Kenadaw li Dawnchee Weechihiwaywin

Weeschaykatawmounawniwun lee dawn si kaykawt tout tahkinay, mawka chikee nakinikawtayw, tawnd pchee ki veu gawnyee en malajee tou lee deu didawn Kenadaw pi mishkamihk alawntour. Par yoel en malajee wawweepat mawchistawn ishpee l'ikol pour lee pchee, akouschi kischi kaykwuy chi-mawchistahk nihta mamiyoowin par yoel keepayhkihtowin ay-itahkamikshoowin pikoushpee si posib.

Li Gouvarnimaw di Kenadaw kee-awnfors ooma yaenk pour achiyow Kenadaw li Dawnchee Weechihiwaywin, si tawnima oushtawniwun chi-pakitinamwuk awtiht larzhawn weechihiwaywin chi-weechihichik la famee kaw-kawschitina li dawnchee pishkaymowin. Avek ooma weechihiwaywin, la famee chikee mawchi natakouhkawtum awtiht soo promyee d' li dawnchee pishkaymowin aykwawnihi see ptsi zawnfawn kaw-ayndawayishchikawtayik maykwawt Li Gouvarnimaw ahkamay atoushkatum chi-oushihchikaywak aen kinwaysh-ikouhk aen zhawn'd Kenadaw li dawnchee pishkaymowin paminikaywin.

KAYKWUY anima weechihiwaywin?

Ooma Kenadaw li Dawnchee Weechihiwaywin pakitinam li payimawn ishko $650 tout keekushkihtamawshoowak lee zawnfawn awntser dooz aen naw. Ka-kee mawchi natoutumin poor iyikouhk deu lee payimawn tout li zawnfawn.

• $650 keeshpin sa famee nahi ashtayk sa profitee si disoor $70,000
• $390 keeshpin sa famee nahi ashtayk sa profitee si awnter $70,000 pi $ $79,999
• $260 keeshpin sa famee nahi ashtayk sa profitee si awnter $80,000 pi $89,999

Ooma weechihiwaywin chikee awpachistawn poor pikou tawnima li dawnchee pishkaymowin pakitinikawtayw arawnzhee ouschi li dawnchee omamiyoow.

AWINA chikee natoutamaw?

Lee parawn/Bishkaymoowaywak aykwana:

• Ayawayw li zawnfawn disoor dooz awn awina namoo kawschitinam tosael li dawnchee pishkaymowin l'aenseurawns.
• Ayaw ay-nahi ashtayk la famee sa profitee disoor $90,000 tout aen naw.
• Kee-mashinahayn l'anee pawsee la tax mashinahikan — poor ayiwawk weehstamakaywin ouschi tawnsheeshi chi-masihamaen mashinahikan, keewkayhk Kenadaw.ca/chitoutamaen-tee-latax.
• Gee-outistikoun Kenadaw Zawnfawn Weechihiwaywin poor tosael keekushkihtamawshoowak zawnfawn.
• Ki-ayawn kee kaw-ayawn li dawnchee pishkaymowin maenshtinikaywin poor tosael keekushkihtamawshoowak lee zawnfawn aykwawniki noo chayshkwa kahkiyuw kee-miyikawin narzhawn disoor kootak li federal, en provayns keema en territwayr li gouvarnimaw paminikaywin.

TAWNSHPEE chikee natoutamakayhk?

Lee parawn chikee mawchi natoutum poor keestwawm weechihiwaywin ikouhk chi-weechihwayhk maenshtinikaywin poor li dawnchee pishkaymowin kaw-outistikouhk ouschi kaw-keekushkihtamawshoowak lee zawnfawn awnter li mwawnd Zhouya 1, 2023 ishko li mwawnd Zhaen 30, 2024.

TAWNSHEESHI chi-natoutamawn?

Kenadaw La Tax la Zhawnsree (CRA) Niweestamakaywin nawachikou kakwayyawhoowin, wayschipayin pi kaykawt tout shoohkakish ishi chi-natoutamaen poor ooma Kenadaw li Dawnchee Weechihiwaywin. Keeshpin namoo maykwawt ki-ayawn CRA Niweestamakaywin, ka-ki-mashinahishoon itay Kenadaw.ca/cra-niweestamakaywin keema taypwayhkun 1-800-715-8836.

Pikou chi-pakitinamaen weehstamakaywin didawn li dawnchee pishkaymowin keewkaywin, avek sa noo ouschi toon zawnfawn li dawnchee pishkaymowin onakahtoohkayw (ak) pi ki- mashinahikayhiwayw weehstamakaywin.

Keeshpin kaw-natoutamaen daw li computer pi ki-mashinahishoon poor CRA daw li bawnk ashtawniwun, ka-ki-outistikoun toon payimawn avawn saenk la business lee zhournee!

Kenawayista toon zawnfawn see li dawnchee lee rseu poor sis aen naw keeshpin CRA ki-peekishkwatik chi- kayshchinahoohk kushkihtamawshoowin.

Kayschinahow ka-ayawyin toon L'ouvraezh Ahkihtashoowin li Noombr, nadres, tipishkumoowin pi tawpimashnahikaywin ouschi toon l'anee pawsee la tax mashinahikan

Keewkayhk Canada.ca/dental poor ayiwawk weehstamakaywin, keema taypwayhkun 1-800-715-883