ᐅᑭᐅᖅᑕᖅᑐᒥᒃ ᖃᐅᔨᒪᓇᓱᐊᕐᓂᖅ : ᐊᖅᕼᐊᓕᐊᑦ ᐅᓂᒃᑳᖅ ᐃᓚᖓ 4

ᐊᖅᕼᐊᓕᐊᑦ ᐅᓂᒃᑳᖅ

• ᐊᕙᑎᑦ ᐊᓯᕈᕐᓂᖓ ᕿᑎᕐᒥᐅᓂ ᐱᓇᖕᓇᖓ ᓄᓇᕗᑦ ᐊᒻᒪᓗ ᐅᓗᒃᓴᖅᑑᖅ ᓄᓇᖏᑦ ᑲᓇᖕᓇᖓᓂ ᓄᓇᑦᓯᐊᖅ
• ᐃᖃᓗᐃᑦ ᓱᑲᓕᔪᒥᒃ ᐊᓯᖑᖅᐸᓪᓕᐊᔪᑦ ᐅᑭᐅᖅᑕᖅᑐᒥ
• ᐳᐃᔨᑦ ᐊᓯᖑᖅᐸᓪᓕᐊᔪᑦ ᐅᑭᐅᖅᑕᖅᑐᖅ ᐃᒪᕕᖓᓂ
• ᑐᒃᑐᑦ - ᑎᒡᓕᕐᓂᖏᑦ ᓄᓇᑐᐃᓐᓇᐅᑉ
• ᑐᑭᓯᓗᒋᑦ ᐊᒃᑐᐃᔪᑦ ᓯᓚᐅᑉ ᐅᖂᓯᕙᓪᓕᐊᓂᖓᓄᑦ ᐊᓯᖑᖅᑐᑦ ᓂᕿᒋᔭᐅᔪᑦ ᐅᑭᐅᖅᑕᖅᑐᒥ ᓄᓇᖅᑲᖅᑳᖅᓯᒪᔪᑦ ᓄᓇᖏᓐᓂᑦ
• ᑐᑭᓯᒋᐊᕈᑎ
  • ᔅᒪᐅᑦᐊᐃᔅ (SmartICE) ᓄᓇᓕᖕᓂᑦ ᓯᑯᒥᒃ ᖃᐅᔨᓴᐃᓐᓇᕐᓂᖅ
  • ᖃᓄᐃᑦᑑᓂᖏᑦ ᐊᒻᒪ ᖃᐅᔨᓴᐃᓐᓇᖅᑕᐅᓂᖓ ᓄᓇᐅᑉ ᐃᑭᐊᖓᓂᑦ ᖁᐊᖑᓐᓇᐅᔭᖅᑐᑦ ᑕᐃᑲᓂ ᖁᒡᓗᒃ ᓄᓇᕘᒥᑦ ᒥᕐᖑᐃᖅᓯᕐᕕᒃ
  • ᑲᓇᑕᒥᑦ ᑕᕆᐅᒥᒃ ᓇᐅᑦᑎᖅᓱᖅᑏᑦ (CROW)
  • ᖁᑦᑎᒃᑐᒥᑦ ᐱᕈᖅᑐᑦ ᐊᒻᒪᓗ ᑎᐱᖃᙱᑦᑐᑦ ᑕᖅᓴᖃᙱᑦᑐᖅ ᐅᖅᓱᐊᓗᒃ
  • ᕿᑎᕐᒥᐅᑦ ᑕᕆᐅᒥᑦ ᑭᒡᓕᓯᓂᐊᕐᓂᕐᒧᑦ ᖃᐅᔨᓴᕈᑦ (K3S)
  • ᓄᓇᒥᖔᖅᑐᓄᑦ ᐆᒻᒪᖅᑯᑎᖃᕐᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᖃᐅᔨᓴᖅᓯᓂᖅ
  • ᓄᓇᕘᒥᑦ ᓴᕕᕋᔭᖕᓂᒃ ᐊᐅᓚᑦᑎᓂᕐᒧᑦ ᐱᓕᕆᐊᒃᓴᐅᔪᖅ ᑕᑯᒃᓴᐅᑎᑦᑎᓂᕐᒧᑦ ᐱᓕᕆᐊᒃᓴᖅ
  • ᐃᒋᑕᐅᔪᓄᑦ ᐊᐅᓚᑦᑎᓂᕐᒧᑦ ᖃᕆᑕᐅᔭᓕᕆᔾᔪᑏᑦ
  • ᐊᑐᖅᓯᒪᔪᖅ ᐃᒥᖅ ᓴᓗᒻᒪᖅᓴᖅᑕᐅᓂ
  • ᕿᑎᕐᒥᐅᓂᑦ ᖃᕝᕕᒑᕐᔪᑦ ᖃᐅᔨᓴᐅᓐᓇᖅᑕᐅᔪᑦ - ᑎᑭᑉᐸᙱᑦᑐᑦ ᐊᒻᒪᓗ ᓄᓇᓕᖕᓕᑦ-ᑐᙵᕕᓖᑦ ᐱᓕᕆᐊᖑᕙᓪᓕᐊᔪᒪᔪᑦ

ᔅᒪᐅᑦᐊᐃᔅ (SmartICE) ᓄᓇᓕᖕᓂᑦ ᓯᑯᒥᒃ ᖃᐅᔨᓴᐃᓐᓇᕐᓂᖅ

ᖃᓄᖅ ᖃᕆᓴᐅᔭᑎᒍᑦ, ᑲᑎᙵᓗᑎᒃ ᐃᓄᐃᑦ ᖃᐅᔨᒪᓂᖏᓐᓄᑦ, ᐃᑲᔪᕈᓐᓇᖅᐸ ᑕᕆᐅᒥᑦ-ᓯᑯᒥᑦ ᐃᖏᕐᕋᖃᑦᑕᕐᓂᖅ ᐊᑦᑕᕐᓇᙱᓐᓂᖅᓴᐅᓗᓂ?

ᐱᓪᓚᕆᐅᔪᑦ ᐅᖃᐅᓯᒃᓴᐃᑦ

• ᔅᒪᐅᑦᐊᐃᔅ (SmartICE) ᑲᑎᑎᑦᑎᓯᒪᔪᑦ ᓄᓇᓕᖕᓂᑦ ᑕᐅᕙᓂᓗᒃᑖᖅ ᐃᓄᐃᑦ ᓄᓇᖓᓐᓂᑦ ᒪᑯᑎᒎᓇᖅ ᖃᐅᔨᓴᐃᓐᓇᕐᓂᒃᑯᑦ ᖃᕆᓴᐅᔭᒃᑯᑦ ᐊᒻᒪᓗ ᖃᖓᑦᑕᖅᑎᑕᐅᓯᒪᔪᑎᒍᑦ ᐊᔾᔨᒋᐊᒃᑯᑦ. ᑲᑎᒪᓯᒪᔫᒃ ᖃᐅᔨᓴᐃᓐᓇᕐᓂᕐᒧᑦ ᖃᕆᑕᐅᔭᒃᑯᑦ ᐱᖃᓯᐅᓪᖢᒍ ᐃᓄᐃᑦ ᑕᕆᐅᒥᑦ-ᓯᑯᒥᑦ ᖃᐅᔨᒪᓂᖏᑦ ᓄᓇᖃᖅᑐᓂᑦ ᐃᓚᒋᔭᐅᔪᓂ ᐋᖅᑭᒋᐊᓯᔪᓐᓇᕐᓂᐊᕐᒪᑕ ᐊᐅᓪᓚᕐᓂᕐᒧᑦ ᐸᕐᓇᐅᑎᖏᓐᓂᒃ ᐊᑐᖅᑕᐅᓚᐅᖅᓯᒪᙱᑦᑐᒃᑯᑦ ᐊᒻᒪᓗ ᓂᕆᐅᒋᔭᐅᙱᑦᑐᒃᑯᑦ ᓯᑰᑉ ᖃᓄᐃᓕᖓᓂᖓᒍᑦ.
• ᔅᒪᐅᑦᐊᐃᔅ (SmartICE) ᐃᓅᖃᑎᒌᓄᑦ ᓇᖕᒥᓂᕆᔭᐅᔪᖅ ᐊᑐᐃᓐᓇᐅᑎᑦᑎᓪᓗᓂ ᓯᑯᐃᑦ ᑐᓴᐅᒪᔾᔪᑎᖏᓐᓄᑦ ᐱᔨᑦᑎᕋᐅᑎᓂᒃ ᑕᐅᕙᓂᓗᒃᑖᖅ ᐃᓄᐃᑦ ᓄᓇᖓᓐᓂᑦ. ᑐᐊᕕᐊᓕᕇᖑᔪᑦ ᓄᓇᓖᑦ ᐱᓕᕆᖃᑎᒌᖕᓂᖏᑦ, ᐃᑲᔪᖅᓯᕐᓂᖏᑦ ᐃᓄᐃᑦ ᑕᕆᐅᒥᑦ-ᓯᑯᒥᑦ ᖃᐅᔨᒪᓂᖏᓐᓂᒃ, ᐊᒻᒪᓗ ᐃᓄᖕᓂᒃ ᐃᓚᐅᑎᑦᑎᓪᓗᑎᒃ ᓇᐅᒃᑯᓗᒃᑖᖅ ᐊᐅᓚᓂᖏᑦᑎᒍᑦ ᐊᒻᒪᓗ ᐃᓱᒪᓕᐅᕆᓂᖏᑦᑎᒍᑦ.
• ᔅᒪᐅᑦᐊᐃᔅ (SmartICE) ᐱᓕᕆᖃᑎᖃᖅᑐᑦ ᐅᑭᐅᖅᑕᖅᑐᒥ ᓇᖕᒥᓂᖃᖅᑎᓂᒃ (ᓲᕐᓗ, ᐊᐅᓪᓚᕈᔾᔩᑦ) ᑕᑯᒃᓴᐅᑎᑦᑎᓂᐊᕐᓗᑎᒃ ᖃᓄᖅ ᓯᑯᒧᑦ ᑐᓴᐅᒪᔾᔪᑎᖏᑦ ᐱᔨᑦᑎᕋᐅᑏᑦ ᐃᑲᔪᕈᓐᓇᕐᒪᖔᑕ ᐃᓄᐃᓴᒃᖠᒋᐊᖅᓯᒪᖁᓪᓗᒋᑦ ᐋᓐᓂᕐᓇᖅᑐᑦ ᐊᒃᑐᖅᑕᐅᓃᑦ ᑕᒪᒃᑯᓇᙵᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑕᒪᒃᑯᓄᖓ ᐅᑭᐅᖅᑕᖅᑐᒥᑦ ᓇᖕᒥᓂᖃᖅᑎᐅᔪᓄᑦ ᐊᐅᓚᓂᕐᓄᑦ.
• ᐃᓕᓐᓂᐊᖅᓯᒪᔪᑦ ᐊᐅᓚᑦᑎᔩᑦ ᐱᓕᕆᖃᑦᑕᖅᑐᑦ ᐱᕚᓪᓕᖁᓪᓗᒋᑦ ᐊᒻᒪᓗ ᐊᑦᑕᕐᓇᖅᑐᒦᖁᓇᒋᑦ ᓄᓇᓕᖏᑦ ᑲᔪᓯᓪᓗᑎᒃ ᐊᐅᓚᑦᑎᖃᑦᑕᖅᑐᑦ ᔅᒪᐅᑦᐊᐃᔅ (SmartICE) ᐊᑐᕋᓗᐊᖅᑎᓪᓗᑕ ᓄᕙᒡᔪᐊᕐᓇᖅ-19 ᖃᓂᒪᓇᐅᔪᒥᑦ.

ᐱᓕᕆᐊᒃᓴᐅᔪᓄᑦ ᓯᕗᓕᖅᑎ

ᓘᒃᑖᖅ ᑐᕋᕗ ᐱᐅᓪ, ᒪᒧᐊᕆᐅ ᓯᓚᑦᑐᖅᓴᕐᕕᒡᔪᐊᖓ ᓂᐅᕗᓐᓛᓐᒥᑦ, tbell@mun.ca

ᑐᓴᐅᒪᔾᔪᑎᒃᑲᓐᓃᑦ

www.smartice.org

ᓄᓇᓕᖕᓂᑦ ᓯᑯᒥᒃ ᖃᐅᔨᓴᐃᓐᓇᕐᓂᖅ

ᑕᒪᓐᓇ ᐱᓕᕆᐊᖅ ᐱᖃᓯᐅᓪᓗᓂ ᐃᓄᐃᑦ ᖃᐅᔨᒪᓂᖏᓐᓂᒃ ᓯᑯᒃᑯᑦ ᐃᖏᕐᕋᖃᑦᑕᕐᓂᕐᒧᑦ ᐊᑦᑕᕐᓇᖅᑕᐃᓕᒪᔾᔪᑎᓂᒃ ᓄᑖᑎᒍᑦ ᓄᓇᓕᖕᓂᑦ-ᐊᐅᓚᑦᑎᓂᕐᒧᑦ ᖃᐅᔨᓴᐃᓐᓇᕐᓂᕐᒧᑦ ᖃᕆᓴᐅᔭᒃᑯᑦ ᐊᒻᒪᓗ ᖃᖓᑦᑕᖅᑎᑕᐅᓯᒪᔪᑎᒍᑦ ᐊᔾᔨᙳᐊᒃᑯᑦ. ᔅᒪᐅᑦᐊᐃᔅ (SmartICE) ᑕᕆᐅᒃᑯ-ᓯᑯᒃᑯᑦ ᐃᖏᖃᑦᑕᕐᓂᕐᒥᒃ ᐊᑦᑕᕐᓇᙱᑎᑦᑎᓂᖅᓴᐅᔪᖅ ᐊᑐᐃᓐᓇᐅᑎᑦᑎᓂᒃᑯᑦ ᒫᓐᓇᓕᓴᕐᓂᒃ ᑐᓴᐅᒪᔾᔪᑎᖃᖅᖢᑎᒃ ᑕᒪᒃᑯᓄᖓ ᓯᑯᐃᑦ ᖃᓄᐃᓕᖓᓂᖏᓐᓂᒃ. ᐊᑐᖃᑦᑕᖅᑐᑦ ᖃᕆᓴᐅᔭᒃᑯᑦ ᐃᒃᐱᖕᓂᔭᑦᑐᓂᒃ ᐳᒃᑕᖅᑯᑎᓂᒃ (SmartBUOY), ᐋᖅᑭᒃᑕᐅᓯᒪᕙᒃᑐᑦ ᓇᓂᑐᐃᓐᓇᖅ ᓯᑯᒥᑦ, ᐊᒻᒪᓗ ᐊᐅᓚᑦᑎᔩᑦ-ᑲᒪᒋᖃᑦᑕᖅᑕᖏᑦ ᐃᒃᐱᖕᓂᔭᒃᑐᑦ (SmartQAMUTIK), ᑲᓕᑕᐅᓪᓗᑎᒃ ᖃᒧᑕᐅᔭᓄᑦ ᐃᒡᓕᓂᖅᑎᒍᑦ, ᖃᐅᔨᓴᖁᓪᓗᒋᑦ ᐊᒻᒪᓗ ᐅᓂᒃᑳᓕᐅᕈᓐᓇᖁᓪᓗᒋᑦ ᓯᑰᑉ ᐃᔾᔪᓂᖓᓂᒃ

ᓄᓇᓕᖕᓄᑦ. ᓄᓇᓕᖕᓂᑦ ᐃᓚᒋᔭᐅᔪᑦ ᑕᑯᔪᓐᓇᖅᑐᑦ ᑎᑎᖅᑲᖁᑎᓂᒃ ᑕᑭᑰᓇ ᓯᑯ (SIKU) (siku.org), ᐃᑭᐊᖅᑭᕕᒃ ᐋᖅᑭᒃᑕᐅᓯᒪᔪᑦ ᐃᓄᖕᓂᑦ ᐃᓄᖕᓄᑦ, ᐊᑐᐃᓐᓇᐅᑎᑦᑎᔪᖅ ᓴᓇᕐᕈᑎᓂᒃ ᐊᒻᒪᓗ ᐱᔨᑦᑎᕋᐅᑎᓂᒃ ᑕᒪᑐᒧᖓ ᓯᑯᒥᑦ ᐊᑦᑕᕐᓇᖅᑕᐃᓕᒪᓂᕐᒧᑦ. ᑕᐃᑲᙵᑦ ᐱᒋᐊᕐᖓᕐᓂᖓᓂᑦ ᐅᑭᐅᖅᑕᖅᑐᒥᑦ ᖃᐅᔨᓴᖅᑕᐅᓪᓗᑎᒃ ᐃᓂᓂᑦ ᓇᐃᓂᒥᑦ ᐊᒻᒪᓗ ᒥᑦᑎᒪᑕᓕᖕᒥᑦ, ᔅᒪᐅᑦᐊᐃᔅ (SmartICE) ᐅᓄᖅᓯᒋᐊᕆᓯᒪᓕᖅᑐᑦ 24 ᐃᓂᓄᑦ ᑕᐅᕙᓂᓗᒃᑖᖅ ᐃᓄᐃᑦ ᓄᓇᖓᓐᓂᑦ ᐱᓕᕆᑎᓪᓗᒋᑦ 2020-2021 ᓯᑯᓕᕆᓐᓇᐅᑎᓪᓗᒍ. ᔅᒪᐅᑦᐊᐃᔅ (SmartICE) ᐃᖅᑲᓇᐃᔭᕐᓂᕐᒧᑦ- ᐃᓚᓕᐅᔾᔭᐅᓯᒪᔪᑦ ᐃᓅᖃᑎᒌᓄᑦ ᓇᖕᒥᓂᕆᔭᐅᔪᑦ (WISE) ᐃᓕᓐᓂᐊᖅᑎᑦᑎᓲᑦ ᐊᒻᒪᓗ ᐃᖅᑲᓇᐃᔭᖅᑎᑦᑎᓪᓗᑎᒃ ᒪᒃᑯᒃᑐᓂᒃ ᐃᓄᖕᓂᒃ ᓴᖅᑭᑎᕆᔨᐅᓪᓗᑎᒃ, ᐊᐅᓚᑦᑎᔨᐅᓪᓗᑎᒃ ᐊᒻᒪᓗ ᓴᓇᔨᐅᓪᓗᑎᒃ ᖃᕆᑕᐅᔭᕆᓕᔾᔪᑎᖏᓐᓂᑦ (ᑕᑯᓗᒍ ᑐᓴᐅᒪᔾᔪᑎᓄᑦ-ᑎᑎᕋᖅᑕᐅᓯᒪᔪᒃᑯᕕᒃ).

ᓄᓇᓕᖕᓂᑦ ᐊᐅᓚᑦᑎᓂᖅ

ᐃᑲᔪᖅᓯᖅᑕᐅᓪᓗᑎᒃ ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR), ᔅᒪᐅᑦᐊᐃᔅ (SmartICE) ᐱᓕᕆᖃᑎᖃᖅᓯᒪᔪᖅ ᐱᓕᕆᖃᑎᒋᓪᓗᒋᑦ ᔅᒪᐅᑦᐊᐃᔅ (SmartICE) ᓄᓇᓕᖕᓂᑦ ᐊᐅᓚᑦᑎᓂᕐᒧᑦ ᑲᑎᒪᔨᐊᓛᓂᒃ ᑕᐃᑲᓂ ᒥᑦᑎᒪᑕᓕᖕᒥᑦ ᑐᑭᓯᑦᑎᐊᕋᓱᐊᖅᖢᑎᒃ ᓄᓇᓕᖕᓂᑦ ᓯᑯᒧᑦ ᑐᓴᐅᒪᔾᔪᑎᓂᒃ ᐱᑕᖃᕆᐊᓕᖕᓂᒃ ᐊᒻᒪᓗ ᓴᖅᑮᓗᑎᒃ ᖃᕆᑕᐅᔭᕆᓕᔾᔪᑎᓂᒃ ᐱᔨᑦᑎᕋᐅᑎᓂᒡᓗ ᑭᐅᔾᔪᑕᐅᓇᓱᐊᖅᖢᑎᒃ ᑖᒃᑯᓄᖓ ᐱᔭᐅᔪᒪᕙᒃᑐᓄᑦ. ᐊᕕᒃᑐᖅᓯᒪᓂᖏᑦ ᑕᕆᐅᒥᑦ-ᓯᑯᒥᑦ ᐊᑐᖅᑏᑦ, ᑖᒃᑯᐊᓗ ᒪᒃᑯᒃᑐᑦ ᐊᖑᓇᓱᒃᑏᑦ ᑖᒃᑯᓄᖓᓱᖓᖅ ᐃᓄᑐᖃᕐᓄᑦ ᑲᑎᒪᔨᐅᓛᖑᖃᑦᑕᖅᑐᑦ ᑲᑎᒪᔨᐅᓛᓂᑦ. ᓇᖕᒥᓂᖅ ᐊᑦᑎᖅᓯᒪᔪᑦ, ᓯᑯᒥᐅᑦ, ᑐᑭᖃᖅᑐᑦ “ᐃᓄᐃᑦ ᓯᑯᒥᐅᑕᐃᑦ”.

ᓯᑯᒥᐅᑦ ᐊᐅᓚᑦᑎᑕᐃᓐᓇᖃᑦᑕᙱᑦᑐᑦ ᔅᒪᐅᑦᐊᐃᔅ (SmartICE) ᐊᐅᓚᓂᖏᓐᓂᒃ ᑭᓯᐊᓂᓕᑦᑕᐅᖅ ᑲᒪᖃᑦᑕᖅᑐᑦ ᓄᑖᓂᒃ ᑕᕆᐅᒥᑦ-ᓯᑯᒥᑦ ᐱᓕᕆᐊᓂᒃ ᑖᒃᑯᓄᖓ ᓄᓇᓕᖕᓄᑦ. ᓲᕐᓗ, ᑎᑎᕋᖅᓯᖃᑦᑕᖅᒪᐃᓐᓇᖅᑐᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ (IQ) ᐊᑦᑕᕐᓇᙱᑦᑐᒥᒃ ᐃᖏᕐᕋᔭᖃᑦᑕᖁᓪᓗᒋᑦ ᓯᑯᒃᑯᑦ ᐃᓕᓐᓂᐊᖅᑎᓪᓗᒋᑦ ᒪᒃᑯᒃᑯᑦ ᓄᓇᓕᑦᑕ ᒥᒃᓵᓄᑦ (ᑕᑯᓗᒍ ᑐᓴᐅᒪᔾᔪᑎᓄᑦ-ᑎᑎᕋᖅᑕᐅᓯᒪᔪᒃᑯᕕᒃ).

ᓄᓇᓕᖕᓂᑦ ᓯᑯᒥᒃ ᓄᓇᙳᐊᓕᐅᕆᓂᖅ

ᔅᒪᐅᑦᐊᐃᔅ (SmartICE) ᐋᖅᑭᒃᓱᐃᖃᑎᖃᖅᐸᓪᓕᐊᔪᑦ ᐱᓕᕆᐊᒃᓴᐅᔪᒥᒃ ᐃᓕᓐᓂᐊᖅᑎᑦᑎᓗᑎᒃ ᓄᓇᓕᖕᓂᑦ ᐊᐅᓚᑦᑎᔨᓂᒃ ᓯᑯᒃᑯᑦ ᐃᖏᕐᕋᔭᖃᑦᑕᕐᓃᑦ ᐊᑦᑕᖅᓇᖅᑕᐃᓕᒪᖁᓪᓗᒋᑦ ᓄᓇᙳᐊᓕᐅᕐᓗᑎᒃ ᓄᓇᓕᖕᓄᑦ ᐃᓚᓕᐅᔾᔨᓯᒪᓗᑎᒃ ᐃᓄᐃᑦ ᖃᐅᔨᒪᓂᖏᓐᓂᒃ ᐊᒻᒪᓗ ᑕᑯᔭᖏᓐᓂᒃ ᖃᖓᑦᑕᖅᑎᑕᐅᓯᒪᔪᑎᒍᑦ ᐊᔾᔨᙳᐊᓂᒃ. ᑖᓐᓇ ᐱᓕᕆᐊᒃᓴᐅᔪᖅ ᐋᖅᑭᒃᓱᖅᑕᐅᕙᓪᓕᐊᔪᖅ ᐱᓕᕆᖃᑦᑕᕐᓂᑯᖏᓐᓂᑦ ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᐃᑲᔪᖅᓯᖅᖢᑎᒃ ᑕᐃᑲᓂ ᒥᑦᑎᒪᑕᓕᖕᓂᑦ ᐊᒻᒪᓗ ᐊᐅᓚᓪᓗᑎᒃ ᐃᒻᒥᓂᒃ ᐱᔪᒪᓂᖃᑦᑎᐊᕐᓂᕐᒧᑦ. ᑕᒪᓐᓇ ᓯᕗᓪᓕᖅᐹᖅ ᐱᓕᕆᐊᒃᓴᖅ ᓴᓇᓇᓱᐊᖅᖢᑎᒃ ᑕᕆᐅᒥᑦ-ᓯᑯᒥᑦ ᓄᓇᙳᐊᓂᒃ ᐊᖏᔪᓂᒃ ᐊᒻᒪᓗ ᖃᖓᐅᓂᖓᓄᑦ ᐊᖏᑎᒋᔪᑦ ᑖᒃᑯᓄᖓᓪᓚᕇᕐᑐᑦ ᓯᑯᒃᑯᑦ ᐃᖏᕐᕋᔭᖃᑦᑕᕐᓂᕐᒧᑦ ᓄᓇᓕᖕᓂᑦ.

ᑕᒪᓐᓇ ᐱᓕᕆᐊᖅ ᐊᑯᓂᐅᓂᐊᖅᑐᑦ, ᐃᓱᒪᒋᔭᐅᖃᓯᐅᖢᑎᒃ ᓂᕆᐅᓇᙱᑦᑐᒃᑯᑦ ᓂᕆᐅᓇᙱᑦᑐᒃᑯᓪᓗ ᓯᑯᐃᑦ ᖃᓄᐃᓕᖓᓂᖏᑦ ᑕᐃᒪᐃᑎᑕᐅᔪᑦ ᐊᓯᔾᔨᖅᐸᓪᓕᐊᓂᖓᓄᑦ ᓯᓚ. ᐊᐅᓚᑦᑎᔩᑦ ᑕᒪᒃᑯᓂᖓ ᓄᓇᙳᐊᓕᐅᖃᑦᑕᕐᓂᐊᖅᑐᑦ ᓄᓇᓕᖏᓐᓂᑦ, ᐱᖃᓯᐅᓪᓗᒋᑦ ᖃᕆᑕᐅᔭᒃᑯᑦ ᐊᒻᒪᓗ ᑕᕆᐅᒥᑦ-ᓯᑯᒥᑦ ᖃᐅᔨᒪᓂᕐᓂᑦ, ᑖᒃᑯᓇᙵᓪᓗ ᐃᓄᖕᓂᑦ ᐅᒃᐱᕆᔭᐅᓪᓗᑎᒃ. ᑕᕆᐅᒥᑦ-ᓯᑯᒥᑦ ᖃᐅᔨᒪᓂᕐᓄᑦ ᐊᑐᖃᑦᑕᖅᑐᑦ ᓇᐅᒃᑯᓕᒫᖅ ᐃᓄᐃᑦ ᐃᖅᑯᓯᖏᑦᑎᒍᑦ, ᐃᓚᐅᓪᓗᑎᒃ ᐱᒻᒪᕆᐅᒋᔭᐅᔪᑦ ᐊᒻᒪᓗ ᐅᖃᐅᒦᑦ. ᑕᐃᒪᐃᓐᓂᖓᓄᑦ ᓴᖅᑭᓯᒪᔪᖅ, ᐃᓄᑐᖃᐃᑦ ᐅᒃᐱᕆᔭᖏᑦ ᑕᒪᒃᑯᐊ ᓄᓇᙳᐊᑦ ᐃᓚᐅᑎᑦᑎᑦᑎᐊᕐᓂᐊᕐᒪᑕ ᓄᓇᓕᖕᓂᑦ ᐊᑑᑎᖃᖅᑐᒥᒃ.

ᔅᒪᐅᑦᐊᐃᔅ (SmartICE) ᐅᑭᐅᖅᑕᖅᑐᒥᑦ ᓴᖅᑮᓂᕐᒧᑦ ᑐᖅᑲᖅᑕᕐᕕᒃ

ᖃᓄᐃᑦᑑᓂᖏᑦ ᐊᒻᒪ ᖃᐅᔨᓴᐃᓐᓇᖅᑕᐅᓂᖓ ᓄᓇᐅᑉ ᐃᑭᐊᖓᓂᑦ ᖁᐊᖑᓐᓇᐅᔭᖅᑐᑦ ᑕᐃᑲᓂ ᖁᒡᓗᒃ ᓄᓇᕘᒥᑦ ᒥᕐᖑᐃᖅᓯᕐᕕᒃ

ᖃᓄᖅ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑑᑉ ᖃᓄᐃᓕᖓᓂᖓ ᐊᒃᑐᐃᓂᐊᖅᐸ ᑎᓴᒪᓕᒃᑯᑦ ᐊᖅᑯᑕᐅᕙᒃᑐᓂᒃ?

ᐱᓪᓚᕆᐅᔪᑦ ᐅᖃᐅᓯᒃᓴᐃᑦ

• ᓯᑯᒥᑦ ᖁᖕᓃᑦ ᐊᒥᓲᖕᒪᑕ ᑕᐃᑲᓂ ᖁᒡᓗᒃ ᓄᓇᕘᒥᑦ ᒥᕐᖑᐃᖅᓯᕐᕕᖕᒥᕈᔪᒃ ᐊᒻᒪᓗ ᑕᑯᔭᐅᕝᕕᐅᒐᔪᒃᖢᑎᒃ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑐᖅ ᓱᕋᒃᐸᓪᓕᐊᑎᓪᓗᒍ ᑕᐃᑰᓇ ᐊᖅᑯᑖᒍᑦ ᐊᒻᒪᓗ ᑎᓴᒪᓕᒃᑯᑦ ᐊᖅᑯᑎᐅᕙᒃᑐᒃᑯᑦ.
• ᒥᕐᖑᐃᖅᓯᕐᕕᖕᒥᑦ ᐊᐅᓚᑦᑎᔩᑦ ᐊᒻᒪᓗ ᓄᓇᓕᖕᓂᑦ ᓯᕗᓕᖅᑏᑦ ᐊᑐᖃᑦᑕᖅᑐᑦ ᑐᓴᐅᒪᔾᔪᑎᓂᒃ ᑕᐃᑲᙵᑦ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑐᕐᒧᑦ ᖃᐅᔨᓴᕈᑎᓂᑦ ᐊᒻᒪᓗ ᖃᐅᔨᓴᐃᓐᓇᕈᑎᓂᒃ ᓄᓇᖓ ᐸᒡᕕᓴᒃᑕᐅᖁᓇᒍ ᑕᐅᕘᓇ ᑎᓴᒪᓕᒃᑯᑦ ᐊᖅᑯᑖᒍᑦ ᐱᐅᓂᖅᓴᒃᑯᑦ ᐅᐸᒃᑕᐅᔪᓐᓇᖁᓪᓗᒍ ᖁᒡᓗᒃ ᓄᓇᕘᒥᑦ ᒥᕐᖑᐃᖅᓯᕐᕕᒃ ᑖᒃᑯᓄᖓ ᓄᓇᕗᒻᒥᐅᕗᑦ.
• ᖃᐅᔨᒪᓂᖅ ᖃᓄᖅ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑑᑉ ᖃᓄᐃᓕᖓᓂᖓ ᐅᑭᐅᖅᑕᖅᑐᒥᑦ ᖃᒥᔾᔨᖅᐸᓪᓕᐊᓂᖏᑦ ᐃᑲᔪᕐᓂᐊᖅᑐᑦ ᓄᓇᓕᖕᓂᑦ ᓴᓇᓇᓱᐊᖅᑎᓪᓗᒋᑦ ᐱᖁᑎᕐᔪᐊᓂᒃ ᐊᑑᑎᖃᖅᑐᓂᒃ ᐊᒻᒪᓗ ᐊᑯᓂᐅᔪᓐᓇᖅᑐᓂᒃ.

ᐱᓕᕆᐊᒃᓴᐅᔪᓄᑦ ᓯᕗᓕᖅᑎ*

ᓕᓯ ᐸᐸᑦᓯ, ᒋᐅᕆ ᐊᑖᑕᒃᕼᐊᒃ ᐊᒻᒪᓗ ᓕᐅᕆ ᐊᔾᔪᓐ ᓄᓇᕘᒥᑦ ᒥᕐᖑᐃᖅᓯᕐᕕᓕᕆᔨᒃᑯᑦ ᐊᒻᒪᓗ ᐊᔾᔨᐅᙱᑦᑐᑦ ᓄᓇᐃᑦ, ᒐᕙᒪᖏᑦ ᓄᓇᕘᒥᑦ

• * ᖃᐅᔨᓴᕐᓂᕐᒧᑦ ᐱᓕᕆᖃᑎᒌᑦ: ᒪᐃᑯ ᐋᓗᑦ ᐊᒻᒪᓗ ᒪᒃ-ᐋᓐᑐᕇ ᑐᓴᐅᒻ, ᓯᓚᑦᑐᖅᓴᕐᕕᒡᔪᐊᖓᓂᑦ ᓚᕕᐅᓪ; ᔅᑕᕙᓂ ᑯᓛᒻᐱ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR).
• ᓇᓗᓇᐃᖅᑕᐅᔪᑦ: ᒐᕙᒪᖏᑦ ᓄᓇᕘᒥᑦ ᒥᕐᖑᐃᖅᓯᕐᕕᓕᕆᔩᑦ ᐊᒻᒪᓗ ᐊᔾᔨᐅᙱᑦᑐᑦ ᓄᓇᐃᑦ; ᓄᓇᓕᖓᑦ ᖁᕐᓗᖅᑑᖅ, ᐅᑭᐅᖅᑕᑐᒧᑦ ᖃᐅᔨᓴᕐᕕᒃ, ᓯᓚᑦᑐᖅᓴᕐᕕᒡᔪᐊᖓ ᓚᕕᐅᓪ, ᓵᒥᐅᓪ ᐱᓗᑑ ᐊᒻᒪᓗ ᓵᒥᐅᓪ ᒐᓐᔪ, ᓯᓚᑦᑐᖅᓴᕐᕕᒡᔪᐊᖓ ᓚᕕᐅᓪ, ᖁᒡᓗᒃ ᓄᓇᓕᖕᓂᑦ ᐸᕐᓇᐃᖃᑎᒌᑦ ᐊᒻᒪᓗ ᐊᐅᓚᑦᑎᖃᑎᒌᑦ ᑲᑎᒪᔨᐊᓛᓂᒃ (CJPMC), ᖁᕐᓗᖅᑑᑦ ᐊᖑᓇᓱᒃᑐᓕᕆᔨᒃᑯᑦ ᐊᒻᒪᓗ ᒥᑭᒋᐊᕐᓂᐊᖅᑏᑦ ᑎᒥᖁᑖ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ.

ᖃᓄᐃᓕᐅᖅᐱᑕ

ᖃᐅᔨᓴᖅᑏᑦ, ᓄᓇᓕᖕᓂᑦ ᒪᒃᑯᒃᑐᑦ ᐊᒻᒪᓗ ᐊᓯᖏᑦ ᓄᓇᓕᖕᓂᑦ ᐃᓚᖏᔭᐅᔪᑦ ᖃᐅᔨᓴᖅᑐᑦ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑑᑉ ᖃᓄᐃᓕᖓᓂᖓᓂᒃ ᑕᐃᑲᓂ ᖁᒡᓗᒃ ᓄᓇᕘᒥᑦ ᒥᕐᖑᐃᖅᓯᕐᕕᖕᒥᑦ ᐊᒻᒪᓗ ᐋᖅᑭᒃᓱᐃᓪᓗᑎᒃ ᖃᐅᔨᐃᓴᓐᓇᕐᓂᕐᒧᑦ ᐃᓂᓂᒃ ᑎᑎᕋᖅᑕᐅᓯᒪᖁᓪᓗᒋᑦ ᓯᕗᓂᒃᓴᑦᑎᓐᓂᑦ ᐊᓯᔾᔨᐅᑏᑦ. ᖃᐅᔨᓴᕐᓂᖏᑦ ᑐᕌᒐᖃᖅᑐᑦ ᑕᒪᒃᑯᓄᖓ ᓇᓄᐃᑦ ᐊᕙᑎᖏᓐᓂᒃ ᖃᓂᒋᔮᓂᑦ ᐊᖅᑯᑕᐅᕙᒃᑑᑉ ᐊᒻᒪᓗ ᑎᓴᒪᓕᒃᑯᑦ ᐊᖅᑯᑎᒋᔭᐅᕙᒃᑐᒃᑯᑦ ᑕᐃᑲᓂ ᒥᕐᖑᐃᖅᓯᕐᕕᖕᒥᑦ ᑐᑭᓯᖁᓪᓗᒋᑦ ᖃᓄᖅ ᐊᓯᔾᔨᖅᐸᓪᓕᐊᓂᖓ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑑᑉ ᖃᓄᐃᓕᖓᓂᖓ ᐊᒃᑐᐃᓯᒪᖕᒪᖔᑦ ᑕᒪᑐᒥᖓ ᐱᒻᒪᕆᐅᔪᒥᒃ ᐃᖏᕐᕋᔭᖕᓂᕐᒧᑦ ᐊᖅᑯᑕᐅᕙᒃᑐᒥᒃ ᑖᒃᑯᓄᖓ ᓄᓇᓕᖓᓐᓂᑦ ᖁᕐᓗᖅᑑᑉ.

ᑭᓱᓂᒃ ᐃᓕᑦᑎᓯᒪᕕᑕ

ᑐᙵᕕᖃᖅᖢᑎᒃ ᖃᐅᔨᔭᐅᓴᕋᐃᑦᑐᓂᒃ ᑕᐃᑲᙵᑦ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑐᓂᒃ ᓂᐅᖅᑐᖅᑕᐅᔪᓂᒃ ᐊᒻᒪᓗ ᒪᓂᕋᕐᒧᑦ-ᐳᑐᓯᕙᒃᑐᓂᒃ ᖃᐅᔨᓴᕈᑎᓂᒃ, ᖃᐅᔨᓴᖅᑏᑦ ᓇᓂᓯᓯᒪᓕᖅᑐᑦ ᑖᒃᑯᐊ ᓄᓇᐃᑦ ᑕᐅᕙᓂ ᐊᖏᔪᒥᒃ ᓯᑯᖃᕐᒪᑦ ᐊᒻᒪᓗ ᐊᒥᓱᓂᒃ ᓯᑯᑦ ᑭᓛᓪᓗᑎᒃ. ᑕᒪᓐᓇ ᓄᓇᒥᒃ ᐃᒃᐱᖕᓂᖅᓴᕋᐃᑑᑎᑦᑎᔪᖅ ᐊᐅᒃᐸᓪᓕᐊᔪᓄᑦ, ᓄᖑᑉᐸᓪᓕᐊᔪᓄᑦ ᐊᒻᒪᓗ ᑲᑕᖃᑦᑕᖅᑐᓄᑦ ᐃᓚᓕᐅᑎᓯᒪᓪᓗᓂᓗ ᐅᓄᖅᓯᒋᐊᕐᓂᖏᓐᓄᑦ ᑕᒪᕐᒦᖕᓄᑦ ᓇᐃᓴᐅᑎᖏᓐᓄᑦ ᐊᒻᒪᓗ ᐊᖏᓂᖏᓐᓄᑦ ᑕᓰᑦ ᑕᐅᕙᓂ ᐃᓂᒥᑦ. ᑕᒪᐃᒃᑲᓗᐊᖅᑎᓪᓗᒍ ᑕᒪᒃᑯᐊ ᑲᔪᓯᕙᓪᓕᐊᓂᐅᔪᑦ ᐊᑐᖅᑕᐅᑎᓪᓗᒋᑦ ᑕᐃᒪᐃᓐᓇᑐᐃᓐᓇᐅᖃᑦᑕᖅᑐᓄᑦ ᐱᔾᔪᑕᐅᓪᓗᓂ ᓯᓚᐅᑉ ᐅᖅᑰᓯᕙᓪᓕᐊᓂᖓ, ᐊᒃᑐᐃᓂᖃᑐᐃᓐᓇᕆᐊᖃᕐᒥᔪᑦ ᓄᓇᐅᑉ ᖄᖓᓃᑦᑐᓂᒃ ᐸᒡᕕᓵᕆᓂᕐᓂᒃ ᓲᕐᓗ ᐊᑐᖅᑕᐅᖓᔪᖕᓂᖓ ᑎᓴᒪᓕᒃᑯᑦ.

ᓄᓇᓕᖕᓂᑦ ᑐᓴᕆᐊᕐᕖᑦ ᐊᒻᒪᓗ ᐃᓚᐅᓂᖏᑦ

ᐊᑐᖅᑕᐅᓪᓗᐊᑕᕈᒪᔪᑦ ᐱᐊᓂᑦᑎᐊᖁᓪᓗᒋᑦ ᑕᒪᑐᒥᖓ ᐱᓕᕆᖃᑎᒌᖕᓂᕐᒥᒃ ᐱᓕᕆᐊᒃᓴᐅᔪᒥᒃ ᐅᑯᓂᖓ ᐃᓚᐅᑎᑦᑎᔪᑦ:

ᓄᓇᓕᖕᓂᑦ ᑐᓴᖅᑎᑕᐅᓂᖅ

ᑲᐅᔨᓴᖅᑏᑦ ᐱᓕᕆᖃᑎᖃᖅᑐᑦ ᖁᒡᓗᒃ ᓄᓇᓕᖕᓂᑦ ᐸᕐᓇᐃᖃᑎᒌᑦ ᐊᒻᒪᓗ ᐊᐅᓚᑦᑎᖃᑎᒌᑦ ᑲᑎᒪᔨᐊᓛᓂᒃ (CJPMC) ᑲᐅᔨᓇᓱᐊᖅᖢᑎᒃ ᖃᐅᔨᓴᕈᑏᑦ ᑐᕌᒐᖏᓐᓂᒃ ᐊᒻᒪᓗ ᖃᐅᔨᓴᐃᓐᓇᕐᓂᕐᒧᑦ ᐱᓕᕆᐊᒃᓴᐅᑉ ᑲᔪᓯᕙᓪᓕᐊᓂᖓᓂᒃ.

ᖃᐃᔨᒪᓂᕐᓂᒃ ᑐᓂᓯᓂᖅ

ᒪᒃᑯᒃᑐᑦ, ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕐᒥᒃ ᑎᒍᒥᐊᖅᑏᑦ, ᐊᒻᒪᓗ ᖃᐅᔨᓴᖅᑏᑦ ᐃᓕᖃᑦᑕᐅᑎᔭᖏᑦ ᐃᒻᒥᖕᓄᑦ ᐃᓚᐅᑎᓪᓗᒋᑦ ᒪᒃᑯᑦᑐᑦ ᐊᐅᓪᓛᖅᓯᒪᑎᓪᓗᒋᑦ, ᓄᓇᕘᒥᑦ ᒥᕐᖑᐃᖅᓯᕐᕕᐅᑉ ᐅᓪᓗᖓᓂ ᖁᕕᐊᓱᓗᒍᑎᖃᕐᓂᖅᒥᑦ ᐊᒻᒪᓗ ᐊᔾᔨᐅᖏᑦᑐᓂᑦ ᖃᓄᐃᓕᐅᕐᓂᐅᔪᓂᑦ.

ᐱᓕᒻᒪᓴᕐᓂᖅ

ᐱᓕᕆᐊᒃᓴᐅᔪᒥᑦ ᓯᕗᒃᑲᖅᑕᖅᑏᑦ ᐱᕕᖃᕐᓂᖏᑦ ᐊᒻᒪᓗ ᓱᓇᒃᑯᑖᖃᕐᓂᖏᑦ ᐃᓚᐅᑎᑦᑎᑎᓪᓗᒋᑦ ᒪᒃᑯᒃᑐᓂᑦ ᐊᒻᒪᓗ ᐃᓕᓐᓂᐊᕐᓂᕐᒧᑦ ᐊᑐᐃᓐᓇᐅᔪᑦ ᐱᓕᕆᐊᕆᔭᐅᓂᓗᒃᑖᖓᓂᑦ ᖃᐅᔨᓴᕐᓂᕐᒧᑦ ᐱᓕᕆᐊᒃᓴᐅᔪᖅ.

ᓄᒃᑕᕈᓐᓇᖅᑐᑦ ᖃᐅᔨᔭᐅᔪᑦ

ᖃᐅᔨᓴᖅᑏᑦ ᖃᐅᔨᔭᐅᔪᓂᒃ ᐊᑐᐃᓐᓇᐅᖁᔨᔪᑦ ᓄᓇᓕᖕᓄᑦ ᐃᓱᒪᓕᐅᕆᔨᓄᑦ ᐊᐱᖅᓱᕐᓂᒃᑯᑦ ᑭᒃᑯᓕᒫᑦ ᓈᓚᒃᑎᓪᓗᒋᑦ ᓈᓚᐅᑎᒃᑯᑦ, ᑖᒃᑯᓄᖓᓪᓚᕆᒃ ᐅᓂᒃᑳᕐᓂᒃᑯᑦ ᓄᓇᓕᖕᓂᑦ ᐸᕐᓇᐃᖃᑎᒌᑦ ᐊᒻᒪᓗ ᐊᐅᓚᑦᑎᖃᑎᒌᑦ ᑲᑎᒪᔨᐊᓛᓄᑦ (CJPMC) ᐊᒻᒪᓗ ᐃᓚᐅᖃᑦᑕᖅᖢᑎᒃ ᑲᑎᒪᓂᕐᓂᑦ.

ᖃᓄᐃᒻᒪᑦ ᐊᑑᑎᖃᖅᐸ

ᖃᐅᔨᔭᐅᔪᑦ ᑕᐃᑲᙵᑦ ᖃᐅᔨᓴᕈᑎᒥᑦ ᑐᓴᐅᒪᑎᑕᐅᓗᓂ ᐃᓱᒪᓕᐊᕆᔭᐅᔪᖅ ᓴᓇᖁᓪᓗᒋᑦ ᓄᑖᒥᒃ ᐱᓱᒡᕕᖕᒥᒃ ᑎᓴᒪᓕᒃᑯᑦ ᐊᖅᑯᑎᒥᑦ ᑕᐃᑲᓂ ᖁᒡᓗᒃᑐᒃ ᓄᓇᕘᒥᑦ ᒥᕐᖑᐃᖅᓯᕐᕕᖕᒥᑦ ᓇᓗᓇᐃᔭᐃᓗᑎᒃ ᐃᓂᓂᒃ ᓯᑯᖃᑦᑎᐊᖅᑐᓂᒃ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑐᒥᑦ ᐊᒻᒪᓗ ᖃᓄᐃᓕᖓᕙᖕᓂᖓ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑑᑉ ᐱᐅᔪᓐᓃᖅᐸᓪᓕᐊᓂᖏᑦ. ᓄᑖᖅ ᑎᓴᒪᓕᒃᑯᑦ ᐊᖅᑯᑦ ᐊᒃᑐᐃᓂᕐᓗᖕᓂᖃᓗᐊᖅᑎᑦᑎᑦᑕᐃᓕᔪᖅ ᓄᓇᒥᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᓇᔪᒐᖏᓐᓂᒃ. ᑲᔪᓯᕙᓪᓕᐊᖏᓐᓇᖅᑐᑦ ᓄᓇᓕᖕᓂᑦ-ᓯᕗᒃᑲᖅᑕᖅᑕᐅᔪᑦ ᖃᐅᔨᓴᐃᓐᓇᕈᑏᑦ ᐱᓕᕆᐊᖑᓇᓱᐊᖅᑐᑦ ᖃᓂᒋᔮᒍᑦ ᓄᑖᑉ ᑎᓴᒪᓕᒃᑯᑦ ᐊᖅᑯᑎᒥᑦ ᐃᑲᔪᕐᓂᐊᖅᑐᑦ ᐊᑦᑕᕐᓇᙱᑎᑦᑏᓐᓇᕐᓗᓂ ᐊᒻᒪᓗ ᐊᑐᖅᑕᐅᑕᖏᓐᓇᖃᑦᑕᕐᓗᓂ ᐊᑯᓂᐅᔪᒃᑯᑦ.

ᐅᑭᐅᖅᑕᖅᑐᒥᑦ ᓯᓚ ᐆᓇᖅᓯᕙᓪᓕᐊᖏᓐᓇᖅᑎᓪᓗᒍ, ᐊᓯᔾᔨᖅᐸᓪᓕᐊᔪᖅ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑑᑉ ᖃᓄᐃᓕᖓᓂᖓ ᐊᒃᑐᐃᓂᖃᕐᔪᐊᕐᓂᐊᖅᑐᑦ ᐱᓕᕆᓂᕐᓂᒃ, ᐊᑦᑕᕐᓇᖅᑕᐃᓕᒪᓂᕐᓂᒃ ᐊᒻᒪᓗ ᐊᑑᑎᔪᓐᓇᕐᓂᖓᓂ ᐅᑭᐅᖅᑕᖅᑐᒥᑦ ᐃᖏᕐᕋᔭᖕᓂᕐᒧᑦ ᐊᖅᑯᑎ. ᑕᒪᓐᓇ ᖃᐅᔨᓴᕐᓂᖅ ᐃᑲᔪᕐᓂᐊᖅᑐᑦ ᑐᑭᓯᐅᓇᓱᐊᖅᑎᓪᓗᒋᑦ ᖃᓄᖅ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑐᖅ ᐊᓯᔾᔨᖅᐸᓪᓕᐊᖕᒪᖔᑦ ᑖᒃᑯᓇᓂ ᓄᓇᓂᑦ ᐊᕕᒃᑐᖅᓯᒪᔪᓂᑦ, ᓄᓇᓖᑦ ᓴᓇᔪᓐᓴᖁᓪᓗᒋᑦ ᐱᖁᑎᕐᔪᐊᓂᒃ ᓈᒻᒪᒋᔭᐅᔪᓂᑦ ᑕᒪᕐᒦᖕᓄᑦ ᐱᔭᐅᔪᒪᔪᓄᑦ ᓄᓇᓕᖕᓂᑦ ᐊᒻᒪᓗ ᐱᔭᐅᔪᒪᔪᑦ ᐊᓯᔾᔨᖅᐸᓪᓕᐊᓂᖓᓄᑦ ᓄᓇᐅᑉ ᐊᕙᑎᖓ.

ᓯᑯᒥᑦ ᖁᖕᓃᑦ

ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑐᖅ ᖁᐊᕌᖓᒥ ᐊᒻᒪᓗ ᓯᖁᒥᑦᑐᓐᓇᖅᑐᑦ ᓂᓚᓱᒃᑎᓪᓗᒍ ᐅᑭᐅᒃᑯᑦ ᓂᒡᓚᓱᓂᖓᓂᑦ. ᑕᒪᐃᒃᑳᖓᑦ, ᐃᒪᖅ ᐅᐱᕐᖔᒃᑯᑦ ᐊᐅᓕᖅᑎᓪᓗᒍ ᐃᒻᒥᖅᓯᖃᑦᑕᖅᑐᑦ ᑕᒪᒃᑯᓂᖓ ᓯᖁᒻᒪᕐᓂᑦ ᐊᒻᒪᓗ ᖁᐊᓕᖅᑭᒃᖢᓂ ᐅᑭᐊᒃᓴᓕᕌᖓᑦ. ᑕᒪᓐᓇ ᖁᖕᓂᖅ ᓯᑯᒥᑦ ᓴᖅᑭᖃᑦᑕᖅᑐᑦ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑐᒥᑦ ᖃᐅᔨᒪᔭᐅᓪᓗᓂᓗ ᓯᑯᒥᑦ ᖁᖕᓂᖅ, ᐊᖏᒡᓕᕙᓪᓕᐊᔪᓐᓇᖅᓗᓂᓗ ᐳᖅᑐᓯᕙᓪᓕᐊᓗᓂ, ᓯᓕᒃᓯᕙᓪᓕᐊᓗᓂ, ᐃᓗᑦᑐᖅᐸᓪᓕᐊᓗᓂ ᐊᑯᓂᐅᔪᒃᑯᑦ ᐊᐅᖃᑦᑕᖅᑎᓪᓗᒍ ᐊᒻᒪᓗ ᖁᐊᒃᑲᓐᓂᖃᑦᑕᖅᑎᓪᓗᒍ.

ᒪᓂᕋᕐᒥᑦ, ᓯᑯᒥᑦ ᖁᖕᓃᑦ ᓴᖅᑭᔮᖃᑦᑕᖅᑐᑦ ᐳᖅᑐᓯᓯᒪᓪᓗᓂ ᓄᓇᑐᐃᓐᓇᕐᒥᑦ. ᖁᓛᓂᑦ ᑕᑯᔭᐅᓪᓗᑎᒃ, ᓯᑯᒥᑦ ᖁᖕᓃᑦ ᓴᖅᑭᔮᖅᑎᑦᑎᔪᑦ ᐊᔾᔨᐅᙱᑦᑑᓪᓗᑎᒃ ᓄᕝᕗᐊᕆᒃᑑᑕᐅᓪᓗᑎᒃ ᓄᓇᒥᑦ ᐋᖅᑭᒃᓱᖅᓯᒪᓂᕆᕙᒃᑕᖏᑦ.

ᑲᓇᑕᒥᑦ ᑕᕆᐅᒥᒃ ᓇᐅᑦᑎᖅᓱᖅᑏᑦ (CROW)

ᖃᓄᖅ ᐃᒪᕐᒥᐅᑕᓕᕆᔨᕐᔪᐊᒃᑯᑦ ᐊᒻᒪᓗ ᑲᓇᑕᒥᑦ ᐅᓇᑕᖅᑐᒃᓴᑦ ᐱᓕᕆᖃᑎᒌᖃᑦᑕᖅᐸᑦ ᖃᐅᔨᓴᐃᓐᓇᖅᑕᐅᖁᓪᓗᒍ ᓂᒋᐊᓃᓐᓂᖅᓴᖅ ᐅᒥᐊᕐᔪᐊᒃᑯᑦ ᐊᖅᑯᑕᐅᕙᒃᑐᖅ?

ᐱᓪᓚᕆᐅᔪᑦ ᐅᖃᐅᓯᒃᓴᐃᑦ

• ᑲᓇᑕᒥᑦ ᑕᕆᐅᒥᒃ ᓇᐅᑦᑎᖅᓱᖅᑏᑦ (CROW) ᑲᑎᙵᓪᓗᑎᒃ ᐅᑭᐅᖅᑕᖅᑐᒥᑦ ᐅᓯᑲᖅᑕᕐᓂᕐᒧᑦ ᐊᒻᒪᓗ ᓇᐅᑦᑎᖅᓱᕐᓂᕐᒧᑦ ᐊᔪᖏᓐᓂᖏᑦ ᑲᓇᑕᒥᑦ ᐅᖓᑕᖅᑐᒃᓴᑦ ᑖᒃᓇᙵᓪᓗ ᑭᒡᓕᓯᓂᐊᕐᓂᕐᓂᑦ ᓴᓇᕝᕕᖓᓐᓂᑦ ᐃᒪᕐᒥᐅᑕᓕᕆᔨᕐᔪᐊᒃᑯᑦ (DFO).
• ᑲᓇᑕᒥᑦ ᐅᓇᑕᖅᑐᒃᓴᑦ ᐱᓕᕆᖃᑦᑕᖅᑐᑦ ᐊᕐᕌᒍᓗᒃᑖᖅ ᓇᐅᑦᑎᖅᓱᕐᓂᕐᒥᑦ ᑕᕆᐅᑉ ᖃᓄᐃᓕᖓᓂᖓᓂᒃ ᖃᓂᒋᔭᖏᓐᓂᑦ ᕿᑎᕐᒥᐅᑦ ᓄᓇᓕᖏᓐᓂᒃ ᐊᑯᓂᐅᔪᒃᑯᑦ.
• ᑕᒪᓐᓇ ᐱᓕᕆᐊᒃᓴᖅ ᐃᓚᓕᐅᑎᔪᖅ ᖃᐅᔨᓴᕐᓂᕐᓄᑦ ᑕᒪᑐᒧᖓ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒻᒪᓗ ᑕᕆᐅᒥᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᓇᔪᒐᖏᓐᓂᒃ.
• ᐱᓕᕆᖃᑎᖃᖅᖢᑎᒃ ᓄᓇᓕᖕᓂᑦ, ᑕᒪᓐᓇ ᐱᓕᕆᐊᒃᓴᐅᔪᖅ ᓄᓇᓖᑦ ᐃᓱᒫᓘᑎᖏᓐᓂᒃ ᐊᒻᒪᓗ ᑕᕆᐅᑉ ᖃᓄᐃᓕᖓᓂᖓᓂ ᑐᓴᐅᒪᑎᑦᑎᔪᖅ ᑕᕆᐅᒥᑦ ᑭᓕᓯᓂᐊᕐᓂᕐᒧᑦ.

ᐱᓕᕆᐊᒃᓴᐅᔪᓄᑦ ᓯᕗᓕᖅᑎ*

ᐱᐅᔾ ᕗᐃᓕᒪᔅ ᐊᒻᒪᓗ ᒪᐃᒃ ᑕᒻᓯ, ᓴᓇᕝᕕᖓᓐᓂᑦ ᐃᒪᕐᒥᐅᑕᓕᕆᔨᕐᔪᐊᒃᑯᑦ ᑲᓇᑕᒥᑦ (DFO), ᖃᐅᔨᓴᕐᕕᒃ ᑕᕆᐅᒥᑦ ᑭᒡᓕᓯᓂᐊᕐᓂᕐᒧᑦ, ᓯᑦᓂ, ᐳᕆᑎᔅ ᑲᓚᒻᐱᐊ, ᑲᓇᑕ. bill.williams@dfo-mpo.gc.ca mike.dempsey@dfo-mpo.gc.ca

* ᐊᒃᑐᐊᒧᑦ ᖃᐅᔨᓴᖅᑏᑦ: ᖃᐅᔨᓴᕐᕕᒃ ᑕᕆᐅᒥᑦ ᑭᒡᓕᓯᓂᐊᕐᓂᕐᒧᑦ, ᓴᓇᕝᕕᖓᓐᓂᑦ ᐃᒪᕐᒥᐅᑕᓕᕆᔨᕐᔪᐊᒃᑯᑦ (DFO), ᓯᑦᓂ, ᐳᕆᑎᔅ ᑲᓚᒻᐱᐊ: ᐱᐅᔾ ᕗᐃᓕᐊᔅ, ᓇᑦᔭ ᔅᑏᓄ, ᕼᐊᓚᓐ ᑐᕌᔅᑎ, ᑯᕆᔅᑏᓇ ᐳᕋᐅᓐ, ᐃᒪᑦᑎᐊᕙᓕᕆᕝᕕᒃ ᓴᓇᕝᕕᖓᓐᓂᑦ ᐃᒪᕐᒥᐅᑕᓕᕆᔨᕐᔪᐊᒃᑯᑦ (DFO), ᕗᐃᓂᐲᒡ, ᒫᓂᑑᐸ: ᑕᐅᓯ ᒪᒃᓂᑯᓪ, ᑭᐅᕙᓐ ᑕᒻᓈᓪ, ᑐᕋᐃᓯ ᓘᕙᓐ, ᑯᕆᔅᑏᓐ ᒪᐃᑯ; ᓴᓇᕝᕕᖓᓐᓂᑦ ᐃᒪᕐᒥᐅᑕᓕᕆᔨᕐᔪᐊᒃᑯᑦ (DFO) ᐃᓅᕕᒃ, ᓄᓇᑦᓯᐊᖅ: ᔮᔅᒥᓐ ᐳᕉᔅᑐ, ᑳᓂ ᐸᓚᐃᒃᓯᑕ; ᐱᓕᕆᖃᑎᒌᒃᑐᑦ ᑎᑎᕋᕐᕕᖓᑦ, ᐃᖃᓗᓕᕆᓂᖅ ᐱᓕᕆᖃᑎᒌᒃᑯᒃ ᐊᐅᓚᑦᑎᓂᕐᒧᑦ ᑲᑎᒪᔨᐊᓛᑦ, ᐃᓅᕕᒃ, ᓄᓇᑦᓯᐊᖅ: ᑮᓚ ᕼᐊᓐᓴᓐ-ᑯᕋᐃᒃ; ᐊᕙᑎᓕᕆᔨᒃᑯᑦ ᑲᓇᑕᒥᑦ, ᑲᓇᑕᒥᑦ ᓯᑯᓕᕆᓂᕐᒧᑦ ᐱᔨᑦᑎᕋᖅᑏᑦ, ᐋᑐᕚ, ᐋᓐᑎᐅᕆᐆ: ᓯᑕᕙᓂ ᑐᕌᒻᐱᓖ-ᑎᐅᕆᐊᓐ

ᑭᒃᑰᕕᑕ

ᐃᓚᒋᔭᐅᔪᑦ ᐃᓚᐅᑎᑦᑎᔪᑦ ᑭᒡᓕᓯᓂᐊᖅᑎᓂᒃ ᐊᒻᒪᓗ ᓴᓇᔨᓂᑦ ᑕᐃᑲᙵᑦ ᓴᓇᕝᕕᐅᔪᒥᑦ ᐃᒪᕐᒥᐅᑕᓕᕆᔨᕐᔪᐊᒃᑯᓐᓂᑦ (DFO) ᐊᒻᒪᓗ ᐅᓇᑕᖅᑐᒃᓴᓂᑦ ᑕᐃᑲᙵᑦ 1 ᑲᓇᑕᒥᑦ ᐅᓇᑕᖅᑐᒃᓴᑦ ᓇᐅᑦᑎᖅᓱᑏᑦ ᐊᕕᒃᑐᖅᓯᒪᓂᖏᑦ (1CRPG). ᑕᒪᓐᓇ ᐱᓕᕆᐊᒃᓴᖅ ᐃᑲᔪᖅᓯᖅᑕᐅᔪᑦ ᑖᒃᑯᓇᙵᑦ ᓴᓇᕝᕕᖓᓐᓂᑦ ᐃᒪᕐᒥᐅᑕᓕᕆᔨᕐᔪᐊᒃᑯᑦ (DFO), ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR), ᐊᒻᒪᓗ ᓴᓇᕝᕕᖓᓂᑦ ᑲᓇᑕᒥᑦ ᐅᓇᑕᖅᑐᒃᓴᒃᑯᑦ (DND).

ᑭᓱᓕᕆᖃᑦᑕᖅᐱᑕ

ᑲᓇᑕᒥᑦ ᑕᕆᐅᒥᒃ ᓇᐅᑦᑎᖅᓱᖅᑏᑦ (CROW) ᑖᒃᑯᓇᖓᑦ ᓴᓇᕝᕕᖓᓂᑦ ᐃᒪᕐᒥᐅᑕᓕᕆᔨᕐᔪᐊᒃᑯᑦ (DFO) ᐱᓕᕆᖃᑎᖃᖅᖢᑎᒃ ᑲᓇᑕᒥᑦ ᐅᓇᑕᖅᑐᒃᓴᑦ ᓇᐅᑦᑎᖅᓱᑏᑦ ᐊᕕᒃᑐᖅᓯᒪᓂᖏᓐᓂᒃ (1CRPG) ᑲᓯᖅᓱᐃᖃᑦᑕᖅᑐᑎᑦ ᐱᒋᐊᕈᑕᐅᔪᓂᒃ ᖃᐅᔨᓴᕐᓂᕐᒧᑦ ᑎᑎᖅᑲᖁᑎᓂᒃ ᑕᐃᑲᓂ ᓂᒋᐊᓂᑦ ᐅᒥᐊᕐᔪᐊᑦ ᐊᖅᑯᑎᒋᖃᑦᑕᖅᑕᖏᓐᓂᑦ. ᑲᓇᑕᒥᑦ ᐅᓇᑕᖅᑐᒃᓴᑦ ᓇᐅᑦᑎᖅᓱᑏᑦ ᐊᕕᒃᑐᖅᓯᒪᓂᖏᑦ (1CRPG) ᐊᑐᖃᑦᑕᖅᑐᑦ ᐊᔾᔨᙱᑦᑐᓂᒃ ᓴᓇᕐᕈᑎᓂᒃ ᑐᓂᔭᐅᓯᒪᓪᓗᑎᒃ ᑖᒃᑯᓇᙵᑦ ᓴᓇᕝᕕᖓᓂᑦ ᐃᒪᕐᒥᐅᑕᓕᕆᔨᕐᔪᐊᒃᑯᑦ (DFO) ᑲᑎᖅᓱᐃᖁᓪᓗᒋᑦ ᖃᐅᔨᓴᒐᒃᓴᓂᒃ ᐃᓚᖓᓂᑦ ᐃᒫᑕ, ᖄᖓᓂᑦ ᐃᖅᑲᖓᓄᑦ. ᐅᓇᑕᖅᑐᒃᓴᑦ ᖃᐅᔨᓴᓲᑦ ᓂᒡᓚᓱᖕᓂᖓᓂᒃ, ᐃᑎᓂᖓᓂᒃ, ᐊᒻᒪᓗ ᑕᕆᐅᖑᓂᖓᓂᒃ, ᐊᓂᖅᓵᖅᐸᒃᑕᑦᑎᓐᓂᒃ, ᐊᒻᒪᓗ ᐱᕈᖅᑐᖃᕐᒪᖔᑦ ᐃᒫᓂᑦ. ᐅᓇᑕᖅᑐᒃᓴᑦ ᖃᐅᔨᓴᓲᑦ ᓯᑰᑉ ᐊᒻᒪᓗ ᐊᐳᑎᐅᑉ ᐃᔾᔪᓂᖓᓂᒃ. ᐊᒥᓲᙱᑦᑐᓂᑦ ᖃᐅᔨᓴᕐᕕᖕᓂᑦ, ᐅᓇᑕᖅᑐᒃᓴᑦ ᑯᒪᕈᕐᓂᒃ ᖃᐅᔨᓴᒐᒃᓴᖅᑖᓲᑦ, ᐋᖅᑭᒃᓱᕙᒃᖢᑎᒡᓗ ᓯᑯᒥᑦ ᓂᒡᓚᓱᖕᓂᕐᒧᑦ ᖃᐅᔨᓴᕈᑎᓂᒃ ᐳᒃᑕᖅᑯᑎᓂᒃ, ᐊᒻᒪᓗ ᖃᐅᔨᓴᒐᒃᓴᓂᒃ ᐃᒥᕐᒥᒃ ᐊᐅᒃᑐᕕᓃᑦ ᐊᓂᖅᑎᕆᔪᓐᓃᕐᓇᖅᑐᑦ ᐊᒻᒪᓗ ᓂᕿᑦᑎᐊᕙᑦ.

ᖃᓄᖅ ᐱᓕᕆᖃᑦᑕᖅᐸᕗᑦ

ᓴᓇᕝᕕᖓᓂᑦ ᐃᒪᕐᒥᐅᑕᓕᕆᔨᕐᔪᐊᒃᑯᑦ (DFO) ᑐᓂᓯᖃᑦᑕᖅᑐᑦ ᑭᒡᓕᓯᓂᐊᕐᓂᕐᒧᑦ ᐱᖁᑎᓂᒃ, ᐃᓕᓐᓂᐊᒐᒃᓴᓂᒃ ᐊᒻᒪᓗ ᖃᓄᔨᓴᕐᓂᕐᒥᒃ ᑕᕆᐅᒥᑦ ᑐᓴᐅᒪᔾᔪᑎᓂᒃ. ᑲᓇᑕᒥᑦ ᐅᓇᑕᖅᑐᒃᓴᑦ ᓇᐅᑦᑎᖅᓱᑏᑦ ᐊᕕᒃᑐᖅᓯᒪᓂᖏᓐᓂᒃ (1CRPG) ᑐᓂᓯᖃᑦᑕᖅᑐᑦ ᐱᔨᑦᑎᕋᐅᑎᓂᒃ ᑖᒃᑯᓇᙵᑦ ᑲᓇᑕᒥᑦ ᐅᖓᑕᖅᑐᒃᓴᓄᑦ ᐱᓕᕆᖁᓪᓗᒋᑦ ᑕᕆᐅᒥᑦ ᖃᐅᔨᓴᒐᒃᓴᓂᒃ. ᑲᓇᑕᒥᑦ ᐅᓇᑕᖅᑐᒃᓴᑦ ᓇᐅᑦᑎᖅᓱᑏᑦ ᐊᕕᒃᑐᖅᓯᒪᓂᖏᓐᓂᑦ (1CRPG) ᐃᓚᒋᔭᐅᔪᑦ ᐊᑐᐃᓐᓇᐅᑎᑦᑎᖃᑦᑕᖅᑐᑦ ᓯᑯᒥᑦ ᐱᐅᒻᒪᕆᒃᑐᑦ ᐊᒻᒪᓗ ᓇᓪᓕᖅᑕᐅᓯᒪᙱᑦᑐᑦ ᓇᐅᑦᑎᖅᓱᕈᓯᖏᓐᓂᒃ ᑕᒪᒃᑯᓄᖓ ᖃᐅᔨᓴᕈᑎᓄᑦ ᐱᒋᐊᕈᑕᐅᔪᓄᑦ ᑕᕆᐅᒥᑦ ᖃᐅᔨᓴᐃᓐᓇᕈᑎᓂᒃ.

ᐱᒋᐊᕈᑕᐅᔪᑦ ᖃᐅᔨᓴᕈᑏᑦ ᖃᐅᔨᓴᐃᓐᓇᖅᑕᐅᓂᖏᑦ

ᐊᑐᖅᑕᐅᒐᔪᓗᐊᙱᒃᑲᓗᐊᖅᑎᓪᓗᒋᑦ, ᑲᔪᓰᓐᓇᖅᑐᑦ ᐊᕐᕌᒍᓗᒃᑖᖅ ᓇᐅᑦᑎᖅᓱᕐᓃᑦ ᐊᑐᖅᑕᐅᔭᕆᐊᖃᖅᐸᒃᑐᑦ ᑕᐃᑲᓂ ᐅᑭᐅᖅᑕᖅᑐᒥᑦ ᖃᐅᔨᓴᐅᖁᓪᓗᒋᑦ ᐊᓯᔾᔨᐅᑏᑦ ᑕᕆᐅᑉ ᐊᕙᑎᖓᓂᑦ ᐊᒃᑐᐃᑐᐃᓐᓇᕆᐊᓖᑦ ᐃᖃᓗᖕᓂᒃ, ᐆᒪᔪᓂᒃ, ᐊᒻᒪᓗ ᐃᓄᖕᓂᑦ ᑖᒃᑯᓂᖓ ᐊᑐᖃᑦᑕᖅᑐᓂᒃ.

ᖃᓄᐃᒻᒪᑦ ᐊᑑᑎᖃᖅᐸ

ᐊᔪᕐᓇᕈᓐᓇᖅᑐᑦ ᐊᒻᒪᓗ ᐊᑭᑐᔫᓗᓂ ᐱᓕᕆᓇᓱᐊᖅᑎᓪᓗᒋᑦ ᓇᐅᑦᑎᖅᓱᕐᓂᕐᓂᒃ ᑕᕆᐅᑉ ᖃᓄᐃᓕᖓᓂᖓᓂᒃ ᑕᐃᑲᓂ ᑲᓇᑕᐅᑉ ᐅᑭᐅᖅᑕᖅᑐᖓᓂᑦ. ᑭᓯᐊᓂ ᒫᓐᓇᓕᓵᖑᓚᐅᖅᑐᑦ, ᐊᑕᖏᖅᖢᒋᑦ ᑕᕆᐅᒥᑦ ᑭᒡᓕᓯᓂᐊᕐᓃᑦ ᐱᓕᕆᐊᖑᖃᑦᑕᓚᐅᖅᑐᑦ ᐊᖏᔪᒧᑦ ᓯᑯᓯᐅᑎᓄᑦ ᐅᒥᐊᕐᔪᐊᓄᑦ ᐊᐅᔭᒃᑯᑦ ᑕᐃᑲᙵᑦ ᐱᒋᐊᖅᖢᒍ ᔪᓚᐃᒥᑦ ᐅᑐᐱᕆᒧᑦ. ᑲᓇᑕᒥᑦ ᑕᕆᐅᒥᒃ ᓇᐅᑦᑎᖅᓱᖅᑏᑦ (CROW) ᐊᔪᕐᓇᕈᓐᓃᖅᑎᑦᑎᔪᑦ ᓇᐅᑦᑎᖅᓱᕐᓂᕐᒥᒃ ᐊᒻᒪᓗ ᖃᐅᔨᓴᒐᒃᓴᓕᐅᕆᓂᕐᒥᒃ ᑲᔪᓯᔪᓐᓇᖁᓪᓗᒋᑎᑦ ᓯᑯᖃᖅᑎᓪᓗᒍ ᑕᖅᑭᖏᓐᓂᑦ ᒥᑭᑦᑐᑎᒍᑦ ᐱᓕᕆᐊᒃᓴᐅᔪᒃᑯᑦ ᐊᑐᖅᖢᑎᒃ ᑲᒧᑕᐅᔭᓂᒃ. ᐊᔪᕐᓇᙱᑎᑦᑎᖕᒥᔪᖅ ᑕᕆᐅᒥᑦ ᑭᒡᓕᓯᓂᐊᓃᑦ ᐊᑐᕐᓗᑎᒃ ᓄᓇᓖᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂᒃ ᐊᒻᒪᓗ ᐊᔪᙱᓐᓂᖏᓐᓂᒃ.

ᐊᕐᕌᒍᓕᒪᖅ ᓇᐅᑦᑎᖅᓱᕐᓃᑦ ᐃᓚᓕᐅᑎᔪᑦ ᑖᒃᑯᓄᖓ ᖃᐅᔨᓴᕐᓂᕐᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒻᒪ ᑕᕆᐅᒥᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᓇᔪᒐᖏᓐᓄᑦ. ᑲᓇᑕᒥᑦ ᐅᓇᑕᖅᑐᒃᓴᑦ ᓇᐅᑦᑎᖅᓱᑏᑦ ᐊᕕᒃᑐᖅᓯᒪᓂᖏᓐᓂᑦ (1CRPG) ᐃᓚᒋᔭᐅᔪᑦ ᐊᑐᐃᓐᓇᐅᑎᑦᑎᔪᑦ ᑕᐅᑐᖅᑰᖅᑕᒥᖕᓂᒃ ᑕᒪᒃᑯᓄᖓ ᐱᒋᐊᕈᑕᐅᔪᓄᑦ ᖃᐅᔨᓴᕈᑎᓄᑦ ᖃᓄᐃᓂᖓᓂᖏᓐᓄᑦ ᐊᒻᒪᓗ ᖃᓄᖅ ᑭᓱᑐᐃᓐᓇᐃᑦ ᐊᓯᔾᔨᖅᐸᓪᓕᐊᖕᒪᖔᑕ. ᓯᑯ ᐊᒻᒪᓗ ᐊᐳᑦ ᖃᐅᔨᓴᖅᑕᐅᓂᖏᖏᑦ ᐊᑑᑎᖃᖅᑐᑦ ᖃᐅᔨᓴᐃᓐᓇᕈᑎᓄᑦ ᓄᓇᓕᖕᓂᑦ ᖃᓄᐃᓕᖓᓂᐅᔪᓄᑦ. ᐃᑲᔪᖃᑦᑕᖅᑐᑦ ᖃᐅᔨᓴᖅᑎᓂᒃ ᐱᐅᓯᒋᐊᖁᓪᓗᒋᑦ ᑐᑭᓯᐅᒪᓂᖏᑦ ᖃᖓᑦᑕᖅᑎᑕᐅᓯᒪᔪᑦ ᐊᔾᔨᙳᐊᖏᓐᓂᑦ ᒪᓕᒃᖢᒋᑦ ᓇᐅᑦᑎᖅᓱᖅᑕᐅᔪᑦ ᒪᓂᕋᕐᒥᑦ.

ᐊᑐᖅᑕᐅᒐᔪᒃᑐᑦ ᖃᐅᔨᓴᕐᓃᑦ ᓱᓪᓗᓄᑦ ᑕᐃᑲᓂ ᑏᔅ (Dease) ᐃᑭᕐᒥᑦ ᐊᒻᒪᓗ ᑖᕕᓐ ᐊᒻᒪ ᔫᓂᐊᓐ (Dolphin and Union) ᐃᑭᖓᓂᑦ ᐃᑲᔪᕐᓂᐊᖅᑐᑦ ᖃᐅᔨᓴᖅᑎᓂᒃ ᑐᑭᓯᖁᓪᓗᒋᑦ ᖃᓄᖅ ᑕᕆᐅᑉ ᐃᒪᖓ ᐃᖏᕐᕋᖃᑦᑕᕐᒪᖔᑦ ᑕᐃᑲᓂ ᕿᑎᕐᒥᐅᓂᑦ ᐅᒥᐊᕐᔪᐊᒃᑯᑦ ᐊᖅᑯᑕᐅᕙᒃᑐᒥᑦ. ᐃᒥᖅ ᑰᒃᐸᓪᓕᐊᔪᖅ ᑕᐃᑯᖓ ᑰᕋᓃᓴᓐ (Coronation) ᐊᒻᒪᓗ ᑯᐃᓐ ᒫᑦ (Queen Maud) ᑲᖏᖅᖢᖏᓐᓂᑦ ᐃᓚᓂᐅᔾᔨᔪᖅ ᓂᕿᑦᑎᐊᕙᖕᓂᒃ ᑕᐃᑯᖓ ᓄᓇᐃᑦ ᐊᕕᒃᑐᖅᓯᒪᔪᓄᑦ ᐱᑕᖃᕐᕕᐅᓂᖅᓴᐅᓪᓗᓂ ᐃᒪᑦᑎᐊᕙᖕᓂᒃ ᑰᒃᑐᓂᒃ ᑕᒪᒃᑯᓇᖓᑦ ᓄᓇᐃᑦ ᑰᖏᓐᓂᑦ.

CTD ᐱᓕᕆᔾᔪᑏᑦ

ᖃᐅᔨᓴᖅᑏᑦ ᓇᐅᑦᑎᖅᓱᕈᓐᓇᖅᑐᑦ ᖃᓕᕇᖕᓂᑦ ᑕᕆᐅᒥᑦ ᐊᑐᕐᓗᑎᒃ ᑕᒪᒃᑯᓂᖓ ᐱᓕᕆᔾᔪᑎᓂᒃ ᖃᐅᔨᓴᓲᓂᒃ ᑕᕆᐅᖅ ᐃᒪᕐᒧᑦ ᐃᓚᓕᐅᑐᔪᓄᑦ ᐃᒫᓂᑦ (ᑲᔪᓯᑎᑦᑎᓂᖅ), ᓂᓖᓇᕐᓂᖓᓂᒃ, ᐊᒻᒪᓗ ᐃᑎᓂᖓᓂᒃ. ᑕᒪᒃᑯᐊ ᐱᓕᕆᔾᔪᑏᑦ ᐃᓛᓐᓂᒃᑯᑦ ᐃᒃᐱᖕᓂᖅᓴᖃᐃᑦᑐᖃᒃᑲᓐᓂᖃᑦᑕᖅᑐᑦ ᖃᐅᔨᓴᕈᓐᓇᖅᑐᓂᒃ ᐊᓂᖅᓵᖅᐸᒃᑕᑦᑎᓐᓂᒃ ᐊᒻᒪᓗ ᐱᕈᖅᑐᑦ ᐱᑕᖃᕐᒪᖔᑕ ᐃᓚᓕᐅᑎᓯᒪᔪᓂᑦ ᐃᒫᓂᑦ. ᐊᑐᖅᖢᑎᒃ ᐊᒥᓱᓂᒃ ᖃᓄᐃᓕᖓᓂᐅᔪᓂᒃ ᑕᐅᕘᓇ ᐃᑭᖓᒍᑦ, ᖃᐅᔨᓴᖅᑏᑦ ᐋᖅᑭᒃᓱᐃᙳᐊᕈᓐᓇᖃᑦᑕᖅᑐᑦ ᑕᕆᐅᓕᕆᓂᕐᒧᑦ ᖃᓄᐃᓕᖓᓂᐅᔪᓂᒃ. ᐅᖃᒃᑲᓐᓂᕐᓗᒍ, ᑕᑯᔪᓐᓇᖅᓯᖃᑦᑕᖅᑐᑦ ᖃᓄᖅ ᑕᕆᐅᒥᑦ ᖃᓕᕇᑦ ᐋᖅᑭᖃᑦᑕᕐᒪᖔᑕ ᓯᒡᔭᖓᓂᑦ ᓯᒡᔭᖓᓄᑦ.

ᓄᓇᓕᖕᓂᑦ-ᑐᙵᕕᓖᑦ ᑭᒡᓕᓯᓂᐊᕐᓃᑦ

ᐃᓄᐃᑦ ᓄᓇᖃᖅᑐᑦ ᖃᐅᔨᓴᖅᑕᐅᕝᕕᐅᔪᓂᑦ ᐃᓂᓂᑦ ᐱᔪᒥᒍᓱᒃᑐᑦ ᖃᐅᔨᓴᐃᓐᓇᕐᓂᕐᒥᒃ ᑕᕆᐅᒥᑦ ᑕᐃᒪᐃᓕᖓᐃᓐᓇᖅᑎᑦᑎᔪᓂᒃ. ᐃᖅᑲᓇᐃᔮᑦ ᐊᒻᒪᓗ ᐃᓕᓐᓂᐊᕐᓂᕐᒧᑦ ᐊᑐᐃᓐᓇᐅᔪᑦ ᓴᖅᑮᖃᑦᑕᖅᑐᑦ ᐃᓚᐅᑎᑦᑎᓂᕐᒥᒃ ᓄᓇᓕᖕᓂᑦ ᑖᒃᑯᓇᓂ ᖃᐅᔨᓴᕐᓂᕐᒧᑦ ᐱᓕᕆᕝᕕᐅᔪᓂᑦ. ᑕᐃᑲᓂ ᐅᑭᐅᖅᑕᖅᑐᒥᑦ ᐃᓂᓂᑦ, ᓇᐅᑦᑎᖅᓱᕐᓂᖅᑕᖃᖅᐸᒃᑐᖅ ᓄᓇᓕᖕᓂᑦ ᐃᓚᒋᔭᐅᔪᓂᑦ ᐃᑲᔪᖁᓪᓗᒋᑦ ᐃᓄᐃᓴᒃᖠᒋᐊᕆᓯᒪᖁᓪᓗᒋᑦ ᐊᐅᓪᓚᕐᓂᕐᒧᑦ ᐊᑭᓂᒃ ᑖᒃᑯᓄᖓ ᖃᓪᓗᓈᑦ ᓄᓇᖏᓐᓂᑦ-ᑐᙵᕕᓕᖕᓄᑦ ᖃᐅᔨᓴᕐᓂᕐᓄᑦ.

ᖁᑦᑎᒃᑐᒥᑦ ᐱᕈᖅᑐᑦ ᐊᒻᒪᓗ ᑎᐱᖃᙱᑦᑐᑦ ᑕᖅᓴᖃᙱᑦᑐᖅ ᐅᖅᓱᐊᓗᒃ

ᖃᓄᖅ ᐅᑭᐅᑦᑕᖅᑐᒥᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᓐᓂᖏᑦ ᐱᖃᓕᖃᑦᑕᕐᒪᖔᑕ ᓴᖅᑭᑦᑎᕙᖕᒪᖔᑕᓘᓐᓃᑦ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂᒃ?

ᐱᓪᓚᕆᐅᔪᑦ ᐅᖃᐅᓯᒃᓴᐃᑦ

• ᑐᑭᓯᐅᒪᖁᓪᓗᒋᑦ ᖃᓄᖅ ᐅᑭᐅᖅᑕᖅᑐᒥᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᓐᓂᖏᑦ ᐱᖃᑦᑕᕐᒪᖔᑕ ᐊᒻᒪᓗ ᓴᖅᑭᑦᑎᖃᑦᑕᕐᒪᖔᑕ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂᒃ ᐃᑲᔪᕐᓂᐊᖅᑐᑦ ᑭᒡᓕᓯᓂᐊᖅᑎᓂᒃ ᓇᓚᐅᑦᑖᖅᑎᓪᓗᒋᑦ ᐊᒃᑐᐃᓂᖏᓐᓂᒃ ᑕᒪᑐᒧᖓ ᓯᓚᐅᑉ ᐅᖅᑰᓯᕙᓪᓕᐊᓂᖓᓄᑦ.
• ᐃᔾᔪᕐᒥᑦ ᒪᓴᒃ ᐊᒻᒪᓗ ᓂᒡᓕᓇᕐᓂᖓ ᐊᒃᑐᐃᓂᖃᕈᓐᓇᕐᒪᖔᑦ ᖃᓄᖅ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂᒃ ᐱᑕᖃᓕᖅᑎᑦᑎᕙᖕᒪᖔᑦ ᐅᕝᕙᓘᓐᓃᑦ ᓴᖅᑭᑎᑦᑎᕙᖕᒪᖔᑦ ᑖᒃᑯᓇᖓᑦ ᐅᑭᐅᖅᑕᖅᑐᒥᑦ ᐃᔾᔪᕐᓂᑦ.
• ᓄᓇᕐᔪᐊᑉ ᑲᔾᔨᖓᓂᑦ ᓄᓇᑦ ᐸᓂᖅᑐᖅ ᑎᐱᖃᙱᑦᑐᓄᑦ ᑕᖅᓴᖃᙱᑦᑐᓄᑦ ᐅᖅᓱᐊᓗᖕᓄᑦ ᐳᓚᕝᕕᐅᕙᖕᒪᑕ, ᑕᒪᓐᓇᓗ ᑐᑭᖃᖅᖢᓂ ᐱᑕᖃᕐᓂᖅᓴᐅᔪᑦ ᑎᐱᖃᙱᑦᑐᑦ ᑕᖅᓴᖃᙱᑦᑐᑦ ᐅᖅᓱᐊᓗᐃᑦ ᓴᖅᑮᙱᖔᖅᖢᑎᒃ. ᐊᔾᔨᒋᙱᑕᖓᓂᑦ, ᒪᓴᐃᑦ ᐃᔾᔪᐃᑦ ᐱᑕᖃᕐᑯᐅᒧᑦ ᑎᐱᖃᙱᑦᑐᓄᑦ ᑕᖅᓴᖃᙱᑦᑐᓄᑦ ᐅᖅᓱᐊᓗᖕᓄᑦ. ᐸᓂᕐᓂᖅᓴᐃᑦ ᐃᓃᑦ ᓴᖅᑮᙱᓐᓂᖅᓴᐅᔪᑦ ᐊᓂᖅᑎᕆᔪᓐᓃᕐᓇᖅᑐᑦ ᑖᒃᑯᓇᙵᓪᓕ ᒪᓴᐅᓂᖅᓴᓂᑦ ᐃᓂᓂᑦ.
• ᑭᖑᓂᖔᑦᑎᓐᓂᑦ ᖃᐅᔨᓴᖅᑕᕕᓃᑦ ᑐᖓᐅᑦᑎᓯᒪᔪᒃᓴᐅᔪᑦ ᖃᓄᑎᒋᑦ ᑎᐱᖃᙱᑦᑐᑦ ᑕᖅᓴᖃᙱᑦᑐᑦ ᐅᖅᓱᐊᓗᐃᑦ ᐱᑕᖃᓕᕐᒪᖔᑕ ᐅᑭᐅᖅᑕᖅᑐᒥᑦ ᐃᔾᔪᕐᓂᑦ ᓲᖃᐃᒻᒪ ᐊᑕᖏᐸᓗᒃᖢᒋᑦ ᖃᐅᔨᓴᕈᑏᑦ ᖃᐅᔨᓴᖃᑦᑕᖅᑐᑦ ᒪᓴᐅᓂᖅᓴᓂᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ.

ᐱᓕᕆᐊᒃᓴᐅᔪᓄᑦ ᓯᕗᓕᖅᑎ*

ᓂᐅᓪ ᓯᑳᑦ, ᑯᐃᓐ ᓯᓚᑦᑐᖅᓴᕐᕕᒡᔪᐊᖓᓂᑦ, ᑭᖕᓯᑕᓐ

ᐋᓐᑎᐅᕆᐆ ᐅᖃᓕᒫᕐᓗᒋᑦ ᐊᑕᖏᕐᓗᒋᑦ ᖃᐅᔨᓴᕐᓂᕐᒧᑦ ᖃᐅᔨᔭᐅᔪᑦ ᑕᐃᑲᓂ ᐅᑭᐅᖅᑕᖅᑐᒥᑦ ᖃᐅᑕᒫᖅᓯᐅᑎᓂᑦ (Arctic Journal).

* ᐊᓯᖏᑦ ᐱᓕᕆᐊᒃᓴᓄᑦ ᐃᑲᔪᖅᑎᒌᑦ: ᔪᕼᐋᓐ ᕗᐊᒡᓄ, ᔮᑭᓖᓐ K.Y. ᕼᐋᖕ, ᐋᓕᓴᓐ ᓂᐅᓪ, ᐊᒻᒪᓗ ᓂᐅᓪ ᐄ.ᓯᑳᑦ, ᑯᐃᓐ ᓯᓚᑦᑐᖅᓴᕐᕕᒡᔪᐊᖓᓂᑦ. ᑮᓇᐅᔭᖃᖅᑎᑕᐅᔪᑦ ᐅᑯᓇᙵᑦ NSERC, NSTP, ᐋᑎᒃᓇᑦ (ArcticNet), ᒐᕙᒪᖏᓐᓂᑦ ᑲᓇᑕᐅᑉ ᐊᒻᒪᓗ ᓄᓇᕐᔪᐊᓕᒫᒥᑦ ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓄᑦ ᐊᕐᕌᒍ. ᐱᓕᕆᔾᔪᑎᓄᑦ ᐃᑲᔪᖅᓱᐃᔪᑦ: ᐅᑭᐅᕐᑕᖅᑐᕐᒥ ᐊᐅᔪᐃᑦᑐᓕᕆᓂᕐᒥᒃ ᐱᓕᕆᐊᒃᓴᖅ. ᖄᒃᑲᓐᓂᐊᒍᑦ ᖃᐅᔨᓴᕐᓃᑦ: ᐱᕈᖅᑐᓄᑦ ᐊᒻᒪᓗ ᐱᕈᖅᑐᑦ-ᓂᖀᑦ ᑲᓇᑕ, ᑲᐅᕈᑕᓐ ᓯᓚᑦᑐᖅᓴᕐᕕᒡᔪᐊᖓ.

ᖃᐅᔨᓴᕐᓂᕐᒧᑦ ᓇᐃᓈᖅᓯᒪᔪᑦ

ᖃᐅᔨᓴᖅᑏᑦ ᐃᓚᒌᒃᑐᑦ ᖃᐅᔨᓴᖅᓯᒪᔪᑦ ᐊᒃᑐᐊᖃᑎᒌᖕᓂᖏᓐᓂᒃ ᒪᓴᐅᔪᓂᒃ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ, ᐊᒻᒪᓗ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᑦ ᑕᐃᑲᓂ ᐅᑭᐅᖅᑕᖅᑑᑉ ᐊᕙᑎᖓᓂᑦ.

ᖃᐅᔨᓴᕈᑎᖏᓐᓂᑦ ᐃᓂᓂᑦ ᑕᐃᑲᓂ ᑲᐃᑉ ᐸᐅᓐᑎᒥᑦ (Cape Bounty) ᒥᐅᓪᕕᐅᓪ (Melville) ᕿᑭᖅᑕᖓᓂᑦ, ᓄᓇᕘᒥᑦ, ᑯᐃᓐ ᓯᓚᑦᑐᖅᓴᕐᕕᒡᔪᐊᖓᓂᒃ-ᑐᖓᕕᓖᑦ ᖃᐅᔨᓴᖅᑏᑦ ᐃᓚᒌᑦ ᖃᐅᔨᓴᖅᓯᓚᐅᖅᑐᑦ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᓐᓂᒃ ᑖᒃᑯᓇᓂ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᐃᓂᓗᒃᑖᓂᑦ ᐊᔾᔨᒌᙱᑦᑐᓂᒃ ᖁᕝᕙᓯᓕᕇᖑᓪᓗᑎᒃ ᐃᔾᔪᐃᑦ ᒪᓴᐅᓂᖏᓐᓂᑦ. ᐸᓂᓛᓂᑦ ᒪᓴᐅᓛᓄᑦ, ᐃᓂᖏᑦ ᐃᓚᐅᑎᑦᑎᔪᑦ ᐸᓂᖅᑐᓂᒃ ᓄᓇᕐᔪᐊᑉ ᑲᔾᔨᖓᓂᑦ ᓄᓇᑦ, ᒪᓴᐅᓗᐊᙱᓐᓂᖅᓴᓂᑦ ᓄᓇᓂᑦ ᐊᒻᒪᓗ ᒪᓴᓪᓚᕆᐅᔪᓂᑦ ᐃᕖᑦ (ᐃᒪᖅᓱᖕᓂᑦ) ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᓕᖓᓂᐅᔪᓂᑦ.

ᐃᓚᒌᒃᑐᑦ ᖃᐅᔨᓴᖃᑦᑕᖅᑐᑦ ᐱᖓᓱᓂᒃ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂᒃ: ᐊᓂᖅᑎᕆᔪᓐᓃᕐᓇᖅᑐᖅ (CO2), ᑎᐱᖃᙱᑦᑐᖅ ᑕᖅᓴᖃᙱᑦᑐᑦ ᐅᖅᓱᐊᓗᒃ (CH4), ᐳᓪᓚᖅ (N2O). ᑎᐱᖃᙱᑦᑐᖅ ᑕᖅᓴᖃᙱᑦᑐᑦ ᐅᖅᓱᐊᓗᒃ ᐊᒻᒪᓗ ᐳᓪᓚᖅ ᐱᑕᖃᓗᐊᙱᓐᓂᖅᓴᐅᔪᑦ ᑖᒃᑯᓇᙵᑦ ᐊᓂᖅᑎᕆᔪᓐᓃᕐᓇᖅᑐᓂᒃ, ᑭᓯᐊᓂᓕ ᓴᙱᔪᒥᒃ ᐅᖅᑰᓯᕙᓪᓕᐊᓂᕐᒧᑦ ᐊᒃᑐᐃᓂᓖᑦ.

ᑐᙵᕕᖃᖅᖢᑎᒃ ᒪᕐᕉᖕᓄᑦ ᐊᕐᕌᒎᖕᓄᑦ ᓇᐅᑦᑎᖅᓱᕐᓂᕐᓂᒃ, ᖃᐅᔨᓴᕐᓂᖅ ᓇᓂᓯᓚᐅᖅᑐᑦ ᐸᓂᕐᓂᖅᓴᐃᑦ ᐃᓃᑦ ᐱᑕᖃᕐᕕᐅᕙᓪᓕᐊᓂᖅᓴᐅᔪᑦ ᑎᐱᖃᙱᑦᑐᓂᒃ ᑕᖅᓴᖃᙱᑦᑐᓂᒃ ᐅᖅᓱᐊᓗᖕᓂᒃ, ᐃᒪᐃᑎᓪᓗᒍ ᒪᓴᐅᓂᖅᓴᑦ ᐃᓃᑦ ᓴᖅᑮᓪᓗᑎᒃ ᑎᐱᖃᙱᑦᑐᓂᒃ ᑕᖅᓴᖃᙱᑐᓂᒃ ᐅᖅᓱᐊᓗᖕᓂᒃ. ᐊᓂᖅᑎᕆᔪᓐᓃᕐᓇᖅᑐᖅ ᐊᓂᐊᑎᑕᐅᓂᖓ ᐊᒃᐸᓯᖕᓂᖅᓴᐅᓚᐅᖅᑐᑦ ᓄᓇᕐᔪᐊᑉ ᑲᔾᔨᖓᓂᑦ ᓄᓇᑦ ᐸᓂᖅᑐᓂᑦ ᐃᓂᓂᑦ.

ᐅᑭᐅᖅᑕᖅᑐᒥᑦ ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑐᖅ ᐃᔾᔪᕐᒥᑦ ᑐᖅᑯᐃᓯᒪᔪᑦ ᐊᖏᔪᒥᒃ ᓄᓇᕐᔪᐊᑦ ᐸᐅᒃᓴᖓᓂᒃ. ᐱᕈᖅᑐᖃᕐᓃᑦ, ᐊᒻᒪᓗ ᐃᔾᔪᕐᓂᑦ ᑯᒪᕈᐃᑦ (ᒥᑭᑦᑐᑦ ᑯᒪᕈᐃᑦ) ᐆᒪᖃᑎᒌᖃᑦᑕᖅᑦ, ᐱᒻᒪᕆᐅᔪᒥᒃ ᐃᓕᕆᐊᖃᖅᖢᑎᒃ ᑭᐳᒃᓯᕙᒃᖢᑎᒃ ᐅᖅᓱᐊᓗᖕᓂᒃ ᑖᒃᑯᓇᓂ ᐃᔾᔪᕐᓂᑦ ᐊᒻᒪᓗ ᐊᓂᖅᓵᖅᐸᒃᑕᑦᑎᓐᓂᑦ.

ᐊᓯᔾᔨᐅᑏᑦ ᐅᑭᐅᖅᑕᖅᑐᒥᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᓐᓂᖏᑦ ᐊᓯᔾᔩᔪᓐᓇᖅᑐᑦ ᓄᓇᕐᔪᐊᒥᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᐅᑭᐅᖅᑕᖅᑐᑦ ᓂᕆᐅᒋᔭᐅᔪᑦ ᐅᖅᑰᓯᕙᓪᓕᐊᓂᐊᕋᓱᒋᔭᐅᓪᓗᓂ ᐊᒻᒪ ᒪᓴᐅᓂᖅᓴᐅᓕᕐᓗᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᐃᒪᐃᓐᓂᖓᓄᑦ ᐃᔾᔫᑉ ᒪᓴᐅᓂᖓ ᐊᒻᒪᓗ ᓂᒡᓕᓇᕐᓂᖓ ᐊᒃᑐᐃᓂᖃᕐᒪᑦ ᐱᕈᖅᑐᓂᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᑐᕌᖅᑎᑦᑎᑐᐃᓐᓇᕆᐊᓕᒃ ᐊᓯᔾᔨᕐᓂᕐᓄᑦ ᐱᕈᖅᑐᑦ ᐊᔾᔨᒌᙱᓐᓂᖏᓐᓂᒃ ᐊᒻᒪᓗ ᓇᓃᖃᑦᑕᕐᓂᖏᓐᓂᒃ ᓄᓇᒥᑦ. ᑐᑭᓯᐅᒪᓗᒍ ᖃᓄᖅ ᐊᔾᔨᒌᙱᑦᑐᑦ ᐃᕈᖅᑐᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᓐᓂᖏᑦ ᐱᑕᖃᕐᕕᐅᓕᖃᑦᑕᕐᓂᖏᑦ ᐊᒻᒪᓗ ᓴᖅᑮᖃᑦᑕᕐᓂᖏᑦ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂᒃ ᐃᑲᔪᕐᓂᐊᖅᑐᑦ ᑭᒡᓕᓯᓂᐊᖅᑎᓂᒃ ᐱᐅᓂᖅᓴᓂᒃ ᒥᒃᓴᐅᓴᐃᑎᓪᓗᒋᑦ ᖃᓄᖅ ᓯᓚ ᐊᓯᔾᔨᕐᓂᐊᖅᒪᖔᑦ.

ᒥᐅᓪᕕᐅᓪ (Melville) ᕿᑭᖅᑕᖓᓂᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ

ᑕᐃᑲᓂ ᒥᐅᓪᕕᐅᓪ (Melville) ᕿᑭᖅᑕᖓᓂᑦ, ᓄᓇᐅᑉ ᐃᑭᐊᖓᓂᑦ ᖁᐊᖑᐃᓐᓇᐅᔭᖅᑐᖅ ᐊᐅᖃᖅᑕᕐᓂᖓ ᖄᖓᓃᓛᖅ ᐃᒪᐃᒐᔪᒃᑐᑦ 50-90 ᓯᓐᑎᒦᑕᑦ ᐃᔾᔪᓂᓕᒃ, ᐊᒻᒪᓗ ᐱᕈᕐᕕᐅᒐᓛᖃᖅᑕᖅᖢᓂ ᑭᒡᓕᖏᓐᓂᓪᓗᐊᑕᐸᓗᒃ ᕿᖁᑎᓯᒪᔫᑉ ᐃᔾᔪᖃᓕᓵᕐᓂᑯᓂᑦ. ᐱᖓᓱᑦ ᐱᒻᒪᕆᐅᔪᑦ ᓄᓇᒥᑦ ᐅᑭᐅᖅᑕᖅᑐᒥᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᓇᓗᓇᐃᔭᖅᑕᐅᓯᒪᔪᑦ ᑖᒃᑯᓇᖓᑦ ᐃᔾᔪᐃᑦ ᒪᓴᐅᓂᖏᓐᓂᒃ ᐊᒻᒪᓗ ᐱᕈᖅᑐᓄᑦ ᐱᕈᖃᑦᑕᖅᑐᑦ ᑕᐅᕙᓂ

ᓄᓇᕐᔪᐊᑉ ᑲᔾᔨᖓᓂᑦ ᓄᓇᑦ ᐸᓂᖅᑐᖅ

• ᐸᓂᖅᑐᖅ ᓄᓇᕋᔭᒃ
• ᐸᓕᖅᑐᑦ ᑭᓱᒃᓴᖃᖅᑐᑦ ᐃᔾᔪᑦ ᓴᖅᑭᔮᖅᑐᑦ 80 ᐳᓇᓐ ᓄᓇᖓᓂᑦ.
• ᐱᕈᖅᑑᒐᔪᒃᑐᑦ ᐃᓚᐅᑎᑦᑎᔪᑦ ᐅᑯᓂᖓ ᐊᐅᐱᓚᑦᑐᙳᐊᓂᒃ, ᐃᒍᑦᑕᑦ ᓂᕿᖏᓐᓂᒃ, ᖁᐊᔭᐅᑎᓂᒃ ᐊᒻᒪᓗ ᐅᕐᔪᐃᑦ ᒪᓃᑦ.
• ᑕᒪᒃᑯᐊ ᑕᑯᒃᓴᐅᒐᔪᖕᓂᖅᓴᐃᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᑕᐃᑲᓂ ᑲᐃᑉ ᐸᐅᓐᑎᒥᑦ (Cape Bounty), ᒥᐅᓪᕕᐅᓪ (Melville) ᕿᑭᖅᑕᖓᓂᑦ

ᒪᓴᐅᓗᐊᙱᓐᓂᖅᓴᓂᑦ ᓄᓇᓂᑦ

• ᐱᕈᕐᕕᐅᓲᑦ ᐃᔾᔪᐃᑦ, ᑕᐅᓄᖓ ᐱᖓᓱᑦ ᓯᓐᑎᒦᑕᐸᓗᐃᑦ, ᒪᓴᐅᓗᐊᙱᑦᑐᑦ ᐃᔾᔪᐃᑦ.
• ᐱᕈᖅᑑᒐᔪᒃᑐᑦ ᐃᓚᐅᑎᑦᑎᔪᑦ ᐅᑯᓂᖓ ᐅᕐᔪᐃᑦ ᒪᓃᑦ, ᖁᐊᔭᐅᑏᑦ, ᐲᑦᓴᕐᓚᐅᔭᐃᑦ ᐱᕈᖅᑐᑦ, ᐃᕖᑦ, ᐊᕚᓚᕿᐊᑦ, ᐊᒻᒪᓗ ᐱᕈᕐᓯᐊᓂᒃ ᐱᕈᕐᕕᐅᓲᑦ.
• ᑕᒪᓐᓇ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᑕᑯᔭᐅᒐᔪᒃᑐᑦ ᐊᓯᖏᓐᓂᑦ ᐃᓚᖓᓂᑦ ᐅᑭᐅᖅᑕᖅᑑᑉ.
•  

ᒪᓴᐃᑦ ᐃᕖᑦ ᐃᒪᖅᓱᐃᑦ

• ᑭᓂᐸᔪᖅ ᓄᓇᕋᔭᒃ
• ᒪᓴᐃᑦ ᐱᕈᕐᕕᐅᔪᓐᓇᖅᑐᑦ ᐃᔾᔪᐃᑦ ᑕᓪᓕᒪᓂᒃ ᓯᓐᑎᒦᑕᑦ ᑕᐅᓄᖓᐅᔪᑦ.
• ᐱᕈᕐᕕᐅᓯᒪᓪᓚᕆᒃᖢᑎᒃ ᐱᕈᖅᑐᓂᒃ, ᐱᕈᖅᑑᒐᔪᒃᑐᑦ ᐃᓚᐅᓪᓗᑎᒃ ᐅᑯᐊ ᐲᑦᓴᖅ, ᐃᒪᖅᓱᖕᒥᑦ ᐃᕖᑦ, ᓄᓇᒥᑦ ᐃᕖᑦ, ᐊᒻᒪᓗ ᐱᕈᖅᑐᒃᓴᔭᑦ.
• ᑕᒪᓐᓇ ᐆᒪᔪᑦ ᓇᔪᒐᖏᑕ ᓯᓚᑎᖏᓪᓗ ᑕᑯᔭᐅᔪᓐᓇᖅᑐᑦ ᓯᕕᖓᔪᓂᑦ ᑖᒃᑯᓇᙵᑦ ᐊᐅᒃᐸᓪᓕᐊᔪᓂᑦ ᖁᐊᖑᔪᓂᑦ.

ᕿᑎᕐᒥᐅᑦ ᑕᕆᐅᒥᑦ ᑭᒡᓕᓯᓂᐊᕐᓂᕐᒧᑦ ᖃᐅᔨᓴᕈᑦ (K3S)

ᖃᓄᖅ ᑎᓂᓐᓃᑦ ᐅᓕᓐᓃᑦ, ᐃᖏᕐᕋᓃᑦ ᐊᒻᒪᓗ ᑲᑎᑉᐸᒃᑐᑦ ᐊᒃᑐᐃᕙᑦ ᑕᕆᐅᑉ ᐊᕙᑎᖓᓂᑦ ᑕᐃᑲᓂ ᕿᑎᕐᒥᐅᑦ ᑕᕆᐅᖓᓂᒃ?

ᐱᓪᓚᕆᐅᔪᑦ ᐅᖃᐅᓯᒃᓴᐃᑦ

• ᕿᑎᕐᒥᐅᑦ ᑕᕆᐅᖓᑕ ᐆᒻᒪᕆᖕᓂᖓ ᑕᕆᐅᕐᒥᐅᑕᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᐊᒃᑐᖅᑕᐅᓯᒪᔪᑦ ᑰᒃᑕᐅᓂᖓᓄᑦ ᑕᐃᑲᙵᑦ ᓄᓇᐃᑦ ᐊᕕᒃᑐᖅᓯᒪᔪᑦ ᑰᖏᓐᓂᑦ ᐊᒻᒪᓗ ᐊᖏᓂᖅᓴᑦ ᐃᖏᕐᕋᓂᐅᕙᒃᑐᑦ ᐊᐅᓚᔾᔪᓰᑦ ᑕᐃᑲᓂᓗᒃᑖᖅ ᐅᑭᐅᖅᑕᖅᑑᑉ ᑕᕆᐅᖓᓂᑦ.
• ᑎᓂᑉᐸᖕᓂᖓ ᐅᓕᑉᐸᖕᓂᖓᓄᑦ ᑲᑎᖃᑦᑕᖅᑐᑦ ᐃᒦᑦ ᑕᐃᑲᓂ ᑐᐊᑦᑐᒥᑦ, ᑰᒃᑐᒻᒪᕆᖕᒥᑦ ᐃᑭᕐᒥᑦ ᕿᑎᕐᒥᐅᑦ ᑕᕆᐅᖓᓂᑦ, ᐊᒃᑐᐃᕙᒃᑐᑦ ᑕᕆᐅᕐᒥᐅᑕᑦ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᐊᒻᒪᓗ ᑕᕆᐅᒥᑦ ᓯᑯ ᖃᓄᐃᓕᖓᕙᖕᒪᖔᑦ ᑕᐃᑲᓂ ᐊᕕᒃᑐᖅᓯᒪᔪᓂᑦ ᓄᓇᓂᑦ.
• ᐅᑭᐅᒃᑯᑦ, ᑕᒪᓐᓇ ᑲᑎᖅᓱᐃᖃᑦᑕᕐᓂᖅ ᐃᓚᓕᐅᑎᕙᒃᐳᖅ ᓵᑦᑐᓄᑦ ᓯᑯᓂᑦ ᐅᕝᕙᓘᓐᓃᑦ ᐊᐅᒃᑲᕐᓂᕐᓄᑦ ᖃᐅᔨᒪᔭᐅᔪᑦ “ᐅᑭᐅᒃᑯᑦ ᐊᖕᒪᔪᑦ”.
• ᐊᐅᔭᒃᑯᑦ, ᑕᒪᓐᓇ ᑲᑎᖃᑦᑕᖅᑐᑦ ᐊᑐᐃᓐᓇᕈᐃᕙᒃᐳᖅ ᓂᕿᑦᑎᐊᕙᖕᓂᒃ ᐃᒪᐃᑉ ᖄᖓᓂᑦ ᐊᒻᒪᓗ ᐃᑲᔪᖅᐸᒃᖢᓂ “ᐊᐅᔭᒃᑯᑦ ᐱᕈᖅᑐᖃᕐᕕᖕᓂᑦ”, ᐃᒪᐃᑦᑑᓪᓗᑎᒃ ᐊᔾᔨᒌᙱᕈᓘᔭᖅᑐᑦ ᐃᖅᑲᖓᓂᕐᒥᐅᑕᑦ ᐊᔾᔨᐅᙱᑦᑐᑦ ᑖᒃᑯᓇᙵᑦ ᖃᓂᖏᔭᖏᓐᓂᑦ ᑰᒃᑕᐅᓗᐊᙱᑦᑐᓂᑦ ᐊᕙᑎᓂᑦ.

ᐱᓕᕆᐊᒃᓴᐅᔪᓄᑦ ᓯᕗᓕᖅᑎ

ᑯᕆᔅᑏᓇ ᐳᕋᐅᓐ, ᐱᐅᓪ ᕗᐃᓕᐊᒪᓯ, ᓴᓇᕝᕕᖓᓐᓂᑦ ᐃᒪᕐᒥᐅᑕᓕᕆᔨᕐᔪᐊᒃᑯᑦ ᑲᓇᑕᒥᑦ (DFO), ᖃᐅᔨᓴᕐᕕᒃ ᑕᕆᐅᒥᑦ ᑭᒡᓕᓯᓂᐊᕐᓂᕐᒧᑦ, ᓯᑦᓂ, ᐳᕆᑎᔅ ᑲᓚᒻᐱᐊ, ᑲᓇᑕ.* kristina.brown@dfo-mpo.gc.ca bill.williams@dfo-mpo.gc.ca

*ᖃᐅᔨᓴᕐᕕᒃ ᑕᕆᐅᒥᑦ ᑭᒡᓕᓯᓂᐊᕐᓂᕐᒧᑦ, ᓯᑦᓂ, ᐳᕆᑎᔅ ᑲᓚᒻᐱᐊ, ᑲᓇᑕ.

ᐱᓕᕆᖃᑎᒌᑦ/ᓇᓗᓇᐃᖅᑕᐅᔪᑦ

ᐴᑐ ᐸᓚᒻ, ᓴᓇᕝᕕᖓᓂᑦ ᐅᑭᐅᖅᑕᖅᑑᑉ ᐊᒻᒪᓗ ᐃᒫᓂᑦ ᐆᒪᔪᓄᑦ, UiT – ᐅᑭᐅᖅᑕᖅᑐᒥᑦ ᓯᓚᑦᑐᖅᓴᕐᕕᒡᔪᐊᖅ, ᓄᐊᕗᐃ, ᑖᒻᓲ, ᓄᐊᕗᐃ, ᑯᕆᔅᑏᓇ ᐳᕋᐅᓐ, ᐃᒪᕐᒥᐅᑕᓕᕆᔨᕐᔪᐊᒃᑯᑦ ᑲᓇᑕᒥᑦ, ᓯᑦᓂ, ᐳᕆᑎᔅ ᑲᓚᒻᐱᐊ, ᑲᓇᑕ, ᐃᐊᑎ ᑲᐅᒫᒃ, ᐃᒪᕐᒥᐅᑕᓕᕆᔨᕐᔪᐊᒃᑯᑦ ᑲᓇᑕᒥᑦ, ᓯᑦᓂ, ᐳᕆᑎᔅ ᑲᓚᒻᐱᐊ, ᑲᓇᑕ, ᓴᑦ ᑖᓂᐅᓴᓐ, ᓯᓚᑦᑐᖅᓴᕐᕕᖓᑦ ᐃᒪᕐᒥᐅᑕᓕᕆᔨᕐᒧᐊᑦ ᑭᒡᓕᓯᓂᐊᓂᕐᒧᑦ, ᓯᓚᑦᑐᖅᓴᕐᕕᒡᔪᖓ ᐊᓛᔅᑲ ᕕᐅᐹᒃᓯ, ᕕᐅᐹᒃᓯ, ᐊᓛᔅᑲ, ᐊᒥᐊᓕᑲᑦ, ᒪᐃᒃ ᑕᒻᓯ, ᐃᒪᕐᒥᐅᑕᓕᕆᔨᕐᔪᐊᑦ ᑲᓇᑕᒥᑦ, ᓯᑦᓂ, ᐳᕆᑎᔅ ᑲᓚᒻᐱᐊ, ᑲᓇᑕ, ᑖᓄᑦ ᒪᒃᖠᓴᓐ, ᐅᑭᐅᖅᑕᖅᑑᑉ ᑲᔾᔨᐊᓄᑦ ᖃᐅᔨᓴᓃᑦ ᑲᓇᑕ, ᐃᖃᓗᒃᑑᑦᑎᖅ, ᓄᓇᕗᑦ, ᑲᓇᑕ, ᓵᓐ ᓂᐅᓪᓴᓐ, ᐃᒪᕐᒥᐅᑕᓕᕆᔨᕐᔪᐊᑦ ᑲᓇᑕᒥᑦ, ᓯᑦᓂ, ᐳᕆᑎᔅ ᑲᓚᒻᐱᐊ, ᑲᓇᑕ, ᓖᓇ ᕉᑐᒪᓐ, ᓯᓚᑦᑐᖅᓴᕐᕕᒡᔪᐊᖓ ᕕᒃᑑᕆᐊ, ᐳᕆᑎᔅ ᑲᓚᒻᐱᐊ, ᑲᓇᑕ, ᐊᐃᑐᕆᐊᓐ ᓯᒻᓇᐅᔅᑭ, ᐅᑭᐅᖅᑕᖅᑐᒥ ᖃᐅᔨᓴᕐᓂᕐᒧᑦ ᑐᙵᕕᖓ, ᕗᐃᓂᐲᒡ, ᒫᓂᑑᐸ, ᑲᓇᑕ, ᐱᐅᓪ ᕗᐃᓕᐊᒻᓯ, ᐃᒪᕐᒥᐅᑕᓕᕆᔨᕐᔪᐊᒃᑯᑦ ᑲᓇᑕᒥᑦ, ᐃᒪᕐᒥᐅᑕᓕᕆᓂᕐᒧᑦ ᖃᐅᔨᓴᖅᑐᓕᕆᓂᖅ, ᓯᑦᓂ, ᐳᕆᑎᔅ ᑲᓚᒻᐱᐊ, ᑲᓇᑕ

ᑭᓱᓕᕆᖃᑦᑕᖅᐱᑕ

ᐃᓚᒌᒃᑐᑦ ᖃᐅᔨᓴᖅᑏᑦ ᑕᐃᑲᙵᑦ ᑲᓇᑕᒥᑦ, ᐊᒥᐊᓕᒃᑲᓂᑦ ᐊᒻᒪᓗ ᓄᐊᕗᐃᒥᑦ ᑲᑎᖅᓱᐃᔪᑦ ᐱᒋᐊᕈᑕᐅᓂᐊᖅᑐᓂᒃ ᖃᐅᔨᓴᕈᑎᓄᑦ ᑎᑎᖅᑲᖁᑎᓂᒃ ᑕᒪᓐᓇ ᖃᓄᖅ ᐃᒥᖅ ᐊᒻᒪᓗ ᓂᕿᑦᑎᐊᕙᖏᑦ ᐃᖏᕐᕋᖃᑦᑕᕐᒪᖔᑕ ᑕᐃᑲᓂ ᕿᑎᕐᒥᐅᑦ ᑕᕆᐅᖓᓂᑦ ᐊᒻᒪᓗ ᖃᓄᖅ ᑕᒪᓐᓇ ᐊᒃᑐᐃᕙᖕᒪᖔᑦ ᑕᕆᐅᕐᒥᐅᑕᓂᒃ ᐆᒪᔪᓂᒃ ᓇᔪᒐᖏᑕ ᓯᓚᑎᖏᓐᓂᒡᓗ. ᖃᐅᔨᓴᖅᑏᑦ ᑲᑎᖅᓱᐃᕙᒃᑐᑦ ᐃᒥᕐᓂᒃ ᖃᐅᔨᓴᒐᒃᓴᓂᒃ ᐊᒻᒪᓗ ᖃᐅᔨᓴᖅᐸᒃᖢᑎᒃ ᐅᒥᐊᕐᔪᐊᒥᑦ ᑕᐃᑲᓂ R/V Martin Bergmann ᐊᐅᔭᒃᑯᑦ. ᑕᖅᑮᑦ ᐊᓯᖏᓐᓂᑦ ᐊᕐᕌᒍᒥᑦ, ᖃᐅᔨᓴᖅᑏᑦ ᐊᑐᖃᑦᑕᖅᑐᑦ ᐱᓂᕆᔾᔪᑎᓂᒃ ᐊᐅᓚᔾᔭᔾᔭᐃᖅᓯᒪᔪᓂᑦ ᐃᖅᖓᓂᑦ ᖃᐅᔨᓴᕋᓱᐊᖅᖢᑎᒃ ᐃᖏᕐᕋᓂᕐᓂᒃ ᐊᒻᒪᓗ ᐃᒪᖅ ᑭᓱᖃᖃᑦᑕᕐᒪᖔᑦ. ᑕᒪᒃᑯᐊ ᖃᐅᔨᓴᕐᓃᑦ ᑐᕌᒐᖃᖅᑐᑦ ᑐᐊᑦᑐᓂᑦ ᐊᒻᒪᓗ ᐃᒃᑲᒃᑐᓂᒃ ᐃᑭᕋᔭᖕᓂᒃ ᑕᐃᑲᓂ ᕿᑎᕐᒥᐅᑦ ᑕᕆᐅᖓᓂᑦ.

ᑭᓱᓂᒃ ᐃᓕᑦᑎᓐᓂᖅᐱᑕ ᐊᒻᒪᓗ ᖃᓄᐃᓗᐊᒧᑦ ᐊᑑᑎᕙ

ᐱᑕᖃᖅᑐᑦ ᓱᒃᑲᓕᓂᖅᓴᓂᒃ ᐃᖏᕐᕋᓂᕐᓂᒃ ᑐᐊᓐᓂᖅᓴᐅᔪᓂᑦ ᑕᕆᐅᒥᑦ ᐃᑭᕋᓴᐅᔪᓂᒃ ᑕᐃᑰᓇᓗᒃᑖᖅ ᕿᑎᕐᒥᐅᑦ ᑕᕆᐅᖓᒍᑦ ᑕᐃᒪᐃᑎᑕᐅᓪᓗᑎᒃ ᑎᓂᖃᑦᑕᕐᓂᖓᓄᑦ ᐅᓕᖃᑦᑕᕐᓂᖓᓄᑦ ᐃᒥᖅ ᑰᖃᑦᑕᕆᐊᖃᕐᓂᖓᓄᑦ ᐊᑯᓐᓂᖏᑦᑎᒍᑦ ᕿᑭᖅᑕᐃᑦ. ᑕᒪᒃᑯᐊ ᐃᖏᕐᕋᓃᑦ ᐃᑲᔪᖃᑦᑕᖅᑐᑦ ᑲᑎᑎᑦᑎᓪᓗᑎᒃ ᐃᒫᓂᑦ ᖃᓕᕇᑦ ᐊᒻᒪᓗ ᓂᕿᑦᑎᐊᕙᖕᓂᒃ ᐃᒪᐅᑉ ᖄᖓᓄᐊᖅᑎᑦᑎᕙᒃᖢᑎᒃ. ᑲᑎᑎᕆᓂᖅ ᐃᑲᔪᖃᑦᑕᖅᑐᑦ ᐱᕈᖅᑐᓂᒃ ᐱᖁᖅᑎᑦᑎᓪᓗᓂ ᐊᒻᒪᓗ ᑕᕆᐅᒥᑦ ᓂᕿᒋᔭᐅᕙᒃᑐᓂᒃ. ᑖᒃᑯᐊ ᐃᓗᐊᓂᑦ, ᐃᖅᑲᖓᓂᑦ ᕿᖅᑯᐊᑦ ᐱᕈᕐᕕᐅᓲᑦ, ᐅᖏᕐᓛᙳᐊᑦ, ᐊᒻᒨᒪᔪᑦ, ᕿᖅᑯᐊᑦ ᐊᔾᔨᒌᙱᑦᑐᑦ ᐊᑲᕐᕉᑎᖃᖅᐸᒃᑐᑦ ᑕᒪᒃᑯᓂᖓ ᓂᕿᑦᑎᐊᕙᖕᓂᒃ. ᓯᓚᑖᓂᑦ ᐊᖅᑯᑕᐅᕙᒃᑯᒃ, ᐊᒡᒐᒋᐊᑦ ᐊᒻᒪᓗ ᒥᑭᑦᑑᑏᑦ ᑕᕆᐅᒥᑦ ᖁᐱᕐᕈᐃᑦ ᓂᕐᒪᔪᖃᑦᑕᖅᑐᑦ ᐊᒥᐊᒃᑯᖏᓐᓂᒃ. ᑕᒪᒃᑯᐊ ᐊᐅᔭᒃᑯᑦ ᐱᕈᕐᑯᐅᒧᑦ ᐃᒻᒪᕆᐅᑐᐃᓐᓇᕆᐊᓖᑦ ᓂᕐᒪᕝᕕᐅᓗᑎᒃ ᐃᖃᓗᖕᓄᑦ ᐅᕝᕙᓘᓐᓃᑦ ᓇᑦᑎᕐᓄᑦ. ᑐᓴᐅᒪᔾᔪᑎᒃᑲᓐᓃᑦ ᑕᒪᒃᑯᓄᖓ ᖃᓄᖅ ᐃᑭᕋᓴᐃᑦ ᐊᒃᑐᐃᕙᖕᒪᖔᑕ ᐆᒪᔪᑦ ᐅᓄᖅᓯᕙᓪᓕᐊᕙᖕᓂᖏᓐᓂᒃ ᐊᖏᓂᖅᓴᑎᒍᑦ ᕿᑎᕐᒥᐅᑦ ᑕᕆᐅᖓᓂᑦ ᐱᑕᖃᕆᐊᖃᖅᑐᑦ.

ᐅᑭᐅᒃᑯᑦ, ᓇᐅᑦᑎᖅᓱᕐᓃᑦ ᓄᓇᓕᖕᓂᑦ ᐊᒻᒪᓗ ᐱᐅᔪᒻᒪᕇᑦ ᖃᖓᑦᑕᖅᑎᑕᐅᓯᒪᔪᑎᒍᑦ ᐊᔾᔨᙳᐊᑦ ᓴᖅᑭᔮᖅᑎᑦᑎᔪᑦ ᑖᒃᑯᓂᖓᔅᓴᐃᓐᓇᖅ ᐃᑭᕋᓴᖕᓂᒃ ᐊᖅᑯᑕᐅᕙᒃᑐᓂᒃ ᓯᑯᖏᑦ ᓵᑦᑑᖃᑦᑕᓕᖅᑐᑦ ᐊᒻᒪᓗ ᓯᑯᐃᖅᓵᓕᖃᑦᑕᓕᖅᖢᑎᒃ, ᐊᑦᑕᕐᓇᖅᑑᓕᖅᖢᑎᒃ ᐅᑭᐅᒃᑯᑦ ᐃᖏᕐᕋᔭᒡᕕᐅᒋᐊᒃᓴᖅ. ᑕᒪᒃᑯᐊ ᐅᑭᐅᒃᑯᑦ ᐊᖕᒪᔪᑦ ᑕᐃᒪᐃᑎᑕᐅᔪᑦ ᐆᓇᔪᖕᓂᖅᓴᐅᓕᕐᓂᖏᓐᓄᑦ ᐃᒦᑦ, ᐃᖅᑲᖓᓂᖔᖅᑎᑕᐅᕙᒃᑐᑦ ᑲᑎᑉᐸᓪᓕᐊᓪᓗᑎᒃ ᐱᔾᔪᑕᐅᓪᓗᑎᒃ ᑎᓂᑉᐸᖕᓃᑦ ᐅᓕᑉᐸᖕᓃᑦ.

ᑭᓱᑦ ᕿᑎᕐᒥᐅᑦ ᑕᕆᐅᖓᓂᑦ ᐊᔾᔨᐅᙱᑎᑦᑎᕙᑦ ᑕᕆᐅᖓᑕ ᐊᕙᑎᖓᓂᒃ?

ᕿᑎᕐᒥᐅᑦ ᑕᕆᐅᖓ ᐊᔾᔨᐅᙱᑦᑑᔪᖅ ᐃᒪᖓᑕ ᐊᕙᑎᖓᓂᑦ ᐅᑭᐅᖅᑕᖅᑐᒥᑦ ᐃᔾᔪᑕᐅᓪᓗᑎᒃ ᐱᖓᓱᓪᓗᐊᑕᑦ ᐅᔾᔨᕐᓇᓪᓗᐊᑕᖅᑐᑦ:

ᓂᕿᑦᑎᐊᕙᖃᓪᓚᕆᒃᑐᖅ- ᐃᑎᔪᒥᑦ ᐃᒪᖅ

ᑕᕆᐅᑉ ᐃᖏᕐᕋᓂᖏᑦ ᐊᑐᐃᓐᓇᐅᑎᑦᑎᔪᑦ ᑕᕆᐅᖑᓪᓗᑎᒃ, ᓂᕿᑦᑎᐊᕙᖃᓪᓚᕆᒃᑐᖅ- ᐃᑎᔪᒥᑦ ᐃᒫᓃᑦ ᑖᒃᑯᓄᖓ ᕿᑎᕐᒥᐅᑦ ᑕᕆᐅᖓᓂᑦ ᑖᒃᑯᓇᖓᑦ ᐊᓯᖏᓐᓂᑦ ᑕᓯᐅᔭᕐᔪᐊᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂᑦ ᕿᑭᖅᑕᖓᓛᓂᑦ. ᓯᕿᓐᓂᖅᑕᐅᖃᑦᑕᙱᑎᓪᓗᒍ, ᑕᒪᒃᑯᐊ ᐱᑕᖃᕈᓐᓃᖅᑐᑦ ᓂᕿᑦᑎᐊᕙᐃᑦ ᐃᓚᓕᐅᑎᔪᓐᓇᙱᒻᒪᑕ ᐱᕈᖅᑐᓄᑦ ᐱᕈᖅᐸᓪᓕᐊᔪᒧᑦ ᓂᕿᖃᑦᑎᑦᑎᕙᒃᑐᑦ ᓂᕆᔭᐅᕙᒃᑐᓂᑦ.

ᐃᒪᑦᑎᐊᕙᐃᑦ ᑰᖃᑦᑕᖅᑐᑦ ᑰᖕᓂᑦ

ᑰᑦ ᕿᑎᕐᒥᐅᑦ ᓄᓇᖁᑎᖏᓐᓂᑦ ᐊᑐᐃᓇᕈᐃᓲᑦ ᐊᖏᔪᒻᒪᕆᖕᒥᒃ ᐃᒪᑦᑎᐊᕙᖕᒥᒃ ᑕᐃᑯᖓ ᕿᑎᕐᒥᐅᑦ ᑕᕆᐅᖓᓄᑦ. ᐃᒪᑦᑎᐊᕙᒃ ᑕᕆᐅᖃᙱᓐᓂᖅᓴᐅᕗᖅ ᑕᕆᐅᕐᒥᑦ, ᑰᒃᑕᐅᓂᖏᑦ ᑕᒪᒃᑯᓇᖓᑦ ᑰᖕᓂᑦ ᖄᖓᓃᖏᓐᓇᖃᑦᑕᖅᑐᑦ.

ᑭᒡᓕᖃᖅᑎᑕᐅᔪᑦ ᐃᒪᕐᒧᑦ ᑯᕕᔪᑦ ᐊᓂᕙᓪᓕᐊᓪᓗᑎᓪᓗ

ᐃᒪᐅᑉ ᐃᖅᑲᖓ ᑕᐃᑲᓂ ᐃᑭᕋᓴᖕᓂᑦ ᕿᑎᕐᒥᐅᑦ ᑕᕆᐅᖓᓂᑦ ᐃᒃᑲᖅᑐᐸᓘᖕᒪᑦ (ᐅᖓᑖᓖᖏᑦᑐᑦ 30 ᒦᑕᑦ ᐃᑎᓂᖓ), ᑭᒡᓕᓕᖅᑎᑦᑎᓯᒪᔪᑦ ᑕᐅᖅᓰᓂᕐᒥᒃ ᐃᒥᕐᓂᑦ ᑖᒃᑯᓇᓂ ᕿᑎᕐᒥᐅᑦ ᑕᕆᐅᖓᓂᑦ ᐊᒻᒪᓗ ᐊᓯᖏᓐᓂᑦ ᐅᑭᐅᖅᑕᖅᑑᑉ ᑕᕆᐅᖓᑕ ᑕᓯᐅᔭᕐᔪᐊᖏᓐᓂᑦ.

ᓄᓇᒥᖔᖅᑐᓄᑦ ᐆᒻᒪᖅᑯᑎᖃᕐᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᖃᐅᔨᓴᖅᓯᓂᖅ

ᓄᓇᒥᖔᖅᑐᑦ ᐆᒻᒪᖅᑯᑎᖃᕐᓂᕐᒧᑦ ᓵᒻᒪᓛᖑᕙ ᐊᑕᖏᖅᑐᓂᑦ ᐃᓂᐅᔪᓂᑦ?

ᐱᓪᓚᕆᐅᔪᑦ ᐅᖃᐅᓯᒃᓴᐃᑦ

• ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᑐᕌᕋᓱᐊᖅᑐᑦ ᐃᑲᔪᕋᓱᐊᖅᖢᑎᒃ ᐅᑭᐅᖅᑕᖅᑐᒥᑦ ᓄᓇᓕᖕᓂᑦ ᐃᓄᐃᓴᒃᖠᒋᐊᖁᓪᓗᒋᑦ ᑕᑎᖃᕐᓂᖏᓐᓄᑦ ᐅᖅᓱᐊᓗᖕᓂᑦ ᑕᒪᒃᑯᓄᖓ ᐆᒻᒪᖅᑯᑎᖃᕋᓱᐊᕐᓂᕐᒧᑦ.
• ᓄᓇᓕᖕᓂᑦ ᓄᓇᒥᖔᖅᑐᓕᕆᓂᕐᒧᑦ ᖃᐅᔨᓴᕈᑏᑦ ᐱᒻᒪᕆᐅᔪᑦ ᓇᓗᓇᐃᖅᑕᐅᓇᓱᐊᖅᑎᓪᓗᒋᑦ ᓄᓇᒥᖔᖅᑐᑦ ᐆᒻᒪᖅᑯᑏᑦ ᐱᔭᐅᔪᓐᓇᖅᑐᑦ ᓈᒻᒪᖕᒪᖔᑕ ᐱᕙᓪᓕᐊᓂᕐᒧᑦ, ᓲᕐᓗ:
  • ᐊᓄᕆ: ᐊᕐᕌᒍᑕᒫᑦ ᐊᓄᕆᐅᒐᔪᒃᑐᖅ ᓱᒃᑲᓕᓂᖓ 3-6 ᒦᑕᑦ ᐊᑕᐅᓯᖅ ᑎᑦᑕᖅ ᐱᑕᖃᕆᐊᓕᒃ ᑕᒪᒃᑯᓄᖓ ᐊᓄᕆᒧᑦ ᐱᓕᕆᐊᒃᓴᐅᓇᓱᐊᖅᑐᓄᑦ ᑮᓇᐅᔭᑎᒍᑦ ᐊᔪᕐᓇᙱᓪᓗᓂ ᐅᖓᓯᒃᑐᓂᑦ ᐅᑭᐅᖅᑕᖅᑐᓂᑦ ᓄᓇᓕᖕᓂᑦ.
  • ᓯᕿᓂᕐᒥᖔᖅᑐᑦ: ᐱᔾᔪᑕᐅᓪᓗᓂ ᐊᓂᖅᓵᖅᐸᒃᑕᑦᑕ ᖃᓄᐃᓕᖓᓂᖓ, ᐃᓚᖏᑦ ᐃᓃᑦ ᐱᐅᓂᖅᓴᐅᔪᑦ ᓯᕿᓂᕐᒥᖔᖅᑐᒧᑦ ᐋᒃᑯᓇᖓᑦ ᐊᓯᖏᓐᓂᑦ. ᑕᒪᓐᓇ ᓇᓗᓇᐃᖅᓯᓂᐊᖅᑐᑦ ᓇᓃᓐᓂᒃᓴᖏᓐᓂᑦ ᓯᕿᓂᕐᒥᖔᖅᑐᓄᑦ ᐆᒃᒪᖅᑯᑕᐅᕙᒃᑐᑦ ᓈᒻᒪᓛᖑᖕᒪᖔᑕ ᓄᓇᓕᖕᓂᑦ.
  • ᓄᓇᐅᑉ ᐆᓇᕐᓂᖓᓂᑦ: ᕿᓇᔪᖕᓃᑦ ᐊᒻᒪᓗ ᑕᐅᓄᖓᐅᔭᖅ ᓂᐅᖅᑐᐃᓂᖅᑕᖃᕆᐊᓕᒃ ᐃᓚᓕᐅᑎᕐᔪᐊᖅᓯᒪᔪᑦ ᐊᑕᖏᓗᒃᑖᖅᑐᒧᑦ ᐱᓕᕆᐊᒃᓴᐅᔫᑉ ᐊᑭᒃᓴᖓᓄᑦ ᐱᕙᓪᓕᐊᖁᓪᓗᒍ ᑕᒪᓐᓇ ᐊᑯᓂᐅᔪᒃᑯᑦ ᐆᒻᒪᖅᑯᑎᖃᕋᓱᐊᕈᑎ.

ᐱᓕᕆᐊᒃᓴᐅᔪᓄᑦ ᓯᕗᓕᖅᑎ

ᕌᑉ ᑯᒃ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR), info@polar.gc.ca

ᐃᖃᓗᒃᑑᑦᑎᐊᖅ ᓄᓇᒥᖔᖅᑐᓄᑦ ᖃᐅᔨᓴᕈᑎ

ᐊᓄᕆᒥᑦ ᐆᒻᒪᖅᑯᑎᖃᕐᓂᖅ

2014-ᒥᑦ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒦᒃᑯᑦ (POLAR) ᓇᑉᐸᐃᓯᒪᔪᑦ ᐊᓄᕆᑦᑎᐅᑏᑦ ᓇᐸᔪᕐᒥᒃ ᓄᓇᓖᑦ ᑭᒡᓕᐊᓂᑦ ᖃᐅᔨᓴᖁᓪᓗᒋᑦ ᓴᑭᖔᒐᔪᖕᒪᖔᑕ ᐊᓄᕆᐅᑉ ᖃᓄᐃᓕᖓᓂᖏᑦ, ᐱᓕᕆᖃᑎᖃᖅᖢᑎᒃ ᓄᓇᒥᙶᖅᑐᓕᕆᔨᒃᑯᑦ ᑲᓇᑕᒦᒃᑯᓐᓂᑦ (NRCan) ᐊᒻᒪᓗ ᐅᓄᕆᒥᖔᖅᑐᒥᒃ ᐆᒻᒪᖅᑯᑎᖃᕐᓂᕐᒧᑦ ᐱᓕᕆᕝᕕᐅᔪᖅ ᑲᓇᑕᒥᑦ (WEICan). ᑖᓐᓇ ᖃᐅᔨᓴᕐᓂᖅ, ᐱᓕᕆᐊᖑᓚᐅᖅᑐᑦ ᐊᑯᓐᓂᖓᓂᑦ 2014 ᐊᒻᒪᓗ 2017, ᓴᖅᑮᔪᖅ ᐊᓄᕆᒧᑦ ᐱᓕᕆᐊᒃᓴᐅᔪᑦ ᓄᓇᓕᖕᓄᑦ ᐱᓕᕆᓂᒃᑯᑦ ᑮᓇᐅᔭᑎᒍᓪᓗ ᐊᑐᕈᓐᓇᑦᑎᐊᑐᐃᓐᓇᕆᐊᓕᒃ. 2020-ᒥᒃ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᐊᒻᒪᓗ ᐅᓄᕆᒥᖔᖅᑐᒥᒃ ᐆᒻᒪᖅᑯᑎᖃᕐᓂᕐᒧᑦ ᐱᓕᕆᕝᕕᐅᔪᖅ ᑲᓇᑕᒦᒃᑯᑦ (WEICan) ᐱᐅᓯᒋᐊᕆᓚᐅᖅᑐᑦ ᐃᒃᐱᖕᓂᖅᓴᕋᐃᔾᔪᑎᖏᓐᓂᒃ ᓇᑉᐸᖅᑕᐅᓯᒪᔪᓂᑦ ᐊᒻᒪᓗ ᐱᒋᐊᖅᖢᑎᒃ ᐊᓄᕆᒥᒃ ᖃᐅᔨᓴᐃᓐᓇᕐᓂᕐᓂᒃ ᐱᒋᐊᓕᖅᑭᓚᐅᖅᑐᑦ ᑕᐅᑐᖅᑰᖅᖢᑎᒃ ᐱᐅᓯᒋᐊᕆᓗᑎᒃ ᑎᑎᖅᑲᑯᑎᓂᒃ ᐊᒻᒪᓗ ᓇᓗᓇᐃᔭᕐᓗᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒃᑐᐃᓂᖃᕐᒪᖔᑦ ᑕᒪᒃᑯᓄᖓ ᐊᓄᕆᐅᑉ ᓱᒃᑲᓕᓂᖓᓄᑦ ᐊᒻᒪᓗ ᓇᑭᙶᖃᑦᑕᕐᓂᖓᓄᑦ.

ᓯᕿᓂᕐᒥᖔᖃᑦᑕᖅᑐᑦ

ᖃᐅᔨᓴᖅᑕᐅᖁᓪᓗᒋᑦ ᓈᒻᒪᓛᖑᓂᖏᑦ ᓯᕿᓂᕐᒥᖔᖅᑐᑦ ᐆᒻᒪᖅᑯᑎᐅᕙᒃᑐᑦ ᑕᐃᑲᓂ ᐃᖃᓗᒃᑑᑦᑎᐊᒥᑦ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᐱᓕᕆᔪᑦ ᓯᕿᓂᕐᒥᖔᖃᑦᑕᖅᑐᓂᑦ ᖃᐅᔨᓴᐃᓐᓇᕐᓂᕐᓂᒃ ᐃᓕᕆᖃᑎᖃᖅᖢᑎᒃ ᓄᓇᒥᙶᖅᑐᓕᕆᔨᒃᑯᑦ ᑲᓇᑕᒦᒃᑯᓐᓂᑦ (NRCan) ᐊᒻᒪᓗ ᑳᒻᐳ ᑭᒡᓕᓯᓂᐊᖅᑏᑦ (Cambell Scientific).

ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᑲᓇᑕᒥᑦ ᖃᕆᓴᐅᔭᓕᕆᓂᕐᒧᑦ ᐊᑐᐃᓐᓇᐅᑎᑦᑎᕙᒃᑐᑦ ᔅᐸᒃᑐᕋᕙᐃ (Spectrafy) ᐱᓕᕆᖃᑎᖃᖅᑐᑦ ᖃᐅᔨᓴᖅᖢᑎᒃ ᐊᒻᒪᓗ ᓴᖅᑭᔮᖅᑎᑦᑎᓪᓗᑎᒃ ᑖᒃᑯᓇᙶᓪᓚᕆᒃᑐᑦ ᓯᕿᓂᕐᒥᖔᖃᑦᑕᖅᑐᑦ ᖃᕆᓴᐅᔭᓕᕆᓂᕐᒧᑦ ᑕᐃᔭᐅᔪᖅ ᓲᕈᓕᒪᒻ (Solarism). ᑕᒪᓐᓇ ᖃᕆᓴᐅᔭᕆᓂᔾᔪᑎ ᐊᑭᑭᑦᑑᓪᓗᓂ ᐊᔪᕐᓇᙱᖢᓂ ᐊᑐᕆᐊᒃᓴᖅ, ᐊᔪᕐᓇᙱᑎᑦᑎᔪᖅ ᐊᑐᖅᑕᐅᖔᕈᓐᓇᖅᑐᑦ ᐊᒥᓱᓄᑦ ᐅᑭᐅᖅᑕᖅᑐᒥᑦ ᓄᓇᓕᖕᓄᑦ. ᐊᑕᐅᓯᖅ ᑖᒃᑯᓇᓂ ᒪᕐᕉᖕᓂᑦ ᐊᕐᕕᓂᓕᖕᓂᑦ ᓲᕈᓕᒪᒻ (Solarism) ᐱᓕᕆᔾᔪᑎᖏᑦ ᐊᑐᖅᑕᐅᓕᓚᐅᖅᑐᑦ ᐃᓚᒋᔭᐅᔪᑦ ᓴᓇᔭᐅᕙᓪᓕᐊᓗᓂ ᑲᓇᑕ ᐱᓕᕆᐊᒃᓴᖅ ᑕᐃᑲᓂ ᐃᖃᓗᒃᑑᑦᑎᐊᒥᑦ. ᐃᖃᓗᒃᑑᑦᑎᐊᕐᒥᑦ ᐱᓕᕆᐊᒃᓴᐅᔪᖅ ᐅᑭᐅᖅᑕᖅᑐᒦᓛᖑᓪᓗᓂ ᐱᓕᕆᐊᖑᓇᓱᐊᖅᑐᑦ ᐊᒻᒪᓗ ᑕᐃᓐᓇᑐᐊᖅ ᐃᖏᕐᕋᓪᓗᓂ ᐅᑭᐅᖅᑕᖅᑐᒥᑦ.

ᓄᓇᓕᖕᓂᑦ ᓄᓇᒥᖔᖅᑐᓕᕆᓂᕐᒧᑦ ᖃᐅᔨᓴᕐᓃᑦ

ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᑐᓂᓯᓯᒪᔪᑦ ᑮᓇᐅᔭᖅᑑᑎᓂᒃ ᐊᒥᓱᒐᓚᖕᓄᑦ ᐅᑭᐅᖅᑕᖅᑐᒥᑦ ᓄᓇᓕᖕᓄᑦ ᐱᐊᓂᒃᓯᖁᓪᓗᒋᑦ ᒥᑭᑦᑑᑎᓂᒃ ᓄᓇᒥᖔᖅᑐᓕᕆᓂᕐᒧᑦ ᐆᒻᒪᖅᑯᑎᓄᑦ ᐱᓕᕆᐊᒃᓴᐅᔪᓂᒃ ᐊᒻᒪᓗ ᐃᑲᔪᖅᓯᒪᓪᓗᓂ ᓄᓇᒥᖔᖅᑐᓕᕆᓂᕐᒧᑦ ᖃᐅᔨᓴᕈᑎᓂᒃ ᐱᑕᖃᑐᐃᓐᓇᕆᐊᓕᖕᓄᑦ ᓄᓇᓕᖕᓂᑦ-ᐊᖏᑎᒋᔪᓂᒃ ᐱᓕᕆᐊᒃᓴᐅᔪᓂᒃ.

ᐊᕐᕕᐊᑦ

ᕼᐋᒪᓚᖏᑦ ᐊᕐᕕᐊᑦ ᐱᓕᕆᖃᑎᖃᖅᑐᑦ NRStor-ᑯᓐᓂᑦ, ᐆᒪᒃᑐᑎᓂᒃ ᑐᖅᑯᐃᖃᑦᑕᖅᑐᑦ ᑲᒻᐸᓂᐅᔪᑦ, ᓇᑉᐸᐃᖁᓪᓗᒋᑦ ᑕᒪᕐᒦᖕᓂᒃ ᐊᓄᕆᒧᑦ ᐊᒻᒪᓗ ᓯᕿᓂᕐᒥᖔᖅᑐᓄᑦ ᖃᐅᔨᓴᐃᓐᓇᕐᓂᕐᒧᑦ ᐱᖁᑎᓂᒃ. ᓄᓇᓖᑦ ᓂᕆᐅᒃᑐᑦ ᐱᕙᓪᓕᐊᔪᒪᓪᓗᓯᒃ ᐊᓄᕆ/ᓯᕿᓂᖅ/ ᑐᖅᑯᐃᓂᖅ ᑲᑎᒪᔪᓂᒃ ᐱᓕᕆᐊᒃᓴᐅᔪᓂᒃ ᐃᓄᐃᓴᒃᖠᒋᐊᖁᓪᓗᒋᑦ ᑭᐊᒃᓴᐅᑎᓯᐅᑎᓂᒃ ᐊᑐᖃᑦᑕᕐᓂᖏᑦ

ᓴᓂᑭᓗᐊᖅ

ᓴᓂᑭᓗᐊᕐᒥᑦ, ᕿᑭᖅᑖᓗᒃ ᑯᐊᐳᕇᓴᓐ ᓇᖕᒥᓂᖁᑎᖏᓪᓗ (QBDC) ᑕᑎᖃᖅᓯᒪᔪᑦ ᓄᓇᓕᖕᓂᑦ ᐃᓚᐅᑎᑦᑎᓂᕐᒥᒃ ᓂᕈᐊᕋᓱᐊᖅᑎᓪᓗᒋᑦ ᓈᒻᒪᓛᒥᒃ ᐃᓂᓂᒃ ᓇᑉᐸᐃᓇᓱᐊᖅᑎᓪᓗᒋᑦ ᐊᓄᕆᑦᑎᐅᑏᑦ ᓇᑉᐸᖅᑕᐅᕙᒃᑐᑦ ᖃᓂᒋᔭᖓᓂᑦ ᓄᓇᓕᖕᓄᑦ. ᖃᐅᔨᔭᐅᔪᑦ ᑕᐃᑲᙵᑦ ᖃᐃᓴᐃᓐᓇᖅᑕᐅᔪᒥᑦ ᐱᓕᕆᐊᒃᓴᐅᔪᒥᑦ ᕿᑭᖅᑖᓗᒃ ᑯᐊᐳᕇᓴᓐ ᓇᖕᒥᓂᖁᑎᖏᓐᓂᒃ (QBDC) ᐱᕙᓪᓕᐊᓪᓚᕆᒃᑎᑦᑎᓯᒪᔪᑦ ᓇᖕᒥᖃᖅᑎᓄᑦ ᐋᖅᑭᒃᓱᖅᑕᐅᕙᒃᑐᓂᒃ ᐃᑲᔪᖅᓯᖁᓪᓗᒋᑦ ᓯᕗᓂᒃᓴᑦᑎᓐᓂᑦ 400-ᑭᓗᕗᐊᑦ ᐊᓄᕆᒧᑦ ᐱᓕᕆᐊᒃᓴᐅᔪᖅ.

ᑎᓂᓐᓂᕐᓄᑦ ᐅᓕᓐᓂᕐᓄᑦ ᖃᐅᔨᓴᕐᓂᖅ

ᐊᓯᔾᔨᖅᐸᓪᓕᐊᔪᑦ ᑕᕆᐅᒥᑦ-ᓯᑯᑦ ᖃᓄᐃᓕᖓᕙᖕᓂᖏᑦ, ᑕᐃᒪᐃᓕᓯᒪᔪᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᓴᖅᑮᔪᓐᓇᖅᑐᑦ ᐱᕕᐅᔪᓂᒃ ᐊᑐᖅᑕᐅᔪᓐᓇᕐᓗᑎᒃ ᐃᒫᓂᑦ ᐆᒻᒪᖅᑯᓯᐅᕐᓂᕐᒥᑦ ᑕᐃᑲᓂ ᑲᓇᑕᐅᑉ ᐅᑭᐅᖅᑕᖅᑐᖓᓂᑦ. ᐃᒪᐃᓐᓂᖓᓄᑦ ᑖᒃᑯᐊ 24 ᓄᓇᕘᒥᑦ 25 ᓄᓇᓖᑦ ᓯᒡᔭᖅᐸᓯᖕᒦᒻᒪᑕ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR), ᐊᒻᒪᓗ ᑖᒃᑯᐊ ᑲᓇᑕᓗᒃᑖᒥᑦ ᖃᐅᔨᓴᕐᓂᕐᒧᑦ ᑲᑎᒪᔩᑦ (NCR) ᐱᓕᕆᖃᑎᒌᒃᑐᑦ ᐃᓕᑦᑐᒪᓪᓗᑎᒃ ᐃᒪᐃᙱᒃᑲᓗᐊᕐᒪᖔᑦ ᑎᓂᑦᑕᕐᓃᑦ ᐅᓕᑦᑕᕐᓃᑦ ᑖᒃᑯᓇᓂ ᖃᓄᖅᑑᖅᑕᐅᔪᓂᑦ ᐃᓂᓂᑦ ᑎᑭᐅᒪᔪᓐᓇᕐᒪᖔᑕ ᐊᕐᕌᒍᓗᒃᑖᒧᑦ ᐆᒻᒪᖅᑯᑎᖃᕆᐊᖃᕐᓂᖏᓐᓄᑦ ᐃᓚᖏᑦ ᓄᓇᓖᑦ. ᑲᓇᑕᓗᒃᑖᒥᑦ ᖃᐅᔨᓴᕐᓂᕐᒧᑦ ᑲᑎᒪᔩᑦ (NCR) ᖃᐅᔨᓴᖅᑐᑦ ᑕᓪᓕᒪᓂᒃ ᓄᓇᕘᒥᑦ ᓄᓇᓕᖕᓂᑦ ᓴᖅᑭᔮᖅᑎᑦᑎᔪᓂᒃ ᐱᐅᓛᓂᒃ ᐱᑕᖃᑐᐃᓐᓇᕆᐊᓕᖕᓂᒃ ᑕᐃᑲᓂ ᑭᐴᑉ-ᖃᖓᓃᑦᑐᓂᒃ ᖃᐅᔨᓴᕐᓂᕐᓂᒃ.

ᓄᓇᕘᒥᑦ ᓴᕕᕋᔭᖕᓂᒃ ᐊᐅᓚᑦᑎᓂᕐᒧᑦ ᐱᓕᕆᐊᒃᓴᐅᔪᖅ ᑕᑯᒃᓴᐅᑎᑦᑎᓂᕐᒧᑦ ᐱᓕᕆᐊᒃᓴᖅ

ᐱᕙᓪᓕᐊᑎᑦᑎᔪᓐᓇᖅᑐᒍᑦ ᓄᓇᐃᑦ ᐊᕕᒃᑐᖅᓯᒪᔪᓄᑦ ᐋᖅᑭᙳᐊᖅᑕᐅᓯᒪᔪᑦ ᑕᒪᒃᑯᓄᖓ ᑕᖏᓕᖕᓄᑦ ᐃᒋᑕᐅᕙᒃᑐᓄᑦ ᐊᐅᓚᑦᑎᓂᕐᒧᑦ ᑕᐃᑲᓂ ᓄᓇᕘᒥᑦ ᐃᓄᖕᓂᑦ ᐊᒻᒪ ᓄᓇᓕᖕᓂᑦ-ᓯᕗᒃᑲᖅᑕᖅᑕᐅᔪᓂᑦ ᐊᒻᒪᓗ ᐊᖏᓛᒥᒃ ᓄᓇᓖᑦ ᐱᕚᓪᓕᖅᓯᒪᖁᓪᓗᒋᑦ?

ᐱᓪᓚᕆᐅᔪᑦ ᐅᖃᐅᓯᒃᓴᐃᑦ

• ᐊᔪᕐᓇᙱᑦᑐᖅ ᐊᒻᒪᓗ ᐊᑲᕐᕉᑕᐅᔪᓐᓇᖅᑐᑦ ᐊᑐᐃᓐᓇᐅᑎᑦᑎᓗᓂ ᑕᖏᖃᖅᑐᓄᑦ ᐃᒋᑕᐅᕙᒃᑐᓄᑦ ᐊᐅᓚᑦᑎᓂᖅ ᐊᑐᕐᓗᑎᒃ ᐃᓄᐃᑦ ᐱᕙᓪᓕᐊᓂᕐᒧᑦ ᑯᐊᐳᕇᓴᖏᖏᓐᓂᒃ.
• ᐅᖓᑖᓂᑦ 900 ᐹᑕᓖᑦ, 12 ᖃᑦᑕᐅᔭᑦ ᑭᓂᖅᑐᑦ ᐃᒋᑕᒃᓴᑦ, ᐊᒻᒪᓗ ᐊᒥᓱᐊᓗᐃᑦ ᓴᕕᕋᔭᐃᑦ ᐃᒪᐅᓪᓗᑎᒃ ᐃᑭᑦᑕᐅᑕᐅᕙᒃᑐᑦ ᐲᖅᑕᐅᓚᐅᖅᑐᑦ ᓄᓇᒥᑦ ᐊᒻᒪᓗ ᓇᒃᓯᐅᔾᔭᐅᓪᓗᑎᒃ ᖃᓪᓗᓈᑦ ᓄᓇᖓᓐᓄᑦ ᐃᒋᑕᐅᑦᑎᐊᖁᓪᓗᒋᑦ ᐊᒻᒪᓗ ᐊᑐᒃᑲᓐᓂᓕᖅᑎᑕᐅᖁᓪᓗᒋᑦ.
• ᓄᓇᓕᖕᓂᑦ ᐃᓚᒋᔭᐅᒧᑦ ᐃᖅᑲᓇᐃᔭᓕᖅᑎᑕᐅᔪᑦ ᕼᐋᒪᓚᒃᑯᓐᓂᑦ ᐱᓕᐊᓂᒃᓯᓚᐅᖅᑐᑦ ᐃᖅᑲᓇᐃᔭᕐᕕᐅᔪᒥᑦ ᐊᒻᒪᓗ ᐅᖓᑖᓂᑦ 30 ᐅᓪᓗᑦ ᐃᖅᑲᓇᐃᔭᕐᕕᐅᔪᒥᑦ ᐃᓕᓐᓂᐊᖅᑎᑕᐅᓪᓗᑎᒃ.
• 59% ᑮᓇᐅᔭᖅᑑᑎᑦ ᓄᓇᓕᖕᓃᖏᓐᓇᓚᐅᖅᑐᑦ ᐃᒪᐃᑦᑑᓪᓗᑎᒃ ᑮᓇᐅᔾᔭᒃᓵᓄᑦ, ᐱᖁᑎᓄᑦ ᐊᒻᒪᓗ ᓱᓇᒃᑯᑖᓄᑦ.

ᐱᓕᕆᐊᒃᓴᐅᔪᓄᑦ ᓯᕗᓕᖅᑎ

ᓯᐅᑕᓐ ᓂᒻᔭᒃ, ᕿᑭᖅᑖᓗᒃ ᑯᐊᐳᕇᓴᓐ ᓇᖕᒥᓂᖁᑎᖏᓐᓗ (QBDC) snimchuk@qcorp.ca

ᑮᓇᐅᔭᑎᒍᑦ ᐃᑲᔪᖅᑐᑦ

ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ, ᒐᕙᒪᖏᑦ ᓄᓇᕘᑉ, ᕿᑭᖅᑖᓗᒃ ᑯᐊᐳᕇᓴᓐ, ᑲᑭᕙᒃ ᑎᒥᖁᑖ, ᕼᐋᒪᓚᖏᑦ ᑭᙵᐃᑦ, ᐱᔪᒪᓂᑐᐃᓐᓇᕐᒥᖕᓄᑦ ᐃᑲᔪᖅᓱᐃᔪᑦ: ᓄᓇᓯᐅᑎᓂᒃ ᐊᑐᓕᖅᑎᑦᑎᒃᑲᓐᓂᖅᑎᕆᔩᑦ ᑲᓇᑕᒥᑦ, ᕼᐋᒪᓚᖏᑦ ᑭᙵᐃᑦ, ᕿᑭᖅᑖᓗᒃ ᑯᐊᐳᕇᓴᓐ ᓇᖕᒥᓂᖁᑎᖏᓐᓗ (QBDC), ᒐᕙᒪᖏᑦ ᓄᓇᕘᑉ; plusArctic Consulting Ltd., ᖁᓪᓕᖅ ᐃᒡᓗᓕᐅᖅᑏᑦ

ᑭᓱᓕᕆᓚᐅᖅᐱᑕ

ᑕᒪᓐᓇ ᐱᓕᕆᐊᒃᓴᐅᔪᖅ ᑐᕌᒐᖃᓚᐅᖅᑐᑦ ᐲᖅᓯᓗᓂ ᓴᕕᕋᔭᖕᓂᒃ ᐃᒋᑕᐅᔪᓂᒃ ᐃᖅᑲᓇᐃᔭᖅᑎᑦᑎᓯᓐᓈᖅᖢᓂ ᐊᒻᒪᓗ ᐃᓕᓐᓂᐊᖅᑎᑦᑎᓪᓗᓂ ᑕᐅᕙᓂ ᓄᓇᖃᖅᑐᓂᑦ. ᓴᕕᕋᔭᐃᑦ ᐱᖑᓕᐊᖑᔪᑦ ᐃᓗᓕᖃᖅᑐᑦ ᓄᓇᒃᑰᕈᑎᕋᓛᕕᓂᕐᓂᒃ, ᖃᒧᑕᐅᔭᕕᓂᕐᓂᒃ, ᓄᓇᒃᑰᕈᑎᓂᒃ ᐊᒻᒪᓗ ᐃᒡᓗᒥᓯᐅᑎᓂᒃ. ᐊᑐᓂ ᑕᒪᒃᑯᐊ ᐃᓗᓕᖃᓚᐅᖅᑐᑦ ᖁᐊᖅᓵᕐᓇᕈᓐᓇᖅᑐᓂᒃ ᐃᒋᑕᐅᔪᓂᒃ. ᓄᓇᒃᑰᕈᑎᕕᓃᑦ ᐃᓗᓕᖃᖅᑐᑦ ᓴᕕᕋᔭᒃ ᐃᒪᐅᔪᑦ ᐃᑭᑦᑕᐅᑎᓂᒃ, ᓴᕕᕋᔭᒃ, ᐊᒻᒪᓗ ᐊᔾᔨᒌᙱᑦᑐᑦ ᐃᒪᐃᑦ ᐃᒋᑕᐅᔪᑦ ᓲᕐᓗ ᑭᓂᖅᑐᑦ ᐊᒻᒪᓗ ᐅᖅᓱᐊᓗᒃ. ᖁᐊᒃᑯᕕᑐᖃᐃᑦ ᐃᓗᓕᖃᖅᑐᑦ ᑭᓂᖅᑐᓂᒃ ᐊᒻᒪᓗ ᐊᓂᕐᓂᖃᕐᓇᖅᑐᒥᒃ- ᓄᖑᑎᕆᔪᑦ ᐳᓪᓚᐃᑦ. ᐅᓄᕈᓐᓃᖅᑎᕆᓂᖅ ᓴᕕᕋᔭᖕᓂᒃ ᐃᒋᑕᒃᓴᓂᒃ ᓄᖅᑲᖅᑎᑦᑎᔪᓐᓇᖅᑐᑦ ᖁᐊᖅᓵᕐᓇᕈᓐᓇᖅᑐᓂᒃ ᐃᒋᑕᐅᔪᓂᒃ ᓱᕈᐃᑦᑕᐃᓕᒪᑎᑕᐅᓗᓂ ᐊᕙᑎᒥᒃ.

ᐱᓕᕆᖃᑎᒌᑦ ᓴᐳᔾᔨᓯᒪᔪᑦ ᐊᕙᑎᒥᒃ ᐲᔭᐅᓪᓗᑎᒃ ᖁᐊᖅᓵᕐᓇᕈᓐᓇᖅᑐᓂᒃ ᑭᓱᑐᐃᓐᓇᕐᓂᒃ ᑕᐃᑲᙵᑦ ᓴᕕᕋᔭᖕᓂᑦ ᐱᒋᑕᐅᔪᓂᑦ. ᐊᑯᓂᐅᓂᖅᓴᒃᑯᑦ ᐊᑐᖅᑕᐅᔪᓐᓇᖅᓯᑎᑦᑎᓪᓗᑎᒃ ᒫᓐᓇ ᐊᒃᑕᕐᑯᐅᔪᓂᒃ ᑲᑎᖅᓱᖅᖢᓂᒋᑦ ᓴᕕᕋᔭᐃᑦ ᑭᑉᐹᕆᒃᑐᓄᑦ. ᑕᒪᓐᓇ ᐱᓕᕆᐊᒃᓴᖅ ᐃᑲᔪᓚᐅᖅᑐᖅ ᐱᑕᖃᓗᐊᕆᖃᕈᓐᓃᖅᖢ ᐊᖏᓂᖅᓴᐃᑦ ᐊᒃᑕᕐᕖᑦ ᓯᕗᓂᒃᓴᑦᑎᓐᓂᑦ. ᐅᓄᕈᓐᓃᕆᐊᕆᓚᐅᕐᒥᔪᖅ ᖁᐊᖅᓵᕐᓇᕈᓐᓇᖅᑐᑦ ᐊᕙᑎᒥᒃ ᓱᕈᖅᓴᐃᓂᕐᒧᑦ.

ᑖᓐᓇ ᐋᖅᑭᙳᐊᖅᑕᐅᓯᒪᔪᑦ ᐱᑕᖃᖅᑎᑦᑎᓂᖏᑦ ᑕᖏᓕᖕᓄᑦ ᐃᒋᑕᒃᓴᓄᑦ ᐊᐅᓚᑦᑎᓂᕐᒥᒃ ᐊᑐᖅᖢᑎᒃ ᐃᓄᐃᑦ ᐱᕙᓪᓕᐊᓂᕐᒧᑦ ᑯᐊᐳᕇᓴᖏᓐᓂᒃ ᐊᑐᖅᑕᐅᔪᓐᓇᖅᑐᑦ ᑲᒪᒋᔭᐅᖁᓪᓗᒋᑦ ᓴᕕᕋᔭᖕᓂᒃ ᐱᖑᓕᐊᕙᒃᑐᓄᑦ ᐊᑐᖅᑕᐅᖃᑦᑕᖅᑐᑦ ᐊᑕᖏᖅᖢᒋᑦ ᓄᓇᕘᒥᑦ ᓄᓇᓕᖕᓂᑦ. ᑕᒪᓐᓇ ᐱᓕᕆᐊᒃᓴᖅ ᐊᑐᖅᑕᐅᔪᖅ ᐃᓄᖕᓂᒃ ᓯᕗᒃᑲᖅᑕᖅᑕᐅᓚᐅᖅᑐᑦ ᐊᒻᒪᓗ ᐊᑐᖅᑕᐅᓪᓗᓂ.

ᑕᒪᓐᓇ ᐱᓕᕆᐊᖅ ᓯᕗᓪᓕᐅᔾᔨᓚᐅᖅᑐᑦ ᓴᓇᓂᕐᒥᒃ ᐃᓄᐃᑦ ᐊᔪᕈᓐᓃᖁᓪᓗᒋᑦ, ᑐᕌᒐᖃᖅᖢᓂ ᐃᓄᓕᕆᓂᕐᒧᑦ ᐅᑎᖅᑎᕝᕕᐅᓂᖅ ᑮᓇᐅᔭᓕᐅᕈᑕᐅᓇᓱᖅᑐᓄᑦ ᐊᑐᐃᓐᓇᖃᖁᓪᓗᒋᑦ ᐱᓕᕆᐊᒃᓴᐅᔪᒥᒃ. ᓄᓇᓕᖕᓂᑦ ᐃᓚᒋᔭᐅᔪᑦ ᐃᖅᑲᓇᐃᔭᓕᖅᑎᑕᐅᔪᑦ ᐊᑐᖅᖢᑎᒃ ᕼᐋᒪᓚᒃᑯᓐᓂᑦ ᐱᐊᓂᒃᓯᓚᐅᖅᑐᑦ ᐊᑕᖏᖅᖢᒋᑦ ᐃᖅᑲᓇᐃᔭᕐᕕᖕᒥᑦ ᐱᓕᕆᐊᓂᑦ. ᐱᓕᕆᐊᒃᓴᒧᑦ ᐃᓚᒋᔭᐅᔪᑦ ᐊᑐᐃᓐᓇᐅᑎᑦᑎᓚᐅᖅᑐᑦ ᐃᓕᓐᓂᐊᕐᓂᕐᒥᒃ ᐃᖅᑲᓇᐃᔭᕐᕕᖕᒥᑦ, ᐅᒃᑯᐃᖓᓪᓗᓂᓗ ᐊᓯᖏᓐᓄᑦ ᓄᓇᓕᖕᓂᑦ ᐃᓚᒋᔭᐅᔪᓄᑦ. ᕼᐋᒪᓚᒃᑯᑦ ᐊᑐᓕᒻᒪᓚᐅᖅᑐᑦ ᐊᒻᒪᓗ ᐱᖁᑎᑖᖅᖢᑎᒃ ᐱᑕᖃᕆᐊᓕᖕᓂᒃ ᑲᔪᓯᔪᓐᓇᖁᓪᓗᒋᑦ ᑲᒪᓂᕐᒧᑦ ᓴᕕᕋᔭᒃᑯᕕᖕᓂᒃ ᐊᒃᑕᕐᕕᖕᓂᑦ ᑲᒪᑦᑎᐊᕋᓱᐊᕐᓂᒃᑯᑦ, ᓯᓚᑖᒍᑦ ᑳᓐᑐᖄᒃᑎᑕᖃᙱᖢᓂ.

ᖃᓄᐃᒻᒪᑦ ᐊᑑᑎᖃᖅᐸ

ᑕᖏᖃᖅᑐᓂᒃ ᐃᒋᑕᐅᔪᓄᑦ ᐱᖁᑎᕐᔪᐊᑦ ᓄᓇᕘᒥᑦ ᓄᓇᓕᖕᓂᑦ ᓈᒻᒪᙱᒻᒪᑕ, ᓄᑕᐅᙱᖢᑎᒃ ᐊᒻᒪᓗ ᒥᑭᓗᐊᖅᖢᑎᒃ. ᑭᒡᓕᖃᖅᑐᑦ ᑮᓇᐅᔭᑦ ᐊᑐᖅᑐᒃᓴᑦ ᐊᒻᒪᓗ ᑐᐊᕕᕐᓇᕐᓂᖅᓴᐃᑦ ᖁᕝᕙᓯᓕᕇᓂᑦ ᒐᕙᒪᓂᑦ ᐃᓚᓕᐅᑎᓯᒪᔪᑦ ᑕᒪᑐᒧᖓ ᐊᔪᕐᓇᕈᑎᒧᑦ. ᓴᕕᕋᔭᐃᑦ ᐃᒋᑕᐅᔪᑦ ᑕᒫᓃᖃᑦᑕᖅᓯᒪᔪᑦ ᑕᐃᒪᙵᓂᑦ ᒫᓐᓇ ᒪᓕᒐᐃᑦ ᐊᒻᒪ ᐊᐅᓚᑦᑎᓂᕐᒧᑦ ᐱᓕᕆᔾᔪᑕᐅᓂᐊᖅᑐᑦ ᐊᑐᓕᖅᑕᐅᓚᐅᖅᑳᖅᑎᓐᓇᒋᑦ. ᐊᑕᖏᐸᓗᒃᖢᑎᒃ ᐃᒋᑕᐅᖃᑦᑕᖅᓯᒪᔪᑦ ᑕᒫᓃᖃᑦᑕᖅᓯᒪᔪᑦ ᓴᕕᕋᔭᐅᔪᑦ, ᐃᓚᐅᓪᓗᑎᒃ ᓄᓇᒃᑰᕈᑎᕕᓂᑐᖃᑦ, ᖁᐊᒃᑯᑯᕕᓃᑦ ᐊᒻᒪᓗ ᐃᒡᓗᕐᔪᐊᓄᑦ ᓱᓇᒃᑯᑖᑦ. ᑕᐃᒪᐃᓕᖓᑎᑕᐅᖏᓐᓇᕈᑎᒃ, ᖁᐊᖅᓵᕐᓇᖅᑑᓪᓗᑎᒃ ᐃᒋᑕᐅᔪᑦ ᐃᓗᓕᖃᕐᓂᖏᓐᓄᑦ ᓴᕕᕋᔭᖕᓂᒃ ᕿᕐᓛᓂᐊᖅᑐᑦ ᐊᕙᑎᒧᑦ, ᖁᐊᖅᓵᕐᓇᖅᑑᔪᑦ ᐃᓄᐃᑦ ᐋᓐᓂᐊᖃᖅᑕᐃᓕᒪᓂᖏᓐᓄᑦ, ᐊᒻᒪᓗ ᓱᕈᖅᓴᐃᓪᓗᑎᒃ ᓄᓇᒥᒃ, ᐃᒪᕐᒥᒃ ᐊᒻᒪᓗ ᐊᓂᖅᓵᖅᐸᒃᑕᑦᑎᓐᓂᑦ.

ᑕᒪᓐᓇ ᐱᓕᕆᐊᒃᓴᐅᔪᖅ ᓴᖅᑭᔮᖅᑎᑦᑎᔪᖅ ᓯᕗᓂᒃᓴᒥᑦ ᐊᖏᕈᑎᓂᒃ ᑖᒃᑯᓇᓂ ᒐᕙᒪᖏᓐᓂᑦ ᓄᓇᕘᑉ ᐊᒻᒪᓗ ᓄᓇᐃᑦ ᐊᕕᒃᑐᖅᓯᒪᔪᑦ ᐱᕙᓪᓕᐊᓂᕐᒧᑦ ᑯᐊᐅᕇᓴᖏᓐᓂᑦ ᑕᐃᑲᓂ ᕿᑭᖅᑕᓂᒥᑦ, ᕿᑎᕐᒥᐅᓂᑦ, ᐊᒻᒪᓗ ᑭᕙᓪᓕᕐᒥᑦ ᓄᓇᖁᑎᒋᔭᐅᔪᓂᒃ ᐊᔪᕐᓇᙱᓐᓂᖓᓂᒃ. ᑖᒃᑯᐊ ᐊᖏᕈᑏᑦ ᑲᒪᔪᓐᓇᖅᑐᑦ ᓴᕕᕋᔭᐃᑦ ᐃᒋᑕᐅᔪᑦ ᑕᒫᓃᖃᑦᑕᖅᓯᒪᔪᑦ ᐱᖑᓕᐊᖑᕙᒃᑐᑦ ᓄᓇᕗᓗᒃᑖᒥᑦ ᑮᓇᐅᔭᓂᒡᓗ ᓄᓇᓕᖕᓃᑎᑦᑎᓯᓐᓈᕐᖢᑎᒃ ᓄᓇᕘᒥᑦ ᐊᒻᒪᓗ ᐊᖏᓛᖑᑎᓐᓇᓱᐊᖅᖢᒍ ᐱᕙᓪᓕᕈᑎᖏᑦ ᐃᓄᐃᑦ ᐊᒻᒪᓗ ᓄᓇᓖᑦ.

ᐃᒋᑕᐅᔪᓄᑦ ᐊᐅᓚᑦᑎᓂᕐᒧᑦ ᖃᕆᑕᐅᔭᓕᕆᔾᔪᑏᑦ

ᑭᓱᑦ ᐃᒋᑕᐅᔪᓄᑦ ᐊᐅᓚᑦᑎᓂᕐᒧᑦ ᖃᕆᑕᐅᔭᓕᕆᔾᔪᑏᑦ ᐊᑑᑎᖃᖅᐸᑦ ᑕᐃᑲᓂ ᐃᖃᓗᒃᑑᑦᑎᐊᒥᑦ?

ᐱᓪᓚᕆᐅᔪᑦ ᐅᖃᐅᓯᒃᓴᐃᑦ

• ᓄᓇᖃᖅᑐᑦ ᑲᓇᑕᐅᑉ ᐅᖓᓯᒃᑐᖏᓐᓂᑦ ᐅᑭᐅᖅᑕᖅᑐᒥᑦ ᓄᓇᓖᑦ ᐱᐅᓯᒋᐊᕆᔪᒪᖕᒪᑕ ᐃᒋᑕᐅᕙᒃᑐᓂᒃ ᑲᒪᓂᕐᒧᑦ ᐊᑐᖅᑕᐅᕙᒃᑐᑦ ᐊᒻᒪᓗ ᑕᑎᖃᓗᐊᕈᓐᓃᕐᓗᑎᒃ ᐅᖅᓱᐊᓗᖕᓂᒃ- ᑐᙵᕕᓕᖕᓂᒃ ᐆᒻᒪᖅᑯᑎᖃᐅᑎᓂᒃ.
• ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑏᑦ ᐊᓂᐊᑎᑕᐅᔪᑦ, ᕿᕐᓂᖅᑐᑦ ᐸᐅᒃᓴᑦ ᑖᒃᑯᓇᙵᑦ ᐅᓱᖅᐊᓗᖕᒥᒃ ᐊᑐᕐᓂᕐᒧᑦ, ᐊᒻᒪᓗ ᐊᕙᑎᒥᒃ ᓱᕈᖅᓴᐃᓃᑦ ᑖᒃᑯᓇᙵᑦ ᑕᑖᓗᐊᖅᑐᓂᑦ ᐊᒃᑕᕐᕕᖕᓂᑦ ᓴᖅᑭᔮᖅᖢᑎᒃ ᐃᑭᑎᑦᑎᓂᐅᖃᑦᑕᖅᑐᑦ ᐊᒃᑐᐃᓂᕐᓗᖕᓂᖃᕐᒪᑕ ᐃᓗᓕᒫᑦ ᐋᓐᓂᐊᖃᖅᑕᐃᓕᒪᓂᖏᓐᓂᒃ ᐊᒻᒪᓗ ᓱᕈᖅᓱᐃᓪᓗᑎᒃ ᓄᓇᒥᒃ ᐊᒻᒪᓗ ᓂᕿᒋᔭᐅᕙᒃᑐᓂᑦ.
• ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒦᒃᑯᑦ (POLAR) ᕿᓂᖃᑦᑕᖅᓯᒪᔪᑦ ᐊᒥᓱᒐᓚᖕᓂᒃ ᐃᒋᑕᐅᔪᓄᑦ ᐊᐅᓚᑦᑎᔾᔪᑎᓂᒃ ᐊᒻᒪᓗ ᐊᒃᑕᑯᓂᑦ-ᐆᒻᒪᖅᑯᑎᙳᖅᑐᑦ ᐋᖅᑭᒋᐊᕈᑎᒃᓴᐅᔪᓐᓇᕐᒪᖔᑕ. ᖃᐅᔨᒪᓕᖅᑕᐅᔪᑦ ᐃᑲᔫᑎᖃᖅᑐᑦ ᐊᓯᖏᓐᓄᑦ ᐅᑭᐅᖅᑕᖅᑐᒥᑦ ᓄᓇᓕᖕᓂᑦ ᐃᓱᒪᒋᔭᖃᖅᖢᑎᒃ ᓴᓗᒪᓂᖅᓴᓂᒃ ᐆᒻᒪᖅᑯᑎᖃᕐᓂᕐᒧᑦ ᐊᑐᖅᑕᐅᖔᕈᓐᓇᖅᑐᓂᒃ.

ᐱᓕᕆᐊᒃᓴᐅᔪᓄᑦ ᓯᕗᓕᖅᑎ

ᕌᑉ ᑯᒃ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR), info@polar.gc.ca

ᐃᒻᒥᓂᒃ ᐊᐅᓚᔪᑦ ᓄᓇᓕᓐᓂᑦ ᐱᓕᕆᔾᔪᑎᖏᑦ (ACS150)

ᐃᒻᒥᓂᒃ ᐊᐅᓚᔪᑦ ᓄᓇᓕᓐᓂᑦ ᐱᓕᕆᔾᔪᑎᖏᑦ (ACS150) ᑲᑎᖅᓱᐃᕝᕕᐅᓚᐅᖅᑐᑦ ᖃᕆᑕᐅᔭᕆᓂᕐᒧᑦ ᑐᕌᖅᑐᑦ ᑎᑭᐅᑎᑦᑎᓂᕐᒥᒃ ᐆᒻᒪᖅᑯᑎᖃᕆᐊᖃᕐᓂᕐᒧᑦ 150-ᐃᓄᖃᖅᑐᑦ ᓄᓇᓖᑦ ᐃᓗᐊᓂᑦ ᒪᕐᕉᒃ ᑐᖅᑯᐃᕝᕕᐅᓲᑦ ᐅᒥᐊᕐᔪᐊᒃᑯᑦ ᑎᑭᑎᑕᐅᕙᒃᑑᒃ. ᖃᕆᑕᐅᔭᕆᔾᔪᑏᑦ ᐊᕕᒃᑐᖅᑕᐅᓚᐅᖅᑐᑦ ᐃᒪᐃᖁᓪᓗᒋᑦ ᐃᒋᑕᒃᓴᑦ ᓱᓇᑐᐃᓐᓇᑦ ᐃᓯᕐᓗᑎᒃ ᐊᒻᒪᓗ ᐃᒪᐃᑦ, ᐅᖅᑰᓴᐅᑏᑦ ᐊᒻᒪᓗ ᐆᒻᒪᖅᑯᑏᑦ ᓴᖅᑭᑕᐅᔪᑦ ᐊᓂᐊᓗᑎᒃ. ᑕᒪᓐᓇ ᖃᕆᑕᐅᔭᕆᔾᔪᓯᑦ ᓴᖅᑭᔮᖅᑎᑦᑎᔪᖅ ᐱᓕᕆᐊᖑᓚᐅᖅᑐᑦ ᑕᐃᑲᓂ ᐃᖃᓗᒃᑑᑦᑎᐊᒥᑦ 2014-ᒥᑦ, ᐱᓕᕆᖃᑎᖃᖅᖢᑎᒃ ᐊᑯᓂᐅᔪᒃᑯᑦ ᐱᕙᓪᓕᐊᓂᕐᒧᑦ ᖃᕆᓴᐅᔭᓕᕆᔾᔪᓯᕐᓄᑦ ᑲᓇᑕᒥᑦ.

ᐃᒋᑕᐅᕙᒃᑐᑦ ᓇᐅᒃᑰᖃᑦᑕᕐᒪᖔᑕ ᖃᐅᔨᓴᕈᑎ

ᐃᒋᑕᐅᕙᒃᑐᓂᒃ ᖃᐅᔨᓴᕐᓂᖅ ᑕᐃᑲᓂ ᐃᖃᓗᒃᑑᑦᑎᐊᑉ ᐊᒃᑕᕐᑯᖓᓂᑦ ᐱᐊᓂᒃᑕᐅᓚᐳᖅᑐᑦ ᓂᕈᐊᕈᓐᓇᖁᓪᓗᒋᑦ ᓈᒻᒪᓛᒥᒃ ᐊᒃᑕᑯᓂᑦ-ᐆᒻᒪᖅᑯᑎᙳᖅᑐᑦ ᖃᕆᓴᐅᔭᓕᕆᔾᔪᑏᑦ ᓄᓇᓕᖕᓄᑦ. ᑕᒪᓐᓇ ᐱᓕᕆᐊᖅ ᐱᐊᓂᒃᑕᐅᓚᐅᖅᑐᑦ ᐱᓕᕆᖃᑎᒋᓪᓗᒋᑦ ᑳᓐᑯᐊᑎᐊ ᓯᓚᑦᑐᖅᓴᕐᕕᒡᔪᖓᖏᓐᓂᒃ ᐃᒥᕐᒧᑦ, ᐆᒻᒪᖅᑯᑎᓄᑦ ᐊᒻᒪᓗ ᐊᑯᓂᐅᔪᒃᑯᑦ ᐱᓕᕆᔾᔪᓯᕐᓄᑦ. 2016- ᒥᑦ, ᐃᖅᑲᓇᐃᔭᖅᑏᑦ ᕼᐋᒪᓚᒃᑯᓐᓂᑦ, ᐃᓚᐅᓪᓗᓂ ᐃᓕᓴᕆᔭᐅᔾᔪᑎᑖᕐᓂᕐᒧᑦ ᐃᓕᓐᓂᐊᖅᑎ ᓇᐃᑕᓐ ᑭᐅᕆ, ᐱᓕᕆᓚᐅᖅᑐᑦ ᒪᕐᕉᖕᓂᒃ ᐃᓇᓱᐊᕈᓰᖕᓂᒃ ᐊᕕᒃᑐᖅᖢᒋᑦ 725 ᑭᓗᒍᕌᒻ (1600 ᐸᐅᓐ) ᐱᒋᑕᐅᔪᓂᒃ. ᑲᑎᒪᑎᑦᑎᓚᐅᖅᑐᑦ ᓄᓇᓕᓗᒃᑖᒥᒃ ᑕᐃᑲᓂ ᐃᓐᓇᒃᑯᕕᖕᒥᑦ ᐊᒻᒪᓗ ᐱᐊᓂᒃᓯᓪᓗᑎᒃ ᐊᐱᖅᓲᑎᓪᓚᑦᑖᓂᒃ ᐃᒋᑕᐅᕙᒃᑐᑦ ᑲᒪᖏᔭᐅᓂᖏᑕ ᒥᒃᓵᓄᑦ. ᖃᐅᔨᔭᐅᔪᑦ ᓴᖅᑮᓯᒪᔪᑦ ᑖᒃᑯᐊ ᓄᓇᓖᑦ ᐱᕚᓪᓕᕋᔭᕐᓂᖏᓐᓂᒃ ᐃᔾᔪᓕᐅᖃᑦᑕᕐᓂᕐᒧᑦ ᐱᓕᕆᐊᒃᓴᒥᒃ ᑕᒪᒃᑯᓇᙵᑦ ᓂᕿᓂᑦ ᐃᑭᑕᐅᕙᒃᑐᓂᒃ ᐊᒻᒪᓗ ᐊᑐᓕᒃᑲᓐᓂᖅᑎᑦᑎᓂᕐᒧᑦ ᐱᓕᕆᐊᒃᓴᓂᒃ ᑕᒪᒃᑯᓄᖓ ᕿᑐᑦᑐᒐᐅᔭᕐᓄᑦ, ᐊᐅᒃᑕᔫᓄᑦ ᐊᒻᒪᓗ ᐃᒥᒐᖃᐅᑎᓄᑦ.

ᒥᑭᔫᑎᕈᓗᐃᑦ ᐅᖅᓱᖃᐅᑎᓄᑦ ᐱᓕᕆᔾᔪᓰᑦ (MAGS)

ᖃᐅᔨᔭᐅᔪᓂᑦ ᑖᒃᑯᓇᙵᑦ ᐃᒋᑕᐅᕙᒃᑐᑦ ᓇᐅᒃᑰᖃᑦᑕᕐᒪᖔᑕ ᖃᐅᔨᓴᕈᑎᓂᑦ ᐱᔭᐅᓯᒪᔪᓂᒃ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᐱᓕᕆᖃᑎᖃᖅᖢᑎᒃ ᑲᓇᑕᒥᑦ ᐊᒃᑕᑯᓂᑦ-ᐆᒻᒪᖅᑯᑎᙳᖅᑐᑦ ᖃᕆᓴᐅᔭᓕᕆᔾᔪᑏᑦ ᐊᑐᐃᓐᓇᐅᑎᑦᑎᕙᒃᑐᑦ, Terragon Environmental Technologies Inc., ᖃᐅᔨᓴᖁᓪᓗᒋᑦ ᐊᒻᒪᓗ ᓴᖅᑭᔮᖅᑎᑦᑎᓗᑎᒃ ᒥᑭᔫᑎᕈᓗᐃᑦ ᐅᖅᓱᖃᐅᑎᓄᑦ ᐱᓕᕆᔾᔪᓰᑦ (MAGS) ᓄᓇᓕᖓᓂᑦ ᐃᖃᓗᒃᑑᑦᑎᐊᑉ. ᑎᐅᕋᒑᓐ (Terragon) ᑮᓇᐅᔭᖃᖅᑎᑦᑎᓚᐅᖅᑐᑦ ᐱᒋᐊᖅᑎᑦᑎᓗᑎᒃ ᐱᓕᕆᓪᔪᓯᕐᒥᒃ ᐊᒻᒪᓗ ᐊᑐᐃᓐᓇᐅᑎᑦᑎᓪᓗᑎᒃ ᐱᒋᐊᕈᑕᐅᔪᓂᒃ ᐃᓕᓐᓂᐊᕈᑎᒃᓴᓂᒃ ᑖᒃᑯᓄᖓ ᒪᕐᕉᖕᓄᑦ ᐊᐅᓚᑦᑎᔨᓄᑦ ᓄᓇᓕᖕᓂᖔᖅᑑᖕᓂᒃ.

ᐱᓕᕆᔾᔪᓯᖅ ᐊᐅᓚᕙᒃᑐᑦ ᐊᖏᔫᑎᑦ ᐃᓕᔭᐅᕙᓪᓕᐊᓪᓗᑎᒃ ᐃᒋᑕᐅᔪᑦ ᑖᒃᑯᓄᖓ ᒪᕐᕉᖕᒧᑦ ᐃᓯᖅᓯᕖᖕᓄᑦ. ᐃᒋᑕᐅᔪᑦ ᐆᓇᖅᓯᑎᑕᐅᓪᓗᑎᒃ ᐊᒻᒪᓗ ᓱᖃᒃᐸᓪᓕᐊᓪᓗᑎᒃ ᐃᔾᔪᒃᓴᓕᐊᖑᓪᓗᑎᒃ ᐊᒻᒪᓗ ᐳᓪᓚᖅ ᐃᓗᓕᖃᖅᑐᑦ ᐃᒪᕐᒧᑦ ᐊᐅᓚᔪᓐᓇᐅᑎᓂᒃ ᐊᒻᒪ ᐊᓂᖅᑎᕆᔪᓐᓃᕐᓇᖅᑐᓂᒃ (ᐅᖅᓱᐊᓗᒃᓴᓕᐊᖑᔪᑦ: ᐅᖅᓱᐊᓗᒃᓴᓕᐊᖅ). ᐅᖅᓱᐊᓗᒃᓴᓕᐊᖑᔪᖅ ᐊᑐᖅᑕᐅᖃᑦᑕᖅᑐᖅ ᐅᖅᓱᐊᓗᒋᔭᐅᓪᓗᓂ ᑲᒪᒋᔭᐅᕙᓪᓕᐊᑎᓪᓗᒍ ᑲᔪᓯᕙᓪᓕᐊᓂᖏᑦ. ᐊᑕᖏᖢᒃᑖᑐᒧᑦ ᑐᕌᒐᖓ ᐱᓕᕆᐊᒃᓴᐅᑉ ᖃᐅᔨᓴᖅᑕᐅᖁᓪᓗᒋᑦ ᒥᑭᔫᑎᕈᓗᐃᑦ ᐅᖅᓱᖃᐅᑎᓄᑦ ᐱᓕᕆᔾᔪᓰᑦ (MAGS) ᖃᕆᓴᐅᔭᓕᕆᔾᔪᑏᑦ ᒪᓕᒃᖢᒋᑦ ᖃᓄᐃᓐᓂᖏᑦ, ᑮᓇᐅᔭᑎᒍᑦ ᐊᔪᕐᓇᙱᒻᒪᖔᑦ, ᐊᒻᒪᓗ ᐊᐅᓚᔪᓐᓇᕐᒪᖔᑦ ᐅᖓᓯᒃᑐᒥᑦ ᐅᑭᐅᖅᑕᖅᑐᒥᑦ ᓄᓇᓕᖕᓂᑦ.

ᖃᕆᓴᐅᔭᓕᕆᓂᕐᒧᑦ ᖃᐅᔨᓴᕈᑏᑦ

ᐃᒪᐃᒃᑲᓗᐊᖅᑎᓪᓗᒍ ᒥᑭᔫᑎᕈᓗᐃᑦ ᐅᖅᓱᖃᐅᑎᓄᑦ ᐱᓕᕆᔾᔪᓰᑦ (MAGS) ᓴᖅᑭᔮᖅᑎᑦᑎᓂᖏᑦ ᐊᐅᓚᓂᕐᒥᒃ ᑕᐃᑲᓂ ᐃᖃᓗᒃᑑᑦᑎᐊᒥᑦ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᓴᓇᔪᓕᕆᔨᒻᒪᕆᖕᒧᑦ ᒫᑦ ᕗᐊᓚᔅ ᖃᐅᔨᓴᖅᓯᒪᔪᑦ ᐊᔾᔨᒌᙱᑦᑐᓂᒃ ᓂᐅᕐᕈᑎᖃᕐᓂᕐᒧᑦ ᐊᑐᐃᓐᓇᐅᖕᒪᖔᑕ ᐊᒃᑕᑯᓂᑦ-ᐆᒻᒪᖅᑯᑎᙳᖅᑐᑦ ᖃᕆᓴᐅᔭᓕᕆᔾᔪᑏᑦ. ᑕᒪᓐᓇ ᐃᓚᐅᑎᑦᑎᔪᖅ ᐆᓇᖅᑐᑎᒍᑦ-ᐱᔭᐅᔪᑦ ᖃᕆᓴᐅᔭᕆᔾᔪᑏᑦ ᐊᒻᒪᓗᑦᑕᐅᖅ ᐋᖅᑭᒋᐊᕈᑎᒃᓴᑦ ᐋᖅᑭᖔᕋᓱᐊᕐᓗᒋᑦ ᐊᒃᑕᑯᐃᑦ ᑕᒪᒃᑯᓄᖓ ᐱᔭᐅᓯᒪᔭᕆᐊᖃᓪᓚᕆᒃᑐᓄᑦ ᓴᓇᓂᕐᒧᑦ ᓱᓇᒃᑯᑖᑦ ᐅᕝᕙᓘᓐᓃᑦ ᐊᖅᑯᑎᐅᑉ ᖄᖓᓄᒐᒃᓴᑦ-ᓱᓇᑐᐃᓐᓇᑦ ᐊᑭᓪᓗᐊᖏᓐᓂᒃ ᐊᑭᖃᖅᑐᑦ ᐅᖓᓯᒃᑐᓂᑦ ᐅᑭᐅᖅᑕᖅᑐᒥᑦ ᓄᓇᓕᖕᓂᑦ. ᐱᐊᓂᓚᐅᖅᑎᓪᓗᒋᑦ ᓇᓗᓇᐃᔭᑦᑎᐊᖅᓯᒪᔪᓂᒃ ᖃᐅᔨᓴᕈᑎᓂᒃ, ᕗᐊᓚᔅ ᐊᑐᓕᖁᔨᓚᐅᖅᑐᑦ ᐱᓇᓱᐊᖏᓐᓇᕐᓗᒋᑦ ᐊᔪᕐᓇᙱᑦᑐᑦ ᐃᑭᑎᑦᑎᓂᕐᒧᑦ ᐱᓕᕆᔾᔪᓯᕐᓂᒃ ᐆᓇᖅᑐᒧᑦ ᐅᑎᖅᑎᑕᐅᕙᒃᑐᑦ ᐱᒋᐊᕈᑕᐅᓗᑎᒃ ᑖᒃᑯᓄᓂ ᐅᖓᓯᒃᑐᓂᑦ ᓄᓇᓕᖕᓂᑦ ᐊᒃᑕᑯᓂᑦ-ᐆᒻᒪᖅᑯᑎᙳᖅᑐᓄᑦ ᐱᓕᕆᔾᔪᓯᕐᓄᑦ.

ᐃᑭᑎᑦᑎᓂᕐᒧᑦ ᐱᓕᕆᔾᔪᓰᑦ ᐆᓇᖅᑐᒥᒃ ᐊᑐᒃᑯᓐᓂᓕᖅᑎᑦᑎᓂᖅ

ᓴᓇᔭᐅᓪᓗᑎᒃ ᑖᒃᑯᓇᖓᑦ ᑕᐃᓈᒥᔅ (Dynamis) ᐋᒻᒪᖅᑯᓯᕆᔩᑦ, ᐆᓇᖅᑐᒧᑦ ᐊᑐᓕᒃᑲᓐᓂᖅᕈᑏᑦ ᐱᓕᕆᔾᔪᓰᑦ (TOS) ᐊᐅᓚᑕᐅᔪᓐᓇᓚᐅᖅᑐᑦ ᑖᒃᑯᓇᙵᑦ ᓄᐊᑦ ᒡᓘᑉ ᐳᕉ ᑕᐃᑲᓂ ᐅᒃᕿᒡᑯᖕᒥᑦ, ᐊᓛᔅᑲᒥᑦ. ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᐊᒻᒪᓗ ᕼᐋᒪᓚᒃᑯᑦ ᐃᖅᑲᓇᐅᔭᖅᑎᖏᑦ ᓂᐅᕐᕈᓚᐅᖅᑐᑦ ᐊᓛᔅᑲᒧᑦ ᕿᒥᕐᕈᔭᖅᑐᖅᖢᑎᒃ ᐆᓇᖅᑐᒧᑦ ᐊᑐᓕᒃᑲᓐᓂᖅᕈᑏᑦ ᐱᓕᕆᔾᔪᓯᕐᓂᒃ (TOS) ᐊᒻᒪᓗ ᑲᑎᒪᖃᑎᒋᓪᓗᒋᑦ ᑲᒻᐸᓂᐅᔪᖅ ᐊᒻᒪᓗ ᐳᕉᑯᓐᓂᑦ ᐃᖅᑲᓇᐃᔭᖅᑏᑦ. ᖃᐅᔨᓚᐅᖅᑐᑦ ᑕᒪᓐᓇ ᐱᓕᕆᔾᔪᓯᖅ ᓈᒻᒪᒐᔭᕐᓂᖓᓂᒃ ᐊᒃᑕᑯᓂᒃ ᐊᐅᓚᑦᑎᓇᓱᐊᕐᓂᕐᒧᑦ ᐊᑐᖅᑕᐅᔭᕆᐊᓕᖕᓄᑦ ᑕᐃᑲᓂ ᐃᖃᓗᒃᑑᑦᑎᐊᒥᑦ.

ᐃᒪᐃᒃᑲᓗᐊᖅᑎᓪᓗᒍ ᐃᓄᒋᖓᖕᓂᖏᑦ ᐅᑦᕿᐊᒡᕕᖕᒥᑦ ᒪᕐᕈᐊᖅᑎ ᐅᓄᕐᓂᖅᓴᐅᔪᑦ ᑕᐃᑲᖓᓂᑦ ᐃᖃᓗᒃᑑᑦᑎᐊᒥᑦ, ᐊᔾᔨᒌᐸᓘᒃ ᑖᒃᑯᐊ ᓄᓇᓖᒃ ᐃᑲᔪᖅᓯᕐᓂᖏᑦ ᐊᑐᕐᓂᕐᒧᑦ ᐆᓇᖅᑐᒧᑦ ᐊᑐᓕᒃᑲᓐᓂᖅᕈᑏᑦ ᐱᓕᕆᔾᔪᓯᕐᓂᒃ (TOS) ᓄᓇᕘᒥᑦ. ᐅᑦᕿᐊᒡᕕᒃ ᐅᑭᐅᖅᑕᖅᑐᒦᑦᑐᖅ ᐊᒻᒪᓗ ᐅᓄᕐᓂᖅᓴᐅᓪᓗᑎᒃ ᓄᓇᖃᖅᑳᖅᓯᒪᔪᑦ ᐃᓄᖏᑦ (ᓲᕐᓗ ᐅᖓᑖᓃᑦᑐᑦ 60 ᐳᓴᓐ ᐃᓄᖏᑦ ᐃᓄᒃᐱᐊᖑᔪᑦ). ᑕᐅᕙᓂᕐᒥᐅᑎᑐᑦ ᐃᖃᓗᒃᑑᑦᑎᐊᕐᒥᐅᑎᑐᑦ, ᐅᑦᕿᐊᒡᕕᒃ ᓄᓇᕐᔪᐊᑉ ᑲᔾᔨᖓᓂᑦ ᓄᓇᑦ ᐸᓂᖅᑑᔪᖅ ᓯᓚᖓ, ᑎᑭᑕᐅᕙᒃᑐᑦ ᐅᒥᐊᕐᔪᐊᒃᑯᑐᐊᐸᓗᒃ, ᐊᒻᒪᓗ ᑲᔪᓯᑎᑦᑎᓯᒪᔪᑦ ᓴᙱᔪᒥᒃ ᐃᓕᖅᑯᓯᑐᖃᕐᓂᕐᒥᒃ ᐊᖑᓇᓱᖕᓂᕐᒧᑦ ᓂᕿᓪᓚᑦᑖᓂᒃ. ᑕᒪᓐᓇ ᖃᓄᐃᓐᓂᖅᓴᐅᖕᒪᖔᑦ ᐃᑲᔪᖃᑦᑕᖅᑐᖅ ᑕᐅᔨᓴᖅᑕᐅᑎᓪᓗᒍ ᐱᓕᕆᔾᔪᓯᖅ ᑎᑭᐅᒪᖕᒪᖔᑦ ᐱᔭᐅᔪᒪᔪᓂᑦ ᐃᖃᓗᒃᑑᑦᑎᐊᕐᒥᐅᓄᑦ ᓲᖃᐃᒻᒪ ᐅᑦᕿᐊᒡᕕᒃ ᐊᒻᒪᓗ ᐃᖃᓗᒃᑑᑦᑦᐊᖅ ᐊᔾᔨᒌᐸᓗᖕᓂᒃ ᐊᒃᑕᑯᖃᖅᐸᒃᑐᑦ.

ᐆᓇᖅᑐᒧᑦ ᐊᑐᓕᒃᑲᓐᓂᖅᕈᑏᑦ ᐱᓕᕆᔾᔪᓯᕐᓂᒃ (TOS) ᑕᐃᑲᓂ ᐅᑦᕿᐊᒡᕕᖕᒥᑦ ᐃᓄᐃᓴᒃᖠᒋᐊᕆᕐᔪᐊᖅᓯᒪᔪᑦ ᐊᒃᑕᑯᓂᑦ ᐊᒃᑕᕐᕕᖕᒧᐊᖅᐸᓪᓕᐊᔪᓂᒃ. ᓴᖅᑮᖃᑦᑕᖅᑐᑦ ᓴᓗᒪᓂᖅᓴᓂᒃ ᐊᓂᐊᑎᑦᑎᓂᕐᓂᒃ ᐊᒻᒪᓗ ᓱᕈᖅᓴᐃᙱᓐᓂᖅᓴᒥᒃ ᐊᕐᔭᖑᖅᑎᑦᑎᕙᒃᖢᓂ. ᐃᒪᐃᙱᑦᑐᖅ, ᑭᓯᐊᓂᓕ, ᐊᑐᖅᖢᑎᒃ ᐊᑕᖏᖅᑐᒥᒃ ᐆᓐᓇᕐᓂᕐᒥᒃ ᐅᕝᕙᓘᓐᓃᑦ ᐅᖅᓱᐊᓗᒃᓴᓕᖓᖑᔪᑦ, ᐃᓄᐃᓴᒃᖠᒋᐊᕆᔪᖅ ᐊᑕᖏᓗᒃᑖᖅᖢᒋᑦ ᑮᓇᐅᔭᑎᒍᑦ ᐊᔪᕐᓇᖏᓐᓂᖓᓂᒃ ᐱᓕᕆᔾᔪᓯᐅᔪᒥᑦ. ᕼᐋᒪᓚᖏᑦ ᐃᖃᓗᒃᑑᑦᑎᐊᑉ ᕿᓂᖅᑐᑦ ᑮᓇᐅᔭᖃᖅᑎᑕᐅᔾᔪᑎᓂᒃ ᐋᖅᑭᒃᓱᐃᔾᔪᑎᒃᓴᓂᒃ ᐆᓇᖅᑐᒧᑦ ᐊᑐᓕᒃᑲᓐᓂᖅᕈᑏᑦ ᐱᓕᕆᔾᔪᓯᕐᓂᒃ (TOS) ᐊᒻᒪᓗ ᐊᑐᕈᒪᔪᑦ ᐊᒃᑕᑯᐃᑦ ᐆᓇᕐᓂᖏᓐᓂᒃ ᐊᑐᖅᑕᐅᓗᑎᒡᓘᓐᓃᑦ ᐊᔾᔨᐅᙱᑦᑐᑎᒍᑦ ᐅᖅᑰᓴᐅᑕᐅᓗᑎᒃ ᐅᕝᕙᓘᓐᓃᑦ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓄᑦ. ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᐊᒻᒪᓗ ᕼᐋᒪᓚᒃᑯᑦ ᐱᔪᒥᒍᓱᒃᑐᐃᓐᓈᒃ ᐊᑐᖅᑕᐅᓕᑐᐃᓐᓇᕆᐊᖃᕐᓂᖓᓂᒃ ᐅᖅᓱᐊᓗᒃᓴᓕᖓᖑᔪᑦ ᐆᒪᖅᑯᑎᖃᕐᓂᕐᒧᑦ.

ᐊᑐᖅᓯᒪᔪᖅ ᐃᒥᖅ ᓴᓗᒻᒪᖅᓴᖅᑕᐅᓂ

ᖃᓄᖅ ᐱᐅᓯᒋᐊᕈᓐᓇᖅᐸᕗᑦ ᐃᒥᖅ ᓴᓗᒻᒪᖅᓴᐅᑕᐅᔪᖅ ᐊᐅᓚᑕᐅᓇᓱᐊᖅᑎᓪᓗᒍ ᐅᖓᓯᒃᑐᓂᑦ ᓄᓇᓕᖕᓂᑦ?

ᐱᓪᓚᕆᐅᔪᑦ ᐅᖃᐅᓯᒃᓴᐃᑦ

• ᐊᑐᖅᑕᐅᓪᓗᑎᒃ ᖃᐅᔨᓴᕐᓂᕐᒧᑦ ᐱᐅᓯᒋᐊᕈᑕᐅᖁᓪᓗᒍ ᐃᒥᖅ ᐊᒻᒪᓗ ᐊᑐᖅᓯᒪᔪᖅ ᐃᒥᖅ ᓴᓗᒻᒪᖅᓴᖅᑕᐅᓂᖓᓄᑦ ᐊᐅᓚᑦᑎᔾᔪᑏᑦ ᓯᕗᓪᓕᐅᑎᔭᐅᓯᒪ- ᕐᔪᐊᕋᓱᐊᖅᑐᑦ ᑖᒃᑯᓇᓂ ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᐅᑭᐅᖅᑕᖅᑐᒥᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᐱᓕᕆᖃᑎᒌᓂᑦ.
• ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᓯᕗᒃᑲᖅᑕᖅᓯᒪᔪᑦ ᐊᒻᒪᓗ ᐃᑲᔪᖅᓯᓯᒪᓪᓗᓂ ᐊᒥᓱᒐᓚᖕᓂᒃ ᖃᐅᔨᓴᕈᑎᓂᒃ ᑐᑭᓯᑦᑎᐊᕈᒪᓪᓗᑎᒃ ᐊᑑᑎᖃᕐᓂᖏᑦ ᒫᓐᓇ ᐃᒥᖅ ᓴᓗᒻᒪᖅᑕᖅᓴᑕᐅᓯᒪᔪᕐᒧᑦ ᐊᑐᖅᑕᐅᒐᔪᒃᑐᑦ ᖃᐅᔨᓴᖅᓯᓪᓗᑎᒡᓗ ᖃᕆᓴᐅᔭᓕᕆᔾᔪᑎᓂᒃ ᐊᑐᖅᑕᐅᔪᓂᒃ ᐅᑭᐅᖅᑕᖅᑐᒥᑦ ᐊᒻᒪᓗ ᐅᑭᐅᖅᑕᖅᑐᒥᑦ ᓄᓇᓕᖕᓂᑦ.
• ᐅᐊᓴᐅᑕᐅᔪᖅ ᐃᒥᖅ ᐊᒻᒪᓗ ᖁᕐᕕᖕᓂᖔᖅᑐᑦ ᐃᒥᖅ. ᐊᑐᖅᑕᐅᔪᖅ ᐃᒥᖅ ᐅᕕᓂᖕᓂᐊᕐᓂᕐᒧᑦ ᐊᒻᒪᓗ ᐊᓐᓄᕌᓂᒃ ᐅᐊᓴᐃᓂᕐᒧᑦ ᖃᐅᔨᒪᔭᐅᔪᖅ ᐅᐊᓴᐅᑕᐅᔪᖅ ᐃᒥᖅ. ᓱᕉᙱᓐᓂᖅᓴᐅᔪᖅ ᑖᒃᑯᓇᖓᑦ ᖁᕐᕕᖕᓂᖔᖅᑐᑦ ᐃᒥᕐᒥᑦ (ᑭᓈᓗ- ᖃᐅᑏᑦ), ᐃᓚᐅᑎᑦᑎᓪᓗᑎᒡᓗ ᐃᒥᖅ ᐊᑐᖅᓯᒪᔪᖅ ᖁᕐᕕᖕᓂᖔᖅᑐᑦ, ᓂᖅᖠᐅᕐᕕᖕᓂᑦ ᐅᐊᓴᕐᕕᖕᓂᑦ, ᐊᒻᒪᓗ ᓂᕐᕆᓯᓄᑦ ᐅᐊᓴᕈᑎᓂᑦ. ᐊᒥᓱᓂᑦ ᓄᓇᓂᑦ ᐊᕕᒃᑐᖅᓯᒪᔪᓂᑦ ᓄᓇᕐᔪᐊᒥᑦ ᐃᒪᐃᑦᑐᓄᑦ ᐃᒥᖅ ᐊᖏᔫᓗᐊᖅᑎᓐᓇᒍ, ᐃᓄᐃᑦ ᐊᑐᒃᑯᓐᓂᖃᑦᑕᖅᑐᑦ ᐅᐊᓴᐅᑕᐅᔪᒥᒃ ᐃᒥᕐᒥᒃ ᖁᕐᕕᖕᓄᑦ ᑯᕕᑎᑦᑎᔾᔪᑕᐅᓪᓗᑎᒃ, ᐱᕈᖅᓯᐊᓄᑦ ᐃᒥᕆᔭᐅᓪᓗᓂ, ᐊᓐᓄᕌᓂᒃ ᐅᐊᓴᐃᓂᐃᒧᑦ, ᐊᒻᒪᓗ ᓴᓗᒻᒪᖅᓴᐃᓂᕐᒧᑦ.

ᐱᓕᕆᐊᒃᓴᐅᔪᓄᑦ ᓯᕗᓕᖅᑎ

ᕌᑉ ᑯᒃ, ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR), info@polar.gc.ca

ᐊᑐᖅᓯᒪᔪᖅ ᐃᒥᖅ ᓴᓗᒻᒪᖅᓴᖅᑕᐅᓂᖓᓄᑦ ᐊᐅᓚᑕᐅᓂᖓ

ᐊᒥᓱᑦ ᓄᓇᓖᑦ ᑕᑎᖃᕐᒪᑕ ᐃᒥᖅᑕᖅᑕᐅᕙᒃᖢᑎᒃ ᐃᒪᐃᑦᑐᒃᑯᑦ ᐊᑐᖅᓯᒪᔪᖅ ᐃᒥᖅ ᓴᓗᒻᒪᖅᓴᖅᑕᐅᓂᖓᓄᑦ ᑲᑎᑕᐅᕙᓪᓕᐊᔪᑦ, ᐊᑲᐅᙱᖢᓂ ᐊᑭᑐᓪᓗᓂᓗ. ᓄᓇᓯᐅᑎᒃᑯᑦ ᐃᒥᖅᑕᖅᑕᐅᖃᑦᑕᕐᓂᖅ ᐃᓚᓕᐅᔾᔨᖕᒪᑦ ᐊᓂᖅᓵᖅᐸᒃᑕᑦᑎᓐᓂᒃ ᓱᕈᖅᓴᐃᓪᓗᓂ ᐊᑐᖅᖢᑎᒃ ᐳᔪᕋᕐᓂᒃ ᐊᒻᒪᓗ ᐅᓄᖅᓯᒋᐊᕆᕙᓪᓕᐊᓪᓗᓂ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖓᓄᑦ ᑖᒃᑯᓇᖓᑦ ᐃᖏᕐᕋᔾᔪᑎᓂᑦ ᐊᓂᐊᔪᓂᑦ.

ᑖᒃᑯᓇᓂ ᓄᓇᓕᖕᓂᑦ, ᖁᕐᕕᖕᓂᖔᖅᑐᑦ ᐃᒥᖅ ᐊᒻᒪᓗ ᐅᐊᓴᐅᑕᐅᔪᖅ ᐃᒥᖅ ᐃᓘᓂᑦ ᐊᒻᒪᓗ ᓇᖕᒥᓂᖃᖅᑎᐅᔪᓂᑦ ᑲᑎᑕᐅᕙᒃᑐᑦ ᑭᓈᓗᖃᐅᑎᖃᕐᕕᖕᓄᑦ, ᒥᓗᒃᑕᐅᕙᒃᖢᑎᒃ ᓄᓇᓯᐅᑎᕐᔪᐊᓄᑦ, ᐊᒻᒪᓗ ᑯᕕᔭᐅᕙᒃᖢᑎᒃ ᑭᓈᓗᖃᕐᕕᖕᓄᑦ. ᐊᑯᓂᐅᔪᒃᑯᑦ, ᑭᓈᓗᖃᐅᑏᑦ ᐊᑐᖅᑕᐅᖃᑦᑕᖅᑐᑦ ᐊᑐᖅᓯᒪᔪᓂᒃ ᐅᑑᑎᖃᑦᑎᐊᖅᑐᒃᑯᑦ ᑭᓯᐊᓂᓕ ᓴᕈᐃᑐᐃᓐᓇᕆᐊᖃᕐᔪᐊᖅᑐᑦ, ᓄᓇᓕᖕᓂᑦ ᑰᒃᐸᒃᑐᓂᒃ, ᐊᒻᒪᓗ ᓂᕿᖁᑎᒋᔭᐅᔪᓂᒃ. ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᐃᑲᔪᖅᓯᖅᓯᓯᒪᔪᑦ ᓯᓚᑦᑐᖅᓴᕐᕕᒡᔪᐊᖓᓂᒃ ᕗᐃᓂᐲᒡ ᖃᐅᔨᓴᕈᑎᖏᓐᓂᒃ ᓇᓗᓇᐃᔭᐃᓇᓱᐊᖅᑎᓪᓗᒋᑦ ᐊᖏᓂᖓᓂᒃ ᓱᕈᐃᓂᕐᒧᑦ ᖃᓂᒋᔭᖓᓂᑦ ᐅᖓᓯᒃᑐᑦ ᓄᓇᓖᑦ ᑐᑭᓯᔭᐅᑦᑎᐊᒃᑲᓐᓂᖁᓪᓗᒍ ᐊᑑᑎᖃᕐᓂᖓ ᑭᓈᓗᖃᐅᑎᖃᕐᕖᑦ ᐊᒻᒪᓗ ᐊᒃᑐᐃᓂᐅᑐᐃᓐᓇᕆᐊᓖᑦ ᓴᓗᒻᒪᖅᓴᖅᓯᒪᔪᑦ ᐃᒦᑦ ᑰᓕᕋᔭᕈᑎᒃ ᐊᕙᑎᒧᑦ ᐊᒻᒪᓗ ᓂᕿᖁᑎᒋᔭᐅᔪᓄᑦ.

ᐅᐊᓴᐅᑕᐅᔪᖅ ᐃᒥᕐᒥᒃ ᓴᓗᒻᒪᖅᓴᐃᓂᖅ

ᑲᒪᔪᒪᓪᓗᑎᒃ ᑕᒪᒃᑯᓂᖓ ᐊᑲᐅᙱᓕᐅᕈᑎᓂᒃ ᐱᒋᐊᕐᕕᖏᓪᓕᒃ ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᖃᐅᔨᓴᖅᑐᑦ ᐃᒥᕐᒥᒃ ᐱᐅᖅᓱᐊᕐᓂᕐᒥᒃ ᐊᑐᕐᓗᑎᒃ ᐅᐊᓴᐅᑕᐅᔪᖅ ᐃᒥᕐᒧᑦ ᐊᒻᒪᓗ ᖁᕐᕕᖕᓂᖔᖅᑐᑦ ᐃᒥᕐᒧᑦ ᓴᓗᒻᒪᖅᓴᐃᔾᔪᑎᓂᒃ ᐱᓕᕆᔾᔪᑎᓂᒃ.

2018-ᒥᑦ, ᑮᓇᐅᔭᖃᖅᑎᑕᐅᓪᓗᑎᒃ ᑖᒃᑯᓇᙵᑦ ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR), ᑎᐅᕋᒡᒐᓐ (Terragon) ᐊᕙᑎᓕᕆᔨᒃᑯᑦ ᐱᓕᕆᔾᔪᑎᓄᑦ ᐃᖕᑯᐊᐳᕇᑎᑦ ᐋᖅᑭᒃᓯᓚᐅᖅᑐᑦ ᐅᐊᓴᐅᑕᐅᔪᖅ ᐃᒥᕐᒧᑦ ᓴᓗᒻᒪᖅᓴᐃᔾᔪᑎᒥᒃ ᐱᓕᕆᔾᔪᑎᓂᒃ ᖃᐅᔨᒪᔭᐅᔪᖅ ᕗᐊᑦ-ᔩ (WETT-G) ᑕᐃᑲᓂ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᕐᕕᖕᒥᑦ (CHARS) ᐃᓕᓐᓂᐊᕐᕕᖓᓂᑦ ᑕᐃᑲᓂ ᐃᖃᓗᒃᑑᑦᑎᐊᒥᑦ.

ᑕᒪᓐᓇ ᐅᐊᓴᐅᑕᐅᔪᖅ ᐃᒥᕐᒧᑦ ᐱᓕᕆᔾᔪᓯᖅ ᑐᖓᕕᖃᖅᖢᓂ ᖃᕆᑕᐅᔭᒃᑰᖅᑐᑎᒍᑦ ᐆᒻᒪᖅᑐᑎᖑᕈᓐᓇᖅᑐᑦ ᐱᓕᕆᔾᔪᑎ, ᐱᑕᖃᕆᐊᖃᖅᑎᑦᑎᙱᑦᑐᑦ ᐃᓚᓯᓗᑎᒃ ᐅᕕᓂᖕᒧᑦ ᐆᓐᓇᖅᑐᓂᒃ ᐅᕝᕙᓘᓐᓃᑦ ᑲᒪᒋᔭᐅᔭᕆᐊᖃᕐᔪᐊᖅᑐᑎᒍᑦ ᑲᔪᓯᓂᖃᖅᑐᑦ. ᐱᐅᓂᖓ ᓴᓗᒻᒪᖅᓴᖅᑕᐅᓯᒪᔫᑉ ᐅᐊᓴᐅᑕᐅᔫᑉ ᐃᒥᐅᑉ ᖃᓄᐃᓐᓂᖅᓴᐅᖕᒪᖔᑦ ᓴᓗᒻᒪᖅᓴᖅᑕᐅᓯᒪᔪᑦᖅ ᕼᐋᒪᓚᒃᑯᑦ ᐃᒥᖓᓄᑦ, ᐊᒻᒪᓗ ᐊᑭᖓ ᓴᓗᒻᒪᖅᓴᐃᔾᔪᑎᓄᑦ ᐊᑭᑭᓐᓂᖅᓴᕐᔪᐊᖑᓚᐅᖅᑐᑦ ᑖᒃᑯᓇᖓᑦ ᕼᐋᒪᓚᒃᑯᑦ ᐃᒥᖏᑦᑕ ᐊᑭᖏᓐᓂᒃ. ᑕᒪᓐᓇ ᐱᓕᕆᐊᒃᓴᐅᔪᖅ ᓴᖅᑭᔮᖅᑎᑦᑎᔪᖅ ᑮᓇᐅᔭᑎᒍᑦ ᐊᔪᕐᓇᙱᓐᓂᖓᓂᒃ ᐊᒻᒪᓗ ᐱᕚᓪᓕᕈᑎᒃᓴᐃᑦ ᐊᑐᒃᑲᓐᓂᕐᓂᕐᒥᒃ ᐃᒥᕐᒥᒃ ᐊᑐᖅᑕᐅᓪᓗᑎᒃ ᐅᐊᓴᐅᑕᐅᔪᑦ ᐃᒦᑦ.

ᖁᕐᕕᖕᓂᖔᖅᑐᑦ ᐃᒥᕐᒧᑦ ᓴᓗᒻᒪᖅᓴᐅᑎ: ᑕᖏᖃᖅᑐᓂᖔᖅᑐᑦ ᐆᒪᖅᑯᑎᒃᓴᓄᑦ ᓱᕋᐃᔭᕙᓪᓕᐊᓂᖅ ᑭᓈᓗᖕᓄᑦ ᓴᓗᒻᒪᖅᓴᐃᔾᔪᑎ (BeAST)

ᑖᒃᑯᐊ ᑲᓇᑕᓗᒃᑖᒥᑦ ᖃᐅᔨᓴᕐᓂᕐᒧᑦ ᑲᑎᒪᔩᑦ (NCR) ᐱᕙᓪᓕᐊᑎᑦᑎᓯᒪᔪᑦ ᑭᓈᓗᖃᐅᑎᓄᑦ ᓴᓗᒻᒪᖅᓴᐃᔾᔪᑎᓂᒃ ᐱᓕᕆᔾᔪᑎᓂᒃ ᑐᕌᒐᖃᖅᑐᑦ ᖁᕐᑯᖕᓂᖔᖅᑐᑦ ᐃᒦᑦ ᑯᕕᔭᐅᖅᑳᖅᑎᓐᓇᒍ ᑭᓈᓗᖃᕐᕕᖕᒧᑦ. ᑖᒃᑯᐊ ᑕᖏᖃᖅᑐᓂᖔᖅᑐᑦ ᐆᒪᖅᑯᑎᒃᓴᓄᑦ ᓱᕋᐃᔭᕙᓪᓕᐊᓂᖅ ᑭᓈᓗᖕᓄᑦ ᓴᓗᒻᒪᖅᓴᐃᔾᔪᑎ (BeAST) ᐱᓕᕆᔾᔪᓰᑦ ᐊᑐᖃᑦᑕᖅᑐᖅ ᑯᒪᖁᕐᓂᒃ ᓴᕋᐅᔭᐃᔪᓂᒃ ᐊᒃᑕᑯᓂᑦ ᓱᒃᑲᐃᑦᑐᒃᑯᑦ ᐱᓕᕆᔾᔪᓯᖅᑎᒍᑦ. ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᐱᓕᕆᖃᑎᖃᖅᖢᑎᒃ ᑖᒃᑯᓂᖓ ᑲᓇᑕᓗᒃᑖᒥᑦ ᖃᐅᔨᓴᕐᓂᕐᒧᑦ ᑲᑎᒪᔨᓂᑦ (NCR) ᖃᐅᔨᓴᖁᓪᓗᒋᑦ ᓂᐅᕐᕈᑕᐅᖃᑦᑕᓕᓚᐅᙱᓐᓂᖏᓐᓂᒃ ᐱᓕᕆᔾᔪᑏᑦ ᑕᐃᑲᓂ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᕐᕕᐅᑉ (CHARS) ᐃᓕᓐᓂᐊᕐᕕᖓᓂᑦ.

ᑭᓈᓗᖃᐅᑎᓂᑦ ᖃᐅᔨᓴᒐᒃᓴᑦ ᓇᒃᓯᐅᔾᔭᐅᓚᐅᖅᑐᑦ ᑕᐃᑲᙵᑦ ᐃᖃᓗᒃᑑᑦᑎᐊᒥᑦ ᑲᓇᑕᓗᒃᑖᒥᑦ ᖃᐅᔨᓴᕐᓂᕐᒧᑦ ᑲᑎᒪᔩᑦ (NCR) ᖃᐃᔨᓴᕐᕕᖏᓐᓄᑦ ᑕᐃᑲᓂ ᑯᐸᐃᒃᒥᑦ. ᖃᐅᔨᓴᖅᑏᑦ ᖃᐅᔨᓴᓚᐅᖅᑐᑦ ᑲᐅᔨᓴᒐᒃᓴᓂᒃ ᐊᒻᒪᓗ ᐋᖅᑭᒋᐊᖅᖢᒍ ᑕᖏᖃᖅᑐᓂᖔᖅᑐᑦ ᐆᒪᖅᑯᑎᒃᓴᓄᑦ ᓱᕋᐃᔭᕙᓪᓕᐊᓂᖅ ᑭᓈᓗᖕᓄᑦ ᓴᓗᒻᒪᖅᓴᐃᔾᔪᑎ (BeAST) ᖃᓄᐃᓕᒋᐊᕈᑎᖏᑦ, ᐋᖅᑭᒃᑕᐅᓕᓚᐅᖅᖢᓂᓗ ᑕᐃᑲᓂ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᕐᕕᖕᒥᑦ (CHARS). 30-ᓖᑕᑦ ᑕᖏᖃᖅᑐᓂᖔᖅᑐᑦ ᐆᒪᖅᑯᑎᒃᓴᓄᑦ ᓱᕋᐃᔭᕙᓪᓕᐊᓂᖅ ᑭᓈᓗᖕᓄᑦ ᓴᓗᒻᒪᖅᓴᐃᔾᔪᑎ (BeAST) ᖃᓄᐃᓕᒋᐊᕈᑎᖏᑦ ᑕᐃᑲᓂ ᑲᓇᑕᒥᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᕐᕕᖕᒥᑦ (CHARS) ᐃᖏᕐᕋᓂᐊᖅᑐᑦ 12-ᑦ ᑕᖅᑭᐸᓗᖕᓄᑦ.

ᐱᒋᐊᕈᑕᐅᔪᑦ ᖃᐅᔨᓴᖅᑕᐅᔪᑦ ᓴᖅᑭᔮᖅᑎᑦᑎᔪᑦ ᑖᒃᑯᐊ ᐊᑐᖅᖢᑎᒃ ᑕᖏᖃᖅᑐᓂᖔᖅᑐᑦ ᐆᒪᖅᑯᑎᒃᓴᓄᑦ ᓱᕋᐃᔭᕙᓪᓕᐊᓂᖅ ᑭᓈᓗᖕᓄᑦ ᓴᓗᒻᒪᖅᓴᐃᔾᔪᑎ (BeAST) ᓴᓗᒪᓂᖅᓴᓂᒃ ᐊᑐᖅᓯᒪᔪᖅ ᐃᒥᖅ ᑯᕕᔭᐅᔪᓐᓇᖁᓪᓗᒍ ᑭᓈᓗᖃᐅᑎᒃᑯᕕᖕᒧᑦ. ᖃᐅᓴᒃᑲᓐᓂᕈᑏᑦ ᐱᐊᓂᒃᑕᐅᑦᑎᐊᖅᐸᑕ, ᑲᓇᑕᓗᒃᑖᒥᑦ ᖃᐅᔨᓴᕐᓂᕐᒧᑦ ᑲᑎᒪᔩᑦ (NCR) ᐊᒻᒪᓗ ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR) ᐱᓕᕆᖃᑎᒌᖕᓂᐊᖅᑐᑦ ᐱᕙᓪᓕᐊᑎᑦᑎᓗᑎᒃ ᐊᒻᒪᓗ ᐋᖅᑭᒃᓯᓗᑎᒃ ᐊᖏᓂᖅᓴᒥᒃ ᖃᓄᐃᓕᒋᐊᕈᑎᓂᒃ ᑕᕿᑲᓂ ᐃᒡᓗᖃᖅᑎᓄᑦ ᐃᖃᓗᒃᑑᑎᐊᒥᑦ.

ᕿᑎᕐᒥᐅᓂᑦ ᖃᕝᕕᒑᕐᔪᑦ ᖃᐅᔨᓴᐅᓐᓇᖅᑕᐅᔪᑦ - ᑎᑭᑉᐸᙱᑦᑐᑦ ᐊᒻᒪᓗ ᓄᓇᓕᖕᓕᑦ-ᑐᙵᕕᓖᑦ ᐱᓕᕆᐊᖑᕙᓪᓕᐊᔪᒪᔪᑦ

ᖃᔅᓰᑦ ᖃᕝᕕᒑᕐᔪᑦ ᑕᐅᕙᓃᑉᐸᑦ ᕿᑎᕐᒥᐅᓂᑦ?

ᐱᓪᓚᕆᐅᔪᑦ ᐅᖃᐅᓯᒃᓴᐃᑦ

• ᖃᕝᕕᒑᕐᔪᑦ ᑕᐅᕙᓂ ᐱᑕᖃᖅᑐᑦ ᐅᓄᓗᐊᙱᖢᑎᒃ ᐊᒻᒪᓗ ᑕᑯᔭᐅᖃᑦᑕᕐᓂᖅᓴᐅᕙᓪᓕᐊᓕᖅᑐᑦ ᐃᓄᖕᓄᑦ ᐱᓕᕆᑎᓪᓗᒋᑦ.
• ᖃᐅᔨᒪᓗᑎᒃ ᐱᑕᖃᕐᕕᐅᓂᖏᑦ ᖃᕝᕕᒑᕐᔪᐃᑦ ᐅᓄᕐᓂᖏᑦ ᓄᓇᖓᓂᑦ ᑐᑭᓯᑎᑦᑎᔪᓐᓇᖅᑐᑦ ᓯᕗᓂᒃᓴᒥᑦ ᐊᑯᓂᐅᔪᒃᑯᑦ ᐊᖑᓇᓱᖕᓂᕐᒧᑦ ᑭᒡᓕᐅᔪᓂᒃ ᐊᒻᒪᓗ ᐃᑲᔪᕈᓐᓇᖅᖢᓂ ᑐᓴᖅᑎᑦᑎᓗᑎᒃ ᐊᒃᑐᐃᓂᕐᒧᑦ ᕿᒥᕐᕈᔭᐅᓂᕐᒧᑦ ᑲᔪᓯᓂᐅᔪᓂᑦ. ᑕᒪᓐᓇ ᑐᓴᐅᒪᔾᔪᑎ ᐃᑲᔪᕐᓂᐊᕐᒥᔪᖅ ᑐᑭᓯᑎᑦᑎᓗᓂ ᓂᕿᑐᖅᑏᑦ ᖃᐅᔨᓴᖅᑕᐅᑎᓪᓗᒋᑦ ᑐᒃᑐᓂᒃ ᐊᐅᓚᑦᑎᓂᕐᒧᑦ.
• ᑕᒪᓐᓇ ᐱᓕᕆᖃᑎᒌᖕᓂᖅ ᖃᐅᔨᓴᕐᓂᕐᒧᑦ ᐱᓕᕆᐊᒃᓴᖅ ᑖᒃᑯᓇᓂ ᒐᕙᒪᖏᓐᓂᑦ ᓄᓇᕘᑉ ᐊᒻᒪᓗ ᖁᕐᓗᖅᑑᖅ ᐊᖑᓇᓱᒃᑐᓕᕆᔨᒃᑯᑦ ᐊᒻᒪᓗ ᒥᑭᒋᐊᕐᓂᐊᖅᑏᑦ ᑎᒥᖁᑖ ᐊᑐᐃᓐᓇᕈᐃᓯᒪᔪᑦ ᐱᒻᒪᕆᐅᔪᓂᒃ ᐃᓕᓐᓂᐊᒐᒃᓴᓂᒃ ᐊᒻᒪᓗ ᐃᖅᑲᓇᐃᔮᓂᒃ ᑖᒃᑯᓄᖓ ᐊᖑᓇᓱᒃᑐᓕᕆᔨᒃᑯᑦ ᐊᒻᒪᓗ ᒥᑭᒋᐊᕐᓂᐊᖅᑏᑦ ᑎᒥᖁᑖᓄᑦ ᐃᓚᒋᔭᐅᔪᓄᑦ. ᓴᖅᑭᔮᖅᑎᑦᑎᖕᒥᔪᖅ ᐊᑑᑎᖃᑦᑎᐊᕐᓂᖓᓂᒃ ᐱᓕᕆᖃᑎᒌᖕᓃᑦ ᖃᐅᔨᓴᕐᓂᕐᒧᑦ ᐱᓕᕆᐊᒃᓴᐅᔪᓂᒃ ᑐᑭᓯᐅᒪᑎᑦᑎᖁᓪᓗᒋᑦ ᓂᕐᔪᑎᓂᒃ ᐊᐅᓚᑦᑎᓂᕐᒧᑦ.

ᐱᓕᕆᐊᒃᓴᐅᔪᓄᑦ ᓯᕗᓕᖅᑎ

ᒪᓕᒃ ᐊᕙᓐ, ᓴᓇᕝᕕᖓ ᐊᕙᑎᓕᕆᔨᒃᑯᑦ, ᒐᕙᒪᖏᑦ ᓄᓇᕗᑦ, mawan@gov.nu.ca

ᐱᓕᕆᖃᑎᒌᑦ/ᓇᓗᓇᐃᖅᑕᐅᔪᑦ

ᖁᕐᓗᖅᑐᖅ ᐊᑯᓂᐊᑎᑦ, ᐊᖑᓇᓱᒃᑐᓕᕆᔨᒃᑯᑦ ᐊᒻᒪᓗ ᒥᑭᒋᐊᕐᓂᐊᖅᑏᑦ ᑎᒥᖁᑖ, ᓄᓇᓕᕆᓂᕐᒧᑦ ᐃᓚᒌᑦ: ᒪᓕᒃ ᐊᕙᓐ, ᒐᕙᒪᖏᑦ ᓄᓇᕘᑉ ᓴᓇᕝᕕᖓ ᐊᕙᑎᓕᕆᔨᒃᑯᑦ; ᐆᔭᐃ (OJ) ᐴᓐᕼᐊᐅᑦ, ᖁᕐᓗᖅᑑᖅ ᐊᖑᓇᓱᒃᑐᓕᕆᔨᒃᑯᑦ ᐊᒻᒪᓗ ᒥᑭᒋᐊᕐᓂᐊᖅᑏᑦ ᑎᒥᖁᑖ (HTO) ᐃᓚᒋᔭᐅᔪᖅ, ᐱᐅᕆ ᒃᓚᖕᓇᓐᐴᒡ, ᖁᕐᓗᖅᑑᖅ ᐊᖑᓇᓱᒃᑐᓕᕆᔨᒃᑯᑦ ᐊᒻᒪᓗ ᒥᑭᒋᐊᕐᓂᐊᖅᑏᑦ ᑎᒥᖁᑖ (HTO) ᐃᓚᒋᔭᐅᔪᖅ ᔮᓇᑕᓐ ᓂᑉᑕᓇᑎᐊᒃ ᖁᕐᓗᖅᑑᖅ ᐊᖑᓇᓱᒃᑐᓕᕆᔨᒃᑯᑦ ᐊᒻᒪᓗ ᒥᑭᒋᐊᕐᓂᐊᖅᑏᑦ ᑎᒥᖁᑖ (HTO) ᐃᓚᒋᔭᐅᔪᖅ, ᑮᓇᐅᔭᖃᖅᑎᑦᑎᔩᑦ: ᒐᕙᒪᖏᑦ ᓄᓇᕘᑉ, ᓴᓇᕝᕕᖓ ᐊᕙᑎᓕᕆᔨᒃᑯᑦ; ᓄᓇᕘᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ (NWMB), ᓄᓇᕐᔪᐊᑉ ᑲᔾᔨᖓᓂᑦ ᖃᐅᔨᒪᔨᑕᓂᒃ ᑲᓇᑕᒥᑦ (POLAR)

ᐱᓕᕆᐊᒧᑦ ᓇᐃᓈᖅᓯᒪᔪᖅ

ᑕᐃᑲᓂ 2018 ᐊᒻᒪᓗ 2019, ᒐᕙᒪᖏᑦ ᓄᓇᕘᑉ ᐆᒪᔪᓕᕆᔨᖏᑦ ᐱᓕᕆᖃᑎᖃᓚᐅᓯᖅᑐᑦ ᖁᕐᓗᖅᑑᖅ ᐊᖑᓂᐊᑏᑦ ᑎᒥᖁᑖᓂᒃ (ᖁᕐᓗᖅᑑᑉ ᐊᖑᓇᓱᒃᑐᓕᕆᔨᒃᑯᑦ ᐊᒻᒪᓗ ᒥᑭᒋᐊᕐᓂᐊᖅᑏᑦ ᑎᒥᖁᑖ), ᒥᒃᓴᐅᓴᐃᓪᓗᑎᒃ ᐱᑕᖃᕐᓂᖏᓐᓂᒃ ᓄᓇᖓᓂᑦ ᖃᕐᕕᒑᕐᔪᐃᑦ ᐅᓄᕐᓂᖏᑦ. ᑕᒪᓐᓇ ᐱᓕᕆᐊᒃᓴᖅ ᐃᑲᔪᖅᓯᓚᐅᖅᑐᖅ ᐊᑯᓂᐅᔪᒃᑯᑦ ᓄᓇᐃᑦ ᐊᕕᒃᑐᖅᓯᒪᔪᓂᑦ ᖃᐅᔨᓴᐃᓐᓇᕐᓂᕐᒧᑦ ᐋᖅᑭᒃᓯᓗᑎᒃ ᐱᒋᐊᕈᑕᐅᔪᓂᒃ ᖃᔨᐅᓴᕐᓂᕐᒧᑦ ᑐᓴᐅᒪᔾᔪᑎᓂᒃ ᐊᒥᓱᒐᓚᖕᓄᑦ ᐊᒻᒪᓗ ᐱᑕᖃᕐᓂᖏᑦ ᖃᕝᕕᒑᕐᔪᐃᑦ ᑕᐅᕙᓂ ᓄᓇᖓᓂᑦ.

ᑕᒪᓂᓇ ᖃᐅᔨᓴᕐᓂᖅ ᑐᑭᓯᑎᑦᑎᔪᖅ ᓂᕿᑐᖅᑎᓂᒃ ᖃᐅᔨᓴᕐᓂᕐᒧᑦ ᑕᒪᒃᑯᓄᖓ ᑐᒃᑐᐃᑦ ᐊᐅᓚᑕᐅᓂᖏᓐᓄᑦ ᐊᒻᒪᓗ ᐊᑐᖅᑕᐅᔪᓐᓇᕐᓂᐊᑐᑦ ᐋᖅᑭᒃᓯᓇᓱᐊᖅᑎᓪᓗᒋᑦ ᓯᕗᓂᒃᓴᒥᑦ ᐊᑯᓂᐅᔪᒃᑯᑦ ᐊᖑᓇᓱᖕᓂᕐᒧᑦ ᑭᒡᓕᐅᔪᓂᒃ ᐊᒻᒪᓗ ᐃᑲᔪᕐᓗᓂ ᑐᓴᖅᑎᑦᑎᔾᔪᑕᐅᔪᑦ ᑖᒃᑯᓄᖓ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᓐᓄᑦ (NIRB) ᕿᒥᕐᕈᓂᕐᒧᑦ ᑲᔪᓯᓂᐅᔪᓂᑦ.

ᖃᐅᔨᓴᖅᑏᑦ ᐊᑐᓚᐅᖅᑐᑦ ᐸᒡᕕᓴᐅᓗᐊᙱᓐᓂᖅᓴᓂᒃ ᖃᐅᔨᓴᕈᓯᕐᓂᒃ ᑲᑎᖅᓱᐃᓂᕐᒧᑦ ᖃᕝᕕᒑᕐᔫᑉ ᐊᒥᖓᓂᒃ ᖃᐅᔨᓴᒐᒃᓴᓕᐅᕐᓂᕐᒧᑦ ᐅᐊᖕᓇᔮᖓᓂᑦ ᐱᓇᖕᓇᖅᐸᓯᖓᓂᑦ ᓇᐸᒃᑐᓕᒃ ᑕᓯᖓᑕ. ᐃᓕᓯᓚᐅᖅᑐᑦ 154 ᒥᖅᑯᖏᓐᓂᒃ ᐲᖅᓯᔾᔪᑎᓂᒃ, ᓂᖅᖠᖢᒋᑦ ᑐᒃᑐᒥᒃ, ᐅᒥᖕᒪᐅᑉ ᓂᐅᖏᓐᓂᒃ ᐊᒻᒪᓗ ᑎᐱᖃᖅᑐᑦ ᒥᑭᒃᓱᒍᓯᖅᖢᑎᒃ, ᐋᖅᑭᒃᓱᖅᓯᒪᔪᑎᒍᑦ ᓄᓇᒥᑦ. ᐃᓕᔭᐅᔪᑦ ᖃᓪᓕᖅᑕᐅᓪᓗᑎᒃ ᓇᒃᑎᓐᓇᖅᑐᓂᒃ ᓴᕕᒐᐅᔭᓂᒃ, ᐲᖅᓯᔾᔪᑕᐅᓇᓱᐊᖅᑐᑦ ᒥᖅᑯᖏᓐᓂᒃ ᖃᐅᔨᓴᒐᒃᓴᓂᒃ ᓂᕐᔪᑎᓂᑦ ᓇᐃᒪᔭᒃᑐᓂᒃ ᒥᑭᒃᓱᒍᑎᓂᒃ. ᖃᐅᔨᓴᒐᒃᓴᓕᐅᕐᓂᖅ ᐱᓕᕆᐊᖑᓚᐅᖅᑐᑦ ᐱᖓᓱᑦ 10-ᐅᓪᓗᑦ ᐱᓕᕆᓂᕐᓂᒃ ᑕᐃᑲᙵᑦ ᐱᒋᐊᓕᓵᖅᑎᓪᓗᒍ ᒫᔾᔨ ᑕᐃᑯᖓᓱᖓᖅ ᐃᓱᓕᓕᖅᑎᓪᓗᒍ ᐊᐃᕐᕆᓕ 2018-ᒥᑦ ᐊᒻᒪᓗ ᐱᓕᕆᒃᑲᓐᓂᖅᖢᑎᒃ ᑕᐃᑲᓂ 2019-ᒥᑦ. ᑕᒪᓐᓇ ᐊᑑᑎᖃᑦᑎᐊᖅᑐᑦ ᐊᒻᒪᓗ ᐊᑭᑭᑦᑑᓪᓗᓂ ᐱᓕᕆᔾᔪᓯᖅ ᖃᐅᔨᓴᐃᓐᓇᕐᓂᕐᒧᑦ ᖃᕝᕕᒑᕐᔪᐃᑦ ᐅᓄᕐᓂᖏᓐᓄᑦ ᓄᓇᒥᑦ.

ᖃᕝᕕᒑᕐᔪᐃᑦ

ᖃᕝᕕᒑᕐᔪᐃᑦ ᐊᖏᓂᖅᓴᐅᔪᑦ ᐆᒪᔪᐃᑦ ᐊᔾᔨᒌᖏᐊᕐᔪᓐᓂᖏᑦ ᑖᒃᑯᓇᓂ ᑎᕆᐊᑦ ᐃᓚᒋᔭᖏᓐᓂᑦ. ᐊᕐᓇᓪᓗᐃᑦ ᐅᖁᒪᐃᓐᓂᖃᒐᔪᒃᑐᑦ 10.5 ᑯᓗᒍᕌᒻ (23 ᐸᐅᓐ) ᐃᒪᐃᑎᓪᓗᒍ ᐊᖑᑏᑦ ᐅᖁᒪᐃᓐᓂᖃᒐᔪᒃᑐᑦ 15 ᑯᓗᒍᕌᒻ (33 ᐸᐅᓐ).

ᖃᕝᕕᒑᕐᔪᐃᑦ ᐱᕈᖅᑐᖅᑎᐅᓪᓗᑎᒃ ᓂᕿᑐᖅᑎᐅᓯᓐᓈᖅᖢᑎᒃ ᐊᒻᒪᓗ ᓇᒡᕚᖅᑕᖅᑎᓪᓗᐊᑕᐅᓪᓗᑎᒃ. ᐃᒪᐃᒃᑲᓗᐊᖅᑎᓪᓗᒍ ᓴᙱᓂᖓ ᑐᖂᑦᑎᔪᓐᓇᖅᑑᒐᓗᐊᖅ ᐊᖏᓂᖅᓴᓂᒃ ᐆᒪᔪᓂᒃ ᓲᕐᓗ ᑐᒃᑑᔭᖅ, ᑐᒃᑐ, ᐊᒻᒪᓗ ᑐᒃᑐᕙᒃ, ᑕᐃᒪᐃᓕᐅᓲᖅ ᐃᓛᓐᓂᓚᐅᓱᖓᒃᑯᑦ.

ᓇᒡᕚᖅᑕᖅᑎᐅᓪᓗᑎᒡᓗ ᐊᒻᒪᓗ ᐊᖑᓇᓱᒃᐸᒃᖢᑎᒃ ᐊᖏᔪᓂᒃ ᓂᕐᔪᑎᓂᒃ ᐅᑭᐅᒃᑯᑦ, ᖃᕝᕕᒑᕐᔪᐃᑦ ᓂᕆᖃᑦᑕᖅᑐᑦ ᒪᓐᓂᖕᓂᒃ ᒪᓂᖅᑲᒥ-ᐃᕙᕙᒃᑐᑦ ᑎᖕᒥᐊᓂᑦ ᐊᒻᒪᓗᑦᑕᐅᖅ ᓂᕆᔭᒃᓴᓂᒃ ᐊᐃᕋᕐᓂᒃ ᐊᒻᒪᓗ ᐸᐅᕐᖓᕐᓂᒃ ᐊᐅᔭᐅᓕᕌᖓᑦ. ᖃᕝᕕᒑᕐᔪᐃᑦ ᑕᐃᑲᓂ ᖃᐅᔨᓴᖅᑕᐅᔪᒥᑦ ᓄᓇᒥᑦ ᐱᑕᖃᖅᑐᑦ ᐱᑕᖃᕐᕕᐅᓗᐊᙱᑦᑐᒥᑦ ᐊᒻᒪᓗ ᓴᖅᑭᑕᐅᕙᓪᓕᐊᔪᑦ ᐅᓄᖅᓯᕙᓪᓕᐊᓪᓗᑎᒃ ᐃᓄᐃᑦ ᐱᓕᕆᓂᖏᓐᓄᑦ.

ᐱᒋᐊᕈᑕᐅᔪᑦ ᖃᐅᔨᓴᕈᑏᑦ ᑎᑎᖅᑲᖁᑎᖏᑦ

ᐱᒋᐊᕈᑕᐅᔪᑦ ᖃᐅᔨᓴᕈᑏᑦ ᑎᑎᖅᑲᖁᑎᖏᑦ ᑐᓴᐅᒪᔾᔪᑕᐅᔪᑦ ᐊᑐᐃᓐᓇᕈᐃᓪᓗᑎᒃ ᑕᐅᑐᙳᐊᖅᑕᐅᔪᓐᓇᖅᑐᓂᒃ ᖃᓄᐃᓕᖓᓂᕐᓄᑦ ᖃᓄᐃᓕᖓᓂᖏᓐᓂᒃ ᖃᓄᐃᓕᖓᓂᖏᓐᓂᒃᓘᓐᓃᑦ ᒫᓐᓇ. ᑎᑎᖅᑲᖁᑏᑦ ᓯᕗᓂᒃᓴᑦᑎᓐᓂᑦ ᖃᓄᐃᓐᓂᖅᓴᐅᖕᒪᖔᑕ ᑖᒃᑯᓄᖓ ᑐᓴᐅᒪᔾᔪᑎᓄᑦ ᖃᐅᔨᔭᐅᖁᓪᓗᒋᑦ ᐊᓯᔾᔨᐅᑏᑦ.

ᐱᓕᕆᐊᒃᓴᓄᑦ ᖃᐅᔨᔭᐅᔪᑦ

ᑖᒃᑯᐊ ᖃᐅᔨᓴᖅᑏᑦ ᖃᐅᔨᓴᓚᐅᖅᑐᑦ ᑭᓇᐅᔾᔪᑎᖏᑦ ᐱᔭᐅᔪᖅ ᑖᒃᑯᓇᙵᖅ ᒥᖅᑯᖏᓐᓂᑦ ᖃᐅᔨᓴᒐᒃᓴᓕᐊᖑᔪᓂᑦ ᓇᓗᓇᐃᔭᖅᑕᐅᖁᓪᓗᒋᑦ ᓇᓕᐊᖑᓂᖓ ᖃᕝᕕᒑᕐᔪᒃ ᐊᒻᒪᓗ ᐊᕐᓇᓪᓘᖕᒪᖔᑦ ᐊᖑᑕᐅᖕᒪᖔᓪᓗ. ᖃᐅᔨᓴᖅᑏᑦ ᓇᓗᓇᐃᖅᓯᓚᐅᖅᑐᑦ ᐊᔾᔨᒌᐸᓗᖕᓂᒃ ᓇᐃᓴᐅᑎᓂᒃ ᐊᕐᓇᓪᓗᕐᓄᑦ ᐊᒻᒪᓗ ᐊᖑᑎᓄᑦ ᖃᕝᕕᖔᕐᔪᖕᓄᑦ. ᓇᓗᓇᐃᖅᓯᓚᐅᖅᑐᑦ 22 ᖃᕝᕕᒑᕐᔪᖕᓂᒃ ᑕᐃᑲᓂ 2018-ᒥᑦ, ᑖᒃᑯᐊ 11 ᐊᕐᓇᓪᓘᓪᓗᑎᒃ ᐊᒻᒪᓗ 11 ᐊᖑᑕᐅᓪᓗᑎᒃ. ᑕᐃᑲᓂ 2019-ᒥᑦ, ᓇᓗᓇᐃᖅᓯᓚᐅᖅᑐᑦ 27 ᖃᕝᕕᒑᕐᔪᖕᓂᒃ, ᑖᒃᑯᓇᓂ 13 ᐊᕐᓇᓪᓘᓪᓗᑎᒃ ᐊᒻᒪᓗ 14 ᐊᖑᑕᐅᓪᓗᑎᒃ. ᖁᓖᑦ ᖁᕝᕕᒑᕐᔪᐃᑦ ᓇᓗᓇᐃᖅᑕᐅᓚᐅᖅᑐᑦ 2018-ᒥᑦ ᐱᔭᐅᒃᑲᓐᓂᕐᓂᖅᖢᑎᒃ ᑕᐃᑲᓂ 2019-ᒥᑦ.

ᖃᐅᔨᔭᐅᔪᑦ ᓴᖅᑮᓯᒪᔪᑦ ᑖᒃᑯᐊ ᐱᖓᓱᐸᓗᐃᑦ ᑎᓴᒪᐃᓪᓗᑭᐊᖅ ᖃᕝᕕᒑᕐᔪᐃᑦ ᐊᑐᓂ 1,000 ᑭᓛᒥᑕᑦ ᑭᑉᐹᕆᒃᑐᑦ (km2). ᑕᒪᒃᑯᐊ ᒥᒃᓴᐅᓴᒃᑕᐅᓯᒪᔪᑦ ᐊᑐᖅᑐᑦ ᑭᓯᐊᓂ ᖃᕝᕕᒑᕐᔪᖕᓄᑦ ᑎᓯᖃᕐᑯᖏᑦ ᕿᑎᐊᓃᖢᑎᒃ ᐃᓗᐊᓂᑦ 4,000 ᑭᓛᒥᑕᑦ ᑭᑉᐹᕆᒃᑐᑦ (km²) ᖃᐅᔨᓴᖅᑕᐅᕝᕖᑦ ᖃᓂᒋᔭᖓᓂᑦ ᓇᐸᒃᑐᓕᒃ ᑕᓯᖓᑕ, ᒥᖅᑯᖏᓐᓂᒃ ᐲᖅᓯᖃᑦᑕᕐᕕᐅᔪᑦ ᓇᑉᐸᖅᑎᖅᑕᐅᓚᐅᖅᑐᑦ ᐋᖅᑭᒃᓱᖅᑕᐅᓪᓗᑎᒃ. ᖃᕝᕕᒑᕐᔪᐃᑦ ᐊᑐᖃᑦᑕᖅᑐᑦ ᑖᔅᓱᒥᖓ ᖃᐅᔨᓴᕐᕕᐅᔪᒥᑦ ᐃᓂᒥᑦ ᐊᔾᔨᒌᙱᑦᑐᑎᒍᑦ, ᓇᓗᓇᐃᔭᐃᔪᓐᓇᖅᑐᑦ ᐊᔾᔨᒌᙱᑦᑐᑦ ᐅᓄᕐᓂᖏᓐᓄᑦ ᐱᑕᖃᕐᕕᐅᔪᑦ ᒥᒃᓴᐅᓴᒃᑕᐅᑎᓪᓗᒋᑦ ᐊᑯᓐᓂᖏᓐᓂᑦ ᐊᕐᕌᒍᐃᑦ.

ᖃᕝᕕᒑᕐᔪᐃᑦ ᐊᖏᔪᒥᒃ ᐊᖑᓇᓱᒡᕕᖃᓲᑦ ᐃᓱᒪᒋᓪᓗᒋᑦ ᑎᒥᖏᑦ ᒥᑭᑦᑑᒐᓗᐊᖅᑎᓪᓗᒋᑦ. ᑕᐃᑲᓂ 2018-ᒥᑦ, ᖃᐅᔨᓴᖅᑏᑦ ᑕᑯᓚᐅᖅᑐᑦ ᐊᖏᔪᒥᒃ ᓄᓇᖁᑎᒋᔭᐅᔪᑦ ᒥᒃᓴᐅᓴᒃᑕᐅᓯᒪᔪᖅ 25 ᑭᓛᒥᑕᑦ ᑕᒪᕐᒦᖕᓄᑦ ᐊᖑᑎᓄᑦ ᐊᒻᒪᓗ ᐊᕐᓇᓪᓗᕐᓄᑦ. ᑕᐃᑲᓂ 2019-ᒥᑦ, ᖃᐅᔨᓴᖅᑏᑦ ᑕᑯᓚᐅᖅᑐᑦ ᒪᓕᒃᖢᑎᒃ ᐊᖏᓂᖅᓴᐅᔪᓂᒃ ᓄᓇᖁᑎᒋᔭᐅᔪᑦ ᐊᖑᑎᓄᑦ.

ᑖᓐᓇ ᖃᐅᔨᓴᕐᓂᖅ ᓴᖅᑭᔮᖅᑎᑦᑎᔪᖅ ᐱᒻᒪᕆᐅᓂᖓᓂᒃ ᐱᓕᕆᖃᑎᒌᒡᓗᑎᒃ ᖃᐅᔨᓴᕐᓂᕐᓄᑦ ᐱᓕᕆᐊᒃᓴᓂᒃ ᑐᑭᓯᖁᓪᓗᒋᑦ ᓂᕐᔪᑎᓂᒃ ᐊᐅᓚᑦᑎᓇᓱᖕᓂᕐᒧᑦ. ᑕᑯᒃᓴᐅᑎᑦᑎᒋᕗᖅᑕᐅᖅ ᐱᑕᖃᖅᐸᒌᖅᑐᓂᒃ ᐱᕕᒃᓴᓂᒃ ᐊᑐᐃᓐᓇᕈᐃᖁᓪᓗᒋᑦ ᐱᒻᒪᕆᐅᔪᓂᒃ ᐃᓕᓐᓂᐊᒐᒃᓴᓂᒃ ᐊᒻᒪᓗ ᐃᖅᑲᓇᐃᔮᒃᓴᓂᒃ ᑖᒃᑯᓄᖓ ᐊᖑᓇᓱᒃᑐᓕᕆᔨᒃᑯᓐᓄᑦ ᐊᒻᒪᓗ ᒥᑭᒋᐊᕐᓂᐊᖅᑎᒃᑯᑦ ᑎᒥᖁᑖᓂᑦ ᐃᓚᖏᔭᐅᔪᓄᑦ ᐊᑐᕐᓗᑎᒃ ᐱᓕᕆᖃᑎᒌᖕᓂᒃᑯᑦ ᖃᐅᔨᓴᕐᓂᕐᒧᑦ ᐱᓕᕆᐊᒃᓴᐅᔪᓂᒃ.