Correctional Service Canada (CSC) Victim Services

Correctional Services of Canada (CSC) wiyawâw kâ-nâkatohkêcik kipahwâkana kâ-misihowiyit mîna ka-kanawêyimâcik anihi ayisiyinînâhk ayiwâk nîswâskiy kâ-wiyasiwâtimiht.

kîspin kikî-mâyi-tôtâkawin, ninôhtê-kêhcinâhonân kwayask ka-paminikawiyêk mîna ka-kistêyimikawiyêk. ê-kihcêyihtahkik otatoskêwiniwâw Victim Services Officers kika-wîcihikwak ka-wihtamâkwak kîkwây ôma CSC mîna ana kâ-kî-mâyi-tôtâsk ka-âcimêwak.

nikiskêyihtênân ê-mistêyihtâkwahki kâ-pêyakoskânêwihk êkwa mîna ê-wîtaskêmitohk ayisiyinînîhk ôta Canada. êkwa mîna nikiskêyihtênân ayisiyiniw mâna kâ-mâyi-tôtâkot awiya, kiskêyimêw anihi. ka-kî-kahtitinên kîkway êkota ê-âcimiht ana kâ-kî-mâyi-tôtâsk êkwa kîspin môy kinôhtê-kiskêyimâw ana ayisiyiniw. nika-kistêyihtênân tânisi kiya ê-isi-nitawêyihtaman.

pâ-pîtos isi kîsta ka-kî-mâmiskôtên anita ispîhk wiyasiwêhki. wîhtamâkêwin kika-kî-miyikwak CSC êkwa mîna kikâh-miyikawin âcimowin ê-âcimiht awa ayisiyiniw kâ-kî-mâyi-tôtâsk.

mîna kika-kî-wîhtamawâwak aniki Victims’ Advisory Committee (VAC) tânisi kiya ê-itêyihtaman. êkota mêskoc VAC wihtamawêwak CSC êkwa anihi Parole Board of Canada (PBC) ta-wîcihikoyit ka-masinahahkik wiyasiwêwina êkwa isiyihcikêwina ka-pimitisahamihk ispîhk ayisiyiniw kâ-wî-pakitiniht.

nitawêyihtamani âcimowin ana ohci kâ-kî-mâyi-itôtâsk kâ-misiot sôskwâc piko ta-kiskêyihtamohacik CSC ahpô PBC. ôma kâ-wihtamâskik ka-nisitohtên tânisi ôki CSC êkwa PBC ê-isi-waskawîcik ispîhk kâ-wî-pakitinâcik ayisiyiniwa. êwakôma kâ-wihtamâskik ka-wîcihikon êkâ ana kâ-wî-pakitiniht ka-kî-mâyi-itôtâsk êkwa mîna ka-wîcihikon ka-ati-miywâyâyan. mîna ka-kî-kahtitinên âcimowin kotakak ayiwâk ohci ahpô awiyak ê-mamisîtotawat ê-miyo-wic êwat ka-kî-katinikêstamâk ôma âcimowin.

anita Correctional and Conditional Release Act (CCRA) wiyasiwêwin omisi itwêmakan awîna ka-kî-wihtamâht âcimowin kā-misihoyit ohci awiya nîswâskiy ahpô kinwêsîs kâ-kipahomiht:

• awiyak kâ-kî-mây-itôtâht wiyawihk ahpô ê-pîkwêyihtamâtisit omâmitonêcikanihk ayisk awiya ê-kî-misi-pakamahokot,
• owîkimakan ahpô owîcêwâkan, owâhkômâkana, ahpô ana wiya awiya ê-kî-nakataskêyit wiya ohci ahpô cî awiya êkâ ê -kaskihtâyit ta-nâkatohkâsoyit. (tâpiskôc awiyak ê -âhkosit ahpô ê-awâsisîwit), awiya kâ-kanawêyimâyit anihi kâ-kî-mâyitôtâht ocawâsimisa, ahpô
• awiyak kâ-misihkêmot simâkanisak isi ahpô kihci-okimânâhk.

ispîhk kakwêcihkêmowin kahtinamâhko, ôma kika-wihtamâkawin:

• tânisi ana ê-isiyihkâsot kâ-wiyasiwâtiht
• tânisi ê-itahkamikisit êkwa anima kâ-isiyihkâtêk anima wiyasiwêwikamik ita kâ-kî-wiyasiwâtiht
• tânisipîhk kê-mâcihtât ana kâ-misihot kâ-wiyasiwâtiht owiyasiwêwin êkwa tânispîhk ta-pônipayiniyik êkwa
• tânispîhk kâ-misihot kita-kî-pakitiniht êkwa tânispîhk ê-mâmiskocikâtêyik mahti kîspin aciyaw ta-pakitiniht êkwa kîspin nôhtaw ka-pakitiniht.

ôhi mîna ayiwâk ka-kî-isi-wihtamâkawin:

• tânitahtopiponêt ana kâ-misihot;
• kîspin ê-kipahoht ana kâ-misihot êkwa, kîspin namôya, tânêhki;
• tânisi ê-isiyihkâtêk anima kipahotowikamik êkwa tânitê ê-astêk êkwânima ita kâ-kipahoht ana kâ-misihot;
• mîna kîspin kotakihk kipahotowikamikohk wî-isitisahwâw ana kâ-misihot;
• mîna âcimowin tânisi ê-itôtâht ta-wîcihiht ana kâ-misihot mîna isihcikêwina anihi kâ-kîsihtât ta-wîcihisot;
• kîspin mitoni kwayask kî-mâyahkamikisiw awa kâ-misihot mîna mâyahkamikiskici ita kâ-kanawêyimiht;
• tânispîhk ana kâ-misihot aciyaw ka-pakitiniht, ka-nitawi-atoskêt, aci-nâkatêyimisot, piko ta-pakitiniht,
• isipîhk aniki Parole Board of Canada kâ-wî-mâmiskôtâhkik mahti ta-pakitinâcik anihi kâ-misihoyit;
• tânêhki ohci kîkway kâ-wî-pakitiniht aciyaw;
• kîkwây astêwa êkota ka-pimisahahk awa kâ-misihot aciyaw kâ-namatêci, nitawi-atoskêci, ôci-nâkatêyimisowin,êkâ cî piko ka-pakitiniht;
• tânitê ê-wî-itohtêt awa kâ-kî-misihot pakitinihci aciyaw kâ-namatêci, nitawi-atoskêci, ôci-nâkatêyimisowin, êkâ cî piko ka-pakitiniht;êkwa kîspin awa kâ-kî-misihot wî-papâmâcihow êkotê isi nânitaw kâ-ayâyit anihi kâ-kî-mây-itôtawât;êkwa
• tânispîhk aniki Parole Board of Canada kâ-wî-mâmiskômâcik ana kâ-misihot.

kîspin nitawêyihtamani, kîkway kâ-kîī-wihtên tânisi ê-isi-pakamiskâkoyan ôma kâ-mây-itôtâkawiyan ahpô mîna ê-isi-môsihocik kîtisânak ahpô mîna ka-kî-âcimâw ana kâ-mây-itôtâsk. êkôma kâ-wihtamawiyâhk ka-kî-âpacihcikâtêw tânisi ka-isi- kîsêyihtamihk pakitinihci awa kâ misihot. ahpô mîna ta-âpacihtâwak PBC ta-kîsêyihtahkik kîspin ka-pakitiinâcik ana kâ-misîhot ayisiyinînâhk isi. kâ-pê-pîkiskwâtacik mâna ôki CSC Victim Services kîkway kâ-nôhtê-kiskêyihtaman, namôya wîhtamawâw kâ-misihot. mâka kîspin kîkiway wîhtamani êkâ ta-pakitiniht ana kâ-misihot kipahotowikamikohk ohci êkota piko ta-wihtamâht ana kâ-misihot. mâka namôya ta-wihtamawâw tânitê ê-wîkiyan êkwa kisêwêpicikan akihtâsowin mîna môy ka-miyâw.

ka-kî-pîkiskwâtâwak CSC ayiwâk kîkway nôhtê-kiskêyihtamani ahpô âcimowin nôhtê-kahtitinamani
namôya kâkatâc ta-tipahikêyan: 1-866-806-2275
E-mail: victims-victimes@csc-scc.gc.ca
Web site: www.csc-scc.gc.ca/victims/

Parole Board of Canada – Services for Victims
namôya kâkatâc ta-tipahikêyan 1-866-789-4636
www.pbc-clcc.gc.ca

Department of Justice – Victims Fund
(sôniyâw ka-miyikawin ta-itohtêyan Parole Board mamawapiwina)
namôya kâkatâc ta-tipahikêyan: 1-866-544-1007
www.justice.gc.ca

The Office of the Federal Ombudsman for Victims of Crime
namôya kâkatâc ta-tipahikêyan: 1-866-481-8429
www.victimsfirst.gc.ca