ᑎᑎᕋᐅᓯᖅ ᐊᑐᖅᑕᐅᖔᕈᖕᓇᖅᑐᖅ

POLAR-ᑯᓐᓄᑦ ᑲᑎᒪᔩᑦ

ᑲᑎᓚᐅᖅᐱᒋᑦ POLAR-ᑯᑦ ᑲᑎᒪᔨᖏᑦ? ᑲᑎᒪᔩᑦ ᐱᔭᒃᓴᐅᑎᖃᖅᑐᑦ ᐱᓕᕆᖃᑎᒌᒃᑯᓐᓄᑦ ᖃᓄᖅᑑᕆᓂᕐᒧᑦ ᖃᓄᐃᓕᐅᖅᑎᑦᑎᓂᕐᒥᒃ. POLAR-ᑯᑦ ᑭᖑᓪᓕᖅᐹᖅ ᑲᑎᒪᓂᕆᓚᐅᖅᑕᖓᑦ ᑲᒪᒋᔭᐅᓚᐅᑐᖅ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒥᑦ (CHARS) ᒪᓐᓃᑦᒥᑦ (ᔫᓂ). ᑲᑎᒪᔩᑦ ᐅᖃᐅᓯᖃᕈᖕᓇᓚᐅᖅᑐᑦ ᐱᒻᒪᕆᐅᔪᓂᒃ ᐱᔾᔪᑕᐅᔪᓂᒃ ᐊᒻᒪᓗ ᑲᑎᖃᑎᒋᑉᓗᒋᑦ ᐱᓕᕆᖃᑎᒋᔭᖏᑦ ᓄᓇᓕᖕᒥᑦ. ᐃᖃᓗᒃᑑᑦᑎᐊᕐᒦᑎᓪᓗᒋᑦ, ᐃᓚᐅᖃᑕᐅᓚᐅᖅᑐᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐅᑉᓗᕐᒥᑦ (ᐅᑉᓗᕐᒥᑦ ᐃᓕᓴᖅᖢᑎᒃ ᐃᓄᐃᑦ ᐱᖅᖁᓯᒃᑯᑦ ᖃᐅᔨᒪᓂᖏᓐᓂᒃ), ᐊᑕᐅᑦᑎᒃᑰᖃᑎᖃᓚᐅᖅᑐᖅ ᓄᓇᕐᔪᐊᕐᒥᑦ ᑕᕆᐅᕐᒧᑦ ᐅᑉᓗᕆᔭᐅᔪᒥᑦ.

ᐃᖅᖃᐅᒪᔾᔪᑎ ᑐᑭᓯᐊᓂᕐᒥᑦ ᐅᑭᐅᖅᑕᖅᑐᒥᑦ ᓄᓇᖃᖅᖄᖅᑐᑦ ᐱᓕᕆᖃᑎᒌᓂᑦ

POLAR-ᑯᑦ ᐃᖅᖃᐅᒪᔾᔪᑎ ᑐᑭᓯᐊᓂᕐᒥᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ ᐊᒻᒪᓗ ᒍᐃᑦᓯᓐ ᐃᖅᕿᓕᐅᖃᑎᒌᑦ ᑲᑎᒪᔨᖏᓐᓄᑦ. ᐊᖏᖃᑎᒌᒍᑏᑦ ᓴᙱᒃᑎᑎᑦᑎᔪᑦ POLAR-ᑯᑦ ᐱᓕᕆᐊᖏᓐᓂᒃ ᓯᕗᒻᒧᒃᑎᑦᑎᓂᕐᒥᒃ ᖃᐅᔨᓴᐃᓂᖓᓐᓂᒃ ᐱᓕᕆᐊᖃᖅᑐᓂᒃ ᓯᕗᓪᓕᖅᐸᐅᑎᔭᐅᔪᒪᔪᓂᑦ ᐃᓄᖕᓄᑦ ᐊᒻᒪᓗ ᒍᐃᑦᓯᓐ ᐃᖅᕿᓕᐅᖃᑎᒌᑦ ᓄᓇᓕᖏᓐᓄᑦ ᐱᕙᓪᓕᐊᖃᑕᐅᑎᑦᑎᓂᒃᑯᑦ, ᐃᓂᓕᐅᕆᓂᒃᑯᑦ ᐊᒻᒪᓗ ᐱᓕᕆᖃᑎᒌᖕᓂᒃᑯᑦ. ᓄᓇᖃᖅᖄᖅᑐᑦ ᓯᕗᓕᖅᑎᓂᒃ ᐊᒻᒪᓗ ᐊᐅᓚᑦᑎᓂᖏᓐᓂᒃ ᐃᓚᒋᔭᐅᑎᑦᑎᖃᑦᑕᖅᑐᑦ POLAR-ᑯᑦ ᐋᖅᕿᐅᒪᓂᖏᓐᓄᑦ.

POLAR-ᑯᑦ ᑕᐅᑐᒐᖃᖅᑐᑦ ᐱᓕᕆᐊᖏᓐᓂᒃ ᐱᓕᕆᖃᑎᒌᖕᓂᒃᑯᑦ ᐊᒻᒪᓗ ᐊᔾᔨᒌᙱᑦᑑᑎᓂᒃ ᐱᓕᕆᓂᒃᑯᑦ ᐱᓕᕆᐊᖑᔪᖅ ᐱᔭᐅᔭᕆᐊᓕᖕᓄᑦ ᐅᑭᐅᖅᑕᖅᑐᒥᑦ ᓄᓇᓕᖏᓐᓄᑦ ᐊᒻᒪᓗ ᐊᐱᖅᖁᑕᐅᔪᑦ ᐱᒻᒪᕆᐅᑉᓗᑎᒃ ᑲᓇᑕᒥᐅᓂᑦ ᐊᒻᒪᓗ ᓄᓇᕐᔪᐊᕐᒥᑦ ᐱᓕᕆᖃᑎᒋᔭᐅᔪᓄᑦ. ᐃᓕᑦᑭᒃᑲᓐᓂᕆᑦ ᐊᑐᖅᑕᑉᑕ ᒥᒃᓵᓄᑦ ᐊᒻᒪᓗ ᐱᒻᒪᕆᐅᒋᔭᑉᑕ POLAR-ᑯᑦ ᖃᓄᖅᑑᕆᓂᕐᒧᑦ ᐸᕐᓇᐅᑎᖓᓂᑦ.

ᖃᐅᔨᓴᐃᓂᖅ ᐊᒻᒪᓗ ᑮᓇᐅᔭᖃᖅᑎᑕᐅᓂᖅ

ᖃᐅᔨᓴᐃᓂᖅ ᐊᒻᒪᓗ ᑮᓇᐅᔭᖃᖅᑎᑕᐅᓂᖅ POLAR-ᑯᓐᓂᑦ ᑲᒪᒋᔭᐅᖃᑦᑕᖅᑐᖅ ᖃᐅᔨᓇᓱᖕᓂᕐᒧᑦ ᐊᒻᒪᓗ ᐊᑐᖅᑕᐅᔪᓄᑦ ᑐᕌᖓᔪᒧᑦ ᐊᒻᒪᓗ ᐊᑐᖃᑦᑕᖅᑐᖅ POLAR-ᑯᑦ ᐱᖓᓱᐃᑦ ᑐᕌᒐᕆᔭᖏᓐᓂᑦ:

• ᐱᐅᓯᒋᐊᖅᖢᒋᑦ ᖃᐅᔨᒪᓂᕆᔭᐅᔪᑦ ᐱᓪᓗᕆᒃᑐᑦ ᐅᑭᐊᖅᑕᖅᑐᒥᑦ ᓄᓇᒥᐅᑕᓄᑦ, ᐃᒪᑦᑎᐊᕙᖕᓄᑦ ᐊᒻᒪᓗ ᐃᒫᓂᑦ ᐆᒪᓂᖃᖃᑎᒌᒃᑐᓄᑦ ᐱᐊᓚᔪᒥᒃ ᐊᓯᐊᙳᖅᐸᓪᓕᐊᓂᕐᒥᑦ;
• ᑐᑭᓯᐊᓕᒃᑲᓐᓂᕐᓗᒋᑦ ᐊᒃᑐᐊᓂᕆᔭᖏᑦ ᐅᑭᐅᖅᑕᖅᑐᒥᑦ ᓄᓇᓕᐅᑉ ᖃᓄᐃᖏᑦᑎᐊᕐᓂᖓ ᐊᒻᒪᓗ ᐊᕙᑎᑉᑕ ᖃᓄᐃᖏᑦᑎᐊᕐᓂᖓ; ᐊᒻᒪᓗ
• ᓯᕗᒻᒧᒡᓗᒍ ᐆᒻᒪᖅᖁᑎᓕᐅᕆᓂᖅ, ᐊᑐᖅᑕᐅᔪᑦ ᑲᑉᐳᔾᔭᓅᖅᑐᑦ ᐊᒻᒪᓗ ᐱᖁᑎᓄᑦ ᐋᖅᕿᒃᓯᓃᑦ ᐊᔾᔨᐅᖏᑦᑐᑦ ᐊᕙᑎᓕᕆᓂᕐᒧᑦ, ᐃᓅᖃᑎᒌᓄᑦ ᐊᒻᒪᓗ ᐱᖅᖁᓯᕆᔭᐅᔪᑦ ᖃᓄᐃᓐᓂᖏᓐᓄᑦ ᐅᑭᐅᖅᑕᖅᑐᒥᑦ.

ᐃᓕᑦᑎᒃᑲᓐᓂᕆᑦ ᐱᔾᔪᑎᖃᖅᑐᓂᒃ ᑮᓇᐅᔭᖃᖅᑎᑦᑎᓂᕐᒧᑦ ᐊᒻᒪᓗ ᑐᕌᖓᔪᓂᑦ.

ᐃᓄᐃᑦ ᓇᓄᕐᓂᒃ ᖃᐅᔨᒪᓂᖃᑦᑎᐊᖅᑐᑦ ᑐᓂᓯᔪᑦ ᖃᐅᔨᒪᓂᕆᔭᖏᓐᓂᒃ ᓄᑖᒥᒃ ᖃᐅᔨᓴᐃᓂᕐᒥᑦ

ᓄᑖᖅ ᐅᓂᑉᑳᒥᑦ, ᐃᓄᐃᑦ ᓇᓄᕐᓂᒃ ᖃᐅᔨᒪᓂᖃᑦᑎᐊᖅᑐᑦ ᓄᓇᕗᒻᒥ ᓄᓇᓕᖕᓂᑦ ᐸᖕᓂᖅᑑᕐᒥᑦ ᐊᒻᒪᓗ ᑭᒻᒥᕈᒻᒥᑦ ᑭᐅᓚᐅᖅᑐᑦ ᐃᓚᖏᓐᓂᒃ ᐱᒻᒪᕆᐅᔪᓂᒃ ᐊᐱᖅᖁᑕᐅᔪᓂᒃ ᖃᓄᐃᓐᓂᕆᔭᖏᑦᑕ ᐊᒻᒪᓗ ᐊᒥᓲᑎᒋᓂᖏᑦᑕ ᓇᓄᐃᑦ ᒥᒃᓵᓄᑦ. ᐃᓄᐃᑦ ᖃᐅᔨᒪᓂᕆᔭᖏᑦ ᐱᒻᒪᕆᐅᔪᖅ ᑐᑭᓯᐊᓂᐊᕐᓗᒋᑦ ᖃᓄᖅ ᓇᓄᐃᑦ ᐅᐸᓗᐊᓂᖃᕐᒪᖔᑕ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᐅᓂᑉᑳᖅ ᐱᒻᒪᕆᐅᓗᓂ ᐊᑐᖅᑕᐅᔪᒃᓴᐅᑕᐅᓂᐊᖅᑐᖅ ᓂᕐᔪᑎᓂᒃ ᐊᐅᓚᑦᑎᓂᕐᒧᑦ ᐸᕐᓇᐃᓂᕐᓂᑦ ᑕᐃᕕᔅ ᓯᑐᕇᑦ (Davis Strait) ᓇᓄᐃᑦ ᐊᒥᓲᑎᒋᓂᖏᓐᓄᑦ.

ᐃᓕᑦᑎᒃᑲᓐᓂᕆᑦ

ᐊᑐᖅᖢᑎᒃ ᑎᒥᒥᑦ ᓇᓕᐊᖕᓅᖕᒪᖔᑦ ᓇᓗᓇᐃᒃᑯᑕᓂᒃ (DNA) ᖃᐅᔨᓴᕐᓂᐊᕐᓗᒋᑦ ᑕᒫᓂᕐᒥᐅᑕᐅᖏᑦᑐᑦ ᐆᒪᔪᐃᑦ ᐅᑭᐅᖅᑕᖅᑐᒥᑦ

POLAR-ᑯᓐᓂᑦ ᖃᐅᔨᓴᐃᔩᑦ ᐊᑐᖃᑦᑕᖅᑐᑦ ᑎᒥᒥᑦ ᓇᓕᐊᖕᓅᖕᒪᖔᑦ ᓇᓗᓇᐃᒃᑯᑕᓂᒃ (DNA) ᓇᓗᓇᐃᒃᑯᑦᑎᖅᑐᐃᔾᔪᑎᓂᒃ ᐊᑐᖅᖢᑎᒃ ᒪᓂᖅᖃᒥᑦ ᐱᓕᕆᓂᐊᕐᓗᑎᒃ ᓯᕗᓂᒃᓴᒥᑦ ᖃᐅᔨᓗᒋᑦ ᑕᒫᓂᕐᒥᐅᑕᐅᖏᑦᑐᑦ ᐆᒪᔪᐃᑦ. ᓯᕗᓂᒃᓴᒥᑦ ᖃᐅᔨᓂᐊᕐᓗᑎᒃ ᓄᑖᓂᒃ ᐆᒪᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑎᑭᑎᑕᐅᔪᓂᒃ ᐅᑭᐅᖅᑕᖅᑐᒧᑦ - ᐃᓚᐅᑉᓗᑎᒃ ᒥᑭᔫᑏᑦ ᐆᒪᔪᑦ - ᖃᐅᔨᔭᕆᐊᖃᖅᑐᒍᑦ ᓱᓇᐃᑦ ᐆᒪᔪᐃᑦ ᐅᑭᐅᖅᑕᖅᑐᒥᐅᑕᐅᖕᒪᖔᑕ ᐅᑉᓗᒥ. ᑎᒥᒥᑦ ᓇᓕᐊᖕᓅᖕᒪᖔᑦ ᓇᓗᓇᐃᒃᑯᑕᓂᒃ (DNA) ᓇᓗᓇᐃᒃᑯᑦᑎᖅᑐᐃᔾᔪᑎᓂᒃ ᐊᑐᖃᑦᑕᖅᑐᑦ ᑎᒥᒥᑦ ᐱᔭᐅᔪᓂᒃ ᖃᐅᔨᓂᐊᕐᓗᑎᒃ ᐆᒪᔫᑉ ᐊᒻᒪᓗ ᖃᑉᓯᐅᓂᖏᓐᓄᑦ ᓇᓕᐊᖕᓅᖕᒪᖔᑕ.

ᐃᓕᑦᑎᒃᑲᓐᓂᕆᑦ

ᖃᓄᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒃᑐᖅᓯᕙ ᐅᑭᐅᖅᑕᖅᑑᑉ ᒥᑭᓛᖑᔪᑦ ᓂᕐᔪᑎᖓᓂᑦ, ᐊᕕᙵᕐᒥᑦ?

ᖃᐅᔨᓇᓱᒃᑏᑦ ᓯᓚᑦᑐᖅᓴᕐᕕᒡᔪᐊᖅ ᓚᕚᓪ-ᒥᑦ, ᑲᓇᑕᒥᑦ ᑕᑯᔭᒐᒃᓴᖃᖅᑐᑦ ᓄᓇᒥᑦ ᐱᔪᓂᒃ, ᐊᒻᒪᓗ ᑲᓇᑕᒥᑦ ᐅᑭᐅᐊᖅᑐᒥᑦ ᖃᐅᔨᒪᓂᖃᖅᑐᒃᑯᑦ ᕿᓂᖅᑐᑦ ᖃᓄᖅ ᒪᖁᒃ ᖁᐊᖃᑦᑕᖅᑐᖅ ᐊᒃᑐᖅᓯᓂᖃᕐᒪᖔᑦ ᐊᕕᙵᕐᓂᑦ. ᐊᕕᙵᐃᑦ ᐱᒻᒪᕆᐅᔪᑦ ᓂᕿᒋᔭᐅᓂᖏᓐᓄᑦ ᐊᒥᓱᓄᑦ ᐅᑭᐅᖅᑕᖅᑐᒥᑦ ᓂᕆᔭᒃᓴᖅᓯᐅᖅᑎᓄᑦ. ᐅᑭᐅᒃᑯᑦ, ᐊᐳᑎᐅᑉ ᐃᓗᐊᓂᑦ ᓱᑉᓗᓕᐅᖃᑦᑕᖅᑐᑦ ᐅᖅᖂᓂᐊᕐᓗᑎᒃ. ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᒪᖁᖕᒥᑦ ᖁᐊᖑᔪᒥᒃ ᒪᖁᒃᑎᑦᑎᕙᓪᓕᐊᑐᐃᓐᓇᖅᑐᖅ, ᐊᐳᑎ ᓯᑎᒃᑎᑎᖦᖢᒍ. ᖃᐅᔨᓴᐃᔩᑦ ᑕᑯᑎᑦᑎᓚᐅᖅᑐᑦ ᓯᓂᖅᓴᖅ, ᐊᐳᑎᖃᕐᓂᖅᓴᕐᒥᑦ, ᐊᕕᙵᐃᑦ ᐃᓗᑐᔪᓕᐅᕋᓚᓂᖅ ᐊᔪᕐᓂᐊᖅᑐᑦ, ᐊᒻᒪᓗ ᓇᐃᓐᓂᖅᓴᐅᔪᓂᒃ ᓱᑉᓗᓕᐅᕐᓗᑎᒃ. ᐱᒻᒪᕆᐅᔪᖅ, ᓯᓚ ᐆᓇᖅᓯᒃᐸᑦ, ᐅᑭᐅᖅᑕᖅᑐᒥᑦ ᒪᖁᖃᑦᑕᕐᓂᖅᓴᐅᓂᐊᖅᑐᖅ ᐊᐳᑎᒧᑦ, ᐊᒻᒪᓗ ᐊᕕᙵᐃᑦ ᐊᒃᓱᕈᕐᓂᖅᓴᐅᓕᕐᓂᐊᖅᑐᑦ ᐊᓐᓇᒃᓯᒪᓂᐊᕐᓗᑎᒃ.

ᑐᑭᓯᐅᒪᔾᔪᑎᒃᑲᓐᓃᑦ

POLAR-ᓄᓇᑦᑎᐊᕐᒥᑦ ᒐᕙᒪᒃᑯᑦ ᐱᓕᕆᖃᑎᒌᒃᑐᑦ ᐃᑲᔪᖅᑐᒥᒃ ᕿᓂᖅᓴᐃᓂᕐᒧᑦ ᐋᖅᕿᒃᓯᓂᐅᔪᓂᒃ ᐊᒥᓲᔪᖕᓃᖅᐸᓪᓕᐊᔪᑦ ᐊᒥᕐᕋᐃᑦ ᑐᒃᑐᓄᑦ.

ᑲᓇᑕᒥᑦ ᐅᑭᐅᖅᑕᖅᑐᒥᑦ ᖃᐅᔨᒪᓂᖃᖅᑐᒃᑯᑦ ᐊᒻᒪᓗ ᓄᓇᑦᑎᐊᕐᒥᑦ ᒐᕙᒪᒃᑯᑦ ᐱᓕᕆᖃᑎᒌᒃᑐᑦ ᑐᓂᓯᓂᐊᕐᓗᑎᒃ ᓄᑖᒥᒃ ᑮᓇᐅᔭᖃᖅᑎᑦᑎᓂᕐᒥᒃ ᑐᒃᑐᓂᒃ ᖃᐅᔨᓴᐃᓂᕐᒧᑦ ᐊᑐᖅᑕᐅᓂᐊᖅᑐᒥᒃ. $850,000-ᓗᐊᓂᒃ ᒪᓂᒪᔪᖃᕐᓂᐊᖅᑐᖅ ᐊᕐᕌᒍᑕᒫᒃᑯᑦ ᐅᑭᐅᑦ ᐱᖓᓱᑦ ᖃᐃᔪᓂᑦ ᖃᐅᔨᓴᐃᓂᕐᒧᑦ ᑐᒃᑐᐃᑦ ᒥᒃᓵᓄᑦ.

ᑐᑭᓯᐅᒪᔾᔪᑎᒃᑲᓐᓃᑦ

ᐅᑭᐅᖅᑕᖅᑐᒥᑦ ᖃᐅᔨᓇᓱᖕᓂᕐᒥᒃ ᐊᔪᕈᖕᓃᖅᓴᐃᓂᕐᒧᑦ ᑐᕌᖓᔪᒧᑦ ᐅᑉᓗᒥᒨᓕᖅᑐᐃᓂᖅ

POLAR-ᑯᑦ ᐊᐅᓚᑦᑎᖃᑦᑕᖅᑐᑦ ᐅᑭᐅᖅᑕᖅᑐᒥᑦ ᖃᐅᔨᓇᓱᖕᓂᕐᒥᒃ ᐊᔪᕈᖕᓃᖅᓴᐃᓂᕐᒧᑦ ᑐᕌᖓᔪᒥᑦ, ᓴᖅᕿᑕᐅᓚᐅᖅᑐᖅ 1961-ᒥᑦ ᑲᓇᑕᒥᑦ ᒐᕙᒪᒃᑯᓐᓄᑦ ᐃᑲᔪᖅᑐᖅᖢᒋᑦ ᑲᓇᑕᒥᑦ ᓯᓚᑦᑐᖅᓴᕐᕖᑦ ᐊᔪᕈᖕᓃᖅᓴᐃᓂᐊᕐᓗᑎᒃ ᐅᑭᐅᖅᑕᖅᑐᒥᐅᓂᒃ ᐃᖅᖃᓇᐃᔭᖅᑎᒃᓴᓂᒃ ᑎᑭᐅᑎᓂᐊᕐᓗᑎᒃ ᑲᓇᑕᒥᑦ ᐱᔭᐅᔭᕆᐊᓕᖕᓄᑦ. ᐅᑭᐅᖅᑕᖅᑐᒥᑦ ᖃᐅᔨᓇᓱᖕᓂᕐᒥᒃ ᐊᔪᕈᖕᓃᖅᓴᐃᓂᕐᒧᑦ ᑐᕌᖓᔪᖅ ᐃᓚᒋᔭᐅᔪᓂᒃ ᑮᓇᐅᔭᖃᖅᑎᑦᑎᖃᑦᑕᖅᑐᖅ ᐃᓕᓵᓂᒃᓯᒪᔪᑦ ᐃᓕᓴᖅᑎᓄᑦ ᑲᓇᑎᒥᑦ. ᐅᑭᐅᐊᖅ ᑐᕌᖓᔪᖅ ᑐᓂᓯᓚᐅᖅᑐᖅ $920,000 ᐃᑲᔫᑎᓂᒃ 279 ᐃᓕᓴᖅᑎᓄᑦ 36 ᓯᓚᑦᑐᖅᓴᕐᕕᖕᓂᑦ.

ᑐᑭᓯᐅᒪᔾᔪᑎᒃᑲᓐᓃᑦ

ᑲᓇᑕᒥᑦ ᐅᑭᐅᖅᑕᖅᑐᒥᑦ ᖃᐅᔨᒪᓂᖃᖅᑐᒃᑯᑦ ᐃᓅᖃᑎᒌᖕᓂᕐᒧᑦ ᑐᕌᖓᔪᖅ

ᐅᑭᐊᖑᔪᖅ ᑲᓇᑕᒥᑦ ᐅᑭᐅᖅᑕᖅᑐᒥᑦ ᖃᐅᔨᒪᓂᖃᖅᑐᒃᑯᑦ ᓴᖅᕿᑦᑎᓚᐅᖅᑐᑦ ᓄᑖᖅ ᐃᓅᖃᑎᒌᖕᓂᕐᒧᑦ ᑐᕌᖓᔪᒥᒃ ᐃᑲᔪᕐᓂᐊᑐᖅ ᓴᙱᒃᑎᑎᕐᓗᒍ ᐅᑭᐅᖅᑕᖅᑐᒦᖓᔪᒥᒃ ᖃᐅᔨᓴᐃᓂᕐᒥᑦ. ᑲᓇᑕᒥᑦ ᐅᑭᐅᖅᑕᖅᑐᒥᑦ ᖃᐅᔨᒪᓂᖃᖅᑐᒃᑯᑦ (POLAR) ᐃᓅᖃᑎᒌᕐᓂᕐᒧᑦ ($50,000) ᐃᑲᔪᖃᑦᑕᖅᑐᖅ ᓘᒃᑖᙳᖅᑐᒃᓴᓂᒃ ᐊᒻᒪᓗ ᑕᑯᔭᖅᑐᐃᔪᑦ ᖃᐅᔨᓴᐃᔨᓂᒃ ᐅᑭᐅᖅᑕᖅᑐᒥᑦ ᐱᓕᕆᕝᕕᖕᓂᑦ, ᐱᓕᕆᐊᖏᑦ ᑎᑯᓕᐊᖅᖢᑎᒃ POLAR-ᑯᑦ ᖃᐅᔨᓇᓱᖕᓂᕐᒧᑦ ᐊᒻᒪᓗ ᐊᑐᖅᑕᐅᔪᑦ ᑲᑉᐳᔾᔭᓅᖅᑐᓄᑦ ᑐᕌᒐᕆᔭᖏᓐᓄᑦ.

ᐆᒃᑐᕈᒪᕕᑦ ᐃᖅᖃᓇᐃᔭᖅᑎᙳᕐᓂᕐᒧᑦ ᐃᓚᒋᔭᐅᔪᒥᑦ? ᑭᒡᓕᒋᔭᐅᔪᖅ ᐆᒃᑐᕈᒪᔪᓄᑦ ᑕᖅᖀᓐᓇᕐᔪᐊᖅ (ᔭᓄᐊᕆ) 16, 2023 ᓇᓂᓯᒃᑲᓐᓂᕆᑦ ᑐᑭᓯᐅᒪᔾᔪᑎᓂᒃ.

ᔫᑳᓐ ᑐᒃᓯᕋᐅᓯᐅᖁᔨᔪᖅ

POLAR-ᑯᑦ ᐅᒃᑯᐃᖅᓯᓚᐅᖅᑐᑦ ᑐᒃᓯᕋᐅᓯᐅᖁᔨᔪᒥᑦ ᑲᑕᒑᕆᕝᕕᒥᑦ (ᓄᕕᐱᕆ) ᔫᑳᓐᒦᑦᑐᒥᒃ ᐱᓕᕆᐊᓄᑦ ᓯᕗᒻᒧᒃᓯᔪᓂᒃ ᖃᐅᔨᒪᓂᕐᒥᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᑦ ᐊᒃᑐᖅᓯᓂᐅᔪᓄᑦ ᐊᒻᒪᓗ ᐊᑐᓕᖅᑎᑦᑎᓂᕐᒧᑦ ᖃᓄᖅᑑᕈᑎᓂᒃ. ᐃᑲᔪᖅᑐᐃᔪᖅ ᐃᖕᒥᓂᒃ-ᖃᐅᔨᓂᕐᒧᑦ ᖃᐅᔨᓴᐃᓂᕐᒥᒃ ᑕᐅᑐᒐᖃᖅᑐᖅ ᔫᑳᓐᒥᑦ ᐃᖅᕿᓖᑦ ᓄᓇᖅᖃᑎᒌᓄᑦ ᓯᕗᓪᓕᖅᐸᐅᑎᔭᐅᔪᒪᔪᓂᒃ ᐊᒻᒪᓗ ᓄᓇᓕᖕᒥᑦ ᑲᒪᒋᔭᐅᔪᓂᒃ ᐱᓕᕆᐊᒃᓴᓂᒃ ᑕᐅᑐᒐᖃᖅᑐᑦ ᓴᖅᕿᑦᑎᓂᕐᒥᒃ ᐊᔪᙱᑦᑐᓂᒃ ᐋᖅᕿᒃᓯᓂᐅᔪᓂᒃ ᐊᒻᒪᓗ ᓯᕗᓂᒃᓴᖏᓐᓂᑦ ᔫᑳᓐᒥᑦ ᓄᓇᓖᑦ.

ᐃᓕᑦᑎᒃᑲᓐᓂᕆᑦ

ᑲᓇᑕᒥᐅᑕᐃᑦ, ᐃᓄᐃᑦ ᐊᒻᒪᓗ ᐊᑭᐊᓂᕐᒥᐅᑦ ᖃᐅᔨᓴᐃᓂᕐᒧᑦ ᐃᖅᖃᓇᐃᔭᖃᑎᒌᑦ (CINUK ᑐᕌᖓᔪᖅ)

ᓄᕐᕋᐃᑦ (ᒪᐃ) 2022-ᒥᑦ, 13 ᐱᓕᕆᐊᑦ ᓂᕈᐊᖅᑕᐅᓚᐅᖅᑐᑦ ᑮᓇᐅᔭᖃᖅᑎᑕᐅᓂᐊᕐᓗᑎᒃ ᑲᓇᑕ-ᐃᓄᐃᑦ ᓄᓇᖓᑦ-ᐊᑭᐊᓂᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᓂᕐᒧᑦ ᑐᕌᖓᔪᖅ 2021-25 (CINUK ᑐᕌᖓᔪᖅ)

CINUK ᑐᕌᖓᔪᖅ ᐱᓕᕆᐊᖃᖅᑐᖅ ᐊᒥᓱᓂᒃ ᐱᒻᒪᕆᐅᔪᓂᑦ, ᐃᓚᐅᑉᓗᑎᒃ ᐅᒥᐊᕐᔪᐊᓕᕆᓃᑦ, ᓂᕐᔪᑏᑦ ᖃᓄᐃᖏᑦᑎᐊᕐᓂᖏᑦ, ᐃᓄᐃᑦ ᓂᕿᖏᑦ, ᐱᕈᖅᐸᓪᓕᐊᓂᖃᖃᑎᒌᒃᑐᑦ ᖃᓄᐃᖏᑦᑎᐊᕐᓂᖏᑦ, ᕿᓂᖅᓴᐃᓂᖅ ᐊᒻᒪᓗ ᐊᓐᓇᒃᑐᐃᓂᖅ, ᐊᑐᖅᑕᐅᒃᑲᓐᓂᕈᖕᓇᖅᑐᖅ ᐆᒻᒪᖅᖁᑎᓕᐅᕆᓂᕐᒥᒃ, ᓄᓇᓕᒃ ᖃᓄᐃᖏᑦᑎᐊᕐᓂᖓᓄᑦ, ᓯᒡᔭᐃᑦ ᓱᕋᒃᐸᓪᓕᐊᓂᖏᑦ, ᐊᐅᒃᑕᔫᑦ ᐊᒻᒪᓗ ᐱᑦᑕᐅᖏᑦᑐᖅ, ᐊᒥᓱᒃᑲᓐᓃᓪᓗ. CINUK ᐊᕐᕌᒍᑕᒫᖅ ᖃᐅᔨᓇᓱᖕᓂᕐᒧᑦ ᑲᑎᒪᓂᖃᓚᐅᖅᑐᑦ ᐋᒡᔪᓕᕐᕕᒃ (ᑎᓯᐱᕆ) 5-ᒥᑦ ᐅᑭᐅᖑᔪᖅ ArcticNet-ᑯᑦ ᐊᕐᕌᒍᑕᒫᖅ ᖃᐅᔨᓇᓱᖕᓂᕐᒧᑦ ᑲᑎᒪᓂᖓᓐᓂᑦ (ASM) 2022.

2022 ᐅᑭᐅᖅᑕᖅᑐᒥᑦ ᖃᐅᔨᓇᓱᖕᓂᕐᒧᑦ ᐃᓕᑕᕆᔭᐅᔾᔪᑎ

ᖁᕕᐊᒋᕙᕗᑦ ᓘᑲᓯ ᐊᕋᒡᒍᑕᐃᓐᓇᖅ, ᐅᑭᐊᖅ ᐅᑭᐅᖅᑕᖅᑐᒥᑦ ᖃᐅᔨᓇᓱᖕᓂᕐᒧᑦ ᐃᓕᑕᕆᔭᐅᔾᔪᑎᑖᖅᑐᖅ ᓴᓂᑭᓗᐊᕐᒥᑦ, ᓄᓇᕗᒻᒥᑦ. ᑐᓂᔭᐅᓚᐅᖅᑐᖅ ᐃᓕᑕᕆᔭᐅᔾᔪᑎᒥᑦ ᐋᒡᔪᓕᕐᕕᒃ (ᑎᓯᐱᕆ) 8-ᒥᑦ ArcticNet-ᑯᑦ ᐊᕐᕌᒍᑕᒫᖅ ᖃᐅᔨᓇᓱᖕᓂᕐᒧᑦ ᑲᑎᒪᓂᖓᓐᓂᑦ.

ᐅᑭᐅᖅᑕᖅᑐᒥᑦ ᖃᐅᔨᓇᓱᖕᓂᕐᒧᑦ ᐃᓕᑕᕆᔭᐅᔾᔪᑎ ᑐᓂᔭᐅᖃᑦᑕᖅᑐᖅ ᐊᕐᕌᒍᑕᒫᖅ ᐃᓕᑕᖅᓯᑉᓗᑎᒃ ᐊᖏᔪᒥᒃ ᐃᑲᔪᐃᓂᖃᖅᑐᓂᒃ ᐊᖏᔪᒻᒪᕆᖕᒥᑦ ᖃᐅᔨᒪᓂᕐᒥᒃ ᐊᒻᒪᓗ ᑐᑭᓯᐊᓂᕐᒥᒃ ᑲᓇᑕᐅᑉ ᐅᑭᐅᖅᑕᖅᑐᖓᓂᑦ ᐊᒻᒪᓗ, ᑭᖑᓪᓕᖅᐹᖑᓚᐅᖅᑐᒥᑦ ᓄᓇᕐᔪᐊᕐᒥᑦ ᐅᑭᐅᖅᑕᖅᑐᒧᑦ ᐅᑭᐅᖑᔪᒧᑦ (2007-2008), ᐃᓕᑕᖅᓯᑉᓗᓂ ᐊᓯᐊᙳᖅᑐᒥᒃ ᖃᐅᔨᒪᓂᕐᒥᒃ ᐱᒋᐊᖅᑎᑦᑎᓂᕐᒧᑦ.

ᐃᓕᑦᑎᒃᑲᓐᓂᕆᑦ

POLAR ᐃᓕᓴᖅᑎᓂᒃ ᐃᓕᑕᖅᓯᓃᑦ

POLAR-ᑯᑦ ᐅᐱᒍᓱᒃᑐᑦ ᐊᒻᒪᓗ ᐃᑲᔪᖅᖢᑎᒃ ᑭᖑᕚᖑᓂᐊᖅᑐᓂᒃ ᐅᑭᐅᖅᑕᖅᑐᒥᑦ ᖃᐅᔨᓴᐃᔨᓂᒃ ᖃᑉᓯᐊᕐᔪᖕᓂᑦ ᐃᓕᑕᖅᓯᓂᒃᑯᑦ ᐊᒻᒪᓗ ᐃᓕᓴᖅᑎᓂᒃ ᐃᑲᔫᑎᒃᑯᑦ ᐊᔪᙱᑦᑎᐊᖅᑐᓂᒃ ᓯᓚᑦᑐᖅᓴᕐᕕᖕᒥᑦ ᐃᓕᓴᖅᑎᓂᒃ ᐅᑭᐅᖅᑕᖅᑐᒥᑦ ᖃᐅᔨᓴᐃᓂᕐᓄᑦ: ᑲᓇᑕᒥᑦ ᐅᑭᐅᖅᑕᖅᑐᒥᑦ ᖃᐅᔨᒪᓂᕐᒧᑦ ᐃᓕᓴᖅᑎᓄᑦ ᐃᑲᔫᑎ, POLAR ᐅᑭᐅᖅᑕᖅᑐᒥᐅᑕᒥᒃ ᐃᓕᓴᖅᑎᒧᑦ ᐃᑲᔫᑎ, POLAR ᐅᑭᐅᖅᑕᖅᑐᒥᐅᑕᒥᒃ ᐃᓕᑕᖅᓯᔾᔪᑎ, POLAR ᓂᒋᐊᓃᑦᑐᒥᑦ ᐅᑭᐅᖅᑕᖅᑐᒥᑦ ᐃᓕᓴᖅᑎᒧᑦ ᐃᑲᔫᑎ, ᐊᒻᒪᓗ ᐅᑭᐅᖅᑕᖅᑐᒥᑦ ᖃᐅᔨᓇᓱᖕᓂᕐᒥᒃ ᐊᔪᕈᖕᓃᖅᓴᐃᓂᕐᒧᑦ ᑐᕌᖓᔪᒧᑦ ᐊᔾᔨᐅᖏᑦᑐᑦ ᐃᓕᑕᖅᓯᔾᔪᑏᑦ ᐅᑭᐅᖅ ᐃᓱᐊ ᑎᑭᑉᐸᓪᓕᐊᓂᖓᓂᑦ, ᐃᓕᑕᖅᓯᖃᑦᑕᖅᑐᒍᑦ ᐱᐊᓂᑦᑎᐊᖅᓯᒪᓂᕆᔭᖏᓐᓂᒃ ᐅᑭᐅᖑᔪᒥᑦ ᐱᑖᖅᑎᑕᐅᔪᓂᒃ.

POLAR ᐃᓕᓴᖅᑎᒥᒃ ᐃᓕᑕᕆᔭᐅᔾᔪᑎᑖᖅᑐᑦ

ᐊᖅᕼᐊᓕᐊᑦ ᐅᓂᑉᑳᖅ

ᓯᑕᒪᒋᓕᖅᑕᖓᑦ ᐊᖅᕼᐊᓕᐊᑦ ᐅᓂᑉᑳᒥᑦ ᖃᑉᓯᐊᕐᔪᐃᑦ ᐱᔪᒥᓇᖅᑐᑦ ᓇᐃᑦᑐᑦ ᐅᖃᓕᒫᒐᐃᑦ 60 ᐅᖓᑖᓄᑦ ᐱᓕᕆᖃᑎᒌᓚᐅᖅᑐᑦ ᐱᓕᕆᐊᕆᓚᐅᖅᑕᖓᓐᓄᑦ ᑲᓇᑕᒥᑦ ᐊᔪᙱᓐᓂᖃᖅᑐᑦ, ᐃᓚᐅᑉᓗᑎᒃ ᓄᓇᒥᑦ ᐊᒻᒪᓗ ᐃᓅᖃᑎᒌᓄᑦ ᖃᐅᔨᓇᓱᒃᑏᑦ ᐊᒻᒪᓗ ᓄᓇᖃᖅᖄᖅᑐᑦ ᖃᐅᔨᒪᓂᕐᒥᒃ ᐱᓯᒪᔪᑦ. ᖃᓄᐃᖓᓂᐅᔪᑦ POLAR-ᑯᑦ ᐱᓕᕆᖃᑎᒌᖕᓂᕐᒧᑦ ᖃᐅᔨᓴᐃᓂᕐᒧᑦ ᐱᓕᕆᐊᖓᑦ, ᐊᓕᓚᔪᐃᑦ ᓇᐃᓈᖅᑎᕆᔪᑦ ᓴᖅᕿᑕᐅᓯᒪᔪᑦ ᖃᐅᔨᓴᐃᓂᕐᓂᑦ ᐊᒻᒪᓗ ᖃᐅᔨᓴᐃᓂᕐᒧᑦ ᖃᓄᐃᖓᓂᐅᔪᑦ, ᑕᑯᒃᓴᐅᑎᑦᑎᔪᑦ ᐃᓂᐅᔪᒥᑦ ᖃᓄᐃᓕᐅᖅᐸᓪᓕᐊᓂᐅᔪᓂᒃ, ᐊᒻᒪᓗ ᖃᐅᔨᑉᓗᒋᑦ ᐃᓂᐅᔪᑦ ᖃᐅᔨᓴᐃᕝᕕᐅᒃᑲᓐᓂᕆᐊᖃᖅᑐᓂᑦ. ᐱᓕᕆᐊᖃᖅᑐᑦ ᐃᓚᖏᓐᓂᒃ ᐱᒻᒪᕆᐅᔪᑦ ᐊᐱᖅᖁᑎᒋᔭᐅᓯᒪᔪᓂᒃ ᐅᑭᐅᖅᑕᖅᑐᒥᐅᓄᑦ POLAR-ᑯᑦ ᖃᓂᑦᑐᒥᑦ ᐸᕐᓇᐃᓂᖓᑦ ᐊᒻᒪᓗ ᖃᐅᔨᒪᓂᕐᒥᒃ ᑐᓂᐅᑎᖃᑦᑕᕐᓂᕐᒧᑦ ᑲᑎᒪᓂᖏᓐᓂᑦ 2020-ᒥᑦ.

ᐱᔾᔪᑕᐅᔪᑦ:

• ᑐᒃᑐ
• ᐃᖁᓗᒃᐱᒃ
• ᐃᒪᕐᒥᐅᑕᐃᑦ ᓂᕐᔪᑏᑦ
• ᓯᓚᐅᑉ ᐊᓯᔾᔨᖅᐸᓪᓕᐊᓂᖓ
• ᐊᕙᑎᕗᑦ ᐊᓯᐊᙳᕐᓂᖓ

POLAR-ᑯᑦ ᖃᕆᑕᐅᔭᒃᑯᑦ ᑲᑎᒪᑎᑦᑎᓂᖏᑦ

ᓇᑦᑎᐊᑦ (ᒫᑦᓯ) 2022-ᒥᑦ POLAR-ᑯᑦ ᖃᑉᓯᐊᕐᔪᖕᓂᑦ ᖃᕆᑕᐅᔭᒃᑯᑦ ᑲᑎᒪᑎᑦᑎᓚᐅᖅᑐᑦ ᖃᐅᔨᓴᐃᔩᑦ ᐊᒻᒪᓗ ᓄᓇᖃᖅᖄᖅᑐᑦ ᖃᐅᔨᒪᓂᕐᒥᒃ ᐱᓯᒪᔪᑦ ᑐᓂᓯᖃᑦᑕᐅᑎᑉᓗᑎᒃ ᑐᑭᓯᐅᒪᔾᔪᑎᓂᒃ ᐃᓚᖏᓐᓂᒃ ᐊᕙᑎᓕᕆᓂᕐᒧᑦ ᐱᔾᔪᑕᐅᔪᓂᒃ ᐅᑭᐅᖅᑕᖅᑐᒥᑦ ᓄᓇᓖᑦ ᐃᓱᒫᓘᑎᒋᓗᐊᖅᑕᖏᓐᓂᒃ - ᐃᓚᐅᑉᓗᑎᒃ ᑐᒃᑐᐃᑦ ᐊᒥᓲᑎᒋᓂᖏᑦ, ᐃᖃᓗᒃᐲᑦ ᐊᒥᓲᑎᒋᓂᖏᑦ, ᕿᓇᓗᒐᐃᑦ ᐊᒻᒪᓗ ᐃᒪᕐᒥᑦ ᐱᕈᖅᐸᓪᓕᐊᓂᖃᖃᑎᒌᒃᑐᑦ ᐆᒪᔪᐃᑦ ᐊᔾᔨᒌᙱᑦᑐᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᐅᔨᓴᐃᓂᖅ, ᐊᒻᒪᓗ ᐊᓯᙳᕐᓂᖓ ᐊᐳᑎᐅᑉ, ᓯᑰᑉ, ᐊᒻᒪᓗ ᖃᐅᓯᖃᑦᑕᕐᓂᐅᑉ.

ᖃᐅᔨᒪᓂᕐᒥᒃ ᑐᓂᓯᖃᑦᑕᐅᑎᓂᖅ ᖃᕆᑕᐅᔭᒃᑯᑦ ᑲᑎᒪᓂᕐᓂᑦ - YouTube

POLAR-ᑯᓐᓂᑦ ᐅᖃᓪᓚᒃᑏᑦ ᐃᖃᓗᒃᑑᑦᑎᐊᕐᒥᑦ

POLAR-ᑯᑦ ᐱᓇᓱᐊᕈᓯᑕᒫᑦ ᐅᖃᓪᓚᒃᑎᖃᖃᑦᑕᖅᑐᑦ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒥᙶᖅᑐᒥᒃ (CHARS) ᐱᔾᔪᑎᖃᖅᑐᓂᒃ ᖃᐅᔨᓇᓱᒃᑏᑦ ᑕᑯᔭᖅᑐᐃᓯᒪᔪᓂᒃ, ᓄᓇᓕᖕᒥᑦ ᐊᔪᙱᓐᓂᖃᖅᑐᓂᒃ ᐃᓚᐅᖃᑕᐅᔪᑦ ᖃᐅᔨᓴᐃᓂᕐᒥᑦ, ᐊᒻᒪᓗ POLAR-ᑯᑦ ᐃᖅᖃᓇᐃᔭᖅᑎᖏᓐᓂᑦ. ᐅᖃᓪᓚᒃᑏᑦ ᑭᑐᑐᐃᓐᓇᓄᑦ ᑐᓂᓯᖃᑦᑕᖅᑐᑦ ᖃᐅᔨᒪᓂᕆᔭᖏᓐᓂᒃ, ᑕᑯᒃᓴᐅᑎᑦᑎᑉᓗᑎᒃ ᖃᓄᖅ ᐱᓕᕆᖃᑎᖃᖃᑦᑕᕐᓂᖏᓐᓂᒃ ᓄᓇᓕᖕᒥᑦ ᐊᒻᒪᓗ ᐃᓚᓕᐅᑎᑉᓗᒋᑦ ᐃᓄᐃᑦ ᖃᐅᔨᒪᓂᕆᔭᖏᑦ ᖃᐅᔨᓴᐃᓂᕆᔭᖏᓐᓄᑦ.

ᐃᓕᑦᑎᒃᑲᓐᓂᕆᑦ ᐅᖃᓪᓚᒃᑎᓂᒃ ᐱᔾᔪᑎᖃᖅᑐᒥᒃ..

“ᓱᓇᑕᖃᖅᐸ ᐃᒪᕐᒥᑦ?” ᒪᒃᑯᒃᑐᓂᒃ ᐆᒪᓂᖃᖅᑐᓂᒃ ᑲᑎᒪᑎᑦᑎᓂᖅ

ᓴᒡᒐᕉᑦᒥᑦ (ᔪᓚᐃ) POLAR-ᑯᑦ ᖃᐅᔨᓴᐃᓂᕐᒧᑦ ᐃᑲᔪᖅᑎᖓ ᐊᒻᒪᓗ ᓘᒃᑖᒧᑦ ᐃᓕᓴᖅᑐᖅ ᑖᓂᐊᓪ ᓄᕗᓴᑦ (Danielle Nowosad) ᒪᕐᕉᖕᓂᒃ ᑲᑎᒪᑎᑦᑎᓚᐅᖅᑐᖅ ᐃᒪᑦᑎᐊᕙᖕᒥᑦ ᐆᒪᔪᐃᑦ ᐊᔾᔨᒌᙱᑦᑐᓂᒃ ᐃᖃᓗᒃᑑᑦᑎᐊᕐᒥᑦ ᒪᒃᑯᒃᑐᖏᓐᓄᑦ ᐱᓕᕆᖃᑎᒋᑉᓗᒋᑦ ᕿᑎᕐᒥᐅᓂᑦ ᐱᖃᓐᓈᒌᓄᑦ ᑲᑐᔾᔨᖃᑎᒌᒃᑯᑦ. ᖃᐅᔨᔪᒪᑦᑎᐊᖅᑐᑦ ᒪᒃᑯᒃᑐᐃᑦ ᑲᑎᒪᔪᓃᖃᑕᐅᔪᑦ ᑕᑯᔭᖅᑐᐃᓚᐅᖅᑐᑦ ᑕᓯᕋᔭᖕᒥᑦ ᖃᓂᑕᖓᓃᑦᑐᒥᒃ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᐅᑉ (CHARS) ᒥᑭᔪᓂᒃ ᐆᒪᔪᓂᒃ ᑲᑐᖅᓱᐃᓂᐊᕐᓗᑎᒃ. ᖃᐅᔨᓴᐃᕝᕕᖕᒧᐊᓕᖅᖢᑎᒃ ᕿᒥᕐᕈᓂᐊᕐᓗᒋᑦ ᒥᑭᔪᑦ ᐆᒪᔪᐃᑦ ᐊᖏᓐᓇᖅᑐᒃᑯᑦ ᐊᒻᒪᓗ ᐃᓕᑦᑎᓗᑎᒃ ᐆᒪᓂᖏᓐᓂᒃ, ᐃᓂᒋᖃᑦᑕᖅᑕᖏᓐᓂᒃ, ᐊᒻᒪᓗ ᐱᒻᒪᕆᐅᔪᒥᒃ ᐱᓕᕆᐊᖃᕐᓂᖏᓐᓂᒃ ᐱᕈᖅᐸᓪᓕᐊᓂᖃᖃᑎᒌᒃᑐᓂᑦ. ᑕᐃᒪᓐᓇᐃᓕᖅᑎᑦᑎᓃᑦ ᓱᕈᓯᕐᓂᑦ ᖃᐅᔨᔪᒪᓕᖅᑎᑦᑎᓂᖃᖃᑦᑕᖅᑐᑦ ᓂᕐᔪᑏᑦ ᒥᒃᓵᓄᑦ ᐊᒻᒪᓗ ᐱᒋᐊᕈᒪᓕᖅᑎᑦᑎᑉᓗᑎᒃ ᐃᓅᓯᓗᒃᑖᒥᒃ ᐱᔪᒪᓂᖃᕐᓂᕐᒧᑦ - ᐃᒻᒪᖅᖄᓘᓐᓃᑦ ᐃᖅᖃᓇᐃᔮᕆᓗᒍ - ᖃᐅᔨᓇᓱᖕᓂᖅ.

ᑎᖕᒥᐊᓂᑦ ᐋᓐᓂᐊᕐᓇᒥᑦ ᖃᐅᔨᒪᓕᖅᑎᑦᑎᓂᖅ

ᐅᑭᐅᖅᑕᖅᑐᒥᐅᑕᐃᑦ ᐃᓱᒫᓘᑎᖃᓚᐅᖅᑐᑦ ᑎᖕᒥᐊᑦ ᐋᓐᓂᐊᕐᓇᖅᑐᖃᓚᐅᖅᑐᓂᑦ ᐅᑭᐅᖅ ᑲᓇᑕᒥᑦ. ᐋᓐᓂᐊᕐᓇᖅ ᐊᒃᑐᖅᓯᔪᖕᓇᖅᑐᖅ ᒥᑎᕐᓂᑦ ᐊᒻᒪᓗ ᑎᖕᒥᐊᓂᑦ ᓂᕆᔭᐅᖃᑦᑕᖅᑐᑦ ᐅᑭᐅᑕᖅᑐᒥᑦ ᓄᓇᓕᖕᒥᐅᓄᑦ. ᓴᓂᕋᕐᒧᐊᖅᑕᐅᓲᒃᑯᑦ, ᑭᑐᑐᐃᓐᓇᓄᑦ ᖃᕆᑕᐅᔭᒃᑯᑦ ᑐᕌᖓᔪᒃᑯᑦ, ᐊᒻᒪᓗ ᓰᐲᓰ ᐅᑭᐅᖅᑕᖅᑐᖅ ᓈᓚᐅᑎᒃᑯᑦ “ᖁᓪᓕᖅ” ᑐᓴᖅᓴᐅᓚᐅᖅᑐᑦ ᐃᖅᖃᓇᐃᔭᖅᑎ ᖃᐅᔨᓴᐃᔨ ᓂᕐᔪᑎᓂᒃ ᒪᑎᐅᓪᑎ ᑑᒪᓯᐊᓕ (Matilde Tomaselli), POLAR-ᑯᑦ ᖃᐅᔨᑎᓚᐅᖅᑕᖏᑦ ᑭᑐᑐᐃᓐᓇᐃᑦ ᐋᓐᓂᐊᕐᓇᐅᔪᒥᒃ ᐊᒻᒪᓗ ᖃᓄᖅ ᐃᓕᑕᕆᔭᐅᔪᖕᓇᕐᓂᖓ ᐅᖃᐅᓯᕆᑉᓗᒋᓪᓗ ᐅᓗᕆᐊᓇᙱᑦᑐᒃᑯᑦ ᐊᑐᖅᑕᐅᔪᒃᓴᐃᑦ ᒪᖃᐃᑕᐅᑉᓗᑎᒃ ᐊᒻᒪᓗ ᓂᕆᔭᐅᑉᓗᑎᒃ ᑎᖕᒥᐊᑦ ᐊᒻᒪᓗ ᒪᓐᓂᖏᑦ.

ᓴᓗᒪᔪᒥᒃ ᐆᒻᒪᖅᖁᑎᖃᕐᓂᖅ ᐅᑭᐅᖅᑕᖅᑐᒥᑦ ᓄᓇᓖᑦ

ᐅᑭᐅᖅᑕᖅᑐᒥᑦ ᓄᓇᓖᑦ ᓯᕗᓪᓕᖅᐸᐅᑎᔭᕆᐊᓕᖕᓂᑦ ᐋᖅᕿᒃᓯᓚᐅᖅᑐᑦ ᐊᑐᕈᒪᙱᓕᖅᖢᒋᑦ ᐅᖅᓱᐊᓗᒥᒃᒃ. POLAR-ᑯᑦ ᐱᓕᕆᖃᑎᖃᖅᑐᑦ, ᓲᕐᓗ ᑲᓇᑕᒥᑦ ᖃᐅᔨᓴᐃᓂᕐᒧᑦ ᑲᑎᒪᔨᓂᒃ ᐊᒻᒪᓗ ᑲᓇᑕᒥᑦ ᓄᓇᒥᑦ ᐱᕝᕕᐅᖃᑦᑕᖅᑐᒃᑯᓐᓂᑦ, ᐊᒥᓱᓂᒃ ᓴᓗᒪᔪᖅ ᐆᒻᒪᖅᖁᑎᓕᐅᕆᓂᕐᒧᑦ ᐱᓕᕆᐊᓄᑦ. POLAR-ᑯᑦ ᓴᓗᒪᔪᒥᒃ ᐆᒻᒪᖁᖅᑎᓕᐅᕆᓂᕐᒧᑦ ᐃᖅᖃᓇᐃᔭᖅᑎᖏᑦ ᐱᕙᓪᓕᐊᓂᕐᒧᑦ ᐊᒻᒪᓗ ᐆᒃᑐᕋᐃᓂᕐᒧᑦ ᓴᓗᒪᔪᓕᐅᕆᔾᔪᑎᓂᒃ ᖃᓄᖅ ᑲᒪᒋᔭᕆᐊᖃᕐᓂᕆᔭᖓᓐᓄᑦ ᐊᕙᑎᑉᑎᖕᓂᑦ, ᐃᓂᓕᐅᕆᓂᕐᓂᒃ ᐊᒻᒪᓗ ᐱᖅᖁᓯᕆᔭᐅᔪᒥᒃ ᐊᒃᓱᕈᕐᓇᖅᑐᓄᑦ ᑲᓇᑕᐅᑉ ᐅᖓᓯᒃᑐᓂᑦ ᐅᑭᐅᑕᖅᑐᒥᑦ ᓄᓇᓕᖏᓐᓂᑦ.

• ᐆᒃᑐᕋᐃᓂᖅ ᐊᒻᒪᓗ ᑕᑯᑎᑦᑎᓂᖅ ᒥᑭᔪᒥᒃ ᐊᓄᕆᒥᑦ ᑲᐃᕕᑦᑐᒥᒃ ᐅᑭᐅᖅᑕᖅᑐᒥᑦ
• ᐆᒪᔪᓂᙶᖅᑐᓂᒃ ᐅᖅᓱᓕᐅᕆᓂᖅ ᓂᖀᑦ ᐊᒃᑕᑰᖅᑕᐅᔪᓂᑦ ᐅᑭᐅᖅᑕᖅᑐᒥᑦ ᓄᓇᓕᖕᒥᑦ
• ARENA: ᐱᕙᓪᓕᐊᓂᖅ ᐆᒻᒪᖅᖁᒧᑦ ᐊᔪᙱᑦᑐᓂᒃ ᐅᖓᓯᒃᑐᓂᑦ ᓄᓇᓕᖕᓂᑦ
• BeAST: ᐆᒻᒪᖅᖁᑎᓕᐅᕆᓂᖅ ᐃᓄᐃᑦ ᐊᓇᖅᑕᖏᓐᓂᑦ
• ᐊᓯᖏᑦ ᐱᓕᕆᐊᑦ

2022 ᒪᒃᑯᒃᑐᐃᑦ ᖃᐅᔨᓇᓱᖕᓂᕐᒧᑦ ᐃᖅᖃᓇᐃᔮᓂᒃ ᖃᐅᔨᒪᓕᖅᑎᑦᑎᓂᕐᒧᑦ ᑕᖕᒫᕐᕕᒃ

2022 ᒪᒃᑯᒃᑐᐃᑦ ᖃᐅᔨᓇᓱᖕᓂᕐᒧᑦ ᐃᖅᖃᓇᐃᔮᓂᒃ ᖃᐅᔨᒪᓕᖅᑎᑦᑎᓂᕐᒧᑦ ᑕᖕᒫᕐᕕᓕᕆᓂᖓᑦ ᑲᒪᒋᔭᐅᓚᐅᖅᑐᖅ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒧᑦ (CHARS) ᐊᒻᒪᓗ ᖃᐅᔨᑎᖦᖢᒋᑦ ᒪᒃᑯᒃᑐᐃᑦ ᐱᕕᖃᖅᑎᑦᑎᓂᐅᔪᓂᒃ ᖃᐅᔨᓇᓱᖕᓂᕐᒥᑦ. ᐱᓕᕆᓂᖃᖅᖢᑎᒃ ᑲᑎᒪᓚᐅᖅᑐᑦ ᓂᕐᔪᑎᓂᒃ ᖃᐅᔨᓴᐃᓂᕐᓄᑦ, ᐊᐅᓚᐅᑎᖃᖅᑐᓕᕆᓂᕐᒃ, ᐃᖏᕐᕋᔭᒍᑎᓄᑦ ᐋᖅᕿᐅᒪᓂᖏᓐᓂᒃ, ᖃᕆᑕᐅᔭᒃᑯᑦ ᓇᓗᓇᐃᒃᑯᑦᑎᖅᑐᐃᓂᕐᓄᑦ, ᐊᒻᒪᓗ ᖃᐅᔨᓴᐃᓂᕐᒧᑦ ᐃᒪᐅᑉ ᖃᓄᐃᓐᓂᕆᔭᖓᓂᒃ ᐊᒻᒪᓗ ᐊᒃᑐᖅᓯᓂᕆᔭᖓᓂᒃ ᐅᑭᐅᖅᑕᖅᑐᒥᑦ ᐃᒪᕐᒥᐅᑕᐃᑦ ᐆᒪᔪᓂᒃ.

ᑕᖕᒫᕐᕕᒃ ᐃᑲᔪᖅᑕᐅᓗᐊᓚᐅᖅᑐᖅ ᒪᑭᒋᐊᖅᑕ ᐃᓄᐃᑦ ᐊᔪᕈᖕᓃᖅᓴᐃᓂᕐᒧᑦ ᐊᐅᓚᑦᑎᔨᒃᑯᓐᓄᑦ, ᐊᒻᒪᓗ ᐱᓕᕆᖃᑎᒋᔭᐅᔪᓄᑦ ᐃᓚᐅᑉᓗᑎᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᐊᒻᒪᓗ ᐊᐅᓚᑦᑎᓂᕐᒧᑦ ᑲᑎᒪᔩᑦ, MakerSpace-ᑯᑦ, SHAD Canada-ᑯᑦ, ᐊᒻᒪᓗ ᐱᙳᐊᖅᑐᓕᕆᔨᒃᑯᑦ ᐊᒻᒪᓗ ᒥᕐᖑᐃᖅᓯᕐᕕᖕᓄᑦ ᑲᑐᔾᔨᖃᑎᒌᑦ ᓄᓇᕗᒻᒥᒃᑯᓐᓄᑦ.

ᐊᕐᕌᒍᑕᒫᖅ ᑲᑎᒪᓂᖏᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᒃᑯᑦ

POLAR-ᑯᑦ ᐊᕐᕌᒍᑕᒫᖅ ᑲᑎᒪᓂᖏᓐᓃᖃᑕᐅᓚᐅᖅᑐᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᒃᑯᓐᓂᑦ ᐊᒻᒪᓗ ᐅᑉᓗᒥᒨᓕᖅᑐᐃᓚᐅᖅᑐᑦ ᐅᑭᐅᖑᔪᖅ ᐱᓕᕆᐊᖑᔪᓂᑦ, ᐃᓚᐅᑉᓗᑎᒃ ᐱᕙᓪᓕᐊᓂᕆᔭᕗᑦ ᐃᓄᐃᑦ ᐃᖅᖃᓇᐃᔭᖅᑎᑕᐅᓂᖏᑦ ᐊᒻᒪᓗ ᐱᓕᕆᖃᑎᒋᔭᐅᓂᖏᑦ ᐃᓄᐃᑦ ᐱᓕᕆᖃᑎᒌᖑᔪᑦ, ᐱᔾᔪᔾᔨᔨᐅᔪᑦ, ᐊᒻᒪᓗ ᒐᕙᒪᒃᑯᑦ.

ᒥᓂᔅᑕ ᑖᓐ ᕙᓐᑕᓪ ᑕᑯᔭᖅᑐᐃᔪᖅ

POLAR-ᑯᑦ ᑐᙵᓱᒃᑎᑦᑎᓚᐅᖅᑐᑦ ᒥᓂᔅᑕ ᑖᓐ ᕙᓐᑕᓪᒥᑦ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒧᑦ (CHARS) ᐊᑯᓪᓕᕈᕐᕕᒃ (ᐋᒋᓯ) 9-ᒥᑦ. ᖁᓪᓕᕐᒥᑦ ᐃᑭᑦᑎᓂᖃᖅᖄᖅᑎᓪᓗᒍ ᐄᕙ ᑲᑯᓚᒃ ᐅᑦᑐᑭᐊᖅ ᐊᒻᒪᓗ ᕿᐊᕐᕚᖅᖢᑎᒃ ᐃᒻᖏᖅᑐᖃᖅᖄᖅᑎᓪᓗᒋᑦ ᕕᒃᑑᕆᔭ ᐊᒻᒪᓗ ᑲᓕᓐᑕ ᑯᑉᓗᒌᓇ, ᒥᓂᔅᑕ ᑖᓐ ᕙᓐᑕᓪ ᑕᑯᔭᖅᑐᓚᐅᖅᑕᖓ ᖃᐅᔨᓴᐃᕝᕕᒃ ᐊᒻᒪᓗ ᐅᖃᓪᓚᖃᑎᒋᑉᓗᒋᑦ ᖃᐅᔨᓴᐃᔩᑦ ᐊᓯᖏᓪᓗ POLAR-ᑯᓐᓄᑦ ᐃᖅᖃᓇᐃᔭᖅᑎᐅᔪᑦ.

ᑲᓇᑕᒥᑦ ᐊᖏᔪᖅᖄᕐᔪᐊᖅ ᔭᔅᑎᓐ ᑐᕉᑑ ᐊᒻᒪᓗ NATO-ᑯᓐᓄᑦ ᑎᑎᕋᖅᑎ ᑕᑯᔭᖅᑐᐃᔪᑦ

ᐊᑯᓪᓕᕈᕐᕕᒃ (ᐋᒋᓯ) 25-ᒥᑦ, ᑕᓕᖅᐱᒃᖠᒃᑯᑦ ᐅᐱᓐᓇᖅᑐᖅ ᔭᔅᑎᓐ ᑐᕉᑑ ᐊᒻᒪᓗ ᔨᐊᓐᔅ ᓯᑐᓪᑕᓐᐴᔅ (Jens Stoltenberg), NATO-ᑯᓐᓄᑦ ᑎᑎᕋᖅᑎ ᑕᑯᔭᖅᑐᐃᓚᐅᖅᑐᑦ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒥᑦ (CHARS). ᐃᓚᒋᔭᐅᑉᓗᓂ ᑕᑯᔭᖅᑐᐃᓂᖓᓐᓄᑦ, ᑲᑎᖃᑎᖃᓚᐅᖅᑐᑦ ᐃᓐᓇᕆᔭᐅᔪᓂᑦ ᐊᒻᒪᓗ ᐃᓄᐃᑦ ᓯᕗᓕᖅᑎᐅᔪᓂᒃ ᐊᒻᒪᓗ ᐅᖃᖃᑎᖃᖅᖢᑎᒃ ᐊᒥᓱᓂᒃ ᖃᐅᔨᓴᐃᔨᒋᔭᑉᑎᖕᓂᑦ ᐊᒻᒪᓗ ᐃᖅᖃᓇᐃᔭᖅᑎᓂᒃ ᖃᐅᔨᑎᑦᑎᔪᖕᓇᓚᐅᖅᖢᑎᒃ ᐃᖅᖃᓇᐃᔮᕆᖃᑦᑕᖅᑕᖏᓐᓂᑦ. ᑲᓇᑕᒥᑦ ᐊᖏᔪᖅᖄᕐᔪᐊᖅ ᑲᑎᖃᑎᖃᓚᐅᕐᒥᔪᖅ ᐊᑕᐅᑦᑎᒃᑯᑦ ᐱᓕᕆᐊᓖᑦ ᓇᓄᖅ-ᓄᓇᒃᐳᑦ-ᐅᓇᑕᖅᑐᒃᓴᓂᒃ, ᐅᒥᐊᕐᔪᐊᕐᒦᐅᑕᓂᒃ, ᐊᒻᒪᓗ ᖃᖓᑕᓲᖅᑎᓂᒃ - ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒦᓚᐅᖅᑐᑦ (CHARS) ᐊᐅᔭᐅᓚᐅᖅᑐᒥᑦ.

ᐅᑉᓗᕐᒥᑦ, ᐊᓕᐊᓇᐃᓚᐅᕐᒥᔪᖅ ᑲᒪᔭᖃᖅᑎᓪᓗᑕ ᖃᐃᓯᒪᔪᓂᒃ ᐅᐱᓐᓇᖅᑐᖅ ᐹᒥᓚ ᕼᐊᑯᖓᖅ ᒍᕉᔅ (Pamela Hakongaq Gross), ᓄᓇᕗᒻᒧᑦ ᓯᕗᓕᖅᑎᒧᑦ ᑐᖏᓕᕆᔭᐅᔪᖅ; ᐅᐱᓐᓇᖅᑐᖅ ᑖᓐ ᕙᓐᑖᓪ (Dan Vandal), ᒥᓂᔅᑕ ᐅᑭᐊᖅᑕᖅᑐᒥᑦ ᑲᒪᔨᒃᑯᑦ; ᐅᐱᓐᓇᖅᑐᖅ ᒥᓚᓂ ᔪᐃ (Mélanie Joly), ᒥᓂᔅᑕ ᐊᓯᐊᓂᑦ ᓄᓇᓂᑦ ᑲᒪᔨᒃᑯᓐᓄᑦ; ᐅᐱᓐᓇᖅᑐᖅ ᐊᓃᑕ ᐊᓇᓐᑦ (Anita Anand), ᒥᓂᔅᑕ ᐅᓇᑕᖅᑐᒃᓴᒃᑯᓐᓄᑦ; ᐊᒻᒪᓗ ᐅᓇᑕᖅᑐᒃᓴᓄᑦ ᐊᖏᔪᖅᖄᕆᔭᐅᔪᖅ ᐅᐄᓐ ᐃᐊᐃᐅᕐ (Wayne Eyre), ᐊᖏᔪᖅᖄᖅ ᐅᓇᑕᖅᑐᒃᓴᓂᑦ ᐃᖅᖃᓇᐃᔭᖅᑎᓄᑦ.

ᐊᑕᐅᑦᑎᒃᑯᑦ ᐱᓕᕆᐊᓖᑦ ᓇᓄᖅ-ᓄᓇᒃᐳᑦ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒦᑎᓪᓗᒋᑦ (CHARS), POLAR-ᑯᑦ ᑲᒪᔭᖃᓚᐅᕐᒥᔪᑦ ᐅᑉᓗᕈᒥᑖᓂᒃᑎᓪᓗᒋᑦ ᖁᕕᐊᓱᒃᑎᑦᑎᑉᓗᑎᒃ ᐃᖃᓗᒃᑑᑦᑎᐊᕐᒥᑦ ᓇᒃᑭᐅᖦᖢᑎᒃ, ᑕᑯᔭᒃᓴᖃᖅᖢᑎᒃ ᐱᖁᑎᓂᒃ, ᐊᒻᒪᓗ ᑲᑎᖃᑎᖃᕈᖕᓇᖅᑎᑦᑎᑉᓗᑎᒃ ᑲᓇᑕᒥᑦ ᐅᓇᑕᖅᑐᒃᓴᖏᓐᓂᑦ.

ᐊᓕᐊᓇᐃᒍᓱᓚᐅᕐᒥᔪᒍᑦ ᑲᒪᔭᖃᕐᓂᕐᒥᒃ:

• ᑲᓇᑕᒥᑦ ᓯᒡᔭᓂᒃ ᒥᐊᓂᖅᓯᔨᒃᑯᓐᓂᑦ
• ᑲᓇᑕᒥᑦ ᑲᑐᔾᔨᖃᑎᒌᑦ ᓯᓚᑦᑐᖅᓴᕐᕕᖕᒥᑦ

ᑲᑎᒪᔨᐊᓛᑦ ᑲᓇᑕᒥᑦ ᒥᐊᓂᖅᓯᓂᕐᒧᑦ ᐊᒻᒪᓗ ᐅᓇᑕᖅᑐᒃᓴᓂᒃ

ᑲᑎᒪᔨᐊᓛᑦ ᑲᓇᑕᒥᑦ ᒥᐊᓂᖅᓯᓂᕐᒧᑦ ᐊᒻᒪᓗ ᐅᓇᑕᖅᑐᒃᓴᓂᒃᑯᑦ ᑕᑯᔭᖅᑐᐃᓚᐅᖅᑐᑦ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒥᑦ (CHARS) ᐅᑭᐅᓖᑦᒥᑦ (ᐅᒃᑑᐱᕆ) ᐅᑭᐅᖅᑕᖅᑐᒦᑎᓪᓗᒋᑦ ᖃᐅᔨᓴᐃᑉᓗᑎᒃ “ᐱᔾᔪᑕᐅᔪᑦ ᒥᐊᓂᖅᓯᓂᕐᒧᑦ ᐊᒻᒪᓗ ᐅᓇᑕᖅᑐᒃᓴᓂᒃ ᐅᑭᐅᖅᑕᖅᑐᒥᑦ, ᐃᒪᐅᑉᓗᑎᒃ ᑲᓇᑕᐅᑉ ᐅᓇᑕᖅᑐᒃᓴᖏᑦᑕ ᐱᖁᑎᖏᑦ ᐊᒻᒪᓗ ᒥᐊᓂᖅᓯᓂᕐᒧᑦ ᐊᔪᙱᓐᓂᕆᔭᖏᑦ.”

ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒦᑎᓪᓗᒋᑦ (CHARS), ᑲᑎᖃᑎᖃᓚᐅᖅᑐᑦ ᔨᐊᓂᕗ ᕼᐊᐳᑦ (Jennifer C. Hubbard), POLAR-ᑯᑦ ᐊᖏᔪᖅᖄᖓᓂᑦ, ᐊᒻᒪᓗ ᓗᒃᑖᖅ ᑕᐃᕕᑎ ᕼᐃᒃ (David Hik) ᐊᖏᔪᖅᖄᖅ ᖃᐅᔨᓇᓱᒃᑎ, ᐊᖏᔪᖅᖄᖑᔪᖅ ᑐᕌᖓᔪᓄᑦ, ᐃᓕᑦᑎᒃᑲᓐᓂᕐᓂᐊᕐᓗᑎᒃ ᐱᔾᔪᑕᐅᔪᓂᒃ ᐊᒻᒪᓗ ᑕᐅᑐᒐᐅᔪᓂᒃ ᐅᓇᑕᖅᑐᒃᓴᓂᒃ ᐊᒻᒪᓗ ᒥᐊᓂᖅᓯᓂᖅ ᐅᑭᐅᖅᑕᖅᑐᒥᑦ.

ᓂᒋᐊᓃᑦᑐᖅ ᐅᑭᐅᖅᑕᖅᑐᒧᑦ ᐊᖏᖃᑎᒌᒍᑎᒧᑦ ᐅᖃᖃᑎᖃᕐᓂᕐᒧᑦ ᑲᑎᒪᓃᑦ

ᐱᔾᔪᑎᑉᓗᒋᑦ ᑲᓇᑕ, ᑲᓇᑕᒥᑦ ᓄᓇᕐᔪᐊᕐᒥᑦ ᑲᒪᔨᒃᑯᑦ ᑐᓂᓯᓚᐅᖅᑐᑦ ᑐᒃᓯᕋᐅᑎᒥᒃ ᐃᓗᐃᑦᑑᖓᔪᒃᑯᑦ ᐅᖃᖃᑎᒋᔭᐅᓂᕐᒧᑦ ᐃᓚᒋᔭᐅᓂᐊᕐᓗᑎᒃ ᓂᒋᐊᓂᑦ ᐅᑭᐅᖅᑕᖅᑐᒧᑦ ᐊᖏᖃᑎᒌᒍᑎᒥᑦ. ᓄᕐᕋᐃᑦ-ᒥᑦ (ᒪᐃ), POLAR-ᑯᑦ ᐃᓚᒋᔭᐅᓚᐅᖅᑐᑦ ᑲᓇᑕᒥᑦ ᑲᑎᒪᔨᐅᖃᑕᐅᔪᓂᑦ, ᑲᒪᒋᔭᐅᔪᖅ ᑲᓇᑕᒥᑦ ᓄᓇᕐᔪᐊᕐᒥᑦ ᑲᒪᔨᒃᑯᓐᓄᑦ ᐊᒻᒪᓗ ᐊᕙᑎᓕᕆᔨᒃᑯᑦ ᐊᒻᒪᓗ ᑲᓇᑕᒥᑦ ᓯᓚᐅᑉ ᐊᓯᔾᔨᖅᐸᓪᓕᐊᔪᓕᕆᔨᒃᑯᓐᓄᑦ, ᐃᑲᔪᖅᑕᐅᑉᓗᓂ ᐱᓕᕆᐊᖅ ᓂᒋᐊᓂᑦ ᐅᑭᐅᖅᑕᖅᑐᒥᑦ ᐊᖏᖃᑎᒌᒍᑎᒧᑦ ᐅᖃᖃᑎᖃᕐᓂᕐᒧᑦ ᑲᑎᒪᓂᕐᒥᑦ (ATCM-44) ᑲᓇᑕᐅᑉ ᑐᒃᓯᕋᐅᓯᐊᖓ ᐃᑲᔪᖅᑐᖅᑕᐅᑦᑎᐊᓚᐅᕋᓗᐊᖅᑎᓪᓗᒋᑦ 27-ᓄᑦ 29-ᖑᔪᓂᑦ ᓄᓇᓂᑦ, ᐊᖏᖃᑎᒌᒃᑐᓄᑦ ᐃᓱᒪᓕᐊᖑᓚᐅᖅᑐᖅ ᑎᑭᐅᑎᔭᐅᓂᖅ ᐊᔪᓚᐅᖅᑐᖅ ᐱᔾᔪᑕᐅᔪᑦ ᓴᖅᕿᑕᐅᓚᐅᕐᓂᖏᓐᓄᑦ ᒪᕐᕉᒃ ᓄᓈᖕᓄᑦ. ᐅᖃᖃᑎᒋᔭᐅᓂᕐᒧᑦ ᐃᓚᒋᔭᐅᔪᑦ ᐊᖏᓚᐅᖅᑐᑦ ᐊᓯᐊᓄᐊᕐᓂᐊᕐᓗᒍ ᐃᓱᒪᓕᐊᖅ ᑲᓇᑕᐅᑉ ᑐᒃᓯᕋᐅᑎᖓᓄᑦ 2023-ᒥᑦ ATCM-ᒧᑦ.

ᑲᓇᑕᒥᐅᑕᐃᑦ ᐱᒻᒪᕆᐅᔪᒥᒃ ᐃᑲᔪᐃᓂᖃᖅᓯᒪᔪᑦ ᐅᑭᐅᑕᖅᑐᒥᑦ ᖃᐅᔨᓴᐃᓂᕐᒧᑦ 100 ᐅᑭᐅᑦ ᐅᖓᑖᓄᑦ. ᐊᕙᑎᐅᑉ ᖃᓄᐃᖓᓂᖏᑦ ᐅᑭᐅᑕᖅᑐᒥᑦ ᐱᑎᑦᑎᓂᖃᖅᑐᑦ ᓄᓇᕐᔪᐊᕐᒥᑦ ᑕᕆᐅᕐᒥᑦ ᐊᒻᒪᓗ ᓯᓚᒧᑦ ᐋᖅᕿᐅᒪᓂᖏᓐᓂᒃ, ᐊᒻᒪᓗ ᓄᓇᕐᔪᐊᕐᒥᑦ ᐱᓕᕆᖃᑎᒌᖕᓂᐅᔪᑦ ᐱᒻᒪᕆᐅᔪᒥᒃ ᐱᓕᕆᐊᖃᖅᑐᑦ ᑐᑭᓯᐊᓂᖓᓐᓄᑦ ᐊᒻᒪᓗ ᒥᐊᓂᖅᓯᓂᕐᒧᑦ ᐱᒻᒪᕆᐅᓂᖏᑦᑕ ᐅᑭᐅᑕᖅᑐᐃᑦ ᐃᓂᖏᑦ.

ᑲᑎᒪᔩᑦ ᐊᐅᓚᑦᑎᔨᐅᔪᓂᑦ ᐃᓂᐅᔪᒧᑦ ᐅᑭᐅᑕᖅᑐᒥᑦ ᑐᕌᖓᔪᓄᑦ

POLAR-ᑯᑦ ᑕᑯᑎᑦᑎᓚᐅᖅᑐᑦ ᑲᓇᑕᐅᑉ ᑐᒃᓯᕋᐅᓯᐊᖓᓂᑦ ᐃᓗᐃᑦᑑᖓᔪᒃᑯᑦ ᐃᓚᒋᔭᐅᓕᕈᒪᑉᓗᑎᒃ ᑲᑎᒪᔩᑦ ᐊᐅᓚᑦᑎᔨᐅᔪᓂᑦ ᐃᓂᐅᔪᒧᑦ ᐅᑭᐅᑕᖅᑐᒥᑦ ᑐᕌᖓᔪᒃᑯᓐᓂᑦ (COMNAP) ᐊᕐᕌᒍᑕᒫᖅ ᑲᑎᒪᓂᖃᖅᑎᓪᓗᒋᑦ ᓴᒡᒐᕉᑦ (ᔪᓚᐃ) 2022-ᒥᑦ. COMNAP-ᑯᓐᓄᑦ ᑭᒡᒐᖅᑐᐃᔪᑦ 32 ᓄᓇᓂᑦ ᐃᓕᑕᕆᔭᐅᓯᒪᔪᑦ ᓄᓇᕐᔪᐊᕐᒥᑦ ᐱᓕᕆᖃᑎᒌᖑᑉᓗᑎᒃ, ᐊᑯᓂᐅᔪᒥᑦ ᐊᐅᓛᕐᓂᖃᖅᓯᒪᔪᑦ, ᐅᑭᐅᑕᖅᑐᖅ ᐊᒻᒪᓗ ᐅᑭᐅᖅᑕᖅᑐᒧᑦ ᖃᐅᔨᓴᐃᓂᕐᒧᑦ ᑐᕌᖓᔪᑦ ᑲᒪᒋᔭᐅᓂᐊᖅᑐᑦ ᑲᓇᑕᒥᑦ ᐅᑭᐅᑕᖅᑐᒥᑦ ᖃᐅᔨᒪᓂᖃᖅᑐᒃᑯᓐᓄᑦ, ᐃᓚᐅᑉᓗᑎᒃ ᐱᖁᑎᒋᔭᐅᔪᑦ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒥᑦ (CHARS) (ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᒃ (CHARS)). ᐊᓯᖏᑦ ᓄᓇᐃᑦ ᐅᖃᓚᐅᖅᑐᑦ ᖃᑉᓯᐊᕐᔪᐃᑦ ᐱᓕᕆᖃᑎᒌᖕᓂᐅᔪᓂᒃ ᐱᑕᖄᓂᒃᑐᖅ ᑲᓇᑕᒥᑦ ᖃᐅᔨᓴᐃᔨᓂᑦ ᐊᒻᒪᓗ ᐋᖅᕿᒃᓯᓂᖃᕈᖕᓇᖅᑐᑦ ᐱᓕᕆᖃᑎᒌᖕᓂᐅᔪᓂᑦ COMNAP-ᑯᑦ.

ᐅᑭᐅᖅᑕᖅᑐᒥᑦ ᑲᑎᒪᔩᑦ

POLAR-ᑯᑦ ᔨᐊᓂᕗ ᕼᐊᐳᑦ (Jennifer C. Hubbard) (ᐊᖏᔪᖅᖄᖅ) ᐊᒻᒪᓗ ᑕᐃᕕᑎ ᕼᐃᒃ (David Hik) (ᐊᖏᔪᖅᖄᖅ ᖃᐅᔨᓇᓱᒃᑎ, ᐊᖏᔪᖅᖄᖑᔪᖅ ᑐᕌᖓᔪᓄᑦ) ᐃᓚᒋᔭᐅᓚᐅᖅᑐᑦ ᑲᓇᑕᒥᙶᖅᖢᑎᒃ ᐊᕐᕌᒍᑕᒫᖅ ᐅᑭᐅᖅᑕᖅᑐᒥᑦ ᑲᑎᒪᔨᓄᑦ, ᕆᒃᔭᕕᒃ, ᐊᐃᔅᓚᓐᒥᑦ. ᐅᑭᐅᖅ, 2,000 ᐅᖓᑖᓄᑦ ᐃᓄᐃᑦ ᐃᓚᐅᓚᐅᖅᑐᑦ, ᐃᓚᐅᑉᓗᓂ ᓇᓚᐅᑦᑎᔪᖅ ᐅᐱᓐᓇᖅᑐᖅ ᒥᐊᓕ ᒪᐃ ᓴᐃᒪᓐ, ᑲᓇᑕᒥᑦ ᑯᐃᓐ ᑭᒡᒐᖅᑐᖅᑎᖓ.

ᑕᒪᕐᒥᒃ ᔨᐊᓂᕗ ᕼᐊᐳᑦ (Jennifer C. Hubbard) ᐊᒻᒪᓗ ᓘᒃᑖᖅ ᕼᐃᒃ (Dr. Hik) ᑕᑯᑎᑦᑎᓚᐅᖅᑐᑦ ᖃᑉᓯᐊᕐᔪᖕᓂᑦ ᑲᑎᒪᓂᕐᓂᑦ, ᐃᓚᐅᑉᓗᑎᒃ ᖃᐅᔨᓴᐃᓂᖅ ᐱᓕᕆᖃᑎᒌᖕᓂᒃᑯᑦ ᑲᓇᑕ-ᐃᓄᐃᑦ ᓄᓇᖓᑦ-ᐊᑭᐊᓂᑦ, ᑐᑭᖃᖅᑐᒃᑯᑦ ᐃᓚᐅᖃᑕᐅᑎᑦᑎᓂᖅ ᐊᑐᐊᒐᒥᑦ, ᐱᕙᓪᓕᐊᓂᖅ ᐊᒻᒪᓗ ᖃᐅᔨᓴᐃᓂᖅ ᐅᑭᐅᖅᑕᖅᑐᒥᑦ, ᐊᒻᒪᓗ ᑮᓇᐅᔭᖃᖅᑎᑦᑎᓂᖅ ᓄᓇᕐᔪᐊᕐᒥᑦ ᐅᑭᐅᖅᑕᖅᑐᒥᑦ ᖃᐅᔨᓇᓱᖕᓂᖅ.

ᒪᕐᕈᐃᖅᑕᖅᖢᑎᒃ ᑲᑎᖃᑎᖃᖃᑦᑕᓚᐅᕐᒥᔪᑦ ᓄᓇᕐᔪᐊᕐᒥᑦ ᐱᓕᕆᖃᑎᒋᔭᖏᓐᓂᑦ, ᐱᓗᐊᖅᑐᒥᑦ ᓱᐃᑦᓱᓚᓐᒥᑦ ᐅᑭᐅᑕᖅᑐᓕᕆᕝᕕᒃ ᐊᒻᒪᓗ ᖃᐅᔨᓴᐃᓂᕐᒧᑦ ᑎᒪᔩᑦ ᓄᐊᐅᐃ-ᒥᑦ, ᑲᓇᑕᒥᑦ ᑲᒪᔨᐅᔪᖅ ᐊᐃᔅᓚᓐᒧᑦ (POLAR-ᑯᓐᓄᑦ ᐃᖅᖃᓇᐃᔭᖅᑎᐅᓚᐅᖅᑐᖅ ᔨᐊᓂᐊᑦ ᒥᐊᓐᔨᔅ (Jeannette Menzies), ᐊᒻᒪᓗ ᖃᑉᓯᐊᕐᔪᐃᑦ ᐅᑭᐅᑕᖅᑐᒥᑦ ᐊᒻᒪᓗ ᓄᓇᖃᖅᖄᖅᑐᑦ ᓯᕗᓕᖅᑎᓂᑦ, ᐃᓚᐅᑉᓗᓂ ᐊᖏᔪᖅᖄᕐᔪᐊᖅ ᑭᐊᓐ ᑭᔨᑲᕕᑦᓯᒃ, ᒍᐃᑦᓯᓐ ᐃᖅᕿᓕᐅᖃᑎᒌᑦ ᑲᑎᒪᔨᖏᓐᓂᑦ; ᓖᓴ ᕿᓗᖅᕿ ᑯᐱᕐᕈᐊᓗᒃ, ICC-ᑲᓇᑕ ᐊᖏᔪᖅᖄᖓᑦ; ᐊᒻᒪᓗ ᐊᖏᔪᖅᖄᖅ ᐱᐅᓪ ᐃᕈᐊᔅᒧᔅ, ᐅᑭᐅᖅᑕᖅᑐᒥᑦ ᐋᑕᐹᔅᑲᒥᑦ ᑲᑎᒪᔨᒃᑯᓐᓂᑦ. ᑕᑯᓗᒍ https://www.arcticcircle.org/assemblies/2022-arctic-circle-assembly

British Antarctic Survey-ᑯᑦ

ᕼᐃᐅ ᒍᕆᕕᑦᔅ (Huw Griffiths) ᐊᒻᒪᓗ ᓯᑏ ᕈᐊᐳᑦᔅ (Steve Roberts), ᖃᐅᔨᓴᐃᔩᑦ British Antarctic Survey-ᑯᓐᓂᑦ (BAS), ᑳᑦ ᐅᐊᓗᕐ (Cath Waller), ᓯᓚᑦᑐᖅᓴᕐᕕᒡᔪᐊᖅ ᕼᐋᓪ-ᒥᑦ, ᒪᕐᕉᒃ ᐱᓇᓱᐊᕈᓰᖕᓂᑦ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᖕᒦᓚᐅᖅᑐᖅ (CHARS) ᐊᐅᔭᐅᓚᐅᖅᑐᒥᑦ ᖃᐅᔨᓴᖅᖢᒋᑦ ᐆᒪᓂᖃᐅᖅᑐᑦ ᐅᔭᕋᖃᐅᕐᓂᐅᔪᒥᑦ ᑎᓂᑦᑕᖅᑐᓖᑦ ᓄᓇᓕᖕᓂᑦ ᐊᒻᒪᓗ ᐊᖏᒧᑦ ᐊᒻᒪᓗ ᒥᑭᔪᓂᒃ ᐊᐅᒃᑕᔫᓂᒃ ᐃᖃᓗᒃᑑᑦᑎᐊᕐᒥᑦ. ᐆᒃᑐᕋᐃᓚᐅᖅᑐᑦ ᒥᑭᔪᓂᒃ ᐊᐅᒃᑕᔫᓂᑦ ᐱᑦᑕᐅᖏᑦᑐᓕᐊᓂᒃ ᐊᓂᖅᓴᖅᑐᖅᑕᑉᑎᖕᓃᑦᑐᓂᒃ, ᐳᔪᖃᑖᖕᒥᑦ, ᐊᒻᒪᓗ ᓯᒡᔭᒥᑦ ᐊᓗᐊᓄᐊᖅᑐᓂᒃ, ᓂᕐᔪᑎᓂᒃ, ᐊᒻᒪᓗ ᐃᒪᕐᒥᑦ. ᐃᑲᔪᓚᐅᖅᑐᑦ ᐊᖏᓂᖅᓴᐅᔪᒥᒃ ᖃᐅᔨᓴᐃᓂᐅᔪᖅ ᐊᐅᒃᑕᔫᓂᒃ ᐅᑭᐅᖅᑕᖅᑐᒥᑦ ᐊᒻᒪᓗ ᖃᓄᐃᖓᓂᐅᔪᑦ ᐃᑲᔪᕐᓂᐊᖅᐳᑦᑐᖅ ᐱᖅᖁᓯᕆᔭᐅᔪᓄᑦ ᐊᒻᒪᓗ ᐊᑐᐊᒐᓄᑦ ᐱᔾᔪᑎᖃᖅᑐᓂᒃ ᐊᑐᖅᑕᐅᒃᑲᓐᓂᖅᑐᓕᐅᕆᓂᕐᓄᑦ ᐊᒻᒪᓗ ᐅᓗᕆᐊᓇᙱᑦᑐᒃᑯᑦ ᐊᒃᑕᑰᕆᓂᕐᒧᑦ ᐊᑯᓂᐅᔪᒥᑦ ᐱᑦᑕᐅᖏᑎᑦᑎᓂᖃᖅᑐᓂᒃ. ᐃᓕᑦᑎᒃᑲᓐᓂᕆᑦ ᐃᖏᕐᕋᓂᒋᓐᓂᑦ ᐱᓕᕆᓯᒪᓂᕆᔭᖏᓐᓂᑦ.