕐᓂᖃᖏᑦᑎᐊᕐᓗᓐᓘᓐᓃᑦ. ᑭᓯᐊᓂᖔᖅ, ᐊᑐᓲᖅ ᐆᒻᒪᖅᑯᑎᓂᑦ ᓱᑲᑏᓐᓇᖅᖢᒋᑦ ᐱᐅᓯᒋᐊᕈᑕᐅᓪᓗᑎᒃ ᓱᕋᑦᑎᔭᐅᓂᖏᓐᓄᑦ ᑎᒥᓂᙶᖅᑐᑦ. ᖃᐅᔨᓴᖅᑕᐅᓚᐅᕋᓗᐊᕋᓂ ᑕᒫᓂ ᖃᐅᔨᓴᕐᓇᕐᒥ, ᐊᐅᓚᑕᐅᒐᒥ ᐊᓂᕐᓂᖃᖏᖦᖢᓂ, ᓴᓇᓯᒪᔪᑦ ᐊᔪᖏᓐᓂᖃᕈᓐᓇᖅᑐᑦ ᐆᒪᔪᓂᙶᖅᑐᓂᑦ ᒑᓯᓕᐅᕐᓗᑎᒃ ᐊᑐᖅᑕᐅᔪᓐᓇᖅᑐᓄᑦ ᓄᑭᖕᓄᑦ.

2020ᒥ, 30 ᓖᑕᓄᑦ ᐃᒪᖃᕈᓐᓇᖅᑐᖅ ᖃᐅᔨᓴᐅᑎ - BEAST ᓱᕈᐃᔭᐃᔾᔪᑎ ᖃᐅᔨᓴᖅᑕᐅᑦᑎᐊᓚᐅᖅᑐᖅ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖕᒥ. ᑎᓯᐱᕆ 2023ᒥ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓂᒡᓚᓱᒃᑐᓂ ᓯᓚᓂ ᓴᓇᓯᒪᔪᓄᑦ ᐱᓕᕆᔨᐅᖃᑎᒌᖏᑦ ᖃᐅᔨᓴᓕᓚᐅᖅᑐᑦ ᐊᖏᓐᖅᓴᒥᒃ 300 ᓖᑕᑦ BEAST ᓱᕈᐃᔭᐃᔾᔪᑎᒥᒃ. ᑖᓐᓇ ᓱᕈᐃᔭᐃᔾᔪᑎ ᐃᓕᔭᐅᓚᐅᖅᑐᖅ ᐊᐅᓚᐅᑎᖃᕐᕕᖓᓄᑦ ᐃᓚᖓᓄᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᑉ ᐱᖓᓱᐃᓕᖓᔪᓄᑦ ᐊᖏᕐᕋᕆᔭᐅᔪᓄᑦ ᐃᒡᓗᓄᑦ ᑎᑭᖦᖢᒍ ᔫᓂ 2024.

ᑖᓐᓇᐅᑎᓪᓗᒍ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᐸᖅᑭᓯᓚᐅᖅᑐᑦ ᐊᐅᓚᖦᖢᒍᓗ ᓱᕈᐃᔭᐃᔾᔪᑎ, ᑲᑎᖅᓱᐃᕙᒃᖢᑎᒃ ᐱᓇᓱᐊᕈᓯᑕᒫᑦ ᖃᐅᐃᔨᓴᒐᒃᓴᓂᒃ ᖃᐅᔨᓇᓱᒃᖢᑎᒃ ᖃᓄᖅ ᓱᕈᐃᔭᐃᔾᔪᑎ ᓱᕋᐃᓲᖑᖕᒪᖔᑦ ᑎᒥᓂᙶᖅᑐᓂᒃ. 6 ᑕᖅᑮᑦ ᐊᓂᒍᕐᒪᑕ ᐊᐅᓚᓚᐅᖅᑎᓪᓗᒍ ᐱᓕᕆᓂᖅ ᐃᓱᓕᑕᐅᓪᓗᓂ, BEAST ᓱᕈᐃᔭᐃᔾᔪᑎᓗ ᐊᑐᕈᓐᓃᖅᑎᑕᐅᓚᐅᖅᑐᖅ.

ᖃᐅᔨᔭᐅᔪᑦ ᖃᐅᔨᓴᐅᑎᒥᑦ ᑲᑎᖅᓱᖅᑕᐅᓕᖅᑐᑦ, ᐸᕐᓇᒃᖢᑎᒃ ᖃᐅᔨᔭᐅᔪᑦ ᑎᑎᕋᐅᑕᐅᓗᑎᒃ ᑐᙵᓗᑎᒃ ᖃᐅᔨᔭᐅᔪᓂᑦ ᑲᑎᑕᐅᔪᓂᑦ. ᓯᕗᓂᕐᒥ, ᓴᓇᓯᒪᔪᑦ BEASTᑎᑐᑐᑦ ᐊᑐᕈᓐᓇᑐᐃᓐᓇᕆᐊᓖᑦ ᓱᕈᐃᔭᖅᑕᐅᖏᓐᓂᕐᒥᓂ ᑭᓈᓗᑭᓐᓂᖅᓴᐅᓕᖅᑎᓪᓗᒍ ᐅᑭᐅᖅᑕᖅᑑᑉ ᑭᓈᓗᒃᑯᕕᖏᓐᓂ.

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᕙᐃᐊᑦ ᒃᓕᖏᓐᐳᒡ ᔭᐃᓴᓐ ᒫᔅᓗ ᐊᑐᕈᓐᓃᖅᑎᑦᑎᔪᑦ BEASTᒥᒃ.

ᓄᓇᖅᑲᖅᑳᖅᓯᒪᔪᑦ ᖃᐅᔨᒪᓂᖓ ᐸᐅᕐᖓᓂᒃ ᓄᓇᑦᓯᐊᕐᒥ

2017ᒥ ᖃᐅᔨᓴᖅᑐᑦ ᐊᒃᖤᓂᒃ ᐅᑭᐅᖅᑕᖅᑐᐊᓂ ᓄᓇᑦᑎᐊᑉ ᖃᐅᔨᓚᐅᖅᑐᑦ ᐊᒃᖤᐃᑦ ᑭᒍᑕᖏᕐᓇᖅᑐᒃᑳᓗᐃᑦ, ᐱᓗᐊᖅᑐᒥᒃ Vaccinium vitas-idaea—ᑭᒻᒥᓇᐃᑦ.

“ᐅᖃᖃᑦᑕᓚᐅᖅᑐᑦ ᐃᓚᖏᓐᓂᑦ ᓄᓇᓕᖕᓂᑦ ᑭᒍᑕᖏᕐᓇᑭᑦᑐᒡᒎᖅ. ᑭᒍᑕᖏᕐᓇᑭᓐᓂᖅᓴᐅᓕᑐᐃᓐᓇᖏᑦᑐᑦ ᐱᕈᖅᑐᓂᑦ, ᑭᓯᐊᓂᑦᑕᐅᖅ ᐊᖏᓂᖏᑦ ᑭᒍᑕᖏᕐᓇᑦ. ᐊᒻᒪᓗ, ᐊᓯᔾᔨᖅᑐᖃᓚᐅᕐᒪᑦᑕᐅᖅ ᖃᓄᐃᓕᖓᓂᖏᓐᓄᑦ ᑭᒍᑕᖏᕐᓇᑦ. ᐸᓂᕐᓂᖅᓴᐅᓚᐅᖅᑐᑦ,” ᐅᖃᖅᑐᖅ ᒃᓕᐊᕐ ᓯᖑ, ᐆᒪᔪᕐᓂᐊᖅᑎᕕᓂᖅ ᐊᕕᒃᓯᒪᔪᑦ ᒐᕙᒻᒐᖓᑕ ᐆᒪᔪᖃᑎᒌᖏᑦᑐᖃᕐᓂᕐᓄᑦ ᐱᓕᕆᔭᖓᓄᑦ.

ᐊᑯᓂᒧᑦ ᑭᒍᑕᖏᕐᓇᖅᑕᖅᓯᒪᔪᓄᑦ, ᐆᒪᔪᓄᑦ ᐅᓗᕆᐊᓇᖅᑐᒦᑦᑐᓄᑦ ᑲᑎᒪᔨᖏᑦ, ᑕᑯᓇᓚᐅᑐᑦ ᐊᒃᖤᓄᑦ ᓇᓄᕐᓄᑦ ᐅᓂᒃᑳᒥᒃ, ᖃᐅᔨᓴᖁᔨᓚᐅᖅᑐᑦ ᑭᒍᑕᖏᕐᓇᓄᑦ ᑐᙵᓗᑎᒃ ᓄᓇᖃᖅᑳᖅᑐᑦ ᖃᐅᔨᒪᔾᔪᓯᖏᓐᓄᑦ, ᑖᒃᑯᐊ ᖃᐅᔨᒪᔾᔪᓰᑦ ᐊᑐᕐᒪᑕ ᐅᖓᓯᒃᑐᑲᓪᓚᓄᑦ ᓄᓇᓄᑦ ᐊᑯᓂᐊᓗᖕᓂᓗᓂᒃ.

ᒃᓕᐊᕐ, ᐊᐅᓚᑦᑎᓚᐅᖅᑐᖅ ᓄᓇᖃᖅᑳᖅᑐᑦ ᖃᐅᔨᒪᔭᐅᔪᓂᒃ ᑭᒍᑕᖏᕐᓇᓄᑦ ᐱᓇᖕᓇᖏᓐᓂ ᐊᕕᒃᓱᒪᔪᒧᑦ ᐱᓕᕆᔪᓂᒃ, ᐃᑲᔪᓚᐅᖅᑐᖅ ᐸᕐᓇᐃᔪᓄᑦ ᖃᐅᔨᓴᖃᑎᒌᓄᑦ ᖃᐅᔨᒪᔨᑕᕐᓂᒃ ᐊᕕᒃᓯᒪᔪᕐᒥᑦ. ᐊᑐᓂ ᑲᑎᒪᔩᑦ ᐊᐱᖅᓱᓚᐅᖅᑐᑦ ᑭᒍᑕᖏᕐᓇᖅᑕᓕᒪᔪᓂᒃ-ᐃᓐᓇᐅᒐᔪᒃᖢᑎᒃ-ᓇᖕᒥᓂᖅ ᓄᓇᓕᖕᒥᓂ ᑲᑎᖅᓱᐃᓪᓗᑎᒃ ᖃᐅᔨᒪᔭᐅᔪᑐᖃᓂᒃ ᑭᒍᑕᖏᕐᓇᓄᑦ. ᓄᕙᖕᓇᕐᔪᐊᕐᒧᑦ ᑭᖑᕙᕆᐊᕈᑕᐅᓪᓗᓂ ᐱᓕᕆᓂᕐᒧᑦ, ᑲᑎᒪᔩᑦ 10ᖑᓪᓗᑎᒃ ᑲᑎᓚᐅᖅᑐᑦ ᔫᓂᒥ 2022ᒥ ᖃᐅᔨᓴᕐᓂᕐᓄᑦ ᐸᕐᓇᐅᑎᓕᐅᖅᖢᑎᒃ, ᐱᔭᕇᕐᓗᒋᑦ ᐊᐱᖅᓱᖅᑐᓄᑦ ᐊᐱᖅᑯᑏᑦ, ᐱᑦᑎᐊᕐᓂᕐᓄᑦ ᐊᖏᖅᑕᐅᓗᑎᒃ, ᖃᐅᔨᓴᕐᓂᕐᓄᓪᓗ ᐱᔪᓐᓇᐅᑎᑖᕐᓗᑎᒃ. ᖃᐅᔨᓴᓕᖅᖢᑎᒃ 2023ᒥ.

ᐱ ᓕᐱᒻ, ᑲᑎᒪᔨ ᖃᐅᔨᓴᕐᓂᕐᓄᑦ ᑲᑎᒪᔨᕋᓛᓄᑦ ᓇᒃᓴᖅᐸᐃᑦ ᐃᓅᓯᓕᒫᒥᓄᑦ ᐊᑐᖅᓯᒪᔭᓂ ᑭᒍᑕᖏᕐᓇᖅᑕᖅᖢᓂ ᕼᐊᐃ ᕆᕗᒥ. ᑯᕇ ᐊᕐᓇᐅᓪᓗᓂ, ᐱ ᐅᖃᐅᓯᕆᕙᐃᑦ ᖃᐅᔨᒪᔭᓂ ᑲᑎᖅᓱᐃᓯᓐᓈᑦ ᖃᐅᔨᒪᔭᐅᔪᓂᒃ ᐃᓐᓇᓂᑦ ᓄᓇᓕᖕᒥᓂᑦ. ᐅᖃᖅᑐᖅ ᑭᒻᒥᓇᐃᑦ ᐊᑑᑎᖃᑦᑎᐊᖏᓐᓇᖅᓯᒪᔪᑦ ᐃᓅᖃᑎᒌᖏᑕ ᓂᕿᖏᓐᓄᑦ.

“ᐱᕐᔪᐊᖑᔪᑦ ᑎᒥᑦᑕ ᖃᓄᐃᖏᓐᓂᖏᓐᓄᑦ” ᐅᖃᖅᑐᖅ, {“ᓲᖃᐃ ᑭᓱᕈᓘᔭᖃᕐᒪᑕ ᕙᐃᑕᒥᓐᑎᑐᑦ, ᐱᓗᐊᖅᑐᒥᒃ ᕙᐃᑕᒥᓐ .”

ᐅᓪᓗᑯᑖᖃᖃᑦᑕᖅᑎᓪᓗᒋᑦ ᐅᑭᐅᖅᑕᖅᑐᒥ, ᑭᒍᑕᖏᕐᓇᐃᑦ ᐳᖅᑐᓂᖅᓴᓂᒃ ᑎᒥᓄᑦ ᐃᑲᔫᑎᖃᕐᓂᖅᓴᐃᑦ ᐱᕈᖅᑎᑕᐅᔪᓂᑦ ᖃᓪᓗᓈᓂᑦ.

ᐱ ᐅᖃᐅᓯᕆᕙᐃᑦ ᐱᕐᔪᐊᖑᓂᖓᑕ ᖃᐅᔨᓴᕐᓂᐅᑉ.

“ᓂᕿᖃᕈᓐᓇᕐᓂᕐᓅᖕᒪᑦ. ᐃᓄᐃᑦ ᑐᑭᓯᔭᕆᐊᓖᑦ ᐱᕐᔪᐊᖑᓂᖏᓐᓂᒃ ᐱᕈᖅᑐᑦ ᑭᒍᑕᖏᕐᓇᓪᓗ ᐊᓐᓇᐅᒪᓂᑦᑎᓐᓄᑦ ᐃᓅᓪᓗᑕ, ᐊᑐᕈᓯᑐᖃᑐᐊᑦᑎᓐᓅᖏᑦᑐᖅ ᓯᕗᓂᕐᒧᑦᑕᐅᖅ. ᓇᓗᓇᖅᑐᖅ ᑭᓱᓄᑦ ᓵᑕᐅᓂᐊᖅᑐᒍᑦ ᓯᓚᐃᑦ ᐊᓯᔾᔨᕐᓂᖏᓐᓂᑦ-ᐊᒃᓱᓪᓕ ᖃᐅᔨᔭᐅᔪᓂᒃ ᐱᓯᒪᕗᒍᑦ,” ᐅᖃᖅᑐᖅ.

ᐅᓪᓗᒥᒧᑦ, ᖃᐅᔨᓴᖃᑎᒌᑦ ᐊᐱᖅᓱᕇᖅᓯᒪᕗᑦ 14 ᓄᓇᓕᖕᓂ ᓄᓇᑦᑎᐊᕐᒥ. ᖃᐅᔨᔭᖏᑦ ᓇᓗᓇᐃᖅᓯᕗᑦ ᓯᓚᐃᑦ ᐊᓯᔾᔨᕐᓂᖏᑦ ᐅᓗᕆᐊᓇᖅᑐᑦ ᐊᕙᑎᓄᑦ ᑭᒍᑕᖏᕐᓇᓕᖕᓄᑦ, ᐊᒃᑐᖅᖢᒋᑦ ᐱᑕᖃᐃᓐᓇᕈᓐᓇᕐᓂᖏᑦ. ᒪᖁᖏᔅᓲᔭᖃᑦᑕᕐᓃᑦ ᓇᐹᖅᑐᓪᓗ ᐃᑭᑦᑐᑦ ᖃᖓᑦᑎᐊᕐᓂ ᐊᕐᕌᒍᓂ ᐊᒃᑐᐃᕐᔪᐊᖅᓯᒪᕗᑦ ᑭᒍᑕᖏᕐᓇᓂᒃ ᐃᓚᖏᓐᓂ ᓄᓇᓂ.

ᖃᐅᔨᓴᖃᑎᒌᑦ ᓯᕗᓪᓕᖅᐹᖅᓯᐅᑎᒥᒃ ᐅᓂᒃᑳᓕᐅᓕᖅᑐᑦ ᖃᓄᐃᓕᖓᓂᖏᓐᓄᑦ ᓄᓇᑦᑎᐊᑉ ᑭᒍᑕᖏᕐᓇᖏᓐᓄᑦ. ᐸᕐᓇᖕᒥᔪᑦᑕᐅᖅ ᐃᓕᓐᓂᐊᖅᑐᓄᑦ ᑐᕌᕈᑎᒥᒃ ᓄᓇᓕᖕᓄᑦ, ᐅᓪᓗᖅᓯᐅᑎᖃᕐᓗᑎᒃ ᐱᕈᕐᓇᓄᑦ ᓴᖅᑭᔮᖅᑎᑦᑎᔪᓂᒃ ᐊᔾᔨᒌᖏᓐᓂᕐᓂᒃ ᓄᓇᓂ ᓄᓇᑦᑎᐊᕐᒥ. ᑎᑎᕋᑦ ᐊᐱᖅᓱᖅᑕᓂᑦ ᐅᑎᖅᑎᑕᐅᓂᐊᖅᑐᑦ ᓄᓇᓕᖕᓄᑦ ᐊᓐᓂᕐᓇᓪᓚᒃᑐᑎᑐᑦ ᖃᐅᔨᒪᔾᔪᑕᐅᓗᑎᒃ.

ᒃᓕᐊᕐ ᐅᖃᖅᑐᖅ ᓄᓇᒥᐅᓂᒃ ᐊᑐᕐᓂᕐᓄᑦ ᐊᐅᓚᑦᑎᓃᑦ ᑕᐃᒪᙵᓂᑦ ᑐᕌᓲᑦ ᐊᖑᓇᓱᖕᓂᕐᓄᑦ, ᒥᑭᒋᐊᕐᓂᕐᓄᑦ ᐃᖃᓗᒐᓱᖕᓂᕐᓄᓪᓗ.

“ᐊᒻᒪᓗ ᑕᑯᔪᓐᓇᕐᓗᓂ ᐅᖓᑖᓄᑦ ᐊᖏᔪᐊᓗᐃᑦ ᓂᕐᔪᑏᑦ ᓴᓂᐊᓂ ᐃᓅᕝᕕᒋᔭᖏᑕ, ᐆᒪᔪᓪᓗ ᐃᓅᔾᔨᑎᒋᔭᖏᑦ, ᐊᑑᑎᖃᑦᑎᐊᖅᖢᓂ ᐃᓚᒋᕙᐅᒃ ᑖᔅᓱᒪ ᐱᓕᕆᓂᐅᑉ ᐊᓕᐊᓇᐃᒋᓪᓚᒃᖢᑎᒍᑦ.”

ᓯᕗᓪᓕᖅᐹᒧᑦ ᑲᑎᑦᑐᑦ ᑲᑎᒪᔩᑦ ᔫᓂ 2022ᒥ ᑉᒥ. ᑎᐊᓂ ᑕᖕᒫᕐᕕᖕᒥ ᑎᐊᑕᒥ, ᓄᓇᑦᑎᐊᖅ. ᑐᓄᐊᓃᑦᑐᑦ, ᓴᐅᒥᖕᒥᑦ ᑕᓕᖅᐱᖕᒧᑦ: ᒥᓯᐊᓪ ᒍᕋᑉᑭ, ᐃᓚᐃᓐ ᓚᒪᓚᐃᔅ, ᒪᑎᓴᓐ ᒥᓇᓱ ᒥᐅᓪᓂᒃ, ᓕᓚ ᕗᕋᐃᓱ ᐃᕋᔅᒪᔅ, ᒃᓕᐊᕐ ᓯᖑ, ᑎᓂᔅ ᓇᑭᑯ

ᓵᖓᓂ, ᓴᐅᒥᖕᒥᑦ ᑕᓕᖅᐱᖕᒧᑦ: ᐊᓇ ᑐᕋᓱ, ᒪᒍᕋᑦ ᓕᔅᒪᓐ, ᒪᒍᕋᑦ ᒪᒃᑕᓄᓪᑦ, ᓯᓖᓐ ᐳᕋᒃᑐ, ᐊᓂ ᐸᑯᓪ

ᐊᔾᔨ : ᐸᐱ ᑐᕋᐃᒌᔅ

ᓄᑖᖅ ᑎᑎᕋᖅᓯᒪᔪᖅ: ᐊᕝᕗᖅᑕᐅᓕᓵᖅᑐᑦ ᑭᒻᒥᓇᐃᑦ.

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐅᑭᐅᖅᑕᖅᑐᓂ ᑭᒡᓕᓯᓂᐊᕐᓂᕐᓄᑦ ᓵᓚᒃᓴᒐᖓ

ᐊᕐᕌᒍᑕᒫᑦ ᐱᒋᐊᖅᖢᓂ 2015ᒥ, ᐅᑭᐅᖅᑕᖅᑐᒥ ᑭᒡᓕᓯᓂᐊᕐᓂᕐᓄᑦ ᓵᓚᒃᓴᒐᖅ ᑐᓂᔭᐅᓲᖅ ᐊᕐᑎᒃᓂᐊᑦ ᑲᑎᒪᔪᓂ ᐃᓄᖕᒧᑦ ᐱᓕᕆᖃᑎᒌᓄᓪᓘᓐᓃᑦ ᐃᑲᔪᓪᓚᒃᓯᒪᔪᓄᑦ ᓯᕗᒧᐊᖅᑎᑦᑎᓗᑎᒃ ᖃᐅᔨᒪᔭᐅᔪᓂᒃ ᑐᑭᓯᓂᕐᓂᒡᓗ ᑲᓇᑕᒥᐅᑦ ᐅᑭᐅᖅᑕᖅᑐᐊᓂᒃ. ᐊᕐᕌᒍᑕᒫᑦ ᑐᓂᔭᐅᓲᑦ ᐱᖃᓯᐅᔾᔨᔪᖅ $100,000ᓂᒃ ᓯᓐᑎᓂᐊᕆ ᐅᔭᒥᖕᒥᒡᓗ.

2024: ᐊᒃᓚᕕᒃ ᐊᖑᓇᓱᒃᑐᓕᕆᔨᒃᑯᑦ ᒥᑭᒐᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖏᑦ  

ᓄᓇᓕᖕᓄᑦ ᑐᙵᔪᑦ ᖃᐅᔨᒪᔭᐅᔪᓂᒃ ᑐᓴᖅᑎᑦᑎᓃᑦ ᐆᒪᔪᓂᒡᓗ ᓄᖑᔾᔭᐃᖅᓯᓃᑦ

ᑲᑎᒪᔨᖏᑦ ᓯᕗᓕᖅᑎᐅᓯᒪᔪᑦ ᐊᕙᑎᓕᕆᓂᕐᓄᑦ ᓴᐳᔾᔨᔨᐅᓂᕐᓄᑦ ᖃᐅᔨᒪᔭᐅᔪᓂᓗ ᑐᓴᖅᑕᐅᑎᑦᑎᓂᕐᓄᑦ ᑲᓇᑕᐅᑉ ᐅᑭᐅᖅᑕᖅᑐᐊᓂ ᐅᖓᑖᓄᑦ 40 ᐊᕐᕌᒍᓄᑦ. ᑲᑐᔾᔨᖃᑎᖃᓲᑦ ᖃᐅᔨᓴᖅᑎᓂᒃ ᐊᔾᔨᒌᖏᑦᑐᓂᒃ ᐱᓕᕆᔪᓂᒃ ᒐᕙᒪᓕᖕᓂᒡᓗ ᐊᓯᓂᒃ, ᐱᕈᖅᓴᐃᓪᓗᑎᒃ ᑲᑐᔨᖃᑎᒌᖕᓂᕐᓂᒃ ᑎᒥᓄᑦ ᓴᓇᖃᑎᒋᓪᓗᒋᓪᓗ ᑭᒡᓕᓯᓂᐊᕐᓂᕐᓄᑦ ᐱᓕᕆᐊᒃᓴᓂᒃ ᐃᓚᓕᐅᔾᔨᔪᓂᒃ ᓄᓇᖃᖅᑳᖅᑐᑦ ᖃᐅᔨᒪᔭᖏᓐᓂᒃ.

2023: ᑐᕆᕗ ᐱᐊᓪ, PhD, SmartICEᓗ  

ᓄᓇᓕᖕᓄᑦ ᑐᙵᔪᑦ ᐊᕙᑎᓕᕆᓂᕐᓄᑦ ᖃᐅᔨᓴᕐᓃᑦ

ᑐᕆᕗ ᐱᐊᓪ ᓴᖅᑭᑦᑎᓚᐅᖅᑐᖅ SmartICEᒥᒃ, ᑲᑎᑦᑎᓲᖅ ᓄᓇᖃᖅᑳᖅᑐᑦ ᖃᐅᔨᒪᔭᖏᓐᓂᒃ ᐱᐅᓛᓄᑦ ᓴᓇᓯᒪᔪᓄᑦ ᐱᕕᖃᕈᑕᐅᓪᓗᑎᒃ ᑕᕝᕙᙵᑲᐅᑎᒋᒥᑦ ᖃᐅᔨᒪᔭᐅᔪᓄᑦ ᓯᑯᐃᑦ ᖃᓄᐃᓕᖓᓂᖏᓐᓄᑦ. ᐱᓕᕆᓂᖓᑦ ᐊᑑᑎᖃᑦᑎᐊᖅᓯᒪᔪᖅ ᐃᑲᔫᑕᐅᓪᓗᓂ ᐊᓯᔾᔩᓂᕐᓄᑦ ᖃᓄᖅ ᖃᐅᔨᒪᔭᐅᔪᑦ ᓴᖅᑭᑕᐅᓲᖑᓂᖏᓐᓄᑦ ᐅᖃᐅᓯᐅᓂᖏᓐᓄᓪᓗ.

2022: ᓗᑲᓯ ᐊᕋᒍᑕᐃᓇᖅ  

ᓄᓇᖃᖅᑳᖅᑐᓂᑦ ᐆᒪᔫᖃᑎᒌᖏᑦᑐᓄᑦ ᖃᐅᔨᒪᔭᐅᔪᑦ ᐊᕙᑎᓕᕆᓂᕐᓄᓪᓗ ᐸᖅᑭᔨᐅᓃᑦ

30 ᐊᕐᕌᒍᓄᑦ, ᓗᑲᓯ ᐊᕋᒍᑕᐃᓇᖅ, ᓴᓂᑭᓗᐊᕐᒥᐅᖅ, ᐳᐃᒍᔾᔭᐃᖅᓯᓯᒪᕗᖅ ᓄᓇᖃᖅᑳᖅᑐᑦ ᐆᒪᔫᖃᑎᒌᖏᑦᑐᓄᑦ ᖃᐅᔨᒪᔭᐅᔪᓂᒃ ᐃᑲᔪᖅᓯᒪᓪᓗᓂᓗ ᖃᐅᔨᓴᖅᑐᓄᑦ ᐊᓯᔾᔨᖅᐸᓪᓕᐊᔪᓄᑦ ᐊᕙᑎᓄᑦ ᑕᓯᐅᔭᕐᔪᐊᕐᒥ.

2021: ᑕᐃᕕᑦ ᐸᐳ, PhD  

ᐊᕙᑏᑦ ᓄᓇᐃᓪᓗ  

 ᑕᐃᕕᑦ ᐸᐴᑉ ᖃᐅᔨᓴᖅᑕᖏᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ ᐊᕙᑎᒃᑯᓪᓗ ᐃᓅᓯᒃᑯᑦ ᑮᓇᐅᔭᑎᒍᓪᓗ ᐊᒃᑐᐃᓂᒋᓪᓗ ᐃᑲᔪᓚᐅᖅᑐᑦ ᐋᖅᑭᒃᓯᔾᔪᑕᐅᔪᓄᑦ ᐊᕕᒃᓯᒪᔪᑦ ᑲᓇᑕᒧᑦ ᓄᓇᕐᔪᐊᕐᒧᓪᓗ ᐊᑐᐊᒐᓂᒃ.

ᐃᓚᓕᐅᑎᓚᐅᖅᑕᖏᑦ ᓄᓇᖃᖅᑳᖅᑐᑦ ᐃᓱᒪᒋᔭᖏᑦ ᐱᓕᕆᔭᒥᓄᑦ ᐃᓕᓴᐃᓪᓗᓂᓗ ᒪᒃᑯᒃᑐᓂᒃ ᑭᒡᓕᓯᓂᐊᖅᑎᓂᒃ ᐃᒃᐱᒋᓗᒋᑦ ᐊᒃᓱᕉᑎᒋᓂᖅᓴᕆᓗᒋᓪᓗ ᖃᐅᔨᓴᕐᓂᕐᓄᑦ ᖃᐅᔨᓴᕆᐊᓖᑦ ᐊᐱᖅᑯᑎᖏᓪᓗ

ᓄᓇᖃᖅᑳᖅᑐᑦ ᓄᓇᓖᑦ.

2020: ᕙᐃᓐ ᐸᓚᕐᑦ, PhD  

ᓄᓇᐃᑦ

ᐃᖅᑲᓇᐃᔭᕐᓂᓕᒫᒥᓂ, ᕙᐃᓐ ᐸᓚᕐᑦ ᓴᖅᑭᑦᑎᓚᐅᖅᑐᖅ ᐅᓄᖅᑐᑲᓪᓚᖕᓂᒃ ᖃᐅᔨᔭᐅᓕᓵᖅᑐᓂᒃ ᐋᖅᑭᒃᓯᒪᓂᖏᓐᓄᑦ ᓅᒃᑕᕐᓂᖏᓐᓄᓪᓗ ᓄᓇᐃᑦ ᓯᕐᒥᖏᑕ. ᐱᓕᕆᓂᖓᑦᑕᐅᖅ ᓄᑖᓂᒃ ᑐᑭᓯᓂᖅᑖᖅᑎᑦᑎᓚᐅᕐᒥᔪᖅ ᓄᓇᕐᔪᐊᑉ ᐊᑎᖓᓂ ᐊᕙᑎᓂᒃ, ᐱᓕᕆᔾᔪᓯᕐᓂᒡᓗ ᐊᒃᑐᐃᔪᓂᒃ ᓄᓇᐃᑦ ᓯᕐᒥᖏᓐᓂᒃ ᐊᒃᑐᖅᑕᐅᓪᓗᑎᒃ ᓄᓇᓄᑦ ᓯᖒᕆᕐᒥ.

2019: ᔪᓕ ᑯᕈᐃᒃᓴᓐᒃ, PhD  

ᐃᑦᑕᕐᓂᓴᓕᕆᔨ

ᔪᓕ ᑯᕈᐃᒃᓴᓐᒃ ᐊᑯᓂᒧᑦ ᐃᓕᓴᕆᔭᐅᑦᑎᐊᖅᓯᒪᔪᕐᒥᒡᓗ ᐳᐃᒍᔾᔭᐃᖅᓯᓯᒪᕗᖅ ᐅᖃᐅᓯᒃᑯᑦ ᕿᒪᒃᑕᑦᑎᓐᓂᑦ ᐃᓅᓯᕐᓂᓗ ᐅᓂᒃᑳᓂᒃ ᐊᑕᐸᔅᑲᓐ ᑦᓕᖏᑦ ᐃᓐᓇᓂᑦ, ᑕᑯᓇᒃᖢᒋᑦ ᔪᑲᓐ ᓄᖃᖅᑳᖅᑐᑦ ᐋᖅᑭᒃᓯᒪᓂᖏᑦ ᐅᓂᒃᑳᕐᓂᒃᑯᑦ ᖃᐅᔨᒪᔭᒃᑯᓪᓗ.

2018: ᓄᓇᕕᖕᒥ ᖃᐅᔨᓴᕐᕕᒃ  

ᓄᓇᓕᖕᓄᑦ ᑐᙵᔪᑦ ᖃᐅᔨᓴᕐᓃᑦ

40 ᐊᕐᕌᒍᓄᑦ, the ᓄᓇᕕᖕᒥ ᖃᐅᔨᓴᕐᕕᒃ ᑰᒡᔪᐊᕐᒥ, ᖃᐅᔨᓴᖅᓯᒪᕗᑦ ᓄᓇᓕᖕᓄᑦ ᑐᙵᔪᓂᒃ ᖃᐅᔨᓴᕐᓂᕐᓂᒃ. ᖃᐅᔨᓴᕐᕕᒃ ᓴᓇᓯᒪᕗᑦ ᖃᐅᔨᓴᕈᑎᓂᒃ ᐃᓚᓕᐅᔾᔨᔪᓂᒃ ᑭᒡᓕᓯᓂᐊᕐᓂᕐᓂᒃ ᓄᓇᖃᖅᑳᖅᑐᓪᓗ ᖃᐅᔨᒪᔭᖏᓐᓂᒃ, ᓲᕐᓗᑐᑦ ᐊᕙᑎᓕᕆᓂᕐᓄᑦ ᖃᐅᔨᓴᕐᓂᕐᓂᒃ ᐃᑲᔪᖅᑐᓂᒃ ᓴᐳᑎᓗᒋᑦ ᖃᓄᐃᖏᓐᓂᖏᑦ ᓄᓇᕕᖕᒥᐅᑦ ᐃᓄᐃᑦ.

2017: ᔭᓐ ᐃᖕᓚᓐ PhD  

ᐅᑭᐅᖅᑕᖅᑐᓂ ᐊᕙᑎᓂ ᐊᓯᔾᔨᕐᓃᑦ

ᔭᓐ ᐃᖕᓚᓐ ᐃᓅᓯᓕᒫᒥᓄᑦ ᖃᐅᔨᓴᖅᓯᒪᔪᖅ ᐊᕙᑎᒃᑯᑦ ᓯᓚᒃᑯᓪᓗ ᖃᓄᐃᓯᒪᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᕿᑭᖅᑕᓂ. ᐊᒃᓱᕈᖅᖢᓂ ᐃᑲᔪᖅᑐᓲᖅ ᓴᐳᔾᔭᐅᓂᖏᓐᓄᑦ ᐅᑭᐅᖅᑕᖅᑑᑉ ᐊᕙᑎᖏᑦ ᐊᑑᑎᖃᑦᑎᐊᓚᐅᖅᖢᓂᓗ ᓴᓇᔭᐅᓂᖓᓄᑦ ᑲᓇᑕᐅᑉ ᐅᑭᐅᖅᑕᖅᑐᒦᓛᖓᓂᒃ ᒥᕐᖑᐃᖅᓯᕐᕕᖕᒥᒃ, ᖁᑦᑎᖕᓂᖅᐹᖅ, ᐊᐅᓱᐃᑦᑑᑉ ᕿᑭᖅᑕᖓᓂ..

2016: ᔭᓐ ᔅᒧᓪ, PhD  

ᓄᓇᐃᓐᓇᕐᓂ ᐃᒥᐅᖃᑎᒌᓕᕆᓃᑦ

ᔭᓐ ᔅᒧᓪ ᓴᓇᓚᐅᖅᑐᖅ ᐱᓕᕆᔾᔪᓯᕐᓂᒃ ᐊᓯᔾᔩᔪᓂᒃ ᖃᐅᔨᓴᕐᓂᕐᓂᒃ ᐅᑭᐅᖅᑕᖅᑐᒥ ᐆᒪᔫᖃᑎᒌᖏᑦᑐᓄᑦ. ᓴᖅᑭᔮᖅᑎᑦᑎᓚᐅᖅᑐᖅ ᐃᔨᑐᐃᓐᓇᓄᑦ ᑕᑯᒃᑕᐅᖏᑦᑐᑦ ᐱᕈᖅᑐᕋᓛᑦ ᐃᓗᐊᓂᑦᑐᑦ ᑕᓯᕐᓂ ᒥᑭᓐᓂᖅᓴᓂᓗ ᑕᓯᕐᓂ ᓴᙱᔪᐊᓘᕗᑦ ᐱᓕᕆᔾᔪᑕᐅᓪᓗᑎᒃ ᑐᑭᓯᓂᕐᓄᑦ ᐊᕙᑎᓂ ᐊᓯᔾᔨᕐᓂᕐᓂᒃ, ᓯᕗᓪᓕᖅᐹᖑᓪᓗᓂ ᐅᑭᐅᖅᑕᖅᑐᒥ ᓯᓚᐃᑦ ᐊᓯᔾᔨᕐᓂᖏᓐᓄᑦ ᖃᐅᔨᓴᖅᑐᓂ.

2015: ᓗᐃ ᕗᐊᑎᐊᐃ, PhD  

ᑕᕆᐅᕐᓂ ᐆᒪᔪᓕᕆᓃᑦ

ᓯᕗᓕᖅᑎᐅᓂᕐᒥᓄᑦ, ᓗᐃ ᕗᐊᑎᐊᐃ ᑲᑎᑦᑎᓚᐅᖅᑐᖅ ᓄᓇᕐᔪᐊᕐᒥᐅᓂᒃ ᐃᓕᓐᓇᓪᓚᒃᓯᒪᔪᓂᒃ, ᐃᓄᖕᓂᒃ ᐱᓕᕆᖃᑕᐅᔪᓂᒃ, ᑮᓇᐅᔭᓕᐅᕋᓱᐊᖅᑎᓂᒃ ᐊᑐᐊᓕᐅᖅᑎᓂᒡᓗ ᐳᐃᒍᔾᔭᐃᕐᓗᒋᑦ ᐊᔾᔨᖏᓐᓂᒡᓗ ᓴᓇᓗᓂ ᐊᒃᑐᐃᓂᕐᓂᒃ ᓯᓚᐃᑦ ᐊᓯᔾᔨᕐᓂᖏᓐᓂᑦ, ᐃᑲᔫᑕᐅᓪᓗᑎᒃ ᖃᐅᔨᒪᔭᐅᓄᑦ ᐊᑐᐊᒐᓕᐅᕐᓂᕐᓄᑦ ᐃᑲᔫᑕᐅᓗᑎᒃ ᑲᓇᑕᒥᐅᓄᑦ.

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓵᓚᒃᓴᖅᑎᑕᖏᑦ ᑮᓇᐅᔭᖅᑖᖅᑎᑕᖏᓪᓗ ᐃᓕᓐᓂᐊᕐᓂᕐᓄᑦ, 2023–2024

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐃᓕᓐᓂᐊᖅᑎᖓᓄᑦ $50,000 

ᐊᐃᒥ ᑲᒋ, PhD

ᖃᓄᐃᖏᓐᓂᕐᓄᑦ ᐃᓅᓯᕐᓄᓪᓗ ᑭᒡᓕᓯᓂᐊᕐᓃᑦ

ᓄᓇᕘᒥ ᖃᐅᔨᓴᕐᕕᒃ

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓄᓇᕐᔪᐊᑉ ᐊᑎᖓ

ᐃᓕᓐᓂᐊᖅᑐᒧᑦ ᑮᓇᐅᔭᖅᑖᖅᑎᑦᑎᓂᖅ

$10,000

ᐳᕋᐃᑎ ᐅᑲᓄ, PhD 

ᐆᒪᔪᓕᕆᓃᑦ

ᒪᒋᓪ ᓯᓚᑦᑐᖅᓴᕐᕕᒡᔪᐊᖅ

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐃᓕᓐᓂᐊᖅᑐᒧᑦ ᑮᓇᐅᔭᖅᑖᖅᑎᑦᑎᓂᖅ

$10,000 

ᐱᓄᐊ ᓚᐅᓴᓐ, PhD 

ᓄᓇᓕᕆᓃᑦ

ᓯᓚᑦᑐᖅᓴᕐᕕᒡᔪᐊᖓ ᐊᑐᕚᑉ

ᒃᓚᑎᐊ ᕼᐋᔅ, PhD 

ᐆᒪᔪᓕᕆᓃᑦ

ᕕᐅᕗᕆᑦ ᓗᐊᕆᐊᐃ ᓯᓚᑦᑐᖅᓴᕐᕕᒡᔪᐊᖓ

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐅᑭᐅᖅᑕᖅᑐᒥᐅᒧᑦ ᐃᓕᓐᓂᐊᖅᑐᒧᑦ ᑮᓇᐅᔭᖅᑖᖅᑎᑦᑎᓂᖅ$10,000 

ᐊᒪᓐᑕ ᐸᕙᓗ, PhD 

ᓄᓇᓕᕆᓃᑦ

ᓯᓚᑦᑐᖅᓴᕐᕕᒡᔪᐊᖓ ᑐᕋᓐᑑᑉ

ᑯᕆᔅᑎᓐ ᑕᓐᐸᕐ, MSc 

ᐃᓚᓕᐅᔾᔪᓲᑦ ᐆᒪᔪᓕᕆᓃᑦ

ᕕᐅᕗᕆᑦ ᓗᐊᕆᐊᐃ ᓯᓚᑦᑐᖅᓴᕐᕕᒡᔪᐊᖓ

ᓗᐃᔅ ᒧᐊᑯᕋᕝᑦ, PhD 

ᐃᓅᓯᒃᑯᑦ ᐃᖅᑲᖅᑐᐃᓕᕆᓂᕐᓄᑦ ᐃᓕᓐᓂᐊᕐᓃᑦ

ᓯᓚᑦᑐᖅᓴᕐᕕᒡᔪᐊᖓ ᑐᕋᓐᑑᑉ

ᔨᐊᓯ ᐅᓪᓴᓐ, MSc 

ᐆᒪᔪᓄᑦ ᐃᓅᓕᓴᐃᓃᑦ, ᖁᐱᕐᕈᓕᓃᑦ 

ᓯᓚᑦᑐᖅᓴᕐᕕᒡᔪᐊᖓ ᑲᐅᒍᕆᐅᑉ

ᑎᕕᓐ ᕕᑎᒡ, MSc 

ᐊᕙᑎᓕᕆᓂᕐᓄᑦ ᑭᒡᓕᓯᓂᐊᕐᓃᑦ

ᓯᓚᑦᑐᖅᓴᕐᕕᒡᔪᐊᖓ ᐅᐊᖕᓇᖓᑕ ᐳᕆᑎᔅ ᑲᓚᒻᐱᐊᑉ

ᐊᐃᒥ ᔪᕆᔅ, MSc 

ᐃᓄᓕᒫᑦ ᖃᓄᐃᖏᓐᓂᖏᓐᓄᑦ ᑭᒡᓕᓯᓂᐊᕐᓃᑦ

ᓯᓚᑦᑐᖅᓴᕐᕕᒡᔪᐊᖓ ᕙᑐᓘᑉ

ᐅᑭᐅᖅᑕᖅᑐᒥᐅᒧᑦ ᑐᓂᔭᐅᔪᑦ $5,000 

ᑯᕆᔅᑎᓐ ᒪᒃᓂᐅᓪ, BSc 

ᐅᑭᐅᖅᑕᖅᑐᓂ ᐊᕙᑎᓕᕆᓂᕐᓄᑦ ᓄᖑᔾᔭᐃᖅᓯᓂᕐᓄᓪᓗ ᑭᒡᓕᓯᓂᐊᕐᓃᑦ

ᔪᑲᓐ ᓯᓚᑦᑐᖅᓴᕐᕕᒡᔪᐊᖓ

ᓴᕋ ᓂᐅᑕᓐ, BSc 

ᐆᒪᔪᓕᕆᓃᑦ

ᔪᑲᓐ ᓯᓚᑦᑐᖅᓴᕐᕕᒡᔪᐊᖓ

ᓯᕗᒧᐊᕐᓗᓂ

ᑖᓐᓇ ᐊᔾᔨ ᓴᖅᑭᔮᖅᑎᑦᑎᕗᖅ ᐃᔅᓯᖓᓂᒃ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐱᓕᕆᔾᔪᓯᖓᑕ ᖃᐅᔨᓴᕐᓂᕐᓄᑦ-ᑲᑎᖦᖢᒋᑦ ᐅᓪᓗᒥᓯᐅᑏᑦ ᐊᑐᖅᑕᐅᔪᑐᖃᓪᓗ ᓴᓇᐅᒐᐃᑦ ᐱᐅᓯᒋᐊᕈᑎᒋᓪᓗᒋᑦ ᑐᑭᓯᓂᑦᑎᓐᓂᒃ ᐅᑭᐅᖅᑕᖅᑐᓂ ᓄᓇᓂᒃ.

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓯᕗᒧᑦ ᑕᐅᑐᒃᑎᓪᓗᒋᑦ ᑭᖑᓪᓕᕐᓄᑦ 10 ᐊᕐᕌᒍᓄᑦ, ᑐᕌᖓᔪᖅ ᓴᙲᒃᑎᒋᐊᕐᓗᒋᑦ ᑲᑎᙵᓃᑦ ᖃᓪᓗᓈᓂᑦ ᑭᒡᓕᓯᓂᐊᖅᑎᓄᑦ ᐅᑭᐅᖅᑕᖅᑐᒥᓪᓗ ᖃᐅᔨᒪᔨᑕᕐᓄᑦ. ᖃᒧᑎᒃ ᓇᐸᔪᕐᓗ ᓇᓗᓇᐃᒃᑯᑕᕆᕙᕗᑦ ᐊᖅᑯᑎᑦᑎᓐᓄᑦ ᓯᕗᒧᑦ.

ᔭᓂᑦ ᑭᖕ, ᐃᒃᓯᕙᐅᑕᖓ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᑎᒪᔨᖏᓐᓄᑦ, ᐅᖃᖅᒃᑐᖅ ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᐊᑑᑎᖃᑦᑎᐊᖅᑐᑦ ᑎᒥᐅᑉ ᐱᓕᕆᐊᒃᓴᖏᓐᓄᑦ.

“ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖓ, ᐃᒡᓗᖓ, ᐊᐅᓚᓪᓚᒃᑐᖅ ᑐᙵᕕᖓ ᑲᑐᔾᔨᖃᑎᒌᓂ ᐅᑭᐅᖅᑕᖅᑐᓄᑦ ᖃᐅᔨᓴᕐᓂᕐᓄᑦ ᖃᐅᔨᒪᔭᐅᔪᓄᓪᓗ-ᐅᖃᐅᓯᖃᖅᐳᖓᓗ ᑕᒪᒃᑮᖕᓂᒃ ᐱᖁᑎᕐᔪᐊᓪᓚᑦᑖᓂᒃ ᐃᖏᕐᕋᓂᖏᓐᓄᓪᓗ ᖃᐅᔨᒪᔭᐅᔪᑦ,” ᐅᖃᖅᑐᖅ ᔭᓂᑦ. “ᐃᓱᒪᖕᒥᔪᖓ ᑭᒡᓕᓯᓂᐊᕐᓂᖅ ᐃᓕᓐᓂᐅᖕᒪᑦ ᓱᓕᒃᑲᓐᓂᐅᓪᓗᓂ. ᐱᑕᖃᕐᓂᖅᓴᐅᓕᖅᑐᖅ ᑭᓱᕈᓘᔭᓄᑦ ᖃᐅᔨᓴᕐᓂᕐᓂᒃ, ᐅᓄᕐᓂᖅᓴᐃᑦ ᑲᑐᔾᔨᖃᑎᒌᒃᑐᑦ, ᖃᐅᔨᒪᔭᐅᔪᓂᒡᓗ ᑐᓴᐅᒪᑎᑦᑎᓂᖅᓴᐃᑦ, ᑐᕌᕈᑕᐃᓐᓇᐅᓪᓗᑎᒃ ᐱᐅᓂᖅᓴᓄᑦ ᖃᐅᔨᓴᕐᓂᕐᓄᑦ. ᑭᒡᓕᓯᓂᐊᕐᓂᕐᓂᒃ ᐃᓕᓐᓂᐅᔪᖅ ᐃᖃᖏᓐᓂᕐᒥᒃ, ᓱᒃᑲᓂᕐᒥᒃ ᐊᔾᔨᒌᖏᑦᑐᓂᒡᓗ ᐱᓕᕆᓂᕐᓂᒃ. ᓲᖃᐃᓗ, ᑖᒃᑯᐊ ᒪᓕᑦᑎᐊᖅᐳᑦ ᖃᓄᖅ ᖃᐅᔨᒪᔭᐅᔪᑦ ᓴᖅᑭᑕᐅᓂᖏᓐᓄᑦ ᐅᑭᐅᖅᑕᖅᑐᒦᑎᓪᓗᒋᓪᓗ.”

ᐊᔾᔨ ᒪᕐᕉᖕᓂᒃ ᖃᒧᑏᖕᓂᒃ ᓇᐸᔪᕐᒥᒡᓗ, ᐊᔾᔨᓕᐅᖅᑕᐅᔪᖅ ᒪᐃ 2018ᒥ, ᐳᐃᒍᔾᔭᐃᖅᓯᕗᖅ ᖃᐅᔨᓴᕐᓂᕐᓄᑦ ᐱᓕᕆᓂᕐᒥᑦ ᓯᑯᒥ ᐃᖃᓗᒃᑑᑦᑎᐊᕐᒥ. ᖃᐅᔨᔭᐅᔪᑦ ᑲᑎᖅᓱᖅᑕᐅᔪᑦ ᐃᑲᔪᖅᐳᑦ ᐋᖅᑭᒃᓱᐃᓗᑎᒃ ᓯᕗᓂᕐᒥ ᖃᐅᔨᓴᖅᑕᓄᑦ ᐅᑭᐅᖅᑕᖅᑑᑉ ᓯᑯᖏᓐᓄᑦ. ᖃᐅᔨᓴᖅᑕᐅᔪᑦ ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᓐᓄᑦ ᐃᑲᔪᖅᑐᑦ ᐅᓪᓗᒥ, ᑕᒪᒃᑮᖕᓂ ᐅᑭᐅᖅᑕᖅᑐᕐᒥ ᓄᓇᕐᔪᐊᑉ ᐊᑎᖓᓂᓗ, ᓯᕗᒧᐊᖅᑎᑦᑎᔪᑦ ᖃᐅᔨᒪᔭᐅᔪᓂᒃ ᐅᑭᐅᖅᑕᖅᑐᓂ ᓄᓇᓂ ᐅᖓᑖᓂᓗ- ᑕᐃᒪᓐᓇᑦᑕᐅᖅ ᕿᒪᒃᑕᑦᑎᓐᓂ ᖃᐅᔨᓴᖅᑕᐅᔪᑦ ᐊᒃᑐᐃᓯᒪᖕᒪᑕ ᒫᓇᐅᔪᖅ ᖃᐅᔨᓴᖅᑕᐅᔪᓂᒃ.

ᓄᓇᕐᔪᐊᕐᒥ ᐅᑭᐅᖅᑕᖅᑐᑦ ᐊᕐᕌᒍᖓ (IPY) ᓴᖅᑭᔮᖅᑎᑦᑎᑦᑎᐊᖅᐳᖅ ᓯᕗᒧᐊᕐᓂᕐᓂᒃ. ᓯᕗᓪᓕᖅᐹᖅ ᓄᓇᕐᔪᐊᕐᒥ ᐅᑭᐅᖅᑕᖅᑐᑦ ᐊᕐᕌᒍᖓᓂ, ᐊᐅᓚᑕᐅᓪᓗᓂ ᐊᑯᓐᓂᖓᓂ 1882 1883ᓗ, ᑲᑐᔾᔭᐅᓪᓗᓂ ᐊᐅᓚᑕᐅᓚᐅᖅᑐᖅ, ᐊᔾᔨᒌᖏᑦᑐᓄᑦ ᑭᓱᓕᕆᓂᕐᓄᑦ, ᐊᕐᕌᒍᓕᒫᒧᑦ ᖃᐅᔨᓴᕐᓂᖅ ᐅᑭᐅᖅᑕᖅᑐᕐᒥᒃ ᓄᓇᕐᔪᐊᑉ ᐊᑎᖓᓂᒡᓗ ᓄᓇᕐᔪᐊᕐᒥᐅᓄᑦ ᖃᐅᔨᓴᖅᑎᓄᑦ. ᐱᖃᖅᑎᑦᑎᓚᐅᖅᑐᑦ ᐊᑑᑎᖃᓗᐊᖅᑐᓂᒃ ᑭᒡᓕᓯᓂᐊᕐᓂᕐᓂᑦ ᖃᐅᔨᔭᐅᔪᓂᒃ ᐊᖏᒡᓕᒋᐊᖅᑎᑦᑎᓚᐅᖅᑐᓂᒃ ᑐᑭᓯᓂᑦᑎᓐᓂᒃ ᐅᑭᐅᖅᑕᖅᑐᓂ ᓄᓇᓂᒃ. ᓄᓇᕐᔪᐊᕐᒥ ᐅᑭᐅᖅᑕᖅᑐᑦ ᐊᕐᕌᒍᐊ ᑕᐃᒪᐃᓲᖅ 25 ᐊᕐᕌᒍᑕᒫᑦ, ᐊᑐᓂ ᐱᕈᖅᓴᐃᓪᓗᑎᒃ ᖃᐅᔨᒪᔭᐅᔪᓄᑦ ᓯᕗᓪᓕᐅᓚᐅᖅᑐᒥᑦ.

7 ᐊᕐᕌᒍᓂ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑭᒡᒐᖅᑐᐃᓂᐊᖅᑐᑦ ᑲᓇᑕᒥᒃ, 2032–33 ᓄᓇᕐᔪᐊᕐᒥ ᐅᑭᐅᖅᑕᖅᑐᑦ ᐊᕐᕌᒍᖓᓂ. ᑕᓪᓕᒪᖓᑦ ᓄᓇᕐᔪᐊᕐᒥ ᐅᑭᐅᖅᑕᖅᑐᑦ ᐊᕐᕌᒍᖓ ᑐᕌᖓᓂᐊᖅᑐᖅ ᐊᔾᔨᖃᖏᑦᑐᓄᑦ ᐊᓯᔾᔨᖅᑐᓄᑦ ᐅᑭᐅᖅᑕᖅᑐᓂ ᓄᓇᕐᔪᐊᓪᓗ ᐊᑖᓂ ᐆᒪᔫᖃᑎᒌᖏᑦᑐᓄᑦ ᓯᓚᐃᑦ ᐅᖅᑰᓯᓂᖏᓐᓄᑦ. ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᓕᐊᓇᐃᒍᓱᒃᑐᑦ ᐃᑲᔪᕈᓐᓇᕋᒥᒃ ᑖᔅᓱᒧᖓ ᓄᓇᕐᔪᐊᕐᒥᐅᓂᑦ ᖃᓄᐃᒋᐊᖅᑐᓂᑦ ᐃᓱᒪᖕᓇᖏᑦᑐᓂᒃ ᖃᐅᔨᓗᑎᒃ ᖃᓄᖅᑑᕈᑎᓂᒃ ᐃᑲᔪᕈᑎᓂᒃ ᓄᓇᕐᔪᐊᕐᒧᑦ ᓵᓪᓗᒋᑦ ᑖᒃᑯᐊ ᐊᒃᓱᕈᕐᓇᖅᑐᑦ.   ᑭᖑᓪᓕᖅᐹᒥᑦ ᓄᓇᕐᔪᐊᕐᒥ ᐅᑭᐅᖅᑕᖅᑐᑦ ᐊᕐᕌᒍᖓᓂ 2007ᒥᑦ–08ᒧᑦ, ᓄᓇᕐᔪᐊᕐᒥᐅᑦ ᑕᐅᑐᓕᕐᒪᑕ ᐅᑭᐅᖅᑕᖅᑐᒥᒃ, ᓴᖅᑭᔮᖅᑎᖦᖢᒋᑦ ᐊᓯᔾᔨᑲᐅᖅᑐᖅᑐᑦ ᑕᑯᔭᐅᔪᑦ ᑭᒡᓕᓯᓂᐊᖅᑎᓂᑦ ᓄᓇᓕᖕᒥᐅᓂᓪᓗ.

ᔭᓯᐊᓐ ᑐᓗᒐᓇᒃ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᑐᑭᒧᐊᒃᑎᑦᑎᔨᖓ ᖃᐅᔨᒪᔭᐅᔪᓂᒃ ᐊᐅᓚᑦᑎᓂᕐᓄᑦ ᑲᑎᖃᑎᖃᕐᓂᕐᓄᓪᓗ, ᐅᖃᖅᑐᖅ ᐱᕐᔪᐊᖑᓂᖏᓐᓄᑦ ᐃᓚᓕᐅᑎᓗᒋᑦ ᐅᑭᐅᖅᑕᖅᑐᕐᒥᐅᑦ ᐃᓱᒪᒋᔭᖏᑦ ᖃᐅᔨᓴᕐᓂᕐᓄᑦ ᑐᑭᓯᑦᑎᐊᕐᓂᖅᓴᐅᓗᒋᑦ ᓯᕗᓐᒃᓴᖏᑦ ᐅᑭᐅᑉᖅᑕᖅᑑᑉ ᕿᒪᒃᑕᕐᒥᓂᑦ.

“ᓄᓇᓕᖕᒥᐅᑦ ᓂᐱᖏᑦ ᖃᐅᔨᒪᔭᖏᓪᓗ, ᑐᓂᔭᐅᓯᒪᔪᑦ ᑭᖑᕚᓂᑦ ᑭᖑᕚᓄᑦ, ᐅᖃᐅᓯᒃᑯᑦ ᐃᑦᑕᕐᒥᑦ ᐃᓅᓂᕐᓂᑦ ᑕᑯᖃᑦᑕᕐᓂᕐᓂᓪᓗ ᑖᒃᑯᓂᖓ ᖃᓄᐃᑦᑐᓂᒃ ᑕᒫᓂ ᐊᕙᑎᓂ, ᐊᔾᔨᖐᓂᒃ ᓴᙱᓂᖃᖅᑐᑦ ᑭᓇᑎᑐᑦ PhDᓕᒃᑎᑐᑦ,” ᐅᖃᖅᑐᖅ.  

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐊᑑᑎᖃᑦᑎᐊᖏᓐᓇᖅᐳᑦ ᐊᑯᓐᓂᖏᓐᓂ ᓄᓇᕐᔪᐊᕐᒥᐅᑭᐅᖅᑕᖅᑐᑦᐊᕐᕌᒍᐃᑦᐃᑲᔪᖅᖢᑎᒃᐊᔾᔨᒌᖏᑦᑐᓐᒃᖃᐅᔨᓴᕐᓂᕐᓂᒃᐅᑭᐅᖅᑕᖅᑐᒥᓄᓇᕐᔪᐊᓗᐊᑎᖓᓂ, ᑐᓂᓯᓪᓗᑎᒃᐊᑑᑎᖃᑦᑎᐊᖅᑐᓂᒃᑐᑭᓯᓂᕐᓂᒃᑖᒃᑯᓇᓂᓄᓇᓂᐆᒪᔪᖃᑎᒌᖏᑦᑐᓂᓗ.

ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᐅᐱᑦᑐᑦ ᐃᓚᐅᔪᓐᓇᕋᒥᒃ ᑲᔪᓰᓇᖅᑐᓄᑦ ᖃᓄᐃᓐᓇᓱᒃᑐᓄᑦ.  

“ᐅᑭᐅᖅᑕᖅᑐᒥᐅᑦ ᓱᖏᐅᔾᔨᓯᒪᔪᑦ ᐅᑭᐅᖅᑕᖅᑐᒥᐅᖑᓕᕐᓂᕐᒥᓂᑦ,” ᐅᖃᖅᑐᖅ ᐊᓐᓄᕈ ᐊᐳᔭᓐ, ᐳᕐᓚ ᖃᐅᔨᒪᓂᕐᓄᑦ ᑲᓇᑕᒥᒃᑯᑦ ᓯᕗᓕᖅᑎᓄᑦ ᑐᑭᒧᐊᒃᑎᑦᑎᔨᖓ ᐱᓕᕆᓂᕐᓄᑦ. “ᑭᓯᐊᓂ ᐊᔪᖏᓐᓂᖅ ᓯᕗᒧᑦ ᑕᑯᓗᓂ ᓇᓚᐅᑦᑖᕐᓗᓂᓗ, ᐃᓱᒪᔪᖓ ᑖᓐᓇ ᐊᑑᑎᖃᑦᑎᐊᖅᑐᖅ ᐃᓚᖓ ᓂᕆᐅᒃᐳᖓᓗ ᓯᕗᓂᕐᒧᑦ ᐅᑭᖅᑕᖅᑐᒥᐅᑦ ᑕᐅᑐᒃᑕᖓᓂᑦ, ᖃᓪᓗᓈᓂᑐᐊᖑᖏᑦᑐᖅ ᑕᐅᑐᒃᑐᒥᑦ.”

ᐅᖃᕐᕕᒋᑎᒍᑦ

ᑭᓱᑐᐃᓐᓇᓂᒃ ᑐᑭᓯᒋᐊᕈᓐᓇᖅᑐᓯ ᐊᒻᒪᓗ ᑐᓴᒐᒃᓴᓕᕆᔨᒃᑯᓄᑦ ᑐᒃᓯᕋᕈᓐᓇᖅᑐᓯ: communications@polar-polaire.gc.ca

 

ᖃᕆᓴᐅᔭᖃᕐᕕᖓ: canada.ca/en/polar-knowledge

ᐊᔾᔨᓕᐅᖅᓯᒪᔪᑦ: @polar.knowledge

ᕕᔅᐳᒃ: @PolarKnowledge

X: @POLARCanada

ᓇᖕᒥᓂᖁᑎᖃᖅᑐᑦ ᖃᕆᓴᐅᔭᖃᕐᕕᖓ: ᐅᑭᐅᖅᑕᖅᑐᒥᒃ ᖃᐅᔨᒪᔪᑐᖃᓕᕆᔨᒃᑯᑦ ᑲᓇᑕ

 

ᐊᖓᔪᖅᑳᖃᕐᕕᖓᑦ:

ᑲᓇᑕᐅᑉ ᖁᑎᒃᑐᕐᒥᐅᓂ ᖃᐅᔨᓴᕐᕕᖓᓂᒃ ᐃᖃᓗᒃᑑᑦᑎᐊᕐᒥ

1 ᐅᕙᔪᖅ ᐊᖁᑎ, ᑎᑎᖃᒃᑯᕕᒃ 2150

ᐃᖃᓗᒃᑑᑦᑎᐊᖅ, ᓄᓇᕗᑦ, X0B 0C0, ᑲᓇᑕ

 

ᐊᕕᒃᑐᖅᓯᒪᔪᓂ ᑎᑎᕋᕐᕕᖏᑦ:

ᐋᑐᕚ

170 Laurier Avenue West

2 ᓇᑎᖅ, ᐃᒡᓗᕈᓯᑦ 200

ᐋᑐᕚ, ᐋᓐᑎᐅᕆᐅ, K1P 5V5, ᑲᓇᑕ

 

ᒍᐃᑦᕼᐅᐊᔅ

ᐃᒡᓗᕈᓯᖅ 305, 300 Main Street

ᐃᓚᐃᔾᔭ ᓯᒥᑦ ᐃᒡᓗᖁᑖ

ᒍᐃᑦᕼᐅᐊᔅ, ᔫᑳᓐ, Y1A 2B5, ᑲᓇᑕ

ᒥᓇᕆᓗᒍ

ᐃᓄᒃᑎᑐᑦ

ᐃᓄᐃᓐᓇᖅᑐᓐ

ᖃᓪᓗᓈᑎᑐᑦ

ᐅᐃᕖᑎᑐᑦ