Ask a question or make a complaint | Ojicree

ᒪᐦᑎ ᑲᑫᐧᑌᐣ ᓇᐣᑕ ᑎᐸᒋᑕᐣ ᑭᑎᔑᓭᐃᐧᐣ

ᑭᐡᐱᐣ ᐅᒪ ᐁᐅᒋᑎᐯᐣᑕᑯᓯᔭᐣ ᐁᑲᐧ ᐁᑭᑫᐣᑕᒪᐣ ᐁᑲ ᑲᐧᔭᐠ ᐁᐃᔑᑲᓇᐊᐧᐸᒥᑲᐧ ᑲᓀᐣᑎᔭᐣ ᓄᑎᓂᑫᐃᐧ ᐱᒧᒋᑫᐃᐧᐣ (CAF) ᒥᓇ ᒥᓯᐁᐧ ᑲᓇᑕ ᓄᑎᓂᑫᐃᐧ ᐱᒧᒋᑫᐃᐧᐣ (DND), ᐊᔕᔾ ᓂᑕᓴᐧᐱᒥᐣ ᒋᐃᐧᒋᐦᐃᐁᐧᔭᐠ.  

ᐁᑲᐧ ᑭᔑᑭᒥᑯᓇᐊᐧ ᒋᓇᓇᑲᒋᑐᔦᐠ ᓂᑭᐦᑭᓄᐦᐊᒪᑫᐃᐧ ᐃᐧᑕᒪᑫᐃᐧᓂᓇᐣ, ᐊᐦᐃ ᑲᔦ ᒋᓇᐱ ᓇᓇᑲᒋᒋᑲᑌᐠ ᒥᓇ ᑎᐸᒋᒧᐃᐧᓇᐣ ᑲᐃᓇᑌᑭᐣ—ᐁᑲᐧ ᓇᐣᑕ ᑲᐊᐧᐸᑕᐣ ᒋᐃᐧᒋᐦᐃᑯᔭᐣ ᐃᐧᑕᒪᑫᐃᐧᐣ ᒥᐡᑯᐨ ᒋᐊᓄᑲᑌᑭᐣ ᑲᒪᒥᑎᓀᐣᑕᒥᐦᐃᑯᔭᓂᐣ. ᐁᑲᐧ ᑭᔭᐱᐨ ᑲᑫᐧᑌᐃᐧᓇᐣ ᐊᔭᔭᐣ ᓇᐣᑕ ᐃᐧᒋᐦᐃᐁᐧᐃᐧᐣ ᓇᑕᐁᐧᐣᑕᒪᐣ, ᑲᐃᐧᐣ ᒪᓇᒋ ᐱᑲᓄᓂᔑᓇᑦ ᒋᑲᓇᐊᐧᐸᑕᒪᓂᐣ ᑫᑯᓇᐣ ᐅᒪ ᑲᐃᐧᒋᑲᑌᑭᐣ ᐸᑭᑭᓂᑲᓂᐠ. 

ᑎᐸᐦᐃᑲᐣ ᐅᓇᒋᑫᐃᐧᓇᐣ—ᑯᑕᑭᔭᐣ ᓇᐱ ᓇᓇᑲᒋᒋᑫᐃᐧᓇᐣ ᒥᓇ ᑎᐸᒋᒧᐃᐧᓇᐣ ᑲᐃᓇᑌᑭᐣ

ᐁᑲᐧ ᒧᔕᐠ ᓇᓇᑲᒋᑐᑭᐣ ᑎᐸᐦᐃᑲᐣ ᐅᓇᒋᑫᐃᐧᓇᐣ ᐁᑲᐧ ᑭᑫᐣᑕᑲᐧᐣ ᓇᓇᑲ ᐁᐃᔑᓭᑭᐣ ᑫᑯᓇᐣ ᑐᑲᐣ ᐅᑕ ᑲᔦ ᑲᑲᓇᐊᐧᐸᒋᑲᑌᐠ ᑭᑎᔑᓭᐃᐧᐣ.

ᐁᑲᐧ ᐊᑎᐟ ᐅᑫᐧᓂᐊᐧᐣ ᑎᐸᒋᒧᐃᐧᓇᐣ ᑲᐃᓇᑌᑭᐣ, ᒥᓇ ᐅᓇᑯᓂᑫᐃᐧᑲᒥᐠ ᒧᐡᑭᓀᐱᐦᐃᑲᓇᐣ, ᒥᓇ ᐅᓇᑯᓂᑫᐃᐧ ᓇᓇᑲᒋᒋᑫᐃᐧᓇᐣ ᒪᐊᐧᐨ ᐱᑯ ᑎᐱᒥᓂᑯᐠ ᐅᓇᒋᑲᑌᐊᐧᐣ. ᐁᑲᐧ ᑭᐡᐱᐣ ᐱᑭᑐᔦᐠ ᓂᑕᓄᐦᑭᑕᒪᑫᐃᐧᑲᒥᑯᓇᐣ ᑲᐃᐧᐣ ᑭᔭᐱᐨ ᓂᑲᑭᐱᑎᓇᓯᒥᓇᐣ.

ᐁᑲᐧ ᐊᐊᐧᓀᓄᔭᐠ

• ᐁᑲᐧ ᓂᑕᓄᑲᑕᒥᓇᐣ ᐃᔑᓭᐃᐧᓇᐣ ᐅᒪ ᑲᐃᔑᓭᑭᐣ ᐱᒧᒋᑫᐃᐧᓇᐣ (DND ᐁᑲᐧ CAF).
• ᐁᑲᐧ ᒥᓇ ᑎᐸᐣ ᐊᓄᑭᑕᒪᑫᐃᐧᑲᒥᐠ ᓂᐱᒧᑐᒥᐣ ᐁᑲᐧ ᑲᐃᐧᐣ ᒋᑎᐸᒋᒧᑕᐊᐧᔭᐠ ᓄᑎᓂᑫᐃᐧ ᐅᓇᑭᒪᐠ ᒥᓇ ᑯᑕᑭᔭᐠ ᐅᑭᒪᐠ.
• ᐁᑲᐧ ᐸᑲᐣ ᓂᑐᒋᐊᓄᑲᑕᒥᓇᐣ ᐃᔑᓭᐃᐧᓇᐣ ᑫᒋᓇᐨ ᑲᐧᔭᐠ ᒋᐃᐧᒋᐦᐃᐊᔭᐠ ᐊᐃᐧᔭᐠ ᒥᐡᑯᐨ ᑲᐧᔭᐠ ᒋᑐᑕᐊᐧᑲᓄᐊᐧᐨ ᐅᑫᐧᓂᐊᐧᐠ ᑲᐃᐧᒋᐦᐃᔭᑲᓄᐊᐧᐨ.
• ᐁᑲᐧ ᒥᓇ ᓂᑭᐦᑭᓄᐦᐊᒪᐊᐧᒥᓇᐠ ᒥᓇ ᑲᐧᔭᐠ ᓂᐃᐧᑕᒪᐊᐧᒥᓇᐠ ᑲᐃᐧᒋᐦᐃᐊᔭᐠ, ᒥᓇ ᑎᐸᐣ ᐃᔑᓭᐃᐧᓇᐣ ᓂᓇᓇᑲᒋᑐᒥᓇᐣ, ᒥᓇ ᓂᒥᓇᒥᐣ ᐸᑯᓭᐣᒋᑫᐃᐧᓇᐣ ᐱᒧᒋᑫᐃᐧᓇᐣ (DND/CAF) ᐅᓂᑲᓂᑕᒪᑫᐠ ᒥᐡᑯᐨ ᑲᐧᔭᐠ ᒋᐃᔑᓇᑲᐧᐠ ᐱᒧᒋᑫᐃᐧᐣ.
• ᐁᑲᐧ ᑕᔑᓀ ᓂᑕᐃᐧᓭᓭᒥᐣ ᒥᓇ ᐱᑲᐧᓇᐱ ᒋᐊᓂᒧᑕᒪᑯᔭᐣ ᐅᐁᐧ ᑭᑎᔑᓭᐃᐧᐣ.
• ᐁᑲᐧ ᑭᑎᐸᒋᒧᐃᐧᐣ ᓂᑲᔭᑯ ᑲᓇᐁᐧᐣᑕᒪᐣ. ᐁᑲᐧ ᑭᐡᐱᐣ ᐊᐃᐧᔭ ᒋᑲᓄᓇᔭᐠ ᐅᐁᐧ ᑭᑎᐸᒋᒧᐃᐧᐣ ᐅᒋ, ᐊᒥᐁᐧ ᑫᐃᔑᓭᐠ ᐱᓇᒪ ᒋᒪᓯᓇᐦᐊᒪᐣ ᐯᐸᐣ ᐁᐸᑭᑎᓂᑎᓯᔦᐠ ᒋᐊᓂᒧᑕᒪᑯᔭᐣ ᐅᐁᐧ ᑭᑎᔑᓭᐃᐧᐣ ᒥᓇ ᑯᑕᑭᔭᐠ ᐊᐃᐧᔭᐠ ᐅᐁᐧ ᒋᑭᑫᐣᑕᒧᐊᐧᐨ. ᐁᑲᐧ ᑭᐣ ᑲᐅᓀᐣᑕᒪᐣ ᑭᔭᑦ ᒋᒪᑕᓄᑲᑌᐠ ᑭᑎᐸᒋᒧᐃᐧᐣ.
• ᐁᑲᐧ ᑭᔭᑦ ᑭᑕᐱᓇᐢᑲᐃᐧᔑᓇᑦ ᐁᑲ ᒥᓇ ᒋᑯᑕᒋᔭᐣ ᓇᐣᑕ ᒋᑐᑕᑯᔭᐣ. ᐁᑲᐧ ᑭᐡᐱᐣ ᒥᑲᒪᐠ ᑭᑎᔑᓭᐃᐧᐣ ᐅᒋ, ᐊᒥᐁᐧ ᔐᒪᐠ ᒋᒪᑕᓄᑲᑕᒪᐠ.

ᐊᐊᐧᔑᒣ ᐃᐧᑕᒪᑫᐃᐧᐣ ᐃᐧᑭᑫᐣᑕᒪᐣ, ᑲᓇᐊᐧᐸᑕᐣ ᓂᐸᑯᓭᓂᒥᑯᐃᐧᓂᓇᐣ.

ᐁᑲᐧ ᐊᐊᐧᓀᓇᐠ ᑲᐃᐧᒋᐦᐃᐊᔭᐠ

ᐁᑲᐧ ᑭᐣ ᑲᐃᐧᐃᐧᒋᐦᐃᑯᔭᐣ ᐁᑲᐧ ᑭᐡᐱᐣ ᐅᒪ ᐯᔑᐠ ᐱᒧᒋᑫᐃᐧᐣ ᐁᐅᒋᑎᐯᐣᑕᑯᓯᔭᐣ ᐁᑲᐧ ᒪᐊᐧᐨ ᒥᐡᑕᐦᐃ ᑫᑯᓇᐣ ᐁᒪᒥᑎᓀᐣᑕᒥᐦᐃᑯᔭᓂᐣ ᐅᑫᐧᓂᐊᐧᐣ ᐱᒧᒋᑫᐃᐧᓇᐣ ᑲᓇᑕ ᓄᑎᓂᑫᐃᐧᐣ ᐱᒧᒋᑫᐃᐧᐣ (DND) ᒥᓇ ᑲᓀᐣᑎᔭᐣ ᓄᑎᓂᑫᐃᐧ ᐱᒧᒋᑫᐃᐧᐣ (CAF):

• ᒣᑲᐧᐨ ᐅᒪ ᑲᐅᒋᑎᐯᐣᑕᑯᓯᔭᐣ ᒥᓇ ᐱᐅᑕᓇᐠ ᑲᑭᐱᐃᐧᒋᑕᐧᔭᐸᐣ:
  • ᑲᓀᐣᑎᔭᐣ ᓄᑎᓂᑫᐃᐧ ᐱᒧᒋᑫᐃᐧᐣ (CAF) (ᓄᑎᓂᑫᐃᐧᐣ, ᒪᔭᑦ ᐅᓄᑎᓂᑫᐠ, ᑲᓀᐣᑎᔭᐣ ᕑᐁᐣᒉᕑᐢ, ᑲᑌᐟ ᐱᒧᒋᑫᐃᐧᐣ ᐅᑭᒪᐃᐧᑲᒥᐠ ᐁᑲᐧ ᑭᐦᑭᓄᐦᐊᒪᑫᐃᐧ ᐃᐧᒋᐦᐃᐁᐧᐃᐧᐣ, ᒥᓇ ᑯᑕᑭᔭᐣ ᐃᓇᑯᓱᐃᐧᓇᐣ) ᓇᐣᑕ ᑲᔦ;
  • ᑲᑌᐟᐢ ᐁᑲᐧ ᒍᓂᔦᕑ ᑲᓀᐣᑎᔭᐣ ᕑᐁᐣᒉᕑᐢ;
• ᒥᓇ ᒣᑲᐧᐨ ᐁᑲᐧ ᐱᐅᑕᓇᐠ ᑲᑭᐱᐊᓄᑭᐊᐧᐨ ᐅᒪ ᐱᒧᒋᑫᐃᐧᓂᐠ (DND*) ᐁᑲᐧ ᐅᒪ ᐊᓄᑭᓇᑲᓇᐠ ᔓᓂᔭᓇᐣ ᑲᑭᐅᒋᐸᑭᑎᓂᒪᑲᓄᓂᐨ ᑲᑭᔭᐸᒋᐦᐃᔭᐊᐧᐨ;
• ᐁᑲᐧ ᐊᐃᐧᔭ ᑲᓇᑐᑕᒪᐨ ᒋᐃᐧᒋᐦᐃᐁᐧᐨ ᐅᒪ ᓄᑎᓄᑫᐃᐧ ᐃᓇᑭᓱᐃᐧᓂᐠ (CAF);
• ᐅᐊᐧᐁᐧ ᐊᐃᐧᔭ ᒪᔭᑦ ᑲᐅᒋᑎᐯᐣᑕᑯᓯᐨ ᑌᐯᐣᒋᑫᐃᐧᓂᐠ ᐃᐡᐱᒥᐠ ᑲᒪᓯᓇᐦᐃᑲᑌᐠ; ᐁᑲᐧ
• ᒥᓇ ᑲᐸᐯᔑᑯᐊᐧᐨ ᐊᐃᐧᔭᐠ ᐅᒪ ᑲᐃᔑᐃᐧᒋᐦᐃᐁᐧᐊᐧᐨ ᑲᓀᐣᑎᔭᐣ ᓄᑎᓂᑫᐃᐧ ᐱᒧᒋᑫᐃᐧᓂᐠ. 

ᐊᐊᐧᔑᒣ ᐃᐧᑕᒪᑫᐃᐧᐣ ᐃᐧᑭᑫᐣᑕᒪᐣ, ᑲᓇᐊᐧᐸᑕᐣ ᓂᐸᑯᓭᓂᒥᑯᐃᐧᓂᓇᐣ.

*ᑫᐃᐧᓇᐊᐧ ᑲᓀᐣᑎᔭᐣ ᓄᑎᓂᑫᐠ ᑭᒋᑲᒥᐠ ᑲᑕᔑᐃᐧᑐᐊᐧᐨ ᑲᒪᒋᓭᐠ ᐊᐧᑌᐸᑲᐃᐧᐱᓯᑦ 2025

ᐁᑲᐧ ᐊᓂᐣ ᑫᑐᑕᒪᐠ ᒋᐃᐧᒋᐦᐃᐁᐧᔭᐠ

ᐁᑲᐧ ᐊᓂᐣ ᒥᓇ ᑫᑐᑕᒪᐠ

• ᓂᑲᑭᐸᑭᑎᓇᒥᐣ ᐃᐧᑕᒪᑫᐃᐧᐣ ᒋᐃᐧᒋᐦᐃᑯᔭᐣ ᑫᐃᔑᐅᑕᐱᓇᒪᐣ ᐊᔓᑕᒪᑫᐃᐧᓇᐣ ᐁᑲᐧ ᒋᐅᓀᐣᑕᒪᐣ ᐃᔑᓭᐃᐧᓇᐣ ᑲᐃᐧᐊᓄᑲᑕᒪᐣ ᐅᑫᐧᓂᐊᐧᐣ ᐱᒧᒋᑫᐃᐧᓇᐣ (DND/CAF) ᐅᒋ.
• ᐁᑲᐧ ᑲᔦ ᓂᒥᑫᐧᒥᐣ ᑭᐦᑭᓄᐦᐊᒪᑫᐃᐧ ᐃᐧᑕᒪᑫᐃᐧᐣ ᒋᐃᐧᒋᐦᐃᑯᔭᐣ ᐅᑫᐧᓂᐊᐧᐣ ᑲᑫᐧᑌᐃᐧᓇᐣ ᒥᓇ ᐃᔑᓭᐃᐧᓇᐣ ᐅᒋ.
• ᐁᑲᐧ ᑲᔦ ᑫᒋᓇᐨ ᒋᐃᐧᒋᐦᐃᑯᔭᐣ ᑭᑎᐸᒋᒧᐃᐧᐣ ᒥᓇ ᑲᒪᒥᑎᓀᐣᑕᒥᐦᐃᑯᔭᐣ ᒋᐸᑭᑎᓇᒪᐣ ᐅᒪ ᑲᐧᔭᐠ ᑎᐸᒋᒧᐃᐧᐣ ᑲᐅᒋᐸᑭᑎᓂᑲᑌᐠ ᒋᐊᐸᒋᑐᔭᐣ.
• ᐁᑲᐧ ᑲᐧᔭᐠ ᓂᑲᒪᒥᓇᐧᑐᒥᓇᐣ ᑫᑯᓇᐣ ᑲᔭᓄᑲᑌᑭᐣ ᑭᐡᐱᐣ ᑲᔦ ᑭᐱᒋᓭᐠ ᑲᔭᓄᑲᑕᒪᐣ ᑭᑎᐸᒋᒧᐃᐧᐣ ᓇᐣᑕ ᐃᔑᓭᐃᐧᓇᐣ ᐁᑲ ᑭᐣ ᑎᐱᓇᐁᐧ ᑲᑭᒥᓇᐧᑕᒪᓯᔭᐣ.
• ᐁᑲᐧ ᒥᓇ ᑭᔭᑦ ᓂᑲᓇᓇᑲᒋᑐᒥᐣ ᑭᑎᐸᒋᒧᐃᐧᐣ ᑲᑭᐸᑭᑎᓇᒪᐣ ᑭᐡᐱᐣ ᑲᐧᔭᐠ ᐃᔑᑲᓇᐊᐧᐸᒥᑯᐊᐧᓀᐣ ᐅᒋ.
• ᐁᑲᐧ ᑲᔦ ᓂᑲᑭᐸᑭᑎᓇᒥᐣ ᐃᔑᓭᐃᐧ ᑎᐸᒋᒧᐃᐧᐣ ᐁᑲᐧ ᒋᒥᓇᔭᐠ ᐸᑯᓭᐣᒋᑫᐃᐧᓇᐣ ᐅᑫᐧᓂᐊᐧᐠ ᒪᔭᑦ ᐊᐃᐧᔭᐠ ᑫᑯᓇᐣ ᑲᔭᓄᑲᑕᒧᐊᐧᐨ ᑭᐡᐱᐣ ᒥᑲᒪᐠ ᐁᑲ ᑲᐧᔭᐠ ᐁᑐᑕᑯᔭᐣ.

ᐁᑲᐧ ᐅᑫᐧᓂᐊᐧᐣ ᐃᔑᓭᐃᐧᓇᐣ ᓂᑲᑭᐃᐧᒋᐦᐃᐁᐧᒥᐣ

• ᒪᐡᑭᑭᐃᐧ ᒥᓄᔭᐃᐧᐣ
• ᐊᓄᑭᐃᐧᓇᐣ
• ᑎᐸᐦᐃᑫᐃᐧᐣ
• ᐅᒋᑕᒪᓱᐃᐧᓇᐣ
• ᐸᒥᐦᐃᐁᐧᐃᐧᐣ

ᐁᑲᐧ ᑯᑕᑭᔭᐣ ᑲᔭᐸᑕᑭᐣ ᐃᐧᑕᒪᑫᐃᐧᓇᐣ

• ᐅᑫᐧᓂᐊᐧᐣ ᓂᑕᐁᐧᒋᑲᓂᓇᓇᐣ ᑲᒥᑫᐧᔭᐠ ᐊᐁᐧᒋᑲᓇᐣ ᐊᓂᐣ ᑲᑐᑕᒪᐠ ᑲᐃᐧᑕᓄᑭᒪᔭᐠ ᐱᒧᒋᑫᐃᐧᓇᐣ (DND/CAF) ᐊᐱᐣ ᑲᔭᓄᑲᑌᑭᐣ ᑎᐸᒋᒧᐃᐧᓇᐣ.
• ᐁᑲᐧ ᓇᓇᑲ ᐃᔑᓭᐃᐧᓇᐣ ᐊᐱᐣ ᐊᓂᒥᐦᐃᑯᔭᐣ ᑭᐱᒪᑎᓱᐃᐧᓂᐠ, ᑕᑭᐃᔑᓭ ᒋᐃᐧᒋᐦᐃᑯᔭᐣ ᑭᐡᐱᐣ ᐁᑲ ᒪᔑᐃᐧᐣ ᑲᑭᓇ ᐃᐧᒋᐦᐃᐁᐧᐃᐧᓇᐣ ᐊᐸᒋᑐᔭᓂᐣ ᑐᑲᐣ ᑲᑕᑲᐧᑭᐣ ᑎᐸᒋᒧᐃᐧᓇᐣ ᑲᐅᒋᐸᑭᑎᓂᑲᑌᑭᐣ ᑲᐃᒋᑲᑌᐠ.

ᐃᔑᓭᐃᐧᓇᐣ ᑲᐃᔑᓭᑭᐣ ᐊᑲᐧᒋᐠ ᑭᐦᒋᐅᑲᓄᒋᑫᑕᒪᑫ ᐅᐸᑯᓭᐣᑕᑯᓯᐃᐧᐣ

• ᑭᐦᒋᒪᒪᓂᐃᐧᓇᐣ ᑲᓇᓇᑲᒋᒋᑲᑌᑭᐣ ᒥᓇ ᐅᓇᒋᑫᐃᐧᐣ ᐅᐁᐧ ᐃᐧᒋᐦᐃᐁᐧᐃᐧᐣ ᑎᐸᑯᓂᑫᐃᐧᐣ
• ᐅᓇᑯᓂᑫᐃᐧᐣ ᐃᔑᒋᑫᐃᐧᓇᐣ
• ᐊᓄᑭᐃᐧ ᐃᔑᓭᐃᐧᓇᐣ ᐅᒪ ᐅᒋᑲᓇᐊᐧᐸᒋᑲᑌᐊᐧᐣ ᐱᒧᒋᑫᐃᐧ ᐊᐱᑕᒪᑫᐃᐧᐣ ᐅᓇᔓᐁᐧᐃᐧᓂᐠ
• ᑫᑌ ᐅᓄᑎᓂᑫᐠ ᐅᑎᔑᓭᐃᐧᓂᐊᐧᐣ
• ᐅᓇᑯᓂᑫᐃᐧ ᐅᑕᔭᒥᑕᒪᑫ ᓇᐣᑕ ᑭᐦᑭᓄᔑᓄᐃᐧ ᐃᐧᑕᒪᑫᐃᐧᐣ
• ᐱᒧᒋᑫᐃᐧᓇᐣ ᒥᓇ ᑲᓇᐁᐧᐣᒋᑫᐃᐧᐣ ᐸᑯᓭᐣᒋᑫᐃᐧᓇᐣ
• ᑎᐸᒋᒧᐃᐧᓇᐣ ᑲᑭᐸᑭᑎᓂᑲᑌᑭᐣ ᐊᒪᐧᔦ ᐅᐡᑭᐸᑲᐃᐧᐱᓯᑦ 15, 1998, ᐁᑲᐧ ᐁᐱᑎᑫᓭᑭᐣ ᐸᑯᓭᐣᒋᑫᐃᐧᓂᐠ ᔕᑯᐨ ᐃᐧᐣ ᒪᔭᑦ ᑭᐦᒋᐅᓇᑯᓂᑫᐃᐧᑭᒪ ᐅᑲᑭᐅᓂᓂᑲᑕᐣ.
• ᐁᑲ ᑲᑭᒋᔑᓭᑭᐣ ᑫᑯᓇᐣ ᓇᐣᑕ ᑲᒪᒥᑎᓀᐣᑕᒥᐦᐃᐁᐧᒪᑲᑭᐣ ᑎᐸᒋᒧᐃᐧᓇᐣ
• ᓄᑎᓂᑫᐃᐧ ᔑᒪᑲᓂᔕᐠ ᐅᓇᓇᑲᒋᒋᑫᐃᐧᓂᐊᐧᐣ

ᐁᑲᐧ ᑫᑯᓀᐣ ᑫᐦᔭᐤᔐᐣᑕᒪᐣ

ᑲᐃᐧᐣ ᒋᐃᐧᒋᑲᑌᐠ

ᐁᑲᐧ ᑲᑭᓇ ᑫᑯᐣ ᑲᑎᐸᒋᑕᒪᐣ ᑲᐃᐧᐣ ᒋᐃᐧᑕᒪᐠ. ᐁᑲᐧ ᑭᐡᐱᐣ ᐊᐃᐧᔭ ᐃᐧᑲᓄᓇᔭᐠ ᐅᐁᐧ ᑭᑎᐸᒋᒧᐃᐧᐣ ᐅᒋ, ᐱᓇᒪ ᑭᐣ ᑲᑲᑫᐧᒋᒥᑯ ᒋᒪᓯᓇᐦᐊᒪᐣ ᐯᐸᐣ ᐁᐸᑭᑎᓂᔑᔭᐠ ᒋᐊᓂᒧᑕᒪᐊᐧᔭᑲᐧ ᑭᑎᔑᓭᐃᐧᐣ ᒪᔭᑦ ᐅᑫᐧᓂᐊᐧᐠ ᐊᐃᐧᔭᐠ ᑲᔭᓄᑲᑕᒧᐊᐧᐨ. ᐁᑲᐧ ᑭᐣ ᑲᐅᓀᐣᑕᐣ ᑭᔭᑦ ᒋᒪᑕᓄᑲᑌᐠ ᑭᑎᔑᓭᐃᐧᐣ.

ᑲᐧᔭᐠ ᐃᐧᒋᐦᐃᐁᐧᐃᐧᐣ

ᐁᑲᐧ ᐊᐱᐣ ᑲᒥᓂᑯᔭᐠ ᑭᑎᐸᒋᒧᐃᐧᐣ, ᐱᓇᒪ ᐃᔑᓭ ᑲᐧᔭᐠ ᒋᓇᓇᑲᑕᐁᐧᐣᑕᒪᐠ ᑭᐡᐱᐣ ᑲᐧᔭᐠ ᑲᐃᔑᑲᓇᐊᐧᐸᒥᑯᐊᐧᓀᐣ ᓇᐣᑕ ᑲᔦ ᐁᑲ ᑲᐧᔭᐠ ᑲᐃᔑᑲᓇᐊᐧᐸᒥᑯᐊᐧᓀᐣ.

ᐁᑲᐧ ᑲᐧᔭᐠ ᓂᓇᓇᑲᒋᑐᒥᐣ ᑭᑎᔑᑲᓇᐊᐧᐸᒥᑯᐃᐧᐣ ᑐᑲᐣ ᐃᔑᒋᑫᐃᐧᓇᐣ ᐁᔭᐸᒋᑐᔭᐠ :

• ᐱᓇᒪ ᐁᒪᐊᐧᑐᓇᒪᐠ ᐃᐧᑕᒪᑫᐃᐧᐣ ᐅᑫᐧᓂᐊᐧᐣ ᑫᑯᓇᐣ ᑲᒪᒥᑎᓀᐣᑕᒥᐦᐃᑯᔭᐣ ᐅᒋ ᐁᑲᐧ ᐊᓂᐣ ᒥᓇ ᑫᐃᔑᓇᑲᐧᐠ ᑲᓄᒋᑫᐃᐧᐣ;
• ᐱᓇᒪ ᒥᓇ ᒋᐅᑎᓇᒪᐠ ᐁᐸᑭᑎᓂᔑᔭᐠ ᒋᐊᓄᑭᑕᒪᑯᔭᐣ ᐁᑲᐧ ᒋᑲᓄᓇᔭᐠ ᐱᒧᒋᑫᐃᐧᓇᐣ (DND/CAF) ᑭᐡᐱᐣ ᑫᐃᐧᓇᐊᐧ ᐅᑫᐧᓂᐊᐧᐣ ᐃᐧᑕᒪᑫᐃᐧᓇᐣ ᐊᔭᐊᐧᑫᐧᐣ ᑲᓇᑕᐁᐧᐣᑕᑲᐧᑭᐣ ᐊᐱᐣ ᑲᐃᐧᒪᑕᓄᑲᑌᑭᐣ ᑫᑯᓇᐣ ᑲᒪᒥᑎᓀᐣᑕᒥᐦᐃᑯᔭᓂᐣ;
• ᐱᓇᒪ ᒋᑲᓇᐊᐧᐸᒋᑲᑌᑭᐣ ᐃᔑᓭᐃᐧᓇᐣ ᓇᐣᑕ ᐅᓇᒋᑫᐃᐧᓇᐣ ᑫᔭᐸᑕᑭᐣ ᐊᐱᐣ ᑲᓄᒋᑲᑌᑭᐣ ᑲᒪᒥᑎᓀᐣᑕᒥᐦᐃᑯᔭᓂᐣ ᒥᓇ ᒋᐊᐸᑕᑭᐣ ᐅᓇᔓᐁᐧᐃᐧᓇᐣ ᐁᑲᐧ ᐅᓇᒋᑫᐃᐧᓇᐣ; ᐁᑲᐧ ᒥᓇ
• ᒋᐅᔑᒋᑲᑌᑭᐣ ᐸᑯᓭᐣᑕᒪᑫᐃᐧᓇᐣ ᐅᑫᐧᓂᐊᐧᐠ ᒪᔭᑦ ᑲᔭᓄᑲᑕᒧᐊᐧᐨ ᒋᒥᓇᑲᓄᐊᐧᐨ ᐁᑲᐧ ᒥᓇ ᒋᓇᓇᑕᐊᐧᐸᒋᑲᑌᐠ ᒥᓂᓂᑫᐃᐧᐣ ᑭᐡᐱᐣ ᒥᑲᒪᐠ ᐁᑲ ᑲᐧᔭᐠ ᐁᑭᐅᒋᐃᔑᑲᓇᐊᐧᐸᒥᑯᔭᐣ.

ᑭᑌᐣᒋᑫᐃᐧᐣ

ᐁᑲᐧ ᐅᒪ ᑲᑕᔑᐊᓄᑭᑕᒪᑫᔭᐠ ᓂᐃᐧᑕᒪᐊᐧᒥᓇᐠ ᐱᒧᒋᑫᐃᐧᓇᐣ ᒥᓇ ᐊᓄᑭᓇᑲᓇᐠ ᑲᐧᔭᐠ ᒋᐃᔑᑲᓇᐊᐧᐸᒥᑐᐊᐧᐨ ᒥᓇ ᒋᑭᑌᓂᒥᑐᐊᐧᐨ. ᐁᑲᐧ ᑲᐧᓂᐣ ᓂᑲᑭ ᐃᐧᒋᐦᐃᔭᓯᒥᓇᐠ ᐅᑫᐧᓂᐊᐧᐠ ᐊᐃᐧᔭᐠ ᐅᓴᑦ ᑲᔭᑫᐧᐣᑕᒧᐊᐧᐨ ᑫᑯᓇᐣ ᒥᓇ ᑭᔑᐊᐧᓯᐃᐧᓂᐠ ᑲᐅᒋᐸᑭᑌᐡᑲᒧᐊᐧᐨ ᐃᔑᓭᐃᐧᓇᐣ. 

ᓂᐡᑕᑦ 1—ᒪᔭᑦ ᑲᓄᒋᑫᐃᐧᐣ (ᓂᔓᑭᔑᑲᐣ (2) ᐊᓄᑭᐃᐧᐣ)

ᐁᑲᐧ ᒋᐅᓀᐣᑕᒪᐣ ᐊᓂᐣ ᑫᑐᑕᒪᐣ ᐃᐧᐱᑲᓄᐣᔑᔭᐠ, ᑫᒋᐁᐧ ᒋᐱᐊᔭᒥᐦᐃᔭᐨ ᓇᐣᑕ ᐱᐊᐧᐱᑯᐠ ᒋᐅᒋᐊᔭᒥᐦᐃᔭᐨ ᔐᒪᐠ ᐊᐃᐧᔭ, ᑲᑭᐃᔑᐅᓇᑐᔭᐸᐣ ᐅᑕ ᑫᐃᔑᐊᔭᒥᐦᐃᑯᔭᐣ, ᓇᐣᑕ ᑲᔦ ᓂᔓᑭᔑᑲᐣ ᐊᓂ ᓂᑲᐣ ᐊᐦᑯᓇᐠ ᑲᑭᐃᔑᐊᔭᒥᐦᐃᑯᔭᐸᐣ.

ᐁᑲᐧ ᐊᓂᐣ ᑫᑐᑕᒪᐣ ᑲᐧᔭᒋᔭᐣ 

• ᑲᐧᔭᐠ ᒋᓂᓯᑐᑕᑲᐧᒥᑐᔭᐣ ᑭᑎᔑᓭᐃᐧᐣ ᒥᓇ ᑭᑎᐸᒋᒧᐃᐧᐣ ᑭᐡᐱᐣ ᓇᑕᐁᐧᐣᑕᒪᐣ ᒋᔭᓄᑲᑌᐠ.
• ᐁᑲᐧ ᒋᓇᓇᑲᒋᑐᔭᐣ ᓂᑭᐦᑭᓄᐦᐊᒪᑫᐃᐧ ᐃᐧᑕᒪᑫᐃᐧᓂᓇᐣ ᒥᐡᑯᐨ ᒋᐊᐧᐸᑕᒪᐣ ᑭᐡᐱᐣ ᐊᔕᔾ ᑲᑭᔭᓄᑲᑕᒪᑭᐣ ᑲᒪᒥᑎᓀᐣᑕᒥᐦᐃᑯᔭᐣ ᑫᑯᓇᐣ. 
• ᐁᑲᐧ ᒥᓇ ᐱᓇᒪ ᑫᒋᓇᐨ ᑭᐡᐱᐣ ᑲᑭᓇ ᑯᑕᑭᔭᐣ ᑫᑯᓇᐣ ᑲᔭᐸᒋᑐᐊᐧᓀᐣ ᑐᑲᐣ ᓇᐱ ᓇᓇᑲᒋᒋᑫᐃᐧᐣ ᒥᓇ ᑎᐸᒋᒧᐃᐧ ᐊᐸᒋᒋᑲᓇᐣ.
• ᒥᓇ ᒋᒪᐊᐧᑐᓂᑲᑌᐠ ᑲᑭᓇ ᑲᒥᓇᐧᔑᐠ ᐃᐧᑕᒪᑫᐃᐧᐣ, ᐊᐦᐃᐣ ᑲᔦ ᑯᑕᑭᔭᐣ ᐊᔕᔾ ᐃᔑᒋᑫᐃᐧᓇᐣ ᑲᑭᐊᐸᒋᑐᔭᐸᓂᐣ.
• ᐁᑲᐧ ᓇᓇᑲᒋᑐᐣ ᐅᐁᐧ ᐃᐧᑕᒪᑫᐃᐧᐣ ᑐᑲᐣ ᐊᓂᐣ ᑫᐃᔑᐃᐧᒋᐦᐃᐁᐧᔭᐠ ᒪᑯᐁᐧᐱᓂᑲᐣ ᑫᒋᓇᐨ ᒋᔭᓄᑲᑕᒪᐠ ᑭᑎᔑᓭᐃᐧᐣ ᒥᓇ ᑭᑎᐸᒋᒧᐃᐧᐣ.

ᓂᔑᐣ 2—ᐅᑕᐱᓂᑫᐃᐧᐣ (ᒥᓂᑯᐠ ᓂᔭᓄᔕᐳᑭᔑᑲᐣ (15))

ᐁᑲᐧ ᑯᑕᐠ ᑫᑐᑕᒪᐣ ᒋᐱᑭᑐᔭᐣ ᐅᒪ ᓂᑕᓄᑭᑕᒪᑫᐃᐧᑲᒥᑯᓇᐣ ᐁᑲᐧ ᐃᒋᑲᑌ ᐅᑕᐱᓂᑫᐃᐧᐣ.

ᐁᑲᐧ ᐅᐁᐧ ᒣᑲᐧᐨ ᑲᑐᒋᑲᑌᐠ ᐅᑕᐱᓂᑫᐃᐧ ᐊᓄᑭᓇᑲᐣ ᐅᑲᒪᐊᐧᑐᓇᐣ ᑭᑭᑫᓂᒥᑯᐃᐧᐣ ᑐᑲᐣ ᑭᐃᐧᓱᐃᐧᐣ, ᑫᐃᔑᑲᓄᓂᑯᔭᐣ, ᐁᑲᐧ ᑭᑲᑫᐧᑌᐃᐧᐣ ᒥᓇ ᑲᒪᒥᑎᓀᐣᑕᒥᐦᐃᑯᔭᐣ. ᐁᑲᐧ ᐊᐱᐣ ᐅᐊᐧᐁᐧ ᐊᓄᑭᓇᑲᐣ ᑲᔭᓂᒧᑕᒪᐠ ᑭᑎᔑᓭᐃᐧᐣ ᒥᐡᑯᐨ ᐅᒪ ᒋᐅᒋᑭᑫᐣᑕᐠ ᑭᐡᐱᐣ ᐱᑎᑫᓭᑫᐧᐣ ᐅᐁᐧ ᑭᑎᔑᓭᐃᐧᐣ ᐅᒪ ᓂᐸᑯᓭᓂᒥᑯᐃᐧᓇᐠ. ᐁᑲᐧ ᐅᐁᐧ ᒣᑲᐧᐨ, ᐅᐊᐧᐁᐧ ᐊᓄᑭᓇᑲᐣ ᐅᑲᓇᓇᑲᒋᑐᐣ ᑫᑯᓀᓇᐣ ᑫᑐᒋᑲᑌᑭᐣ ᐁᑲᐧ ᓇᐣᑕ ᑭᔭᐱᐨ ᓇᐦᑫ ᑫᑯᓇᐣ ᑲᓇᑐᑕᒪᐠ. ᐁᑲᐧ ᒪᐊᐧᐨ ᑲᑭᒋᔑᓭᑭᐣ ᑫᑯᓇᐣ, ᐊᒥᐁᐧ ᑫᐃᔑᓭᐠ ᐊᐱᐣ ᔐᒪᐠ ᒋᔭᓄᑲᑕᒪᑭᐣ. ᐁᑲᐧ ᒥᔑᐣ ᐃᔑᓭᐃᐧᓇᐣ, ᐅᐊᐧᐁᐧ ᐅᑕᐱᓂᑫᐃᐧ ᐊᓄᑭᓇᑲᐣ ᑲᑭᒥᓂᐠ ᐃᐧᑕᒪᑫᐃᐧᐣ ᐁᑲᐧ ᐃᐧᒋᐦᐃᐁᐧᐃᐧ ᐊᐸᒋᒋᑲᓇᐣ ᑫᔭᐸᒋᑐᔭᐣ ᐊᓄᑲᑕᒪᐣ ᑫᑯᓇᐣ ᑲᒪᒥᑎᓀᐣᑕᒥᐦᐃᑯᔭᐣ.

ᐁᑲᐧ ᑫᑲᐟ ᑲᑭᓇ ᐃᔑᓭᐃᐧᓇᐣ ᑲᐧᔭᐠ ᓂᓴᑲᑭᓇᒥᓇᐣ ᒣᑲᐧᐨ ᐅᐁᐧ ᓂᔭᓄᔕᐳᑭᔑᑲᐣ (15) ᑲᐱᒥᓭᐠ.

ᓂᐦᓯᐣ 3—ᑎᐸᒋᒧᐃᐧᐣ ᓇᓇᑲᑕᐁᐧᐣᑕᒧᐃᐧᐣ ᓇᐣᑕ ᓇᓇᑲᒋᒋᑫᐃᐧᐣ

ᐁᑲᐧ ᐅᐁᐧ ᒣᑲᐧᐨ ᐊᑎᐟ ᐃᔑᓭᐃᐧᓇᐣ ᑕᐃᔓᒋᑲᑌᐊᐧᐣ ᑎᐸᒋᒧᐃᐧᐣ ᓇᓇᑲᑕᐁᐧᐣᑕᒧᐃᐧᓂᐠ. ᐁᑲᐧ ᑯᑕᑭᔭᐣ ᐃᔑᓭᐃᐧᓇᐣ ᐊᐦᐃᐠ ᔐᒪᐠ ᑲᐃᔓᒋᑲᑌᐊᐧᐣ ᓇᓇᑲᒋᒋᑫᐃᐧᓂᐠ ᓇᐣᑕ ᑎᐸᒋᒧᐃᐧᐣ ᓇᓇᑲᑕᐁᐧᐣᑕᒧᐃᐧᓂᐠ ᐊᐱᐣ ᒋᓇᓇᑲᒋᒋᑲᑌᑭᐣ. ᐁᑲᐧ ᔕᑯᐨ ᐊᐦᐃ ᑕᑲᓇᐊᐧᐸᒋᑲᑌ ᑲᐃᔑᓇᑲᐧᐠ ᑭᑎᔑᓭᐃᐧᐣ ᑲᔭᓂᒧᑕᒪᐣ.

ᐁᑲᐧ ᐊᐱᐣ ᓇᑐᑕᒪᐣ ᑎᐸᒋᒧᐃᐧᐣ ᓇᓇᑲᑕᐁᐧᐣᑕᒧᐃᐧᐣ ᓇᐣᑕ ᓇᓇᑲᒋᒋᑫᐃᐧᐣ, ᑲᐸᑯᓭᓂᒥᑯ ᒋᒪᓯᓇᐦᐊᒪᐣ ᐯᐸᐣ ᐁᐸᑭᑎᓂᔑᔭᐠ ᑭᔭᑦ ᑯᑕᑭᔭᐠ ᐊᐃᐧᔭᐠ ᒋᑲᓄᓇᔭᐠ ᐅᐁᐧ ᑲᐃᓇᓄᑭᐊᐧᐨ ᒥᐡᑯᐨ ᑫᒋᓇᐨ ᑲᐧᔭᐠ ᐃᐧᑕᒪᑫᐃᐧᓇᐣ ᒋᔭᐸᒋᑐᔭᑭᐣ. ᐁᑲᐧ ᑭᐡᐱᐣ ᐁᑲ ᒪᓯᓇᐦᐊᒪᐣ ᐯᐸᐣ ᑐᑲᐣ ᐁᑲ ᐁᐸᑭᑎᓂᔑᔭᐠ, ᓂᑲᑭᑌᐣᑕᒪᐣ ᑭᐸᑯᓭᓂᒧᐃᐧᓇᐣ ᐁᑲᐧ ᑭᔭᑦ ᓂᑲᑭᐸᐦᐊᒥᐣ ᐅᐁᐧ ᑭᑎᐸᒋᒧᐃᐧᐣ. ᑲᐧᓂᐣ ᓂᑲᑭᓇᓇᑲᒋᒋᑫᓯᒥᐣ ᐸᓂᒪ ᐁᑕ ᐸᑭᑎᓂᔑᔭᐠ ᐅᐁᐧ ᓂᑲᑭᑐᑕᒥᐣ.

ᑎᐸᒋᒧᐃᐧᐣ ᓇᓇᑲᑕᐁᐧᐣᑕᒧᐃᐧᐣ (ᒥᓂᑯᐠ ᓂᐦᓱᒥᑕᓇᐁᐧᑭᔑᑲᐣ (30))

ᐁᑲᐧ ᑭᐡᐱᐣ ᐁᑲ ᐃᐧᐸᐨ ᐁᑭᒥᑫᐧᔭᐠ ᐃᐧᑕᒪᑫᐃᐧᐣ ᒥᓇ ᐃᐧᒋᐦᐃᐁᐧᐃᐧᓇᐣ ᑲᓇᑕᐁᐧᐣᑕᒪᓂᐣ ᓇᐣᑕ ᐃᐧᒋᐦᐃᐁᐧᐃᐧᐣ ᑲᐸᑯᓭᐣᑕᑲᐧᐠ, ᓇᐣᑕ ᑕᐃᔑᓭ ᑭᔭᐱᐨ ᐊᐊᐧᔑᒣ ᒋᓇᓇᑕᐁᐧᐣᒋᑲᑌᐠ. ᐁᑲᐧ ᐅᐊᐧᐁᐧ ᐯᔑᐠ ᐊᓄᑭᓇᑲᐣ ᑲᐱᑲᓄᓂᐠ ᒥᓂᑯᐠ ᓂᔭᓄᑭᔑᑲᐣ (5) ᒋᔭᓂᒧᑕᒪᐃᐧᐠ ᐊᐊᐧᔑᒣ ᑭᑎᔑᓭᐃᐧᐣ. ᐁᑲᐧ ᑲᐃᐧ ᒥᓂᓂᑲᑌᐠ ᐃᔑᓭᐃᐧᐣ ᑫᒋᓇᐨ ᓂᐦᓱᒥᑕᓇᐁᐧᑭᔑᑲᐣ (30) ᒪᒪᐤ ᐱᒪᓄᑲᑌ.

ᓇᓇᑲᒋᒋᑫᐃᐧᐣ (ᒥᓂᑯᐠ ᓂᑯᑕᐧᓱᒥᑕᓇᐁᐧᑭᔑᑲᐣ (60))

ᐁᑲᐧ ᒪᐊᐧᐨ ᑭᒋᔑᓭᐃᐧᓇᐣ ᒥᓇ ᒪᒥᑎᓀᐣᑕᒥᐦᐃᐁᐧᐃᐧᓇᐣ ᓇᓇᑲ ᐃᔑᑲᓇᐊᐧᐸᒋᑲᑌᐊᐧᐣ. ᐁᑲᐧ ᐅᐊᐧᐁᐧ ᐯᔑᐠ ᐅᓇᓇᑲᒋᒋᑫ ᑲᐱᑲᓄᓂᐠ ᒥᓂᑯᐠ ᓂᔭᓄᑭᔑᑲᐣ (5) ᒋᔭᓂᒧᑕᒪᐃᐧᐠ ᐊᐊᐧᔑᒣ ᑭᑎᔑᓭᐃᐧᐣ. ᐁᑲᐧ ᐊᐦᑯ ᐊᔕᔾ ᓂᑭᔑᓇᓇᑲᒋᒋᑫᒥᐣ ᒥᓂᑯᐠ ᓂᑯᑕᐧᓱᒥᑕᓇᐁᐧᑭᔑᑲᐣ (60)).

ᐃᐧᒋᐦᐃᐁᐧᐃᐧ ᐊᐸᒋᒋᑲᓇᐣ

ᐁᑲᐧ ᐅᒪ ᒥᓇ ᓂᑭᐦᑭᓄᐦᐊᒪᑫᐃᐧ ᐃᐧᑕᒪᑫᐃᐧᓂᓇᐣ, ᑭᔭᐱᐨ ᑯᑕᑭᔭᐣ ᐃᐧᒋᐦᐃᐁᐧᐃ ᐊᐸᒋᒋᑲᓇᐣ ᓂᑕᔭᒥᓇᐣ ᒋᐃᐧᒋᐦᐃᑯᔭᐣ ᒥᓇ ᒋᑭᑫᐣᑕᒪᐣ ᓂᑕᓄᑭᑕᒪᑫᐃᐧᑲᒥᑯᓇᐣ ᐁᑲᐧ ᐊᓂᐣ ᒥᓇ ᑫᑭᐃᔑᐃᐧᒋᐦᐃᐁᐧᔭᐠ.

ᑭᐦᑭᓇᐧᒋᒋᑫᐃᐧ ᐃᔑᓭᐃᐧᓇᐣ

ᐁᑲᐧ ᑭᐦᑭᓇᐧᒋᒋᑫᐃᐧ ᐃᔑᓭᐃᐧᓇᐣ ᐃᐧᒋᐦᐃᐁᐧᒪᑲᐣ ᒥᓇ ᐃᐧᑕᒪᑫᒪᑲᐣ ᐊᓂᐣ ᐁᐃᔑᓭᐠ ᑲᐱᑯᓄᓂᔑᔭᐠ ᓂᑕᓄᑭᑕᒪᑫᐃᐧᑲᒥᑯᓇᐣ ᐃᐧᒋᐦᐃᐁᐧᐃᐧᐣ ᑲᐱᓇᑕᐁᐧᐣᑕᒪᐣ.

ᒪᓯᓇᑌᐢᒋᑲᓂᔭᐱᐣ