ᐱᓂᕐᓗᒃᑕᐅᓯᒪᓐᖏᑦᑐᑦ ᖃᐅᔨᔭᐅᔪᑦ ᑲᓇᑕᒥ : ᓇᓄᐃᑦ

ᐱᓪᓗᒍ: ᐃᑲᔪᖅᓱᐃᔪᑦ ᑐᓴᐅᒪᔪᑎᒃᓴᑦ ᐊᑐᖅᑕᐅᓱᑦ ᐃᒪᓐᓇᐃᓗᖅᑕᐅᑎᓪᓗᒋ Ursus maritimus (ᓇᓄᐃᑦ) ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᔪᑦ ᑲᓇᑕᒧᑦ

(2009-12-11 ᐊᖑᒪᑎᓕᕆᐊᕈᑎᑦ 2018-03-13)

ᓇᐃᓈᕈᑎᑦ

ᐊᐅᓪᓚᖅᑎᑦᑎᓂᖅ ᒪᓕᒐᖅᑎᒍ ᐊᖑᑦᔭᐅᔪᓯᒪᔪᓂᑦ ᓇᓄᕐᓂᑦ ᑕᒫᙵᑦ ᑲᓇᑕᒥᑦ ᐱᓂᕐᓗᒃᓯᔪᑕᐅᓂᕋᒃᑕᐅᖏᒪᑕ. ᐃᓚᒃᑲᓐᓂᖏᑦ ᑐᓴᐅᒪᔪᑎᒃᓴᑦ ᑕᒪᒃᑯᓇᓂ ᐱᓂᕐᓗᒃᓯᔪᑕᐅᓯᒪᖏᑦᑐᑦ ᖃᐅᔨᔭᐅᔪᑦ ᓇᓄᐃᑦ ᐊᖑᑦᔭᐅᓯᒪᔪᑦ ᓴᓐᓂᕈᑎᐅᑉ ᐃᒪᖓᓂ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂ ᑕᑯᔭᐅᔪᓐᓇᖅᐳᑦ ᐃᓚᒋᓕᐅᑎᓯᒪᔪᖅ 1−ᒥ.

• ᓇᓄᖅ ᐱᓪᓗᐊᑕᐅᓪᓗᓂ ᐱᓕᕆᓂᖃᕐᒪᑦ ᑲᓇᑕᐅᑉ ᐅᑭᐅᖅᑕᖅᑐᖓᑕ ᐆᒪᔫᖃᑎᒋᒡᕕᖓᓂ ᐊᒻᒪᓗ ᐃᓕᖅᑯᓯᖃᓂᖏᓐᓂ ᓄᓇᖃᒃᑎᐅᔪᑦ ᐅᑭᐅᖅᑕᖅᑐᖓᓂ ᑲᓇᑕ, ᐱᓗᐊᙳᐊᖅᑐᒥᑦ ᐃᓄᖏᓐᓂ. ᐱᑕᖃᕐᒪᑦ ᐅᖓᑖᓂᑦᑐᓂᒃ 16,000 ᓇᓄᕐᓂᑦ ᑲᓇᑕᒥ, ᑖᓐᓇᓗ ᒪᕐᕈᓪᓗᐊᕆᒡᒪᒍ−ᐱᖓᓱᓂᑦ ᒥᒃᓴᐅᓴᒃᑕᐅᓯᒪᔪᑦ ᓄᓇᕐᔪᐊᓕᒫᒥ ᐅᓄᕐᓂᖏᓐᓂ. ᓇᓄᐃᑦ ᐱᑕᖃᕐᒪᑕ ᒫᓂᑐᕙᒥ, ᓅᐸᓐᓛᓐᒥ ᐊᒻᒪᓗ ᓛᐱᑐᐊᕆᒥ, ᓄᓇᑦᓯᐊᒥ, ᓄᓇᕗᒻᒥ, ᐊᓐᑎᐅᕆᔪᒥ, ᑯᐱᐊᒃᒥ, ᐊᒻᒪᓗ ᔫᑲᓐᒥ. 75% ᐳᓴᓐᑎᖏᓐᓄᑦ ᓇᓄᐃᑦ ᐊᖑᑦᔭᐅᔪᑦ ᑲᓇᑕᒥ ᐱᔭᐅᓱᖑᕗᑦ ᓄᓇᕗᒻᒥ.
• ᓇᓄᐃᑦ ᓇᔪᒐᖃᓱᖑᕗᑦ ᐊᑯᓂᐅᓂᖅᓴᖅ ᐱᓇᓱᒡᕕᖃᕐᓗᑎᒃ ᑕᕆᐅᑉ ᓯᑯᖓᓂ. ᓴᖅᑭᑕᐅᓯᒪᔪᖅ ᐊᓯᐅᔨᓂᖅ ᑕᕆᐅᑉ ᓯᑯᖓᓂᑦ ᐊᒃᓱᐊᓗᒃ ᓯᕘᕋᓇᖅᑐᒦᑎᑦᑎᕗᖅ ᐊᒃᑐᐃᒐᔭᕐᓂᖓᓄᑦ ᐊᑐᐃᓐᓇᐅᔪᓐᓇᖅᑐᒥᑦ ᓇᔪᖅᑕᐅᔪᓐᓇᖅᑐᒥᑦ ᐊᒻᒪᓗ ᐱᕕᐅᔪᓐᓇᕐᓗᓂ ᐆᒪᔪᖃᑦᑕᕋᔭᖅᑕᖏᓐᓂᑦ ᓇᓄᐃᑦ. ᓇᓄᐃᑦ ᑎᑎᖅᑕᐅᓯᒪᓕᓚᐅᕐᒪᑕ ᒪᑯᓇᓃᓕᖅᑎᑕᐅᓪᓗᑎᒃ ᑲᓇᑕᒥ ᐆᒪᔪᐃᑦ ᖁᒃᓴᓇᖅᑐᒦᓕᖅᑐᓄᑦ ᒪᓕᒐᕐᓂ 2011−ᒥ ᐃᒪᓐᓇᐅᓕᖅᑎᑕᐅᓪᓗᑎᒃ ᓂᕐᔪᑎᑦ ᐊᔾᔨᐅᖏᑦᑐᒥᑦ ᐃᓱᒫᓗᖕᓇᖅᓯᔪᑦ ᐊᑕᐅᓯᑐᐊᖑᑎᑕᐅᓗᓂ ᓇᓅᖃᑎᒋᑦ ᐅᓄᕐᓂᖏᓐᓂ ᑲᓇᑕᒥ. ᐱᓕᕆᐊᕆᔭᕐᓂᖅᓯᑎᓪᓗᒍ ᐊᐅᓚᑦᑎᓂᕐᒥ ᐱᓕᕆᓃᑦ ᐊᒻᒪᓗ ᓇᖑᑦᑎᑦᑕᐃᓕᒪᓂᕐᒧᑦ, ᓇᓄᐃᑦ ᐅᓄᕐᓂᖏᑦ ᑲᓇᑕᒥᑦ ᐊᕕᒃᑐᖅᓯᒪᖕᒪᑕ ᐃᒪᓇᑎᒋᐅᓕᖅᑎᓯᒪᓪᓗᑎᒃ 13 ᐅᓄᕐᓂᒃᑲᓐᓂᖏᓐᓂ, ᐊᔾᔨᒌᓪᓗᐊᐸᓗᖕᓂᑦ ᐊᐅᓚᑦᑎᓂᖃᕐᓗᑎᒃ ᐃᒻᒥᒃᑰᖓᓂᖏᒃ (ᑎᑎᕋᒃᓯᒪᔪᖅ 1). ᐃᓚᖏᑦ ᐅᓄᕐᓂᒃᑲᓐᓃᑦ ᓴᖅᑭᓱᖑᕗᑦ ᐊᑕᐅᓯᐅᖏᑦᑐᓂ ᐊᕕᒃᑐᖅᓯᒪᓂᕐᓂ/ᓄᓇᓕᖃᕐᕕᐅᔪᓂ ᐊᒻᒪᓗ/ᐅᕝᕙᓗᓂᑦ ᓄᓇᖃᕐᕕᒡᔪᐊᓂ.
• ᑲᓇᑕᓕᒫᒥ ᐋᖅᑭᑦᑎᐊᖅᓯᒪᔭᕆᐊᖃᕐᓂᕐᒧᑦ ᑲᑎᒪᔨᕋᓛᑦ (ᓇᓄᐃᑦ ᐋᖅᑭᑦᑎᐊᖅᓯᒪᔭᕆᐊᖃᕐᓂᒧᑦ ᑲᑎᒪᔨᕋᓛᑦ ᐅᕝᕙᓗᓂᑦ CTOB) ᖃᐅᔨᓴᖅᓯᖕᒪᑕ ᐅᓄᕐᓂᖏᑕ ᖃᓄᐃᓕᖓᓕᕐᓂᖏᓐᓂᑦ ᐊᒻᒪᓗ ᖃᓄᐃᓘᕙᓪᓕᐊᓂᖏᓐᓂᑦ ᐊᕐᕌᒍᑕᒪᑦ ᑕᐃᒃᑯᓄᖓ ᐊᑐᓂ 13 ᐅᓄᕐᓂᒃᑲᓐᓂᖏᓐᓄᑦ ᐊᒻᒪᓗ ᐊᔾᔨᒌᓪᓗᐊᐸᓗᖕᓂᑦ ᐊᐅᓚᑦᑎᓂᖃᕐᓗᑎᒃ ᐃᒻᒥᒃᑰᖓᓂᖏᒃ ᐃᓗᐊᓂ ᑲᓇᑕᐅᑦ ᑐᓴᖅᑎᑕᐅᖁᓗᒋᑦ ᐱᐅᖅᓱᐅᓂᖅ ᐊᒻᒪᓗ ᐊᑐᖔᓕᕈᓐᓇᕐᓂᕐᒧᑦ ᐊᐅᓚᑦᑎᓂᕐᒥ ᐱᓕᕆᓂᕐᓃ.
• ᐃᓚᒋᔭᐅᓗᓂ ᑲᓇᑕᐅᑉ ᐊᐅᓚᑦᑎᔪᑎᖏᑕ ᐱᓕᕆᔪᑎᖏᓐᓄᑦ ᓇᓄᕐᓄᑦ, ᐊᐅᓚᑦᑎᔨᑦ, ᖃᐅᔨᓇᓱᐊᖅᑎᑦ, ᐊᖑᓇᓱᐊᖅᑎᑦ ᐊᒻᒪᓗ ᓄᓇᖃᖄᒃᓯᒪᔪᑦ ᐃᓄᖏᑦ ᖃᐅᔨᓴᕐᒪᑕ ᐊᒻᒪᓗ ᖃᐅᔨᒪᒋᐊᖅᓯᓪᓗᑎᒃ ᓇᓄᕐᓂᒃ ᖃᐅᔨᔪᓐᓇᕈᒪᓪᓗᑎᒃ ᐱᐅᓈᖏᑦᑐᓂᒃ ᐊᒃᑐᐃᓂᖅᑕᖃᕋᔭᕐᒪᖔᑦ.
• ᑲᓇᑕᒥ ᓇᓄᐃᑦ ᐊᐅᓚᑕᐅᖕᒪᑕ ᐊᒻᒪᓗ ᓴᐳᒻᒥᔭᐅᓪᓗᑎᒃ ᒪᑯᑎᒎᓇ ᐊᕕᒃᑐᖅᓯᒪᔪᑦ ᐊᒻᒪᓗ ᓄᓇᓕᖃᕐᕕᐅᔪᑦ ᓂᕐᔪᑎᓕᕆᓂᕐᒧᑦ ᒪᓕᒐᖅᑎᒍ ᐊᒻᒪᓗ ᑕᐃᒪᓐᓇᐃᑐᓄᑦ ᒪᓕᒃᑕᐅᔭᕆᐊᓕᒃᑎᒍ, ᐊᑐᖅᑎᐅᖃᑎᒌᒡᓂᕐᒧᑦ ᐊᖏᖃᑎᒋᒍᑎᖏᓐᓂ, ᐊᖏᖃᑎᒌᒪᕆᒍᑎᓂ, ᐊᒻᒪᓗ ᓄᓇᑖᕈᑎᑦ ᐊᖏᖃᑎᒋᒍᑎᖏᓐᓂ. ᐊᖏᖃᑎᒋᒪᕆᒍᑎᑦ ᐊᒻᒪᓗ ᓄᓇᑖᕈᑎᑦ ᐊᖏᖃᑎᒋᒍᑎᖏᑦ ᓴᐳᒻᒥᔭᐅᖕᒪᑕ ᑲᓇᑕᐅᑉ ᒪᓕᒐᕐᔪᐊᖓᒍᑦ. ᐊᖏᖃᑎᒋᒪᕆᒍᑎᑦ ᐊᒻᒪᓗ ᓄᓇᑖᕈᑎᑦ ᐊᖏᖃᑎᒋᒍᑎᖏᑦ ᐋᖅᑭᒃᓯᔪᓐᓇᕐᒪᑕ ᐱᔪᓐᓇᕐᓂᕆᔭᐅᔪᓐᓇᖅᑐᓂᒃ ᓄᓇᖃᖄᒃᓯᒪᔪᑦ ᐃᓄᖏᓐᓄᑦ ᐊᖑᓇᓱᒍᓐᓇᕈᑕᐅᓗᑎᒃ ᓂᕐᔪᑎᓂᒃ ᐱᖃᓯᐅᑎᓗᒋᑦ ᐱᔪᓐᓇᖅᑎᑕᐅᔪᑎᑦ ᐱᕚᓪᓕᕈᑕᐅᔪᓐᓇᕐᓗᑎᒃ ᓂᐅᕕᐊᒃᓴᕆᔭᐅᓂᖏᓐᓄᑦ ᓇᓄᕋᐃᑦ. ᒪᑭᒪᓇᓱᐊᕈᑎᑦ ᐱᖃᓯᐅᔾᔨᔪᓐᓇᕐᒪᑕ ᐱᕚᓪᓕᕈᑕᐅᔪᓐᓇᕐᓂᖏᓐᓂᑦ ᓄᓇᖃᖄᒃᓯᒪᔪᑦ ᐃᓄᖏᓐᓄᑦ ᓂᐅᕕᐊᒃᓴᕆᔭᐅᓂᖏᓄᑦ ᓇᓄᕋᐃᑦ. ᐊᐅᓚᑦᑎᓂᕐᒧᑦ ᑎᑭᑕᐅᓇᓱᐊᖅᑐᑦ ᐅᖃᐅᑎᒋᔭᐅᓯᒪᕗᑦ ᑲᓇᑕᐅᑉ ᓄᓇᑖᕈᑎᑦ ᐊᖏᖃᑎᒋᒍᑎᖏᓐᓂ. ᖃᐅᔨᒪᓇᖅᑐᖅ ᓂᕐᔪᑎᑦ ᐊᐅᓚᑕᐅᓂᐊᕐᒪᑕ ᐋᖅᑭᒋᐊᖅᑕᐅᔪᓐᓇᕐᓗᑎᒃ ᒪᓕᒃᑕᐅᔭᕆᐊᓕᖕᓄᑦ ᐱᐅᖅᓱᐊᓂᓕᕆᓯᒪᔪᓂ. ᓇᓄᐃ ᐊᐅᓚᑕᐅᓂᖏᓄᑦ ᐃᓱᒪᓕᐅᕈᑎᑦ ᐋᖅᑭᒃᑕᐅᓱᖑᕗᑦ ᓂᕐᔪᑎᓕᕆᓂᕐᒧᑦ ᐊᐅᓚᑦᑎᔨᑦ ᑲᑎᒪᔨᖏᓐᓄᑦ ᐊᒻᒪᓗ ᐊᖏᖅᑕᐅᓪᓗᑎᒃ ᑕᐃᑦᓱᒧᖓᓪᓗᐊᖅ ᒥᓂᔅᑕ ᑲᒪᒋᔭᓕᖕᒧᑦ ᓂᕐᔪᑎᓂᑦ ᑐᙵᕕᖃᕐᓗᑎᒃ ᑕᐃᒃᑯᓂᖓᓪᓗᐊᖅ ᐱᓕᕆᖃᑎᖃᒃᑐᓂᑦ ᐊᒻᒪᓗ ᐊᐱᖅᓱᖅᓂᒃᑯᑦ ᐱᓕᕆᐊᖑᓗᑎᒃ ᐱᓕᕆᖃᑕᐅᑎᑕᐅᓗᑎᒃ ᒐᕙᒪᒃᑯᑦ (ᒐᕙᒪᑐᖃᒃᑯᑦ, ᐊᕕᒃᑐᖅᓯᒪᔪᑦ, ᐅᕝᕙᓗᓂᑦ ᓄᓇᓕᖃᕐᕕᐅᔪᑦ), ᐃᖃᓇᐃᔭᕐᕕᖁᑎᑦ ᐃᓄᓕᒫᓂᑦ ᒐᕙᒪᓂᑦ, ᖃᐅᔨᓇᓱᐊᖅᑎᓂᑦ, ᐱᖅᑯᓯᒃᑯᑦ ᖃᐅᔨᒪᓂᓖᑦ ᑎᒍᒥᐊᖅᑎᑦ, ᐊᖑᓇᓱᐊᖅᑎᑦ ᐊᒻᒪᓗ ᐊᓯᖏᑦ ᓄᓇᖃᖄᒃᓯᒪᔪᑦ ᐱᓕᕆᖃᑎᒋᑦ ᑭᒡᒐᖅᑐᐃᔨᖏᑦ.
•  ᐊᖑᓇᓱᐊᕐᓂᖅ ᐊᐅᓚᑕᐅᖕᒪᑦ ᐱᔭᐅᖔᕈᓐᓇᕐᓗᓂ ᐱᔭᐅᖁᓗᒍ ᐊᑐᓂᖃᑦᑎᐊᖅᑐᖅ, ᐋᖅᑭᐅᒪᐃᓐᓇᖅᑎᑕᒃᓴᐃᑦ ᐅᓄᕐᓂᒃᑲᓐᓂᖏᑦ ᐊᒻᒪᓗ ᐱᕚᓪᓕᕈᑎᖃᒃᑎᐊᖅᑎᑦᑎᓂᕐᒥᑦ ᐊᐅᓚᑦᑎᓂᖅ ᐃᒻᒥᒃᑰᖓᓂᖏᑦ ᐊᖑᓇᓱᐊᒍᓐᓇᖅᑎᑕᐅᑎᓗᑎᒃ ᓄᓇᖃᖄᖅᓯᒪᔪᑦ ᐃᓄᖏᓐᓄᑦ ᐊᒻᒪᓗ ᓇᓐᓄᒍᓇᕐᓗᑎᒃ ᓴᐳᒥᓇᓱᒡᓂᕐᒥᖕᓄᑦ ᐃᓄᐃᑦ ᐃᓅᓯᕐᒥᖕᓂᑦ ᐊᒻᒪᓗ ᐱᖁᑎᒥᖕᓂᑦ. ᖃᐅᔨᓇᓱᐊᕐᓂᖅ ᐊᒻᒪᓗ ᖃᐅᔨᒪᒋᐊᖅᓯᔪᑦ ᒐᕙᒪᒋᔭᐅᔪᑦ, ᐱᖃᓯᐅᑎᓗᒋᑦ ᐅᓄᕐᓂᖏᓐᓂᑦ ᖃᐅᔨᒪᒋᐊᖅᓯᓃᑦ ᐊᒻᒪᓗ ᖃᐅᔨᓴᖅᓯᓂᑦ ᐊᖑᑦᔭᐅᔪᓄᑦ ᖃᐅᔨᒪᔪᑎᒃᓴᓂᑦ, ᐱᓕᕆᔪᓐᓇᕈᑕᐅᖕᒪᑕ ᑕᐃᒪᙵᓕᒫᖅ ᖃᐅᔨᓴᖅᑕᐅᔪᓐᓇᕐᓗᑎᒃ ᐊᒻᒪᓗ ᐋᖅᑭᒋᐊᖅᓯᔪᑕᐅᔪᓐᓇᕐᓗᑎᒃ ᐊᐅᓚᑦᑎᓂᕐᒥᑦ. ᐊᐅᓚᑦᑎᓂᕐᒧᑦ ᐱᓕᕆᔪᑎ ᐱᒋᐊᖅᖤᐅᑎᒋᔪᓐᓇᕐᒪᑦ ᐊᒻᒪᓗ ᐋᖅᑭᒋᐊᖅᓯᔪᓐᓇᕐᖢᓂ ᐊᖑᓇᓱᐊᖅᑕᐅᔪᑦ ᐅᓄᕐᓂᖏᓐᓂᑦ ᕿᓚᒥᐊᓗᒃ ᑕᐃᒪᓐᓇᐅᔭᕆᐊᖃᑐᐊᖅᐸᑕ. ᐅᓄᕐᓂᖏᓐᓂᑦ ᖃᐅᔨᒪᒋᐊᖅᓯᓂᖅ ᐊᑐᓲᖑᕗᖅ ᐱᓕᕆᐊᖑᔭᕆᐊᖃᓕᑐᐊᕋᖓᑕ ᐊᒻᒪᓗ ᓇᒪᓈᖅᑕᐅᒋᐊᓗᑎᒃ ᖃᐅᔨᒪᒋᐊᖅᓯᓂᑦ ᒪᓕᑐᐃᓐᓇᕐᒪᑕ ᐅᓄᕐᓂᖏᓐᓄᑦ ᖃᓄᐃᓕᖓᓂᖏᑕ, ᐱᖃᓯᐅᑎᓗᒋᑦ ᖃᐅᔨᒪᒋᐊᖅᓯᓂᕐᒧᑦ ᐱᓕᕆᔪᓯᑦ ᐊᑐᖅᑕᐅᓱᑦ, ᐊᐅᓚᑦᑎᓂᕐᒧᑦ ᐱᓕᕆᐊᖑᔪᒪᔪᑦ, ᐱᐅᖅᓱᐊᕐᓂᕐᒧᑦ ᐃᓱᒫᓗᑎᑦ, ᐊᒻᒪᓗ ᐱᑐᖃᐅᓂᖏᑦ ᐊᒻᒪᓗ ᐱᐅᓈᖅᓯᒪᓂᖏᑦ ᐱᔭᐅᔪᓐᓇᖅᑐᑦ ᖃᐅᔨᒪᔪᑎᒃᓴᐃᑦ. ᐊᖑᑦᔭᐅᔪᓂᑦ ᑐᓴᖅᑕᐅᑎᑦᑎᓂᖅ ᐱᖃᓯᐅᔾᔨᕗᖅ ᐃᓘᓇᖏᓄᑦ ᐃᓄᖕᓄᑦ−ᑕᐃᒪᓐᓇᐃᑎᑕᐅᓗᑎᒃ ᑐᖁᑕᐅᔪᓂᑦ, ᐊᖑᓇᓱᐊᖅᑐᓂᑦ ᐅᕝᕙᓗᓂᑦ ᓴᐳᒻᒥᓇᓱᐊᕐᓗᑎᒃ ᐃᓅᓯᕐᒥᖕᓂᑦ ᐅᕝᕙᓗᓂᑦ ᐱᖁᑎᒥᖕᓂᑦ.
• ᐊᖑᑦᔭᑕᐅᔪᑦ ᐊᒻᒪᓗ ᐊᐅᓚᖅᑎᑕᐅᔪᓄᑦ ᐃᓱᒪᓕᐅᕈᑎᑦ ᑐᙵᕕᖃᒃᑎᑕᐅᕗᑦ ᐅᓄᕐᓂᖏᓐᓄᑦ ᖁᒃᓴᓇᕈᑎᔪᓂᑦ ᖃᐅᔨᓴᖅᑕᐅᔪᑎᖏᓐᓂ ᐱᖃᓯᐅᔨᔪᑕᐅᓪᓗᑎᒃ ᐱᐅᖅᓱᐊᕐᓂᕐᒧᑦ ᖃᓄᐃᓕᖓᓂᐅᔪᓂᑦ ᐊᒻᒪᓗ ᐅᓗᕆᐊᓇᕈᑎᔪᓄᑦ, ᐊᐅᓚᑦᑎᓂᕐᒧᑦ ᐱᓕᕆᔪᑎᑦ ᐊᒃᓱᐊᓗᕈᓐᓃᖅᑎᑦᑎᔪᑕᐅᓇᓱᐊᕐᓗᑎᒃ ᑕᒪᒃᑯᓂᖓ ᐅᓗᕆᐊᓇᕈᑎᔪᓂᑦ ᐊᒻᒪᓗ ᖃᐅᔨᒪᒋᐊᖅᓯᓂᕐᒨᖓᔪᑦ ᐱᓕᕆᐊᖑᔭᕆᐊᓕᖕᓅᖓᔪᑦ. ᐅᖃᐅᔾᔨᒋᐊᕈᑎᖃᒃᑎᓪᓗᒋᑦ ᓄᓇᕐᔪᐊᓕᒫᒥ ᐊᐅᓚᑦᑎᑦᑎᓂᕐᒨᖓᔪᓂᒃ, ᑲᓇᑕᒥ ᓄᓇᕐᔪᐊᓕᒫᒥ ᓄᖑᑐᐃᓐᓇᕆᐊᓕᑦ ᑕᐅᖅᓯᕈᑕᐅᓂᖏᓄᑦ ᑲᑎᒪᓂᕐᔪᐊᒧᑦ (CITES) ᖃᐅᔨᓇᓱᐊᕐᓂᕐᒥ ᐱᔪᓐᓇᕐᓂᓕᑦ ᐃᓱᒪᒋᖃᓯᐅᔾᔨᓱᖑᕗᑦ ᐃᓘᓐᓇᓕᒫᖏᓐᓂᑦ ᐊᖑᑦᔭᐅᔪᓂᑦ ᐊᒻᒪᓗ ᐊᐅᓚᑦᑎᑕᐅᕙᒃᑐᓂᑦ ᖃᑦᓯᐅᓂᖏᓐᓂᑦ ᑐᕌᖓᑎᑕᐅᓗᑎᒃ ᐅᓄᕐᓂᖏᓐᓄᑦ ᐊᒥᒐᖏᓐᓂᖏᓐᓄᑦ ᐊᒻᒪᓗ ᖃᓄᐃᓕᕙᓪᓗᐊᓂᖏᓄᑦ ᑲᓇᑕᒥ. ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᔪᑦ ᐅᖃᐅᔨᒋᐊᕈᑎᖓᑦ ᐱᓕᕆᔪᑕᐅᓇᓱᐊᕐᓗᓂ ᐊᐅᓪᓚᖅᑎᑕᐅᖃᑦᑕᕐᓂᖏᓐᓄᑦ ᓇᓄᕐᓂᑦ ᐱᓂᕐᓗᒃᓯᔪᑕᐅᖁᓇᒍ ᐆᒪᐃᓇᖅᑎᑕᐅᓇᓱᐊᕐᓂᖏᓄᑦ ᑕᒪᒃᑯᐊ ᓂᕐᔪᑏᑦ. ᓄᓇᕐᔪᐊᓕᒫᒥ ᓄᖑᑐᐃᓐᓇᕆᐊᓕᑦ ᑕᐅᖅᓯᕈᑕᐅᓂᖏᓄᑦ ᑲᑎᒪᓂᕐᔪᐊᖅ (CITES) ᖃᐅᔨᓇᓱᐊᕐᓂᕐᒥ ᐱᔪᓐᓇᕐᓂᓖᑦ ᕿᒥᕐᕈᖃᓯᐅᔾᔨᓱᖑᒋᕗᑦ ᐊᐅᓚᑦᑎᓂᕐᒧᑦ ᐱᓕᕆᐊᖑᓇᓱᐊᖅᑐᓂᒃ ᐊᒻᒪᓗ ᐃᓱᒪᓕᐅᕈᑎᓂᒃ, ᐱᐅᖅᓱᐊᕐᓂᕐᒧᑦ ᖃᓄᐃᓕᖓᓂᐅᔪᓂᑦ, ᐊᒻᒪᓗ ᐊᖑᑦᔭᐅᔪᑦ ᐊᒻᒪᓗ ᑕᐅᖅᓯᖅᑕᐅᔪᑎᖏᑕ ᖃᑦᓯᐅᓂᖏᓐᓂᑦ 13 ᐅᓄᕐᓂᒃᑲᓐᓂᖏᓪᓄᑦ ᐊᒻᒪᓗ ᑐᕌᖓᔪᓄᑦ ᐊᐅᓚᑦᑎᓂᑦ ᐃᒻᒥᒃᑰᖓᓂᖏᓄᑦ.
• ᐊᕙᑎᐅᑉ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᑲᓇᑕ (ECCC) ᖃᐅᔨᓇᓱᐊᕐᓂᕐᒥ ᐱᔪᓐᓇᕐᓂᓖᑦ ᐅᔾᔨᖅᑐᑦᑎᐊᕐᓗᑎᒃ ᕿᒥᕐᕈᓱᖑᕗᑦ ᐊᒻᒪᓗ ᐱᓕᕆᑦᑎᐊᕋᓱᐊᕐᓗᑎᒃ ᖃᓄᐃᓕᖓᓕᕐᓂᖏᓐᓂ ᐊᒻᒪᓗ ᖃᓄᐃᓕᕙᓪᓕᐊᓂᖏᓐᓂ, ᑕᐅᖅᓰᓂᕐᒧᑦ ᖃᐅᔨᒪᔪᑎᒃᓴᑦ ᐊᒻᒪᓗ ᐊᐅᓚᑦᑎᓂᕐᒧᑦ ᑐᓴᐅᒪᔪᑎᒃᓴᑦ ᐃᓘᓐᓇᓕᒫᖏᓄᑦ ᐅᓄᕐᓂᒃᑲᓐᓂᐅᔪᓂ ᐊᒻᒪᓗ ᐊᔾᔨᓪᓗᐊᐸᓗᖏᓐᓂ ᐊᐅᓚᑦᑎᓂᑦ ᐃᒻᒥᒃᑰᖓᓂᖏᓐᓂ, ᐊᑐᕐᓗᑎᒃ ᒫᓐᓇᕋᑕᕐᓂᓴᓂᑦ ᓇᓄᐃᑦ ᐋᖅᑭᑦᑎᐊᖅᓯᒪᔭᕆᐊᖃᕐᓂᖏᓄᑦ ᑲᑎᒪᔨᕋᓛᑦ (COTB) ᖃᓄᐃᓕᖓᓕᕐᓂᖏᑕ ᑎᑎᕋᒃᓯᒪᓂᖏᓐᓂᑦ, ᐱᓪᓗᐊᑕᖁᑕᐅᓪᓗᑎᒃ ᑐᓴᐅᒪᔪᑎᒃᓴᖁᑕᐅᓂᖏᑦ. ᖃᐅᔨᓴᖅᓯᓂᖅ ᐃᒪᓐᓇᐅᔭᕆᐊᖃᕐᒪᑦ ᑭᑭᑦᑎᖏᓪᓗᓂ ᐅᖃᖃᑎᒌᒍᑎᒋᓗᒋᑦ ᐊᐅᓚᑦᑎᔨᑦ, ᓇᓄᐃᑦ ᐋᖅᑭᑦᑎᐊᖅᓯᒪᔭᕆᐊᖃᕐᓂᖏᓄᑦ ᑲᑎᒪᔨᕋᓛᖏᓐᓂᑦ (COTB) ᑭᒡᒐᖅᑐᐃᔨᓂᑦ ᐊᓯᖏᓐᓂᓪᓗ. ᐃᓚᒃᑲᓐᓂᖏᑦ ᐃᓱᒪᒋᔭᐅᖃᓯᐅᑎᔪᓐᓇᖅᑐᑦ ᐱᖃᓯᐅᔾᔨᕗᑦ:
  • ᐊᐅᓚᑦᑎᓂᕐᒧᑦ ᐱᓕᕆᐊᖑᔪᑦ ᐊᑐᓂ ᐃᒻᒥᒃᑰᖓᔪᓂ ᐋᖅᑭᒃᓱᖅᑕᐅᓯᒪᔭᕆᐊᖃᕐᒪᑕ ᐱᐅᖅᓱᐊᕐᓂᕐᒧᑦ ᑎᑭᑕᐅᓪᓚᕆᖁᓪᓗᒋᑦ ᐱᔭᐅᓗᑎᒃ, ᐱᔪᖃᕈᓐᓇᖅᑎᑕᐅᓗᓂᓗ ᐊᓯᖏᓐᓂᑦ ᐊᐅᓚᑦᑎᓂᕐᒧᑦ ᐱᔭᐅᔭᕆᐊᓕᖕᓂᑦ ᓱᕐᓗ ᒪᑯᓂᖓ ᓇᓐᓄᒍᓐᓇᕐᓗᑎᒃ ᓴᐳᒻᒥᓇᓱᐊᕐᓂᕐᒧᑦ ᐃᓄᑉ ᐃᓅᓯᕐᒥᖕᓂᑦ ᐊᒻᒪᓗ ᐱᖁᑎᒥᖕᓂᑦ.
  • ᖃᐅᔨᓇᓱᐊᕐᓂᕐᒥ ᐱᔪᓐᓇᕐᓂᓖᑦ ᖃᐅᔨᓴᖅᓯᓱᖑᒪᑕ ᐊᐅᓚᑦᑎᔨᑦ ᐃᓱᒪᓕᐅᕈᑎᖏᑦ ᐱᖃᓯᐅᔾᔨᑦᑎᐊᕋᓗᐊᒪᖔᑕ ᐃᖃᓇᐃᔭᖅᑎᓚᕆᐅᓂᕐᒧᑦ ᖃᐅᔨᓴᖅᓯᑦᑎᐊᕋᓗᐊᕐᒪᖔᑕ ᓇᓄᐃᑦ ᐋᖅᑭᑦᑎᐊᖅᓯᒪᔭᕆᐊᖃᕐᓂᖏᓐᓂ ᑲᑎᒪᔨᕋᓛᑦ (COTB), ᐱᖃᓯᐅᑎᓗᒋᑦ ᐅᓄᕐᓂᖏᑕ ᒥᒃᓴᐅᓴᒃᑕᐅᓯᒪᓂᖏᑦ, ᑕᐃᑦᓱᒪᓂ ᖃᓄᐃᓕᕙᓪᓕᐊᓂᕆᓚᐅᖅᑕᖏᑦ, ᓄᓇᓕᖕᓂ ᐅᕝᕙᓗᓂᑦ ᐱᖅᑯᓯᕐᒥᒍᑦ ᓄᓇᒥᐅᑕᓕᕆᓂᕐᒧᑦ ᖃᐅᔨᒪᓂᕐᒥᓄᑦ ᖃᐅᔨᓴᖅᓯᓂᕐᓂᑦ, ᒫᓐᓇᕋᑕᖅ ᖃᓄᐃᓕᕙᓪᓕᐊᓂᕆᓚᐅᖅᑕᖏᓐᓂᑦ, ᐊᒻᒪᓗ ᐊᑐᖅᑕᐅᑐᐃᓐᓇᕆᐊᓕᒃ ᓯᕗᓂᒃᓴᒥ ᖃᓄᐃᓕᕙᓪᓕᐊᓂᐅᔪᓐᓇᖅᑐᓂᑦ.
  • ᖃᐅᔨᓇᓱᐊᕐᓂᕐᒥ ᐱᔪᓐᓇᕐᓂᓖᑦ ᖃᐅᔨᓴᖅᓯᓂᖏᑦ ᐱᓕᕆᐊᖑᓱᖑᕗᑦ ᐊᑐᓂ−ᐱᓕᕆᐊᖑᓂᖏᑦ ᑐᙵᕕᒋᓗᒋᑦ ᑕᐃᒪᓐᓇᐃᔪᑕᐅᓪᓗᓂ ᐊᑐᓂ ᐅᓄᕐᓂᒃᑲᓐᓂᕆᔭᐅᔪᑦ ᐊᒻᒪᓗ ᑕᐃᒃᑯᓄᖓ ᑐᕌᖓᔪᑦ ᐃᒻᒥᒃᑰᖓᔪᑦ ᐊᔾᔨᐅᖏᒪᑕ ᒪᑯᑎᒎᓇ ᐊᕐᕌᒍᒥ ᖃᐅᔨᓇᓱᐊᖅᑕᐅᓂᖏᓐᓂ, ᖃᐅᔨᓇᓱᐊᖅᓯᓂᕐᒧᑦ ᐱᓕᕆᔪᓯᖏᓐᓂ ᐊᒻᒪᓗ ᑲᖐᒋᔭᐅᓂᖏᓐᓂ, ᐊᒻᒪᓗ ᖃᐅᔨᒪᒋᐊᖅᑕᐅᓪᓗᑎᒃ ᐱᓕᕆᐊᖑᓕᖃᑦᑕᕐᓂᖏᑦ.
  • ᖃᓄᐃᓕᖓᓂᖏᑦ ᑕᑯᔭᐅᔪᓐᓇᖅᐳᑦ ᐆᒃᑐᕋᒃᑕᐅᑦᖤᐅᑎᒋᓗᑎᒃ ᐅᓄᕐᓂᖏᑦ ᑕᐃᒪᓐᓇᐅᖏᓐᓇᕐᓗᑎᒃ (ᑐᑭᓕᐅᑎᓗᒍ ᐊᒥᒐᖏᓂᖏᑦ, ᐆᒪᑯᑖᖃᑦᑕᕐᓂᖏᓐᓂ ᐊᒻᒪᓗ ᓄᑕᔾᔨᖅᑕᓂᖏᓐᓂ) ᐱᕕᖃᕐᓂᖅ ᐊᓂᒍᖅᐸᓪᓕᐊᑎᓪᓗᒍ, ᐅᕝᕙᓗᓂᑦ ᐱᔾᔪᑎᖃᑦᑎᐊᕐᑐᓂᖓᕐᓗᓂ ᐊᓯᖏᓐᓂᑦ ᖃᐅᔨᒪᔪᑎᓴᐅᔪᓂᑦ ᓱᕐᓗ ᒪᑯᓇᖓᑦ ᐋᖅᑭᒃᓱᕈᑎ ᓇᓚᐅᑦᑎᔪᑕᐅᔪᓐᓇᖅᑐᓄᑦ. ᐃᒪᓇᐅᒐᔭᕐᓂᖅᐸᑦ ᖃᐅᔨᒪᔪᑎᒃᑯᑦ ᐋᖅᑭᒃᓯᔪᖃᕐᓂᖅᐸᑦ, ᖃᐅᔨᓇᓱᐊᕐᓂᕐᒥ ᐱᔪᓐᓇᕐᓂᓖᑦ ᖃᐅᔨᓇᓱᐊᕋᔭᕐᒪᑕ ᐱᓕᕆᔪᑕᐅᔭᕆᐊᓕᒃᑯᑦ ᖃᐅᔨᒪᒋᐊᖅᓯᓐᓂᕋᓗᐊᕐᒪᖔᑕ ᐸᕐᓇᒍᑎᒃᑰᖅᓯᒪᔪᓂᒃ ᐋᖅᑭᒃᓯᒪᔪᖃᕋᓗᐊᕐᒪᖓᑦ ᐊᒃᓱᐊᓘᕈᓐᓃᖁᓗᒍ ᖁᒃᓴᓇᕐᓂᖓᓄ ᑐᕌᖓᔪᖅ ᓇᓗᓈᕿᓂᖓᓄᑦ.
  • ᖃᐅᔨᓇᓱᐊᕐᓂᕐᒥ ᐱᔪᓐᓇᕐᓂᓖᑦ ᐃᓱᒪᒋᔭᖃᓱᖑᒪᑕ ᐅᓄᕐᓂᖅᐹᕆᔪᓐᓇᑕᖓᓂᑦ ᐅᓄᕐᓂᖃᕐᓗᑎᒃ ᓇᓄᐃᑦ ᐲᖅᑕᐅᔪᑦ ᐊᐅᓚᑦᑎᓂᐅᑉ ᐃᒻᒥᒃᑰᖓᓂᖓᓂᑦ ᐊᒻᒪᓗ ᐃᖃᓇᐃᔭᖅᑎᓚᕆᒡᒧᑦ ᐅᖃᐅᔨᒋᐊᕈᑕᐅᔪᖅ ᐋᖅᑭᐅᒪᑎᑦᑎᔪᓐᓇᕐᓗᓂ ᐊᖑᓇᓱᐊᕐᓂᕐᒧᑦ ᐊᑐᖅᑕᐅᔪᓐᓇᑐᐃᓇᕆᐊᓕᖕᒥᑦ. ᓈᓴᐅᓯᕆᐊᖑᓯᒪᓗᑎᒃ ᐋᖅᑭᐅᒪᑎᑕᒃᓴᐅᓂᖏᑦ ᐊᖑᑦᔭᐅᔪᓐᓇᖅᑐᑦ ᖃᑦᓯᐅᓂᖏᑦ ᐊᔾᔨᒌᖏᒪᑕ ᑕᒪᒃᑯᓇᓂ ᑲᓇᑕᐅᑉ ᓇᓄᖏᑕ ᐅᓄᕐᓂᒃᑲᓐᓂᖏᓐᓂ ᐊᒻᒪᓗ ᒪᓕᑐᐃᓐᓇᖅᖢᑎᒃ ᐅᓄᖅᓯᕙᓪᓕᐊᓂᖏᑕ ᐃᓕᖁᓯᖏᓐᓂᑦ, ᐅᓄᕐᓂᒃᑲᓐᓂᖏᑕ ᐊᓄᕐᓂᖏᓐᓂᑦ, ᖃᓄᐃᓕᕙᓪᓕᐊᓂᖏᓐᓂᑦ ᐊᒻᒪᓗ ᐃᓚᙵᖅᓯᒪᓕᖅᑎᓗᒋᑦ ᕿᑐᙱᐅᕈᓐᓇᕐᓂᖏᑦ ᐃᓗᐊᓂ ᐊᑐᓂ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᐅᔪᓂ. ᑕᒪᐃᑎᒍᑦ ᖃᐅᔨᒋᐊᕐᕕᒃᓴᐃᑦ ᐊᑐᖅᑕᐅᔪᓐᓇᕐᓗᑎᒃ, ᐅᓄᕐᓂᖏᓐᓄᑦ ᐱᓕᕆᔪᑕᐅᔪᓐᓇᖅᑐᑦ ᑕᑯᒃᓴᐅᑎᑦᑎᓯᒪᖕᒪᑦ ᐊᖑᑦᔭᐅᔪᑦ ᖃᑦᓯᐅᓂᖏᓐᓂᑦ 4.5% ᐳᓴᓐᑎᓂᑦ ᐋᖅᑭᐅᒪᑎᑕᒃᓴᐅᖕᒪᑦ ᑕᐃᒃᑯᑎᒎᓇᓪᓗᐊᖅ ᐱᓕᕆᐊᖑᒐᔭᕐᓂᖅᐸᑕ. ᑕᐃᒪᐃᒃᑲᓗᐊᖅᑎᓪᓗᒍ, ᐊᖑᑦᔭᐅᔪᑦ ᐅᓄᕐᓂᖏᑦ ᐅᖓᑖᓂᑉᐸᑕ ᐅᕝᕙᓗᓂᑦ ᑐᖔᓂᑉᐸᑕ ᑕᒪᓐᓇ ᐅᓄᕐᓂᖓ ᓈᒪᒍᓐᓇᕐᒪᑦ.
• ᑕᑯᓂᐊᖅᑕᑎᑦ ᖃᐅᔨᒪᔪᑎᒃᓴᓕᐊᖑᓯᒪᔪᑦ ᐃᑲᔪᖅᓱᐃᖕᒪᑕ ᖃᐅᔨᓇᓱᐊᕐᓂᕐᒥ ᐱᔪᓐᓇᕐᓂᓖᑦ ᐅᖃᐅᔨᒋᐊᕈᑎᖏᓐᓂᑦ ᑕᒪᓐᓇ ᐊᖑᓇᓱᐊᕐᓂᖅ ᓇᓄᕐᓂᑦ ᑲᓇᑕᒥ ᐋᖅᑭᐅᒪᑎᑕᒃᓴᐅᓂᖓᓂᑦ ᐊᒻᒪᓗ ᑕᐃᒪᓐᓇᐃᓂᖓᓄᑦ, ᐊᐅᓚᖅᑎᑕᐅᖃᑦᑕᖅᑐᑦ ᐱᓂᕐᓗᒃᓯᔪᑕᐅᓂᐅᓴᖏᒪᑕ ᐆᒪᑯᑖᖃᑦᑕᕐᓂᖏᓐᓂᑦ ᓇᓄᐃᑦ ᑕᖅᑳᓂᑐᐃᓐᓇᖅ:
  • ᐃᓘᓐᓇᓕᒫᖓᓂ, ᑐᙵᕕᒋᓗᒋᑦ ᐅᓄᕐᓂᖏᑦ ᐅᓂᒃᑳᓕᐊᖑᓯᒪᔪᑦ ᐊᖑᑦᔭᐅᕙᒃᑐᑦ ᑲᓇᑕᒥ 2015/2016-ᒥ ᐅᑯᓇᖓᑦ 540−ᓂᑦ, ᐊᖑᑦᔭᐅᓯᒪᔪᑦ ᐅᓄᕐᓂᖏᑦ ᐅᓄᖏᓐᓂᖅᓴᐅᖕᒪᑕ 3.5% ᐳᓴᓐᑎᖏᓐᓂᑦ ᒥᒃᓴᐅᓴᒃᑕᐅᓯᒪᔪᓂᑦ ᑲᓇᑕᐅᑉ ᓇᓄᖏᑕ ᐅᓄᕐᓂᖏᓐᓂᑦ ᐅᖓᑖᓂᒪᑕ 16,000 ᓇᓄᐃᑦ.
  • ᐊᑐᓚᐅᖅᑐᓂ ᐊᓂᒍᖅᑐᓂ ᑕᓪᓕᒪᓂ ᐊᕐᕌᒍᓂ (2012 ᑎᑭᓪᓗᒍ 2016), 281 ᓇᓄᐃᑦ ᐊᐅᓚᖅᑎᑕᐅᖃᑦᑕᓚᐅᕐᒪᑕ ᐊᕐᕌᒍᑕᒪᑦ ᑲᓇᑕᒥᑦ (ᐃᒪᓐᓇᑎᒋᐅᒐᔪᒡᓗᑎᒃ ᐊᑐᖅᑎᓪᓗᒋᑦ ᑕᓪᓕᒪᑦ ᐊᕐᕌᒎᑦ ᐅᓄᕐᓂᖏᑦ ᑎᒥᑦ ᐊᒻᒪᓗ ᐊᒥᖏᑦ ᑲᓇᑕᐅᑉ ᓄᓇᕐᔪᐊᓕᒫᒥ ᓄᖑᑐᐃᓐᓇᕆᐊᓕᑦ ᑕᐅᖅᓯᕈᑕᐅᓂᖏᓄᑦ ᑲᑎᒪᓂᕐᔪᐊᕐᒥ (CITES) ᐱᔪᓐᓇᐅᑎᑦ ᖃᐅᔨᒪᔪᑎᒃᓴᓕᐊᖑᓯᒪᔪᑦ 2012-2016), ᑭᒡᒐᖅᑐᐃᒪᑕ 1.8% ᐳᓴᓐᑎᓂᑦ ᑲᓇᑕᐅᑉ ᓇᓄᖏᑕ ᐅᓄᕐᓂᖏᓐᓂᑦ ᑎᑭᐅᒪᐸᓗᑎᒃ 16,000 ᓇᓄᕐᓄᑦ. ᑐᙵᕕᒋᓗᒋᑦ 2016−ᒥ ᖃᐅᔨᒪᔪᑎᓴᐃᑦ, ᒥᒃᓴᐅᓴᒃᑕᐅᓯᒪᔪᑦ 1.3% ᐳᓇᓐᑎᑦ ᑲᓇᑕᐅᑉ ᓇᓄᖏᑕ ᐅᓄᕐᓂᖏᑦ ᐃᓯᕈᓐᓇᕐᒪᑕ ᓄᓇᕐᔪᐊᓕᒫᒥ ᑕᐅᖅᓰᖃᑎᒌᒍᓇᕐᓂᕐᒧᑦ, ᐃᒪᓐᓇ, 203 ᓇᓄᐃᑦ ᐅᑯᓇᖔᕐᒪᑕ 16,000−ᓂᑦ ᓇᓄᕐᓂᑦ. ᐱᒪᕆᐊᓘᖕᒪᑦ ᐃᓱᒪᒋᖃᓯᐅᑏᓐᓇᕐᓗᒋᑦ ᑕᒪᒃᑯᐊ ᓇᓄᐃᑦ ᐃᓯᖅᐸᓪᓕᐊᔪᑦ ᑕᐅᖅᓰᔪᑕᐅᓂᖏᓐᓄᑦ ᓇᓪᓕᐊᖕᓂᑐᐃᓐᓇᖅ ᐊᑕᐅᓯᕐᒥ ᐊᕐᕌᒍᒥ ᓇᓪᓕᐊᖕᓃᑐᐃᓐᓈᕈᓐᓇᕐᒪᑕ ᐅᓄᖅᑐᓂᑦ ᐊᔾᔨᒌᖏᑦᑐᓂᑦ ᒫᓐᓇᕋᑕᖅ ᐊᖑᓇᓱᒃᑕᐅᓚᐅᖅᑐᓂᑦ ᓇᓪᓕᕉᑎᓂᕐᒥ ᐅᐊᑦᑎᐊᕈᑐᖃᓂᑦ ᑎᑭᐅᒪᔪᓐᓇᕐᒪᑕ ᐱᒋᐊᓕᕋᑖᕐᓂᖏᓐᓂᑦ 1980−ᐅᓚᐅᖅᑐᓂᑦ. ᑐᑭᓕᐅᑎᓗᒍ, ᐅᑯᓄᖓ ᓄᓇᕐᔪᐊᓕᒫᒥ ᓄᖑᑐᐃᓐᓇᕆᐊᓕᑦ ᑕᐅᖅᓯᕈᑕᐅᓂᖏᓄᑦ ᑲᑎᒪᓂᕐᔪᐊᕐᒥᑦ (CITES) ᐊᐅᓚᖅᑎᑦᑎᔪᑎᑦ ᐱᔪᓐᓇᐅᑎᑦ ᑎᑎᕋᒃᑕᐅᓯᒪᓚᐅᕐᒪᑕ 2013−ᒥ ᐊᒻᒪᓗ 2014−ᒥ, ᐃᒪᓇᑐᐃᓐᓇᐅᓚᑎᒃ 25% ᐳᓇᓐᑎᑦ ᐊᒦᑦ ᐊᐅᓚᖅᑎᑕᐅᔪᑦ ᑲᓇᑕᒥᑦ ᒪᑯᓇᖔᕐᓗᑎᒃ ᓇᓐᓄᒃᑕᐅᓯᒪᔪᓂᑦ ᒫᓐᓇᕋᑖᖑᓚᐅᖅᑐᖅ ᐊᖑᓇᓱᐊᕐᓂᕐᒧᑦ ᓇᓪᓕᕉᑎᓂᕐᒥᑦ. ᒫᓐᓇᕋᑕᖅ ᐱᔭᐅᔪᓐᓇᖅᑎᑕᐅᔪᑦ ᖃᐅᔨᒪᔪᑎᒃᓴᐃᑦ ᓇᓗᓇᐃᖅᓯᓚᐅᕐᒪᑕ ᐅᓄᕐᓂᖅᓴᐃᑦ ᓇᓄᐃᑦ ᐊᐅᓚᖅᑎᑕᐅᔪᑦ ᐃᓗᐊᓂ 5 ᐊᕐᕌᒍᓂ ᐊᖑᑦᔭᐅᓂᑰᓚᐅᕐᒪᑕ.
  • ᒥᒃᓴᐅᓴᒃᑕᐅᓯᒪᔪᑦ 65% ᐳᓴᓐᑎᑦ ᐅᓄᕐᓂᖏᓐᓂ ᓇᓄᐃᑦ ᑲᓇᑕᒥ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᔪᓃᒪᑕ ᑕᒪᒃᑯᓇᓂ ᒫᓐᓇᕋᑕᖅ (15 ᐊᕐᕌᒍᓂ) ᐅᓄᕐᓂᖏᑕ ᖃᓄᐃᓕᕙᓪᓕᐊᓂᖏᓐᓂ ᐅᓄᖅᓯᒃᑲᓐᓂᖅᓯᒪᓂᐅᓴᑐᐃᓐᓇᕐᒪᑕ ᐅᕝᕙᓗᓂᑦ ᓄᖑᑉᐸᓪᓕᐊᓇᑎᒃ/ᐃᒪᓇᐅᓂᐅᓴᑐᐃᓐᓇᖅᑐᑦ ᓄᖑᑉᐸᓪᓕᐊᖏᑦᑐᑦ (7 ᐅᑯᓇᖓᑦ 13−ᓂᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᐅᔪᓂᑦ). ᐃᒪᓐᓇᑎᒋᐸᓗᐃᑦ 7% ᐳᓴᓐᑎᑦ ᓇᓄᐃᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᒥᒪᑕ ᑕᒪᒃᑯᐊᓗ ᐅᓄᕈᓐᓃᖅᐸᓪᓕᐊᓂᐅᓴᑐᐃᓐᓇᖅᖢᑎᒃ (1 ᐅᑯᓇᖓᑦ 13-ᓂᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᒥ), ᐊᒻᒪᓗ ᐃᒪᓇᑎᒋᐸᓗᐃᑦ 28% ᐳᓴᓐᑎᑦ ᓇᓄᐃᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᒥ ᑕᒪᒃᑯᓇᓂᓪᓗᑎᒃ ᖃᓄᐃᓕᕙᓪᓕᐊᓂᖏᓐᓂ “ᓇᓗᓈᕿᓗᑎᒃ” (5 ᐅᑯᓇᖓᑦ 13-ᓂᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᓂᑦ). ᑕᐃᑦᓱᒪᓂ ᐊᓂᒍᖅᑐᓂ ᐊᕙᑎᑦ ᐊᕐᕌᒍᓂ, ᐃᓘᓇᑲᓇᖏᑦ ᐊᐅᓚᑦᑎᓂᕐᒥ ᐃᒻᒥᒃᑰᖓᓂᕐᒥ ᐊᐅᓚᑕᐅᓚᐅᕐᒪᑕ ᑎᑭᑦᑐᒪᔭᖃᕐᓗᑎᒃ ᓯᕐᓚᕈᓗᒃ ᐅᓄᖅᓯᒋᐊᖅᓯᒪᔪᓂᑦ ᐅᕝᕙᓗᓂᑦ ᓱᕐᕋᒃᓯᒪᖏᓪᓗᒋᑦ ᒫᓐᓇᓕᓴᐃᑦ ᐅᓄᕐᓂᖏᑕ ᐊᒥᓲᓂᖏᑦ ᒪᑯᑎᒍᓇ ᐊᕐᕌᒍᑕᒪᑦ ᓇᓐᓄᒃᑕᐅᔪᓐᓇᕐᓗᑎᒃ ᐊᒻᒪᓗ ᐊᕐᓇᑦ ᐊᖑᑕᐅᓗᑎᒡᓗᓂᑦ ᓂᕈᐊᖅᑕᐅᓯᒪᓗᑎᒃ ᐊᖑᑦᔭᐅᔪᓐᓇᕐᓗᑎᒃ ᐊᐅᓚᑕᐅᓗᑎᒃ ᐃᓘᓐᓇᑲᓴᖏᓐᓄᑦ ᐅᓄᕐᓂᒃᑲᓐᓂᖏᓐᓄᑦ. ᐊᑕᐅᓯᖅ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᖅ, ᐅᓄᖅᓯᒃᑲᓐᓂᕐᓂᐅᓴᑐᐃᓐᓇᕐᓗᑎᒃ ᐅᓄᕐᓂᖏᑕ ᖃᓄᐃᓕᕙᓕᐊᓂᖏᑦ, ᐊᐅᓚᑕᐅᓱᖑᒪᑦ ᖃᑦᓰᓐᓇᐅᓂᖅᓴᐅᓕᖅᑎᑕᐅᓇᓱᐊᕐᓗᑎᒃ ᐅᓄᕐᓂᖏᑦ ᓇᓄᐃᑦ ᐋᖅᑭᐅᒪᑎᑕᐅᖁᓗᒋᑦ ᖃᓄᐃᖏᑦᑎᐊᕐᓂᖏᑦ ᐅᓄᕐᓂᖏᑕ ᐊᒻᒪᓗ ᐱᓕᕆᐊᖑᖁᓗᒍ ᐱᕕᒡᔪᐊᓂᖅ ᐃᓄᓕᒫᓂᑦ ᐊᑦᑕᕐᓇᖏᑦᑐᒦᓐᓂᖅ ᐃᓱᒫᓗᑕᐅᔪᖅ ᐊᒻᒪᓗ ᐱᓕᕆᐊᖑᖁᓪᓗᒋᑦ ᐊᒃᑐᖅᑕᐅᓂᖏᑦ ᐊᓯᖏᑕ ᓂᕐᔪᑎᑦ (ᑎᖕᒥᐊᑦ ᑎᑭᖃᑦᑕᓱᑦ).

ᐃᑲᔪᖅᓱᐃᔪᑦ ᑐᓴᐅᒪᔪᑎᒃᓴᑦ

ᐆᒪᖃᑎᒋᑦᑐᑦ ᐃᓕᖅᑯᓯᖃᕐᓂᖏᑦ

ᓇᓄᐃᑦ ᐆᒪᑯᑖᒡᓂᖃᓱᖑᒪᑕ 20-30 ᐊᕐᕌᒍᓂᒃ, ᐊᒻᒪᓗ ᓱᒃᑲᐃᑦᑐᒥᑦ ᐱᕈᒃᐸᓪᓕᐊᓂᖃᓱᖑᓗᑎᒃ. ᐊᕐᓇᓪᓗᐃᑦ ᓄᓕᐊᖅᑕᐅᔪᓐᓇᖅᓯᓪᓗᑎᒃ ᐃᓐᓇᕈᓱᖑᒪᑕ ᐊᑯᓐᓂᖏᓐᓂ ᑎᓴᒪᓂᑦ ᐊᒻᒪᓗ ᐊᕐᕕᓂᓕᖕᓂᑦ ᐊᕐᕌᒍᖃᓕᖅᑎᓪᓗᒋᑦ ᐊᒻᒪᓗ ᐊᖑᓴᓪᓗᐃᑦ ᓄᓕᐊᖃᑦᑕᓕᓱᖑᓗᑎᒃ ᐊᑯᓐᓂᖏᓐᓂ ᐅᑭᐅᖃᓕᖅᑎᓪᓗᒋᑦ ᑎᓴᒪᐅᔪᖅᑐᓂᑦ ᐊᒻᒪᓗ 10−ᓂᑦ ᐅᑭᐅᖃᓕᖅᑎᓪᓗᖏᑦ. ᐊᕐᓇᓪᓗᐃᑦ ᓱᒃᑲᐃᑦᑐᐊᓗᖏᒥᑦ ᕿᑐᙱᐅᕈᓐᓇᖅᓯᓇᓱᐊᓱᖑᒪᑕ, ᐃᒪᓇᐅᒐᔪᒃᑐᑦ ᐃᕐᓂᐅᖃᑦᑕᕐᓗᑎᒃ ᐊᑕᐅᓯᕐᒥᑦ ᒪᕐᕉᒡᓂᓪᓘᓐᓂᑦ ᐊᑎᖅᑖᖕᓂᒃ ᐃᒪᓐᓇᑎᒋᐸᓗᖃᐃ ᓈᑐᐊᕋᖓᑕ ᐱᖓᓱᑦ ᐊᕐᕌᒍᑦ ᐊᒻᒪᓗ ᐊᑎᖅᑕᖏᑦ ᑕᑎᖃᐃᓇᓱᖑᓗᑎᒃ ᐊᕐᓇᒥᖕᓂᑦ ᐊᒻᒪᓗ ᑲᑎᖕᒪᑎᓐᓇᖅᖢᑎᒃ ᐊᕐᓇᕐᓗᖕᒧᑦ ᐃᒪᓇᑎᒋᐅᒐᔪᓗᑎᒃ 2.5 ᐊᕐᕌᒍᓄᑦ. ᐊᕐᓇᓪᓗᐃᑦ ᕿᑐᙱᐅᕈᓐᓇᕐᓂᖏᑕ ᑲᔪᓯᑦᑎᐊᕈᓐᓇᕐᓂᖏᑦ ᒪᓕᓪᓗᐊᑕᓱᖑᒪᑕ ᑎᒥᖏᑕ ᐊᖏᓂᖏᓐᓂᑦ ᐊᒻᒪᓗ ᖃᓄᐃᖏᓐᓂᖏᓐᓂᑦ ᐊᕐᓇᓪᓗᐃᑦ ᐱᒋᐊᓕᕐᓂᖓᓂ ᐊᒻᒪᓗ ᐃᓱᓕᑎᓪᓗᒍ ᐊᑐᖅᑎᓂᖏᑕ ᐅᑭᐅᒃᑯᑦ ᓂᕆᖏᑯᑖᒡᓂᖏᑦ. ᐆᒪᑯᑖᒡᓂᖏᑕ ᐊᑯᓂᐅᓂᖏᑦ ᐊᖑᓴᓪᓗᐃᑦ ᐊᒃᐸᓯᒡᓂᖅᓴᐅᖕᒪᑕ ᐊᕐᓇᓪᓗᖕᓂᑦ, ᐃᓚᒋᔭᐅᓪᓗᓂ ᐱᔪᑕᐅᓂᖓ ᐊᖑᓴᓪᓗᐃᑦ−ᓂᕈᐊᖅᑕᐅᓂᖅᓴᐅᓱᖑᓂᖏᓄᑦ ᐊᖑᓇᓱᐊᖅᑕᐅᑎᑕᐅᓗᑎᒃ.

ᓇᓄᐃᑦ ᖁᕝᕙᓯᓛᖑᒪᑕ ᐊᖑᓯᓇᓱᐊᖃᑦᑕᖅᑎᐅᓪᓗᑎᒃ ᓇᔪᒐᖃᐃᓐᓇᒐᔪᒡᓗᑎᒃ ᐆᒪᓂᕐᒥᖕᓂ ᑕᕆᐅᑉ ᓯᑯᖓᓂ. ᕿᑐᙱᐅᕈᓐᓇᖅᓯᓂᖏᑦ ᓇᓄᐃᑦ ᐅᓄᕐᓂᖏᓐᓂ ᐊᖏᓂᖅᐹᒥᑦ ᑕᑎᖃᕐᒪᑦ ᓯᐊᒻᒪᖅᓯᒪᓂᖓᓂᑦ, ᐊᑯᓂᐅᓂᖓᓂᑦ, ᐊᒻᒪᓗ ᐃᔾᔪᓂᖓᓂᑦ ᑕᕆᐅᑉ ᓯᑯᖓᑕ, ᑕᒪᓐᓇᓗ ᐱᕕᒃᓴᖃᕈᑕᐅᓪᓗᓂ ᐱᖃᑦᑕᕈᓐᓇᖅᓯᔪᑕᐅᓪᓗᓂ ᓂᕿᒋᓪᓗᐊᑕᖅᑕᒥᖕᓂᑦ, ᓇᑦᑎᕐᓂᑦ (Pusa hispida). ᒫᓐᓇᕋᑕᖅ ᖃᓄᐃᓕᕙᓪᓕᐊᓂᖓ ᑕᕆᐅᑉ ᓯᑯᖓᑕ ᐊᓯᕈᒃᑎᑦᑎᓯᒪᓕᕐᒪᑦ ᓇᓄᐃᑦ ᓯᐊᒻᒪᖅᓯᒪᓂᖏᓐᓂᑦ, ᕿᓇᔭᖕᓂᕐᒥᑦ ᐃᓕᖅᑯᓯᖃᓕᕐᓗᑎᒃ ᐊᒻᒪᓗ ᐱᖃᑦᑕᕈᓐᓇᕐᓂᖏᓐᓂᑦ ᓇᑦᑎᕐᓂᑦ, ᐱᓗᐊᙳᐊᖅᑐᒥᑦ ᐅᖅᑯᖔᖓᓂ ᓇᔪᒐᕐᒥ ᑎᑭᐅᒪᔪᓐᓇᖅᑕᖏᓐᓂ.

ᖃᓄᐃᓕᖓᓕᕐᓂᖏᑦ ᐊᒻᒪᓗ ᓯᕘᕋᓇᖅᑐᒦᔪᑎᖏᑦ

ᓇᓄᐃᑦ ᓇᔪᒐᖃᕐᒪᑕ ᐅᑭᐅᖅᑕᖅᑐᒥ ᓯᐊᒻᒪᖅᓯᒪᓂᖓᓂ ᐅᑭᐅᖅᑕᖅᑐᑉ ᓇᔪᒐᐅᓂᖓᓂ ᑲᓇᑕᒥ, ᖃᓛᑦᖠᓂ, ᓄᐊᐅᐃᒥ, ᐅᓛᓯᐊᒃᑯᓐᓂ ᐊᒻᒪᓗ ᐊᒥᐊᓕᒃᑲᓂ. ᑲᓇᑕᐅᑉ ᐅᓄᕐᓂᖏᑦ ᓇᓄᐃᑦ ᐃᒪᓐᓇᑎᒋᐅᖕᒪᑕ ᐅᖓᑖᓂᓪᓗᑎᒃ 16,000 ᓇᓄᐃᑦ, ᑕᒪᓐᓇᓗ ᒪᕈᓗᐊᕆᓪᓗᓂᐅᒃ ᐱᖓᓲᓕᓯᒪᓂᖏᓐᓂ ᒥᒃᓴᐅᓴᒃᑕᐅᓯᒪᔪᑦ ᓄᓇᕐᔪᐊᓕᒫᒥ ᑲᑎᑕᐅᓗᑎᒃ. ᓇᓄᐃᑦ ᒪᑯᓇᓃᒪᑕ ᐃᓘᓇᑲᓴᖏᓐᓂ ᑕᐃᑦᓱᒪᓂᐅᓚᐅᖅᑐᖅ ᑎᑭᐅᒪᔭᐅᓂᖏᓐ ᑲᓇᑕᒥ, ᒪᑯᓇᓂ ᒫᓂᑐᕙᒥ, ᓅᐸᓐᓛᒥ ᐊᒻᒪᓗ ᓛᐱᑐᐊᒥ, ᓄᓇᑦᓯᐊᒥ, ᓄᓇᕗᒻᒥ, ᐊᓐᑎᐅᕆᔪᒥ, ᑯᐱᐊᒃᒥ, ᐊᒻᒪᓗ ᔫᑲᓐ ᓄᓇᓕᖃᕐᕕᖓᓂ. ᑕᒪᐃᑎᒍ, ᑕᐃᒪᓐᓇ ᐃᓕᖅᑯᓯᑐᐃᓐᓇᐅᖕᒪᑦ ᐊᖏᔪᑦ ᓂᕿᒃᓴᖅᓯᐅᖅᑎᓄᑦ, ᓇᓄᐃᑦ ᖃᐅᔨᒪᔭᐅᖕᒪᑕ ᑲᑎᖕᒪᔪᐊᓗᓇᑎᒃ ᑕᒫᓂᓕᒫᖅ ᐅᑭᐅᖅᑕᕐᓂᖓᓂ ᐅᑭᐅᖅᑕᖅᑐᑉ.

ᓂᕆᐅᒋᔭᐅᓚᐅᖅᑐᖅ ᓯᑯᖃᕈᓐᓃᕐᓂᒃᓴᖓ ᑕᕆᐅᑉ ᓯᑯᖓᑕ ᐅᓗᕆᐊᓇᕈᑎᑐᐃᓐᓇᕆᐊᖃᕐᒪᑦ ᐊᒃᑐᐃᔪᓐᓇᕐᓂᖓᓄᑦ ᐊᑐᐃᓐᓇᖃᕐᕕᐅᔪᓐᓇᕐᓂᖓᓄᑦ ᓇᔪᒐᐅᔪᓐᓇᖅᑑᑉ ᐊᒻᒪᓗ ᐊᖑᓯᕕᐅᔪᓐᓇᕋᔭᕐᓂᖓᓂᑦ ᓇᓄᕐᓂᑦ ᐃᓘᓐᓇᓕᒫᖓᓂ ᑎᑭᐅᒪᔭᐅᔪᓂ ᑲᓇᑕᒥ, ᑕᐃᒪᐃᒃᑲᓗᐊᖅᑎᓪᓗᒍ ᐅᖃᐅᑕᐅᓯᒪᔪᖅ ᐱᕕᒃᓴᖃᓂᖅ ᐊᒻᒪᓗ ᐊᒃᓱᐊᓘᕐᓂᖓ ᐅᓗᕆᐊᓇᕐᓂᖓᓅᖓᔪᖅ ᐊᔾᔨᒌᖏᒪᑦ ᑎᑭᐅᒪᔭᐅᔪᓐᓇᖅᑐᓂ. ᐊᓯᖏᑦ ᐅᓗᕆᐊᓇᕈᓐᓇᕐᒪᑕ ᐱᖃᓯᐅᑎᓪᓗᒋᑦ ᓱᕈᕐᓇᖅᑐᑦ, ᐳᓚᕋᑐᓕᕆᓃᑦ, ᐅᖅᓱᐊᓗᒃᓴᓂᑦ ᐊᒻᒪᓗ ᐳᓪᓚᕐᓂᑦ ᕿᓇᔭᖕᓂᑦ ᐊᒻᒪᓗ ᐱᕙᓪᓕᐊᑎᑦᑎᓃᑦ, ᐊᒻᒪᓗ ᑕᕆᐅᒃᑯᑦ ᐅᒥᐊᕐᔪᐊᒃᑰᖅᑎᑦᑎᖃᑦᑕᕐᓂᑦ. ᑕᒪᒃᑯᐊ ᖃᓄᐃᓘᕈᑕᐅᔪᑦ ᐃᓱᒪᒋᔭᐅᓱᖑᒪᑕ ᐃᓱᒪᓕᐅᕈᑎᖃᕋᓱᐊᖅᑎᓗᒋᑦ ᒪᑯᓂᖓ ᐊᖑᓇᓱᐊᕐᓂᕐᒧᑦ ᐊᐅᓚᑦᑎᓂᕐᒥᑦ.

ᓇᓄᐃᑦ ᐱᔭᐅᔭᕆᐊᖃᕈᓐᓃᖅᑎᑕᐅᓯᒪᓕᓚᐅᕐᒪᑕ ᐃᓱᒫᓗᑕᐅᓕᕐᓂᖏᓐᓂᑦ ᑲᓇᑕᒥ ᐅᑯᑎᒎᓇ ᑲᓇᑕᓕᒫᒥ ᐆᒪᔪᐃᑦ ᖁᒃᓴᓇᖅᑐᒦᓕᖅᑐᓄᑦ ᒪᓕᒐᖏᑎᒍ ᑕᐅᕙᖓᓂᑦ 2011−ᒥᑦ, ᑭᖑᓂᖓᒍᑦ ᖃᐅᔨᓴᖅᑕᐅᒃᑲᓐᓂᓚᐅᖅᑎᓪᓗᒋᑦ ᑲᑎᒪᔨᕋᓛᑦ ᖃᓄᐃᓕᖓᓕᕐᓂᖏᓂ ᓄᖑᑐᐃᓐᓇᕆᐊᖃᓕᖅᑐᑦ ᓂᕐᔪᑎᓂ ᑲᓇᑕᒥ (COSEWIC). ᑲᑎᒪᔨᕋᓛᑦ ᖃᓄᐃᓕᖓᓕᕐᓂᖏᓂ ᓄᖑᑐᐃᓐᓇᕆᐊᖃᓕᖅᑐᑦ ᓂᕐᔪᑎᓂ ᑲᓇᑕᒥ (COSEWIC) ᐃᒻᒥᒃᑰᖓᒪᑕ ᐃᖃᓇᐃᔭᖅᑎᓚᕆᐅᓪᓗᑎᒃ ᑲᒪᒋᔭᖃᓕᑦ ᓇᓗᓇᐃᖅᓯᓂᕐᒥᑦ ᐊᒻᒪᓗ ᖃᐅᔨᓴᖅᓯᓂᕐᒥᑦ ᓂᕐᔪᑎᑦ ᐆᒪᔪᓂᑦ ᑲᙱᒋᔭᐅᔪᓂᑦ ᖁᒃᓴᓇᖅᑐᒦᓐᓇᓱᒋᔭᐅᓕᕐᓗᑎᒃ ᓄᖑᑐᐃᓐᓇᕆᐊᖃᓕᕐᓂᖏᓐᓄᑦ ᐅᕝᕙᓗᓂᑦ ᓄᖑᑕᐅᑐᐃᓐᓇᕆᐊᖃᓕᖕᓂᖏᓐᓄᑦ ᑲᓇᑕᒥ. ᐆᒪᔪᐃᑦ ᐊᔾᔨᐅᖏᑦᑐᒃᑯᑦ ᐃᓱᒫᓗᑕᐅᔪᑦ ᐅᓗᕆᐊᓇᖅᑐᒦᓕᑐᐃᓐᓇᕆᐊᖃᕐᒪᑕ ᐅᕝᕙᓗᓂᑦ ᓄᖑᑐᐃᓐᓇᕆᐊᖃᓕᕐᓗᑎᒃ ᐆᒪᔪᐃᑦ ᐱᔾᔪᑎᖃᕐᓗᑎᒃ ᑲᑐᔾᔭᐅᓗᑎᒃ ᓄᓇᒥᐅᑕᐃᑦ ᐃᓕᖅᑯᓯᖏᓄᑦ ᐊᒻᒪᓗ ᓇᓗᓇᐃᖅᑕᐅᓯᓚᔪᓄᑦ ᐅᓗᕆᐊᓇᖅᑐᒦᔪᑎᖏᓐᓄᑦ.

ᓇᓄᐃᑦ ᑲᑎᒪᔨᕋᓛᖏᑦ (CTOB) ᑲᓇᑕᓕᒫᒥ−ᖁᕝᕙᓯᒡᓂᐅᖕᒪᑕ ᖃᐅᔨᓇᓱᐊᕐᓂᕐᒥ ᐊᒻᒪᓗ ᓄᓇᖃᖄᒃᓯᒪᔪᑦ ᐱᖅᑯᓯᕐᒥᒍᑦ ᖃᐅᔨᒪᓂᕐᓂ (CTA) ᑲᑎᒪᔨᕋᓛᑦ ᐱᔭᕐᓂᖅᓯᕚᓪᓕᖅᑎᑦᑎᔪᑦ ᐊᐅᓚᑦᑎᓂᕐᒥ ᐃᓱᒪᓕᐅᕈᑎᓂᒃ ᐊᕕᒃᑐᖅᓯᒪᔪᓂ ᐊᒻᒪᓗ ᓄᓇᓕᖃᕐᕕᐅᔪᓂ ᐱᔭᐅᑎᑦᑎᓂᕐᒥᒍᑦ ᐊᕐᕌᒍᑕᒪᑦ ᖃᐅᔨᓴᖅᓯᔪᑎᓂᒃ ᖃᓄᐃᓕᖓᓕᕐᓂᖏᓐᓂ ᓇᓄᐃᑦ ᑐᙵᕕᒋᓗᒋᑦ ᖃᐅᔨᓇᓱᐊᕐᓂᑦ ᐊᒻᒪᓗ ᐃᓄᐃᑦ ᑲᐱᕇᑦ ᑲᓇᑕᒥ (CTA). ᓇᓄᐃᑦ ᑲᑎᒪᔨᕋᓛᑦ (CTOB) ᐃᓚᖃᕐᒪᑕ ᖃᐅᔨᓇᓱᐊᖅᑎᓂᒃ ᐊᕕᒃᑐᖅᓯᒪᔪᓃᖓᖅᑐᓂᑦ ᐊᒻᒪᓗ ᓄᓇᓕᖃᕕᐅᔪᓃᖓᖅᑐᓂᑦ ᐊᒻᒪᓗ ᐊᓯᖏᓐᓂᑦ ᐃᖃᓇᐃᔭᖅᑎᓚᕆᒡᓂᑦ, ᐱᖃᓯᐅᑎᓪᓗᒋᑦ ᓂᕐᔪᑎᓂᑦ ᐊᐅᓚᑦᑎᓂᕐᒥ ᑲᑎᒪᔨᓂᑦ ᐊᒻᒪᓗ ᐃᓄᖕᓂᑦ ᑭᒡᒐᖅᑐᐃᔨᓂᑦ. 2017 ᑐᓴᐅᒪᔪᑎᒃᓴᑦ ᐅᑯᓇᖔᖅᑐᑦ ᓇᓄᐃᑦ ᐋᖅᑭᑦᑎᐊᖅᓯᒪᔭᕆᐊᖃᕐᓂᖏᓄᑦ ᑲᑎᒪᔨᕋᓛᓂᑦ (CTOB) ᓇᓗᓇᐃᖅᓯᖕᒪᑕ ᐅᖓᑖᓂᑦᑐᑦ 50% ᐳᓴᓐᑎᖏᑕ ᑲᑎᓗᒋᑦ ᓇᓄᐃᑦ ᑲᓇᑕᒥ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᔪᓂᕐᒥ ᑕᒪᒃᑯᐊᓗ ᐅᓄᖅᓯᕙᓪᓕᐊᓪᓗᑎᒃ ᐅᕝᕙᓗᓂᑦ ᓄᖑᑉᐸᓪᓕᐊᓇᑎᒃ/ᐃᒪᓇᐅᓂᐅᓴᑐᐃᓐᓇᖅᑐᑦ ᓄᖑᑉᐸᓪᓕᐊᖏᑦᑐᑦ ᐅᓄᕐᓂᖏᓐᓂ (7 ᐅᑯᓇᖓᑦ 13−ᓂᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᓂᑦ). ᐅᓄᖏᓐᓂᖅᓴᐃᑦ 10% ᐳᓴᓐᑎᖏᓐᓂᑦ ᓇᓄᐃᑦ ᐅᑯᓇᓃᒪᑕ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᒥ ᖃᑦᓰᓐᓇᕈᒃᐸᓪᓕᐊᓂᐅᓱᑐᐃᓐᓇᖅᑐᓂ (1 ᐅᑯᓇᖓᑦ 13−ᓂᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᒥ), ᐊᒻᒪᓗ ᐃᒪᓐᓇᑎᒋᐸᓗᐃᑦ 35% ᐳᓴᓐᑎᑦ ᓇᓄᐃᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᒦᒪᑕ ᑕᒪᑯᐊᓗ ᖃᓄᐃᓕᕙᓪᓕᐊᓂᖏᑦ “ᓇᓗᓈᕿᓪᓗᑎᒃ” (5 ᐅᑯᓇᖓᑦ 13−ᓂᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᒥ). ᐅᓄᕐᓂᖅᓴᐃᑦ (ᒥᒃᓴᐅᓴᒃᑕᐅᓗᑎᒃ 65% ᐳᓴᓐᑎᑦ) ᓇᓄᐃᑦ ᑲᓇᑕᒥ ᐅᓄᕐᓂᒃᑲᓐᓂᖏᓐᓃᒪᑕ ᑕᒃᑯᐊᓗ ᐅᓄᖅᓯᕙᓪᓕᐊᓪᓗᑎᒃ, ᓄᖑᑉᐸᓪᓕᐊᓇᑎᒃ ᐅᕝᕙᓗᓂᑦ ᐃᒪᓇᐅᓂᐅᓴᑐᐃᓐᓇᕐᓗᑎᒃ ᓄᖑᑉᐸᓪᓕᐊᖏᑦᑐᑦ.

ᐊᖑᓇᓱᐊᖅᑕᐅᓂᖏᓐᓂᑦ ᐊᐅᓚᑦᑎᓂᖅ

ᑲᓇᑕ ᖃᐅᔨᒪᔭᐅᔪᑎᖃᕐᒪᑦ ᐊᐅᓚᑦᑎᑦᑎᐊᕈᓐᓇᕐᓂᖏᓐᓄᑦ ᓂᕐᔪᑎᑦ ᓄᖒᑦᑎᑦᑕᐃᓕᒪᔪᓐᓇᕐᓂᖏᓐᓂᑦ ᐱᓕᕆᓂᕐᒥᒍᑦ. ᑲᓇᑕᐅᑉ ᓄᓇᖃᖄᒃᓯᒪᔪᑦ ᐃᓄᖏᑦ ᐊᖑᓇᓱᐊᖃᑦᑕᖅᓯᒪᖕᒪᑕ ᓇᓄᕐᓂᑦ ᒪᑭᒪᓇᓱᐊᕈᑎᒋᓪᓗᒋᑦ ᑕᐅᓴᒐᓴᖏᓐᓂ ᐊᕐᕌᒍᓂ. ᐊᐅᓚᑕᐅᓪᓗᑎᒃ ᐊᖑᓇᓱᐊᕐᓂᑦ ᓇᓄᕐᓂᑦ ᐃᓘᓐᓇᑲᓴᖓᓂ ᑲᓇᑕᐅᑉ ᐊᑐᖅᑕᐅᓯᒪᖕᒪᑦ ᐅᓄᕐᓂᖅᓴᓄᑦ ᓇᓄᕐᓄᑦ ᑲᓇᑕᒥ ᑕᐃᒪᖓᓂᑦ 1970−ᖏᓐᓂᑦ. ᐊᐅᓚᑦᑎᓂᖅ ᓇᓄᐃᑦ ᐊᖑᓇᓱᐊᖅᑕᐅᓂᖏᓐᓂᑦ ᑲᓇᑕᒥ ᐱᓕᕆᐊᖑᓱᖑᒪᑦ ᑐᕌᒐᖃᕋᓱᐊᕐᓗᑎᒃ ᐊᑯᓂ ᑕᐅᕗᖓᑐᖃᒃ ᐅᓄᕐᓂᖏᑦ ᓄᖑᑕᐅᖁᓇᒋᑦ, ᐊᒻᒪᓗ ᐱᖃᓯᐅᑎᓪᓗᒋᑦ ᑐᖁᖃᑦᑕᕐᓂᖏᑦ ᑕᐃᒪᓐᓇᐃᑎᑕᐅᓪᓗᑎᒃ ᐃᓄᐃᑦ−ᓇᓄᕐᓂᒃ ᓴᙵᓪᓘᑎᓕᖅᑎᓪᓗᒋᑦ ᐊᒻᒪᓗ ᐃᓱᒫᓗᑎᖃᒃᑎᓪᓗᒋᑦ ᐃᓄᐃᑦ ᐊᑦᑕᕐᓇᖅᑐᒦᖁᓇᒋᑦ.

ᑲᓇᑕᐅᑉ ᐊᕕᒃᑐᖅᓯᒪᓂᖏᓐᓂ ᐊᒻᒪᓗ ᓄᓇᓕᖃᕐᕕᐅᔪᑦ ᐱᔪᓐᓇᕐᓂᖃᕐᕕᖃᕐᒪᑕ ᒪᓕᒐᓕᐅᕈᓐᓇᕐᓗᑎᒃ ᑐᕌᖓᔪᓂᒃ ᓇᖕᒥᓂᖅ ᓄᓇᒦᖓᖅᑐᓂᑦ ᑮᓇᐅᔭᓕᐅᕈᑎᒃᓴᓄᑦ, ᐱᖃᓯᐅᑎᓪᓗᒋᑦ ᓂᕐᔪᑎᑦ ᐊᒻᒪᓗ ᓂᕐᔪᑎᓂᒃ ᐊᐅᓚᑦᑎᓂᕐᒥᑦ, ᑕᒫᓂᑐᐊᖅᐸᑕ ᐃᓗᐊᓂ ᐊᕕᒃᑐᖅᓯᒪᔪᓂ ᐅᕝᕙᓗᓂᑦ ᓄᓇᓕᖃᕐᕕᐅᔪᓂ. ᒐᕙᒪᑐᖃᒃᑯᑦ ᐱᔪᓐᓇᕐᓂᖃᕐᕕᖃᕐᒪᑕ ᒪᓕᒐᓕᐅᕈᓐᓇᕐᓗᑎᒃ ᑐᕌᖓᔪᓂᑦ ᓇᖕᒥᓂᖅ ᓄᓇᖁᑎᒥᖕᓄᑦ ᐊᒻᒪᓗ ᐋᖅᑭᒃᓯᔪᓐᓇᕐᓗᑎᒃ-ᐱᔪᓐᓇᕐᓂᖃᕕᒋᔭᒥᖕᓂᑦ ᐊᒻᒪᓗ ᓄᓇᕐᔪᐊᓕᒫᒥ ᐱᓕᕆᐊᖑᔭᕆᐊᓕᖕᓂ. ᐃᓄᐃᑦ ᐱᖃᕐᒪᑕ ᓇᖕᒥᓂᖅ-ᒐᕙᒪᖃᕐᓗᑎᒃ ᒪᑯᑎᒎᓇ ᓄᓇᑖᕈᑎᑦ ᐊᖏᖃᑎᒋᒍᑎᒥᒍᑦ ᐃᓕᓴᕆᔭᐅᓯᒪᔪᒃᑯᑦ ᑲᓇᑕᐅᑉ ᒪᓕᒐᕐᔪᐊᖓᒍᑦ. ᓂᕐᔪᑎᓂ ᐊᐅᓚᑦᑎᓂᕐᒧᑦ ᑲᑎᒪᔨᑦ, ᐃᓚᖃᕐᒪᑕ ᓄᓇᖃᖄᖅᓯᒪᔪᑦ ᐃᓄᖏᓐᓂᑦ ᐊᒻᒪᓗ ᒐᕙᒪᒃᑯᓐᓂ ᑭᒡᒐᖅᑐᐃᔨᓂᑦ, ᐋᖅᑭᒃᑕᐅᓯᒪᓪᓗᑎᒃ ᓄᓇᑖᕈᑎᑦ ᐊᖏᖃᑎᒋᒍᑎᖏᑎᒍ ᐃᒪᓐᓇᐅᔪᓐᓇᖅᓯᓪᓗᑎᒃ ᓂᕐᔪᑎᑦ ᐊᐅᓚᑕᐅᓂᖏᓐᓂ ᐃᓱᒪᓕᐅᕈᑎᖃᕈᓐᓇᖅᓯᓗᑎᒃ ᐊᕝᕙᓗᓂᑦ ᐱᖁᔨᕗᖔᕈᑎᓕᐅᕈᓐᓇᖅᓯᓗᑎᒃ, ᑕᒪᒃᑯᐊᓗ ᑐᓂᔭᐅᕙᒡᓗᑎᒃ ᑐᓂᓯᕕᐅᔭᕆᐊᓕᖕᓄᑦ ᐊᕕᒃᑐᖅᓯᒪᔪᓄᑦ, ᓄᓇᓕᖃᕐᕕᐅᔪᓄᑦ, ᐊᒻᒪᓗ ᑲᓇᑕᓕᒫᒧᑦ ᒥᓂᔅᑕᒋᔭᐅᔪᓄᑦ, ᐃᓱᒪᒃᓴᖅᓯᐅᕈᑕᐅᖁᓪᓗᒋᑦ ᐊᒻᒪᓗ ᐋᖅᑭᒃᑕᐅᔪᓐᓇᖅᓯᖁᓪᓗᒋᑦ. ᐊᑐᓂ ᐱᔪᓐᓇᕐᓂᖃᕐᕕᐅᔪᑦ ᐋᖅᑭᒃᓯᓱᖑᒪᑕ ᐊᐅᓚᑦᑎᓂᕐᒧᑦ ᐃᓱᒪᓕᐅᕈᑎᓂᒃ ᒪᓕᒡᓗᒋᑦ ᓇᖕᒥᓂᖅ ᐱᔪᓐᓇᕐᓂᖃᕐᕕᒋᔭᖏᑕ ᐱᓕᕆᔪᑎᖃᕈᓐᓇᕐᓂᖏᑦ. ᐱᑕᖃᒃᑎᓪᓗᒍ ᐱᖃᖃᑎᒋᒡᓂᕐᒥᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᓂᑦ, ᐊᐅᓚᑦᑎᓂᖅᑕᖃᓱᖑᒪᑦ ᒪᑯᓇᓂ ᐊᕕᒃᑐᖅᓯᒪᔪᓂ, ᓄᓇᓕᖃᕐᕕᐅᔪᓂ ᐊᒻᒪᓗ ᒐᕙᒪᑐᖃᒃᑯᓐᓂ, ᐱᓕᕆᐊᕆᔭᕐᓂᖅᓯᑎᑕᐅᓪᓗᑎᒃ ᓇᓄᓕᕆᓂᕐᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᓂᑦ (PBAC) ᐊᒻᒪᓗ ᐊᓯᖏᓐᓂᑦ ᓄᓇᓕᖃᕐᕕᒡᔪᐊᓂᑦ ᑕᐃᒪᓐᓇᐅᔪᓐᓇᑐᐊᖅᐸᑕ. ᓇᓄᓕᕆᓂᕐᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᓂᑦ (PBAC) ᐃᓚᖃᕐᒪᑕ ᐊᕕᒃᑐᖅᓯᒪᔪᓂ ᐊᒻᒪᓗ ᓄᓇᓕᖃᕐᕕᐅᔪᓂ ᓂᕐᔪᑎᓕᕆᓂᕐᒧᑦ ᑐᑭᒧᐊᖅᑎᑦᑎᔨᓂᑦ, ᑭᒡᒐᖅᑐᐃᔨᓂᑦ ᓂᕐᔪᑎᑦ ᐊᐅᓚᑕᐅᓂᖏᓐᓄᑦ ᑲᑎᒪᔨᓂᑦ ᐊᒻᒪᓗ ᐃᓄᐃᑦ ᐃᖃᓇᐃᔭᕐᕕᖁᑎᖏᓐᓂ.

ᐊᑐᖅᑕᐅᔪᑦ ᓂᕐᔪᑎᓕᕆᓂᕐᒥ ᒪᓕᒐᑦ ᐊᒻᒪᓗ ᑕᒪᒃᑯᓄᙵᖓᔪᑦ ᒪᓕᒃᑕᐅᔭᕆᐊᓕᑦ, ᐋᖅᑭᒃᓯᔪᓐᓇᕐᓗᑎᒃ−ᐱᔪᓐᓇᕐᓂᖃᕐᕕᒋᔭᒥᖕᓂ ᐊᖏᖃᑎᒋᒍᑎᑦ, ᓄᓇᑖᕈᑎᑦ ᐊᖏᖃᑎᒋᒍᑎᖏᓐᓂ ᐊᒻᒪᓗ ᓄᓇᕐᔪᐊᓕᒫᒥ ᐊᖏᖃᑎᒋᒍᑎᑦ ᑎᑎᕋᒃᑕᐅᓯᒪᕗᑦ ᐃᓱᐊᓂ ᑖᒃᑯᐊ ᑎᑎᕋᒃᓯᒪᔪᖁᑎᑦ.

ᑕᒪᒃᑯᐊᖑᑎᓪᓗᒋᑦ ᑕᐃᒃᑯᓄᖓᓗᐊᖅ ᑎᑭᑕᐅᔪᒪᓂᖏᑦ ᐊᔾᔨᒌᖏᒪᑕ ᒪᑯᓇᓂ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᓂ, ᐱᖃᓯᐅᔾᔨᓯᒪᔪᑦ ᐊᐅᓚᑦᑎᓂᕐᒧᑦ ᐱᓕᕆᐊᖑᔪᒪᔪᓂᑦ ᒪᑯᓇᓂ ᓇᓄᐃᑦ ᐅᓄᕐᓂᖏᓄᑦ ᑲᓇᑕᒥ ᐃᒪᓐᓇᐃᓕᓯᒪᖕᒪᑕ ᑕᑯᓂᐊᖅᐸᑎᑦ:

• ᐊᑐᓪᓚᕆᖁᓪᓗᒋᑦ ᑲᓇᑕᐅᑉ ᓇᓄᖏᑕ ᐅᓄᕐᓂᖏᑦ ᓱᕐᕌᖁᓇᒋᑦ ᐊᒥᒐᖏᓪᓗᑎᒃ ᐊᒻᒪᓗ ᑭᖑᕚᓕᐅᑦᑎᐊᕐᓗᑎᒃ
• ᓄᐊᑦᑎᓗᓂ ᐱᖅᑯᓯᒃᑯᑦ ᓄᓇᒥᐅᑕᓕᕆᓂᕐᒥ ᖃᐅᔨᒪᓂᕐᓂᑦ (TEK) ᐊᒻᒪᓗ ᖃᐅᔨᓇᓱᐊᕐᓂᕐᒧᑦ ᖃᐅᔨᒪᔪᑎᒃᓴᓂᒃ ᓇᒪᓈᕈᑎᓯᒪᔪᓂᑦ ᑐᙵᕕᖃᕐᓗᑎᒃ ᒪᓕᒃᑎᑕᐅᑦᑎᐊᖁᓗᒋᑦ ᐊᐅᓚᑦᑎᓂᕐᒧᑦ ᐃᓱᒪᓕᐅᕈᑎᖃᕐᓂᑦ
• ᐊᐅᓚᑕᐅᖁᓗᒋᑦ ᓇᓄᐃᑦ ᐊᖏᓛᒥᑦ ᐱᕚᓪᓕᕈᑕᐅᓪᓚᕆᖁᓗᒋᑦ ᐃᓄᖕᓂᑦ ᐊᓪᓚᓂᓪᓗ ᐊᖑᓇᓱᐊᖅᐸᒃᑐᓂᑦ ᐊᑕᐅᑦᑎᒃᑰᖅᑎᑕᐅᓗᑎᒃ ᐊᑐᕐᓂᖃᑦᑎᐊᖅᑎᑕᐅᓚᕆᖁᓪᓗᒋᑦ ᐱᐅᖅᓱᕐᓂᑦ ᓇᓄᕐᓂᑦ ᒪᓕᒡᓗᒋᑦ ᐱᐅᓛᑦ ᑐᓴᐅᒪᔪᑎᒃᓴᐃᑦ ᐊᑐᐃᓐᓇᐅᑎᑕᐅᔪᑦ, ᐱᖃᓯᐅᑎᓗᒋᑦ ᑕᒪᐃᑎᒍᑦ ᐊᖑᓇᓱᐊᕐᓃᑦ, ᐃᓄᐃᑦ−ᓇᓄᐃᓪᓗ ᓵᙵᓪᓗᐊᖃᑕᐅᑎᑎᓪᓗᒋᑦ ᐊᒻᒪᓗ ᓴᐳᒻᒥᓗᑎᒃ ᓇᓐᓄᒃᑕᐅᖃᑦᑕᕐᓂᖏᑦ ᖃᐅᔨᒪᔪᑎᒃᓴᓕᐊᖑᓯᒪᔪᑦ, ᐊᒻᒪᓗ ᐊᐅᓚᑦᑎᓂᕐᒧᑦ ᐱᓕᕆᐊᖑᔪᒪᔪᑦ
• ᖃᐅᔨᒪᒋᐊᕐᓗᒋᑦ ᓇᓄᐃᑦ ᐃᓗᐊᓂᑦᑐᑦ ᑲᓇᑕᐅᑉ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᒥ, ᓯᕗᓪᓕᐅᑎᔭᕆᐊᖃᒃᑐᓕᐅᕐᓗᓂ ᖃᐅᔨᓴᖅᑕᐅᔭᕆᐊᖃᕐᓂᖏᓐᓄᑦ ᐊᒻᒪᓗ ᖃᐅᔨᓴᕐᓗᒋᑦ ᐊᑐᓕᖅᑎᑕᐅᓯᒪᔪᑦ ᐊᐅᓚᑦᑎᓂᕐᒧᑦ ᐱᓕᕆᔪᑎᑦ ᐊᒻᒪᓗ ᐱᔭᐅᔭᕆᐊᖃᕐᓂᖏᓄᑦ ᓄᑖᑦ ᖃᐅᔨᒪᔪᑎᒃᓴᐃᑦ
• ᓇᓗᓇᐃᖅᑕᐅᓗᑎᒃ ᑕᐃᑯᓄᖓᓪᓗᐊᖅ ᐊᐅᓚᑦᑎᓂᕐᒧᑦ ᐱᓕᕆᔪᑎᑦ ᐊᑐᕐᓂᖃᑦᑎᐊᖅᑐᑦ ᐊᖑᓇᓱᒃᑕᐅᔭᕆᐊᖃᕐᓂᖏᓄᑦ ᐊᒻᒪᓗ ᒪᓕᑦᑎᐊᖅᓯᒪᖕᒥᓗᑎᒃ ᐊᑐᑦᑎᐊᕐᓂᖏᓄᑦ ᓄᓇᓕᖃᕕᐅᔪᓄᑦ, ᐊᕕᒃᑐᖅᓯᒪᔪᓄᑦ, ᐊᒻᒪᓗ ᑲᓇᑕᓕᒫᒥ ᒪᓕᒃᑕᐅᖁᔭᐅᔪᓄᑦ ᐱᖃᓯᐅᑎᓗᒋᑦ ᓄᓇᕐᔪᐊᓕᒫᒥ ᐊᖏᖃᑎᒋᒍᑎᑦ
• ᐊᖏᓛᖑᓕᖅᑎᒋᐊᕐᓗᒍ ᐊᒻᒪᓗ ᐊᑐᖅᑕᐅᑎᓐᓇᓱᐊᖏᓪᓗᒍ ᐃᓄᐃᑦ−ᓇᓗᐃᓪᓗ ᓴᙵᓪᓗᐊᖃᑕᐅᑎᔭᕆᐊᖃᓕᕐᓂᖏᑦ ᐊᒻᒪᓗ ᓴᐳᒻᒥᓗᑎᒃ ᓇᓐᓄᖃᑦᑕᕐᓃᑦ ᓄᓇᓕᒃᑎᒍ, ᐊᐅᓚᖅᓯᒪᕕᐅᔪᓂ, ᐳᓚᕋᑦᑐᓕᕆᓂᕐᒥ ᐊᒻᒪᓗ ᓴᓇᕕᖁᑎᖃᕐᕕᐅᔪᓂ
• ᒥᑭᓛᖑᑎᓐᓇᓱᐊᕐᓗᒋᑦ ᐊᑲᐅᓈᖏᔪᑎᓂᕐᒧᑦ ᐊᒃᑐᐃᓃᑦ ᐃᓄᐃᑦ ᐱᓕᕆᓂᖏᓐᓂ, ᐱᓗᐊᙳᐊᖅᑐᒥᑦ ᑮᓇᐅᔭᓕᐅᕋᓱᐊᕐᓂᕐᒥᑦ ᐱᓕᕆᓃᑦ ᓱᕐᓗ ᒪᑯᐊ ᐃᒪᐃᓐᓇᕐᒥ ᐱᕙᓪᓕᐊᑎᑦᑎᓇᓱᒃᑐᑦ, ᐅᒥᐊᕐᔪᐊᒃᑰᖅᑎᑦᑎᓂᕐᒥ, ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᐅᓂᖅᓯᐅᕆᔪᓂ, ᓇᓄᕐᓄᑦ ᐊᒻᒪᓗ ᓇᓄᐃᑦ ᓇᔪᒐᕆᔪᓐᓇᖅᑕᖏᓐᓂ
• ᐋᖅᑭᐅᒪᑎᑦᑎᓇᓱᐊᕈᑎᒋᓗᒋᑦ ᐱᓕᕆᔪᑎᖓᓂᑦ ᑕᒪᐃᑎᒍᑦ ᓂᕕᖓᑖᖃᕐᓂᕐᒥᑦ, ᐱᔪᓐᓇᐅᑎᖃᕐᓃᑦ ᐊᒻᒪᓗ ᐱᓕᕆᔪᓐᓇᖁᑎᖃᕐᓃᑦ ᐱᔭᐅᓯᒪᔭᕆᐊᖃᒃᑎᑕᐅᔪᑦ ᓵᑕᒃᓴᐅᔪᓐᓇᓚᕆᖁᓪᓗᒋᑦ ᓇᓄᐃᑦ ᐊᖑᓇᓱᐊᖅᑕᐅᑎᓪᓗᒋᑦ ᐊᒻᒪᓗ ᓇᓄᕋᔭᐃᑦ ᓂᐅᕕᐅᒃᓴᐅᔪᓐᓇᕐᓂᖏᓐᓂᑦ

ᐊᐅᓚᑦᑎᓂᕐᒥ ᐱᓕᕆᓇᓱᐊᕐᓂᑦ ᐊᑐᓂ ᓇᓄᐃᑦ ᐅᓄᕐᓂᒃᑲᓐᓂᖏᓐᓂ ᐊᒻᒪᓗ ᒪᒃᑯᓄᙵᖓᔪᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᔪᓄᑦ ᐋᖅᑭᒍᑎᑦᑎᐊᕈᓐᓇᕆᐊᖃᕐᒪᑕ ᐱᔭᐅᔪᓐᓇᖁᓗᒋᑦ ᐋᖅᑭᒋᐊᕈᑕᐅᓂᖏᑦ ᐊᖑᓇᓱᐊᕐᓂᕐᒧᑦ ᐅᓄᕐᓂᕆᔭᐅᔪᓄᑦ ᐃᓄᓕᒫᑦ ᐊᑦᑕᕐᓇᖅᑐᒦᖁᓇᒋᑦ ᐊᒻᒪᓗ ᓄᓇᖃᖄᒃᓯᒪᔪᓄᑦ ᐊᖑᓇᓱᐊᖅᑕᐅᔪᓐᓇᖁᓪᓗᒋᑦ, ᒪᓕᑦᑎᐊᖅᑕᐅᓯᓐᓇᖅᑎᓪᓗᒋᑦ ᓈᓚᑦᑎᐊᕐᓗᑎᒃ ᓈᖑᑦᑎᑦᑕᐃᓕᒪᓃᑦ ᒪᓕᒃᑕᐅᔭᕆᐊᓕᑦ. ᐊᖑᓇᓱᐊᕐᓂᖅ ᐱᕕᖃᒃᑎᑦᑎᔪᖅ ᐋᖅᑭᐅᒪᓂᕐᒥᑦ ᒫᓐᓇᓕᓴᕐᓂ ᐅᓄᕐᓂᖏᑕ ᐊᒥᓲᓂᖏᓐᓂ ᑎᑭᑕᐅᓇᓱᐊᕐᒪᑦ ᐃᓘᓇᑲᓴᖏᓐᓄᑦ ᐊᐅᓚᑦᑎᓂᕐᓄᑦ (87% ᐳᓴᓐᑎᖏᑦ ᓇᓄᐃᑦ) ᑲᓇᑕᒥ.

ᐊᐅᓚᑦᑎᓂᕐᒧᑦ ᐃᓱᒪᓕᐅᕈᑎᑦ ᑐᙵᕕᖃᕐᒪᑕ ᓇᓗᓇᐃᖅᑕᐅᓯᒪᓂᖏᓐᓂᑦ ᐊᒻᒪᓗ ᖃᐅᔨᓴᖅᑕᐅᓂᖏᓐᓂᑦ ᐱᐅᓛᓂᑦ ᐊᑐᐃᓐᓇᐅᔪᑦ ᖃᐅᔨᓇᓱᐊᕐᓂᕐᒧᑦ ᖃᐅᔨᓇᓱᐊᕈᑎᓂᑦ, ᐱᖃᓯᐅᑎᓪᓗᒋᑦ ᖃᐅᔨᓴᖅᑕᐅᓯᒪᔪᑦ ᓇᓄᐃᑦ ᐋᖅᑭᑦᑎᐊᖅᓯᒪᔭᕆᐊᖃᕐᓂᖏᓄᑦ ᑲᑎᒪᔨᕋᓛᓂᑦ (CTOB) ᐊᒻᒪᓗ ᐱᖅᑯᓯᒃᑯᑦ ᓄᓇᒥᐅᑕᓕᕆᓂᕐᒥ ᖃᐅᔨᒪᓃᑦ (TEK), ᐊᖑᓇᓱᐊᕐᓂᕐᒧᑦ ᖃᐅᔨᒪᔪᑎᒃᓴᓕᐊᖑᓯᒪᔪᑦ ᐊᒻᒪᓗ ᐅᓄᕐᓂᖏᑕ ᖃᓄᐃᓕᕙᓪᓕᐊᓂᖏᑕ ᓴᖅᑭᑎᑕᐅᓯᒪᔪᑦ ᐋᖅᑭᒃᓱᕈᑎᑦ ᓴᓇᔾᔪᑎᖏᓐᓂᑦ. ᓇᓄᐃᑦ ᐊᖑᓇᓱᐊᖅᑕᐅᓂᖏᑦ ᐊᐅᓚᑕᐅᖕᒪᑕ ᐊᑐᖅᑕᐅᖔᓕᕈᓐᓇᖅᑐᒃᑯᑦ ᐊᐅᓚᑦᑎᓂᑦ ᐋᖅᑭᒃᓱᖅᓯᒪᓂᖏᑎᒍᑦ, ᑕᒪᓐᓇᓗ ᑐᑭᖃᕐᒪᑦ ᑲᔪᓯᑦᑎᐊᓂᖏᓐᓂᑦ ᑕᐃᒃᑯᐊᓪᓗᐊᖅ ᐊᐅᓚᑦᑎᓂᕐᒧᑦ ᐱᓕᕆᓂᐅᔪᓂᑦ ᓈᒪᒃᓯᑐᐊᕋᖓᑦ ᖃᐅᔨᓴᖅᑕᐅᖃᒃᑕᖅᑐᓂᑦ ᐊᒻᒪᓗ ᐋᖅᑭᒋᐊᖅᑕᐅᕙᒡᓗᑎᒃ ᑕᐃᒪᓐᓇᐅᔭᕆᐊᖃᑐᐊᕌᖓᑕ.

ᑲᓇᑕᓕᒫᒥ ᐊᐅᓚᑦᑎᓂᕐᒧᑦ ᐸᕐᓇᒍᑎ ᓇᓄᕐᓄᑦ ᐊᑐᖅᑕᐅᔭᕆᐊᖃᒃᑎᑕᐅᔪᓂ ᐅᑯᑎᒎᓇ ᐆᒪᔪᐃᑦ ᖁᒃᓴᓇᖅᑐᒦᓕᖅᑐᓄᑦ ᒪᓕᒐᖏᑎᒍ (SARA) ᐋᖅᑭᒃᓱᐃᒐᔭᕐᒪᑕ ᐸᕐᓇᒍᑎᓂ ᐊᑐᖅᑕᐅᕙᒌᓕᖅᑐᓂ ᐅᕝᕙᓗᓂᑦ ᒫᓐᓇ ᐋᖅᑭᒃᓱᖅᑕᐅᕙᓪᓕᐊᔪᓂ ᐃᓗᐊᓂ ᐃᒻᒥᒃᑰᖓᔪᑦ ᐊᕕᒃᑐᖅᓯᒪᔪᓂ ᐊᒻᒪᓗ ᓄᓇᓕᖃᕐᕕᐅᔪᓂ. ᑕᒪᓐᓇᓗ ᐋᖅᑭᒃᓱᐃᔪᑕᐅᒐᔭᕆᓪᓗᓂ ᒪᑯᓇᓂ ᑲᓇᑕᓕᒫᒥ ᓇᓄᕐᓂᑦ ᐱᐅᖅᓱᐊᕐᓂᕐᒧᑦ ᐱᓕᕆᒋᐊᕈᑎᒃᓴᓂᑦ (2011), ᑕᒪᓐᓇᓗ ᐋᖅᑭᒃᑕᐅᓚᐅᖅᓯᒪᓪᓗᓂ ᓇᓄᓕᕆᓂᕐᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᓂᑦ (CAOB) ᐃᑲᔪᖅᓯᖅᑕᐅᓪᓗᑎᒃ ᓇᓄᐃᑦ ᐋᖅᑭᑦᑎᐊᖅᓯᒪᔭᕆᐊᖃᕐᓂᖏᓄᑦ ᑲᑎᒪᔨᕋᓛᑦ (CTOB) ᐱᓕᕆᐊᖑᖁᓪᓗᒍ ᐅᓗᕆᐊᓇᖅᑐᒦᓐᓂᖓ, ᐱᓕᕆᔪᑕᐅᖁᓪᓗᒍ ᐊᔪᖏᓐᓂᖅᓴᐅᓕᕈᑕᐅᓂᖓᓄᑦ ᐋᖅᑭᓯᔪᓐᓇᕐᓂᒥᒃ−ᐱᓕᕆᔪᓐᓇᕐᓂᖃᕐᕕᒋᔭᐅᔪᒥ ᐊᐅᓚᑦᑎᔪᑕᐅᓗᓂ ᐊᒻᒪᓗ ᐱᔭᐅᑎᑦᑎᖁᓗᒍ ᒪᓕᒃᑕᐅᔭᕆᐊᓕᖕᓂᑦ ᐊᖑᓇᓱᐊᕐᓂᕐᒧᑦ ᐊᐅᓚᑦᑎᓂᕐᒥᑦ.

ᐊᐅᓚᑦᑎᓂᖅ ᐊᖑᓇᓱᐊᕐᓂᕐᒥᑦ

ᓇᓄᕐᓂᑦ ᐊᖑᓇᓱᖃᕐᓂᖅ ᐊᐅᓚᑕᐅᖕᒪᑦ ᒪᑯᑎᒎᓇ ᑲᓇᑕ ᐊᑕᐅᑦᑎᒃᑰᖅᓯᓂᖓᒍᑦ ᒪᓕᒃᑕᐅᑦᑎᐊᖁᔨᓂᖓᓂᑦ ᒪᓕᒃᑕᐅᔭᕆᐊᓕᖕᓂᑦ ᐊᐅᓚᑦᑎᔪᑎᓂᒃ ᐱᖃᓯᐅᑎᓗᒋᑦ ᐊᖑᓇᓱᐊᕐᓂᕐᒧᑦ ᐊᑐᖅᑕᐅᔭᕆᐊᓕᑦ, ᐱᔪᓐᓇᐅᑎᖃᕆᐊᖃᒃᑎᑕᐅᓂᖏᓐᓂᑦ, ᓇᓐᓄᒐᒃᓴᐅᑎᑕᐅᔪᓂᑦ ᐅᕝᕙᓗᓂᑦ ᐊᖑᓇᓱᐊᖅᑕᐅᓗᑎᒃ ᑭᒡᓕᒋᑎᑕᐅᔪᓂᑦ, ᐅᓄᕐᓂᖃᒃᑎᑕᐅᓗᑎᒃ ᓂᕕᖓᑖᑦ, ᐊᒻᒪᓗ ᐅᖃᐅᑕᐅᖃᑦᑕᕆᐊᖃᕐᓗᑎᒃ ᓇᓐᓄᒃᑕᐅᔪᑦ.

ᐱᓕᕆᔪᑎ ᐊᐅᓚᑦᑎᓂᕐᒧᑦ ᐊᖑᓇᓱᒃᑕᐅᔪᓐᓇᖅᑐᓄᑦ ᐊᔾᔨᒌᖏᒪᑕ ᒪᓕᑐᐃᓐᓇᕐᓗᑎᒃ ᐊᕕᒃᑐᖅᓯᒪᔪᓂ ᐊᕝᕙᓗᓂᑦ ᓄᓇᓕᖃᕐᕕᐅᔪᓂᑦ. ᓅᐸᓐᓛᒥ ᐊᒻᒪᓗ ᓛᐸᑐᐊᒥ, ᓄᓇᑦᓯᐊᕐᒥ, ᓄᓇᕗᒻᒥ, ᐊᒻᒪᓗ ᔫᑲᓐ ᓄᓇᓕᖃᕐᕕᖓᓂ, ᑕᒪᒃᑯᐊᓗ ᑲᑦᑐᓯᐅᑎᓯᒪᓗᑎᒃ ᐃᓚᖃᕐᒪᑕ ᐊᖏᔪᐊᓗᖕᓂ ᐅᓄᕐᓂᖃᕐᓗᑎᒃ ᓇᓄᐃᑦ ᐅᓄᕐᓂᖏᓐᓂ ᑲᓇᑕᒥ, ᐊᖑᓇᓱᐊᖅᑕᐅᓂᖏᑦ ᓇᓄᐃᑦ ᐊᐅᓚᑕᐅᖕᒪᑕ ᒪᑯᑎᒎᓇ ᐅᓄᕐᓂᖃᕐᓗᑎᒃ ᐱᔭᐅᑎᑕᐅᔪᓐᓇᕐᓂᖏᑦ ᐊᖑᓇᓱᐊᖅᑕᐅᓗᑎᒃ ᐊᒻᒪᓗ ᓄᓇᓕᑦ ᐃᒪᓐᓇᑎᒋᓪᓗᐊᓂᑦ ᓇᓐᓄᒍᓐᓇᖅᑎᑕᐅᓗᑎᒃ ᓴᓂᕐᕙᐃᔪᑎᓂᒃ ᐱᓕᕆᔪᑎᖃᒃᑎᑕᐅᓪᓗᑎᒃ. ᓇᓐᓄᒃᑕᐅᔪᓐᓇᖅᑎᑕᐅᔪᑦ ᕿᒥᕐᕈᔭᐅᓱᖑᕗᑦ ᐊᒻᒪᓗ ᐊᖑᒪᑎᓕᕆᐊᖅᑎᑕᐅᓱᖑᓪᓗᑎᒃ ᐊᕐᕌᒍᑕᒪᑦ ᐊᑐᓂ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᓂᑦ ᒪᑯᑎᒎᓇ ᐊᑐᕐᓂᖃᓂᖏᑎᒍ ᐊᕕᒃᑐᖅᓯᒪᔪᑎᒍ ᐅᕝᕙᓗᓂᑦ ᓄᓇᓕᖃᕐᕕᐅᔪᑦ ᒐᕙᒪᖏᑎᒍ. ᓇᓐᓄᒐᒃᓴᐅᑎᑕᐅᔪᑦ ᕿᒥᕐᕈᔭᐅᓂᖏᑦ ᒪᓕᓱᖑᕗᑦ ᐱᓕᕆᐊᖑᔪᑎᓂᒃ ᐃᓚᒋᓕᐅᔨᓯᒪᓪᓗᑎᒃ ᐅᖃᕐᕕᖃᕈᓐᓇᖅᑎᑕᐅᓪᓗᑎᒃ ᐊᐅᓚᑦᑎᓂᕐᒧᑦ ᑲᑎᒪᔨᑦ ᐃᓚᖃᕐᓗᑎᒃ ᒐᕙᒪᒃᑯᓐᓂᑦ (ᑲᓇᑕᓕᒫᒥ, ᐊᕕᒃᑐᖅᓯᒪᔪᓂ, ᐅᕝᕙᓗᓂᑦ ᓄᓇᓕᖃᕐᕕᐅᔪᓂᑦ) ᐊᒻᒪᓗ ᓄᓇᖃᖄᒃᓯᒪᔪᑦ ᐱᓕᕆᖃᑎᒋᓂᑦ ᑭᒡᒐᖅᑐᐃᔨᓂᑦ. ᐃᓘᓇᑎᒃ ᐃᓄᖕᓄᑦ−ᐱᔭᕆᔭᐅᔪᑦ ᓇᓄᐃᑦ ᓇᓐᓄᒃᑕᐅᓪᓗᑎᒃ ᐱᔭᐅᓂᕋᒃᑕᐅᓱᖑᕗᑦ ᒪᑯᑎᒎᓇ ᓇᓐᓄᒐᒃᓴᐅᑎᑕᐅᔪᑎᒎᕐᓂᕋᒃᑕᐅᓗᑎᒃ: ᓄᓇᖃᖄᒃᓯᒪᔪᓄᑦ ᐊᖑᑦᔭᐅᔪᑦ, ᑕᒫᓂᒥᐅᑕᐅᖏᑦᑐᓄᑦ ᐱᓕᐅᑎᓂᕐᒧᑦ ᐊᖑᓇᓱᒃᑕᐅᔪᑦ, ᖃᐅᔨᔭᐅᔪᑦ ᒪᓕᒐᖅᑎᒎᕐᓇᑎᒃ ᓇᓐᓄᒃᑕᐅᔪᑦ, ᐊᒻᒪᓗ ᓇᓐᓄᒃᑕᐅᔪᑦ ᓴᐳᒻᒥᓇᓱᐊᖅᑐᓄᑦ ᐃᓅᓯᕐᒥᖕᓂᑦ ᐊᒻᒪᓗ ᐱᖁᑎᒥᖕᓂᑦ. ᓈᓴᐅᓯᖅᑕᐅᓯᒪᔪᑦ ᑎᑎᕋᖅᑕᐅᑦᑎᐊᕐᓗᑎᒃ, ᐲᕈᓐᓇᖅᑐᓂᒃ ᖁᖓᓯᖅᑕᐅᓯᒪᔪᑦ ᐊᒥᖓᓂ ᑕᒪᕐᒥᒃ ᐊᖑᔭᐅᔪᑦ ᓇᓄᐃᑦ ᐊᒻᒪᓗ ᐅᑯᐊ ᐱᔭᐅᔪᓐᓇᖅᑐᑦ ᖃᑦᓯᐅᔭᕆᐊᖃᕐᓂᖏᑦᑎᒍᑦ ᐃᒃᐱᒋᔭᐅᑦᑎᐊᕐᓗᑎᒃ. ᓇᓐᓄᒍᓐᓇᐅᑎᑦ ᐊᒻᒪᓗ ᑎᑎᕋᖅᑕᐅᑦᑎᐊᕐᓗᑎᒃ ᓂᐅᕕᖅᑕᐅᒍᓂ ᐅᒡᕙᓘᓐᓃᑦ ᓄᒃᑕᖅᑕᐅᓂᐊᕈᓂ ᐊᕙᑖᓂᑦ ᓄᓇᖃᑎᒌᓐᖏᑦᑐᓂ ᐋᕿᑦᑎᐊᖅᓯᒪᔪᓂᒃ ᒥᐊᓂᕆᔾᔪᑎᖃᕐᓂᐊᕐᒪᑕ ᖃᑦᓯᐅᓂᖏᓐᓂᒃ ᓂᕐᔪᑎᑦ ᐱᔭᐅᔪᑦ ᐊᕐᕌᒍᑕᒫᑦ ᑕᒪᐅᓐᓇ ᐊᐅᓚᑦᑎᔾᔪᑕᐅᔪᑎᒍᑦ ᐊᑐᓂ ᑎᐅᓕᑐᐊᓕᔅ ᐊᒻᒪᓗ ᑲᓇᑕᒥ ᐊᕕᒃᑐᖅᓯᒪᔪᓂ. ᓇᓐᓄᒍᓇᐅᑎᑦ ᖃᐅᔨᒪᔾᔪᑕᐅᖕᒥᔪᑦ ᐊᕐᓇᕕᐊᖑᖕᒪᖔᑦ ᐊᖑᑕᐅᖕᒪᖔᑦ ᐊᒻᒪᓗ ᓇᓕᐊᖕᓂᒥᐅᑕᐅᖕᒪᖔᑦ ᓇᓄᕐᓂ.

ᒪᒃᑯᓇᓂ ᐊᕕᒃᑐᖅᓯᒪᔪᓂ ᒫᓂᑐᕙᒥ ᐊᒻᒪᓗ ᐊᓐᑎᐅᕆᔪᒥ, ᐊᖑᓇᓱᐊᕐᓂᖅ ᖃᑦᓰᓇᒪᕆᐊᓘᑎᑕᐅᖕᒪᑕ ᐊᒻᒪᓗ ᐊᐅᓚᑦᑎᑦᑎᓂᑦ ᑕᒪᐃᑎᒍᑦ ᐱᓕᕆᔪᓐᓇᐅᑎᖃᒃᑎᑕᐅᓇᑎᒃ. ᐊᕕᒃᓯᒪᓂᖓᓂ ᑯᐱᐊᒃ, ᐊᖑᓇᓱᐊᕐᓂᕐᒧᑦ ᐊᐅᓚᑕᐅᔪᑦ ᐅᓄᕐᓂᕆᑎᑕᐅᔪᑦ ᐃᓚᖓᒍᑦ ᐊᐅᓚᑕᐅᖕᒪᑕ ᐊᖏᖃᑎᒋᒍᑎᖏᑎᒍ ᐅᑯᐊ ᓄᓇᖃᖄᒃᓯᒪᔪᑦ ᐃᓄᖏᓐᓂᑦ ᐊᒻᒪᓗ ᐊᕕᒃᑐᖅᓯᒪᔪᑦ ᒐᕙᒪᖏᓐᓂᑦ. ᑕᐃᑦᓱᒪᓂᐅᓚᐅᖅᓯᒪᔪᖅ ᓇᓐᓄᒐᒃᓴᖅᑕᖃᒃᑎᑕᐅᔪᖃᓚᐅᖅᓯᒪᖏᒻᒪᑦ ᐊᒻᒪᓗ ᓇᓄᐃᑦ ᐊᖑᓇᓱᐊᖅᑕᐅᓂᖏᑦ ᖃᑦᓰᓇᕈᓘᓯᒪᓪᓗᑎᒃ, ᐊᒥᓲᖏᑦᑐᓂᑦ ᒪᓕᑦᑎᐊᖏᑦᑐᖃᒃᓯᒪᓪᓗᓂ. ᑲᔪᓯᓂᐊᖅᑐᖅ ᒥᐊᓂᕆᔭᐅᓂᖓ ᓴᕿᑦᑐᖃᕈᓂ ᑕᐃᒪᓐᓇᐅᔭᕆᐊᖃᖅᑐᓂᒃ, ᐊᖑᓇᓱᒍᓐᓇᐃᓕᑎᑕᐅᕙᒡᓗᑎᒃ, ᐅᖃᐅᓯᕆᑦᑎᐊᕆᐊᖃᕐᓗᒋᓪᓗ ᐱᔭᐅᔪᑦ ᐊᒻᒪᓗ ᐊᑐᖅᓯᓗᑎᒃ ᑭᓯᐊᓂ ᓇᓐᓄᒍᓐᓇᐅᑎᓂᒃ ᐊᒻᒪᓗ ᐊᐅᓚᑦᑎᔾᔪᓪᒪᕆᖕᓂᑦ ᒪᓕᑦᑎᐊᖅᑐᓂᒃ ᐊᓯᒥᖕᓂ ᑲᓇᑕᒥ ᐊᕕᒃᑐᖅᓯᒪᔪᑦ ᐊᒻᒪᓗ ᑎᐅᓕᑐᐊᓕᔅ ᐱᓕᕆᕙᓪᓕᐊᔭᖏᓐᓂ.

ᐱᑕᖃᓗᐊᖏᒪᑦ ᖃᐅᔨᒪᔪᑎᒃᓴᓂᒃ ᒪᓕᒐᖅᑎᒎᖏᓂᖏᓐᓄᑦ ᐅᕝᕙᓗᓂᑦ ᑎᑎᕋᒃᑕᐅᓯᒪᔪᖁᑎᓅᖅᑕᐅᓯᒪᖏᑦᑐᓂᑦ ᐊᖑᑦᔭᐅᔪᓂᑦ ᑲᓇᑕᒥ. ᒪᓕᑦᑎᐊᕐᓃᑦ ᐊᒻᒪᓗ ᐱᐅᓈᕐᓂᖏᑦ ᐅᖃᐅᑕᐅᖃᑦᑕᕐᓂᖏᑕ ᐊᖑᑦᔭᐅᔪᑦ ᖁᕝᕙᓯᒃᑐᒪᕆᐅᒪᑦ, ᐱᔾᔪᑎᒋᓪᓗᒍ ᐊᕕᒃᑐᖅᓯᒪᔪᑦ ᐊᒻᒪᓗ ᓄᓇᓕᖃᕐᕕᐅᔪᑦ ᐊᒻᒪᓗ ᓄᓇᖃᖄᒃᓯᒪᔪᑦ ᐃᓄᖏᑦ ᐊᔾᔨᒌᓂᑦ ᐱᔪᒪᓂᖃᕐᒪᑕ ᐊᑐᖅᑕᐅᓚᕆᖁᔨᓪᓗᑎᒃ ᐊᑯᓂ−ᑕᐅᕗᖓᑐᖃᒃ, ᐊᑐᖅᑕᐅᖏᓐᓇᕈᓐᓇᖅᑐᒥᑦ ᐊᖑᓇᓱᐊᕐᓂᕐᒥᑦ. ᖁᓚᖅᑕᐅᖏᓐᓂᖏᑦ ᐊᖑᓇᓱᐊᕐᓂᕐᒧᑦ ᐱᓕᐱᔪᑎᑦ ᖁᕝᕙᓯᒃᑐᒪᕆᐅᕗᖅ ᐱᔾᔪᑎᒋᓪᓗᒍ ᐱᔭᐅᖔᕈᓐᓇᕐᓂᖏᓄᑦ ᐊᐅᓚᑦᑎᓂᕐᒧᑦ ᐱᓕᕆᔪᑎᑦ ᐱᕕᒃᑎᑦᑎᔪᑎᑦ ᒪᓕᒃᑕᐅᓚᕆᖁᔨᓂᖏᓄᑦ ᐊᐅᓚᑦᑎᔪᑎᓂᒃ ᐊᖑᓇᓱᐊᕐᓂᕐᒧᑦ ᐊᒻᒪᓗ ᐱᒋᐊᒃᑲᓐᓂᖅᑎᑕᐅᓱᖑᓗᑎᒃ ᐊᓯᕈᕐᓂᖅᐸᑕ ᖃᓄᐃᓕᖓᓂᕆᔭᐅᔪᑦ.

ᐊᖑᓇᓱᐊᕐᓂᕐᒧᑦ ᖃᓄᐃᓕᕙᓪᓕᐊᓂᑦ

ᐅᓄᕐᓂᖏᑦ ᓇᓄᐃᑦ ᐊᖑᑦᔭᐅᓯᒪᔪᑦ ᑐᖔᓂᒪᑕ ᑲᑎᓗᒋᑦ ᐱᔭᐅᔪᓐᓇᖅᑎᑕᐅᒧᑦ ᖁᕝᕙᓯᒡᓂᖏᑕ, ᐊᒻᒪᓗ ᑎᑭᐅᒪᓪᓗᑎᒃ ᐊᑯᓐᓂᖏᓐᓂ ᐃᒪᓐᓇᑎᒋᐸᓗᒃ 500 ᐊᒻᒪᓗ 650 ᓇᓄᐃᑦ ᐊᕐᕌᒍᑕᒪᑦ ᐊᑐᓚᐅᖅᑐᓂ ᐱᖓᓱᓂ ᖁᓕᐅᓚᐅᖅᑐᓂ, ᑕᒪᑯᐊ ᐊᑯᓐᓂᖏᓐᓃᓪᓗᑎᒃ 3% ᐳᓴᓐᑎᑦ ᐊᒻᒪᓗ 4% ᐳᓇᓐᑎᑦ ᒥᒃᓴᐅᓴᒃᑕᐅᓯᒪᓪᓗᑎᒃ ᐅᓄᕐᓂᖏᑕ ᐅᓄᕐᓂᖏᓐᓂ. ᑕᒪᓐᓇ ᐃᓱᒪᒋᔭᐅᖕᒪᑦ ᐋᖅᑭᐅᒪᑎᑕᐅᔪᓐᓇᕋᓱᒋᔭᐅᓪᓗᓂ. ᐊᖑᓇᓱᐊᕐᓂᕐᒧᑦ ᖁᕝᕙᓯᒡᓂᖅ 2015 à 2016-ᒥ ᐅᓄᖏᓐᓂᖅᓴᐅᓚᐅᕐᒪᑕ ᐅᑯᓇᙵᑦ 3.4% ᐳᓴᓐᑎᖏᓐᓂᑦ ᒥᒃᓴᐅᓴᒃᑕᐅᓯᒪᔪᓂᑦ ᑲᓇᑕᐅᑉ ᓇᓄᖏᑕ ᐅᓄᕐᓂᖏᓐᓂ ᐅᑯᓇᓂ 16,560 ᓇᓄᕐᓂ. ᐅᓄᕐᓂᖅᓴᐃᑦ ᐊᖑᑦᔭᐅᔪᑦ ᑕᐃᒪᓐᓇᐃᓚᐅᖅᐳᑦ ᓄᓇᕗᒻᒥ ᑕᒪᒃᑯᐊᓗ ᐃᒪᓐᓇᐅᓕᖅᑎᑦᑎᓪᓗᑎᒃ ᑎᑭᐅᒪᐸᓗᒡᓗᑎᒃ 77% ᐳᓴᓐᑎᓄᑦ ᐃᓘᓐᓇᖏᓐᓂ ᐊᖑᑦᔭᐅᔪᓂ, ᓄᓇᑦᓯᐊᖅ ᐱᓚᐅᕐᒪᑦ ᐃᒪᓐᓇᑎᒋᐸᓗᖕᓂᑦ 11% ᐳᓴᓐᑎᓂᑦ ᐊᒻᒪᓗ ᑯᐱᒃ ᐱᓚᐅᕆᓪᓗᓂ ᐃᒪᓐᓇᑎᒋᐸᓗᖕᓂᑦ 8% ᐳᓴᓐᑎᓂᑦ ᑲᑎᓪᓗᒋᑦ ᑲᓇᑕᒥ ᐊᖑᑦᔭᐅᔪᓂᑦ).

ᐊᖑᑦᔭᐅᔪᑦ ᖃᐅᔨᒪᒋᐊᖅᑕᐅᓂᖏᑦ

ᐊᖑᑦᔭᐅᔪᑦ ᖃᐅᔨᒪᔪᑎᒃᓴᑦ ᓄᐊᑕᐅᓱᖑᕗᑦ, ᐱᖃᓯᐅᑎᓪᓗᒋᑦ ᖃᐅᔨᒪᔪᑎᒃᓴᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᑦ, ᐊᖑᑦᔭᐅᔪᑦ ᓇᒦᓐᓂᕐᒪᖔᑕ, ᖃᐅᔨᒪᔪᑎᒃᓴᐃᑦ ᐊᖑᑕᐅᒃᐸᑕ ᐊᕐᓇᓪᓘᕐᐸᑕᓗᓂ, ᐅᓪᓗᖓ, ᓂᕕᖓᑕᑉ ᓈᓴᐅᑎᖓ, ᐅᑭᐅᖃᕐᓂᖓ (ᑭᖑᑕᐃᑕᐅᓗᓂ ᐅᑭᐅᖃᕐᓂᖓ ᖃᐅᔨᔭᐅᖁᓗᒍ) ᐊᒻᒪᓗ ᐃᒪᓐᓇᐅᒐᔭᕐᓂᖅᐸᓪᓗᓐᓂᑦ ᓇᓄᖅ ᐃᓚᒋᔭᐅᓐᓂᖅᐸᑦ ᐃᓚᒌᓂᑦ ᐃᒻᒥᒃᑰᖓᔪᓂᑦ. ᐅᓄᕐᓂᖏᑕ ᖃᓄᐃᓕᖓᓕᕐᓂᖏᓐᓄᑦ ᖃᐅᔨᒪᔪᑎᑦ ᐱᔭᐅᓱᖑᕗᑦ ᐊᔾᔨᒌᖏᑐᑎᒍ ᐱᓕᕆᓂᒃᑯᑦ ᐱᖃᓯᐅᑎᓪᓗᒋᑦ ᑎᑎᖅᑕᐅᓯᒪᓂᖃᓂᖏᑎᒍ ᐊᒻᒪᓗ ᐱᔭᐅᒃᑲᓐᓂᖃᒃᑕᖅᓯᒪᓂᖏᑎᒍ ᖃᐅᔨᓇᓱᐊᖅᑕᐅᑎᓪᓗᒋᑦ (ᖃᓄᐃᓂᖃᖏᒃᑲᓗᐊᕐᒪᖔᑕ ᐊᒻᒪᓗ ᐃᓗᑦᑎᕈᑎᓯᐅᖅᑕᐅᓪᓗᑎᒃ DNA), ᖃᖓᑕᓱᒃᑯᑦ ᖃᐅᔨᓇᓱᐊᖅᑕᐅᓪᓗᑎᒃ, ᐱᖅᑯᓯᒃᑯᑦ ᓄᓇᒥᐅᑕᓕᕆᓂᕐᒧᑦ ᖃᐅᔨᒪᓂᕐᓂ, ᐊᖑᑦᔭᐅᕙᒃᑐᑦ ᖃᐅᔨᒪᔪᑎᓂ, ᐊᒻᒪᓗ ᐅᓄᕐᓂᖏᑕ ᐊᑐᖅᑕᐅᔪᓐᓇᕐᓂᖏᓄᑦ ᖃᐅᔨᓴᖅᓯᔪᑎᓂ (ᖃᐅᔨᒪᔪᑎᒃᓴᑎᒍ ᐋᖅᑭᒃᓱᐃᔪᑎᓂ). ᑕᒪᒃᑯᐊ ᖃᑯᑎᒃᑯᑦ ᐅᓄᕐᓂᖏᑦ ᒥᒃᓴᐅᓴᒃᑕᐅᖃᑦᑕᕐᓂᖏᑦ, ᐊᒻᒪᓗ ᑐᓴᐅᒪᔪᑎᒃᓴᐃᑦ ᓄᐊᑕᐅᕙᒃᑐᑦ ᐱᓕᕆᐊᖑᐃᓐᓇᓱᖑᕗᑦ ᑕᐃᒪᖓᓕᒪᖅ ᒪᑯᑎᒎᓇ ᐊᑐᓕᖅᑎᑕᐅᓯᒪᓂᖏᑎᒍ ᐊᖑᓇᓱᐊᕐᓂᕐᒧᑦ ᐊᐅᓚᑦᑎᔪᑎᒍ, ᐊᑐᖅᑕᐅᓱᖑᓪᓗᑎᒃ ᖃᐅᔨᒪᒋᐊᖅᓯᔪᑕᐅᓪᓗᑎᒃ ᐅᓄᕐᓂᖏᑕ ᖃᓄᐃᓕᖓᓕᕐᓂᖏᓐᓄᑦ ᐊᒻᒪᓗ ᖃᓄᐃᓕᕙᓪᓕᐊᓂᖏᓐᓄᑦ ᒪᑯᑎᒎᓇ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᖅᑎᒍ, ᐊᒻᒪᓗ ᐊᖑᓇᓱᒃᑕᐅᕙᒃᑐᑦ ᖁᕝᕙᓯᒡᓂᖏᑦ ᓈᒪᒃᑲᓗᐊᕐᒪᖔᑕ.

ᖃᐅᔨᒪᒋᐊᖅᓯᓂᖅ ᐊᖏᔫᑎᐊᓗᖕᓂᑦ ᓂᕿᑐᖅᑎᓂᑦ ᓇᔪᒐᖃᕈᓐᓇᖅᑐᓂᒃ ᐊᖏᔪᐊᓗᖕᒥᑦ ᓇᔪᖅᑕᐅᔪᓐᓇᖅᑐᒥᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᔭᕆᐊᑐᔪᐊᓘᖕᒪᑦ. ᐅᓄᖅᑐᓄᑦ−ᐊᕐᕌᖑᓄᑦ ᐸᕐᓇᒍᑎᑦ ᐊᐅᓚᑕᐅᓱᖑᒪᑕ ᐃᓘᓐᓇᓕᒫᖓᓂ ᑲᓇᑕᐅᑉ ᐊᒻᒪᓗ ᐱᓕᕆᐊᖑᓇᓱᐊᖅᖢᑎᒃ ᓇᔪᒐᕐᓂ ᐱᐅᖅᓱᐊᕆᐊᖃᕐᓂᐊᖅᑐᕆᔭᐅᔪᓂ ᐃᓱᒫᓗᑕᐅᓂᐅᓴᒃᐸᑕ. ᐊᖑᒪᑎᓕᕆᐊᕈᑎᒃᓴᐃᑦ ᐅᓄᕐᓂᖏᓐᓄᑦ ᖃᐅᔨᓴᕈᑎᓄᑦ ᓂᕆᐅᒋᔭᐅᕗᑦ ᐃᓘᓐᓇᓕᒫᖏᓐᓄᑦ ᐊᐅᓚᑦᑎᓂᑦ ᐃᒻᒥᒃᑰᖓᓂᖏᓐᓄᑦ 2023-ᒥ. ᐅᓂᒃᑳᓕᐅᕐᓂᕐᒧᑦ ᖃᐅᔨᒪᒋᐊᖅᓯᓃᑦ ᐱᓕᕆᐊᖑᖃᑦᑕᕐᓂᐊᖅᐳᑦ ᓈᒪᒃᓯᑐᐊᕋᖓ ᐊᒻᒪᓗ ᓇᒪᓈᖅᓯᒋᐊᕐᓗᑎᒃ ᖃᐅᔨᒪᒋᐊᖅᓯᓂᕐᒥᑦ ᑕᒪᓐᓇᓗ ᒪᓕᑐᐃᓐᓇᕐᓂᐊᕐᒪᑦ ᐅᓄᖅᑐᑲᓚᖕᓂᑦ ᖃᓄᐃᓕᖓᓂᕐᓂᑦ ᐱᖃᓯᐅᑎᓗᒋᑦ ᖃᐅᔨᒪᒋᐊᖅᓯᓂᕐᒧᑦ ᐱᓕᕆᔪᓯᑦ ᐊᑐᖅᑕᐅᓱᑦ, ᐊᐅᓚᑦᑎᓂᕐᒧᑦ ᐱᓕᐊᖑᔪᒪᔪᑦ, ᐱᐅᖅᓱᐊᕐᓂᕐᒧᑦ ᐃᓱᒫᓘᑎᑦ, ᐅᑭᐅᖃᕐᓂᖏᓐᓂᑦ ᐊᒻᒪᓗ ᐱᐅᓈᖅᓯᒪᓂᖏᓐᓄᑦ ᐊᑐᖅᑕᐅᔪᓐᓇᖅᑐᑦ ᖃᐅᔨᒪᔪᑎᒃᓴᐃᑦ, ᐊᒻᒪᓗ ᐊᓯᖏᑦ ᖃᐅᔨᓇᓱᐊᕐᓂᕐᒧᑦ ᐱᓕᕆᐊᖑᔪᒪᔪᑦ.

ᑲᔪᖏᖅᓴᐃᔪᑎᑦ ᐊᒻᒪᓗ ᐱᕚᓪᓕᕆᑎᑦ ᐊᖑᓇᓱᐊᕐᓂᕐᒧᑦ

ᐊᑐᑦᑎᐊᕐᓂᓕᒃ ᐊᐅᓚᑦᑎᓂᖅ ᓇᓄᕐᓂᑦ ᑲᓇᑕᒥ ᐱᓕᕆᐊᖑᔪᒪᖕᒪᑦ ᒐᕙᒪᒃᑯᓐᓂᑦ, ᐊᐅᓚᑦᑎᔨᐅᖃᑎᒋᒃᑐᓂᑦ ᑎᒥᐅᔪᓂᑦ, ᐊᒻᒪᓗ ᐊᖑᓇᓱᐊᖅᑎᓂᑦ. ᓄᖒᑦᑎᑦᑕᐅᓕᒪᓂᖅ ᐊᑯᓂ−ᑕᐅᕗᖓᑐᖃᒃ ᐊᖑᓇᓱᐊᕐᓂᕐᒥ ᒪᓕᑐᐃᓐᓇᕐᒪᑦ ᐊᑐᖅᑕᐅᔪᓐᓇᕐᓂᖓᓂᑦ ᓂᕐᔪᑎᑦ ᐅᓄᕐᓂᖏᓐᓂᑦ ᑕᐃᒪᓐᓇᐃᓂᖓᓄᑦ ᐊᑐᖅᑕᐅᓂᖅᓴᐅᑎᑦᑎᓇᓱᐊᕐᓂᖅ ᑲᒪᔨᐅᑎᑕᐅᔪᑦ ᐃᒃᐱᒍᓱᑦᑎᐊᕐᓗᑎᒃ ᑕᒪᒃᑭᖏᓐᓂᑦ ᓇᓄᕐᓂᑦ ᐊᒻᒪᓗ ᓇᔪᒐᖏᓐᓂᑦ. ᑕᒪᐃᑎᒍᑦ, ᐊᖑᓇᓱᐊᕐᓂᕐᒥ ᐱᓇᓱᐊᕐᓂᐅᕙᒃᑐᑦ ᐃᑲᔪᖅᓱᐃᖕᒪᑕ ᐃᓅᓇᓱᐊᕐᓂᖏᓐᓂᑦ ᐅᑭᐅᖅᑕᖅᑐᒥ ᓄᓇᖃᖄᒃᓯᒪᔪᑦ ᐃᓄᖏᓐᓂᑦ ᐊᒻᒪᓗ ᐃᑲᔪᕆᓪᓗᑎᒃ ᐊᐅᓚᑦᑎᓂᕐᒥᑦ ᓇᖑᑦᑎᑦᑕᐃᓕᒪᓂᕐᒥᑦ ᓇᓄᕐᓂᑦ ᐊᒻᒪᓗ ᐊᒃᓱᐊᓘᕈᓐᓃᖅᑎᑕᐅᓂᖏᓐᓄᑦ ᐃᓄᐃᑦ−ᓇᓄᐃᓪᓗ ᓴᙵᓪᓗᐊᖃᑦᑕᐅᑎᔭᕆᐊᖃᓕᓱᖑᓂᖏᓐᓂᑦ. ᑕᐅᖅᓰᓂᕐᒧᑦ ᑲᔪᖏᖅᓴᐃᔪᑎᑦ ᐱᒪᕆᐊᓘᖃᑕᐅᖕᒪᑕ ᐱᓕᕆᖃᑕᐅᑎᑦᑎᓗᓂ ᑕᒫᓂᑦᑐᓂᑦ ᓄᓇᓕᖕᓂᑦ ᓄᖒᑦᑎᑦᑕᐃᓕᒪᓂᕐᒥᑦ ᐊᖑᓇᓱᐊᕐᓂᒃᑯᑦ ᐱᓕᕆᔪᓯᐅᕙᒃᑐᓂ.

ᐃᓚᖏᑦ ᓄᓇᖃᖄᒃᓯᒪᔪᑦ ᐱᔪᓐᓇᕐᓂᓖᑦ ᐊᖑᓇᓱᖃᕈᓐᓇᕐᓂᕐᒥᑦ ᐱᕚᓪᓕᓱᖑᒪᑕ ᐊᖑᓇᓱᐊᕐᓂᑦᒥᑦ ᓇᓄᐃᑦ ᐊᒥᖏᓐᓂᑦ, ᓂᕿᖏᓐᓂᑦ, ᐱᖅᑯᓯᕐᒥᒍᑦ ᐱᓕᕆᓂᕐᒥᖕᓄᑦ ᐊᒻᒪᓗ ᖃᐅᔨᒪᔨᑕᕆᔭᐅᑎᓪᓗᒋᑦ ᐊᖑᓇᓱᐊᕐᓂᕐᒥ ᑮᓇᐅᔭᓕᐅᕈᑎᖃᕐᓗᑎᒃ. ᐃᓚᖏᓐᓂ ᐱᔪᓐᓇᕐᓂᖃᕐᕕᐅᔪᓂ, ᐃᓚᖏᑦ ᓂᕕᖓᑖᑦ ᐱᔭᐅᖔᖅᑎᑕᐅᓱᖑᒪᑕ ᓄᓇᖃᖄᖅᓯᒪᖏᑦᑐᓄᑦ ᑭᒃᑯᑐᐃᓚᕐᓄᑦ ᐱᓕᐅᑎᔪᑕᐅᓗᑎᒃ ᐊᖑᓇᓱᐊᕐᓃᑦ ᐊᑐᖅᑕᐅᓗᑎᒃ ᑕᒪᓐᓇ ᐊᖑᓇᓱᐊᕐᓂᖅ ᖃᐅᔨᒪᔨᑕᐅᕕᐅᒃᐸᑦ ᓄᓇᖃᖄᒃᓯᒪᔪᒧᑦ ᐃᓄᖕᒧᑦ ᐊᑐᕐᓗᑎᒃ ᐱᖅᑯᓯᕐᒥᒍᑦ ᐱᓕᕆᔪᓯᕐᓂᒃ ᐊᖑᓇᓱᐊᖅᑎᓪᓗᒋᑦ. ᑕᐃᒪᓇᐃᓘᖅᑎᓪᓗᒋᑦ, ᐅᓄᕐᓂᖅᓴᐃᑦ ᑮᓇᐅᔭᑦ ᐱᔭᐅᑎᑕᐅᔪᑦ ᐊᖑᓇᓱᐊᕐᓂᑦ ᐱᓕᕆᔪᑕᐅᔪᓂᖏᓐᓄᑦ ᐱᔭᐅᓱᖑᒪᑕ ᐅᑭᐅᖅᑕᖅᑐᒥ ᓄᓇᖃᖄᒃᓯᒪᔪᑦ ᓄᓇᓕᖏᓐᓄᑦ ᑕᒪᒃᑯᐊᓗ ᖃᑦᓰᓐᓇᕈᓪᓗᑎᒃ ᐊᓯᖏᑦ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᐊᒻᒪᓗ ᐊᑭᖏᑦ−ᐃᓚᓕᐅᑎᓱᖑᓗᑎᒃ ᑮᓇᐅᔭᓕᐊᖑᔪᓄᑦ.

ᓇᓄᕐᓂᑦ ᐊᖑᓇᓱᐊᕐᓂᑦ ᐊᒻᒪᓗ ᓴᐳᒻᒥᓗᑎᒃ ᓇᓐᓄᒃᑕᐅᔪᓄᑦ ᖃᐅᔨᒪᔪᑎᒃᓴᐃᑦ ᐱᔭᐅᑎᑦᑎᓱᖑᒥᖕᒪᑕ ᑐᓴᐅᒪᔪᑎᒃᓴᓂᑦ ᓇᑭᐅᓐᓂᕐᒪᖔᑕ, ᓇᒧᖓᖅᐸᓪᓕᐊᓐᓂᕐᒪᖔᑕ, ᐊᔾᔨᒌᒡᓂᖃᕈᑎᖏᓐᓂᑦ, ᓂᕆᖃᑦᑕᓱᖏᓐᓂᑦ, ᖃᓄᐃᓐᓂᖏᓐᓂ ᓱᕈᕐᓇᖅᑐᖃᒃᐸᑕ ᐊᒻᒪᓗ ᐊᓯᖏᓐᓂ ᐃᓕᖅᑯᓯᖃᓂᖃᒃᐸᑕ ᓇᓄᐃᑦ ᐅᓄᕐᓂᒃᑲᓐᓂᖏᓐᓂ ᑕᒪᒃᑯᐊᓗ ᐊᓯᐊᒍᑦ ᐱᔭᐅᔪᓐᓇᖏᑐᐃᓇᕆᐊᖃᕋᔭᕐᒪᑕ. ᑕᒪᒃᑯᐊ ᐊᖑᓇᓱᐊᕐᓂᕐᒧᑦ ᖃᐅᔨᒪᔪᑎᒃᓴᐃᑦ ᐱᔭᐅᔭᕆᐊᖃᓚᕆᒡᒪᑕ ᐃᓚᒋᐊᖅᓯᔪᑕᐅᖁᓪᓗᒋᑦ ᐊᑐᖅᑕᐅᓱᓄᑦ ᐱᓕᕆᔪᑎᓕᐊᕆᓯᒪᔪᓄᑦ ᐅᓄᕐᓂᖏᓐᓄᑦ ᖃᐅᔨᓇᓱᐊᕐᓂᕐᒧᑦ ᐊᒻᒪᓗ ᐊᓯᖏᓐᓄᑦ ᖃᐅᔨᓇᓱᐊᕐᓂᕐᒧᑦ ᐱᓕᕆᔪᑎᓄᑦ.

ᓴᐳᒻᒥᔭᐅᔪᑎᑦ ᐊᖑᓇᓱᐊᕐᓂᕐᒥᑦ

ᐱᔭᐅᖔᕈᓐᓇᖅᑐᑦ ᐊᐅᓚᑦᑎᓂᕐᒧᑦ ᐋᖅᑭᒃᓱᖅᓯᒪᓂᑦ ᒫᓐᓇ ᐋᖅᑭᒃᑕᐅᓯᒪᔪᑦ ᓇᓄᕐᓂᑦ ᐊᖑᓇᓱᐊᕐᓂᕐᒧᑦ ᐊᐅᓚᑦᑎᔪᑎᑦ ᐱᓕᕆᔪᑎᖏᑦ ᑲᓇᑕᒥ ᐊᑐᑦᑎᐊᖅᑐᐊᓘᖕᒪᑕ ᐊᑐᖅᑕᐅᙱᑎᑦᑎᓂᖏᓐᓄᑦ ᐅᖓᑖᓄᓗᐊᖅ−ᐊᖑᓇᓱᐊᖅᑕᐅᓂᖏᓐᓂᑦ ᓂᕐᔪᑏᑦ. ᐱᔭᐅᑦᑕᐃᓕᑎᑦᑎᓂᕐᒧᑦ ᐱᓕᕆᔪᑎᑦ ᐊᑐᖅᑕᐅᑎᑕᐅᔪᓐᓇᕐᒪᑕ ᑕᐃᒪᓐᓇᐅᔭᕆᐊᖃᑐᐊᖅᐸᑕ ᐊᒻᒪᓗ ᒪᓕᒃᑕᐅᔭᕆᐊᖃᕐᓂᖏᑦ ᖁᕝᕙᓯᒃᑐᒪᕆᐅᓪᓗᑎᒃ ᐱᔾᔪᑎᒋᓪᓗᒍ ᓄᓇᓕᖕᓂᒥᐅᑕᐃᑦ ᐃᓄᖏᑦ ᐱᓕᕆᖃᑕᐅᓂᖏᓐᓄᑦ ᐃᓱᒪᓕᐅᕈᑎᖃᒃᑎᓪᓗᒋᑦ. ᑕᒪᐃᑎᒍ, ᓂᕐᔪᑎᑦ ᐊᖑᓇᓱᒃᑕᐅᔪᓐᓇᕐᒪᑕ ᐅᓄᕐᓂᖅᓴᓂ ᓇᔪᖅᑕᐅᔪᓂ ᑎᑭᐅᒪᔭᐅᔪᓇᖅᑐᓂ ᑭᓯᐊᓂ ᐱᔪᓐᓇᕐᓂᖃᕐᕕᐅᔪᑦ ᐊᔪᙱᑎᑕᐅᕗᑦ ᒪᑐᓯᔪᓐᓇᖅᑎᑕᐅᓪᓗᑎᒃ ᐊᖑᓇᓱᐊᕐᓂᕐᒥᑦ ᑕᐃᒪᓐᓇᐅᔭᕆᐊᖃᒃᐸᑕ ᐱᔪᓐᓇᖁᓗᒋᑦ ᐱᔭᐅᖁᔭᐅᔪᓂᑦ ᓇᖑᑦᑎᑦᑕᐃᓕᒪᓂᕐᒧᑦ ᑎᑭᑕᐅᔪᒪᔪᓂᑦ. ᑕᒪᓐᓇᓗ ᒪᓕᒃᑕᐅᔭᕆᐊᖃᓕᖅᑎᑕᐅᒃᑲᓐᓂᖅᓯᒪᓪᓗᓂ ᐊᐅᓚᖅᑎᑦᑎᓂᕐᒧᑦ ᐊᐅᓚᑦᑎᔪᑎᓂᑦ. ᐊᑎᖅᑕᐃᑦ, ᐊᕐᓇᓪᓗᐃᑦ ᐊᑎᖅᑕᓖᑦ ᐊᒻᒪᓗ ᓇᓄᐃᑦ ᑎᓯᓕᐅᖅᑐᑦ ᐅᕝᕙᓗᓂᑦ ᑎᓯᒥᖕᓃᑦᑐᑦ ᐊᖑᓇᓱᒐᒃᓴᐅᑎᑕᐅᖏᒻᒪᑕ ᒪᓕᒐᖅᑎᒍ ᒫᓂᑐᕙᒥ, ᑯᐱᐊᒃᒥ, ᓅᐸᓐᓛᓐᒥ ᐊᒻᒪᓗ ᓛᐱᑐᐊᒥ, ᓄᓇᕗᒻᒥ, ᔫᑲᓐ ᓄᓇᓕᖃᕐᕕᖓᓂ ᐊᒻᒪᓗ ᓄᓇᑦᓯᐊᕐᒥ. ᐱᓕᕆᓂᒃᑯᑦ, ᓄᓇᕐᔪᐊᓕᒫᒥ ᓄᖑᑐᐃᓐᓇᕆᐊᓕᑦ ᑕᐅᖅᓯᕈᑕᐅᓂᖏᓄᑦ ᑲᑎᒪᓂᕐᔪᐊᒥ (CITES) ᖃᐅᔨᓇᓱᐊᕐᓂᕐᒥ ᐱᔪᓐᓇᕐᓂᓖᑦ ᐅᖃᐅᔨᒋᐊᖅᓯᒪᕗᑦ ᑕᐅᖅᓰᕈᑕᐅᖁᓇᒋᑦ ᐊᑎᖅᑕᐃᑦ (ᐅᖃᐅᑎᒋᔭᐅᑦᑎᐊᖅᓯᒪᓪᓗᑎᒃ ᑲᓇᑕᒥ ᑐᖔᓂᑐᐊᖅᐸᑕ ᐊᑕᐅᓯᕐᒥᑦ ᐊᕐᕌᒍᓕᑦ, ᒪᓕᑦᑎᐊᖅᓯᒪᓗᑎᒃ ᓇᓗᓇᐃᖅᓯᔪᑎᓂᑦ, ᐱᔭᐅᑎᑕᐅᓯᒪᑐᐊᖅᐸᑕ, ᐊᑐᓂ ᐊᕕᒃᑐᖅᓯᒪᔪᓄᑦ ᐅᕝᕙᓗᓂᑦ ᓄᓇᓕᖃᕐᕕᐅᔪᓄᑦ).

ᑎᑎᕋᒃᓯᒪᔪᖅ 1. ᓇᐃᓈᕈᑎᖓ ᓇᔪᒐᖏᓐᓂ ᑲᓇᑕᒥ ᓇᓄᐃᑦ ᐅᓄᕐᓂᒃᑲᓐᓂᖏᓐᓂ ᐊᒻᒪᓗ ᓇᔪᖅᐸᒃᑕᖏᓐᓂ ᐅᓄᕐᓂᖏᑕ ᑎᑎᖅᓯᒪᓂᖓᓂ ᑭᒡᓕᖃᕐᕕᖓᓂ.

ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᔪᑦ ᐅᖃᐅᔾᔨᒋᐊᕈᑎᑦ ᓴᓐᓂᕈᑎᐅᑉ ᐃᒪᖓᓂ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᔪᑦ: ᐊᖑᓇᓱᐊᕐᓂᖅ ᐊᒻᒪᓗ ᐊᐅᓚᖅᑎᑦᑎᓂᖅ ᓴᓐᓂᕈᑎᐅᑉ ᐃᒪᖓᓂᑦ ᐅᓄᕐᓂᒃᑲᓐᓂᖏᓐᓂᑦ ᐃᒪᓐᓇᐅᕗᑦ ᐃᓱᒪᒋᔭᐅᔪᑦ ᐱᓂᕐᓗᒃᑕᐅᓯᒪᖏᓪᓗᑎᒃ (ᐱᐅᓈᓗᑎᒃ ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᔪᑦ) ᑕᒪᒃᑯᓄᖓ ᓇᓄᐃᑦ ᐊᖑᑦᔭᐅᓯᒪᔪᑦ ᓯᕗᓂᖓᒍᑦ ᒫᔨ 10, 2010 ᐊᒻᒪᓗ ᑭᖑᓂᖓᒍᑦ ᔪᓚᐃ 1, 2013.

ᐃᓚᒋᓕᐅᑎᓯᒪᔪᖅ 1: ᐃᓚᒃᑲᓐᓂᖏᑦ ᑐᓴᐅᒪᔪᑎᒃᓴᑦ ᑐᕌᖓᔪᑦ ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᔪᑦ ᓴᓐᓂᕈᑎᐅᑉ ᐃᒪᖓᓂ ᐅᓄᕐᓂᒃᑲᓐᓂᖏᑦ ᑲᓇᑕᒥ

ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᔪᑦ ᐅᖃᐅᔾᔨᒋᐊᕈᑎᑦ ᓴᓐᓂᕈᑎᐅᑉ ᐃᒪᖓᓂ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᔪᑦ: ᐊᖑᓇᓱᐊᕐᓂᖅ ᐊᒻᒪᓗ ᐊᐅᓚᖅᑎᑦᑎᓂᖅ ᓴᓐᓂᕈᑎᐅᑉ ᐃᒪᖓᓂᑦ ᐅᓄᕐᓂᒃᑲᓐᓂᖏᓐᓂᑦ ᐃᒪᓐᓇᐅᕗᑦ ᐃᓱᒪᒋᔭᐅᔪᑦ ᐱᓂᕐᓗᒃᑕᐅᓯᒪᖏᓪᓗᑎᒃ (ᐱᐅᓈᓗᑎᒃ ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᔪᑦ, NDF) ᑕᒪᒃᑯᓄᖓ ᓇᓄᐃᑦ ᐊᖑᑦᔭᐅᓯᒪᔪᑦ ᓯᕗᓂᖓᒍᑦ ᒫᔨ 10, 2010 ᐊᒻᒪᓗ ᑭᖑᓂᖓᒍᑦ ᔪᓚᐃ 1, 2013.

ᑕᐃᑦᓱᒪᓂᓕᓴᐃᑦ ᒪᑯᓇᓂ ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᔪᑦ (NDF) ᐅᖃᐅᔨᒋᐊᕈᑎᑦ ᓴᓐᓂᕈᑎᐅᑉ ᐃᒪᖓᓂ ᐊᐅᓚᑦᑎᓂᕐᒥ ᐃᒻᒥᒃᑰᖓᓂᑦ

ᓯᕗᓂᖓᒍᑦ ᒫᔨ 10, 2010, ᐊᐅᓚᖅᑎᑦᑎᓂᑦ ᒪᓕᒐᖅᑎᒍ−ᐊᖑᑦᔭᐅᓯᒪᔪᑦ ᓇᓄᐃᑦ ᑕᒫᖓᑦ ᓴᓐᓂᕈᑎᐅᑉ ᐃᒪᖓᓂᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᑦ ᐃᓱᒪᒋᔭᐅᓚᐅᖅᐳᑦ ᐱᓂᕐᓗᒃᑕᐅᓯᒪᖏᓂᕋᒃᑕᐅᓪᓗᑎᒃ. ᐊᑯᓐᓂᖏᓐᓂ ᒫᔨ 10, 2010 ᐊᒻᒪᓗ ᔪᓂ 30, 2017, ᐱᐅᓈᖏᑦᑐᑦ ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᔪᑦ (NDF) ᐅᖃᐅᔨᒋᐊᕈᑎᑦ ᐋᖅᑭᒃᑕᐅᓯᒪᓕᓚᐅᖅᐳᑦ ᐊᐅᓚᖅᑎᑦᑕᐅᔪᓐᓇᖅᓯᓗᑎᒃ ᓴᓐᓂᕈᑎᐅᑉ ᐃᒪᖓᓂᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᕐᒥ ᐊᒻᒪᓗ, ᑕᐃᒪᓐᓇ ᓴᕿᑕᐅᓂᖏᓄᑦ, ᐊᐅᓚᖅᑎᑕᐅᔪᑦ ᓇᓄᐃᑦ ᐊᖑᑦᔭᐅᓯᒪᔪᑦ ᓴᓐᓂᕈᑎᐅᑉ ᐃᒪᖓᓂᑦ ᐊᑐᖅᑎᓪᓗᒍ ᑕᒪᓐᓇ ᐱᕕᖃᕐᓂᖅ ᐊᑐᖅᑎᓗᒍ ᑕᐃᒪᓐᓇᐅᔪᓐᓇᖅᑎᑕᐅᓚᐅᙱᓚᑦ. ᐱᐅᓈᖏᑦᑐᑦ ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᓂᖏᑦ (NDF) ᑐᙵᕕᖃᒃᑎᑕᐅᓚᐅᖅᐳᖅ ᐅᓄᖅᓯᒋᐊᖅᑕᐅᓂᖏᓐᓂᑦ ᐅᓄᕐᓂᖏᑕ ᐊᖑᑦᔭᐅᔪᓐᓇᖅᑐᑦ ᐅᓄᕐᓂᖏᑦ ᑕᒪᒃᑭᖏᓐᓂᑦ ᓄᓇᕗᑦ ᐊᒻᒪᓗ ᖃᓛᑦᖠᑦ ᐊᒻᒪᓗ ᒪᓕᒃᑕᐅᔪᓐᓇᖅᑐᑦ ᓴᕿᑎᑕᐅᓂᖏᑦ ᑐᙵᕕᖃᒃᑎᑕᐅᓚᐅᖅᐳᑦ ᐆᒪᑯᑖᖃᑦᑕᕐᓂᖏᑕ ᖃᓄᑎᒋᐅᓂᖏᓐᓂᑦ ᑐᑭᓯᓇᖅᓯᑎᑦᑎᓗᓂ ᐅᓄᕐᓂᖏᑕ ᖃᑦᓰᓇᕈᒃᑲᓐᓂᕐᓂᖏᓂᑦ. ᔪᓚᐃ 1, 2017, ᐃᓱᒪᒋᔭᐅᓗᑎᒃ ᐱᔭᐅᔪᓐᓇᖅᑐᑦ ᑐᓴᐅᒪᔪᑎᒃᓴᐃᑦ ᐅᓄᕐᓂᖏᑕ ᐊᒥᓲᓂᖏᑦ ᐊᒻᒪᓗ ᖃᓄᐃᓕᕙᓪᓕᐊᓂᖏᑦ ᐱᖃᓯᐅᑎᓗᒋᑦ ᐊᖑᑦᔭᐅᔪᓐᓇᖅᑐᑦ ᐱᔭᐅᔪᓐᓇᕐᓂᖏᑦ, ᐃᒪᓐᓇᐅᓂᕋᒃᑕᐅᓕᓚᐅᖅᐳᑦ ᐊᖑᑦᔭᐅᔪᑦ ᐊᒻᒪᓗ ᐊᐅᓚᖅᑎᑕᐅᔪᑦ ᑕᒫᖓᑦ ᓴᓐᓂᕈᑎᐅᑉ ᐃᒪᖓᓂᑦ ᐊᐅᓚᑦᑎᓂᕐᒧᑦ ᐃᒻᒥᒃᑰᖓᓂᑦ ᐱᓂᕐᓗᒃᑕᐅᓯᒪᖏᓐᓂᕋᒃᑕᐅᓗᑎᒃ (ᐱᐅᓈᓗᑎᒃ ᐱᓂᕐᓗᒃᑕᐅᓯᒪᖏᑦᑐᑦ ᖃᐅᔨᔭᐅᔪᑦ, NDF) ᓇᓄᐃᑦ ᐊᖑᑦᔭᐅᓯᒪᔪᑦ ᓯᕗᓂᖓᓂ ᒫᔨ 10, 2010 ᐊᒻᒪᓗ ᑭᖑᓂᖓᓂ ᔪᓚᐃ 1, 2013. ᐅᓪᓗᖓ ᔪᓚᐃ 1, 2013 ᒪᓕᑦᑎᐊᖅᓯᒪᕗᑦ ᑕᐃᑦᓱᒪᓂ ᑲᓇᑕ ᖃᑦᓰᓇᕈᕆᐊᖅᓯᓚᐅᑎᓗᒍ ᐊᖑᑦᔭᐅᔪᓐᓇᖅᑐᑦ ᐅᓄᕐᓂᖏᓐᓂᑦ, ᐃᓚᒋᔭᐅᓗᑎᒃ ᖃᓛᑦᖠᑦ, ᐅᓄᕐᓂᖏᑕ ᐋᖅᑭᒃᑕᐅᓯᒪᓇᐅᕐᓂᖏᓐᓄᑦ 2017/2018 ᐊᖑᑦᔭᐅᔪᑦ ᓇᓪᓕᕉᑎᓂᖓᓂ ᐊᒻᒪᓗ ᐊᖑᒪᑎᓕᕆᐊᖅᑎᑦ ᐅᓄᕐᓂᖏᑦ ᖃᐅᔨᓇᓱᐊᖅᑕᐅᔪᑎᖏᑦ ᖃᐅᔨᒪᔪᑎᒃᓴᐃᑦ ᓄᐊᑕᐅᓯᒪᓕᓚᐅᕐᒪᑕ.

ᐅᓄᕐᓂᖏᑕ ᖃᓄᐃᓕᖓᓕᕐᓂᖏᑦ ᐊᒻᒪᓗ ᖃᓄᐃᓕᕙᓪᓕᐊᓂᖏᑦ

ᓴᓐᓂᕈᑎᐅᑉ ᐃᒪᖓᓂ ᐅᓄᕐᓂᒃᑲᓐᓂᖏᑦ ᒥᒃᓴᐅᓴᒃᑕᐅᓚᐅᖅᐳᑦ ᐃᒪᓇᑎᒋᐅᓗᒋᑦ 2074 ᓇᓄᐃᑦ 1997-ᒥ. ᐱᒋᐊᓕᕐᓗᑎᒃ 2011-ᒥ, ᓄᓇᕗᑦ ᒐᕙᒪᒃᑯᑦ, ᐱᓕᕆᖃᑎᖃᕐᓗᑎᒃ ᒐᕙᒪᖏᓐᓂᑦ ᖃᓛᑦᖠᒃᑯᑦ, ᐊᑐᓕᖅᑎᑦᑎᓚᐅᕐᒪᑕ ᐊᒃᓱᕈᒪᕆᒡᓗᑎᒃ, ᐱᖓᓱᑦ−ᐊᕐᕌᒍᑦ ᖃᐅᔨᓇᓱᐊᓂᕐᒧᑦ ᐱᓕᕆᔪᑎᒥᒃ ᐋᖅᑭᒃᓯᖔᕋᓱᐊᕐᓗᑎᒃ ᐅᓪᓗᒥᒧᑦ ᐊᖑᒪᑎᔪᓂᒃ ᐅᓄᕐᓂᖏᓐᓄᑦ ᒥᒃᓴᐅᓴᒃᓯᔪᑎᓂᒃ, ᓴᖅᑭᑕᐅᔪᓪᓗ ᕿᒥᕐᕈᔭᐅᓚᐅᕆᓪᓗᑎᒃ ᐊᒻᒪᓗ ᓇᓗᓇᖅᑕᐅᓪᓗᑎᒃ ᑕᐅᕙᓂ 2017−ᒥ ᓇᓄᐃᑦ ᐋᖅᑭᑦᑎᐊᖅᓯᒪᔭᕆᐊᖃᕐᓂᒧᑦ ᑲᑎᒪᔨᕋᓛᑦ (PBTC) ᖃᓄᐃᓕᖓᓕᕐᓂᖏᓐᓂᑦ ᑎᑎᕋᒃᓯᕕᒃ. ᓴᖅᑭᓚᐅᖅᑐᑦ ᒫᓐᓇᕋᑖᖅ ᖃᐅᔨᓇᓱᐊᕈᑕᐅᓚᐅᖅᑐᑦ ᓇᓗᓇᐃᖅᓯᓚᐅᕐᒪᑕ ᐊᒥᓲᓂᖅᓴᐅᓕᕐᓂᖏᓐᓂᑦ ᐅᓄᕐᓂᖏᑕ ᖃᓄᑎᒋᐅᓂᖏᑦ ᑕᐃᒪᙵᓂᓪᓕ ᖃᐅᔨᓇᓱᐊᖅᑕᐅᓚᐅᖅᓯᒪᓂᖏᓐᓂᑦ 1997−ᒥ (2826 ᓇᓄᐃᑦ ᐅᓄᕐᓂᖅᓴᐅᓕᕐᒪᑕ 2074−ᖑᓚᐅᖅᑐᓂᑦ ᓇᓄᕐᓂᑦ). ᖃᐅᔨᒪᒋᑦ ᑕᒪᓐᓇ ᓄᑖᖅ 2016 ᒥᒃᓴᐅᓴᒃᓯᔪᑎ ᑐᕌᖓᑦᖤᐅᑎᒋᑎᑕᐅᔪᓐᓇᖏᒪᑦ ᐊᔾᔨᒌᒍᓃᕐᓂᖏᓄᑦ ᒫᓐᓇᕋᑖᖅ ᖃᐅᔨᓇᓱᐊᕐᓂᐅᓚᐅᖅᑐᒧᑦ ᐃᓱᒪᓕᐅᕈᑕᐅᒐᕙᖅᐸᑕ ᑕᐃᑦᓱᒪᓂ ᖃᓄᐃᓕᕙᓪᓕᐊᓂᕆᓚᐅᖅᑕᖏᓄᑦ ᖁᓚᖏᑦᑎᐊᕐᓗᑎᒃ ᐱᔾᔪᑎᒋᓪᓗᒍ ᐊᔾᔨᒋᔪᓐᓃᕐᓂᖏᓄᑦ ᖃᐅᔨᓇᓱᐊᓂᕐᒧᑦ ᐱᓕᕆᔪᓰᑦ ᐊᒻᒪᓗ ᓇᔪᖅᑕᐅᔪᓐᓇᖅᑐᑉ ᕿᓂᕐᕕᐅᔪᓐᓇᓕᕐᒪᑦ ᐊᕗᖓᐅᓂᖅᓴᖅ. ᑕᐃᑦᓱᒪᓂᐅᓚᐅᖅᑐᖅ ᖃᓄᐃᓕᕙᓪᓕᐊᓂᖅ ᐃᓱᒪᒋᔭᐅᖕᒪᑦ ᓇᓗᓈᕿᓇᓱᒋᔭᐅᓪᓗᓂ ᐊᒻᒪᓗ ᒫᓐᓇᕋᑖᖅ ᖃᓄᐃᓕᕙᓪᓕᐊᓂᕆᔭᐅᔪᖅ (ᐅᓄᖏᓐᓂᖅᓴᐅᖕᒪᑕ 15−ᓂᑦ ᐊᕐᕌᒍᓂᑦ) ᐃᓱᒪᓇᕐᒪᑦ ᐃᒪᓐᓇᐅᓱᒋᔭᐅᓪᓗᓂ “ᓱᕌᕙᓪᓕᐊᔮᔪᓐᓃᖅᑐᑦ”.

ᐊᖑᓇᓱᐊᖅᑕᐅᓂᖏᓐᓂᑦ ᐊᐅᓚᑦᑎᓂᖅ

ᑕᒪᓐᓇᐅᑎᓪᓗᒍ ᐅᓄᕐᓂᒃᑲᓐᓂᖏᑕ ᒥᒃᓴᐅᓴᑦᑕᐅᔪᑎᖏᑦ ᐅᖃᓕᒫᒐᓕᐊᖑᓚᐅᖅᑐᑦ 2016−ᒥ, ᑲᑎᑕᐅᓗᑎᒃ ᐊᖑᓇᓱᐊᖅᑕᐅᓂᖏᑦ ᓴᓐᓂᕈᑎᐅᑉ ᐃᒪᖏᑕ ᐊᑯᓐᓂᖏᓐᓂ ᖃᓛᑦᖠᓪᓗ ᐊᒻᒪᓗ ᑲᓇᑕᐅᑉ ᐃᓱᒪᒋᔭᐅᖕᒪᑦ ᓄᖑᑉᐸᓪᓕᖏᑎᑕᒃᓴᐅᓇᓱᒋᔭᐅᓪᓗᑎᒃ. ᓄᓇᕗᑦ ᒐᕙᒪᒃᑯᑦ ᐅᓄᕈᓐᓃᕆᐊᖅᑎᑦᑎᖃᑦᑕᓚᐅᕐᒪᑕ ᐊᕐᕌᒍᓕᒫᒥ ᐊᖑᓇᓱᒃᑕᐅᔪᓐᓇᖅᑐᑦ ᓂᕕᖓᑖᖏᓐᓂᑦ ᐃᒪᓐᓇᑎᒋᓂᑦ 10 ᓇᓄᕐᓂᑦ ᐊᑐᓂ ᐊᕐᕌᒍᓂ ᐊᑐᖅᑎᓪᓗᒋᑦ ᑎᓴᒪᑦ ᐊᕐᕌᒍᑦ, ᐃᒪᓐᓇᑎᒋᐅᓗᑎᒃ 105 ᓇᓄᐃᑦ ᑕᐅᕙᓂ 2009-2010 ᐊᖑᓇᓱᒃᑕᐅᔪᓐᓇᕐᓗᑎᒃ ᓇᓪᓕᕉᑎᓂᕐᒥ ᐃᒪᓇᐅᓕᕐᓗᑎᒃ 65 ᓇᓄᐃᑦ ᑕᐅᕙᓂ 2013-2014 ᐊᖑᓇᓱᒃᑕᐅᔪᓐᓇᕐᓗᑎᒃ ᓇᓪᓕᕉᑎᓂᕐᒥ, ᐊᒻᒪᓗ ᐅᓄᕐᓂᖏᑕ ᐋᖅᑭᒃᑕᐅᓯᒪᓇᐅᕐᓂᖏᓐᓄᑦ 2017/2018 ᐊᖑᑦᔭᐅᔪᑦ ᓇᓪᓕᕉᑎᓂᖓᓂ. ᐊᐅᓚᑦᑎᓂᕐᒧᑦ ᐱᓕᕆᐊᖑᔪᒪᔪᑦ ᑐᑭᓯᔭᐅᔪᓐᓇᕐᒥᔪᑦ ᐊᑐᖅᑕᐅᓗᑎᒃ ᓄᑖᑦ ᐅᓄᕐᓂᖏᓐᓄᑦ ᑐᓴᐅᒪᔪᑎᒃᓴᐃᑦ, ᑕᐃᒪᐃᒃᑲᓗᐊᖅᑎᓪᓗᒍ, ᒫᓐᓇ ᐱᓕᕆᐊᖑᔪᒪᔪᑦ ᓄᓇᕗᒻᒧᑦ ᐊᒻᒪᓗ ᑲᓛᑦᖠᓂᑦ ᐋᖅᑭᐅᒪᑎᑕᐅᖁᓗᒋᑦ ᑕᐃᒪᑦᑕᐃᓐᓇᓕᓗᑎᒃ ᐅᓄᕐᓂᖏᑦ ᓇᓄᐃᑦ ᑲᔪᓯᑦᑎᐊᕈᓐᓇᕐᓗᑎᒃ ᓂᕕᖓᑖᑦ ᐱᔾᔪᑕᐅᕙᒃᑐᑦ ᐃᓘᓐᓇᓕᒫᖏᓄᑦ ᐃᓄᖕᓂᑦ ᑐᖁᑕᐅᖃᑦᑕᕐᓂᖏᓄᑦ ᐱᖃᓯᐅᑎᓗᒋᑦ ᐊᕐᕌᒍᑕᒪᑦ ᐊᖑᔭᐅᖃᑦᑕᕐᓂᖏᑦ ᐊᒻᒪᓗ ᐱᔭᐅᕙᒃᑐᑦ ᓴᐳᒻᒥᓇᓱᐊᖅᑎᓗᒋᑦ ᐃᓅᓯᕐᒥᖕᓂᑦ ᐊᒻᒪᓗ ᐱᖁᑎᒥᖕᓂᑦ.

ᐃᓚᒋᓕᐅᑎᓯᒪᔪᖅ 2: ᒪᓕᒐᖅ, ᒪᓕᒃᑕᐅᖁᔭᐅᔪᑦ ᐊᒻᒪᓗ ᐊᖏᖃᑎᒋᒍᑎᑦ ᑐᕌᖓᔪᑦ ᓇᓄᕐᓄᑦ ᐊᑐᓂ ᐊᕕᒃᑐᖅᓯᒪᔪᓄᑦ ᐊᒻᒪᓗ ᓄᓇᓕᖃᕐᕕᐅᔪᓄᑦ, ᑲᓇᑕᒥ ᐊᒻᒪᓗ ᓄᓇᕐᔪᐊᓕᒫᒥ

ᒫᓂᑐᕙ

ᓂᕐᔪᑎᓕᕆᓂᕐᒧᑦ ᒪᓕᒐᖅ (1987)
ᓇᓄᕐᓂᑦ ᓴᐳᒻᒥᒃᓯᓂᕐᒧᑦ ᒪᓕᒐᖅ (2002)
ᓄᖑᑐᐃᓐᓇᕆᐊᖃᓕᖅᑐᓄᑦ ᓂᕐᔪᑎᓄᑦ ᐊᒻᒪᓗ ᐆᒪᔫᖃᑎᒌᓄᑦ ᒪᓕᒐᖅ (1990)

ᓅᐸᓐᓛᓐ ᐊᒻᒪᓗ ᓛᐱᑐᐊ

ᓂᕐᔪᑎᓕᕆᓂᕐᒧᑦ ᒪᓕᒐᖅ (1990)
ᓂᕐᔪᑎᓕᕆᓂᕐᒥ ᒪᓕᒃᑕᐅᔭᕆᐊᓕᑦ ᐅᑯᓇᓃᑦᑐᑦ ᓂᕐᔪᑎᓕᕆᓂᕐᒧᑦ ᒪᓕᒐᑦ (1996)
ᓅᐸᓐᓛᓐ ᐊᒻᒪᓗ ᓛᐱᑐᐊ ᒪᓕᒃᑕᐅᔭᕆᐊᓕᖁᑎᖏᑦ 26/07 (ᐊᖑᓇᓱᐊᕐᕕᒃᓴᐅᓕᖅᑎᑦᑎᔪᑦ ᐊᖏᔪᓂᑦ ᐱᓇᓱᒐᒃᓴᓂᑦ ᓇᓄᕐᓂᑦ ᐊᖑᓇᓱᒡᓗᒋᑦ ᐱᖁᔨᔪᑎ, ᓛᐱᑐᐊ, ᐅᑯᑎᒎᓇ ᓂᕐᔪᑎᓕᕆᓂᕐᒧᑦ ᒪᓕᒃᑕᐅᔭᕆᐊᓕᒃᑎᒍ ᐊᒻᒪᓗ ᓂᕐᔪᑎᓕᕆᓂᕐᒧᑦ ᒪᓕᒐᖅᑎᒍ (2007)
ᓛᐱᑐᐊ ᐃᓄᖏᑕ ᓄᓇᑖᕈᑎᖏᓐᓄᑦ ᐊᖏᖃᑎᒋᒍᑎᑦ

ᓄᓇᑦᓯᐊᖅ

ᓂᕐᔪᑎᓕᕆᓂᕐᒧᑦ ᒪᓕᒐᖅ
ᓂᕐᔪᑎᓕᕆᓂᕐᒧᑦ ᒪᓕᒐᑦ ᐱᓇᓱᒡᓗᒋᑦ ᐊᖑᓇᓱᐊᓗᒋᑦ ᒪᓕᒃᑕᐅᔭᕆᐊᓕᑦ
ᐆᒪᔪᐃᑦ ᖁᒃᓴᓇᖅᑐᒦᓕᖅᑐᓄᑦ (ᓄᓇᑦᓯᐊᖅ) ᒪᓕᒐᖅ (2009)
ᐃᓄᕕᐊᓗᐃᑦ ᓄᓇᓕᕈᒃᑎᑕᐅᓯᒪᔪᑦ ᐊᕕᒃᓯᒪᓂᖓᓂ ᐊᒃᓚᕕᒃ ᐊᖑᓇᓱᐊᖅᑐᓕᕆᔨᒃᑯᖏᑕ ᑲᑎᒪᔨᕋᓛᖏᑕ ᒪᓕᒃᑕᐅᔭᕆᐊᓕᖁᑎᖏᑦ
ᐃᓄᕕᐊᓗᐃᑦ ᓄᓇᓕᕈᒃᑎᑕᐅᓯᒪᔪᑦ ᐊᕕᒃᓯᒪᓂᖓᓂ ᐃᓄᕕᒃ ᐊᖑᓇᓱᐊᖅᑐᓕᕆᔨᒃᑯᖏᑕ ᑲᑎᒪᔨᕋᓛᖏᑕ ᒪᓕᒃᑕᐅᔭᕆᐊᓕᖁᑎᖏᑦ
ᐃᓄᕕᐊᓗᐃᑦ ᓄᓇᓕᕈᒃᑎᑕᐅᓯᒪᔪᑦ ᐊᕕᒃᓯᒪᓂᖓᓂ ᐃᑲᓱᒃ ᐊᖑᓇᓱᐊᖅᑐᓕᕆᔨᒃᑯᖏᑕ ᑲᑎᒪᔨᕋᓛᖏᑕ ᒪᓕᒃᑕᐅᔭᕆᐊᓕᖁᑎᖏᑦ
ᐃᓄᕕᐊᓗᐃᑦ ᓄᓇᓕᕈᒃᑎᑕᐅᓯᒪᔪᑦ ᐊᕕᒃᓯᒪᓂᖓᓂ ᐅᓗᒃᓴᖅᑐᖅ ᐊᖑᓇᓱᐊᖅᑐᓕᕆᔨᒃᑯᖏᑕ ᑲᑎᒪᔨᕋᓛᖏᑕ ᒪᓕᒃᑕᐅᔭᕆᐊᓕᖁᑎᖏᑦ
ᐃᓄᕕᐊᓗᐃᑦ ᓄᓇᓕᕈᒃᑎᑕᐅᓯᒪᔪᑦ ᐊᕕᒃᓯᒪᓂᖓᓂ ᑐᒃᑑᔭᖅᑐᖅ ᐊᖑᓇᓱᐊᖅᑐᓕᕆᔨᒃᑯᖏᑕ ᑲᑎᒪᔨᕋᓛᖏᑕ ᒪᓕᒃᑕᐅᔭᕆᐊᓕᖁᑎᖏᑦ
ᐃᓄᕕᐊᓗᐃᑦ ᓄᓇᓕᕈᒃᑎᑕᐅᓯᒪᔪᑦ ᐊᕕᒃᓯᒪᓂᖓᓂ ᐸᐅᓚᑐᖅ ᐊᖑᓇᓱᐊᖅᑐᓕᕆᔨᒃᑯᖏᑕ ᑲᑎᒪᔨᕋᓛᖏᑕ ᒪᓕᒃᑕᐅᔭᕆᐊᓕᖁᑎᖏᑦ
ᐅᐊᓕᓂᖅ ᐅᑭᐅᖅᑕᖅᑐᒥ ᓄᓇᑖᕈᑎᖏᑦ – ᐃᓄᕕᐊᓗᐃᑦ ᐱᔭᕇᕈᑎᖏᑦ ᐊᖏᖃᑎᒋᒍᑎᑦ (ᐊᒻᒪᓗ ᐋᖅᑭᒋᐊᖅᓯᔪᑎᖏᑦ)
ᐃᓄᕕᐊᓗᐃᑦ-ᐃᓄᑉᐱᐊᑦ ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᐊᖏᖃᑎᒋᒍᑎᖏᑦ ᐅᖅᑯᒃᐸᓯᐊᓂ ᐅᐊᓕᓂᐅᑉ ᑕᕆᐅᖓᓂ (2011, ᐊᑐᖅᑕᐅᓕᖅᑐ 1988−ᒥᓂᑦ)
ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᐊᖏᖃᑎᒋᒍᑎᖏᑦ ᐊᒡᒍᖅᐸᓯᐊᓂ ᐅᐊᓕᓂᐅᑉ ᑕᕆᐅᖓᓂ ᐊᒻᒪᓗ ᐅᖅᓱᕆᐊᑉ ᐃᒪᖓᓂ ᓇᓄᐃᑦ ᐅᓄᕐᓂᖏᑦ – ᐅᑯᓇᓂ ᐃᓄᖏᓐᓂ ᕿᑎᕐᒥᐅᑦ ᐅᐊᓕᓂᕐᒥ ᐊᕕᒃᓯᒪᓂᖓᓂ ᓄᓇᕗᒻᒥ ᐊᒻᒪᓗ ᐃᓄᕕᐊᓗᖕᓂ (2006)

ᓄᓇᕗᑦ

ᓂᕐᔪᑎᓕᕆᓂᕐᒧᑦ ᒪᓕᒐᖅ
ᐊᖏᔪᑦ ᐱᓇᓱᒐᒃᓴᑦ ᐊᖑᓇᓱᐊᕐᓗᓂ ᒪᓕᒃᑕᐅᔭᕆᐊᓕᑦ

1. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᕿᑭᖅᑕᕐᔪᐊᖅ ᓇᑦᑎᕙᒃ ᐊᖑᓇᓱᐊᖅᑐᓕᕆᔨᒃᑯᖏᑕ ᐃᖃᓇᐃᔭᕐᕕᖁᑕ, ᑲᖏᖅᖢᒑᐱᒃ ᓇᒪᐅᑕᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᒥᑦᑎᒪᑕᓕᒃ ᒥᑦᑎᒪᑕᓕᖕᒥ ᐊᖑᓇᓱᐊᖅᑐᓕᕆᔨᒃᑯᖏᑕ ᐃᖃᓇᐃᔭᕐᕕᖁᑕ, ᕿᑭᖅᑖᓗᒃ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᓴᓐᓂᕈᑎᐅᑉ ᐃᒪᖓᓂ” ᓇᓄᐃᑦ ᐅᓄᕐᓂᖏᑦ.
2. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐸᓐᓂᖅᑑᒥ ᐸᓐᓂᖅᑐᑉ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᐃᖃᓗᐃᑦ ᐊᒪᕈᒃ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᑭᒻᒥᕈᑦ ᒪᔪᖅᑲᓕᒃ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᕿᑭᖅᑖᓗᒃ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᕿᑭᖅᑖᓗᑉ ᐃᑭᖓᓂ” ᓇᓄᐃᑦ ᐅᓄᕐᓂᖏᑦ.
3. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᐃᒡᓗᓕᒑᕐᔪᒃ ᐊᕿᒋᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᓇᐅᔮᑦ ᐊᕐᑯᒃ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᓴᓪᓖᑦ ᐊᐃᕕᓕᒃ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᓴᓂᕋᔭᒃ ᓴᓂᕋᔭᖕᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᐃᒡᓗᓕᒃ ᐃᒡᓗᓕᖕᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᑭᙵᐃᑦ ᐊᐃᕕᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᑭᒻᒥᕈᑦ ᒪᔪᖅᑲᓕᒃ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᑭᕙᓪᓕᖅ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ, ᕿᑭᖅᑖᓗᒃ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᐊᒥᑦᑑᑉ ᑕᕆᐅᖓᓂ” ᓇᓄᐃᑦ ᐅᓄᕐᓂᖏᑦ.
4. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᑕᓗᕐᔪᐊᖅ ᑕᓗᕐᔪᐊᕐᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᑯᒑᕈᒃ ᑯᕐᑕᐃᕈᔪᐊᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᐃᒡᓗᓕᒃ ᐃᒡᓗᓕᖕᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᓴᓂᕋᔭᒃ ᓴᓂᕋᔭᖕᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᓇᐅᔭᑦ ᐊᐃᕕᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᐅᖅᓱᖅᑐᖅ ᐅᖅᓱᖅᑑᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᕿᑎᕐᒥᐅᑦ ᐊᖑᓇᓱᐊᖅᑐᓕᕆᔨᒃᑯᑦ ᑲᑐᔾᔨᖃᑎᒋᖏᑦ, ᑭᕙᓪᓕᖅ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ, ᕿᑭᖅᑖᓗᒃ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᕿᑭᖅᑖᓗᑉ ᐃᑭᖓᓂ” ᓇᓄᐃᑦ ᐅᓄᕐᓂᖏᑦ.
5. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᐊᐅᓱᐃᑐᖅ ᐊᐃᕕᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᕿᑭᖅᑖᓗᒃ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᑲᐃᓂ ᑲᖏᖅᖢᐊᓂ” ᓇᓄᐃᑦ ᐅᓄᕐᓂᖏᑦ.
6. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᐃᒃᐱᐊᕐᔪᒃ ᐃᑲᔪᑎᑦ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᐊᐅᓱᐃᑦᑐᖅ ᐊᐅᕕᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᖃᐅᓱᐃᑦᑐᖅ ᖃᐅᓱᐃᑦᑐᕐᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᕿᑭᖅᑖᓗᒃ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᕿᑭᖅᑖᓗᑉ ᐃᑭᖓᓂ” ᓇᓄᐃᑦ ᐅᓄᕐᓂᖏᑦ.
7. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᐃᖃᓗᒃᑐᑦᑎᐊᖅ ᐃᖃᓗᒃᑐᑦᑎᐊᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᐅᖅᓱᖅᑐᖅ ᐅᖅᓱᖅᑐᑉ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᑕᓗᕐᔪᐊᖅ ᑕᓗᕐᔪᐊᕐᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᕿᑎᕐᒥᐅᑦ ᐊᖑᓇᓱᐊᖅᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᖃᒡᒋᐅᔭᐅᑉ” ᓇᓄᐃᑦ ᐅᓄᕐᓂᖏᑦ.
8. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᖁᕐᓗᖅᑐᖅ ᖁᕐᓗᖅᑐᖅ ᐊᖑᓇᐃᑎᑦ ᑲᑐᔾᔨᖃᑎᒋᖏᑦ, ᕿᑎᕐᒥᐅᑦ ᐊᖑᓇᓱᐊᖅᑐᓕᕆᔨᒃᑯᑦ ᑲᑐᔾᔨᖃᑎᒋᖏᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᐊᒡᒍᖅᐸᓯᐊᓂ ᐅᐊᓕᓂᐅᑉ” ᓇᓄᐃᑦ ᐅᓄᕐᓂᖏᑦ.
9. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᐊᐅᓱᐃᑦᑐᖅ ᐊᐃᕕᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᕿᑭᖅᑖᓗᒃ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᓄᐊᕇᔾᔭᓐ ᐃᒪᖓᓂ” ᓇᓄᐃᑦ ᐅᓄᕐᓂᖏᑦ.
10. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᓴᓂᑭᓗᐊᖅ ᓴᓂᑭᓗᐊᕐᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᕿᑭᖅᑖᓗᒃ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᐅᖅᑯᒃᐸᓯᐊᓂ ᓄᓇᕕᐅᑉ ᑲᖏᖅᖢᐊᓗᐊᓂ” ᓇᓄᐃᑦ ᐅᓄᕐᓂᖏᑦ.
11. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᐃᖃᓗᒃᑐᑦᑎᐊᖅ ᐃᖃᓗᒃᑐᑦᑎᐊᕐᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᕿᑎᕐᒥᐅᑦ ᐊᖑᓇᓱᐊᖅᑐᓕᕆᔨᒃᑯᑦ ᑲᑐᔾᔨᖃᑎᒋᖏᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᐅᖅᓱᕆᐊᒥ” ᓇᓄᐃᑦ ᐅᓄᕐᓂᖏᑦ.
12. ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᐊᕐᕕᐊᖅ ᐊᕐᕕᐊᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᖃᒪᓂᑦᑐᐊᖅ ᖃᒪᓂᑦᑐᐊᕐᒥ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᐃᒡᓗᓕᒑᕐᔪᒃ ᐊᕿᒡᒋᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᖃᖏᖅᖠᓂᖅ ᐊᕿᒡᒋᐊᖅ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᑎᑭᕋᕐᔪᐊᖅ ᐃᒡᓴᑎᒃ ᐊᖑᓇᓱᐊᖅᑐᓕᕆᔨᒃᑯᑦ ᐃᖃᓇᐃᔭᕕᖁᑕ, ᑭᕙᓪᓕᖅ ᓂᕐᔪᑎᓕᕆᓂᕐᒧᑦ ᑲᑎᒪᔨᑦ, ᐊᒻᒪᓗ ᐊᕙᑎᓕᕆᔨᒃᑯᑦ ᐊᐅᓚᑦᑎᓂᖓ “ᐱᖓᓐᓇᖅᐸᓯᐊᓂ ᓄᓇᕕᐅᑉ ᑲᖏᖅᖢᐊᓂ” ᓇᓄᐃᑦ ᐅᓄᕐᓂᖏᑦ.

ᓇᓄᓕᕆᓂᕐᒧᑦ ᐊᐅᓚᑦᑎᓂᕐᒥ ᐊᖏᖃᑎᒋᒍᑎᑦ ᐊᒡᒍᐊᓂ ᐅᐊᓕᓂᐅᑉ ᑕᕆᐅᖓᑕ ᐊᒻᒪᓗ ᐅᖅᓱᕆᐊᑉ ᑲᖏᖅᖢᐊᓂ ᓇᓄᐃᑦ ᐅᓄᕐᓂᖏᑦ − ᐃᓚᒋᓗᒋᑦ ᐃᓄᖏᑦ ᕿᑎᕐᒥᐅᑦ ᐱᖓᓇᖓᑕ ᐊᕕᒃᑐᖅᓯᒪᓂᖓᓂ ᓄᓇᕗᒻᒥ ᐊᒻᒪᓗ ᐃᓄᕕᐊᓗᖕᓂ (2006)
ᓄᓇᕗᖅᑖᕈᑎᑦ ᐊᖏᖃᑎᒋᒍᑎᖏᑦ (ᐊᒻᒪᓗ ᐋᖅᑭᒋᐊᖅᑕᐅᔪᑎᖏᑦ)

ᐊᓐᑎᐅᕆᔪ

ᐃᖃᓗᓕᕆᓂᕐᒥ ᓂᕐᔪᑎᓕᕆᓂᕐᒥᓗ ᓇᖑᑦᑎᑦᑕᐃᓕᒪᓂᕐᒧᑦ ᒪᓕᒐᖅ (1997)
ᓄᖑᑐᐃᓐᓇᕆᐊᖃᓕᖅᑐᓄᑦ ᐆᒪᔪᓕᕆᓂᕐᒧᑦ ᒪᓕᒐᖅ (2007)

ᑯᐱᐊᒃ

ᒪᓕᒐᖅ ᑐᕌᖓᔪᖅ ᓇᖑᑦᑎᑦᑕᐃᓕᒪᓂᕐᒧᑦ ᐊᒻᒪᓗ ᐱᕙᓪᓕᐊᑎᑦᑎᓂᕐᒧᑦ ᓂᕐᔪᑎᓂ (2002)
ᓇᓄᓕᕆᓂᕐᒧᑦ ᒪᓕᒃᑕᐅᖁᔭᐅᔪᑦ (1984)
ᓯᕿᓂᕐᒥᐅᑦ ᐊᒻᒪᓗ ᐊᒡᒍᐊᓂ ᑯᐱᐊᒃ ᐊᖏᖃᑎᒋᒍᑎᑦ ᐊᒻᒪᓗ ᓈᒪᓕᖅᑎᑦᑎᔪᑦ ᐊᖏᖃᑎᒋᒍᑎᑦ
ᐊᖏᖃᑎᒋᒍᑎᑦ ᑐᕌᒐᔪᑦ ᐊᑐᓕᖅᑎᑕᐅᓂᖏᓐᓄᑦ ᓯᕿᓂᕐᒥᐅᑦ ᐊᒻᒪᓗ ᐊᒡᒍᐊᓂ ᑯᐱᐊᒃ ᐊᖏᖃᑎᒋᒍᑎᑦ ᐃᓚᒋᓗᒍ ᐊᖓᔪᖅᑳᕐᔪᐊᖅ ᑯᐃᓐ ᐱᔾᔪᑎᖃᕐᓗᓂ ᑲᓇᑕᒥᑦ ᐊᒻᒪᓗ ᒪᑭᕝᕕᒃ ᑎᒥᖑᖅᑎᑕᐅᓯᒪᔪᖅ
ᓄᓇᕕᒃ ᐃᓄᖏᑕ ᓄᓇᑖᕈᑎᖏᓄᑦ ᐊᖏᖃᑎᒋᒍᑎᑦ
ᐄᔪ ᑕᕆᐅᑉ ᐃᒪᖓᓂ ᐊᕕᒃᓯᒪᓂᖓᑕ ᓄᓇᑖᕈᑎᓄᑦ ᐊᖏᖃᑎᒋᒍᑎᑦ

ᔫᑲᓐ ᓄᓇᓕᖃᕐᕕᖓᓂ

ᓂᕐᔪᑎᓕᕆᓂᕐᒧᑦ ᒪᓕᒐᖅ (2002)
ᓂᕐᔪᑎᓕᕆᓂᕐᒧᑦ ᒪᓕᒐᖅ ᒪᓕᒃᑕᐅᖁᔭᐅᔪᑦ (2012)
ᐱᖓᓇᖓᓂ ᐅᑭᐅᖅᑕᖅᑐᑉ ᓄᓇᑖᕈᑎᑦ – ᐃᓄᕕᐊᓗᐃᑦ ᐋᕿᕕᒍᑎᖏᑦ ᐊᖏᖃᑎᒋᒍᑎᖏᑕ (ᐊᒻᒪᓗ ᐋᖅᑭᒋᐊᕈᑎᖏᑦ)
ᐃᓄᕕᐊᓗᐃᑦ-ᐃᓄᑉᐱᐊᑦ ᓇᓄᓕᕆᓂᕐᒧᑦ ᐊᐅᓚᑦᑎᔪᑎᑦ ᐊᖏᖃᑎᒋᒍᑎᖏᑦ ᐅᖅᑯᒃᐸᓯᐊᓂ ᐅᐊᓕᓂᐅᑉ ᑕᕆᐅᖓᓂ (2011) (ᐊᑐᖅᑕᐅᓕᖅᑐ 1988−ᒥᓂᑦ)

ᑲᓇᑕ

ᐆᒪᔪᓕᕆᓃᖅ ᐊᒻᒪᓗ ᐱᕈᒃᑐᑦ ᓴᐳᒻᒥᔭᐅᓂᖏᑦ ᐊᒻᒪᓗ ᒪᓕᒃᑕᐅᖁᔭᐅᔪᑦ ᓄᓇᕐᔪᐊᓕᒫᒥ ᐊᒻᒪᓗ ᐊᕕᒃᑐᖅᓯᒪᖃᑎᒋᒃᑐᓄᑦ ᑕᐅᖅᓰᖃᑎᒋᒡᓂᕐᒧᑦ ᒪᓕᒐᖅ (WAPPRIITA)
ᐆᒪᔪᐃᑦ ᖁᒃᓴᓇᖅᑐᒦᓕᖅᑐᓄᑦ ᒪᓕᒐᖅ (SARA)

ᓄᓇᕐᔪᐊᓕᒫᒥ

1973 ᐊᖏᖃᑎᒋᒍᑎᑦ ᓇᖑᑦᑎᑦᑕᐃᓕᒪᓂᕐᒧᑦ ᓇᓄᕐᓂᑦ (ᐊᑎᓕᐅᖅᑕᐅᓪᓗᑎᒃ ᑎᑭᐅᒪᔭᐅᔪᓐᓇᖅᑐᓕᒫᓄᑦ ᓄᓇᓕᖃᕐᕕᐅᔪᓄᑦ ᐱᖃᓯᐅᑎᓗᒋᑦ: ᑲᓇᑕ, ᖃᓛᑦᖠᑦ (ᑎᐊᓐᒪᐅᒃ), ᓄᐊᐅᐃ, ᐊᒥᐊᓕᒃᑲᐃᑦ, ᐊᒻᒪᓗ ᑕᐃᑦᓱᒪᓂᓕᓴᐃᑦ ᑲᑐᔾᔨᖃᑎᒌᓂ ᐅᓛᓯᐊᒃᑯᑦ ᐃᓄᖏᓐᓂᑦ ᐊᐅᓚᑕᐅᔪᓂ (ᐅᓛᓯᐊᑦ)
ᑎᑎᕋᑐᐃᓐᓇᖅᓯᒪᔪᑦ ᑐᑭᓯᐅᒪᖃᑎᒋᒡᓂᕋᕈᑎᑦ ᐃᓚᒋᓗᒋᑦ ᐊᕙᑎᓕᕆᔨᒃᑯᑦ ᑲᓇᑕᒥ ᐊᒻᒪᓗ ᐊᒥᐊᓕᒃᑲᓂ ᐱᓕᕆᕕᖓᓂ ᐃᓗᐊᓂ ᓄᖑᑦᑎᑦᑕᐃᓕᒪᓂᕐᒧᑦ ᐊᒻᒪᓗ ᐊᐅᓚᑦᑎᓂᕐᒧᑦ ᐱᖃᖃᑎᖃᕐᓂᕐᒥ ᓇᓄᐃᑦ ᐅᓄᕐᓂᖏᓐᓂᑦ (2008)
ᑎᑎᕋᑐᐃᓐᓇᖅᓯᒪᔪᖅ ᑐᑭᓯᐅᒪᖃᑎᒋᓂᕋᕈᑎᑦ ᐅᑯᓇᙵᑦ ᑲᓇᑕᐅᑉ ᒐᕙᒪᒃᑯᖏᓂᑦ, ᓄᓇᕗᑦ ᒐᕙᒪᒃᑯᖏᓐᓂᑦ, ᐊᒻᒪᓗ ᒐᕙᒪᒃᑯᖏᓂᑦ ᑲᓛᑦᖠᑦ ᓄᖒᑦᑎᑦᑕᐃᓕᒪᓗᑎᒃ ᐊᒻᒪᓗ ᐊᐅᓚᑦᑎᓂᕐᒧᑦ ᓇᓄᐃᑦ ᐅᓄᕐᓂᖏᓐᓂᑦ (2009)
ᑲᑎᒪᔪᑎᖃᕐᓂᖅ ᓄᓇᕐᔪᐊᓕᒫᒥ ᑕᐅᖅᓰᓂᕐᒧᑦ ᓄᖑᑐᐃᓐᓇᕆᐊᖃᓕᖅᑐᓂᑦ ᓂᕐᔪᑎᓂᑦ ᐆᒪᔪᑦ ᓂᕐᔪᑕᐅᕕᒋᕙᒃᑕᖏᓐᓂ ᐊᒻᒪᓗ ᐱᕈᒃᑑᕕᒋᓲᖏᓐᓂ (ᓄᓇᕐᔪᐊᓕᒫᒥ ᓄᖑᑐᐃᓐᓇᕆᐊᓕᑦ ᑕᐅᖅᓯᕈᑕᐅᓂᖏᓄᑦ ᑲᑎᒪᓂᕐᔪᐊᖅ, CITES) (183 ᐱᓕᕆᔩᑦ)
ᑲᑎᒪᓂᖅ ᓄᖒᑦᑎᑦᑕᐃᓕᒪᓂᕐᒧᑦ ᑎᑭᖃᑦᓴᓱᓂᖅ ᓂᕐᔪᑎᓂᑦ ᓄᔪᐊᖅᑐᑦ ᐆᒪᔪᓂᑦ (120 ᐱᓕᕆᔨᑦ; ᐊᑎᓕᐅᖅᑕᐅᓯᓪᓗᓂ ᐃᓚᖓᓐᓄᑦ ᑎᑭᐅᒪᔭᐅᔪᒧᑦ ᓄᓇᖃᕕᐅᔪᒧᑦ, ᓄᐊᐅᐃ)