ᖃᓄᐃᑦᑐᖃᖅᓯᒪᙱᑦᑐᒥᑦ ᖃᐅᔨᓯᒪᔪᑦ ᐅᓂᒃᑳᖅ ᑲᓇᑕᒥ - ᓇᓄᐃᑦ

ᖃᓄᐃᑦᑐᖃᖅᓯᒪᙱᑦᑐᒥᑦ ᖃᐅᔨᓯᒪᔪᑦ ᐅᓂᒃᑳᖅ ᑲᓇᑕᒥ - ᓇᓄᐃᑦ

ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑕᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᖃᐅᔨᓴᖅᑎᒻᒪᕇᑦ
ᑲᓇᑕᒥ ᐆᒪᔪᓕᕆᓂᕐᒧᑦ ᐱᔨᑦᑎᕋᖅᑏᑦ, ᐊᕙᑎᑦᑎᓐᓂ ᐊᒻᒪᓗ ᓯᓚ ᐊᓯᔾᔨᐸᓪᓕᐊᓂᖓ ᑲᓇᑕᒥ

(ᐅᓪᓗᒥᓕᓴᐃᑦ 2024-03-28)

ᐃᑲᔪᖅᑐᐃᔾᔪᑎ ᐊᑐᖅᑕᐅᔪᓐᓇᖅᑐᖅ ᓇᓄᐃᑦ ᖃᓄᐃᑦᑐᖃᖅᓯᒪᙱᑦᑐᓂᒃ ᖃᐅᔨᔭᐅᓯᒪᔪᑦ ᑲᓇᑕᒥ

ᑭᓲᓂᖓᓐᓂ ᓇᓗᓇᐃᖅᓯᓂᖅ

ᑲᓇᑕ ᐃᓚᒋᔭᐅᒻᒪᑦ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᒪᑯᓂᖓ ᐆᒪᔪᓂᒃ ᐱᕈᖅᑐᓂᓪᓗ (CITES), ᒪᓕᒐᖅᑎᒍᑦ ᐊᖏᖃᑎᒌᒍᑎ ᓂᕐᔪᑏᑦ ᓄᖑᓴᖁᓇᒋ ᐅᕝᕙᓘᓐᓃᑦ ᐱᑕᖃᕈᓐᓃᖁᓇᒋᑦ ᓯᓚᕐᔪᐊᒥ ᑕᒪᒃᑯᐊ ᑕᐅᖅᓰᓂᕐᒨᖓᔪᑦ. ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᒪᓕᒐᐅᔪᑦ ᑕᐅᖅᓰᓂᕐᒧᑦ ᐆᒪᔪᓂᒃ ᐱᕈᖅᑐᓂᓪᓗ ᑎᑎᕋᖅᑕᐅᓯᒪᔪᓂᒃ ᐃᓚᓕᐅᑎᓯᒪᓪᓗᑎᑦ ᐊᑐᖅᑐᑎᑦ ᐱᔪᓐᓇᐅᑎᖏᓐᓂ ᐸᐃᑉᐹᖅᑎᒍᓪᓗ ᑕᒪᒃᑯᓂᖓ ᑕᐅᖅᓯᖅᑕᐅᒍᓐᓇᖅᑐᓂᒃ ᖃᓄᐃᒍᑕᐅᙱᑦᑐᒃᑯᑦ ᐊᓐᓇᐅᒪᖁᓪᓗᒋᑦ ᐆᒪᔪᑦ. ᓯᓚᕐᔪᐊᒥ ᑕᐅᖅᓰᓂᕐᒨᖓᔪᑦ ᐱᕈᖅᑐᓄᑦ ᐆᒪᔪᓄᓪᓗ ᐸᖅᑭᔭᐅᒻᒪᑦ ᐅᑯᓂᖓ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᒪᓕᒐᖅᑎᒍᑦ ᐊᕙᑎᑦᑎᓐᓂ ᑲᒪᑦᑎᐊᓂᕐᒥᓪᓗ. ᐱᓕᕆᔭᕆᐊᖃᕐᖓᑕ ᑲᓇᑕᒥᐅᑦ ᑕᒪᒃᑯᐊ ᓯᓚᑖᓅᕈᔾᔭᐅᕙᑦᑐᑦ ᑭᓱᑐᐃᓐᓇᐃᑦ ᑎᑎᕋᖅᑕᐅᓯᒪᔪᓂᒃ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᒪᓕᑦᑎᐊᕋᓗᐊᕐᒪᖔᑕ ᖃᐅᔨᓴᖅᑕᐅᖃᑦᑕᖅᑐᑦ ᐊᖏᕈᑏᑦ ᒪᓕᑦᑐᒋᑦ.

ᓇᓄᐃᑦ ᑎᑎᕋᖅᑕᐅᓯᒪᒻᒪᑕ ᐃᓚᒋᔭᐅᓪᓗᑎᑦ II ᑕᕝᕙᓂ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES), ᐊᓐᓂᔾᔨᒍᓐᓇᐅᑎᖃᕆᐊᓕᒃ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) (ᒪᓕᒐᐃᑦ ᒪᓕᑦᑐᒋᑦ ᐃᓚᖓᓐᓃᑦᑐᖅ IV−ᒥ ᑕᐃᑲᓂ ᐊᖏᖃᑎᒌᒍᑎᓂᒃ) ᐃᓯᕐᓂᐊᕐᓗᓂ ᓯᓚᕐᔪᐊᒥ ᑕᐅᖅᓰᓂᕐᒧᑦ. ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᐱᔪᓐᓇᐅᑎᑖᖅᑎᑦᑎᔪᓐᓇᖅᑐᑦ ᕿᒥᕐᕈᔭᐅᓚᐅᕐᓗᑎᑦ ᓄᓇᓕᕐᔪᐊᑉ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᖃᐅᔨᓴᖅᑎᒻᒪᕆᖓᓐᓄᑦ ᖃᓄᐃᒍᑕᐅᔾᔮᖏᓐᓂᖓᓐᓄᑦ ᐊᓐᓇᐅᒪᓇᓱᐊᕐᓂᖏᓐᓂ ᓂᕐᔪᑎᑦ (ᐅᖃᐅᓯᐅᓯᒪᔪᖅ ᖃᓄᐃᒍᑕᐅᔾᔮᖏᑦᑐᓂᑦ ᖃᐅᔨᔭᐅᓯᒪᔪᓂᒃ ᐅᕝᕙᓘᓐᓃᑦ ᑕᐃᔭᐅᓲᖅ NDF−ᓂᑦ). ᑖᓐᓇ ᖃᓄᐃᒍᑕᐅᔾᔮᖏᑦᑐᖅ ᖃᐅᔨᔭᐅᓯᒪᔪᖅ ᐱᔪᓐᓇᐅᑎᑖᖃᑦᑕᕐᓂᖏᓐᓂ ᐊᑐᓂ ᕿᒥᕐᕈᔭᐅᕙᑦᑐᑦ. ᓯᓚᑖᓅᕈᔾᔨᒐᔪᓐᓂᖏᑦ ᑲᓇᑕᐅᑉ ᓂᕐᔪᑎᖏᑦ, ᓲᕐᓗ ᓇᓄᕐᓂᑦ, ᑲᓇᑕᒥ ᐅᓂᒃᑳᓕᐅᖅᓯᒪᔪᖅ ᑕᐃᒪᐃᑦᑐᒧᑦ, ᑭᓲᓂᖏᓐᓂ ᓇᓗᓇᐃᖅᑕᐅᓂᐊᖅᑐᑦ ᐃᓱᒪᒋᔭᐅᒋᐊᓖᓪᓗᑦ ᖃᐅᔨᓴᖅᑎᒻᒪᕆᒻᒥᓐᖔᖅᑐᖅ ᖃᓄᐃᒍᑕᐅᔾᔮᖏᑦᑐᓄᑦ ᖃᐅᔨᔭᐅᓯᒪᔪᓂᒃ (NDF) ᓯᓚᑖᓅᕈᔾᔨᓂᐊᕐᓗᓂ ᐱᔪᓐᓇᐅᑎᑖᕋᓱᑦᑐᓂᒃ. ᑕᒪᓐᓇ ᖃᓄᐃᒍᑕᐅᔾᔮᖏᑦᑐᖅ ᖃᐅᔨᔭᐅᓯᒪᔪᓂᒃ (NDF) ᐅᓂᒃᑳᖅ ᖃᐅᔨᓴᐅᑎᒥᓂᕐᓂᑦ ᖃᓄᐃᒍᑕᐅᔾᔮᖏᑦᑐᓂᑦ, ᐊᑐᓂ ᐱᔪᓐᓇᐅᑏᑦ ᕿᒥᕐᕈᔭᐅᖃᑦᑕᖅᑐᑦ ᐃᓛᒃᑰᑎᖅᑐᑎᑦ.

ᓇᐃᓈᖅᓯᒪᔪᖅ ᐅᓂᒃᑳᖅ:

ᓯᓚᑖᓅᕈᔾᔨᓂᖏᑦ ᓄᓇᓕᕐᔪᐊᑉ ᒪᓕᒐᖅᑎᒍᑦ ᒪᓕᓪᓗᑎᑦ ᓇᓐᓄᑦᑕᒥᓃᑦ ᑲᓇᑕᒥ ᐃᓱᒪᒋᔭᐅᔪᑦ ᖃᓄᐃᒍᑕᐅᔾᔮᙱᒋᐊᖏᑕ ᐆᒪᔪᓄᑦ. ᐊᒻᒪᓗᒃᑲᓐᓂᖅ ᓇᓐᓄᑦᑕᐃᑦ ᓴᓐᓂᕈᑎᐅᑉ ᐃᒪᖓᓂ ᓇᓄᕐᓂ ᐃᓚᒍᑕᖓᓐᓃᑦᑐᑦ 1−ᒥ. ᑐᑭᓯᒋᐊᕈᑎᑕᖃᒃᑲᓂᕐᒥᔪᖅ ᓇᓐᓄᑦᑕᐅᓯᒪᔪᓂᒃ ᓂᒋᐊᓂ ᑲᖏᖅᑐᐊᓘᑉ ᐃᓗᐊᓂ ᓇᓗᓇᐃᔭᖅᓯᒪᒻᒥᔪᑦ ᐃᓚᒍᑕᖓᓐᓂ 2−ᒥ.

• ᓇᓄᐃᑦ ᐱᒻᒪᕆᐅᖃᑕᐅᒻᒪᑕ ᑲᓇᑕᐅᑉ ᐅᑭᐅᖅᑕᖅᑐᖏᓐᓂ ᐆᒪᔪᑦ ᓇᔪᒐᖏᓪᓗ ᐊᑦᑐᐊᔪᓂᒃ ᐊᒻᒪᓗ ᐱᖅᑯᓯᖏᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᑦ, ᐱᓗᐊᖅᑐᒥᑦ ᓄᓇᖃᖅᑳᖅᓯᒪᔪᑦ. ᒥᔅᓴᐅᓴᑦᑕᐅᓯᒪᔪᑦ ᑕᒫᓂᖃᐃ ᐅᖓᑖᓃᑦᑐᑦ 17,000 ᓇᓄᐃᑦ ᑲᓇᑕᒥ, 2/3−ᖑᓪᓗᑎᑦ ᒥᔅᓴᐅᓴᑦᑕᐅᓯᒪᔪᓂᑦ ᓯᓚᕐᔪᐊᒥ. ᓇᓄᖅᑕᓕᒃ ᒫᓂᑑᐸᒥ, ᓅᐸᓪᓛᒥ ᓛᐸᑐᐊᒥ, ᓄᓇᑦᑎᐊᒥ, ᓄᓇᕗᒻᒥ, ᐊᓐᑎᐅᕆᔪᒥ, ᑯᐸᐃᒻᒥ ᔫᑳᒥᓗ. ᑕᒫᓂᖃᐃ 75%−ᖑᓪᓗᑎᑦ ᓇᓐᓄᑦᑕᐅᕙᑦᑐᑦ ᑲᓇᑕᒥ ᓄᓇᕗᒻᒦᑦᑐᑎᑦ
• ᓇᓄᐃᑦ ᓯᑯᒦᒐᔪᓐᓂᖅᓴᐅᓲᑦ. ᑕᒪᓐᓇ ᐃᓱᒪᒋᔭᐅᓯᒪᔪᖅ ᓯᑯᐃᖅᐸᓪᓕᐊᓂᐅᔪᖅ ᐊᑦᑐᐃᓂᖃᓪᓚᕆᓐᓂᐊᖅᑐᖅ ᓇᔪᖅᐸᑦᑕᖏᑦ ᓇᓄᐃᑦ ᓂᕿᔅᓴᖅᓯᐅᖅᑎᓪᓗᒋᑦ. ᓇᓄᐃᑦ ᑎᑎᕋᖅᑕᐅᓚᐅᖅᓯᒪᒻᒪᑕ ᒐᕙᒪᑐᖃᒃᑯᓐᓂ ᓂᕐᔪᑏᑦ ᐅᓗᕆᐊᓇᖅᑐᒦᓐᓂᕐᒧᑦ ᐱᖁᔭᖏᓐᓂ (SARA) 2011−ᒥ ᓂᕐᔪᑏᑦ ᐃᓱᒫᓗᓇᖅᑐᒦᓕᖅᑐᑎᑦ ᓇᓄᐃᓐᓇᐃᑦ ᑲᓇᑕᒥ. ᐊᐅᓚᑕᐅᓂᖏᓐᓂ ᐸᖅᑭᔭᐅᓂᖏᓐᓂᓪᓗ, ᓇᓄᐃᑦ ᐊᒥᓲᓂᖏᑦ ᐊᒡᒍᑐᖅᓯᒪᑎᑕᐅᒻᒪᑕ ᑲᓇᑕᒥ 13−ᖑᓪᓗᑎᑦ, ᐅᖃᐅᓯᐅᕙᑦᑐᑦ “ᐊᕕᑦᑐᖅᓯᒪᒃᑲᓂᕐᓂᖏᓐᓂ” ᓇᓅᓂᖏᓐᓂᓪᓗ ᑕᐃᒫᒃ ᐊᕕᑦᑐᖅᓯᒪᙱᑦᑑᒐᓗᐊᑦ (ᑎᑎᖅᑐᒐᖅᓯᒪᔪᖅ 1). ᐃᓚᖏᑦ ᐊᕕᑦᑐᖅᓯᒪᔪᑦ ᐊᑕᐅᓯᐅᙱᑦᑑᒍᓐᓇᕐᒥᔪᑦ ᑲᓇᑕᐅᑉ ᐊᕕᑦᑐᖅᓯᒪᓂᖏᓐᓂ/ᐅᑭᐅᖅᑕᖅᑐᒥ ᐃᓚᖏᓪᓗ ᑲᑐᔾᔨᓪᓗᑎᑦ ᓄᓇᓕᕐᔪᐊᓂᑦ ᐊᓯᖏᓐᓂ
• ᑲᓇᑕᒥ ᐱᓕᕆᔨᒻᒪᕇᑦ ᑲᑎᒪᔨᕋᓛᖏᑦ (ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ ᐅᕝᕙᓘᓐᓃᑦ PBTC) ᕿᒥᕐᕈᕙᒻᒪᑕ ᐊᒥᓲᓂᖏᓐᓂ ᐊᓯᔾᔨᑕᕐᓂᖏᓐᓂ ᐊᕐᕌᒍᑕᒫᑦ ᐊᑐᓂ ᑖᒃᑯᓂᖓ ᐊᒡᒍᑐᖅᓯᒪᔪᓂᒃ 13−ᓂᑦ ᑲᓇᑕᐅᑉ ᐃᓗᐊᓂ ᐱᐅᖅᓱᐊᖅᑕᐅᖁᓪᓗᒋᑦ ᐃᓕᑦᑐᓂᕐᒧᓪᓗ ᐊᐅᓚᑦᑎᓂᕐᒨᖓᔪᓂᒃ
• ᐃᓚᒋᒻᒪᒍ ᑲᓇᑕᒥ ᐊᐅᓚᑦᑎᓂᕐᒨᖓᔪᓂᒃ ᓇᓄᕐᓂᑦ, ᐊᐅᓚᑦᑎᔩᑦ, ᖃᐅᔨᓴᖅᑎᒻᒪᕇᑦ, ᐊᓯᕙᖅᑏᑦ, ᓄᓇᖃᖅᑳᖅᓯᒪᔪᓪᓗ ᐅᔾᔨᓱᕐᖓᑕ ᖃᐅᔨᓴᖅᑐᑎᓪᓗ ᓇᓄᕐᓂᑦ ᐱᐅᙱᑦᑐᒃᑯᑦ ᐊᑦᑐᖅᑕᐅᕙᓪᓕᐊᒻᒪᖔᑕ
• ᑲᓇᑕᒥ, ᓇᓄᐃᑦ ᐊᐅᓚᑕᐅᒻᒪᑕ ᐸᖅᑭᔭᐅᓪᓗᑎᓪᓗ ᒐᕙᒪᑐᖃᒃᑯᓐᓂ, ᐊᕕᑦᑐᖅᓯᒪᔪᓂᒃ ᑲᓇᑕᒥ ᐅᑭᐅᖅᑕᖅᑐᒥᓪᓗ ᓂᕐᔪᑎᓄᑦ ᐱᖁᔭᖅᑎᒍᑦ, ᓂᕐᔪᑎᓂᒃ ᐅᓗᕆᐊᓇᖅᑐᒦᑦᑐᓂᒃ ᒪᓕᒐᖅᑎᒍᑦ, ᐊᓯᖏᑎᒍᓪᓗ ᒪᓕᒐᖅᑎᒍᑦ ᐊᑦᑐᐊᔪᓂᓪᓗ ᐊᑐᐊᒐᕐᓂᑦ, ᐃᓚᒋᔭᐅᖃᑕᐅᔪᓂᓪᓗ ᐊᖏᕈᑎᑎᒍᑦ, ᐊᖏᕈᑕᐅᓯᒪᔪᒃᑯᑦ, ᓄᓇᑖᕈᑏᓪᓗ ᐊᖏᕈᑕᐅᓯᒪᔪᒃᑯᑦ. ᐊᖏᕈᑕᐅᓯᒪᔪᑦ ᐊᒻᒪᓗ ᓄᓇᑖᕈᑎᐅᓯᒪᔪᑦ ᐊᖏᕈᑏᑦ ᐸᖅᑭᑦᑎᒻᒪᑕ ᑲᓇᑕᐅᑉ ᒪᓕᒐᕐᔪᐊᖏᓐᓂ. ᐊᖏᕈᑏᑦ ᐅᕝᕙᓘᓐᓃᑦ ᓄᓇᑖᕈᑎᓄᑦ ᐊᖏᕈᑏᑦ ᐅᖃᖅᓯᒪᒻᒪᑕ ᐱᔪᓐᓇᐅᑎᖏᓐᓂ ᒪᑯᓂᖓᓗ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂ ᐊᓯᕙᕈᓐᓇᕐᓂᖏᑦ ᐊᒻᒪᓗ ᐃᑲᔫᑎᐅᔪᓐᓇᖅᑐᑎᑦ ᓲᕐᓗ ᓂᐅᕐᕈᑎᖃᕐᓗᑎᑦ ᓇᓄᕋᕐᓂᑦ. ᑲᒪᑦᑎᐊᕐᓂ ᒪᑯᓂᖓ ᐃᑲᔫᑕᐅᔪᓐᓇᕐᖓᑕ ᓄᓇᖃᖅᑳᖅᓯᒪᔪᓂᒃ ᓂᐅᕐᕈᑎᖃᕐᓂᐊᖅᑎᓪᓗᒋᑦ ᓇᓄᕋᕐᓂᑦ
• ᐊᐅᓚᑦᑎᓪᓗᓂ ᑐᕌᒐᕆᒻᒪᒋᑦ ᓇᓗᓇᐃᔭᖅᓯᒪᓪᓗᑎᑦ ᑲᓇᑕᒥ ᓄᓇᑖᕈᑎᓂᒃ ᐊᖏᕈᑎᓂᒃ. ᐱᓗᐊᖅᑐᒥᑦ, ᓂᕐᔪᑎᓂᒃ ᐊᐅᓚᑕᐅᓂᐊᕐᖓᑕ ᒪᓕᓪᓗᑎᑦ ᐊᖏᕈᑎᑎᒍᑦ. ᓇᓄᕐᓂᑦ ᐊᐅᓚᑦᑎᓂᕐᒧᑦ ᐊᑐᓕᖁᔭᐅᔪᑦ ᐃᓱᒪᓕᐊᖑᔭᕆᐊᓖᓪᓗᑦ ᑖᒃᑯᓄᖓ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᐊᖏᖅᑕᐅᓯᒪᔪᓂᒃ ᒥᓂᔅᑕᓄᑦ ᑲᒪᔪᓂᒃ ᓂᕐᔪᑎᓕᕆᓂᕐᒥᑦ ᒪᓕᑦᑐᑎᑦ ᓇᓗᓇᐃᖅᑕᐅᓯᒪᔪᑦ ᐱᓕᕆᖃᑕᐅᔪᑦ ᑲᑎᒪᑎᑦᑎᓂᒃᑯᓪᓗ ᐃᓚᒋᔭᐅᓪᓗᑎᑦ ᒐᕙᒪᒃᑯᑦ (ᒐᕙᒪᑐᖃᒃᑯᑦ, ᐊᕕᑦᑐᖅᓯᒪᔪᓂᒃ ᑲᓇᑕᒥ, ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂᒃ) ᑎᒥᐅᔪᓂᒃ ᑭᒃᑯᑐᐃᓐᓇᐃᑦ ᒐᕙᒪᒃᑯᖏᓐᓂ, ᖃᐅᔨᓴᖅᑎᒻᒪᕆᓐᓂᒃ, ᓄᓇᖃᖅᑳᖅᓯᒪᔪᑦ ᖃᐅᔨᒪᔭᑐᖃᖏᓐᓂ, ᐊᓯᕙᖅᑎᓂᒃ ᐊᒻᒪᓗ ᐊᓯᖏᓐᓂ ᓄᓇᖃᖅᑳᖅᓯᒪᔪᓂᒃ ᑭᒡᒐᖅᑐᐃᔨᓂᒃ
• ᓇᓐᓄᒐᓱᐊᕐᓂᖅ ᐊᐅᓚᑕᐅᒻᒪᑕ ᐃᓕᑦᑐᖅᓯᒪᑦᑎᐊᖁᓪᓗᒋᑦ ᑕᒪᒃᑯᐊ ᓈᒻᒪᔾᔫᒥᖁᓪᓗᒋᑦ, ᓄᖑᑕᐅᕙᓪᓕᐊᓗᐊᙱᓪᓗᑎᑦ, ᐱᔪᓐᓇᑦᑎᐊᕐᓗᑎᑦ ᐊᒡᒍᑐᖅᓯᒪᔪᓐᓃᓐᖔᖅᑐᓂᒃ ᐊᓯᕙᖃᑦᑕᕈᓇᓯᓐᓈᖁᓪᓗᑎᑦ ᓄᓇᖃᖅᑳᖅᓯᒪᔪᑦ ᓴᐳᓐᓂᐊᕆᐊᖃᖅᑲᑕᓗ ᐃᒻᒥᓂᒃ ᐱᖁᑎᒥᓂᓪᓘᓐᓃᑦ. ᖃᐅᔨᓴᕐᓂᕐᒧᑦ ᐅᔾᔨᓱᕐᓂᒧᓪᓗ ᒪᓕᒐᐃᑦ, ᒪᑯᐊᓗ ᐊᒥᓲᓂᖏᓐᓂ ᐅᔾᔨᓱᕐᓂᐅᔪᑦ ᖃᐅᔨᓴᕐᓂᒥᓪᓗ ᓇᓐᓄᑦᑕᐅᕙᑦᑐᓂᒃ, ᑕᒪᓐᓇ ᖃᐅᔨᓴᖅᑕᐅᖏᓐᓇᕆᐊᖃᕐᖓᑦ ᐋᖅᑭᒋᐊᖅᑕᐅᖃᑦᑕᕐᓗᑎᓪᓗ ᐊᐅᓚᑕᐅᓂᖏᑦ. ᐊᐅᓚᑦᑎᓂᕐᒧᑦ ᑲᒪᖃᑦᑕᕐᖓᑕ ᐊᒻᒪᓗ ᐋᖅᑭᒋᐊᕆᔪᓐᓇᖅᑐᑎᑦ ᓇᓐᓄᑦᑕᐅᔪᓐᓇᖅᑐᓂᒃ ᑕᐃᒪᐃᒋᐊᖃᖅᑲᑕ. ᐊᒥᓲᓂᖏᑦ ᐅᔾᔨᓱᖅᑕᐅᒐᔪᑦᑐᑦ ᐊᒻᒪᓗ ᖃᖓᒃᑰᓂᖏᓐᓂ ᒪᓕᑦᑐᑦ ᐊᒥᓱᓂᒃ ᐱᔾᔪᑎᖃᖅᑐᑎᑦ, ᒪᑯᓂᖓᓗ ᐅᔾᔨᔅᓱᕆᐊᓕᓐᓂᒃ ᐊᑐᖅᑕᐅᕙᑦᑐᓂᒃ, ᐊᐅᓚᑦᑎᓂᕐᒧᑦ ᑐᕌᒐᖓᕐᓂᑦ, ᐱᐅᖅᓱᐊᓂᕐᒧᑦ ᐃᓱᒫᓘᑎᓂᒃ, ᐊᒻᒪᓗ ᐅᑭᐅᖏᓐᓂ ᐱᐅᓂᖏᓐᓂᓪᓗ ᐊᑐᐃᓐᓇᐅᔪᑦ ᑐᑭᓯᒋᐊᕈᑏᑦ. ᐊᓯᕙᕈᓐᓇᖅᑐᓂᒃ ᐅᓂᒃᑳᓕᐅᕆᐊᖃᕐᓂᖏᓐᓂ ᒪᑯᐊ ᐃᓄᓐᓄᑦ ᑐᖁᑕᐅᔪᑦ, ᓲᕐᓗ ᐊᓯᕙᖅᑐᓂᒃ ᓴᐳᒻᒥᑦᑎᔪᓂᓪᓘᓐᓃᑦ ᓇᒻᒥᓂᖅ ᐃᓅᓯᕐᒥᓂᒃ ᐱᖁᑎᒥᓂᓪᓘᓐᓃᑦ
• ᐃᓗᐊᓂᑦᑐᖅ ᐃᓕᑦᑐᓂᕐᒧᑦ ᐊᐅᓚᑦᑎᓂᕐᒥᑦ, ᐊᓯᕙᖃᑦᑕᖅᑐᑦ ᐊᓐᓂᔾᔨᖃᑦᑕᕈᒪᔪᓄᓪᓗ ᓄᓇᓕᕐᔪᐊᑉ ᓯᓚᑖᓄ ᐃᓱᒪᓕᐅᖅᑕᐅᓯᒪᔪᑦ ᒪᓕᑦᑐᑎᑦ ᐱᐅᖅᓱᐊᓂᕐᒧᑦ ᐅᓗᕆᐊᓇᖅᑐᒦᓂᖏᓐᓂᓪᓗ, ᐊᐅᓚᑦᑎᓂᕐᒥᑦ ᐅᓗᕆᐊᓇᖅᑐᒦᖁᔨᙱᓐᓂᖏᓐᓂ ᐅᔾᔨᖅᓱᖅᑎᐊᕆᐊᖃᕐᓂᖏᓐᓂᓪᓗ ᐱᕙᒻᒪᑕ. ᐃᓚᖏᓐᓂ ᐊᒡᒍᑐᖅᓯᒪᔪᓂᒃ, ᐊᓯᕙᖅᑕᐃᑦ ᐅᓗᕆᐊᓇᖅᑐᒦᙱᒃᑲᓗᐊᕐᒪᖔᑕ ᖃᔨᐅᓴᖅᑕᐅᓲᑦ ᐃᓱᒪᓕᐅᖅᑏᓪᓗ ᖃᐅᔨᒃᑲᖅᑕᐅᓪᓗᑎᑦ
• ᖃᓄᐃᒍᑕᐅᔾᔮᖏᑦᑐᖅ ᖃᐅᔨᔭᐅᓯᒪᔪᓂᒃ (NDF) ᐅᖃᐅᔾᔨᒋᐊᕆᓲᑦ ᑕᐃᑲᙵᑦ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᖃᐅᔨᓴᖅᑎᒻᒪᕆᓐᓂᒃ ᖃᐅᔨᓇᓱᐊᖅᑐᑎᑦ ᑲᓇᑕᐅᑉ ᓯᓚᑖᓅᕈᔾᔨᖃᑦᑕᑎᓪᓗᒋᑦ ᖃᓄᐃᙱᒃᑲᓗᐊᕐᒪᖔᖅ ᖃᐅᔨᔭᐅᓯᒪᔪᓂᒃ ᐊᓐᓇᐅᒪᓇᓱᓐᓂᖏᑦ ᓂᕐᔪᑏᑦ. ᐅᖃᐅᔾᔨᒋᐊᕆᔭᕆᐊᖃᕋᐃᒻᒪᑕ, ᑲᓇᑕᒥᐅᑦ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᖃᐅᔨᓴᖅᑎᒻᒪᕆᖏᑦ ᐃᓱᒪᖃᓯᐅᔾᔨᓲᖑᒻᒥᔪᑦ ᐊᓯᕙᖅᑕᐅᕙᑦᑐᓂᒃ ᐊᒻᒪᓗ ᑲᓇᑕᒥ ᐊᓐᓂᔾᔭᐅᕙᑦᑐᓂᒃ ᐊᒥᓲᓂᖏᓐᓂ ᓱᕐᕋᐃᓂᐊᕐᒪᖔᑕ ᐊᒻᒪᓗ ᐊᓯᔾᔨᕐᓂᐊᕐᒪᖔᑕ ᑲᓇᑕᒥ, ᑕᐃᒫᒃ ᖃᐅᔨᓴᖃᑦᑕᓲᑦ ᖃᐅᔨᓴᖅᑎᒻᒪᕇᑦ ᐃᓕᖅᑯᓯᕐᒥᓂᒃ ᐊᑐᖅᑐᑎᑦ ᐊᒻᒪᓗ ᓄᓇᖃᖅᑳᖅᑐᓯᒪᔪᑦ ᖃᐅᔨᒪᓂᖏᓐᓂ. ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᖃᐅᔨᓴᖅᑎᒻᒪᕇᑦ ᕿᒥᕐᕈᓲᑦ ᐊᐅᓚᑦᑎᒍᑕᐅᓂᐊᖅᑐᓂᒃ ᐃᓱᒪᓕᐅᕆᐊᖃᖅᑐᓂᒃ, ᐱᐅᖅᓱᐊᕆᐊᖃᕐᓂᕐᒧᑦ, ᐊᒻᒪᓗ ᐊᓯᕙᖅᑕᐅᕙᑦᑐᓂᒃ ᐊᒻᒪᓗ ᑕᐅᖅᓰᒍᑕᕐᓂᑦ ᐃᓗᐊᓃᑦᑐᓂᒃ ᐊᒡᒍᑐᖅᓯᒪᔪᓂᒃ ᑖᒃᑯᓂᖓ 13−ᓂᒃ
• ᐅᑯᐊ ᑭᓪᓕᓯᓂᐊᖅᑕᐅᓯᒪᔪᑦ ᖃᐅᔨᓴᖅᑎᒻᒪᕆᓐᓄᑦ ᐅᖃᐅᔾᔨᒋᐊᕈᑏᑦ ᓇᓐᓄᑦᑕᐅᒐᓱᑉᐸᑦᑐᓄᑦ ᑲᓇᑕᒥ:
  • ᑕᒪᒃᑯᐊᓕᒫᑦ ᒪᓕᑦᑐᑎᑦ ᐅᓂᒃᑳᕐᓂᑦ ᓇᓐᓄᑦᑕᐅᕙᑦᑐᓂᒃ ᑲᓇᑕᒥ 475 ᓇᓐᓄᑦᑕᐅᓯᒪᔪᑦ 2020-2021−ᒥ, ᒫᓐᓇᓕᓴᐅᓂᖅᓴᐃᑦ ᑐᑭᓯᒋᐊᕈᑏᑦ ᐊᑐᐃᓐᓇᖅᑕᓕᒃ, ᐃᓚᖃᖅᑐᑎᑦ 100−ᓂᑦ ᓇᓐᓄᑦᑕᐅᑲᓐᓂᖅᓯᒪᔪᓂᒃ ᑲᓇᑕᐅᑉ ᓯᓚᑖᓂ ᐊᒡᒍᑐᖅᓯᒪᔪᓃᓐᖔᖅᑐᓂᒃ ᑲᑐᔾᔭᐅᔪᓂᒃ ᑲᓛᖡᑦ ᓄᓈᓂ ᐊᒻᒪᓗ ᒥᐊᓕᐊᕐᓂᑦ, ᓇᓐᓄᑦᑕᐅᕙᑦᑐᑦ ᑕᒫᓂ 3.3%−ᖑᓪᓗᑎᑦ ᒥᔅᓴᐅᓴᑦᑕᐅᓯᒪᔪᓂᒃ ᑖᒃᑯᓂᖓ ᐅᖓᑖᓂᑦᑐᓂᒃ 17,000 ᓇᓄᐃᑦ ᐃᓗᐊᓃᑦᑐᑦ 13 ᐊᒡᒍᑐᖅᓯᒪᔪᓂᒃ ᑲᓇᑕᒥ ᐱᖃᓯᐅᑎᙱᑦᑐᑦ ᑲᑐᔾᔨᖃᑎᖃᖅᑐᓪᓘᓐᓃᑦ ᐊᓯᖏᓐᓂ ᓄᓇᓕᕐᔪᐊᓂᑦ
  • ᐊᕐᕌᒍᑕᒫᑦ ᐲᖅᑕᐅᕙᑦᑐᑦ 4.5% ᐊᒥᓲᓂᖏᓐᓂ ᑖᒃᑯᓂᖓ 2:1 ᐊᖑᓴᓪᓗᐃᑦ ᐊᕐᓇᓗᐃᓪᓗ ᓇᓐᓄᑦᑕᐅᕙᑦᑐᑦ ᐅᐊᑦᑎᐊᕈᕐᓂᓴᕐᓂᑦ ᐊᑐᖅᑕᐅᓯᒪᔪᑦ ᑕᒪᒃᑯᐊ ᒪᓕᑦᑐᒋᑦ ᐃᓕᖅᑯᓯᐅᕙᑦᑐᑦ ᖃᐅᔨᓴᐅᑎᒥᓂᐅᓚᐅᖅᑎᓪᓗᒋᑦ
  • ᐅᑭᐅᓄᑦ ᑕᓪᓕᒪᐅᓚᐅᖅᑐᓄᑦ ᓇᓐᓄᑦᑕᐅᓯᒪᓕᖅᑐᑦ (2016-2021−ᒧᑦ), ᑲᑎᑦᑐᒋᑦ ᐅᖃᐅᓯᐅᓯᒪᔪᑦ ᑲᓇᑕᐅᑉ ᐃᓗᐊᓂ ᐊᓯᔾᔨᑕᕐᖓᑕ, ᑕᒫᓂᖃᐃ 475−ᒥᑦ 533−ᒧᑦ ᓇᓄᐃᑦ. ᓇᓐᓄᔅᓯᒪᔪᑦ ᖃᑦᑏᓐᓇᐅᓂᖅᓴᓂᑦ ᐅᑭᐅᓂᑦ ᑕᓪᓕᒪᐅᓯᒪᔪᓂᒃ (2011-2016−ᒥ) ᑲᑎᑦᑐᒋᑦ ᐅᖃᐅᓯᐅᓯᒪᔪᑦ ᑕᒫᓂᖃᐃ 534−ᒥᑦ 637−ᒧᑦ ᓇᓄᐃᑦ
  • ᐅᑭᐅᓄᑦ ᑕᓪᓕᒪᐅᔪᓄᑦ (2017-2021), 122−ᖑᓪᓗᑎᑦ ᑲᓇᑕᐅᑉ ᓯᓚᑖᓅᕈᔾᔭᐅᓯᒪᔪᑦ ᐊᕐᕌᒍᑕᒫᑦ (ᑕᒫᓂᖃᐃ ᐅᑭᐅᓄᑦ ᑕᓪᓕᒪᓄᑦ 2017−ᒥ 2021−ᒧᑦ ᐊᒥᓲᓂᖏᑦ ᓇᓄᕋᕐᓂᑦ ᓂᐊᖁᐃᓪᓗ ᑲᓇᑕᒥ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᐱᔪᓐᓇᐅᑎᖃᖅᑐᑎᑦ ᑎᑎᕋᖅᑕᐅᓯᒪᔪᑦ), ᑕᒫᓃᑦᑐᑎᑦ 0.7% ᑲᓇᑕᒥ ᒥᔅᓴᐅᓴᑦᑕᐅᓯᒪᔪᑦ ᐊᒥᓲᓂᕆᔭᖏᓐᓂ ᐅᖓᑖᓃᑦᑐᓄᑦ 17,000 ᓇᓄᐃᑦ. ᑲᓇᑕᐅᑉ ᓯᓚᑖᓅᕈᔾᔭᐅᓯᒪᔪᑦ ᖃᑦᑏᓐᓇᕈᖅᐹᓪᓕᖅᓯᒪᔪᑦ ᐅᑭᐅᓄᑦ 12−ᓄᑦ, ᑕᒫᓂ ᐊᑖᓂ 75 ᓇᓄᕋᐃᑦ ᑎᑎᕋᖅᓯᒪᓚᐅᖅᓯᒪᔪᑦ 2020−ᒥ. ᖃᑦᑏᓐᓇᕈᖅᐹᓪᓕᖅᓯᒪᔪᑦ ᐊᓐᓂᔾᔭᐅᓯᒪᔪᑦ ᒪᓕᑦᑐᑦ ᖃᑦᑏᓐᓇᕈᖅᐹᓪᓕᖅᓯᒪᔪᓄᑦ ᓯᓚᔪᐊᓂ ᓂᐅᕐᕈᑕᐅᕙᑦᑐᓂᒃ. ᐃᓱᒪᐃᓐᓇᕆᐊᖃᖅᑐᒍᑦ ᓇᓄᐃᑦ ᑕᐅᖅᓰᒍᑕᐅᔪᑦ ᐊᕐᕌᒍᒥ ᓇᑭᑐᐃᓐᓈᖅᓯᒪᑐᐃᓐᓇᕆᐊᓖᑦ ᓇᓐᓄᑦᑕᒥᓂᕐᒥᑦ ᐅᐊᑦᑎᐊᕈᑲᓪᓚᒃ ᐊᓪᓛᖃᐃ 1980−ᓕᓴᐃᑦ. ᐱᔪᓐᓇᐅᑎᑖᖅᑎᑦᑎᓂᖅ ᓇᓗᓇᐃᖅᓯᓯᒪᔪᖅ ᓇᓄᕋᐃᑦ ᑲᓇᑕᐅᑉ ᓯᓚᑖᓅᕈᔾᔭᐅᕙᑦᑐᑦ ᐊᕐᕌᒍᑦ ᑕᓪᓕᒪᑦ ᐃᓗᐊᓂ ᓇᓐᓄᑦᑕᒥᓂᐅᓚᐅᖅᑎᓪᓗᒋᑦ
  • ᐅᑭᐅᓄᑦ ᐊᕙᑎᐅᓚᐅᖅᑐᓄᑦ, ᐊᒡᒍᑐᖅᓯᒪᔪᓂᒃ ᐊᐅᓚᑕᐅᖏᓐᓇᖅᑐᑦ ᐅᓪᓗᒥᒧᑦ ᐊᒥᓲᓂᖏᑦ ᑕᐃᒪᐃᑦᑑᑏᓐᓇᕋᓱᐊᖅᑐᒋᑦ. ᑕᐃᒃᑯᓂᖓ ᑎᓴᒪᓂᒃ ᐊᒡᒍᑐᖅᓯᒪᔪᓂᒃ, ᐊᐅᓚᑦᑎᓪᓗᑎᓪᓗ ᖃᑦᑏᓐᓇᕈᖅᐹᓪᓕᖅᓯᒪᔪᑦ ᐱᓕᕆᖃᑎᖃᖅᑐᑎᑦ, ᐃᓚᖓᓐᓂ ᑲᒪᓯᒪᔪᑦ ᐊᑦᑕᓇᖅᑐᒦᑦᑕᐃᓕᒪᖁᓪᓗᒋᑦ ᐃᓱᒫᓘᑎᒋᔭᐅᔪᑦ
  • ᒪᓕᑦᑐᒋᑦ ᖃᐅᔨᓴᖅᑎᒻᒪᕇᑦ ᖃᐅᔨᓴᖅᓯᒪᓂᖏᑦ (2022 ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC) ᖃᓄᐃᓕᖓᓕᕐᓂᖏᑦ ᑎᑎᕋᖅᓯᒪᔪᑦ), ᒥᔅᓴᐅᓴᑦᑕᐅᓯᒪᔪᑦ 54% ᑲᑎᑦᑐᒋᑦ ᓇᓄᐃᑦ ᑲᓇᑕᒥ ᐊᒡᒍᑐᖅᓯᒪᔪᓃᑦᑐᑦ (15-ᐅᑭᐅᓄᑦ) ᐊᒥᓱᕈᕆᐊᖅᓯᒪᔪᑦ ᐅᕝᕙᓘᓐᓃᑦ ᑕᐃᒪᐃᓕᖓᑐᐃᓐᓇᖅᑐᖅ (6−ᖓ 13−ᓂᒃ ᐊᒡᒍᑐᖅᓯᒪᔪᓂᒃ). ᑕᒫᓂᖃᐃ 29% ᐊᒡᒍᑐᖅᓯᒪᔪᓂᒃ ᖃᑦᑎᓐᓇᕈᖅᐹᓪᓕᖅᐸᓪᓕᐊᔪᑦ (ᑎᓴᒪᓂᒃ 13−ᓂᒃ ᐊᒡᒍᑐᖅᓯᒪᔪᓂᒃ), ᐊᒻᒪᓗ 17% ᓇᓄᐃᑦ ᐊᒡᒍᑐᖅᓯᒪᔪᓂᒃ ᐊᓯᔾᔨᐸᓪᓕᐊᒋᓪᓗᑎᑦ “ᓇᓗᓇᐅᖅᑐᑦ” (ᐱᖓᓱᑦ 13−ᓂᑦ ᐊᒡᒍᑐᖅᓯᒪᔪᓂᒃ)
  • ᒪᓕᑦᑐᒋᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᑐᖃᖏᑦ (2022 ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC) ᖃᓄᐃᓕᖓᓕᕐᓂᖏᑦ ᑎᑎᕋᖅᓯᒪᔪᑦ), 100% ᓇᓄᕐᓂᑦ ᑲᓇᑕᒥ ᕿᒥᕐᕈᔭᐅᓯᒪᔪᑦ ᐊᒥᓱᕈᖅᐹᓪᓕᖅᓯᒪᔪᑦ ᐅᕝᕙᓘᓐᓃᑦ ᑕᐃᒪᐃᑐᐃᓐᓇᖅᑐᑦ (13−ᓂᒃ ᑖᒃᑯᓇᙵᑦ 13−ᓂᒃ ᐊᒡᒐᑐᖅᓯᒪᔪᓂᒃ). ᒥᔅᓴᐅᓴᑦᑕᐅᓯᒪᔪᑦ 59% ᑲᑎᑦᑐᒋᑦ ᓇᓄᐃᑦ ᑲᓇᑕᒥ ᐊᒡᒍᑐᖅᓯᒪᔪᓃᑦᑐᑦ ᕿᒥᕐᕈᔭᐅᓯᒪᔪᑦ ᐊᒥᓱᕈᖅᐸᓪᓕᖅᓯᒪᔪᑦ (7−ᖓ 13−ᓂᒃ ᐊᒡᒍᑐᖅᓯᒪᔪᓂᒃ). ᒥᔅᓴᐅᓴᑦᑕᐅᓯᒪᔪᑦ 36% ᓇᓄᐃᑦ ᑲᓇᑕᒥ ᐊᒡᒍᑐᖅᓯᒪᔪᓃᑦᑐᑦ ᕿᒥᕐᕈᔭᐅᓯᒪᔪᑦ ᑕᐃᒪᐃᑐᐃᓐᓇᖅᓯᒪᔪᑦ (5−ᖓ 13−ᓂᒃ ᐊᒡᒍᑐᖅᓯᒪᔪᓂᒃ), ᐊᒻᒪᓗ ᑕᒫᓂ 5% ᓇᓄᐃᑦ ᐃᓄᑐᐊᑲᓪᓚᐃᑦ ᐊᒡᒍᑐᖅᓯᒪᔪᑦ ᐊᒥᓱᕈᖅᐸᓪᓕᐊᓂᐊᖅᑐᒋᔭᐅᔪᑦ, ᑕᐃᒪᐃᑐᐃᓐᓇᕐᓗᑎᓗ, ᐊᓯᐊᓃᑦᑐᓂᒃ ᐊᒡᒍᑐᖅᓯᒪᔪᓂᓪᓕ

ᐃᑲᔪᖅᑐᐃᔾᔪᑏᑦ ᑐᑭᓯᒋᐊᕈᑏᑦ:

ᐆᒪᓂᖏᓐᓂ ᖃᓄᐃᑦᑑᓂᖏᑦ

ᓇᓄᐃᑦ ᐃᓅᒍᓐᓇᖅᑐᑦ ᐅᑭᐅᓄᑦ ᐊᕙᑎᓄᑦ 30−ᓄᑦ ᑎᑭᓪᓗᑎᑦ ᐊᒻᒪᓗ ᐃᓐᓇᕈᔅᓴᓂᖏᑦ ᓱᒃᑲᐃᑦᑐᐊᓘᓪᓗᑎᑦ. ᐊᕐᓇᓪᓗᐃᑦ ᕿᑐᕐᖏᐅᕈᓐᓇᓕᓲᑦ ᐅᑭᐅᖃᓕᖅᑎᓪᓗᒋᑦ ᑎᓴᒪᓂᒃ ᐱᖓᓲᔪᖅᑐᓄᒃ ᐊᒻᒪᓗ ᐊᖑᓴᓪᓗᐃᑦ ᓄᓕᐊᕈᓐᓇᓕᖅᑐᑎᑦ ᐅᑭᐅᖃᓕᖅᑎᓪᓗᒋᑦ ᑎᓴᒪᐅᔪᖅᑐᓂᒃ ᖁᓕᓄᑦ. ᐊᕐᓇᓪᓗᐃᑦ ᓇᔾᔨᒐᔪᙱᑦᑐᐊᓗᐃᑦ, ᑕᒫᓂᖃᐃ ᐊᑕᐅᓯᕐᒥᑦ ᒪᕐᕉᓂᓪᓘᓐᓃᑦ ᕿᑐᕐᖏᐅᓲᑦ ᐅᑭᐅᑦ ᐱᖓᓱᑦ ᐊᓂᒍᕋᐃᒻᒪᑕ ᑭᓯᐊᓂ, ᐊᑎᖅᑕᖏᓪᓗ ᐊᓈᓇᒥᓃᓲᖑᓪᓗᑎᑦ ᐅᑭᐅᓄᑦ ᐱᖓᓱᑲᓴᓐᓄᑦ. ᐊᕐᓇᓪᓗᐃᑦ ᓇᔾᔨᓕᕈᓐᓇᖅᑐᑦ ᒪᓕᑦᑐᑎᑦ ᑎᒥᖓᑕ ᐊᖏᓂᖓᓐᓂ ᖃᓄᐃᑦᑑᓂᖓᓂᓗ ᑎᒥᖓ ᐊᕐᓇᓪᓗᒃ ᐱᒋᐊᕐᖓᕐᓂᖓᓂ ᐊᒻᒪᓗ ᐃᓱᐊᓂ ᓂᕆᖃᑦᑕᖏᓐᓂᖏᓐᓂ ᑎᓯᖓᓃᑦᑎᓪᓗᒍ. ᐊᓐᓇᐅᒪᒍᓐᓇᕐᓂᖏᓪᓕ ᐊᖑᓴᓪᓗᐃᑦ ᕿᓚᒥᐅᓂᖅᓴᐅᔪᑦ ᐊᕐᓇᓪᓗᓐᓂᑦ, ᐱᔾᔪᑎᖃᓗᐊᖅᑐᖅ ᐊᖑᓴᓪᓗᐃᑦ ᓇᓐᓄᑦᑕᐅᓂᖅᓴᐅᖃᑦᑕᓲᖑᓂᖏᓐᓂ.

ᓇᓄᐃᑦ ᖁᑦᑎᓂᖅᐹᒦᑦᑐᑎᑦ ᓂᕿᔅᓴᖅᓯᐅᑦᑎᐅᔪᑦ ᓯᑯᒦᒐᔪᑦᑐᑎᓪᓗ. ᐱᓇᓱᐊᕈᓐᓇᕐᓂᖏᑦ ᓇᓄᐃᑦ ᒪᓕᑦᑐᑦ ᓂᕿᔅᓴᖅᓯᐊᕈᓐᓇᕐᓂᖏᓐᓂ, ᐊᑯᓂᐅᓂᖏᓐᓂ, ᐃᔾᔪᓂᖓᓂᓪᓗ ᓯᑯᐃᑦ, ᓂᕿᔅᓴᖅᓯᐅᕐᕕᓪᓚᕆᐊᓗᒋᒻᒪᒍ ᓯᑯ, ᓇᑦᑎᕐᓂᑦ (Pusa hispida). ᐊᓯᔾᔨᐸᓪᓕᐊᓕᕋᑖᕐᖓᑦ ᓯᑯᐃᖅᓴᕋᐃᕐᓂᖓ ᓂᕿᔅᓴᖅᓯᐅᕐᓂᖏᓐᓂ, ᖃᓄᐃᑦᑑᓂᖏᓐᓂ ᓇᑦᑎᕈᓐᓇᕐᓂᖏᓐᓂᓪᓗ, ᐱᓗᐊᖅᑐᒥᑦ ᓂᒋᐊᓂ ᐱᕕᒋᕙᑦᑕᖏᓐᓂ.

ᖃᓄᐃᓕᖓᓂᖏᑦ ᐅᓗᕆᐊᓇᖅᑐᒦᓐᓂᖏᓪᓗ

ᓇᓄᐃᑦ ᓯᓚᕐᔪᐊᑉ ᑲᔾᔨᖓᓃᒐᔪᑦᑐᑦ ᐅᑭᐅᖅᑕᖅᑐᒥ ᑲᓇᑕᒥ, ᑲᓚᖡᑦ ᓄᓈᓂ, ᓄᐊᕙᐃᒥ, ᐅᓛᓵᒥ ᒥᐊᓕᒐᐃᓪᓗ ᓄᓇᖓᓐᓂ. ᑲᓇᑕᒥ ᐊᒥᓲᓂᖏᑦ ᓇᓄᐃᑦ ᑕᒫᓂᖃᐃ ᐅᖓᑖᓃᑦᑐᑦ 17,000, 2/3−ᖑᓪᓗᑎᑦ ᒥᔅᓴᐅᓴᑦᑕᐅᓯᒪᔪᑦ ᓯᓚᕐᔪᐊᒥ ᑲᑎᑦᑐᒋᑦ. ᓇᓄᑦᑕᖃᓲᖑᒻᒥᔪᖅ ᒫᓂᑑᐸᒥ, ᓅᐸᓪᓛᒥ ᓛᐸᑐᐊᒥᓗ, ᓄᓇᑦᑎᐊᕐᒥ, ᓄᓇᕗᒻᒥ, ᐊᓐᑎᐅᕆᔪᒥ, ᑯᐸᐃᒻᒥ ᔫᑳᒥᓗ.

ᒥᔅᓴᐅᓴᑦᑕᐅᓯᒪᔪᑦ ᓯᑯᐃᖅᐸᓪᓕᐊᓯᒪᓕᕐᓂᓐᓂ ᐅᓗᕆᐊᓇᕈᑎᒍᓐᓇᖅᑐᑦ ᓂᕐᔪᑎᓄᑦ, ᓇᔪᒐᖏᑦ ᐱᑕᖃᕈᓐᓃᓂᖅᓴᐅᓗᑎᑦ ᓂᕿᔅᓴᖅᓯᐊᖑᕙᑦᑐᑦ ᓇᓄᕐᓄᑦ ᓇᒥᑐᐃᓐᓇᑦᑎᐊᖅ ᑲᓇᑕᒥ ᑕᐃᒪᐃᑦᑐᑦ. ᒥᔅᓴᐅᓴᑦᑕᐅᓯᒪᔪᑦ ᖃᓄᑎᒋᐅᓂᐊᕐᓂᖓᓐᓂ ᐊᔅᓱᑲᓪᓛᓐᓂᐊᖅᑐᓂᓗ ᐅᓗᕆᐊᓇᕐᓂᖏᑦ ᓇᐅᒃᑯᑐᐃᓐᓇᐃᖅ. ᐊᓯᖏᑦ ᐅᓗᕆᐊᓇᖅᑐᒦᑎᑦᑎᒻᒥᔪᑦ ᓱᕈᓐᓇᖅᑐᑦ, ᐳᓚᕋᖅᑏᑦ, ᐅᖅᓱᐊᓗᐃᑦ ᒐᓯᓯᐅᖅᑏᓪᓗ ᐱᕙᓪᓕᐊᔪᓪᓗ, ᐃᒪᒃᑯᑦ ᐅᒥᐊᕐᔪᐊᖑᕙᑦᑐᑦ. ᑐᖁᓐᓇᖅᑐᓖᓐᓇᐃᑦ ᑕᒪᒃᑯᐊ ᓯᓚᒥ ᐊᓯᔾᔩᐸᓪᓕᐊᔪᑦ ᐅᓗᕆᐊᓇᖅᑐᐃᓐᓇᐃᑦ.

ᓇᓄᐃᑦ ᑎᑎᕋᖅᑕᐅᓯᒪᒻᒪ ᓂᕐᔪᑏᑦ ᐃᓱᒫᓗᓇᖅᑐᒦᑦᑐᑎᑦ ᑲᓇᑕᒥ ᐃᓗᐊᓂ ᒐᕙᒪᑐᖃᒃᑯᑦ ᓂᕐᔪᑏᑦ ᐅᓗᕆᐊᓇᖅᑐᒦᓐᓂᕐᒧᑦ ᐱᖁᔭᖏᑦ (SARA) 2011−ᒥᓂᑦ, ᖃᐅᔨᓴᖅᑕᐅᓯᒪᔪᑦ ᑲᑎᒪᔨᕋᓛᓄᑦ ᖃᓄᐃᓕᖓᓕᕐᓂᖏᓐᓂ ᓄᖑᑐᐃᓐᓇᕆᐊᖃᓕᕐᓂᖏᓐᓄᑦ ᓂᕐᔪᑏᑦ ᑲᓇᑕᒥ (COSEPAC) 2008−ᓂ. ᑲᑎᒪᔨᕋᓛᓄᑦ ᖃᓄᐃᓕᖓᓕᕐᓂᖏᓐᓂ ᓄᖑᑐᐃᓐᓇᕆᐊᖃᓕᕐᓂᖏᓐᓄᑦ ᓂᕐᔪᑏᑦ ᑲᓇᑕᒥ (COSEPAC) ᓇᓗᓇᐃᖅᓯᑲᓐᓂᓚᐅᖅᑐᑦ ᖃᓄᐃᓕᖓᓕᕐᓂᖏᓐᓂ ᐃᓱᒫᓗᓇᕐᓂᖏᓐᓂ ᕿᒥᕐᕈᑲᓐᓂᕐᖓᑕ ᓂᕐᔪᑎᓂᒃ 2018−ᒥ. ᑲᑎᒪᔨᕋᓛᓄᑦ ᖃᓄᐃᓕᖓᓕᕐᓂᖏᓐᓂ ᓄᖑᑐᐃᓐᓇᕆᐊᖃᓕᕐᓂᖏᓐᓄᑦ ᓂᕐᔪᑏᑦ ᑲᓇᑕᒥ (COSEPAC) ᐃᒻᒥᒃᑰᖅᑐᑦ ᑎᒥᐅᓪᓗᓂ ᐱᓕᕆᔨᒻᒪᕇᑦ ᓇᓗᓇᐃᖅᓯᓲᑦ ᕿᒥᕐᕈᓲᖑᓪᓗᑎᓪᓗ ᓄᓇᒦᑦᑐᓂᒃ ᓂᕐᔪᑎᓂᒃ ᐅᓗᕆᐊᓇᖅᑐᒦᑦᑐᒋᔭᐅᔪᓂᒃ ᐱᑕᖃᕈᓐᓃᑐᐃᓐᓇᕆᐊᖃᕐᓂᖏᓐᓂ ᐅᕝᕙᓘᓐᓃᑦ ᐆᒪᔪᐃᑦ ᐊᔾᔨᒌᙱᓐᓂᖏᑦ ᐃᓚᙵᖅᑕᐅᔪᑦ ᑲᓇᑕᒥ.

ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC) ᑲᓇᑕᒥ ᖃᐅᔨᓴᖅᑎᒻᒪᕆᐅᓪᓗᑎᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᑲᑎᒪᔨᕋᓛᑦ ᐊᐅᓚᑦᑎᖃᑕᐅᓪᓗᑎᑦ ᐃᓱᒪᓕᐅᕈᑕᐅᓂᐊᖅᑐᓄᑦ ᐊᑐᐃᓐᓇᐅᑎᑦᑎᖃᑦᑕᖅᑐᑎᑦ ᐊᕐᕌᒍᑕᒫᑦ ᖃᐅᔨᓴᐅᑎᒥᓂᖏᓐᓂ ᖃᓄᐃᓕᖓᓕᕐᓂᖏᓐᓂ ᓇᓄᐃᑦ ᒪᓕᑦᑐᑎᑦ ᖃᐅᔨᓴᕐᓂᒻᒪᕆᒻᒥᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ. ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC) ᑭᒡᒐᖅᑐᐃᔨᐅᔪᑦ ᐊᑐᓂ ᑭᓪᓕᖃᖅᑐᓃᓐᖔᖅᑐᑦ ᓇᓄᖅᑕᓕᓐᓂᑦ ᑲᓇᑕᒥ. ᑭᒡᒐᖅᑐᐃᔩᑦ ᒪᑯᐊ ᑲᓇᑕᒥ ᐊᕕᑦᑐᖅᓯᒪᔪᓂᒃ, ᐅᑭᐅᖅᑕᖅᑐᒥ, ᐊᒻᒪᓗ ᒐᕙᒪᑐᖃᒃᑯᑦ ᖃᐅᓴᖅᑎᒻᒪᕆᖏᑦ, ᐱᓕᕆᔨᒻᒪᕇᑦ ᓄᓇᖃᖅᑳᖅᓯᒪᔪᓂᒃ, ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪᓗ ᓂᕈᐊᕈᓐᓇᖏᑦᑐᑦ ᑕᐃᒃᑯᐊ ᒥᐊᓕᒐᐃᑦ ᓄᓇᖓᓐᓃᓐᖔᖅᓯᒪᔪᑦ ᐃᖃᓗᓕᕆᓂᕐᒧᑦ ᓂᕐᔪᑎᓂᓪᓗ ᐱᔨᑦᑎᕋᖅᑏᑦ, ᒥᐊᓕᒐᐃᑦ ᓄᓇᓕᕆᔨᒃᑯᖏᑦ ᖃᐅᔨᓴᖅᑎᖏᑦ, ᓄᐊᑦ ᓯᓘᑉ ᐳᕈᒥ (North Slope Borough) ᑲᓚᖡᑦ ᓄᓈᓂ ᑎᒥᐅᔪᖅ ᓄᓇᓕᕆᓂᕐᒧᑦ, ᑲᓇᑕᒥ ᐱᓕᕆᖃᑎᖃᖃᑦᑕᖅᑐᑦ ᑲᑐᔾᔨᓗᑎᓪᓗ ᓇᓄᐃᑦ ᐊᒡᒍᑐᖅᓯᒪᓂᖏᓐᓂ.

ᖃᐅᔨᓴᖅᑎᒻᒪᕆᓐᓄᑦ ᖃᐅᔨᓴᐅᑎᒥᓃᑦ, 2022 ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC) ᐅᓂᒃᑳᑦ ᐅᖃᖅᓯᒪᔪᑦ ᒥᔅᓴᐅᓴᐃᓯᒪᔪᑦ 54% ᑲᑎᑦᑐᒋᑦ ᓇᓄᐃᑦ ᑲᓇᑕᒥ ᐊᒡᒍᑐᖅᓯᒪᔪᓃᑦᑐᑦ ᒫᓐᓇᓕᓴᐅᓪᓗᑎᑦ (15-ᐅᑭᐅᑦ) ᐊᒥᓲᓂᖏᑦ ᐊᒥᓱᕈᓐᓂᖅᓴᐅᓱᒋᔭᐅᓂᐊᖅᑐᑦ ᐅᕝᕙᓘᓐᓃᑦ ᑕᐃᒪᐃᑐᐃᓐᓇᕐᓗᑎᑦ (6−ᖓ 13−ᓂᒃ ᐊᒡᒍᑐᖅᓯᒪᔪᓂᒃ). ᑕᒫᓂᐸᓗᒃ 29% ᓇᓄᐃᑦ ᐊᒡᒍᑐᖅᓯᒪᔪᓂᒃ ᖃᑦᑏᓐᓇᕈᖅᐹᓪᓕᕐᓂᐊᖅᑐᑎᑦ (4−ᖓ 13−ᓂᒃ ᐊᒡᒍᑐᖅᓯᒪᔪᓂᒃ), ᑕᒫᓂᖃᐃ 17% ᓇᓄᐃᑦ ᐊᒡᒍᑐᖅᓯᒪᔪᓂᒃ “ᓇᓗᓇᖅᑐᑎᑦ” (3−ᖓ 13−ᓂᒃ ᐊᒡᒍᑐᖅᓯᒪᔪᓂᒃ). ᐊᒥᓲᓂᖅᓴᐃᑦ (ᒥᔅᓴᐅᓴᑦᑕᐅᓯᒪᔪᑦ 54%) ᓇᓄᐃᑦ ᑲᓇᑕᒥ ᐊᒡᒍᑐᖅᓯᒪᔪᓃᑦᑐᑦ ᐊᒥᓱᕈᕐᓂᓴᐅᓂᐊᖅᑐᒋᔭᑦ, ᑕᐃᒪᐃᑐᐃᓐᓇᕐᓗᑎᑦ ᐅᕝᕙᓘᓐᓃᑦ ᑕᐃᒪᐃᑐᐃᓐᓇᕐᓗᑎᑦ ᓱᕐᕋᖏᓪᓗᑎᑦ. ᑕᐃᒪᙵᓂ ᓴᖅᑭᖅᑕᐅᓚᐅᖅᓯᒪᒻᒪᑕ ᑎᑎᕋᖅᓯᒪᔪᑦ 2022−ᓂ ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC) ᐅᓂᒃᑳᕐᒥ, ᑖᒃᑯᐊ 2021−ᒥ ᖃᐅᔨᓴᐅᑎᒥᓃᑦ ᐊᒡᒍᑐᖅᓯᒪᔪᓂᒃ ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC) ᕿᒥᕐᕈᔭᐅᓯᒪᔪᑦ “ᖃᑦᑏᓐᓇᕈᑐᐃᓐᓇᕆᐊᖃᖅᑐᒋᔭᐅᔪᑦ” ᖁᕝᕙᓯᓐᓂᖅᓴᐅᓱᒋᔭᐅᓪᓗᑎᓪᓗ ᒥᔅᓴᐅᓴᑦᑕᓯᒪᔪᓂᒃ ᑕᐃᑲᓂ 2016−ᒥ ᖃᐅᔨᓴᕐᓂᐅᔪᓂᑦ.

ᒪᓕᑦᑐᒋᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ, 2022−ᒥ ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC) ᐅᓂᒃᑳᖏᓐᓂ ᐅᖃᖅᓯᒪᔪᑦ 100% ᓇᓄᐃᑦ ᑲᓇᑕᒥ ᕿᒥᕐᕈᔭᐅᓯᒪᔪᑦ ᐊᒥᓱᕈᕆᐊᖅᑐᒋᔭᐅᓯᒪᓪᓗᑎᑦ ᐅᕝᕙᓘᓐᓃᑦ ᑕᐃᒪᐃᑐᐃᓐᓇᖅᑐᒋᔭᐅᓪᓗᑎᑦ (13−ᖓ 13−ᓂᒃ ᐊᒡᒍᑐᖅᓯᒪᔪᓂᒃ). ᒥᔅᓴᐅᓴᑦᑕᐅᓯᒪᔪᑦ 59% ᑲᑎᑦᑐᒋᑦ ᓇᓄᐃᑦ ᑲᓇᑕᒥ ᐊᒡᒍᑐᖅᓯᒪᔪᓂᑦ ᕿᒥᕐᕈᔭᐅᓯᒪᔪᑦ ᐊᒥᓱᕈᕆᐊᖅᓯᒪᔪᒋᔭᐅᓪᓗᑎᑦ (7−ᖓ 13−ᓂᒃ ᐊᒡᒍᑐᖅᓯᒪᔪᓂᒃ). ᒥᔅᓴᐅᓴᑦᑕᐅᓯᒪᔪᑦ 36% ᓇᓄᐃᑦ ᑲᓇᑕᒥ ᐊᒡᒍᑐᖅᓯᒪᔪᓂᑦ ᕿᒥᕐᕈᔭᐅᓯᒪᔪᑦ ᑕᐃᒪᐃᑐᐃᓐᓇᖅᑐᒋᔭᐅᓪᓗᑎᑦ (5−ᖓ 13−ᓂᒃ ᐊᒡᒍᑐᖅᓯᒪᔪᓂᒃ), ᐊᒻᒪᓗ ᑕᒫᓂ 5% ᓇᓄᐃᑦ ᐃᓄᑐᐊᑲᓪᓚᐃᑦ ᐊᒡᒍᑐᖅᓯᒪᔪᑦ ᐊᒥᓱᕈᖅᐸᓪᓕᐊᓂᐊᖅᑐᒋᔭᐅᔪᑦ, ᑕᐃᒪᐃᑐᐃᓐᓇᕐᓗᑎᓗ, ᐊᓯᐊᓃᑦᑐᓂᒃ ᐊᒡᒍᑐᖅᓯᒪᔪᓂᓪᓕ.

ᐆᒪᔪᖅᑕᐅᔪᓐᓇᖅᑐᑦ ᐊᐅᓚᑕᐅᓂᖏᑦ

ᑲᓇᑕᒥ ᓄᓇᖃᖅᑳᖅᓯᒪᔪᑦ ᓇᓐᓄᖃᑦᑕᐃᓐᓇᕐᖓᑕ ᐃᓅᓯᓕᒫᕐᒥᓂᑦ ᑕᐅᓴᖏᓐᓃᑦᑐᓂᑦ ᐅᑭᐅᒐᓵᓗᓐᓂᑦ. ᓇᒥᑐᐃᓐᓈᕋᔪᑦᑐᑦ ᓇᓐᓄᖃᑦᑕᖅᑐᑦ ᑲᓇᑕᒥ, ᐊᐅᓚᑦᑎᒍᑎᐅᓚᐅᖅᓯᒪᔪᑦ ᐆᒪᔪᕋᓱᕐᓂᕐᒧᑦ, ᐃᓚᒋᔭᐅᓪᓗᑎᑦ ᒐᕙᒪᑐᖃᒃᑯᑦ, ᑲᓇᑕᒥ ᐊᕕᑦᑐᖅᓯᒪᔪᓂᒃ ᐅᑭᐅᖅᑕᖅᑐᒥᓪᓗ ᒐᕙᒪᒃᑯᖏᑦ, ᐋᖅᑮᓚᐅᖅᓯᒪᔪᑦ 1970−ᖏᓐᓂ. ᐊᐅᓚᑦᑎᓪᓗᑎᑦ ᓇᓐᓄᑦᑕᐅᔪᓐᓇᖅᑐᓂᒃ ᑲᓇᑕᒥ ᐊᑯᓂᒧ ᐊᒥᓱᕈᖅᑎᑕᐅᒃᑲᓐᓂᕋᓱᐊᕐᓗᑎᑦ, ᐃᓱᒪᒋᔭᕆᐊᖃᖅᑐᒋᓪᓗ ᐃᓄᓐᓄᑦ ᐊᑲᐅᙱᓕᐅᕈᑎᖃᕐᓂᖅᑲᑕ ᓇᓐᓄᑦᑕᐅᕙᑦᑐᑦ ᐊᑦᑕᓇᖅᑐᒦᖁᓇᒋᑦ ᐃᓄᐃᑦ.

ᑲᓇᑕᒥ ᐊᕕᑦᑐᖅᓯᒪᔪᓂᒃ ᐅᑭᐅᖅᑕᖅᑐᒥᓪᓗ ᑭᓪᓕᖃᕐᖓᑕ ᒪᓕᒐᖃᐅᖅᑐᑎᓪᓗ ᓄᓇᖏᓐᓂ ᑭᓱᑦᑕᐅᔪᓐᓇᖅᑐᓂᒃ, ᒪᑯᓂᖓᓗ ᓂᕐᔪᑎᓂᒃ ᐊᒻᒪᓗ ᓂᕐᔪᑎᓂᒃ ᐊᐅᓚᑦᑎᓂᕐᒥᑦ. ᒐᕙᒪᑐᖃᒃᑯᑦ ᑭᓪᓕᖏᑦ ᒪᓕᒐᓕᐅᖅᑕᐅᒋᐊᖃᖅᑐᑎᑦ ᐱᔾᔪᑎᖃᖅᑐᑎᑦ ᓄᓇᖁᑎᖏᓐᓂ, ᐃᒪᖏᓐᓂ ᑲᓱᖅᓯᒪᔪᓂᒃ ᑭᓪᓕᖃᕐᓂᖏᓐᓂ ᓯᓚᕐᔪᐊᒥᓗ ᐃᓱᒫᓘᑎᓂᒃ. ᓄᓇᑖᕈᑎᓄᑦ ᐊᖏᕈᑎᓕᐅᖅᓯᒪᓪᓗᑎᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ ᐃᓕᓴᕆᔭᐅᓪᓗᑎᑦ ᑲᓇᑕᐅᑉ ᒪᓕᒐᕐᔪᐊᖏᓐᓄᑦ ᐊᒻᒪᓗ ᐃᓚᖃᖅᑐᑎᑦ ᐱᔪᓐᓇᐅᑎᖃᕐᓂᖏᓐᓂ ᐊᓯᕙᕈᓐᓇᕐᓂᖏᓐᓂ ᐊᐅᓚᑦᑎᒍᓐᓇᕐᓂᖏᓐᓂᓪᓗ ᓂᕐᔪᑎᓂᒃ. ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ, ᐅᑯᐊᖑᓪᓗᑎᑦ ᓄᓇᖃᖅᑳᖅᓯᒪᔪᑦ ᐊᒻᒪᓗ ᒐᕙᒪᒃᑯᓐᓂᑦ ᑭᒡᒐᖅᑐᐃᔩᑦ, ᐋᖅᑮᓚᐅᖅᓯᒪᔪᑦ ᓄᓇᑖᕈᑎᓄᑦ ᐊᖏᕈᑎᒥᑦ ᓂᕐᔪᑎᓂᒃ ᐊᐅᓚᑦᑎᖃᑦᑕᕐᓂᐊᖅᑎᓪᓗᒋᑦ ᐃᓱᒪᓕᐅᖃᑦᑕᕐᓗᑎᑦ ᐅᕝᕙᓘᓐᓃᑦ ᐊᑐᓕᖁᔨᓕᐅᕐᓗᑎᑦ, ᑐᓂᔭᐅᕙᑦᑐᑎᓪᓗ ᑲᒪᕙᑦᑐᓂᒃ ᑲᓇᑕᒥ ᐊᕕᑦᑐᖅᓯᒪᔪᓄᑦ, ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓄᑦ, ᐊᒻᒪᓗ ᒐᕙᒪᑐᖃᒃᑯᑦ ᒥᓂᔅᑕᖏᓐᓄᑦ, ᐃᓱᒪᖅᓴᖅᓯᐅᕈᑕᐅᓂᐊᖅᑐᑎᑦ ᐱᔭᕇᔭᖅᑕᐅᓗᑎᓪᓗ. ᐊᑐᓂ ᑭᓪᓕᖏᑦ ᐊᐅᓚᑦᑎᓂᕐᒧᑦ ᐃᓱᒪᓕᐅᖅᑎᐅᓪᓗᑎᑦ ᒪᓕᑦᑐᑎᑦ ᑭᓪᓕᖏᓐᓂ. ᑲᑐᔾᔨᒐᐃᒻᒪᑕ ᐊᒡᒍᑐᖅᓯᒪᔪᓂᒃ, ᐱᓕᕆᖃᑎᒌᒋᐊᖃᓲᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ, ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᑦ, ᑲᓇᑕᒥ ᐊᕕᑦᑐᖅᓯᒪᔪᓂᒃ, ᐅᑭᐅᖅᑕᖅᑐᒥᓗ ᐊᒻᒪᓗ ᒐᕙᒪᑐᖃᒃᑯᓐᓂ, ᐊᐅᓚᑕᐅᓪᓗᑎᑦ ᓇᓄᓕᕆᓂᕐᒥᑦ ᐊᓪᓚᕕᓕᕆᓂᒃᑯᑦ ᑲᑎᒪᔨᕋᓛᖏᑦ (PBAC) ᐊᓯᖏᓪᓗ ᓄᓇᓕᕐᔪᐊᑦ ᑕᐃᒪᐃᑦᑐᓕᕆᔪᑦ. ᐅᑯᐊᖑᓪᓗᑎᑦ ᓇᓄᓕᕆᓂᕐᒥᑦ ᐊᓪᓚᕕᓕᕆᓂᒃᑯᑦ ᑲᑎᒪᔨᕋᓛᖏᑦ (PBAC) ᑲᓇᑕᒥ ᐊᕕᑦᑐᖅᓯᒪᔪᓂᒃ, ᐅᑭᐅᖅᑕᖅᑐᒥ ᐊᒻᒪᓗ ᒐᕙᒪᑐᖃᒃᑯᓐᓂ ᓂᕐᔪᑎᓕᕆᔩᑦ, ᑭᒡᒐᖅᑐᐃᔩᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂ ᐊᒻᒪᓗ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓂ ᐊᐅᓚᑦᑎᖃᑦᑕᖅᑐᑦ ᓇᓄᓕᕆᓂᕐᒥᑦ.

ᐊᑦᑐᐊᔪᑦ ᓂᕐᔪᑎᓄᑦ ᐱᖁᔭᕐᓂᑦ ᑎᒥᐅᔪᓪᓗ ᒪᓕᒐᖏᑦ, ᐊᕕᑦᑐᖅᓯᒪᖃᓯᐅᑎᔪᓪᓗ ᑲᑎᙵᔪᓂ ᐊᖏᕈᑏᑦ, ᓄᓇᑖᕈᑎᓄᑦ ᐊᖏᕈᑎᑦ ᐊᒻᒪᓗ ᓯᓚᕐᔪᐊᒥ ᐊᖏᕈᑎᓂᒃ ᑎᑎᕋᖅᓯᒪᔪᑦ ᑕᕝᕙᓂ ᑎᑎᕋᖅᓯᒪᔪᑦ ᐃᓱᐊᓂ.

ᑕᒪᒃᑯᐊᓕ ᐊᐅᓚᑦᑎᔾᔪᑎᓄᑦ ᑐᕌᒐᖏᑦ ᐊᓯᖏᓪᓗ ᐊᒡᒍᑐᖅᓯᒪᔪᓄᑦ, ᐊᔾᔨᒌᙱᑦᑐᑦ ᑐᕌᒐᐃᑦ ᓇᓄᐃᑦ ᐊᒥᓲᓂᖏᓐᓂ ᑲᓇᑕᒥ ᐃᒪᐃᑦᑑᓪᓗᑎᑦ:

• ᐊᒥᓲᖏᓐᓇᖁᓪᓗᒋᑦ ᑲᓇᑕᒥ ᓇᓄᐃᑦ ᐊᐅᓚᓂᖃᑦᑎᐊᕐᓗᑎᓪᓗ
• ᓄᐊᑦᑎᖃᑦᑕᕐᓗᑎᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᖃᐅᔨᓴᖅᑎᒻᒪᕇᓪᓗᑦ ᑭᖑᕙᖅᓯᒪᙱᑦᑎᐊᕐᓗᑎ ᐊᐅᓚᑦᑎᔾᔪᑎᒋᓗᑎᒍ ᐃᓱᒪᓕᐅᕐᓂᐊᖅᑎᓪᓗᑕ
• ᐊᐅᓚᑦᑎᒍᓐᓇᕐᓗᑎᑦ ᓇᓄᕐᓂᑦ ᐃᑲᔫᑎᐅᖃᑦᑕᕋᔭᖅᑐᓄᑦ ᓄᓇᖃᖅᑳᖅᓯᒪᔪᑦ ᓇᓐᓄᒐᓱᓐᓂᖏᓐᓄᑦ ᐱᐅᖅᓱᐊᖏᓐᓇᕐᓗᑎᓪᓗ ᓇᓄᕐᓂᑦ ᒪᓕᓪᓗᑎᑦ ᑐᓴᐅᒪᑦᑎᐊᕐᓂᖏᓐᓂ, ᒪᑯᓂᖓᓗ ᓇᓗᓇᐃᔭᖅᓯᒪᑦᑎᐊᕐᓗᑎᑦ ᓇᓐᓄᖅᑕᐅᔪᓐᓇᖅᑐᑦ ᒥᔅᓵᓄᑦ, ᓇᓄᕐᓂᓪᓗ ᐊᑲᐅᙱᓕᐅᕈᑏᑦ ᓇᒻᒥᓂᖅ ᓴᐳᒻᒥᒋᐊᖃᕐᓂᖏᓐᓄᑦ ᓇᓐᓄᑦᑐᑦ, ᐊᐅᓚᑦᑎᓂᕐᒧᓪᓗ ᑐᕌᒐᖏᓐᓂ
• ᐅᔾᔨᓱᕐᓗᑎᑦ ᓇᓄᕐᓂᑦ ᑲᓇᑕᐅᑉ ᐊᒡᒍᑐᖅᓯᒪᓂᖏᓐᓂ, ᓯᕗᓪᓕᖅᐸᐅᑎᓪᓗᒋᓪᓗ ᖃᐅᔨᓴᖅᑕᐅᒋᐊᓖᑦ ᕿᒥᕐᕈᔭᐅᒋᐊᓖᓪᓗ ᐊᑐᓕᖅᑎᑕᐅᓂᖏᓐᓂ ᐊᐅᓚᑦᑎᒍᑎᔅᓴᐃᑦ ᐊᒻᒪᓗ ᓄᑖᑦ ᑐᓴᖅᑕᖏᑦ ᓄᐊᑕᑦ
• ᓇᓗᓇᐃᔭᕐᓗᒋᑦ ᐊᔾᔨᐅᖏᑦᑐᑦ ᐊᐅᓚᑎᔾᔪᑎᔅᓴᐅᒍᓐᓇᖅᑐᑦ ᐱᔭᐅᒋᐊᓖᑦ ᐊᓯᕙᖅᑎᓄᑦ ᐊᒻᒪᓗ ᒪᓕᔾᔫᒥᓗᑎᑦ ᑕᐃᒃᑯᓄᖓ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓄᑦ, ᑲᓇᑕᒥ, ᒐᕙᒪᑐᖃᒃᑯᑦ ᒪᓕᒐᖏᓐᓂ ᐊᒻᒪᓗ ᓯᓚᕐᔪᐊᒥ ᐊᖏᕈᑎᐅᔪᓂᒃ
• ᖃᑦᑏᓇᐅᓂᖅᐹᖑᑎᒐᓱᐊᕐᓗᒋᑦ ᓇᓄᕐᓄᑦ ᐅᐸᑦᑕᐅᑦᑕᐃᓕᒪᓇᓱᐊᕐᓂᖅ ᓴᐳᒻᒥᓗᑎᑦ ᑐᖁᑦᑎᑦᑕᐃᓕᒪᓂᖅᓴᐅᓗᑎᑦ ᓄᓇᓕᓐᓂᑦ, ᑐᐱᕐᕕᓐᓂᑦ, ᐳᓚᕋᖅᑏᑦ ᓴᓇᔩᓪᓗ
• ᖃᓄᐃᒍᑕᐅᑎᑦᑕᐃᓕᒪᓇᓱᐊᕐᓗᒋᑦ ᐃᓄᓐᓄᑦ ᖃᓄᐃᓘᖃᑦᑕᖅᑐᓄᑦ, ᐱᓗᐊᖅᑐᒥᑦ ᐆᒪᔪᖅᓯᐅᖅᑐᓄᑦ ᓂᐅᕐᕈᑎᔅᓴᓂᒃ ᓲᕐᓗ ᓯᔾᔭᒥ ᖃᓂᑦᑐᒥᑦ ᐱᕙᓪᓕᐊᓂᖏᓐᓂ, ᐅᒥᐊᕐᔪᐊᓄᑦ ᐊᒻᒪᓗ ᓱᓇᒃᑯᑖᓂᑦ ᓄᐊᑦᑎᔪᓂᒃ, ᓇᓄᐃᑦ ᓇᓄᐃᓪᓗ ᓇᔪᒐᖏᑦ
• ᐊᑐᐃᓐᓇᕐᓗᑎᑦ ᑲᒪᑦᑎᐊᖏᓐᓇᕐᓗᑎᑦ ᓂᕕᖓᑖᕐᓂᑦ, ᓚᐃᓴᔅᓯᓂᒃ ᐱᔪᓐᓇᐅᑎᓂᓪᓗ ᑕᒪᒃᑯᐊ ᑕᑎᒋᔭᐅᑦᑎᐊᖁᓪᓗᒋᑦ ᓇᓐᓄᑦᑐᓄᑦ ᓇᓗᓇᐃᒃᑯᑎᐅᒻᒪᑕ ᐊᒻᒪᓗ ᓱᓇᒃᑯᑖᖏᓐᓂ ᓇᓄᕐᓃᓐᖔᖅᑐᓂᒃ

ᐊᒡᒍᑐᖅᓯᒪᔪᓂᒃ, ᐊᐅᓚᑦᑎᔩᑦ ᖃᓄᖅᑑᕈᓐᓇᕆᐊᖃᖅᑐᑦ ᐋᖅᑭᒋᐊᕆᖃᑦᑕᕐᓂᐊᕐᖓᑕ ᓇᓐᓄᑦᑕᐅᔪᓐᓇᖅᑐᑦ ᐊᒥᓲᖏᓐᓂ ᑭᓯᐊᓂᓕ ᓄᖑᑉᐸᓪᓕᐊᓗᐊᙱᓪᓗᑎᑦ ᓄᓇᖃᖅᑳᖅᑐᒥᓃᑦ ᐱᔭᕆᐊᓕᖏᓐᓂ ᐱᖃᑦᑕᕐᓗᑎᑦ, ᐊᓯᔾᔨᐸᓪᓕᐊᓂᖓᓐᓂᓗ ᐊᕙᑎᓄᑦ, ᐃᓚᖏᓪᓗ ᑭᒃᑯᑐᐃᓐᓇᐃᑦ ᖃᐅᔨᒪᒋᐊᖃᕐᖓᑕ ᐅᓗᕆᐊᓇᖅᑐᒦᒍᓐᓇᕐᓂᖏᓐᓂ ᐊᒻᒪᓗ ᐱᐅᖅᓱᐊᕆᐊᖃᕐᖓᑕ ᒪᓕᒐᖅᑎᒍᑦ ᒪᓕᓪᓗᑎᑦ. ᐊᒡᒍᑐᖅᓯᒪᔪᓂᒃ ᑲᓇᑕᒥ ᐊᐅᓚᑦᑎᓂᐅᔪᑦ ᑐᕌᒐᖃᖅᑐᑎᑦ ᐊᒥᓲᓂᖏᑦ ᑕᐃᒪᐃᑐᐃᓐᓇᖁᔭᐅᓪᓗᑎᑦ.

ᐊᐅᓚᑦᑎᔩᑦ ᐃᓱᒪᓕᐅᖃᑦᑕᖅᑐᑦ ᖃᐅᔨᓚᐅᖅᑐᑎᑦ ᓇᓗᓇᐃᖅᑕᒥᓂᕐᓂᑦ ᕿᒥᕐᕈᔭᒥᓂᕐᓂᓪᓗ ᖃᔨᐅᓴᖅᑎᒻᒪᕆᓐᓂᒃ ᐊᒻᒪᓗ ᓄᓇᖃᖅᑲᖅᓯᒪᔪᑦ ᖃᐅᔨᒪᓂᖏᓐᓂ, ᒪᑯᓂᖓᓗ ᖃᐅᔨᓴᓚᐅᖅᑐᑎᒃ ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC), ᓇᓐᓄᑦᑕᐅᕙᑦᑐᑦ ᑭᓪᓕᓯᓂᐊᖅᑕᐅᓂᖏᑦ ᐊᒥᓲᓂᖏᓪᓗ ᐊᓯᔾᔨᐸᓪᓕᐊᓂᖏᑦ ᖃᐅᔨᓴᐅᑎᓂᒃ ᐊᑐᖅᑕᐅᕙᑦᑐᓂᒃ. ᓇᓐᓄᑦᑕᐅᕙᑦᑐᑦ ᐊᐅᓚᑕᐅᒻᒥᔪᑦ ᐃᓕᑦᑐᕆᐊᓕᑎᒍᑦ ᐊᐅᓚᑦᑎᓪᓗᑎᑦ, ᓇᓗᓇᐃᔭᖅᓯᒪᑦᑎᐊᖅᑐᓂᒃ ᐊᐅᓚᑦᑎᒍᑎᖃᖅᑐᑎᑦ ᖃᐅᔨᓵᒥᓂᕐᓂᑦ ᐊᒻᒪᓗ ᐋᖅᑭᒋᐊᖅᑕᐅᕙᑦᑐᑎᑦ ᑕᐃᒪᐃᒋᐊᖃᕋᐃᒻᒪᑕ. ᐊᒡᒍᑐᖅᓯᒪᔪᑦ ᐊᐅᓚᑕᐅᑎᓪᓗᒋᑦ ᐊᒥᓲᓂᖏᑦ ᖃᑦᑏᓐᓇᕈᕆᐊᕐᓂᖅᑲᑕ, ᑲᓇᑕᒥ ᖃᐅᔨᓴᖅᑎᒻᒪᕇᑦ ᐱᓕᕆᔨᖏᑦ ᐊᐅᓚᑦᑎᔾᔪᑎᔅᓴᓂᒃ ᑐᕌᒐᓕᐅᕋᔭᖅᑐᑦ ᓄᖑᑉᐸᓪᓕᐊᓗᐊᖁᓇᒋᑦ ᐊᑯᓂᒧᑦ, ᐊᒻᒪᓗ ᓇᓗᓇᐃᔭᖅᓯᒪᑦᑎᐊᕐᓗᒋᑦ ᖃᑦᑏᓐᓇᕈᖅᐸᓪᓕᐊᔾᔪᑎᖏᓐᓂ ᐊᒻᒪᓗ ᖃᓄᑎᒋ ᑐᕌᒐᖏᓐᓂ ᑲᔪᓯᑎᑦᑎᓇᓱᐊᕐᓂᐊᕐᒪᖔᑕ.

ᐱᔭᕇᖅᓯᒪᓕᖅᑲᑦ, ᑲᓇᑕᒥ ᐊᐅᓚᑦᑎᓂᕐᒧᑦ ᐸᕐᓇᐅᑏᑦ ᓇᓄᓕᕆᓂᕐᒧᑦ ᑕᐃᒪᐃᒋᐊᖃᖅᑎᑕᐅᒻᒪᑕ ᓂᕐᔪᑎᓂᒃ ᐅᓗᕆᐊᓇᖅᑐᒦᑦᑐᓄᑦ ᐱᖁᔭᕐᓂᑦ (SARA) ᓄᐊᑕᐅᓯᒪᒐᔭᖅᑐᑦ ᐱᖓᓲᔪᖅᑐᓂᒃ ᑭᓪᓕᖏᓐᓂ ᓇᓄᐃᑦ ᐊᐅᓚᑕᐅᓂᕐᒧᑦ ᐸᕐᓇᐅᑎᖏᓐᓂ ᐊᒥᓱᕈᖅᑎᑦᑎᑲᓐᓂᕋᓱᐊᕐᓂᒧᓪᓗ, ᐊᒻᒪᓗ ᒐᕙᒪᑐᖃᒃᑯᓐᓂ ᐃᓚᒋᓗᖏᑦ. ᒐᕙᒪᑐᖃᒃᑯᑦ ᐃᓚᒋᓗᒋᑦ ᐋᖅᑭᖅᑕᐅᓯᒪᔪᑦ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᑲᓇᑕᒥ ᐱᓕᕆᖃᑎᖃᖅᑐᑎᑦ ᓇᓄᓕᕆᔨᓄᑦ ᐱᓕᕆᖃᑕᐅᔪᓂᒃ (ᐃᓚᒋᔭᐅᓪᓗᑎᑦ ᑲᓇᑕᒥ ᐊᕕᑦᑐᖅᓯᒪᔪᑦ ᐅᑭᐅᖅᑕᖅᑐᒥᓗ ᒐᕙᒪᐅᔪᓂᒃ, ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᑦ). ᒐᕙᒪᑐᖃᒃᑯᑦ ᐃᓚᒃᑲᓐᓂᖏᓐᓂ ᐱᕙᓪᓕᐊᒐᔭᖅᑐᑦ ᑭᓪᓕᖏᓐᓂ ᐊᐅᓚᑦᑎᓂᕐᒥᑦ ᐸᕐᓇᐅᑎᓂᒃ ᐊᒻᒪᓗ ᐊᒥᓱᕈᖅᑎᑦᑎᑲᓐᓂᕋᓱᐊᕐᓂᕐᒧᑦ ᐸᕐᓇᐅᑎᓂᒃ ᐱᑕᖃᕇᖅᑐᓪᓕ (ᐃᓅᕕᐊᓗᓐᓂᑦ, ᓄᓇᕗᑦ ᐊᓐᑎᐅᕆᔪᒥᓗ) ᐅᕝᕙᓘᓐᓃᑦ ᒫᓐᓇ ᐋᖅᑭᔅᓱᐃᕙᓪᓕᐊᔪᑦ (ᑯᐸᒻᒥ, ᒫᓂᑑᐸ ᐊᒻᒪᓗ ᓅᐸᓪᓛᑦ ᓛᐸᑐᐊᓗ). ᐱᕙᓪᓕᐊᑎᑦᑎᓂᐊᕐᒥᔪᑦ ᑲᓇᑕᒥ ᓇᓄᓕᕆᓂᕐᒥᑦ ᐱᐅᖅᓱᐊᓂᕐᒧᑦ ᐸᕐᓇᐅᑎᓂᒃ (2011), ᐋᖅᓱᖅᑕᐅᓚᐅᖅᓯᒪᓪᓗᑎᑦ ᓇᓄᓕᕆᓂᕐᒥᑦ ᐊᓪᓚᕕᓕᕆᓂᒃᑯᑦ ᑲᑎᒪᔨᕋᓛᖏᑦ (PBAC) ᐃᑲᔪᖅᑐᐃᓪᓗᑎᑦ ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC) ᓇᓄᕐᓂᑦ ᐊᐅᓚᖃᑎᖃᕐᓗᑎᑦ ᐃᓄᓐᓂᑦ ᐊᐅᓚᖃᑎᖃᕐᓗᑎᑦ ᐱᓕᕆᖃᑎᖃᕐᓗᓂ ᑲᓇᑕᒥ.

ᐱᒋᐊᕐᖓᕐᓂᖏᓐᓂ 1990, ᐊᐅᓚᑦᑎᓂᕐᒧᑦ ᐃᓕᖅᑯᓯᖏᓐᓂ 2:1 ᐊᖑᓴᓪᓗᐃᑦ ᓇᓐᓄᑦᑕᐅᕙᑦᑐᑦ ᐊᒥᓲᓂᖏᑦ ᐊᕐᓇᓐᓗᐃᓪᓗ ᖃᑦᑏᓐᓇᐅᓂᖅᐅᓗᑎᑦ 1.5% ᐊᑐᓕᖅᑎᑕᐅᓚᐅᖅᓯᒪᔪᖅ ᑲᓇᑕᒥ, ᓇᓐᓄᒍᓐᓇᖅᑐᓂᒃ ᑕᐃᒫᔅᓴᐃᓐᓇᖅ ᐃᓕᖅᑯᓯᖃᖅᑐᑎᑦ ᖃᑦᑏᓐᓇᕈᖅᐹᓪᓕᖅᑕᐅᖁᓇᒋᑦ. ᑕᐃᒫᒃ ᐃᓕᖅᑯᓯᖃᖅᑐᑎᑦ ᖃᐅᔨᓚᐅᖅᑐᑦ ᐊᕐᓇᓪᓗᐃᑦ ᐱᒻᒪᕆᐅᓂᖅᓴᐅᓂᖏᓐᓂ ᐊᒥᓱᕈᖅᑎᒐᓱᐊᖅᑐᒋᑦ. ᑕᐃᒪ ᓇᓐᓄᑦᑕᐅᔪᓐᓇᖅᑐᑦ ᐊᖑᓴᓪᓗᐃᑦ ᐊᒻᒪᓗ ᐊᕐᓇᓪᓗᐃᑦ ᐃᒪᐃᑦᑐᓪᓗᑎᑦ 2:1 ᓇᓐᓄᑦᑕᐅᔪᓐᓇᖅᑐᓂᒃ ᐃᓕᖅᑯᓯᖃᖅᑐᑎᑦ 4.5%−ᓂᑦ.

2018−ᒥ, ᑕᐃᑲᙵ ᓴᓐᓂᕈᑎᐅ ᐃᒪᖓᓐᓂ (Baffin Bay) ᐊᒻᒪᓗ ᑲᐃᓐ ᐸᐃᓴᓐᒥ (Kane Basin) ᐊᒡᒍᑐᖅᓯᒪᔪᑐᐊᕐᓂᑦ, ᒪᓕᑦᑐᒋᑦ ᐆᒪᔪᓂᒃ ᐊᕙᑎᑦᑎᓐᓂᓪ ᐊᒻᒪᓗ ᐊᒥᓲᓂᖏᑦ ᐊᔾᔨᒌᙱᑦᑐᑦ, ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ, ᓇᓐᓄᑦᑕᐅᕙᑦᑐᓪᓗ ᖃᐅᔨᓴᖅᑕᐅᓯᒪᓪᓗᑎᑦ ᑲᓇᑕᒥ-ᑲᓚᖡᑦ ᓄᓇᓂ ᑲᑐᔾᔨᓪᓗᑎᑦ ᓇᓄᓕᕆᔨᐅᔪᑦ, ᓄᓇᕗᒻᒥ ᑎᒍᓯᓪᓗᑎᑦ ᓇᓐᓄᒐᓱᐊᕐᓂᕐᒧᑦ ᐊᐅᓚᑦᑎᔾᔪᑎᓂᒃ ᑕᐃᒫᒃ ᐊᒥᓲᓂᖅᐹᓐᓂᓕᒃ ᐱᔪᓐᓇᕐᓂᐊᕐᖓᑕ 50%−ᓂᑦ ᐊᕐᓇᓪᓗᓂᑦ ᑲᑎᑦᑐᒋᑦ ᐱᐅᔪᓐᓇᖅᑐᓂᒃ. ᐃᓱᒪᓕᐅᓚᐅᖅᓯᒪᔪᑦ ᐊᑐᕈᒪᓪᓗᑎᑦ ᐊᕐᓇᓗᓐᓂ ᐊᖑᓴᓪᓗᓂᓪᓗ ᐱᔭᐅᔪᓐᓇᖅᑐᓂᒃ 1:1 ᐃᒫᖑᙱᖔᖅᑐᖅ 2:1 ᐊᖑᓴᓪᓗᐃᑦ ᐊᕐᓇᓪᓗᐃᓪᓗ ᐱᔭᐅᔪᓐᓇᕐᓗᑎᑦ ᐊᓯᖏᓐᓄᑦ ᐃᑲᔪᖅᑐᖅᑕᐅᓚᐅᖅᓯᒪᔪᑦ ᓇᓐᓄᑦᑕᐅᔪᓐᓇᖅᑐᑦ ᖃᐅᔨᓴᖅᑕᐅᓕᕐᖓᑕ ᐃᓱᒪᒋᖃᓯᐅᑎᒋᐊᖃᖅᑐᑎᑦ ᐊᓯᕙᖅᑕᐅᕙᙱᑦᑐᑦ ᐊᖑᓴᓪᓗᐃᑦ ᖃᑦᑏᓐᓇᐅᓂᖅᓴᐅᓕᖅᑐᑎᑦ ᐊᕐᓇᓪᓗᓐᓂ ᑕᒪᒃᑯᓂᖓ ᐊᒡᒍᑐᖅᓯᒪᔪᓂᒃ, ᐊᒻᒪᓗ ᐊᖑᓴᓪᓗᐃᑦ ᖃᑦᑏᓐᓇᕈᖅᐹᓪᓕᖅᐸᓪᓕᐊᔪᖅᐸᓘᓪᓗᑎᑦ ᐃᓱᒫᓗᒋᔭᐅᓕᖅᑐᑎᑦ.

ᐱᒋᐊᕐᖓᕐᓂᖏᓐᓂ 2019/20 ᓇᓐᓄᓐᓇᒥ, ᑭᖑᓂᖓᓂ ᑲᑎᒪᑎᑦᑎᖃᑦᑕᖅᑐᑎᑦ ᓄᓇᓂᓐᓄᓪᓗ ᑐᓴᖅᑐᑎᑦ, ᓄᓇᕗᒻᒥ ᑎᒍᓯᓕᓚᐅᖅᓯᒪᔪᑦ ᐊᐅᓚᑦᑎᔾᔪᑎᓂᒃ ᑕᐃᒫᒃ ᓄᓇᓕᓐᓂᑦ ᐱᔪᓐᓇᕐᓂᐊᕐᖓᑕ ᐊᑕᐅᓯᕐᒥᑦ ᐊᕐᓇᓪᓗᒻᒥ ᐊᑕᐅᓯᕐᒧᑦ ᐊᖑᓴᓪᓗᒻᒧᑦ (ᑖᒃᑯᐊ “ᐃᒪᐃᓕᖓᓕᕐᓗᑎᑦ 1:1 ᓇᓐᓄᑦᑕᐅᔪᓐᓇᖅᑐᑦ”). ᓄᓇᓖᑦ ᐅᖃᖅᑐᑎᑦ ᐃᓱᒫᓗᓐᓂᕋᖅᑐᑎᑦ 2:1−ᖑᑎᓪᓗᒋᑦ ᓇᓐᓄᑦᑕᐅᔪᓐᓇᖅᑐᑦ ᐱᔪᓐᓇᖅᑎᐅᖔᖅᑐᑎᒃ ᐊᕐᓇᓪᓗᐃᑦ ᐊᒥᓲᓗᐊᖅᑐᑦ ᐱᔭᐅᕙᓕᖅᑐᑎᑦ. ᐸᖅᑭᔭᐅᖏᓐᓇᕆᐊᓖᑦ ᑎᓯᖏᑦ ᐊᕐᓇᓪᓗᐃᓪᓗ ᐊᑎᖅᑕᓛᖏᑦ (ᐃᓚᒌᑦ ᑲᑎᒪᔪᑦ). ᑭᓯᐊᓂᓕ, ᖃᑦᑏᓐᓇᕈᖅᐹᓪᓕᕈᓐᓇᖅᑐᑦ ᑕᐃᒪᐃᑦᑐᓂᑦ ᐊᐅᓚᑦᑎᑎᓪᓗᒋᑦ ᐊᓯᔾᔨᖅᑕᐅᓂᖅᑲᑕ ᐊᒥᓱᕆᐊᖅᑕᐅᓗᑎᑦ ᐊᕐᓇᓪᓗᐃᑦ ᓇᓐᓄᑦᑕᐅᓂᖅᓴᐅᔪᓐᓇᕐᓗᑎᑦ. ᐊᑦᑐᐃᓂᖃᖅᑐᑦ ᐊᖑᓴᓪᓗᓐᓂ ᐊᕐᓇᓗᓂᓪᓗ ᐅᔾᔨᓱᖅᑕᐅᔪᓂᒃ.

ᐊᐅᓚᑕᐅᒍᓐᓇᕐᓂᖏᑦ ᓇᓐᓄᑦᑕᐅᕙᑦᑐᑦ

ᓇᓐᓄᑦᑕᐅᔪᓐᓇᖅᑐᑦ ᐊᐅᓚᑕᐅᒻᒪᑕ ᑲᓇᑕᒥ ᐊᓯᕙᖅᑕᐅᔪᓐᓇᖅᑐᓂᒃ, ᓚᐃᓴᔅᓯᖃᖅᑎᑕᐅᓪᓗᑎᑦ, ᑰᑕᖃᖅᑎᑕᐅᓪᓗᑎᑦ ᐅᕝᕙᓘᓐᓃᑦ ᐃᓱᖃᖅᑎᑕᐅᓪᓗᑎᑦ, ᓂᕕᖓᑖᓕᖅᓱᖅᑕᐅᓪᓗᑎᑦ, ᐅᓂᒃᑳᓕᐅᕆᐊᖃᖅᑐᑎᓪᓗ.

ᐃᓕᖅᑯᓯᐅᔪᑦ ᐊᐅᓚᑦᑎᓂᕐᒥᑦ ᓇᓐᓄᑦᑕᐅᔪᓐᓇᖅᑐᑦ ᒪᓕᑦᑐᑦ ᑲᓇᑕᒥ ᐊᕕᑦᑐᖅᓯᒪᔪᓂᒃ ᐅᑭᐅᖅᑕᖅᑐᒥᓘᓐᓃᑦ. ᓅᐸᓪᓛᒥ ᓛᐸᑐᐊᒥᓗ, ᓄᓇᑦᑎᐊᒥ, ᓄᓇᕗᒻᒥ ᔫᑳᒥᓗ, ᑲᑎᑦᑐᒋᑦ ᓇᓐᓄᑦᑕᐅᔪᓐᓇᖅᑐᑦ ᐊᒥᓲᓂᖅᐹᖑᔪᑦ ᑲᓇᑕᒥ, ᓇᓐᓄᑦᑕᐅᔪᓐᓇᖅᑐᑦ ᐊᐅᓚᑕᐅᔪᑦ ᐊᒥᓲᓂᖏᓐᓂ ᓇᓐᓄᑦᑕᐅᔪᓐᓇᖅᑐᑎᑦ ᓄᓇᓕᓐᓂᓪᓗ ᑰᑕᖃᖅᑐᑎᑦ ᐃᓚᖏᓐᓂ. ᑰᑕᐃᑦ ᕿᒥᕐᕈᔭᐅᓯᒪᔪᑦ ᐊᕐᕌᒍᑕᒫᕐᓗ ᓄᑕᔾᔨᖅᑕᐅᕙᑦᑐᑎᒃ ᑲᓇᑕᒥ ᐊᕕᑦᑐᖅᓯᒪᔪᓄᑦ ᐅᑭᐅᖅᑕᖅᑑᓪᓗ ᒐᕙᒪᒃᑯᖏᓐᓂᓪᓘᓐᓃᑦ. ᑰᑕᐃᑦ ᕿᒥᕐᕈᔭᐅᕙᑦᑐᑦ ᒪᓕᑦᑐᑦ ᓇᓗᓇᐃᖅᑕᐅᓯᒪᔪᓂᒃ ᐃᓕᖅᑯᓯᐅᔪᓂᒃ ᑐᓴᖅᓯᒪᔭᖏᓐᓂ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂ. ᐃᓄᐃ ᓇᓐᓄᐸᑦᑐᑦ ᐃᓱᒪᒋᔭᐅᔪ ᑰᑕᑎᒍᑦ: ᓄᓇᖃᖅᑳᖅᓯᒪᔪᑦ ᓇᓐᓄᑦᑐᑦ, ᐊᐅᓪᓚᕈᔾᔭᐅᓯᒪᙱᑦᑐᓂᑦ ᓇᓐᓄᑦᑐᒥᓃᑦ, ᖃᐅᔨᒪᔭᐅᔪᑦ ᒪᓕᒐᖅᑎᒍᑦ ᒪᓕᓐᓇᑎᑦ ᓇᓐᓄᑦᑐᒥᓃᑦ, ᓴᐳᒻᒥᔪᑦ ᐃᓅᓯᕐᒥᓂᒃ ᐱᖁᑎᒥᓂᓪᓗ. ᓈᓴᐅᑎᓕᖅᓱᖅᑕᐅᓯᒪᔪᑦ, ᐊᑐᓕᖅᑭᑦᑕᐅᔪᓐᓇᖏᑦᑐᑦ ᓂᕕᖓᑖᑦ ᐊᒥᖓᓃᑦᑐᑦ ᓇᓐᓄᑦᑕᒥᓂᕐᓂᑦ ᐃᑲᔪᕐᓂᖃᕈᓐᓇᖅᑐᑦ ᑰᑕᐃᑦ ᐊᑐᖅᑕᐅᑦᑎᐊᕐᓂᖏᓐᓂ. ᓂᕕᖓᑖᓕᒃᑯᑦ ᓇᓐᓄᑦᑐᐃᑦ ᑎᑎᕋᖅᑕᐅᓪᓗᑎᓪᓗ ᓅᑕᐅᓪᓗᑎᓪᓗ ᓇᒻᒥᓂᖃᖅᑐᓂᒃ ᐅᕝᕙᓘᓐᓃᑦ ᐊᓯᖏᓐᓂ ᑭᓪᓕᖏᓐᓃᓐᖔᖅᑐᓂᒃ ᐅᔾᔨᓱᖅᑕᐅᕙᒻᒪᑕ ᐆᒪᔪᑦ ᓇᓐᓄᑦᑕᐅᕙᑦᑐᑦ ᐊᕐᕌᒍᑕᒫᑦ ᑲᓇᑕᒥ ᐊᕕᑦᑐᖅᓯᒪᔪᓂᑦ ᐅᑭᐅᖅᑕᖅᑐᒥᓗ. ᓂᕕᖓᑖᑦ ᓇᓗᓇᐃᒃᑯᑎᖃᖅᑐᑦ ᐊᕐᓇᓪᓘᑉᐸᑦ ᐊᖑᓴᓪᓘᑉᐸᓪᓘᓐᓃᑦ ᐊᒻᒪᓗ ᐅᑭᐅᖏᓐᓂ ᓇᓄᐃᑦ.

ᓄᓇᕗᒻᒥ, ᑲᑎᑦᑐᒋᑦ ᓇᓐᓄᑦᑕᐅᔪᓐᓇᖅᑐᑦ ᐱᔭᐃᓐᓇᐅᖏᑉᐸᑕ, ᐱᔭᐅᓯᒪᙱᑦᑐᑦ ᑎᑎᕋᖅᑕᐅᓗᑎᑦ ᐊᑮᑦᑐᕈᑎᔅᓴᐅᙳᐊᓕᕋᔭᖅᑐᑦ ᐊᕐᕌᒍᒻᒧᑦ ᓄᑖᕐᒨᕐᓗᒋᑦ ᑕᐃᒫᒃ ᐅᖓᑖᓅᕈᔾᔨᒐᔭᙱᒻᒪᑕ ᓇᓐᓄᑦᑕᒥᓂᕐᓂᑦ ᖃᑦᑏᓐᓇᕈᖅᐹᓪᓕᖅᑕᐅᖁᓇᒋᑦ ᑰᑕᐃᑦ. ᑕᐃᒪᓕ, ᐊᑮᑦᑐᕈᑕᐅᓕᕐᓗᑎᑦ ᐊᕐᕌᒍᒧᑦ ᓄᑖᕐᒧᑦ, ᐊᖏᖅᑕᐅᖅᑳᕐᓂᖅᑲᑕ ᑭᓯᐊᓂ ᐊᕕᑦᑐᖅᓯᒪᔪᓄᑦ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᓐᓄᑦ, ᐊᒥᓲᓂᖅᓴᐅᓕᕐᓗᑎᑦ. ᐊᑮᑦᑐᕈᑎᙳᐊᑦ ᐊᒡᒍᑐᖅᓯᒪᔪᓂᒃ ᐊᒥᓱᕈᒃᑲᓂᕐᓗᑎᑦ ᓄᑖᓂᑦ ᑲᑎᑦᑐᒋᑦ ᓇᓐᓄᑦᑕᐅᔪᓐᓇᖅᑐᓂᒃ ᐃᓱᒪᓕᐅᕈᑕᐅᓚᐅᖅᑎᓪᓗᒋᑦ, ᐱᔭᐅᓯᒪᙱᑦᑐᓄᑦ ᑭᓯᐊᓂ 0−ᓖᖅᑲᑦ. ᐊᑮᑦᑐᕈᑎᔪᓂᒃ ᐋᖅᑮᓗᑎᑦ ᐅᔾᔨᓱᖅᑕᐅᖏᓐᓇᕐᓗᑎᑦ ᓇᓐᓄᑦᑕᐅᕙᑦᑐᑦ ᓄᓇᓕᓐᓂ ᖃᑦᑏᓐᓇᕈᖅᐹᓕᕐᓗᑎᑦ ᐊᑐᐃᓐᓇᖅᑕᖃᕋᓗᐊᖅᑎᓪᓗᒍ ᓂᕕᖓᑖᓂᑦ ᑕᐃᒫᒃ ᐅᓗᕆᐊᓇᖅᑐᒦᙱᓂᖅᓴᐅᒐᔭᕐᖓᑕ ᐊᕐᓇᓪᓗᐃᑦ ᐱᔭᐅᔪᓐᓇᖅᑐᑦ ᐱᓗᐊᖅᑐᒥᑦ ᑕᐃᑲᓂ ᐊᕐᕌᒍᒥ. ᑕᒪᒃᑯᐊᓗ ᐊᑮᑦᑐᕈᑏᑦ ᓇᓐᓄᑦᑕᒥᓂᕐᓄᑦ ᐊᑐᖅᑕᐅᔪᓇᖅᑐᑦ ᓴᐳᒻᒥᒋᐊᖃᖅᑐᓄᑦ ᓇᒻᒥᓂᖅ ᐃᓅᓯᕐᒥᓂᒥᒃ ᐱᖁᑎᖏᓐᓂᓪᓗ, ᐱᖃᓯᐅᔾᔭᐅᔪᑦ ᑲᑎᑦᑐᒋᑦ ᐆᒪᔪᖅᑕᐅᔪᓐᓇᖅᑐᓂᒃ.

ᓄᓇᕗᒻᒥ ᓇᓐᓄᑦᑕᐅᕙᑦᑐᓄᑦ ᑎᑎᕋᖅᑕᐅᕙᑦᑐᑦ ᐊᑮᑦᑐᕈᑏᓪᓗ ᐊᒦᓲᓂᕆᕙᑦᑕᖏᑦ (HACCS) ᕿᒥᕐᕈᔭᐅᓯᒪᓕᖅᑐᑦ ᒪᓕᖁᓪᓗᒋᑦ ᐊᓯᔨᐸᓪᓕᐊᔪᓄᑦ ᑖᒃᑯᓂᖓ 1:1 ᓇᓐᓄᑦᑕᐅᔪᓐᓇᖅᑐᓂᒃ. ᒫᓐᓇᓕᓴᕐᓂᑦ ᕿᒥᕐᕈᔭᕐᓂᑦ ᓄᓇᕗᒻᒥ ᓇᓐᓄᑦᑕᐅᕙᑦᑐᓄᑦ ᑎᑎᕋᖅᑕᐅᕙᑦᑐᑦ ᐊᑮᑦᑐᕈᑏᓪᓗ ᐊᒦᓲᓂᕆᕙᑦᑕᖏᑦ (HACCS) ᐊᖏᖅᑕᐅᓯᒪᔪᑦ ᕖᕝᕗᐊᕆᒥ 2022−ᒥ, ᑐᔅᓯᕋᓚᐅᖅᑐᑦ ᐊᕕᑦᑐᖅᓯᒪᔪᓂᒃ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᑐᔅᓯᕋᕐᓗᑎᑦ ᑲᑎᓯᒪᔪᓂᒃ ᐊᑮᑦᑐᕈᑎᓂᒃ ᐊᕐᕌᒎᓚᐅᖅᑐᒥᑦ ᐱᔭᐅᓐᓂᖏᑦᑐᓂᑦ ᑐᓂᔭᐅᑦᑕᐅᑎᒋᓗᑎᑦ ᓄᓇᕗᑦ ᐆᒪᔪᓕᕆᓂᕐᔪᐊᒃᑯᖏᓐᓄᑦ ᕿᒥᕐᕈᔭᐅᓂᐊᕐᖓᑕ ᐱᐅᖅᓱᐊᕈᑎᔅᓴᐅᓗᑎᑦ ᐃᓱᒫᓗᓇᖅᑐᒥᑦ ᐊᑮᑦᑐᕈᑎᖏᑦ ᑐᔅᓯᕋᐅᑕᐅᔪᑦ ᐅᖓᑖᓅᖓᓐᓂᖅᑲᑕ 25% ᐊᒡᒍᑐᖅᓯᒪᔪᓂᒃ ᑲᑎᑦᑐᒋᑦ ᐱᔭᐅᔪᓐᓇᖅᑐᓂᒃ.

ᐊᕕᑦᑐᖅᓯᒪᔪᓂᒃ ᒫᓂᑑᐸᒥ ᐊᓐᑎᐅᕆᔪᒥᓗ, ᓇᓄᐃᑦ ᐲᖅᑕᐅᓗᑎᑦ ᐃᓱᖃᕐᓂᖏᓐᓄᑦ ᐊᒻᒪᓗ ᓯᓚᑖᓅᕈᔾᔨᒍᓐᓇᕐᓂᖏᓐᓄᑦ ᓄᓇᓕᕐᔪᐊᓄᑦ ᐊᓯᐊᓄᑦ ᐱᔪᓐᓇᕆᐊᖃᙱᑦᑐᑦ.

ᑯᐸᒻᒥᓕ, ᓇᓐᓄᑦᑕᐅᕙᑦᑐᑦ ᐊᐅᓚᑕᐅᔪᑦ ᐊᖏᕈᑎᑎᒍᑦ ᓄᓇᖃᖅᑳᖅᓯᒪᔪᓂᒃ ᐊᒻᒪᓗ ᐊᕕᑦᑐᖅᓯᒪᔪᑦ ᑲᓇᑕᒥ ᒐᕙᒪᒃᑯᖏᓐᓂ. ᓯᔾᔭᒥ ᐊᐅᓚᑕᐅᓪᓗᑎᑦ ᐊᖏᕈᑎᑎᒍᑦ ᓄᓇᖃᖅᑳᖅᓯᒪᔪᓂᑦ, ᒐᕙᒪᑐᖃᒃᑯᓐᓂ, ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ. ᐅᓂᒃᑳᓕᐅᕆᐊᖃᖅᑐᑎᑦ ᓇᓐᓄᒌᖅᓯᒪᓕᖅᑲᑕ. ᑯᐸᐃᒻᒥ ᒪᓕᒐᖅᑎᒍᑦ ᐱᔅᓴᐃᓐᓇᕆᐊᖃᖅᑎᑕᐅᙱᑦᑐᑦ ᓄᓇᕗᒻᒥ ᐃᓄᐃᑦ ᐊᒻᒪᓗ ᐃᔫ ᐃᑦᓰ ᐃᖅᑭᓖᑦ (Eeyou Istchee Cree) ᐅᓂᒃᑳᓕᐅᕐᓗᑎᑦ ᓇᓐᓄᑦᑕᒥᓂᒃ, ᑭᓯᐊᓂᓕ ᑯᐸᐃᒃ ᒐᕙᒪᒃᑯᖏᑦ ᓄᐊᑦᑎᕙᑦᑐᑦ ᓇᓐᓄᑦᑕᒥᓂᕐᓂᑦ ᓂᕕᖓᑖᓂᓪᓗ ᑐᓂᓯᕙᑦᑐᑎᑦ 1985−ᒥᓂᑦ ᐊᓯᕙᖅᑏᑦ ᓂᐅᕐᕈᑎᖃᕈᓐᓇᖁᓪᓗᒋᑦ ᓄᓇᓕᕐᔪᐊᓪᓗ ᓯᓚᑖᓅᖅᑎᑦᑎᒍᓐᓇᕐᓗᑎᑦ ᓇᓄᕋᕐᓂᑦ. 2018−ᒥᓂᑦ, ᐃᔫ ᐃᒪᕐᒥᐅᑕᓕᕆᔨᒃᑯᑦ ᐆᒪᔪᓕᕆᔨᒃᑯᖏᑕ ᑲᑎᒪᔨᖏᑦ ᐱᓕᕆᖃᑎᖃᖃᑦᑕᑦᑐᑦ ᓯᓚᒃᑯᑦ ᐊᓪᓚᖓᔪᓂᒃ ᐆᒪᔪᕐᓂᐊᖅᑎᒃᑯᖏᓐᓂ ᐱᐅᓯᕚᓪᓕᑲᓐᓂᖁᓪᓗᒋᑦ ᐅᓂᒃᑳᓕᐅᖃᑦᑕᖁᓪᓗᒋᑦ ᓇᓐᓄᑦᑕᒥᓂᕐᓂᑦ ᐄᔪ ᐃᒪᖏᓐᓂ, ᐊᒻᒪᓗ ᑐᑭᓯᒋᐊᕈᑎᓂᒃ ᑐᓂᓯᒍᓐᓇᕐᓗᑎᑦ ᑲᓇᑕᒥ ᐊᕕᑦᑐᖅᓯᒪᔪᓂᒃ.

ᐅᐊᑦᑎᐊᕈᓕ ᑰᑕᖃᖃᑦᑕᓂᙱᑦᑐᑦ ᑯᐸᒻᒥ, ᑭᓯᐊᓂᓕ ᓇᓐᓄᒍᓐᓇᖅᑐᑦ ᖃᐅᔨᒃᑲᐃᓗᑎᑦ ᐊᒻᒪᓗ ᓂᕕᖓᑖᑦ ᓂᐅᕕᐊᖑᔪᓐᓇᖅᑐᑎᑦ ᓄᓇᖃᖅᑲᖅᓯᒪᙱᑦᑐᓄᑦ ᐊᐅᓪᓚᕈᔾᔭᐅᔪᓐᓇᕐᓗᑎᓪᓗ ᓄᓇᓕᕐᔪᐊᑉ ᓯᓚᑕᓄᑦ. ᐃᓱᖃᖅᑎᑕᐅᓕᖅᑐᑎᑦ 2016−ᒥ ᐃᓚᒋᔭᐅᓕᖅᑐᑎᑦ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᐊᒡᒍᑐᖅᓯᒪᔪᓂᒃ ᑯᐸᒻᒥ ᐃᓗᐊᓂ ᓄᓇᕗᑦ ᐃᒪᖏᓐᓂ, ᑭᓯᐊᓂᓕ ᐊᑐᓕᖅᑎᑕᐅᓂᖏᑦ ᐃᓱᖃᖅᑎᑕᐅᓂᖏᓐᓄᑦ ᐊᔅᓱᕉᑎᐅᖃᑦᑕᖅᑐᑦ. ᒪᓕᑦᑎᐊᓂᖅᓴᐅᓪᓗᑎᑦ ᐊᐅᓚᑦᑎᒍᑎᖃᓕᖅᑐᑦ ᐱᓕᕆᖃᑎᖃᖅᑐᑎᑦ ᐊᓯᖏᓐᓂ ᐊᕕᑦᑐᖅᓯᒪᔪᓂᒃ ᐅᑭᐅᖅᑕᖅᑐᒥᓗ, ᐅᓂᒃᑳᓕᐅᕆᐊᖃᖅᑐᑦ ᓇᓐᓄᑦᑐᑦ, ᐱᕙᓪᓕᐊᖏᓐᓇᖅᑐᖅ ᑕᒪᓐᓇ.

ᓇᓗᓇᐃᖅᓯᒪᓪᓚᕆᙱᒻᒪᑕ ᓇᓐᓄᒋᐊᖃᙱᑦᑐᑦ ᓇᓐᓄᑦᑐᒥᓃᑦ ᑲᓇᑕᒥ. ᒪᓕᑦᑐᑦ ᐊᒻᒪᓗ ᐱᐅᓂᖏᓐᓂ ᐅᓂᒃᑳᓕᐅᖅᑐᓂᒃ ᓇᓐᓄᑦᑕᒥᓂᕐᓂᑦ ᖁᕝᕙᓯᑦᑐᖅ, ᑲᓇᑕᒥ ᐊᕕᑦᑐᖅᓯᒪᔪᓂᒃ ᐅᑭᐅᖅᑕᖅᑐᒥᓗ ᐊᒻᒪᓗ ᓄᓇᖃᖅᑳᖅᓯᒪᔪᓂᒃ ᐱᔪᒪᔪᐃᓐᓇᐅᒻᒪᑕ ᐊᑯᓂᒧᑦ, ᐱᓗᐊᖅᑕᐃᓕᒪᖃᑦᑕᕐᓗᑎᓪᓗ. ᐅᑉᐱᕆᔭᐅᓂᖏᑦ ᓇᓐᓄᖃᑦᑕᖅᑐᓄᑦ ᐊᐅᓚᑦᑎᒍᑏᑦ ᖁᕝᕙᓯᑦᑐᑦ ᐃᓕᑦᑐᐸᓪᓕᐊᓂᐊᖅᑐᑎᓪᓗ ᐊᐅᓚᑦᑎᒍᑎᓂᒃ ᐊᐅᓚᑦᑎᓪᓚᕆᓪᓗᑎᑦ ᓇᓐᓄᖃᑦᑕᖅᑐᓂᒃ ᑲᒪᒍᓐᓇᕐᓂᖏᓐᓂ ᐊᒻᒪᓗ ᐊᓯᔾᔨᐸᓪᓕᐊᔪᓂᒃ.

ᓇᓐᓄᖃᑦᑕᕐᓂᖏᑦ ᐊᓯᔾᔨᐸᓪᓕᐊᓂᖏᑦ

ᐊᒥᓲᓂᖏᑦ ᓇᓐᓄᑦᑕᐅᕙᑦᑐᑦ ᑲᓇᑕᒥ ᐊᑖᓃᑦᑐᑦ ᑲᑎᑦᑐᒋᑦ ᓇᓐᓄᑦᑕᐅᔪᓐᓇᖅᑐᓂᒃ ᐊᒻᒪᓗ ᑕᒫᓂ ᐊᑯᓐᓂᖏᓐᓃᑦᑐᑦ 475 ᐊᒻᒪᓗ 650 ᓇᓄᐃᑦ ᐊᕐᕌᒍᑕᒫᑦ ᐅᑭᐅᓄᑦ 12−ᓅᖓᔪᓄᑦ, ᑕᒫᓂᖃᐃ ᐊᑯᓐᓂᖏᓐᓂ 3% ᐊᒻᒪᓗ 4% ᒥᔅᓴᐅᓴᑦᑕᐅᓯᒪᔪᓂᑦ ᐊᒥᓲᓂᖏᓐᓂ. ᑕᐃᒪᐃᒍᓐᓇᖅᑐᑎᓪᓗ ᐅᐊᑦᑎᐊᕈᕐᓂᓴᕐᓂᑦ ᒪᓕᑦᑕᐅᔪᓂᑦ ᐊᒥᓲᓗᐊᙱᑦᑐᓂᑦ ᓇᓐᓄᖃᑦᑕᕐᓗᑎᑦ 4.5% ᐊᕐᕌᖑᑕᒫᑦ ᐲᕐᓗᒋᑦ ᑖᒃᑯᓂᖓ 2:1 ᐊᖑᓴᓪᓗᐃᑦ ᐊᕐᓇᓪᓗᓂ ᓇᓐᓄᑦᑕᐅᔪᓐᓇᖅᑐᓂᒃ ᐊᒥᓲᓂᖏᓐᓂ.

ᑕᐃᒪᓕ, ᐅᖃᐅᓯᐅᓯᒪᔪᑦ ᓇᓐᓄᑦᑕᐅᓯᒪᔪᑦ ᑲᓇᑕᒥ 475 ᑕᕝᕙᓂ 2020-2021−ᒥ, ᓇᓐᓂᐊᕐᓇᐅᑎᓪᓗᒍ ᑐᑭᓯᒋᐊᕈᑏᑦ ᐊᑐᐃᓐᓇᐅᔪᑦ, ᐊᒻᒪᓗ ᖄᒃᑲᓐᓂᖓᒍᑦ 100−ᓂᒃ ᓇᓐᓄᑦᑐᖃᖅᓯᒪᒻᒥᔪᖅ ᑲᓇᑕᐅᑉ ᓯᓚᑖᓂ ᐊᒡᒍᑐᖅᓯᒪᓂᖏᓐᓂ ᐊᒻᒪᓗ ᑲᓇᑕ ᑲᑐᔾᔨᓂᖏᓐᓂ ᑲᓚᖡᑦ ᓄᓈᓂ ᐊᒻᒪᓗ ᒥᐊᓕᒐᐃᑦ ᓄᓇᖓᓐᓂ, ᓇᓐᓄᑦᑕᐅᓯᒪᔪᑦ ᑕᒪᓂᖃᐃ ᒥᔅᓴᐅᓴᑦᑕᐅᓯᒪᔪᑦ 3.3%−ᒥᑦ ᒥᔅᓴᐅᓴᑦᑕᐅᓯᒪᔪᑦ ᑲᑎᑦᑐᒋᑦ ᐊᒥᓲᓂᖏᑦ ᐅᖓᑖᓃᑦᑐᓂᒃ 17,000 ᓇᓄᕐᓂᑦ.

ᐅᑭᐅᓄ ᑕᓪᓕᒪᓄᑦ ᓇᓐᓄᑦᑕᐅᑎᓪᓗᒍ (2016-2021), ᑲᑎᑦᑐᒋᑦ ᐅᖃᐅᓯᐅᓯᒪᔪᑦ ᑲᓇᑕᒥ ᐊᓯᔾᔨᑕᖅᓯᒪᔪᑦ, ᑕᒫᓂᖃᐃ 475−ᒥᑦ 533−ᒧᑦ. ᓇᓐᓄᑦᑕᐅᓯᒪᔪᑦ ᖃᑦᑏᓐᓇᐅᓂᖅᓴᐅᓚᐅᕆᓪᓗᑎᑦ ᐅᑭᐅᖓᓐᓂ ᑕᓪᓕᒪᓂᒃ (2011-2016) ᑲᑎᑦᑐᒋᑦ ᓇᓐᓄᑦᑕᒥᓃᑦ ᐅᖃᐅᓯᒥᓃᑦ ᖃᑦᑏᓐᓇᕈᒃᑲᓂᑦᑕᕆᕗᑦ 637−ᒥᑦ 534−ᒧᑦ.

ᐊᒥᓲᓂᖏᑦ ᓇᓐᓄᑦᑕᐅᕙᑦᑐᓪᓗ ᐅᔾᔨᓱᖅᑕᐅᖃᑦᑕᕐᓂᖏᑦ

ᓇᓐᓄᑦᑕᐅᖃᑦᑕᖅᑐᑦ ᐊᒥᓲᓂᖏᑦ ᓄᐊᑕᐅᓪᓗᑎᑦ, ᒪᑯᐊᓗ ᐊᒡᒍᑐᖅᓯᒪᔪᓂᒃ, ᓇᒥᓗ ᓇᓐᓄᒻᒪᖔᑕ, ᖃᓄᐃᑦᑐᒥᓪᓗ ᐊᕐᓇᓪᓗᒃ ᐊᖑᓴᓪᓗᒥᓪᓘᓐᓃᑦ, ᐅᓪᓗᖓᓐᓂ, ᓂᕕᖓᑖᑉ ᓈᓴᐅᑎᖓ, ᐅᓪᓗᖓ (ᑭᒍᑕᐃᖅᑕᐅᓂᖓ ᐅᑭᐅᖏᑦ ᖃᐅᔨᓴᕐᓂᐊᕐᓗᒋᑦ) ᐊᒻᒪᓗ ᓇᓄᖅ ᐃᓚᖃᕐᓂᕐᒪᖔᖅ ᑲᓇᑕᒥ ᐊᕕᑦᑐᖅᓯᒪᔪᓃᑦᑐᓂᒃ ᐅᑭᐅᖅᑕᖅᑐᒥᓪᓘᓐᓃᑦ. ᐊᒥᓱᓂᖏᑦ ᖃᓄᐃᓕᖓᓂᖏᑦ ᐱᔭᐅᖃᑦᑕᑦᑐᑦ ᓇᑭᑐᐃᓐᓇᖅ ᒪᑯᓂᖓ ᓇᓗᓇᐃᒃᑯᓯᖅᑕᐅᓯᒪᔪᓂᒃ ᐱᔭᐅᓕᖅᑭᑦᑐᓂᑦ ᖃᐅᔨᓵᒃᑯᑦ (ᑎᒥᖓᓐᓂ ᐊᐅᖓᓐᓂᓪᓗ), ᖃᖓᑕᓲᒃᑯᑦ ᖃᐅᔨᓴᖅᑐᑎᑦ, ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ, ᓇᓐᓄᑦᑕᐅᕙᑦᑐᑦ ᑐᑭᓯᒋᐊᕈᑎᓂᒃ, ᐊᒻᒪᓗ ᐊᒥᓲᓂᖏᑦ ᐊᔾᔨᒌᖃᑦᑕᖏᓐᓂᖏᓐᓂ ᖃᐅᔨᓴᖅᑕᐅᔪᓂᒃ (ᑭᓪᓕᓯᓂᐊᖅᑕᐅᓯᒪᔪᓂᒃ ᐊᑐᖅᑕᖏᓐᓂ). ᑖᒃᑯᐊ ᐊᒥᓲᓂᖏᑦ ᒥᔅᓴᐅᓴᑦᑕᐅᖃᑦᑕᖅᓯᒪᔪᑦ, ᑐᑭᓯᒋᐊᕈᑏᓪᓗ ᓄᐊᑕᐅᓯᒪᔪᑦ ᓱᓕ ᑲᔪᓰᓐᓇᖅᑐᑦ ᐊᑐᓕᖅᑎᑦᑎᕙᓐᓂᖏᓐᓄᑦ ᓇᓐᓄᑦᑕᐅᕙᑦᑐᓂᒃ ᐊᐅᓚᑕᐅᔪᓂᒃ, ᐅᔾᔨᓱᖃᑦᑕᕐᓂᖏᓐᓂᓪᓗ ᐊᒡᒍᑐᖅᓯᒪᔪᓃᑦᑐᓂᒃ ᖃᓄᐃᓕᖓᓕᕐᓂᖏᓐᓂ ᐊᓯᔾᔨᑕᕐᓂᖏᓐᓂᓪᓗ, ᐊᒻᒪᓗ ᓇᓐᓄᑦᑕᐅᕙᑦᑐᑦ ᐊᒥᓲᓂᖏᑦ ᓈᒻᒪᒃᑲᓗᐊᕐᒪᖔᑖ.

ᐅᔾᔨᓱᖅᑐᒋᑦ ᐊᖏᔪᐊᓗᐃᑦ ᓂᕿᑐᖅᑏᑦ ᐊᖏᔪᐊᓗᒻᒥ ᓄᓇᒥ ᑲᓇᑕᐅᑉ ᐅᑭᐅᖅᑕᖅᑐᖏᓐᓂ ᐱᔭᕆᐊᑐᔪᐊᓗᒃ. ᐊᕐᕌᒍᒐᓚᓐᓄᑦ ᐸᕐᓇᐅᒋᐊᖃᕐᖓᑦ ᑐᑭᒧᐊᑦᑎᐊᕈᒪᓗᒋᑦ ᑲᓇᑕᒥ ᐊᒻᒪᓗ ᐱᓕᕆᓂᐊᖅᓯᒪᔭᑦᑎᓐᓂ ᐱᐅᖅᓱᐊᕆᐊᖃᑐᐃᓐᓇᕆᐊᖃᕐᓂᑎᓐᓂ. ᐅᔾᔨᓱᐃᓐᓇᖅᑕᕗᑦ ᐊᒻᒪᓗ ᖃᖓᒃᑯᑦ ᐅᔾᔨᖅᓱᕆᐊᖃᕐᓂᑎᓐᓂ ᒪᓕᑦᑐᑦ ᐊᒥᓱᓂᒃ ᒪᑯᓂᖓ ᖃᓄᖅ ᐅᔾᔨᓱᕐᓂᐊᕐᒪᖔᑦᑕ, ᐊᐅᓚᑦᑎᒍᑎᔅᓴᓂᑦ ᑐᕌᒐᕐᓂᑦ, ᐱᐅᖅᓱᐊᓂᕐᒧᑦ ᐃᓱᒫᓘᑏᑦ, ᐅᑭᐅᖏᑦ ᐱᐅᓂᖏᓪᓗ ᐊᑐᐃᓐᓇᐅᔪᑦ ᑐᑭᓯᒋᐊᕈᑏᑦ, ᐊᓯᖏᓪᓗ ᖃᐅᔨᓴᕐᓂᕐᒧᑦ ᑐᕌᒐᐃᑦ.

ᐊᒡᒍᑐᖅᓯᒪᔪᓂᒃ ᖃᐅᔨᓴᕐᓂᕐᒥᑦ “ᖃᑦᑏᓐᓇᕈᖅᐹᓪᓕᑐᐃᓐᓇᕆᐊᓕᓐᓂᒃ” ᖃᐅᔨᓴᖅᑎᒻᒪᕇᑦ ᖃᐅᔨᓴᕐᓂᖏᓐᓂ 2022 ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC) ᐅᓂᒃᑳᑦ (ᕿᑭᖅᑖᓘᑉ ᐃᑭᕋᓴᖓ (Davis Strait)), ᓂᒋᐊᓂ ᐅᐊᓕᓂᐅᑉ ᑕᕆᐅᖓ (Southern Beaufort Sea), ᓂᒋᐊᓂ ᑲᖏᖅᑐᐊᓘ ᐃᒪᖓᓐᓂ (Southern Hudson Bay), ᐊᒻᒪᓗ ᐅᐊᓐᓇᖓᓂ ᑲᖏᖅᑐᐊᓗᑉ ᐃᒪᖓᓐᓂ (Western Hudson Bay)), ᑲᓇᑕᒥ ᖃᐅᔨᓴᖅᑎᒻᒪᕇᑦ ᐱᔪᓐᓇᕐᓂᖏᑦ ᐅᔾᔨᓱᐃᓐᓇᕐᓂᐊᖅᑐᑦ ᖃᓄᓕᒫᑦᑎᐊᖅ ᓇᓐᓄᑦᑕᐅᕙᑦᑐᓂᒃ ᐊᐅᓚᑦᑎᓂᕐᒥᓪᓗ.

ᐱᔾᔪᑎᖏᑦ ᐃᑲᔫᑎᔅᓴᐃᓪᓗ ᓇᓐᓄᓂᕐᒧᑦ

ᐊᐅᓚᑦᑎᑦᑎᓂᐊᕐᓂᖅ ᓇᓄᕐᓂᑦ ᑲᓇᑕᒥ ᑐᕌᒐᕆᔭᐅᔪᑦ ᒐᕙᒪᒃᑯᓐᓂ, ᐊᐅᓚᑦᑎᖃᑎᖃᖅᑐᑦ ᑎᒥᐅᓪᓗᑎᑦ, ᐊᓯᕙᖅᑐᓂᓪᓗ. ᓄᖑᓴᑦᑕᐃᓕᑦᑎᐊᕐᓗᒋᑦ ᐊᑯᓂᒧᑦ ᓇᓐᓄᑦᑕᐅᕙᑦᑐᑦ ᒪᓕᑦᑐᑦ ᓂᕐᔪᑎᓂᒃ ᐊᒥᓲᓂᖏᓐᓂ ᓴᖅᑭᔮᖅᑎᑦᑎᖃᑦᑕᕆᐊᖃᕐᓂᖏᑦ ᐱᑦᑎᐊᖃᑦᑕᕆᐊᖃᕐᓂᖏᓐᓂ ᓇᓄᕐᓂᑦ ᓇᔪᒐᖏᓐᓂᓪᓗ. ᑕᐃᒪᓕ, ᐊᓯᕙᖅᑏᑦ ᐃᑲᔪᖅᑐᐃᒻᒪᑕ ᐃᓅᓇᓱᐊᕐᓂᕐᒥᑦ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᓂᒃ ᐊᒻᒪᓗ ᐃᑲᔪᖃᑦᑕᖅᑐᑦ ᐱᐅᖅᓱᐊᖅᑕᐅᒋᐊᖃᕐᓂᖏᓐᓂ ᓇᓄᐃᑦ ᐊᒻᒪᓗ ᐃᓄᓐᓂᒃ ᐊᑲᐅᙱᓕᐅᕈᑎᖃᕋᓱᐊᙱᓂᕐᒥᑦ. ᑕᒪᒃᑯᐊ ᑕᐅᖅᓰᓂᕐᒧᑦ ᐱᔾᔪᑕᐅᔪᑦ ᐱᒻᒪᕆᐅᒻᒪᑕ ᐱᓕᕆᖃᑎᖃᖃᑦᑕᕐᓗᑎᑦ ᓄᓇᓕᓐᓂ ᓄᖑᑦᑕᐅᕙᓪᓕᐊᒐᓱᙱᓪᓗᑎᑦ ᓇᓐᓄᑦᑕᐅᖃᑦᑕᖅᑐᑦ ᑕᐃᒫᒃ ᐃᓕᖅᑯᓯᖃᕐᓗᑎᑦ.

ᐃᓚᖏᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖃᕐᖓᑕ ᐊᓯᕙᕈᓐᓇᕐᓗᑎᑦ, ᐃᑲᔫᑎᖃᕐᓗᑎᓪᓗ ᐊᓯᕙᖅᑕᒥᓂᒃ ᓇᓄᕋᕐᓄᑦ, ᓂᕿᓄᑦ, ᐱᖅᑯᓯᑐᖃᕐᒥᑎᒍᑦ ᖃᓄᐃᓘᕐᓗᑎᑦ ᐊᐅᓪᓚᕈᔾᔨᓗᑎᓪᓗ ᑮᓇᐅᔭᓕᐅᕈᓐᓇᕐᖓ. ᓄᓇᕗᒻᒥ ᓄᓇᑦᑎᐊᒥᓗ, ᐃᓚᖏᑦ ᓂᕕᖓᑖᑦ ᑐᓂᔭᐅᖃᑦᑕᕐᖓᑕ ᓄᓇᖃᖅᑳᖅᓯᒪᙱᑦᑐᓄᑦ ᐊᐅᓪᓚᕈᔾᔨᓂᐊᖅᑐᓄᑦ ᑭᓯᐊᓂ ᐃᓚᖃᑐᐊᖅᑲᑕ ᓄᓇᖃᖅᑳᖅᓯᒪᔪᒥᑦ ᐱᖅᑯᓯᕐᒥᓂᑦ ᐊᑐᕐᓗᑎᑦ ᐊᓯᕙᖅᓯᒪᓗᑎᑦ. ᑕᐃᒫᒃ, ᐊᒥᓱᓂᖅᓴᓂᑦ ᑮᓇᐅᔭᓕᐅᕈᓐᓇᒥᒻᒪᑕ ᖃᓄᐃᓘᖅᑎᑦᑎᓪᓗᒋᑦ ᐅᑭᐅᖅᑕᖅᑐᒥ ᓄᓇᖃᖅᑲᖅᓯᒪᔪᑦ ᓄᓇᓕᖏᓐᓂ ᑮᓇᐅᔭᓕᐅᕈᑎᖃᑦᑎᐊᙱᑦᑐᓂᑦ ᐊᑭᖏᓐᓂᓪᓗ ᐊᐅᓚᔾᔪᑎᓄᑦ ᐊᑭᓕᖅᑕᐅᓗᑎᑦ.

ᓇᓐᓂᐊᕐᓂᖅᑐᑦ ᓴᐳᒥᓂᖏᓐᓄᓪᓗ ᓇᓐᓄᑦᑐᑦ ᐱᒻᒪᕆᐅᒻᒥᔪᑦ ᑐᑭᓯᒋᐊᖃᕐᖓᑕ ᓇᒥ ᓇᓐᓄᑦᑕᐅᓂᕐᒪᖔᑕ, ᐃᖏᕐᕋᓂᖏᑦ, ᖃᓄᐃᑦᑑᓂᖓ, ᓂᕆᕙᑦᑕᖏᑦ, ᓱᕈᓐᓇᖅᑐᖃᕐᓂᖏᑦ ᐊᓯᖏᓐᓂᓪᓗ ᖃᓄᐃᑦᑑᓂᖏᓐᓂ ᓇᓄᐃᑦ ᐊᒡᒍᑐᖅᓯᒪᔪᓃᓐᖔᖅᑐᑦ ᐊᑐᐃᓐᓇᐅᙱᑐᐃᓐᓇᕆᐊᖃᕐᒥᒻᒪᑕ. ᓇᓐᓄᑦᑐᒥᓂᕐᓂᑦ ᑐᑭᓯᔭᐅᒋᐊᖃᕐᖓᑕ ᐱᔭᐅᒐᔪᑦᑐᓂᒃ ᖃᐅᔨᓴᕐᓂᕐᒧᑦ ᑐᑭᓯᒍᑕᐅᒻᒪᑕ ᐊᓯᖏᓐᓄᓪᓗ ᖃᐅᔨᓴᐅᑎᓄᑦ. ᐱᒻᒪᕆᐅᒻᒥᒻᒪᑕ ᓄᓇᖃᖅᑳᖅᓯᒪᔪᓄᑦ ᐃᓚᓕᐅᑎᓯᒪᓂᖏᓐᓄᑦ ᐊᐅᓚᑦᑎᓂᕐᒥᑦ ᐊᕕᑦᑐᖅᓯᒪᔪᓂᒃ ᓄᓇᓕᓐᓂᑦ, ᐊᐅᓚᑦᑎᑦᑎᐊᕈᓐᓇᖅᑐᑎᑦ ᓴᙵᑎᒃᑲᓐᓂᕈᓐᓇᖅᑐᑦ ᐊᐅᓚᑦᑎᓂᖏᓐᓂ.

ᐸᖅᑭᑦᑎᓂᖅ ᓇᓐᓂᐊᓂᕐᒥᑦ

ᐃᓕᑦᑐᕆᐊᖃᕐᓂᖏᓐᓂ ᐊᐅᓚᑦᑎᓂᐅᔪᑦ ᒫᓐᓇ ᐊᑐᖅᑕᐅᓕᖅᑐᑦ ᓇᓐᓄᑦᑕᐅᕙᑦᑐᓂᒃ ᐊᐅᓚᑦᑎᒍᑎᓂᒃ ᑲᓇᑕᒥ ᐊᑑᑎᖃᑦᑎᐊᓂᖅᓴᐅᓕᖅᑐᑦ ᐅᖓᑖᓅᓗᐊᖅᑐᐊᓗᒃ ᓇᓐᓄᖃᑦᑕᕈᓐᓃᓂᖅᓴᐃᑦ. ᐱᔪᓐᓇᖏᑦᑎᑕᐅᒍᓐᓇᕐᒥᔪᑦ ᑕᐃᒪᐃᒋᐊᖃᖅᑲᑕ ᐊᒻᒪᓗ ᒪᓕᓪᑎᑦ ᓄᓇᓕᓐᓂᑦ ᐃᓱᒪᓕᐅᖃᑕᐅᓗᑎᑦ. ᐊᒻᒪᓗ, ᓇᓐᓄᖅᑕᐅᒍᓐᓇᖅᑐᑦ ᓇᒦᓐᓂᖏᓐᓂ, ᑭᓯᐊᓂᓕ ᑭᓪᓕᖏᑦ ᐊᐅᓚᑕᐅᑦᑎᐊᕆᐊᓖᑦ ᓇᓗᓇᐃᑦᑕᐅᑦᑎᐊᕐᓗᑎᑦ ᓇᓪᓕᐊᓐᓂ ᑭᓪᓕᖓᓐᓂ ᐱᔭᐅᒻᒪᖔᑕ ᐱᐅᖅᓱᐊᓂᕐᒧᑦ ᐱᔪᑦ. ᑖᒃᑯᐊ ᐊᓐᓂᔾᔭᐅᓂᐊᕐᓂᖏᓐᓂ ᓄᓇᓕᕐᔪᐊᑉ ᐊᐅᓚᑦᑎᔾᔪᑕᐅᔪᑦ. ᐊᑎᖅᑕᐃᑦ, ᐊᕐᓇᓪᓗᐃᓪᓗ ᐊᑎᖅᑕᓖᑦ ᑎᓯᓕᐅᖅᑐᑦ ᐅᕝᕙᓘᓐᓃᑦ ᑎᒥᓃᑦᑐᓂᑦ ᓇᓐᓄᒋᐊᖃᙱᑦᑐᑦ, ᑭᓯᐊᓕ ᓄᓇᖃᖅᑳᖅᑐᒥᓂᑦ ᐱᔪᓐᓇᖅᑐᑦ ᑕᐃᒫᒃ ᓄᓇᕗᒻᒥ ᐊᒻᒪᓗ ᓇᓗᓇᐃᖅᓯᒪᔪᓂᑦ ᐊᓐᑎᐅᕆᔪᒥᑦ, ᐅᕝᕙᓘᓐᓃᑦ ᓴᐳᒻᒥᒋᐊᖃᖅᑲᑕ ᐃᓅᓯᕐᒥᓂᒃ ᐱᖃᑎᒥᓂᓪᓘᓐᓃᑦ, ᑖᒃᑯᐊ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᖃᐅᔨᓴᖅᑎᒻᒪᕇᑦ ᐱᔪᓐᓇᕐᓂᖏᑦ ᐅᖃᐅᔾᔨᒋᐊᕐᓗᑎᑦ ᑕᐅᖅᓰᖁᔨᓇᑎᑦ ᐊᑎᖅᑕᓂᑦ (ᓇᓄᐃᑦ ᐅᑭᐅᖃᙱᑦᑐᑦ ᓱᓕ) ᐊᓈᓇᖏᓐᓂ ᐊᑎᖅᑕᓛᓐᓂᓪᓗ.

ᑐᑭᓯᒋᐊᕈᑎᔅᓴᑲᓐᓃᑦ:

ᓇᓄᓕᕆᒻᒪᕇᑦ ᑲᑎᒪᔨᕋᓛᖏᑦ (PBTC). 2022. 2022 ᓇᓄᓕᕆᓂᕐᒧᑦ ᐱᓕᕆᔨᒻᒪᕇᑦ ᑲᑎᒪᔨᕋᓛᖏᑦ ᖃᓄᐃᓕᖓᓕᕐᓂᖏᓐᓂ ᑎᑎᕋᖅᓯᒪᔪᑦ ᐃᑲᔪᖅᑐᐃᔾᔪᑏᓪᓗ. ᖃᕋᓴᐅᔭᒃᑯᑦ ᐅᕙᙵ ᑕᑯᔭᔅᓴᑦ : Les sous-populations d’ours blancs au Canada.

ᑰᐳ, E.W.T. 2022. ᕿᒥᕐᕈᓂᖏᑦ ᖃᐅᔨᓴᕐᓂᖏᓪᓗ ᑲᓇᑕᒥᐅᑕᐃᑦ ᑕᐅᖅᓰᓂᕐᒧᑦ ᓇᓄᕐᓂᑦ ᑕᐃᑲᙵᑦ 2012–2021. ᐊᕙᑎᓕᕆᓂᖅ ᓯᓚᓪᓗ ᐊᓯᔾᔨᕐᓂᖏᓐᓂ ᑲᓇᑕᒥ, ᐋᑐᕚ, ᑲᓇᑕ, 98 ᒪᑉᐱᒐᖅ. ᖃᕋᓴᐅᔭᒃᑯᑦ ᐅᕙᙵ ᑕᑯᔭᔅᓴᑦ : Review and Analysis of Canadian Trade in Polar Bears from 2012–2021 (seulement en anglais).

ᓇᓗᓇᐃᖅᓯᒪᔪᑦ 1: ᐱᖁᔭᐃᑦ, ᐊᑐᐊᒐᐃᑦ ᐊᖏᕈᑏᓪᓗ ᓇᓄᓕᕆᓂᕐᒨᖓᔪᑦ ᑲᓇᑕᒥ ᐊᕕᑦᑐᖅᓯᒪᔪᓂᑦ ᐅᑭᐅᖅᑕᖅᑐᒥᓗ, ᑲᓇᑕᒥ ᓯᓚᕐᔪᐊᒥᓗ.

ᒫᓂᑑᐸ

ᓂᕐᔪᑎᓕᕆᓂᕐᒧᑦ ᐱᖁᔭᑦ (1987)

ᓇᓄᕐᓂᑦ ᐸᖅᑭᑦᑎᓂᕐᒧᑦ ᐱᖁᔭᑦ (2002)

ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ ᐊᕙᑎᑦᑎᓂᓪᓗ ᐱᖁᔭᖅ (1990)

ᓅᐸᓪᓚᑦ ᓛᐸᑐᐊᓗ

ᓂᕐᔪᑏᑦ ᐃᓅᓯᖏᓐᓂ ᐱᖁᔭᑦ (1990)

ᓂᕐᔪᑏᑦ ᐃᓅᓯᖏᓐᓄᑦ ᒪᓕᒐᐃᑦ ᒪᓕᑦᑐᒋᑦ ᓂᕐᔪᑏᑦ ᐃᓅᓯᖏᓐᓂ ᐱᖁᔭᕐᓂᑦ (1996)

ᓅᐸᓪᓚᑦ ᓛᐸᑐᐊᓗ ᒪᓕᒐᖓ 26/07 (ᓇᓐᓄᓇᖅᓯᑎᓪᓗᒍ, ᓛᐸᑐᐊ, ᐊᑖᓃᑦᑐᓂᒃ ᓂᕐᔪᑏᑦ ᐃᓅᓯᖏᓐᓂ ᒪᓕᒐᕐᓂᑦ ᐊᒻᒪᓗ ᓂᕐᔪᑏᑦ ᐃᓅᓯᖏᓐᓂ ᐱᖁᔭᕐᓂᑦ) (2007)

ᓛᐸᑐᐊ ᐃᓄᐃᑦ ᓄᓇᑖᕈᑎᖓᑦᑕ ᐊᖏᕈᑎᖓ

ᓄᓇᑦᑎᐊᖅ

ᓂᕐᔪᑎᓕᕆᓂᕐᒧᑦ ᐱᖁᔭᑦ

ᓂᕐᔪᑎᓄᑦ ᐱᖁᔭᖅ ᐊᖏᔫᑎᓂᒃ ᐆᒪᔪᕋᓱᑉᐸᑦᑐᓄᑦ ᒪᓕᒐᐃᑦ

ᓂᕐᔪᑏᑦ ᐅᓗᕆᐊᓇᖅᑐᒦᓐᓂᕐᒧᑦ (NWT) ᐱᖁᔭᖓ (2009)

ᐃᓅᕕᐊᓗᐃᑦ ᐊᒃᓛᕕᒃ ᐆᒪᔪᕐᓂᐊᖅᑎᒃᑯᑦ ᑲᑎᒪᔨᕋᓛᖏᑦ ᒪᓕᒐᖏᑦ

ᐃᓅᕕᐊᓗᐃᑦ ᐃᓅᕕᒃ ᐆᒪᔪᕐᓂᐊᖅᑎᒃᑯᑦ ᑲᑎᒪᔨᕋᓛᖏᑦ ᒪᓕᒐᖏᑦ

ᐃᓅᕕᐊᓗᐃᑦ ᓴᒃᔅ ᕼᐊᐳ (Sachs Harbour) ᐆᒪᔪᕐᓂᐊᖅᑎᒃᑯᑦ ᑲᑎᒪᔨᕋᓛᖏᑦ ᒪᓕᒐᖏᑦ

ᐃᓅᕕᐊᓗᐃᑦ ᐅᓗᖅᕼᐊᒃᑑᒥᐅᑦ (Olokhaktomiut) ᐆᒪᔪᕐᓂᐊᖅᑎᒃᑯᑦ ᑲᑎᒪᔨᕋᓛᖏᑦ ᒪᓕᒐᖏᑦ

ᐃᓅᕕᐊᓗᐃᑦ ᑐᒃᑑᔭᒃᑯᖅ ᐆᒪᔪᕐᓂᐊᖅᑎᒃᑯᑦ ᑲᑎᒪᔨᕋᓛᖏᑦ ᒪᓕᒐᖏᑦ

ᐃᓅᕕᐊᓗᐃᑦ ᐸᐅᓚᑐᖅ ᐆᒪᔪᕐᓂᐊᖅᑎᒃᑯᑦ ᑲᑎᒪᔨᕋᓛᖏᑦ ᒪᓕᒐᖏᑦ

ᐅᐊᓕᓂᖅ ᐅᑭᐅᖅᑕᖅᑐᒥ ᓄᓇᑖᕈᑎᒃ − ᐃᓅᕕᐊᓗᐃᑦ ᑭᖑᓪᓕᖅᐹᒥ ᐊᖏᕈᑎᒃ (ᐊᓯᔾᔨᖅᓯᒪᔪᓪᓗ)

ᐆᒪᔪᕐᓂᐊᖅᑎᒃᑯᑦ ᑲᑎᒪᔨᕋᓛᖏᑦ ᒪᓕᒐᖏᑦ–ᐃᓄᑉᐱᐊᑦ ᓇᓄᓕᕆᓂᕐᒧᑦ ᐊᖏᕈᑎᒃ ᓂᒋᐊᓂ ᐅᐊᓕᓂᕐᒥᐅᑦ ᑕᕆᐅᖓ (2011, ᐃᓇᖐᔪᖅ 1988)

ᓇᓄᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᐊᖏᕈᑏᑦ ᐱᖓᓐᓇᖓᓄᑦ ᐅᐊᓕᓂᕐᒥᐅᑦ ᑕᕆᐅᖓᓂ ᐊᒻᒪᓗ

Viscount-ᐃᓗᐃᓪᓕᕐᒥ ᓇᓄᑦᑕᓕᒻᒥᑦ—ᐊᑯᓐᓂᖏᓐᓂ ᐃᓄᐃᑦ ᕿᑎᕐᒥᐅᓂᑦ ᐅᐊᓕᓂᕐᒥᑦ ᓄᓇᕗᒻᒥ ᐃᓅᕕᐊᓗᐃᓪᓗ (2006)

ᐃᓅᕕᐊᓗᐃᑦ ᓇᓄᓕᕆᓂᕐᒧᑦ ᑲᑐᔾᔨᓪᓗᑎᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᖏᑦ (2017)

ᓄᓇᕗᑦ

ᓂᕐᔪᑎᓕᕆᓂᕐᒧᑦ ᐱᖁᔭᑦ (2005)

ᐊᓯᕙᕐᓂᕐᒧᑦ ᒪᓕᒐᐃᑦ

ᓇᓐᓄᑦᑕᐅᔪᓐᓇᖅᑐᑦ ᑲᑎᑦᑐᒋᑦ ᑎᓕᔭᐅᔾᔪᑎ (R-011-2005) (ᐊᓯᔾᔨᖅᓯᒪᔪᓪᓗ)

ᓄᓇᕗᒻᒥ ᓇᓄᓕᕆᖃᑕᐅᓂᖅ ᐸᕐᓇᐅᑏᑦ (2019)

ᖃᐅᔨᒪᔭᐅᒋᐊᓕᒃ: ᐊᐅᓚᑦᑎᖃᑎᒌᓐᓂᕐᒧᑦ ᐸᕐᓇᐅᑏᑦ ᐃᓇᖐᔪᖅ ᐊᖏᖃᑎᒌᒍᑕᐅᓯᒪᔪᒥᑦ ᓴᖅᑭᖅᑕᐅᓚᐅᖅᓯᒪᔪᓂᒃ ᐊᑐᓂ ᓇᓄᕐᓄᑦ ᐊᒡᒍᑐᖅᓯᒪᔪᓄᑦ ᑭᖑᓂᖓᓂ ᓴᖅᑭᖅᑕᐅᓪᓗᑎᑦ ᓄᓇᕗᑦ ᑖᒃᑯᓂᖓ ᓄᓇᕗᑦ ᐊᕙᑎᓕᕆᔨᒃᑯᓐᓂ ᐊᒻᒪᓗ ᐊᕕᑦᑐᖅᓯᒪᔪᓂᒃ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ ᐊᒻᒪᓗ ᐆᒪᔪᕐᓂᐊᖅᑎᒃᑯᑦ ᑲᑐᔾᔨᖃᑎᒌᖏᓐᓂ, ᐊᐅᓚᑦᑎᒍᑕᐅᓂᐊᖅᑐᓂᒃ ᐊᓯᕙᕐᓂᕐᒧᑦ ᐊᐅᓚᑦᑎᓂᕐᒧᓪᓗ.

ᓄᓇᕗᑦ ᓇᓐᓄᒐᓱᐊᕐᓂᕐᒧᑦ ᐊᐅᓚᑕᐅᔪᑦ ᐃᓕᓴᕆᔭᐅᓂᖏᓪᓗ ᑐᓂᐅᖅᑲᖅᑕᐅᖃᑦᑕᕐᓂᖏᓐᓂ ᑐᓴᕈᑎᑦ (ᑎᑭᑦᑐᒍ 1:1 ᓇᓐᓄᑦᑕᐅᔪᓐᓇᖅᑐᓂᒃ). ᒫᓐᓇᓕᓴᐅᓂᖅᓴᖅ ᐊᖏᖅᑕᐅᓚᐅᖅᓯᒪᔪᖅ ᕖᕝᕗᐊᕆᒥ 2022.

ᓇᓄᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᐊᖏᕈᑏᑦ ᐱᖓᓐᓇᖓᓄᑦ ᐅᐊᓕᓂᕐᒥᐅᑦ ᑕᕆᐅᖓᓂ ᐊᒻᒪᓗ

Viscount-ᐃᓗᐃᓪᓕᕐᒥ ᓇᓄᑦᑕᓕᒻᒥᑦ—ᐊᑯᓐᓂᖏᓐᓂ ᐃᓄᐃᑦ ᕿᑎᕐᒥᐅᓂᑦ ᐅᐊᓕᓂᕐᒥᑦ ᓄᓇᕗᒻᒥ ᐃᓅᕕᐊᓗᐃᓪᓗ (2006)

ᓄᓇᕗᑦ ᓄᓇᑖᕈᑎᖓᑕ ᐊᖏᕈᑎᖓ (ᐊᓯᔾᔨᖅᓯᒪᔪᓪᓗ)

ᐋᓐᑎᐅᕆᔪ

ᐃᖃᓗᐃᑦ ᓂᕐᔪᑏᓪᓗ ᐱᐅᖅᓱᐊᖅᑕᐅᓂᕐᒧᑦ ᐱᖁᔭᐃᑦ (1997)

ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ ᐱᖁᔭᖅ (2007)

ᐊᓐᑎᐅᕆᔪ ᓇᓄᕐᓂᑦ ᐊᒥᓱᕈᖅᑎᑦᑎᑲᓐᓂᕋᓱᐊᕐᓂᕐᒧᑦ ᐸᕐᓇᐅᑎ (2011)

ᑯᐸᒃ

ᐱᖁᔭᑦ ᐊᓯᕙᕐᓂᕐᒧᑦ ᐃᖃᓗᒐᓱᐊᕐᓂᒧᓪᓗ ᐱᔪᓐᓇᐅᑎᖏᑦ ᔭᐃᒻᔅ ᐸᐃᒥ ᓄᑖᕐᒥᓪᓗ ᑯᐸᒻᒥ

ᐱᖁᔭᑦ ᐱᐅᖅᓱᐊᓂᕐᒧᑦ ᐱᕙᓪᓕᐊᒐᓱᐊᕐᓂᒧᓪᓗ ᓂᕐᔪᑎᓕᕆᓂᕐᒥᑦ (2002)

ᓇᓄᓕᕆᓂᕐᒧᑦ ᒪᓕᒐᐃᑦ (1984)

ᔭᐃᒻᔅ ᐸᐃ ᐊᒻᒪᓗ ᑯᐸᐃ ᑕᕐᕋᖓᓐᓂ ᐊᖏᕈᑎ ᐊᒻᒪᓗ ᑕᐃᒪᐃᓪᓗᐊᖅᑎᑦᑎᓂᕐᒧᑦ ᐊᖏᕈᑏᑦ

ᐊᖏᕈᑏᑦ ᐊᑐᓕᖅᑎᑦᑎᓂᕐᒧᑦ ᔭᐃᒻᔅ ᐸᐃᒥ ᐊᒻᒪᓗ ᑯᐸᐃᒃ ᑕᕐᕋᖓᓐᓂ ᐊᖏᕈᑎᐅᔪᑦ ᑯᐃᑉ ᑭᒡᒐᖅᑐᐃᔨᖓᓐᓂ ᐱᔪᓐᓇᐅᑎᖏᓐᓂ ᑲᓇᑕᒥ ᐊᒻᒪᓗ ᒪᑭᕕᒃ ᑯᐊᐳᕇᒃᓴᑯᓐᓂ

ᓄᓇᕕᒃ ᐃᓄᐃᑦ ᓄᓇᑖᕈᑎᖓᓐᓂ ᐊᖏᕈᑎ

ᐄᔪ (Eeyou) ᐃᒪᕐᒧᑦ ᓄᓇᑖᕈᑎᓄᑦ ᐊᖏᕈᑎᒃ

ᐊᖏᕈᑎᒃ ᒪᑯᓄᖓ ᐃᖅᑭᓕᓄᑦ/ᐃᓄᓐᓄᑦ ᓯᔾᔭᒦᑦᑐᓂᒃ ᖃᓕᕇᓕᖃᑦᑕᐅᑎᔪᓂᒃ ᐱᕕᐅᔪᒪᔪᓂᒃ ᐃᖅᑭᓕᓄᑦ ᑯᐸᒻᒦᑦᑐᓂᒃ ᐊᒻᒪᓗ ᓄᓇᕗᒻᒦᑦᑐᓂᒃ ᐃᓄᓐᓄᑦ (2002)

ᔫᑳᓐ

ᓂᕐᔪᑎᓕᕆᓂᕐᒧᑦ ᐱᖁᔭᑦ (2002)

ᓂᕐᔪᑎᓕᕆᓂᕐᒧᑦ ᐱᖁᔭᐃᑦ ᒪᓕᒐᐃᑦ (2012)

ᐅᐊᓕᓂᕐᒥᑦ ᐅᑭᐅᖅᑕᖅᑐᒥ ᓄᓇᑖᕈᑎᓂᒃ – ᐃᓅᕕᐊᓗᐃᑦ ᑭᖑᓪᓕᖅᐹᒥ ᐊᖏᕈᑎᒃ (ᐊᓯᔾᔨᖅᓯᒪᔪᓪᓗ)

ᐃᓅᕕᐊᓗᐃᑦ–ᐃᓄᑉᐱᐊᑦ ᓇᓂᓕᕆᓂᕐᒧᑦ ᐊᖏᕈᑏᑦ ᓂᒋᐊᓂ ᐅᐊᓕᓂᕐᒥᐅᑦ ᑕᕆᐅᖓᓂ (2011) (ᐃᓇᖐᓯᒪᔪᖅ 1988)

ᑲᓇᑕ

ᓂᕐᔪᑏᑦ ᐱᕈᖅᑐᓪᓗ ᐸᖅᑭᔭᐅᓂᖏᑦ ᒪᓕᒐᐃᓪᓗ ᓯᓚᕐᔪᐊᒥ ᑲᑎᙵᐅᖅᑐᓄᓪᓗ ᑲᓇᑕᒥ ᐊᕕᑦᑐᖅᓯᒪᔪᓂᒃ ᑕᐅᖅᓰᓂᕐᒧᑦ ᐱᖁᔭᐃᑦ (WAPPRIITA)

ᓂᕐᔪᑏᑦ ᐅᓗᕆᐊᓇᖅᑐᒦᓐᓂᕐᒧᑦ ᐱᖁᔭᖓ (SARA)

ᓯᓚᕐᔪᐊᒥ

1973 ᐊᖏᕈᑎᒃ ᓴᓄᓕᕆᓂᕐᒧᑦ (ᐊᑎᓕᐅᖅᑕᐅᓯᒪᔪᑦ ᐊᔾᔨᒌᙱᑦᑐᓄᑦ ᑎᒥᐅᔪᓄᑦ: ᑲᓇᑕᒥ, ᑲᓚᖡᑦ ᓄᓈᓂᑦ (ᑕᓐᒫᒃ, ᓄᐊᕙᐃ, ᒥᐊᓕᒐᐃᑦ ᓄᓇᖓᓐᓂ, ᐊᒻᒪᓗ ᐅᓛᓵᒥ (Union of Soviet Socialist Republics (Russia))

ᐊᖏᖃᑎᒌᒍᑕᐅᓯᒪᔪᖅ ᐊᕙᑎᓕᕆᓂᕐᒧᑦ ᑲᓇᑕᒥ ᐊᒻᒪᓗ ᒥᐊᓕᒐᕐᓂᑦ ᐊᖏᖃᑎᒌᒍᑎᓂᒃ ᐊᐅᓚᑦᑎᓂᕐᒥᓪᓗ ᑲᑐᔾᔭᐅᔪᓂᒃ ᓇᓄᕐᓂᑦ (2008)

ᐊᖏᖃᑎᒌᒍᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᓐᓂ, ᓄᓇᕗᑦ ᒐᕙᒪᒃᑯᖏᓐᓂ, ᐊᒻᒪᓗ ᒐᕙᒪᒃᑯᖏᓐᓂ ᑲᓚᖡᑦ ᓄᓈᓂ ᐱᐅᖅᓱᐊᕐᓂᕐᒧᑦ ᐊᐅᓚᑦᑎᓂᕐᒧᓪᓗ ᓇᓄᕐᓂᑦ (2009)

ᐊᖏᖃᑎᒌᒍᑦ ᓯᓚᕐᔪᐊᒥ ᑕᐅᖅᓰᓂᕐᒧᑦ ᓄᖑᖁᓇᒋᑦ ᓂᕐᔪᑏᑦ ᐆᒪᔪᑦ ᐱᕈᖅᑐᓪᓗ (CITES) (184 ᐱᓕᕆᖃᑎᒌᑦ)

ᐊᖏᖃᑎᒌᒍᑏᑦ ᑎᒻᒥᐊᑦ ᓄᓇᒦᑦᑐᓂᑦ (120 ᐱᓕᕆᖃᑎᒌᑦ; ᐊᑎᓕᐅᖅᓯᒪᔪᑦ ᐃᓚᖏᓐᓄᑦ ᓄᓇᓕᕐᔪᐊᓂᑦ, ᓄᐊᕙᐃᒥᓪᓗ)

ᑎᑎᖅᑐᒐᖅᓯᒪᔪᖅ 1. ᑕᑯᓪᓗᒋᑦ ᐅᑭᐅᖅᑕᖅᑐᒥ ᓇᓄᐃᑦ ᐊᒡᒍᑐᖅᓯᒪᔪᓂᒃ ᑭᓪᓕᖏᓐᓂᓪᓗ. ᑲᓇᑕᒥ ᓇᓄᖅᑕᓖᑦ ᐅᑯᐊᖑᓪᓗᑎᑦ: SB – ᓂᒋᐊᓂ ᐅᐊᓕᓂᐅᑉ ᑕᕆᐅᖓᓂ; NB – ᐱᖓᓐᓇᖓᓂ ᐅᐊᓕᓂᐅᑉ ᑕᕆᐅᖓᓂ; VM – Viscount ᐃᓗᐃᓪᓕᕐᒥ; NW – ᓄᐊᕇᔾᔭᒥ; LS – ᑕᓪᓗᕈᑎᐅᑉ ᐃᒪᖓᓂ; MC – ᐃᑦᑐᐊᖅᑑᑦ; GB – Gulf of Boothia; WH – ᐅᐊᓐᓇᖓᓂ ᑲᖏᖅᑐᐊᓘᑉ ᐃᒪᖓᓂ; FB – ᓴᓐᓄᕈᑎᐅ ᐃᑭᕋᓴᖓ; SH – ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ; KB – Kane Basin; BB – ᓴᓐᓂᕈᑎᐅᑉ ᐃᒪᖓ; DS – ᕿᑭᖅᑖᓘᑉ ᐃᑭᕋᓴᖓᓂ.

ᐱᔭᐅᓯᒪᔪᑦ: ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚ ᐊᓯᔾᔨᐸᓪᓕᐊᓂᖏᓐᓄᑦ ᑲᓇᑕᒥ, 2018

ᖃᕋᓴᐅᔭᒃᑯᑦ ᑐᑭᓯᒋᐊᕐᕕᔅᓴᖅ: ᐅᑭᐅᖅᑕᖅᑐᒥ ᓇᓄᓕᕆᓂᕐᒧᑦ ᓄᓇᙳᐊᖅ: ECCC

ᐃᓚᒍᑕᖓ 2: ᑐᑭᓯᒋᐊᕈᑎᔅᓴᑲᓐᓃᑦ ᓴᓐᓂᕈᑎᐅᑉ ᐃᒪᖓᓐᓃᑦᑐᑦ ᐊᒡᒍᑐᖅᓯᒪᔪᓂᑦ ᑲᓇᑕᒥ:

ᖃᓄᐃᒍᑕᐅᔾᔮᖏᑦᑐᑦ ᖃᐅᔨᔭᐅᓯᒪᔪᑦ ᐅᖃᐅᔾᔨᒋᐊᕈᑏᑦ ᓴᓐᓂᕈᑎᐅᑉ ᐃᒪᖓᓂ ᐊᐅᓚᑦᑎᔩᑦ: ᓇᓐᓄᐸᑦᑐᑦ ᐊᓐᓂᔾᔨᕙᑦᑐᓪᓗ ᓄᓇᓕᕐᔪᐊᓂᑦ ᓴᓐᓂᕈᑎᐅᑉ ᐃᒪᖓᓂᓐᖔᖅᑐᓂᒃ ᐃᓱᒪᒋᔭᐅᔪᑦ ᖃᓄᐃᒍᑕᐅᔾᔭᙱᒋᐊᖏᑕ (ᐱᐅᔪᑦ ᖃᓄᐃᒍᑕᐅᔾᔮᖏᑦᑐᑦ (NDF)) ᓇᓐᓄᑦᑕᐅᔪ ᑎᑭᓚᐅᖅᑎᓐᓇᒍ ᒫᔾᔨ 10, 2010 ᑭᖑᓂᖓᓂᓗ ᔪᓚᐃ 1, 2013.

ᖃᓄᐃᑦᑑᖃᑦᑕᖅᓯᒪᓂᖏᑦ ᖃᓄᐃᒍᑕᐅᔾᔮᖏᑦᑐᑦ ᖃᐅᔨᔭᐅᓯᒪᔪᑦ (NDF) ᐅᖃᐅᔾᔨᒋᐊᕈᑏᑦ ᓴᓐᓂᕈᑎᐅᑉ ᐃᒪᖓᓂ ᐊᐅᓚᑦᑎᔩᑦ:

ᓯᕗᓂᖓᓂ ᒫᔾᔨ 10, 2010, ᐊᓐᓂᔾᔨᒍᒪᔪᑦ ᒪᓕᒐᖅᑎᒍᑦ ᓇᓐᓄᑦᑐᒥᓂᑦ ᑕᕝᕙᙵᑦ ᓴᓐᓂᕈᑎᐅᑉ ᐃᒪᖓᓂ ᐊᐅᓚᑕᐅᔪᓂᒃ ᐃᓱᒪᒋᔭᐅᓚᐅᖅᑐ ᖃᓄᐃᒍᑕᐅᔾᔮᙱᒋᐊᖏᑕ. ᐊᑯᓐᓂᖏᓐᓂ ᒫᔾᔨ 10, 2010 ᐊᒻᒪᓗ ᔫᓂᒥ 30, 2017, ᐱᐅᓚᐅᙱᑦᑐᖅ ᖃᓄᐃᒍᑕᐅᔾᔮᖏᑦᑐᑦ ᖃᐅᔨᔭᐅᓯᒪᔪᑦ (NDF) ᐅᖃᐅᔾᔨᒋᐊᓂᖏᑦ ᐊᓐᓂᔾᔭᐅᓂᖏᓐᓂ ᓴᓐᓂᕈᑎᐅᑉ ᐃᒪᖓᓐᓂ ᐊᐅᓚᑕᐅᔪᓂᒃ, ᑕᐃᒪᐃᓐᓂᖓᓐᓄᑦ, ᐊᓐᓂᔾᔭᐅᔪᑦ ᓇᓐᓄᑦᑕᒥᓃᑦ ᓴᓐᓂᕈᑎᐅᑉ ᐃᒪᖓᓂ ᑕᐃᑲᓂ ᐱᔪᓐᓇᖅᑎᑕᐅᓚᐅᖅᓯᒪᙱᑦᑐᑦ. ᐱᐅᙱᓐᓂᖓ ᖃᓄᐃᒍᑕᐅᔾᔮᖏᑦᑐᑦ ᖃᐅᔨᔭᐅᓯᒪᔪᑦ (NDF) ᒪᓕᑦᑐᑦ ᐊᒥᓱᕈᖅᐹᓪᓕᖅᓯᒪᓂᖏᓐᓂ ᓇᓐᓄᑦᑕᐅᔪᓐᓇᖅᑐᑦ ᓄᓇᕗᒻᒥ ᑲᓚᖡᑦ ᓄᓈᓂᓗ ᐊᒻᒪᓗ ᒥᔅᓴᐅᓴᑦᑕᐅᓯᒪᓗᑎᑦ ᐊᒥᓲᓂᖏᑦ ᖃᑦᑏᓐᓇᕈᖅᐹᓪᓕᓐᓂᐊᖅᑐᒋᔭᐅᓪᓗᑎᑦ. ᔪᓚᐃᒥ 1−ᒥ, 2017, ᐃᓱᒪᒋᔭᐅᓚᐅᖅᓯᒪᔪᑦ ᐊᑐᐃᓇᐅᓂᖏᑦ ᑐᑭᓯᒋᐊᕈᑏᑦ ᐊᒥᓲᓂᖏᑦ ᖃᑦᑎᐅᒻᒪᖔᑕ ᐊᓯᔾᔨᑕᕐᓂᖏᓪᓗ ᐆᒪᔪᖅᑕᐅᕙᑦᑐᑦ ᑰᑕᖃᖅᑐᑎᑦ, ᐃᓱᒪᒋᔭᐅᓕᓚᐅᖅᑐᑦ ᓇᓐᓄᑦᑕᐅᕙᑦᑐᑦ ᐊᓐᓂᔾᔭᐅᕙᑦᑐᓪᓗ ᑕᕝᕙᙵᑦ ᓴᓐᓂᕈᑎᐅᑉ ᐃᒪᖓᓂ ᐊᐅᓚᑦᑎᓂᕐᒨᖓᓪᓗᑎᑦ ᖃᓄᐃᒍᑕᐅᔾᔮᖏᑦᑐᑦ ᖃᐅᔨᔭᐅᓯᒪᔪᑦ (ᐱᐅᔪᑦ ᖃᓄᐃᒍᑕᐅᔾᔮᖏᑦᑐᑦ (NDF)) ᓇᓐᓄᑦᑕᒥᓃᑦ ᒫᔾᔨᕈᓚᐅᖅᑎᓐᓇᒍ 10, 2010 ᑭᖑᓂᖓᓂᓗ ᔪᓚᐃᒥ 1, 2013. ᔪᓚᐃ 1, 2013 ᒪᓕᑦᑐᑦ ᑲᓇᑕᒥ ᓇᓐᓄᒐᔅᓴᓂᒃ ᑰᑕᓂᒃ ᖃᑦᑏᓐᓇᕈᕆᐊᖅᓯᓚᐅᕐᓂᖏᓐᓂ, ᑲᑐᔾᔨᓪᓗᑎᑦ ᑲᓚᖡᑦ ᓄᓈᓂ, ᑕᐃᒪᐃᓪᓗᐊᖅᑎᒐᓱᐊᖅᑐᒋᑦ 2017/2018 ᓇᓐᓂᐊᕐᓂᐅᓂᐊᖅᑐᓄᑦ ᐊᒻᒪᓗ ᐅᓪᓗᒥᒧᑦ ᖃᐅᔨᓴᐅᑏᑦ ᑎᑎᕋᖅᓯᒪᕗᑦ.

ᐊᒥᓲᓂᖏᑦ ᖃᓄᐃᓕᖓᓕᕐᓂᖏᑦ ᐊᓯᔾᔨᑕᕐᓂᖏᓪᓗ: ᓴᓐᓂᓄᕈᑎᐅᑉ ᐃᒪᖓᓐᓂ ᐊᒡᒍᑐᖅᓯᒪᔪᓂᒃ ᒥᔅᓴᐅᓴᑦᑕᐅᓚᐅᖅᓯᒪᔪᑦ ᑕᒫᓂ 2074 ᓇᓄᐃᑦ 1997−ᒥ. ᐱᒋᐊᕐᖓᕐᓂᖓᓂ 2011, ᓄᓇᕗᑦ ᒐᕙᒪᒃᑯᑦ, ᐱᓕᕆᖃᑎᖃᖅᑐᑎᒃ ᑲᓚᖡᐅᑉ ᓄᓈᓂ ᒐᕙᒪᒃᑯᖏᑕ, ᐊᑐᓕᖅᑎᑦᑎᓚᐅᖅᑐᑦ ᐱᓪᓚᕆᐊᓗᓐᓂᑦ, ᐱᖓᓱᓄᑦ ᐊᕐᕌᒍᓄᑦ ᖃᐅᔨᓴᕐᓗᑎᑦ ᐅᓪᓗᒥᒧᑦ ᐅᓂᒃᑳᓕᐅᕐᓗᑎᑦ ᒥᓂᔅᓴᐅᓴᑦᑕᐅᓯᒪᔪᑦ, ᕿᒥᕐᕈᔭᐅᑦᑎᐊᖅᑐᑎᓪᓗ ᓇᓗᓇᐃᖅᑕᐅᑦᑎᐊᖅᑐᑎᓪᓗ 2017−ᒥ ᓇᓄᓕᕆᔨᒻᒪᕆᓐᓄᑦ ᑲᑎᒪᔨᕋᓛᑦ (PBTC), ᖃᓄᐃᓕᖓᓂᖏᑦ ᑎᑎᕋᖅᓯᒪᔪᑦ. ᖃᐅᔨᓴᐅᑎᒥᓂᐅᓚᐅᖅᑐᓂᒃ ᐅᖃᖅᓯᒪᔪᑦ ᖁᕝᕙᓯᓐᓂᖅᓴᒻᒪᕆᐅᒻᒪᑕᒎᖅ ᐊᒥᓱᓂᖏᑦ ᖃᐅᔨᓴᐅᑎᒥᓂᕐᓂᑦ 1997−ᒥ (2826 ᓇᓄᐃᑦ ᑕᐃᒃᑯᐊᖑᓱᒋᔭᐅᓚᐅᖅᓯᒪᔪᑦ 2074−ᓂᑦ ᓇᓄᕐᓂᑦ). ᓄᑖᖅ ᑖᓐᓇ 2016−ᒥ ᒥᔅᓴᐅᓴᑦᑕᐅᓯᒪᔪᑦ ᐊᔾᔨᒌᙱᓐᓂᖏᓐᓂ ᐃᓱᒪᒋᔭᕆᐊᖃᙱᑦᑐᑦ ᖃᐅᔨᓴᐅᑎᒥᓂᐅᓚᐅᖅᓯᒪᔪᓂᑦ ᐊᓯᔾᔨᕐᓂᖏᓐᓂ ᐊᒥᓲᓂᖏᑦ ᖃᐅᔨᓴᐅᑎᖏᑦ ᐊᔾᔨᒌᙱᓐᓂᖏᓐᓄᑦ ᐊᒻᒪᓗ ᓇᒥ ᖃᐅᔨᓴᕐᓂᒥᓂᖏᓐᓂ. ᐅᐊᑦᑎᐊᕈᕐᓂᓴᐃᑦ ᐊᓯᔾᔨᑕᕐᓂᖏᑦ ᐃᓱᒪᒋᔭᐅᔪᑦ ᓇᓗᓇᓗᐊᕐᓂᖏᓐᓂ ᐊᒻᒪᓗ ᒫᓐᓇᓕᓴᐃᑦ ᐊᓯᔾᔨᕐᓂᖏᑦ (ᑕᒫᓂᑦ ᐅᑭᐅᓄᑦ 15 ᐊᑖᓃᑦᑐᓂᒃ) “ᑕᐃᒪᐃᑐᐃᓐᓇᖅᑐᒋᔭᐅᓯᒪᔪᑦ”.

ᐆᒪᔪᖅᑕᐅᕙᑦᑐᑦ ᐊᐅᓚᑕᐅᓂᖏᑦ: ᑖᒃᑯᐊ ᐊᒡᒍᑐᖅᓯᒪᔪᓂᒃ ᒥᔅᓴᐅᓴᑦᑕᐅᓯᒪᔪᑦ ᓴᖅᑭᖅᑕᐅᓚᐅᖅᓯᒪᔪᑦ 2016−ᒥ, ᑲᑎᑦᑐᒋᑦ ᓇᓐᓄᑦᑕᐅᓯᒪᔪᑦ ᓴᓐᓂᕈᑎᐅᑉ ᐃᒪᖓᓐᓂ ᐊᑯᓐᓂᖏᓐᓂ ᑲᓚᖡᑦ ᓄᓈᓂ ᑲᓇᑕᒥᓗ ᐃᓱᒪᒋᔭᐅᔪᑦ ᐱᓗᐊᖅᑕᐅᙱᒋᐊᖏᑕ. ᓄᓇᕗᑦ ᒐᕙᒪᒃᑯᖏᑦ ᒥᑭᓪᓕᕚᓪᓕᑎᑦᑎᓚᐅᖅᓯᒪᔪᑦ ᑰᑕᒥ ᓇᓐᓄᒍᓐᓇᐅᑎᓄᑦ ᐅᑭᐅᓄᑦ ᖁᓕᓄᑦ ᐊᕐᕌᒍᑕᒫᑦ ᑎᓴᒪᓄᑦ ᐅᑭᐅᓄᑦ, ᑕᒪᓂ 105−ᒥᑦ 2009–2010−ᒧᑦ ᓇᓐᓄᒍᓐᓇᓕᖅᑐᑎᑦ 65−ᓂᒃ 2013–2014−ᒧᑦ ᓇᓐᓂᐊᕐᓇᒥ, ᐊᒥᐊᒃᑯᖏᑦ ᑰᑕᒥ 2017/2018 ᓇᓐᓄᑦᑕᐅᔪᓇᖅᑐᑦ. ᐊᐅᓚᑦᑎᓂᕐᒧᑦ ᑐᕌᒐᖏᑦ ᕿᒥᕐᕈᔭᐅᒋᐊᓖᑦ ᓄᑖᕐᓂᑦ ᐊᒥᓲᓂᖏᓐᓂ ᑐᑭᓯᒋᐊᕈᑎᖃᑦᑎᐊᕐᓗᑎᑦ, ᑭᓯᐊᓂᓕ, ᒫᓐᓇ ᑐᕌᒐᖏᓐᓂ ᓄᓇᕗᒻᒥ ᐊᒻᒪᓗ ᑲᓚᖡᑦ ᓄᓈᓂ ᑕᐃᒪᐃᑐᐃᓐᓇᖅᑎᑕᐅᓇᓱᐊᕐᓗᑎᑦ ᐊᒥᓱᓂᖏᑦ ᑰᑕᐃᓪᓗ ᑕᐃᒪᐃᓕᖓᑎᑐᐃᓐᓇᕐᓗᒋᑦ ᐃᓄᓐᓄᓪᓗ ᑐᖁᑕᐅᕙᑦᑐᑦ ᐊᕐᕌᒍᑕᒫᑦ ᓴᐳᒻᒥᓪᓗᑎᓪᓗ ᓇᒻᒥᓂᖅ ᐱᖁᑎᒥᓂᓪᓗ.

ᐃᓚᒍᑕᖓ 3. ᑐᑭᓯᒋᐊᕈᑎᒃᑲᓐᓃᑦ ᓂᒋᐊᓃᑦᑐᑦ ᑲᖏᖅᑐᐊᓘᑉ ᐃᒪᖓᓐᓂ ᐊᒡᒍᑐᖅᓯᒪᔪᓂᒃ:

ᐊᐅᓚᑦᑎᓂᖏᓐᓂ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᓇᓄᐃᑦ ᐊᒡᒍᑐᖅᓯᒪᔪᓂᒃ ᑲᑐᔾᔭᐅᔪᑦ ᑲᒪᒋᔭᐅᓂᖏᑦ ᓄᓇᕗᑦ ᒐᕙᒪᒃᑯᖏᓐᓄᑦ, ᑯᐸᒻᒥ, ᐊᓐᑎᐅᕆᔪᒥ ᑲᓇᑕᒥᓗ, ᐊᒻᒪᓗ ᐊᒥᑲᓪᓚᓐᓄᑦ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐊᒻᒪᓗ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᑦ, ᐊᒻᒪᓗ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ (NWMB), ᓄᓇᕕᒃ ᐃᒪᓕᕆᓂᕐᒧᑦ ᐆᒪᔪᓕᕆᓂᕐᔪᐊᒃᑯ ᑲᑎᒪᔨᖏᑦ (NMRWB), ᐄᔪ (Eeyou) ᐃᒪᓕᕆᓂᕐᒧᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ (EMRWB), ᐊᓯᕙᖅᑏᑦ, ᐃᖃᓗᒐᓱᑦᑏᑦ ᐊᒻᒪᓗ ᐆᒪᔪᕐᓂᐊᖅᑎᒃᑯᑦ ᑲᑎᒪᔨᕋᓚᖏᑦ (HFTCC). ᐊᒻᒪᓗᒃᑲᓐᓂᖅ ᐊᐅᓚᑦᑎᖃᓯᐅᑎᒃᑲᓂᖅᑐᑦ ᐃᓗᐊᓃᑦᑐᓂᒃ ᓄᓇᑖᕈᑏᑦ ᐊᖏᕈᑎᖓᓂ, ᒐᕙᒪᑐᖃᒃᑯᑦ ᒥᓂᔅᑕᖓ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᑲᒪᔅᓴᐃᓐᓇᕆᐊᖃᕐᖓᑕ ᑕᒪᒃᑯᐊ ᓇᓄᐃᑦ ᓄᖑᑕᐅᕙᓪᓗᐊᓗᐊᙱᒃᑲᓗᐊᕐᒪᖔᑕ ᒪᓕᑦᑐᑎᑦ ᓯᓚᕐᔪᐊᒥ ᐊᖏᕈᑎᒥᒃ ᐱᐅᖅᓱᐊᓂᕐᒧᑦ ᓇᓄᕐᓂᑦ ᐊᒻᒪᓗ ᑕᐅᖅᓰᕐᓂᑦᒧ ᓇᓄᕐᓃᓐᖔᖅᑐᓂᒃ ᐅᓗᕆᐊᓇᖅᑐᒦᒋᐊᖃᙱᓐᓂᖏᓐᓂ ᓂᕐᔪᑏᑦ ᒪᓕᒐᑦ ᒪᓕᑦᑐᒋᑦ ᐊᖏᕈᑎᑦ ᓯᓚᕐᔪᐊᒥ ᑕᐅᖅᓰᓂᕐᒧᑦ ᓄᖑᑉᐸᓪᓕᐊᓕᙱᒃᑲᓗᐊᕐᒪᖔᑕ ᓂᕐᔪᑏᑦ ᐱᕈᖅᑐᓪᓗ ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES).

ᐅᓂᒃᑳᓕᐅᓕᐊᕆᓯᒪᔪᑦ ᓇᓐᓄᑦᑕᐅᕙᑦᑐᓂᒃ ᐱᔭᕇᖅᑕᐅᓯᒪᔪᑦ 100% ᓄᓇᕗᒻᒥ ᑭᓯᐊᓂᓕ ᑯᐸᐃᒻᒥ ᐱᔭᕇᖅᓯᒪᙱᑦᑐᑦ. ᐅᓂᒃᑳᓕᐅᕇᖃᑦᑕᖏᓐᓂᖏᓐᓄᑦ ᐱᔭᕇᖅᓯᒪᖃᑦᑕᓚᐅᙱᑦᑐᑦ ᐊᑑᑎᖃᑦᑎᐊᕈᓐᓃᖅᑐᑎᑦ ᐊᓯᕙᕐᓂᕐᒧᑦ ᐊᐅᓚᑦᑎᓂᕐᒥᑦ. ᑯᐸᒻᒥ, ᒪᓕᒐᖅᑎᒍᑦ ᐱᑕᖃᓚᐅᙱᑦᑐᖅ ᓄᓇᕗᒻᒧᑦ ᐃᓄᐃᑦ ᐄᔪᓪᓗ ᐃᑦᓰ ᐃᖅᑭᓕᑦ (Eeyou Istchee Cree) ᐅᓂᒃᑳᓕᐅᖃᑦᑕᓚᐅᙱᑦᑐᑦ ᓇᓐᓄᒐᐃᒻᒪᑕ, ᑭᓯᐊᓂᓕ ᑯᐸᐃᒃ ᒐᕙᒪᒃᑯᖏᑦ ᓄᐊᑦᑎᓚᐅᖅᑐᑦ ᐅᓂᒃᑳᓕᐊᒥᓂᕐᓂᑦ ᐊᒻᒪᓗ ᓂᕕᖏᑖᕐᓂᑦ ᑐᓂᓯᖃᑦᑕᖅᑐᑎᑦ 1985−ᒥᓂᑦ ᑕᐃᒫᒃ ᐊᓯᕙᖅᑏᑦ ᓂᐅᕐᕈᑎᖃᕈᓐᓇᖅᑐᑎᑦ ᐊᓐᓂᔾᔭᐅᔪᓐᓇᖅᑐᑎᓪᓗ ᓇᓄᕋᐃᑦ ᑲᓇᑕᐅᑉ ᓯᓚᑖᓂ. 2018−ᒥᓂᑦ, ᐄᔪ (Eeyou) ᐃᒪᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᐱᓕᕆᖃᑎᖃᖅᓯᒪᔪᑦ ᓯᔾᔭᒥ ᐃᖅᑭᓕᓐᓂᑦ ᐆᒪᔪᕐᓂᐊᖅᑎᒃᑯᖏᓐᓂ ᐅᓂᒃᑳᓕᐅᖃᑦᑕᖁᔨᓪᓗᑎᑦ ᓇᓐᓄᑦᑐᓂᒃ ᐄᔪ (Eeyou) ᐃᒪᕐᒥᐅᑕᓕᕆᔨᒃᑯᖏᓐᓂ ᐊᒻᒪᓗ ᑲᑐᔾᔨᖃᑦᑕᕐᓗᑎᑦ ᑐᑭᓯᒋᐊᕈᑎᓂᒃ ᐊᕕᑦᑐᖅᓯᒪᔪᓄᑦ ᑲᓇᑕᒥ. ᓄᑖᕐᒥᑦ ᐊᐅᓚᑦᑎᒍᑎᒥᑦ ᐸᕐᓇᐅᑎᓕᐅᖅᐸᓪᓕᐊᔪᑦ ᑎᒍᓯᓂᐊᖅᑐᑎᑦ ᑯᐸᒻᒥ ᐊᒻᒪᓗ ᖃᓂᒋᔭᖏᓐᓂ ᐃᒪᕐᓂᑦ ᐅᔾᔨᖅᓱᑦᑎᐊᓂᖅᓴᐅᓂᐊᕐᖓᑕ ᒫᓐᓇ ᐊᓯᕙᖅᑕᐅᕙᑦᑐᓂᒃ.

ᐊᓯᕙᕐᓇᐅᑎᓪᓗᒍ 2020-2021−ᒥ, ᓄᓇᕗᒻᒥ ᓇᓐᓄᓚᐅᖅᓯᒪᔪᑦ 47−ᓂᒃ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᐊᒡᒍᑐᖅᓯᒪᔪᓂᓐᖔᖅᑐᓂᒃ. ᖁᕝᕙᓯᓐᓂᓴᒻᒪᕆᒃ ᑲᑎᑦᑐᒋᑦ ᐱᐅᔪᓐᓇᖅᑐᓂᒃ (TAH) ᐃᓱᖃᖅᑎᑦᑎᒐᓗᐊᕐᖓᑕ ᐆᒪᔪᓕᕆᔨᕐᔪᐊᒃᑯᑦ (NWMB) 25−ᓂᒥᒃ ᓇᓄᕐᓂᑦ. ᑖᒃᑯᐊ ᐱᔪᓇᖅᑎᑕᐅᓕᓚᐅᖅᑐᑦ ᒪᓕᑦᑐᑎᑦ ᐅᑭᐅᖅᑕᖅᑐᒥ ᐊᓯᕙᖅᑕᐅᑲᐃᓐᓇᕈᓐᓇᖅᑐᓂᒃ ᐊᓯᔾᔨᖅᑕᐅᓪᓗᑎᑦ ᐊᒥᓱᓂᑦ ᐱᔪᓐᓇᕐᓂᖏᓐᓂ ᐊᒥᐊᒃᑯᖃᕐᓂᖏᓐᓄᑦ ᓂᕕᖓᑖᕐᓂᑦ. ᔫᓂᒥ 10, 2020, ᐱᓕᕆᔨᒻᒪᕇᑦ ᑕᐃᒪᐃᒃᑲᓐᓂᖁᔨᓚᐅᕈᓐᓃᖅᑐᑦ ᓯᕗᓂᑦᑎᓐᓂ. ᐊᕙᑎᓕᕆᔨᒃᑯᑦ ᐊᒻᒪᓗ ᓯᓚ ᐊᓯᔾᔨᐸᓪᓕᐊᓂᖓᓐᓂ ᑲᓇᑕᒥ ᐱᓕᕆᔨᒻᒪᕇᑦ ᐊᖏᓚᐅᖅᑐᑦ, ᐅᖃᖅᑐᑎᓪᓗ ᐊᑕᐅᓯᐊᑐᐊᖅ ᐊᕐᕌᒍᒥ ᖁᕝᕙᓯᓐᓂᖃᑲᐃᓐᓇᕐᓂᐊᖅᑐᖅ 29−ᓄᑦ ᐊᒡᒍᑐᖅᓯᒪᕕᖏᓐᓂ ᐅᓗᕆᐊᓇᖅᓯᔪᓐᓇᕐᓂᖓᓐᓂ ᑕᐃᒫᒃ.

ᑲᑎᑦᑐᒋᑦ ᐊᕐᕌᒍᓕᒫᒧᑦ ᑰᑕᐃᑦ ᓄᓇᕗᒻᒥ ᐃᓄᓐᓄᑦ (25−ᖑᓪᓗᑎᑦ) ᓄᓇᓄᒻᒥ ᐃᓄᓐᓄᑦ ᐊᓯᕙᖅᑎᓄᑦ ᓄᓇᕕᒻᒥ ᐃᒪᓕᕆᔨᒃᑯᓐᓂ (22), ᑖᒃᑯᐊᓗ ᑕᒪᓂ ᐊᕐᕌᒍᒥ ᐃᖅᑭᓕᓄᑦ ᑯᐸᒻᒥ (1.1) ᐊᓐᑎᐅᕆᔪᒥᓗ (1.8) ᑕᒫᓂᖃᖏᐃ 50−ᓂᒃ ᓇᓄᕐᓂᑦ. ᑖᒃᑯᐊᓗ ᓄᓇᕗᒻᒥ 2020-2021 ᓇᓐᓄᒐᔅᓴᓂᒃ ᐃᓱᒪᒋᓗᒋᑦ, ᐊᓯᖏᓐᓂ ᓇᓐᓄᒍᓐᓇᖅᑎᑕᐅᓐᓂᖅᑲᑕ ᑕᐃᒫᒃ, ᑲᑎᑦᑐᒋᑦ ᐅᖓᑖᓅᕈᔾᔨᓯᒪᒐᔭᖅᑐᑦ 72 ᓇᓄᕐᓄᑦ, ᑕᒫᓂᖃᐃ 10%−ᖑᓗᓂ ᒥᔅᓴᐅᓴᑦᑕᐅᓯᒪᔪᓂᑦ ᐊᒥᓲᓂᖏᓐᓂ. ᐊᒥᓲᓂᑦ ᑕᐃᒪ ᐅᓗᕆᐊᓇᕈᓐᓇᕐᖓᑕ ᐊᒡᒍᑐᖅᓯᒪᔪᓃᑦᑐᓂᒃ ᐊᑯᓂᒧᓪᓗ ᓇᓐᓄᑦᑕᐅᔪᓐᓇᖅᑐᓄᑦ ᐊᑦᑐᐃᓂᖃᕋᔭᕐᖓᑦ. ᑲᑎᑦᑐᒋᑦ ᐅᖃᐅᓯᐅᓯᒪᔪᑦ ᓇᓐᓄᑦᑕᒥᓃᑦ ᑕᐃᑲᓂ ᐊᒡᒍᑐᖅᓯᒪᔪᓂᒃ ᐊᑦᑎᓂᖅᓴᐅᒐᓗᐊᑦ 2020-2021−ᒥ (55 ᓇᓄᐃᑦ, ᐱᖃᓯᐅᑎᓪᓗᒋᑦ ᓇᓐᓄᑦᑕᒥᓂᑦ ᓄᓇᕗᒻᒥ, ᑯᐸᒻᒥ ᐊᓐᑎᐅᕆᔪᒥᓗ), ᐃᒪᓐᓇᐅᓪᓗᑎᑦ 7.1% ᒥᔅᓴᐅᓴᑦᑕᐅᓯᒪᔪᓂᒃ. ᐅᖃᐅᓯᐅᓯᒪᔪᑦ ᐊᕐᓇᓪᓗᑦᑕᒥᓂᑦ 22, ᐃᒪᓐᓇᐅᓪᓗᑎᑦ 2.9% ᒥᔅᓴᐅᓴᑦᑕᐅᓯᒪᓂᒃ. ᑕᒪᒃᑐᐊᓗ ᐃᓱᒪᒋᓗᒋᑦ ᐅᖃᐅᓯᐅᓯᒪᙱᑦᑐᑦ ᓇᓐᓄᑦᑕᒥᓂᑦ ᑯᐊᒻᒥ, ᖁᕝᕙᓯᓐᓂᖅᓴᐅᒍᓐᓇᒻᒪᕆᑦᑐᖅ ᑖᒃᑯᓂᖓ. ᑕᒪᒃᑯᐊ ᐊᒥᓲᓂᖏᑦ ᐅᖓᑖᓅᖅᓯᒪᒻᒪᕆᑦᑐᑦ ᐃᓚᖓᓐᓂ ᑕᒪᓂᖃᐃ 4.5% ᑲᑎᓕᒪᖅᑐᒋᑦ, ᐊᒻᒪᓗ 1.5% ᐊᕐᓇᓪᓗᑦ ᓇᓐᓄᑦᑕᒥᓃᑦ.

ᐅᑯᐊ 2020-2021−ᒥ ᓇᓐᓄᑦᑕᒥᓃᑦ, ᐊᓯᔾᔨᖅᓯᒪᓕᖅᑐᑦ ᓄᓇᕗᒻᒥ ᓇᓐᓄᑦᑕᐅᕙᑦᑐᓄᑦ ᑎᑎᕋᖅᑕᐅᕙᑦᑐᑦ ᐊᑮᑦᑐᕈᑏᓪᓗ ᐊᒦᓲᓂᕆᕙᑦᑕᖏᑦ (ᓄᓇᕗᒻᒥ ᓇᓐᓄᑦᑕᐅᕙᑦᑐᓄᑦ ᑎᑎᕋᖅᑕᐅᕙᑦᑐᑦ ᐊᑮᑦᑐᕈᑏᓪᓗ ᐊᒦᓲᓂᕆᕙᑦᑕᖏᑦ (HACCS) ᐃᓱᒪᓕᐊᖑᓚᐅᖅᑐᑦ ᐆᒪᔪᓕᕆᔨᕐᔪᐊᒃᑯᓐᓄᑦ (NWMB) ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ ᐊᖏᖅᑕᐅᓯᒪᓪᓗᑎᑦ. ᐋᖅᑭᒋᐊᖅᓯᒪᔪᑦ ᐃᓕᖅᑯᓯᐅᓂᐊᖅᑐᑦ ᓇᓗᓇᐃᔭᐃᓯᒪᔪᖅ ᐊᒥᐊᒃᑯᖃᕐᓂᖅᑲᑕ ᐅᖓᑖᓅᖓᓐᓂᖅᑲᑦ 25% ᑲᑎᑦᑐᒋᑦ ᐱᔭᐅᔪᓐᓇᖅᑐᓂᒃ ᓇᓪᓕᐊᓐᓂ ᐊᒡᒍᑐᖅᓯᒪᔪᓂᒃ ᐊᕐᕌᒍᒧᑦ ᑐᓂᐅᔭᑦᑕᐅᑎᒋᔭᕆᐊᓕᑦ ᐆᒪᔪᓕᕆᔨᕐᔪᐊᒃᑯᓐᓄᑦ (NWMB) ᕿᒥᕐᕈᔭᐅᖅᑳᕆᐊᖃᕐᖓᑕ ᐱᐅᖅᓱᐊᕆᐊᖃᕐᓂᕐᒧᑦ ᐃᓱᒫᓘᑎᐅᓕᖅᑕᖅᐱᐊᕐᖓᑕ.

2021−ᒥ, ᖃᖓᑕᓲᒃᑯᑦ ᓈᓴᐃᓚᐅᖅᓯᒪᒻᒥᔪᑦ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᐊᒻᒪᓗ ᐅᐊᓐᓇᖓᓂ ᑕᐃᑲᓂᔅᓴᐃᓐᓇᖅ. ᐱᓕᕆᔨᒻᒪᕇᑦ ᐅᖃᖅᑐᑎᑦ^{Note de bas de page 1} ᑕᒪᒃᑮᓐᓂᒃ ᓈᓴᐃᒌᖅᑐᑎᑦ ᓅᕖᑉᐱᕆᒥ 2022. ᒪᕐᕉᒃ ᐊᕕᑦᑐᖅᓯᒪᔪᑦ ᒥᔅᓴᐅᓴᑦᑕᐅᓪᓗᑎᒃ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᑎᑎᕋᖅᑕᐅᓪᓗᑎᑦ ᑕᕝᕙᓐᖔᖅᓯᒪᔪᓂᒃ. ᒥᔅᓴᐅᓴᑦᑕᐅᓪᓗᑎᑦ ᑕᒪᓂ 1003−ᖑᓪᓗᑎᑦ (95%−ᒥᑦ ᓱᓕᓱᒋᑦᑎᓚᐅᖅᑐᑦ ᐊᓯᔾᔨᖅᓯᒪᓪᓗᑎᑦ 773-1302), ᐊᔾᔨᒌᓚᐅᙱᓪᓚᕆᑦᑑᒃ ᓯᕗᓂᖓᓂ 2016−ᒥ ᒥᔅᓴᐅᓴᑦᑕᐅᓚᐅᖅᓯᒪᔪᑦ 780−ᖑᓪᓗᑎᒃ (95%−ᒥᑦ ᓱᓕᓱᒋᑦᑎᓚᐅᖅᑐᑦ ᐊᔾᔨᒌᓚᐅᙱᓪᓚᕆᑦᑑᒃ 590-1029) ᑕᒪᓂᖃᐃ 29% ᐊᒥᓲᓂᖅᓴᐅᓚᐅᖅᑐᑦ ᑖᒃᑯᓂᖓ 2016−ᒥ 2021−ᒧᑦ. ᐊᐃᑉᐸᖓᓐᓂ ᒥᔅᓴᐅᓴᑦᑕᐅᓪᓗᑎᑦ 1119−ᓂᑦ (95% ᓱᓕᓱᒋᑦᑎᓚᐅᖅᑐᑦ ᐊᓯᔾᔨᖅᓯᒪᓪᓗᑎᑦ 860-1454) ᑎᑎᕋᑦᑕᐅᓪᓗᑎᑦ ᐆᑦᑐᕋᐅᑎᓂᒃ ᐊᑐᖅᑐᑎᑦ ᓱᓕᔪᓂᒃ. ᐊᔾᔨᒌᙱᓐᓂᖃᓗᐊᓚᐅᙱᑦᑐᑦ 2016−ᒥ ᒥᔅᓴᐅᓴᑦᑕᐅᓯᒪᔪᓂᒃ, ᒥᔅᓴᐅᓴᑦᑕᐅᓚᐅᖅᓯᒪᔪᑦ 2021−ᒥ ᖃᖓᑕᓲᒃᑯᑦ ᖃᐅᔨᓴᒃᑲᓐᓂᓚᐅᖅᓯᒪᒻᒪᑕ ᓱᓕᓂᖅᓴᐅᔮᖅᑐᑎᓪᓗ.

ᐅᓂᒃᑳᕐᒥᑦ ᐅᖃᖅᓯᒪᓚᐅᖅᑐᑦ ᐊᒥᓱᕈᒃᑲᓂᖅᓯᒪᓂᖏᓐᓂ ᒥᔅᓴᐅᓴᑦᑕᐅᓯᒪᔪᑦ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᑲᑎᖅᓱᖅᓯᒪᓂᖏᓐᓄᑦ. ᐊᕐᕌᒍᑕᒫᑦ ᐊᓯᔾᔨᑕᖅᑐᑦ ᓇᓐᓄᑦᑕᐅᖃᑦᑕᕐᓂᖏᓐᓄᑦ ᓂᒋᐊᓂ ᐅᐊᓐᓇᖓᓂᓗ ᑲᖏᖅᑐᐊᓘᑉ ᐃᒪᖓᓐᓂ, ᐅᓂᒃᑳᓪᓗ ᐅᖃᖅᓯᒪᓪᓗᑎᑦ ᐃᓛᓐᓂᒃᑯᑦ ᐊᓯᐊᓅᑦᑕᖃᑦᑕᕐᓂᖏᓐᓂ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᐊᒡᒍᑐᖅᓯᒪᔪᓂᒃ ᖃᓂᒋᔭᖓᓄᑦ ᐅᐊᓐᓇᒧᑦ ᑲᖏᖅᑐᐊᓗᑉ ᐃᒪᖓᓐᓄᑦ 2021−ᒥ. ᐅᓂᒃᑳᓪᓗ ᐅᖃᖅᓯᒪᓪᓗᑎᑦ ᐊᒥᓱᕈᒃᑲᓐᓂᖅᓯᒪᓂᖏᓐᓂ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᐊᒥᓱᕈᑦᑎᐊᐸᓪᓕᐊᓂᖏᓐᓂ (ᓲᕐᓗ ᕿᑐᕐᖏᐅᑦᑎᐊᖃᑦᑕᕐᓂᖏᓐᓂ ᐊᓐᓇᐅᒪᖃᑦᑕᕐᓂᖏᓐᓂᓪᓗ ᐊᑎᖅᑕᖏᑦ), ᑕᑯᔭᐅᓯᒪᓪᓗᑎᓪᓗ ᓯᑯᖃᑦᑎᐊᖃᑦᑕᕐᓂᖓᓐᓄᑦ ᐅᑭᐅᓄᑦ ᑕᓪᓕᒪᓄᑦ 2011-ᒥᑦ 2016−ᒧᑦ. ᐊᒻᒪᓗᒃᑲᓐᓂᖅ, ᐅᓂᒃᑳᕐᒥᑦ ᓇᓐᓄᑦᑕᐅᓯᒪᔪᑦ ᖃᑦᑏᓐᓇᐅᓂᖅᓴᐅᖃᑦᑕᖅᓯᒪᔪᑦ 2016-ᒥᑦ ᐊᒻᒪᓗ 2021−ᒥ ᑖᒃᑯᓂᖓᓗ ᐊᑯᓐᓂᖏᓐᓂ 2010−ᒥ ᐊᒻᒪᓗ 2015−ᒥ (37.8 ᓇᓐᓄᑦᑕᒥᓃᑦ ᑖᒃᑯᐊᓕ 58.8−ᖑᓪᓗᑎᑦ ᐊᑐᓂ ᓇᓐᓄᑦᑕᒥᓃᑦ).

ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓰᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᖃᐅᔨᓴᖅᑎᒻᒪᕇᑦ ᐃᓱᒪᓯᒪᔪᑦ ᖃᐅᔨᓴᖅᑎᒻᒪᕆᓐᓂᒃ ᓄᓇᖃᖅᑳᖅᓯᒪᔪᓪᓗ ᖃᐅᔨᒪᓂᖏᑦ ᐅᖃᐅᔾᔨᒋᐊᕆᓯᒪᔪᐃᓐᓇᐃᑦ ᖃᓄᐃᒍᑕᐅᙱᓐᓂᖏᓐᓂ. ᑕᐃᒪᓕ ᓄᓇᐃᑦ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᐊᒡᒍᑐᖅᓯᒪᔪᓃᑦᑐᑦ, ᑕᐃᑲᓂ 2020-2021 ᓇᓐᓂᐊᕐᓇᒥ, ᖃᐅᔨᓴᖅᑎᒻᒪᕇᑦ ᒥᔅᓴᐃᓴᐃᓚᐅᖅᑐᑦ 17%−ᒥᑦ ᖃᑦᑏᓐᓇᕈᕆᐊᖅᓯᒪᓕᖅᑐᒡᒎ ᖁᓕᓄᑦ ᐅᑭᐅᓄᑦ 15−ᓄᑦ ᑎᑭᑦᑐᒍ, ᐊᑯᓂᒨᖓᔪᓂᒃ, ᓯᑯᐃᖅᐸᓪᓕᐊᓂᖏᓐᓄᓪᓗ. ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ ᐅᓂᒃᑳᖅᑐᑎᑦ ᑕᐃᒪᐃᑐᐃᓐᓇᕐᓂᕋᐃᓪᓗᑎᑦ ᐅᕝᕙᓘᓐᓃᑦ ᐊᒥᓱᖅᐹᓪᓕᖅᓯᒪᓂᕋᐃᓪᓗᑎᑦ ᑕᒫᓂ ᓇᓄᖅᓯᖃᑦᑕᓂᖅᓴᐅᓕᕐᖓᑕᓗ ᑎᒥᖏᓪᓗ ᓇᓄᐃᑦ ᐱᐅᑦᑎᐊᖅᑐᑎᑦ. ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᐱᓕᕆᔨᒻᒪᕇᑦ ᐅᔾᔨᖅᓱᖁᔨᓚᐅᖅᑐᑦ ᑕᒪᑐᒥᖓ ᐊᔾᔨᒌᙱᓐᓂᖏᓐᓂ ᐃᓱᒪᒋᔭᐅᔪᓂᒃ ᐊᑐᐃᓐᓇᕐᓂᑦ ᑐᑭᓯᒋᐊᕈᑎᓂᒃ.

ᑕᒪᒃᑯᐊ ᐃᓱᒪᒋᓗᒋᑦ ᐊᓯᔾᔨᐸᓪᓗᐊᔪᑦ ᓄᓇᕗᒻᒥ ᓇᓐᓄᑦᑕᐅᕙᑦᑐᓄᑦ ᑎᑎᕋᖅᑕᐅᕙᑦᑐᑦ ᐊᑮᑦᑐᕈᑏᓪᓗ ᐊᒦᓲᓂᕆᕙᑦᑕᖏᑦ (HACCS), ᐊᖏᖅᑕᐅᓚᐅᖅᓯᒪᔪᑦ ᕖᕝᕗᐊᕆᒥ 2022, ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᖃᐅᔨᒪᖅᑎᒻᒪᕇᑦ ᐅᖃᓚᐅᖅᑐᑦ ᓄᑖᕐᓂᑦ ᒪᓕᒐᕐᓂᑦ ᐊᑐᔅᓴᐃᓐᓇᕆᐊᓕᓐᓂᒃ ᐆᒪᔪᓕᕆᓂᕐᔪᐊᒃᑯᓐᓂ (NWMB) ᕿᒥᕐᕈᔭᖅᑳᕆᐊᖃᕐᖓᑕ ᑐᔅᓯᕋᐅᑏᑦ ᐊᓯᔾᔩᒍᒪᔪᓂᒃ ᐊᑮᑦᑐᕈᑎᔅᓴᓂᒃ ᓂᕕᖓᑖᕐᓂᑦ ᐅᖓᑖᓃᑐᐊᖅᑲᑕ 25% ᐊᒡᒍᑐᖅᓯᒪᔪᓂᒃ ᑲᑎᑦᑐᒋᑦ ᐱᔭᐅᔪᓐᓇᖅᑐᓂᒃ ᕿᓂᕐᕈᔭᐅᖅᑳᕆᐊᖃᖅᑐᓂ. ᖃᐅᔨᓴᖅᑎᒻᒪᕇᑦ ᐅᖃᖅᑐᑎᓪᓗ ᓱᓕ ᐊᕐᓇᓪᓗᓐᓂ ᓇᓐᓄᑎᑦᑎᒍᓐᓇᕐᓂᐊᖅᑐᖅ ᐃᒫᒃ 1:1 ᐃᓕᖅᑯᓯᖃᕐᓗᑎᑦ, ᐊᒥᓱᕈᖅᑎᑕᐅᑐᐃᓐᓇᕆᐊᓕᒃ ᑭᓯᐊᓂ ᐊᕐᓇᓗᓐᓂ ᓇᓐᓄᑦᑕᐅᔪᓐᓇᖅᑐᓂᒃ. ᖃᐅᔨᓴᖅᑎᒻᒪᕇᑦ ᐅᔾᔨᓱᐃᓐᓇᕐᓂᐊᖅᑐᖅ ᑕᒪᑐᒥᖓ ᐊᓯᖏᓐᓂᓪᓗ ᓇᓄᓕᕆᓂᕐᒧᑦ ᐊᐅᓚᑦᑎᒍᓐᓇᕐᓂᕐᒥᑦ ᑕᕝᕙᙵᑦ ᐊᒡᒍᑐᖅᓯᒪᕕᓃᑦᑐᓂᒃ.

ᑭᖑᓪᓕᖅᐹᒥᓪᓕ, ᐊᖏᖃᑎᒌᒍᑏᑦ ᓯᓚᕐᔪᐊᒥ ᑕᐅᖅᓯᓂᕐᒧᑦ ᓄᖑᑐᐃᓐᓇᕆᐊᓕᓐᓄᑦ ᓂᕐᔪᑎᓂᒃ (CITES) ᖃᐅᔨᓴᖅᑎᒻᒪᕇᑦ ᖃᐅᔨᒪᓂᐊᖅᑐᑦ ᒫᓐᓇᕈᓗᒃ ᖃᐅᔨᔭᒥᓂᖏᓐᓂ ᖃᐅᔨᓴᖅᑎᓪᓗᒋᑦ 2021−ᒥ ᓂᒋᐊᓄᑦ ᑲᖏᖅᑐᐊᓘᑉ ᐃᒪᖓᓐᓂ ᐊᒡᒍᑐᖅᓯᒪᔪᓂᒃ. ᖃᐅᔨᓴᕐᓂᖏᓐᓂ ᖃᐅᔨᓚᐅᖅᑐᑦ ᐊᒥᓲᓂᖅᓴᐅᒻᒪᑕ ᒥᔅᓴᐅᓴᑦᑕᐅᓯᒪᔪᑦ 2016−ᓕᓴᕐᓂᑦ ᑲᑎᓯᒪᓂᖏᓐᓄᑦ ᖃᑦᑏᓐᓇᕈᖅᐸᓪᓕᖅᓯᒪᓚᐅᖅᑐᓂᒃ 2016-2021− ᑕᐃᑯᖓ 2010-2015−ᒥᑦ, ᕿᑐᕐᖏᐅᓂᖅᓴᐅᓕᖅᑐᑎᓪᓗ ᓇᓐᓄᑦᑕᐅᓇᓱᙱᓂᖅᓴᐅᓕᖅᑐᑎᑦ ᓯᑯᑦᑎᐊᕆᓐᓂᖅᓴᐅᓪᓗᓂᓗ, ᐊᕐᕌᒍᑕᒫᑦ ᐊᓯᔾᔨᑕᖅᑐᑦ ᓇᓐᓄᑦᑕᐅᕙᑦᑐᑦ ᑖᒃᑯᓂᖓ ᓂᒋᐊᓂ ᐅᐊᓐᓇᖓᓂᓗ ᑲᖏᖅᑐᐊᓘᑉ ᐃᒪᖓᓐᓂ ᐊᒡᒍᑐᖅᓯᒪᔪᓂᒃ.

ᖃᐅᔨᓴᖅᑎᒻᒪᕇᑦ ᐃᓕᓴᖅᓯᓯᒪᒻᒪᑕ ᐅᓂᒃᑳᓕᐅᑦᑎᐊᙱᓗᐊᖃᑦᑕᕐᓂᖏᓐᓂ ᑯᐸᐃᒻᒥ ᓴᓐᖐᔾᔪᑎᒋᓪᓗᓂᒋᑦ ᐊᐅᓚᑦᑎᒐᓱᐊᕐᓂᕐᒧᑦ ᓇᓐᓄᑦᑕᐅᔪᓐᓇᖅᑐᓂᒃ ᐅᔾᔨᖅᓱᖅᑕᐅᖏᓐᓇᕐᓂᐊᖅᑐᖅ ᑕᒪᓐᓇ ᑯᐸᐃᒻᒥ ᐊᒡᒍᑐᖅᓯᒪᔪᓂᒃ.

ᒪᓕᑦᑐᒋᑦ ᐊᑐᐃᓐᓇᐃᑦ ᑐᑭᓯᒋᐊᕈᑏᑦ, ᖃᐅᔨᓴᖅᑎᒻᒪᕇᑦ ᐅᖃᐅᔾᔨᒋᐊᕆᔪᑦ ᐊᓯᕙᕐᓂᐅᖃᑦᑕᖅᑐᑦ ᐊᓐᓂᔾᔨᓂᕐᒥᓪᓗ ᑲᓇᑕᐅᑉ ᓯᓚᑖᓄᑦ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᐊᒡᒍᑐᖅᓯᒪᔪᓂᒃ ᖃᓄᐃᒍᑕᐅᔾᔮᖏᓐᓂᕋᐃᓪᓗᑎᑦ ᑕᐃᒪᐃᒃᑲᓗᐊᖅᑲᑕ. ᖃᐅᔨᓴᖅᑎᒻᒪᕇᑦ ᓱᓕ ᖃᐅᔨᓴᑦᑎᐊᑲᓐᓂᕈᒪᔪᑦ ᓇᓐᓄᑦᑕᐅᖃᑦᑕᓂᕐᒧᑦ ᐊᐅᓚᑦᑎᓂᕐᒥᑦ ᑕᐃᑲᓂ ᓂᒋᐊᓂ ᑲᖏᖅᑐᐊᓘᑉ ᐃᒪᖓᓐᓂ ᐊᒻᒪᓗ ᑐᑭᓯᒋᐊᕈᑎᓂᒃ ᑕᒪᒃᑯᓂᖓ ᐊᐅᓚᑕᐅᕙᑦᑐᓂᒃ ᐊᓯᔾᔨᖅᓯᒪᔪᓂᒃ, ᐅᖃᐅᔾᔨᒋᐊᕆᑎᓪᓗᒋᑦ ᓯᓚᕐᔪᐊᒥ ᑕᐅᖅᓰᓂᕐᒥᑦ ᐃᓱᒪᒋᔭᐅᔪᓐᓇᖅᑐᑦ ᖃᓄᐃᒍᑕᐅᔾᔮᙱᒋᐊᖏᑕ ᑕᒪᒃᑯᓄᖓ.