ᒪᓯᓈᐱᔅᑲᐦᐄᑲᓐ ᐅᐦᒋ ᐁ ᐧᐄᐦᑖᑯᐦᒡ ᒉ ᐃᔑ ᒦᒋᓱᓈᓅᒡ
ᒪᓯᓈᐱᔅᑲᐦᐄᑲᓐ ᐅᐦᒋ ᐁ ᐧᐄᐦᑖᑯᐦᒡ ᒉ ᐃᔑ ᒦᒋᓱᓈᓅᐦᒡ - ᐁ ᐧᐄᐦᑖᑯᐦᒡ ᐁ ᐃᔑ ᒪᓯᓈᑌᒡ
ᓃᔓᔨᒡ ᐃᔑᓈᑯᓐᐦ ᒪᓯᓈᐱᔅᑲᐦᐄᑲᓐᐦ ᐁ ᓅᑯᐦᒡ ᒉ ᐃᔑ ᒦᒋᓱᓈᓅᑯᐸᓀ᙮ ᐊᓐ ᓃᔥᑕᒻ ᐁ ᓅᑯᐦᒡ ᐯᔭᒄ ᒥᓂᐦᐧᑳᑲᓐ ᓂᐲ ᑲᔦ ᐧᐃᔮᑲᓂᐦᒡ ᐁ ᐊᔥᑌᒡ ᒦᒋᒻ᙮ ᐄᔥᐱᒥᐦᒡ ᒪᓯᓈᑌᐤ ᐁ ᐧᐄᐦᑖᑯᐦᒡ:
ᓇᓈᐦᑰ ᐁ ᐃᔑᓈᑯᐦᒡ ᒦᒋᒻ ᐁ ᒥᔪᔅᑳᒉᒡ ᒉ ᒦᒋᔨᓐ ᐁᔑᑯᒥᒌᔑᑳᐤᐦ᙮
ᓀᐅᔨᒡ ᐄᔑ ᐧᐄᐦᑖᑯᓐ ᒉᐧᑳᓐ ᐧᐋᔅᑳ ᐧᐃᔮᑲᓂᐦᒡ᙮ ᐁᐅᑯᓐᐦ ᐅᔫᐦ:
- ᒥᔅᑕᐦᐄ ᒉ ᒦᒋᔨᓐ ᒦᒋᒻᐦ ᐁᒌ ᓂᐦᑖᐅᒋᐦᑖᑲᓅᐦᐧᑳᐤᐦ ᑲᔦ ᓇᓈᐦᑯ ᒦᓂᔖᐦ
- ᐊᔅᒌᐦᒡ ᐁ ᐅᐦᒋ ᓂᐦᑖᐅᒋᐦᒡ - ᒥᓯᐧᐁ ᐁ ᐃᔅᐱᔖᒡ ᐁ ᐅᐦᒋᐸᔨᐦᒡ ᒉ ᒦᒋᔨᓐ
- ᐁ ᒦᒋᒥᔅᑳᒉᒡ ᐁᐅᒄ ᒉ ᒦᒋᔨᓐ
- ᓂᐲ ᐅᓵ ᒉ ᒥᓂᐦᐧᑫᔨᓐ
ᐋᐱᐦᑑ ᐧᐃᔮᑲᓂᐦᒡ ᐁᑯᑦᐦ ᐁ ᐊᔥᑌᒡ ᒦᒋᒻᐦ ᐁᒌ ᓂᐦᑖᐅᒋᐦᑖᑲᓅᐦᐧᑳᐤᐦ ᑲᔦ ᓇᓈᐦᑯ ᒦᓂᔖᐦ (ᐱᕎᑭᓖ, ᑫᕆᑦᔅ, ᐄᓂᒥᓈᓐᐦ, ᐅᑌᐦᐄᒥᓈᓐᐦ, ᑳ ᐅᓵᐙᐧᑳᐤᐦ ᑲᔦ ᑳ ᐅᔖᐙᔑᐧᑳᐤᐦ ᐯᓪ ᐯᐱᕐᔅ, ᐧᐋᐸᒥᓐᒡ, ᑳ ᒥᐦᒀᒡ ᑳᐱᒡ, ᔅᐱᓂᒡ, ᑕᒫᑐᔅ, ᐸᑌᑎᓴᐦ, ᔅᑯᐙᔥ ᑲᔦ ᑳ ᐅᓵᐙᐧᑳᐤᐦ ᐲᔅ)᙮ ᐧᑫᔥᑌᐦᒉ ᒦᓐ ᐋᐱᐦᑑ ᐁᑯᑦ ᑳ ᒦᒋᒥᔥᑳᒉᒡ ᒦᒋᒻ ᐁ ᐊᔥᑌᒡ (ᐁᑳ ᐱᒦᔫᐦᒡ ᐧᐃᔮᔅ, ᐸᑲᐦᐋᐦᐧᑳᓐ, ᐸᑳᓂᒡ ᑲᔦ ᓰᒥᓂᒡ, ᓓᓐᑎᓪᔅ, ᐧᐋᐤᐦ, ᐧᑖᕘ, ᐧᔮᑭᕐᑦ, ᓇᒣᔅ, ᐲᓂᓯᒡ)᙮ ᐧᑫᔥᑌᐦ ᒦᓐ ᐋᐱᐦᑑ ᐁᑯᑦ ᐁ ᓅᑯᐦᐧᑳᐤ ᒦᒋᒻᐦ ᐁ ᐊᔑᒋᐸᔨᐦᒡ ᐊᓂᑕᐦ ᒥᓯᐧᐁ ᐁ ᐃᔥᐱᔖᒡ ᐁ ᓂᐦᑖᐅᒋᐦᒡ ᐁ ᒦᒋᓈᓅᐦᒡ (ᐲᐧᓭᐋᐃᐦᑯᓈᐤ, ᐹᔅᑖ, ᐧᐋᐸᔫᒥᓂᔑᒡ, ᑳ ᒥᐦᐧᑳᒡ ᑮᓂᐧᐋ, ᑳ ᐧᐄᔅᑯᔥᑌᐅᓈᑯᔑᐧᑖᐤ ᐧᐋᐸᔫᒥᓂᔑᒡ)᙮
ᐊᓐ ᓃᔓ ᒪᓯᓈᐱᔅᑲᐦᐄᑲᓐ ᐁᑯᑦ ᓃᐧᔖᔥᒡ ᓇᓈᐦᑰ ᒉᐧᑳᔫᐦ ᑌᐹᑐᑌᐧᑳᐤᐦ ᑲᔦ ᓅᑯᓐᐦ᙮
ᐄᔥᐱᒥᐦᒡ ᒪᓯᓈᑌᐤ ᐁ ᐧᐄᐦᑖᑯᐦᒡ:
ᓇᒪᔦᐤ ᒥᒄ ᑯᐃᔅᒄ ᐁ ᐄᔑ ᒦᒋᓱᔨᓐ ᒉ ᐧᐄᒋᐦᐄᑯᔨᓐ᙮
ᐊᓂᑕᐦ ᓃᔥᑕᒻ ᐁ ᐃᐦᑕᑯᐦᒡ ᐄᒋᔥᑌᐤ, ᒉ ᒫᒥᑐᓀᔨᐦᑕᒪᓐ ᑖᓐ ᐁ ᐃᔑ ᒦᒋᓱᔨᓐ᙮
ᓃᔓ ᐊᐧᐁᓂᒌ ᓅᑯᓲᒡ ᐁ ᒉᒋᔐᐹᓂᔨᐧᑖᐤ᙮
ᒦᓐ ᐊᓐ ᑏᐧᐁᐦᒡ ᒣᓯᓈᑌᒡ ᐄᒋᔥᑌᐤ, ᐁᑎᑑ ᒥᐦᒉᐧᑖᐤ ᒉ ᐱᒥᓇᐧᐁᔨᓐ᙮
ᐁᑯᑦ ᐁ ᓅᑯᓯᑦ ᐊᐧᐁᓐ ᐊᐧᐋᔥᐦ ᐁ ᐧᐄᒋᐦᐄᑯᑦ ᐁ ᐱᒥᓇᐧᐁᑦ᙮
ᐊᓐ ᓂᔥᑐ ᐁ ᐃᐦᑕᑯᐦᒡ ᐄᒋᔥᑌᐤ, ᒉ ᐧᐄᐦ ᒥᒥᔫᒦᒋᓱᔨᓐ᙮
ᓅᑯᓐ ᐁ ᒨᑖᔮᔑᒡ ᐧᐃᔮᑲᓐ ᐁ ᐊᔥᑌᒡ ᐊᓂᑕᐦ ᒦᒋᒻ᙮
ᐊᓐ ᓀᐤ ᐁ ᐃᐦᑕᑯᐦᒡ ᐄᒋᔥᑌᐤ, ᒉ ᐧᐄᒋᒦᒋᓲᒪᐧᑖᐤ ᑯᑕᑲᒡ ᐊᐧᐁᓂᒌ᙮
ᐁᑯᑦ ᐁ ᓅᑯᓯᐧᑖᐤ ᐊᐧᐁᓂᒌ ᐁ ᒫᒨᒦᒋᓱᐧᑖᐤ᙮
ᐊᓐ ᓂᔮᔨᓐ ᐁ ᐃᐦᑕᑯᐦᒡ ᐄᒋᔥᑌᐤ: ᒉ ᐊᔨᒥᐦᑖᔨᓐ ᐊᓂᑕᐦ ᒣᓯᓈᑌᒡ ᒉᐧᑳᓐ ᐁ ᐊᔑᒋᐸᔨᐦᒡ ᐊᓂᑕᐦ ᒦᒋᒥᐦᒡ᙮
ᐁᑯᑦ ᐁ ᓅᑯᓯᑦ ᐊᐧᐁᓐ ᓃᔓ ᑳᓂᒦᒋᒻᐦ ᐁ ᑕᐦᑯᓇᐦᒃ᙮ ᒪᓯᓈᑌᐤ ᐊᓂᑕᐦ ᑳᓂᐦᒡ ᒉᐧᑳᓐ ᐁ ᐃᐦᑕᑯᐦᒡ ᐊᓂᑕᐦ ᐊᓐ ᒦᒋᒥᒻ᙮
ᐊᓐ ᑯᐧᑖᔥᒡ ᐁ ᐃᐦᑕᑯᐦᒡ ᐄᒋᔥᑌᐤ, ᐁᑳᐧᐄ ᓈᔥᒡ ᒦᒡᐦ ᒦᒋᒻ ᒥᔥᑕᐦᐄ ᐁ ᐃᐦᑕᑯᐦᒡ ᓱᑎᔭᒻ, ᔔᑳᐤ ᑲᔦ ᐱᒦ᙮
ᐁᑯᑦ ᐁ ᓅᑯᐦᒡ ᒦᒋᒻ ᒌᔖᒡ ᐁ ᒌ ᒣᒣᐦᒌᐦᑑᑖᑲᓅᐦᒡ ᑲᔦ ᓇᓈᐦᑰ ᒉᐧᑳᓐ ᐁ ᐊᔑᒋᐸᔨᐦᒡ ᐊᓂᑕᐦ ᐁᐅᒄ ᐲᓵᐃᐦᑯᓈᐤ, ᐲᑦᓵ, ᑳᔒᐧᐋᑲᒥᔑᒡ, ᐧᒑᑲᓚᑦ, ᑲᔦ ᐦᐊᑦ ᐧᑕᒃ᙮
ᐊᓐ ᓃᐧᔖᔥᒡ ᐁ ᐃᐦᑕᑯᐦᒡ ᐄᒋᔥᑌᐤ, ᐁᑳᐧᐄ ᓈᔥᒡ ᐅᑎᓐᐦ ᐊᓐ ᒦᒋᒻ ᒨᔥ ᐁ ᐧᐋᐸᐦᑕᒪᓐ ᓈᔥᒡ ᐁ ᐋᔨᒨᑌᒡ᙮
ᐁᑯᑦ ᐁ ᓅᑯᓯᑦ ᐊᐧᐁᓐ ᐁ ᑲᓇᐧᐋᐸᐦᑕᐦᒃ ᒦᒋᒥᔫ ᐁ ᓅᑯᐦᑖᑲᓄᔨᒡ ᐅᑖᐦᑳᐱᐦᒉᓂᑲᓂᔑᐦᒡ ᑲᔦ ᓂᑕᐧᐋᐸᐦᒋᑲᓂᐦᒡ᙮
ᑯᐃᔅᒄ ᐄᔑ ᒦᒋᓱᐦ᙮ ᒉ ᒥᔫᐱᒫᑎᓯᔩᓐ᙮
Détails de la page
- Date de modification :